អាសន្នរោគ - La Reine Media

មនុស្សជាង784,000នាក់បានឆ្លងវីរុសCOVID-19 នៅទូទាំងពិភពលោក

COVID-19 នៅតែបន្តឆ្លងរាលដាលខ្លាំងនៅទូទាំងពិភពលោក ពិសេសគឺអឺរ៉ុប និងសហរដ្ឋអាមេរិក ធ្វើឱ្យតួលេខនៃករណីឆ្លងសរុបឡើងដល់ជិត800,000នាក់ ក្នុងនោះមានជិត38,000នាក់បានបាត់បង់ជីវិត។

ពិភពលោកទាំងមូល មានអ្នកឆ្លងមេរោគCOVID-19 ចំនួន784,314ករណី និងស្លាប់ចំនួន37,638ករណី។ ទ្វីបអឺរ៉ុបមានអ្នកស្លាប់26,674ករណី គឺប្រមាណជា2/3 នៃអ្នកស្លាប់សរុប។ អ៊ីតាលីគឺជាប្រទេសដែលមានអ្នកស្លាប់ច្រើនជាងគេបង្អស់ក្នុងពិភពលោក។

សហរដ្ឋអាមេរិក៖ ប្រទេសនេះបានរកឃើញអ្នកជំងឺកូរ៉ូណាថ្មី 18,089ករណី និងស្លាប់412ករណីបន្ថែមទៀត ធ្វើឱ្យអ្នកជំងឺសរុបឡើងដល់163,807ករណី និងស្លាប់ឡើងដល់3,008ករណី។ ប្រទេសនេះ នៅតែបន្តជាសម្បុកមេរោគធំជាងគេក្នុងពិភពលោក។

អ៊ីតាលី៖ ប្រទេសនេះទើបបានរកឃើញអ្នកជំងឺថ្មី4,050ករណី និងស្លាប់812ករណីបន្ថែមទៀត។ ចំនួនអ្នកជំងឺសរុប101,739នាក់ និងស្លាប់សរុប11,591នាក់។ អត្រានៃការស្លាប់ដោយសារCOVID-19 នៅអ៊ីតាលី ជិតស្មើនឹង11.4% គឺខ្ពស់ជាងទ្វេដងបើធៀបនឹងអត្រានៃការស្លាប់ដោយសារវីរុសកូរ៉ូណានៅទូទាំងពិភពលោក។

អេស្ប៉ាញ៖ អ្នកជំងឺថ្មី7,846នាក់ អ្នកជំងឺសរុប87,956 នាក់ អ្នកស្លាប់ថ្មី913នាក់ អ្នកស្លាប់សរុប7,716នាក់។ តួលេខនេះបានធ្វើឱ្យអេស្ប៉ាញលោតរលងប្រទេសចិន ដើម្បីក្លាយជាសម្បុកមេរោគធំបំផុតទី3ក្នុងពិភពលោក។

អាល្លឺម៉ង់៖ អ្នកជំងឺថ្មី4,450នាក់ និងជំងឺសរុប66,885នាក់ អ្នកស្លាប់ថ្មី104នាក់ អ្នកស្លាប់សរុប645នាក់។ ប្រទេសនេះគឺជាសម្បុកមេរោគធំទី3នៅអឺរ៉ុប បន្ទាប់ពីអ៊ីតាលី និងអេស្ប៉ាញ។

អ៊ីរ៉ង់៖ ប្រទេសនេះបន្តជាសម្បុកមេរោគធំជាងគេលំដាប់ទី2នៅអាស៊ី ដោយមានអ្នកជំងឺថ្មី3,186នាក់ អ្នកជំងឺសរុប41,495នាក់ អ្នកស្លាប់ថ្មី117នាក់ និងអ្នកស្លាប់សរុប2,757នាក់។

ប្រទេសចិន និងកូរ៉េខាងត្បូង មិនទាន់ប្រកាសអំពីតួលេខពាក់ព័ន្ធនឹងវីរុសកូរ៉ូណានេះនៅឡើយ ប៉ុន្តែ តួលេខចុងក្រោយរបស់ចិនបង្ហាញថា មានអ្នកជំងឺសរុប81,518ករណី និងស្លាប់សរុប3,305ករណី។ ចំណែកប្រទេសកូរ៉េខាងត្បូងវិញ មានអ្នកជំងឺសរុបមាន9.661នាក់ និងអ្នកស្លាប់សរុប158នាក់។

តំបន់អាស៊ីអាគ្នេយ៍៖ ម៉ាឡេស៊ីជាសម្បុកមេរោគធំទី1ក្នុងតំបន់នេះ ដោយមានអ្នកជំងឺសរុប2,626នាក់ និងស្លាប់សរុប37នាក់។ ចំណែកឥណ្ឌូនេស៊ីវិញ បានក្លាយជា ”វាលពិឃាត” របស់ COVID-19 ធំបំផុតនៅក្នុងតំបន់នេះ ដោយមានអ្នកស្លាប់សរុប122នាក់ ក្នុងចំណោមអ្នកជំងឺ1,414នាក់ ហើយអត្រានៃការស្លាប់ដោយសារវីរុសនេះគឺ 8.6%។

ហ្វីលីពីន និងប្រទេសថៃ សុទ្ធតែមានអ្នកឆ្លងមេរោគលើសពី1,500នាក់ ប៉ុន្តែ ចំនួនករណីស្លាប់នៅប្រទេសទាំង2នេះ ខុសគ្នាឆ្ងាយណាស់ ពោលគឺហ្វីលីពីនមានអ្នកស្លាប់78នាក់ ចំណែកប្រទេសថៃមានតែ9នាក់។ COVID-19 បានបង្ហាញខ្លួននៅក្នុងប្រទេសទាំង11 នៃតំបន់អាស៊ីអាគ្នេយ៍នេះ៕

ប្រភព៖ សារព័ត៌មានបរទេស

March 31, 2020

មេដឹកនាំសង្គ្រាមប្រឆាំង COVID-19 បានឆ្លងវីរុស ខណៈអេស្ប៉ាញក្លាយជា “វាលពិឃាត” ទី2ក្នុងលោក របស់មេរោគបង្កជំងឺរលាកសួតថ្មី

មេដឹកនាំក្នុងសង្គ្រាមប្រឆាំង COVID-19 របស់អេស្ប៉ាញ បានឆ្លងវីរុសបង្កជំងឺរលាកសួតប្រភេទថ្មី ក្នុងខណៈដែលចំនួនអ្នកឆ្លងមេរោគសរុបនៅប្រទេសនេះ បានកើនឡើងលើសពីប្រទេសចិន។

