Tag: ហើម

នាវាមុជទឹកដែលបាត់ខ្លួនពេលដឹកភ្ញៀវចុះទៅមើលសាកសពកប៉ាល់ Titanic មានលក្ខណៈបែបណា?
នាវាមុជទឹក Titan ដែលដឹកមនុស្ស 5 នាក់ និងបានបាត់ខ្លួននៅពេលចុះទៅមើលសាកសពកប៉ាល់ Titanic អាចស្ថិតនៅក្នុងសមុទ្ររយៈពេល 10 ម៉ោង ដោយគ្មានការព្រួយបារម្ភ។
សមត្ថកិច្ចកំពុងស្វែងរកនាវាមុជទឹកឈ្មោះ Titan ដែលផលិតឡើងដោយប្រើប្រាស់វត្ថុធាតុទីតាញ៉ូម និងសរសៃកាបូន ប្រវែង 6.7 ម៉ែត្រ បន្ទាប់ពីនាវានេះបានបាត់ខ្លួនកាលពីថ្ងៃទី 18 មិថុនា នៅក្នុងដំណើរដឹកអ្នកទេសចរណ៍ទៅមើលសាកសពកប៉ាល់ Titanic។ យោងតាមកងកម្លាំងល្បាតសមុទ្រ បរិមាណអុកស៊ីសែនក្នុងនាវានេះ អាចឱ្យអ្នកនៅក្នុងនាវាដកដង្ហើមមិនដល់ 70 ម៉ោងទៀតទេ គិតមកដល់ថ្ងៃត្រង់ទី 26 មិថុនា (នៅកម្ពុជា)។
នាវាមុជទឹក Titan បានបាត់ខ្លួននៅក្នុងសមុទ្រអាម៉េរិកខាងជើង ដែលស្ថិតក្នុងមហាសមុទ្រអាត្លង់ទិក ដឹកមនុស្ស 5 នាក់ ក្នុងនោះមានអ្នកបើកបរម្នាក់ និងទេសចរ 4 នាក់។ នាវានេះគឺជាកម្មសិទ្ធិរបស់ក្រុមហ៊ុនទេសចរណ៍ OceanGate Expeditions។ កងកម្លាំងល្បាតសមុទ្រ Boston របស់សហរដ្ឋអាម៉េរិក និងកាណាដា កំពុងស្វែងរកនាវានេះ។
ទិន្នន័យមួយចំនួនស្ដីពីលក្ខណសម្បត្តិរបស់នាវាមុជទឹក Titan ៖
នាវានេះមានទំហំ 670 សម x 280 សម x 250 សម អាចមុជដល់ជម្រៅ 4,000 ម៉ែត្រ។ Titan មានទម្ងន់ 10,432 គីឡូក្រាម អាចផ្លាស់ទីក្នុងល្បឿន 5,556 គីឡូម៉ែត្រ/ម៉ោង ដោយប្រើកម្លាំងរុញច្រានរបស់ម៉ូទ័រអគ្គិសនី Four Innerspace 1002។ នាវានេះបំពាក់កាមេរ៉ា Sub C Imaging 4k Rayfin, ម៉ាស៊ីនផ្សាយរលកសញ្ញា Teledyne 2D, អំពូលភ្លើងហ្វា 40,000 lumen និងម៉ាស៊ីនស្កេនឡាស៊ែរ 2G Robotics។
ឧបករណ៍អេឡិចត្រូនិច និងកាប៊ីនបញ្ជាម៉ូទ័ររុញច្រានសុទ្ធតែនៅខាងក្រៅសម្បកការពារសម្ពាធ ដើម្បីបង្កើនលំហសម្រាប់អ្នកនៅខាងក្នុង។ នាវានេះក៏មានបន្ទប់ទឹកនៅក្បែរបង្អួច។
Titan អាចមុជក្រោមទឹករយៈពេល 10 ម៉ោងក្នុងមួយលើកដោយសុវត្ថិភាពបំផុត ហើយអ្នកចូលរួមដំណើរទេសចរណ៍ក្រោមសមុទ្រនឹងស្ថិតនៅលើកប៉ាល់មួយនៅលើសមុទ្ររយៈពេល 10 ថ្ងៃ៕
June 20, 2023
លោកយាយម្នាក់ «ស្លាប់ហើយតែបែរជារស់ឡើងវិញ» ពេលកូនចៅកំពុងធ្វើបុណ្យសព
(អេក្វាទ័រ) – លោកយាយអាយុ 76 ឆ្នាំម្នាក់ត្រូវបានវេជ្ជបណ្ឌិតពិនិត្យ និងបញ្ជាក់ថាបានស្លាប់ នៅក្នុងមន្ទីរពេទ្យមួយក្នុងទីក្រុង Babahoyo ប៉ុន្តែបានភ្ញាក់ដឹងខ្លួននៅក្នុងពិធីបុណ្យសពរបស់ខ្លួន និងគោះលើមឈូស ធ្វើឱ្យមនុស្សម្នាមានការភ័យខ្លាច។
ស្ត្រីវ័យចំណាស់ដែលជាអតីតគ្រូពេទ្យម្នាក់ឈ្មោះ Bella Montoya ត្រូវបានបញ្ជូនទៅកាន់មន្ទីរពេទ្យក្នុងទីក្រុង Babahoyo ភាគកណ្ដាលប្រទេសអេក្វាទ័រ កាលពីថ្ងៃទី 09 មិថុនា 2023 បន្ទាប់ពីគាំងបេះដូង។ បន្ទាប់ពីជួយសង្គ្រោះមិនបានសម្រេច វេជ្ជបណ្ឌិតក៏ប្រកាសថា លោកយាយ Montoya បានបាត់បង់ជីវិត។ នេះបើតាមការអះអាងរបស់កូនប្រុសស្ត្រីរូបខាងលើ។
គ្រូសារបានយកសពលោកយាយ Montoya ទៅរៀបចំពិធីបុណ្យសព។ ពេលពិធីបុណ្យកំពុងប្រព្រឹត្តទៅ មនុស្សម្នាប្រហែល 20 នាក់នៅទីនោះ ក៏ឮសំឡេងចម្លែក។ «ប្រហែល 5 ម៉ោង រាប់ពីពេលពិធីបុណ្យបានចាប់ផ្ដើម មឈូសក៏ចាប់ផ្ដើមមានសំឡេង។ ម្ដាយរបស់ខ្ញុំត្រូវគេរុំក្នុងក្រណាត់ ហើយគាត់ក៏វាយទៅលើមឈូស។ ពេលទៅក្បែរ ពួកខ្ញុំដឹងថា គាត់កំពុងដកដង្ហើមយ៉ាងលំបាក» Gilberto Barbera ដែលជាកូនប្រុសរបស់ស្ត្រីខាងលើ ឱ្យដឹងដូច្នេះ។
សាច់ញាតិក៏ប្រញាប់បញ្ជូនលោកយាយ Montoya ទៅកាន់មន្ទីរពេទ្យ។ បច្ចុប្បន្ន លោកយាយកំពុងទទួលការព្យាបាលពិសេសពីក្រុមវេជ្ជបណ្ឌិត។
Barbera និយាយថា «ការដែលម្ដាយខ្ញុំភ្ញាក់ខ្លួននៅក្នុងពិធីបុណ្យសព ធ្វើឱ្យពួកខ្ញុំភ័យខ្លាចខ្លាំង» និងបន្តថា គ្រូពេទ្យថា ជំងឺរបស់ម្ដាយខ្ញុំនៅតែស្ថិតក្នុងស្ថានភាពគ្រោះថ្នាក់។
