សុខភាព - La Reine Media

ដើម្បីអាចគេចផុតពីរោគរាតត្បាត ជនជាតិអាមេរិកាំង1ក្រុម បង្កើត “ជំរំស្វ័យការពារ” នៅតំបន់ព្រៃភ្នំ

ផ្លូវលំតូចមួយនៅឯតំបន់ Virginia ខាងលិច ក្បែរជើងភ្នំ Appalachia នាំទៅកាន់ជំរំមួយដែលស្ថិតនៅក្នុងព្រៃរបស់មនុស្សមួយក្រុមដែលគេចាត់ទុកថាជាអ្នកកាន់ “លទ្ធិការពារខ្លួន” (survivalism)។

ក្រុមនេះ បានចាប់ផ្ដើមត្រៀមតាំងពីយូរមកហើយ សម្រាប់ការដួលរលំនៃអរិយធម៌របស់មនុស្សជាតិ មុនពេលរោគរាតត្បាត COVID-19 បានមកដល់។

ជាមួយនឹងសម្ភារប្រើប្រាស់ ស្បៀងអាហារដែលមានសុពលភាពប្រើប្រាស់ដល់ទៅ25ឆ្នាំ រួមនឹងអង្ករ និងម្សៅមីជាដើម មនុស្សទាំងនេះ បាននាំគ្នាគេចចេញពីតំបន់ដែលអាចឆ្លងរោគ COVID-19 ទៅរស់នៅក្នុងតំបន់សុវត្ថិភាពដែលស្ថិតនៅក្នុងព្រៃជ្រៅ។ ស្បៀងអាហាររបស់ពួកគេត្រូវបានតម្រៀបយ៉ាងមានរបៀប នៅក្នុងឃ្លាំងក្រោមដី ដែលធ្វើអំពីបេតុង និងដែកយ៉ាងរឹងមាំ។

ក្រុមមនុស្សកាន់ “លទ្ធិការពារខ្លួន” ដែលគេហៅក្រុម Fortitude Ranchនេះ សម្បូរទៅដោយសម្ភារចាំបាច់ដែលកំពុងត្រូវបានគេតាម “ប្រមាញ់” នៅទូទាំងពិភពលោក នោះគឺ ក្រដាសអនាម័យ និងម៉ាស់។

Steve Rene ជាអ្នកគ្រប់គ្រងជំរំលាក់ខ្លួនដែលមានផ្ទៃដីទំហំ 40ហិកតា បានឱ្យដឹងថា “ពេលនេះ វា (ជំរំលាក់ខ្លួន) មានតម្លៃខ្លាំងណាស់”។

បាវចនារបស់ក្រុម Fortitude Ranch គឺ “ត្រៀមរួចរាល់សម្រាប់ស្ថានភាពអាក្រក់បំផុត និងរីករាយនឹងបច្ចុប្បន្នភាព!”។ ជារៀងរាល់ឆ្នាំ សមាជិកក្នុងក្រុមនេះ មានពេល2សប្ដាហ៍ដើម្បីមកលេង និងសម្រាកលម្ហែកាយក្នុងតំបន់ដាច់ស្រយាល និងពោរពេញដោយសម្រស់ធម្មជាតិ ព្រមទាំងអាចដើរកម្សាន្ត ឬស្ទូចត្រី នៅក្នុងទន្លេដែលមានឈ្មោះថា “Lost”។ ក្រុមនេះ ក៏មានសាខាមួយផ្សេងទៀត នៅក្នុងរដ្ឋ Colorado ផងដែរ។

លោក Rene ដែលសមាជិកម្នាក់ក្នុងក្រុម “លទ្ធិការពារខ្លួន” Fortitude Ranch បានឱ្យដឹងថា “នេះមិនមែនជាក្រុមមនុស្សល្ងង់ល្ងីល្ងើ ដែលចេះតែគិតអំពីថ្ងៃអវសាននៃពិភពលោកនោះទេ។ យើងមិនបានរើសអើង ហើយយើងក៏មិនមានទំនាក់ទំនងជាមួយក្រុមប្រដាប់អាវុធណាមួយនោះដែរ”។

ប៉ុន្តែ នៅលើទីតាំងនៃមុមទាំង4របស់ជំរំនៃក្រុម Fortitude Ranchនេះ សុទ្ធតែមានប៉មយាម ហើយក្នុងបន្ទប់ទទួលភ្ញៀវក៏មានកាំភ្លើងកាណុងវែង1ដើមផងដែរ ដើម្បីបង្ហាញថា ក្រុមនេះ ធ្វើសកម្មភាពយ៉ាងហ្មត់ចត់។ Rene និយាយថា “ក្រុមមនុស្សដែលអស់សង្ឃឹម គឺគេធ្វើរឿងអស់សង្ឃឹម”។

ក្រុម Fortitude Ranch នេះ មិនបានចាត់ទុកកម្លាំងបរទេស ឬកម្លាំងពិភពខាងក្រៅ ជាការគំរាមកំហែងលើពួកគេនោះទេ ប៉ុន្តែ ពួកគេបានចាត់ទុកជនជាតិអាមេរិកាំងខ្លួនឯង ដែលមានភាពច្របូកច្របល់ អាចមានសកម្មភាពប្លន់ស្បៀងអាហាររបស់ពួកគេ នៅពេលមានការវាយប្រហារដោយអាវុធនុយក្លេអែរ ឬអាវុធជីវសាស្ត្រ ការបះបោរផ្នែកនយោបាយ និងមហារោគរោគរាតត្បាត។ល។

“ជាក់ស្ដែងបញ្ហាខាងលើនេះ កម្រនឹងកើតឡើង ប៉ុន្តែ វានៅតែមានលទ្ធភាពអាចកើតឡើង។ បើសិនអ្នកមិនបានត្រៀមខ្លួន អ្នកនឹងមិនដឹងថាត្រូវទៅណា និងធ្វើអ្វីនោះទេ។ ពេលមានអាសន្នធំកើតឡើង ភាពច្របូកប្របល់នឹងធ្វើឱ្យមនុស្សអាចដណ្ដើមគ្នារស់ ហើយនិងមានបញ្ហាជាច្រើនហួសពីសមត្ថភាពទប់ទល់របស់យើង” លោក Rene រៀបរាប់។

គណៈកម្មការនៃក្រុមខាងលើនេះ មានសមាជិកចំនួន5នាក់ ក្នុងនោះមាន Rene ផងដែរ។ ក្នុងករណីបន្ទាន់ Rene នឹងសម្រេចចិត្តថាតើត្រូវប្រកាសអាសន្នដែរ ឬអត់។ ពេលនោះ សមាជិកនៃគណៈកម្មការ នឹងត្រូវបានអញ្ជើញមកកាន់ជំរំខាងលើ។ អ្នកដែលមានបំណងចូលកាន់ជំរំរបស់ក្រុម Fortitude Ranch គឺត្រូវតែប្រើប្រាស់ពាក្យសម្ងាត់ដែលក្រុមនេះបានកំណត់។

