ពេទ្យជនជាតិជប៉ុនដែលស្ថិតនៅក្នុងទីក្រុងវូហាន ប្រទេសចិន បានបង្ហើបឱ្យដឹងថា ចំនួនអ្នកឆ្លងមេ រោគ វីរុសកូរ៉ូណា មានច្រើនជាងក្នុងរបាយការណ៍ទៅទៀត ដោយសារតែភាពយឺតយ៉ាវក្នុងការបង្ហាញព័ត៌មានរបស់រដ្ឋបាលចិន។
ស្ថានីយទូរទស្សន៍ NHK របស់ជប៉ុនបានឆ្លើយឆ្លងតាមទូរស័ព្ទជាមួយគ្រូពេទ្យហ្វឹកហាត់ជនជាតិជប៉ុនម្នាក់ដែលកំពុងស្ថិតនៅក្នុងទីក្រុងវូហាន និងសុំមិនបញ្ចេញឈ្មោះបានរៀបរាប់ថា៖ “មនុស្សម្នានៅទីនោះមិនសូវជាភ្ញាក់ផ្អើលប៉ុន្មានទេក្នុងរយៈដំបូងៗ ខ្ញុំគិតថាគ្មាននរណានឹកស្មានដល់ថា វានឹងឆ្លងរាលដាលឆាប់រហ័សបែបនេះ”។
ពេទ្យហ្វឹកហាត់ជនជាតិជប៉ុនរូបនោះបានប៉ាន់ស្មានថា ចំនួនអ្នកឆ្លងមេរោគ អាចនឹងខ្ពស់ជាងនៅក្នុងរបាយការណ៍ច្រើនណាស់ ដោយលោកបានបញ្ជាក់ថា អំឡុងប្រហែលជាថ្ងៃទី 3មករា រូបលោកបានទទួលដំណឹងថា បុគ្គលិកមន្ទីរពេទ្យអាចនឹងឆ្លងមេរោគនេះ តែសារព័ត៌មានចិនប្រើពេលវេលាច្រើនជាង 2សប្ដាហ៍ ទើបរាយការណ៍ថា បុគ្គលិកពេទ្យទាំងនោះបានឆ្លងមេរោគវីរុសកូរ៉ូណាប្រភេទថ្មី។
អភិបាលក្រុង វូហាន៖ ត្រូវរង់ចាំការអនុម័តសិន ទើបអាចផ្សាយព័ត៌មានបាន
រដ្ឋបាលក្រុងវូហាន ត្រូវរងការរិះគន់យ៉ាងខ្លាំង រឿងការលាក់បាំងព័ត៌មាន រហូតធ្វើឱ្យការឆ្លងរីករាលដាលសាយភាយធ្ងន់ធ្ងរ រហូតពិបាកក្នុងការទប់ស្កាត់ ជាពិសេសក្នុងអំឡុងពេលចូលឆ្នាំចិន ដែលជនជាតិចិនរាប់លាននាក់ធ្វើដំណើរទាំងក្នុងប្រទេស និងក្រៅប្រទេស។
លោក ចូ សៀនវ៉ាង អភិបាលក្រុងវូហាន បានទទួលស្គាល់ថា ការបញ្ចេញព័ត៌មានមានការយឺតយ៉ាវមែន ព្រោះត្រូវទទួលបានការអនុញ្ញាតពីថ្នាក់លើ គឺមណ្ឌលហ៊ូពើយ និងគណៈកម្មការសុខាភិបាលជាតិចិន ជាមុនសិន ទើបអាចបញ្ចេញព័ត៌មានបាន។
លោកអភិបាលក្រុងវូហាន ក៏បានទទួលស្គាល់ដែរថា មុនមានវិធានការបិទទីក្រុងវូហាននេះ មានអ្នកធ្វើដំណើរចេញពីទីក្រុងនេះច្រើនជាង 5លាននាក់។ លោកបានឱ្យដឹងទៀតថា លោកដឹងច្បាស់ពីការមិនពេញចិត្តរបស់ប្រជាជន តែវិធានការផ្សេងៗ ចាំបាច់ត្រូវតែប្រើ ដើម្បីទប់ស្កាត់ និងគ្រប់គ្រង។
