អចលនទ្រព្យ

ថៃនឹងបញ្ចេញគោលនយោបាយជំរុញការទិញផ្ទះស្នាក់នៅ

ក្រសួងហិរញ្ញវត្ថុថៃ ឱ្យដឹងថា ប្រទេសនេះនឹងបញ្ចេញគោលនយោបាយថ្មីជាច្រើន ដែលគាំទ្រដល់ទីផ្សារអចលនទ្រព្យ ដើម្បីរួមចំណែកស្ដារសេដ្ឋកិច្ចជាតិ។

ក្រសួងហិរញ្ញវត្ថុថៃ គ្រោងនឹងដាក់សំណើស្ដីពីការបន្ថយការចំណាយទៅលើសេវាផ្ទេរសិទ្ធិកាន់កាប់អចលនទ្រព្យ ពី 2% ចុះមកនៅត្រឹម 0.01% សម្រាប់ផ្ទះដែលមានតម្លៃដល់ 7 លានបាត (ប្រហែល 190,890 ដុល្លារអាម៉េរិក) ជូនគណៈរដ្ឋមន្ត្រីនាពេលខាងមុខ។

ទន្ទឹមនឹងនេះ ថៃក៏អាចនឹងបន្ធូរបន្ថយពន្ធចំពោះអ្នកដែលចង់សាងសង់ផ្ទះ ព្រមទាំងបន្ថយអត្រាការប្រាក់ចំពោះអ្នកមានចំណូលទាបដែលចង់ខ្ចីប្រាក់ទិញផ្ទះផងដែរ។

ស្ថាប័នខាងលើក៏នឹងដាក់សំណើដើម្បីធ្វើវិសោធនកម្មច្បាប់ដែលទាក់ទងនឹងសិទ្ធិកាន់កាប់ផ្ទះរបស់ជនបរទេស។ ក្នុងនោះ រយៈពេលនៃការជួលផ្ទះ អាចនឹងត្រូវបានបន្ថែមសុពលភាពពី 30 ឡើងដល់ 99 ឆ្នាំ ព្រមទាំងអាចអនុញ្ញាតឱ្យជនបរទេសទិញផ្ទះស្នាក់នៅប្រភេទខ្លះទៀតផង។

ក្រុមហ៊ុនទិន្នន័យ Statista (អាល្លឺម៉ង់) បានគណនាឃើញថា ទំហំទីផ្សារអចលនទ្រព្យនៅប្រទេសថៃ នឹងកើនឡើងដល់ជាង 2.5 ទ្រីលាន (2,500,000,000,000) ដុល្លារអាម៉េរិក ក្នុងឆ្នាំនេះ។ ក្នុងនោះ ទីផ្សារផ្ទះស្នាក់នៅមានតម្លៃសរុបជាង 2 ទ្រីលានដុល្លារ៕

April 9, 2024

ចិន ចាកផុតពីបញ្ហាបរិត្តផរណា ដែលជួយបន្ធូរបន្ថយសម្ពាធលើសេដ្ឋកិច្ច

ជាលើកដំបូងក្រោយរយៈពេលជិតកន្លះឆ្នាំ តម្លៃទំនំនិញប្រើប្រាស់នៅប្រទេសចិន បានកើនឡើងជាថ្មី ជួយឱ្យសេដ្ឋកិច្ចប្រទេសនេះចាកផុតពីបរិត្តផរណា។

កាលពីថ្ងៃទី 09 មីនា វិទ្យាស្ថានជាតិស្ថិតិចិន ប្រកាសទិន្នន័យឱ្យដឹងថា សន្ទស្សន៍ថ្លៃទំនិញ (CPI) ប្រទេសនេះ កើន 0.7% ក្នុងខែកុម្ភៈ។ នេះគឺជាលើកដំបូងក្នុងអំឡុងជិតកន្លះឆ្នាំ ដែល CPI ចិន កើនឡើង។

មុននោះ ប្រទេសចិនបានឃើញបរិត្តផរណាក្នុងរយៈពេល 4 ខែបន្តបន្ទាប់។ ខែមករា ឆ្នាំ 2024 CPI ចិន ធ្លាក់ចុះ 0.8% ដែលនេះគឺជាជាតួលេខធ្លាក់ចុះជ្រៅបំផុតក្នុងរង្វង់ 15 ឆ្នាំកន្លង។

បរិត្តផរណា (ពាក្យអង់គ្លេសថា Deflation) គឺជាពាក្យសំដៅទៅលើការធ្លាក់ថ្លៃជារួមរបស់ទំនិញ និងសេវាកម្ម។ បរិត្តផរណា គឺជាការដកចំនួនរូបិយវត្ថុមួយភាគ ចេញពីទីផ្សារដែលលើសចំនួនត្រូវការចរាចរណ៍របស់សាច់ប្រាក់ ដើម្បីធ្វើឲ្យចំនួនរូបិយវត្ថុសមាមាត្រនឹងតម្រូវការចាំបាច់សម្រាប់ចរាចរណ៍។ នេះមិនមែនជាប្រការល្អសម្រាប់សេដ្ឋកិច្ចឡើយ ព្រោះថា នៅពេលអ្នកប្រើប្រាស់ និងក្រុមហ៊ុននានាពន្យារពេលលើការផ្អាកការចំណាយដើម្បីរង់ចាំទំនិញ ឬសេវាកម្មធ្លាក់ថ្លៃបន្ថែមទៀត សកម្មភាពសេដ្ឋកិច្ចនឹងត្រូវរឹតត្បិត។

ធៀបនឹងខែមុន CPI ចិន ក្នុងខែកុម្ភៈបានកើន 1%។ ល្បឿននេះខ្ពស់ជាងការព្យាកររបស់ក្រុមអ្នកសេដ្ឋកិច្ចដែលត្រូវបានចុះផ្សាយដោយ Reuters។

