អាសន្នរោគ - La Reine Media

ចំនួនអ្នកស្លាប់ដោយសារវីរុសកូរ៉ូណា បានកើនលើសពីអាសន្នរោគ SARS ទៅហើយ

អ្នកស្លាប់បន្ថែម 97នាក់ ដោយសារតែមេរោគកូរ៉ូណា គឺកើន11,9% បើធៀបនឹងម្សិលមិញ ធ្វើឱ្យចំនួនអ្នកស្លាប់សរុបឡើងដល់ 910នាក់ ច្រើនជាងជិត100នាក់ បើធៀបនឹងអាសន្នរោគ SARS។

គណៈកម្មការសុខាភិបាលខេត្ត Hebei នៃប្រទេសចិន ព្រឹកនេះបានបញ្ជាក់ថា មានអ្នកស្លាប់បន្ថែមចំនួន 91នាក់ ដោយសារបានឆ្លងមេរោគដ៏កំណាចនេះ ធ្វើឱ្យចំនួនអ្នកស្លាប់សរុបនៃខេត្ត Hubei ឡើងដល់ 871 នាក់។ នេះបើតាមទីភ្នាក់ងារសារព័ត៌មាន CNN។

ខេត្ត Hubei ក៏បានរកឃើញអ្នកឆ្លងមេរោគថ្មីចំនួន 2,618នាក់ ធ្វើឱ្យចំនួនសរុបនៃការបានឆ្លងមេរោគនេះនៅខេត្ត Hubei កើនឡើងដល់ 29,631នាក់។

គណៈកម្មការសុខាភិបាលជាតិរបស់ចិន ក៏បានប្រកាសដែរថា ចំនួនអ្នកស្លាប់ថ្មីនៅទូទាំងប្រទេសចិន គឺមាន 97នាក់ ធ្វើឱ្យចំនួនអ្នកស្លាប់សរុបនៃប្រទេសនេះ កើនដល់ 908នាក់។

ដូច្នេះ ចំនួនអ្នកស្លាប់ដោយសារមេរោគកូរ៉ូណាទូទាំងពិភពលោក សរុបមាន 910នាក់ ក្នុងនោះ មាន2នាក់ ស្លាប់នៅខាងក្រៅប្រទេសចិនដីគោក ពោលគឺ1ករណីនៅហុងកុង និង1ករណីទៀតនៅហ្វីលីពីន។ ចំនួនខាងលើនេះ បានលើសពីចំនួនអ្នកស្លាប់ដោយសារអាសន្នរោគ SARS ដែលបានកើតឡើងពីឆ្នាំ 2002-2003 នេះបើតាមអង្គការសុខភាពពិភពលោក។

គណៈកម្មការសុខាភិបាលចិន ក៏បានឱ្យដឹងថា ប្រទេសនេះ បច្ចុប្បន្ន មានអ្នកឆ្លងមេរោគកូរ៉ូណាបន្ថែមចំនួន 3,062នាក់ ធ្វើឱ្យចំនួនអ្នកឆ្លងមេរោគនេះ នៅប្រទេសចិនដីគោក សរុបឡើងដល់ 40,171នាក់៕

ប្រភព៖ សារព័ត៌មានបរទេស

February 10, 2020

ពលរដ្ឋចិននាំគ្នារកទិញថ្នាំអេដស៍ ដើម្បីទុកទប់ទល់វីរុសកូរ៉ូណា! អ្នកឆ្លៀតឱកាសរកលុយ និងសប្បុរសជនក៏បង្ហាញខ្លួន

ដោយសារតែមិនទាន់មានវិធីសាស្ត្រ ឬថ្នាំព្យាបាលពិសេស ពលរដ្ឋជាច្រើននៅប្រទេសចិន បាននាំគ្នាស្វែងរកទិញថ្នាំព្យាបាលជំងឺអេដស៍មកជំនួសបណ្ដោះអាសន្ន ដោយសង្ឃឹមថាពួកគេអាចឆ្លងផុតគ្រាលំបាក និងនៅមានជីវិតក្រោយការរាតត្បាតនៃអាសន្នរោគកូរ៉ូណានេះ។

បច្ចុប្បន្ន ក្នុងពិភពលោក មិនទាន់មានថ្នាំពិសេស និងមានប្រសិទ្ធភាពខ្ពស់សម្រាប់ព្យាបាលអ្នកជំងឺកូរ៉ូណានៅឡើយ បណ្ដាលឱ្យវីរុសនេះ សម្លាប់មនុស្សដល់ទៅ 724នាក់ គិតមកត្រឹមថ្ងៃទី8កុម្ភៈ ឆ្នាំ2020។ បើទោះបីជាមិនទាន់មានភ័ស្ដុតាងបង្ហាញពីលទ្ធផលនៃការពិសោធន៍ស៊ីជម្រៅក៏ដោយ ប៉ុន្តែ គណៈកម្មការសុខាភិបាលកណ្ដាលរបស់ចិន បានឱ្យដឹងថា ថ្នាំ lopinavir/ritonavir ដែលគេប្រើសម្រាប់ព្យាបាលជំងឺអេដស៍ ក៏អាចប្រើប្រាស់ដើម្បីព្យាបាលអ្នកមានផ្ទុកមេរោគកូរ៉ូណាផងដែរ ថ្វីបើមិនទាន់បានបកស្រាយអំពីយន្តការព្យាបាលនៃថ្នាំនេះ។

គ្រូពេទ្យចិនប្រើថ្នាំព្យាបាលអេដស៍ ដើម្បីព្យាបាលជំងឺរលាកសួតថ្មីកូរ៉ូណា

អ្នកវិទ្យាសាស្ត្រក៏កំពុងដុតដៃដុតជើងក្នុងការរកវិធីបង្កើតថ្នាំប្រឆាំងមេរោគកូរ៉ូណានេះដែរ

ប្រការខាងលើនេះ បានធ្វើឱ្យមានការភ្ញាក់ផ្អើលខ្លាំង ពិសេសគឺចំពោះថ្នាំ Kaletra ឬហៅថា Aluvia។ នេះគឺជាថ្នាំ lopinavir/ritonavir ដែលត្រូវបានដាក់់លក់ក្រោមឈ្មោះ Kaletra និងជាថ្នាំប្រឆាំងមេរោគអេដស៍តែមួយប្រភេទគត់ដែលត្រូវបានដាក់លក់នៅប្រទេសចិន។

Devy អាយុ38ឆ្នាំ មកពីខេត្ត Shandong បានឱ្យដឹងថា គាត់គឺជាមនុស្សម្នាក់ក្នុងចំណោមរាប់រយនាក់ដែលបានព្យាយាមស្វែងរកជួបអ្នកមានផ្ទុកមេរោគអេដស៍ ដើម្បីសុំថ្នាំនេះ។

បើទោះបីជាថ្មីៗនេះ Devy មិនធ្លាប់បានទៅកាន់ខេត្ត Hubei ឬ ក្រុង Wuhan ដែលជាសម្បុកមេរោគកូរ៉ូណាក៏ដោយ ប៉ុន្តែគាត់នៅតែព្រួយបារម្ភខ្លាចឆ្លងជំងឺនេះ ព្រោះថា គាត់មានអាការក្ដៅខ្លួន និងរកកលក្អួត។ ក្នុងពេលមានអារម្មណ៍អស់សង្ឃឹម គាត់ក៏បានស្គាល់បុរសម្នាក់ដែលមានផ្ទុកមេរោគអេដស៍។ បុរសម្នាក់នេះ មានរហ័សនាមថា Brother Squirrel ហើយគាត់កំពុងផ្ដត់ថ្នាំ Kaletra ដោយមិនគិតថ្លៃចំពោះអ្នកណាដែលកំពុងសង្ស័យថា ខ្លួនឯងមានផ្ទុកមេរោគកូរ៉ូណា។ Devy បានទៅជួប Brother Squirrel ហើយទទួលបានថ្នាំនេះចំនួន 30គ្រាប់។

ថ្នាំវ៉ាក់សាំងទប់ស្កាត់មេរោគកូរ៉ូណា nCoV នឹងត្រូវបានពិសោធនៅដើមសប្ដាហ៍ក្រោយ

ឱសថបុរាណចិនក៏ត្រូវបានគេយកមកប្រើសម្រាប់ព្យាបាលជំងឺកូរ៉ូណា

សូម្បីតែក្រោយពេលគាត់ត្រូវគ្រូពេទ្យពិនិត្យឃើញថា មិនមានផ្ទុកមេរោគកូរ៉ូណាប្រភេទ nCoV ក៏ដោយ ប៉ុន្តែ Devy នៅតែជឿថា ការស្វែងរកថ្នាំអេដស៍ គឺជាជម្រើសត្រឹមត្រូវ។

“អ្នកមានរក្សាខ្សត់”

