ហ្គេម - La Reine Media

ថៃហាមអត្តពលិកទៅកាន់កាស៊ីណូនៅពេលចូលរួមព្រឹត្តិការណ៍ស៊ីហ្គេមកម្ពុជា

ប្រតិភូកីឡាថៃស្នើអត្តពលិកចៀសឱ្យឆ្ងាយពីបនល្បែង (កាស៊ីណូ) នៅកម្ពុជា គ្រាដែលពួកគេមកចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32។

«ចេញទៅក្រៅលេងបាន ប៉ុន្តែកុំទៅបនល្បែ» ប្រធានក្រុម Thana Chaiprasit បានប្រាប់ប្រព័ន្ធផ្សព្វផ្សាយ Thairath ដូច្នេះ។ «រឿងនេះនៅកម្ពុជាគឺស្របច្បាប់ ប៉ុន្តែមិនសមស្របសម្រាប់អត្តពលិកដែលកំពុងបំពេញកាតព្វកិច្ចជាតិ»។

មេដឹកនាំក្រុម និងគ្រូបង្វឹកនឹងតាមដានអត្តពលិក បង្ការកុំឱ្យពួកគេធ្វើទង្វើខុសច្បាប់ ឬខុសគោលការណ៍ដែលបានកំណត់។ សារព័ត៌មាន Thairath យល់ថា ការណែនាំរបស់លោក Chaiprasit នឹងមិនទទួលបានចំណាប់អារម្មណ៍ច្រើន ព្រោះថា អត្តពលិកចេះថែរក្សារូបភាពសម្រាប់កីឡារបស់ប្រទេសថៃ។

ប្រទេសហ្វ៊ីលីពីនក៏ចាត់ទុកកាស៊ីណូជាជំនួញស្របច្បាប់។ ប៉ុន្តែ ក្នុងព្រឹត្តិការណ៍ស៊ីហ្គេមលើកទី 30 ប្រតិភូកីឡារបស់បណ្ដាប្រទេសពុំបានជួបបញ្ហាអត្តពលិកចូលបនល្បែងឡើយ។

អត្តពលិកនៃប្រតិភូកីឡាថៃចំនួន 847 នាក់ មកកាន់កម្ពុជាប្រកួតក្នុង 36 លើ 37 វិញ្ញាសា។ បណ្ដាក្រុមកីឡាករដែលបានប្រកួតមុនគេនៅស៊ីហ្គេមលើកនេះ រួមមាន ក្រុមបាល់ទាត់ U-22, ក្រុមចត្រង្គ និងក្រុមកីឡាកីឡាគ្រីឃីត (Cricket) ដែលចាប់ផ្ដើមប្រកួតតាំងពីថ្ងៃទី 29 មេសា 2023។

ក្រុមអត្តពលិកជាច្រើនរូបរបស់ប្រទេសថៃ បានមកដល់កម្ពុជាតាំងពីថ្ងៃទី 30 មេសា

គោលដៅរបស់ក្រុមប្រតិភូកីឡាថៃគឺមេដាយមាស 162 គ្រឿង។ នេះគឺជាចំនួនច្រើនបំផុតរាប់ចាប់តាំងពីស៊ីហ្គេមលើកទី 24 ដែលថៃទទួលធ្វើជាម្ចាស់ផ្ទះ។ នៅស៊ីហ្គេមលើកទី 31 ក្រុមថៃដណ្ដើមមេដាយមាសបាន 92 គ្រឿង តិចជាងឆ្ងាយធៀបនឹងក្រុមម្ចាស់ផ្ទះវៀតណាតដែលដណ្ដើមបាន 205 គ្រឿង។

នៅក្នុងប្រវត្តិសាស្ត្រស៊ីហ្គេម ថៃគឺជាក្រុមកីឡាតែមួយគត់ដែលមិនធ្លាប់ជាប់ចំណាត់ថ្នាក់ក្រោមលេខបី។

May 2, 2023

ស្ថិតិចុងក្រោយខ្លះៗស្ដីពី U-22 កម្ពុជា និង U-22 ហ្វ៊ីលីពីន នៅមុនការប្រកួតនាព្រលប់ថ្ងៃទី 02 ឧសភានេះ

ក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ កម្ពុជា និង ហ្វ៊ីលីពីន នឹងប៉ះគ្នានៅជើងទីពីរក្នុងការប្រកួតវគ្គចែកពូលរបស់ពូល A នៃវិញ្ញាសាបាល់ទាត់បុរសនៅស៊ីហ្គេមលើកទី 32។

ខាងក្រោមនេះគឺជាស្ថិតិមួយចំនួនដែលគួរឱ្យចាប់អារម្មណ៍នៅមុនការប្រកួតរវាង U-22 កម្ពុជា និង U-22 ហ្វ៊ីលីពីន នៅថ្ងៃទី 02 ឧសភា 2023៖