“ប្រធានមជ្ឈមណ្ឌលចាត់ចែងករណីបន្ទាន់របស់ក្រសួងសុខាភិបាលអេស្ប៉ាញ លោក Fernando Simon វិជ្ជមានជាមួយនឹង COVID-19 បន្ទាប់ពីបានធ្វើតេស្ត” Maria Jose Sierra ដែលជាអនុប្រធានរបស់លោក Simon ថ្លែងបែបនេះ នៅក្នុងសន្និសីទសារព័ត៌មានមួយនៅឯរាជធានី Madrid កាលពីម្សិលមិញ។

លោកប្រធាន Simon គឺជាអ្នកដឹកនាំយុទ្ធនាការប្រយុទ្ធប្រឆាំងនឹង COVID-19 របស់រាជាណាចក្រអេស្ប៉ាញ និងជាអ្នកដែលតែងតែរក្សាទំនាក់ទំនងជាមួយនាយករដ្ឋមន្ត្រី Pedro Sanchez។ ប្រភពព័ត៌មានមិនបានឱ្យដឹងថា បច្ចុប្បន្នសុខភាពរបស់លោកយ៉ាងណាហើយនោះទេ។

អនុប្រធាន Sierra បានប្រកាសថា បុគ្គលិកពេទ្យចំនួន12,298នាក់បានឆ្លងមេរោគCOVID-19 គឺស្មើនឹង14% នៃចំនួនអ្នកឆ្លងមេរោគសរុបរបស់ប្រទេសអេស្ប៉ាញ។ ក្រុមគ្រូពេទ្យបានឱ្យដឹងថា ពួកគេកំពុងខ្វះសម្ភារការពារខ្លួន។

អេស្ប៉ាញ បច្ចុប្បន្នបានក្លាយជាប្រទេសដែលមានអ្នកស្លាប់ដោយសារមេរោគCOVID-19 ច្រើនជាគេបង្អស់លំដាប់ទី2ក្នុងពិភពលោក បន្ទាប់ពីប្រទេសអ៊ីតាលី ដោយមានអ្នកស្លាប់ដល់ទៅ7,340នាក់។

COVID-19 បានចាប់ផ្ដើមឆ្លងរាលដាលពីប្រទេសចិន កាលពីខែធ្នូ ឆ្នាំ2019 ហើយបានបង្ហាញខ្លួននៅក្នុងប្រទេស និងដែនដីចំនួន199 នៅទូទាំងពិភពលោក បណ្ដាលឱ្យមនុស្សចំនួន 741,030នាក់បានឆ្លងមេរោគ ក្នុងនោះមានអ្នកជំងឺ 35,114នាក់បានស្លាប់ និងជាង 28.000នាក់កំពុងប្រឈមនឹងការស្លាប់៕

ប្រភព៖ Reuters

March 30, 2020

បុគ្គលិកពេទ្យអាមេរិកាំង បានជួយឱ្យអ្នកជំងឺCOVID-19ជិតស្លាប់ម្នាក់ និងកូនចៅ បានលាគ្នាជាលើកចុងក្រោយ តាមរយៈទូរស័ព្ទ

គិលានុដ្ឋាយិកាម្នាក់នៅក្នុងរដ្ឋ Washington បានយកទូរស័ព្ទរបស់ខ្លួនភ្ជាប់ទៅកាន់កូនរបស់អ្នកជំងឺ COVID-19 ដើម្បីឱ្យពួកគេបានជួបមុខគ្នាជាលើកចុងក្រោយបង្អស់។

អ៊ំស្រី Carolann Gann អាយុ75ឆ្នាំ ធ្លាប់ធ្វើជាគិលានុបដ្ឋាកជាង30ឆ្នាំ បានធ្លាក់ខ្លួនឈឺនៅឯមជ្ឈមណ្ឌលចាស់ជរាមួយនៅ Issaquah ជាយក្រុង Seattle កាលពីសប្ដាហ៍មុន។ អ៊ំស្រីរូបនេះ បានទូរស័ព្ទទៅកូនស្រី ឈ្មោះ Michelle Bennett ដែលជានគរបាលជាន់ខ្ពស់ម្នាក់ ដើម្បីប្រាប់ថា បុគ្គលិកពេទ្យកំពុងធ្វើតេស្តរកមេរោគឱ្យគាត់។

បន្ទាប់មក គាត់ក៏ត្រូវបាននាំទៅកាន់មន្ទីរពេទ្យ ប៉ុន្តែសុខភាពរបស់គាត់ កាន់តែដុនដាបទៅៗ។ អ៊ំស្រី Gann បានបាត់បង់ជីវិតកាលពីថ្ងៃទី27មីនា ដោយពុំមានកូនចៅណាម្នាក់នៅក្បែរទាល់តែសោះ ព្រោះតែពួកគេមិនត្រូវបានអនុញ្ញាតឱ្យចូលក្នុងមន្ទីរពេទ្យ ដោយសារ COVID-19។

Bennett និយាយថា “ពិតជាមិនគួរឱ្យជឿសោះថា កាលពីសប្ដាហ៍មុន ម្ដាយរបស់ខ្ញុំនៅឯមជ្ឈមណ្ឌលថែទាំចាស់ជរា ហើយ7ថ្ងៃក្រោយ គាត់បែរជាទៅចោលខ្ញុំដូច្នេះសោះ។ ហេតុអីក៏រឿងនេះអាចកើតឡើងបាន?។ ម្ដាយខ្ញុំ បានទូរស័ព្ទប្រាប់ថា គាត់បានឆ្លង COVID-19។ ពេលនោះ ពិភពលោកហាក់ត្រូវបាក់រលំមកលើរូបខ្ញុំដូច្នោះដែរ”។

Bennett ដែលជាស្ត្រីភេទទី3ម្នាក់ ហើយប្រពន្ធរបស់នាងឈ្មោះ Brand Gordon Bennet បាននិយាយថា បុគ្គលិកពេទ្យបានធ្វើរឿងគ្រប់យ៉ាងដើម្បីឱ្យម្ដាយពួកគេបានស្ងប់ចិត្ត។

“ពួកយើងទាំងអស់គ្នា បាននិយាយគ្នាតាមទូរស័ព្ទដើម្បីលាគ្នាជាលើកចុងក្រោយ។ ពិតជាគួរឱ្យស្លុតចិត្តខ្លាំងណាស់។ ចៅៗរបស់គាត់ យំបណ្ដើរ និយាយលាគាត់បណ្ដើរ។ គាត់អាចស្ដាប់ និងនិយាយជាមួយពួកគេបាន។ គាត់និយាយជាមួយក្មេងៗថា គាត់ពិតជាមានមោទនភាពចំពោះពួកគេខ្លាំងណាស់” Bennett និយាយបណ្ដើរស្រក់ទឹកភ្នែកបណ្ដើរ។

