Tag: អាជីវកម្

រថយន្ត Ford Ranger 2024 បានបង្ហាញខ្លួនក្នុងទីផ្សារប្រទេសកម្ពុជាហើយ!
កាលពីថ្ងៃទី ១៥ ខែមីនា ឆ្នាំ២០២៤ ផ្នែកលក់រថយន្ត ហ្វដ នៃក្រុមហ៊ុន អ អិម អេ (ខេមបូឌា) – RMA (Cambodia) PLC បានធ្វើពិធីដាក់បង្ហាញជាផ្លូវការរថយន្ត Ford Ranger ស៊េរីឆ្នាំ2024 ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានចូលរួមប្រមាណជាង 2,000 នាក់ នៅមជ្ឈមណ្ឌល ដឹ ព្រេមៀ សេនធ័រ សែនសុខ – The Premier Center Sen Sok ។
នៅវេលាម៉ោង ៩ព្រឹក ដល់ ៤ល្ងាច គឺមានការបើកបរសាកល្បងសម្រាប់រថយន្ត Ford Ranger ស៊េរីឆ្នាំ2024 ដែលមានការបង្ហាញអំពីបច្ចេកវិទ្យាទំនើបៗដែលមានបំពាក់ក្នុងរថយន្ត រួមទាំងធ្វើការបង្ហាញនូវសមត្ថភាពជើងក្រោម និង កម្លាំងនៃម៉ាស៊ីនម៉ាស៊ូត 2.0L Bi-Turbo ដែលផ្តល់នូវផាសុកភាពក្នុងការបើកបរ និងបច្ចេក វិទ្យាទំនើបផ្សេងៗទៀតរបស់រថយន្ត Ford Ranger ស៊េរីឆ្នាំ2024។ ជាពិសេស អតិថិជនដែលបានចូលរួមក៏មានការលេងល្បែងកម្សាន្ត និងទទួលបានកាដូវត្ថុអនុសាវរីន៏ជាច្រើនទៀតពីក្រុមហ៊ុន ហ្វដ។ មិនតែប៉ុណ្ណោះ រថយន្ត Ford Ranger Wildtrak ស៊េរីឆ្នាំ2024 និងរថយន្ត Ford Ranger XLT ស៊េរីឆ្នាំ2024 ក៏មានបំពាក់នូវឈ្នាន់ជាន់ជើងផ្នែកចំហៀងខាងក្រោយ ដែលបង្កភាពងាយស្រួលក្នុងការឡើងចុះរថយន្ត ដោយពុំចាំបាច់ឡើងតាមកង់រថយន្តនោះទេ។
ជាកិច្ចចាប់ផ្តើមកម្មវិធី លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ ថា៖ “ក្រុមហ៊ុន អ អិម អេ (ខេមបូឌា) គឺជាក្រុមហ៊ុនមួយដែលឈានមុខគេក្នុងទីផ្សាររថយន្តថ្មី ហើយភាពពេញនិយម និងភាពល្បីល្បាញនេះ ដោយសារតែទទួលបានការគាំទ្រ ពីសំណាក់បងប្អូនប្រជាពលរដ្ឋកម្ពុជាមកលើរថយន្ត Ford Ranger និងភាពជឿជាក់ទៅលើគុណភាព និងសេវាកម្មផ្តល់ជូនអតិថិជន។”
លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “រថយន្ត Ford Ranger គឺជាដៃគូដ៏មានទំនុក ចិត្តសម្រាប់អតិថិជនដែលប្រើប្រាស់ជាលក្ខណៈគ្រួសារ ការងារ ប្រកបអាជីវកម្ម និងជាពិសេស សម្រាប់អ្នកចូលចិត្តធ្វើដំណើរកម្សាន្តបែបផ្សងព្រេងជាដើម។ ការលក់របស់រថយន្ត Ford Ranger ត្រូវបានគ្របដណ្តប់លើទីផ្សារជាង ១៨០ ប្រទេសជុំវិញពិភពលោក ហើយសម្រាប់រថយន្ត Ford Ranger ស៊េរីថ្មីនេះ គឺនៅតែបន្តផ្តល់នូវភាពរឹងមាំ បច្ចេកវិទ្យាទំនើប និងប្រព័ន្ធសុវត្ថិភាពខ្ពស់លើសគេ ដែលបង្កភាពងាយស្រួលដល់អតិថិជនទាំងអស់ ក្នុងការបំពេញកិច្ចការងារផ្សេងៗរបស់ខ្លួន។ ខ្ញុំសូមថ្លែងអំណរគុណចំពោះអតិថិជន ហ្វដ ទាំងអស់ដែលបន្តគាំទ្រ និងជឿជាក់ទៅលើគុណភាព ប្រព័ន្ធសុវត្ថិភាព និងបច្ចេកវិទ្យារបស់រថយន្ត ហ្វដ។”