អ្នកជំនាញការបង្ហាញថា មិនមានអាការរោគ ក៏ចម្លងមេរោគបានដែរ
អ្នកជំនាញការជនជាតិជប៉ុនបាននិយាយថា ការគ្រប់គ្រងការចម្លងរោគ និងការការពារ ពិបាកនឹងធ្វើបានណាស់សម្រាប់វីរុសកូរ៉ូណាប្រភេទថ្មីនេះ។ ការចម្លងមេរោគអាចកើតឡើងបាន ខណៈដែលអ្នកផ្ទុកមេរោគមិនទាន់បង្ហាញរោគសញ្ញា។
លោកសាស្ត្រាចារ្យ មីតស៊ីអូ ខាកូ នៃមហាវិទ្យាល័យវេជ្ជសាស្ត្រ និងឱសថសាស្ត្រ ថូហូកូ បានរៀបរាប់ថា ចំនួនអ្នកជំងឺនៅក្នុងប្រទេសចិនបានកើនច្រើនឡើងជាបន្តបន្ទាប់ ទោះជាមានការគ្រប់គ្រងការធ្វើដំណើរក្នុងទីក្រុងវូហាន និងកន្លែងផ្សេងៗក្នុងប្រទេសចិនក៏ដោយ។ លោកបានបន្តទៀតថា រដ្ឋបាលចិនមានអារម្មណ៍ដឹងអំពីភាពប្រញាប់ប្រញាល់ខ្លាំងឡើង ដោយសារតែមនុស្សដែលជាភ្នាក់ងារចម្លងមេរោគនេះ អាចនឹងសាយភាយវីរុសនេះបាន ទោះជាក្នុងអំឡុងពេលដែលមិនមានបង្ហាញអាការរោគក៏ដោយ។
វីរុសកូរ៉ូណាប្រភេទថ្មីនេះ ខុសប្លែកពីប្រភេទដែលបង្កឱ្យកើតការសាយភាយរាតត្បាតរបស់ជំងឺខាងប្រព័ន្ធដកដង្ហើមទាន់ហន់ និងធ្ងន់ធ្ងរ ឬសារស៍ និងរោគខាងផ្លូវដង្ហើមមជ្ឈិមបូព៌ា ឬជំងឺមើស ព្រោះថា អ្នកដែលឆ្លងមេរោគវីរុសជំងឺសារស៍ និងមើស នឹងមិនសាយភាយ ឬចម្លងទៅបុគ្គលដទៃឡើយ ខណៈដែលខ្លួនឯងនៅមិនទាន់មានអាការរោគ ដូចជាក្អក ឬហៀរសំបោរ ជាដើមនោះ។
លោកសាស្ត្រចារ្យ ខាកូ បានដាស់តឿនថា អ្នកដែលមានជំងឺរ៉ាំរ៉ៃ អាចនឹងមានអាការធ្ងន់ធ្ងរ បើបានទទួលមេរោគវីរុសកូរ៉ូណាប្រភេទថ្មីនេះ លោកព្រមទាំងបានដាស់តឿនទៀតថា ចូរព្យាយាមចៀសវាងកុំឱ្យបានទទួលវីរុសនេះឱ្យសោះ ទោះជាតិចតួចក៏ដោយ ព្រោះវាជាមេរោគប្រភេទថ្មីដែលមនុស្សមិនធ្លាប់ស្គាល់ និងមិនមានបទពិសោធពីមុនមក៕
ប្រភព៖ សារព័ត៌មានបរទេស
