Tag: អាសន្នរោគ

គួរឱ្យអាណិតណាស់! កូនកំលោះ និងកូនក្រមុំ ត្រូវ “ឃុំខ្លួនឯង” ក្នុងផ្ទះ ខណៈពិធីរៀបការធ្វើឡើងនៅឯសណ្ឋាគារ ព្រោះតែខ្លាច…
កូនកំលោះ និងកូនក្រមុំ រួមជាមួយឪពុកម្ដាយ ត្រូវបង្ខាំងខ្លួនឯងក្នុងផ្ទះ ខណៈដែលពិធីអាពាហ៍ពិពាហ៍របស់ពួកគេប្រារព្ធឡើងនៅឯសណ្ឋាគារតាមការគ្រោងទុក។
លោក Yu អាយុ 37ឆ្នាំ ធ្វើការផ្នែកសំណង់ បានត្រឡប់មកស្រុកកំណើតម្ដាយក្នុងខេត្ត Hunan ប្រទេសចិន មុនរដូវចូលឆ្នាំចិន ហើយបានត្រឡប់មកដល់សិង្ហបុរីវិញនៅថ្ងៃទី30 មករា។ ពិធីជប់លៀងអាពាហ៍ពិពាហ៍របស់គាត់ និងភរិយាបានត្រូវធ្វើឡើងនៅក្នុងសណ្ឋាគារមួយកាលពីថ្ងៃទី2 កុម្ភៈ ប៉ុន្តែ ដោយសារតែគេទើបត្រឡប់មកពីតំបន់មានអាសន្នរោគកូរ៉ូណា គម្រោងរបស់ពួកគេក៏ត្រូវបានផ្លាស់ប្ដូរ។
កូនកំលោះរូបនេះបាននិយាយថា ៖ “ភ្ញៀវដែលពួកខ្ញុំបានអញ្ជើញ មានការព្រួយបារម្ភនៅពេលដឹងថា ពួកខ្ញុំទើបត្រឡប់មកពីប្រទេសចិន ទើបយើងខ្ញុំសម្រេចចិត្តនៅដាច់ដោយឡែកពីមនុស្សម្នាក្នុងរយៈពេល 14ថ្ងៃ”។
ពិធីជប់លៀងអាពាហ៍ពិពាហ៍ នៅតែប្រារព្ធឡើងតាមការគ្រោងទុក ភ្ញៀវដែលបានអញ្ជើញ បានមកចូលរួមគ្រប់គ្នា។ កូនកំលោះ និងកូនក្រមុំត្រូវបង្ខាំងខ្លួនក្នុងផ្ទះ ហើយទទួលភ្ញៀវតាមរយៈអេក្រង់ទូរទស្សន៍ដោយការផ្សាយផ្ទាល់តាមអ៊ីនធើណិត។ កូនកំលោះនិយាយថា៖ “សូមអរគុណលោក លោកស្រី និងមិត្តទាំងអស់ដែលបានអញ្ជើញចូលរួមក្នុងពិធីមង្គលការរបស់យើងខ្ញុំ។ សូមមេត្តាអធ្យាស្រ័យផងដែលយើងខ្ញុំមិនអាចនិយាយពាក្យអរគុណដោយផ្ទាល់បាន”។ ភ្លាមនោះ សម្លេងទះដៃក៏លាន់កងរំពងឡើង។
ជាងនេះទៅទៀត ពួកគេថែមទាំងឆ្លៀតធ្វើពិធីមង្គលការបែបប្រពៃណីចិន និងអញ្ជើញភ្ញៀវកិត្តិយសឡើង លើ ឆាកដើម្បីជល់កែវជាមួយពួកគេទៀតផង។ ដោយសារតែឪពុកម្ដាយរស់នៅជាមួយកូន ដូច្នេះពួកគេក៏ត្រូវនៅដាច់ដោយឡែកពីមនុស្សម្នា។ ក្នុងពិធីជប់លៀងនេះ មានតែប្អូនស្រីរបស់កូនកំលោះប៉ុណ្ណោះ ជាអ្នកទទួលភ្ញៀវដោយផ្ទាល់។
ទីភ្នាក់ងារសារព័ត៌មានចិន Chinapress បានឱ្យដឹងថា បន្ទាប់ពីពិធីរៀបការនៅសិង្ហបុរីនេះ កូនកំលោះនិងកូនក្រមុំនឹងបន្តរស់នៅដាច់ដោយឡែកពីគេឯង ហើយពួកគេនឹងចូលធ្វើការវិញចាប់ពីថ្ងៃទី15កុម្ភៈខាងមុខ បើសិនជាពួកគេមិនមានផ្ទុកមេរោគវីរុសកូរ៉ូណា៕
ប្រភព៖ សារព័ត៌មានបរទេស
February 5, 2020
សម្តេច ហ៊ុន សែន ជាមេដឹកនាំដំបូងគេក្នុងលោក ដែលបានអញ្ជើញទៅដល់ប្រទេសចិន ខណៈប្រទេសនេះកំពុងរងការរាតត្បាតពីមេរោគកូរ៉ូណា
សម្តេចនាយករដ្ឋមន្ត្រី ហ៊ុន សែន បានក្លាយជាមេដឹកនាំដំបូងគេដែលបានអញ្ជើញទៅដល់ប្រទេសចិន ខណៈប្រទេសនេះកំពុងរងការរាតត្បាតអាសន្នរោគរលាកសួតដ៏សាហាវបង្កឡើងដោយវីរុសកូរ៉ូណានៅទូទាំងប្រទេស ដែលគិតមកដល់ពេលនេះ វាបានសម្លាប់មនុស្សដល់ទៅ 493នាក់ និងជាង24,587នាក់ផ្សេងទៀតកំពុងផ្ទុកមេរោគនេះ។
រសៀលថ្ងៃទី5កុម្ភៈនេះ នាយករដ្ឋមន្ត្រីកម្ពុជា សម្ដេច ហ៊ុន សែន បានដឹកនាំគណៈប្រតិភូកម្ពុជា ចេញពីក្រុងសេអ៊ូល ប្រទេសកូរ៉េខាងត្បូង និងបានអញ្ជើញទៅដល់អាកាសយានដ្ឋានក្រុងប៉េកាំង។ រដ្ឋមន្ត្រីការបរទេសចិន លោក វ៉ាង យី ក៏បានអញ្ជើញមកទទួលសម្ដេច ហ៊ុន សែន ដោយផ្ទាល់។
ក្នុងក្រុមប្រតិភូនេះ គេឃើញមានវត្តមានរបស់លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក ហ៊ុន ម៉ាណែត រួមនិងលោកឧកញ៉ា គិត ម៉េងផងដែរ។
សារព័ត៌មាន CCTV បានរាយការណ៍ថា សម្ដេច ហ៊ុន សែន បានមានប្រសាសន៍ច្រើនទាក់ទិននឹងបញ្ហាអាសន្នរោគកូរ៉ូណា ហើយថា កម្ពុជាជឿជាក់ថា ប្រទេសចិននឹងដោះស្រាយបញ្ហានេះបានយ៉ាងឆាប់រហ័ស។
សម្ដេច ហ៊ុន សែន ក៏បានថ្លែងទៀតថា ប្រជាជនកម្ពុជា នឹងចែករំលែកការលំបាករបស់ប្រជាជនចិន នេះបើតាម CCTV។
