Tag: អាសន្នរោគ

  • “ម៉ាសពេលនេះសំខាន់ និងមានតម្លៃជាងមាសទៅទៀត!” នេះជាសម្ដីអ្នកស្រុកសៀងហៃប្រទេសចិន

    “ម៉ាសពេលនេះសំខាន់ និងមានតម្លៃជាងមាសទៅទៀត!” នេះជាសម្ដីអ្នកស្រុកសៀងហៃប្រទេសចិន

    ព្រឹកព្រលឹមម៉ោងប្រហែល6 Yu Husheng ដែលជាវិស្វករចូលនិវត្តន៍មួយរូប បានទៅកាន់ឱសថស្ថានមួយកន្លែងក្នុងខណ្ឌ Xuhui (ក្នុងក្រុងសៀងហៃ ប្រទេសចិន) ដើម្បីទិញម៉ាសទុកប្រើប្រាស់ក្នុងគ្រួសារ។ ពេលទៅដល់ គាត់ឃើញមានមនុស្សម្នាប្រហែលជាង 100នាក់ បានមកតម្រង់ជួរមុនគាត់ទៅទៀត។

    លោកអ៊ំវ័យចំណាស់ម្នាក់ បានឱ្យដឹងថា គាត់សុខចិត្តចំណាយពេល និងកម្លាំងកាយដើម្បីស្វែងរក បើទោះត្រូវសម្រាន្តតិចជាងមុនក៏ដោយ។ លោកអ៊ំថ្លែងថា ៖ “ខ្ញុំគិតថា ម៉ាសពេលនេះវាសំខាន់ និង​មាន​តម្លៃ​ជាងមាសទៅទៀត”។

    គិតមកដល់ថ្ងៃទី1កុម្ភៈនេះ អាសន្នរោគ Corona បានឆ្លងរាលដាលស្ទើរ​ពេញ​ផ្ទៃ​ប្រទេស​ចិន បណ្ដាលឱ្យមនុស្សជាង 12,000នាក់បានឆ្លងមេរោគនេះ និង 259នាក់ផ្សេងទៀតបានបាត់បង់ជីវិត។ ដោយ​សារ​តែ​ភ័យ​ខ្លាច ពលរដ្ឋចិនដីគោក បានសម្រុកទៅទិញម៉ាសទុកប្រើប្រាស់ក្នុងរយៈពេលយូរអង្វែង។

    លោក Yu Husheng បានឱ្យដឹងថា លោកត្រូវការម៉ាសយ៉ាងតិច 30 សម្រាប់គ្រួសាររបស់គាត់ដែលមានសមាជិក 6នាក់។ ប៉ុន្តែ អាជ្ញាធរក្រុងសៀងហៃបានចេញបទបញ្ជា ហាមមិនឱ្យទិញលើសពី10ម៉ាស សម្រាប់មនុស្សម្នាក់ក្នុង1ថ្ងៃ។

    ម៉ាស ត្រូវបានកំណត់ឱ្យលក់ក្នុងតម្លៃត្រឹមតែ 0,46 យន់ (ប្រហែល 270 រៀល) ប៉ុណ្ណោះ។ ប៉ុន្តែ នៅក្នុងផ្សារងងឹត ឬតូបទំនិញតាមចិញ្ចើមផ្លូវ អ្នកទិញត្រូវចំណាយប្រាក់ដល់ទៅ 5 យន់ (2,900រៀល) សម្រាប់ម៉ាសមួយ។

    បុរសម្នាក់ឈ្មោះ Li Yan អាយុ42ឆ្នាំ ជាបុគ្គលិកក្រុមហ៊ុនផ្សាយពាណិជ្ជកម្មមួយ បាននិយាយថា ៖ “នៅលើ WeChat (បណ្ដាញសង្គមចិន) ពួកគេ (អតិថិជន) សុខចិត្តចំណាយប្រាក់គុណជា 10ដងនៃតម្លៃធម្មតា ដើម្បីទិញម៉ាសចំនួន1។ ប៉ុន្តែ មិត្តភ័ក្តិខ្ញុំគ្មានអ្នកណានៅសល់ម៉ាសដើម្បីលក់នោះដែរ។ រដ្ឋាភិបាល គួរតែស្វែងរកវិធីដើម្បីចែកចាយម៉ាសដល់អ្នករាល់គ្នា”។

    បណ្ដាក្រុមហ៊ុន រោងចក្រផលិតសម្ភារវេជ្ជសាស្ត្របានឱ្យដឹងថា ពួកគេបានបង្កើនសង្វាក់ផលិតកម្ម ដើម្បីរត់ប្រណាំងជាមួយនិងតម្រូវការរបស់ប្រជាជន។ ចំណែកអាជ្ញាធរមូលដ្ឋានក៏បាន និងកំពុងជួយផ្គត់ផ្គង់កម្លាំង និងវត្ថុធាតុដើមដល់ការផលិតម៉ាសក្នុងអំឡុងរដូវបុណ្យចូលឆ្នាំចិន។

    លោក Li Jia សមាជិកនៃគណកម្មការព័ត៌មានវិទ្យានៃក្រុងសៀងហៃបានប្រាប់ថា បរិមាណទិន្នផលប្រចាំថ្ងៃបានកើនដល់ 1.5លានម៉ាស គឺច្រើនជាង 3ដង បើធៀបនឹងចំនួន 400,000ម៉ាសកាលពីមុនថ្ងៃទី 25មករា ឆ្នាំ2020។ រដ្ឋាភិបាលក៏បានសន្យាជួយដល់បណ្ដាក្រុមហ៊ុន និងរោងចក្រ ក្នុងការធានាដល់សង្វាក់ផលិតកម្មរបស់ពួកគេ ដើម្បីអាចបង្កើនបរិមាណផលិតផល។

    លោក Wu Shengrong ប្រធានរោងចក្រផលិតម៉ាស Dangsheng Shanghai ឱ្យដឹងថា កម្មករត្រូវធ្វើការទាំងយប់ទាំងថ្ងៃដើម្បីផលិតឱ្យបានគ្រប់តាមតម្រូវការរបស់ប្រជាជន។ លោក Wu បានបន្ថែមថា ៖ “យើងខ្ញុំមិនដំឡើងថ្លៃដើម្បីបានចំណេញច្រើនពីវិបត្តិសុខភាពនេះឡើយ”។

    ក្រុមហ៊ុនរបស់លោក Wu បច្ចុប្បន្នផលិតម៉ាសចំនួន 80,000 ក្នុងមួយថ្ងៃៗ។ តាមគម្រោង ក្នុងរយៈពេល 10 ទៅ 15ថ្ងៃទៀត រោងចក្រ Dangsheng អាចផ្គត់ផ្គង់ 200,000ម៉ាសទៅឱ្យទីផ្សារ បើសិនប្រឹងអស់ពីលទ្ធភាព។

    កន្លងមក ក្រុងហុងកុងក៏ធ្លាប់ទទួលរងផលវិបាកស្រដៀងគ្នានេះដែរ។ មនុស្សជាច្រើនបានក្រោកពីព្រលឹម ទៅតម្រង់ជួរគ្នា និងត្រូវរង់ចាំ5ម៉ោងមុនគេបើកហាង ដើម្បីទិញម៉ាស។ អ្នកខ្លះមានការខឹងសម្បាជាខ្លាំង នៅពេលត្រូវត្រឡប់ទៅផ្ទះដោយដៃទទេ។ ហួសហេតុជាងនេះទៀត មានអ្នកខ្លះនាំគ្នាមកបោះតង់នៅមុខហ្វាម៉ាស៊ី 230កន្លែង ដេកមួយយប់ រង់ចាំទិញម៉ាស។

    សូមរំឭកថា ប្រទេសចិនកំពុងទទួលរងការរាតត្បាតនៃអាសន្នរោគ Corona ដែលបានផ្ទុះឆ្លងរាលដាលតាំងពីខែធ្នូ ឆ្នាំ2019។ អាសន្នរោគរលាកសួតនេះ បានបណ្ដាលឱ្យមានអ្នកស្លាប់យ៉ាងតិច 259នាក់ និងជាង11,374នាក់ផ្សេងទៀតបានឆ្លងមេរោគនេះនៅទូទាំងពិភពលោក គិតត្រឹមព្រឹកថ្ងៃទី1កុម្ភៈនេះ៕

    ប្រភព៖ សារព័ត៌មានបរទេស

  • គួរឱ្យអាសូរអ្នកក្រុង Wuhan! ដួលស្លាប់លើចិញ្ចើមផ្លូវក្បែរហាងទំនិញ ប៉ុន្តែ2ម៉ោងក្រោយទើបមានរថយន្តសង្គ្រោះបន្ទាន់មកដល់ “ព្រោះតែរវល់ពេក”