ករណីមានមហារោគរាតត្បាតកើតឡើងទូទាំងប្រទេស អ្នកចំណូលថ្មីដែលចូលមកកាន់ជំរំនេះ នឹងត្រូវវាស់កម្ដៅខ្លួន មុនពេលត្រូវបានអនុញ្ញាតឱ្យចូលក្នុងតំបន់ដែលមានប្រព័ន្ធអេកូឡូស៊ី ដែលអាចចិញ្ចឹមជីវិតដោយខ្លួនឯងបាន។ នៅក្នុងជំរំនេះ មានអណ្ដូងទឹក ប្រព័ន្ធថាមពលព្រះអាទិត្យ វិទ្យុ ផ្ទះកញ្ចក់ សត្វចិញ្ចឹមផ្សេងៗ ដូចជា មាន់ ពពែ គោ រួមនឹងកន្លែងរំលាយសាកសពអ្នកជំងឺដែលស្លាប់ដោយសាររោគរាតត្បាត។

ស្ថាបនិករបស់ Fortitude Ranch គឺ Drew Miller ដែលជាអតីតអ្នកជំនាញផ្នែកចារកម្មយោធា ដែលបានបញ្ចប់ការសិក្សានៅសាកលវិទ្យាល័យ Harvard។

ខុសពីប្រព័ន្ធបន្ទប់លាក់ខ្លួននៅក្រោមដីដ៏មានតម្លៃថ្លៃ ដែលមហាសេដ្ឋីនានាបានសាងសង់ Fortitude Ranch របស់ Drew Miller ផ្ដោតទៅលើក្រុមមនុស្សដែលមានទ្រព្យធម្យម និងទាប។ អ្នកដែលចូលមកសម្រាកនៅទីនេះ គ្រាន់តែចំណាយ1,000ដុល្លារអាមេរិកប៉ុណ្ណោះក្នុង1ឆ្នាំ សម្រាប់កញ្ចប់ទាបបំផុតដែលមានគ្រែ1នៅក្នុងបន្ទប់ក្រោមដី។

ថ្មីៗនេះ Rene ទទួលបានការស្នើ និងសាកសួរព័ត៌មានជាច្រើនតាមរយៈអ៊ីម៉េល ខណៈដែលរោគរាតត្បាត COVID-19 កំពុងបង្កភាពវឹកវរនៅពាសពេញសហរដ្ឋអាមេរិក៕

ប្រភព៖ សារព័ត៌មានបរទេស

March 18, 2020

ស្រឡាំងកាំង!! ជនជាតិម៉ាឡេស៊ីប្រជ្រៀតគ្នាចូលប្រទេសសិង្ហបុរី ប៉ុន្មានម៉ោងមុនដល់កំណត់បិទប្រទេស…

ជនជាតិម៉ាឡេស៊ីចំនួនរាប់ពាន់នាក់ នាំគ្នាយួរកាបូបដាក់សម្ភារចាំបាច់ និងសម្លៀកបំពាក់ ធ្វើដំណើរឆ្លងព្រំដែនចូលទៅប្រទេសសិង្ហបុរី កាលពីអំឡុងពេលល្ងាចថ្ងៃអង្គារម្សិលមិញ(ទី17មីនា) ត្រៀមខ្លួនចាកចេញពីស្រុកកំណើតរយៈពេល 2សប្ដាហ៍ នៅប៉ុន្មានម៉ោង មុនពេលវិធានការបិទព្រំដែនរបស់រដ្ឋបាលម៉ាឡេស៊ីត្រូវបានអនុវត្ត។ នេះបើតាមការរាយការណ៍របស់សារព័ត៌មានរ៉យទ័រ។

ដោយសារក្លាយជាប្រទេសដែលបានរកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ច្រើនជាងគេនៅក្នុងតំបន់អាស៊ីភាគអាគ្នេយ៍ ម៉ាឡេស៊ីមានវិធានការហាមពលរដ្ឋរបស់ខ្លួនធ្វើដំណើរចេញទៅក្រៅប្រទេស និង ហាមជនបរទេសចូលមកក្នុងប្រទេសដូចគ្នា ចាប់តាំងពីអធ្រាត្រថ្ងៃទី17 មីនាកន្លងទៅ រហូតដល់ថ្ងៃទី31 មីនា ដើម្បីទប់ស្កាត់ការឆ្លងរាលដាលនៃមេរោគមរណៈនោះ។

ទាំងអស់នេះ ជាធម្មតា មានប្រជាជនម៉ាឡេស៊ីជាង 300,000នាក់ ដែលធ្វើដំណើរចេញ-ចូលទៅធ្វើការនៅក្នុងប្រទេសសិង្ហបុរីក្នុង 1ថ្ងៃៗ ហើយសេចក្ដីថ្លែងការណ៍កាលពីយប់ថ្ងៃចន្ទ(ទី16មីនា) អាចនឹងធ្វើឱ្យពួកគេត្រូវរស់នៅដោយគ្មានប្រាក់ចំណូលក្នុងរយៈពេលយូរ ដោយសារវិធានការបិទប្រទេសក្នុងគ្រានេះ។

ឡៅ តុងលីន អាយុ 21ឆ្នាំ បានប្រាប់ថា គេមានផែនការទៅសុំស្នាក់អាស្រ័យនៅជាមួយបងប្អូនជីដូនមួយនៅក្នុងប្រទេសសិង្ហបុរី “បើខ្ញុំមិនទៅទេ ខ្ញុំអាចចាំបាច់ត្រូវសុំច្បាប់ឈប់ដោយមិនបានទទួលប្រាក់ឈ្នួល និងខ្លាំងជាងនោះទៅទៀត គឺខ្ញុំខ្លាចអត់ការងារធ្វើ”

ប្រទេសសិង្ហបុរី ជាប្រទេសដែលមានប្រជាជនជាង 5.7លាននាក់ ដែលត្រូវពឹងលើជនជាតិម៉ាឡេស៊ីពីរដ្ឋយ៉ះហូរ យ៉ាងច្រើន សម្រាប់ធ្វើជាធនធានបុគ្គលិកក្នុងមុខជំនួញផ្សេងៗ រាប់តាំងពីភោជនីយដ្ឋាន រហូតទៅដល់ផ្នែកផលិត សឺមីខន់ដាក់ទើរ។

រដ្ឋបាលសិង្ហបុរី បានប្រាប់ថា នឹងជួយសង្គ្រោះក្រុមហ៊ុនផ្សេងៗ ដែលចាំបាច់ត្រូវរៀបចំត្រៀមកន្លែងស្នាក់នៅឱ្យពលករម៉ាឡេស៊ី ក្នុងនោះរួមទាំងសាលារៀន និងបន្ទប់ស្នាក់នៅតម្លៃថោកឱ្យពួកគេផងដែរ។