តួលេខថ្មីបំផុតនេះបានបន្ថយសម្ពាធមួយផ្នែកសម្រាប់សេដ្ឋកិច្ចចិន នៅក្នុងស្ថានភាពតម្រូវការក្នុងស្រុកធ្លាក់ចុះ អចលនទ្រព្យមិនទាន់ចាកផុតពីវិបត្តិ និងបំណុលរបស់រដ្ឋនៅតែស្ថិតក្នុងកម្រិតខ្ពស់៕

March 10, 2024

ក្រុមហ៊ុនមួយរបស់ឥណ្ឌូណេស៊ី ចាប់អារម្មណ៍លើវិស័យមួយចំនួននៅកម្ពុជា

(ភ្នំពេញ) – ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យលោក Jonh Riady នាយកប្រតិបត្តិរបស់ក្រុមហ៊ុន Lippo Group និងសហការី អញ្ជើញចូលជួបសម្ដែងការគួរសម និងពិភាក្សាការងារ។

យោងតាម ក្រុមប្រឹក្សាអភិវឌ្ឍន៍កម្ពុជា (CDC) ក្នុងជំនួបនេះ លោក Jonh Riady បានបង្ហាញចំណាប់អារម្មណ៍លើវិស័យមួយចំនួននៅកម្ពុជា រួមមានជាអាទិ៍ វិស័យអចលនទ្រព្យ ផ្សារទំនើប សុខាភិបាល និងសេវាកម្មហិរញ្ញវត្ថុ-ធនាគារជាដើម។

ក្រុមហ៊ុន Lippo Group ជាក្រុមហ៊ុនមានបទពិសោធន៍ប្រមាណ 60 ឆ្នាំ ក្នុងវិស័យអចលនទ្រព្យ ការលក់រាយ បដិសណ្ឋារកិច្ចនិងការកម្សាន្ត ការថែទាំសុខភាព ការអប់រំ ប្រព័ន្ធផ្សព្វផ្សាយនិងព័ត៌មាន ទូរគមនាគមន៍ បច្ចេកវិទ្យាឌីជីថល និងសេវាកម្មហិរញ្ញវត្ថុជាដើម។ នេះបើតាម CDC ចេញផ្សាយនាយប់ថ្ងៃទី 19 កុម្ភៈ 2024៕

February 19, 2024

ផ្ទះលក់មិនដាច់នៅប្រទេសចិន ច្រើនគ្រប់គ្រាន់សម្រាប់មនុស្ស 150 លាននាក់

ផ្ទះដែលលក់មិនទាន់ដាច់នៅប្រទេសចិន មានទំហំសរុបជិត 5 ពាន់លានម៉ែត្រការ៉េ បើគិតត្រឹមចុងឆ្នាំកន្លង ហើយផ្ទៃក្រឡានេះអាចឱ្យមនុស្សរស់នៅបាន 150 លាននាក់។ នេះបើតាមការផ្សាយរបស់ទំព័រ Nikkei។

បច្ចុប្បន្ន ដោយសារតែជួបបញ្ហាហិរញ្ញវត្ថុ វិនិយោគិនទាំងឡាយក្នុងវិស័យអចលនទ្រព្យនៅប្រទេសចិន នាំគ្នាលក់បញ្ចុះតម្លៃជាបន្តបន្ទាប់។ ការប្រកួតប្រជែងតម្លៃនេះ កើតឡើងនៅពេលទីផ្សារអចលនទ្រព្យបានឈានចូលដល់ដំណាក់កាលគ្រប់គ្រាន់។ អត្រានៃអចលនទ្រព្យដែលនៅសល់ពីការលក់ គឺជិត 5 ពាន់លានម៉ែត្រការ៉េ កាលពីចុងឆ្នាំ 2023។ Nikkei ឧទាហរណ៍ថា ខុនដូ ឬផ្ទះមួយខ្នងដែលមានទំហំ 100 ម៉ែត្រការ៉េ និងមានមនុស្ស 3 នាក់រស់នៅ នោះផ្ទៃក្រឡាសរុបរបស់ផ្ទះដែលកំពុងសល់គឺអាចឱ្យមនុស្សរស់នៅបាន 150 លាននាក់ ដែលប្រហាក់ប្រហែលនឹងផ្ទះ 50 លានខ្នង។

ប្រទេសចិនកំពុងតែប្រឈមមុខនឹងផលវិបាករបស់ «ប៉ោងប៉ោងអចលនទ្រព្យ»។ កំណើននៃការសាងសង់ផ្ទះបានថយចុះ បន្ទាប់ពីប្រទេសនេះចាប់ផ្ដើមរឹតបន្តឹងគោលការណ៍នានាក្នុងឆ្នាំ 2020 ប៉ុន្តែចំនួនផ្ទះដែលលក់មិនដាច់នៅតែមានកម្រិតខ្ពស់ ព្រោះតែការលក់ចេញមានភាពយឹតយ៉ាវ។

China Index Academy ព្យាករថា សកម្មភាពទីផ្សារអាចនឹងប្រសើរឡើងវិញ នៅក្រោយរដូវបុណ្យចូលឆ្នាំប្រពៃណីជាតិចិន ដែលចាប់ផ្ដើមពីថ្ងៃទី 10 ដល់ 17 កុម្ភៈខាងមុខ។ ក៏ប៉ុន្តែ ក្រុមអ្នកវិភាគយល់ថា បញ្ហាបំណុលរបស់ក្រុមហ៊ុន Evergrande នៅតែជាស្រមោលអាក្រក់ក្នុងវិស័យអចលនទ្រព្យនៅប្រទេសចិន៕