នៅលើទំព័រសារព័ត៌មាន Reuters លោក Brother Squirrel (ឈ្មោះពិត Andy Li) បានឱ្យដឹងថា បន្ទាប់ពីបានឮថា មន្ត្រីសុខាភិបាលចិន ណែនាំឱ្យប្រើថ្នាំសម្រាប់អ្នកជំងឺអេដស៍ ដើម្បីព្យាបាលជំងឺកូរ៉ូណា លោក និងអ្នកជំងឺអេដស៍ជាច្រើននាក់ ក៏បាននាំគ្នាចែករំលែក និងប្រមូលបានថ្នាំអេដស៍ Kaletra ប្រហែល 5,400គ្រាប់ ក្នុងរយៈពេលមិនដល់1សប្ដាហ៍។ ក្រោយមក ពួកគេបានបង្ហោះសារនៅលើបណ្ដាញសង្គម Weibo ដើម្បីស្វែងរកអ្នកត្រូវការថ្នាំនេះ។

Andy យល់ថា ក្រុមរបស់គាត់ដូចជា “កំពុងអនុវត្តភារកិច្ចយោធា” ដូច្នោះដែរ។ ក្នុងរយៈពេល3ថ្ងៃដំបូងបន្ទាប់ពីបង្ហោះសារ លោក Andy បានទទួលសាររាប់រយ ធ្វើឱ្យគាត់រវល់រកតែពេលហូបបាយមិនចង់បាន ព្រោះមមាញឹកនឹងការរៀបចំថ្នាំធ្វើទៅឱ្យអ្នកដែលកំពុងត្រូវការ។

Andy បន្ថែមថា ៖ “មានមនុស្សច្រើនណាស់ដែលកំពុងត្រូវការថ្នាំនេះ ហើយខ្ញុំក៏មិនចង់ខ្ជះខ្ជាយពេលវេលា ព្រោះពេលវេលានៅពេលនេះ គឺជាអាយុជីវិត”។

ឱកាសចំណេញពីថ្នាំអេដស៍

ទន្ទឺមនិងសប្បុរជនដូច Andy ក៏មានមនុស្សជាច្រើនកំពុងរកបានផលចំណេញពីតម្រូវការថ្នាំអេដស៍នេះ។

មនុស្សជាង 34,893នាក់ ត្រូវបានគេបញ្ជាក់ថា បានឆ្លងមេរោគកូរ៉ូណានៅប្រទេសចិន ដែលភាគច្រើនគឺជាអ្នកស្រុក Wuhan នៅខេត្ត Hubei។ ក៏ប៉ុន្តែ កង្វះខាតឧបករណ៍ពិសោធន៍ បានធ្វើឱ្យមនុស្សជាច្រើនសង្ស័យថា ជាក់ស្ដែងមានមនុស្សច្រើនជាងនេះកំពុងផ្ទុកមេរោគ តែមិនទាន់បានពិនិត្យ។

វ៉ាក់សាំងការពារមេរោគរលាកសួត Wuhan នឹងមានក្នុងអំឡុង3ខែទៀត

Gatsby Fang ដែលជាអ្នកនាំទំនិញឆ្លងដែននៅប្រទេសចិន បានប្រាប់ថា គាត់បានបញ្ជាទិញថ្នាំអេដស៍ Kaletra ពីប្រទេសឥណ្ឌាកាលពីថ្ងៃទី 23មករា បន្ទាប់ពីមានដំណឹងថា ប្រភេទថ្នាំនេះអាចជួយទប់ទល់មេរោគកូរ៉ូណាបាន។

Gatsby បង្ហើបឱ្យដឹងថា ថ្នាំមួយដបដែលមាន60គ្រាប់ គាត់លក់ក្នុងតម្លៃ600យន់ (ប្រហែល85ដុល្លារអាមេរិក) គឺគាត់ចំណេញចាប់ពី 200-300យន់ (28-42ដុល្លារ) ក្នុងមួយដប។ ជាធម្មតា តម្លៃរបស់ថ្នាំនេះ ត្រឹមតែ100យន់ (14ដុល្លារ) ប៉ុណ្ណោះ តែពេលនេះ វាបានឡើងដល់ 300-400យន់ (42-57ដុល្លារ) ក្នុងមួយដប។ ក្រោយការនាំចូលទំនិញបាន2ថ្ងៃ Gatsby បានលក់ដាច់គ្មានសល់។ មានអតិថិជនខ្លះ បានបញ្ជាទិញដល់ទៅ 600ដបក្នុងពេលតែមួយ។

តាមការឱ្យដឹងពីអ្នកជំនួញឆ្លងដែនខាងលើ អតិថិជនរបស់គាត់មានច្រើនប្រភេទ ចាប់ពីអ្នកដែលមានផ្ទុកមេរោគកូរ៉ូណា គ្រូពេទ្យជួរមុខនៅខេត្ត Hubei រហូតដល់អ្នកដែលមិនមានផ្ទុកមេរោគនេះសោះ ក៏ទិញទុកការពារផងដែរ។ ក្រៅពីនេះ ក៏មានអ្នកខ្លះក្លែងធ្វើជាអ្នកជំងឺមកទិញថ្នាំអេដស៍ដើម្បីយកទៅលក់បន្ត រកចំណេញ។

យ៉ាងណាក៏ដោយ លោក Gatsby បានឱ្យដឹងថា អតិថិជនភាគច្រើនរបស់គាត់ គឺជាអ្នកដែលមិនទាន់ទទួលបានការព្យាបាល ឬមិនទាន់ដឹងច្បាស់ថាខ្លួនមានផ្ទុកមេរោគដ៏សាហាវនេះដែរឬអត់។

សូមបញ្ជាក់ថា ថ្វីបើមានការប្រើប្រាស់ថ្នាំអេដស៍ដើម្បីព្យាបាលអ្នកជំងឺកូរ៉ូណានៅប្រទេសចិន ប៉ុន្តែ អង្គការសុខភាពពិភពលោក WHO បានប្រកាសថា បច្ចុប្បន្ន គេមិនទាន់រកឃើញថ្នាំ ឬវិធីព្យាបាលពិសេសណាមួយសម្រាប់មេរោគនេះនៅឡើយ៕

ប្រភព៖ សារព័ត៌មានបរទេស

February 8, 2020

ប្រជាជនចិនកំពុងអាណិត ស្រណោះ “អ្នកក្លាហានដំបូងគេ ដែលបានព្រមានអំពីអាសន្នរោគកូរ៉ូណា”

អ្នកប្រើបណ្ដាញសង្គមនៅប្រទេសចិន បាននាំគ្នាសម្ដែងការស្ដាយស្រណោះចំពោះការចាកចេញដោយគ្មានថ្ងៃត្រឡប់របស់វេជ្ជបណ្ឌិត Li Wenliang ហើយថា អាជ្ញាធរនៅជំពាក់ពាក្យសុំទោសចំពោះគាត់។

មន្ទីរពេទ្យធំរបស់ក្រុង Wuhan កាលពីព្រឹកមិញ បានបញ្ជាក់នៅលើទំព័រ Weibo របស់ខ្លួនថា វេជ្ជបណ្ឌិត Li Wenliang អាយុ34ឆ្នាំ ដែលជាមនុស្សម្នាក់ក្នុងចំណោមមនុស្សដែលបានបញ្ចេញសារព្រមានអំពីអាសន្នរោគរលាកសួតថ្មី ពិតជាបានបាត់បង់ជីវិតនៅវេលាម៉ោង2និង58នាទី (ប្រហែលម៉ោង2 នៅភ្នំពេញ) ក្រោយពីបានប្រយុទ្ធនឹងជំងឺរលាកសួត nCoV អស់មួយរយៈពេលមកនេះ។

ព័ត៌មានស្ដីអំពីការស្លាប់របស់គ្រូពេទ្យខាងលើនេះត្រូវបានសារព័ត៌មាន Global Times ដែលគ្រប់គ្រងដោយទីភ្នាក់ងារសារព័ត៌មាន People’s Daily (អ្នកនាំពាក្យផ្លូវការរបស់បក្សកុម្មុយនីសចិន) បានបង្ហោះសារដំបូងនៅលើបណ្ដាញសង្គម Twetter កាលពីវេលាម៉ោងប្រហែល20និង40នាទីនៃថ្ងៃទី6កុម្ភៈកន្លងទៅ។ មិត្តភក្ដិ និងក្រុមគ្រូពេទ្យនៅមន្ទីរពេទ្យ Wuhan ប្រាប់ថា ការស្លាប់របស់់គ្រូពេទ្យ Li Wenliang គឺបណ្ដាលមកពីជំងឺរលាកសួតដែលបង្កឡើងដោយមេរោគកូរ៉ូណា nCoV នេះបើតាមសារព័ត៌មាន Global Times។

បន្ទាប់ពីការបានបង្ហោះសារដំបូងនៅលើបណ្ដាញសង្គម Twetter ត្រឹមតែប៉ុន្មាននាទីប៉ុណ្ណោះ អ្នកលេងបណ្ដាញសង្គមរាប់ពាន់នាក់បានបញ្ចេញមតិសោកស្ដាយ និងអាណិតអាសូរចំពោះការស្លាប់របស់វេជ្ជបណ្ឌិតរូបនេះ។