    គួរឱ្យអាសូរអ្នកក្រុង Wuhan! ដួលស្លាប់លើចិញ្ចើមផ្លូវក្បែរហាងទំនិញ ប៉ុន្តែ2ម៉ោងក្រោយទើបមានរថយន្តសង្គ្រោះបន្ទាន់មកដល់ “ព្រោះតែរវល់ពេក”

    បុរសវ័យចំណាស់ម្នាក់ មានពាក់ម៉ាស បានដួលស្លាប់នៅលើដងផ្លូវក្នុងក្រុង Wuhan ប្រទេសចិន។ ថ្វីបើរឿងនេះបានកើតឡើងតាំងតែពីថ្ងៃទី30មករា ប៉ុន្តែករណីនេះបានបង្ហាញថា ស្ថានភាពកំពុងវិវដ្ដអាក្រក់ទៅៗនៃអាសន្នរោគ Corona នៅប្រទេសចិន។

    រូបថតដែលត្រូវបានថតដោយភ្នាក់ងារសារព័ត៌មាន AFP នៅក្រុង Wuhan បានបង្ហាញថា ជនរងគ្រោះមានអាយុប្រហែល60ឆ្នាំ សក់ស្កូវល្បាយអាចម៍ខ្លា ពាក់ម៉ាស ដេកស្លាប់នៅលើចិញ្ចើមផ្លូវ ខាងមុខហាងទំនិញដែលបានបិទមួយកន្លែង ហើយនៅក្នុងដៃសាកសពនេះ មានថង់ដាក់អីវ៉ាន់ផងដែរ។

    គេមិនបានដឹងថា បុរសរងគ្រោះនោះ បានស្លាប់នៅពេលណា ហើយក៏មិនបានដឹងអំពីមូលហេតុដែលនាំឱ្យគាត់ស្លាប់នោះដែរ។ នៅតាមផ្លូវក្នុងក្រុង Wuhan នៃខេត្ត Hebei ប្រទេសចិន ដើមឡើយជាតំបន់ដែលមានមនុស្សម្នាច្រើនកុះករ ប៉ុន្តែ ចាប់តាំងពីត្រូវបានដាក់បម្រាមគោចរដើម្បីការពារការឆ្លងរាលដាលនៃមេរោគ Corona ទីនេះកាន់តែស្ងាត់ទៅៗ។

    យ៉ាងនេះក្ដី នៅលើដងផ្លូវ គេក៏នៅតែឃើញមនុស្ស2-3នាក់ ដើរទៅ-មក កាត់កន្លែងកើតហេតុ ប៉ុន្តែពួកគេមិនហ៊ានចូលក្បែរសាកសព ខណៈរង់ចាំសមត្ថកិច្ចមកដល់។

    មួយសន្ទុះក្រោយមក មានបុគ្គលិកពេទ្យជាច្រើននាក់ ពាក់ឈុតការពារមេរោគមកដល់ ហើយបានគ្របសំពត់អ្វីមួយពីលើសាកសព។ ក្នុងរយៈពេល2ម៉ោងដែលបានពិនិត្យមើលកន្លែងកើនហេតុ ភ្នាក់ងារសារព័ត៌មាន AFP បានឃើញរថយន្តសង្គ្រោះបន្ទាន់យ៉ាងតិច 15គ្រឿង បើកបរកាត់ទីនេះ ប៉ុន្តែពួកគេមានភារកិច្ចផ្សេង។

    ចុងក្រោយ រថយន្តដឹកទំនិញពណ៌សមួយគ្រឿងបានមកដល់ ហើយក៏បានដឹកសាកសពបុរសនោះចេញទៅ។ បុគ្គលិកពេទ្យក៏នាំគ្នាបាញ់ថ្លាំសម្លាប់មេរោគត្រង់កន្លែងកើតហេតុ។

    AFP បានទាក់ទងសមត្ថកិច្ចក្នុងតំបន់ ប៉ុន្តែ មិនទាន់ទទួលបានព័ត៌មានអ្វីច្បាស់លាស់ស្ដីអំពីអត្តសញ្ញាណ ក៏ដូចជាមូលហេតុនៃការស្លាប់នេះនៅឡើយ។

    ស្ត្រីម្នាក់ដែលនៅក្បែរកន្លែងកើតហេតុ បានប្រាប់ថា គាត់ជឿថា បុរសម្នាក់ដែលបានស្លាប់នោះ ប្រាកដជាដោយសារឆ្លងមេរោគ nCoV (Corona)។ ស្ដ្រីម្នាក់នេះនិយាយទៀតថា ៖ “វាគួរឱ្យខ្លាច! ប៉ុន្មានថ្ងៃនេះមានអ្នកស្លាប់ច្រើនណាស់”។

    ទីតាំងកើតហេតុស្ថិតនៅក្បែរមន្ទីរពេទ្យ Wuhan លេខ6 ជាកន្លែងទទួលព្យាបាលអ្នកជំងឺដែលមានអាការនៃជំងឺរលាកសួតថ្មីដែលបង្កឡើងដោយមេរោគ nCoV។

    ក្រុង Wuhan កំពុងទទួលរងការរាតត្បាតនៃអាសន្នរោគ Corona ដែលបានផ្ទុះឆ្លងរាលដាលតាំងពីខែធ្នូ ឆ្នាំ2019។ អាសន្នរោគនេះ បានបណ្ដាលឱ្យមានអ្នកស្លាប់យ៉ាងតិច 259នាក់ និងជាង11,374 នាក់បានឆ្លងមេរោគនេះនៅទូទាំងពិភពលោក។ ដោយឡែក ខេត្ត Hubei ដែលមានក្រុង Wuhan ជា “សម្បុកមេរោគ” មានអ្នកស្លាប់ដល់ទៅ 249នាក់ គិតមកដល់ព្រឹកថ្ងៃទី1កុម្ភៈនេះ៕

    ប្រភព៖ សារព័ត៌មានបរទេស

  • ក្រុមហ៊ុនអាកាសចរណ៍ចំនួន29 ផ្អាកការហោះហើរទៅ-មកប្រទេសចិន ក្នុងនោះមាន…

    ក្រុមហ៊ុនអាកាសចរណ៍ចំនួន29 ផ្អាកការហោះហើរទៅ-មកប្រទេសចិន ក្នុងនោះមាន…

    ទីភ្នាក់ងារសារព័ត៌មាន Reuters បានរាយការណ៍ថា ក្រុមហ៊ុនអាកាសចរណ៍សរុបចំនួន 29ក្រុមហ៊ុន បានផ្អាក លុបចោល ឬពន្យាពេលជើងហោះហើរទៅ-មកប្រទេសចិន ដោយសារបារម្ភអំពីអាសន្នរោគក្នុងប្រទេសនេះ។

    ក្រុមហ៊ុនអាកាសចរណ៍ចំនួន29 ដែលបានផ្អាក ឬប្រកាសផ្អាកការហោះហើរទៅ-មកប្រទេសចិន មានដូចជាក្រុមហ៊ុនរបស់អាមេរិក បារាំង ឥណ្ឌា កាណាដា កូរ៉េខាងត្បូង អង់គ្លេស និងវៀតណាម។

    អង្គការសុខភាពពិភពលោក (WHO) កាលពីថ្ងៃទី 30មករាកន្លងទៅ បានប្រកាសអាសន្ននៅទូទាំងពិភព​លោកចំពោះអាសន្នរោគនេះ ហើយបានអំពាវនាវឱ្យប្រទេសទាំងអស់ បង្កើនការការពារ និងប្រយុទ្ធប្រឆាំងអាសន្នរោគនេះ។