នៅពេលដែលស្ថានភាពជំងឺរបស់អ៊ំស្រី Gann កាន់តែអាក្រក់ទៅៗ បុគ្គលិកពេទ្យម្នាក់បានយកទូរស័ព្ទរបស់ខ្លួន ភ្ជាប់ទៅកាន់កូនរបស់អ្នកជំងឺនេះ ដោយឱ្យពួកគេបានជួបគ្នាជាលើកទី2 ដែលជាលើកចុងក្រោយបង្អស់។

Bennett និយាយថា “បុគ្គលិកពេទ្យម្នាក់នោះ បានលើកទូរស័ព្ទនៅចំពោះមុខម្ដាយខ្ញុំ ហើយខ្ញុំអាចមើលឃើញ និងដឹងអំពីដង្ហើមរបស់គាត់។ ពេលនោះ ខ្ញុំអាចនិយាយពាក្យថា “លា” ទៅកាន់ម្ដាយខ្ញុំ ហើយថា ខ្ញុំស្រឡាញ់ និងអាណិតម្ដាយខ្លាំងណាស់”។

បន្ទាប់ពីអ៊ំស្រី Gann បានលាចាកលោកនេះទៅ គិលានុបដ្ឋាកម្នាក់ក៏បានទូរស័ព្ទមកកាន់គ្រួសារ Bennett។ បុគ្គលិកពេទ្យម្នាក់នេះបានប្រាប់ថា នាងបានចាប់ដៃ និងយកដៃច្បូតសក់ជូនគាត់ នៅពេលគាត់កំពុងបញ្ចប់ដង្ហើមចុងក្រោយ។

COVID-19 បានបង្ហាញខ្លួននៅក្នុងប្រទេស និងដែនដីចំនួន199 នៅក្នុងពិភពលោក បណ្ដាលឱ្យមនុស្សចំនួន 737,929នាក់បានបាត់បង់ជីវិត និងអ្នកជំងឺប្រមាណជា28,400នាក់កំពុងប្រឈមនឹងការស្លាប់ ខណៈដែលអ្នកជំងឺ156,507នាក់ទៀតបានជាសះស្បើយ។ ចំណែកសហរដ្ឋអាមេរិក បច្ចុប្បន្ន ជាសម្បុកមេរោគកូរ៉ូណាធំបំផុតក្នុងពិភពលោក ដោយមានអ្នកឆ្លងមេរោគនេះសរុបឡើងដល់143,055នាក់ ក្នុងនោះមាន2,513នាក់បានបាត់បង់ជីវិត និង4,865នាក់បានជាសះស្បើយ៕

ប្រភព៖ សារព័ត៌មានបរទេស

March 30, 2020

COVID-19! សត្វឆ្មាដំបូងបង្អស់ក្នុងពិភពលោក ដែលបានឆ្លងវីរុសពីម្ចាស់

បែលហ្សិក៖ ឆ្មា1ក្បាលបានឆ្លងវីរុសCOVID-19 បន្ទាប់ពីម្ចាស់របស់វា បានត្រឡប់មកពីប្រទេសអ៊ីតាលី នាំឱ្យវាក្លាយឆ្មាដំបូងគេបង្អស់ក្នុងពិភពលោក ដែលបានឆ្លង COVID-19 ពីមនុស្ស។

នាយកដ្ឋានសុខាភិបាលសាធារណៈ សុវត្ថិភាពអាហារ និងបរិស្ថានរបស់ប្រទេសបែលហ្សិក កាលពីថ្ងៃទី27មីនា បានប្រកាសថា ឆ្មា1ក្បាលរបស់ប្រទេសនេះបានឆ្លងវីរុសCOVID-19។ មួយសប្ដាហ៍បន្ទាប់ពីម្ចាស់របស់វាបានត្រឡប់មកពីប្រទេសអ៊ីតាលី ហើយបានឆ្លងវីរុសCOVID-19 ឆ្មានៅក្នុងផ្ទះនេះក៏ចាប់ផ្ដើមមានរោគសញ្ញាទាក់ទិននឹងផ្លូវដង្ហើម ដូចជាអាការរាក និងក្អួតចង្អោរ។ នេះបើតាមការឱ្យដឹងពី Steven Van Gucht អ្នកនាំពាក្យរបស់រដ្ឋាភិបាលបែលហ្សិក។

ម្ចាស់របស់ឆ្មាខាងលើ បានយកសំណាកវត្ថុវិភាគរបស់ឆ្មានេះ ផ្ញើទៅកាន់មន្ទីរពិសោធន៍របស់វេជ្ជបណ្ឌិត Daniel Desmecht នៅឯសាកលវិទ្យាល័យ Liege។ លទ្ធផលនៃការធ្វើតេស្ត បានរកឃើញថា សត្វឆ្មានេះមានផ្ទុកវីរុសCOVID-19 យ៉ាងច្រើននៅក្នុងសំណាកវត្ថុវិភាគខាងលើ។ Van Gucht បានឱ្យដឹងថា សត្វឆ្មានេះ មានសុខភាពល្អវិញខ្លះហើយ បន្ទាប់ពីបានព្យាបាលរយៈពេល9ថ្ងៃ។

ឆ្មា និងមនុស្ស ហាក់ដូចជាមានចំណុចពិសេសរួមមួយ នៅលើផ្ទៃនៃកោសិកាប្រព័ន្ធដង្ហើម នោះគឺទីតាំងដែល COVID-19 ប្រើដើម្បីជ្រែកចូល។ ចំពោះមនុស្ស ក្រុមអ្នកវិទ្យាសាស្ត្ររកឃើញថា COVID-19 ភ្ជាប់ខ្លួនទៅនឹងប្រូតេអ៊ីនដែលមានឈ្មោះថា ACE2 ស្ថិតនៅខាងក្រៅកោសិកាផ្លូវដង្ហើម។ បន្ទាប់ពីបានជ្រែកចូល វីរុសនេះនឹងគ្រប់គ្រងយន្តការខាងក្នុងនៃកោសិកាដើម្បីបង្កើនចំនួនវីរុស(កើតកូនចៅដោយមិនបាច់មានញី-ឈ្មោល។ ប្រូតេអ៊ីន ACE2 របស់សត្វឆ្មា មានលក្ខណៈដូចច្រើនទៅនឹង ACE2 របស់មនុស្ស។ នេះបើតាមសម្ដីរបស់ Van Gucht។

កន្លងមកនេះ គេបានរកឃើញសត្វចិញ្ចឹមចំនួន2ក្បាលដែលបានឆ្លងវីរុសCOVID-19 ពីម្ចាស់របស់វាផងដែរ។ ករណីនេះគឺជាសត្វសុនក2ក្បាលនៅក្នុងទីក្រុងហុងកុង។