ក្រសួងសុខាភិបាលអេក្វាទ័រ បានឱ្យដឹងថា សមត្ថកិច្ចកំពុងស៊ើបអង្កេតលើក្រុមវេជ្ជបណ្ឌិតដែលទាក់ទងនឹងករណីលោកយាយ Montoya។ គណៈកម្មការមួយត្រូវបានបង្កើតឡើងដើម្បីពិនិត្យលើដំណើរការនៃការចេញលិខិតបញ្ជាក់មរណភាពរបស់មន្ទីរពេទ្យខាងលើ៕
June 13, 2023
ចម្លែកណាស់! បុរសនេះពិសាតែភេសជ្ជៈកំប៉ុងជំនួសអាហារ អស់រយៈពេល 17 ឆ្នាំមកហើយ
(ប្រទេសអ៊ីរ៉ង់) – Gholamreza Ardeshiri អាយុ 58 ឆ្នាំ គឺជាបុរសម្នាក់ដែលរស់ដោយសារ Pepsi និង Coca-Cola ក្នុងរយៈពេល 17 ឆ្នាំកន្លងមកហើយ ព្រោះ ឱ្យតែឃើញអាហារគឺគាត់រកកលក្អួត។
រឿងរ៉ាវបានចាប់ផ្ដើមកាលពីយប់មួយក្នុងឆ្នាំ 2006 នៅពេល Ardeshiri ក្រោកពីសម្រាន្តស្រាប់តែមានអ្វីចម្លែកនៅក្នុងមាត់ដែលមិនអាចបំបាត់ចោលបាន។
«ខ្ញុំមានអារម្មណ៍ដូចជាមានសក់នៅក្នុងអណ្ដាត។ ខ្ញុំបានធ្វើគ្រប់យ៉ាង ប៉ុន្តែមិនអាចបំបាត់វាចោល។ ខ្ញុំពិបាកដកដង្ហើម មិនអាចធ្វើអ្វីបាន។ អារម្មណ៍នេះពិតជាផ្ដេសផ្ដាស និងពិបាកពន្យល់» លោក Ardeshiri រម្លឹកអំពីដើមហេតុដែលនាំឱ្យគាត់ឈប់ទទួលទានអាហារ។
គាត់បានទៅពេទ្យស្ទើរគ្រប់ជំនាញ ប៉ុន្តែ បញ្ហានៅតែមិនអាចដោះស្រាយបាន។ ចុងក្រោយ គាត់បានសម្រេចចិត្តបោះបង់ការទទួលទានអាហារ ហើយរស់នៅដោយសារភេសជ្ជៈកំប៉ុង។ លោក Ardeshiri ឱ្យដឹងថា លើកដំបូងដែលគាត់ពិសាភេសជ្ជៈកំប៉ុន គាត់មានអារម្មណ៍ថា មានកម្លាំងភ្លាមៗ ហើយក៏សម្រេចចិត្តពិសាវាជំនួសអាហារ។
គ្រួសាររបស់លោក Ardeshiri បានប្រាប់ថា ពួកគេមិនបរិភោគអាហារនៅចំពោះលោក Ardeshiri ឡើយ ព្រោះថា រាល់ពេលដែលគាត់បានឃើញអាហារ គាត់តែងតែរកកលក្អួត។ ជារៀងរាល់ថ្ងៃ លោក Ardeshiri ពិសាភេសជ្ជៈនេះបីដបធំៗ និងបានអះអាងថា មិនដែលមានអារម្មណ៍ថាឃ្លាននោះទេ។ ចាប់តាំងពីមានទម្លាប់នេះមក គាត់ស្រកទម្ងន់ 32 គីឡូក្រាម ហើយក៏មិនដែលមានបញ្ហាសុខភាពធ្ងន់ធ្ងរអ្វីឡើយ ក្នុងរយៈពេល 17 ឆ្នាំកន្លងទៅ៕
May 19, 2023
U-22 ទីម័រខាងកើតប្រហែលនឹងក្លាយជា «ចំណីឆ្ងាញ់» សម្រាប់ U-22 មីយ៉ាន់ម៉ា នៅថ្ងៃនេះ
នៅល្ងាចម៉ោង 16 ថ្ងៃទី 02 ឧសភានេះ ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់មីយ៉ាន់ម៉ា នឹងត្រូវប្រកួតជាមួយ U-22 របស់ប្រទេសទីម័រខាងកើត នៅក្នុងជើងទីពីរបស់ពូល A នៃវិញ្ញាសាបាល់ទាត់បុរសនៅស៊ីហ្គេមលើកទី 32។
នៅមុនស៊ីហ្គេមចូលមកដល់ U-22 របស់មីយ៉ាន់ម៉ា បានបោះជំរំហ្វឹកហាត់នៅប្រទេសថៃ ដើម្បីត្រៀមខ្លួនសម្រាប់ស៊ីហ្គេម។ ក៏ប៉ុន្តែ លទ្ធផលដែល U-22 មីយ៉ាន់ម៉ា បានទទួល គឺមិនល្អប៉ុន្មាន ដោយសារតែពួកគេបានឈ្នះតែមួយប្រកួត និងចាញ់រហូតដល់បីប្រកួត។
ទោះជាយ៉ាងណាក៏ដោយ នៅក្នុងពូល «ស្រួលដកដង្ហើម» ដែលរួមមាន ឥណ្ឌូណេស៊ី ទីម័រខាងកើត ហ្វ៊ីលីពីន និងកម្ពុជា គេឃើញថា U-22 មីយ៉ាន់ម៉ា នៅតែមានសង្ឃឹមអាចឡើងដល់វគ្គពាក់កណ្ដាលផ្ដាច់ព្រ័ត្រ ហើយការប្រកួតជាមួយទីម័រខាងកើតនៅល្ងាចថ្ងៃទី 02 ឧសភានេះ ក្រុមមីយ៉ាន់ម៉ាប្រាកដជានឹងបង្ហាញសមត្ថភាពបានល្អបំផុត។
ចំណែក U-22 ទីម័រខាងកើតវិញ ទើបតែចាញ់ក្រុមម្ចាស់ផ្ទះកម្ពុជា នៅក្នុងការប្រកួតបើកឆាក ដោយលទ្ធផល 0-4។ ក្រុមទីម័រខាងកើតបានបង្ហាញយ៉ាងច្បាស់នូវចំណុចខ្សោយដ៏គ្រោះថ្នាក់របស់ខ្លួនទាក់ទងនឹងខ្សែប្រយុទ្ធ និងខ្សែការពារ។ ជាមួយនឹងសមត្ថភាពបច្ចុប្បន្ន ទីម័រខាងកើតហាក់ដូចកំពុងដើរតួជាក្រុម «បម្រើ» នៅស៊ីហ្គេមលើកនេះ។ ដូច្នេះ ក្នុងការប្រកួតនៅថ្ងៃនេះ កូនសិស្សរបស់គ្រូបង្វឹក Park Soon Tae ប្រហែលជាអាច «ជូន» បីពិន្ទុឱ្យ U-22 មីយ៉ាន់ម៉ា ដោយស្រួល។
ការប្រកួតរវាង U-22 មីយ៉ាន់ម៉ា និងទីម័រខាងកើតនៅវេលាម៉ោង 16 ថ្ងៃទី 02 ឧសភា ឆ្នាំ 2023 នឹងធ្វើឡើងនៅពហុកីឡដ្ឋានជាតិមរតកតេជោ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ៕
May 2, 2023
ស្ត្រីមានគភ៌ ត្រូវប្រយ័ត្ន…គ្រោះថ្នាក់ បែបនឹកស្មានមិនដល់!!