    ឆ្លើយតបទៅនឹងការប្រកាសអាសន្នខាងលើ ក្រុមហ៊ុនអាកាសចរណ៍មួយចំនួនដូចជា Cathay Pacific Airways, Singapore Airlines និង Turkish Airlines បានចេញសេចក្ដីប្រកាសលុបចោលជើងហោះហើរទៅ-មកប្រទេសចិន។ Air Tanzania ក៏បានប្រកាសពន្យាពេលជើងហោះហើរដំបូងក្នុងខែកុម្ភៈទៅកាន់ប្រទេស​ចិន។ ក្រុមហ៊ុនអាកាសចរណ៍ United Airlines បានឱ្យដឹងថា នឹងលុបចោលជើងហោះហើរចំនួន 332 រវាងទីក្រុងមួយចំនួននៅអាមេរិក និងក្រុងប៉េកាំង សៀងហៃ និងហុងកុងផងដែរ។ ចំណែកក្រុមហ៊ុន Vietnam Airlines ក៏ប្រកាសដែរថា នឹងផ្អាកជើងហោះហើរទៅ-មកក្រុងប៉េកាំង សៀងហៃ ខ្វាងចូវ និងក្រុងសិនជិន ចាប់ពីថ្ងៃទី6កុម្ភៈខាងមុខ និងក្រុងចេងឌូ ចាប់ពីថ្ងៃទី5កុម្ភៈ និងក្រុងម៉ាកាវ ចាប់ផ្ដើមផ្អាកការ​ហោះ​ហើរ​ពីថ្ងៃទី6កុម្ភៈ ឆ្នាំ2020។ ក្រុមហ៊ុនអាកាសចរណ៍មួយផ្សេងទៀតរបស់វៀតណាមគឺ Vietjet ក៏​នឹងផ្អាក​ជើង​ហោះ​ហើរ​ទាំងអស់របស់ខ្លួន ដែលហោះហើរទៅ-មកប្រទេសចិន ចាប់ពីថ្ងៃទី1កុម្ភៈនេះ។


    បណ្ដាក្រុមហ៊ុនអាកាសចរណ៍ដែលផ្អាកការហោះហើរ​ទៅកាន់ប្រទេសចិន រួមមាន ៖

    ក្រុម​ហ៊ុន​អាកាស​ចរណ៍ Air Canada, Air France, Air India, Air Seoul, American Airlines, Austrian Airlines, British Airways, Delta Air Lines, Egyptair, El Al Israel Airlines, Etihad Airways, Finnair, Kenya Airways, Lion Air, LOT, Lufthansa, NordStar, Royal Air Maroc, RwandAir, S7 Airlines, SAS, Scoot, Shanghai Airlines, Swiss, Ural Airlines, Vietjet, Vietnam Airlines, Virgin Atlantic និងក្រុមហ៊ុន Yakutia Airlines។

    សូមរំឭកថា អ្នកជំនាញខាងរោគឆ្លងបានឱ្យដឹងថា ហានិភ័យនៃការឆ្លងមេរោគ Corona គឺមានខ្ពស់ណាស់ នៅពេលមនុស្សម្នាក់នៅក្បែរអ្នកជំងឺក្នុងរង្វង់ក្រោម 2ម៉ែត្រ។ កត្តានេះក៏ជាមូលហេតុដែលនាំឱ្យការឆ្លង​រាល​ដាលនៃមេរោគនេះ កើនឡើងដល់ 11,791នាក់ និងអ្នកស្លាប់កើនដល់ 259នាក់ គិតមកត្រឹមព្រឹកនេះ៕

    ប្រភព៖ សារព័ត៌មានបរទេស

  • ខ្សិកខ្សួលអួលដើម-ក ពេលបានអានសំបុត្ររបស់អ្នកគ្រូពេទ្យចិនម្នាក់ សរសេរទុកឱ្យកូនប្រុស ពេលខ្លួនឯងចូលទៅ “សមរភូមិវូហាន”

    ខ្សិកខ្សួលអួលដើម-ក ពេលបានអានសំបុត្ររបស់អ្នកគ្រូពេទ្យចិនម្នាក់ សរសេរទុកឱ្យកូនប្រុស ពេលខ្លួនឯងចូលទៅ “សមរភូមិវូហាន”

    “កូនសម្លាញ់ តើកូនធ្លាប់បានឃើញកែវភ្នែករបស់អ្នកជំងឺ និងគ្រួសាររបស់ពួកគេដែលអង្វរសុំឱ្យជួយសង្គ្រោះជីវិតដែរឬទេ? កែវភ្នែកពួកគេដែលសម្លឹងមកម្ដាយ ហាក់ដូចជាផ្ញើសេចក្ដីទុកចិត្ត សេចក្ដីសង្ឃឹម និងការប្រាថ្នាសុំរស់បន្តទៀត”។

    ខាងលើនេះ គឺជាការចាប់ផ្ដើមបន្ទាត់ដំបូងនៃសំបុត្រដែលលោកស្រីវេជ្ជបណ្ឌិត Cao Xiaoying អាយុ 56ឆ្នាំ ជាប្រធានមជ្ឈមណ្ឌលព្យាបាលរោគឆ្លងនៃមន្ទីរពេទ្យប្រជាជនលេខ2 ក្នុងខេត្ត Hebei ប្រទេសចិន ដែលសរសេរទុកឱ្យកូនប្រុសរបស់គាត់ មុនពេលឈានជើងចូលក្នុងតំបន់ “សមរភូមិវូហាន” ដើម្បីប្រយុទ្ធប្រឆាំងនឹងមេរោគរលាកសួត Corona។

    សំបុត្រនោះបានសរសេរទៀតថា ៖ “ម្ដាយយល់អំពីអាការព្រួយភ័យ និងក្ដីទុក្ខលំបាក ដែលពួកគេទទួលរងពីអាសន្នរោគដ៏អាក្រក់នេះ”។

    លោកស្រីវេជ្ជបណ្ឌិត Cao Xiaoying បានចូលនិវត្តន៍នៅមុនរដូវបុណ្យចូលឆ្នាំចិន ប៉ុន្តែ បន្ទាប់ពីអាជ្ញាធរខេត្ត Hunan ប្រកាសអំពីការផ្ទុះឆ្លងរាលដាលនៃមេរោគវីរុស Corona លោកស្រីបានសម្រេចចិត្ត ប្រញាប់ត្រឡប់ទៅកាន់មន្ទីរពេទ្យវិញ ដើម្បីបានរួមដំណើរជាមួយក្រុមគ្រូពេទ្យចំនួន 60នាក់ផ្សេងទៀត ស្ម័គ្រចូលទៅប្រយុទ្ធប្រឆាំងមេរោគវីរុស Corona ដ៏សាហាវនោះ។ ជាមួយនឹងបទពិសោធជាង 30ឆ្នាំក្នុងការប្រឆាំងនឹងបណ្ដាមេរោគឆ្លងទាំងឡាយ លោកស្រីបានទទួលព្យាបាលអ្នកជំងឺរលាកសួតដោយការឆ្លងមេរោគវីរុស Corona ដំបូងនៅជនបទ។

    នៅចំពោះមុខការសម្រេចចិត្តនេះ កូនប្រុសរបស់លោកស្រីបានជំទាស់យ៉ាងខ្លាំងក្លា។ កូនប្រុសរបស់លោកស្រីមានគម្រោងនាំមិត្តស្រីរបស់គេមកជម្រាបសួរលោកស្រីក្នុងរដូវចូលឆ្នាំចិនឆ្នាំនេះ។
    មុនពេលត្រឡប់ទៅមន្ទីរពេទ្យវិញ លោកស្រីបានរៀបចំអ្វីៗគ្រប់សព្វបែបយ៉ាងរួចរាល់ ដើម្បីឱ្យកូនប្រុសរបស់គាត់ស្វាគមន៍មិត្តស្រីរបស់គេ ព្រមទាំងបានសរសេរសំបុត្រមួយច្បាប់ទុកឱ្យកូនប្រុសរបស់គាត់ ដោយក្ដីសង្ឃឹមថា កូនប្រុសគាត់នឹងយល់អំពីអារម្មណ៍របស់លោកស្រី។

    ក្នុងសំបុត្រនោះ លោកស្រីវេជ្ជបណ្ឌិត បានសុំទោសកូនប្រុសរបស់គាត់ ព្រោះមិនទាន់បានបំពេញភារកិច្ចជាម្ដាយដ៏ល្អ ប៉ុន្តែ លោកស្រីបានរំឭកជាច្រើនលើកច្រើនសាថា លោកស្រីពិតជាស្រឡាញ់រូបគេខ្លាំងណាស់។

    “កូនប្រុសម្ដាយ ម្ដាយបានសម្រេចជ្រើសរើសមុខរបរជាគ្រូពេទ្យ ដូច្នេះយ៉ាងណាក៏ដោយ យើងមិនអាចនៅជុំគ្នាបានពេញលេញនោះទេ។ ម្ដាយស្រឡាញ់កូន100% ប៉ុន្តែ ពេលវេលារបស់ម្ដាយមិនអាចផ្ដល់ឱ្យកូនបាន 100%​ឡើយ។ ម្ដាយដឹងអំពីភាពគ្រោះថ្នាក់នៃអាសន្នរោគដ៏អាក្រក់នេះ ម្ដាយអាចដឹងបានអំពីការឈឺចាប់ និងការរងទុក្ខវេទនាពីមេរោគនេះ។ បំណងរបស់ម្ដាយក្នុងជាតិនេះ គឺការបំបាត់ចោលរាល់បញ្ហាអាក្រក់ទាំងអស់នេះ។ សុំទោសណា៎ កូនប្រុសម្ដាយ ការបែកគ្នាមួយរយៈខ្លីរបស់យើង គឺជាសំឡេងសើចរីករាយរបស់មនុស្សរាប់លាននាក់ដែលគេត្រូវការម្ដាយណា៎កូន។ នេះគឺជាប្រការមួយដែលគ្រូពេទ្យទាំងឡាយត្រូវតែធ្វើ”។