ប្រភពព័ត៌មានបានប្រាប់ឱ្យដឹងថា លោកស្រី Hua Chunying (អ្នកនយោបាយចិន និងជាប្រធាននាយកដ្ឋានព័ត៌មាននៃក្រសួងការបរទេសចិន) បានថ្លែងថា ប្រទេសចិនពិតជាយល់អំពីការព្រួយបារម្ភរបស់នាយករដ្ឋមន្ត្រីកម្ពុជា ចំពោះនិស្សិតខ្មែរដែលកំពុងស្ថិតនៅក្នុងក្រុង Wuhan។
លោកស្រី Hua Chunying បន្តថា ប្រទេសចិនយកចិត្តទុកដាក់លើសុវត្ថិភាពរបស់និស្សិតកម្ពុជា ហើយថានឹងបន្តប្រឹងប្រែងការពារពួកគេដូចទៅនឹងប្រជាជនចិន៕
ប្រភព៖ សារព័ត៌មានបរទេស
February 5, 2020
ជប៉ុនរកឃើញអ្នកដំណើរក្នុងនាវាទេសចរណ៍កម្សាន្តមួយ ឆ្លងមេរោគ “វីរុសកូរ៉ូណា” យ៉ាងតិច 10នាក់
រដ្ឋមន្ត្រីក្រសួងសាធារណៈសុខាភិបាលរបស់ប្រទេសជប៉ុនបានអះអាងនៅថ្ងៃនេះថា អ្នកដំណើរយ៉ាងតិច 10នាក់នៅលើនាវាទេសចរណ៍កម្សាន្តដែលត្រូវបានឃាត់ទុកពិនិត្យមេរោគនៅឯកំពង់ផែយ៉ូកូហាម៉ា មានលទ្ធផលពិនិត្យមេរោគវីរុសកូរ៉ូណាប្រភេទថ្មី “វិជ្ជមាន” និងរំពឹងថា នឹងរកឃើញអ្នកឆ្លងមេរោគនេះបន្ថែមទៀត ក្នុងអំឡុងពេលដែលក្រុមគ្រូពេទ្យកំពុងធ្វើការត្រួតពិនិត្យរាងកាយអ្នកដំណើរ និងក្រុមនាវិកជាង 3,000នាក់។
ខាត់ស៊ីណូប៊ុ ខាតូ រដ្ឋមន្ត្រីក្រសួងសាធារណៈសុខាភិបាលជប៉ុន បានបញ្ជាក់នៅក្នុងសន្និសីទសារព័ត៌មានកាលពីព្រឹកមិញ(ថ្ងៃទី5 កុម្ភៈ)ថា អ្នកឆ្លងមេរោគទាំង 10នាក់ នឹងត្រូវបញ្ជូនទៅមន្ទីរព្យាបាលរោគមួយកន្លែង ចំណែកអ្នកដំណើរ និងក្រុមនាវិកប្រមាណជា 3,700នាក់ទៀត នឹងត្រូវបង្ខាំងការពាររោគនៅលើនាវាទេសចរណ៍កម្សាន្តរបស់ក្រុមហ៊ុន ខានីវ៉ាល់ ខប់ រយៈពេល 14ថ្ងៃ។
លោក ខាតូ បានបញ្ជាក់ទៀតថា គ្រប់គ្នានៅលើនាវាទេសចរណ៍កម្សាន្តនោះ ធ្លាប់បានឆ្លងកាត់ការពិនិត្យសុខភាពរយៈដំបូងរួចមកហើយ ដែលតាមរយៈដំណាក់កាលនោះ នឹងនាំឆ្ពោះទៅរកការសុំពិនិត្យសុខភាពអ្នកដំណើរ និងក្រុមនាវិកចំនួនត្រឹមតែ 273នាក់ប៉ុណ្ណោះ ដោយក្នុងចំនួនអ្នកដែលដឹងលទ្ធផលហើយមានចំនួន 31នាក់ រកឃើញអ្នកផ្ទុកមេរោគវីរុសកូរ៉ូណា 10នាក់។ ទាំងអស់នេះ មន្ត្រីសុខាភិបាលជប៉ុននឹងនៅតែតាមដានសង្កេតមើលអ្នកដំណើរ និងក្រុមនាវិកទាំងនោះថា តើនឹងមានអាការឈឺថ្កាត់ដែរឬទេ និងអាចនឹងត្រូវមានការសុំពិនិត្យសុខភាពបន្ថែមទៀត។
ស្ថានីយទូរទស្សន៍ NHK បានរាយការណ៍ថា ក្នុងចំណោមអ្នកឆ្លងមេរោគទាំងនោះ មានពលរដ្ឋជប៉ុន 3នាក់ និងទាំង 10នាក់នោះ មិនមានអាការធ្ងន់ធ្ងរទេ។ អ្នកឆ្លងមេរោគដែលរកឃើញ បានធ្វើឱ្យចំនួនអ្នកឆ្លងមេរោគវីរុសកូរ៉ូណាក្នុងប្រទេសជប៉ុនដែលបានអះអាងហើយ កើនឡើងដល់ 33នាក់។ កាលពីពេលមុននេះ NHK ធ្លាប់បានបញ្ជាក់ថា ក្រុមមន្ត្រីជប៉ុននឹងធ្វើការពិនិត្យសុខភាពអ្នកដែលបង្ហាញអាការគួរឱ្យសង្ស័យ ដូចជាមានអាការគ្រុនក្ដៅខ្លួន ឬធ្លាប់មានទំនាក់ទំនងជិតស្និទ្ធជាមួយបុគ្គលដែលមានអាការដូចខាងដើម ខណៈដែលមន្ត្រីក្រសួងសាធារណៈសុខាភិបាលម្នាក់បានអះអាងថា “មិនមែនគ្រប់គ្នាទេ” ដែលនឹងត្រូវឆ្លងកាត់ការពិនិត្យ PCR ឬ Polymerase Chain Reaction នេះ ដោយសារតែប្រើពេលវេលាយូរ និងមិនមានភាពចាំបាច់។
ប្រតិបត្តិការពិនិត្យសុខភាពអ្នកដំណើរ និងក្រុមនាវិក បានចាប់ផ្ដើមតាំងពីពេលល្ងាចថ្ងៃចន្ទ(ទី3) បន្ទាប់ពីមានអ្នកក្រុងហុងកុងវ័យ 60ឆ្នាំម្នាក់ដែលធ្លាប់ធ្វើដំណើរតាមនាវាទេសចរណ៍កម្សាន្តនេះកាលពីខែមករា បានឆ្លងមេរោគវីរុសកូរ៉ូណា។
ខានីវ៉ាល់ ជេភែន បានបញ្ជាក់កាលពីថ្ងៃអង្គារ ម្សិលមិញថា នាវាកម្សាន្តមួយទៀត គឺដាយម៉ន់ដ៍ ព្រីនសេស ចាំបាច់ត្រូវពន្យារពេលការចេញដំណើរចេញពីយ៉ូកូហាម៉ា និងកំពង់ផែកូបេ ក្នុងសប្ដាហ៍នេះ ដោយសារតែមានបញ្ជាឱ្យបង្ខាំងពិនិត្យមេរោគ។
ជំងឺឆ្លងរាលដាលដែលមានដើមកំណើតមកពីមណ្ឌលហ៊ូពេយរបស់ចិន បានសម្លាប់ជីវិតមនុស្សរួចទៅហើយជាង 400នាក់ និងមានអ្នកឆ្លងជំងឺនេះជាង 20,000នាក់ទៀត៕
