Tag: អាជីវកម្ម

អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
ចង្រិតក្រហមកំពុងបំភ័យប្រជាជននៅទីក្រុងរបស់សហរដ្ឋអាម៉េរិក
ចង្រិត Mormon ដែលស៊ីសាច់គ្នាឯង កំពុង «សម្រុក» ចូលទីក្រុង Elko របស់រដ្ឋ Nevada ក្នុងទ្រង់ទ្រាយធំ បាន និងកំពុងពង្រាយខ្លួនពេញដងផ្លូវល្បឿនលឿន វាលស្មៅ និង «ឡោមព័ទ្ធ» ទីលំនៅរបស់ប្រជាជន។
ទីក្រុង Elko របស់រដ្ឋ Nevada ប្រឈមមុខនឹងទិដ្ឋភាពដូចទៅនឹងភាពយន្តរន្ធត់ នៅពេលហ្វូងចង្រិតក្រហមដូចឈាមកំពុងចូលមកកាន់កាប់ស្ទើរគ្រប់ច្រកល្ហក។ ចង្រិត Mormon មិនបង្កគ្រោះថ្នាក់ដល់មនុស្សដោយផ្ទាល់ ប៉ុន្តែវត្តមានរបស់ពួកវាធ្វើឱ្យប្រជាជនមានការព្រួយបារម្ភ។ នេះបើតាម Interesting Engineering ចុះផ្សាយនៅថ្ងៃទី 26 មិថុនានេះ។
ចង្រិត Mormon មានឈ្មោះក្នុងវិទ្យាសាស្ត្រថា Anabrus simplex។ វាគឺជាសត្វល្អិតគ្មានស្លាបដែលមានប្រភពនៅពាក់កណ្ដាលភាគខាងជើងរបស់អាម៉េរិកខាងជើង។
ជាធម្មតា ក្នុងមួយឆ្នាំ ចង្រិតញីនឹងបង្កើតកូនបានមួយលើក។ ក្រោយមក ពួកវាប្រមូលផ្ដុំគ្នា ផ្លាស់ទី និងស៊ីដំណាំនៅតាមផ្លូវពេលធ្វើដំណើរ។ ក៏ប៉ុន្តែ ឆ្នាំនេះ ពួកវានាំគ្នាចូលមកក្នុងទីប្រជុំជន និងទីក្រុង រួមមាន Elko ជាដើម បង្កឱ្យមានការព្រួយបារម្ភពីប្រជាជន។ ក្រុមអ្នកជំនាញវាយតម្លៃថា ចង្រិតរាប់លានក្បាលចូលមកកាន់ទីក្រុង Elko នៅរដូវក្ដៅនេះ។
បើទោះជាមិនគំរាមកំហែងដល់មនុស្ស ប៉ុន្តែចង្រិត Mormon មានក្លិនអាក្រក់ និងជាសត្វល្អិតដែលអាចស៊ីសាច់គ្នាឯង។ នៅពេលចង្រិតណាមួយត្រូវឡានកិន ពួកដែលនៅក្បែរនោះតែងលោតចូលមកដណ្ដើមគ្នាស៊ី បង្កើតបានជាទិដ្ឋភាពមួយដ៏គួរឱ្យខ្លាច។
វត្តមានក្នុងទ្រង់ទ្រាយធំរបស់ចង្រិតនេះ នាំឱ្យមន្ទីរពេទ្យ និងកន្លែងអាជីវកម្មនានាត្រូវបញ្ជូនមនុស្សទៅចាត់ការ បើទោះមិនសូវទទួលបានលទ្ធផលល្អ៕

June 26, 2023
ហាងសម្លៀកបំពាក់អេស្ប៉ាញលំដាប់ពិភពលោកដំបូងគេបង្អស់នៅកម្ពុជា «ZARA» សម្ពោធបើកដំណើរការនៅភ្នំពេញ
(ភ្នំពេញ) – តើនាងកញ្ញា លោក លោកស្រី គឺជាមនុស្សស៊ីវិល័យដែលចូលចិត្ត និងមានបំណងស្វែងរកម៉ូដសម្លៀកបំពាក់ទាន់សម័យ និងថ្លៃថ្នូរលំដាប់ពិភពលោកមែនទេ? ZARA បានមកដល់កម្ពុជាយើងហើយ!
ក្រុមហ៊ុនគ្រប់គ្រង ម៉ាក ZARA បានសម្ពោធបើកដំណើរការហាងសម្លៀកបំពាក់លំដាប់ពិភពលោកដំបូងរបស់ខ្លួននៅកម្ពុជា ស្ថិតនៅផ្សារទំនើប ជីប ម៉ុង 271 មេហ្កាម៉ល ជាកន្លែងប្រមូលផ្ដុំនូវម៉ូដសម្លៀកបំពាក់ទាន់សម័យ និងសម្បូបែបសម្រាប់មនុស្សគ្រប់វ័យ។
នាងកញ្ញា លោក លោកស្រី អាចរកទិញសម្លៀកបំពាក់ថ្មីៗ ទាន់សម័យ សម្បូរបែប សម្រាប់គ្រប់វ័យ នៅឯហាង ZARA ក្នុងផ្សារទំនើប ជីប ម៉ុង 271 មេហ្កាម៉ល នៅរាជធានីភ្នំពេញ ដែលបើកដំណើរការលក់ចាប់ពីថ្ងៃទី13 ខែឧសភា ឆ្នាំ 2023 និងរកទិញបានតាមអនឡាញ តាមរយៈគេហទំព័រ Zara.com/kh។
ហាងសម្លៀកបំពាក់អន្តរជាតិដំបូងគេក្នុងប្រទេសកម្ពុជា របស់យីហោ ZARA ស្ថិតនៅក្នុងបរិវេណទំហំសរុប 3,300 ម៉ែត្រការ៉េ ដែលលាតសន្ធឹងពេញមួយជាន់នៃផ្សារទំនើប ជីប ម៉ុង 271 មេហ្កាម៉ល។ ផ្នែកខាងក្នុងរបស់ហាងនេះ ត្រូវបានរចនាដោយស្ទូឌីយោ ស្ថាបត្យកម្ម ZARA (Zara Architectural Studio) ដែលភាគច្រើនមានពណ៌ស្រស់ស្អាត ស៊ីគ្នានឹងពណ៌នានារបស់សម្លៀកបំពាក់ រួមគ្រឿងសង្ហារឹមធ្វើពីឈើ និងផ្ទៃពណ៌ធម្មជាតិដ៏ទាក់ទាញ។
ហាង ZARA មានទំហំធំទូលាយ ប្រមូលផ្ដុំសម្លៀកបំពាក់កីឡា ស្បែកជើង និងប្រដាប់ប្រដារផ្សេងៗដ៏ទាន់សម័យ។ ក្នុងហាង មានការតុបតែង និងរចនាគ្រឿងសង្ហារឹមប្លែកៗ និងរៀបចំទីតាំងស្តុកទំនិញថ្មីនៅជាប់ៗ គ្នា ផ្ដល់ភាពងាយស្រួលដល់អតិថិជន។
ហាង ZARA ត្រូវបានបំពាក់ឧបករណ៍បច្ចេកវិទ្យាដ៏មានប្រសិទ្ធភាព ដើម្បីផ្តល់ជូនអតិថិជននូវបទពិសោធន៍ម៉ូដែលសម្លៀកបំពាក់មួយគ្មានពីរ ដែលរួមបញ្ចូលជាមួយវេទិកាអនឡាញថ្មីបំផុតនៅកម្ពុជា ក្នុងនោះមានដូចជា Zara.com/kh តាមរយៈកម្មវិធី Zara និងមុខងារ Store Mode ជាដើម។ ZARA ផ្ដល់ភាពងាយស្រួលដល់អតិថិជន ដោយសារមានកម្មវិធីស្វែងរកទំនិញនៅក្នុងហាង តាមរយៈអ៊ីនធើណិត។ ទំនិញដែលលក់តាមអនឡាញមានតម្លៃដូចគ្នាទៅនឹងទំនិញលក់នៅក្នុងហាង ZARA ហើយអតិថិជនអាចសម្រេចចិត្តទិញមុខទំនិញដោយការដឹកជញ្ជូនដល់ផ្ទះ ឬទៅទិញផ្ទាល់នៅហាងក៏បាន។
មុខងារ «Store Mode» តាមរយៈកម្មវិធី ZARA ភ្ជាប់ប្រព័ន្ធអនឡាញជាមួយហាងនៅរាជធានីភ្នំពេញ។ មុខងារនេះអនុញ្ញាតឱ្យអតិថិជនរកមើលមុខទំនិញនៅក្នុងហាង និងបញ្ជាទិញទំនិញក្នុងរយៈពេលដ៏ខ្លី។ អតិថិជនក៏អាចប្រើបាស់កម្មវិធីនេះ ដើម្បីរកទីតាំងមុខទំនិញ នៅក្នុងហាងផងដែរ។
សម្រាប់ការដឹកជញ្ជូន គឺត្រូវបានរៀបចំឡើងដើម្បីផ្តល់ជូននូវផលិតផល ដែលបានបញ្ជាទិញតាមអនឡាញ ដោយការវេចខ្ចប់យ៉ាងប្រុងប្រយ័ត្ន មិនធ្វើឱ្យប៉ះពាល់ដល់បរិស្ថាន និងការពារមុខទំនិញក្នុងអំឡុងពេលដឹកជញ្ជូន។
មុខទំនិញត្រូវបានដឹកជញ្ជូនដោយឥតគិតថ្លៃ ដោយមិនគិតពីចំនួនមុខទំនិញ នៅពេលអតិថិជនសម្រេចចិត្តទិញមុខទំនិញនៅក្នុងហាង តាមរយៈសេវាដឹកជញ្ជូនស្តង់ដារពី 7 ទៅ 8 ថ្ងៃនៃថ្ងៃធ្វើការ។
អតិថិជនដែលជ្រើសរើសការដឹកជញ្ជូនដល់ផ្ទះ សម្រាប់ការដឹកជញ្ជូនតាមស្ទង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃលើសពី 320,000 រៀល នឹងមិនគិតថ្លៃដឹកជញ្ជូន។ ចំពោះការដឹកជញ្ជូនតាមស្តង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃក្រោម 320,000 រៀល នឹងមានការគិតថ្លៃដឹកជញ្ជូន 20,000 រៀល។