ក្រសួងការងារ បានបញ្ជាក់ថា នឹងឧបត្ថម្ភប្រាក់ចំនួន 50ដុល្លារសិង្ហបុរី(ប្រមាណ 30ដុល្លារអាមេរិក)ក្នុង 1យប់ ក្នុងរយៈពេល 14យប់ សម្រាប់ពលករម្នាក់ៗដែលក្រុមហ៊ុនមួយៗត្រូវតែជួយសម្រួលឱ្យ។

ប្រទេសសិង្ហបុរី កាលពីថ្ងៃអង្គារ(ទី17មីនា) បានរាយការណ៍ថា រកឃើញអ្នកឆ្លងមេរោគវីរុសកូរ៉ូណាប្រភេទថ្មីថែមទៀតចំនួន 23នាក់ ជាថ្ងៃដែលមានអ្នកឆ្លងមេរោគច្រើនបំផុត ចាប់តាំងពីការរកឃើញមានការឆ្លងរាលដាលមក ធ្វើឱ្យចំនួនអ្នកឆ្លងមេរោគនៅពេលនេះកើនឡើងដល់ 266នាក់ហើយ៕

ប្រភព ៖ ព័ត៌មានបរទេស

March 18, 2020

លាសិនហើយ Wuhan! ថ្ងៃក្រោយជួបគ្នាទៀត!

ក្រុមបុគ្គលិកសុខាភិបាលដែលត្រូវបានបញ្ជូនទៅកាន់ទីក្រុង Wuhan ដើម្បីជួយទប់ទល់នឹងរោគ COVID-19 បានចាប់ផ្ដើមចាកចេញពីទីក្រុងនេះ ជាបណ្ដើរៗហើយ បន្ទាប់ពីបានបំពេញភារកិច្ចចប់ជាស្ថាពរ។

ក្រុមបុគ្គលិកសុខាភិបាលសរុប 41ក្រុម ដែលមានសមាជិកចំនួន 3,675នាក់ នឹងត្រូវបានអនុញ្ញាតឱ្យចាកចេញពីទីក្រុង Wuhan ទៅកាន់កន្លែងដើមរបស់ពួកគេ ជាបណ្ដើរៗ។ ពួកគេបានចូលរួមក្នុងការប្រយុទ្ធប្រឆាំង COVID-19 នៅក្នុងមន្ទីរបណ្ដោះអាសន្ន (field hospital) ចំនួន14កន្លែង និងមន្ទីរពេទ្យដែលរដ្ឋប្រើជាកន្លែងដាក់អ្នកជំងឺកូរ៉ូណាផ្សេងទៀតចំនួន7កន្លែង នៅក្នុងអំឡុងពេល “ធ្វើសង្គ្រាម” ជាមួយវីរុសកូរ៉ូណានេះ។ ក្នុងនោះ ក្រុមគ្រូពេទ្យនៃមន្ទីរពេទ្យ សាអានស៊ី (Shaanxi Provincial People’s Hospital) ដែលមានសមាជិកចំនួន 43នាក់ គឺជាក្រុមដែលត្រូវចាកចេញពី Wuhan ដោយចាប់ផ្ដើមធ្វើដំណើរចេញពីទីក្រុង នៅព្រឹកថ្ងៃទី17មីនា។

Ma Fuchun ប្រធានក្រុមសង្គ្រោះបន្ទាន់នៃមន្ទីរពេទ្យ សាអានស៊ី និយាយថា “យើងមកកាន់ Wuhan កាលពីថ្ងៃទី4មីនា ហើយបានធ្វើការនៅមន្ទីរពេទ្យបណ្ដោះអាសន្ន រយៈពេល40ថ្ងៃមកហើយ។ រួមជាមួយនឹងមិត្តរួមការងារក្នុងទីក្រុង Wuhan និងខេត្ត Henan យើងបានគ្រប់គ្រងគ្រែអ្នកជំងឺចំនួន 988គ្រែ ដោយបានព្យាបាលអ្នកជំងឺ 1,235នាក់។ សំណាងល្អណាស់ អ្នកជំងឺដែលយើងខ្ញុំបានព្យាបាល មិនមានអ្នកណាម្នាក់ស្លាប់នោះឡើយ ហើយក៏មិនមានបុគ្គលិកណាម្នាក់ ឆ្លងមេរោគនេះដែរ”។ នេះបើតាមសារព័ត៌មាន Xinhua។

នៅពេលចាកចេញពីទីក្រុង Wuhan ពួកគេមានអារម្មណ៍ក្ដុកក្ដួលណាស់។ មានអ្នកខ្លះយំដូចកូនក្មេង អ្នកខ្លះសើចទាំងស្រក់ទឹកភ្នែក។

បន្ទាប់ពីមន្ទីរពេទ្យ សាអានស៊ី ក្រុមបុគ្គលិកដែលមកពីខេត្តក្រុងផ្សេងៗដូចជា ជាំងស៊ូ ហ្គន់ស៊ូ ក្វាងទុង សានដុង និងខេត្តស៊ីឈួន ជាដើម នឹងត្រូវចាកចេញពីទីក្រុង Wuhan ដែលជាអតីតសម្បុកមេរោគកូរ៉ូណា ទៅតាមការរៀបចំរបស់អាជ្ញាធរ។

មុននេះ មន្ទីរពេទ្យបណ្ដោះអាសន្នចំនួន 14កន្លែងនៅទីក្រុង Wuhan ត្រូវបានបិទទ្វារ បន្ទាប់ពីបានសម្រេចភារកិច្ចក្នុងការព្យាបាលអ្នកជំងឺ COVID-19។ មន្ទីរពេទ្យទាំងនេះ បានធ្វើសកម្មភាពអស់ពីលទ្ធភាពក្នុងការព្យាបាលអ្នកជំងឺ។

មន្ទីរពេទ្យបណ្ដោះអាសន្ន នៅឯកីឡដ្ឋាន Wuhan បានបើកដំណើរការកាលពីថ្ងៃទី 12កុម្ភៈ ហើយបានបិទដំណើរការនៅថ្ងៃទី8មីនា បន្ទាប់ពីមន្ទីរពេទ្យនេះ បញ្ចប់ភារកិច្ច។ ចំណែកមន្ទីរពេទ្យបណ្ដោះអាសន្នមួយទៀតដែលត្រូវបានប្ដូរពីកីឡដ្ឋាន Hongshan Gymnasium នៅ Wuhan គឺជាមន្ទីរពេទ្យបណ្ដោះអាសន្នចុងក្រោយគេ ដែលត្រូវបានបិទកាលពីថ្ងៃទី10មីនា បន្ទាប់ពីបានទទួលព្យាបាលអ្នកជំងឺរយៈពេល35ថ្ងៃ។