    នៅទីបញ្ចប់នៃសំបុត្រ ស្ត្រីម្នាក់នេះបានសរសេរថា ៖ “កូនប្រុស ក្រដាសវាខ្លីពេក ប៉ុន្តែក្ដីស្រឡាញ់ដែលម្ដាយមានចំពោះកូន គឺវែងជាងនេះឆ្ងាយណាស់។ ម្ដាយនឹងស្លៀកឈុតការពារមេរោគជាប់ជានិច្ច កូនកុំបារម្ភ ហើយចូរកូនធ្វើជំនួសម្ដាយ ក្នុងការការពារក្រុមគ្រួសារយើង ណា៎កូនណា៎។ ម្ដាយត្រូវការពារ និងបំពេញកាតព្វកិច្ចរបស់ម្ដាយ។ ពេលអាសន្នរោគអាក្រក់នេះបានថមថយចុះ ម្ដាយសន្យាថា នឹងត្រឡប់ទៅនៅក្បែរកូនឱ្យបានច្រើន តាមដែលអាចធ្វើទៅបាន។ ម្ដាយជឿថា កូននឹងយល់ចំពោះរឿងទាំងអស់នេះ មែនទេកូន?”។

    ថ្ងៃទី26 មករា បន្ទាប់ពីសំបុត្រខាងលើត្រូវបានគេបង្ហោះ និងចែករំលែកក្នុងបណ្ដាញសង្គមចិន មានអ្នកលេងអ៊ីនធើណិតជាច្រើន បានបង្ហាញពីអារម្មណ៍របស់ខ្លួនដោយការ Comment។

    អ្នកលេងបណ្ដាញសង្គម Weibo ម្នាក់បានបញ្ចេញមតិថា ៖ “នៅក្នុងអំឡុងពេលដែលអាសន្នរោគកំពុងរាតត្បាត សំបុត្ររបស់អ្នកគ្រូពេទ្យ Cao Xiaoying បានធ្វើឱ្យខ្ញុំរំភើប អួលដើម-ក និងពិតជាកោតសរសើរចំពោះស្មារតីជួយអ្នកជំងឺយ៉ាងអស់ពីចិត្តរបស់លោកស្រី”។

    អ្នកលេងបណ្ដាញសង្គមម្នាក់ទៀតសរសេរថា ៖ “សង្ឃឹមថា ទេវតាអាវពណ៌សទាំងឡាយ ដែលនៅតំបន់ជួរមុខនឹងបានត្រឡប់មកផ្ទះវិញដោយសុវត្ថិភាព និងបានជួបជុំគ្រួសារ”។

    សូមបញ្ជាក់ថា គិតដល់រសៀលថ្ងៃទី31មករានេះ មានអ្នកឆ្លងមេរោគ Corona សរុបជាង 9,800នាក់ ក្នុងនោះមាន 9700នាក់ស្ថិតនៅក្នុងប្រទេសចិន រួមទាំងហុងកុង ម៉ាកាវ និងកោះតៃវ៉ាន់ផងដែរ។ ចំណែកអ្នកស្លាប់ដោយសារមេរោគវីរុស Corona នេះ បានកើនឡើងដល់ 213នាក់ ដែលជនរងគ្រោះទាំងនោះ សុទ្ធតែស្ថិតនៅក្នុងប្រទេសចិន ពិសេសគឺ ក្នុងតំបន់ Wuhan ដែលជាកន្លែង “ចាប់កំណើត” នៃមេរោគវីរុស Corona ដ៏គួរ​ឱ្យភ័យខ្លាចនេះ៕

    ប្រភព៖ សារព័ត៌មានបរទេស

  • វិធីការពារសុខភាព និងសុវត្ថិភាព ពេលទៅលេងតំបន់ឆ្ងាយៗ ឬ​ទៅ​ទេស​ចរណ៍​ក្រៅ​ប្រទេស

    វិធីការពារសុខភាព និងសុវត្ថិភាព ពេលទៅលេងតំបន់ឆ្ងាយៗ ឬ​ទៅ​ទេស​ចរណ៍​ក្រៅ​ប្រទេស

    នៅក្នុងស្ថានភាពដែលមេរោគបង្កជំងឺរលាកសួតថ្មី Corona កំពុងរាតត្បាតពិភពលោកនេះ សូម​មាន​ការ​ប្រុង​ប្រយ័ត្ន ឱ្យបានខ្ពស់ ចំពោះ មេរោគឆ្លងផ្សេងៗ មិនថាតែមេរោគ Corona នោះទេ។

    Health Direct ដែលជាអង្គការសុខភាពមួយរបស់ប្រទេសអូស្ត្រាលី បានលើក​ឡើង​នូវ​ប្រការ​មួយ​ចំនួន​ដែល​លោក​អ្នកត្រូវតែយកចិត្តទុកដាក់ មុននឹងគិតធ្វើដំណើរទៅលេងតំបន់ឆ្ងាយៗ ឬទៅក្រៅប្រទេស។

    អង្គការសុខភាពមួយនេះ បានលើកឡើងថា ការស្វែងយល់អំពី​គុណភាព​នៃ​ប្រភពទឹក​នៅ​ក្នុង​តំបន់​ដែល​អ្នក​នឹង​ទៅ​លេងនោះ គឺជាការចាំបាច់ ដើម្បីធានាសុវត្ថិភាព និងសុខភាពល្អ។




    ប្រភព​៖ សារ​ព័ត៌មាន​បរទេស

  • បុរសអាមេរិកាំងម្នាក់ឆ្លងមេរោគវីរុស corona ទាំងមិនបានទៅប្រទេសចិនសោះ…

    បុរសអាមេរិកាំងម្នាក់ឆ្លងមេរោគវីរុស corona ទាំងមិនបានទៅប្រទេសចិនសោះ…

    មជ្ឈមណ្ឌលគ្រប់គ្រង និងបង្ការរោគអាមេរិក Centers for Disease Control and Prevention (CDC) កាល​ពី​​ថ្ងៃទី30 មករា បានឱ្យដឹងថា ករណីឆ្លងមេរោគ corona ថ្មីបំផុតនៅប្រទេសនេះ គឺ​មាន​ជាប់​ទាក់​ទិន​នឹងប្ដី​ប្រពន្ធ​ 1គូនៅក្រុង Chicago រដ្ឋ Illinois។

    បុរសដែលបានឆ្លងមេរោគនេះ មិនដែលធ្លាប់បានទៅប្រទេសចិនម្ដងណាឡើយ ប៉ុន្តែ​ប្រពន្ធ​របស់​គាត់​ត្រូវ​បាន​គេ​រកឃើញថា មានផ្ទុកមេរោគនេះ បន្ទាប់នាងពីត្រឡប់មកពីក្រុង Wuhan នៃប្រទេសចិនដែលជា “សម្បុក​មេរោគ” corona។

    នេះគឺជាករណីឆ្លងមេរោគវិរុស corona ពីមនុស្សទៅមនុស្សដំបូងគេនៅសហរដ្ឋអាមេរិក និង​ជា​ករណី​ដែល​អ្នក​ចម្លងមិនទាន់បង្ហាញអាការរោគអ្វីទាំងអស់ តែអាចចម្លងទៅអ្នកជិតខាងបាន។ ប៉ុន្តែ​មន្ត្រី​សុខាភិបាល​អាមេរិក​នៅតែអះអាងថា ចំពោះមុខ ហានិភ័យនៃការឆ្លងមេរោគនេះនៅអាមេរិក គឺនៅទាបនៅឡើយ។

    យ៉ាងនេះក្ដី អគ្គនាយកនៃ CDC លោក Robert Redfield បានថ្លែងថា នឹង​មាន​ការ​ឆ្លង​មេរោគ​នេះ​ពី​មនុស្ស​ទៅ​មនុស្សជាច្រើនករណីបន្ថែមទៀតនៅអាមេរិក។

    បច្ចុប្បន្ន អាមេរិកមានអ្នកផ្ទុកមេរោគវីរុស corona សរុបចំនួន 6នាក់។ ក្រៅ​ពី​ករណី​ថ្មី​បំផុត​ដែល​ឆ្លង​ពី​មនុស្ស​ទៅ​មនុស្ស គឺមាន 5ករណី ដែលសុទ្ធតែជាអ្នកទើបត្រឡប់មកពីប្រទេសចិនទាំងអស់៕

    ប្រភព៖ សារព័ត៌មានបរទេស

  • 17ឆ្នាំ ពីមេរោគ «Sars» មកដល់ «Corona» វីរុសថ្មីផ្ដាច់ជីវិតមនុស្ស…តើមួយណាសាហាវជាង?