ចំពោះអតិថិជនដែលចង់ផ្លាស់ប្តូរទំនិញ តាមគោលការណ៍ផ្លាស់ប្តូរ និងប្រគល់ទំនិញត្រលប់ គឺដូចគ្នាសម្រាប់ទាំងការទិញនៅហាង និងតាមអនឡាញ ក្នុងនោះ អតិថិជនអាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ 30 ថ្ងៃ បន្ទាប់ពីបានទិញ។ ការប្រគល់ទំនិញគឺឥតគិតថ្លៃ សម្រាប់ការប្រគល់ទំនិញផ្ទាល់នៅហាង និងគិតថ្លៃ 20,000 រៀល សម្រាប់ការប្រគល់ទំនិញពីអាសយដ្ឋានរបស់អតិថិជន។
យីហោ Zara គឺជាផ្នែកមួយនៃក្រុមហ៊ុន Inditex ដែលជាក្រុមហ៊ុនលក់រាយសម្លៀកបំពាក់ទូទាំងពិភពលោក។ Inditex ក៏ជាម្ចាស់កម្មសិទ្ធិលើក្រុមហ៊ុនជាច្រើនទៀត រួមមាន ក្រុមហ៊ុន Pull&Bear, Massimo Dutti, Bershka, Stradivarius, Oysho, Zara Home និង Uterque ផងដែរ។ រឿងរ៉ាវស្ដីពី ZARA បានចាប់ផ្តើមជាមួយនឹងការបើកហាងដំបូង របស់ខ្លួននៅប្រទេសអេស្ប៉ាញ ក្នុងឆ្នាំ 1975 ហើយ បច្ចុប្បន្ននេះ ZARA មានវត្តមានទាំងនៅហាងផ្ទាល់ និងនៅលើហាងអនឡាញ នៅក្នុងទីផ្សារជាង 200 កន្លែង នៅទូទាំងពិភពលោក។ ដោយផ្តោតលើការច្នៃប្រឌិតឥតឈប់ឈរ ZARA ផ្តល់ជូននូវផលិតផលឈានមុខគេសម្រាប់ស្រ្តី បុរស និងកុមារ តាមរយៈគំរូអាជីវកម្មដែលធ្វើឱ្យអតិថិជនមានចំណាប់អារម្មណ៍លើអ្វីគ្រប់យ៉ាងដែលយើងមាន។
លើសពីនេះទៅទៀត ថ្នាក់ដឹកនាំរបស់យីហោ ZARA ក៏ដូចជា Inditex ក៏បានសន្យាថា នឹងសម្រេចឱ្យបានគោលដៅស្ដីពីការបន្សាបកាបូនដែលនឹងជួយទប់ស្កាត់ការឡើងកម្ដៅផែនដីនៅត្រឹមឆ្នាំ 2040 ផងដែរ៕

ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល
ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល
ផ្សារទំនើប ជីប ម៉ុង 271 មេហ្កាម៉ល
May 13, 2023
វៀតណាម មិនព្រមបន្ថយអត្រាពន្ធនាំចូលរថយន្តអគ្គិសនី ខណៈកម្ពុជាបញ្ចុះ 50%
ថ្មីៗនេះ សំណើសុំបញ្ចុះអត្រាពន្ធនាំចូលរថយន្តអគ្គិសនីរបស់បណ្ដាក្រុមហ៊ុន និងស្ថាប័នមួយចំនួននៅប្រទេសវៀតណាម បានទទួលចម្លើយជាផ្លូវការពីក្រសួងហិរញ្ញវត្ថុប្រទេសនេះ។
ក្រសួងហិរញ្ញវត្ថុវៀតណាម កាលពីចុងឆ្នាំកន្លង បានស្នើឱ្យរដ្ឋាភិបាល កុំអនុម័តគោលនយោបាយកាត់បន្ថយអត្រាពន្ធពិសេសចំពោះការនាំចូលរថយន្តអគ្គិសនី ដោយលើកហេតុផលថា វៀតណាមមានគោលនយោបាយបញ្ចុះអត្រាពន្ធជាច្រើនរួចហើយ ក្នុងនោះក៏អត្រាពន្ធនាំចូលគ្រឿងបន្លាស់សម្រាប់ការផលិត និងដំឡើងរថយន្តអគ្គិសនី ដែលបញ្ចុះមកនៅ 0% ជាដើម ដើម្បីជំរុញវិស័យឧស្សាហកម្មបៃតងនៅប្រទេសនេះ។
ចំពោះអ្នកប្រើប្រាស់វិញ រដ្ឋាភិបាលវៀតណាមអនុវត្តគោលនយោបាយអនុគ្រោះពន្ធប្រថាប់ត្រា 0 ដុង ក្នុងរង្វង់បីឆ្នាំ ចាប់ពីខែមីនា 2022 និងបញ្ចុះពន្ធនេះ 50% នៅពីរឆ្នាំបន្ទាប់។ នេះបើតាមការអះអាងរបស់ក្រសួងហិរញ្ញវត្ថុវៀតណាម។
ជាងនេះ ក្រសួងខាងលើបានបញ្ជាក់ថា ការបញ្ចុះអត្រាពន្ធនាំចូលចំពោះរថយន្តអគ្គិសនី ក៏នឹងធ្វើឱ្យសមត្ថភាពប្រកួតប្រជែងរបស់រថយន្តផលិតក្នុងស្រុកត្រូវថយចុះ ប៉ះពាល់ដល់ប្រភពចំណូលរបស់រដ្ឋ និងបន្ថែមសម្ពាធទៅលើហេដ្ឋារចនាសម្ព័ន្ធគមនាគមក្នុងប្រទេសនេះផងដែរ។
សំណើសុំមិនបញ្ចុះអត្រាពន្ធសម្រាប់ការនាំចូលរថយន្តអគ្គិសនីរបស់ក្រសួងហិរញ្ញវត្ថុវៀតណាម ក៏ត្រូវបានឧបនាយករដ្ឋមន្ត្រីវៀតណាម Le Minh Khai អនុម័តរួចហើយកាលពីចុងឆ្នាំ 2022។
នេះគឺជាការបដិសេធជាផ្លូវការទៅនឹងសំណើសុំបញ្ចុះអត្រាពន្ធដែលក្រុមហ៊ុន TMT ដៃគូសហការរបស់សម្ព័ន្ធក្រុមហ៊ុនចិន-អាម៉េរិក SGMW (SAIC-GM-Wuling) នៅវៀតណាម និងសមាគមអាជីវកម្មមេកានិចវៀតណាម (VAMI) ដែលបានស្នើមុននោះ។
នៅកម្ពុជា ដើម្បីលើកទឹកចិត្តឱ្យមានការប្រើប្រាស់រថយន្តអគ្គិសនីកាន់តែច្រើនថែមទៀត រាជរដ្ឋាភិបាលបានទម្លាក់ពន្ធនាំចូលរថយន្តអគ្គិសនីចំនួន 50% ខណៈដែលការនាំចូលយានយន្តដែលដើរដោយប្រេងឥន្ធនៈ តម្រូវឱ្យបង់ពន្ធនាំចូលរហូតដល់ 120%។ នេះបើតាម ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ថ្លែងនៅក្នុងពិធី «អបអរសាទរខួបបីឆ្នាំ និងការដាក់តាំងពិព័រណ៍លក់លេខពិសេសផ្ទាល់ខ្លួន» នៅសួនច្បារវត្តបទុមវតី កាលពីព្រឹកថ្ងៃទី 07 មីនា 2023៕
May 11, 2023
ការសម្របសម្រួលជាចំណុចសំខាន់ក្នុងការសម្រួចសកម្មភាពឱ្យសម្រេចគោលដៅក្នុងអាជីវកម្ម
មិនថាការរស់នៅ ការធ្វើការងារ ឬការធ្វើអាជីវកម្មនោះទេ មនុស្សគ្រប់គ្នាចាំបាច់ត្រូវធ្វើការប្រាស្រ័យទាក់ទងដើម្បីប្រើប្រាស់មនុស្សឱ្យអស់ពីសក្តានុពលឆ្ពោះទៅសម្រេចគោលដៅណាមួយដែលបានកំណត់ទុក។ មនុស្សម្នាក់ៗ ជាពិសេសសហគ្រិនដែលជាអ្នកមើលឃើញពីឱកាសច្រើនជាងអ្នកដទៃផ្សេងទៀត តែងតែជាអ្នកដែលមានសមត្ថភាពក្នុងការប្រមូលមនុស្សខ្លាំងៗឱ្យធ្វើការងារជាមួយខ្លួន តែពេលខ្លះម្ចាស់អាជីវកម្មអាចនឹងប្រឈមជាមួយហានិភ័យខ្ពស់ក្នុងអាជីវកម្មទៅវិញ បើទោះបីជាពួកគាត់មានមនុស្សខ្លាំងនៅក្បែរខ្លួនក៏ដោយ។
លោក គង់ វិចិត្រា ស្ថាបនិកស្ថាប័ន Asia Leading Academy បានលើកឡើងថា អ្នកដែលពូកែប្រមូលមនុស្សមកធ្វើការងាររួមគ្នា ឬចូលរួមដើម្បីជួយដល់អាជីវកម្ម មិនប្រាកដថា សុទ្ធតែអាចជោគជ័យនោះទេ ព្រោះមនុស្សម្នាក់ៗមានចំណុចខុសគ្នាច្រើនដែលអាចធ្វើឱ្យមានការខ្វែងគំនិតគ្នាគ្រប់ពេល។ ពេលខ្លះមានមនុស្សពូកែច្រើន បញ្ហាក្នុងក្រុមការងារក៏កាន់តែច្រើនដូចគ្នា ដែលស្ថានភាពនេះជាចំណុចប្រឈមសំខាន់មួយអាចធ្វើឱ្យអាជីកម្មថ្មីៗត្រូវបិទទ្វារទៅវិញប្រសិនបើអ្នកគ្រប់គ្រងមិនចេះសម្របសម្រួលឱ្យបានល្អ ទោះបីជាមានម្ចាស់ភាគហ៊ុនជាមនុស្សពូកែធ្វើការងារក៏ដោយ។ ដើម្បីដោះស្រាយបញ្ហានេះ អ្នក-គ្រប់គ្រងចាំបាច់ត្រូវតែមានសមត្ថភាពគ្រប់គ្រងបុគ្គលិក ឬដៃគូឱ្យបានល្អ ដើម្បីធានាថា យើងអាចកាត់បន្ថយគុណវិបត្តិ ហើយប្រើប្រាស់សមត្ថភាពរបស់សមាជិកទាំងអស់ក្នុងក្រុមហ៊ុនដើម្បីនាំស្ថាប័នឱ្យកាន់តែខ្លាំង និងលេចធ្លោឡើង។