រឿងដែលនឹកស្មានមិនដល់ តែងតែកើតឡើងគ្រប់ពេលវេលា…ដូច្នេះស្ត្រីមានគភ៌ គួរតែមានការប្រុងប្រយ័ត្នជាប់ជានិច្ច ព្រោះធ្លាប់បានឃើញឧទាហរណ៍ជាច្រើនរួចមកហើយ ដូចជា មានមិត្តភក្តិជិតដិតម្នាក់ នាងមានផ្ទៃពោះ 5ខែទៅហើយ តែក៏នៅតែចូលចិត្តធ្វើការងារប្រចាំថ្ងៃ ដូចមនុស្សទូទៅធម្មតាអ៊ីចឹង រហូតមកដល់ថ្ងៃមួយ ទើបដឹងថា…រឿងដែលនឹកស្មានមិនដល់ និងធ្លាប់តែធ្វើជាប្រចាំនោះ បានហុចផលមិនល្អដល់ខ្លួន ហើយថែមទាំងមានផលអាក្រក់ទៅដល់កូននៅក្នុងផ្ទៃទៀតផង រឿងទាំងនោះគឺ៖
គ្រាន់តែការទំពាអាហារសោះ…
ដឹងទេថា រឿងដ៏តូចតាចមួយនេះ បើស្ត្រីមានគភ៌យើងមើលរំលង រឿងនេះអាចនាំមកនូវផលអាក្រក់ជាច្រើនដល់ខ្លួនអ្នកម្តាយ និងកូនតូចបាន។ ស្ត្រីមានគភ៌ ដែលទទួលទានអាហារបែបប្រញាប់ៗ ទំពាអាហារតែមួយភ្លែត ហើយលេបនោះ ផលអាក្រក់ដែលតាមមកគឺ អាហារដែលយើងលេបចូលទៅក្នុងក្រពះនោះ នឹងមិនរំលាយ ធ្វើឱ្យមានអាការណែនឆ្អល់ក្នុងពោះ អាចបណ្តាលឱ្យការទទួលទានអាហារលើកក្រោយថយចុះ កូនតូចនៅក្នុងផ្ទៃក៏ទទួលរងផលប៉ះពាល់នេះតាមដែរ។ ដូច្នេះក្នុងការទទួលទានអាហារ ទោះជាពេលណាក៏ដោយ សូមស្ត្រីមានគភ៌យើង នឹកក្នុងចិត្តជាប់ជានិច្ចថា ត្រូវទទួលទានឱ្យបានទៀងទាត់ពេលវេលា ហើយត្រូវទំពាអាហារឱ្យបានល្អិត ព្រោះនេះ គឺជារឿងល្អមួយ ដើម្បីឱ្យកូនតូចរបស់អ្នក បានទទួលសារធាតុអាហារបានពេញលេញតាមនោះដែរ។
រហ័សទាន់ចិត្ត ភ្លែតៗ ដល់ណាដល់ហ្នឹងដែរ…
ស្ត្រីមានគភ៌ខ្លះ ច្រើនតែភ្លេចថា ខ្លួនឯងកំពុងពពោះ ធ្វើឱ្យការដើរ ក្រោក អង្គុយ រត់ រួមទាំងការធ្វើចលនាផ្សេងៗ ប្រព្រឹត្តទៅតាមធម្មតា។ ចំពោះរឿងនេះ សូមជម្រាបថា បើស្ត្រីដែលមានអាយុគភ៌នៅតិច អាចគ្មានគ្រោះថ្នាក់អ្វីធ្ងន់ធ្ងរទេ តែបើជាស្ត្រីដែលអាយុគភ៌ ស្ថិតក្នុងអំឡុងខែចុងក្រោយៗ ហើយមានការធ្វើចលនា ដូចជា ក្រោក ដើរ រត់ បែបរហ័សៗនោះ ប្រាកដណាស់ ពិតជាមានផលប៉ះពាល់ដល់កូនតូច ដែលនៅក្នុងផ្ទៃមិនខាន។ អាចដល់ថ្នាក់ មានកាបុកប៉ះនឹងសាច់ជញ្ជាំងស្បូនក្នុងពោះ ទៅជំរុញឱ្យស្បូនបង្រួញខ្លួន ធ្វើឱ្យអ្នកម្តាយមានអារម្មណ៍ឈឺពោះ និងបើសិនជាស្បូនកើតការបង្រួញខ្លួនខ្លាំងៗផងនោះ កូនអាចនឹងប្រសូតចេញមក មុនពេលកំណត់បាន។ ដូច្នេះស្ត្រីមានគភ៌ ត្រូវធ្វើចលនាឱ្យយឺតៗ ដើម្បីឱ្យកូនតូចក្នុងផ្ទៃមានសុវត្ថិភាព មិនដូច្នោះទេ បេះដូងនឹងធ្វើការខ្លាំង អុកស៊ីហ្ស៊ែន ដែលត្រូវបញ្ជូនទៅកូនតូច នឹងត្រូវថយចុះ តែផលអាក្រក់ ដែលខ្លាំងជាងហ្នឹងទៅទៀតនោះគឺ កូនតូចនៅក្នុងគភ៌អាចនឹងមិនសូវរឺងមាំ និងធំធាត់យឺត។
សត្វចិញ្ចឹមគួរឱ្យស្រឡាញ់…
ជាពិសេសឆ្កែ និងឆ្មា ស្ត្រីមានគភ៌ខ្លះ កើតរោគប្រតិកម្មចាញ់ជាមួយរោមសត្វ ល្អងធូលី កេសរផ្កា តែក៏នៅតែចូលចិត្តចិញ្ចឹមសត្វ នៅក្នុងផ្ទះ និងចូលចិត្តលេងជាមួយពួកវា ដោយមិនបានគិតដល់សត្វចៃ ដែលនឹងនាំមេរោគចូលមករកទាំងខ្លួនឯង និងកូនក្នុងផ្ទៃ ដោយមិនបានដឹងខ្លួនឡើយ។ ដូច្នេះស្ត្រីមានគភ៌ គួរមើលថែទាំ សម្អាតសត្វចិញ្ចឹម ដែលក្នុងផ្ទះឱ្យបានកាន់តែខ្លាំងឡើង ដើម្បីសុខភាព និងអនាម័យដ៏ល្អរបស់អ្នក និងកូនក្នុងផ្ទៃ។
ធ្មេញពុក…
ស្ត្រីមានគភ៌មួយចំនួន អាចគិតថាជារឿងតូចតាច រហូតបណ្តោយឱ្យកើតអាការអញ្ចាញធ្មេញឡើងហើម មានខ្ទុះ ឬមិនព្រមព្យាបាល ព្រោះគិតថា អនាម័យ និងភាពស្អាតក្នុងប្រអប់មាត់ មិនចាំបាច់យកចិត្តទុកដាក់ខ្លាំងពេកទេ រហូតធ្វើឱ្យកើតមានមេរោគបាក់តេរី កើនឡើងច្រើន រាលដាលទៅដល់ឫសធ្មេញ ធ្វើឱ្យអញ្ចាញក្លាយជាដំបៅឡើងខ្ទុះជាដើម។ ពេលនោះ រឿងតូចតាច ក៏ក្លាយជារឿងធំឡើង ផលប៉ះពាល់ដែលតាមមក គឺមេរោគឆ្លងចូលទៅក្នុងក្រសែឈាម ហើយឆ្ពោះទៅរកកូនតូច រហូតដល់ថ្នាក់អាចធ្វើឱ្យបាត់បង់ជីវិតបានទៀតផង។ ដូច្នេះស្ត្រីមានគភ៌ ត្រូវតែថែរក្សាអនាម័យ និងភាពស្អាតក្នុងប្រអប់មាត់ឱ្យបានល្អជាប់ជានិច្ច ព្រោះនេះ គឺជារឿងតូចតាច ដែលអាចធ្វើឱ្យកើតទៅជារឿងធំបាន។
យួរ ឬលើករបស់ធ្ងន់…
ស្ត្រីមានគភ៌ ត្រូវប្រុងប្រយ័ត្នជាប់ជានិច្ចថា ខ្លួនអ្នកកំពុងតែមានផ្ទៃពោះ!! ចូរកុំលើករបស់ធ្ងន់ៗជាដាច់ខាត តែមានពេលខ្លះ ស្ត្រីមួយចំនួនអាចភ្លេចខ្លួនពេលទៅដើរទិញឥវ៉ាន់ ដែលត្រូវយួររបស់របរឡើងជ្រែកដៃ ពេលនោះសាច់ដុំខ្នង សាច់ដុំជើង និងសន្លាក់ផ្សេងៗ ត្រូវធ្វើការធ្ងន់ទាំងអស់ រហូតជំរុញឱ្យកើតរោគផ្សេងៗឡើង ដូចជាសម្ពាធលោហិតឡើងខ្ពស់ ដោយសារតែបេះដូងខំធ្វើការខ្លាំងពេក ឈឺខ្នង ឈឺស្មា និងសន្លាក់ជាដើម។
បើកសំឡេងបទភ្លេងឮខ្លាំងៗពេក…
ក្នុងចំណុចនេះចង់បានន័យថា ស្ត្រីមានគភ៌រូបណា ដែលចូលចិត្តបើកបទចម្រៀង ឮៗខ្លាំងជាងប្រក្រតី ព្រោះតែយល់ច្រឡំថា កូនតូចនៅក្នុងផ្ទៃ នឹងបានឮច្បាស់នោះ ការពិតទៅ នេះជាគ្រោះថ្នាក់សម្រាប់កូនតូចទៅវិញទេ ព្រោះជាការរុកកួនរំខានកូនតូចនៅក្នុងផ្ទៃដោយផ្ទាល់តែម្តង ដោយសារតែសរសៃប្រសាទត្រចៀករបស់កូន មិនទាន់វិវឌ្ឍបានពេញទំហឹងនៅឡើយទេ។ អាចធ្វើឱ្យកូនតូច កើតក្តីធុញថប់មួម៉ៅ មានផលប៉ះពាល់ធ្វើឱ្យការវិវឌ្ឍរបស់កូនថមថយចុះបាន។ ការបើកបទចម្រៀង ដើម្បីជួយជំរុញវិវឌ្ឍនាការរបស់កូនតូចនៅក្នុងផ្ទៃនោះ គ្រាន់តែចាក់បទភ្លេង ដែលមានចង្វាក់ស្រាលៗ ពីរោះៗ ដូចជាបទភ្លេងក្លាស៊ីក ឬក៏បទចម្រៀងធម្មតាទូទៅណា ដែលមានចង្វាក់ និងទំនុកភ្លេងងាយស្រួលស្តាប់ មានទំនុកច្រៀង និងអត្ថន័យល្អៗ តែប៉ុណ្ណឹងក៏គ្រប់គ្រាន់ណាស់ទៅហើយ៕
June 17, 2021
តើស្ត្រីមានគភ៌ គួរជ្រើសរើសពាក់ស្បែកជើងបែបណា?