គិតមកដល់ព្រឹកថ្ងៃទី27 មករានេះ តំបន់ Wuhan មានអ្នកជំងឺដល់ទៅ 533នាក់ ត្រូវបានគេបញ្ជាក់ថា មានផ្ទុកជំងឺរលាកសួតថ្មី Corona។ ខេត្ត Hebei នៃប្រទេសចិន មានអ្នកជំងឺរលាកសួតជាងពាក់កណ្ដាលក្នុងចំណោមអ្នកជំងឺជាង 2,700នាក់នៅប្រទេសចិន នេះបើតាមគេហទំព័រ CNBC។
ទីភ្នាក់ងារសារព័ត៌មាន Nytimes បានដកស្រង់សម្ដីលោកអភិបាលក្រុង Wuhan លោក Zhou Xianwang ឱ្យដឹងថា មុនការដាក់បម្រាមគោចរ មានមនុស្សចំនួនប្រមាណជា 5លាននាក់បានចាកចេញពីទីក្រុង Wuhan ទៅកាន់តំបន់ផ្សេងៗក្នុងពិភពលោក។
បើតាមគេហទំព័រដែលមានឈ្មោះថា “ថ្មីៗ” បានសរសេរថា លោក ជា អូន អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលកម្ពុជា បានឱ្យដឹងថា បច្ចុប្បន្នមានជនជាតិចិនដែលមកពីទីក្រុងវូហានចំនួនជាង 3,000នាក់បានស្នាក់នៅក្នុងប្រទេសកម្ពុជា ដោយពួកគេបានធ្វើដំណើរមកដល់កម្ពុជាតាំងពីថ្ងៃទី23 មករាកន្លងទៅ៕
គិលានុបដ្ឋាយិកាម្នាក់ដែលមានផ្ទៃពោះ 7ខែ នៅតែត្រូវទៅកាន់មន្ទីរពេទ្យ ដើម្បីថែទាំអ្នកជំងឺ ហើយចុងក្រោយគិលានុបដ្ឋាយិកាម្នាក់នេះក៏បានឆ្លងមេរោគ Corona។ ម្ដាយដែលមានវ័យ 70ឆ្នាំរបស់គិលានុបដ្ឋាយិកាម្នាក់នេះក៏ឆ្លងមេរោគ Corona ពីនាងដែរ។
Helen ធ្វើការនៅតំបន់ដែលមានអ្នកជំងឺដែលគេសង្ស័យថា មានផ្ទុកមេរោគ Corona ក្នុងមន្ទីរពេទ្យស៊ាងហៃ ប្រទេសចិន មានឱកាសហូបមីតែ 1ចានគត់ក្នុងរយៈពេល 1ថ្ងៃដែលនាងប្រចាំការ ហើយនាងក៏មិនបានគេង ឬសម្រាកដែរ ដោយសារតែខ្វះបុគ្គលិក។ ចំណែកប្ដី និងកូនរបស់នាង បានចាកចេញទៅស្រុកកំណើតបាត់ទៅហើយ។
មន្ទីរពេទ្យភាគច្រើនដែលនៅជុំវិញក្រុង Wuhan ត្រូវប្រឈមនឹងភាពតានតឹង និងសម្ពាធការងារដ៏ធ្ងន់ធ្ងរ រួមនឹងហានិភ័យនៃការឆ្លងមេរោគ ព្រមទាំងកង្វះខាតគ្រប់បែបយ៉ាង។ មន្ទីរពេទ្យធំៗ នៅតំបន់នោះ ពោរពេញដោយអ្នកជំងឺ ហើយសម្ភារវេជ្ជសាស្ត្រ ឯគ្រែសម្រាប់អ្នកជំងឺក៏ខ្វះខាត។ ចំណែកបុគ្គលិកពេទ្យវិញ ក៏មិនមានចំនួនច្រើនគ្រប់គ្រាន់ដើម្បីទប់ទល់នឹងការកើនឡើងនៃអ្នកជំងឺ ជាហេតុធ្វើឱ្យពួកគេម្នាក់ៗ ត្រូវបាក់កម្លាំង។ មនុស្សជាច្រើនដែលសង្ស័យថា មានផ្ទុកមេរោគ Corona ប៉ុន្តែត្រូវបានគេបដិសេធមិនទទួលការពិនិត្យ និងព្យាបាល ព្រោះពេទ្យគ្មានកន្លែងសម្រាប់អ្នកជំងឺថ្មី។