Ford Ranger ស៊េរីឆ្នាំ 2024 ត្រូវបានរចនាឡើងដោយកំណត់យកបទដ្ឋាន «Built Ford Tough» ដែលផ្តោតសំខាន់លើ ភាពធន់ រឹងមាំ ហាប់ណែន ទំនើបទាន់សម័យ និងប្រកបដោយផាសុកភាព ដែលជាគំនិតមួយដែលទទួលបានការគាំទ្រយ៉ាងច្រើនពីសំណាក់អតិថិជន។ លើសពីនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែបន្តបំពាក់ដោយបច្ចេកវិទ្យាឆ្លាតវៃជាច្រើន ដើម្បីបង្កនូវភាពងាយស្រួលដល់អតិថិជនដូចជា កុងទ័រឌីជីថល 8អ៊ីញដែលផ្តល់ទិន្នន័យផ្សេងៗ រួមទាំងជម្រើស Mode ទៅតាមស្ថានភាពផ្លូវចំនួន ៦ រួមមាន Normal, Eco, Tow/Hual, Slippery, Mud/Ruts, និង Sand, អេក្រង់ Multi-Touchscreen 12អ៊ីញ ដែលភ្ជាប់ជាមួយបច្ចេកវិទ្យា SYNC4A ដែលអាចភ្ជាប់ជាមួយនឹង Apple Carplay និង Android Auto តាមរយៈ Wireless និងកាមេរ៉ា 360^o រួមជាមួយប្រព័ន្ធសាកថ្មទូរស័ព្ទឥតខ្សែ និងប្រព័ន្ធចាប់ហ្វ្រាំងដោយស្វ័យប្រវត្តនៅពេលឈប់ស្តុប (Auto Hold) ។ល។
ពិសេសជាងនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែផ្តល់នូវប្រព័ន្ធសុវត្ថិភាពទំនើបៗចុងក្រោយ ដើម្បីសម្រួលដល់ការបើកបររបស់អតិថិជន ដូចជាប្រព័ន្ធចង្កៀងឆ្លាតវៃដែលអាចរេតាមចង្កូត និងបែងចែកពន្លឺដោយស្វ័យប្រវត្ត ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត ប្រព័ន្ធជំនួយលើដៃចង្កូតបញ្ចៀសចេញពីគ្រោះថា្នក់ ប្រព័ន្ធចាប់ហ្រ្វាំងបន្ទាន់ក្រោយពេលមានការប៉ះទង្គិច ប្រព័ន្ធផ្តល់សញ្ញាគ្រោះថ្នាក់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត នៅពេលថយក្រោយ និងប្រព័ន្ធឆ្លាតវៃជាច្រើនទៀត ដើម្បីផ្តល់នូវទំនុកចិត្តដល់អតិថិជន។
រថយន្ត Ford Ranger Wildtrak ស៊េរីឆ្នាំ 2024 មានជម្រើសពណ៌ចំនួន ៦ពណ៌ ដើម្បីជាជម្រើសដល់អតិថិជន រួមមានពណ៌លឿងទុំ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស និងរថយន្ត Ford Ranger XLT ស៊េរីឆ្នាំ2024 មានជម្រើសពណ៌ចំនួន ៦ពណ៌ ដូចគ្នា សម្រាប់ជាជម្រើសដល់អតិថិជន រួមមានពណ៌ខៀវ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស ។ សម្រាប់តម្លៃនៃរថយន្ត Ford Ranger Wildtrak ស៊េរីឆ្នាំ 2024 គឺ $55,900 និងរថយន្ត Ford Ranger XLT ស៊េរីឆ្នាំ 2024 គឺ $46,900។ សូមទំនាក់ទំនងផ្នែកលក់តាមសាខានីមួយៗ: សាខាព្រះមុនីវង្ស 078 999 773, សាខាទឹកថ្លា 095 939 939, សាខាទូលសង្កែ 078 935 935, សាខាជ្រោយចង្វារ 017 999 027, សាខាខេត្តសៀមរាប 077 666 357 ឬ 088 9 666 357, សាខាខេត្តកំពង់ចាម 078 999 883 ឬ 088 3 999 883, សាខាភ្នំពេញថ្មី 011 255 229 / 077 722 999 និងសាខាបឹងបៃតង 099 999 747។
March 18, 2024
ទុនវិនិយោគជិត 1.2 ពាន់លានដុល្លារ ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា សម្រាប់ពីខែកុម្ភៈ 2024
នៅក្នុងខែកុម្ភៈ ឆ្នាំ 2024 ក្រុមប្រឹក្សាអភិវឌ្ឍកម្ពុជា (ក.អ.ក) បានអនុម័តគម្រោងថ្មី និងគម្រោងពង្រីកផលិតកម្មចំនួន 37 គម្រោង ដែលមានទុនវិនិយោគសរុបជិត 1.2 ពាន់លានដុល្លារអាម៉េរិក និងអាចបង្កើតការងារបានប្រមាណ 38 ពាន់កន្លែង។
យោងតាមក្រុមប្រឹក្សាអភិវឌ្ឍកម្ពុជា នៅក្នុងកុម្ភៈ មានគម្រោងវិនិយោគចំនួន 5 ដែលលេចធ្លោជាងគេ រួមមានដូចខាងក្រោម៖
1-គម្រោងវិនិយោគសាងសង់វារីអគ្គិសនីស្ទឹងមេទឹក អានុភាព 150 MW ក្នុងខេត្តកោះកុង ដែលមានទុនវិនិយោគប្រមាណ 440 លានដុល្លារអាម៉េរិក