ប្រភព៖ សារព័ត៌មានបរទេស
February 5, 2020
ជនជាតិចិនកំពុងរងការរើសអើងកាន់តែច្រើនឡើងៗ ដោយសារតែ…
នៅប្រទេសជប៉ុន hashtag (ប្រភេទ tag ដែលត្រូវបានប្រើនៅលើបណ្ដាញសង្គម ដើម្បីងាយស្រួលឱ្យអ្នកផ្សេងស្វែងរកទិន្នន័យពាក់ព័ន្ធនឹងពាក្យដែលបានសរសេរក្នុង tag) ChineseDon’tComeToJapan (ជនជាតិ ចិនកុំមកប្រទេសជប៉ុន) ត្រូវបានគេប្រើប្រាស់ច្រើនគួរឱ្យព្រួយបារម្ភ។
នៅឯប្រទេសសិង្ហបុរីឯណោះវិញ អ្នកស្រុករាប់ម៉ឺននាក់ បានចុះហត្ថលេខាលើញត្តិមួយច្បាប់ អំពាវនាវឱ្យរដ្ឋា ភិបាលចេញបញ្ជាហាមពលរដ្ឋចិនចូលមកទឹកដីរបស់ពួកគេ។
ភោជនីយដ្ឋាន និងហាងទំនិញជាច្រើននៅប្រទេសកូរ៉េខាងត្បូង នាំគ្នាដាក់បង្ហាញបដាដែលមានសរសេរថា មិនទទួលស្វាគមន៍អ្នកមកពីចិនដីគោក។ល។ ចំណែកប្រជាជនក្រុងបាងកក ប្រទេសថៃឯណោះវិញ ម្នាក់ៗក៏មិនហ៊ានទៅកាន់ទីប្រជុំជនដែលមានជនជាតិចិនច្រើន(China Town)នោះដែរ ជាពិសេសផ្សារទំនើបកណ្ដាលក្រុងជាដើម។ នៅឯហាងកែសម្ផស្សមួយក្នុងតំបន់ Gangnam ដែលមានមនុស្សម្នាច្រើននៅក្នុងក្រុង សេអ៊ូល ប្រទេសកូរ៉េខាងត្បូង ក៏បានស្នើឱ្យបុគ្គលិករបស់ខ្លួនទទួលបម្រើតែភ្ញៀវក្នុងស្រុក និងភ្ញៀវ ចិនណាដែលបានមកកាន់កូរ៉េខាងត្បូងចាប់ពី 14ថ្ងៃឡើងទៅ គិតមកដល់ថ្ងៃដែលម្ចាស់ហាងនោះប្រកាស។
ពលរដ្ឋកូរ៉េខាងត្បូង នាំគ្នាស្នើរដ្ឋាភិបាល ឱ្យហាមអ្នកទេសចរណ៍ចិនចូលស្រុកបណ្ដោះអាសន្ន
Yaeko Suenaga ម្ចាស់ភោជនីយដ្ឋាន sushi មួយនៅក្នុងក្រុងតូក្យូ បាននិយាយថា គាត់យល់អំពីការភ័យព្រួយរបស់ម្ចាស់អាជីវកម្ម ដែលបានបដិសេធការទទួលបម្រើភ្ញៀវពីចិនដីគោក។
Suenaga ឱ្យដឹងថា ៖ “ខ្ញុំមិនគិតថា ប្រការនេះចាប់ផ្ដើមពីការរើសអើងពូជសាសន៍នោះទេ ប៉ុន្តែ វាកើតឡើងពីការភ័យខ្លាចចំពោះហានិភ័យដែលអាចឆ្លងមេរោគមួយប្រភេទដែលអាចសម្លាប់មនុស្សបាន”។ ភោជនីយដ្ឋានរបស់អ្នកស្រី នៅតែបន្តទទួលភ្ញៀវ ប៉ុន្តែបុគ្គលិករបស់គាត់សុទ្ធតែត្រូវពាក់ម៉ាស់ការពារជាប់ជានិច្ច។
Kwong Wing Catering ដែលជាបណ្ដាញភោជនីយដ្ឋានមួយនៅក្រុងហុងកុង ក៏បានចេញសេចក្ដីប្រកាសដែរថា ខ្លួនទទួលបម្រើតែភ្ញៀវណាដែលនិយាយភាសាអង់គ្លេស ឬភាសាចិនក្វាងតុងតែប៉ុណ្ណោះ។
Karen Eggleston អគ្គនាយកនៃកម្មវិធីគោលនយោបាយសុខាភិបាលអាស៊ី នៃមជ្ឈមណ្ឌលស្រាវជ្រាវអាស៊ី-ប៉ាស៊ីហ្វិក របស់សាកលវិទ្យាល័យ Stanford បានឱ្យដឹងថា៖ “ការដែលរក្សាខ្លួនឱ្យនៅឆ្ងាយពីកត្តាដែលអាចធ្វើឱ្យឆ្លងអាសន្នរោគ គឺជាការប្រតិកម្មធម្មតារបស់មនុស្ស ពិសេសគឺចំពោះមេរោគដែលមិនទាន់មានថ្នាំព្យាបាល”។
នៅប្រទេសចិន តំបន់មួយចំនួនបានបង្កើតក្រុមល្បាតពិសេសដើម្បីទប់ស្កាត់មិនឱ្យអ្នកស្រុក Wuhan ចូលមកក្នុងតំបន់របស់ពួកគេ
នៅប្រទេសអូស្ត្រាលីវិញ The Herald Sun បានបង្ហោះពាក្យមួយឃ្លា “China Virus Panda-monium” នៅក្បែររូបភាពម៉ាស់ពណ៌ក្រហម (អានឱ្យខុសបន្តិច “pandemonium” ដែលមានន័យថា “មហាអាសន្នរោគ” ហើយបូកជាមួយ “panda” ដែលមានន័យថា ខ្លាឃ្លុំផេនដាដែលជាសត្វតំណាងឱ្យប្រទេសចិន)។ ទង្វើនេះបានធ្វើឱ្យជនជាតិអូស្ត្រាលីដើមកំណើតចិនចំនួន 46,000នាក់ មានការខឹងសម្បាយ៉ាងខ្លាំង ហើយបាននាំគ្នាចុះហត្ថលេខាលើញត្តិមួយ ហៅទង្វើនេះថា ជាការរើសអើងពូជសាសន៍ ដែលមិនអាចទទួលយកបាន។
នៅឯអូស្ត្រាលីនោះដែរ Andy Miao អាយុ 24ឆ្នាំ ជានិស្សិតជនជាតិចិន ដែលទើបត្រឡប់មកពីប្រទេសចិន បានឱ្យដឹងថា អ្នកដំណើរនៅលើមធ្យោបាយធ្វើដំណើរសាធារណៈនានា សុទ្ធតែមើលមកគាត់ក្នុងន័យភ័យខ្លាច បើសិនគាត់មិនពាក់ម៉ាស់។
