អាសន្នរោគ

រន្ធត់រដ្ឋនីវយ៉ក! ឆ្លងកូវីដ-19 ជាង 1.6សែននាក់ គ្រងស្ថិតិរដ្ឋតែមួយ មានអ្នកឆ្លងមេរោគ វ៉ាដាច់ប្រទេសអេស្ប៉ាញទាំងមូល

រដ្ឋនីវយ៉ក រងវិបត្តិធ្ងន់ធ្ងរ ចំនួនអ្នកឆ្លងមេរោគកូវីដ-19 នៅតែហក់ឡើងឥតឈប់ ដល់ជាង 1.6សែននាក់ហើយ គ្រងស្ថិតិជារដ្ឋតែមួយគត់ដែលមានអ្នកឆ្លងមេរោគច្រើនជាងប្រទេសអេស្ប៉ាញ និងអ៊ីតាលីទាំងមូលទៅទៀត។

នៅថ្ងៃទី10 មេសានេះ វេបសាយ ដឹ សាន់ បានឱ្យដឹងថា មហាវិទ្យាល័យ ចន ហប់គីនស៍ នៅក្នុងសហរដ្ឋអាមេរិក បានរាយការណ៍ពីស្ថានការណ៍មេរោគវីរុសកូរ៉ូណាប្រភេទថ្មី ឬកូវីដ-19 រាតត្បាត ដែលនៅក្នុងរដ្ឋនីវយ៉ក កំពុងរងវិបត្តិកាន់តែធ្ងន់ធ្ងរឡើង គ្រងស្ថិតិជារដ្ឋតែមួយ ដែលមានចំនួនអ្នកឆ្លងមេរោគច្រើនជាងប្រទេសណាៗទាំងអស់លើពិភពលោក ព្រោះរហូតមកដល់ខណៈពេលនេះ បានរកឃើញអ្នកឆ្លងមេរោគក្នុងរដ្ឋមួយនេះរួចហើយដល់ទៅ 160,000នាក់ និងស្លាប់ជាង 7,000នាក់ ដែលនៅពេលប្រៀបធៀបជាមួយនឹងប្រទេសអេស្ប៉ាញ ជាប្រទេសដែលមានអ្នកឆ្លងមេរោគច្រើនបំផុតលំដាប់លេខ2 របស់ពិភពលោក មានអ្នកឆ្លងមេរោគប្រមាណ 150,000នាក់ និងអ៊ីតាលី មានអ្នកឆ្លងមេរោគកូវីដ-19 ច្រើនលំដាប់លេខ3 ក្នុងពិភពលោក ក្នុងចំនួនប្រមាណជា 140,000នាក់។

លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក ដែលកំពុងធ្វើការយ៉ាងធ្ងន់ធ្ងរ ដើម្បីរិះរកវិធីទប់ទល់នឹងការរាតត្បាតរបស់មេរោគកូវីដ-19 ក្នុងរដ្ឋនីវយ៉ក បានថ្លែងកាលពីថ្ងៃព្រហស្បតិ៍កន្លងទៅ ដោយបានរិះគន់លោកប្រធានាធិបតី ដូណាល់ ត្រាំ នៃសហរដ្ឋអាមេរិក និងលោក ប៊ីល ដឹ ប្លាស៊ីអូ អភិបាលទីក្រុងនីវយ៉ក ដែលប្រកាសក្នុងថាមឡាញ អំពីការវិលត្រឡប់មកបើកមហានគរនីវយ៉កឡើងជាថ្មីម្ដងទៀត។

លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក“ហេតុអ្វីបានជាពួកគេទស្សន៍ទាយថា ពលរដ្ឋនីវយ៉ក អាចបញ្ឈប់ការឆ្លងរាតត្បាតរបស់មេរោគកូវីដ-19បាននៅពេលណានោះ? ខណៈដែលប្រធានាធិបតី ត្រាំ ថែមទាំងទស្សន៍ទាយថា ប្រទេសអាមេរិក នឹងអាចវិលមកដំណើរការធុរកិច្ចបានដូចកាលពីដើម ក្នុងអំឡុងពិធីបុណ្យអ៊ីស្ទើរ៍ទៀតផង…ហេតុអីបានពួកលោកនិយាយបែបហ្នឹង?” លោក ខូអូម៉ូ ថ្លែងរិះគន់លោកប្រធានាធិបតី ត្រាំ និងបានចង្អុលបង្ហាញថា សូម្បីតែអ្នកជំនាញការផ្នែករោគឆ្លង ក៏នៅមិនទាន់ហ៊ានទស្សន៍ទាយបានផងថា តើការឆ្លងរាតត្បាតរបស់កូវីដ-19 នឹងចប់នៅពេលណានោះ?! តើអ្នកណាអាចនៅរង់ចាំមើលស្ថានការណ៍ និងនិយាយបានថា ពួកយើងកំពុងតែឆ្ពោះទៅកាន់ចំណុចណានោះ?។

ក្រៅពីនោះ លោកខូអូម៉ូ អភិបាលរដ្ឋនីវយ៉ក នៅបានថ្លែងយ៉ាងត្រង់ទៅត្រង់មកទៀតផងថា សម្រាប់ខ្លួនលោក គ្មានការគិតថា ការរាតត្បាតរបស់មេរោគកូវីដ-19 នឹងចប់នៅពេលណាឡើយ…មិនដឹងថា ក្រាហ្វិករបស់អ្នកឆ្លងមេរោគថ្មីក្នុងរដ្ឋនីវយ៉ក នឹងនៅតែហក់ឡើងខ្ពស់តទៅទៀត ឬក៏ចាប់ផ្ដើមថយចុះ ឬយ៉ាងណានោះឡើយ? ព្រោះពេលនេះ ពួកយើងនឹងដឹង ក៏នៅពេលដែលទៅដល់ចំណុចនោះហើយប៉ុណ្ណោះ។ ពួកយើងតាមដានព័ត៌មានតួលេខរៀងរាល់ថ្ងៃ។ លោកខូអូម៉ូ នៅបានថ្លែងអះអាងពីចំនួនអ្នកស្លាប់ដោយសារមេរោគកូវីដ-19 ក្នុងរដ្ឋនីវយ៉ក ថា មានចំនួន 7,067ហើយ ដែលនេះគឺជាចំនួនដែលច្រើនជាងចំនួនអ្នកស្លាប់ដោយសារហេតុការណ៍វិនាសកម្ម 9/11(យន្តហោះភេរវករបើកបំបុកអគារ វើល ថ្រេត សេនធើរ កាលពីឆ្នាំ2001) ក្រៅពីនោះ តួលេខនៃអ្នកស្លាប់ថ្មីៗ ក្នុងអំឡុង 24ម៉ោង នៅតែកើនឡើងខ្ពស់ដល់ទៅ 799នាក់ម្ដងទៀតដដែល កាលពីថ្ងៃទី8 មេសា កន្លងទៅ។

ទាំងអស់នេះ ចំនួនសរុបនៃអ្នកឆ្លងមេរោគវីរុសកូវីដ-19 នៅក្នុងសហរដ្ឋអាមេរិក បានកើនឡើងដល់ចំនួន 452,135នាក់ និងមានអ្នកស្លាប់ 16,513នាក់ រហូតជាប់លំដាប់ជាប្រទេសដែលមានអ្នកឆ្លងមេរោគកូវីដ-19 ច្រើនបំផុតលំដាប់លេខ1 របស់ពិភពលោក រួមទាំងមានចំនួនអ្នកស្លាប់ច្រើនជាងគេបំផុត លំដាប់លេខ2 ក្នុងពិភពលោក បន្ទាប់ពីអ៊ីតាលី ដែលមានអ្នកឆ្លងមេរោគ 143,626នាក់ និងស្លាប់ 18,279នាក់៕

ប្រភព៖ សារព័ត៌មានបរទេស

April 10, 2020

4ដំណាក់កាលក្នុងការព្យាបាលអ្នកជំងឺ COVID-19

អ្នកជំងឺ COVID-19 ទទួលការព្យាបាលនៅមន្ទីរពេទ្យដោយវិធីជាច្រើន តាំងពីការដកដង្ហើមតាមបំពង់អ៊ុកស៊ីហ្សែន រហូតដល់វិធីសាស្ត្រអន្តរាគមន៍ដ៏ទំនើប ពិសេសគឺ ECMO។

អ្នកជំងឺត្រូវបានធ្វើតេស្តជាច្រើនប្រភេទ ក្នុងនោះក៏មានការពិនិត្យទៅលើកម្រិតអ៊ុកស៊ីហ្សែននៅក្នុងឈាម ដើម្បីអាចដឹងអំពីដំណើរការរបស់សួត។ គ្រូពេទ្យក៏នឹងវាស់សម្ពាធឈាមដើម្បីឱ្យដឹងអំពីស្ថានភាពរបស់បេះដូង និងប្រព័ន្ធបញ្ជូនឈាម។

វិធីសាស្ត្រព្យាបាលនាបច្ចុប្បន្ន មិនបានព្យាបាលផ្ទាល់ឱ្យជាពី COVID-19 នោះទេ ប៉ុន្តែគ្រាន់តែរួមចំណែកក្នុងការជួយឱ្យអ្នកជំងឺអាចទប់ទល់នឹងវីរុសតែប៉ុណ្ណោះ។