ចង់ក្លាយជានារី ដែលមើលទៅស្អាត មានមន្តស្នេហ៏តាំងពីក្បាលដល់ចុងជើង ចូរកុំមើលរំលងស្បែកជើង ដែលត្រូវពាក់ដើររាល់ថ្ងៃឱ្យសោះ ជាពិសេសក្នុងរយៈពេលមានគភ៌ ដែលជើងត្រូវទទួលទ្រទម្ងន់ខ្លួន ដែលកាន់តែកើនឡើងជារឿយៗ រហូតគួរឱ្យអាណិត ដូច្នេះហើយទើបការជ្រើសរើសស្បែកជើងរបស់ស្ត្រីមានផ្ទៃពោះ ដែលត្រូវពាក់ឱ្យសប្បាយស្រួលជើង និងមានសុវត្ថិភាព គឺជារឿងសំខាន់ណាស់។
ការជ្រើសរើសស្បែកជើង សម្រាប់ទៅធ្វើការងារក្រៅផ្ទះ
-ស្ត្រីមានគភ៌ គួរជ្រើសរើសពាក់ស្បែកជើង ដែលគ្មានកែង ដើម្បីការពារ ទាំងការរអឹលដួល និងការឈឺខ្នង ឈឺចង្កេះផង។
-ជ្រើសរើសពាក់ស្បែកជើងណា ដែលស័ក្តិសមនឹងរូបរាងជើងរបស់ខ្លួន អាចទទួលទ្រទម្ងន់ខ្លួន និងទប់ទល់នឹងការប៉ះទង្គិចបានយ៉ាងល្អ។
-កុំជ្រើសរើសយកស្បែកជើងតាមលេខ ដែលធ្លាប់ពាក់ដោយមិនបានពាក់ល ព្រោះទំហំជើងអាចប្រែប្រួល និងនៅពេលពាក់ គួរទុកឱ្យនៅសល់ចន្លោះ រវាងចុងម្រាមជើង និងស្បែកជើងប្រវែង 1សង្ទីម៉ែត្រ។
-ពិនិត្យមើលបាតស្បែកជើងណា ដែលតោងស្អឹតនឹងកម្រាលឥដ្ឋ ជ្រើសរើសយកពណ៌ ដែលលេចច្បាស់ជាងសម្លៀកបំពាក់ ដែលពាក់ទៅធ្វើការ និងមើលទៅឃើញសមជាអ្នកធ្វើការផង។
.បើត្រូវឈរធ្វើការយូរ គួរពាក់ស្បែកជើងដែលមានបាតរាបស្មើ ស្បែកទន់ៗ ដើម្បីកាត់បន្ថយការឈឺស្រពន់របស់សាច់ដុំជើង និងបាតជើង ។
-ឈានចូលដល់ត្រីមាសទី3 នៃការមានគភ៌ គួរចៀសវាងស្បែកជើងណា ដែលពិបាកពាក់ពេលទៅធ្វើការ ដូចជាស្បែកជើងដែលមានខ្សែចង ខ្សែរឹតបន្តឹង ឬមានក្បាលគន្លឹះ ដែលធ្វើឱ្យត្រូវអោនងើបៗនៅពេលពាក់ ឬពេលដោះ។
ការជ្រើសរើសស្បែកជើងពាក់ធ្វើការនៅផ្ទះ
-ក្នុងអំឡុងពេលមានគភ៌ ជើងនឹងហើម ហើយធំ ដូច្នេះគួរជ្រើសរើសពាក់ស្បែកជើងណា ដែលមានលក្ខណៈធំទូលាយ ហើយស្រាល ពាក់ហើយសប្បាយស្រួលជើង ដូចជាស្បែកជើងសម្រាប់ស្ត្រីមានផ្ទៃពោះ ឬស្បែកជើងផ្ទាត់ជាដើម។
-ជ្រើសរើសបែបម៉ូដ ដែលសមគ្នានឹងរូបរាងបាតជើងរបស់ខ្លួនបំផុត ផ្នែកធំបំផុតរបស់ស្បែកជើង និងបាតជើង គួរតែឱ្យមានទំហំប៉ុនគ្នា។
-ជ្រើសរើសពាក់ស្បែកជើងណា ដែលមានបាតតោងស្អឹតនឹងកម្រាលឥដ្ឋ មិនងាយរអឹល បាតខាងក្នុងទន់ ទប់ទល់នឹងការប៉ះបុកបាន ដើម្បីកាត់បន្ថយការឈឺជង្គង់ ឈឺកជើង។
-ជាធម្មតា បាតជើងច្រើនតែមានទំហំខុសគ្នា ដូច្នេះគួរវាស់បាតជើងទាំងសងខាងជាមុនសិន មុននឹងទិញ ដោយរើសយកតាមខ្នាតជើងដែលធំ។
-ជ្រើសរើសពាក់ស្បែកជើងណា ដែលយឺតយារ ពង្រីកខ្លួនតាមរូបរាងបាតជើងបានល្អ កុំទិញស្បែកជើងដែលរឹបណែនខ្លាំង ដោយសារតែគិតថា ពាក់យូរទៅវាគង់តែយារនោះឡើយ។
-តមពាក់ស្បែកជើងកែងចោត ព្រោះអាចប្រឈមនឹងការជំពប់ជើងដួល និងធ្វើឱ្យឈឺខ្នងទៀតផង។
-បើចង់ឱ្យល្អ គួរជ្រើសរើសពាក់ស្បែកជើងសុខភាព ដែលផលិតឡើង ដើម្បីទ្រទម្ងន់របស់ជើង និងបាតជើងរបស់ស្ត្រីមានគភ៌ជាពិសេស។
-ពេលវេលាដ៏សមស្រប ដែលអ្នកម្តាយគួរទិញស្បែកជើង គឺពេលថ្ងៃរសៀល ព្រោះពេលនេះជើងនឹងហើម និងរីកធំជាងពេលធម្មតា៕
May 15, 2021
ការមើលថែទាំសុខភាពប្រអប់មាត់ សម្រាប់ស្ត្រីមានគភ៌
ការមានសុខភាព ដែលល្អក្នុងអំឡុងពេលមានគភ៌ គឺជារឿងមួយដែលស្ត្រីគ្រប់រូបចង់បាន…
ស្ត្រីមានគភ៌ អាចមានក្តីកង្វល់ចំពោះការប្រែប្រួលផ្សេងៗរបស់រាងកាយ និងតែងខំប្រឹងមើលថែទាំសុខភាពគភ៌ និងកូននៅក្នុងផ្ទៃឱ្យបានល្អបំផុត តែយ៉ាងណាក៏ដោយ ចូរស្ត្រីមានគភ៌ កុំភ្លេចពីសុខភាពប្រអប់មាត់ឱ្យសោះ ព្រោះវាមានផលប៉ះពាល់ដល់សុខភាពរបស់ទារកនៅក្នុងផ្ទៃ។