2-គម្រោងវិនិយោគសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង ក្នុងខេត្តកំពង់ឆ្នាំង មានទុនប្រមាណជាង 108 លានដុល្លារ
3-គម្រោងវិនិយោគបង្កើត និងធ្វើអាជីវកម្មមជ្ឈមណ្ឌលទិន្នន័យ នៅក្នុងខណ្ឌដូនពេញ រាជធានីភ្នំពេញ មានទុនវិនិយោគប្រមាណជាង 107 លានដុល្លារ
4-គម្រោងវិនិយោគបង្កើត និងធ្វើអាជីវកម្មមជ្ឈមណ្ឌលទិន្នន័យ នៅក្នុងខណ្ឌឫស្សីកែវ រាជធានីភ្នំពេញ មានទុនប្រមាណ 30 លានដុល្លារ
5-គម្រោងពង្រីកផលិតកម្មរបស់គម្រោងវិនិយោគផលិតសំបកកង់រថយន្ត នៅក្នុងខេត្តស្វាយរៀង មានទុនវិនិយោគប្រមាណ 212 លានដុល្លារអាម៉េរិក។
ក.អ.ក ឱ្យដឹងថា ក្នុងខែកុម្ភៈ ឆ្នាំ 2024 វិនិយោគិនក្នុងស្រុកបានរួមចំណែកបណ្ដាក់ទុនវិនិយោគសរុបចំនួន 58.41% ស្របពេលដែលទុនមានប្រភពពីប្រទេសចិន រួមចំណែក 33.19%, សិង្ហបុរីរួមចំណែក 4.3% និងវៀតណាម 4.09%៕
March 12, 2024
ក្រុមហ៊ុនមួយរបស់កូរ៉េខាងត្បូង មានគោលដៅបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា
គណៈប្រតិភូក្រុមហ៊ុន CAMKO MOTOR COMPANT LTD. និងក្រុមហ៊ុន CAMKO INFRACORE CO., LTD. របស់កូរ៉េខាងត្បូង បានបង្ហាញទិសដៅនៃការបង្កើតរោងចក្រផលិតគ្រឿងបង្គុំរថយន្តអគ្គិសនីនៅកម្ពុជា។
ការបង្ហាញទិសដៅរបស់ក្រុមហ៊ុនខាងលើ ត្រូវបានលើកឡើងនៅក្នុងជំនួបពិភាក្សាការងាររវាងក្រុមប្រឹក្សាអភិវឌ្ឍកម្ពុជាដែលដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា និងប្រតិភូកូរ៉េខាងត្បូងដែលដឹកនាំដោយអតីតនាយករដ្ឋមន្ត្រីនៃសាធារណរដ្ឋករ៉េ លោក Chung Sye-Kyun កាលពីព្រឹកថ្ងៃទី 24 មករា 2024។
យោងតាមក្រុមប្រឹក្សាអភិវឌ្ឍកម្ពុជា ជំនួបនេះត្រូវបានរៀបចំឡើងក្នុងគោលបំណងដើម្បីពិភាក្សាអំពីកិច្ចសហប្រតិបត្តិការរវាងភាគីទាំងពីរកម្ពុជា-កូរ៉េ នាពេលកន្លងមក ពិសេសលើសកម្មភាពវិនិយោគ និងការជំរុញឱ្យមានវិនិយោគិនពីក្រុមហ៊ុននានារបស់សាធារណរដ្ឋកូរ៉េ ចូលមកបណ្ដាក់ទុននៅកម្ពុជាបន្ថែមទៀត។
ក្រុមហ៊ុន CAMKO MOTOR បច្ចុប្បន្នកំពុងមានប្រតិបត្តិការអាជីវកម្មនៅកម្ពុជា លើការដំឡើងរថយន្តម៉ាក Hyundai និងផលិតខ្សែភ្លើងរថយន្ត សម្រាប់ការនាំចេញ។ ចំណែកក្រុមហ៊ុន CAMKO INFRACORE តាមរយៈកិច្ចប្រជុំនេះ ក៏បានបង្ហាញទិសដៅនៃការដាក់ទុនវិនិយោគបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា សម្រាប់ការនាំចេញទៅទីផ្សារអន្តរជាតិ។
January 25, 2024
ឱកាសល្អសម្រាប់អ្នកជំនួញដែលចង់ពង្រីកអាជីវកម្មនៅខេត្តបាត់ដំបង
ចាប់ពីថ្ងៃទី 14 ដល់ 16 កុម្ភៈ 2024 សភាពាណិជ្ជកម្មកម្ពុជា នឹងរៀបចំដំណើរទស្សនកិច្ចពាណិជ្ជកម្មទៅកាន់ខេត្តបាត់ដំបង ដែលនេះគឺជាឱកាសល្អសម្រាប់អ្នកជំនួញទាំងឡាយណាដែលចង់ពង្រីកអាជីវកម្មទៅកាន់ខេត្តនេះ។
កាលពីថ្ងៃទី 03 មករា 2024 សភាពាណិជ្ជកម្មកម្ពុជា បានចេញសេចក្ដីជូនដំណឹងមួយជាសាធារណៈ ទាក់ទងនឹងដំណើរទស្សនកិច្ចពាណិជ្ជកម្មទៅកាន់ខេត្តបាត់ដំបង ក្នុងបំណងស្វែងយល់ពីសង្វាក់ផលិតកម្មចំណីអាហារ សក្ដានុពលសេដ្ឋកិច្ច កសិកម្ម ទំនាក់ទំនងដៃគូពាណិជ្ជកម្ម និងឱកាសវិនិយោគនានានៅក្នុងខេត្តបាត់ដំបង។