អ្នកជំងឺជាច្រើនត្រូវឆ្លងកាត់ការព្យាបាលជាច្រើនដំណាក់កាល ជាមួយនឹងកម្រិតនៃការ “ជ្រៀតជ្រែក” និងគ្រោះថ្នាក់កើនឡើងបន្តិចម្ដងៗ។

ដំណាក់កាលទី1៖ វិធីសាស្ត្រព្យាបាលដោយអ៊ុកស៊ីហ្សែនបែបសាមញ្ញ

នេះគឺជារូបភាពនៃការព្យាបាលលក្ខណៈសាមញ្ញបំផុត សម្រាប់អ្នកជំងឺ COVID-19 ដែលចាប់ផ្ដើមមានអាការពិបាកដកដង្ហើម និងខ្វះអ៊ុកស៊ីហ្សែនក្នុងឈាម។ អ្នកជំងឺត្រូវពាក់ម៉ាស់អ៊ុកស៊ីហ្សែនដើម្បីជួយដល់ការស្រូបយកខ្យល់អ៊ុកស៊ីហ្សែន។

ដំណាក់កាលទី2៖ វិធីសាស្ត្រព្យាបាលដោយអ៊ុកស៊ីហ្សែនកម្រិតខ្ពស់

នេះគឺជាវិធីសាស្ត្រប្រើអ៊ុកស៊ីហ្សែនសុទ្ធក្នុងទម្រង់សម្ពាធខ្ពស់ដើម្បីព្យាបាល ឬថែទាំអ្នកជំងឺ ដែលនេះនឹងមានប្រយោជន៍ដល់អ្នកជំងឺក្នុងករណីឆ្លងមេរោគធ្ងន់ធ្ងរ និងមានពពុះខ្យល់នៅក្នុងសរសៃឈាម (ដែលភាគច្រើនកើតឡើងដោយសារជំងឺ DCS(decompression sickness)។

អ្នកជំងឺនឹងបានដកដង្ហើមស្រូបយកអ៊ុកស៊ីហ្សែនសុទ្ធ ឬខ្យល់ចម្រុះដែលសម្បូរដោយអ៊ុកស៊ីហ្សែនក្នុងបន្ទប់ដែលមានសម្ពាធខ្យល់ខ្ពស់។ ដំណាក់កាលនេះ វេជ្ជបណ្ឌិតនឹងតាមដានសញ្ញាសំខាន់ៗរបស់អ្នកជំងឺដោយយកចិត្តទុកដាក់កម្រិតខ្ពស់។ អ្នកជំងឺនឹងនៅតែដឹងខ្លួនក្នុងអំឡុងស្រូបយកអ៊ុកស៊ីហ្សែនសុទ្ធនេះ។

ដំណាក់ទី3៖ ជំនួយការដកដង្ហើមដោយប្រើម៉ាស៊ីន-Mechanical ventilation (assisted ventilation)

វិធីសាស្ត្រនេះត្រូវបានប្រើប្រាស់នៅពេលការដកដង្ហើមដោយឯកឯងរបស់អ្នកជំងឺលែងមានប្រសិទ្ធភាព។ ម៉ាស៊ីនជំនួយការដកដង្ហើមនឹងជួយបង្កើនកម្លាំងដល់សួតរបស់អ្នកជំងឺ ក្នុងការរុញខ្យល់ចូលនិងចេញ។ នេះគឺជាវិធីសាស្ត្រព្យាបាលកម្រិតខ្ពស់ដែលមានដាក់ថ្នាំសណ្ដំ។

ម៉ាស៊ីនជំនួយការដកដង្ហើមនឹងជួយរក្សាជីវិតរបស់អ្នកជំងឺ ដោយទុកពេលវេលាបន្ថែមទៀតដល់រាងកាយដើម្បីទប់ទល់នឹងវីរុស។

ដំណាក់កាលទី4៖ បេះដូង និងសួតសិប្បនិម្មិត (ECMO)

នេះគឺជាជម្រើសចុងក្រោយរបស់វេជ្ជបណ្ឌិត នៅពេលដែលអ្នកជំងឺកំពុងស្ថិតក្នុងស្ថានភាពគ្រោះថ្នាក់ដល់ជីវិត។ សួតបានរងរបួសធ្ងន់ធ្ងរ និងលែងមានលទ្ធភាពគ្រប់គ្រាន់ក្នុងការនាំអ៊ុកស៊ីហ្សែនចូលទៅដល់សរសៃឈាម។

ECMO ប្រើប្រាស់ប្រព័ន្ធដំណើរការមួយនៅខាងក្រៅរាងកាយ ដើម្បីនាំខ្យល់ចេញ-ចូល ក្នុងបំណងជួយរក្សាមុខងារសំខាន់របស់រាងកាយ។ វិធីនេះដូចទៅនឹងវិធីសាស្ត្រដែលវេជ្ជបណ្ឌិតប្រើប្រាស់ក្នុងពេលវះកាត់អ្នកជំងឺហើបសន្ទះបេះដូង(បេះដូងប្រហោង) ដែលជាវិធីមួយមានលក្ខណៈទំនើបបំផុតនាបច្ចុប្បន្ន។ វិធីសាស្ត្រនេះក៏ត្រូវបានអង្គការសុខភាពពិភពលោកណែនាំឱ្យប្រើជាបណ្ដោះអាសន្ន សម្រាប់ជួយដល់អ្នកជំងឺ COVID-19 ដែលស្ថិតក្នុងសភាពធ្ងន់ធ្ងរ។

ម៉ាស៊ីន ECMO មានតម្លៃប្រហែល 120,000ដុល្លារអាមេរិក។ ECMO មានមុខងារជួយបូមឈាមរបស់អ្នកជំងឹចេញមកខាងក្រៅរាងកាយ ហើយរត់ចូលសួតសិប្បនិម្មិត។ ECMO នឹងចម្រាញ់ចោលកាបូនឌីអុកស៊ីត និងកម្ដៅឈាមឡើងវិញ មុនពេលបូមត្រឡប់ចូលទៅក្នុងរាងកាយអ្នកជំងឹ។ បំពង់បូមឈាមមួយត្រូវបានភ្ជាប់ទៅនឹងសរសៃឈាមវ៉ែននៅត្រង់ក ហើយបំពង់បូមឈាមនេះក៏តភ្ជាប់ទៅនឹងម៉ាស៊ីន ECMO។

ដើម្បីចៀសវាងបញ្ហាឈាមកក ពេលកំពុងបូមចេញពីរាងកាយ វេជ្ជបណ្ឌិតនឹងប្រើប្រាស់ថ្នាំ heparin ដែលជួយឱ្យឈាមមានសភាពរាវ។

ការប្រើម៉ាស៊ីន ECMO មិនមែនជាវិធីសាស្ត្រព្យាបាលពិតប្រាកដនោះទេ។ វាមានតួនាទីសង្គ្រោះបន្ទាន់ ជួយដល់ដណើរការរបស់សួត និងសមស្របជាមួយអ្នកជំងឺភាគតិចតែប៉ុណ្ណោះ៕

ប្រភព៖ Telegraph

April 8, 2020

កូរ៉េខាងត្បូងវឹលវល់! អ្នកជំងឺកូវីដ-19 ជាហើយ ឈឺឡើងវិញម្ដងទៀត(មេរោគអាចគ្រាន់តែសន្លប់ រួចហើយងើបឡើងវិញ…)

វេបសាយ ដេលី មែល បានរាយការណ៍ថា កាលពីថ្ងៃទី6 មេសា មជ្ឈមណ្ឌលគ្រប់គ្រង និងការពារជំងឺនៃប្រទេសកូរ៉េខាងត្បូង ឬ KCDC បានថ្លែងថា ប្រទេសកូរ៉េខាងត្បូង បានរកឃើញអ្នកជំងឺដែលជាសះស្បើយពីកូវីដ-19 ហើយ បែរជាត្រឡប់មកឈឺឡើងវិញម្ដងទៀតយ៉ាងតិច 51នាក់ហើយ ដែលការរកឃើញនេះ បានធ្វើឱ្យកើតមានការភ័យខ្លាចក្រែងថា មេរោគវីរុសអាចនឹងមានសមត្ថភាពត្រឡប់មកបញ្ចេញឫទ្ធិឡើងវិញបានម្ដងទៀត បើទោះបីជាអ្នកជំងឺម្នាក់នោះ មានលទ្ធផលអវិជ្ជមាននៃមេរោគវីរុសនោះហើយក៏ដោយ ក៏អាចនឹងត្រឡប់មកវិជ្ជមានបានម្ដងទៀតដែរ។

KCDC បានបញ្ជាក់ថា អ្នកជំងឺមកពីទីក្រុង ធែគូ ជាទីក្រុងដែលមានការឆ្លងរាលដាលខ្លាំងក្លាបំផុតនៅក្នុងប្រទេសកូរ៉េខាងត្បូង ត្រូវបានបង្ខាំងឱ្យនៅដោយឡែក ក្រោយពីបានរកឃើញថា មានឆ្លងមេរោគ ហើយនៅពេលរកឃើញថា លែងមានមេរោគហើយ និងត្រូវបានអនុញ្ញាតឱ្យចេញពីមន្ទីរពេទ្យ តែបែរជារកឃើញថា ឈាមមានលទ្ធផលវិជ្ជមានជាថ្មីម្ដងទៀត ដោយ KCDC បានបញ្ជាក់ថា មើលទៅហាក់ដូចជា វីរុសអាចវិលត្រឡប់មកមានឫទ្ធិជាថ្មីឡើងវិញបានម្ដងទៀត និងមិនមែនជាការត្រឡប់ទៅឆ្លងមេរោគម្ដងទៀតនោះទេ។