លោក គង់ វិចិត្រា បាននិយាយថា៖ “សម្រាប់ខ្ញុំការគ្រប់គ្រងមនុស្សចាំបាច់ត្រូវមានចំណុចសំខាន់ៗមួយចំនួនគឺវិធីសាស្ត្រ ចិត្តសាស្ត្រ និងការកំណត់គោលដៅឱ្យបានច្បាស់លាស់”។
សហគ្រិនខាងលើបានលើកឡើងផងដែរថាចំពោះវិធីសាស្ត្រ អ្នកគ្រប់គ្រងចាំបាច់ត្រូវព្យាយាមស្វែងយល់ឱ្យបានកាន់តែច្បាស់ និងលម្អិតពីបុគ្គលភាពរបស់សមាជិកម្នាក់ៗថា តើគាត់ជាមនុស្សបែបណា មានប្រភពមកពីណា ហើយមានបទពិសោធអ្វីខ្លះហើយគាត់មានលក្ខណៈប្លែកអ្វីខ្លះខុសពីសមាជិកដទៃទៀត។ ចំពោះចិត្តសាស្ត្រ គឺជាដំណាក់កាលសំខាន់មួយផ្សេងទៀតដែលត្រូវយកចិត្តទុកដាក់ ព្រោះក្រោយពេលយើងដឹងច្បាស់ពីបុគ្គលភាពរបស់បុគ្គលិកហើយ អ្នកគ្រប់គ្រងចាំបាច់ត្រូវចេះប្រើប្រាស់ភាពឆ្លាតវៃរបស់ខ្លួនក្នុងការប្រាស្រ័យទាក់ទង ឬជំរុញសកម្មភាពការងារបែបណាដើម្បីធ្វើឱ្យត្រូវនឹងអ្វីដែលមនុស្សម្នាក់ៗត្រូវការ។ ប្រសិនបើយើងអនុវត្តសកម្មភាពតែមួយជាមួយសមាជិកគ្រប់គ្នានោះ យើងនឹងបង្កើតចំណុចជំទាស់កាន់តែច្រើន ព្រោះមនុស្សម្នាក់ៗត្រូវការការយកចិត្តទុកដាក់តាមវិធីសាស្ត្រផ្សេងគ្នា និងមានវីធីសាស្រ្តធ្វើការងារផ្សេងៗគ្នាដែលទាមទាឱ្យអ្នកគ្រប់គ្រងយល់ពីកាលៈទេសៈ ហើយជំរុញលើកទឹកចិត្តឱ្យធ្វើការងារបានល្អដោយមិនប៉ះពាល់ដល់ទឹកចិត្ត។ ចំណុចចុងក្រោយគឺព្យាយាមកំណត់គោលដៅឱ្យបានច្បាស់លាស់ថា សកម្មភាពការងាររបស់យើងត្រូវការមនុស្សប្រភេទណាផ្សេងទៀត ហើយមនុស្សណាខ្លះដែលគួរតែបន្ថែមសម្រាប់ក្រុមការងារទាំងមូលបន្ទាប់ពីអាចសហការគ្នាបានល្អហើយ ដើម្បីឱ្យសកម្មភាពអាជីវកម្មកាន់តែមានការអភិវឌ្ឍលឿនឡើង។
លោក ឃួន សុខាន់ឌី អគ្គនាយកក្រុមហ៊ុន ECC Reality បានលើកឡើងថា សម្រាប់អាជីវកម្មរបស់លោក និងក្រុមការងាររបស់លោក ដែលជាវិស្វករផងនោះ ពេលខ្លះមានការលំបាកក្នុងការសម្របសម្រួលជាមួយក្រុមការងារ ព្រោះក្រុមអ្នកជំនាញខុសពីអ្នករកស៊ី។ អ្នកជំនាញជាអ្នកដែលសិក្សាល្អិតល្អន់ ត្រូវការប្រើប្រាស់ពេលវេលាយូរក្នុងការចេញគម្រោងមួយៗ ហើយពេលខ្លះទៀតត្រូវការភាពល្អិតល្អន់បំផុត ទើបអាចនិយាយបាន ដើម្បីចៀសវាងការខាតបង់ ហើយមិនចូលចិត្តស្មាននោះទេ តែសម្រាប់អ្នករកស៊ីវិញត្រូវការភាពរហ័ស និងនិយាយចេញភ្លាមៗជាការប៉ាន់ស្មាន។ ភាពខុសគ្នានេះធ្វើឱ្យមានភាពលំបាកក្នុងការគ្រប់គ្រង ឬសម្របសម្រួលឱ្យម្ចាស់អាជីវកម្ម និងអ្នកជំនាញដើរស្របគ្នាណាស់ តែសម្រាប់អ្នករកស៊ីលើវិស័យអចលនទ្រព្យ ឬសំណង់ចាំបាច់ត្រូវតែប្រឈមបញ្ហានេះ។ ហេតុនេះហើយទើបទាមទារឱ្យមានការយកចិត្តទុកដាក់ខ្លាំងដើម្បីធ្វើយ៉ាងណាឱ្យអាជីវកម្មអាចដំណើរការទៅបានដោយរលូន ហើយប្រកួតប្រជែងជាមួយដៃគូប្រកួតប្រជែងបាន។
លោក ឃួន សុខាន់ឌី និយាយថា៖ “សកម្មភាពសំខាន់ក្នុងការសម្របសម្រួលរវាងអ្នកជំនាញ និងម្ចាស់អាជីវកម្ម គឺបណ្តុះបណ្តាល និងព្យាយាមជំរុញឱ្យអ្នកជំនាញក្លាយជាអ្នករកស៊ី។ នៅពេលដែលអ្នកជំនាញចាប់ផ្តើមគិតថា ខ្លួនឯងជាផ្នែកមួយនៃអាជីវកម្មនោះ ពេលនោះគាត់នឹងចាប់ផ្តើមយល់ពីតម្រូវការរបស់អតិថិជនកាន់តែច្បាស់ដែលធ្វើឱ្យគាត់អាចនឹងចាប់ផ្តើមច្នៃស្ថានការណ៍ឱ្យកាន់តែប្រសើរឡើង”។
លោក សុខាន់ឌី បានលើកឡើងផងដែរថា អ្នករកស៊ីជាមួយអ្នកជំនាញចាំបាច់ត្រូវតែអត់ធ្មត់ ហើយព្យាយាមនាំពួកគាត់បន្តិចម្តងៗឱ្យយល់ពីតម្រូវការជាក់ស្តែងដែលយើងចង់បាន ហើយកាត់បន្ថយការស្តីបន្ទោស ព្រោះម្នាក់ៗសុទ្ធតែមានចំណុចសំខាន់រៀងៗខ្លួន។ នៅពេលដែលអ្នកជំនាញគាត់ដឹងពីគោលដៅ និងចំណុចសំខាន់ក្នុងការប្រកួតប្រជែង ឬមានជំនាញសហគ្រិនភាពហើយ គាត់នឹងប្រើប្រាស់ភាពច្នៃប្រឌិតរបស់គាត់ដើម្បីធ្វើយ៉ាងណាបង្កើតក្បួនងាយស្រួលផ្សេងៗទៀតដើម្បីធ្វើឱ្យលឿន ឱ្យល្អ ហើយធ្វើឱ្យម្ចាស់ស្ថាប័នយល់ពីតម្លៃរបស់គាត់កាន់តែខ្លាំង៕
January 15, 2019
អត្ថប្រយោជន៍ និងហានិភ័យនៃការវិនិយោគក្នុងទីផ្សារមូលបត្រដែលម្ចាស់អាជីវកម្មគួរយល់ដឹង
ជាទូទៅសហគ្រិនដែលមានបំណងចង់ពង្រីកអាជីវកម្មតែងគិតថា ជម្រើសមានតែមួយគត់គឺប្រាក់កម្ចីពីធនាគារ ប៉ុន្ដែបច្ចុប្បន្នយើងមានប្រភពហិរញ្ញប្បទានមួយទៀត គឺការបោះភាគហ៊ុនចូលទៅក្នុងផ្សារមូលបត្រដើម្បីទទួលប្រមូលដើមទុនពីម្ចាស់ហ៊ុនផ្សេងទៀត។
ដូច្នេះប្រភពហិរញ្ញប្បទានដែលកម្ពុជាមានបច្ចុប្បន្នគឺទី1ប្រព័ន្ធធនាគារ និងទី2ទីផ្សារមូលបត្រ ដែលក្នុងនោះប្រព័ន្ធធនាគារ គឺជាប្រភពហិរញ្ញប្បទានមួយដែលកំពុងតែដើរតួសំខាន់ក្នុងការផ្ដល់ទុនសម្រាប់ការវិនិយោគ។ ចំណែកឯទីផ្សារមូលបត្រវិញ គឺជាប្រភពហិរញ្ញប្បទានថ្មីមួយនៅកម្ពុជាសម្រាប់សហគ្រាសនានាដែលត្រូវការទុនក្នុងការពង្រីកអាជីវកម្ម។
ប៉ុន្តែការវិនិយោគលើមូលបត្រ ជាការវិនិយោគមានហានិភ័យខ្ពស់ ដែលវិនិយោគិនគួរពិនិត្យ ពិចារណាចំពោះព័ត៌មានទាំងឡាយដែលមាននៅក្នុងឯកសារ ជាពិសេសកត្តាហានិភ័យ។ ករណីបើសិនមានហានិភ័យណាមួយកើតឡើង ស្ថានភាពធុរកិច្ច ឬស្ថានភាពហិរញ្ញវត្ថុរបស់ក្រុមហ៊ុនអាចទទួលរងផលប៉ះពាល់ជាអវិជ្ជមាន ដែលនាំឱ្យតម្លៃរបស់មូលបត្រមានការធ្លាក់ចុះ ហើយវិនិយោគិនដែលបានវិនិយោគលើមូលបត្រនេះ អាចនឹងខាតបង់ការវិនិយោគមួយផ្នែក ឬទាំងស្រុង។ នេះបើតាមលោក ហោ ស៊ីម៉េត នាយកប្រតិបត្ដិការ និងហិរញ្ញវត្ថុនៃធនាគារអេស៊ីលីដា ដែលបានមានប្រសាសន៍ពាក់ព័ន្ធនឹងការវិនិយោគលើមូលបត្រ ភាពប្រឈមនឹងហានិភ័យមួយចំនួនដែលអាចមានដូចខាងក្រោម៖
1. ហានិភ័យអត្រាប្ដូរប្រាក់៖ កត្តានេះកើតឡើងដោយសារមានការប្រែប្រួលនៃអត្រាប្ដូរប្រាក់រវាងរូបិយប័ណ្ណមួយ ជាមួយនឹងរូបិយប័ណ្ណមួយទៀត។ ភាគហ៊ុននៅស្រុកខ្មែរ គេជួញដូរជាប្រាក់រៀល ប៉ុន្តែប្រជាជនខ្មែរភាគច្រើនសន្សំទុកលុយដុល្លារច្រើនជាងលុយខ្មែរ។ ដូច្នេះបើចង់ទិញភាគហ៊ុន ក៏ត្រូវតែបង្ខំចិត្តប្តូរជាលុយរៀល នោះគឺជាការខាតបង់មួយចំណែក។ ប្រសិនបើប្រាក់មានចំនួនច្រើន យើងក៏នឹងខាតច្រើនដែរ ព្រោះនៅពេលដែលយើងលក់ទៅវិញ យើងទទួលបានលុយរៀល រួចបើចង់ទុកជាលុយដុល្លារ គឺត្រូវប្ដូរម្ដងទៀត។