ជាងនេះទៅទៀត បុគ្គលិកពេទ្យជាច្រើនត្រូវបានគេរើសអើងជាទីបំផុត ទាក់ទិននឹងអាហារការហូបចុក និងបញ្ហាផ្សេងៗជាច្រើនទៀត។ ក្រុមហ៊ុនផ្គត់ផ្គង់អាហារជាច្រើន បានបដិសេធការបញ្ជាទិញពីក្រុមគ្រូពេទ្យដែលកំពុងធ្វើការនៅក្នុងបណ្ដាមន្ទីរពេទ្យដែលមានអ្នកជំងឺរលាកសួត ព្រោះតែភ័យខ្លាចឆ្លងមេរោគ Corona។
គ្រូពេទ្យយ៉ាងតិច 5នាក់ នៅទីក្រុង Huanggang ក្បែរតំបន់ Wuhan ក៏បានឆ្លងមេរោគ Corona នេះដែរ។ វេជ្ជបណ្ឌិត Jiang Jijun បានបាត់បង់ជីវិតក្នុងអំឡុងពេលព្យាបាលអ្នកជំងឺរលាកសួត។ ចំណែកវេជ្ជបណ្ឌិត Liang Wudong អាយុ 62ឆ្នាំ ក៏បានស្លាប់បន្ទាប់ពីបានឆ្លងមេរោគ Corona អស់រយៈពេល 9ថ្ងៃ៕
ទន្ទឹមនិងនេះ អាជ្ញាធរនៃតំបន់ផ្សេងៗមួយចំនួនទៀតក៏បានចេញបទបញ្ជាប្រហាក់ប្រហែលគ្នានេះដែរ។ អាជ្ញាធរខេត្ត Shandong និង Shanxi ក៏បានហាមបុគ្គលិកបម្រើការឱ្យក្រុមហ៊ុនទាំងឡាយក្នុងខេត្តទាំងពីរនេះ ត្រឡប់មកធ្វើការវិញ ដោយរង់ចាំបទបញ្ជាថ្មី។
ចំណែកនៅឯក្រុង Wuhan វិញ អាជ្ញាធរបានសម្រេចចិត្តដាក់បម្រាមគោចរ ហើយមធ្យោបាយធ្វើដំណើរសាធារណៈភាគច្រើនត្រូវផ្អាកដំណើរការ។ រីឯក្រុមហ៊ុនផលិតរថយន្តនានាវិញ ក៏ត្រូវកែសម្រួលសង្វាក់ផលិតកម្ម ដើម្បីសម្របខ្លួនទៅនឹងបម្រាមគោចរនេះផងដែរ៕
នៅពេលមានរបាយការណ៍ថ្មី ផែនទីនេះនឹងធ្វើបច្ចុប្បន្នភាពអំពីចំនួនករណីឆ្លង និងករណីស្លាប់ រួមនិងអ្នកជម្ងឺដែលបានជាសះស្បើយ ទៅតាមពេលវេលាជាក់ស្ដែង (Real Time)។ ចំនុចក្រហមគឺបង្ហាញពីទីកន្លែងដែលមានអ្នកឆ្លងរោគ។ ទំហំនៃចំនុចក្រហម គឺស្មើនឹងចំនួនអ្នកឆ្លងមេរោគ។ នៅពេលចុចទៅលើចំនុចក្រហម វានឹងបង្ហាញព័ត៌មាននៃតំបន់ ពេលវេលានៃការធ្វើបច្ចុប្បន្នភាព និងប្រភពព័ត៌មាន។ នៅផ្នែកខាងលើ ជ្រុងខាងឆ្វេង គឺជាមុខងារពង្រីក និងបង្រួមទីតាំង ដើម្បីងាយស្រួលក្នុងការពិនិត្យមើលទិន្នន័យ។