អ្នកវិទ្យាសាស្ត្ររបស់ KCDC ជឿថា មេរោគវីរុសអាចនឹងគ្រាន់តែឈប់សម្រាកបណ្ដោះអាសន្ន ក្នុងកម្រិតមួយដែលមិនអាចពិនិត្យរកឃើញនៅក្នុងកោសិកាមនុស្ស តែក៏នៅតែមិនទាន់ដឹងពីមូលហេតុពិតប្រាកដនៃការត្រឡប់មកមានឫទ្ធិម្ដងទៀតរបស់វីរុសនោះថា តើហេតុអី ទើបវាងើបឡើងវិញបាននៅឡើយ?។

យ៉ាងណាក៏ដោយ ជាបឋម បណ្ដាអ្នកជំនាញការទាំងអស់បានបញ្ជាក់ថា នៅមិនទាន់មានភ័ស្តុតាងដែលអាចពិសោធបានថា វីរុសអាចនឹងសម្រាក ហើយត្រឡប់មកបញ្ចេញឫទ្ធិម្ដងទៀតនៅឡើយ តែលទ្ធផលពីការស្រាវជ្រាវនៅលើសត្វស្វា បានរកឃើញថា មានលទ្ធផលផ្ទុយពីគ្នា និងបានបញ្ជាក់ទៀតថា ក្នុងករណីដែលអ្នកជំងឺរកឃើញលទ្ធផលវិជ្ជមាន 2ដង គឺជារឿងប្រក្រតី ព្រោះលទ្ធផលនៃការពិនិត្យដែលខុសឆ្គង អាចកើតឡើងបានរៀងរាល់អត្រា 1ភាគ5(5នាក់ អាចពិនិត្យខុស 1នាក់) ។

លោក ផូល ហាន់ធើរ៍ សាស្ត្រាចារ្យអ្នកជំនាញការផ្នែកជំងឺឆ្លង របស់មហាវិទ្យាល័យ អ៊ីស អ៊ែងហ្គ្លៀ បានបង្ហើបប្រាប់ ដេលី មែល អនឡាញថា លោកឯកភាពចំពោះរឿងដែលថា មិនគួរអាចនឹងមានការត្រឡប់មកកើតម្ដងទៀតបានឡើយ តែក៏មិនគិតថា វាជាការដែលមេរោគវីរុសរស់ឡើងវិញ និងត្រឡប់មកមានឫទ្ធិម្ដងទៀតបានដែរ។ តាមការយល់ឃើញផ្ទាល់ខ្លួន ដែលអាចនឹងអធិប្បាយអំពីរឿងនេះបាននោះគឺ ជា “លទ្ធផលអវិជ្ជមានក្លែងក្លាយ” ឬ “លទ្ធផលអវិជ្ជមានបណ្ដោះអាសន្ន” ដែលលោកបានថ្លែងថា លទ្ធផលនៃការពិនិត្យរកមេរោគវីរុសកូរ៉ូណានេះ អាចនឹងទទួលបានលទ្ធផលដែលខុសឆ្គងបានដល់ទៅ 20-30ភាគរយ ហើយលោកជឿថា លទ្ធផលនៃការពិនិត្យលើអ្នកជំងឺជនជាតិកូរ៉េខាងត្បូង មុននឹងបានទទួលការអនុញ្ញាតឱ្យចាកចេញពីការបង្ខាំងខ្លួននោះ ទទួលបានលទ្ធផលដែលខុសឆ្គង ដែលបង្ហាញឱ្យឃើញថា អ្នកទាំងនោះជាហើយ តែការពិតទៅ គឺនៅមានមេរោគនៅឡើយ។

ចំណែកលោក ចង យុន ខយ៉ុង អគ្គលេខាធិការ KCDC បានថ្លែងថា KCDC បានបញ្ជូនក្រុមមន្ត្រីស៊ើបអង្កេត ចុះទៅដល់ទីតាំងក្នុងទីក្រុងធែគូ រួចហើយ ដើម្បីពិនិត្យមើលរឿងដែលកើតឡើងនេះ៕

ប្រភព៖ សារព័ត៌មានបរទេស

April 8, 2020

បន្ទោសតែគេគ្រប់យ៉ាង! ត្រាំពន្លះWHO ថា ណែនាំវិធីការពារវីរុសមហាសែនអន់ នាំឱ្យកូវីដ-19 រាលដាលធ្ងន់ធ្ងរ…

ប្រធានាធិបតី ដូណាល់ ត្រាំ នៃសហរដ្ឋអាមេរិក កាលពីថ្ងៃអង្គារ(ទី7មេសា)បានរិះគន់អង្គការសុខភាពពិភព លោក(WHO) យ៉ាងធ្ងន់ៗ ដោយបានចោទថា អង្គការនេះបានផ្ដល់ភាពសំខាន់ទៅលើប្រទេសចិនខ្លាំងជ្រុលពេក និងណែនាំវិធីការពារមេរោគមហាសែនអន់ក្នុងអំឡុងការឆ្លងរាតត្បាតរបស់មេរោគវីរុសកូរ៉ូណាប្រភេទថ្មី ឬកូវីដ-19 ខណៈដែលស្ថានការណ៍វិបត្តិកូវីដ-19 នៅក្នុងសហរដ្ឋអាមេរិក ជាពិសេសក្នុងទីក្រុងនីវយ៉កកាន់តែចាប់ផ្ដើមធ្ងន់ធ្ងរឡើងៗទៅជារឿយៗ។

“អង្គការសុខភាពពិភពលោក ជាអ្នកចម្លងសាយភាយវា” លោកត្រាំ បានសរសេរយ៉ាងដូច្នេះនៅក្នុងធ្វីតធើរ “សម្រាប់ហេតុផលមួយចំនួន គឺអង្គការនេះបានទទួលការគាំទ្រខាងហិរញ្ញវត្ថុមួយចំណែកធំពីសហរដ្ឋអាមេរិក តែចិនជាមជ្ឈមណ្ឌលកណ្ដាល។ សំណាងល្អដែរ ដែលខ្ញុំបានបដិសេធការណែនាំរបស់ពួកគេ ដែលប្រាប់ថា ឱ្យបើកព្រំដែនស្វាគមន៍ចិនក្នុងអំឡុងពេលដំបូងៗ…តើហេតុអី បានពួកគេផ្ដល់ការណែនាំដែលខុសឆ្គងដល់ពួកយើង?”
ទីភ្នាក់ងារសារព័ត៌មានរ៉យទ័រ ព្យាយាមទាក់ទងសាកសួរ ពាក់ព័ន្ធនឹងការរិះគន់របស់លោកត្រាំនេះ ទៅអង្គការសុខភាពពិភពលោក តែខាងអង្គការសុខភាពពិភពលោកនៅមិនទាន់ឆ្លើយតបនៅឡើយ។

កាលពីថ្ងៃទី31 មីនា អង្គការសុខភាពពិភពលោក ដែលជាអង្គការផ្នែកសុខភាពសាធារណៈរបស់អង្គការសហប្រជាជាតិ បានចេញការណែនាំដល់ប្រទេសផ្សេងៗ ឱ្យបើកព្រំដែនតាមប្រក្រតី ទោះជាមានការឆ្លងរាលដាល និងទោះជាមួយផ្នែកទៀត ពួកគេបានសង្កត់ធ្ងន់ថា ប្រទេសផ្សេងៗមានសិទ្ធិប្រើវិធានការផ្សេងៗក្នុងការការពារពលរដ្ឋរបស់ខ្លួនក៏ដោយ តែតមក ក្នុងថ្ងៃជាមួយគ្នា រដ្ឋបាលរបស់លោកត្រាំ បានសម្រេចចិត្តចេញវិធានការកម្រិតការធ្វើដំណើរ សម្រាប់អ្នកដំណើរមកពីប្រទេសចិន។

កាលពីពេលមុនហ្នឹង ពួកអ្នកនយោបាយគាំពារនិយមនៅក្នុងសហរដ្ឋអាមេរិក បាននាំគ្នាចេញមករិះគន់អង្គការសុខភាពពិភពលោកធ្ងន់ឡើងៗជារឿយៗ ចំពោះការណែនាំរបស់WHO ក្នុងអំឡុងពេលមេរោគកំពុងរាតត្បាតក្នុងកម្រិតសកល ដោយបានប្រាប់ថា អង្គការមួយនេះ ពឹងតែលើព័ត៌មានដែលខុសៗអំពីចិន ពាក់ព័ន្ធនឹងការចម្លងសាយភាយរបស់មេរោគកូរ៉ូណាប្រភេទថ្មីនេះ។