ដោយឡែក សម្រាប់អ្នកវិនិយោគបរទេសវិញ គឺពិតជាត្រូវប្រឈមខ្លាំង ព្រោះពួកគាត់ជាជនបរទេសហើយនៅពេលដែលគាត់មកស្រុកខ្មែរ គាត់យកលុយដុល្លារមក ឬអាចយករូបិយប័ណ្ណផ្សេងមក ដូច្នេះគាត់ត្រូវខាតច្រើន ប្រសិនបើអត្រាប្ដូរប្រាក់នៅក្នុងទីផ្សារមានការប្រែប្រួលខ្លាំង។ ថ្វីដ្បិតតែវិនិយោគិនអាចប្រឈមនឹងហានិភ័យនៃអត្រាប្តូរប្រាក់ក៏ពិតមែន តែទោះជាយ៉ាងណាក៏អត្រាប្ដូរប្រាក់រវាងប្រាក់រៀល និងដុល្លារ នៅមានស្ថិរភាពល្អនៅទីផ្សារនៃប្រទេសកម្ពុជា។
2. ហានិភ័យសន្ទនីយភាពសាច់ប្រាក់៖ ដោយសារតែទីផ្សារមូលបត្រនៅកម្ពុជានៅមានទំហំតូចនៅឡើយ ការជួញដូរ គឺនៅតិច និងពុំទាន់មានទំនុកចិត្តទាំងស្រុងពីសាធារណជន ដូច្នេះនៅពេលដែលយើងលក់វិញ គឺអាចនឹងលក់មិនដាច់។ ម្យ៉ាងវិញទៀតការដាក់កំហិតលើលទ្ធភាពរបស់វិនិយោគិនក្នុងការជួញដូរមូលបត្រ ឬក៏នៅពេលដែលចង់បាន វានៅមានតម្លៃថ្លៃ ដោយសារការកំណត់ការប្រែប្រួលតម្លៃប្រចាំថ្ងៃ។
3. ហានិភ័យពាក់ព័ន្ធនឹងបទប្បញ្ញត្តិ៖ លទ្ធភាពនៃការប្រកាសដាក់ឱ្យប្រើប្រាស់ច្បាប់ស្ដីពីពន្ធលើចំណូលមូលធន បច្ចុប្បន្នមិនទាន់មានច្បាប់ដែលដាក់ពន្ធលើចំណូលមូលធននៅឡើយ ប៉ុន្តែអាចនឹងមាននៅពេលអនាគត។ មួយទៀត ទាក់ទងនឹងពន្ធកាត់ទុកលើចំណូលភាគលាភរបស់ភាគហ៊ុនិកអភិវាសជនដែលសំដៅលើជនបរទេសដែលពួកគេអាចនឹងខាតបង់ទៅលើការបង់ពន្ធ7% និងក្នុងការលើកទឹកចិត្ត50%។
ទោះបីមានហានិភ័យមួយចំនួនក្ដី លោក រស់ ស៊ីលវ៉ា អនុរដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា វិស័យមូលបត្រនឹងគាំទ្រកំណើនសេដ្ឋកិច្ចរបស់ប្រទេស។ វានឹងអនុញ្ញាតឱ្យរដ្ឋាភិបាលបង្កើនមូលធនក្នុងរូបិយប័ណ្ណក្នុងស្រុក និងបង្កើតការវិនិយោគដែលមានហានិភ័យទាបសម្រាប់វិនិយោគិន និងស្ថាប័នដូចជាធនាគារពាណិជ្ជក្រុមហ៊ុនធានារ៉ាប់រង និងមូលនិធិសោធនជាដើម។
ហេតុនេះទើបបច្នុប្បន្នទីផ្សារភាគហ៊ុនកំពុងទទួលបានការចាប់អារម្មណ៍ ជាពិសេសក្រុមហ៊ុនដែលបានចុះបញ្ជី និងលក់ភាគហ៊ុននៅក្នុងទីផ្សារមូលបត្រកម្ពុជា នឹងទទួលបានអត្ថប្រយោជន៍ជាច្រើនផងដែរ តាមការវិនិយោគលើវិស័យភាគហ៊ុននេះ។ អត្ថប្រយោជន៍ 6យ៉ាងនៃការវិនិយោគនៅផ្សារមូល-បត្រមានដូចជា៖
1. ទទួលបានប្រាក់ចំណេញពីការជួញដូរភាគហ៊ុន និងទទួលបានភាគលាភ៖ អត្ថប្រយោជន៍ចម្បងពីការវិនិយោគក្នុងទីផ្សារភាគហ៊ុន គឺឱកាសទទួលបានប្រាក់ចំណេញ។ ការវិនិយោគជាមួយក្រុមហ៊ុនដែលមានស្ថិរភាព និងសក្ដានុពលអាចនឹងធ្វើឱ្យវិនិយោគិនទទួលបានប្រាក់ចំណេញដោយទិញនៅពេលភាគហ៊ុនមានតម្លៃទាប ហើយលក់ទៅវិញនៅពេលភាគហ៊ុនឡើងថ្លៃ។ ប្រាក់ចំណូល ក្នុងទម្រង់ជាភាគលាភ ជាចំណែកនៃប្រាក់ចំណេញដែលក្រុមហ៊ុនរកបាន ហើយបង់ចំណែកនោះជូនវិនិយោគិនប្រចាំឆ្នាំ។
2. ជម្រើសល្អបំផុតសម្រាប់ការសន្សំ៖ ការវិនិយោគភាគហ៊ុនមានសារៈសំខាន់ណាស់ សម្រាប់សន្សំ និងវិនិយោគសម្រាប់អនាគត ហើយអ្នកជំនាញផ្នែកវិនិយោគភាគច្រើនក្នុងពិភពលោកសុទ្ធតែយល់ស្របថា ការវិនិយោគភាគហ៊ុនជាជម្រើសល្អបំផុតសម្រាប់ការសន្សំ ដោយសារតែភាគហ៊ុនជាជម្រើសសម្រាប់ការវិនិយោគដ៏ល្អមួយដែលអាចបង្កើនប្រាក់ក្នុងអត្រាចំណូលខ្ពស់ ជាងជម្រើសវិនិយោគផ្សេងៗទៀតក្នុងរយៈពេលវែង។
3. ការធ្វើពិពិធកម្ម (Diversification) ការធ្វើពិពិធកម្មទៅលើភាគហ៊ុន គឺជាបច្ចេកទេសមួយដែលអាចជួយកាត់បន្ថយហានិភ័យក្នុងការវិនិយោគ ដោយការបែងចែកទឹកប្រាក់វិនិយោគទៅលើឧបករណ៍ហិរញ្ញវត្ថុផ្សេងៗគ្នា ឬទៅលើក្រុមហ៊ុនផ្សេងៗគ្នា។ គោលបំណងនេះ គឺដើម្បីបង្កើនឱកាសទទួលបានប្រាក់ចំណេញពីការវិនិយោគក្នុងឧបករណ៍ហិរញ្ញវត្ថុច្រើនផ្សេងៗគ្នា។ ការធ្វើពិពិធកម្មដោយវិនិយោគភាគហ៊ុនអាចជួយវិនិយោគិនកាត់បន្ថយការខាតបង់ និងចៀសវាងការវិនិយោគ ដែលមានភាពអភិរក្សពេក។
4. ទទួលបានភាពជាម្ចាស់កម្មសិទ្ធិក្នុងក្រុមហ៊ុនជោគជ័យ៖ ការទិញភាគហ៊ុន គឺមានន័យថាលោកអ្នកទទួលយកចំណែកនៃភាពជាម្ចាស់កម្មសិទ្ធិពីក្រុមហ៊ុនដែលបានលក់ភាគហ៊ុន ហើយលោកអ្នកក៏មានសិទ្ធិទទួលបាននូវចំណែកនៃប្រាក់ចំណេញដែលក្រុមហ៊ុនទទួលបានផងដែរ។ ភាគហ៊ុនិកមានសិទ្ធិបោះឆ្នោត និងមានចំណែកចូលរួមសម្រេចចិត្តក្នុងអាជីវកម្មរបស់ក្រុមហ៊ុនតាមសមាមាត្រនៃភាគហ៊ុនដែលខ្លួនកាន់កាប់។
5. រួមចំណែកដល់កំណើនសេដ្ឋកិច្ចជាតិ៖ ការវិនិយោគភាគហ៊ុនរបស់វិនិយោគិន មិនគ្រាន់តែទទួលបានប្រាក់ចំណេញប៉ុណ្ណោះទេ ថែមទាំងអាចជួយក្រុមហ៊ុនដែលបោះផ្សាយលក់ភាគហ៊ុនឱ្យទទួលបានដើមទុនបន្ថែមសម្រាប់ពង្រឹងអាជីវកម្ម និងសមត្ថភាពជួលបុគ្គលិកធ្វើការបន្ថែម។ ក្នុងន័យនេះ ការវិនិយោគភាគហ៊ុន គឺជាការចូលរួមចំណែកជួយបង្កើតការងារ និងជួយដល់កំណើនសេដ្ឋកិច្ចជាតិ។
6. ទីផ្សារភាគហ៊ុនជាឧបករណ៍វាស់ស្ទង់សេដ្ឋកិច្ច៖ ផ្សារភាគហ៊ុនត្រូវបានគេចាត់ទុកជាជីពចរនៃសេដ្ឋកិច្ច ឬជាកញ្ចក់ដែលឆ្លុះបញ្ចាំងពីស្ថានភាពសេដ្ឋកិច្ចរបស់ប្រទេស ដ្បិតទីផ្សារភាគហ៊ុនជាសូចនាករសេដ្ឋកិច្ចសំខាន់ដែលជាជំនួយសម្រាប់វិនិយោគិនក្នុងការរៀបចំ និងសម្រេចចិត្តវិនិយោគឱ្យបានត្រឹមត្រូវ ហើយទីផ្សារភាគហ៊ុនក៏អាចជួយពង្រីកចំណេះដឹងរបស់ប្រជាជនអំពីស្ថានភាពសេដ្ឋកិច្ចរបស់ប្រទេសផងដែរ។
លោកស្រី ហ៊ លីគា នាយិកានៃនាយកដ្ឋានស្រាវជ្រាវបណ្តុះបណ្តាលអភិវឌ្ឍន៍ទីផ្សារមូលបត្របានមានប្រសាសន៍ថា តាមពិតទៅការវិនិយោគមួយណាក៏មានហានិភ័យដែរ។ ការវិនិយោគទៅលើមូលបត្រ បើប្រៀបធៀបការដាក់លុយនៅក្នុងធនាគារវាមានហានិភ័យខ្ពស់ជាងធនាគារ។