ក្រុមគ្រូពេទ្យខាងលើនិយាយថា មកដល់ពេលនេះ មិនទាន់មានរបាយការណ៍ណាមួយនិយាយអំពីសត្វចិញ្ចឹមចម្លងមេរោគដល់ម្ចាស់របស់វានោះទេ។ លោកបញ្ជាក់ថា ការឆ្លងមេរោគពីសត្វមកមនុស្ស មិនមែនជាវិធីចម្បងក្នុងការចម្លងមេរោគនោះទេ។ ដើម្បីស្វែងយល់ឱ្យបានច្បាស់ជាងនេះ គេត្រូវធ្វើការពិសោធន៍ស៊ីជម្រៅជាងនេះ បន្ទាប់ពីសត្វឆ្មាខាងលើបានឆ្លងផុតការដាក់ឱ្យនៅដោយឡែករយៈពេល14ថ្ងៃ៕

ប្រភព៖ Live Science

March 30, 2020

កូរ៉េខាងត្បូងនឹងផ្ដល់ជំនួយ 6លានលានវ៉ុន ដល់ពលរដ្ឋដែលមានចំណូលទាប

ប្រទេសកូរ៉េខាងត្បូង កំពុងតែពិចារណាទៅលើគម្រោងផ្ដល់ជំនួយជាសាច់ប្រាក់សុទ្ធ ជូនដល់បណ្ដាគ្រួសារដែលមានចំណូលទាបទាំងអស់ក្នុងប្រទេសនេះ ដើម្បីកាត់បន្ថយផលប៉ះពាល់ផ្នែកសេដ្ឋកិច្ច ដែលកើតឡើងដោយសារវីរុស COVID-19។

ប្រធានាធិបតីកូរ៉េខាងត្បូង លោក Moon Jae-in កាលពីថ្ងៃទី29មីនាកន្លងទៅ បានប្រកាសថា នឹងពិភាក្សាលម្អិតទៅលើជំនួយហិរញ្ញវត្ថុដែលនឹងផ្ដល់ជូនដល់គ្រួសារមានចំណូលទាបប្រមាណជា10លានគ្រួសារ ដែលជាផ្នែកមួយនៃវិធានការបន្ទាន់សម្រាប់ទប់ទល់នឹងវិបត្តិនានាដែលកើតឡើងដោយសារវិបត្តសុខភាព COVID-19នេះ។ យោងតាមគម្រោង គ្រួសារមួយដែលមានសមាជិក4នាក់ និងមានប្រាក់ចំណូលក្រោមមធ្យម នឹងអាចទទួលបានប្រាក់ជំនួយមួយលើក ប្រហែលជា1លានវ៉ុន(820ដុល្លារអាមេរិក)។ នេះបើតាមការឱ្យដឹងពីក្រសួងហិរញ្ញវត្ថុ និងសេដ្ឋកិច្ចកូរ៉េខាងត្បូង។

ប្រាក់ចំណូលមធ្យមនៅកូរ៉េខាងត្បូងនាបច្ចុប្បន្ន គឺ 3.75លានវ៉ុន (3,058ដុល្លារអាមេរិក) ចំពោះគ្រួសារដែលមានសមាជិក4នាក់ និង2.99លានវ៉ុន (2,365ដុល្លារអាមេរិក) ចំពោះគ្រួសារ1ដែលមានសមាជិក2នាក់ និង5.63លានវ៉ុន (4,592ដុល្លារ) ចំពោះគ្រួសារតែមានសមាជិក5នាក់។ ដូច្នេះ គ្រួសារដែលមានសមាជិកក្រោម4នាក់ អាចនឹងទទួលបានជំនួយក្រោម820ដុល្លារអាមេរិក។

កញ្ចប់ថវិកាជំនួយដែលមានទំហំទឹកប្រាក់ 6លានលានវ៉ុន (ជិត5ពាន់លានដុល្លារអាមេរិក)នេះ តាមគម្រោងនឹងត្រូវបានយកទៅពិភាក្សាក្នុងកិច្ចប្រជុំរបស់ក្រុមប្រឹក្សាសេដ្ឋកិច្ចសង្គ្រោះបន្ទាន់ នៅក្នុងសប្ដាហ៍នេះ ដែលមានប្រធានាធិបតី Moon Jae-in ជាអធិបតី។

សេចក្ដីប្រកាសខាងលើនេះ ត្រូវបានធ្វើឡើងក្នុងគ្រាដែលកូរ៉េខាងត្បូងបានរកឃើញអ្នកផ្ទុកមេរោគCOVID-19ថ្មី105ករណី រួមនឹងអ្នកស្លាប់8ករណីបន្ថែមទៀត នាំឱ្យតួលេខនៃអ្នកឆ្លងមេរោគនៅប្រទេសនេះ ឡើងដល់ 9,661 ករណី និងស្លាប់158ករណី។ ចំនួនអ្នកឆ្លងមេរោគថ្មីជារៀងរាល់ថ្ងៃនៅប្រទេសនេះ ជាមធ្យមមានចំនួន100ករណី ប៉ុន្តែអាជ្ញាធរកូរ៉េខាងត្បូងនៅតែបន្តរឹតបន្តឹងខ្លាំងទៅលើតំបន់ព្រំដែន ព្រោះថា ករណីឆ្លងវីរុសCOVID-19 “នាំចូល” ពីខាងក្រៅ បានកើនឡើងច្រើនជាងមុន។ យ៉ាងហោចណាស់មាន13នាក់ក្នុងចំណោមករណីឆ្លងថ្មីបំផុតនៅប្រទេសនេះ គឺជាអ្នកទេសចរបរទេស។ នេះបើតាមមជ្ឈមណ្ឌលគ្រប់គ្រង និងទប់ស្កាត់ជំងឺ Korea Centers for Disease Control and Prevention (KCDC) របស់កូរ៉េខាងត្បូង។

កូរ៉េខាងត្បូង កាលពីថ្ងៃទី29មីនា បានប្រកាសថា ចាប់ពីថ្ងៃទី1មេសាខាងមុខនេះ រាល់ទេសចរបរទេសដែលមកកាន់ប្រទេសនេះ នឹងត្រូវដាក់ឱ្យនៅដាច់ដោយឡែករយៈពេល2សប្ដាហ៍។

COVID-19 បានបង្ហាញខ្លួននៅក្នុងប្រទេស និងដែនដីជិត200 ក្នុងពិភពលោក បន្ទាប់ពីបានរាលដាលនៅប្រទេសចិន កាលពីខែធ្នូ ឆ្នាំ2019 បណ្ដាលឱ្យមានមនុស្ស 723,740នាក់ត្រូវកើតរោគ ក្នុងនោះមាន34,018នាក់បានបាត់បង់ជីវិត និង152,042បានជាសះស្បើយ។

ក្រុមអ្នកជំនាញផ្នែកសេដ្ឋកិច្ច ជឿថា ឥទ្ធិពលដែល COVID-19 បង្កឡើងទៅលើសេដ្ឋកិច្ចពិភពលោក អាចធំជាង “មហាវិបត្តិ” សេដ្ឋកិច្ច (The Great Depression) ក្នុងទសវត្សរ៍ឆ្នាំ1930ទៅទៀត។ នេះបើតាមការចុះផ្សាយរបស់សារព័ត៌មាន Yonhap និង Guardian៕

ប្រភព៖ សារព័ត៌មានបរទេស

March 30, 2020

រួមសំណួរ-ចម្លើយថ្មីៗ ដែលទាំងអស់គ្នាគួរតែដឹង ពាក់ព័ន្ធនឹងវីរុសកូវីដ-19

1. ទំហំរបស់មេរោគវីរុសកូរ៉ូណាប្រភេទថ្មី ឬកូវីដ-19?