នៅក្នុងមួយទសវត្សរ៍ចុងក្រោយនេះ គេសង្កេតឃើញថា ចំនួនទេសចរជនជាតិចិន បានកើនឡើងយ៉ាងច្រើន នៅទូទាំងពិភពលោក។ ប្រការនេះហើយ ធ្វើឱ្យបណ្ដាប្រទេសដែលទទួលឥទ្ធិពល ឬផលប្រយោជន៍ច្រើនពីចិន បានបង្ហាញសកម្មភាពទប់ស្កាត់ការរើសអើងអ្នកទេសចរដែលមកពីចិនដីគោក ដោយរូបភាពផ្សេងៗគ្នា។ នៅក្រុង Toronto ប្រទេសកាណាដា អ្នកនយោបាយ គណៈគ្រប់គ្រងសាលា និងក្រុមសង្គមស៊ីវិលមួយចំនួន បានអំពាវនាវកុំឱ្យពលរដ្ឋខ្លួនមានការរើសអើងដូចកាលឆ្នាំ 2003 ដែលពេលនោះ អាសន្នរោគ SARS បានសម្លាប់មនុស្ស 44នាក់នៅទីនោះ។
អ្នកដំណើរជនជាតិចិន
នៅប្រទេសឥណ្ឌូនេស៊ី បើទោះបីជារដ្ឋាភិបាលបានផ្អាករាល់ជើងហោះហើរពីក្រុង Wuhan ប្រទេសចិនក្ដី តែអភិបាលរដ្ឋ West Sumatra លោក Irwan Prayitno មិនគាំទ្រឡើយចំពោះការស្នើរបស់តំណាងពលរដ្ឋមួយចំនួនដែលសុំឱ្យផ្អាកការទទួលយកភ្ញៀវទេសចរពីចិន។ កាលពីចុងខែមករា លោក Irwan Prayitno បានធ្វើដំណើរទៅទទួលអ្នកទេសចរចិនដីគោកចំនួន 174នាក់ដោយរូបលោកផ្ទាល់ទៀតផង។
Michiko Kubota ដែលជាម្ចាស់ហាងសម្លៀកបំពាក់ធំមួយនៅឯក្រុងតូក្យូ បានឱ្យដឹងថា នាងសង្ឃឹមថា រាជរដ្ឋាភិបាលជប៉ុន អាចនឹងធ្វើសកម្មភាពដើម្បីជួយសម្រួលដល់ពលរដ្ឋចិនដែលកំពុងរស់នៅទីនោះ៕
ប្រភព៖ សារព័ត៌មានបរទេស
February 5, 2020
កូរ៉េខាងត្បូងដាក់ពន្ធនាគារច្រើនឆ្នាំ ចំពោះជនដែលឆ្លៀតឱកាសដំឡើងថ្លៃម៉ាស់
រដ្ឋាភិបាលកូរ៉េខាងត្បូងបានប្រកាសថា ឈ្មួញទាំងឡាយណាដែលឆ្លៀតឱកាសដំឡើងថ្លៃម៉ាស់ និងផលិតផលជួយទប់ស្កាត់វីរុសកូរ៉ូណា នឹងត្រូវផ្ដន្ទាទោសដាក់ពន្ធនាគាររហូតដល់ពី 2ឆ្នាំ។
ក្រសួងសេដ្ឋកិច្ច និងហិរញ្ញវត្ថុកូរ៉េខាងត្បូង បានឱ្យដឹងកាលពីម្សិលម៉្ងៃ (3កុម្ភៈ) ថា តម្រូវការរបស់ពលរដ្ឋបានកើនឡើងច្រើន ធ្វើឱ្យមានសកម្មភាពឆ្លៀតឱកាសដំឡើងតម្លៃម៉ាស់ និងផលិតផលការពារមេរោគនៅប្រទេសនេះ ក៏បានកើនឡើងច្រើនផងដែរ។ ផលិតផលទាំង 2មុខនេះ ត្រូវបានចាត់ចូលក្នុងមុខទំនិញពិសេស។
នៅកូរ៉េខាងត្បូង អ្នកជូញដូរម៉ាសខុសច្បាប់ នឹងត្រូវប្រឈមមុខជាមួយការជាប់ពន្ធនាគាររយៈពេល 2ឆ្នាំ ឬត្រូវពិន័យជាប្រាក់ឡើងដល់ 50លានវ៉ុន (ជាង 42,000ដុល្លារអាមេរិក)។
ចាប់ពីថ្ងៃនេះ (5កុម្ភៈ) តទៅ ឈ្មួញទាំងឡាយណាដែលរក្សាទុកផលិតផលទាំង 2មុខខាងលើ ក្នុងបរិមាណច្រើនជាង1,5ដង បើធៀបនឹងបរិមាណមធ្យមប្រចាំខែរបស់ពួកគេ នឹងត្រូវប្រឈមមុខជាមួយការជាប់ពន្ធនាគាររយៈពេល 2ឆ្នាំ ឬត្រូវពិន័យជាប្រាក់ឡើងដល់ 50លានវ៉ុន (ជាង 42,000ដុល្លារអាមេរិក)។
នៅកន្លែងមួយក្នុងតំបន់ក្បែរព្រំដែនចិន-វៀតណាម ពលរដ្ឋចិននាំគ្នាមកទិញដូរម៉ាសយកទៅលក់បន្តដើម្បីបានចំណេញច្រើន
បទបញ្ញត្តិខាងលើនេះ ត្រូវបានធ្វើឡើងក្នុងស្ថានភាពអាសន្នរោគរលាកសួតពីវីរុសកូរ៉ូណាប្រភេទថ្មី (nCoV) បាន និងកំពុងឆ្លងរាលដាលយ៉ាងឆាប់រហ័ស ចេញពីក្រុង Wuhan ប្រទេសចិនទៅដល់ប្រទេស និងតំបន់ចំនួន 28 ក្នុងពិភពលោក ក្នុងនោះមានកម្ពុជាផងដែរ និងបណ្ដាលឱ្យមានអ្នកស្លាប់ 492នាក់ និងអ្នកឆ្លងមេរោគនេះមានចំនួន 24,469នាក់។
ប្រជាជនកូរ៉េខាងត្បូងមានការព្រួយបារម្ភយ៉ាងខ្លាំង ក្រោយពីប្រទេសនេះបានរកឃើញអ្នកផ្ទុកមេរោគកូរ៉ូណាចំនួន 16នាក់។ ពលរដ្ឋចំនួនជាងកន្លះលាននាក់ បានចុះហត្ថលេខាលើញត្តិមួយផ្ញើទៅកាន់វិមានខៀវ (The Blue House) ស្នើឱ្យរដ្ឋាភិបាលហាមជនជាតិចិនចូលស្រុកជាបណ្ដោះអាសន្ន។ កូរ៉េខាងត្បូងបានជម្លៀសពលរដ្ឋរបស់ខ្លួនចេញពីតំបន់ Wuhan ប្រទេសចិនរួចហើយ និងបានដាក់ពួកគេឱ្យនៅដាច់ដោយឡែក ដើម្បីតាមដានសុខភាព។
ការរត់ពន្ធម៉ាសឆ្លងដែន ត្រូវបានឈ្មួញធ្វើឡើងក្នុងរូបភាពផ្សេងៗគ្នា
ចំណែកឯរដ្ឋាភិបាលចិនវិញ បានប្រកាសថា ប្រទេសនេះកំពុងត្រូវការម៉ាស់ សម្លៀកបំពាក់ការពារ និងវ៉ែនតាការពារមេរោគក្នុងបរិមាណច្រើនជាបន្ទាន់ ដើម្បីទប់ទល់នឹងមេរោគកូរ៉ូណាប្រភេទ nCoV។ ជាការឆ្លើយតបនឹងតម្រូវការខាងលើ ប្រទេសជប៉ុន កូរ៉េខាងត្បូង និងកាហ្សាក់ស្ថាន ជាដើម បានផ្ដល់ជំនួយសម្ភារវេជ្ជសាស្ត្រទៅឱ្យប្រទេសចិនជាបន្តបន្ទាប់ហើយ។