U-22 កម្ពុជា បានឈ្នះពីរប្រកួត និងចាញ់មួយប្រកួតនៅក្នុងបីប្រកួតចុងក្រោយបំផុតរបស់ខ្លួន។
U-22 ហ្វ៊ីលីពីន បានចាញ់ពីរប្រកួត និងឈ្នះមួយប្រកួតនៅក្នុងបីប្រកួតចុងក្រោយបំផុតរបស់ខ្លួន។
ក្នុងការប៉ះគ្នាចុងក្រោយបង្អស់រវាង U-22 កម្ពុជា និង U-22 ហ្វ៊ីលីពីន ភាគីកម្ពុជាបានឈ្នះក្នុងលទ្ធផល 1-0។

សមាសភាពក្រុមកីឡាករដែលអាចចូលប្រកួតរបស់ U-22 កម្ពុជា និង U-22 ហ្វ៊ីលីពីន៖

U-22 កម្ពុជា៖ រ៉េត លីហេង, ជា សុខម៉េង, តាំង ប៊ុនឆៃ, ជូ ស៊ីនទី, នី សុខរី, លឹម ពិសុទ្ធ, សៀង ចន្ធា, គី រីណា, សុផល ឌីម៉ង់, ផាត សុខា។
U-22 ហ្វ៊ីលីពីន៖ ជូនលាន (Julian), សានត្យាហ្កោ (Santiago), កាមីល (Kamil), ដេនីស (Dennis), អានដ្រែស (Andres), អៀរិក (Yrick), ជេកូប (Jacob), ហ្កាវិន (Gavin), ណូវ៉ា (Noah), ផឈូ (Pochoo), ដេវីដ (David)។

U22 Philippines (ខៀវ) ចាញ់ U22 ឥណ្ឌូណេស៊ី 0-3 ក្នុងការប្រកួតបើកឆាករបស់ពួកគេនៅពូល A របស់វិញ្ញាសាបាល់ទាត់បុរសរបស់ស៊ីហ្គេមលើកទី 32

តាមការស្មានរបស់ Adin លទ្ធផលនៃការប្រកួតរវាង U-22 កម្ពុជា និង U-22 ហ្វ៊ីលីពីន នៅម៉ោង 19 ព្រលប់ថ្ងៃទី 02 ឧសភានេះ កម្ពុជាអាចឈ្នះហ្វ៊ីលីពីនក្នុងលទ្ធផល 2-1។

May 2, 2023

U-22 ទីម័រខាងកើតប្រហែលនឹងក្លាយជា «ចំណីឆ្ងាញ់» សម្រាប់ U-22 មីយ៉ាន់ម៉ា នៅថ្ងៃនេះ

នៅល្ងាចម៉ោង 16 ថ្ងៃទី 02 ឧសភានេះ ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់មីយ៉ាន់ម៉ា នឹងត្រូវប្រកួតជាមួយ U-22 របស់ប្រទេសទីម័រខាងកើត នៅក្នុងជើងទីពីរបស់ពូល A នៃវិញ្ញាសាបាល់ទាត់បុរសនៅស៊ីហ្គេមលើកទី 32។

នៅមុនស៊ីហ្គេមចូលមកដល់ U-22 របស់មីយ៉ាន់ម៉ា បានបោះជំរំហ្វឹកហាត់នៅប្រទេសថៃ ដើម្បីត្រៀមខ្លួនសម្រាប់ស៊ីហ្គេម។ ក៏ប៉ុន្តែ លទ្ធផលដែល U-22 មីយ៉ាន់ម៉ា បានទទួល គឺមិនល្អប៉ុន្មាន ដោយសារតែពួកគេបានឈ្នះតែមួយប្រកួត និងចាញ់រហូតដល់បីប្រកួត។

ទោះជាយ៉ាងណាក៏ដោយ នៅក្នុងពូល «ស្រួលដកដង្ហើម» ដែលរួមមាន ឥណ្ឌូណេស៊ី ទីម័រខាងកើត ហ្វ៊ីលីពីន និងកម្ពុជា គេឃើញថា U-22 មីយ៉ាន់ម៉ា នៅតែមានសង្ឃឹមអាចឡើងដល់វគ្គពាក់កណ្ដាលផ្ដាច់ព្រ័ត្រ ហើយការប្រកួតជាមួយទីម័រខាងកើតនៅល្ងាចថ្ងៃទី 02 ឧសភានេះ ក្រុមមីយ៉ាន់ម៉ាប្រាកដជានឹងបង្ហាញសមត្ថភាពបានល្អបំផុត។