– មេរោគកូវីដ-19 ជាមេរោគវីរុសក្នុងត្រកូលកូរ៉ូណាវីរុស មានទំហំតូចខ្លាំងណាស់ មិនអាចមើលឃើញដោយភ្នែកទទេ ឬដោយមីក្រូទស្សន៍ទូទៅបានទេ។

2. ភាពប្រថុយប្រថាន(គិតជាភាគរយ) ដែលមេរោគនឹងចម្លងសាយភាយពីការជាប់នៅលើវត្ថុរបស់របរ?

– មេរោគកូវីដ-19 អាចចម្លងសាយភាយតាមរយៈវត្ថុរបស់របរដែលប្រឡាក់មេរោគបាន វាស្ថិតនៅលើនោះបានច្រើនថ្ងៃ បើសិនគ្មានការសម្អាត។ បើមានការប្រើដៃប៉ះវត្ថុរបស់របរទាំងនោះ ហើយយកមកប៉ះលើបរិវេណផ្ទៃមុខ ឬកាន់ចំណីអាហារដាក់ចូលមាត់ នឹងអាចឆ្លងមេរោគបាន ដូចគ្នានឹងការប៉ះពាល់មេរោគពីអ្នកជំងឺដោយផ្ទាល់ដែរ។ ដូច្នេះទើប ត្រូវតែប្រយ័ត្នប្រយែង លាងសម្អាត ឬបាញ់ថ្នាំសម្លាប់មេរោគនៅលើវត្ថុរបស់របរផ្សេងៗ និងលាងសម្អាតដៃឱ្យបានញឹកញាប់។

3. តើមេរោគអាចចម្លងសាយភាយនៅក្នុងអាងហែលទឹកបានទេ?

បច្ចុប្បន្ន មិនទាន់មានរបាយការណ៍អំពីការឆ្លងមេរោគនេះតាមរយៈការហែលទឹកក្នុងអាងហែលទឹក ឬប្រភពទឹកផ្សេងទៀតនៅឡើយ តែគួរចៀសវាងពីអាងហែលទឹកដែលមានមនុស្សម្នាច្រើន។

4. ការសម្អាតរថយន្តផ្ទាល់ខ្លួន រថយន្តក្រុងសាធារណៈ ក្រៅពីការជូតសម្អាតកន្លែងសំខាន់ៗដោយអាល់កុល 70% តើត្រូវធ្វើអ្វីទៀត?

– ចំណុចសំខាន់របស់ការសម្អាតរថយន្តផ្ទាល់ខ្លួន ឬរថយន្តសាធារណៈ គឺការសម្អាតនៅត្រង់កន្លែងដែលដៃរបស់អ្នកដំណើរមានឱកាសប៉ះច្រើនបំផុត។ ក្រៅពីការជូតសម្អាតដោយអាល់កុល 70%ហើយ អង្គការសុខភាពពិភពលោក បានណែនាំថា អាចប្រើទឹកថ្នាំ លាយជាមួយម្សៅសាប៊ូ ជូតសម្អាតបាន។ ក្រៅពីការជូតលើកន្លែងប៉ះពាល់ផ្សេងៗហើយ ការនាំរថយន្តទៅដាក់ហាលថ្ងៃ ក៏អាចនឹងកាត់បន្ថយការស្ថិតនៅរបស់មេរោគដោយសារសីតុណ្ហភាពដែលក្ដៅបានដែរ។

5. អាការរបស់អ្នកជំងឺកូវីដ-19 បង្ហាញឡើងយ៉ាងណាខ្លះ?

– អាការទូទៅ គឺមានអាការខាងប្រព័ន្ធដកដង្ហើម មានគ្រុនក្ដៅខ្លួន ក្អក ដកដង្ហើមញាប់ ពិបាកដកដង្ហើម។ ក្នុងករណីដែលអាការធ្ងន់ធ្ងរខ្លាំង អាចធ្វើឱ្យកើតមានសភាវជ្រៀតជ្រែក ដូចជា ហើមសួត រលាកសួត គាំងក្រលៀន និងអាចដល់ថ្នាក់ស្លាប់បាន។

6. តើប្រជាជនទូទៅ ត្រូវការពារខ្លួនឯងយ៉ាងណា?

– ចៀសវាងពីការប៉ះពាល់ជិតស្និទ្ធជាមួយអ្នកជំងឺ រក្សាគម្លាតចម្ងាយយ៉ាងតិចបំផុត 1ម៉ែត្រ ចៀសវាងពីការប៉ះពាល់ភ្នែក ច្រមុះ និងមាត់ ដោយមិនបានលាងសម្អាតដៃ។ គួរលាងសម្អាតដៃឱ្យបានញឹកញាប់ដោយទឹក និងសាប៊ូ ឬអាល់កុលសម្រាប់លាងដៃ 70%។ បើមានគ្រុនក្ដៅខ្លួន ក្អក ពិបាកដកដង្ហើម ត្រូវប្រញាប់ទៅមន្ទីរពេទ្យជាបន្ទាន់ និងរាយការណ៍លម្អិតអំពីខ្លួនឯងប្រាប់គ្រូពេទ្យ។

7. ការសម្អាតទីកន្លែងស្នាក់នៅ?