អ្នកលេងបណ្ដាញសង្គមម្នាក់បញ្ចេញមតិនៅខាងក្រោមសេចក្ដីប្រកាសរបស់មន្ទីរពេទ្យក្រុង Wuhan ថា ៖ “យើងខ្ញុំនឹងចងចាំមិនភ្លេចចំពោះលោកគ្រូពេទ្យដែលបានបញ្ចេញព័ត៌មានដំបូងគេទាក់ទិននឹងអាសន្នរោគនេះ ហើយដែលត្រូវគេចាត់ទុកថាជាព័ត៌មានមិនពិត។ តើយើងខ្ញុំអាចធ្វើអ្វីបានខ្លះ? ប្រការដែលយើងខ្ញុំអាចធ្វើបាននោះគឺមិនភ្លេចគាត់”។

Hashtag “គ្រូពេទ្យ Li បាត់បង់ជីវិត” ភ្លាមនោះ ទទួលបានការចូលមើល និងការបញ្ចេញមតិរាប់លានដង នៅលើបណ្ដាញសង្គម Weibo។ ប៉ុន្តែប៉ុន្មានម៉ោងក្រោយមក អត្ថបទដែលបានបង្ហោះនៅលើគណនី Twitter របស់ Global Times ក៏ត្រូវបានគេលុបចោល។ ទំព័រសារព័ត៌មានផ្សេងៗរបស់រដ្ឋចិន ក៏បានលុបចោលព័ត៌មានដែលទាក់ទិននឹងការស្លាប់របស់វេជ្ជបណ្ឌិតវ័យក្មេង ដោយមិនមានការបកស្រាយអ្វីទាំងអស់។

អង្គការសុខភាពពិភពលោក WHO ដំបូងក៏បានសម្ដែងការសោកស្ដាយចំពោះវេជ្ជបណ្ឌិត Li Wenliang នៅលើទំិព័រ Twetter ៖ “យើងខ្ញុំពិតជាក្ដុកក្ដួលចំពោះមរណភាពរបស់វេជ្ជបណ្ឌិត Li Wenliang។ យើងទាំងអស់គ្នាត្រូវតែលើកតម្កើងកិត្តិយសនៃកិច្ចការដែលគាត់បានធ្វើ ទាក់ទិននឹង #nCoV2019″។ ប៉ុន្តែ ក្រោយមក មិនដឹងមានមូលហេតុអ្វី WHO ក៏បានកែប្រែអត្ថបទរបស់ខ្លួន ដោយសរសេរថា ពួកគេពុំមានព័ត៌មានអ្វីស្ដីអំពីស្ថានភាពរបស់លោក Li Wenliang នោះឡើយ។

មនុស្សជាច្រើនកំពុងតែសង្ឃឹមទៅលើអព្ភូតហេតុដ៏អស្ចារ្យមួយកើតឡើង ខណៈដែលមន្ទីរពេទ្យធំរបស់ក្រុង Wuhan កាលពីវេលាម៉ោង 00និង45នាទី ថ្ងៃទី7កុម្ភៈ ប្រកាសថា គ្រូពេទ្យ Li “កំពុងស្ថិតក្នុងស្ថានភាពគ្រោះថ្នាក់” ប៉ុន្តែ មិនទាន់បាត់បង់ជីវិតដូចការរាយការណ៍របស់សារព័ត៌មាននោះទេ។

“យប់នេះ ពួកយើងមិនដេកនោះទេ ពួកយើងគឺនៅរង់ចាំអព្ភូតហេតុ។ យប់នេះយើងខ្ញុំមិនបាច់ដេកទេ ប៉ុន្តែ Li Wenliang ត្រូវតែរស់”។

មនុស្សជាច្រើនបានបញ្ចេញមតិនៅលើគណនីបណ្ដាញសង្គម Weibo របស់លោកគ្រូ Li ដោយបួងសួងឱ្យគាត់អាចបន្តបង្ហោះសារនៅលើទំព័ររបស់គាត់តទៅទៀត។ ប្រហែល 2ម៉ោងក្រោយការប្រកាសលើកទីមួយរបស់មន្ទីរពេទ្យធំនៅក្រុង Wuhan មន្ទីរពេទ្យនេះបានចេញសេចក្ដីប្រកាសជាលើកទីពីរ។ អព្ភូតហេតុដែលមនុស្សគ្រប់គ្នាកំពុងរង់ចាំ ពេលនេះមិនបានកើតសោះឡើយ។ មន្ទីរពេទ្យធំនៃក្រុង Wuhan បានបញ្ជាក់ថា លោកគ្រូពេទ្យ Li បានបាត់បង់ជីវិតក្រោយការប្រកាសព័ត៌មានលើកទីមួយ។

“អ្នកដែលរក្សាអណ្ដាតភ្លើងឱ្យហ្វូងមនុស្ស នឹងក្លាយជាមនុស្សដែលស្លាប់កកប្រាណ ព្រោះតែខ្យល់ និងព្រឹល” អ្នកលេងបណ្ដាញសង្គម នាំគ្នាចែករំលែកតៗគ្នានូវពាក្យមួយឃ្លានេះ ដើម្បីសម្ដែងការសោកស្ដាយចំពោះការលាចាកលោករបស់លោកគ្រូពេទ្យ Li Wenliang។

ប្រធានបទ ” អាជ្ញាធរក្រុង Wuhan នៅជំពាក់ពាក្យសុំទោសលោកគ្រូ Li Wenliang” ដែលគេយកមកជជែកគ្នានៅលើបណ្ដាញសង្គមចិន Weibo បានទាក់ទាញចំណាប់អារម្មណ៍អ្នកប្រើប្រាស់អ៊ីនធើណិតរាប់ម៉ឺននាក់ចូលមកបញ្ចេញមតិ មុនពេលប្រធានបទនេះត្រូវបានលុបចេញ។

“មនុស្សពេញវ័យជាច្រើននឹងដឹងខ្លួនបន្ទាប់ពីយប់នេះ ៖ ពិភពលោកមិនស្រស់ស្អាតដូចអ្វីដែលយើងបានស្រមៃនោះទេ។ អ្នកទាំងអស់មានការខឹងសម្បាខ្លាំងដែរទេ បើសិនអ្នកណាម្នាក់ក្នុងចំណោមពួកយើង មានសំណាងគ្រប់គ្រាន់ក្នុងការបញ្ចេញមតិដើម្បីអនាគតសង្គម? សូមមេត្តាធានាឱ្យបានប្រាកដថា អ្នកទាំងអស់គ្នានឹងចងចាំការខឹងសម្បានាយប់នេះ” នេះគឺជាមតិមួយដែលត្រូវគេយកចិត្តទុកដាក់ច្រើនបំផុត ក្នុងចំណោមមតិដែលត្រូវបានបង្ហោះនៅខាងក្រោមសេចក្ដីប្រកាសរបស់មន្ទីរពេទ្យធំ Wuhan។

Li Wenliang ត្រូវបានគេចាត់ទុកថា ជាមនុស្សម្នាក់ក្នុងចំណោមមនុស្សដំបូងគេដែលបានចែករំលែកព័ត៌មាន និងព្រមានអំពីអាសន្នរោគរលាកសួតដែលបង្កឡើងដោយមេរោគកូរ៉ូណា (nCoV) នៅប្រទេសចិន។ ក្នុងថ្ងៃទី30 ខែធ្នូ ឆ្នាំ2019 Li Wenliang បានផ្ញើសារចូលក្នុងក្រុម WeChat របស់គាត់ដែលមានមិត្តភក្ដិរបស់គាត់ 150នាក់ ដែលជាមិត្តចាស់។ គាត់បានព្រមានអំពីអ្នកជំងឺ 7នាក់ដែលបានឆ្លងមេរោគមួយប្រភេទដែលគាត់យល់ថា ដូចទៅនឹងមេរោគផ្លូវដង្ហើម SARS (Severe Acute Respiratory Syndrome) ដែលធ្លាប់បានកើតឡើងនៅប្រទេសចិនកាលពីឆ្នាំ2002 និងបានសម្លាប់មនុស្សប្រមាណជា800នាក់ នៅទូទាំងពិភពលោក។

សាររបស់លោកគ្រូ Li បានទាក់ទាញចំណាប់អារម្មណ៍របស់ក្រុមមន្ត្រីអាជ្ញាធរក្រុង បន្ទាប់ពីមនុស្សម្នាក់ក្នុងក្រុមរបស់គាត់ បានបង្ហោះរូបភាពនៃការជជែករបស់ពួកគេនៅលើបណ្ដាញសង្គម។ ក្រោយមកទៀត គ្រូពេទ្យ7នាក់ដែលស្ថិតក្នុងក្រុមជជែករបស់លោកគ្រូ Li ក៏បានចែករំលែកព័ត៌មាននេះទៅកាន់ក្រុមជជែកចំនួន3ផ្សេងទៀត។

នៅក្នុងយប់ដដែលនោះ ក្រុមមន្ត្រីសុខាភិបាលនៃក្រុង Wuhan បានកោះហៅលោកគ្រូ Li ដោយស្នើឱ្យគាត់និយាយអំពីមូលហេតុដែលគាត់បានចែករំលែកព័ត៌៌មាននេះ។ ថ្ងៃទី3មករា ក្រុមនគរបាលបានហៅគាត់ទៅសួរនាំ ហើយបង្ខំឱ្យគាត់សន្យាថា “បានចែករំលែកព័ត៌មានមិនពិត ធ្វើឱ្យច្របូកច្របល់ក្នុងសង្គមជាតិ”។