ចំណែក U-22 ទីម័រខាងកើតវិញ ទើបតែចាញ់ក្រុមម្ចាស់ផ្ទះកម្ពុជា នៅក្នុងការប្រកួតបើកឆាក ដោយលទ្ធផល 0-4។ ក្រុមទីម័រខាងកើតបានបង្ហាញយ៉ាងច្បាស់នូវចំណុចខ្សោយដ៏គ្រោះថ្នាក់របស់ខ្លួនទាក់ទងនឹងខ្សែប្រយុទ្ធ និងខ្សែការពារ។ ជាមួយនឹងសមត្ថភាពបច្ចុប្បន្ន ទីម័រខាងកើតហាក់ដូចកំពុងដើរតួជាក្រុម «បម្រើ» នៅស៊ីហ្គេមលើកនេះ។ ដូច្នេះ ក្នុងការប្រកួតនៅថ្ងៃនេះ កូនសិស្សរបស់គ្រូបង្វឹក Park Soon Tae ប្រហែលជាអាច «ជូន» បីពិន្ទុឱ្យ U-22 មីយ៉ាន់ម៉ា ដោយស្រួល។

ការប្រកួតរវាង U-22 មីយ៉ាន់ម៉ា និងទីម័រខាងកើតនៅវេលាម៉ោង 16 ថ្ងៃទី 02 ឧសភា ឆ្នាំ 2023 នឹងធ្វើឡើងនៅពហុកីឡដ្ឋានជាតិមរតកតេជោ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ៕

May 2, 2023

U-22 កម្ពុជាកំពុងមានប្រៀបនៅមុនការប្រកួតទីពីរដែលត្រូវបះហ្វ៊ីលីពីននៅស៊ីហ្គេម

ក្រុមកីឡាករបាល់ទាត់បុរសអាយុក្រោម 22 ឆ្នាំ (U-22) របស់កម្ពុជា កំពុងតែមានប្រៀបច្រើនលើហ្វ៊ីលីពីន ដែលអាចនាំទៅរកជ័យជម្នះទីពីរនៅស៊ីហ្គេមលើកទី 32 ដែលការប្រកួតនឹងធ្វើឡើងនៅវេលាម៉ោង 19 ថ្ងៃទី 02 ខែឧសភា ឆ្នាំ 2023។

U-22 កម្ពុជាកំពុងមានប្រភពជំរុញកម្លាំងដ៏ធំសម្រាប់ការប្រកួតជើងទីពីររបស់ខ្លួននៅពូល A។ U-22 កម្ពុជាទើបតែបានឈ្នះទីម័រខាងកើត 4-0។ យុទ្ធសាស្ត្រប្រកួតរបស់ «ឆ្មាំអង្គរ» ក៏កាន់តែល្អដែលគេមើលឃើញកាន់តែច្បាស់ឡើងៗ។ បច្ចុប្បន្ន នៅលើតារាងចំណាត់ថ្នាក់ កម្ពុជាក៏កំពុងតែនាំមុខគេជាបណ្ដោះអាសន្នដោយមានបីពិន្ទុ ខណៈដែលគ្រាប់បាល់ចំណេញធំជាង U-22 ឥណ្ឌូណេស៊ីទៅទៀតនៅក្នុងពូល។

ទន្ទឹមនឹងនេះ ការទាត់លើទឹកដីរបស់ខ្លួន បូករួមនឹងការផ្ដល់កម្លាំងចិត្តពីអ្នកគាំទ្រកម្ពុជា គេជឿថា U-22 កម្ពុជា នឹងដណ្ដើមបានជ័យជម្នះលើកទីពីរនៅថ្ងៃទី 02 ឧសភា 2023 វេលាម៉ោង 19 ហើយអាចបង្កើនកម្លាំងសម្រាប់ការដណ្ដើមសំបុត្រឡើងទៅកាន់វគ្គពាក់ផ្ដាច់ព្រ័ត្រ។

ដោយឡែក ក្រុម U-22 ហ្វ៊ីលីពីនវិញ បច្ចុប្បន្នកំពុងកាន់កាប់លទ្ធផលមិនល្អ។ ពួកគេទើបតែបានចាញ់ U-22 ឥណ្ឌូណេស៊ីនៅក្នុងការប្រកួតបើកឆាក។ ទន្ទឹមនឹងនេះ នៅក្នុងព្រឹត្តិការណ៍ស៊ីហ្គេមនៅកម្ពុជា ហ្វ៊ីលីពីនក៏មិនមានក្រុមកីឡាករល្អបំផុតនោះដែរ។ ទោះជាយ៉ាងណាក៏ដោយ នៅក្នុងការប្រកួតបើកឆាករបស់ខ្លួន U-22 ហ្វ៊ីលីពីនក៏បានធ្វើឱ្យ U-22 ឥណ្ឌូណេស៊ី «បែកញើស» មិនតិចឡើយ ដោយសារខ្សែការពារដ៏រឹងមាំ៕