ពាក់ព័ន្ធនឹងបញ្ហាខាងលើនេះដែរ កាលពីថ្ងៃទី 29មករាកន្លងទៅ គណៈកម្មការគ្រប់គ្រងទីផ្សារនៃក្រុងប៉េកាំង បានប្រកាសនៅលើគេហទំព័ររបស់ខ្លួនថា ខ្លួនបានផ្ញើលិខិតពិន័យទៅកាន់ឱសថស្ថាន Beijing Jimin Kangtai Pharmacy ព្រោះតែឱសថស្ថានមួយនេះបានដំឡើងតម្លៃហួសហេតុទៅលើម៉ាស់ប្រភេទ N95។ នេះបើតាមទីភ្នាក់ងារសារព័ត៌មាន Reuters។
ពលរដ្ឋវៀតណាម នាំគ្នាបង្កើតផ្សារមួយកន្លែងនៅក្បែរព្រំដែនវៀតណាម-ចិន ដើម្បីជួញដូរម៉ាស
ទូរទស្សន៍ជាតិរបស់ចិន បានរាយការណ៍ថា ឱសថស្ថាននេះបានដំឡើងថ្លៃម៉ាស់ដែលមានរូបសញ្ញា 3M ឡើងដល់ 850យន់ (121ដុល្លារអាមេរិក)ក្នុង 1ប្រអប់ ខណៈនៅក្នុងទីផ្សារអនឡាញមានតម្លៃតែ 143យន់។ ជាមធ្យម ម៉ាស់នៅតាមឱសថស្ថាននានា 1ប្រអប់មានម៉ាស់ចំនួន 50បន្ទះ។
អ្នករត់ពន្ធម៉ាសឆ្លងដែនទៅចិនម្នាក់ ត្រូវអាជ្ញាធរវៀតណាមចាប់ឃាត់ខ្លួន
ទន្ទឹមនឹងនេះដែរ នៅឯប្រទេសជិតខាងចិន ដូចជាវៀតណាមជាដើម តម្លៃម៉ាស់ និងទឹកសម្អាតមេរោគ ក៏បានឡើងថ្លៃខ្លាំងដែរ ព្រោះថា ឈ្មួញខ្លះបានប្រមូលទិញម៉ាស់ក្នុងស្រុកយកទៅលក់ឱ្យឈ្មួញនៅតាមព្រំដែនជាប់ជាមួយចិន។ ជាក់ស្ដែង កាលពីថ្ងៃទី3កុម្ភៈ អាជ្ញាធរខេត្ត Vinh Phuc នៅវៀតណាមខាងជើងបានឃាត់ខ្លួនឈ្មួញជាច្រើននាក់ ដែលនាំម៉ាស់ពីប្រទេសវៀតណាមទៅកាន់ប្រទេសចិនដោយខុសច្បាប់។ ម៉ាស់ដែលត្រូវបានរឹបអូសក្នុងថ្ងៃនោះ មានចំនួនសរុប 26,100បន្ទះ។ នេះបើតាមសារព័ត៌មាន Thanhnien៕
ប្រភព៖ សារព័ត៌មានបរទេស
February 5, 2020
ជនជាតិតៃវ៉ាន់ 56នាក់បានស្លាប់ ដោយសារមេរោគផ្ដាសាយបក្សី
យ៉ាងហោចណាស់ ក៏មានជនជាតិតៃវ៉ាន់ 56នាក់ដែរ ដែលបានបាត់បង់ជីវិតដោយសារបានឆ្លងមេរោគផ្ដាសាយបក្សី H1N1 ក្នុងរយៈពេល 3ខែកន្លងមកនេះ ប៉ុន្តែមិនទាន់មានអ្នកណាម្នាក់ស្លាប់ដោយសារមេរោគកូរ៉ូណានៅឡើយ។
មន្ត្រីនៃមជ្ឈមណ្ឌលគ្រប់គ្រងគ្រោះអាសន្នរោគតៃវ៉ាន់ (CDC) កាលពីថ្ងៃទី3 កុម្ភៈ បានឱ្យដឹងថា H1N1 ឬហៅថា មេរោគផ្ដាសាយបក្សី គឺជាប្រភេទវីរុសដែលកើតច្រើនក្នុងរដូវត្រជាក់នៅលើកោះតៃវ៉ាន់ រយៈពេល 3ខែចុងក្រោយនេះ។ កំណត់ត្រារបស់ CDC បានបង្ហាញថា មានអ្នកឆ្លងមេរោគផ្ដាសាយបក្សី H1N1 ចំនួន 771នាក់ ដែលមានអាការធ្ងន់ធ្ងរ ចាប់តាំងពីថ្ងៃទី1តុលា ឆ្នាំកន្លង ក្នុងនោះមានអ្នកជំងឺ 56នាក់បានស្លាប់។
CDC ក្នុងសប្ដាហ៍នេះ បានផ្អាកការប្រកាសអំពីចំនួនអ្នកស្លាប់ដោយសារមេរោគផ្ដាសាយបក្សី ប៉ុន្តែសារព័ត៌មានក្នុងស្រុកបានឱ្យដឹងថា យ៉ាងហោចណាស់ក៏មានអ្នកស្លាប់បន្ថែមចំនួន 13នាក់ទៀតដែរ ដែលអ្នកជំងឺទាំងនេះ មានអាយុចាប់ពី 47-97ឆ្នាំ ក្នុងនោះមានទាំងលោកយាយអាយុ 80ឆ្នាំផងដែរ។
វេជ្ជបណ្ឌិត Lin Yung-ching មកពី CDC បានប្រាប់ថា អ្នកដែលបានស្លាប់ ភាគច្រើនដោយសារផលប៉ះពាល់ខ្លាំងទៅលើសួត និងផ្លូវដង្ហើម។ នេះបើតាមការចុះផ្សាយរបស់សារព័ត៌មាន SCMP។
ជំងឺផ្ដាសាយបក្សីតាមរដូវ គឺជាការគំរាមកំហែងដល់កោះតៃវ៉ាន់ ដែលវាធ្ងន់ធ្ងរជាងមេរោគ Corona (nCoV) ដែលកំពុងរាតត្បាតពិភពលោកទៅទៀត ចាប់ពីខែធ្នូ ឆ្នាំ2019 មកនេះ។ កោះតៃវ៉ាន់ បច្ចុប្បន្ន មានអ្នកផ្ទុកមេរោគ nCoV ចំនួន10នាក់ ប៉ុន្តែមិនទាន់មានអ្នកជំងឺណាម្នាក់បានបាត់បង់ជីវិតនៅឡើយ។
ពលរដ្ឋតៃវ៉ាន់ នៅក្រុងតៃប៉ី
គួររំឭកថា កាលពីថ្ងៃទី2កុម្ភៈ ប្រទេសចិនក៏បានប្រកាសអំពីការរកឃើញសម្បុកមេរោគផ្ដាសាយបក្សី H5N1 នៅក្នុងកសិដ្ឋានមួយ នៅក្រុង Shaoyang នៃខេត្ត Hunan ដែលបានធ្វើឱ្យមាន់ 4,500ក្បាលត្រូវងាប់។ H5N1 គឺជាវីរុសផ្ដាសាយបក្សីដែលអាចឆ្លងរាលដាលយ៉ាងឆាប់រហ័ស ក្នុងនោះមានប្រភេទខ្លះអាចឆ្លងមកមនុស្ស។ មន្ត្រីជំនាញនៅ Shaoyang បានប្រើប្រាស់វិធីទប់ស្កាត់មួយចំនួន ក្នុងនោះបានដុតកម្ទេចមាន់ចំនួន 17,828ក្បាលផងដែរ៕