លោកស្រីបញ្ជាក់ថា តែប្រសិនបើប្រៀបធៀបជាមួយអចលនទ្រព្យ វាល្អជាង ព្រោះយើងមានហានិភ័យទាបជាង។ ដោយសារមូលហេតុថា នៅស្រុកគេអាចមានហានិភ័យខ្ពស់ ដោយសារតម្លៃប្រែប្រួលអត់មានដែនកំណត់ទេ ដោយឡែកនៅក្នុងស្រុកខ្មែរយើងវិញមានតម្លៃខ្ពស់បំផុត ជាឧទាហរណ៍ ថ្ងៃនេះថ្លៃ 5,000រៀលក្នុង1ហ៊ុន បើធ្លាក់ទាបបំផុត គឺត្រឹមតែ10% ដូច្នេះនៅសល់តែ4,500រៀលទេ ប៉ុន្តែបើថ្ងៃស្អែកឡើងថ្លៃ ខ្ពស់បំផុតគឺត្រឹមតែ10%ដូចគ្នា ដូច្នេះគឺ 5,500រៀល។
ពោលគឺនៅស្រុកខ្មែរ យើងកម្រិតថ្លៃនៃបម្រែបម្រួលប្រចាំថ្ងៃគឺត្រឹម10% ដែលធ្វើឱ្យការវិនិយោគនៃទីផ្សារភាគហ៊ុននៅស្រុកខ្មែរ មិនសូវមានហានិភ័យទេ គឺហានិភ័យមានទាបមែនទែន។ ការមានហានិភ័យខ្ពស់ គឺមាននៅតែស្រុកគេទេ ពីព្រោះស្រុកគេមិនមានកំណត់ដែនបម្រែបម្រួលថ្លៃនេះទេ។
ដូចជាតម្លៃភាគហ៊ុននៃក្រុមហ៊ុនមួយមានដំណើរការល្អ តែពេលណាមានពាក្យចចាមអារ៉ាមមិនល្អ ឬសេដ្ឋកិច្ចមានការប្រែប្រួល វានឹងធ្វើឱ្យទីផ្សារភាគហ៊ុនធ្លាក់ចុះភ្លាមៗ។ ដោយឡែកទីផ្សារនៅស្រុកខ្មែរយើង អត់អីទេ។ ការវិនិយោគក្នុងទីផ្សារមូលបត្រនៅស្រុកខ្មែរ មិនមានហានិភ័យខ្ពស់ទេដោយសារតែមូលហេតុ និងកត្តាខាងលើបានបញ្ជាក់ស្រាប់៕
November 28, 2018
យុទ្ធសាស្ត្រច្បាស់លាស់ក្នុងការចែកចាយនឹងធ្វើឱ្យអាជីវកម្មរឹងមាំ
ការធ្វើអាជីវកម្ម និងជំនួញចាំបាច់ត្រូវមានស្តង់ដារច្បាស់លាស់ ពីព្រោះថា បើយើងធ្វើតាមគំរូល្អ វានឹងនាំឱ្យយើងល្អ និងមានស្តង់ដារល្អ បើយើងធ្វើតាមគំរូមធ្យម នឹងនាំឱ្យយើងទទួលបានស្តង់ដារមធ្យម និងមានស្តង់ដារកម្រិតមធ្យមដែរ។
ដូច្នេះជាទូទៅ មុននឹងសហគ្រិនបើកអាជីវកម្មពួកគាត់តែងតែមានផែនការអាជីវកម្មច្បាស់លាស់មានសហគ្រាសស្អាត និងមានស្តង់ដារល្អ ប៉ុន្តែក៏មិនត្រូវភ្លេចថា ផែនការទីផ្សារក៏សំខាន់ផងដែរដើម្បីជួយឱ្យពួកគាត់រក្សាអតិថិជន និងបង្កើនការលក់របស់ពួកគាត់បាន និងរឿងសំខាន់មួយទៀត គឺការចែកចាយផលិតផល បន្ថែមពីនេះផែនការម៉ាឃីតធីង(Maketing)គឺជាយុទ្ធសាស្ត្រដែលរួមបញ្ចូលទាំងតម្លៃ ភាពជាក់ស្តែង និងវត្ថុបំណងច្បាស់លាស់។ នេះជាការបញ្ជាក់របស់លោក សោម សម្បត្តិនាយកប្រតិបត្តិក្រុមហ៊ុនថ្នាំពណ៌ជាតិ(Cam-paint)។
ការរកស៊ីក៏ដោយ ធ្វើការក៏ដោយ ត្រូវមានគោលដៅច្បាស់លាស់ ហើយចំពោះការបើកអាជីវកម្មយុទ្ធសាស្ត្រចែកចាយ គឺជារឿងសំខាន់មួយក្នុងមុខរបរ និងត្រូវបានចាត់ទុកថាជាកិច្ចការដ៏សំខាន់នៅក្នុងក្រុមហ៊ុន។ អាជីវកម្មដែលកំពុងរកស៊ីត្រូវជំរុញការចែកចាយនេះឱ្យបានថេរដែលជាការរក្សាអតិថិជន និងរក្សាចំនួននៃការលក់ ដើម្បីឱ្យក្រុមហ៊ុនអាចឈរជើងលើទីផ្សារបាន។ យុទ្ធសាស្ត្រការចែកចាយទំនិញ ឬផលិតផលត្រូវបានបែងចែកជា 2ចំណុចសំខាន់៖
ទី1-យុទ្ធសាស្ត្របញ្ឈរៈ រៀបចំចែកចាយដោយខ្លួនឯង(ដូចជាគ្រប់ស្ថានីយប្រេងឥន្ធនៈ សុទ្ធតែក្រុមហ៊ុនប្រេងជាអ្នកធ្វើការចែកចាយដោយខ្លួនឯងទាំងអស់)
ទី2-យុទ្ធសាស្ត្របែងចែកបន្តៈ បើយើងមិនអាចជួលផ្ទះបើកសាខា ឬមិនចង់ឱ្យក្រុមហ៊ុនមានលក្ខណៈធំពេក ត្រូវឱ្យគេចែកចាយផលិតផលបន្តពីយើងទៅគ្រប់សាខា ដោយយើងចែកភាគរយនៃការចំណេញពោលគឺចែកគ្នាចំណេញទាំងអស់គ្នា។
សូមបញ្ជាក់ថា យុទ្ធសាស្រ្តក្នុងការចែកចាយ គឺជាការចែកចាយឆ្ពោះទៅរកលទ្ធភាពទទួលបានផលិតផល ឬភាពងាយស្រួលសម្រាប់អតិថិជនក្នុងការរកទិញផលិតផល។ យុទ្ធសាស្ត្រចែកចាយ ដែលពេញនិយមជាងគេគឺ ការចែកចាយទៅកាន់ដេប៉ូ ឬឈ្មួញកណ្ដាលឱ្យលក់បន្ត។ យុទ្ធសាស្រ្តធ្វើយ៉ាងណាដើម្បីឱ្យសាធារណជនបានមើលឃើញពីផលិតផលរបស់យើងបានគ្រប់ទីកន្លែងទាំងអស់។ ការធ្វើបែបនេះគឺជាការសម្រួលដល់អតិថិជនផងដែរ។
លោក សោម សម្បត្តិ បានបញ្ជាក់ថា ក្នុងយុទ្ធសាស្ត្រនៃការចែកចាយចាំបាច់ត្រូវមានធាតុផ្សំចំនួន 4ទៀតជាជំនួយ។
សោម សម្បត្តិ នាយកប្រតិបត្តិក្រុមហ៊ុនថ្នាំពណ៌ជាតិ(Cam-paint)
ទី1-រកអ្នកផ្គត់ផ្គង់៖ យើងត្រូវមានផលិតផលឱ្យល្អ។ មានន័យថា បើយើងផលិតខ្លួនឯងយើងត្រូវរកវត្ថុធាតុដើមដែលល្អ ដើម្បីយើងផលិតបានទំនិញ ឬផលិតផលដែលល្អ ព្រោះថា បើយើងមានផលិតផលល្អ និងមានអ្នកផ្គត់ផ្គង់ចែកចាយពូកែ ទើបទំនិញ ឬផលិតផលរបស់យើងលក់ដាច់។
ទី2-វិធីសាស្រ្តក្នុងការលក់៖ យើងមានផលិតផលល្អ យើងត្រូវការលក់ ព្រោះមានតម្រូវការ។ ជួនកាលយើងមានផលិតផលល្អមែន តែយើងលក់មិនបាន ព្រោះខ្វះទីផ្សារដើម្បីលក់។ ជួនកាលទៀត មានផលិតផលល្អហើយ តែយើងមិនចេះធ្វើទីផ្សារ ក៏ផលិតផលនោះមិនអាចលក់បានដែរ ដូច្នេះយើងត្រូវការមានក្រុមលក់ពូកែ និងវិធីសាស្ត្រលក់ដែលល្អ។
ទី3-ការគ្រប់គ្រងថវិកា៖ ត្រូវចេះគ្រប់គ្រងលុយកាក់ក្នុងនាមយើងជាសហគ្រិន មិនអាចថាមិនចេះគ្រប់គ្រងបានទេ។ បើមិនចេះត្រូវរៀន រៀនឱ្យមានចំណេះចេះគ្រប់គ្រងថវិកា។ បើយើងតាំងចិត្តហើយមិនអាចថាមិនចេះនោះទេ មិនចេះមកពីយើងមិនទាន់រៀន។ ការចេះគ្រប់គ្រងថវិកា ដើមទុន ប្រាក់ចំណូល-ចំណាយ-ចំណេញ គឺជារឿងសំខាន់សម្រាប់អាជីវកម្មមួយ។
ទី4-ធនធានមនុស្ស៖ អ្នកណាដែលត្រូវអភិវឌ្ឍ? គឺខ្លួនយើងហ្នឹងឯងដែលត្រូវពង្រឹងឱ្យខ្លាំង ព្រោះបើយើងខ្លាំង ធនធានមនុស្សពូកែៗនឹងមកធ្វើការជាមួយយើង។ បើយើងមិនខ្លាំង មិនល្អ គេមិនមកធ្វើការឱ្យយើងទេ។ ប្រសិនបើគេជាអ្នកខ្លាំង ក៏គេមិនមកធ្វើការឱ្យយើងដែរ។ ប៉ុន្តែនៅពេលដែលយើងខ្លាំងកូនចៅយើងក៏ប្រឹងប្រែងតាមយើងដើម្បីឱ្យខ្លួនគេខ្លាំងដែរ ពេលនោះទើបយើងមានក្រុមហ៊ុនមួយដែលខ្លាំងដែរ។