យោងតាមសេចក្ដីជូនដំណឹង ដំណើរទស្សនកិច្ចពាណិជ្ជកម្មនេះនឹងត្រូវធ្វើឡើងរយៈពេលពីរយប់ បីថ្ងៃ គឺចាប់ពីថ្ងៃទី 14 ដល់ 16 កុម្ភៈ 2024។ សភាពាណិជ្ជកម្មកម្ពុជា ក៏បានបញ្ជាក់ថា តម្លៃសំបុត្រសម្រាប់ការចូលរួមដំណើរទស្សនកិច្ចពាណិជ្ជកម្មនេះគឺ 185 ដុល្លារ/ម្នាក់។
January 5, 2024
ទុនវិនិយោគផ្ទាល់ពីបរទេសក្នុង 11 ខែដំបូងនៃឆ្នាំនេះ នៅវៀតណាម កើន 15 ភាគរយ
ក្នុងរយៈពេល 11 ខែដំបូងនៃឆ្នាំ 2023 វៀតណាមទាក់ទាញទុនវិនិយោគផ្ទាល់ពីបរទេស (FDI) បានជិត 28.85 ពាន់លានដុល្លារអាម៉េរិក កើនជិត 15% បើធៀបនឹងដំណាក់កាលដូចគ្នាក្នុងឆ្នាំ 2022។ នេះបើតាមក្រសួងសេដ្ឋកិច្ចនិងវិនិយោគវៀតណាម។
សារព័ត៌មានវៀតណាមបានចេញផ្សាយថា គោលនយោបាយគាំពារ កិច្ចសហប្រតិបត្តិការយ៉ាងជិតស្និទ្ធរវាងរដ្ឋាភិបាល ក្រសួង និងមូលដ្ឋាន ត្រូវបានគេជឿថា បានជួយឱ្យសហគ្រាសនានាទទួលបានស្ថិរភាពក្នុងការផលិត និងការធ្វើអាជីវកម្ម នាំឱ្យទុន FDI មានការកើនឡើង។
ដៃគូសហការលំដាប់កំពូលៗរបស់វៀតណាម នៅតែជា សិង្ហបុរី ហុងកុង និងកូរ៉េខាងត្បូង។ បើទោះជាការនាំចេញ នាំចូលដែលបានពីគម្រោង FDI មានការថយចុះ ប៉ុន្តែទុនវិនិយោគផ្ទាល់ពីបរទេសនៅតែរួមចំណែកធំធេងនៅក្នុងចំណូលសរុបទូទាំងប្រទេស។
គិតចាប់ពីដើមឆ្នាំមកដល់ថ្ងៃទី 20 វិច្ឆិកា 2023 វៀតណាមទាក់ទាញទុនវិនិយោគផ្ទាល់ពីបរទេស (FDI) ថ្មីបានជិត 28.85 ពាន់លានដុល្លារអាម៉េរិក កើន 14.8% បើធៀបនឹងដំណាក់កាលដូចគ្នាក្នុងឆ្នាំ 2022 និងកើន 0.1% បើធៀបនឹងខែតុលា 2023។
បច្ចុប្បន្ន FDI នៅវៀតណាម នៅមានគម្រោងចំនួន 38,844 ទៀតដែលនៅមានសុពលភាព និងមានតម្លៃសរុបជិត 462.4 ពាន់លានដុល្លារអាម៉េរិក។ ឧស្សាហកម្មកែច្នៃ និងផលិតកម្ម នៅតែជាវិស័យដែលទទួលបានទុនវិនិយោគច្រើនជាងគេ។ ទីក្រុងហូជីមិញ ខេត្តប៊ិញយឿង និងរដ្ឋធានីហាណូយ នៅតែជាតំបន់ដែលទាក់ទាញបានទុន FDI ច្រើនជាងគេ ខណៈខេត្តក្វាងនិញ និងបាក់និញ ក៏ជាតំបន់ដែលកំពុងលេខធ្លោផងដែរ៕
November 29, 2023
វិនិយោគគិនជប៉ុន និងកម្ពុជា ប្រមាណ 60 ក្រុមហ៊ុន រៀបចំវេទិកាមួយដើម្បីស្វែងយល់ដោយផ្ទាល់ពីឱកាស និងសក្តានុពលវិនិយោគនៅស្រុកខ្មែរ
កាលពីថ្ងៃទី 20 ខែវិច្ឆិកា 2023 វេទិកា «ធុរកិច្ច ភាពជាដៃគូពាណិជ្ជកម្មកម្ពុជា និងវិនិយោគិនជប៉ុន» ដើម្បីសិក្សាស្វែងយល់ដោយផ្ទាល់ពីឱកាស និងសក្តានុពលវិនិយោគនៅក្នុង កម្ពុជា ក៏ដូចជាការស្វែងរកដៃគូ និង កិច្ចសហប្រតិបត្តិការអាជីវកម្មរបស់ខ្លួន ត្រូវបានរៀបចំឡើងដោយមានការផ្តូចផ្តើមពីធនាគារ អេស៊ីលីដា និង សហការដោយសមាគមជប៉ុន-កម្ពុជា។
ជំនួបធុរកិច្ចនេះរៀបចំឡើងនៅទីស្នាក់ការកណ្តាលរបស់ធនាគារ អេស៊ីលីដា ដោយមានការចូលរួមពីអ្នកវិនិយោគជប៉ុនមកពី 28 ក្រុមហ៊ុន និង អ្នកវិនិយោគកម្ពុជា មកពីក្រុមហ៊ុនជាង 30 ស្ថាប័ន។ នេះបើតាមការចុះផ្សាយរបស់ ក្រសួងព័ត៌មាន កាលពីដើមសប្ដាហ៍នេះ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ឱ្យដឹងថា ជំនួបធុរកិច្ចខាងលើនេះគឺជាឱកាសសម្រាប់ឱ្យអ្នកវិនិយោគកម្ពុជា-ជប៉ុន ជួបគ្នា និងសិក្សាស្វែងរកអត្ថប្រយោជន៍រួមនៃការវិនិយោគដ៏មានសក្តានុពលនៅ កម្ពុជា។