ប្រភព៖ សារព័ត៌មានបរទេស
February 5, 2020
ចំនួនអ្នកស្លាប់ដោយសារមេរោគកូរ៉ូណា កើនដល់ 492នាក់ ខណៈអ្នកជំងឺជាង 2,500នាក់ ស្ថិតក្នុងស្ថានភាពធ្ងន់ធ្ងរ
គិតមកដល់ព្រឹកនេះ (5កុម្ភៈ) ចំនួនអ្នកស្លាប់ដោយសារមេរោគកូរ៉ូណា កើនដល់ 492នាក់ ក្នុងនោះ 490នាក់នៅចិនដីគោក ចំណែកអ្នកដែលកំពុងផ្ទុកមេរោគនេះ កើនឡើងដល់ 24,551នាក់។
គណៈកម្មការសុខាភិបាលខេត្ត Hubei ថ្ងៃនេះ បានបញ្ជាក់ថា មានអ្នកស្លាប់ថ្មីចំនួន 65នាក់ ដែលនេះបានធ្វើឱ្យចំនួនអ្នកស្លាប់សរុបក្នុងខេត្តនេះ ឡើងដល់ 479នាក់។ ខេត្ត Hebei ក៏បានរកឃើញអ្នកជំងឺថ្មីចំនួន 3,156នាក់ផងដែរ ធ្វើឱ្យចំនួនអ្នកមានផ្ទុកមេរោគសរុបដល់ទៅ 16,678នាក់។ ក្នុងចំណោមអ្នកកំពុងមានផ្ទុកមេរោគកូរ៉ូណា មានអ្នកជំងឺជាង 2,500នាក់ កំពុងស្ថិតក្នុងស្ថានភាពធ្ងន់ធ្ងរ និងធ្ងន់ធ្ងរបំផុត។
យោងតាមគណៈកម្មការសុខាភិបាលចិន ចំនួនអ្នកមានផ្ទុកមេរោគរលាកសួតកើនបន្ថែម 3,887 នាក់ ធ្វើឱ្យចំនួនអ្នកឆ្លងសរុបឡើងដល់ 24,324នាក់៕
ប្រភព៖ សារព័ត៌មានបរទេស
February 5, 2020
អ្នកដែលជាពីជំងឺរលាកសួត Corona អាចនឹងឆ្លងមេរោគនេះសាជាថ្មី?
អ្នកវិទ្យាសាស្ត្រនៃគណៈកម្មការសុខាភិបាលជាតិនៃប្រទេសចិន កាលពីថ្ងៃទី31មករា បានព្រមានថា អ្នកជំងឺរលាកសួត nCoV (Corona) ដែលបានជាសះស្បើយពីជំងឺនេះហើយ នៅតែអាចឆ្លងវីរុសនេះជាថ្មីម្ដងទៀតបានជានិច្ច។
Zhan Qungyuan ប្រធានផ្នែកទប់ស្កាត់ និងព្យាបាលជំងឺរលាកសួតនៃមន្ទីរពេទ្យមិត្តភាពចិន-ជប៉ុន ដែលជាអ្នកដឹកនាំក្រុមជំនាញផ្នែក nCoV បានព្រមានថា សូម្បីតែអ្នកដែលបានជាសះស្បើយពីជំងឺនេះហើយ ក៏នៅតែអាចឆ្លងសាជាថ្មីម្ដងទៀតបានដែរ។ ថ្វីបើរាងកាយរបស់ពួកគេអាចបង្កើតអង្គបដិប្រាណ (antibody)បានមែន ប៉ុន្តែសម្រាប់អ្នកខ្លះ អង្គបដិប្រាណនេះមិនអាចគង់នៅបានយូរអង្វែងទេ។
លោក Zhan Qungyuan បានណែនាំឱ្យអ្នកដែលបានជាសះស្បើយពីជំងឺអាសន្នរោគនេះ លើកកម្ពស់ការការពារការឆ្លងមេរោគ ថែរក្សាសុខភាព និងចៀសវាងអាកាសធាតុត្រជាក់ខ្លាំង ឬរោគផ្ដាសាយ។ អ្នកវេជ្ជសាស្ត្រចិនរូបនេះ ក៏បានស្នើឱ្យអ្នកជំងឺដែលបានជាសះស្បើយហើយ ត្រូវពិនិត្យសុខភាពតាមការកំណត់របស់គ្រូពេទ្យ។
អម្បូរមេរោគ Corona គឺរួមទាំងវីរុសបង្កើតជំងឺផ្ដាសាយធម្មតា អាសន្នរោគ SARS និង MERS ។ ភាគច្រើននៃវីរុស Corona អាចបង្កជំងឺរលាកផ្លូវដង្ហើមផ្នែកខាងលើ ចាប់ពីស្រាល ដល់មធ្យម និងឆ្លងពីសត្វមកមនុស្ស។ នៅពេលមេរោគបានចូលក្នុងរាងកាយមនុស្ស វានឹងរកវិធីតោងទាម និងរុកចូលក្នុងកោសិកានៃរាងកាយមនុស្ស។ ដើម្បីទប់ទល់នឹងមេរោគនេះ ប្រព័ន្ធការពាររាងកាយរបស់មនុស្សនឹងបង្កើតអង្គបដិប្រាណ ដែលជាប្រូតិអ៊ីនមួយប្រភេទអាចកំណត់អត្តសញ្ញាណមេរោគ រួចបណ្ដេញវាចេញពីរាងកាយ។ នេះជាវិធីដែលជួយឱ្យមនុស្សមិនឆ្លងមេរោគមួយចំនួនដែលពួកគេធ្លាប់បានឆ្លងរួចមកហើយ។ វ៉ាក់សាំងក៏ជាវិធីសាស្ត្រមួយផ្សេងទៀតដើម្បីជួយចម្រើនអង្គបដិប្រាណនេះដែរ។
Amira Roess សាស្ត្រាចារ្យផ្នែកសុខាភិបាល និងអាសន្នរោគ នៃសាកលវិទ្យាល័យ George Mason បាននិយាយថា៖ “ចំពោះជំងឺឆ្លងមួយចំនួន រាងកាយមនុស្សអាចបង្កើតប្រព័ន្ធអង្គបដិប្រាណដើម្បីទប់ស្កាត់មេរោគជាក់លាក់ណាមួយ ក្រោយពីបានឆ្លងមេរោគ។ ជាធម្មតា អ្នកដែលបានឆ្លងមេរោគម្ដងហើយ នឹងមិនឆ្លងម្ដងទៀតទេ បើទោះពួកគេបានប៉ះពាល់មេរោគនោះក៏ដោយ។ ក្នុងករណីអម្បូរមេរោគ Corona ថ្មី (nCoV) អ្នកវិទ្យាសាស្ត្រកំពុងតែស្វែងរកចម្លើយ ដើម្បីដោះស្រាយបញ្ហានេះ”។