– គួរធ្វើការសម្អាតទីកន្លែង ឧបករណ៍ វត្ថុប្រើប្រាស់ដែលមានអ្នកប៉ះពាល់ច្រើន ដូចជាដៃទ្វារ បង្កាន់ដៃ តុបាយ ភួយ កម្រាលពូក ឧបករណ៍ផ្ទះបាយ ចាន ស្លាបព្រា សម កែវទឹក ដោយត្រូវសម្អាតដោយការជូតនឹងអាល់កុល 70% យ៉ាងតិចឱ្យបាន 2ដង ក្នុង 1ថ្ងៃ៕

ប្រភព៖ សារព័ត៌មានបរទេស

March 30, 2020

ពិភពលោក កាលពីសប្ដាហ៍មុន…(បណ្ដុំរូបភាព)

-ព្រះអង្គម្ចាស់ ឆារ៍លស៍ នៃរាជវង្សអង់គ្លេស ទ្រង់មានលទ្ធផល “វិជ្ជមាន” ពីការពិនិត្យរកមេរោគកូវីដ-19 ដោយនៅក្នុងសេចក្ដីថ្លែងការណ៍ពីព្រះរាជដំណាក់ ឃ្លែរេនស៍ បានបញ្ជាក់កាលពីថ្ងៃទី25 ថា ព្រះអង្គ ទ្រង់នៅតែមានព្រះរាជសុខភាពល្អដូចមុនជាធម្មតា និងព្រះអង្គទ្រង់បានបង្ខាំងព្រះកាយនៅក្នុងប្រទេសស្កុតលែនដ៍

ខាងក្រោមនេះ គឺបណ្ដុំរូបភាពព័ត៌មានអន្តរជាតិជុំវិញពិភពលោក កាលពីសប្ដាហ៍កន្លងទៅ…

-អ្នកជំនាញការនៃកងទ័ពរុស្ស៊ី កំពុងឈរនៅខាងក្រៅកន្លែងសម្រាកថែទាំ នើសស៊ីង ហូម(Honneger) ដែលមានអ្នកស្លាប់ដោយសារមេរោគកូវីដ-19 មិនតិចជាង 35នាក់ឡើយ នៅក្នុងតំបន់ Albino អ៊ីតាលី(រូបភាពកាលពីថ្ងៃសៅរ៍ ទី28មីនា របស់ AFP)

-ស្លាកសញ្ញាណែនាំពីការរក្សាគម្លាតឆ្ងាយពីគ្នា នៅក្នុងប្រទេសសហរដ្ឋអាមេរិក(AP)

-លោកប្រធានាធិបតីនៃសហរដ្ឋអាមេរិក ដូណាល់ ត្រាំ ក្នុងពិធីចុះហត្ថលេខាលើបទបញ្ជាប្រកាសឱ្យប្រើច្បាប់ The CARES act ដែលជាច្បាប់ប្រើប្រាស់ថវិកាគ្រាអាសន្ន ដើម្បីជួយដល់ផ្នែកសេដ្ឋកិច្ចរបស់ពលរដ្ឋអាមេរិកាំង ក្នុងស្ថានការណ៍វិបត្តិកូវីដ-19 ចំនួន 2លានលានដុល្លារ នៅក្នុងបន្ទប់ធ្វើការរាងពងក្រពើ ប្រចាំសេតវិមាន កាលពីថ្ងៃសុក្រ ទី27 មីនា(AFP)

-អាជ្ញាធរ និងមន្ត្រីយោធា នេសឹននែល ហ្គាដ ក្នុងទីក្រុងនីវយ៉ក ដើរនៅពីមុខតង់កៅស៊ូ ដែលសាងឡើង សម្រាប់ធ្វើជាកន្លែងតម្កល់សាកសពបណ្ដោះអាសន្ន នៅបរិវេណខាងក្រៅមន្ទីរពេទ្យ Bellevue ក្នុងទីក្រុងនីវយ៉ក កាលពីថ្ងៃពុធ ទី25 មីនា(AFP)

-រូបភាពបង្ហាញពីជីវិតរស់នៅប្រចាំថ្ងៃរបស់អ្នកទីក្រុងវូហាន…បុគ្គលិកអ្នកបញ្ជូនម្ហូបអាហារម្នាក់ កំពុងឈររង់ចាំហុចកញ្ចប់ចំណីអាហារពីលើរបារបាំងឃាំងផ្លូវចូលតំបន់ស្នាក់អាស្រ័យមួយក្នុងទីក្រុង។ រូបភាពកាលពីថ្ងៃអាទិត្យ ទី29 មីនា(រ៉យទ័រ)

-ពលករចំណាកស្រុកជនជាតិមីយ៉ាន់ម៉ា កំពុងប្រជ្រៀតគ្នាដើរឆ្លងស្ពានមិត្តភាពថៃ-មីយ៉ាន់ម៉ា ដើម្បីត្រឡប់ចូលទៅក្នុងខេត្ត មៀវ៉ាឌី ប្រទេសកំណើតរបស់ពួកគេវិញ ក្រោយវីរុសកូវីដ-19 រាតត្បាតនៅក្នុងប្រទេសថៃ ហើយរដ្ឋបាលថៃបានប្រកាសប្រើច្បាប់ស្ថានការណ៍អាសន្ននៅក្នុងសប្ដាហ៍នេះ។ រូបភាពកាលពីថ្ងៃពុធ ទី25 មីនា(រ៉យទ័រ)

-សម្ដេចសង្ឃ សាន់តាប៉ាប៉ា ហ្វ្រានស៊ីស ប្រារព្ធពិធីជូនពរ Urbi et Orbi ជាភាសាឡាទីន ឬប្រែថា “ជូនចំពោះទីក្រុងនេះ និងពិភពលោកទាំងមូល” នៅផ្នែកខាងលើបំផុតនៃជណ្ដើររបស់ព្រះមហាវិហារអ្នកឆ្លងបុណ្យ ប៉េត្រូ តែព្រះអង្គឯង។ រូបភាពកាលពីថ្ងៃសុក្រ ទី27 មីនា(AFP)

-លោកនាយករដ្ឋមន្ត្រីនៃប្រទេសអង់គ្លេស បូរីស ចនសុន កំពុងអ្គុយនៅក្នុងបន្ទប់ធ្វើការ ក្នុងផ្ទះលេខ10 ផ្លូវ ដាវនីង ក្នុងអំឡុងពេលចូលរួមក្នុង វីដេអូ ខន់ហ្វ៊ើរេនស៍ ជាមួយមេដឹកនាំក្រុមប្រទេសG-20 ដទៃទៀត។ កាលពីពេលមុនហ្នឹង លោក ចនសុន បានចេញសេចក្ដីថ្លែងការណ៍ តាមរយៈប្រព័ន្ធធ្វីតធើរថា លោកបានកើតជំងឺដោយសារមេរោគវីរុសកូរ៉ូណាប្រភេទថ្មីហើយ។ រូបភាពកាលពីថ្ងៃព្រហស្បតិ៍ ទី27 មីនា(រ៉យទ័រ)

-បុគ្គលិកពេទ្យផ្នែកសង្គ្រោះបន្ទាន់បារាំង កំពុងនាំខ្លួនអ្នកជំងឺកូវីដ-19 ឡើងជិះរថភ្លើងល្បឿនលឿន TGV ក្នុងតំបន់ Mullhouse ភាគខាងកើត ដើម្បីធ្វើការជម្លៀសទៅកាន់មន្ទីរពេទ្យក្នុងភូមិភាគផ្សេងទៀតនៃប្រទេស។ រូបភាពកាលពីថ្ងៃអាទិត្យ ទី29 មីនា(AFP)