February 8, 2024

នាយករដ្ឋមន្ត្រីថៃ ប្រកាសទ្រព្យសម្បត្តិជាសាធារណៈ

នាយករដ្ឋមន្ត្រីថៃ លោក Srettha ប្រកាសថា លោកមានទ្រព្យជិត 19 លានដុល្លារអាម៉េរិក ក្នុងនោះមានរថយន្តទំនើបមួយគ្រឿងដែលមានតម្លៃជាង 1.4 លានដុល្លារអាម៉េរិក និងនាឡិកាចំនួន 38 គ្រឿងផងដែរ។

អង្គភាពជាតិប្រឆាំងអំពើពុករលួយថៃ (NACC) កាលពីថ្ងៃទី 28 ធ្នូ បានឱ្យដឹងថា នាយករដ្ឋមន្ត្រី Srettha Thavisin និងជាអតីតអ្នកជំនួញផ្នែកអចលនទ្រព្យ មានទ្រព្យសម្បត្តិតម្លៃជិត 660 លានបាត (ជាង 18.9 លានដុល្លារអាម៉េរិក)។ ច្បាប់ប្រឆាំងអំពើពុករលួយរបស់ប្រទេសថៃ តម្រូវឱ្យមន្ត្រីរាជការប្រកាសទ្រព្យសម្បត្តិ និងបំណុលរបស់ខ្លួន និងភរិយា/ស្វាមី ក្នុងរង្វង់ 60 ថ្ងៃ រាប់ចាប់ពីថ្ងៃចូលកាន់តំណែង។

យោងតាម NACC នាយករដ្ឋមន្ត្រីថៃមានសាច់ប្រាក់សុទ្ធមួយលានបាត (ជាង 28,700 ដុល្លារអាម៉េរិក), ជិត 69 លានបាត (ជាង 1.9 លានដុល្លារ) ក្នុងធនាគារចំនួន 47 ស្ថាប័ន និងជាង 1.3 លានបាត (ជាង 37,300 ដុល្លារ) កំពុងវិនិយោគ។ លោកក៏មានដីដែលមានតម្លៃជាង 158 លានបាត (ជាង 4.5 លានដុល្លារ) នៅបាងកក។

នាយករដ្ឋមន្ត្រីថ្មីរបស់ថៃ ក៏ជាម្ចាស់អគារមួយចំនួនដែលមានតម្លៃសរុបជាង 156 លានបាត (ជាង 4.4 លានដុល្លារ) ក្នុងនោះក៏មានខុនដូនៅតំបន់លម្ហែកាយ Hua Hin និងផ្ទះបីជាន់មួយកន្លែងនៅក្នុងខណ្ឌ Khlong Toei នៅរាជធានីបាងកកផងដែរ។

អំពីយានជំនិះ លោក Srettha មានរថយន្តទំនើប Aston Martin DB5 តម្លៃ 50 លានបាត (ជាង 1.4 លានដុល្លារ)។ លោកក៏នៅមាននាឡិកា 38 គ្រឿង ដែលមានតម្លៃជិត 122 លានបាត (ជាង 3.5 លានដុល្លារ)។ ចំណែកបំណុលវិញ នាយករដ្ឋមន្ត្រីថៃកំពុងជំពាក់ជាង 10 លានបាត (ជាង 287,000 ដុល្លារ)។

នាយករដ្ឋមន្ត្រីថ្មីរបស់ថៃ ក៏ជាម្ចាស់អគារមួយចំនួនដែលមានតម្លៃសរុបជាង 156 លានបាត (ជាង 4.4 លានដុល្លារ) ក្នុងនោះក៏មានខុនដូនៅតំបន់លម្ហែកាយ Hua Hin និងផ្ទះបីជាន់មួយកន្លែងនៅក្នុងខណ្ឌ Khlong Toei នៅរាជធានីបាងកកផងដែរ។

អំពីយានជំនិះ លោក Srettha មានរថយន្តទំនើប Aston Martin DB5 តម្លៃ 50 លានបាត (ជាង 1.4 លានដុល្លារ)។ លោកក៏នៅមាននាឡិកា 38 គ្រឿង ដែលមានតម្លៃជិត 122 លានបាត (ជាង 3.5 លានដុល្លារ)។ ចំណែកបំណុលវិញ នាយករដ្ឋមន្ត្រីថៃកំពុងជំពាក់ជាង 10 លានបាត (ជាង 287,000 ដុល្លារ)។

NACC ឱ្យដឹងថា ប្រាក់ចំណូលប្រចាំឆ្នាំរបស់លោក Srettha រួមមានប្រាក់បៀវត្សរ៍ ប្រាក់រង្វាន់ជាង 153 លានបាត (4.3 លានដុល្លារ) រួមនឹងប្រាក់ឧបត្ថម្ភជាច្រើនផ្សេងទៀត។ ជារៀងរាល់ឆ្នាំ លោកចំណាយប្រហែល 36.5 លានបាត (ជាងមួយលានដុល្លារ) សម្រាប់ខ្ទង់ចំណាយផ្ទាល់ខ្លួន គ្រួសារ ពន្ធអាករ និងសប្បុរសធម៌។

លោក Srettha អាយុ 61 ឆ្នាំ កាលពីខែសីហា 2023 បានក្លាយជាមេដឹកនាំថ្មីរបស់ប្រទេសថៃ បញ្ចប់ស្ថានភាពជាប់គាំងដែលបានអូសបន្លាយអស់ច្រើនខែ ក្រោយពីការបោះឆ្នោតកាលពីខែឧសភា៕

December 30, 2023

ហេតុអ្វីសហរដ្ឋអាម៉េរិក គេចផុតពីវិបត្តិសេដ្ឋកិច្ច?