ក្រុមគ្រូពេទ្យ និងអ្នកមេរោគវិទ្យា មិនទាន់ដឹងច្បាស់នៅឡើយអំពី nCoV ដើម្បីប្រាកដថា តើរាងកាយមនុស្សអាចបង្កើតអង្គបដិប្រាណបានគ្រប់គ្រាន់ដែរឬទេ បន្ទាប់ពីបានឆ្លងមេរោគដ៏សាហាវនេះ?។ លោក Zhan Qungyuan បន្តថា ក្រុមអ្នកវិទ្យាសាស្រមិនទាន់ប្រាកដថា អង្គបដិប្រាណដែលរាងកាយមនុស្សផលិតនោះ អាចការពារពួកគេពីការឆ្លងមេរោគម្ដងទៀតឬយ៉ាងណានៅឡើយ?។ មេរោគ Corona ថ្មី ប្រភេទ nCoV ក៏អាចរីកចម្រើន និងប្រែកាយយ៉ាងលឿនដែរ ដូច្នេះអង្គបដិប្រាណដែលអាចទប់ស្កាត់មេរោគប្រភេទនេះ ក៏មិនអាចធានាបានថា អាចទប់ស្កាត់មេរោគប្រភេទផ្សេងបានដែរ។
អង្គការសុខភាពពិភពលោក WHO បានប្រកាសភាពអាសន្នចំពោះមេរោគរាតត្បាត Corona ប្រភេទថ្មី (nCoV) នេះកាលពីថ្ងៃទី 30មករាកន្លងទៅ។ គិតមកដល់ថ្ងៃទី 4មករានេះ ចំនួនអ្នកស្លាប់ដោយសារអាសន្នរោគនេះបានកើនដល់ 427នាក់ និងអ្នកបានឆ្លងមេរោគនេះ កើនដល់ 20,622នាក់៕
ប្រភព៖ សារព័ត៌មានបរទេស
February 4, 2020
“ខ្ញុំមិនមែនវីរុសទេ!!” ដាស់ស្មារតីមនុស្សជុំវិញពិភពលោក បញ្ឈប់ការដាក់បដាបិទហាង-ដេញ-និងបិទប្រទេស ហាមជនជាតិចិន
មនុស្សជុំវិញពិភពលោកដែលកំពុងភ័យរន្ធត់ខ្លាំងអំពី “វីរុសកូរ៉ូណា” បានបណ្ដាលឱ្យកើតមានក្រសែស្អប់ខ្ពើម-រើសអើងជនជាតិចិន រហូតដល់នៅក្នុងប្រទេសថៃ មានការសរសេរបដាហាមជនជាតិចិនចូលទៀតផង!។ សង្គមមនុស្សជាតិបានដាក់សំណួរថា “តើធ្វើនេះត្រឹមត្រូវហើយ ឬធ្វើហួសហេតុជ្រុលពេក?”។ ថ្មីៗនេះ អ្នកជំនាញការផ្នែកទំនាក់ទំនង និងសម្ព័ន្ធភាពអន្តរជាតិ បានធ្វើការវិភាគពី “ការបិទប្រទេស” ថា “រឹតតែសាងស្នាមរបួសលើសម្ព័ន្ធភាពដ៏ល្អ” និងបានសង្កត់ធ្ងន់លើ “ការរួមដៃគ្នាខាងវេជ្ជសាស្ត្រទើបជាការប្រសើរបំផុត!”។
ទូទាំងពិភពលោកភ័យខ្លាចវីរុស មិនស្វាគមន៍ជនជាតិចិន!
“សូមអភ័យទោស មិនទទួលភ្ញៀវចិន និងអតិថិជនបរទេស…ដែលយើងមិនអាចផ្ដល់សេវាកម្មជូនលោកអ្នកបាននេះ គឺដោយសាតែបញ្ហាមេរោគវីរុសកូរ៉ូណា…សូមអរគុណដែលបានយល់ចិត្ត”
អត្ថបទដែលមានទាំងភាសាថៃ និងអង់គ្លេស ត្រូវបានបំពាក់នៅផ្នែកខាងមុខមាត់ទ្វារនៃភោជនីយដ្ឋានមួយនៅក្នុងខេត្តឈៀងម៉ៃ ប្រទេសថៃ ដោយសារតែការភ័យខ្លាចវីរុសកូរ៉ូណា រហូតដល់ត្រូវកំណត់អតិថិជនចំពោះតែជនជាតិថៃប៉ុណ្ណោះដែលអាចចូលបាន។
រឿងនេះបានក្លាយជារឿងមួយដែលត្រូវបានជជែកដេញដោលគ្នាយ៉ាងទូលំទូលាយ ដែលមានទាំងយល់ស្រប និងមិនយល់ស្របថា ជាទង្វើដែលរើសអើង ឬតើនឹងធ្វើឱ្យអ្នកទេសចរខូចអារម្មណ៍ នឹកអន់ចិត្តដែរឬទេ? ខណៈដែលមនុស្សភាគច្រើនយល់ឃើញថា ខាងភោជនីយដ្ឋានបានធ្វើត្រឹមត្រូវហើយ ដែលផ្ដល់ភាពសំខាន់លើរឿងសុវត្ថិភាពជាចម្បង។
មិនមែនមានតែជនជាតិថៃប៉ុណ្ណោះទេ ដែលមានកង្វល់រឿងការឆ្លងមេរោគពីជនជាតិចិន តែជនជាតិចិនគ្នាឯងនៅក្នុងប្រទេសចិនក៏បានរារាំងគ្នាឯងដែរ ខណៈដែលប្រទេសជាច្រើនទូទាំងពិភពលោកសុទ្ធតែមានវិធានការ និងការប្រតិបត្តិដែលហាក់ដូចជាដាច់ខាត ឬដែលអាក្រក់បំផុតនោះគឺ វាកើតជាក្រសែរើសអើងជនជាតិអាស៊ី បែបម៉ៅរួមទៅជាមួយគ្នាតែម្ដង។
ឧទាហរណ៍ ហាងលក់ទំនិញ ឬភោជនីយដ្ឋានមួយចំនួននៅក្នុងប្រទេសជប៉ុន និងកូរ៉េខាងត្បូង មានការដាក់បដាប្រកាសមិនស្វាគមន៍ជនជាតិចិន រួមទាំងសណ្ឋាគារមួយនៅក្នុងប្រទេសវៀតណាមក៏មានការដាក់បដាផងដែរថា “ប្រទេសរបស់អ្នក កំពុងតែចម្លងមេរោគ ទើបយើងមិនស្វាគមន៍ភ្ញៀវមកពីប្រទេសចិន”។ ខណៈដែលប្រទេសក្នុងតំបន់អឺរ៉ុបក៏មានប្រតិកម្មចំពោះជនជាតិចិន និងជនជាតិអាស៊ីក្នុងទំនងដូចគ្នាដែរ ដូចជានៅប្រទេសបារាំង មានការនិយាយគ្នាអំពីស្ត្រីម្នាក់ដែលជិះនៅក្នុងរថយន្តក្រុងថា “មានស្រីចិនម្នាក់ កំពុងចម្លងមេរោគមកពួកយើង”។ ដែលការពិតទៅ នាងគឺជាអ្នកទីក្រុងប៉ារីសដែលមានសែស្រឡាយវៀតណាម រហូតធ្វើឱ្យកើតក្រសែជជែកតវ៉ាគ្នាយ៉ាងខ្លាំងនៅក្នុងប្រទេសបារាំង ព្រមជាមួយហេចថេក #je ne suis pas un virus ឬ ខ្ញុំមិនមែនជាវីរុសទេ!!។