ថ្ងៃនេះ ប្រទេសចិនប្រកាសថា បានរកឃើញអ្នកផ្ទុកមេរោគ COVID-19 ចំនួន21នាក់បន្ថែមទៀត ក្នុងនោះមាន20ករណី គឺជាអ្នកជំងឺដែលមានប្រភពមកពីបរទេស និងមានតែម្នាក់គត់ដែលជាអ្នកជំងឺក្នុងស្រុក។ ចំនួនអ្នកស្លាប់នៅក្នុងប្រទេសចិន កើនដល់ 3,226នាក់។ ក្នុងចំណោមអ្នកជំងឺ 80,881នាក់ មានជាង3,200ករណី កំពុងស្ថិតក្នុងស្ថានភាពអាសន្ន និងជាង 68,000នាក់ បានជាសះស្បើយ៕

ប្រភព៖ សារព័ត៌មានបរទេស

March 18, 2020

នៅតែចោទគ្នា…ប៉េកាំង-វ៉ាស៊ីនតោន បើកសង្គ្រាមជះភក់ដាក់គ្នា រឿងប្រភពមេរោគវីរុសកូរ៉ូណា

ចិន-អាមេរិកទាមទារឱ្យបញ្ឈប់ការជះភក់ដាក់គ្នា រឿងមេរោគវីរុសកូវីដ-19 ដែលថ្មីៗបំផុតនេះ លោក ដូណាល់ ត្រាំ បានហៅមេរោគនេះថា “វីរុសចិន” និងកាលពីពេលមុននេះ ទីក្រុងប៉េកាំង បានបញ្ចេញព័ត៌មានគួរឱ្យគិតពិចារណាថា កងទ័ពអាមេរិក គឺជាអ្នកនាំយកមេរោគកូរ៉ូណាមកចម្លងនៅក្នុងទីក្រុងវូហាន។

លោកប្រធានាធិបតី ដូណាល់ ត្រាំ បានធ្វីតធើរកាលពីយប់ថ្ងៃចន្ទ(ទី16មីនា)ថា ប្រទេសអាមេរិក នឹងផ្ដល់ការគាំទ្រយ៉ាងពេញទំហឹង ដល់ឧស្សាហកម្មផ្សេងៗ ដូចជាជើងហោះហើរ ដែលបានរងផលប៉ះពាល់យ៉ាងធ្ងន់ធ្ងរពី “វីរុសចិន”…។

កាលពីពេលមុននេះ បណ្ដាអ្នកនៅជុំវិញថ្នាក់ដឹកនាំសហរដ្ឋអាមេរិក តែងតែហៅជំងឺឆ្លងរាតត្បាតដែលកំពុងអង្រួនស្មារតីមនុស្សទូទាំងពិភពលោកនេះថា “វីរុសកូរ៉ូណាចិន” តែនេះ ជាលើកដំបូងហើយដែល ត្រាំ បានរបូតមាត់ចេញពាក្យ 1ម៉ាត់នេះមក និងធ្វើឱ្យមានការរិះគន់ភ្លាមៗតែម្ដងថា ជាការរើសអើងជាតិសាសន៍ ដែលអាចនឹងនាំឆ្ពោះទៅរកការសម្ដែងប្រតិកម្មប្រឆាំងបែបធ្ងន់ធ្ងរចំពោះទីប្រជុំជនជនជាតិអាមេរិកាំងខ្សែស្រឡាយអាស៊ី។

លោក ប៊ីល ដឹ ប្លាស៊ិអូ អភិបាលក្រុងនីវយ៉ក ស្ថិតនៅក្នុងរដ្ឋដែលរងផលប៉ះពាល់ពីវីរុសកូរ៉ូណាយ៉ាងធ្ងន់ធ្ងរបំផុតមួយក្នុងសហរដ្ឋអាមេរិក បានសរសេរនៅក្នុងធ្វីតធើរថា ទីប្រជុំជនជនជាតិអាមេរិកាំងខ្សែស្រឡាយអាស៊ី ជាប្រជាជនដែលត្រាំត្រូវមើលថែទាំដូចគ្នាដែរនោះ បានរងផលប៉ះពាល់ស្រាប់ទៅហើយ និងមិនចង់ឱ្យត្រាំបន្ថែមភ្លើងឱ្យស្ថានការណ៍នេះកាន់តែអាក្រក់ជាងមុន ដោយពាក្យសម្ដីដែលគ្មានហេតុផលបែបនេះឡើយ។

ទំនាស់ក្នុងគ្រានេះ កើតឡើងបន្ទាប់ពីអង្គការសុខភាពពិភពលោក បានប្រកាសកាលពីថ្ងៃអាទិត្យ(ទី15មីនា)ថា រកឃើញអ្នកឆ្លងមេរោគថ្មី និងអ្នកស្លាប់នៅក្នុងប្រទេសផ្សេងៗ ច្រើនជាងនៅក្នុងប្រទេសចិន ដែលជាចំណុចចាប់ផ្ដើមនៃការឆ្លងរាលដាលកាលពីចុងឆ្នាំកន្លងទៅ។

លោក ម៉ៃក៍ ប៉ុមប៉េអូ រដ្ឋមន្ត្រីការបរទេសអាមេរិក ថែមទាំងបានទូរស័ព្ទទៅលោក យ៉ាង ចៀឈឺ រដ្ឋមន្ត្រីការបរទេសចិន ដើម្បីទម្លាយអារម្មណ៍មិនសប្បាយចិត្ត ដែលទីក្រុងប៉េកាំងប្រើឱកាសយ៉ាងចំហដើម្បី “ទម្លាក់កំហុសរឿងកូវីដ-19 ទៅលើសហរដ្ឋអាមេរិក”។

លោក ប៉ុមប៉េអូ បានសង្កត់ធ្ងន់ថា ខណៈនេះ មិនមែនជាពេលវេលាក្នុងការបញ្ចេញព័ត៌មានក្លែងក្លាយ និងព័ត៌មានចម្លែកៗនោះទេ តែជាពេលវេលាដែលគ្រប់ប្រទេស ត្រូវរួមដៃគ្នាតស៊ូជាមួយគ្រោះភ័យរុករានដែលកំពុងមានរួមគ្នា។

ទោះយ៉ាងនេះក្ដី លោកប៉ុមប៉េអូខ្លួនឯង បែរជាព្យាយាមភ្ជាប់ជំងឺរាតត្បាតដ៏ធំទូទាំងពិភពលោកក្នុងពេលនេះទៅនឹងចិន ដោយបានហៅមេរោគវីរុសនេះថា “វីរុសវូហាន” ទាំងដែលបុគ្គលិកខាងវេជ្ជសាស្ត្របានណែនាំរួចហើយថា ទង្វើបែបនេះ គឺជាការបំផ្លាញកេរ្តិ៍ឈ្មោះរបស់ទីក្រុងវូហាន និងប្រទេសចិនក៏ដោយ។