ថ្ងៃទី8មករា លោកគ្រូ Li បានពិនិត្យសុខភាពអ្នកជំងឺកូរ៉ូណាម្នាក់។ ពីរថ្ងៃក្រោយមក លោកគ្រូ Li ចាប់ផ្ដើមមានអាការក្អក និងពិបាកដកដង្ហើម ប៉ុន្តែ ការពិនិត្យជាច្រើនលើកបង្ហាញថា គាត់មិនមានផ្ទុកមេរោគកូរ៉ូណា nCoV នោះទេ។ យ៉ាងនេះក្ដី គាត់នៅតែនៅឆ្ងាយពីប្រពន្ធដែលកំពុងមានផ្ទៃពោះ និងកូនតូចរបស់គាត់។ ឪពុកម្ដាយរបស់គាត់ក៏កំពុងសម្រាកព្យាបាលដោយសារជំងឺគ្រុនក្ដៅ ប៉ុន្តែ ពេលនេះមិនដឹងថា ពួកគេបានឆ្លងមេរោគនេះដែរឬយ៉ាងណា? សារព័ត៌មានក្នុងស្រុកមួយចំនួន ចេញផ្សាយថា ប្រពន្ធរបស់គាត់ក៏បានឆ្លងមេរោគនេះដែរ។

ថ្ងៃទី12មករា គ្រូពេទ្យ Li បានចូលសម្រាកព្យាបាលក្នុងមន្ទីរពេទ្យ ហើយថ្ងៃទី1កុម្ភៈ គាត់ត្រូវគេបញ្ជាក់ថា មានផ្ទុកមេរោគកូរ៉ូណា។ នៅក្នុងសំណេរចុងក្រោយនៅលើគណនី Weibo លោកគ្រូ Li រៀបរាប់អំពីស្ថានភាពជំងឺរបស់គាត់ ហើយទទួលបានមតិរាប់ម៉ឺនដែលបង្ហាញការអាណិតអាសូរចំពោះគាត់។

ក្នុងចំណោមមតិទាំងនោះ គេឃើញមានមតិមួយដែលទទួលបានការចុចចូលចិត្តជាង 100,000លើក ដោយបានសរសេរថា ៖ “លោកគ្រូ Li លោកជាគ្រូពេទ្យដែលល្អ និងមានបេះដូង”។

មនុស្សម្នាក់ទៀត បានហៅលោកគ្រូ Li ថាជាមនុស្សម្នាក់ក្នុងចំណោម “ព្យាការី” ទាំង8រូប ៖ “ប្រជាជនទូទាំងប្រទេស រួមគ្នាសាមគ្គីជាមួយលោក”។

តុលាការកំពូលចិន កាលពីថ្ងៃទី28មករា បានបង្ហោះសារនៅលើបណ្ដាញសង្គម រិះគន់ទៅលើចំណាត់ការរបស់មន្ត្រីនៅ Wuhan ដែលបានចោទប្រកាន់លោកគ្រូ Li និងក្រុមគ្រូពេទ្យមួយចំនួនទៀតថាបានចែករំលែកព័ត៌មានចចាមអារ៉ាម។ មានឃ្លាមួយសរសេរថា “បើសិនសាធារណជនស្ដាប់ “ពាក្យចចាមអារ៉ាម” នោះ ហើយអនុវត្តវិធានការទប់ស្កាត់ ដូចជាពាក់ម៉ាសការពារ ឬសម្អាតមេរោគ និងជៀសវាងការទៅកាន់ផ្សារលក់សត្វរស់ជាដើម ប្រាកដជាអាចទប់ស្កាត់ការឆ្លងរាលដាលនៃមេរោគនេះបាន”៕

ប្រភព៖ សារព័ត៌មានបរទេស

February 7, 2020

កិច្ចប្រជុំមួយនៅសិង្ហបុរី ត្រូវគេសង្ស័យថា បានធ្វើឱ្យមេរោគកូរ៉ូណា ឆ្លងរាលដាលទៅប្រទេសជាច្រើនក្នុងពិភពលោក

យ៉ាងហោចណាស់មានជនជាតិកូរ៉េខាងត្បូង និងម៉ាឡេស៊ី 3នាក់ បានឆ្លងមេរោគកូរ៉ូណាប្រភេទថ្មី nCoV បន្ទាប់ពីបានត្រឡប់មកពីចូលរួមកិច្ចប្រជុំមួយនៅសិង្ហបុរី ដែលនេះនាំឱ្យ WHO ចាប់ផ្ដើមធ្វើការស្រាវជ្រាវ។

អង្គការសុខភាពពិភពលោក (WHO) កំពុងសហការជាមួយស្ថាប័នសុខាភិបាលនៃបណ្ដាប្រទេសដើម្បីស្រាវជ្រាវទៅលើកិច្ចប្រជុំរបស់ក្រុមហ៊ុនពហុជាតិមួយដែលបានធ្វើឡើងនៅសិង្ហបុរី កាលពីខែមករា ឆ្នាំ2020។ កិច្ចប្រជុំនេះត្រូវគេសង្ស័យថា បានធ្វើឱ្យមេរោគកូរ៉ូណាប្រភេទថ្មី (nCoV) ឆ្លងរាលដាលទៅប្រទេសជាច្រើនក្នុងពិភពលោកតាមរយៈអ្នកដែលបានចូលរួមកិច្ចប្រជុំនោះ។

កិច្ចប្រជុំខាងលើ ត្រូវក្រុមហ៊ុនមួយនោះ រៀបចំឡើងនៅក្នុងសណ្ឋាគារ Grand Hayatt ចាប់ពីថ្ងៃទី20 ដល់ 22មករា ឆ្នាំ2020 ដោយមានការចូលរួមរបស់បុគ្គលិក 94នាក់ មកពីបណ្ដាប្រទេសផ្សេងៗ និងបុគ្គលិកជនជាតិសិង្ហបុរី 15នាក់ផងដែរ។ បន្ទាប់ពីម៉ាឡេស៊ី និងកូរ៉េខាងត្បូងបានបញ្ជាក់ថា បុគ្គលិក3នាក់នៃក្រុមហ៊ុននោះ មានផ្ទុកមេរោគកូរ៉ូណា (nCoV) ក្រោយពីត្រឡប់មកពីចូលរួមកិច្ចប្រជុំ ក្រសួងសុខាភិបាលសិង្ហបុរីក៏បានបង្ហើបឱ្យដឹងថា ជនជាតិសិង្ហបុរី4នាក់ដែលបានចូលរួមក្នុងកិច្ចប្រជុំនោះដែរ បានចាប់ផ្ដើមមានរោគសញ្ញានៃជំងឺរលាកសួតថ្មី nCoV។

មន្ត្រីសិង្ហបុរី មិនបានបង្ហើបឱ្យដឹងអំពីឈ្មោះក្រុមហ៊ុន ឬវិស័យដែលក្រុមហ៊ុនបានបើកកិច្ចប្រជុំនោះកំពុងរកស៊ីនោះទេ។

អ្នកនាំពាក្យ WHO លោក Olivia Lawe-Davies បានឱ្យដឹងថា ៖ “នៅពេលដែលបណ្ដាប្រទេសទាំងអស់ នាំគ្នារឹតបន្តឹងវិធានការគ្រប់គ្រងអាសន្នរោគ ករណីឆ្លងក្នុងសហគមន៍អាចនឹងត្រូវរកឃើញច្រើនក្នុងពេលខាងមុខ”។

ក្រុមមន្ត្រីសុខាភិបាលម៉ាឡេស៊ី បានឱ្យដឹងថា កិច្ចប្រជុំខាងលើនោះ ក៏មានការចូលរួមពីបុគ្គលិកជាច្រើននាក់មកពីប្រទេសចិន ក្នុងនោះមានម្នាក់មកពីក្រុង Wuhan ដែលជាសម្បុកមេរោគរលាកសួតកូរ៉ូណាប្រទេស nCoV ដែលបានផ្ទុះឆ្លងរាលដាលចាប់ពីខែធ្នូ ឆ្នាំ2019 ហើយបច្ចុប្បន្ន មេរោគនេះបានសម្លាប់មនុស្សចំនួន 638នាក់ នៅទូទាំងពិភពលោក។

ម៉ាឡេស៊ី បានដឹងអំពីករណីនេះ បន្ទាប់ពីពួកគេបានរកឃើញពលរដ្ឋម៉ាឡេស៊ីម្នាក់ អាយុ 41ឆ្នាំ បានឆ្លងមេរោគកូរ៉ូណា nCoV ក្រោយពីបានទៅចូលរួមកិច្ចប្រជុំមួយ ជាមួយនឹងមិត្តរួមការងារជាជនជាតិចិនច្រើននាក់ផ្សេងទៀត។

ប្រទេសកូរ៉េខាងត្បូងវិញ បានបញ្ជាក់ថា ពលរដ្ឋរបស់ខ្លួន2រូបដែលបានឆ្លងមេរោគ nCoV ក៏ធ្លាប់បានទៅចូលរួមកិច្ចប្រជុំមួយនោះដែរ។ យោងតាមសារព័ត៌មានកូរ៉េខាងត្បូង អ្នកដែលបានចូលរួមក្នុងកិច្ចប្រជុំនោះ បានទទួលទានអាហារជាមួយគ្នាផងដែរ។