    17ឆ្នាំ ពីមេរោគ «Sars» មកដល់ «Corona» វីរុសថ្មីផ្ដាច់ជីវិតមនុស្ស…តើមួយណាសាហាវជាង?

    ជាង17ឆ្នាំនៃការឆ្លងរាលដាលពីមេរោគ«Sars»(សារស៍) មកដល់ «Corona» បានក្លាយជាមហាវិបត្តិថ្មី ដែលមានដើមកំណើតមកពីប្រទេស(ចិន)តែមួយ តើមេរោគទាំង2 នេះ មួយណាមានអានុភាពខ្លាំងក្លាជាង? និងតើមនុស្សនៅក្នុងពិភពលោក នឹងត្រូវស្លាប់ប៉ុន្មាននាក់ទៀត?

    គ្រប់ 1ខែគត់ដែលរដ្ឋបាលចិនបានរាយការណ៍ទៅអង្គការសុខភាពពិភពលោក(WHO)អំពីការឆ្លងរាលដាលនៃ “មេរោគវីរុសកូរ៉ូណាប្រភេទថ្មី2019” លើកដំបូងកាលពីថ្ងៃទី31 ខែធ្នូ ឆ្នាំ2019។ នៅក្នុងខណៈនោះ មានអ្នកផ្ទុកមេរោគវីរុសកូរ៉ូណារួចទៅហើយ 44នាក់ ហើយមកដល់ថ្ងៃនេះ(30 មករា 2020) ទូទាំងពិភពលោកមានអ្នកឆ្លងវីរុសកូរ៉ូណាកើនឡើង 7,783នាក់ និងស្លាប់ 170នាក់។

    តាមរយៈតួលេខនេះ បើប្រៀបធៀបនឹងមេរោគ«Sars» (សារស៍)ដែលកើតឡើងក្នុងអំឡុងឆ្នាំ2002-2003 ដែលមានអ្នកឆ្លងមេរោគនេះជាង 8,000នាក់ និងស្លាប់ 774នាក់ មានន័យថា អ្នកឆ្លងវីរុសកូរ៉ូណាទូទាំងពិភពលោកនាពេលបច្ចុប្បន្ន មានភាគរយខ្ពស់ជាងដល់ទៅ 74.80% នៃអ្នកឆ្លងមេរោគ«Sars» ក្នុងរយៈវេលាត្រឹមតែ 1ខែប៉ុណ្ណោះ។

    ខណៈដែលតួលេខឆ្លងមេរោគវីរុសកូរ៉ូណានៅក្នុងប្រទេសចិន នៅថ្ងៃទី30 មករានេះ ក៏ខ្ពស់ឡើងដល់ទៅ 5,974នាក់ទៅហើយដែរ ដោយកើនពីថ្ងៃពុធ ប្រមាណ 1,500នាក់ ឬគិតជាភាគរយ គឺច្រើនជាង 30% ផ្ដួលស្ថិតិ 5,327នាក់របស់មេរោគ«Sars» ស្រេចបាច់បាត់ទៅហើយ និងបើប្រៀបធៀបពីល្បឿននៃការឆ្លងរាលដាលរបស់វីរុសកូរ៉ូណា និង«Sars»វិញ បើយើងមើលពីតួលេខដែលបានបង្ហាញពីខាងដើម ក៏នឹងឃើញថា វីរុសកូរ៉ូណាមានការឆ្លងរាលដាលលឿនរហ័សជាងច្រើនណាស់។ ត្រឹមតែ 29ថ្ងៃ ក៏មានអ្នកឆ្លងមេរោគរួចទៅហើយជាង 3,000នាក់ ខណៈដែល«Sars»ប្រើពេលយ៉ាងហោចណាស់ក៏ 5ខែដែរ ទើបមានអ្នកឆ្លងរោគច្រើនដល់ 3,000នាក់។

    តាមរយៈតួលេខដែលបង្ហាញខាងលើនេះ មិត្តអ្នកអានគេហទំព័រឡារ៉ែន ច្បាស់ជាគិតថា វីរុសកូរ៉ូណាប្រហែលជាមានអានុភាពខ្លាំងក្លាជាងមេរោគ«Sars»មិនខាន…តែការគិតនេះ វាបញ្ច្រាស់គ្នានឹងអ្នកវិទ្យាសាស្ត្រ និងអ្នកជំនាញការខាងវេជ្ជសាស្ត្រនៅក្រៅប្រទេសជាច្រើននាក់ ដែលមិនបានគិតដូច្នេះឡើយ ដោយពួកគេមើលឃើញថា អានុភាពនៃភាពខ្លាំងក្លាដែលនឹងអាចសម្លាប់ជីវិតមនុស្សនៅលើពិភពលោករបស់វីរុសកូរ៉ូណា មានតិចជាង «Sars» ព្រោះគ្រាដែល«Sars»ឆ្លងរាលដាលរាតត្បាតខ្លាំងក្លានោះ មានអត្រាការស្លាប់ខ្ពស់ដល់ទៅ 9.6%ឯណោះ។ ផ្ទុយទៅវិញ វីរុសកូរ៉ូណា មានការវាយតម្លៃថា អាចនឹងស្ថិតក្នុងអត្រា 2.2 ទៅ 3%ប៉ុណ្ណោះ។

    ត្រឡប់ទៅនិយាយអំពីការឆ្លងរាលដាលដែលលឿនរហ័សវិញ គឺមានការវាយតម្លៃចេញមកថា អ្នកឆ្លងមេរោគវីរុសកូរ៉ូណាត្រឹមតែ 1នាក់ អាចចម្លងទៅបុគ្គលផ្សេងទៀតបាន 2-3នាក់ឯណោះ។

            -“វីរុស” រាលដាលឆ្លងប្រទេស
    មុនការឆ្លងរាលដាលឆ្លងប្រទេស ប្រហែលជាយើងត្រូវថយត្រឡប់ទៅមើលពីដើមកំណើតនៃវីរុសទាំង2 នេះសិន។ ទាំងកូរ៉ូណា និងសារស៍ សុទ្ធតែចេញមកពីប្រទេសតែមួយជាមួយគ្នា គឺ “ប្រទេសចិន” និងមានប្រភពកំណើតដូចគ្នា គឺចេញពី “ផ្សារលក់អាហារស្រស់” ខុសគ្នាតែត្រង់មិនបានចេញមកពីទីក្រុង និងមណ្ឌលជាមួយគ្នាតែប៉ុណ្ណោះ។ ដោយវីរុសកូរ៉ូណាចេញមកពីទីក្រុងវូហាន មណ្ឌលហ៊ូពេយ ឯសារស៍ ចេញមកពីមណ្ឌលក្វាងទុង។

    ពីការដែល “ផ្សារលក់អាហារស្រស់” គឺជាប្រភពកំណើតនៃការឆ្លងរាលដាលរបស់មេរោគកូរ៉ូណា ដែលមានរានលក់សាច់សត្វស្រស់ច្រើនប្រភេទ ទាំងពស់ សំពោច សត្វស្លាប រួមទាំងប្រចៀវផងនោះ បានធ្វើឱ្យរដ្ឋបាលចិនចេញវិធានការតឹងរ៉ឹង ចេញបញ្ជាហាមទូទាំងប្រទេសមិនឱ្យលក់សត្វព្រៃនៅក្នុងផ្សារលក់អាហារស្រស់ ភោជនីយដ្ឋាន និងផ្សារផ្លាតហ្វ៉ម អ៊ី-ខំមើរកស៍(លក់តាមអនឡាញ) រួមទាំងការចេញបញ្ជាបិទទីក្រុង និងផ្អាកការធ្វើគមនាគមន៍ ដឹកជញ្ជូនគ្រប់ប្រព័ន្ធផ្លូវ ដោយសារខ្លាចក្លាយជាប្រភពបណ្ដុះមេរោគ និងធ្វើឱ្យកើតការរាលដាលដែលអាចនឹងធ្ងន់ធ្ងរខ្លាំងឡើងជាងពេលបច្ចុប្បន្ន និងដែលអាចនឹងដូចកាលពីសម័យមេរោគ «សារស៍» ដែលឆ្លងរាលដាលរហូតដល់ទៅ 26ប្រទេសក្នុងរយៈពេលតែ 8ខែ ខណៈដែលវីរុសកូរ៉ូណាកំពុងរាលដាលទៅដល់ 18ប្រទេសក្នុងពិភពលោក(រួមទាំងកម្ពុជាផង)ក្នុងរយៈពេលតែ 1ខែប៉ុណ្ណោះ។