ចំណែកលោកយ៉ាង បានថ្លែងបកទៅវិញយ៉ាងម៉ឺងម៉ាត់ថា ផែនការរបស់ទីក្រុងវ៉ាស៊ីនតោនក្នុងការលាបពណ៌ប្រទេសចិន នឹងគ្មានថ្ងៃទទួលបានជោគជ័យឡើយ និងបានដាក់ចំណុចសង្កេតថា អ្នកនយោបាយអាមេរិកាំងមួយចំនួន ចូលចិត្តនិយាយអាក្រក់ពីចិន និងមើលងាយការព្យាយាមរបស់ចិនក្នុងការតស៊ូប្រឆាំងនឹងជំងឺឆ្លងរាតត្បាតជាញឹកញាប់ ហើយលោកថែមទាំងបានបន្ថែមទៀតផងថា ទង្វើទាំងនេះ បានសាងនូវក្ដីមិនសប្បាយចិត្តខ្លាំងបំផុតចំពោះប្រជាជនចិន។

ទីភ្នាក់ងារសារព័ត៌មានស៊ីនហួ បានបន្ថែមថា លោកយ៉ាង បានទាមទារឱ្យអាមេរិកកែប្រែទង្វើខុសៗទាំងនេះ និងបញ្ឈប់ការចោទប្រកាន់ចិនដោយគ្មានភ័ស្តុតាងភ្លាម។

ទាំងអស់នេះ កាលពីថ្ងៃសុក្រ សប្ដាហ៍មុន ក្រសួងការបរទេសសហរដ្ឋអាមេរិក បានកោះហៅលោក ឈុយ ធៀនខៃ ឯកអគ្គរដ្ឋទូតចិន ឱ្យចូលជួប ដើម្បីថ្កោលទោសលើការដែលទីក្រុងប៉េកាំងបានបំផុសបំផុលទ្រឹស្ដីផ្សំគំនិត ដែលទទួលបានការចាប់អារម្មណ៍យ៉ាងទូលំទូលាយនៅលើប្រព័ន្ធបណ្ដាញសង្គម។

ករណីនេះ បានកើតឡើងដោយសារតែលោក ចាវ លីចៀន អ្នកនាំពាក្យក្រសួងការបរទេសចិន បានសរសេរនៅក្នុងធ្វីតធ្វើរទាំងភាសាចិន និងអង់គ្លេសកាលពីសប្ដាហ៍កន្លងទៅក្នុងទំនងថា “អ្នកជំងឺដើមហេតុ” នៃការឆ្លងរាលដាលក្នុងគ្រានេះ អាចមកពីអាមេរិក មិនមែនវូហានទេ។

ធ្វីតធើរនោះ បានបញ្ជាក់ថា អាចជាកងទ័ពសហរដ្ឋអាមេរិកដែលបាននាំជំងឺនោះទៅចម្លងនៅវូហាន ព្រមទាំងទាមទារឱ្យអាមេរិកអធិប្បាយអំពីរឿងនេះ។

ខណៈពេលជាមួយគ្នា លោកត្រាំ ក៏កំពុងរងការរិះគន់យ៉ាងខ្លាំង អំពីរឿងចាត់ការទប់ទល់នឹងការឆ្លងរាតត្បាតរបស់កូវីដ-19 ទើបបណ្ដាសម្ព័ន្ធមិត្តទាំងឡាយខំព្យាយាមសាងព័ត៌មានថា វីរុសនេះ ជាមេរោគដែលចម្លងមកពីជនបរទេស។

ម្នាក់នៅក្នុងនោះ គឺលោក ថម ខត់តន សមាជិកព្រឹទ្ធសភាគណបក្ស រីផាប្លិកាន់ ដែលតែងតែនិយាយអំពីមេរោគនេះថា “វីរុសកូរ៉ូណាចិន” និងថ្មីៗបំផុតនេះ លោក ថម ថែមទាំងប្រកាសទៀតផងថា អាមេរិកនឹងតាមរកអ្នកដែលធ្វើឱ្យទូទាំងពិភពលោកឆ្លងមេរោគនេះមកទទួលខុសត្រូវ។

ទោះជាស្ថានការណ៍ឆ្លងរាតត្បាតរបស់កូវីដ-19 ក្នុងប្រទេសចិនស្ថិតក្រោមការគ្រប់គ្រងបានភាគច្រើនហើយក្ដី តែទូទាំងពិភពលោកនៅតែមានអ្នកស្លាប់ដោយសារជំងឺនេះជាង 7,000នាក់នៅឡើយ ហើយការរស់នៅប្រចាំថ្ងៃរបស់មនុស្សនៅលោកខាងលិច កំពុងតែរងគ្រោះយ៉ាងធ្ងន់ធ្ងរ។

ហើយជំងឺរាតត្បាតនេះ ថែមទាំងកើតឡើងក្នុងខណៈដែលចិន និងអាមេរិកកំពុងទាស់ទែងគ្នាយ៉ាងធ្ងន់ធ្ងរជាច្រើនផ្នែក តាំងពីបញ្ហាសិទ្ធិមនុស្ស រហូតដល់ការប្រមូលសន្សំសក្ដានុពលខាងយោធារបស់ក្រុងប៉េកាំងទៀតផង៕

ប្រភព៖ សារព័ត៌មានបរទេស

March 18, 2020

សហភាពអឺរ៉ុប បិទព្រំដែនទាំងស្រុងដើម្បីទប់ទល់នឹង COVID-19 លើកលែងតែប្រទេស…

មេដឹកនាំបណ្ដាប្រទេសជាសមាជិកសហភាពអឺរ៉ុប (EU) បានឯកភាពគ្នាក្នុងការបិទច្រកព្រំដែនទាំងមូលរបស់ខ្លួនក្នុងរយៈពេល30ថ្ងៃជាបណ្ដោះអាសន្ន ដើម្បីទប់ស្កាត់ការឆ្លងរាលដាលមេរោគបង្កជំងឺរលាកសួត COVID-19។

CNN កាលពីថ្ងៃទី17មីនាបានចេញផ្សាយថា EU បានយល់ព្រមបិទព្រំដែនទាំងស្រុង ចំពោះការធ្វើដំណើរណាដែល “មិនចាំបាច់” ពីប្រទេសទី3 ក្នុងពេលដែលតំបន់នេះកំពុងប្រឹងប្រែងប្រយុទ្ធប្រឆាំងនឹង COVID-19។

ប្រកាសរបស់ EU មានប្រសិទ្ធភាពភ្លាមៗ ប៉ុន្តែ ក៏មានករណីលើកលែងចំពោះអ្នកដែលរស់នៅក្នុងតំបន់អឺរ៉ុបច្រើនឆ្នាំ ក្រុមអ្នកការទូត គ្រូពេទ្យ និងអ្នកសិក្សាស្រាវជ្រាវ។

វិធានការខាងលើ នឹងត្រូវបានអនុវត្តចំនួន30ថ្ងៃ និងមិនរាប់បញ្ចូលប្រទេសអង់គ្លេស ដោយសារប្រទេសនេះបានប្រកាសចាកចេញពីសហភាពអឺរ៉ុបរួចហើយ។