កាលពីសប្ដាហ៍កន្លងទៅ ម៉ាកូ រូប៊ីអូ សមាជិកព្រឹទ្ធសភានៃគណបក្សសាធារណរដ្ឋ បានទាមទារឱ្យ លោកថេដ្រូស អ៊ែតហាណូម កេប្រេយេស៊ុស ប្រធានអង្គការសុខភាពពិភពលោក ចុះចេញពីតំណែង ដោយបានប្រាប់ថា៖ “គាត់បណ្ដោយឱ្យចិន ប្រើអង្គការសុខភាពពិភពលោកដឹកនាំសហគមន៍ពិភពលោកទៅក្នុងផ្លូវដែលខុស”។

ការរិះគន់របស់លោកត្រាំ បានកើតឡើងក្រោមស្ថានការណ៍ការឆ្លងរាលដាលដែលមិនសូវជាល្អប៉ុន្មាននៅក្នុងប្រទេសអាមេរិក ជាពិសេសក្នុងទីក្រុងនីវយ៉ក ដែលតាមរយៈការរាប់របស់ទីភ្នាក់ងារព័ត៌មានរ៉យទ័រ បានរកឃើញថា តួលេខអ្នកឆ្លងមេរោគនៅក្នុងទីក្រុងមួយនេះ មានចំនួនច្រើន វ៉ាដាច់ប្រទេសអ៊ីតាលីរួចរាល់ទៅហើយកាលពីថ្ងៃអង្គារ(ទី7មេសា) ទាំងដែលអ៊ីតាលី គឺជាប្រទេសដែលមានអ្នកឆ្លងមេរោគច្រើនបំផុតលំដាប់លេខ3 នៅលើពិភពលោកបន្ទាប់ពីអាមេរិកនិងអេស្ប៉ាញ។

តាមរយៈការរាប់ចំនួនរបស់ទីភ្នាក់ងារព័ត៌មានរ៉យទ័រ បានរកឃើញថា នៅក្នុងទីក្រុងនីវយ៉ក(តែមួយ) មានអ្នកឆ្លងមេរោគ ចំនួន 138,836នាក់ ច្រើនជាងចំនួន 135,586នាក់ទូទាំងប្រទេសអ៊ីតាលី ខណៈដែលអាមេរិក ជាប្រទេសដែលរកឃើញអ្នកឆ្លងមេរោគ(ទូទាំងប្រទេស)ច្រើនជាងគេបំផុត ចំនួនជាង 380,000នាក់ ក្នុងនោះស្លាប់ 11,800នាក់ តាមពីក្រោយដោយប្រទេសអេស្ប៉ាញ ដែលរកឃើញអ្នកឆ្លងមេរោគ ច្រើនជាង 140,000 នាក់ និងស្លាប់ជាង 13,000នាក់។

តួលេខទាំងនេះ ត្រូវបានផ្សព្វផ្សាយចេញមក ក្នុងខណៈដែលអាមេរិកកំពុងត្រៀមខ្លួនប្រឈមនឹងស្ថានការណ៍អាក្រក់បំផុតក្នុងសប្ដាហ៍នេះ ដែលអាជ្ញាធរម្នាក់បានហៅថា “ជាសប្ដាហ៍ដែលផុតកំពូលបំផុតរបស់ការស្លាប់” ដោយសារកូវីដ-19។

ទីក្រុងនីវយ៉ក រកឃើញអ្នកស្លាប់ប្រចាំថ្ងៃ ច្រើនជាងគេបំផុត រាប់ចាប់តាំងពីមានការឆ្លងរាលដាល ដោយមានចំនួន 731នាក់ សរុប 5,489នាក់ ទោះជាកាលពីពេលមុនហ្នឹង លោក អ៊ែនឌ្រូវ៍ ឃូអូម៉ូ អភិបាលក្រុងនីវយ៉ក បានបញ្ជាក់កាលពីថ្ងៃអង្គារ(ទី7មេសា)ថា ចំនួនអ្នកជំងឺដែលចូលទៅព្យាបាលនៅតាមមន្ទីរពេទ្យផ្សេងៗ មើល ទៅហាក់ដូចជាស្ថិតក្នុងកម្រិតទប់ទប់ហើយក៏ដោយ៕

ប្រភព៖ សារព័ត៌មានបរទេស

April 8, 2020

មនុស្សជាង81.000នាក់ស្លាប់ដោយសារ COVID-19 នៅទូទាំងសកលលោក

ពិភពលោកបានរកឃើញអ្នកផ្ទុកវីរុសកូរ៉ូណាCOVID-19 ចំនួនជាង1.4លានករណី និងស្លាប់ជាង81,000ករណី ក្នុងនោះសហរដ្ឋអាមេរិក និងអឺរ៉ុបបន្តជាសម្បុកមេរោគធំជាងគេ។

យោងតាមស្ថិតិរបស់សាកលវិទ្យាល័យ Johns Hopkins ពិភពលោកបច្ចុប្បន្នមានករណីឆ្លងវីរុសសរុប1,414,738នាក់ និង81,259នាក់បានស្លាប់ ដោយសារតែវីរុសCOVID-19 ដែលកំពុងបង្ហាញវត្តមាននៅក្នុងប្រទេស និងដែនដីចំនួន209 ក្នុងនោះមានករណីឆ្លងថ្មី72,366នាក់ និងស្លាប់ថ្មី6,701នាក់។ ករណីជាសះស្បើយមានចំនួន298,642នាក់។

សហរដ្ឋអាមេរិក៖ ឆ្លងថ្មី31,500នាក់ និងឆ្លងសរុប396,223នាក់។ ស្លាប់ថ្មី1,944នាក់ និងស្លាប់សរុប12,722នាក់។

អេស្ប៉ាញ៖ ឆ្លងថ្មី5,267នាក់ និងឆ្លងសរុប141,942នាក់។ ស្លាប់ថ្មី704នាក់ និងស្លាប់សរុប14,045នាក់។ ប្រទេសនេះគឺជាសម្បុកមេរោគធំជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក។

អ៊ីតាលី៖ ឆ្លងថ្មី3,039នាក់ និងឆ្លងសរុប135,586នាក់។ ស្លាប់ថ្មី604នាក់ និងស្លាប់សរុប17,127នាក់។ ប្រទេសនេះ នៅតែជា “វាលពិឃាត” របស់ COVID-19 ធំបំផុតក្នុងពិភពលោក។

បាររាំង៖ ឆ្លងថ្មី11,059នាក់ និងឆ្លងសរុប109,069នាក់។ ស្លាប់ថ្មី1,417នាក់ និងស្លាប់សរុប10,328នាក់។ ប្រទេសនេះ បានលោតរំលងប្រទេសអាល្លឺម៉ង់ ហើយក្លាយជាសម្បុកមេរោគធំជាងគេទី3នៅអឺរ៉ុប។

អាល្លឺម៉ង់៖ ឆ្លងថ្មី4,288នាក់ និងឆ្លងសរុប107,663នាក់។ ស្លាប់ថ្មី206នាក់ និងស្លាប់សរុប2,016នាក់។ ប្រទេសនេះ គឺជាសម្បុកមេរោគធំជាងគេលំដាប់ទី4នៅអឺរ៉ុប។

អង់គ្លេស៖ ស្លាប់ថ្មី786នាក់ និងស្លាប់សរុប6,159នាក់ ក្នុងចំណោមអ្នកជំងឺសរុប55,242នាក់។

អ៊ីរ៉ង់៖ ប្រទេសនេះបន្តជាសម្បុកមេរោគធំជាងគេទី2នៅអាស៊ី បន្ទាប់ពីប្រទេសចិន ដោយមានអ្នកជំងឺសរុប62,589នាក់ និងស្លាប់សរុប3,872នាក់។

ប្រទេសចិន និងកូរ៉េខាងត្បូងមិនទាន់ប្រកាសតួលេខថ្មីនៅឡើយ។ ប្រទេសចិន (តួលេខចុងក្រោយ) អ្នកឆ្លងសរុប81,740នាក់ និងស្លាប់សរុប3,331នាក់ ខណៈកូរ៉េខាងត្បូង (តួលេខចុងក្រោយ) អ្នកជំងឺសរុប10,331នាក់ និងស្លាប់សរុប192នាក់។

អាស៊ីអាគ្នេយ៍៖ ម៉ាឡេស៊ីបន្តជាសម្បុកមេរោគធំជាងគេក្នុងតំបន់ ដោយមានអ្នកជំងឺសរុប3,963នាក់ និងស្លាប់63នាក់។ ឥណ្ឌូនេស៊ី ជា “វាលពិឃាត” របស់ COVID-19 ធំជាងគេក្នុងតំបន់ ដោយមានអ្នកស្លាប់សរុប221នាក់ គឺកើន12ករណីធៀបនឹងម្សិលមិញ ខណៈអ្នកឆ្លងមេរោគសរុបឡើងដល់2,738នាក់៕

ប្រភព៖ សារព័ត៌មានបរទេស

April 8, 2020

មន្ទីរស្រាវជ្រាវអង់គ្លេសថា “គួរប្ដឹងប្រទេសចិនឱ្យសងសំណង6.5លានលានដុល្លារ ព្រោះតែCOVID-19”