May 1, 2023

U-22 ឡាវមានការជឿជាក់ បន្ទាប់ពី U-22 វៀតណាមបង្ហាញភាពទន់ខ្សោយមុនស៊ីហ្គេមនៅកម្ពុជា

នៅក្នុងការប្រកួតបើកឆាករបស់ U-22 វៀតណាម ជាមួយនឹង U-22 ឡាវ នៅល្ងាចថ្ងៃទី 30 មេសានេះ ទស្សនិកជនប្រហែលជាបានទស្សនាថ្វីជើងល្អរបស់ក្រុមឡាវ ព្រោះតែពួកគេបានរីកចម្រើនជាងមុន ខណៈដែល U-22 វៀតណាម ហាក់បានថមថយកម្លាំងមុនការប្រកួតនៅស៊ីហ្គេមលើកនេះ។

ក្រោយរយៈពេលប្រាំឆ្នាំដែលលេចធ្លោក្រោមការដឹកនាំរបស់គ្រូបង្វឹកជនជាតិកូរ៉េខាងត្បូង Park Hang-seo ក្រុមបាល់ទាត់ជម្រើសជាតិវៀតណាមបច្ចុប្បន្ននឹងឈានចូលដល់ដំណាក់កាលថ្មីនៅស៊ីហ្គេមលើកទី 32 ដែលចាប់ផ្ដើមដោយការប្រកួតជាមួយ U-22 ឡាវនៅឯកីឡដ្ឋានព្រីនស៍ នារាជធានីភ្នំពេញ ដែលជាការប្រកួតផ្លូវការដំបូងរបស់ក្រុមវៀតណាមក្រោមការដឹកនាំរបស់គ្រូបង្វឹកបារាំង លោក Philippe Troussier ។

ប៉ុន្មានឆ្នាំកន្លងទៅ ក្រុមវៀតណាមបានបង្ហាញកម្លាំងដែលស្ទើរតែមិនមានគូប្រៀបនៅអាស៊ីអាគ្នេយ៍ ប៉ុន្តែថ្មីៗនេះ ពួកគេហាក់បានថមថយកម្លាំងទៅហើយ ពិសេសគឺនៅមុនការប្រកួតនៅស៊ីហ្កេមលើកទី 32 នេះ។ នៅ Doha Cup កាលពីពេលថ្មីៗនេះ ក្រុមជម្រើសជាតិវៀតណាមសុទ្ធតែបរាជ័យ។ ពេលត្រលប់មកប្រទេសទាត់មិត្តភាពជាមួយក្លឹប TP HCM និងក្លឹប Ba Ria – Vung Tau ក្រុមជម្រើសជាតិវៀតណាមក៏បន្តចាញ់បួនគ្រាប់ និងឈ្នះតែពីរគ្រាប់។

នៅស៊ីហ្គេមលើកទី 30 និង 31 ក្រុមជម្រើសជាតិវៀតណាមសុទ្ធតែដណ្ដើមបានមេដាយមាស។ ក៏ប៉ុន្តែ នៅស៊ីហ្គេមលើកនេះ ក្រុមជម្រើសជាតិវៀតណាមត្រូវបានអ្នកខ្លះយល់ថា «បានថមថយកម្លាំង» បើធៀបនឹងក្រុមកីឡាករជំនាន់មុនៗ ព្រោះថា ស៊ីហ្គេមលើកទី 32 មិនអនុញ្ញាតឱ្យប្រើប្រាស់កីឡាករលើសអាយុ ដូច្នេះ ក្រុមកីឡាករសំខាន់ៗមួយចំនួនរបស់វៀតណាមក៏ត្រូវអវត្តមាន ស្របពេលដែលក្រុមកីឡាករវ័យក្មេងបានបង្ហាញភាពទន់ខ្សោយនៅមុនការប្រកួតនៅស៊ីហ្គេមលើកនេះ។

ប្រការខាងលើនេះកំពុងតែជួយឱ្យ U-22 ឡាវមានសង្ឃឹមនៅក្នុងការប៉ះជាមួយ U-22 វៀតណាម នៅល្ងាចថ្ងៃទី 30 មេសានេះ ថ្វីបើពួកគេមិនធ្លាប់បានឈ្នះលើវៀតណាម និងទើបតែឆ្លងផុតវគ្គចែកពូលបានមួយលើកនៅស៊ីហ្គេម (2009)។

«មុននោះ យើងមានគម្លាតឆ្ងាយពីវៀតណាម ប៉ុន្តែចាប់ពីប្រហែលមួយឆ្នាំកន្លង ឡាវចាប់ផ្ដើមរីកចម្រើន ហើយយើងសង្ឃឹមថានឹងធ្វើឱ្យវៀតណាមភ្ញាក់ផ្អើល» គ្រូបង្វឹក Michael Weiss និយាយនៅក្នុងសន្និសិទសារព័ត៌មានកាលពីថ្ងៃទី 29 មេសាដូច្នេះ។