1. ការប្រែប្រួលរបស់អ័រម៉ូន ក្នុងអំឡុងពេលមានគភ៌មានផលប៉ះពាល់ ដល់ការកើតរោគរលាកអញ្ចាញធ្មេញ កាន់តែងាយជាងប្រក្រតី ការមានកំណកកំបោរច្រើន អាចធ្វើឱ្យកើតរោគធ្មេញពុក រលាក និងហើមអញ្ចាញធ្មេញ មានចេញឈាមទៀតផង។
2. មានរបាយការណ៍មួយបញ្ជាក់ថា មេរោគបាក់តេរី ដែលធ្វើឱ្យកើតសភាវរលាកអញ្ចាញធ្មេញនោះ អាចឆ្លងចូលទៅក្នុងលោហិត ជំរុញឱ្យមានអ័រម៉ូន Prostaglandin E2 កើនឡើង ដោយអ័រម៉ូននេះនឹងកើតមាន នៅពេលជិតគ្រប់កំណត់ឆ្លងទន្លេ ទើបគេតែងប្រទះឃើញនៅលើមាតា ដែលមានសភាវរលាកអញ្ចាញធ្មេញធ្ងន់ធ្ងរ ច្រើនតែឆ្លងទន្លេមុនពេលកំណត់ ហើយនិងទារកកើតមកមានទម្ងន់ខ្លួនតិច។
3. អាការក្អួតចង្អោរបណ្តាលមកពីការចាញ់ផ្ទៃពោះញឹកញាប់ ធ្វើឱ្យមានអាស៊ីតពីក្រពះអាហារ ចេញបញ្ច្រាស់មកក្នុងប្រអប់មាត់ បើមិនលាងជាតិអាស៊ីតនោះចេញជាបន្ទាន់ទេ អាចធ្វើឱ្យអវយវៈក្នុងប្រអប់មាត់សឹករេចបាន។
4. ការបរិភោគអាហារដែលមានរសជាតិជូរញឹកញាប់ ក៏មានផលធ្វើឱ្យធ្មេញសឹកពុកបានដែរ។
5. ស្ត្រីមានគភ៌ ច្រើនតែបរិភោគតិចៗ តែច្រើនដង ការបរិភោគញឹកញាប់ បរិភោគបង្អែម និងអាហារដែលជាប់ធ្មេញ នឹងធ្វើឱ្យងាយកើតរោគធ្មេញពុក៕
6. សម្រាប់ទារក ធ្មេញទឹកដោះនឹងចាប់ផ្តើមដុះតាំងពីមានអាយុ នៅក្នុងគភ៌មារតាបាន 4-6សប្តាហ៏។ ការកកើតធ្មេញ ត្រូវការសារធាតុអាហារច្រើនប្រភេទ ដូចគ្នានឹងការរីកលូតលាស់របស់រាងកាយដែរ ជាពិសេសសារធាតុរ៉ែ ពពួកកាល់ស្យូម ផូស្វ័រ ដែលវានឹងទៅស្រោបធ្មេញ ធ្វើឱ្យសាច់ធ្មេញមានភាពរឹងមាំ។
ការណែនាំសម្រាប់ស្ត្រីមានផ្ទៃពោះ
1. ដុសធ្មេញ និងប្រើខ្សែអំបោះខាត់ធ្មេញរៀងរាល់ថ្ងៃ យ៉ាងហោចណាស់ 1ថ្ងៃ 2ដង ព្យាយាមដុសខាត់ឱ្យស្អាត ទាំងក្នុងប្រឡោះធ្មេញ និងម្តុំជើងអញ្ចាញធ្មេញ និងគួរខ្ពុរមាត់ ឬដុសធ្មេញរាល់លើកក្រោយពេលបរិភោគអាហាររួច។
2. បើមានអាការចាញ់កូន ក្អួតចង្អោរ គួរខ្ពុរមាត់ដោយទឹកស្អាត ឬទឹកថ្នាំខ្ពុរមាត់ ផ្លួអូរ៉ាយ ដើម្បីកាត់បន្ថយបរិមាណអាស៊ីតដែលចេញពីក្រពះ និងហាមដុសធ្មេញ រយះពេល 30នាទីបន្ទាប់ពីក្អួត ព្រោះអាស៊ីតដែលចេញមកនោះ វាធ្វើឱ្យស្រទាប់ធ្មេញខាងលើទន់ផុយ បើសិនដុសធ្មេញភ្លាមៗ នឹងធ្វើឱ្យធ្មេញឆាប់សឹករេចរិលអស់។
3. បរិភោគអាហារឱ្យគ្រប់ 5ប្រភេទក្រុម ដើម្បីសុខភាពរបស់ម្តាយ និងកូនក្នុងផ្ទៃ។ កាល់ស្យូមជាសារធាតុអាហារសំខាន់ក្នុងការសាងធ្មេញរបស់ទារក ដោយបានទទួលកាល់ស្យូមតាមរយៈឈាមរបស់ម្តាយ ដូច្នេះម្តាយគួរបរិភោគកាល់ស្យូមឱ្យបានគ្រប់គ្រាន់។
4. គួរចៀសវាងអាហារផ្អែមៗ ឬអាហារណាដែលស្អឹតជាប់ធ្មេញ ដើម្បីការពារធ្មេញពុក។
5. គួរទៅត្រួតពិនិត្យធ្មេញរៀងរាល់ 6ខែម្តង ហើយបើមានអាការឈឺ ហើម រលាកអញ្ចាញធ្មេញ គួរតែទៅទទួលការព្យាបាលជាបន្ទាន់ ព្រោះសុខភាពក្នុងប្រអប់មាត់របស់មាតា មានផលប៉ះពាល់ដល់សុខភាពរបស់ទារក។
មេរោគបាក់តេរី នៅក្នុងប្រអប់មាត់ម្តាយ អាចបញ្ជូនបន្តទៅដល់កូនបាន ការមានសុខភាពប្រអប់មាត់ល្អ គ្មានធ្មេញពុក ឬរលាកអញ្ចាញធ្មេញ នឹងជួយកាត់បន្ថយបរិមាណមេរោគបាក់តេរីដល់ទារកបាន៕
January 15, 2021
ការការពារឧប្បត្តិហេតុចំពោះក្មេងតូចក្នុងអំឡុងវ័យ 1-12ខែ តើឪពុកម្ដាយត្រូវប្រយ័ត្នអ្វីខ្លះ?