មន្ទីរស្រាវជ្រាវ Henry Jackson Society នៅប្រទេសអង់គ្លេសយល់ថា បណ្ដាប្រទេស G7 អាចប្ដឹងប្រទេសចិន ដើម្បីទាមទារសំណងយ៉ាងតិច6.5លានលាន(6,500,000,000,000)ដុល្លារអាមេរិក ដោយសារតែបានធ្វើឱ្យវីរុសCOVID-19 ឆ្លងរាលដាល។

មន្ទីរស្រាវជ្រាវ Henry Jackson Society (HJS) ដែលមានមូលដ្ឋាននៅទីក្រុងឡុងដ៍ប្រទេសអង់គ្លេសបានសរសេរនៅក្នុងរបាយការណ៍ “សងសំណងវីរុសកូរ៉ូណា?” ដែលបានប្រកាសក្នុងថ្ងៃនេះថា “បើសិនជាប្រទេសចិនបានផ្ដល់ព័ត៌មានត្រឹមត្រូវក្នុងដំណាក់កាលដំបូង វីរុសរាតត្បាតនឹងមិនអាចចេញផុតពីប្រទេសនេះនោះទេ”។

ឯកសារខាងលើបានយល់ថា ប្រទេសចិនបានរំលោភលើច្បាប់ចំនួន10មាត្រា ក្នុងនោះមានមាត្រាមួយនិយាយអំពីបញ្ហាសុខភាពអន្តរជាតិដែលហៅកាត់ថា IHR (International Health Regulations) ដែលត្រូវបានរឹតបន្តឹងក្រោយអាសន្នរោគ SARS កាលពីឆ្នាំ2003។ HJS អះអាងថា ការព្យាយាមបិទបាំងរោគរាតត្បាតរបស់ទីក្រុងប៉េកាំង បានបណ្ដាលឱ្យ COVID-19 ឆ្លងពាសពេញពិភពលោក ធ្វើឱ្យមនុស្សជាង1.3លាននាក់ត្រូវឆ្លងមេរោគ ជាង74,000នាក់ស្លាប់ និងនាំឱ្យមានការខាតបង់ប្រាក់រាប់លានលានដុល្លារអាមេរិក។

របាយការណ៍របស់ HJS មានឃ្លាសរសេរថា “មន្ត្រីប្រទេសចិនជាច្រើន រួមទាំងអ្នកនាំពាក្យរបស់ក្រសួងការបរទេសចិន លោក Zhao Li Jian បានគាំទ្រគំនិតមិនសមហេតុផលថា COVID-19 ត្រូវបានកងទ័ពអាមេរិកាំងនាំចូលតំបន់ Wuhan មិនមែនមានប្រភពពីផ្សារលក់ត្រីសុទ្រនៅទីក្រុងនេះ ដែលជាកន្លែងទិញដូរសត្វព្រៃនោះទេ។

HJS យល់ថា ប្រទេសចិនត្រូវតែសងសំណងយ៉ាងហោចណាស់ 6.5លានលានដុល្លារអាមេរិក ប្រហាក់ប្រហែលនឹងទំហំទឹកប្រាក់ដែលបណ្ដាប្រទេសG7 កំពុងចំណាយដើម្បីទប់ទល់នឹងរោគរាតត្បាត និងជួយសង្គ្រោះខឿនសេដ្ឋកិច្ច ដោយសារប្រជាជនត្រូវនៅផ្ទះ ចំណែកវិស័យឧស្សាហកម្មក៏ត្រូវពន្យារពេល។

IHR កំណត់ឱ្យបណ្ដាប្រទេសត្រូវតែតាមដាន និងចែករំលែកព័ត៌មានអំពីលទ្ធភាពនៃការចម្លងមេរោគ និងកម្រិតធ្ងន់ធ្ងរនៃមេរោគដែលមានលទ្ធភាពចម្លងរវាងប្រទេសនិងប្រទេស។ មន្ទីរស្រាវជ្រាវ Henry Jackson Society បានចោទប្រកាន់ប្រទេសចិនថា បានធ្វើសកម្មភាពផ្ទុយពីនេះ ដោយសារតែបានបិទបាំងព័ត៌មាន និងពិន័យទៅលើអ្នកដែលព្យាយាមបញ្ចេញទិន្នន័យ។

សារព័ត៌មាន SCMP នៅហុងកុងបានឱ្យដឹងថា មនុស្សជិត200នាក់បានឆ្លងវីរុសCOVID-19 ត្រូវបានរកឃើញនៅមុនថ្ងៃទី27ធ្នូ ឆ្នាំ2019 ប៉ុន្តែអាជ្ញាធរចិន គ្រាន់តែរាយការណ៍អំពីជំងឺទៅអង្គការសុខភាពពិភពលោក(WHO) ក្រោយនោះចំនួន4ថ្ងៃ ហើយអះអាងថា មិនទាន់មានភ័ស្តុតាងបង្ហាញថា វាឆ្លងពីមនុស្សទៅមនុស្ស។

JHS បានឱ្យដឹងថា “អ្នកដែលបានផ្លុំកញ្ចែ ដូចជាវេជ្ជបណ្ឌិត Li Wenliang ជាដើម ត្រូវបានព្រមានដោយសារតែចែករំលែកព័ត៌មានអំពីរោគរាតត្បាត។ មនុស្សជាច្រើនយល់ថា COVID-19 បានឆ្លងពីមនុស្សទៅមនុស្សតាំងពីមុនអំឡុងពេលខាងលើ”។ JHS អំពាវនាវឱ្យបង្កើតជាសម្ព័ន្ធភាពដើម្បីប្ដឹង ព្រោះតែទីក្រុងប៉េកាំង “តែងតែប្រតិកម្មយ៉ាងកំរោលចំពោះការគំរាមនៅលើឆាកអន្តរជាតិ”។

ប្រធានាធិបតីចិន លោកស៊ីជិនពីង រួមនឹងមេដឹកនាំចិនដទៃទៀត កំពុងគោរពវិញ្ញាណក្ខន្ធ នៅក្នុងថ្ងៃកាន់ទុក្ខជាតិសម្រាប់ជនរងគ្រោះដោយសារវីរុសCOVID-19 (នៅទីក្រុងប៉េកាំងនៅថ្ងៃសៅរ៍ទី4 ខែមេសា)។

របាយការណ៍ក៏បានសរសេរថា “វិធានការនេះនឹងទាមទារឱ្យមានភាពក្លាហាន និងសាមគ្គីទូទាំងពិភពលោក។ អាជ្ញាធរទីក្រុង Wuhan និងខេត្ត Hubei បានរំលោភលើ IHR ក្នុងដំណាក់កាលដំបូងនៃអាសន្នរោគ ហើយការទទួលខុសត្រូវគឺត្រូវតែជារបស់មេដឹកនាំជាន់ខ្ពស់បំផុត។ ជាការពិត វិធីទប់ទល់នឹង COVID-19 របស់អាជ្ញាធរចិន បានរំលោភលើច្បាប់អន្តរជាតិ”។

ការប្ដឹងផ្ដល់ដែលកើតឡើងជុំវិញបញ្ហា IHR គឺជាសកម្មភាពដែលមិនធ្លាប់មានពីមុនមក ប៉ុន្តែ JHS យល់ថា ក្របខ័ណ្ឌក្នុង WHO អនុញ្ញាតឱ្យធ្វើរឿងនេះ។ មន្ទីរស្រាវជ្រាវអង់គ្លេសក៏បានលើកឡើងអំពីយុទ្ធសាស្ត្រដែលអាចនាំបញ្ហានេះឡើងតុលាការអាជ្ញាកណ្ដាល អង្គការពាណិជ្ជកម្មអន្តរជាតិ ឬទាក់ទងនឹងបទបញ្ញត្តនៅក្នុងកិច្ចព្រមព្រៀងវិនិយោគ ឬសម្បីតែអនុសញ្ញារបស់អង្គការសហប្រជាជាតិស្តីពីច្បាប់ដែនសមុទ្រក៏អាចយកមកប្រើបានដែរ។

Matthew Henderson ដែលជាសហអ្នកនិពន្ធនៃរបាយការណ៍នេះ យល់ថា ប្រជាជនចិនក៏ជា “អ្នករងគ្រោះដែលគ្មានកំហុស” ព្រោះតែការខ្វះការទទួលខុសត្រូវរបស់រដ្ឋាភិបាល។ “នេះគឺជាកំហុសរបស់រដ្ឋាភិបាលចិន។ ពួកគេមិនទាន់រៀនចេះអ្វីសោះបន្ទាប់ពីអាសន្នរោគ SARS។ ពាក្យមិនពិត និងព័ត៌មានក្លែងក្លាយពីដំណាក់កាលដំបូងនៃអាសន្នរោគ COVID-19 បានធ្វើឱ្យមានផលវិបាកដែលបណ្ដាលឱ្យមនុស្សជាច្រើនត្រូវបាត់បង់ជីវិត”។ នេះបើតាម Henderson។

ក្រុមអ្នករៀបចំរបាយការណ៍របស់ JHS យល់ថា ការគន់គូរអំពីទំហំនៃផលវិបាក ឬការខូចខាតសម្រាប់បណ្ដាប្រទេសកំពុងអភិវឌ្ឍ និងការបង្កើតយន្តការប្ដឹងផ្ដល់ទៅតាមលំដាប់លំដោយ ដោយយោងទៅលើច្បាប់ នឹងអាចជួយឱ្យបណ្ដាប្រទេស “ទទួលបានសំណងក្រោយការខាតបង់ដោយសារប្រទេសចិនបង្កឡើង”៕