U-22 ឡាវនៅតែមានវត្តមានរបស់ក្រុមកីឡាករច្រើនរូបដែលបានទាត់នៅស៊ីហ្កេមលើកទី 31 ក្នុងនោះមានកីឡាករដើមកំណើតវៀតណាមពីររូបផងដែរ។ ជាងនេះ ពួកគេថែមទាំងមានកីឡាករឡាវដើមកំណើតបរទេសបីរូបផ្សេងទៀតដែលកំពុងទាត់ឱ្យអាល្លឺម៉ង់ អាម៉េរិក និងបារាំង។ ទាំងនេះគឺជាក្ដីសង្ឃឹមមួយផ្សេងទៀតសម្រាប់ឡាវ។

April 30, 2023

U-22 ឡាវដែលមានកីឡាករដើមកំណើតវៀតណាមពីររូប ថា អាច «យកស្មើ» នឹងក្រុមផ្កាយលឿងនៅស៊ីហ្គេម

ខ្សែបម្រើ Damoth Thongkhamsavath របស់ក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ប្រទេសឡាវ ប្រកាសយ៉ាងជឿជាក់ថា នឹងយកស្មើជាមួយនឹងក្រុម U-22 វៀតណាមនៅក្នុងការប្រកួតបើកឆាកនៅស៊ីហ្គេមលើកទី 32។

កាលពីល្ងាចថ្ងៃទី 28 មេសា U-22 ឡាវ ក្រោមការដឹកនាំរបស់ប្រធានក្រុមគ្រូបង្វឹក Michael Weiss បានហ្វឹកហាត់ក្នុងថ្ងៃសំខាន់ដើម្បីត្រៀមសម្រាប់ការប្រកួតជាមួយវៀតណាមនៅស៊ីហ្គេម។ នៅក្នុងពេលហ្វឹកហាត់នោះ ខ្សែបម្រើដើមកំណើតវៀតណាមរបស់ U-22 ឡាវ Damoth Thongkhamsavath បានលើកឡើងអំពីការប៉ះគ្នារវាង ឡាវ និងវៀតណាមនៅថ្ងៃទី 30 មេសាខាងមុខ។

Damoth Thongkhamsavath បានប្រាប់អ្នកសារព័ត៌មានដោយភាពជឿជាក់ថា «វៀតណាមឆ្នាំនៅតែខ្លាំងនៅស៊ីហ្គេម ពួកគេជាបេក្ខភាពទីមួយ។ ក៏ប៉ុន្តែ ខ្ញុំគិតថា U-22 ឡាវ នៅតែអាចយកស្មើនៅក្នុងការប្រកួតដំបូង។ លទ្ធផលនៃការប្រកួតនឹងជា 0-0»។

Damoth Thongkhamsavath មានជីដូ ជីតាកើតនៅប្រទេសវៀតណាម និងចេះភាសានេះយ៉ាងស្ទាត់ ដោយសារឪពុកម្ដាយតែងនិយាយភាសាវៀតណាមជាមួយគ្នា។ កីឡាកររូបនេះក៏ធ្លាប់បានចូលរួមប្រកួតនៅស៊ីហ្គេមលើកទី 31 ផងដែរ។

ទន្ទឺមនឹង Damoth Thongkhamsavath នៅស៊ីហ្គេមលើកនេះ U-22 ឡាវ ក៏មានតារាបាល់ទាត់បីរូបទៀតដែលកំពុងទាត់ឱ្យបរទេស រួមមាន Theo Klein (Omaha Mavericks នៅសហរដ្ឋអាម៉េរិក), Roman Angot (Bahlinger អាល្លឺម៉ង់) និង Victor Yovinasak (Montceau បារាំង)។

ទោះជាយ៉ាងណាក៏ដោយ គ្រូបង្វឹកជនជាតិបារាំងរបស់វៀតណាម លោក Troussier បានសង្កត់ធ្ងន់ថា «ក្រុមកីឡាករវៀតណាមក្មេងបំផុតដែលចូលរួមប្រកួតនៅស៊ីហ្គេម..។ ខ្ញុំពេញចិត្ត។ ក្រុមមានសង្ឃឹម ហើយយើងនឹងប្រឹងប្រែងដើម្បីបានលទ្ធផលល្អបំផុត»។

Nalongsit Chanthalangsy ក៏ជាកីឡាកររបស់ក្រុម U-22 ឡាវ ដែលមានដើមកំណើតវៀតណាម

នៅស៊ីហ្គេមលើកនេះ U-22 ឡាវស្ថិតក្នុងពូល B ជាមួយម្ចាស់មេដាយមាសពីរលើកចុងក្រោយគឺ វៀតណាម រួមនឹង ថៃ ម៉ាឡេស៊ី និងសិង្ហបុរី។ U-22 ឡាវនឹងត្រូវប៉ះវៀតណាមនៅក្នុងការប្រកួតបើកឆាកនៅថ្ងៃទី 30 មេសា 2023 នៅឯកីឡដ្ឋានព្រីនស៍៕