ពលរដ្ឋសិង្ហបុរី4នាក់ដែលមានរោគសញ្ញារលាកសួតកូរ៉ូណា ក្រោយពីត្រឡប់មកពីកិច្ចប្រជុំនោះ បានត្រូវបញ្ជូនទៅកាន់មជ្ឈមណ្ឌលជំងឺឆ្លងជាតិ នេះបើតាមក្រសួងសុខាភិបាលសិង្ហបុរី។ ក្រសួងនេះបន្ថែមថា ជនជាតិបរទេសទាំងអស់ដែលបានមកចូលរួមកិច្ចប្រជុំនោះ បានចាកចេញពីសិង្ហបុរីទៅហើយ៕

ប្រភព៖ សារព័ត៌មានបរទេស

February 7, 2020

អ្នកស្លាប់ដោយសារវីរុសកូរ៉ូណា កើនដល់ 638នាក់ ក្នុងនោះក៏មានវេជ្ជបណ្ឌិតដែលបានបញ្ចេញព័ត៌មានមុនគេអំពីមេរោគនេះ

គិតមកត្រឹមព្រឹកនេះ (7កុម្ភៈ) មានអ្នកស្លាប់បន្ថែមដល់ទៅ 73នាក់ កើន 12,9% ធៀបនឹងម្សិលមិញ ធ្វើឱ្យចំនួនអ្នកស្លាប់សរុបទូទាំងពិភពលោក ឡើងដល់ 638នាក់។

គណៈកម្មការសុខាភិបាលខេត្ត Hubei ព្រឹកនេះបានបញ្ជាក់ថា មានករណីស្លាប់បន្ថែមដោយសារមេរោគកូរ៉ូណាចំនួន 69នាក់ ធ្វើឱ្យចំនួនអ្នកស្លាប់សរុបនៅក្នុងខេត្តនេះកើនដល់ 618នាក់។

ផែនទីបង្ហាញពីការរីករាលដាលនៃមេរោគរលាកសួតថ្មី Coronavirus 2019-nCoV

ខេត្ត Hubei ក៏មានអ្នកឆ្លងមេរោគកូរ៉ូណា 2,447នាក់បន្ថែមទៀត នាំឱ្យចំនួនអ្នកឆ្លងរោគសរុបកើនដល់ 22,112នាក់។

នៅទូទាំងប្រទេសចិន គិតមកត្រឹមព្រឹកនេះ អ្នកស្លាប់សរុប ឡើងដល់ 637នាក់។ អ្នកឆ្លងសរុបនៅប្រទេសនេះ ឡើងដល់ 31,161នាក់។

ដូច្នេះ នៅទូទាំងពិភពលោក ចំនួនអ្នកស្លាប់បានកើនដល់ 638នាក់ រួមនិងករណីស្លាប់ម្នាក់នៅហ្វីលីពីន។ អ្នកដែលកំពុងផ្ទុកមេរោគនេះ មានចំនួន 31.481នាក់ ក្នុងនោះ 4,824នាក់ កំពុងប្រឈមនិងហានិភ័យបាត់បង់ជីវិត។ ចំណែកអ្នកដែលបានជាសះស្បើយ មានចំនួន 1,563នាក់។

លោកវេជ្ជបណ្ឌិត Li Wenliang ដែលបានបញ្ចេញព័ត៌មានដំបូង ទាក់ទិននឹងវីរុសកូរ៉ូណា ប៉ុន្តែត្រូវអាជ្ញាធរហៅទៅព្រមាន

នៅក្នុងចំណោមករណីស្លាប់ថ្មី ក៏មានឈ្មោះលោកវេជ្ជបណ្ឌិត Li Wenliang ដែលជាអ្នកធ្លាប់ត្រូវអាជ្ញាធរហៅទៅព្រមាននិងផ្ដិតមេដៃ ដោយចោទថា បានបញ្ចេញព័ត៌មានមិនពិតស្ដីអំពីមេរោគកូរ៉ូណាដែលកាលណោះមិនទាន់មានអ្នកណាដឹងនៅឡើយ៕

ប្រភព៖ សារព័ត៌មានបរទេស

February 7, 2020

មេរោគគ្រោះថ្នាក់បំផុតទាំង៩ដែលមាននៅលើផែនដី

មេរោគ អេបូឡា អេដស៍ និងគ្រុនឈាម ឬគ្រុនផ្ដាសាយតាមរដូវជាដើម សុទ្ធតែបានសម្លាប់មនុស្សក្នុងអត្រាខ្ពស់ ហើយវាតែងតែគំរាមកំហែងដល់មនុស្សលោកជានិច្ច។

មេរោគ ម៉ារបឺក (Marburg Virus)

ក្រុមអ្នកវិទ្យាសាស្ត្របានរកឃើញវីរុសម៉ាបឺកនេះក្នុងឆ្នាំ 1967 នៅពេលអាសន្នរោគនេះបានឆ្លងរាលដាលលើបុគ្គលិកនៃមន្ទីរពិសោធន៍អាល្លឺម៉ង់ ដោយពួកគេបានប៉ះពាល់សត្វស្វាមានផ្ទុកមេរោគម៉ាបឺកដែលនាំមកពីប្រទេសអ៊ូហ្គង់ដា (Uganda)។ មេរោគម៉ាបឺក ដូចទៅនឹងមេរោគអេបូឡា (Ebola) ត្រង់ថា វាបង្កឱ្យអ្នកជំងឺមានអាការគ្រុនឈាម មានន័យថា អ្នកជំងឺនឹងត្រូវគ្រុនក្ដៅ ហើយចេញឈាមតាមសរសៃឈាមក្នុងខួរក្បាល និងក្រពះជាដើម បណ្ដាលឱ្យស្លាប់បាន។

អត្រាស្លាប់ក្នុងការផ្ទុះឆ្លងលើកដំបូង ត្រឹម20% ប៉ុន្តែ វាបានឡើងដល់80% ក្នុងការផ្ទុះឆ្លងរាលដាលចាប់ពីឆ្នាំ 1998-2000 នៅប្រទេសកុងហ្គោ (Congo) និងឆ្នាំ 2005 នៅអាងហ្គោឡា (Angola) នេះបើតាមអង្គការសុខភាពពិភពលោក WHO។

មេរោគអេបូឡា (Ebola Virus)

ការផ្ទុះឆ្លងរាលដាលនៃមេរោគអេបូឡាដំបូងនៅលើមនុស្ស បានកើតឡើងក្នុងអំឡុងពេលតែមួយនៅស៊ូដង់ និង កុងហ្គោ ក្នុងឆ្នាំ 1976។ អេបូឡា ឆ្លងតាមរយៈការប៉ះពាល់ឈាម ឬទឹករងៃនៃរាងកាយ ឬជាលិការបស់មនុស្ស ឬសត្វដែលមានផ្ទុកមេរោគនេះ។ ប្រភេទមេរោគអេបូឡាផ្សេងៗគ្នា បង្កគ្រោះថ្នាក់ក្នុងកម្រិតផ្សេងៗគ្នាដែរ។
អេបូឡាប្រភេទ Reston ភាគច្រើនមិនធ្វើឱ្យអ្នកជំងឺធ្លាក់ខ្លួនឈឺនោះទេ ប៉ុន្តែ ប្រភេទ Bundibugyo សម្លាប់មនុស្សក្នុងអត្រា 50% និងប្រភេទ Sundan គឺ 71%។ អាសន្នរោគនេះ បានរាតត្បាតខ្លាំងបំផុតគឺនៅដើមឆ្នាំ 2014 ហើយវាក៏មានភាពស្មុគស្មាញបំផុតគិតមកដល់បច្ចុប្បន្ន។

មេរោគឆ្កួត (Rabies Virus)

បើទោះជាថ្នាំវ៉ាក់សាំងការពារជំងឺឆ្កួតនៅលើសត្វចិញ្ចឹម ត្រូវបានប្រើប្រាស់តាំងពីឆ្នាំ 1920 ធ្វើឱ្យជំងឺនេះមិនសូវកើតមាននៅក្នុងបណ្ដាប្រទេសអភិវឌ្ឍ ប៉ុន្តែ វានៅតែជាបញ្ហាធំនៅប្រទេសឥណ្ឌា និងបណ្ដាប្រទេសនៅទ្វីបអាហ្វ្រិក។

សាស្ត្រាចារ្យឯកទេសខាងមីក្រូជីវសាស្ត្រនៃសកលវិទ្យាល័យ Boston លោក Elke Muhlberger បានឱ្យដឹងថា ៖ “មេរោគឆ្កួត បំផ្លាញខួរក្បាលរបស់មនុស្ស និងសត្វដែលបានឆ្លងមេរោគនេះ ហើយវាពិតជាអាសន្នរោគដ៏កាចសាហាវ។ បើសិនមានអ្នកណាម្នាក់ត្រូវសត្វដែលមានផ្ទុកមេរោគឆ្កួតនេះ យើងអាចព្យាបាលបាន ប៉ុន្តែ បើសិនព្យាបាលមិនទាន់ពេល នោះហានិភ័យនៃការស្លាប់គឺ 100%។