ប៉ុន្តែអ្វីដែលសំខាន់ជាងគេក្នុងដំណាក់កាលដំបូង អ្នកត្រូវស្គាល់ឱ្យបានច្បាស់ពីសេវាកម្ម ឬផលិតផលនៃអាជីវកម្មរបស់អ្នក។ បន្ទាប់មកអ្នកអាចបង្ហាញពីអត្ថប្រយោជន៍អ្វីខ្លះដែលអ្នកបានផ្តល់ឱ្យអតិថិជន ដូចជាតម្លៃដែលមានភាពខុសប្លែកពីដៃគូប្រកួតប្រជែងរបស់អ្នកជាដើម។ ការកំណត់គោលដៅអតិថិជនឱ្យបានច្បាស់លាស់ក៏ជារឿងសំខាន់។ មិនថាអាជីវកម្មរបស់អ្នកស្ថិតក្នុងវិស័យអ្វីនោះទេការលក់ផលិតផល ឬការផ្តល់សេវាកម្ម ត្រូវការការ-ស្វែងយល់ឱ្យបានច្បាស់ពីទីផ្សារ។ ដូចនេះ នៅក្នុងផែនការម៉ាឃីតធីងតម្រូវឱ្យអ្នកស្គាល់យ៉ាងលម្អិតពីទីផ្សាររបស់អ្នក ហើយអ្នកក៏ត្រូវយល់ឱ្យច្បាស់ពីភាពខុសប្លែករបស់គូប្រកួតប្រជែងរបស់អ្នកផងដែរ៕
September 28, 2018
ពាណិជ្ជករត្រូវតែប្រើប្រាស់បច្ចេកវិទ្យា ដើម្បីរក្សាជំហរក្នុងទីផ្សារអាជីវកម្ម
វាមិនមែនជារឿងចម្លែកពេកទេដែលការធ្វើអាជីវកម្មចាំបាច់ត្រូវមានភាពបត់បែនខ្ពស់នៅក្នុងសម័យបច្ចេកវិទ្យាព័ត៌មាននេះ។ ការធ្វើអាជីវកម្មលើគ្រប់ផ្នែកទាំងអស់ ទាំងការផ្គត់ផ្គង់ចំណីអាហារ ការដឹកជញ្ជូន ឬអាជីវកម្មធំៗជាច្រើនផ្សេងទៀត ចាំបាច់ត្រូវតែបត់បែនឱ្យបានលឿនបំផុតដើម្បីឱ្យទាន់ស្ថានភាពរីកចម្រើននៃបច្ចេកវិទ្យាដែលធ្វើឱ្យការប្រកួតប្រជែងកើតមានកាន់តែខ្លាំងក្នុងពិភពជំនួញ។
លោក Tom Den Hertog អគ្គនាយកក្រុមហ៊ុន Ahold Asia Pacific បានលើកឡើងថា វត្តមាននៃបច្ចេកវិទ្យាទំនើប បានផ្លាស់ប្តូរការរស់នៅរបស់អតិថិជនយ៉ាងច្រើន ព្រោះពួកគេរស់នៅក្នុងពិភពព័ត៌មានយ៉ាងសម្បូរបែប ហេតុនេះការធ្វើអាជីវកម្មចាំបាច់ត្រូវតែប្រើប្រាស់បច្ចេកវិទ្យាដើម្បីបង្កើនល្បឿននៃសេវាកម្ម និងការផ្តល់ព័ត៌មានឱ្យបានកាន់តែលម្អិតទៅដល់អតិថិជន។ លោកថា ជាក់ស្តែងការធ្វើអាជីវកម្មលើការផ្គត់ផ្គង់ចំណីអាហារ ពីមុនមកយើងចាប់ផ្តើមពីការបង្កើតផលិតផលកសិកម្ម បន្ទាប់មករុញចូលទៅក្នុងរោងចក្រកែច្នៃវេចខ្ចប់ បញ្ជូនទៅផ្នែកចែកចាយ ហើយបន្ទាប់មកទៀតទើបដឹកទៅដល់ហាងលក់រាយ ឬភោជនីយដ្ឋានទើបដល់ដៃអតិថិជន។ ដំណើរនៃការរៀបចំចង្វាក់ផ្គត់ផ្គង់ (supply chain) បែបនេះនៅពេញនិយមខ្លះនៅឡើយ តែវានឹងត្រូវផ្លាស់ប្តូរស្ទើរតែទាំងស្រុងនៅពេលឆាប់ៗខាងមុខនេះ។
លោក Tom Den Hertog អគ្គនាយកក្រុមហ៊ុន Ahold Asia Pacific
លោក Tom Den Hertog និយាយថា៖ “អ្នករកស៊ីផ្នែកផ្គត់ផ្គង់ចំណីអាហារនាពេលបច្ចុប្បន្ននេះត្រូវការចាំបាច់បំផុតនូវភាពច្នៃប្រឌិត។ មានក្រុមហ៊ុនមួយឈ្មោះថា Hello Fresh គាត់បានបង្កើតគំនិតច្នៃប្រឌិតយ៉ាងខ្ពស់ដោយការបង្កើតជាប្រអប់សម្រាប់ដាក់បន្លែ និងគ្រឿងផ្សំស្រេច ដោយបញ្ចូលជាមួយវិធីសាស្ត្រធ្វើម្ហូបនៅក្នុងប្រអប់ និងបង្ហាញច្បាស់ពីប្រភពលម្អិតតាំងពីកន្លែងដាំរហូតដល់ដៃអតិថិជនតាមប្រព័ន្ធបច្ចេកវិទ្យា”។
លោកបានបញ្ជាក់ផងដែរថា រាល់ការទិញរបស់អតិថិជននឹងត្រូវដឹកដល់ដៃ មិនចាំបាច់លំបាកស្វែងរកនៅទីផ្សារនោះទេ អតិថិជនក៏អាចរៀនធ្វើម្ហូប និងស្វែងរកវិធីសាស្ត្រប្រកបដោយភាពរីករាយជាច្រើនសម្រាប់ការរស់នៅតាមរយៈប្រព័ន្ធបច្ចេកវិទ្យានៅផ្ទះ ដោយប្រើប្រាស់តែទូរស័ព្ទ Smart Phone មួយប៉ុណ្ណោះ។ ការធ្វើបែបនេះនឹងធ្វើឱ្យអតិថិជនកាត់បន្ថយចំណាយតិច ចំណេញពេលវេលាច្រើនសម្រាប់គ្រួសារ និងមានអារម្មណ៍កក់ក្តៅគ្រប់គ្រាន់ចំពោះម្ហូបអាហារដែលដឹកជញ្ជូនមកដល់ដៃគាត់គ្រប់ពេលវេលានោះ។ លោកថា ការធ្វើពាណិជ្ជកម្មនាពេលបច្ចុប្បន្នចាំបាច់ត្រូវតែបង្កើនល្បឿន គិតឱ្យបានមុនគេ និងផ្តល់ព័ត៌មានលម្អិត ព្រោះផលិតផលដែលយើងនឹងចេញ គឺត្រូវជួបនឹងការប្រកួតប្រជែងខ្លាំង។
លោក Tom Den Hertong បាននិយាយទៀតថា៖ “ប្រសិនបើយើងនាំអាហារ ឬផលិតផលទៅកាន់ប្រទេសណាមួយ សូមកុំគិតថា យើងប្រកួតប្រជែងតែជាមួយក្រុមហ៊ុននៅក្នុងស្រុក តែត្រូវគិតថា យើងប្រកួតប្រជែងជាមួយក្រុមហ៊ុនទាំងអស់លើពិភពលោក ព្រោះអតិថិជនបច្ចុប្បន្ននេះដឹងគ្រប់ព័ត៌មានទាំងអស់លើពិភពលោក ហើយពេលខ្លះអតិថិជនអាចឆ្លាតជាងអ្នកលក់ទៀតផង។ ខ្ញុំមិនដឹងថានៅទីនេះ ប្រជាជនគិតពីប្រភពនៃអាហារ ឬអត់នោះទេតែសម្រាប់ប្រទេសខ្ញុំ គឺគេគិតទាំងអស់ ទាំងកន្លែងកែច្នៃ ការវេចខ្ចប់ ក្រុមហ៊ុនចែកចាយ និងវិធីសាស្ត្ររក្សាទុកផលិតផល ជាដើម។ ហេតុនេះដើម្បីទាក់ទាញអតិថិជនឱ្យទិញបាន លុះត្រាតែរៀបចំប្រព័ន្ធគ្រប់គ្រងដោយប្រើប្រាស់បច្ចេកវិទ្យាដើម្បីធានាថា យើងបានបញ្ជូនព័ត៌មានលម្អិតគ្រប់បែបយ៉ាងទៅកាន់អតិថិជនលើរាប់រយមុខទំនិញដែលយើងផ្គត់ផ្គង់”។
លោកអគ្គនាយករូបនេះ បានបញ្ជាក់ផងដែរថា ការរកស៊ីបច្ចុប្បន្នចាំបាច់ដើរឱ្យបានមុនគេ ដើម្បីទទួលបានជោគជ័យ។ មានការស្រាវជ្រាវមួយពីឥរិយាបថរបស់មនុស្សបានរកឃើញថា ប្រសិនបើគេបើកពហុកីឡដ្ឋាននៅម៉ោង 12:00 ហើយបិទលែងឱ្យចូលនៅម៉ោង 12:50នាទីសម្រាប់ទស្សនាកីឡា មនុស្សនឹងសម្រុកចូលតែពេលជិតដល់ម៉ោងបិទប៉ុណ្ណោះ។ រយៈពេលចាប់ពីម៉ោង 12:00ដល់ម៉ោង 12:45នាទី គឺមានកៅអីទំនេររហូតដល់ 97% ហេតុនេះមនុស្សនឹងនាំគ្នាសម្រុកចូលនៅរយៈពេលត្រឹមតែ 5នាទីចុងក្រោយប៉ុណ្ណោះ។ ការរកស៊ីក៏ដូចគ្នាដែរ ជាទូទៅក្រុមហ៊ុនដែលដើរមិនទាន់គេ ហើយបិទទ្វារទៅវិញភាគច្រើនគឺដោយសារតែមិនព្រមចាប់ផ្តើមធ្វើការច្នៃប្រឌិតឱ្យបានមុនគេ ហើយរួមគ្នាប្រកួតខ្លាំងនៅពេលចុងក្រោយជាមួយគេឯង នោះពួកគេនឹងពិបាកឈរជើង។
បន្ថែមពីលើនេះ លោក Picheat Chansate នាយកគ្រប់គ្រងទូទៅនៃក្រុមហុន ThaiSomdej Service ដែលជាក្រុមហ៊ុនជាប់ពានរង្វាន់ Excellent Logistic Management award 2018 បានលើកឡើងថា ក្រុមហ៊ុនរបស់លោក ជាក្រុមហ៊ុនឡូជីស្ទីក ហេតុនេះការគ្រប់គ្រងសេវាកម្ម និងឯកសារមានសារៈសំខាន់បំផុត ហើយអ្វីដែលជំរុញឱ្យក្រុមហ៊ុនរបស់លោកអាចឈរជើងបានល្អក្នុងទីផ្សារ និងទទួលបានពានរង្វាន់ដ៏សំខាន់នេះក៏មានការរួមចំណែកពីបច្ចេកវិទ្យាផងដែរ។ បច្ចេកវិទ្យាបានដើរតួនាទីយ៉ាងសំខាន់សម្រាប់ពាណិជ្ជកម្មនៅពេលបច្ចុប្បន្ននេះ។ ក្រុមហ៊ុនរបស់លោកបានចំណាយទុនយ៉ាងច្រើនដើម្បីអភិវឌ្ឍកម្មវិធីបច្ចេកវិទ្យាព័ត៌មានដោយខ្លួនឯងដែលមានឈ្មោះថា Intelligent Customs Clearance Technology (ICCT) ដើម្បីសម្រួលដល់សកម្មភាពការងារឱ្យបានកាន់តែឆាប់រហ័ស និងងាយស្រួល។