April 29, 2023

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR

គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។

ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។

នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។

គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។

ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។

លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។

នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕

April 29, 2023

គ្រូបង្វឹកក្រុមបាល់ទាត់ U-22 របស់ឥណ្ឌូណេស៊ី សរសើរចំពោះទីលានបាល់ទាត់នៅកម្ពុជា

គ្រូបង្វឹក Indra Sjafri នៃក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ប្រទេសឥណ្ឌូណេស៊ី មានការភ្ញាក់ផ្អើលចំពោះហេដ្ឋារចនាសម្ព័ន្ធសម្រាប់បាល់ទាត់នៅស៊ីហ្គេមលើកទី 32 របស់ម្ចាស់ផ្ទះកម្ពុជា។

U-22 ឥណ្ឌូណេស៊ី ត្រូវបានរៀបចំឱ្យហ្វឹកហាត់នៅទីលានរបស់ក្លឹបវិសាខា ក្រោយពីបានមកដល់កម្ពុជា។ ថ្វីបើទីលាននេះនៅឆ្ងាយពីសណ្ឋាគារភ្នំពេញដែលក្រុមឥណ្ឌូណេស៊ីស្នាក់នៅ ប៉ុន្តែ ជំនួសមកវិញ វាលស្មៅរបស់ទីលាននេះបានធ្វើឱ្យគ្រូបង្វឹក Indra Sjafri មានការពេញចិត្ត។

នៅក្នុងសន្និសីទសារព័ត៌មានកាលពីពេលថ្មីៗនេះ គ្រូបង្វឹក Indra Sjafri និយាយថា «ខ្ញុំមានការភ្ញាក់ផ្អើល។ ឆ្នាំ 2019 ខ្ញុំបានទៅដល់ទីនោះ វាជាវាលស្មៅសិប្បនិម្មិត តែពេលនេះគឺជាស្មៅធម្មជាតិ។ នោះគឺជាការផ្លាស់ប្ដូរធំ ហើយផ្ទៃរបស់ទីលាននេះល្អណាស់»។

គ្រូបង្វឹក Indra Sjafri ក៏ពេញចិត្តនឹងគុណភាពរបស់ទីលានប្រកួត នៅពេលរួមដំណើរជាមួយក្រុមកូនសិស្ស ធ្វើទស្សនកិច្ចកីឡដ្ឋានជាតិអូឡាំពិក ជាទីដែលនឹងមានការប្រកួតរបស់បណ្ដាក្រុមនៅពូល A ។

នៅថ្ងៃទី 29 មេសានេះ ឥណ្ឌូណេស៊ីនឹងប្រកួតបើកឆាកជាមួយហ្វ៊ីលីពីន វេលាម៉ោង 16 ល្ងាច។ ម៉ោង 19 ក្បាលព្រលបនៃថ្ងៃដដែល ម្ចាស់ផ្ទះកម្ពុជានឹងប្រកួតជាមួយទីម័រខាងកើត។

April 29, 2023

អ្នកនៅពីក្រោយមហាជោគជ័យរបស់ហ្គេម PUBG ធ្លាប់បរាជ័យជាច្រើនលើកក្នុងអាជីពជាអ្នកសរសេរកូដ

បន្ទាប់ពីបានទទួលបរាជ័យជាមួយនឹង startup ចុងក្រោយចំនួន 3 ទើប «កំពូលអ្នកសរសេរកូដ» រូបនេះ អាចបង្កើតបានជោគជ័យជាមួយនឹងកំពូលហ្គេម PUBG។

Kim Chang-han មានឈ្មោះបោះសំឡេងនៅក្នុងសហគមន៍អ្នកអភិវឌ្ឍហ្គេមនៅប្រទេសកូរ៉េខាងត្បូង ប៉ុន្តែ ក្នុងអាជីពជាអ្នកបង្កើតហ្គេម បុរសនេះបានឆ្លងកាត់បរាជ័យជាច្រើនគួរឱ្យកត់សម្គាល់។

ឆ្នាំ 2014 Kim Chang-han ត្រូវបង្ខំចិត្តបញ្ឈប់បុគ្គលិកចំនួន 1/3 ពីក្រុមហ៊ុនហ្គេមរបស់ខ្លួន។ ចាប់ពីឆ្នាំ 2020 លោក Kim Chang-han បង្កើតបានហ្កេមអនឡាញចំនួន 3 ជាមួយនឹងក្រុមហ៊ុនថ្មីចំនួន 3 ផ្សេងៗគ្នាផងដែរ។ ក៏ប៉ុន្តែ ចុងក្រោយ សុទ្ធតែត្រូវបរាជ័យ។

Kim Chang-han និយាយថា៖ «នោះគឺជាកាលៈទេសៈដ៏មហាសែនជូរចត់នៃជីវិតរបស់ខ្ញុំ»។ ក្នុងអំឡុងពេលបរាជ័យ គាត់បានលក់ក្រុមហ៊ុនទៅឱ្យ Krafton Inc និងចូលបម្រើការក្នុងក្រុមហ៊ុនថ្មីនេះដោយមានតួនាទីជានាយកផ្នែកផលិត។