ក៏ប៉ុន្តែ CNN ឱ្យដឹងថា ការឯកភាពគ្នាក្នុងការបិទព្រំដែនខាងលើនេះ មិនត្រូវបានចាប់បង្ខំដោយច្បាប់ ឬបទបញ្ជានោះទេ ពោលគឺវាអាស្រ័យទៅលើប្រទេសនីមួយៗ ថាតើពួកគេអនុវត្ត ឬមួយអត់។

EU សង្សឹមថា ការបិទច្រកព្រំដែនជាមួយនឹងប្រទេសខាងក្រៅ នឹងធ្វើឱ្យប្រទេសជាសមាជិកសហភាពអឺរ៉ុបមួយចំនួន នឹងចាប់ផ្ដើមចូលគ្រប់គ្រងព្រំដែននៃប្រទេសរៀងៗខ្លួនឡើងវិញ បន្ទាប់ពីប្រទេសបារាំង អេស្ប៉ាញ និងដាណឺម៉ាក បាននាំគ្នាបិទច្រកព្រំដែនរបស់ខ្លួន ដើម្បីទប់ទល់នឹងវិបត្តិសុខភាពនេះ។ នៅព្រឹកនេះ(17មីនា) ប្រទេសអាល្លឺម៉ង់ ក៏បានប្រកាសបិទច្រកព្រំដែននៅតំបន់មួយចំនួនរបស់ខ្លួនផងដែរ៕

ប្រភព៖ សារព័ត៌មានបរទេស

March 18, 2020

អ៊ីតាលី៖ ចំនួនអ្នកស្លាប់ដោយសារ COVID-19 កើនលើស 2,500នាក់ ប្រហែល 1/3 នៃចំនួនអ្នកស្លាប់សរុបនៅទូទាំងពិភពលោក

ចំនួនអ្នកស្លាប់ដោយសារវីរុសកូរ៉ូណា COVID-19 នៅប្រទេសអ៊ីតាលី បានកើនឡើងលើសពី2,500នាក់ ដែលប្រហែលជា 1/3 នៃចំនួនអ្នកស្លាប់ដោយសារ COVID-19 នៅទូទាំងពិភពលោក នេះបើតាម សារព័ត៌មាន Reuters ដកស្រង់ព័ត៌មានពី Protezione Civile។

មជ្ឈមណ្ឌលការពារជនស៊ីវិល (Protezione Civile) បានឱ្យដឹងថា ក្នុងថ្ងៃទី17មីនា ប្រទេសនេះមានអ្នកស្លាប់ដោយសារ COVID-19 ចំនួន345ករណីបន្ថែមទៀត ធ្វើឱ្យចំនួនអ្នកស្លាប់ដោយសារមេរោគនេះ កើនដល់ 2,503នាក់។ ដូច្នេះ ចំនួនអ្នកស្លាប់ដោយសាររោគកូរ៉ូណានៅប្រទេសអ៊ីតាលីបច្ចុប្បន្ន ប្រមាណជា 1/3 នៃចំនួនអ្នកស្លាប់ដោយសារ COVID-19 សរុបនៅទូទាំងពិភពលោក និងជិតស្មើនឹងចំនួនអ្នកស្លាប់សរុបនៅប្រទេសចិន(ជាង 3,000នាក់)។

កាលពីម្សិលមិញ អ៊ីតាលីបានរកឃើញអ្នកផ្ទុកមេរោគថ្មី COVID-19 ជាង 3,500ករណី នាំឱ្យចំនួនអ្នកបានឆ្លងរោគកូរ៉ូណា នៅក្នុងប្រទេសនេះ កើនដល់ 31,506នាក់ គឺច្រើនជាងគេក្នុងពិភពលោក បន្ទាប់ពីប្រទេសចិន។ ថ្វីបើចំនួនអ្នកស្លាប់នៅតែបន្តកើនឡើង ប៉ុន្តែ ល្បឿននៃការឆ្លងរាលដាលក្នុងប្រទេសនេះ កំពុងតែមានសញ្ញាថយចុះបន្តិច។ មកដល់បច្ចុប្បន្ន អ៊ីតាលីបានព្យាបាលជាសះស្បើយជិត3,000នាក់ ខណៈដែលជាង 2,000នាក់ផ្សេងទៀត កំពុងទទួលការព្យាបាល។

ស្ថានភាពនៃរោគរាតត្បាតកាន់តែអាក្រក់ឡើងៗ បន្ទាប់ពីក្រុមគ្រូពេទ្យរបស់អ៊ីតាលី ក្លាយជាជនរងគ្រោះជាបន្តបន្ទាប់ដោយសារមេរោគដ៏កាចសាហាវនេះ។ យោងតាមទិន្នន័យរបស់សមាគមគ្រូពេទ្យគ្មានព្រំដែន បានឱ្យដឹងថា បុគ្គលិកផ្នែកសុខាភិបាលចំនួនជិត 1,700នាក់ នៅប្រទេសអ៊ីតាលី បានឆ្លងមេរោគ COVID-19។ ប្រទេសនេះក៏កំពុងខ្វះបុគ្គលិកផ្នែកសុខាភិបាល និងគ្រែសម្រាប់អ្នកជំងឺ រួមនឹងសម្ភារវេជ្ជសាស្ត្រផ្សេងៗទៀតផងដែរ។

ទន្ទឺមនឹងនេះ បញ្ហាខ្វះប្រភពផ្គត់ផ្គង់ម៉ាស់គឺជារឿងគួរឱ្យព្រួយបារម្ភនៅប្រទេសអ៊ីតាលី។ ប្រទេសនេះ ត្រូវការម៉ាស់ចំនួនប្រមាណជា 90លានបន្ទះក្នុង1ខែៗ។ អ៊ីតាលី មិនមានរោងចក្រផលិតម៉ាស់នោះទេ ហើយប្រទេសជិតខាងក៏ឈប់ឱ្យនាំម៉ាស់ទៅក្រៅប្រទេសផងដែរ ដើម្បីទុកប្រើក្នុងស្រុក។ នេះបើតាម Protezione Civile។

COVID-19 បានចាប់ផ្ដើមកើតឡើងនៅទីក្រុង Wuhan ប្រទេសចិន កាលពីចុងឆ្នាំ2019។ គិតមកដល់ពេលនេះ វាបានឆ្លងទៅប្រទេស និងដែនដីចំនួនជាង 160 នៅទូទាំងពិភពលោក បណ្ដាលឱ្យមនុស្សជាង 190,000នាក់ បានឆ្លងជំងឺ និងប្រមាណជា 7,500នាក់បានស្លាប់៕

ប្រភព៖ សារព័ត៌មានបរទេស

March 18, 2020

កម្ពុជារកឃើញអ្នកផ្ទុកមេរោគ COVID-19 ចំនួន9នាក់ទៀតហើយ នាំឱ្យចំនួនអ្នកឆ្លងកើនដល់33នាក់