លោក Picheat Chansate នាយកគ្រប់គ្រងទូទៅនៃក្រុមហុន ThaiSomdej Service
លោក Picheat Chansate បាននិយាយថា៖ “ពីមុនសម្រាប់អតិថិជនម្នាក់ដែលប្រើប្រាស់សេវារបស់យើង យើងប្រើប្រាស់ពេលរហូតដល់ទៅ 4ម៉ោងដើម្បីរៀបចំវិក្កយបត្រ និងបញ្ចូលទៅក្នុងកម្មវិធី Excell តែបច្ចុប្បន្ននេះយើងបង្រួញពេលឱ្យសល់ត្រឹមតែប្រហែល 5នាទីប៉ុណ្ណោះ។ ហើយយើងក៏អាចបំពេញទម្រង់ចេញ ឬចូលសម្រាប់ពួកគាត់ដោយប្រើពេលត្រឹមតែ 5នាទីដូចគ្នាលើមុខទំនិញជាច្រើនមុខរបស់គាត់”។
លោក Picheat Chansate បានលើកឡើងផងដែរថា រាល់ឯកសារទាំងអស់របស់អតិថិជននឹងត្រូវបានផ្ទុកក្នុងកន្លែងផ្ទុកទិន្នន័យធំៗចំនួន 2 ដែលវាមានសមត្ថភាពរក្សាទុករហូតដល់ទៅ 5ឆ្នាំ ដែលធ្វើឱ្យអតិថិជនកាន់តែមានទំនុកចិត្ត និងងាយស្រួលស្វែងរកឯកសារផ្សេងៗផងដែរ។ ប្រព័ន្ធផ្ទុកទិន្នន័យទាំងអស់នេះជាបេះដូងរបស់ក្រុមហ៊ុនលោក ហេតុនេះវាត្រូវបានការពារយ៉ាងល្អិតល្អន់។ ក្រោយពេលប្រើប្រាស់បច្ចេកវិទ្យាទាំងអស់នេះ ការធ្វើការងារកាន់តែមានប្រសិទ្ធភាពជាងមុន ដែលផ្តល់ឱកាសឱ្យក្រុមហ៊ុនរបស់លោកពង្រីកសេវាកម្ម បានកាន់តែច្រើន និងមានគម្រោងបោះទីតាំងទៅកាន់តំបន់សំខាន់ៗជាច្រើនផ្សេងទៀតដោយក្នុងនោះក៏មានកម្ពុជាផងដែរ។
អ្នកគ្រប់គ្រងក្រុមហ៊ុនខាងលើបានលើកឡើងផងដែរថា បើទោះបីជាមានវត្តមាននៃបច្ចេកវិទ្យាទំនើបក្តី តែបុគ្គលិករបស់លោកនៅតែអាចរក្សាលំនឹងរបស់ខ្លួនក្នុងការធ្វើការងារដដែល តែអ្វីដែលពួកគេត្រូវធ្វើគឺបង្កើនសមត្ថភាពក្នុងការប្រើប្រាស់ និងគ្រប់គ្រងប្រព័ន្ធបច្ចេកវិទ្យាទាំងអស់នោះ។ វានឹងធ្វើឱ្យពួកគេមានពេលវេលាទំនេរច្រើនជាងមុន តែយើងនៅតែត្រូវការមនុស្សដើម្បីផ្ទៀងផ្ទាត់ ព្រោះមនុស្សមានអ្វីដែលម៉ាស៊ីនគ្មាន គឺខួរក្បាល៕
September 6, 2018
សហគ្រិនវ័យក្មេងខ្មែរចំនួន 3រូបផ្តល់បទពិសោធអាជីវកម្ម
ក្នុងវេទិកាពិព័រណ៍ទេសចរណ៍ដើម្បីផ្សព្វផ្សាយពីផលិតផលទេសចរណ៍ និងចូលរួមជំរុញចលនាទេសចរណ៍ក្នុងស្រុកត្រូវបានសមាគមទីភ្នាក់ងារទេសចរណ៍កម្ពុជា ឬ CATA (The Cambodia Association of Travel Agents) លើកយកការផ្តល់គំនិតស្តីពីអាជីវកម្មរបស់សហគ្រិនល្បីៗ និងជោគជ័យមួយចំនួនមកបង្ហាញជូនដល់អ្នកចូលរួមទស្សនាពិព័រណ៍ ក្នុងប្រធានបទ “ការចាប់ផ្តើមជំនួញផ្ទាល់ខ្លួន” “Business Start Up”។
ក្នុងនោះសហគ្រិនវ័យក្មេងខ្មែរចំនួន 3រូបមានមុខរបរផ្សេងៗគ្នា ក៏ត្រូវបានអញ្ជើញឱ្យផ្តល់គំនិត និងបទពិសោធស្តីពីអាជីវកម្មរបស់ខ្លួនក្នុងប្រធានបទការចាប់ផ្តើមជំនួញផ្ទាល់ខ្លួន “Business Start Up” ដល់អាជីវករដែលមកចូលរួមក្នុងពិព័រណ៍ ក៏ដូចជាអ្នកមកទស្សនាដែលចង់ស្វែងរកបទពិសោធសម្រាប់ពង្រឹង និងជំរុញអាជីវកម្មរបស់ខ្លួនឱ្យកាន់តែទទួលបានទំនុកចិត្ត និងជោគជ័យក្នុងមុខជំនួញបន្ថែមទៀត។
សហគ្រិនវ័យក្មេងដំបូងគេ គឺអ្នកនាង រី ថានី ជាប្រធានគ្រប់គ្រងទូទៅនៅសិប្បកម្ម នរាអង្គរ (Norea Angkor Handicraft) ខេត្តសៀមរាបដែលជាសិប្បកម្មច្នៃម៉ូដចង្កៀងអំពូល ខ្នើយ វាំងននគ្រឿងសង្ហារិម និងគ្រឿងបរិក្ខារមួយចំនួនទៀតដែលផលិតដោយដៃសម្រាប់តុបតែងផ្ទះ សណ្ឋាគារ និងភោជនីយដ្ឋានទាំងបែបបុរាណ និងសម័យ។ អ្នកនាងថានី បានរៀបរាប់ថា ការចំណាកស្រុករបស់ពលរដ្ឋខ្មែរទៅក្រៅប្រទេសច្រើនពុំទទួលបានជំនាញត្រឡប់មកវិញទេ ទើបអ្នកនាងមានគំនិតបើកអាជីវកម្មច្នៃម៉ូដសម្ភារបរិក្ខារដែលរចនាម៉ូដពីសរសៃសូត្រខ្មែរនេះឡើង សម្រាប់ផ្ដល់ការងារនិងជំនាញថ្មីមួយដល់ពលរដ្ឋខ្មែរ។
អ្នកនាង រី ថានី ប្រធានគ្រប់គ្រងទូទៅនៅសិប្បកម្ម នរាអង្គរ
ម្ចាស់សិប្បកម្មវ័យ 29ឆ្នាំរូបនេះបានបញ្ជាក់ដូច្នេះថា៖ “ការផ្គត់ផ្គង់ក្នុងស្រុកភាគច្រើនក្នុងសណ្ឋាគារលំដាប់ផ្កាយប្រាំ ដោយឱ្យគេទទួលស្គាល់នូវផលិតផលរបស់យើងសិន ឱ្យគេយល់ពីផលិតផលខ្មែរ ទើបយើងធ្វើទៅតាមតម្រូវការ។ ម្យ៉ាងទៀតគឺចង់កាត់បន្ថយផលិតផលនាំចូល ដែលទី1 ប្រឈមការបែកបាក់ ទី2 កាត់បន្ថយចំណាយការលើការនាំចូល។ ដោយឡែកទៀតនោះ គឺចង់ឱ្យអតិថិជនទទួលស្គាល់ពីគុណភាពរបស់ខ្មែរថា អាចធ្វើបាន ព្រោះពីមុនច្រើនតែបរទេសជាអ្នកដឹកនាំបង្រៀនខ្មែរ ទើបយើងបង្កើតសិប្បកម្មនេះជាស្នាដៃខ្មែរ ផ្តួចផ្តើមនូវការប្រកួតប្រជែង បង្កើតផលិតផលឱ្យខ្មែរគាំទ្រ”។
បច្ចុប្បន្នសិប្បកម្ម នរាអង្គរ នេះមានបុគ្គលិក 30នាក់ សុទ្ធតែមានគំនិតច្នៃប្រឌិតខ្ពស់ដែលផ្គត់ផ្គង់ផលិតផលរបស់ខ្លួន និងដោយសារតែមានការគាំទ្រពីអតិថិជនក្នុងស្រុក និងបរទេសទើបធ្វើឱ្យម្ចាស់សិប្បកម្មវ័យក្មេងទទួលបានពានរង្វាន់សហគ្រិនឆ្នើមឆ្នាំ2018។
អ្នកនាង ថានី ឱ្យដឹងថា ទម្រាំឈរជើងបានមកទល់សព្វថ្ងៃនេះ អាជីវកម្ម នរាអង្គរ បានហែលឆ្លងក្ដីបរាជ័យក្នុងការរកស៊ីមិនក្រោម 10ដងឡើយ ហើយពេលដើរមកដល់ចំណុចនេះ នាងលែងមានគំនិតចុះចាញ់ដូចមុនទៀតហើយ តែថែមទាំងមានចិត្តតស៊ូទ្វេដងទៅទៀត ពីព្រោះបទពិសោធនៃការដួលហើយក្រោកឈរឡើងវិញនេះ គឺអាស្រ័យដោយការស្រឡាញ់ និងជឿជាក់លើអាជីវកម្មរបស់យើងជាមួយនឹងទិសដៅច្បាស់លាស់នោះទើបអាចងើបឡើងបាន និងបន្តដំណើរទៅមុខទៀតរហូតមកដល់បច្ចុប្បន្ន។