មេរោគអេដស៍ (HIV)

អេសដ៍អាចជាមេរោគដ៏គ្រោះថា្នក់ក្នុងពិភពលោកនាបច្ចុប្បន្ន ព្រោះវានៅតែជាមេរោគដែលសម្លាប់មនុស្សច្រើនបំផុត នៅទូទាំងពិភពលោក។ មេរោគនេះបានសម្លាប់មនុស្សប្រមាណជា 36លាននាក់ រាប់ចាប់ពីវាត្រូវបានគេរកឃើញកាលពីទសវត្សរ៍ឆ្នាំ 1980 នេះបើតាមការលើកឡើងរបស់បណ្ឌិត Amesh Adalja អ្នកឯកទេសផ្នែកជំងឺឆ្លង និងជាអ្នកនាំពាក្យនៃសមាគមជំងឺឆ្លងអាមេរិក។

យោងតាមអង្គការសុខភាពពិភពលោក (WHO) ថ្វីបើបច្ចុប្បន្ន យើងមានថ្នាំព្យាបាលជំងឺអេដស៍ ប៉ុន្តែ មេរោគនេះនៅតែឆ្លងរាលដាលខ្លាំងនៅតំបន់ដែលមានប្រជាជនក្រីក្រច្រើនរស់នៅ។ របាយការណ៍របស់ WHO បានឱ្យដឹងថា នៅក្បែរតំបន់សាហារ៉ានៃទ្វីបអាហ្វ្រិក ក្នុងចំណោមមនុស្សពេញវ័យ 20នាក់ គឺមានម្នាក់មានផ្ទុកមេរោគអេដស៍។

មេរោគអុតធំ (Smallpox)

ឆ្នាំ 1980 មហាសន្និបាតសុខភាពពិភពលោក បានប្រកាសថា ជំងឺអុតធំ ត្រូវបានកម្ចាត់ចោលទាំងស្រុង។ ប៉ុន្តែ មុននោះ មនុស្សជាតិត្រូវចំណាយពេលរាប់ពាន់ឆ្នាំក្នុងការប្រយុទ្ធប្រឆាំងជំងឺនេះ ដោយក្នុងចំណោមអ្នកជំងឺ3នាក់ គឺមានម្នាក់ស្លាប់។ ចំណែកអ្នកដែលបានជាសះស្បើយពីជំងឺនេះ ពួកគេខ្លះក៏ត្រូវពិការភ្នែក។

ក្រុមប្រវត្តិវិទូ បានឱ្យដឹងថា គិតត្រឹមសតវត្សរ៍ទី20 ជំងឺនេះបានសម្លាប់មនុស្សយ៉ាងតិច 300លាននាក់។

មេរោគស្ទះសួត ហានតា (Hantavirus)

មេរោគនេះត្រូវបានរកឃើញកាលពីឆ្នាំ 1993 នៅសហរដ្ឋអាមេរិក នៅពេលដែលប្ដីប្រពន្ធមួយគូបានស្លាប់ បន្ទាប់ពីមានអាការហត់ និងដង្ហក់តែប៉ុន្មានថ្ងៃប៉ុណ្ណោះ។ ពលរដ្ឋអាមេរិកាំងជាង 600នាក់បានឆ្លងមេរោគនេះ ក្នុងនោះ 36% បានបាត់បង់ជីវិត នេះបើតាមមជ្ឈមណ្ឌលគ្រប់គ្រង និងទប់ស្កាត់ជំងឺឆ្លងនៃសហរដ្ឋអាមេរិក។
មេរោគ Hanta មិនឆ្លងពីមនុស្សទៅមនុស្ស ប៉ុន្តែវាឆ្លងតាមរយៈការប៉ះពាល់លាមករបស់សត្វកណ្ដុរមួយប្រភេទដែលមានផ្ទុកមេរោគនេះ។ កាលពីជំនាន់សង្គ្រាមឧបទ្វីបកូរ៉េ មេរោគនេះ បានឆ្លងទៅទាហានប្រមាណជា 3,000នាក់ ក្នុងនោះមានទាហានប្រហែល 12% ដែលមានផ្ទុកមេរោគនេះ បានបាត់បង់ជីវិត នេះបើតាមការចុះផ្សាយនៅលើទស្សនាវដ្ដី Clinical Microbiology Reviews កាលពីឆ្នាំ 2010។

មេរោគផ្ដាសាយតាមរដូវ (flu season)

WHO បានឱ្យដឹងថា ក្នុងរដូវផ្ដាសាយ មនុស្សប្រហែល 500,000នាក់នៅក្នុងពិភពលោក អាចបាត់បង់ជីវិតដោយឆ្លងមេរោគផ្ដាសាយ។ អាសន្នរោគផ្ដាសាយដែលបានសម្លាប់មនុស្សច្រើនបំផុតគឺមេរោគផ្ដាសាយអេស្ប៉ាញ ដែលចាប់ផ្ដើមក្នុងឆ្នាំ 1918 និងបានឆ្លងទៅមនុស្ស 40% ក្នុងពិភពលោក ក្នុងនោះមានអ្នកស្លាប់ដល់ទៅ 50លាននាក់។

គ្រុនចាញ់

ជំងឺនេះបានកើតឡើងដំបូងនៅក្នុងអំឡុងទសវត្សរ៍ឆ្នាំ 1950 នៅប្រទេសហ្វីលីពីន និងប្រទេសថៃ។ ក្រោយមកវាបានឆ្លងរាលដាលពេញតំបន់ត្រូពិក។ អាសន្នរោគដែលកើតឡើងដោយសារមូសខាំនេះ នឹងរាតត្បាតកាន់តែខ្លាំងនៅពេលផែនដីកើនកំដៅជាងនេះ។

យោងតាម WHO មេរោគនេះបានឆ្លងទៅមនុស្សចាប់ពី 50-100លាននាក់ជារៀងរាល់ឆ្នាំ។ មកដល់បច្ចុប្បន្ន ពិភពលោកមិនទាន់មានថ្នាំវ៉ាក់សាំងការពារមេរោគនេះនៅឡើយ ប៉ុន្តែ ក្រុមហ៊ុនផលិតឱសថ Sanofi របស់បារាំង បាន និងកំពុងពិសោធថ្នាំវ៉ាក់សាំងមួយប្រភេទដែលបង្ហាញលទ្ធផលល្អបង្គួរ។

មេរោគរាកសូស (Rotavirus)

សារព័ត៌មាន Live Science បានចេញផ្សាយថា មេរោគ Rota ធ្វើឱ្យក្មេង និងទារកត្រូវរាករូសខ្លាំងពេលឆ្លងមេរោគនេះ។ មេរោគនេះអាចឆ្លងយ៉ាងឆាប់រហ័សតាមរយៈការប៉ះពាល់លាមកមនុស្ស។ ឆ្នាំ 2008 WHO បានរាយការណ៍ថា ក្មេងអាយុក្រោម 5ឆ្នាំ ប្រមាណជា 453,000នាក់បានស្លាប់ដោយសារឆ្លងមេរោគរាករូសនេះ។ បច្ចុប្បន្ន ពិភពលោកកំពុងប្រើថ្នាំវ៉ាក់សាំងពីរប្រភេទដើម្បីទប់ស្កាត់មេរោគនេះ៕

ប្រភព៖ សារព័ត៌មានបរទេស

February 6, 2020

បុគ្គលិកពេទ្យ 7,000នាក់ ធ្វើកូដកម្មនៅក្រុងហុងកុង ខណៈអាសន្នរោគកូរ៉ូណារាតត្បាតកាន់តែខ្លាំង

នៅក្រុងហុងកុង បុគ្គលិកពេទ្យប្រមាណជា 7,000នាក់ បាននាំគ្នាធ្វើកូដកម្មថ្ងៃទីបួនដើម្បីប្រឆាំងទៅនឹងវិធានការទប់ទល់នឹងអាសន្នរោគកូរ៉ូណាដែលអាជ្ញាធរបាន និងកំពុងធ្វើ។

ចំនួនអ្នកចូលរួមធ្វើកូដកម្មនេះ មានប្រហែល 10% នៃបុគ្គលិកពេទ្យនៅតំបន់ស្វយ័តពិសេសនេះ នាំឱ្យក្រុមមន្ត្រីគ្រប់គ្រងមន្ទីរពេទ្យរដ្ឋនៅហុងកុង ចេញសេចក្ដីជូនដំណឹងក្នុងថ្ងៃនេះថា ពេលនេះមន្ទីរពេទ្យរដ្ឋ បានត្រឹមតែផ្ដល់សេវាកម្មចាំបាច់ប៉ុណ្ណោះ។