វិនិយោគិនជប៉ុនបានធ្វើការសម្រេចចិត្តដ៏ត្រឹមត្រូវក្នុងការវិនិយោគនៅលើទឹកដីកម្ពុជា ដែលជាទីកន្លែងផ្តល់នូវសុខសន្តិភាពពេញលេញ និងសម្បូរបែប។
នេះជាលើកទីបីហើយដែលធនាគារ អេស៊ីលីដា សហការជាមួយសមាគមជប៉ុន-កម្ពុជា រៀបចំវេទិកា «ធុរកិច្ច រវាងដៃគូពាណិជ្ជកម្មកម្ពុជា និងវិនិយោគិនជប៉ុន»។ វេទិកានេះ ត្រូវបានគេរំពឹងថា ជាជំនួបដ៏វិសេសវិសាល ដើម្បីពង្រឹង និង បំពេញតម្រូវការជូនធុរជនក្នុងការស្វែងយល់ពីវិស័យធុរកិច្ចនានានៅកម្ពុជា៕
November 22, 2023
កម្ពុជា លើកទឹកចិត្តឱ្យធនាគារ រៀបចំឥណទានឡើងវិញចំពោះអ្នកទិញអចលនទ្រព្យដែលរងផលប៉ះពាល់ពីវិបត្តិសេដ្ឋកិច្ច
(ភ្នំពេញ) – គ្រឹះស្ថានធនាគារ និងហិរញ្ញវត្ថុទទួលបានការលើកទឹកចិត្តពី ប្រមុខរាជរដ្ឋាភិបាលកម្ពុជា ទាក់ទងនឹងការរៀបចំឥណទានឡើងវិញ ជូនដល់អតិថិជនរបស់ខ្លួនដែលបានខ្ចីប្រាក់ដើម្បីទិញអចលនទ្រព្យ និងកំពុងរងផលប៉ះពាល់ដោយសារវិបត្តិសេដ្ឋកិច្ច។
«លើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខធមស 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន់» សម្តេច ហ៊ុន ម៉ាណែត បានថ្លែងដូច្នេះនៅឯវិមានសន្ដិភាព កាលពីព្រឹកថ្ងៃទី 13 វិច្ឆិកា 2023 ក្នុងឱកាសអញ្ជើញជាអធិបតីនៃវេទិកា «រាជរដ្ឋាភិបាល -ផ្នែកឯកជន» លើកទី 19 ដើម្បីបើកការជជែកលើបញ្ហាធុរកិច្ចនៅកម្ពុជា។
ដោយសារតែវិស័យអចលនទ្រព្យបាន និងកំពុងរងផលប៉ះពាល់ធ្ងន់ធ្ងរពីវិបត្តិសុខភាព និងវិបត្តិផ្សេងៗទៀត រាជរដ្ឋាភិបាលក៏ដាក់ចេញនូវវិធានការមួយចំនួនដើម្បីចូលរួមដោះស្រាយ។ វិធានការទាំងនេះ រួមមានដូចខាងក្រោម៖
- បន្តពន្យារពេលការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ 2024 សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបាននឹងកំពុងប្រតិបត្តិការគម្រោងអភិវឌ្ឍន៍លំនៅឋាន ដែលមានអាជ្ញាបណ្ណអចលនវត្ថុផ្តល់ដល់និយ័តករអាជីវកម្មអចលនវត្ថុ និងបញ្ចាំ។ល។
- បង្កើនរយៈពេលនៃការបង់ពន្ធជាកញ្ចប់តាមដំណាក់កាលពី 12 ខែ ដល់ 18 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធតិចជាងមួយលានដុល្លារ និងពី 24 ខែ ដល់ 38 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធលើសពីមួយលានដុល្លារ។
- ក្រុមហ៊ុនអភិវឌ្ឍន៍លំនៅឋានជាបុរីថ្មី ឬក្រុមហ៊ុនមានគម្រោងអភិវឌ្ឍន៍លំនៅឋានជាបុរី ដែលមិនទាន់បានអភិវឌ្ឍន៍ត្រូវបង់ពន្ធស្របតាម និតិវិធីជាព័ត៌មានរបបពិត និងត្រូវកាន់បញ្ជីគណនីឱ្យបានត្រឹមត្រូវ។
- បន្តពន្យារពេលការអនុវត្តលើពន្ធចំណេញមូលធន សម្រាប់តែវិស័យអចលនទ្រព្យរហូតដល់ដំណាច់ឆ្នាំ2024។
- បន្តលើកលែងពន្ធប្រថាប់ត្រាលើការផ្ទេរសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរី និងដែលមានតម្លៃក្រោម ឬស្មើនឹង 7 ម៉ឺនដុល្លាររហូតដល់ដំណាច់ឆ្នាំ 2024។
- លើកទឹកចិត្ត និងស្នើឱ្យគ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខ 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន។