ឧប្បត្តិហេតុ គឺជារឿងមិននឹកស្មានដល់ដែលគ្មានអ្នកណាចង់ឱ្យកើតឡើងឡើយ ជាពិសេសបំផុតកូនតូចក្នុងវ័យទារក ព្រោះអាចនាំមកនូវគ្រោះថ្នាក់ធ្ងន់ធ្ងរផ្សេងៗខ្លាំងជាមនុស្សចាស់ និងក្មេងធំ។ ទាំងអស់នេះបើឪពុកម្ដាយ ឬអ្នកមើលថែទាំទារកបាននឹកដល់ឧប្បត្តិហេតុដែលអាចនឹងកើតឡើងក្នុងអំឡុងវ័យនីមួយៗរបស់ទារក វាអាចកាត់បន្ថយឱកាសក្នុងការកើតឧប្បត្តិហេតុលើក្មេងតូចបាន។
អំឡុងអាយុ 1ដល់ 2ខែ
ទារកនឹងអាចលើកក្បាលឡើងបានបន្តិច តាមសម្លឹងមើល យំរំខានកាន់តែច្រើន ជាពិសេសក្នុងអំឡុង 3ខែដំបូងនៃជីវិត។ ឧប្បត្តិហេតុដែលគួរប្រយ័ត្នគឺ ការរបូតធ្លាក់ចេញពីដៃមនុស្សធំដែលព ឬបី ឬឧប្បត្តិហេតុនៅពេលមនុស្សធំកាន់វត្ថុក្ដៅៗក្នុងដៃខណៈពេលបីទារក និងគួរប្រយ័ត្ន Shaken baby syndrome ជាសភាវដែលកើតពីការចាប់អង្រួនទារកខ្លាំងៗ ដែលមានមូលហេតុមកពីអារម្មណ៍ដែលខឹងមួម៉ៅខ្លាំង រួមទាំងការមិនបានដឹងពីផលប៉ះពាល់របស់មនុស្សធំ។ ការចាប់អង្រួនទារកខ្លាំងៗ នឹងធ្វើឱ្យសាច់ខួរក្បាលប៉ះទង្គិចនឹងឆ្អឹងលលាដ៍ក្បាល សរសៃឈាមជុំវិញសាច់ខួរក្បាលដាច់រហែក រហូតកើតសភាវហូរឈាមក្នុងខួរក្បាល ផ្ទាំងប្រព័ន្ធប្រសាទកែវភ្នែករងគ្រោះថ្នាក់ ខួរក្បាលប៉ះទង្គិចខ្លាំងក្លា អាចធ្វើឱ្យខ្វាក់ភ្នែក ឬដល់ថ្នាក់ស្លាប់បាន។
អំឡុងអាយុ 4-5ខែ
ទារកនឹងអាចលើកក្បាលត្រង់បានហើយ ចេះគប់វត្ថុតូចៗដែលកាន់នៅក្នុងដៃ និងអាចក្រឡាប់ខ្លួនបានហើយ ដូច្នេះទើបគួរប្រយ័ត្នឧប្បត្តិហេតុដែលបណ្ដាលមកពីការក្រឡាប់ខ្លួននេះ ឬរបស់លេងដែលងាយបែកបាក់ ឬវត្ថុមុតស្រួច រួមទាំងឧប្បត្តិហេតុដោយសាររថយន្ត ដោយសារតែក្នុងអំឡុងវ័យនេះ មនុស្សធំច្រើនតែចាប់ផ្ដើមនាំទារចេញក្រៅផ្ទះច្រើនឡើងហ្នឹងឯង។ ការធ្វើដំណើរចេញក្រៅផ្ទះដោយរថយន្ត គួរឱ្យទារកអង្គុយក្នុង ខារ៍ស៊ីត(Carseat) សម្រាប់ទារកបែបបែរមុខទៅខាងក្រោយ និងគួរឱ្យអង្គុយបែបបែរទៅក្រោយនេះរហូតដល់អាយុ 2ឆ្នាំ។
អំឡុងអាយុ 6ខែ
ទារកនឹងចាប់ផ្ដើមងើបខ្លួនឡើងបានដោយខ្លួនឯង ក្រឡាប់បានកាន់តែចំណានឡើង បង្វិលខ្លួនទៅមុខបាន តែនៅត្រូវអាស្រ័យការជួយទប់ប្រគងខ្លះៗ និងអាចផ្ទេររបស់របរពីដៃម្ខាងទៅដៃម្ខាងបានហើយ។ ក្នុងអំឡុងវ័យនេះ ឪពុកម្ដាយមួយចំនួននឹងចាប់ផ្ដើមឱ្យកូនអង្គុយក្នុងកៅអីរទេះហាត់ដើរហើយ ដែលរឿងនេះមិនគួរធ្វើជាទីបំផុត ព្រោះអាចនាំមកនូវគ្រោះថ្នាក់ដែលធ្ងន់ធ្ងរបានតាមរយៈការធ្លាក់ពីទីខ្ពស់ ឬការដែលរទេះហាត់ដើរក្រឡាប់ជាដើម ដែលនឹងនាំឱ្យមានការរងគ្រោះដល់ឆ្អឹងកងក និងឈាមហូរនៅក្នុងខួរក្បាលដែលបណ្ដាលមកពីការដួលបោកក្បាល និងបាក់ឆ្អឹងដៃ-ជើង រួមទាំងគួរប្រយ័ត្នការទាក់កទារកដោយខ្សែភ្លើង ឬខ្សែរូតវាំងននជាដើម។
អំឡុងអាយុ 9ខែ
ទារកនឹងអាចអង្គុយបានដោយមិនចាំបាច់ជួយទប់ អាចវារ និងលូនបាន ដៃអាចចាប់កាន់យកវត្ថុតូចៗបាន និងចេះយកដៃដាក់ក្នុងមាត់ និងយកចំណីដាក់ចូលមាត់ខ្លួនឯងបានហើយ ដូច្នេះទើបត្រូវប្រយ័ត្នការដែលទារករំកិលខ្លួនទៅជិតទឹក ឬវត្ថុក្ដៅៗ ដែលអាចកើតឧប្បត្តិហេតុពីការលង់ទឹក ឬរលាកទឹកក្ដៅ ឬវត្ថុក្ដៅៗបាន។ ក្រៅពីនេះគួរប្រយ័ត្នការស្លាក់ចំណីអាហារ ឬវត្ថុតូចៗផ្សេងៗដែលទារកចាប់ដាក់ចូលមាត់ រហូតធ្វើឱ្យស្ទះបំពង់ផ្លូវដង្ហើម ដូចជាគ្រាប់សណ្ដែកតូចៗ ឬកាក់ជាដើម។
អំឡុងអាយុ 12ខែ
ទារកនឹងអាចឈរបានមួយភ្លែតៗ តោងនឹងរបស់អ្វីម្យ៉ាងដើម្បីងើបឈរឡើងបានដោយខ្លួនឯង អាចដើរបានដោយការដឹកដៃពីមនុស្សធំ អាចចាប់កាន់វត្ថុតូចៗដោយម្រាមចង្អុលដៃ និងម្រាមមេដៃ និងដួសចំណីអាហារដាក់ចូលមាត់ខ្លួនឯងបាន ដូច្នេះទើបត្រូវប្រយ័ត្នលើការញ៉ាំវត្ថុចម្លែកៗ ឬយកវត្ថុដែលមានជាតិពុលផ្សេងៗដាក់ចូលមាត់។ ការស្លាក់អាហារ ឬវត្ថុរបស់របរ ឧប្បត្តិហេតុពីការលង់ទឹក ឬរអិលធ្លាក់ជំពប់ដួលផ្សេងៗ ជាពិសេសការធ្លាក់ពីទីខ្ពស់ ឬពីបង្អួច ដោយសារតែពេលខ្លះអ្នកមើលថែទាំអាចភ្លេចថា ទារកអាចកម្រើក ឬរំកិលខ្លួនទៅណាមកណាដោយខ្លួនឯងបានច្រើនហើយ។