សហគ្រិនវ័យក្មេងទី2 មានអាយុត្រឹមតែ 27ឆ្នាំប៉ុណ្ណោះ គឺលោក ជា ឡង់ដា ជាស្ថាបនិក និងជាប្រធានក្រុមហ៊ុន“Bookmebus” និងក្លាយជាសហគ្រិនជោគជ័យម្នាក់ដែលមានបុគ្គលិក 17នាក់ ក្នុងនោះមានបរទេស 2នាក់ផងដែរ។ ដោយផ្តើមចេញពីការរង់ចាំរថយន្តត្រូវដ៏យូរក្នុងពេលធ្វើដំណើរទៅស្រុកម្តងៗ ធ្វើឱ្យសហគ្រិនរូបនេះយកបញ្ហានេះមកបង្កើតជាឱកាស គឺឱកាសបើកអាជីវកម្មផ្ទាល់ខ្លួន ជាក្រុមហ៊ុនទទួលកក់សំបុត្ររថយន្តក្រុង និងទូកតាមអនឡាញដែលបានបើកដំណើរការតាំងពីឆ្នាំ2015 មក។
លោក ជា ឡង់ដា ស្ថាបនិក និងជាប្រធានក្រុមហ៊ុន Bookmebus
លោក ឡង់ដា បានឱ្យដឹងថា៖ “ដោយសារតែការរង់ចាំធ្វើឱ្យខាតពេលវេលា យើងក៏ប្រើបច្ចេកវិទ្យាមានប្រព័ន្ធគ្រប់គ្រងត្រឹមត្រូវ ដោយយកព័ត៌មានមកដាក់ក្នុង online ពីទិសដៅ និងការចេញដំណើរច្បាស់លាស់ ធ្វើឱ្យក្រុមហ៊ុនដឹកអ្នកដំណើរជាង 40ក្រុមហ៊ុនបានបំពាក់បច្ចេកវិទ្យានេះ និងក្រុមហ៊ុនដឹកជញ្ជូនតាមទូក ហើយយើងគ្រោងបង្កើតសេវាកក់សំបុត្រយន្តហោះបន្ថែមទៀតផងដែរនាពេលខាងមុខ។ លោកថា ប្រាក់ចំណេញរបស់ក្រុមហ៊ុន គឺបានមកពីប្រាក់កម្រៃជើងសា (លុយកុំមីស្យុង)។ យើងក៏មានចំណែកជួយទាក់ទាញភ្ញៀវទេសចរមកស្រុកខ្មែរឱ្យមានការកើនឡើងជារៀងរាល់ឆ្នាំដែរ ព្រោះថាសំបុត្រធ្វើដំណើរ ទោះទិញមុន1ឆ្នាំ ក៏អាចលក់យកលុយពីភ្ញៀវបានដែរ”។
លោកបន្តថា ការទិញសំបុត្រតាមអនឡាញនេះ អតិថិជនមិនចាំបាច់មកទិញសំបុត្រដល់ក្រុមហ៊ុនទេ គឺគ្រាន់តែមានទូរស័ព្ទទំនើប និងកុំព្យូទ័រដែលអាចដំណើរការអុីនធើណិតបានជាការស្រេច។តាមរយៈWing, Smart Luy, Visa Card ឬប្រព័ន្ធដទៃទៀតពួកគេអាចពិនិត្យមើលជើងចេញដំណើរពេលវេលា និងបង់លុយលើវេបសាយ ឬអាចវេរលុយតាមអុីន-ធើណិតបាន។
លោក ឡង់ដា ធ្លាប់ត្រូវបានកម្មវិធីរបស់មហាសេដ្ឋីចិន Jack Ma ជ្រើសរើសយកទៅចូលរួមវគ្គបណ្តុះបណ្តាល eFounders នៅប្រទេសចិនដើម្បីស្វែងយល់ពីមូលដ្ឋានពាណិជ្ជកម្មអេឡិចត្រូនិក ប្រព័ន្ធបច្ចេកវិទ្យាដែលប្រែប្រួល និងមានឥទ្ធិពលនៅចិន ព្រមទាំងយល់ដឹងស៊ីជម្រៅអំពីគំនិតច្នៃប្រឌិតផ្នែកពាណិជ្ជកម្មអេឡិចត្រូនិកពីប្រទេសចិន និងជុំវិញពិភពលោកទៀតផង។
លោក ឡង់ដា ឱ្យដឹងថា ការធ្វើអាជីវកម្មមិនថាចាប់ផ្តើម 1ឆ្នាំ ឬដំណើរការ 5ឆ្នាំមកហើយក៏ដោយ ក៏នៅតែប្រឈមនឹងផលលំបាកដែរ ពីព្រោះយើងចង់បានលុយពីគេ ត្រូវធ្វើម៉េចឱ្យគេទិញផលិតផលយើង ហើយថែមទាំងមានការប្រកួតប្រជែងខ្លាំងទៀតផង ដូច្នេះយើងត្រូវមានការផ្លាស់ប្តូរ បើមិនផ្លាស់ប្តូរទៅតាមស្ថានភាពនៃការវិវឌ្ឍរបស់សង្គមទេ យើងនឹងជួបផលវិបាកមិនខាន ពីព្រោះការបើកអាជីវកម្ម មួយថ្ងៃៗត្រូវគិតធ្វើម៉េចឱ្យរីកចម្រើន ឱ្យរីកលូតលាស់ និងជោគជ័យ? តែបើយើងស្រឡាញ់អាជីវកម្មរបស់យើង យើងនឹងមានកម្លាំងចិត្តធ្វើ នោះគឺពិតជាជោគជ័យហើយ។
សហគ្រិនវ័យក្មេងទី3 លោក ទិត្យ សុធារ៉ា នៃអាជីវកម្ម Business Noir-Coffee បង្កើតឡើងនៅឆ្នាំ2013 ជាស្នាដៃកូនខ្មែរដែលចង់បង្ហាញដល់បរទេសថា ខ្មែរក៏អាចធ្វើបាន ដោយមាន 3សាខានៅខេត្តសៀមរាប។ ការចាប់ផ្តើមរបស់ស្ថាបនិកនិងជាម្ចាស់អាជីវកម្ម Noir-Coffee នេះបានផ្តើមចេញពីការធ្វើការឱ្យគេរយៈពេល 12ឆ្នាំ ទើបមានគោលបំណងច្បាស់លាស់ថា ចង់រកស៊ីខ្លួនឯង និងមានការជំរុញពីមិត្តភ័ក្តិដែលនាំឱ្យមានក្តីសង្ឃឹមថា ពិតជាអាចរកស៊ីបានហើយ។
លោក ទិត្យ សុធារ៉ា ម្ចាស់ហាងកាហ្វេ Noir-Coffee
សហគ្រិនដែលមានវ័យ 29ឆ្នាំរូបនេះបានបញ្ជាក់ថា៖ មូលហេតុដែលហាងរបស់លោកដាក់ឈ្មោះ Noir-Coffee ដោយសារតែលោកស្រឡាញ់ពណ៌ខ្មៅ ធ្វើឱ្យទីតាំងក៏រចនាពណ៌ខ្មៅដែរ តែទីតាំងទាំង3 រចនាខុសៗគ្នា ដោយច្នៃប្រឌិតបែបខ្មែរ ខាងមុខហាងក៏ដាក់ស្លាកសញ្ញាហាង Noir-Coffee ដោយភា្ជប់អក្សរ “ណ” សម្គាល់ថាម្ចាស់អាជីវកម្មជាខ្មែរដែរ។
លោក សុធារ៉ា បានបញ្ជាក់បន្ថែមថា កត្តាប្រឈមបញ្ហា និងផលលំបាក គឺតែងតែមាននៅក្នុងការចាប់ផ្តើមអាជីវកម្ម ព្រោះថា បើយើងធ្វើការងារឱ្យគេយើងគិតតែ1ទេ តែបើរកស៊ីខ្លួនឯងវិញ គិតដល់10ឯណោះ។ មកដល់ពេលនេះយើងមិនទាន់ហៅថាជោគជ័យទេ តែអាចចូលក្នុងទីផ្សារបាន ដោយសារតែការប្រកួតប្រជែងតែងតែមាន ដូច្នេះយើងត្រូវចេះផ្លាស់ប្តូរ និងធ្វើអ្វីដែលថ្មី ពោលត្រូវតែធ្វើឱ្យបានមុនគេ បន្ថែមនូវអ្វីដែលជាតម្រូវការរបស់អតិថិជន នូវអ្វីដែលថ្មី ប្លែក ដោយ update ឱ្យបានមុនគូប្រកួតប្រជែងជានិច្ច។
សរុបមក សម្រាប់ដំណើរការអាជីវកម្មដំបូងបំផុត អ្វីដែលពួកគាត់មាននោះ គឺគំនិត និងជំនឿចិត្តលើអ្វីដែលខ្លួនកំពុងធ្វើ ចំណែកដើមទុន និងជំនាញ ម្ចាស់អាជីវកម្មម្នាក់ៗអាចរក និងរៀនបន្ថែមបាន ឬអាចជួលអ្នកដទៃធ្វើក៏បានដែរ សំខាន់ត្រង់ថា តើអ្នកចង់បង្កើតអ្វី ឬចង់ផ្តល់អ្វីទៅឱ្យអ្នកដទៃតាមរយៈគំនិតរបស់អ្នកផ្ទាល់ហ្នឹងឯង៕
August 8, 2018
ឱកាសពិសេសជួបជាមួយបុគ្គលជោគជ័យក្នុងអាជីវកម្មនាថ្ងៃទី២៨សីហានេះ!
ស្វែងយល់កាន់តែច្បាស់អំពី៖
១. ហេតុអ្វីត្រូវសម្រេចចិត្តធ្វើអាជីវកម្ម?
២. អ្វីជាដើមទុនចំបងក្នុងការធ្វើអាជីវកម្ម? រកទុននោះតាមវិធីណា?
៣. យុទ្ធសាស្ត្រនិងតិកនិកក្នុងការដោះស្រាយបញ្ហាប្រឈមនីមួយៗក្នុងដំណើរការអាជីវកម្ម។
៤. តើត្រូវពិនិត្យ និងធ្វើយ៉ាងណាដើម្បីដើរអោយទាន់បរិបទទីផ្សារ?
៥. តើអាជីវកម្មថ្មីថ្មោងអាចរីកចំរើនបានយ៉ាងដូចម្តេច?
៦. តើយុទ្ធសាស្ត្រអ្វីដែរអនុញ្ញាតអោយក្រុមហ៊ុនមួយរីកចំរើនខ្លាំងទៅមុខ?
៧. ស្រាយចម្ងល់ផ្សេងៗតាមរយៈការជជែកវែកញែកបន្ថែមជាមួយវាគ្មិននិងអ្នកចូលរួមជាច្រើនទៀត។
កុំភ្លេចជួបគ្នានៅផាកកាហ្វេសាខាបឹងកេងកងត្រសក់ផ្អែម!
កាលបរិច្ឆេទ ៖ ថ្ងៃទី២៨ សីហា ២០១៧
ពេលវេលា៖ ០៥:៣០នាទី
តម្លៃសំបុត្រ៖ ១៥ដុល្លារ
ទំនាក់ទំនង ៖ ០៧៧ ៦៧៦ ៤២៣/ ០១២ ២៣២ ៨២៣
***បញ្ជាក់តំលៃសំបុត្រនេះមានការរួមបញ្ចូលជាមួយនឹង Cocktail Networking រួចជាស្រាច់។
August 16, 2017