- លើកលែងការផាកពិន័យផ្សេងៗចំពោះគម្រោងអភិវឌ្ឍន៍លំនៅឋានជាបុរី ប៉ុន្តែក្រុមហ៊ុនអភិវឌ្ឍចាំបាច់ត្រូវបំពេញកាតព្វកិច្ចសមស្របតាមប្រកាសស្តីពីការគ្រប់គ្រងអាជីវកម្មអភិវឌ្ឍអចលនវត្ថុ។
- ពន្យារពេលអនុវត្តរហូតដល់ដំណាច់ឆ្នាំ 2023 លើសេចក្តីប្រកាសស្តីពីកាតព្វកិច្ចដាក់រាយការណ៍ហិរញ្ញវត្ថុឱ្យសវកម្មឯករាជ្យ ចេញដោយក្រសួងសេដ្ឋកិច្ច និងហិរញ្ញវត្ថុ។
រាជរដ្ឋាភិបាលក៏បានបង្កើតក្រុមការងារអន្តរក្រសួងចំនួនពីរ ដើម្បីតាមដាន ដោះស្រាយបញ្ហាប្រឈម នៅក្នុងវិស័យនេះអចលនទ្រព្យផងដែរ។
សម្តេចធិបតី ក៏បានដាក់ចេញនូវវិធានការមួយចំនួនទៀត ដើម្បីជួយដល់វិស័យអចលទ្រព្យ និងសំណង់ ក្នុងនោះសម្រាប់ផ្ទះមានតម្លៃលើស 7 ម៉ឺនដុល្លារអាមេរិក ត្រូវបានអនុញ្ញាតឱ្យដកតម្លៃ 7 ម៉ឺនដុល្លារអាមេរិកចេញពីមូលដ្ឋាន នៃការគិតពន្ធប្រថាប់ត្រា ក៏ដូចជាការលើកលែងពន្ធប្រថាប់ត្រាដល់អចលនទ្រព្យដែលត្រូវបានទិញ-លក់ក្នុងតម្លៃក្រោម 7 ម៉ឺនដុល្លារ រហូតដល់ឆ្នាំ 2024 ផងដែរ៕
November 14, 2023
Hyundai ចាប់ផ្ដើមទិញ លក់រថយន្តប្រើប្រាស់រួច តាមអនឡាញ
ក្រុមហ៊ុន Hyundai រំពឹងថា ការទិញ លក់រថយន្តមួយទឹកតាមអនឡាញរបស់ខ្លួននឹងជួយកាត់បន្ថយការព្រួយបារម្ភចំពោះរថយន្តដែលត្រូវបានប្រើប្រាស់រួចនៅក្នុងសង្គមកូរ៉េខាងត្បូង។
យោងតាមសារព័ត៌មានក្នុងស្រុក ចាប់ពីថ្ងៃទី 24 តុលា ក្រុមហ៊ុន Hyundai Motor នឹងបើកដំណើរការអាជីវកម្មលក់រថយន្តចាស់តាមអ៊ីនធើណិត ក្នុងបំណងផ្គត់ផ្គង់រថយន្តតម្លៃសមស្របសម្រាប់អតិថិជន និងធ្វើពិពិធកម្មប្រភពចំណូលរបស់ខ្លួន។
ក្រុមហ៊ុន Hyundai រំពឹងថា ការ «ប៉ាវទីផ្សារ» ទាំងមូល តាំងពីដំណាក់កាលទិញរថយន្តចាស់ រហូតដល់ការលក់រថយន្តជូនអតិថិជន នឹងជួយកាត់បន្ថយការព្រួយបារម្ភចំពោះរថយន្តដែលត្រូវបានប្រើប្រាស់រួចនៅក្នុងសង្គមកូរ៉េខាងត្បូងនាបច្ចុប្បន្ន។
Hyundai នឹងដំណើរការគេហទំព័រមួយដើម្បីអនុញ្ញាតឱ្យអតិថិជនទិញ និងលក់រថយន្តដែលប្រើរួច។ ក្រុមហ៊ុននេះនឹងទិញតែរថយន្តដែលបានប្រើប្រាស់ក្រោម 100,000 គីឡូម៉ែត្រ ឬក្រោម 5 ឆ្នាំ និងមិនធ្លាប់ជួបគ្រោះថ្នាក់។ Hyundai ក៏នឹងផ្ដល់សេវាកម្មជួសជុលមិនគិតថ្លៃពីរឆ្នាំ ឬ 20,000 គីឡូម៉េត្រផងដែរ សម្រាប់អតិថិជន៕
October 20, 2023
TikTok ឈប់លក់ទំនិញអនឡាញនៅឥណ្ឌូណេស៊ី បន្ទាប់ពីរដ្ឋបានហាមឃាត់
TikTok សម្រេចចិត្តឈប់លក់ទំនិញតាមអនឡាញនៅប្រទេសឥណ្ឌូណេស៊ី ក្រោយពីរដ្ឋាភិបាលប្រទេសនេះបានប្រកាសហាមឃាត់ ដើម្បីការពារអាជីវកម្មខ្នាតតូច។
កាលពីថ្ងៃទី 03 តុលា 2023 TikTok ដែលជាបណ្ដាញសង្គមរបស់ក្រុមហ៊ុនចិន ByteDance បានប្រកាសថា នឹងបញ្ឈប់សកម្មភាពពាណិជ្ជកម្មនៅលើឧបករណ៍ទិញដូរទំនិញរបស់ខ្លួននៅប្រទេសឥណ្ឌូណេស៊ី ចាប់ពីថ្ងៃទី 04 តុលា 2023 នេះ។
ការសម្រេចចិត្តខាងលើរបស់បណ្ដាញសង្គមចិន TikTok ត្រូវបានធ្វើឡើងក្រោយពីរដ្ឋាភិបាលឥណ្ឌូណេស៊ីបានប្រកាសហាមឃាត់សកម្មភាពលក់ទំនិញផ្ទាល់នៅលើទំព័របណ្ដាញសង្គមនានា ដើម្បីការពារអាជីវកម្មខ្នាតតូចរបស់ខ្លួន។