ឪពុកម្ដាយគួរឧស្សាហ៍សង្កេតមើលវិវឌ្ឍនាការផ្សេងៗតាមវ័យរបស់ទារក និងត្រូវនឹកគិតក្នុងចិត្តជាប់ជានិច្ចថា តើស្ថានភាពជុំវិញផ្សេងៗ រួមទាំងវត្ថុរបស់របរជុំវិញខ្លួន អាចជាមូលហេតុធ្វើឱ្យកើតឧប្បត្តិហេតុបាន ឬទេ? ដើម្បីជួយកាត់បន្ថយភាពប្រថុយប្រថាន និងបង្ការគ្រោះថ្នាក់ពីឧប្បត្តិហេតុដែលកើតឡើងពីការធ្វេសប្រហែស ឬស្មានមិនដល់។ ដើម្បីសុវត្ថិភាពរបស់ទារក ទាំងអស់នេះគួរឱ្យទារកស្ថិតក្នុងក្រសែភ្នែករបស់មនុស្សធំជានិច្ច៕
December 28, 2020
ស្រ្តីមានគភ៌ គួរត្រៀមខ្លួនឱ្យបានស្រេច 1ខែមុនដល់ពេលប្រសូត…
នៅសល់ 1ខែទៀតមុនដល់ពេលឆ្លងទន្លេ គឺជាអំឡុងពេលនៃការទន្ទឹងរង់ចាំរបស់ស្ត្រីមានគភ៌គ្រប់ៗរូប ព្រោះទាំងរំភើបចិត្តផង ទាំងត្រេកអរផង ដែលជិតបានឃើញមុខកូនសម្លាញ់ ខណះពេលជាមួយគ្នា ក៏មានអារម្មណ៍នឹកខ្លាចចំពោះក្តីឈឺចាប់ដែលនឹងកើតមានឡើង ហើយនិងរឿងផ្សេងៗជាច្រើនទៀតដែរ។ ថ្ងៃនេះ ទស្សនាវដ្តី ឡារ៉ែន មានដំបូន្មានល្អៗ ពីគ្រូពេទ្យជំនាញមកជម្រាបអ្នកមានគភ៌លើកដំបូង ដែលនៅមិនទាន់មានបទពិសោធក្នុងរឿងនេះថា តើត្រូវត្រៀមខ្លួនយ៉ាងណាខ្លះមុនដល់ពេលប្រសូត ដូចតទៅ៖
ឈានចូលដល់ខែទី 9
ក្នុងរយ:ពេលនេះ គ្រូពេទ្យនឹងណាត់ឱ្យទៅពិនិត្យគភ៌កាន់តែញឹកញាប់ឡើងរៀងរាល់សប្តាហ៍ ដើម្បីពិនិត្យមើលភាពត្រៀមខ្លួនជាស្រេច និងអាការផ្សេងៗដែលកើតមានឡើងថា តើប្រក្រតី ឬក៏អត់?។ ក្នុងអំឡុងពេលនេះ ស្ត្រីមានគភ៌ជិតគ្រប់ខែនឹងមានអាការឈឺរាងធ្ងន់ៗនៅម្តុំក្រោមផ្ចិតនៅពេលដើរ ជើងនឹងហើម មានអារម្មណ៍ឈឺផ្សាៗនៅត្រង់ចុងដង្ហើម ដោយសារតែអាស៊ីតរំលាយអាហារហូរបញ្រ្ចាស់ឡើង ព្រោះទំហំក្បាលពោះដែលធំឡើង ធ្វើឱ្យក្រពះត្រូវបានរុញឡើងមកលើ អាហារមិនសូវរំលាយ ឆ្អល់ណែនពោះ និងជួនកាលអាចត្រូវភ្ញាក់ឡើងកណ្តាលយប់ ព្រោះតែប្រគ្រីវកាច់ជើង រហូតដល់ត្រូវដាស់លោកប្តីឱ្យជួយរឺតជើងឱ្យទៀតផង។
ត្រៀមខ្លួនជាស្រេច…មុនពេលឆ្លងទន្លេ
ការត្រៀមជាស្រេចទាំងរាងកាយ ផ្លូវចិត្ត និងរបស់របរប្រើប្រាស់ផ្សេងៗ នឹងជួយឱ្យស្ត្រីមានគភ៌ទៅប្រសូតបុត្របានយ៉ាងជឿជាក់ក្នុងចិត្ត និងមានអារម្មណ៍ធូរស្រាល តែ…តើត្រូវត្រៀមរឿងអ្វីខ្លះនោះ សូមតាមដានជាបន្ត។
1.មន្ទីពេទ្យ
- ត្រូវប្រឹក្សាជាមួយគ្រូពេទ្យជានិច្ច បើសិនមានបញ្ហាអ្វីគួរសង្ស័យពាក់ព័ន្ធនឹងគភ៌។
- អាចនឹងត្រូវសាកល្បងជិះរថយន្ត ដើម្បីប៉ាន់ស្មានរយ:ពេលធ្វើដំណើរពីផ្ទះទៅមន្ទីរពេទ្យ ឬរកមើលផ្លូវណាផ្សេងដែលងាយស្រួល និងលឿនជាង ទុកបម្រុងនៅថ្ងៃឈឺពោះប្រសូតជាស្រេច។
2.ត្រៀមរាងកាយ
- ត្រៀមរឿងអាហារការហូបចុក ៈ គួរបរិភោគអាហារណាដែលមានប្រូតេអ៊ីនច្រើន តែបន្ថយអាហារដែលមានរសជាតិខ្លាំងៗ ដូចជាប្រៃខ្លាំង ជូរខ្លាំង ជាពិសេសរសជាតិហឹរ ព្រោះវានឹងធ្វើឱ្យអ្នកមានគភ៌ហើមខ្លួន។ គួរទទួលបន្លែផ្លែឈើរួមជាមួយផង ដើម្បីកាត់បន្ថយអាការណែនឆ្អល់ពោះ។
- គួរញ៉ាំថ្នាំបំប៉នតាមដែលលោកគ្រូពេទ្យឱ្យមកឱ្យបានគ្រប់ ដូចជាថ្នាំបំប៉នលោហិត វិតាមីនរួម និងកាល់ស្យូម ព្រោះក្នុងអំឡុងពេលប្រសូត ស្ត្រីមានគភ៌អាចនឹងត្រូវបាត់បង់ឈាមច្រើន ហើយការញ៉ាំថ្នាំបំប៉ននឹងជួយធ្វើឱ្យអ្នកម្តាយថ្មោងថ្មី ឆាប់ស្រួលខ្លួនឡើងវិញផង។
- រកទិញរបស់របរប្រើប្រាស់ចាំបាច់ៗ ទាំងរបស់អ្នកម្តាយ និងរបស់កូនតូច ទុកជាស្រេច ព្រោះក្រោយពេលប្រសូតរួច អ្នកម្តាយថ្មោងថ្មីមិនអាចមានពេលទៅដើររកទិញបានទេ។
3.ត្រៀមប្រសូត
- ក្នុងករណីដែលស្ត្រីមានគភ៌ មិនមានលក្ខណៈខុសប្រក្រតីខាងរាងកាយ ឬខាងវេជ្ជសាស្រ្តណាដែលតម្រូវឱ្យប្រសូតដោយការវះកាត់ទេនោះ អ្នកគួរតែប្រសូតតាមវិធីធម្មជាតិ។
- កំណត់ផែនការក្រោយពេលប្រសូតរួចជាស្រេចថា តើត្រូវពន្យារកំណើត(គ្រាវ)ឬយ៉ាងណា? បើត្រូវពន្យារកំណើត(គ្រាវ) គួរតែប្រាប់គ្រូពេទ្យឱ្យបានដឹងជាមុន ដើម្បីភាពងាយស្រួលក្នុងការត្រៀមខ្លួនរបស់គ្រូពេទ្យ។
4.ត្រៀមចិត្ត ត្រៀមថ្លើម
- អ្នកមានគភ៌គ្រប់ខែ ត្រូវត្រៀមខ្លួនទប់ទល់នឹងសភាវសោកសៅក្នុងចិត្ត ដែលអាចកើតឡើងក្រោយពេលប្រសូតរួច ដែលមានដូចជា យំខ្សឹកខ្សួលពេញ 1ថ្ងៃ ភ័យខ្លាចប្តីលែងស្រឡាញ់ និងត្រូវបោះបង់ចោល ខ្លាចខ្លួនលែងស្អាតដូចកាលពីពេលមុន ជាដើម និងកុំភ្លេចសួរពីវិធីកែបញ្ហានេះជាមួយគ្រូពេទ្យដើម្បីទុកប្រត្តិបត្តិតាមផង។
អាការប្រាប់ឱ្យដឹងខ្លួន មុនពេលប្រសូត
1. ឈឺពោះយ៉ាងខ្លាំងជាប់ជានិច្ច រៀងរាល់ 3នាទី និងឈឺម្តងៗប្រហែលជា 40វិនាទី។