ការព្យាករជាច្រើនបានបង្ហាញថា សហរដ្ឋអាម៉េរិក អាចធ្លាក់ទៅក្នុងវិបត្តិសេដ្ឋកិច្ចនៅក្នុងឆ្នាំ 2023 ប៉ុន្តែពេលនេះ ស្ថានការណ៍បានផ្លាស់ប្ដូរទាំងស្រុង។

រយៈពេលប៉ុន្មានឆ្នាំមកនេះ Wall Street តែងតែយល់ថា សេដ្ឋកិច្ចអាម៉េរិកនឹងធ្លាក់ទៅក្នុងវិបត្តិ មុនពេលរដូវបោះឆ្នោតជ្រើសរើសប្រធានាធិបតីមកដល់នៅចុងឆ្នាំ 2024។ ក្នុងដំណាក់កាលនោះដែរ ក៏មានសេដ្ឋវិទូជាច្រើនបានព្យាករថា អាម៉េរិកជិតជួបវិបត្តិសេដ្ឋកិច្ច។

ក៏ប៉ុន្តែ មួយឆ្នាំក្រោយមក ពួកគេបានផ្លាស់ប្ដូរយោបល់។ ថ្វីបើពុំមានអ្វីជារឿងប្រាកដ ប៉ុន្តែលទ្ធភាពដែល សហរដ្ឋអាម៉េរិក ជួបវិបត្តិសេដ្ឋកិច្ចក្នុងឆ្នាំរយៈពេលខ្លី កំពុងតែថយចុះបន្តិចម្ដងៗ។

ដូច្នេះ តើហេតុអ្វីបានជា សហរដ្ឋអាម៉េរិក គេចផុតពីវិបត្តិសេដ្ឋកិច្ច?

ក្នុង 20 ខែកន្លង ធនាគារកណ្ដាលអាម៉េរិក (Fed) បានធ្វើគ្រប់យ៉ាងដើម្បីគ្រប់គ្រងសេដ្ឋកិច្ចអាម៉េរិក ក្នុងបំណងកាត់បន្ថយអតិផរណា។ ពួកគេយល់ច្បាស់ថា ប្រការនេះអាចធ្វើឱ្យមនុស្សរាប់លាននាក់បាត់បង់ការងារ។

ក្នុងអំឡុងពេលនោះ Fed បានដំឡើងការប្រាក់ 11 លើក។ ប៉ុន្តែ Fed មិនបានដំឡើងការប្រាក់លឿន និងខ្លាំងដូចកាលពី 40 ឆ្នាំមុន។ កាលពីទសវត្សរ៍ឆ្នាំ 1980 Fed បានដំឡើងការប្រាក់យ៉ាងខ្ពស់ ធ្វើឱ្យសេដ្ឋកិច្ចធ្លាក់ក្នុងវិបត្តិអាក្រក់បំផុតនៅក្នុងអំឡុង 50 ឆ្នាំ។

Fed ក៏បានលក់ចោលមូលបត្របំណុលរាប់ទ្រីលានដុល្លារអាម៉េរិក ដែលបានទិញក្នុងរយៈពេលច្រើនឆ្នាំមុននោះ។ ទង្វើនេះបានកាត់បន្ថយតម្រូវការមូលបត្របំណុលរបស់រដ្ឋាភិបាល នាំឱ្យអត្រាការប្រាក់កើនឡើងខ្ពស់។ អត្រាការប្រាក់នៃកម្ចីប្រើប្រាស់ កម្ចីទិញផ្ទះ បណ្ណឥណទានជាដើម ក៏ត្រូវបានអូសឡើងទៅតាម ធ្វើឱ្យទីផ្សារអចលនទ្រព្យអាម៉េរិកធ្លាក់ចុះ។

ទោះយ៉ាងនេះក៏ដោយ ក្រោយពីអនុវត្តគោលនយោបាយគ្រប់គ្រងសេដ្ឋកិច្ចបានពីរឆ្នាំ Fed ក៏ធ្វើបានសម្រេចនូវអ្វីដែលគ្រប់គ្នាគិតថាមិនអាចទៅរួច នោះគឺការគ្រប់គ្រងអតិផរណាបាន ដោយមិនរុញសេដ្ឋកិច្ចឱ្យធ្លាក់ក្នុងវិបត្តិ បើទោះមិនអាចបំពេញចិត្តមនុស្សគ្រប់រូបបានក៏ដោយ៕

December 22, 2023

កំណើនសេដ្ឋកិច្ចអាស៊ីអាគ្នេយ៍នៅឆ្នាំ 2024 ត្រូវបានព្យាករថា នឹងប្រសើរឡើង

វាយតម្លៃអំពីសក្ដានុពលនៃកំណើនសេដ្ឋកិច្ចរបស់តំបន់អាស៊ីអាគ្នេយ៍ ក្រុមអ្នកវិភាគអន្តរជាតិព្យាករថា កំណើនសេដ្ឋកិច្ចរបស់តំបន់នេះ នឹងប្រសើរឡើងវិញនៅឆ្នាំក្រោយ ប៉ុន្តែម៉ាក្រូសេដ្ឋកិច្ចមិនល្អនឹងបង្កផលប៉ះពាល់ផ្សេងទៀតដល់បណ្ដាប្រទេស។

ឆ្នាំ 2024 សេដ្ឋកិច្ចអាម៉េរិក និងអឺរ៉ុប ត្រូវបានព្យាករថា អាចនឹងនៅទ្រឹង ស្របពេលដែលកំណើនសេដ្ឋកិច្ចចិនអាចនឹងបន្ថយល្បឿន ដោយសារតែឱនភាពនៃវិស័យអចលនទ្រព្យ និងតម្រូវការប្រើប្រាស់លក្ខណៈបុគ្គល។

អង្គការស្រាវជ្រាវ AMRO បានព្យាករថា អតិផរណាក្នុងតំបន់អាស៊ីអាគ្នេយ៍ អាចនឹងថយចុះក្នុងឆ្នាំ 2024 ប៉ុន្តែបានព្រមានថា តម្លៃស្បៀងអាហារ និងថាមពលកើនឡើង អាចបង្កហានិភ័យអតិផរណាដែលឃើញច្បាស់ជាងមុន។ ការថយចុះនៃសេដ្ឋកិច្ចចិន កំពុងបង្កផលប៉ះពាល់ដល់វិស័យផលិតសកល ពិសេសគឺបណ្ដាប្រទេសដែលពឹងផ្អែកលើទីផ្សារចិន។