ក្រុមមន្ត្រីខាងលើបានអំពាវនាវឱ្យប្រជាជនដែលមានបញ្ហាសុខភាពកម្រិតស្រាល ទៅកាន់មន្ទីរពេទ្យឯកជន “ដោយសារតែនៅក្នុងមន្ទីរពេទ្យរដ្ឋ មានបុគ្គលិកតិចប្រចាំការសម្រាប់ករណីបន្ទាន់ប៉ុណ្ណោះ។ មន្ត្រីគ្រប់គ្រងមន្ទីរពេទ្យក៏បានអំពាវនាវឱ្យក្រុមគ្រូពេទ្យដែលបានទៅចូលរួមធ្វើកូដកម្ម ត្រឡប់មកចូលធ្វើការវិញ ដើម្បីផលប្រយោជន៍របស់អ្នកជំងឺ”។

សូមបញ្ជាក់ថា បុគ្គលិកពេទ្យរាប់ពាន់នាក់មកពីមន្ទីរពេទ្យរដ្ឋនានាក្នុងក្រុងហុងកុង បានផ្ដើមធ្វើកូដកម្មចាប់ពីថ្ងៃទី 3កុម្ភៈ ក្នុងបំណងដាក់សម្ពាធទៅលើអាជ្ញាធរហុងកុង ឱ្យបិទច្រកព្រំដែនទាំងអស់ជាមួយចិនដីគោក ដើម្បីកាត់បន្ថយការឆ្លងរាលដាលនៃមេរោគកូរ៉ូណា ដែលបច្ចុប្បន្ន មានមនុស្ស 28,296នាក់ បានឆ្លងមេរោគនេះ និង 565នាក់ផ្សេងទៀតបានបាត់បង់ជីវិត។

ក្រុមបាតុករបានចោទប្រកាន់អាជ្ញាធរក្រុងថា ចាត់វិធានការមិនសមស្របទៅនឹងស្ថានការណ៍ដ៏គួរឱ្យខ្លាចនៃការរាតត្បាតរបស់មេរោគសាហាវនេះ។

ក្រៅពីស្នើឱ្យអាជ្ញាធរបិទច្រកព្រំដែនទាំងអស់ជាមួយចិនដីគោក បុគ្គលិកពេទ្យដែលជាក្រុមបាតុករក៏បានស្នើឱ្យអាជ្ញាធរផ្ដល់សម្ភារវេជ្ជសាស្រ្តចាំបាច់ឱ្យបានគ្រប់គ្រាន់ដល់បុគ្គលិកពេទ្យ និងដាក់អ្នកជំងឺឱ្យនៅដាច់ដោយឡែកឱ្យត្រូវតាមវេជ្ជសាស្ត្រ។

មេដឹកនាំក្រុងហុងកុង លោកស្រី Carrie Lam បានរិះគន់ទៅលើក្រុមបាតុករថា ៖ បានធ្វើឱ្យផ្នែកសុខាភិបាលក្រុងត្រូវថមថយកម្លាំងក្នុងគ្រាសំខាន់ ហើយបុគ្គលិកដែលនៅធ្វើការត្រូវរ៉ាប់រងការងារធ្ងន់ធ្ងរជាងមុន ដើម្បីជំនួសក្រុមការងារដែលអវត្តមាន” នេះបើតាមសារព័ត៌មាន CNN។

ក្រុងហុងកុង មកដល់ពេលនេះ បានបិទច្រកព្រំដែនចំនួន 10 ក្នុងចំណោមច្រកព្រំដែនទាំង13កន្លែងជាមួយចិនដីគោក។ អាជ្ញាធរក្រុងហុងកុងក៏បាននិយាយថា ចំនួនអ្នកដំណើរមកពីចិនដីគោក បានថយចុះយ៉ាងច្រើន។ មេដឹកនាំក្រុងហុងកុងកាលពីម្សិលមិញក៏បានប្រកាសថា នឹងចាត់វិធានការបន្ទាន់ថ្មីជាច្រើនទៀត ដើម្បីទប់ស្កាត់អាសន្នរោគ រួមមានដូចជា ការដាក់អ្នកដំណើរទាំងអស់ដែលមកពីចិនដីគោកចំនួន 14ថ្ងៃ ដោយរួមទាំងពលរដ្ឋក្រុងហុងកុងផងដែរ បន្ទាប់ពីមានករណីស្លាប់ដំបូងដោយសារឆ្លងមេរោគកូរ៉ូណា កាលពីថ្ងៃទី 4កុម្ភៈ៕

ប្រភព៖ សារព័ត៌មានបរទេស

February 6, 2020

ឱសថការីកំលោះម្នាក់ដាច់ខ្យល់ស្លាប់ ដោយសារខំប្រឹងធ្វើការជាប់ៗគ្នា 10ថ្ងៃ តតាំងនឹងវិបត្តិមេរោគវីរុសវូហាន

ឱសថការីកំលោះជនជាតិចិនម្នាក់ បានធ្លាក់ខ្លួនឈឺ និងស្លាប់បាត់បង់ជីវិតបន្ទាប់ពីធ្វើការយ៉ាងខ្លាំងក្លាជាប់ៗគ្នា 10ថ្ងៃ ក្នុងភារកិច្ចតស៊ូជាមួយមេរោគវីរុសកូរ៉ូណាប្រភេទថ្មីដែលឆ្លងរាលដាលយ៉ាងសាហាវនៅក្នុងប្រទេសចិន។

កាលពីថ្ងៃទី4 កុម្ភៈ ទីភ្នាក់ងារព័ត៌មាន វើលដ៍ អហ្វ បាហ្ស បានរាយការណ៍តាមរយៈសារព័ត៌មាន ដឹ ផេភើរ ថា ឱសថការីកំលោះជនជាតិចិនបានធ្លាក់ខ្លួនឈឺ និងបានស្លាប់ ក្រោយពីធ្វើការយ៉ាងខ្លាំងក្លាឥតឈប់សម្រាកជាប់ៗគ្នា 10ថ្ងៃ ក្នុងភារកិច្ចតស៊ូនឹងមេរោគវីរុសកូរ៉ូណាដ៏កាចសាហាវនោះ។

ឱសថការី សុង យីងជី អាយុទើបតែ 28ឆ្នាំ ជាអនុប្រធានផ្នែកឱសថស្ថាន មានចំណែករួមយ៉ាងខ្លាំងក្នុងការថែរក្សាព្យាបាលអ្នកឆ្លងមេរោគទាំងអស់ នៅឯមជ្ឈមណ្ឌលសុខភាពក្នុងអនុមណ្ឌលហ៊ឹងសាន មណ្ឌលហ៊ូណាន ភាគកណ្ដាលប្រទេសចិន ដែលនៅជាប់នឹងមណ្ឌលហ៊ូពេយ ដើមកំណើតនៃការឆ្លងរាលដាលនៃមេរោគវីរុសកូរ៉ូណាប្រភេទថ្មីពីទីក្រុងវូហាន។

ឱសថការី សុង យីង ជី មានតួនាទីទទួលខុសត្រូវក្នុងការចែកចាយវេជ្ជភណ្ឌទៅឱ្យមិត្តរួមការងារ បានខំប្រឹងធ្វើការយ៉ាងឥតឈប់សម្រាកជាប់ៗគ្នា 9យប់ 10ថ្ងៃ ក្នុងអំឡុងពេលដែលប្រទេសចិនកំពុងប្រយុទ្ធតស៊ូជាមួយមេរោគវីរុសកូរ៉ូណាប្រភេទថ្មី។

រហូតមកដល់ថ្ងៃទី3 កុម្ភៈ ឱសថការី សុង ធ្វើការរួចរាល់ក្នុងវេនពេលអធ្រាត្រ និងត្រឡប់ទៅបន្ទប់វិញដើម្បីគេងសម្រាក មុននឹងមិត្តរួមការងារប្រទះឃើញរូបគេបានដេកស្លាប់បាត់បង់ជីវិតនៅក្នុងបន្ទប់របស់គេ។ សន្និដ្ឋានថា គេអាចនឹងស្លាប់ដោយសារបេះដូងឈប់ដំណើរការមួយខណៈពេលភ្លាមៗ ដោយសារតែការធ្វើការងារយ៉ាងខ្លាំងឥតឈប់សម្រាកកាលពីពេលកន្លងមក។ ខណៈនេះ មន្ត្រីពាក់ព័ន្ធកំពុងស៊ើបអង្កេតរកមូលហេតុពិតប្រាកដនៃការស្លាប់នេះជាបន្ត៕

ប្រភព៖ សារព័ត៌មានបរទេស

February 6, 2020

គួរឱ្យអាសូរណាស់…ទារកទើបនឹងកើតបាន 30ម៉ោង តែមានផ្ទុកមេរោគវីរុសកូរ៉ូណា…

មន្ត្រីសាធារណៈសុខាភិបាលចិនបានបញ្ជាក់ថា អ្នកផ្ទុកមេរោគដែលមិនទាន់បញ្ចេញអាការរោគ ក៏អាចចម្លងមេរោគបានដែរ ហើយអ្នកជំងឺដែលបង្ហាញអាការមិនច្រើនប៉ុន្មាន ក៏គួរតែត្រូវបង្ខាំងឱ្យនៅដោយឡែកដែរ ដោយសារតែថ្មីៗនេះ មានទារកទើបកើតនៅក្នុងទីក្រុងវូហានបានឆ្លងមេរោគវីរុសកូរ៉ូណាប្រភេទថ្មី ទាំងទើបតែបានបើកភ្នែកមើលពិភពលោកនេះត្រឹមតែ 30ម៉ោងប៉ុណ្ណោះ តែបច្ចុប្បន្នអាការមិនបង្ហាញពីភាពធ្ងន់ធ្ងរទេ។ ករណីនេះបានក្លាយជារឿងមួយដែលសាងនូវក្ដីវិតក្កកង្វល់ និងភ័យព្រួយយ៉ាងខ្លាំងអំពីការឆ្លងមេរោគតាំងតែពីនៅក្នុងគភ៌របស់ទារក។