ប្រភព៖ Sydney Morning Herald

April 7, 2020

គណៈរដ្ឋមន្ត្រីអង់គ្លេសកំពុងបែកបាក់ផ្ទៃក្នុង ខណៈមិនច្បាស់លាស់អំពីអ្នកស្នងតំណែងនាយករដ្ឋមន្ត្រី ដែលកំពុងផ្ទុកវីរុសCOVID-19

នៅប៉ុន្មានម៉ោងប៉ុណ្ណោះ ក្រោយពីការិយាល័យនាយករដ្ឋមន្ត្រីអង់គ្លេសប្រកាសថាលោក Johnson នៅតែបន្តដឹកនាំប្រទេសពីបន្ទប់សម្រាកព្យាបាលនៅឯមន្ទីរពេទ្យ រដ្ឋមន្ត្រីការបរទេស Dominic Raab ត្រូវបានស្នើឱ្យដឹកនាំ “កិច្ចការចាំបាច់” មួយចំនួន ជំនួសនាយករដ្ឋមន្ត្រី។

នៅក្នុងកិច្ចប្រជុំមួយនៅឯការិយាល័យនាយករដ្ឋមន្ត្រីអង់គ្លេសកាលពីល្ងាចថ្ងៃទី6មេសាក្រោយពីនាយករដ្ឋមន្ត្រី Boris Johnson អាយុ55ឆ្នាំ បានចូលព្យាបាលជាបន្ទាន់នៅឯមន្ទីរពេទ្យដោយសារបានឆ្លងវីរុសCOVID-19 លោក Raab បានសន្យាជាមួយប្រជាជនថា រដ្ឋមន្ត្រី និងមន្ត្រីគ្រប់ជាន់ថ្នាក់ កំពុងតែបន្តអនុវត្តតាមបញ្ជារបស់នាយករដ្ឋមន្ត្រី។

“កិច្ចការរបស់រាជរដ្ឋាភិបាលនឹងត្រូវបានធ្វើបន្ត ហើយនាយករដ្ឋមន្ត្រីកំពុងត្រូវបានធានាសុវត្ថិភាពដោយក្រុមវេជ្ជបណ្ឌិតពូកែៗបំផុតនៅមន្ទីរពេទ្យ St Thomas” នេះបើតាមសម្ដីលោក Raab ដែលមានអាយុ46ឆ្នាំ ជារដ្ឋមន្ត្រីការបរទេសអង់គ្លេស។

លោក Raab ដែលជារដ្ឋមន្ត្រីទីមួយដែរនោះ មុននេះត្រូវបានប្រគល់ភារកិច្ចឱ្យដឹកនាំកិច្ចប្រជុំប្រចាំថ្ងៃរបស់គណៈរដ្ឋមន្ត្រីអង់គ្លេសដែលពិភាក្សាអំពីយុទ្ធសាស្ត្រប្រយុទ្ធប្រឆាំងនឹងការរាតត្បាតនៃវីរុសCOVID-19។ នៅក្នុងសេចក្ដីប្រកាសមួយ ការិយាល័យនាយករដ្ឋមន្ត្រីបានឱ្យដឹងថា រដ្ឋមន្ត្រីទីមួយ (លោក Raab) ត្រូវបានស្នើឱ្យ “បំពេញភារកិច្ចជំនួសនាយករដ្ឋមន្ត្រីលើរឿងចាំបាច់មួយចំនួន”។ នេះបង្ហាញថា រដ្ឋមន្ត្រីការបរទេស មិនទាន់ត្រូវបានអនុញ្ញាតឱ្យកាន់កាប់ទាំងស្រុងនូវតួនាទីរបស់នាយករដ្ឋមន្ត្រីនៅឡើយ។

នៅពេលត្រូវបានសួរ ថាតើបានទទួលកាន់កាប់ “ភារកិច្ចទាក់ទិននឹងសន្តិសុខជាតិ” ពីលោក Johnson ហើយឬនៅ លោក Raab ក៏បានបដិសេធមិនឆ្លើយតប។

លោក Dominic Raab រដ្ឋមន្ត្រីក្រសួងការបរទេស

ថ្នាក់ដឹកនាំដែលត្រូវឡើងជំនួសនាយករដ្ឋមន្ត្រីនៅអង់គ្លេស ខុសពីសហរដ្ឋអាមេរិក។ សិទ្ធិអំណាច និងភារកិច្ចរបស់អនុប្រធានាធិបតីអាមេរិក ត្រូវបានគេកំណត់យ៉ាងច្បាស់ដោយរដ្ឋធម្មនុញ្ញ ខណៈដែលនៅអង់គ្លេស ការិយាល័យនាយករដ្ឋមន្ត្រី មិនត្រូវបានអនុញ្ញាតឱ្យប្រើប្រាស់ ចាប់តាំងពីអតីតឧបនាយករដ្ឋមន្ត្រី Nick Clegg បានចូលរួមធ្វើសម្ព័ន្ធមិត្តជាមួយអតីតនាយករដ្ឋមន្ត្រី David Cameron កាលពីឆ្នាំ2010។

មុនពេលនាយករដ្ឋមន្ត្រី Johnson ចូលសម្រាកព្យាបាលនៅមន្ទីរពេទ្យ ភាពមិនច្បាស់លាស់ខាងលើ បានធ្វើឱ្យមានពាក្យចចាមអារ៉ាមអំពីការបែកបាក់ផ្ទៃក្នុងរវាងរដ្ឋមន្ត្រីនានា ក្នុងនោះក្រុមសម្ព័ន្ធមិត្តរបស់លោក Michael Gove (រដ្ឋមន្ត្រីនៃទីស្ដីការគណៈរដ្ឋមន្ត្រី) យល់ថា លោក Michael Gove ទើបជាអ្នកត្រូវឡើងគ្រប់គ្រងប្រទេសជំនួសនាយករដ្ឋមន្ត្រី Johnson។

នៅពេល COVID-19 បានឈានដល់ចំណុចគួរឱ្យព្រួយបារម្ភ ការិយាល័យនាយករដ្ឋមន្ត្រី បានដឹងមុនអំពីបញ្ហាដែលនឹងកើតឡើង ហើយក៏បានរៀបចំផែនការស្ដីអំពី “អ្នកស្នងតំណែងរបស់នាយករដ្ឋមន្ត្រី” ក្នុងនោះ គេឃើញថា លោក Dominic Raab ដែលជារដ្ឋមន្ត្រីទីមួយ និងជារដ្ឋមន្ត្រីការបរទេស ត្រូវបានតែងតាំងឱ្យស្ថិតនៅកំពូលតារាង ត្រៀមចូលកាន់តំណែងជួសនាយករដ្ឋមន្ត្រី។

លោក Michael Gove រដ្ឋមន្ត្រីទីមួយ និងជារដ្ឋមន្ត្រីនៃទីស្ដីការគណៈរដ្ឋមន្ត្រី (អ្នកគ្រប់គ្រងការិយាល័យនាយករដ្ឋមន្ត្រី)

ក៏ប៉ុន្តែ មកដល់ពេលនេះ សិទ្ធិអំណាចរបស់លោក Raab មិនទាន់ប្រាកដប្រជានៅឡើយ។ លោកស្រីបណ្ឌិត Catherine Haddon សមាជិកជាន់ខ្ពស់ម្នាក់នៅវិមានរដ្ឋាភិបាលឱ្យដឹងថា សិទ្ធិអំណាចមួយចំនួនអាចនឹងត្រូវបានប្រគល់ឱ្យរដ្ឋមន្ត្រីផ្សេងៗក្នុងជួរគណៈរដ្ឋមន្ត្រី៕

ប្រភព៖ សារព័ត៌មានបរទេស

April 7, 2020

អូយ បារម្ភជំនួស! ជនជាតិចិនជាច្រើនម៉ឺននាក់ប្រជ្រៀតគ្នាទៅកម្សាន្ត “ភ្នំហួងសាន” ក្រោយទើបរួចផុតវិបត្តិកូវីដ-19

ទិដ្ឋភាពដ៏គួរឱ្យភ្ញាក់ផ្អើល…មនុស្សម្នាចំនួនដ៏ច្រើននាំគ្នាសម្រុកទៅភ្នំហួងសាន ក្នុងមណ្ឌលអានហ៊ុយ ប្រទេសចិន បានបង្ហាញឱ្យឃើញពីភាពស្មុគស្មាញដែលប្រទេសនេះអាចនឹងប្រឈមនាពេលអនាគត ក្នុងខណៈដែលប្រទេសមួយនេះកំពុងព្យាយាមវិលត្រឡប់មករកសភាវប្រក្រតី និងព្យាយាមទប់ស្កាត់ការរស់ឡើងវិញរបស់វីរុសកូរ៉ូណាប្រភេទថ្មី ឬកូវីដ-19 ឱ្យបាននោះ។