ប្រទេសមួយចំនួនក្នុងតំបន់អាស៊ីអាគ្នេយ៍ មានជាអាទិ៍ សិង្ហបុរី ថៃ និងឥណ្ឌូណេស៊ី បាន និងកំពុងទទួលបទពិសោធន៍ពីកំណើនសេដ្ឋកិច្ចយឺត ដោយសារតែតម្រូវការពីខាងក្រៅធ្លាក់ចុះ។ ក៏ប៉ុន្តែ ម៉ាឡេស៊ី ហ្វ៊ីលីពីន និងវៀតណាម មានកំណើនសេដ្ឋកិច្ចល្អជាងការរំពឹងទុក ព្រោះតែការនាំចេញទំនិញមានការកើនឡើង ខណៈវដ្ដនៃពាណិជ្ជកម្មសកលក៏កំពុងងើបឡើងបណ្ដើរៗ។

November 24, 2023

សេដ្ឋកិច្ចកម្ពុជា នឹងមានកំណើន 5.8% ក្នុងឆ្នាំ 2024 ខណៈឆ្នាំ 2023 មានកំណើន 5.4%

ធនាគារពិភពលោក (WB) បានទម្លាក់កំណើនសេដ្ឋកិច្ចកម្ពុជា ពី 5.5% មកនៅត្រឹម 5.4% សម្រាប់ឆ្នាំនេះ នៅក្នុងរបាយការណ៍ចុងក្រោយស្តីពីបច្ចុប្បន្នភាពសេដ្ឋកិច្ចរបស់កម្ពុជា ចេញផ្សាយនៅថ្ងៃទី22 វិច្ឆិកា 2023។

ទោះបីជាវិស័យទេសចរណ៍ និងសេវាដទៃទៀតបានងើបឡើងវិញ ប៉ុន្តែ ធនាគារពិភពលោក បានលើកពីកត្តារួមផ្សំរវាងសម្ពាធពីខាងក្រៅ និងបញ្ហាប្រឈមផ្នែករចនាសម្ព័ន្ធ ដែលបានដាក់សម្ពាធលើកំណើនសេដ្ឋកិច្ចកម្ពុជា។

ប្រសិនបើការកែទម្រង់រចនាសម្ព័ន្ធដើរអមគ្នាជាមួយការវិនិយោគលើហេដ្ឋារចនាសម្ព័ន្ធ និងកាលានុវត្តភាពពាណិជ្ជកម្ម នោះវានឹងនាំឱ្យកំណើនសេដ្ឋកិច្ចបន្តបង្កើនល្បឿននៅក្នុងរយៈពេលមធ្យម និងវែង។ នេះបើតាមអនុសាសន៍របស់ WB។

«កម្ពុជាចាំបាច់ត្រូវជួយដល់វិស័យឯកជនឱ្យបំពេញមុខងារជាក្បាលម៉ាស៊ីនលើកកម្ពស់កំណើនសេដ្ឋកិច្ច» លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជា លើកឡើងដូច្នេះ និងបន្តថា «កិច្ចការនេះអាចសម្រេចបាន ដោយការធ្វើសកម្មភាពភ្លាមៗនៅក្នុងការធ្វើឱ្យប្រសើរឡើងនូវការបំពេញការងាររបស់វិស័យសាធារណៈ» ខណៈការរក្សាស្ថិរភាពហិរញ្ញវត្ថុក៏ជាអាទិភាពមួយដែរ។

WB សង្កត់ធ្ងន់ថា កំណើនសេដ្ឋកិច្ចអាចនៅតែរងផលប៉ះពាល់បន្ថែមទៀតពីការចុះខ្សោយនៃតម្រូវការពិភពលោក ឬពីការឡើងថ្លៃប្រេងឥន្ធនៈ និងថ្លៃស្បៀងអាហារកើនឡើងវិញ។ ចំណែកនៅក្នុងស្រុក ការកើនឡើងនៃបំណុលគ្រួសារ និងឥណទានក្នុងស្រុកនៅក្នុងវិស័យអចលនទ្រព្យ នៅតែជាហានិភ័យដដែល។

WB ក៏បានផ្ដល់អនុសាសន៍អំពីកំណែទម្រង់រចនាសម្ព័ន្ធ ដែលអាចជួយកម្ពុជាជំរុញឱ្យមានកំណើនប្រកបដោយចីរភាព រួមមាន ការកែលម្អបរិយាកាសធុរកិច្ចដើម្បីបង្កើនផលិតភាព និងការប្រកួតប្រជែង, ការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងបណ្តាញតភ្ជាប់ផ្លូវ និងការធ្វើឱ្យប្រសើរឡើងនូវជំនាញរបស់កម្លាំងពលកម្ម ។

កាលពីឆ្នាំ 2022 សេដ្ឋកិច្ចរបស់កម្ពុជាមានកំណើន 5.2% ខណៈឆ្នាំ 2023 នេះ ត្រូវបាន WB ព្យាករថា នឹងមានកំណើន 5.4% ថយចុះបន្តិចបើធៀបនឹង 5.5% ដែលត្រូវបានព្យាករកាលពីខែឧសភា។ WB ក៏បានព្យាករថា កំណើនសេដ្ឋកិច្ចកម្ពុជា នឹងឡើងដល់ 5.8% ក្នុងឆ្នាំ 2024 និង 6.1% ក្នុងឆ្នាំ 2025៕

November 23, 2023

កម្ពុជា លើកទឹកចិត្តឱ្យធនាគារ រៀបចំឥណទានឡើងវិញចំពោះអ្នកទិញអចលនទ្រព្យដែលរងផលប៉ះពាល់ពីវិបត្តិសេដ្ឋកិច្ច