នៅប្រទេសចិន យ៉ាងហោចណាស់មានមនុស្សជាង33លាននាក់ រងផលប៉ះពាល់ពីអាសន្នរោគនេះ បន្ទាប់ពីវាបានឆ្លងរាលដាលខ្លាំងនាំឱ្យអាជ្ញាធរចេញបម្រាមគោចរនៅទីក្រុង Wuhan និងបណ្ដាទីក្រុងជាច្រើនផ្សេងទៀតដែលនៅក្បែរៗតំបន់ Wuhan នេះគឺមិនទាន់និយាយដល់ផលប៉ះពាល់ទៅលើប្រជាជននៃបណ្ដាប្រទេសក្នុងពិភពលោក។
Candice Qin បាននិយាយថា “យើងខ្ញុំគិតថា នេះជាសម្ពាធដ៏ធ្ងន់មួយ ដែលក្រុមគ្រូពេទ្យនៅតំបន់ Wuhan កំពុងទទួលរង។ យើងខ្ញុំយល់អំពីការព្រួយបារម្ភរបស់អ្នកជំងឺ ប៉ុន្តែយើងត្រូវដឹងថា គ្រូពេទ្យក៏ជាមនុស្សដែរ”៕
បច្ចុប្បន្ន ក្រុង Da Nang មិនទាន់មានករណីឆ្លងមេរោគរលាកសួតថ្មី Corona nCoV នៅឡើយ ប៉ុន្តែ ប៉ុន្មានថ្ងៃមុន អាជ្ញាធរក្រុង Da Nang ក៏ធ្លាប់បានរកឃើញភ្ញៀវទេសចរ 2នាក់ដែលមានកម្ដៅខ្លួនខ្ពស់ ទើបបញ្ជូនទៅកាន់មន្ទីរពេទ្យ ប៉ុន្តែ សំណាងល្អ ពួកគេមិនបានឆ្លងមេរោគដ៏សាហាវនេះទេ៕
ក្រៅពីចិន ដែលជាប្រទេសរងគ្រោះដំបូងគេ បច្ចុប្បន្ន មេរោគនេះបានឆ្លងទៅដល់ប្រទេស និងកោះចំនួន 12ផ្សេងទៀត រួមមានប្រទេសថៃ អូស្ត្រាលី បារាំង ជប៉ុន ម៉ាឡេស៊ី សិង្ហបុរី កោះតៃវ៉ាន់ អាមេរិក វៀតណាម កូរ៉េខាងត្បូង និងប្រទេសនេប៉ាល ហើយថ្មីៗនេះ ប្រទេសកាណាដាក៏បានប្រកាសថា មានករណីឆ្លងមេរោគ corona នេះជាករណីទី1 ដែរ ដែលជនរងគ្រោះជាពលរដ្ឋទើបត្រឡប់មកពីទីក្រុង Wuhan ប្រទេសចិន។
សូមរំឭកថា រោគសញ្ញានៃជម្ងឺរលាកសួតដែលបង្កដោយមេរោគ corona នេះ រួមមានដូចជា ក្ដៅខ្លួនខ្លាំង ពិបាកដកដង្ហើម និងក្អក។ បច្ចុប្បន្ន គេមិនទាន់បង្កើតបានថ្នាំ ឬវ៉ាក់សាំងណាមួយសម្រាប់ទប់ទល់នឹងមេរោគនេះនៅឡើយទេ ប៉ុន្តែ ក្រុមអ្នកវិទ្យាសាស្ត្រនៃបណ្ដាប្រទេសក្នុងលោក កំពុងដុតដៃដុតជើងក្នុងការរកវិធីប្រឆាំងនឹងជំងឺដ៏គ្រោះថ្នាក់នេះ៕