ប្រភព ៖ សារព័ត៌មានបរទេស

March 30, 2020

សហរដ្ឋអាមេរិក អនុញ្ញាតឱ្យពលរដ្ឋយកសំណាកវត្ថុវិភាគដោយខ្លួនឯង ហើយផ្ញើទៅកាន់មន្ទីរពិសោធន៍ដើម្បីធ្វើតេស្តរកមេរោគCOVID-19

ពលរដ្ឋអាមេរិកាំងដែលសង្ស័យថាបានឆ្លងវីរុសCOVID-19 អាចយកសំណាកវត្ថុវិភាគរបស់ខ្លួនដោយខ្លួនឯង ហើយផ្ញើទៅកាន់មន្ទីរពិសោធន៍ ដែលប្រការនេះនឹងជួយបង្កើនល្បឿននៃការធ្វើតេស្តរកមេរោគCOVID-19។

នាយកដ្ឋានគ្រប់គ្រងអាហារ និងឱសថនៃសហរដ្ឋអាមេរិក បានអនុញ្ញាតឱ្យមានការយកសំណាកវត្ថុវិភាគដោយខ្លួនឯង ចំពោះរាល់ពលរដ្ឋដែលសង្ស័យថាខ្លួនបានឆ្លងCOVID-19 ដោយវិធានការនេះនឹងត្រូវបានអនុវត្តចាប់ពីសប្ដាហ៍នេះតទៅ។ នេះបើតាមការឱ្យដឹងរបស់ជំនួយការរដ្ឋមន្ត្រីក្រសួងសុខាភិបាល Brett Giroir កាលពីថ្ងៃទី29មីនាឆ្នាំ2020។

អ្នកដែលសង្ស័យថាខ្លួនបានឆ្លងCOVID-19 នឹងតម្រូវឱ្យប្រើប្រាស់សម្លីកប្បាសដើម្បីផ្ដិតយកសំណាកវត្ថុវិភាគក្នុងច្រមុះ(ទឹកសម្បោរ) ក្រោយមកដាក់វានៅក្នុងកូនថង់ផ្លាស្ទិក រួចផ្ញើទៅកាន់មន្ទីរពិសោធន៍។ ប្រការនេះនឹងជួយឱ្យពលរដ្ឋ និងក្រុមគ្រូពេទ្យ អាចកាត់បន្ថយបានភាពតានតឹងយ៉ាងច្រើន។

ជំនួយការរដ្ឋមន្ត្រីក្រសួងសុខាភិបាល Brett Giroir (រូបខាងស្ដាំគេបង្អស់)

ជំនួយការរដ្ឋមន្ត្រីក្រសួងសុខាភិបាលអាមេរិកាំង លោក Brett Giroir ថ្លែងថា “ដំណើរការនេះនឹងជួយបន្ថែមល្បឿននៃការធ្វើតេស្ត កាត់បន្ថយចំនួនលើកនៃការប្ដូរផ្លាស់ឈុតការពារចាំបាច់របស់ក្រុមគ្រូពេទ្យ។ វាក៏ជួយសន្សំសំចៃកម្លាំងធនធានដ៏មានតម្លៃ ដើម្បីទុកសម្រាប់មន្ទីរពេទ្យផ្សេងៗទៀតផងដែរ”។

យោងតាមស្ថិតិរបស់សាកលវិទ្យាល័យ Johns Hopskins នៅសហរដ្ឋអាមេរិក កាលពីថ្ងៃទី29មីនា បានឱ្យដឹងថា ចំនួនអ្នកឆ្លងមេរោគថ្មីបានកើនជិត18,000ករណីបន្ថែមទៀត នាំឱ្យតួលេខនៃអ្នកបានឆ្លងមេរោគCOVID-19 ទូទាំងប្រទេស ឡើងដល់ជាង141,000ករណី។ រីឯចំនួនអ្នកស្លាប់ថ្មីមានចំនួន247ករណី ធ្វើឱ្យតួលេខនៃអ្នកស្លាប់ដោយសារវីរុសនេះ កើនដល់2,458ករណី។

មន្ត្រីរដ្ឋាភិបាលសហរដ្ឋអាមេរិក បានឱ្យដឹងថា ប្រទេសនេះបានធ្វើតេស្តទៅលើមនុស្សប្រមាណជា894,000ករណី ចាប់តាំងពីCOVID-19 បានបង្ហាញខ្លួននៅសហរដ្ឋអាមេរិក។

ក្រុមអ្នកជំនាញការបានព្រមានថា ទីក្រុង New York នឹងរងផលប៉ះពាល់ធ្ងន់ធ្ងរជាងទីក្រុង Wuhan របស់ប្រទេសចិន ឬតំបន់ Lombardy របស់ប្រទេសអ៊ីតាលីទៅទៀត បើសិនជាល្បឿននៃការឆ្លងមេរោគនេះនៅតែបន្តកើនឡើងដូចសព្វថ្ងៃ។

សហរដ្ឋអាមេរិក អនុញ្ញាតឱ្យពលរដ្ឋយកសំណាកវត្ថុវិភាគដោយខ្លួនឯង ហើយផ្ញើទៅកាន់មន្ទីរពិសោធន៍ — អ្នកដែលសង្ស័យថាខ្លួនបានឆ្លងCOVID-19 នឹងតម្រូវឱ្យប្រើប្រាស់សម្លីកប្បាសដើម្បីផ្ដិតយកសំណាកវត្ថុវិភាគក្នុងច្រមុះ(ទឹកសម្បោរ) ក្រោយមកដាក់វានៅក្នុងកូនថង់ផ្លាស្ទិក រួចផ្ញើទៅកាន់មន្ទីរពិសោធន៍

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារ COVID-19 ចំនួន33,976នាក់ និងអ្នកកំពុងប្រឈមនឹងការស្លាប់មានចំនួន26,681នាក់ ក្នុងចំណោមអ្នកបានឆ្លងវីរុសសរុប 722,196នាក់៕

ប្រភព៖ សារព័ត៌មានបរទេស

March 30, 2020

លោកយាយវូហាន អាយុ 103ឆ្នាំ ជាមនុស្សចាស់បំផុតដែលឈ្នះវីរុសកូរ៉ូណា

សារព័ត៌មាន Independent របស់ប្រទេសអង់គ្លេស បានរាយការណ៍ថា រកឃើញស្ត្រីចំណាស់ អ្នកស្រុកវូហានម្នាក់ អាយុ 103ឆ្នាំ គឺជាមនុស្សដែលមានវ័យច្រើនបំផុត ដែលបានយកឈ្នះមេរោគវីរុសកូរ៉ូណាប្រភេទថ្មី និងព្យាបាលជា បានត្រឡប់ទៅផ្ទះវិញហើយ។