កម្ពុជារកឃើញអ្នកផ្ទុកមេរោគ COVID-19 ចំនួន9នាក់ទៀតហើយ នៅថ្ងៃទី17 ខែមីនា ឆ្នាំ២០២០ នេះ។ ដូច្នេះ ចំនួនអ្នកឆ្លងមេរោគសរុបកើនឡើងដល់33នាក់។

March 17, 2020

មេដឹកនាំប្រទេសម៉ូណាកូ ឆ្លងជំងឺ COVID-19 ខណៈពិភពលោក មានឆ្លងស្លាប់ដោយសារមេរោគនេះ កើនដល់…

ក្រសួងសុខាភិបាលនៃប្រទេសម៉ូណាកូ បានប្រកាសឱ្យដឹងថា មេដឹកនាំរបស់ពួកគេ បានធ្វើតេស្តរកឃើញមានផ្ទុកមេរោគ COVID-19។

បច្ចុប្បន្ន មេដឹកនាំរូបនេះ កំពុងបង្ខាំងខ្លួនឯងនៅក្នុងផ្ទះរបស់លោក ប៉ុន្តែ លោកនៅតែធ្វើការតាមតួនាទីដូចធម្មតា។ នេះបើតាមការប្រកាសរបស់រដ្ឋាភិបាល។

លោក Serge Telle ដែលជាមេដឹកនាំរបស់ប្រទេសម៉ូណាកូ គឺជាមេដឹកនាំទី9នៅអឺរ៉ុប ដែលបានឆ្លងមេរោគ COVID-19។ កាលពីថ្ងៃចន្ទ អភិបាលក្រុង Nice លោក Christian Estrosi ក៏បានធ្វើតេស្តវិជ្ជមានជាមួយ Covid-19 ផងដែរ។ លោក Christian Estrosi ក៏ត្រូវបង្ខាំងខ្លួនឯងនៅឯផ្ទះរបស់គាត់ផងដែរ។

លោក Christian Estrosi អភិបាលក្រុង Nice នៃប្រទេសបារាំង ក៏បានឆ្លងមេរោគ COVID-19

បច្ចុប្បន្ន ប្រទេសម៉ូណាកូ មានអ្នកឆ្លងមេរោគកូរ៉ូណា COVID-19 ចំនួន 7នាក់ ដោយមិនទាន់មានករណីស្លាប់នៅឡើយ។

គិតមកដល់ពេលនេះ នៅទូទាំងពិភពលោក មានអ្នកឆ្លងរោគ COVID-19 ចំនួន 182,424នាក់ ក្នុងនោះមាន 7,155នាក់បានស្លាប់ និង79,433នាក់បានជាសះស្បើយ៕

ប្រភព៖ សារព័ត៌មានបរទេស

March 17, 2020

ប្រទេសចិនប្រកាសព្រឹកនេះថា បានរកឃើញអ្នកឆ្លង COVID-19 តែ1នាក់គត់ ខណៈពិភពលោកមានអ្នកឆ្លងសរុបជាង182,400នាក់

ប្រទេសចិន ថ្ងៃនេះបានប្រកាសថា បានរកឃើញអ្នកផ្ទុកមេរោគថ្មីចំនួន 21ករណី ក្នុងនោះមាន 20ករណី គឺជាអ្នកមកពីបរទេស និងម្នាក់ទៀតនៅក្នុងទីក្រុង Wuhan។

គណៈកម្មការសុខាភិបាលជាតិរបស់ប្រទេសចិន ថ្ងៃនេះ បានចេញសេចក្ដីប្រកាសមួយឱ្យដឹងថា បណ្ដាករណីឆ្លងរោគថ្មី គឺមានប្រភពពីបរទេស រួមមាន 9ករណីត្រូវបានរកឃើញនៅឯទីក្រុងប៉េកាំង 3ករណីនៅសៀងហៃ និង3ករណីនៅក្វាងតុង។ ចំណែក ខេត្តហ្សេជាំង សានដុង ក្វាងស៊ី យូនណាន និងខេត្តសាអានស៊ី ក៏បានរកឃើញអ្នកផ្ទុកមេរោគថ្មីចំនួន1ករណីដូចគ្នា។

អ្នកជំងឺថ្មីតែម្នាក់គត់ដែលបានឆ្លងរោគនៅក្នុងប្រទេស និងទើបតែត្រូវបានរកឃើញកាលពីម្សិលមិញ គឺមានទីលំនៅក្នុងទីក្រុង Wuhan ខេត្ត Hubei ដែលជាទីកំណើត និងជាសម្បុកមេរោគធំបំផុតរបស់ COVID-19 នៅប្រទេសចិន។

គិតមកដល់ពេលនេះ ប្រទេសចិនបានរកឃើញអ្នកឆ្លងមេរោគ COVID-19 សរុប 81,050នាក់ ក្នុងនោះមាន 3,230នាក់បានបាត់បង់ជីវិត។ ដោយឡែក នៅទូទាំងពិភពលោកវិញ បានរកឃើញអ្នកឆ្លងមេរោគសរុប 182,406នាក់ ក្នុងនោះមាន 7,154នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 17, 2020

16វិធានការជោគជ័យរបស់ចិន ប្រយុទ្ធនឹង COVID-19 ឆ្លងផុតអំឡុងពេលគ្រោះថ្នាក់ ឆ្ពោះទៅថ្ងៃដែលឆ្លងផុតវិបត្តិ

បើកវិធានការ 16យ៉ាងរបស់រដ្ឋបាលចិនៈ តឹងរ៉ឹង ម៉ឺងម៉ាត់ សាងសង់មន្ទីរពេទ្យ ចែកម៉ាស់អនាម័យការពារ ហ្វ្រ៊ី ប្រយុទ្ធនឹងវីរុស COVID-19 រហូតឆ្លងផុតដំណាក់កាលគ្រោះថ្នាក់ ឆ្ពោះទៅរកថ្ងៃដែលឆ្លងផុតវិបត្តិជាស្ថាពរ និងស្ថានការណ៍ល្អប្រសើរឡើង។

ហ្វ៊ែនផេច “អាយចុង” បានផូស្តអត្ថបទរៀបរាប់អំពីវិធានការគ្រប់គ្រង និងការពារការឆ្លងរាលដាលវីរុសកូរ៉ូណាប្រភេទថ្មី2019 ឬ COVID-19 របស់រដ្ឋបាលចិន រហូតធ្វើឱ្យខណៈពេលនេះ ស្ថានការណ៍នៅក្នុងប្រទេស ចិនល្អប្រសើរឡើងជាបន្តបន្ទាប់ ដោយវិធានការទាំង 16ចំណុចនោះ គឺ៖

1. រដ្ឋបាលចិនចេញវិធានការឱ្យប្រជាជនអាចលុបចោលសំបុត្រធ្វើដំណើរ-គម្រោងធ្វើដំណើរដែលបម្រុងនឹងចាកចេញពីវូហាន និងការធ្វើដំណើរដែលបម្រុងនឹងចូលមកកាន់វូហាន។