អ្នកជំនាញការផ្នែកទំនាក់ទំនង និងសម្ព័ន្ធភាពអន្តរជាតិ ខាងលើបានសរុបថា ក៏ចង់ផ្ដាំផ្ញើថា គួរយល់ចិត្ត និងអាណិតជនជាតិចិន ការពិតទៅគឺមនុស្សទូទាំងពិភពលោកហ្នឹងឯង! យើងជាពលរដ្ឋរួមពិភពលោកតែមួយ បញ្ហានេះ បើសិនតទៅមុខទៀត វាកើតលើប្រទេសណាមួយ ប្រទេសនោះច្បាស់ជាយ៉ាប់យ៉ឺនដូចតែគ្នាហ្នឹងឯង ដូច្នេះខ្ញុំជឿថា ទីបំផុតទៅ ទូទាំងពិភពលោកត្រូវតែជួយគ្នា ទើបអាចឆ្លងផុតទៅបាន៕
February 4, 2020
អាមេរិកាំងថាចិនយល់ព្រមឱ្យអ្នកវេជ្ជសាស្ត្រអាមេរិកាំងចូលជួយ បន្ទាប់ពីចិនចោទអាមេរិកាំងថា មិនបានជួយអ្វីសោះ
រដ្ឋាភិបាលប្រទេសចិនបានយល់ព្រមឱ្យអ្នកវេជ្ជសាស្ត្រអាមេរិកាំង ចូលមកកាន់ប្រទេសចិនដើម្បីជួយទប់ទល់នឹងមេរោគរលាកសួតកូរ៉ូណាប្រភេទថ្មី(nCoV2019). នេះបើតាមការឱ្យដឹងពីសេតវិមាន។
អ្នកនាំពាក្យរបស់សេតវិមាន លោក Judd Deere កាលពីថ្ងៃទី2 កុម្ភៈ) បានឱ្យដឹងថា៖ “ចិនបានយល់ព្រមឱ្យអាមេរិកាំងបញ្ចូលអ្នកជំនាញផ្នែកវេជ្ជសាស្ត្ររបស់ខ្លួន ទៅក្នុងគណៈប្រតិភូនៃអង្គការសុខភាពពិភពលោក (WHO) នៅប្រទេសចិន ដើម្បីស្វែងយល់បន្ថែម និងស្វែងរកវិធីថ្មីទប់ទល់នឹងមេរោគរលាកសួតប្រភេទថ្មី Corona”។
ប្រធានមជ្ឈមណ្ឌលជាតិសម្រាប់ការចាក់វ៉ាក់សាំង និងជំងឺផ្លូវដង្ហើមរបស់អាមេរិកាំង NCIRD (National Center for Immunization and Respiratory Diseases) បាននិយាយថា វត្តមានរបស់ក្រុមអ្នកឯកទេសនៃមជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអាមេរិកាំង CDC (Centers for Disease Control and Prevention) នឹងមានប្រយោជន៍ច្រើន ព្រោះពួកគេសុទ្ធតែជា “អ្នកវិទ្យាសាស្ដ្រដែលមានបទពិសោធ បច្ចេកទេសទាក់ទិននឹងប្រភេទជំងឺប្រហាក់ប្រហែលនេះ”។
ការប្រកាសរបស់សេតវិមាន ត្រូវបានធ្វើឡើង ក្រោយពីអ្នកនាំពាក្យនៃក្រសួងការបរទេសចិន បានចោទប្រកាន់អាមេរិកថា មិនបានជួយអ្វីសោះ ក្រៅតែពីបង្កើនភាពភ័យខ្លាចចំពោះអាសន្នរោគរលាកសួត Corona (nCoV) ដែលរួមទាំងបទបញ្ជាហាមមិនឱ្យអ្នកទេសចរចិនចូលទឹកដីអាមេរិក និងបានដើរផ្ទុយពីអនុសាសន៍របស់អង្គការសុខភាពពិភពលោក (WHO) ។
ប៉ុន្តែ បន្ទាប់មកលោកស្រីបណ្ឌិត Nancy Messonnier ប្រធានមជ្ឈមណ្ឌលជាតិការពារជំងឺឆ្លង និងជំងឺផ្លូវដង្ហើមអាមេរិកាំង បានឆ្លើយតបវិញថា វិធានការទាំងឡាយរបស់ទីក្រុងវ៉ាស៊ីនតោន គឺយោងទៅលើមូលដ្ឋាននៃវិទ្យាសាស្ត្រ ហើយពួកគេកំពុងការពារសុខភាព និងសុវត្ថិភាពរបស់ពលរដ្ឋអាមេរិកាំងទាំងមូល។
សហរដ្ឋអាមេរិកដែលកំពុងមានអ្នកឆ្លងមេរោគ Corona ចំនួន 11ករណី កាលពីសប្ដាហ៍មុនបានប្រកាសភាពអាសន្នស្ដីអំពីសុខភាពសាធារណៈ និងបានចេញបញ្ជាហាមមិនឱ្យជនបរទេសទាំងឡាយណាដែលធ្លាប់បានទៅកាន់ប្រទេសចិនដីគោកក្នុងអំឡុង 2សប្ដាហ៍មុន ចូលស្រុកអាមេរិក។ អាមេរិកាំងក៏បានចេញអនុសាសន៍កម្រិត4 សម្រាប់វិស័យទេសចរណ៍ ដែលជាកម្រិតខ្ពស់បំផុត ដើម្បីព្រមានពលរដ្ឋអាមេរិកាំង កុំឱ្យទៅកាន់ប្រទេសចិន។ ក្រុមហ៊ុនអាកាសចរណ៍ស្ទើរតែទាំងអស់របស់អាមេរិកាំង បានលុបចោលជើងហោះហើរទៅ-មកប្រទេសចិន។
គិតមកត្រឹមព្រឹកនេះ (4កុម្ភៈ) នៅទូទាំងពិភពលោក មានអ្នកស្លាប់ដោយសារមេរោគកូរ៉ូណា ឡើងដល់ 427នាក់ ក្នុងនោះមាន 425នាក់ស្លាប់នៅឯប្រទេសចិនដីគោក និងម្នាក់ស្លាប់នៅហ្វីលីពីន ម្នាក់ទៀតទើបតែបាត់បង់ជីវិតនៅឯក្រុងហុងកុង។ ចំណែកអ្នកដែលបានឆ្លងមេរោគនេះ កើនឡើងដល់ 20,604 នៅទូទាំងពិភពលោក៕
ប្រភព៖ សារព័ត៌មានបរទេស
February 4, 2020