ជ្រលងភ្នំទេសចរណ៍ដ៏ពេញនិយមដែលស្ថិតនៅភាគខាងកើតឆៀងខាងត្បូងរបស់ប្រទេសចិន ត្រូវបិទការបម្រើសេវាកម្មជាថ្មីម្ដងទៀត ក្រោយពីមនុស្សម្នាជាច្រើនម៉ឺននាក់ បានប្រជ្រៀតគ្នាដើរ ក្លាយជាខ្សែផ្លូវវែងមួយបន្តកន្ទុយគ្នា បំណងឡើងទៅកម្សាន្តលើភ្នំ ក្នុងអំឡុងថ្ងៃចុងសប្ដាហ៍កន្លងទៅ ក្រោមក្ដីបារម្ភកង្វល់យ៉ាងខ្លាំងថា វាអាចនឹងក្លាយជាគំនរភ្លើងដែលនឹងធ្វើឱ្យផ្ទុះវិបត្តិការឆ្លងរាលដាលរបស់មេរោគកូវីដ-19 ឡើងជាថ្មីម្ដងទៀត។

ប្រជាជនជាច្រើនម៉ឺននាក់នាំគ្នាចេញមកដើរលេងកម្សាន្ត ក្រោយពីរដ្ឋបាលមណ្ឌលអានហ៊ុយ មានប្រូម៉ូសិនដើរកម្សាន្តហ្វ្រ៊ី 29កន្លែង សង្ឃឹមបង្កើនចំនួនអ្នកទេសចរ ដែលបានចាប់ផ្ដើមតាំងពីថ្ងៃសៅរ៍(ទី4មេសា)ចុងសប្ដាហ៍កន្លងទៅ។

ក្នុងផែនការជំរុញវិស័យទេសចរណ៍នេះ អ្នកទេសចរត្រូវបានសំណូមពរឱ្យបង្ហាញពីស្ថានភាពខាងសុខភាពតាមរយៈអ៊ែបភ្លីខេសិនមួយ ពាក់ម៉ាស់អនាម័យការពារ និងមានមន្ត្រីចាំត្រួតពិនិត្យសីតុណ្ហភាពរាងកាយ មុននឹងអនុញ្ញាតឱ្យឡើងទៅ…។

តែយ៉ាងណាក៏ដោយ កាលពីថ្ងៃអាទិត្យ(ទី5មេសា) មន្ត្រីនៅឯឧទ្យាននោះ បានប្រាប់ថា ចាំបាច់ត្រូវបិទមណ្ឌលទេសចរណ៍មួយនេះជាថ្មីម្ដងទៀត ដោយសារតែចំនួនអ្នកទេសចរបានកើនលើសចំនួនដែលបានកំណត់ទុក 20,000នាក់ក្នុង 1ថ្ងៃ និងសំណូមពរឱ្យទៅដើរលេងកម្សាន្តនៅទីកន្លែងផ្សេងទៀត ឬរង់ចាំមកកម្សាន្តនៅភ្នំមួយនេះ នាឱកាសក្រោយទៀតក៏បាន។

រូបថត និងវីដេអូ ដែលបានផ្សព្វផ្សាយនៅលើ វើយប៉ ផ្លាតហ្វ៉មព័ត៌មានបណ្ដាញសង្គមអនឡាញរបស់ចិន បានបង្ហាញឱ្យឃើញពីហ្វូងមនុស្សដ៏ច្រើនកុះករ ប្រជ្រៀតគ្នាដើរឡើងទៅលើភ្នំ ក្នុងអំឡុងថ្ងៃឈប់សម្រាក 3ថ្ងៃ នៃថ្ងៃឆេងម៉េង។ មានអ្នកលេងបណ្ដាញសង្គមជាច្រើនបានបញ្ចេញការយល់ឃើញ ដូចជា “វិស័យទេសចរណ៍បានរងផលប៉ះពាល់យ៉ាងធ្ងន់ធ្ងរ ដូចគ្នានឹងវិស័យឧស្សាហកម្មដទៃទៀតដែរ តែមេរោគឆ្លងរាតត្បាត នៅមិនទាន់ចប់ទេ បើអ្នកត្រូវការបើកកន្លែងទេសចរណ៍ឡើងវិញ អ្នកចាំបាច់ត្រូវតែកំណត់ចំនួនអ្នកទេសចរ”។

ប្រទេសចិនបានរាយការណ៍ថា បានរកឃើញអ្នកឆ្លងមេរោគកូវីដ-19 ថ្មីនៅក្នុងថ្ងៃចន្ទ(ទី6មេសា) ម្សិលមិញ ត្រឹមតែ 39នាក់ប៉ុណ្ណោះ និងមានអ្នកស្លាប់បន្ថែម 2នាក់នៅក្នុងប្រទេស៕

ប្រភព៖ សារព័ត៌មានបរទេស

April 7, 2020

មេរៀន1ទៀតពីការបិទទីក្រុង! ជីវិតគូអាពាហ៍ពិពាហ៍ចិនដួលរលំ “បែកគ្នា ល្អជាងនៅជុំគ្នា”

សារព័ត៌មានក្រៅប្រទេស បានរាយការណ៍នៅថ្ងៃម្សិលមិញ(ទី6មេសា)ថា អត្រាការលែងលះគ្នារបស់គូស្វាមី-ភរិយាជនជាតិចិន ដែលកំពុងកើនឡើង មានផលប៉ះពាល់សំខាន់ ក្រោយពីការរស់នៅជាមួយគ្នាជាប់រហូតក្នុងអំឡុងពេលវិបត្តិរោគឆ្លងរាតត្បាត គឺជាការដាស់តឿនដល់បណ្ដាប្រទេសទាំងឡាយក្នុងពិភពលោក ដែលកំពុងប្រើវិធានការបិទទីក្រុង។

របាយការណ៍បានបន្តថា ក្រោយពីបញ្ចប់វិធានការបង្ខាំងឱ្យនៅតែក្នុងផ្ទះដោយរដ្ឋចិនកាលពីខែមីនា រឿងដំបូងគេដែលគូស្វាមី-ភរិយាចិនចំនួនដ៏ច្រើននាំគ្នាធ្វើ គឺទៅដាក់ឯកសារសុំលែងលះគ្នា។

សារព័ត៌មានខាងលើ បានលើកយកបទសម្ភាសរបស់អ្នកស្រី អ៊ូ(ឈ្មោះឧបមា) ជាស្ត្រីមេផ្ទះ វ័យ 30ឆ្នាំ ក្នុងមណ្ឌលក្វាងទុង ភាគខាងត្បូងប្រទេសចិន ដែលបានប្រើពេលវេលាទាំងយប់ទាំងថ្ងៃ ជិត 2ខែ នៅរួមគ្នាជាមួយស្វាមីដែលមិនបានចេញទៅធ្វើការ។ ទង្វើរបស់ស្វាមី ទោះជាការលេងជាមួយកូន ក្នុងពេលដែលកូនៗគួរតែចូលគេងជារឿងតូចតាចក៏ដោយ តែការយល់ឃើញមិនត្រូវគ្នាជាច្រើន បានក្លាយជាភាពគួរឱ្យធុញទ្រាន់ និងគួរឱ្យរំខានហួសនឹងទ្រាំបាន។

“គាត់ជាអ្នកបង្កបញ្ហានៅក្នុងផ្ទះ” អ្នកស្រីនិយាយ “ខ្ញុំលែងត្រូវការទ្រាំតទៅទៀតហើយ យើងឯកភាពថានឹងលែងគ្នា ហើយរឿងបន្តទៅទៀត គឺរកមេធាវី”

ទោះជាចិន បានចេញផ្សាយពីស្ថិតិនៃការលែងលះទូទាំងប្រទេសត្រឹមតែ1ឆ្នាំ 1ដងក្ដី តែរបាយការណ៍របស់សារព័ត៌មានពីតំបន់ផ្សេងៗក្នុងប្រទេសចិនបានបង្ហាញឱ្យដឹងថា មានការបង្ហើបឱ្យដឹងពីចំនួនគូលែងលះដែលកើនឡើងនៅក្នុងខែមីនា រាប់ចាប់ពីសប្ដាហ៍កន្លងមក ហេតុការណ៍នៃអំពើហិង្សាក្នុងគ្រួសារក៏កើនឡើងទ្វេគុណដែរ។

សញ្ញាទាំងនេះ អាចជាការព្រមាន ជាប្រផ្នូលអាក្រក់សម្រាប់គូស្នេហ៍ក្នុងតំបន់ផ្សេងៗទៀតទូទាំងពិភពលោក បើសិនគ្មានការយល់ចិត្តអាណិតអាសូរគ្នាទេ ការរស់នៅជាមួយគ្នាជាប់រហូត គឺជាវិបត្តិដ៏ធំ។

ទីក្រុងស៊ីអាន ក្នុងភាគកណ្ដាលប្រទេសចិន និងទីក្រុងតាចូវ៍ ក្នុងមណ្ឌលសេឆួន សុទ្ធតែមានរបាយការណ៍នៃការប្ដឹងផ្ដល់សុំលែងលះច្រើនជាប្រវត្តិសាស្ត្រដូចគ្នា នៅអំឡុងដើមខែមីនាកន្លងទៅ។