ចាប់តាំងពីពេលនោះ អាជីពរបស់ Kim Chang-han ក៏ចាប់ផ្ដើមផ្លាស់ប្ដូរ។ គាត់បានសម្រេចចិត្តធ្វើការប្រឹងប្រែងជាលើកចុងក្រោយជាមួយនឹងក្ដីសង្ឃឹមថាអាចជោគជ័យក្នុងការងារនេះ នោះគឺ «បង្កើតហ្គេមអនឡាញមួយដែលអ្នកលេងប្រយុទ្ធគ្នាជាមួយនឹងអ្នកលេងដទៃ ហើយអ្នកចុងក្រោយដែលនៅមាន «ជីវិត» គឺជាអ្នកឈ្នះ។

Kim Chang-han បានបញ្ចុះបញ្ចូល Brendan Greene ឱ្យចូលមកជួយក្រុមហ៊ុននៅកូរ៉េខាងត្បូង ដោយឱ្យធ្វើជានាយកផ្នែកច្នៃប្រឌិតសម្រាប់ហ្គេមនេះ។

ឆ្នាំ 2017 Bluehole (ឈ្មោះចាស់របស់ Krafton) ក៏បានឧទ្ទេសនាមហ្គេមមួយដែលមានឈ្មោះថា PUBG ហើយវាក៏បានក្លាយជាហ្គេមមួយដែលមានឈ្មោះល្បីល្បាញ និងជោគជ័យបំផុតមិនធ្លាប់មានពីមុនមក ក្នុងនោះកំណែសម្រាប់កុំព្យូទ័រ លក់បានជាង 70 លានឈុតនៅទូទាំងពិភពលោក និងកំណែសម្រាប់ទូរស័ព្ទត្រូវបានទាញយកជាង 600 លានលើក។

បច្ចុប្បន្ន ក្រុមហ៊ុនកំពុងតែមានគម្រោងធ្វើ IPO (បោះផ្សាយលក់មូលបត្រដំបូងនៅផ្សារហ៊ុន) នៅពាក់កណ្ដាលចុងឆ្នាំ 2021 ហើយវានឹងអាចក្លាយជាករណី IPO ធំបំផុតនៅកូរ៉េខាងត្បូងក្នុងអំឡុងប៉ុន្មានឆ្នាំមកនេះ។

ការធ្វើ IPO របស់ក្រុមហ៊ុនថ្មីនេះ ត្រូវគេវាយតម្លៃថានឹងប្រមូលបានយ៉ាងតិច 30 ពាន់លានវ៉ុន ដែលប្រហាក់ប្រហែលនឹង 27.2 ពាន់លានដុល្លារអាមេរិក។ ការធ្វើ IPO ដែលធំបំផុតក្នុងប្រវត្តិសាស្ត្រកូរ៉េខាងត្បូងគឺ Samsung Life Insurance ដោយប្រមូលបានទុន 4.3 ពាន់លានដុល្លារអាមេរិកកាលពីឆ្នាំ 2020។

ក្រុមហ៊ុន Krafton បច្ចុប្បន្នគ្រប់គ្រង studio ហ្គេមចំនួន 4 ប៉ុន្តែ PUBG រកបានចំណូល និងចំណេញច្រើនជាងគេបង្អស់។ PUBG រកបាន 1.1 ពាន់លានដុល្លារក្នុងរយៈពេល 9 ខែដើមឆ្នាំ 2020។

ស្ថាបនិករបស់ Krafton លោក Chang Byung-gyu បច្ចុប្បន្នជាម្ចាស់ភាគហ៊ុនធំជាងគេ ដោយកាន់កាប់ភាគហ៊ុន 17% គិតត្រឹមខែកញ្ញា។ តាមពីក្រោយគឺក្រុមហ៊ុន Tencent Holdings ដោយមានភាគហ៊ុន 16% ខណៈដែលលោក Kim Chang-han កាន់កាប់ 1.5%។

Kim Chang-han ធ្លាប់ទទួលបានជ័យជំនះនៅក្នុងការប្រកួតផ្នែកកុំព្យូទ័រដែលត្រូវបានរៀបចំដោយក្រសួងវិទ្យាសាស្ត្រកូរ៉េខាងត្បូងកាលពីឆ្នាំ 1985 នៅពេលគាត់មានវ័យទើបតែ 10 ឆ្នាំ។ ក្រោយមក លោកក៏ដណ្ដើមបានពានរង្វាន់ជាច្រើនផ្សេងទៀតដែលទាក់ទងនឹងការសរសេរកម្មវិធីកុំព្យូទ័រ។ លោក Chang-han ក៏ជាសហស្ថាបនិករបស់ហ្គេម Ginno Games កាលពីឆ្នាំ 2009 ក្រោយពីបរាជ័យជាមួយក្រុមហ៊ុនថ្មីចំនួន 2 មុននោះ។