    ដោយចំនួនតួលេខប្រទេសដែលបានឆ្លងរាលដាលច្រើនជាងពាក់កណ្ដាលរបស់មេរោគ សារស៍ និងទោះជាមានការទាមទារឱ្យប្រកាស “សភាវគ្រោះថ្នាក់លំដាប់ពិភពលោក” ក្ដី តែអង្គការសុខភាពពិភពលោក(WHO) បែរជាមើលឃើញថា «វាហាក់ដូចជាលឿនពេកក្នុងការប្រកាសបែបនោះ» ទៅវិញ។

            សរុបទៅ តើវីរុសកូរ៉ូណា និងសារស៍ ដូចគ្នាដែរឬទេ?

    ចម្លើយ មានទាំង “ដូចគ្នា” និង “ខុសគ្នា”
    -ចំណុចដែល “ដូចគ្នា” របស់វីរុសកូរ៉ូណា និងសារស៍ គឺ “ប្រភពបង្កើតមេរោគ”
    -និងចំណុចដែល “ខុសគ្នា” របស់វីរុសកូរ៉ូណា និងសារស៍ គឺ “ភ្នាក់ងារចម្លងរោគ”

            យើងនាំគ្នាទៅមើល ម្ដង 1Step
    1-សារស៍ ចាប់ផ្ដើមពីសត្វប្រចៀវ ចូលទៅសត្វសំពោច រួចចូលមកមនុស្ស និងអាចចម្លងពីមនុស្សទៅមនុស្សបាន តាមរយៈកម្ទេច ឬលម្អងស្លេស្ម៍ ការប៉ះពាល់ និងការក្អក ឬកណ្ដាស។
    2-វីរុសកូរ៉ូណាប្រភេទ2019 ចាប់ផ្ដើមពីសត្វប្រចៀវ ចូលទៅ “ភ្នាក់ងារចម្លងរោគអាថ៌កំបាំង” រួចចូលមកមនុស្ស និងអាចចម្លងពីមនុស្សទៅមនុស្សបាន តាមរយៈកម្ទេច ឬលម្អងស្លេស្ម៍ ការប៉ះពាល់ និងការក្អក ឬកណ្ដាស់។

    ក្រៅពីនេះ រឿងមួយទៀតដែលមេរោគទាំង2 ដូចគ្នា នោះគឺ “គ្មានវ៉ាក់សាំងការពារ”។

    យុទ្ធនាការបង្ក្រាបវីរុសកូរ៉ូណា មេរៀនដែលចិនរៀនយល់ដឹងពីមេរោគ សារស៍

    ក្នុងអំឡុងដើមឆ្នាំ2003 ដែលមេរោគសារស៍មានការឆ្លងរាលដាលយ៉ាងខ្លាំងក្លានោះ ប្រទេសជាច្រើននាំគ្នាខឹងសម្បា និងគិតថា ផលប៉ះពាល់ដែលពិបាកហួសនឹងទប់ស្កាត់ រហូតរាលដាលឆ្លងទៅ 26ប្រទេស មានអ្នកឆ្លងមេរោគជាង 8,000នាក់ និងស្លាប់ជាង 700នាក់នោះ គឺដោយសារតែចិនមានការលាក់បាំងព័ត៌មានអ្វីម្យ៉ាង ទាំងដែលការឆ្លងរាលដាលបានចាប់ផ្ដើមឡើងក្នុងខែវិច្ឆិកា ឆ្នាំ2002 តែចិនបែរជាទើបតែរាយការណ៍ជាសាធារណៈលើកដំបូងនៅក្នុងខែកុម្ភៈ ឆ្នាំ2003។ ស្ថានការណ៍កើតវិបត្តិខ្លាំង មានអ្នកស្លាប់រហូតដល់ 5នាក់រួចទៅហើយ និងឆ្លងមេរោគជាង 300នាក់ក្នុងមណ្ឌលក្វាងទុង។

    កន្លងមក នៅចុងឆ្នាំ2019 ចិនមានការផ្លាស់ប្ដូរ ដោយចាប់ផ្ដើមរាយការណ៍ជាសាធារណៈ និងទៅអង្គការសុខភាពពិភពលោកអំពីស្ថានការណ៍ឆ្លងរាលដាលក្នុងអំឡុងពេលដែលទើបតែមានការចាប់ផ្ដើមឆ្លងរាលដាល ដែលទោះជាកន្លងផុតទៅហើយ 3សប្ដាហ៍ក៏ដោយ តែក៏រាប់ថា លឿនជាងកាលពីគ្រាមុន(កាលពីមេរោគសារស៍រាតត្បាត)។

    យ៉ាងណាក៏ដោយ ទោះជាមានភាពលឿនរហ័សជាងមុន ទោះជាមានការត្រៀមវិធានការទប់ទល់ ទាំងការបិទទីក្រុង ការប្រកាសប្រាប់ប្រជាជន កាត់កាត់ផ្ដាច់ផ្លូវគមនាគមន៍ និងដឹកជញ្ជូន និងរាយការណ៍ពីបច្ចុប្បន្នភាពចំពោះអន្តរជាតិហើយក៏ដោយ តែក៏នៅតែមានភាពមិនច្បាស់លាស់ និងគួរឱ្យសង្ស័យសម្រាប់ប្រទេសជាច្រើនថា “ចិនអាចនៅមិនទាន់ស្មោះត្រង់ចំពោះការរាយការណ៍ទាំងអស់នៅឡើយ”។

    -មេរោគ2 បង្កគ្រោះថ្នាក់ ចិនជប់មន្ទីរពេទ្យឡើងក្នុងរយៈពេល 6ថ្ងៃ

    ថ្ងៃសុក្រ ទី24 មករា ឆ្នាំ2020 ចិនគាស់ “សាស៍ ម៉ូដែល” មកប្រើឡើងវិញម្ដងទៀត ដោយការសាងសង់មន្ទីរពេទ្យពិសេសសម្រាប់ទទួលអ្នកជំងឺមេរោគវីរុសកូរ៉ូណាប្រភេទថ្មី2019 ជាពិសេសតែម្ដង។

    ផ្ទៃដីជាង 25,000ម៉ែត្រការ៉េ ត្រូវបានជប់និម្មិតជាមន្ទីរពេទ្យទំហំ 1,000គ្រែអ្នកជំងឺ ដោយមានបែបគំរូដើមតាមមន្ទីរពេទ្យ សៀវ ថាំងសាន ដែលសាងឡើងដើម្បីទប់ទល់ការឆ្លងរាលដាលរបស់មេរោគសារស៍ក្នុងឆ្នាំ2003។

    កាលពីសម័យមេរោគសារស៍រាតត្បាត ចិនប្រើកម្មករជាង 4,000នាក់ សាងសង់ទាំងយប់ទាំងថ្ងៃ រហូតមន្ទីរពេទ្យកើតចេញជារូបរាងស្រេចបាច់ក្នុងរយៈពេល 7ថ្ងៃ។ ចំណែកក្នុងគ្រា វីរុសកូរ៉ូណានេះ ក៏ដូចគ្នាដែរ រដ្ឋបាលចិនដាក់កំណត់ ត្រូវសាងសង់ឱ្យហើយស្រេចក្នុងរយៈពេល 6ថ្ងៃ ដោយត្រូវត្រៀមឱ្យរួចជាស្រេចសម្រាប់ការប្រើប្រាស់នៅថ្ងៃទី3 កុម្ភៈ ឆ្នាំ2020។

    តាមរយៈស្ថានការណ៍ការឆ្លងរាលដាលនៃ វីរុសកូរ៉ូណាប្រភេទថ្មី2019 ដែលកំពុងតែឆាបឆេះខ្លាំងនាពេលនេះ ទោះជាក្នុងកម្រិតពិភពលោកនៅមិនទាន់មានការប្រកាសថាជា “សភាវវិបត្តិដែលគួរឱ្យភ័យបារម្ភ” ក៏ដោយ និងទោះជាមានអត្រាការស្លាប់ដែលទាបជាងកាលមេរោគសារស៍ក៏ដោយ តែដោយការឆ្លងរាលដាលដែលឆាប់រហ័សបែបនេះ វាអាចនឹងមានភាពអាចទៅរួចដែលថា អ្នកឆ្លងមេរោគនឹងកើនឡើងខ្ពស់ដល់ទៅ 250,000 ឬ 350,000នាក់ ដូចដែលមានការវាយតម្លៃ…។