លោក ស្ទីហ្វ លី មេធាវីរឿងក្ដីក្នុងគ្រួសារនៃទីក្រុងសៀងហៃ នៅឯទីស្នាក់ការច្បាប់ Gentle & Trust បានថ្លែងថា មានពាក្យបណ្ដឹងសុំលែងលះកើនឡើង 25% ចាប់តាំងពីការបិទទីក្រុងបានធូរស្រាលកាលពីពាក់កណ្ដាលខែមីនា។

នៅពេលមេរោគវីរុសរាតត្បាតនាចុងខែមករា គូស្នេហ៍ក្នុងទីក្រុងជាច្រើន ត្រូវទ្រាំជាប់នៅក្រោមដំបូលផ្ទះតែមួយជាមួយគ្នា ពេលខ្លះក៏មានបងប្អូនរបស់គូស្នេហ៍ចូលមកបន្ថែមទៀត ដែលសម្រាប់មនុស្សជាច្រើន មានអារម្មណ៍ថា រឿងនេះ វាជ្រុលហួសលើសលប់ក្នុងការទ្រាំបាន។

លោក លី បានបញ្ជាក់ថា៖ “រឹតតែពួកគេប្រើពេលវេលានៅជាមួយគ្នាយូរប៉ុនណា ពួកគេក៏រឹតតែស្អប់គ្នាច្រើនឡើងប៉ុននោះដែរ”

អាជ្ញាធរចិនរំពឹងថា ការរស់នៅជាមួយគ្នារហូតដល់ទីបញ្ចប់ នឹងនាំឆ្ពោះទៅរកការធំធាត់ឡើងយ៉ាងកក់ក្ដៅរបស់ក្មេង និងជួយសងមកវិញនូវការតាំងគភ៌ដែលថយចុះដល់កម្រិតទាបបំផុតរាប់ចាប់តាំងពីការបង្កើតសាធារណរដ្ឋប្រជាមានិតចិនក្នុងឆ្នាំ1949 មក។

ទោះជាមានការបន្ធូរបន្ថយគោលនយោបាយ “កូនតែ1” និងការជំរុញដើម្បីឱ្យស្ត្រីរៀបការ និងមានបុត្រ “ក្នុងខណៈដែលអ្នកនៅផ្ទះក្នុងអំឡុងពេលដែលមានការឆ្លងរាតត្បាត គោលការណ៍ “កូនទី2” ត្រូវបានបន្ធូរបន្ថយ ដូច្នេះការនៅផ្ទះ និងការមានកូនទី2 ក៏អាចជួយប្រទេសរបស់អ្នកបានដែរ”

តែនៅក្នុងការពិតវិញ លទ្ធផលរបស់ការព្យាយាមទាំងនេះមិនបានបង្ហាញឱ្យឃើញឡើយ ផ្ទុយទៅវិញ ក្នុងសារព័ត៌មានចិន បែរជាពេញទៅដោយរបាយការណ៍នៃការឈ្លោះទាស់ទែងគ្នារបស់គូស្វាមី-ភរិយា។

អ្នកស្រី ហ្វឹង យួន សហស្ថាបនិក Equality ដែលជាអង្គការអភិវឌ្ឍន៍ឯកជនក្នុងទីក្រុងប៉េកាំង ដែលធ្វើការលើប្រធានបទ អំពើហិង្សាផ្លូវភេទ បានថ្លែងថា មានសំណូមពរចូលមកអង្គការរបស់អ្នកស្រីកើនឡើង ដើម្បីសុំជំនួយ។

Sixth Tone សារព័ត៌មានអនឡាញរបស់ទីក្រុងសៀងហៃ បានរាយការណ៍ថា ប៉ូលិសនៅក្នុងតំបន់មួយតាមបណ្ដោយដងទន្លេយ៉ង់ហ្ស៊ី ក្នុងមណ្ឌលហ៊ូពេយភាគកណ្ដាល ជិតកន្លែងដែលផ្ទុះការឆ្លងរាតត្បាតធំនៅក្នុងវូហាន បានទទួលរបាយការណ៍អំពីហេតុការណ៍អំពើហិង្សាក្នុងគ្រួសារក្នុងខែកុម្ភៈ ចំនួន 162លើក កើនឡើង 47លើក បើធៀបនឹងខែមុនហ្នឹង។

ព័ត៌មាន និងស្ថិតិថ្មីៗបំផុតទាំងអស់នេះ អាចជាការព្រមានសម្រាប់ប្រទេសផ្សេងៗនៅក្នុងពិភពលោកដែលកំពុងប្រើវិធានការបិទទីក្រុង អំពីអ្វីដែលពួកគេត្រូវតែមានខ្លាំងបំផុត នោះគឺ “ការយល់ចិត្ត និងអាណិតអាសូរគ្នាទៅវិញទៅមក” ឱ្យដល់ទីបំផុត៕

ប្រភព៖ សារព័ត៌មានបរទេស

April 7, 2020

ជាង74,000នាក់ស្លាប់ដោយសារ COVID-19 នៅទូទាំងពិភពលោក ខណៈឥណ្ឌូនេស៊ី ជា “វាលពិឃាត” របស់ COVID-19 ធំជាងគេនៅតំបន់អាស៊ីអាគ្នេយ៍

ពិភពលោកទាំងមូលមានមនុស្សជាង1.3លាននាក់បានឆ្លងជំងឺ និងជាង74,000នាក់បានស្លាប់ដោយវីរុស COVID-19 ក្នុងនោះសហរដ្ឋអាមេរិក និងអឺរ៉ុបនៅតែជាសម្បុកមេរោគកូរ៉ូណាធំជាងគេ។

យោងតាមស្ថិតិរបស់សាកលវិទ្យាល័យ Johns Hopkins ពិភពលោកបច្ចុប្បន្ន មានអ្នកឆ្លងមេរោគ 1,342,372នាក់ និងអ្នកស្លាប់74,558នាក់ ព្រោះតែបានឆ្លងវីរុសCOVID-19 ដោយអ្នកជំងឺកើន72,303នាក់ និងអ្នកស្លាប់កើន5,249នាក់។ ចំណែកអ្នកដែលបានជាសះស្បើយពីជំងឺ មានចំនួន278,182នាក់។

ខាងក្រោមនេះគឺជាការសង្ខេបអំពីតួលេខអ្នកជំងឺ និងអ្នកស្លាប់នៅក្នុងបណ្ដាប្រទេសលើពិភពលោក៖

សហរដ្ឋអាមេរិក៖ អ្នកជំងឺសរុប364,723នាក់ និងអ្នកជំងឺថ្មី29,199នាក់។ អ្នកស្លាប់សរុប10,781នាក់ និងអ្នកស្លាប់ថ្មី1,219នាក់។

អេស្ប៉ាញ៖ អ្នកជំងឺសរុប136,675នាក់ និងអ្នកជំងឺថ្មី5,029នាក់។ អ្នកស្លាប់សរុប13,341នាក់ និងអ្នកស្លាប់ថ្មី700នាក់។ ប្រទេសនេះជាសម្បុកមេរោគធំជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក។

អ៊ីតាលី៖ អ្នកជំងឺសរុប132,547នាក់ និងអ្នកជំងឺថ្មី3,599នាក់។ អ្នកស្លាប់សរុប16,523នាក់ និងអ្នកស្លាប់ថ្មី636នាក់។

អាល្លឺម៉ង់៖ អ្នកជំងឺសរុប102,403នាក់ និងអ្នកជំងឺថ្មី2,280នាក់។ អ្នកស្លាប់សរុប1,735នាក់ និងអ្នកស្លាប់ថ្មី151នាក់។ ប្រទេសនេះគឺជាសម្បុកមេរោគកូរ៉ូណាធំជាងគេលំដាប់ទី3នៅអឺរ៉ុប។

អង់គ្លេស៖ អ្នកជំងឺសរុប52,276នាក់ អ្នកស្លាប់សរុប5,358នាក់ និងអ្នកស្លាប់ថ្មី451នាក់។

ប្រទេសអ៊ីរ៉ង់៖ អ្នកជំងឺសរុប60,500នាក់ អ្នកស្លាប់សរុប3,739នាក់។ ប្រទេសនេះ គឺជាសម្បុកមេរោគធំទី2នៅអាស៊ី បន្ទាប់ពីប្រទេសចិន។

ប្រទេសចិន៖ (តួលេខចុងក្រោយ) អ្នកជំងឺសរុប81,740នាក់ និងអ្នកស្លាប់សរុប3,331នាក់ ខណៈកូរ៉េខាងត្បូង (តួលេខចុងក្រោយ) មានអ្នកជំងឺសរុប10,331នាក់ និងអ្នកស្លាប់សរុប192នាក់។

អាស៊ីអាគ្នេយ៍៖ ម៉ាឡេស៊ីជាសម្បុកមេរោគធំបំផុតក្នុងតំបន់ដោយមានអ្នកជំងឺសរុប3,793នាក់ និងស្លាប់សរុប62នាក់។ ឥណ្ឌូនេស៊ី ជា “វាលពិឃាត” របស់ COVID-19 ធំជាងគេនៅតំបន់អាស៊ីអាគ្នេយ៍ ដោយមានអ្នកស្លាប់សរុប209នាក់ កើន11ករណីធៀបនឹងម្សិលមិញ៕

ប្រភព៖ សារព័ត៌មានបរទេស

April 7, 2020

Tag: អាសន្នរោគ