ក្នុងប្រកាសថ្មីបំផុតរបស់ខ្លួន TikTok Indonesia សង្កត់ធ្ងន់ថា អាទិភាពដំបូងគេគឺការគោរពច្បាប់ និងការសម្រេចរបស់ប្រទេសដែល TikTok កំពុងធ្វើសកម្មភាព។ ក្នុងនោះ ពួកគេនឹងឈប់ធ្វើពាណិជ្ជកម្មអនឡាញនៅលើឧបករណ៍លក់ដូរទំនិញ TikTok Shop Inodnesia។
ក៏ប៉ុន្តែ TikTok ក៏យល់ថា បទបញ្ជាខាងលើរបស់រដ្ឋាភិបាលឥណ្ឌូណេស៊ី នឹងប៉ះពាល់ដល់អាជីវកររាប់លាននាក់ដែលប្រើប្រាស់ TikTok Shop ក្នុងប្រទេសដែលមានប្រជាជនច្រើនជាងគេនៅអាស៊ីអាគ្នេយ៍នេះផងដែរ។
រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី Zulkifli Hasan ឱ្យដឹងថា បណ្ដាក្រុមហ៊ុនដែលមិនគោរពតាមបទបញ្ជាហាមលក់ទំនិញលើបណ្ដាញសង្គម នឹងត្រូវបានព្រមាន។ បើសិននៅតែរំលោភបំពានជាថ្មី ពួកគេនឹងត្រូវបានដកហូតអាជ្ញាប័ណ្ណអាជីវកម្មនៅឥណ្ឌូណេស៊ី។
មុននោះ រដ្ឋមន្ត្រីខាងលើយល់ថា ពាណិជ្ជកម្មអនឡាញត្រូវការបែងចែកឱ្យដាច់ពីបណ្ដាញសង្គម។ បណ្ដាញសង្គមអាចផ្សព្វផ្សាយផលិតផល ប៉ុន្តែមិនត្រូវបង្កលក្ខណៈងាយស្រួលក្នុងការលក់ដូរផលិតផលនៅលើថ្នាលបច្ចេកវិទ្យារបស់ពួកគេ។ លោក Hasan សង្កត់ធ្ងន់ថា បទបញ្ជាថ្មីនេះត្រូវបានធ្វើឡើងក្នុងបំណងការពារសហគ្រាស អាជីវកម្មខ្នាតមធ្យម និងតូច។
យោងតាមទិន្នន័យរបស់ TikTok ប្រទេសឥណ្ឌូណេស៊ីដែលមានអ្នកប្រើប្រាស់ 125 លាននាក់ គឺជាទីផ្សារធំជាងគេលំដាប់ទីពីរក្នុងពិភពលោករបស់ TikTok បន្ទាប់ពីសហរដ្ឋអាម៉េរិក។ ប៉ុន្តែ ប៉ុន្មានខែចុងក្រោយនេះ មានមតិកាន់តែច្រើនដែលអំពាវនាវឱ្យរដ្ឋគ្រប់គ្រងបណ្ដាញសង្គម និងពាណិជ្ជកម្មអនឡាញ ពេលដែលអ្នកលក់តាមបែបបុរាណយល់ឃើញថា ការលក់ទំនិញក្នុងតម្លៃទាបខ្លាំងនៅលើ TikTok Shop និងបណ្ដាញសង្គមនានា កំពុងគំរាមកំហែងដល់ «ឆ្នាំងបាយ» របស់ពួកគេ៕
October 4, 2023
ឥណ្ឌូណេស៊ីហាមលក់ទំនិញតាមបណ្ដាញសង្គមដើម្បីការពារពាណិជ្ជកម្មបែបបុរាណ
វាសនារបស់ TikTok Shop នៅប្រទេសឥណ្ឌូណេស៊ីអាចនឹងត្រូវបានសម្រេចនៅក្នុងសប្ដាហ៍នេះ ពេលដែលរដ្ឋាភិបាលរបស់ប្រទេសដែលមានប្រជាជនច្រើនជាងគេនៅអាស៊ីអាគ្នេយ៍ បានកំណត់គោលការណ៍ស្ដីពីការលក់ទំនិញតាមអនឡាញ។
លោក Oktavianus មានមុខរបរលក់សម្លៀកបំពាក់កូនក្មេងរយៈពេល 10 ឆ្នាំ នៅឯផ្សារ Tanah Abang (ហ្សាការតា) ប៉ុន្តែ ទើបតែបានងាកទៅលក់តាមអនឡាញកាលពីឆ្នាំ 2017។ អាជីវករវ័យ 37 ឆ្នាំរូបនេះ ឱ្យដឹងថា តាំងពីពេលនោះមក គាត់លក់ដាច់ជាងមុនឆ្ងាយ។ «TikTok Shop បានជួយខ្ញុំ។ ខ្ញុំបានឃើញល្បឿនរង្វិលជុំនៃទំនិញកើនពី 30% ទៅ 40%» លោក Oktavianus បានប្រាប់សារព័ត៌មាន Strait Times ដូច្នេះ។
ក៏ប៉ុន្តែ អាជីវករដូចលោក Oktavianus ទំនងជានឹងលែងបានសប្បាយចិត្តបែបនេះទៀតហើយ នៅពេលរដ្ឋាភិបាលឥណ្ឌូណេស៊ីអំពាវនាវ និងចាត់វិធានការ បង្ខំឱ្យថ្នាលបច្ចេកវិទ្យាទាំងអស់ត្រូវបែងចែកឱ្យបានច្បាស់រវាងបណ្ដាញសង្គម និងពាណិជ្ជកម្មអេឡិចត្រូនិច (ecommerce)។
ឥរិយាបថនេះធ្វើឡើងសំដៅលើបណ្ដាក្រុមហ៊ុនដូច TikTok ជាដើម ដោយក្រុមមន្ត្រីឥណ្ឌូណេស៊ីយល់ថា សកម្មភាពពាណិជ្ជកម្មនៅលើបណ្ដាញសង្គម (social commerce) គឺមិនយុត្តិធម៌ គំរាមកំហែងដល់បណ្ដាសហគ្រាសខ្នាតតូចក្នុងស្រុក។