សារព័ត៌មាន សៅ ឆាយណា ម៉នីង ផូស្ត បានរាយការណ៍កាលពីថ្ងៃម្សិលមិញ(ទី5កុម្ភៈ)ថា មានរបាយការណ៍មួយបានឱ្យដឹងថា ទារកទើបនឹងកើតនៅក្នុងទីក្រុងវូហានបានក្លាយជាអ្នកឆ្លងមេរោគវីរុសកូរ៉ូណា បន្ទាប់ពីប្រសូតចេញមកបានត្រឹមតែ 30ម៉ោងប៉ុណ្ណោះ…រឿងនេះបានសាងនូវក្ដីវិតក្កកង្វល់យ៉ាងខ្លាំងអំពីភាពដែលអាចទៅរួចដែលថា ទារកតូចៗទាំងឡាយអាចនឹងមានការឆ្លងមេរោគតាំងពីនៅក្នុងគភ៌ម្ដាយម្ល៉េះ។

ដោយមានអំណះអំណាងពីប្រភពព័ត៌មាននៅក្នុងមន្ទីរពេទ្យកុមារក្នុងទីក្រុងវូហាន មណ្ឌលហ៊ូពេយ ស្ថានីយទូរទស្សន៍របស់រដ្ឋចិន CCTV បានរាយការណ៍ថា រកឃើញទារក 2នាក់មានលទ្ធផលនៃការពិនិត្យរកមេរោគវីរុសកូរ៉ូណាប្រភេទថ្មី “វិជ្ជមាន” ជាទារកដែលមានអាយុតិចបំផុតត្រឹមតែ 30ម៉ោងប៉ុណ្ណោះ។

“ម្ដាយរបស់ទារកទើបនឹងកើតនោះជាអ្នកជំងឺមេរោគវីរុសកូរ៉ូណាប្រភេទថ្មី តែបច្ចុប្បន្ននេះ សញ្ញាជីពចររបស់ទារកនៅស្មើរនៅឡើយ”

ហ្សេង លីង កុង វេជ្ជបណ្ឌិតចាស់វស្សាប្រចាំផ្នែកទារកទើបនឹងកើតបាននិយាយថា ករណីនេះ ជាការបញ្ជូនសញ្ញាមួយឱ្យយើងដឹងថា “យើងត្រូវតែព្រួយបារម្ភអំពីការឆ្លងមេរោគបែបថ្មីរបស់មេរោគវីរុសកូរ៉ូណា”

សៅ ម៉នីង ផូស្ត បានរាយការណ៍ទៀតថា មន្ត្រីសាធារណៈសុខាភិបាលចិនបានចង្អុលបង្ហាញថា អ្នកជំងឺឆ្លងមេរោគដែលមិនទាន់បង្ហាញអាការ ក៏អាចចម្លងមេរោគបានដែរ ដូច្នេះអ្នកជំងឺដែលបង្ហាញអាការមិនទាន់ច្បាស់ គួរតែត្រូវបង្ខាំងឱ្យនៅដោយឡែក។

លី ស៊ិង វ៉ាង ប្រធានផ្នែកជំងឺឆ្លង ប្រចាំនៅមន្ទីរពេទ្យប៉េកាំង ឌិតាន់ យល់ឃើញថា អ្នកជំងឺដែលមិនទាន់បង្ហាញអាការច្រើននោះ “ពាក់ព័ន្ធ” និង “ទទួលមេរោគ” ពីអ្នកជំងឺដែលបញ្ចេញអាការច្បាស់លាស់។

“ក្រុម “អ្នកចម្លង” ទាំងនោះ មានមេរោគវីរុស និងអាចចម្លងមេរោគបាន ហើយចំនួនវីរុសនេះ វាសម្ព័ន្ធជា មួយនឹងករណីដែលថា តើមានអាការឈឺថ្កាត់ច្រើន ឬតិចប៉ុនណា? ដែលមានន័យថា អ្នកជំងឺដែលមានផ្ទុកមេរោគក្នុងចំនួនតិចតួច នឹងមានសមត្ថភាពក្នុងការចម្លងតិចតួចដែរ”

ក្នុងការណែនាំនៃវិធីការព្យាបាល និងការវិនិច្ឆ័យថ្មី ដែលចេញមកពីគណៈកម្មការសុខភាពជាតិចិន (National Health Commission) ដែលបានបញ្ចេញមកកាលពីថ្ងៃពុធម្សិលមិញ បានរៀបរាប់ថា ក្នុងក្រុមមនុស្សដែលបញ្ចេញអាការមិនច្រើនប៉ុន្មាន ដូចជា មានគ្រុនក្ដៅខ្លួន អស់កម្លាំង និងក្អក តែគ្មានការឆ្លងមេរោគនៅក្នុងសួត គួរតែត្រូវបង្ខាំងឱ្យនៅដោយឡែក ដើម្បីបញ្ឈប់ការចម្លងមេរោគបន្ថែម។

ក្រៅពីនេះ នៅក្នុងការណែនាំនេះ បានរៀបរាប់ទៀតថា ការឆ្លងមេរោគតាមប្រព័ន្ធរំលាយអាហារ និងការឆ្លងមេរោគតាមរយៈខ្យល់អាកាស ជាច្រកផ្លូវមួយទៀតរបស់ការឆ្លងរាលដាលនៃជំងឺមេរោគវីរុសកូរ៉ូណា ក្រោយពីរកឃើញកាកសំណល់របស់វីរុសនៅក្នុងលាមករបស់អ្នកជំងឺ។

យ៉ាងណាក៏ដោយ លោកវេជ្ជបណ្ឌិត លី បានឱ្យដឹងទៀតថា ការឆ្លងមេរោគ 2ច្រកផ្លូវនេះ អាចនិយាយបានថា ជាភាពអាចទៅរួចមួយដែលប្រហែលជានៅត្រូវការការអះអាងបញ្ជាក់បន្ថែមទៀតជាបន្ត៕

ប្រភព៖ សារព័ត៌មានបរទេស

February 6, 2020

ចំនួនអ្នកស្លាប់ដោយសារវីរុសកូរ៉ូណា កើនដល់ 565នាក់

វីរុសកូរ៉ូណា បានសម្លាប់មនុស្ស 73នាក់បន្ថែមទៀតគិតត្រឹមថ្ងៃទី 6កុម្ភៈនេះ ពោលគឺកើន 14,8% បើធៀបនឹងម្សិលមិញ ធ្វើឱ្យចំនួនអ្នកស្លាប់ កើនដល់ 565នាក់ និងអ្នកមានផ្ទុកមេរោគនេះ កើន 28,276នាក់។

គណៈកម្មការសុខាភិបាលខេត្ត Hubei នៃប្រទេសចិន ថ្ងៃនេះ បានបញ្ជាក់ថា មានករណីស្លាប់ 70នាក់បន្ថែមទៀត ធ្វើឱ្យចំនួនអ្នកស្លាប់ក្នុងខេត្តនេះ ឡើងដល់ 549នាក់។ ចំនួនអ្នកដែលបានឆ្លងមេរោគនេះ កើនដល់ 19,665នាក់។

ក្នុងខេត្ត Hubei គិតត្រឹមថ្ងៃទី 5កុម្ភៈ ចំនួនអ្នកជំងឺដែលកំពុងទទួលការព្យាបាលសរុប 14,314នាក់ ក្នុងនោះ មាន 2,328នាក់ ស្ថិតក្នុងស្ថានភាពធ្ងន់ធ្ងរ នេះបើតាមគណៈកម្មការសុខាភិបាលខេត្ត Hubei។

គណៈកម្មការសុខាភិបាលចិន ក្នុងថ្ងៃនេះ ក៏បានប្រកាសថា ប្រទេសចិន មានករណីឆ្លងមេរោគ 3,887នាក់បន្ថែមទៀត និងចំនួនអ្នកឆ្លងសរុបកើនដល់ 28,211នាក់។ ក្រៅពី 70នាក់ដែលបានស្លាប់នៅក្នុងខេត្ត Hubei ក៏មានករណីស្លាប់នៅក្នុងខេត្តផ្សេងៗនៃប្រទេសចិន ចំនួន 3នាក់បន្ថែមទៀតដែរ។

គិតមកដល់ពេលនេះ ចំនួនអ្នកស្លាប់ដោយសារមេរោគកូរ៉ូណា នៅទូទាំងពិភពលោក កើនដល់ 565នាក់ និងអ្នកដែលមានផ្ទុកមេរោគនេះ កើនដល់ 28,078នាក់៕

ប្រភព៖ សារព័ត៌មានបរទេស

February 6, 2020

Tag: អាសន្នរោគ