    ហើយចាប់ពីពេលនេះទៅ ប្រហែលជាត្រូវតាមសង្កេតបែបមិនដាក់ភ្នែកហើយថា តើចិនអាចគ្រប់គ្រង “វីរុសកូរ៉ួណាប្រភេថ្មី2019” ឱ្យស្ថិតក្នុងរង្វង់កំណត់ និងបញ្ឈប់ការឆ្លងរាលដាលបានក្នុងអំឡុងពេល 8ខែដូចកាលពី មេរោគសារស៍ បានដែរឬទេ? ព្រោះបើសិនជាយូរជាងនេះ ច្បាស់ជាមានផលប៉ះពាល់ដល់ GDP របស់ចិន និងពិភពលោកយ៉ាងពិតប្រាកដ យ៉ាងតិចបំផុតក៏ប្រហែល 1-2%ដែរ៕

    ប្រភព ៖ សារព័ត៌មានបរទេស

  • ចិនព្រមានពីការកើតឡើងនៃ “សម្បុកមេរោគ” រលាកសួត “ទី2” បន្ទាប់​ពី Wuhan

    ចិនព្រមានពីការកើតឡើងនៃ “សម្បុកមេរោគ” រលាកសួត “ទី2” បន្ទាប់​ពី Wuhan

    អភិបាលខេត្ត Hebei បាននិយាយថា ជំងឺរលាកសួតដែលបង្កឡើងដោយមេរោគ Corona (nCoV) មកដល់ពេលនេះបានធ្វើឱ្យមានភាពវឹកវរជាខ្លាំងក្នុងក្រុង Huanggang (ទីក្រុង 1ទៀត)នៃខេត្តមួយនេះ។

    នៅក្នុងកិច្ចប្រជុំកាលពីថ្ងៃទី29 មករាកន្លងទៅ អភិបាលខេត្ត Hebei លោក Wang Xiaodong បានថ្លែងថា យើងមិនអាចបណ្ដោយឱ្យទីក្រុង Huanggang ក្លាយជា “សម្បុកមេរោគ” Wuhan ទី2បានទេ។ លោក Wang Xiaodong ក៏បានស្នើឱ្យបណ្ដាក្រុមហ៊ុនក្នុងខេត្ត Hebei បន្តផ្អាកសកម្មភាពរហូតដល់ក្រោយថ្ងៃទី13 កុម្ភៈ ឆ្នាំ2020។

    ទីក្រុង Huanggang មានប្រជាជនសរុប 7.5លាននាក់ ហើយវាគឺជាទីក្រុងដ៏ធំមួយដែរនៅក្បែរទីក្រុង Wuhan។ Huanggang ក៏ជាទីក្រុងមួយក្នុងចំណោមទីក្រុងដែលត្រូវបានដាក់បម្រាមគោចរដើម្បីទប់ស្កាត់ការឆ្លងរាលដាលនៃមេរោគ Corona ដែរ។ ទីក្រុងនេះ មានអ្នកស្លាប់ដោយសារមេរោគរលាកសួត Corona ចំនួន 5នាក់ និងមានអ្នកឆ្លងមេរោគនេះចំនួន 324ករណី គិតមកត្រឹមថ្ងៃទី28 មករា ឈរលំដាប់លេខ2 បន្ទាប់ពីក្រុង Wuhan ដែលជា “ស្រុកកំណើត” របស់មេរោគ Corona។

    ប្រភពព័ត៌មានបានឱ្យដឹងថា អ្នកស្លាប់ដោយសារមេរោគ nCoV (Corona) កើនដល់ 170នាក់ និងអ្នកឆ្លងមេរោគនេះក៏កើនដល់ 7,783ករណីនៅទូទាំងពិភពលោក ភាគច្រើន គឺជាប្រជាជននៅក្រុង Wuhan នេះបើគិតមកដល់ថ្ងៃទី30 មករានេះ។

    ទិន្នន័យចុងក្រោយបានបង្ហាញថា ចិនដីគោកមានអ្នកឆ្លងមេរោគនេះចំនួន7,678នាក់ ប្រទេសថៃ14នាក់ ជប៉ុន11នាក់ ហុងកុង10នាក់ សិង្ហបុរី10នាក់ កោះតៃវ៉ាន់ 8នាក់ អូស្ត្រាលី 7នាក់ ក្រុងម៉ាកាវ 7នាក់ ម៉ាឡេស៊ី 7នាក់ បារាំង 5នាក់ អាមេរិក 5នាក់ អាល្លឺម៉ង់ 4នាក់ កូរ៉េខាងត្បូង 4នាក់ អេមីរ៉េត អារ៉ាប់រួម 4នាក់ កាណាដា 3នាក់ វៀតណាម 2នាក់ កម្ពុជា 1នាក់ ហ្វាំងឡង់ 1នាក់ នេប៉ាល 1នាក់ ស្រីលង្កា 1នាក់។

    ប្រធានាធិបតីចិន លោក ស៊ី ជីនពីង បានថ្លែងនៅក្នុងកិច្ចប្រជុំជាមួយអង្គការសុខភាពពិភពលោក (WHO) កាលពីថ្ងៃទី28កន្លងទៅថា “វីរុស nCoV គឺជាបិសាច ហើយយើងនឹងមិនបណ្ដោយឱ្យពួកវាគេចខ្លួនបានឡើយ។ ចិននឹងបង្កើនកិច្ចសហប្រតិបត្តិការអន្តរជាតិ និងស្វាគមន៍ WHO ដែលចូលរួមបេសកកម្មប្រឆាំងអាសន្នរោគនេះ។ ចិនមានជំនឿចិត្តថា នឹងអាចទប់ស្កាត់វីរុសនេះបាន”។

    អ្នកជំនាញជាច្រើនយល់ថា មេរោគប្រភេទថ្មី nCoV នេះ មិនសម្លាប់មនុស្សច្រើនដូចមេរោគ SARS មែន ប៉ុន្តែពួកគេនៅតែព្រមានអំពីការកើនឡើងនៃករណីឆ្លងដ៏លឿនរហ័ស ហើយចំណុចពិសេសជាច្រើនរបស់មេរោគនេះ មិនទាន់ត្រូវបានគេដឹងលម្អិតនៅឡើយ។

    ដូចនឹងជំងឺផ្លូវដង្ហើមផ្សេងទៀត មេរោគរលាកសួត Corona នេះ ឆ្លងពីមនុស្សម្នាក់ទៅមនុស្សម្នាក់ តាមរយៈគ្រាប់ល្អិតនៃធាតុរាវនៅពេលកណ្ដាស់ ក្អក ឬការប៉ះពាល់អ្នកជំងឺ។ មេរោគនេះក៏អាចឆ្លងទៅអ្នកដទៃបាន នៅមុនពេលអ្នកជំងឺមិនទាន់មានរោគសញ្ញាដែរ។

    WHO បានប្រកាសថា នឹងធ្វើការកោះប្រជុំបន្ទាន់មួយ ដើម្បីដោះស្រាយបញ្ហានៃមេរោគនេះ៕

    ប្រភព៖ សារព័ត៌មានបរទេស

  • ក្រសួងទេសចរណ៍ ដាក់ចេញវិធានការឆ្លើយតបនឹងការឆ្លងរាលដាលនៃជំងឺផ្លូវដង្ហើមថ្មី Corona

    ក្រសួងទេសចរណ៍ ដាក់ចេញវិធានការឆ្លើយតបនឹងការឆ្លងរាលដាលនៃជំងឺផ្លូវដង្ហើមថ្មី Corona

    ក្រសួងទេសចរណ៍របស់កម្ពុជា ថ្មីៗនេះបានចេញសេចក្ដីប្រកាសព័ត៌មានមួយទាក់ទិននឹងវិធានការទប់ស្កាត់មេរោគរលាកសួត Corona។