(ភ្នំពេញ) – គ្រឹះស្ថានធនាគារ និងហិរញ្ញវត្ថុទទួលបានការលើកទឹកចិត្តពី ប្រមុខរាជរដ្ឋាភិបាលកម្ពុជា ទាក់ទងនឹងការរៀបចំឥណទានឡើងវិញ ជូនដល់អតិថិជនរបស់ខ្លួនដែលបានខ្ចីប្រាក់ដើម្បីទិញអចលនទ្រព្យ និងកំពុងរងផលប៉ះពាល់ដោយសារវិបត្តិសេដ្ឋកិច្ច។

«លើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខធមស 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន់» សម្តេច ហ៊ុន ម៉ាណែត បានថ្លែងដូច្នេះនៅឯវិមានសន្ដិភាព កាលពីព្រឹកថ្ងៃទី 13 វិច្ឆិកា 2023 ក្នុងឱកាសអញ្ជើញជាអធិបតីនៃវេទិកា «រាជរដ្ឋាភិបាល -ផ្នែកឯកជន» លើកទី 19 ដើម្បីបើកការជជែកលើបញ្ហាធុរកិច្ចនៅកម្ពុជា។

ដោយសារតែវិស័យអចលនទ្រព្យបាន និងកំពុងរងផលប៉ះពាល់ធ្ងន់ធ្ងរពីវិបត្តិសុខភាព និងវិបត្តិផ្សេងៗទៀត រាជរដ្ឋាភិបាលក៏ដាក់ចេញនូវវិធានការមួយចំនួនដើម្បីចូលរួមដោះស្រាយ។ វិធានការទាំងនេះ រួមមានដូចខាងក្រោម៖

បន្តពន្យារពេលការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ 2024 សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបាននឹងកំពុងប្រតិបត្តិការគម្រោងអភិវឌ្ឍន៍លំនៅឋាន ដែលមានអាជ្ញាបណ្ណអចលនវត្ថុផ្តល់ដល់និយ័តករអាជីវកម្មអចលនវត្ថុ និងបញ្ចាំ។ល។
បង្កើនរយៈពេលនៃការបង់ពន្ធជាកញ្ចប់តាមដំណាក់កាលពី 12 ខែ ដល់ 18 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធតិចជាងមួយលានដុល្លារ និងពី 24 ខែ ដល់ 38 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធលើសពីមួយលានដុល្លារ។
ក្រុមហ៊ុនអភិវឌ្ឍន៍លំនៅឋានជាបុរីថ្មី ឬក្រុមហ៊ុនមានគម្រោងអភិវឌ្ឍន៍លំនៅឋានជាបុរី ដែលមិនទាន់បានអភិវឌ្ឍន៍ត្រូវបង់ពន្ធស្របតាម និតិវិធីជាព័ត៌មានរបបពិត និងត្រូវកាន់បញ្ជីគណនីឱ្យបានត្រឹមត្រូវ។
បន្តពន្យារពេលការអនុវត្តលើពន្ធចំណេញមូលធន សម្រាប់តែវិស័យអចលនទ្រព្យរហូតដល់ដំណាច់ឆ្នាំ2024។
បន្តលើកលែងពន្ធប្រថាប់ត្រាលើការផ្ទេរសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរី និងដែលមានតម្លៃក្រោម ឬស្មើនឹង 7 ម៉ឺនដុល្លាររហូតដល់ដំណាច់ឆ្នាំ 2024។
លើកទឹកចិត្ត និងស្នើឱ្យគ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខ 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន។
លើកលែងការផាកពិន័យផ្សេងៗចំពោះគម្រោងអភិវឌ្ឍន៍លំនៅឋានជាបុរី ប៉ុន្តែក្រុមហ៊ុនអភិវឌ្ឍចាំបាច់ត្រូវបំពេញកាតព្វកិច្ចសមស្របតាមប្រកាសស្តីពីការគ្រប់គ្រងអាជីវកម្មអភិវឌ្ឍអចលនវត្ថុ។
ពន្យារពេលអនុវត្តរហូតដល់ដំណាច់ឆ្នាំ 2023 លើសេចក្តីប្រកាសស្តីពីកាតព្វកិច្ចដាក់រាយការណ៍ហិរញ្ញវត្ថុឱ្យសវកម្មឯករាជ្យ ចេញដោយក្រសួងសេដ្ឋកិច្ច និងហិរញ្ញវត្ថុ។

រាជរដ្ឋាភិបាលក៏បានបង្កើតក្រុមការងារអន្តរក្រសួងចំនួនពីរ ដើម្បីតាមដាន ដោះស្រាយបញ្ហាប្រឈម នៅក្នុងវិស័យនេះអចលនទ្រព្យផងដែរ។

សម្តេចធិបតី ក៏បានដាក់ចេញនូវវិធានការមួយចំនួនទៀត ដើម្បីជួយដល់វិស័យអចលទ្រព្យ និងសំណង់ ក្នុងនោះសម្រាប់ផ្ទះមានតម្លៃលើស 7 ម៉ឺនដុល្លារអាមេរិក ត្រូវបានអនុញ្ញាតឱ្យដកតម្លៃ 7 ម៉ឺនដុល្លារអាមេរិកចេញពីមូលដ្ឋាន នៃការគិតពន្ធប្រថាប់ត្រា ក៏ដូចជាការលើកលែងពន្ធប្រថាប់ត្រាដល់អចលនទ្រព្យដែលត្រូវបានទិញ-លក់ក្នុងតម្លៃក្រោម 7 ម៉ឺនដុល្លារ រហូតដល់ឆ្នាំ 2024 ផងដែរ៕