2. មានឈាមចេញមកតាមរន្ធស្បូន (បញ្ជាក់ ៈ អាការនេះទោះមិនឈឺពោះក៏ដោយ ក៏ត្រូវទៅមន្ទីរពេទ្យដែរ)។
3. មានទឹកភ្លោះហូរចេញមកតាមរន្ធស្បូន អាការនេះទោះមិនឈឺពោះក៏ដោយ ក៏ត្រូវប្រញាប់ទៅមន្ទីរពេទ្យដែរ ព្រោះថង់ទឹកភ្លោះអាចបែកទៅហើយ បើទុកចោលយូរអាចនឹងធ្វើឱ្យឆ្លងមេរោគបាន។
សភាវជ្រៀតជ្រែកពីរោគផ្សេងៗដែលអាចកើតឡើង
1. មានធ្លាក់ឈាម ជាសភាវដែលសុកធ្លាក់ចុះមកទាប ដោយសុកនឹងរំកិលមកតោងនៅម្តុំមាត់ស្បូន ឬផ្នែកក្រោមរបស់មាត់ស្បូន ធ្វើឱ្យមាត់ស្បូនដាច់រហែក ហើយមានឈាមហូរជ្រាបចេញមក។
2. សម្ពាធឈាមឡើងខ្ពស់ ជាដើមហេតុរបស់សភាវគភ៌មានជាតិពុល នឹងធ្វើឱ្យស្ត្រីមានគភ៌ហើមជើង ហើមមុខ អ្នកខ្លះមានឈឺក្បាលទៀតផង ដែលជាហេតុអាចធ្វើឱ្យស្ត្រីមានគភ៌ប្រកាច់ ឬបែកសរសៃឈាមក្នុងខួរក្បាលបាន។
3. ទារកលែងសូវរើ ដែលអាចមានមូលហេតុមកពីសុកចាប់ផ្តើមធ្វើការខ្សោយ ឬខ្សែទងសុកទៅរុំ-កទារក ដែលករណីនេះ ជាគ្រោះថ្នាក់ចំពោះទារកខ្លាំងណាស់។ ពេលស្ត្រីមានគភ៌ជួបអាការដូចដែលបានរៀបរាប់មកខាងលើនេះ ចូរប្រញាប់ទៅជួបគ្រូពេទ្យភ្លាមជាបន្ទាន់។
នៅពេលរាងកាយត្រៀមរួចរាល់ ចិត្តត្រៀមរួចរាល់…ពេលនេះស្ត្រីមានគភ៌គ្រប់ខែ អាចទៅប្រសូតបុត្រដោយភាពជឿជាក់បានហើយ។ ក្តីឈឺចាប់ដែលកើតឡើងក្នុងពេលប្រសូត នឹងរលាយបាត់អស់ នៅពេលដែលអ្នកម្តាយថ្មោងថ្មីបានឃើញមុខកូនសម្លាញ់ និងក្លាយទៅជាក្តីរំភើបសោមនស្សរីករាយពេញក្នុងចិត្តវិញមិនខាន។
ការត្រៀមសម្ភារសម្រាប់ចូលមន្ទីសម្ភព
.សម្រាប់អ្នកម្តាយ
1. ប័ណ្ណពិនិត្យសុខភាពគភ៌ និងអត្តសញ្ញាណប័ណ្ណ
2. សំឡីអនាម័យ និងអាវក្នុងសម្រាប់ពាក់បំបៅដោះកូន
3. សម្លៀកបំពាក់អ្នកម្តាយ សម្រាប់ស្លៀកពេលចេញពីមន្ទីរពេទ្យ
4. អាហារ និងភេស្ជជៈ (ព្រោះក្រោយពេលឆ្លងទន្លេរួច អ្នកម្តាយនឹងឃ្លានខ្លាំងណាស់)
5. កូនកាបូបតូចមួយ សម្រាប់ដាក់គ្រឿងសម្អាង
6. កន្សែងជូតមុខ និងកន្សែងពោះគោសម្រាប់ជូតខ្លួន
7. កាមេរ៉ាថតរូប ក្នុងករណីដែលខាងមន្ទីរពេទ្យអាចអនុញ្ញាតឱ្យថតរូបបាន
.សម្រាប់ទារក
1. ក្រណាត់កន្ទប សម្រាប់រុំខ្លួនទារក
2. ខោអាវកូនតូច (សម្រាប់ទារកទើបកើត)
3. ទឹកសាប៊ូសម្រាប់បោកជម្រះផ្សេងៗ
4. កូនខ្នើយសម្រាប់ទ្រាប់ក្បាលកូនពេលបីបំបៅដោះ
5. ក្រណាត់ ឬកន្សែងសម្រាប់រុំខ្លួនកូនពេលត្រឡប់ទៅផ្ទះវិញ៕
December 25, 2020
អាហារ និងថ្នាំ 5យ៉ាង ដែលអ្នកម្តាយកំពុងបំបៅដោះកូន ហាមទទួលទាន…
ក្នុងអំឡុងពេលដែលអ្នកម្តាយចិញ្ចឹមកូនដោយទឹកដោះរបស់ខ្លួននោះ ការទទួលទានអាហាររបស់អ្នកម្តាយ គឺជារឿងមួយដែលត្រូវប្រយ័ត្នខ្លាំងជាងពេលប្រក្រតី ព្រោះសារធាតុអាហារខ្លះអាចត្រូវបញ្ជូនបន្តទៅកូនតូចតាមរយៈទឹកដោះម្តាយ ធ្វើឱ្យទឹកដោះរបស់អ្នកម្តាយមានរសជាតិប្រែប្រួល ឬអាចធ្វើឱ្យមានសារធាតុគីមីប្រមូលសន្សំនៅក្នុងរាងកាយកូនបាន ដូច្នេះយើងនាំគ្នាមកមើលថា តើអាហារ និងថ្នាំទាំង 5យ៉ាងដែលអ្នកម្តាយកំពុងបំបៅដោះកូនត្រូវតម និងហាមញ៉ាំនោះ មានអ្វីខ្លះ?។
1.ឱសថបុរាណមួយចំនួន ថ្នាំចិនសែប្រភេទខ្លះ ឬស្រាថ្នាំជាដើម មិនគួរទទួលទានទេ ព្រោះអាចធ្វើឱ្យកូនហើមពោះ រាក យំរករឿងច្រើន ឬបន្ទោបង់ខុសប្រក្រតីទៀតផង។
2.ហាមទទួលទានវត្ថុជ្រក់ ត្រាំ ឬភេសជ្ជៈដែលមានជាតិអាល់កុល(ជាតិស្រវឹង) ព្រោះជាតិអាល់កុលមានផលប៉ះពាល់ដល់ខួរក្បាលរបស់កូនតូចដោយត្រង់។
3.អាហារដែលមានរសជាតិហឹរខ្លាំង គួរតមសិន ព្រោះនឹងធ្វើឱ្យកូនបានទទួលរសជាតិហឹរពីទឹកដោះម្តាយដែរ និងអាចធ្វើឱ្យកូនតូចឈឺពោះបាន តែបើអាហារឱសថបុរាណមួយចំនួនដូចជា ស្លឹកម្រះព្រៅ ខ្ញី ម្រេច អាចទទួលទានបាន ព្រោះជាអាហារដែលមានរសជាតិក្តៅខុសពីម្ទេស។ អាហារឱសថបុរាណដែលមានរសជាតិក្តៅទាំងនោះ ថែមទាំងជួយបំប៉នទឹកដោះម្តាយទៀតផង។
4.បន្លែដែលមានជាតិហ្គាសច្រើន ដូចជា ស្ពៃក្តោប ផ្កាខាត់ណា ឬបន្លែស្រស់ប្រភេទខ្លះ គួរតមសិន ព្រោះអាចធ្វើឱ្យកូនហើមពោះបាន ឬបើចង់ញ៉ាំ គួរញ៉ាំបន្លែដែលឆ្អិនហើយប្រសើរជាង។
5.ថ្នាំពេទ្យមួយចំនួនមានផលប៉ះពាល់ដល់កូនតាមរយៈទឹកដោះម្តាយ ដូច្នេះបើអ្នកម្តាយកើតមានអាការឈឺថ្កាត់អ្វីមួយ និងត្រូវការប្រើប្រាស់ថ្នាំ ត្រូវប្រឹក្សាជាមួយគ្រូពេទ្យជាមុនសិនគ្រប់ពេល៕
December 24, 2020