    នៅលើទំព័រ Facebook របស់ខ្លួន ក្រសួងទេសចរណ៍បានសរសេរថា៖ “ទោះជាពិភពលោកកំពុងប្រឈមនឹងជំងឺរលាកផ្លូវដង្ហើមថ្មី ដែលបង្កឡើងដោយវីរុសកូរ៉ូណា (Coronavirus)ក៏ដោយ ប៉ុន្តែកម្ពុជានៅតែជាគោលដៅទេសចរណ៍ដែលមានសុខសុវត្ថិភាពសម្រាប់ភ្ញៀវទេសចរគ្រប់គ្នា ដោយធានាបាននូវការគ្រប់គ្រងបញ្ហាជំងឺថ្មីនេះ ដោយហ្មត់ចត់”។

    ក្រសួងទេសចរណ៍បានសរសេរទៀតថា៖ “ទោះជាយ៉ាងនេះក្តី ដើម្បីឆ្លើយតបនឹងស្ថានភាពដែលកំពុងផ្ទុះជំងឺនេះ ក្រសួងទេសចរណ៍បានដាក់ចេញនូវវិធានការមួយចំនួនផងដែរ”។

    ឯកឧត្ដម បណ្ឌិត ថោង ខុន រដ្ឋមន្ត្រីក្រសួងទេសចរណ៍ ធ្លាប់​បាន​ប្រកាសដោយភាពជឿជាក់ថា កម្ពុជានៅតែជាគោល​ដៅទេសចរណ៍ដ៏កក់ក្តៅសម្រាប់ភ្ញៀវទេសចរគ្រប់គ្នា ដែលនៅតែមានការការពារសុវត្ថិភាព សន្តិសុខ សណ្តាប់​ធ្នាប់ នៅតែត្រៀមទទួលស្វាគមន៍ វត្តមានភ្ញៀវអន្តរជាតិជានិច្ច ពិសេសគឺធានាបានការគ្រប់គ្រងបញ្ហាជំងឺរលាកសួតប្រភេទថ្មី (coronavirus) បានយ៉ាងជឿជាក់បំផុត។

    ខាងក្រោមនេះជាសេចក្តីប្រកាសរបស់ក្រសួងទេសចរណ៍ អំពីវិធានការមួយចំនួនដែលឆ្លើយតបនឹងការផ្ទុះជំងឺផ្លូវដង្ហើមថ្មី Corona ៖


    ប្រភព​៖ ក្រសួងទេសចរណ៍

  • ពលរដ្ឋអាមេរិកនាំគ្នាសម្រុកទៅទិញ “ម៉ាស់” មកស្ដុកទុកប្រើរយៈពេលយូរ

    ពលរដ្ឋអាមេរិកនាំគ្នាសម្រុកទៅទិញ “ម៉ាស់” មកស្ដុកទុកប្រើរយៈពេលយូរ

    នៅសហរដ្ឋអាមេរិក ប្រជាជនជាច្រើនបាននាំគ្នាទិញម៉ាស់ក្នុងចំនួនច្រើនៗ ដើម្បីទុកប្រើឱ្យបានយូរខែ ព្រោះ​តែ​ភ័យខ្លាចការឆ្លងរាលដាលនៃមេរោគ corona និងភ័យខ្លាចខ្វះឧបករណ៍ការពារដ៏សំខាន់មួយនេះ។

    នៅលើផ្សារអនឡាញ Amazon អ្នកផ្គត់ផ្គង់ធំៗជាច្រើនបានឱ្យដឹងថា ខ្លួនត្រូវរង់ចាំរយៈពេលច្រើនសប្ដាហ៍ទៀតទើបអាចប្រគល់ទំនិញទៅអតិថិជនបាន។ អ្នកជំនាញផ្នែកសុខាភិបាលក៏បានព្រួយបារម្ភ​អំពី​ហានិ​ភ័យ​នៃ​ការខ្វះខាតម៉ាស់នៅក្នុងទីផ្សារដែរ ដែលការណ៍នេះនឹងនាំឱ្យមានមនុស្សកាន់តែច្រើនមានអារម្មណ៍កាន់តែភ័យខ្លាចឡើង ហើយអាចបណ្ដាលឱ្យទំនិញនេះឡើងថ្លៃបានទៀតផង។

    ម៉ាស់ត្រូវបានគេចាត់ទុកជាខែលការពារមួយ ដែលអាចជួយកាត់បន្ថយការឆ្លងមេរោគនានានៅតាមទីប្រជុំជន ដូចជា ផ្សារ មន្ទីរពេទ្យ ការិយាល័យ ក្នុងរថយន្តក្រុង ឬភោជនីយដ្ឋាន។ល។

    យោងតាមអ្នកជំនាញ ការដែលមនុស្សនាំគ្នាទៅទិញម៉ាស់ច្រើនបែបនេះ គឺមានន័យថា បណ្ដាមន្ទីរពេទ្យ ឬមណ្ឌលសុខភាពក៏កំពុងខ្វះខាតម៉ាស់ដែរ។ ក្រុមគ្រូពេទ្យដែលមានតួនាទីព្យាបាល និងថែទាំអ្នកជំងឺផ្លូវដង្ហើម គឺជាអ្នកដែលត្រូវប្រើប្រាស់ម៉ាស់ច្រើនជាងគេ នេះបើយោងតាមមជ្ឈមណ្ឌលគ្រប់គ្រង និងបង្ការជំងឺអាសន្នរោគអាមេរិក​(Centers For Disease Control & Prevention ឬ CDC)។

    រដ្ឋមន្ត្រីក្រសួងសុខាភិបាលអាមេរិក

    មន្ត្រីម្នាក់នៅ CDC បានឱ្យដឹងថា ពួកគេកំពុងចរចាជាមួយបណ្ដារោងចក្រផលិតម៉ាស់ ដើម្បីធ្វើយ៉ាងណាឱ្យមានម៉ាស់គ្រប់គ្រាន់តាមតម្រូវការ។ ប៉ុន្តែបណ្ឌិត Anita Patel មកពី CDC បាននិយាយថា៖ “យើងខ្ញុំគិតថា អ្នករាល់គ្នា នាំគ្នាទិញម៉ាស់មកទុកប្រើប្រាស់ គឺដោយសារការភ័យខ្លាច មិនមែនដោយសារតម្រូវការជាក់ស្ដែងនោះទេ”។

    រដ្ឋមន្ត្រីក្រសួងសុខាភិបាលអាមេរិក (United States Department of Health & Human Services (HHS) លោក Alex M. Azar II បានថ្លែងថា ការស្ដុកទុកម៉ាស់ក្នុងចំនួនច្រើន គឺជាការមិនចាំបាច់សម្រាប់ជនជាតិអាមេរិក ព្រោះថា ហានិភ័យទាក់ទិននឹងមេរោគនេះមិនខ្ពស់ទេ។

    ម៉ាស់ គឺជាសម្ភារសុខាភិបាលមួយប្រភេទដែលត្រូវបានស្ដុកទុកក្នុងឃ្លាំងយុទ្ធសាស្ត្ររបស់អាមេរិក ហើយវាត្រូវបានផ្គត់ផ្គង់ទៅឱ្យមន្ទីរពេទ្យរដ្ឋនានានៅទូទាំងប្រទេស។ ប៉ុន្តែអ្នកជំនាញអាមេរិកបច្ចុប្បន្នក៏មិនដឹងដែរថា ម៉ាស់ដែលមាននៅក្នុងឃ្លាំង និងប្រភពផ្គត់ផ្គង់មានចំនួនគ្រប់សម្រាប់តម្រូវការដែរឬក៏អត់នោះទេ បើសិនជាការឆ្លងនៃអាសន្នរោគនេះអូសបន្លាយពេលយូរ។

    ប្រភព​ព័ត៌មាន​បាន​ឱ្យ​ដឹង​ថា គិត​ត្រឹម​យប់​ថ្ងៃ​ទី 29​ មករា 2020 អាមេរិក​មាន​អ្នក​​ឆ្លង​មេរោគ corona ចំនួន 5ករណី។

    រដ្ឋាភិបាលនៃប្រទេសជាច្រើនក្នុងពិភពលោក កំពុងព្យាយាមនាំពលរដ្ឋរបស់ពួកគេចេញពីតំបន់គ្រោះថ្នាក់ Wuhan នៃប្រទេសចិន ខណៈដែលមានអ្នកស្លាប់ដោយសារមេរោគ corona នេះ កំពុងកើនឡើងជាបន្តបន្ទាប់។

    ក្រុមមន្ត្រីចិនបានឱ្យដឹងថា ចំនួនអ្នកស្លាប់ដោយសារឆ្លងមេរោគរលាកសួតថ្មី corona បានកើនដល់ 170នាក់ និងអ្នកកំពុងផ្ទុកមេរោគនេះមានចំនួន 7,711នាក់៕

    ប្រភព៖ សារព័ត៌មានបរទេស