November 14, 2023

ទ្រព្យពុករលួយជាង 386,000,000,000,000 ដុង ត្រូវបានវៀតណាមរឹបអូសអំឡុងពាក់កណ្ដាលអាណត្តិដំបូងនៃនីតិកាលទី15

(វៀតណាម) – យោងតាមស្ថាប័ននានារបស់សភា បេសកកម្មរឹបអូសយកទ្រព្យដែលបានពីអំពើពុករលួយមានការប្រែប្រួលវិជ្ជមាន ក្នុងនោះស្ថាប័នមានសមត្ថកិច្ចរឹបអូសប្រាក់បានជាង 386,000,000,000,000 ដុង។

រាប់ចាប់ពីដើមអាណត្តិសភានីតិកាលទី 15 (2021-2026) វៀតណាមបានរកឃើញអំពើពុករលួយចំនួន 865 ករណី ក្នុងនោះមានបុគ្គល 1374 នាក់ត្រូវបានរកឃើញថាបានរលោភច្បាប់ និងសំណងគិតជាប្រាក់ជាង 972 ពាន់លានដុង (ប្រហែល 39.8 លានដុល្លារអាម៉េរិក)។ នេះបើតាមទំព័រសារព័ត៌មានវៀតណាម Sai Gon Giai Phong (SGGP) ចុះផ្សាយកាលពីល្ងាចថ្ងៃទី 05 តុលា 2023។

ពិសេសជាងនេះ មានមន្ត្រីរដ្ឋការចំនួន 934 រូបត្រូវបានកាត់ទោសពីបទរំលោភគោលការណ៍រដ្ឋ។ យោងតាមស្ថាប័ននានារបស់សភា បេសកកម្មរឹបអូសយកទ្រព្យដែលបានពីអំពើពុករលួយមានការប្រែប្រួលវិជ្ជមាន ក្នុងនោះស្ថាប័នមានសមត្ថកិច្ចរឹបអូសប្រាក់ពុករលួយបានជាង 386,000,000,000,000 (386 ទ្រីលាន) ដុង ដែលប្រហែលនឹង 15.8 ពាន់លានដុល្លារអាម៉េរិក, អចលនទ្រព្យចំនួន 249 កន្លែង និងភាគហ៊ុនជាង 56 លានហ៊ុន។

ការរឹបអូសទ្រព្យពុករលួយធំៗ ដូចករណីក្រុមហ៊ុន Viet A ក្រុមមន្ត្រីពុករលួយដែលជាប់ពាក់ព័ន្ធ បានស្ម័គ្រចិត្តប្រគល់ប្រាក់ដែលបានពីអំពើខុសច្បាប់ ខណៈដែលសមត្ថកិច្ចរឹបអូសទ្រព្យបាន 1.6 ទ្រីលានដុង (65.5 លានដុល្លារអាម៉េរិក) គ្រាដែលករណីស្រដៀងនេះនៅតែមិនទាន់ត្រូវបានចាត់ការ។

សភាកុម្មុយនីស្តឯកបក្សវៀតណាមដែលបច្ចុប្បន្នមានសមាជិកជិត 500 រូប ក៏បានស្នើឱ្យរដ្ឋាភិបាលបញ្ជាក់លំអិតអំពីលទ្ធផលនៃការស៊ើបអង្កេត ដោះស្រាយការតវ៉ា ចោទប្រកាន់ និងបង្ហាញឱ្យបានច្បាស់ថា ស្ថាប័ន អង្គភាព និងវិស័យណាខ្លះដែលងាយកើតមានអំពើពុករលួយផងដែរ៕

October 5, 2023

ប្រាំបួនខែដំបូងក្នុងឆ្នាំនេះ ទុន FDI ជាងម្ភៃពាន់លានដុល្លារបានហូរចូលវៀតណាម

(វៀតណាម) – យោងតាមទិន្នន័យពីនាយកដ្ឋានវិនិយោគបរទេសនៃក្រសួងផែនការ និងវិនិយោគ គិតត្រឹមថ្ងៃទី 20 កញ្ញា 2023 ទុនវិនិយោគផ្ទាល់ពីបរទេស (FDI) សរុបដែលវៀតណាមទទួលបានគឺជិត 20.21 ពាន់លានដុល្លារអាម៉េរិក កើន 7.7% បើធៀបនឹង 9 ខែដំបូងនៃឆ្នាំ 2022។

ក្នុងចំណោមរំហូរទុន FDI នៅវៀតណាមក្នុង 9 ខែដំបូងនៃឆ្នាំ 2023 មានខ្ទង់វិនិយោគថ្មីចំនួន 2,254 គម្រោងដែលទទួលបានវិញ្ញាបនបត្រចុះបញ្ជីវិនិយោគ ដោយមានទុកសរុបជាង 10.23 ពាន់លានដុល្លារអាម៉េរិក កើន 43.6% បើធៀបនឹងដំណាក់កាលដូចគ្នាក្នុងឆ្នាំកន្លង។

គិតពីដើមឆ្នាំមកដល់បច្ចុប្បន្ន ទុន FDI ត្រូវបានវិនិយោគទៅលើវិស័យចំនួន 18 ក្នុងចំណោម 21 របស់វៀតណាម។ ក្នុងនោះ វិស័យឧស្សាហកម្មកែច្នៃ ផលិត ទទួលបានទុនបរទេសច្រើនជាងគេ ពោលគឺជាង 14 ពាន់លានដុល្លារអាម៉េរិក ស្មើនឹង 69.3% ធៀបនឹងទុនសរុបដែលត្រូវបានចុះបញ្ជី និងកើន 15.5% ខណៈវិស័យអចលនទ្រព្យ ឈរលំដាប់លេខពីរ ដោយទទួលបានទុកជិត 1.94 ពាន់លានដុល្លារ ស្មើនឹងជាង 9.6% ក្នុងចំណោមទុនដែលត្រូវបានចុះបញ្ជី ពោលគឺថយចុះ 45% បើធៀបនឹងដំណាក់កាលដូចគ្នាក្នុងឆ្នាំ 2022។