ក៏ប៉ុន្តែ បរាជ័យទាំងនោះបានក្លាយជាអតីតកាលទៅហើយ ចំណែកបច្ចុប្បន្ន Chang-han កំពុងតែជួយ Krafton ក្នុងការធ្វើ IPO នាពេលខាងមុខ។ លោក Chan-han និយាយថា ការសម្រេចពង្រីកប្រភេទហ្កេមរបស់ក្រុមហ៊ុន ទទួលបានជោគជ័យលើសពីការរំពឹងទុកគ្រាដំបូង៕

ប្រភព៖ Bloomberg

January 19, 2021

និស្ស័យល្អ 10យ៉ាង ដែលឪពុកម្ដាយសម័យថ្មីគួរបង្រៀនដល់កូន

ការបង្ហាត់កុមារឱ្យមានទស្សនគតិ និងឧបនិស្ស័យក្នុងការរស់នៅឱ្យបានល្អត្រឹមត្រូវ ទាំងរឿងការចូលក្នុងសង្គម និងចេះហាត់មើលថែទាំសុខភាពតាំងពីអាយុនៅតិចៗ នឹងធ្វើឱ្យរឿងល្អៗទាំងអស់នេះនៅដក់ជាប់នឹងខ្លួនគេរហូតមួយជីវិត ហើយខាងក្រោមនេះ គឺជារឿងសំខាន់ៗដែលអាណាព្យាបាលសម័យថ្មីគួរតែបង្រៀនឱ្យកូនៗប្រត្តិបត្តិឱ្យក្លាយជាទម្លាប់និស្ស័យ ៖

1.ញើសសំបោរឱ្យអស់

រឹតតែបង្ហាត់ឱ្យកុមារឆាប់ចេះញើសសំបោរលឿនប៉ុនណា បញ្ហាសុខភាពរបស់ពួកគេនឹងឆាប់បានថយចុះលឿនប៉ុននោះដែរ ព្រោះច្រមុះដែលពោរពេញដោយសំបោរ គឺជាផ្នែកមួយនៃបញ្ហាត្រចៀក និងរោគផ្សេងទៀតជាច្រើន។

2.បរិភោគអាហារពេលព្រឹករាល់ថ្ងៃ

អាហារពេលព្រឹក គឺជាពេលអាហារដ៏សំខាន់បំផុត ព្រោះនឹងជួយឱ្យក្មេងគិត និងរៀនបានកាន់តែល្អឡើង អាណាព្យាបាលគួររកនឹកអាហារពេលព្រឹកប្លែកៗថ្មីៗ ដើម្បីឱ្យកូនៗមានអារម្មណ៍ចង់ញ៉ាំ ដោយសាកល្បងប្តូរពីបាយសាច់ជ្រូក មកជានំសាំងវិច ឬនំប៊ើហ្គ៊ើជាដើម។

3.ការពារស្បែករបស់ខ្លួនឯង

អ្នកដែលកើតរោគមហារីកស្បែកភាគច្រើន ច្រើនតែកើតដោយសារការហាលកម្ដៅថ្ងៃដែលសន្សំបន្តិចម្តងៗតាំងពីវ័យកុមារមកម្ល៉េះ។ ចូរបង្រៀនឱ្យកុមារយល់ដឹងអំពីរឿងនេះ និងលាបឡេការពារកម្ដៅថ្ងៃ មុនពេលចេញក្រៅផ្ទះគ្រប់ពេល។

4.កម្រើករាងកាយ និងហាត់ប្រាណ

កុមារៗឥឡូវនេះច្រើនតែចូលចិត្តអង្គុយលេងហ្គេមកុំព្យូទ័រ ឬមើលទូរទស្សន៍យូរៗដោយមិនកម្រើកខ្លួនទៅណា ធ្វើឱ្យអាចកើតជម្ងឺផ្សេងៗជាញឹកញាប់ ដូច្នេះឪពុកម្ដាយគួរបង្ហាត់ឱ្យគេចេះធ្វើកិច្ចការឯទៀតខ្លះផង ដូចជាបង្ហាត់ឱ្យចេះហាត់ប្រាណតាមរយ:ការធាក់កង់ ឬលេងបាល់បោះជាដើម។

5.ថែទាំសុខភាពមាត់ធ្មេញរបស់ខ្លួនឯង

បង្រៀនកូនៗថា ការមិនដុសសម្អាតធ្មេញ ឬបណ្តោយឱ្យធ្មេញពុក នឹងមានជំងឺអាក្រក់ផ្សេងទៀតកើតឡើង។ បង្រៀនឱ្យគេចេះដុសធ្មេញឱ្យបានត្រឹមត្រូវ និងនាំទៅទិញច្រាសដុសធ្មេញម៉ូដណាដែលគេស្រឡាញ់ ដើម្បីជាការជំរុញឱ្យគេកាន់តែចង់ដុសធ្មេញឡើង។

(នៅមានត)

December 14, 2020

Tag: ហ្គេម