ចំណែកភាគីតំណាង TikTok ប្រចាំប្រទេសឥណ្ឌូណេស៊ី ឱ្យដឹងថា ពាណិជ្ជកម្មសង្គម ត្រូវបានបង្កើតឡើងដើម្បីដោះស្រាយបញ្ហាជាក់ស្ដែងរបស់អាជីវករតូចតាចនៅក្នុងស្រុកដែលលក់ដូរបែបបុរាណ ដោយការតភ្ជាប់ពួកគេជាមួយនឹងក្រុមអ្នកច្នៃប្រឌិតក្នុងស្រុក ជាមនុស្សដែលអាចជួយបង្កើនការចូលមើលហាងអនឡាញរបស់អាជីវករ។
ទោះយ៉ាងណាក៏ដោយ ថ្មីៗនេះ រដ្ឋមន្ត្រីក្រសួងសហករណ៍សហគ្រាសធុនតូច និងមធ្យមឥណ្ឌូនេស៊ី Teten Masduki លើកឡើងថា សហគ្រាសលើបណ្ដាញសង្គមលក់ផលិតផលនាំចូលក្នុងតម្លៃទាបខុសធម្មតា ទាបជាងការចំណាយក្នុងការផលិតទំនិញក្នុងស្រុក និងប៉ះពាល់ដល់សហគ្រាសក្នុងស្រុក។
ក៏ប៉ុន្តែ លោកស្រី Weihan Chen ប្រធានក្រុម Insights របស់ Momentum Works ឱ្យដឹងថា ការហាមឃាត់លក់ដូរលើបណ្ដាញសង្គមអាចលុបបំបាត់រាល់ផលប្រយោជន៍ដែលបានពីបណ្ដាញសង្គម។ ប្រការនេះប្រាកដជាបង្កឱ្យមានឧបសគ្គដល់អាជីវករតូចតាច ជាក្រុមដែលមានបទពិសោធន៍តិចតួច និងមានធនធានតិចជាងគេ នាំឱ្យកំណើននៃការចាប់ផ្ដើមអាជីវកម្មយូរអង្វេងមានភាពយឺតយ៉ាវ៕
September 26, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
ចង្រិតក្រហមកំពុងបំភ័យប្រជាជននៅទីក្រុងរបស់សហរដ្ឋអាម៉េរិក
ចង្រិត Mormon ដែលស៊ីសាច់គ្នាឯង កំពុង «សម្រុក» ចូលទីក្រុង Elko របស់រដ្ឋ Nevada ក្នុងទ្រង់ទ្រាយធំ បាន និងកំពុងពង្រាយខ្លួនពេញដងផ្លូវល្បឿនលឿន វាលស្មៅ និង «ឡោមព័ទ្ធ» ទីលំនៅរបស់ប្រជាជន។
ទីក្រុង Elko របស់រដ្ឋ Nevada ប្រឈមមុខនឹងទិដ្ឋភាពដូចទៅនឹងភាពយន្តរន្ធត់ នៅពេលហ្វូងចង្រិតក្រហមដូចឈាមកំពុងចូលមកកាន់កាប់ស្ទើរគ្រប់ច្រកល្ហក។ ចង្រិត Mormon មិនបង្កគ្រោះថ្នាក់ដល់មនុស្សដោយផ្ទាល់ ប៉ុន្តែវត្តមានរបស់ពួកវាធ្វើឱ្យប្រជាជនមានការព្រួយបារម្ភ។ នេះបើតាម Interesting Engineering ចុះផ្សាយនៅថ្ងៃទី 26 មិថុនានេះ។
ចង្រិត Mormon មានឈ្មោះក្នុងវិទ្យាសាស្ត្រថា Anabrus simplex។ វាគឺជាសត្វល្អិតគ្មានស្លាបដែលមានប្រភពនៅពាក់កណ្ដាលភាគខាងជើងរបស់អាម៉េរិកខាងជើង។
ជាធម្មតា ក្នុងមួយឆ្នាំ ចង្រិតញីនឹងបង្កើតកូនបានមួយលើក។ ក្រោយមក ពួកវាប្រមូលផ្ដុំគ្នា ផ្លាស់ទី និងស៊ីដំណាំនៅតាមផ្លូវពេលធ្វើដំណើរ។ ក៏ប៉ុន្តែ ឆ្នាំនេះ ពួកវានាំគ្នាចូលមកក្នុងទីប្រជុំជន និងទីក្រុង រួមមាន Elko ជាដើម បង្កឱ្យមានការព្រួយបារម្ភពីប្រជាជន។ ក្រុមអ្នកជំនាញវាយតម្លៃថា ចង្រិតរាប់លានក្បាលចូលមកកាន់ទីក្រុង Elko នៅរដូវក្ដៅនេះ។
បើទោះជាមិនគំរាមកំហែងដល់មនុស្ស ប៉ុន្តែចង្រិត Mormon មានក្លិនអាក្រក់ និងជាសត្វល្អិតដែលអាចស៊ីសាច់គ្នាឯង។ នៅពេលចង្រិតណាមួយត្រូវឡានកិន ពួកដែលនៅក្បែរនោះតែងលោតចូលមកដណ្ដើមគ្នាស៊ី បង្កើតបានជាទិដ្ឋភាពមួយដ៏គួរឱ្យខ្លាច។
វត្តមានក្នុងទ្រង់ទ្រាយធំរបស់ចង្រិតនេះ នាំឱ្យមន្ទីរពេទ្យ និងកន្លែងអាជីវកម្មនានាត្រូវបញ្ជូនមនុស្សទៅចាត់ការ បើទោះមិនសូវទទួលបានលទ្ធផលល្អ៕

June 26, 2023