លោកវេជ្ជបណ្ឌិត ស៊ឹង យូឡាន់ អ្នកព្យាបាលលោកយាយចាង បានរៀបរាប់ប្រាប់អ្នកសារព័ត៌មាន Chutian Metropolis Daily ថា ស្ថិតិនៃការធូរស្បើយយ៉ាងឆាប់រហ័សរបស់មនុស្សដែលមានអាយុខ្ទង់រយឆ្នាំនេះ គឺមកពីលោកយាយគ្មានលក្ខខណ្ឌផ្នែកសុខភាពផ្សេងទៀត ក្រៅពីអាការមិនសូវជាធ្ងន់ធ្ងរប៉ុន្មានរបស់ជំងឺរលាកបំពង់ខ្យល់រ៉ាំរ៉ៃ។

លោកយាយជរា ចាង បានទទួលការវិនិច្ឆ័យថា បានឆ្លងមេរោគវីរុសកូវីដ-19 នៅឯមន្ទីរពេទ្យ លី យួន នៃមហាវិទ្យាល័យវេជ្ជសាស្ត្រ តុង ជិ ក្នុងទីក្រុងវូហាន កាលពីថ្ងៃទី1 មីនាកន្លងទៅ និងបានទទួលការព្យាបាលរហូតដល់ជា ក្លាយជាបុគ្គលចំណាស់បំផុតដែលបានជាសះស្បើយពីជំងឺគ្រោះថ្នាក់នោះរហូតមកដល់បច្ចុប្បន្ន បន្ទាប់ពីលោកតា អាយុ 101ឆ្នាំម្នាក់ដែលជាសះស្បើយពីវីរុសនេះ នៅក្នុងវូហានដូចគ្នាកាលពីពេលមុន។

គួររំឭកដែរថា អ្នករស់នៅក្នុងទីក្រុងវូហានទាំង 11លាននាក់ ត្រូវបានបង្ខាំង(មិនឱ្យចេញទៅណា)តាំងពីចុងខែមករា។ ជំងឺនេះមានអ្នកឆ្លងមេរោគជាង 80,700នាក់នៅក្នុងប្រទេសចិន និងមានអ្នកស្លាប់ជាង 3,000នាក់៕

ប្រភព៖ សារព័ត៌មានបរទេស

March 30, 2020

WHO ប្រកាស៖ ចំនួនអ្នកឆ្លងមេរោគកូវីដ-19 កើនជាងកន្លះលាន ចំណែកវ៉ាក់សាំង គ្មានផ្លូវកាត់ទេ ត្រូវរង់ចាំ 1ឆ្នាំ

ទីក្រុងហ្សឺណែវ ថ្ងៃទី27 មីនា អង្គការសុខភាពពិភពលោក ឬ WHO បានបង្ហើបឱ្យដឹងថា ចំនួនអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ដែលបានអះអាងហើយទូទាំងពិភពលោក បានកើនឡើងដល់ជាងកន្លះ លាននាក់ និងមានអ្នកស្លាប់ច្រើនជាង 20,000នាក់ហើយ ដែលនេះជា “ស្ថិតិដ៏គួរឱ្យសោកសៅ” បំផុត។

WHO បានបញ្ជាក់ថា ចំនួនអ្នកឆ្លងមេរោគកូវីដ-19 ទូទាំងពិភពលោកបានកើនឡើងដល់ 509,164នាក់ គិតត្រឹមម៉ោង10 ម៉ោងនៅអឺរ៉ុប នៃថ្ងៃសុក្រ ទី27 មីនា ដោយវីរុសបានឆ្លងសាយភាយទូទាំងប្រទេស និងភូមិភាគ ជាង 200កន្លែង និងធ្វើឱ្យមានអ្នកស្លាប់ច្រើនរហូតដល់ 23,335នាក់។

លោក ថេដ្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក បានថ្លែងថា នៅតែត្រូវរង់ចាំយ៉ាងហោចណាស់ក៏ 12-18ខែទៀតដែរ ទម្រាំនឹងមានវ៉ាក់សាំងការពារមេរោគមួយនេះ…។ លោកព្រមទាំងបាននិយាយសង្កត់ធ្ងន់ទៅលើភាពចាំបាច់យ៉ាងបន្ទាន់ក្នុងការព្យាបាលអ្នកជំងឺ និងបន្ថយចំនួនអ្នកស្លាប់ ទៀតផង។

“ការសាកល្បងដែលបានរួមដៃគ្នាជាធ្លុងមួយ មានន័យអំពីការសាកល្បងខាងការព្យាបាលរបស់ប្រទេសជាច្រើន ដើម្បីស្វែងរកវិធីព្យាបាលជំងឺដែលបណ្ដាលមកពីវីរុសកូវីដ-19 គឺជាការសាកល្បងជាប្រវត្តិសាស្ត្រ ដែលវានឹងជួយឱ្យការពិសោធភ័ស្តុតាងពាក់ព័ន្ធនឹងថ្នាំដែលមានប្រសិទ្ធផលខាងការព្យាបាល”

លោក ថេដ្រូស បានប្រកាសថា អ្នកជំងឺ 1ឈុតដំបូងនៅក្នុងប្រទេសន័រវេយ៍ និងអេស្បាញ នឹងចូលរួមការសាកល្បងខាងការព្យាបាលក្នុងពេលឆាប់ៗនេះ ដើម្បីប្រៀបធៀបពីសុវត្ថិភាព និងប្រសិទ្ធភាពរបស់ឱសថតែមួយ ឬឱសថផ្សំ ដែលអាចមានសក្ដានុពលព្យាបាលជំងឺដ៏សាហាវមួយនេះ ចំនួន 4មុខ”

“រឹតតែមានប្រទេសផ្សេងៗ ចូលរួមការសាកល្បងកាន់តែច្រើនឡើង នឹងរឹតតែជួយឱ្យយើងបានទទួលលទ្ធផលកាន់តែលឿនឡើង”។ លោកបានបន្តទៀតថា បច្ចុប្បន្ន មានប្រទេស និងភូមិភាគប្រមាណជា 45 កំពុងរួមដៃគ្នាសាកល្បងខាងគ្លីនិក ដើម្បីស្វែងរកវិធីការព្យាបាល និងសង្ឃឹមថា នឹងមានអ្នកចូលរួមកើនឡើងទៀត។

ខណៈពេលជាមួយគ្នា លោក ថេដ្រូស បានអំពាវនាវឱ្យចៀសវាងពីវិធីព្យាបាលដែលមិនបានបង្ហាញពីប្រសិទ្ធផល ដោយលោកបានសង្កត់ធ្ងន់ថា វា “គ្មានផ្លូវកាត់” ទេ និងត្រូវតែប្រកាន់យកភ័ស្តុតាងដែលមានការពិសោធសាកល្បង និងរៀនយល់ជាបន្តបន្ទាប់ថា តើវិធីការមួយណាដែលទទួលបានលទ្ធផល៕

ប្រភព៖ សារព័ត៌មានបរទេស

March 30, 2020

Tag: អាសន្នរោគ