យោងតាមធនាគារអភិវឌ្ឍអាស៊ី (ADB) សេដ្ឋកិច្ចវៀតណាមមានភាពរឹងមាំ ហើយអាចងើបឡើងឆាប់រហ័សក្នុងពេលឆាប់ៗខាងមុខ។ ក្នុងរបាយការណ៍របស់ខ្លួន ADB ឱ្យដឹងថា កំណើនសេដ្ឋកិច្ចវៀតណាមនឹងកើន 5.8% ក្នុងឆ្នាំ 2023 និង 6% ក្នុងឆ្នាំ 2024 ថយចុះបន្តិចបើធៀបនឹង 6.5% និង 6.8% ដែលស្ថាប័ននេះបានព្យាករកាលខែមេសា 2023៕

September 29, 2023

ពន្ធលើអចលនទ្រព្យនៅប្រទេសមួយចំនួនក្នុងទ្វីបអាស៊ី

ពន្ធលើអចលនទ្រព្យគឺជាពន្ធមួយប្រភេទដែលបង្ហាញវត្តមានតាំងពីបុរាណរហូតដល់បច្ចុប្បន្ន ហើយតែងតែផ្ដោតទៅលើដីធ្លី និងសំណង់នៅលើដីធ្លី។ តាំងពីបណ្ដាឆ្នាំ 200 មុនគ្រិស្តសករាជ ដល់ឆ្នាំ 300 នៃគ្រិស្តសករាជ ជនជាតិរ៉ូម៉ាំងបានយកពន្ធលើដីធ្លី និងសំណង់នៅលើដី។ បច្ចុប្បន្ន ពន្ធលើអចលនទ្រព្យត្រូវបានអនុវត្តនៅក្នុងប្រទេសជាច្រើនលើពិភពលោក ដោយប្រើប្រាស់រូបមន្ត និងឈ្មោះផ្សេងៗគ្នា មានជាអាទិ៍ ពន្ធលើអចលនទ្រព្យប្រចាំឆ្នាំ ពន្ធលើការផ្ទេរសិទ្ធិកាន់កាប់អចលនទ្រព្យ ពន្ធលើការចុះបញ្ជីអចលនទ្រព្យ ពន្ធមរតក ពន្ធលើអំណោយដែលសំដៅលើអចលនទ្រព្យដែលជាមរតក ឬអំណោយជាដើម។

យោងតាមនិយមន័យដែលកំណត់ដោយមូលនិធិរូបិយវត្ថុអន្តរជាតិ (IMF) និងអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ (OECD) ពន្ធលើអចលនទ្រព្យគឺជាខ្ទង់ប្រាក់ដែលរដ្ឋប្រមូលតាមកាលកំណត់ ឬមិនតាមកាលកំណត់ ទាក់ទងនឹងការប្រើប្រាស់ កាន់កាប់ និងផ្ទេរសិទ្ធិកាន់កាប់អចលនទ្រព្យ។ គោលដៅដែលត្រូវជាប់ពន្ធនេះភាគច្រើនគឺជាផ្ទះ និងដី ប៉ុន្តែ អាចខុសគ្នាខ្លះទៅតាមប្រទេសនីមួយៗ។ ឧទាហេរណ៍ នៅប្រទេសចិន ពន្ធដែលទាក់ទងនឹងអចលនទ្រព្យរួមមាន ពន្ធលើការប្រើប្រាស់ដីក្រុង ពន្ធលើគេហដ្ឋាន ពន្ធលើអចលនទ្រព្យក្នុងក្រុង និងពន្ធលើការប្រើប្រាស់ដីកសិកម្មជាដើម។ នៅប្រទេសថៃ មុនឆ្នាំ 2016 អចលនទ្រព្យដែលជាប់ពន្ធរួមមាន ផ្ទះ ដី និងការអភិវឌ្ឍដីធ្លី។ល។

បច្ចុប្បន្ន ពន្ធលើអចលនទ្រព្យកាន់តែមានតួនាទីសំខាន់នៅក្នុងខ្ទង់ប្រាក់ចំណូលសរុបរបស់ប្រទេសនានា ដោយមានអត្រាជាមធ្យមពី 3 ទៅ 4% បើធៀបនឹងប្រាក់ចំណូលសរុបដែលបានពីពន្ធនៅក្នុងបណ្ដាប្រទេសអភិវឌ្ឍ ខណៈប្រទេសខ្លះដូចជប៉ុនជាដើម អត្រានេះឡើងជិតដល់ 8%។

ខាងក្រោមនេះគឺជាតារាងសមាមាត្រនៃចំណូលបានពីពន្ធលើអចលនទ្រព្យ ធៀបនឹងចំណូលសរុបដែលបានពីពន្ធនៅប្រទេសមួយចំនួនក្នុងទ្វីបអាស៊ី៖

ប្រទេស	2005	2006	2007	2008	2009	2010	2011	2012	2013	2014
ជប៉ុន	7.3	6.8	6.8	7.3	7.9	7.7	7.5	7	6.8	6.4
កូរ៉េខាងត្បូង	2.4	3.1	3.6	3.6	3.2	3.1	3.0	3.0	3.1	3.2
ឥណ្ឌូណេស៊ី	4.3	4.8	4.5	3.6	3.6	3.7	3.1	2.7	2.1	1.8
ម៉ាឡេស៊ី	3.9	4.2	4	3.6	3.9	4	3.5	3.2	3.2	3.4
ហ្វ៊ីលីពីន	3	2.6	2.4	2.4	2.6	2.4	2.5	2.4	2.2	2.2
សិង្ហបុរី	7.1	7.0	6.6	7.6	5.4	6.7	8.5	7.5	8.2	8.0

September 28, 2023

Tag: អចលនទ្រព្យ