2. រដ្ឋបាលចិន ចេញថ្លៃរក្សាព្យាបាលឱ្យគ្រប់យ៉ាង សម្រាប់អ្នកឆ្លងមេរោគកំណាចនេះ។

3. អាជ្ញាធរវូហាន សុំការសហការពីស្ថាប័នសិក្សាអប់រំឯកជន “បិទថ្នាក់រៀន” និងបន្ថែមគោលការណ៍សងប្រាក់ ឬបង្រៀនសង ដោយសារតែលុបចោលថ្នាក់រៀនជាបណ្ដោះអាសន្នក្នុងអំឡុងពេលមេរោគរាតត្បាត។

4. បំពាក់គ្រឿងវាស់សីតុណ្ហភាពរបស់រាងកាយតាមស្ថានីយនានា។

5. អង្គភាពគ្រប់គ្រងការចរាចរណ៍ក្នងទីក្រុងវូហាន ចេញច្បាប់ “ពិនិត្យឆែកឆេរគ្រប់រថយន្តទាំងអស់ ថាតើមានសត្វ-វត្ថុមានជីវិតនៅក្នុងរថយន្តឬទេ? ដើម្បីការពារការចម្លងមេរោគពីសត្វមានជីវិត ដូចដែលបានសន្និដ្ឋានថា ប្រភពដើមនៃការឆ្លងរាលដាលក្នុងគ្រានោះ បណ្ដាលមកពីសត្វព្រៃ និងសត្វសមុទ្រទាំងសាច់ និងទាំងនៅរស់ ក្នុងទីផ្សារលក់ដុំអាហារសមុទ្រក្នុងទីក្រុងវូហាន”។

6. បញ្ជាបិទទីក្រុងវូហាន និងទីក្រុងផ្សេងៗក្នុងមណ្ឌលហ៊ូពេយ ដើម្បីបង្ខាំង និងបញ្ឈប់ការសាយភាយមេរោគវីរុស។

7. រដ្ឋបាលចិនប្រកាសបញ្ជាឱ្យក្រុមហ៊ុនទេសចរណ៍បញ្ឈប់ការលក់កញ្ចប់ទេសចរណ៍ សំបុត្រយន្តហោះ និងការកក់សណ្ឋាគារ។

8. អាជ្ញាធរទីក្រុងវូហានចេញប្រកាសឱ្យអង្គភាពដែលពាក់ព័ន្ធចុះទៅតាមទីប្រជុំជន ដើម្បីឱ្យប្រាប់ឱ្យឱសថស្ថាននៅក្នុងទីក្រុងវូហានបើកបម្រើសេវាកម្ម(លក់ថ្នាំ)តាមធម្មតា ដើម្បីឱ្យប្រជាជនអាចរកទិញថ្នាំ និងឧបករណ៍ការពារថែទាំខ្លួនបាន និងមិនឱ្យដំឡើងថ្លៃ។

9. អំឡុងពេលដែលឆ្លងរាលដាលខ្លាំង រដ្ឋបាលចិនបានកែសម្រួលការរាប់ និងវិនិច្ឆ័យអ្នកឆ្លងមេរោគបែបថ្មីសម្រាប់មណ្ឌលហ៊ូពេយ និងតំបន់ដែលឆ្លងរាលដាលខ្លាំង ដោយសម្រួលពី “អ្នកគួរឱ្យសង្ស័យ” ដែលមានអាការបង្ហាញខាងរោគសញ្ញា ទៅជា “អ្នកឆ្លងមេរោគ” តែម្ដង ដើម្បីឱ្យគ្រូពេទ្យវិនិច្ឆ័យ និងព្យាបាលបានកាន់តែងាយស្រួលឡើង មិនខកខានិងន កាត់បន្ថយភាពប្រថុយប្រថានក្នុងការចម្លងមេរោគ។

10. ដាក់ចេញវិធានការចែកលុយរង្វាន់ឱ្យ មានតាំងពី 500យន់ រហូតដល់ 10,000យន់ នៅពេលមករាយការណ៍ជូនអាជ្ញាធរថា ខ្លួនមានអាការគួរឱ្យសង្ស័យថាឆ្លងមេរោគ និងបើសិនជាពិនិត្យឃើញថា ឆ្លងមេរោគមែន ក៏បានទទួលលុយភ្លាមៗតែម្ដង។

11. ពង្រីកថ្ងៃឈប់ចូលឆ្នាំចិន ឱ្យក្រុមហ៊ុនឈប់សម្រាកបន្ថែម 1សប្ដាហ៍ទៀត និងច្រើនជាងនោះនៅក្នុងតំបន់ហ៊ូពេយ ដើម្បីកាត់បន្ថយការចម្លងមេរោគ និងការឆ្លងមេរោគ ហើយក្រុមហ៊ុនជាច្រើនមានគោលការណ៍ឱ្យបុគ្គលិកធ្វើការនៅផ្ទះ។

12. រដ្ឋបាលចិន និងរដ្ឋបាលក្នុងតំបន់ទីក្រុងនានា បានដាក់ចេញវិធានការផ្សេងៗ ដើម្បីជួយឱ្យនៅក្នុងប្រទេសចិនមានម៉ាស់អនាម័យការពារប្រើប្រាស់គ្រប់គ្រាន់ក្នុងអំឡុងពេលឆ្លងរាលដាលខ្លាំង ដូចជា ចែកម៉ាស់អនាម័យហ្រ្វ៊ី ចែកចាយទៅតាមចំណុចផ្សេងៗ ដោយត្រូវចុះបញ្ជីតាមរយៈ WeChat និងទៅទទួលយកនៅតាមឱសថស្ថានដែលបានបញ្ជាក់ឈ្មោះ។

13. រដ្ឋបាលចិន បានសហការជាមួយសារព័ត៌មានក្នុងប្រទេស ផ្ដល់ព័ត៌មានអ្នកជំងឺដែលផ្ទុកមេរោគ រួមទាំងខ្សែផ្លូវធ្វើដំណើររបស់អ្នកជំងឺ ថាតើបានទៅណាមកណាខ្លះ? ធ្វើអ្វីខ្លះ? ជួបអ្នកណាខ្លះ? ដោយប្រាប់យ៉ាងលម្អិត ដូចជាលេខទូរស័ព្ទ លេខបន្ទប់ស្នាក់នៅក្នុងសណ្ឋាគារ លេខជើងហោះហើរ និងខ្សែរថភ្លើង ជាដើម។

14. តាំងពីរយៈពេលដំបូងៗនៃការឆ្លងរាលដាលធ្ងន់ធ្ងរនៅចុងខែមករា ក្រសួងហិរញ្ញវត្ថុរបស់ចិន បានអនុម័តថវិកាបន្ទាន់ 4.4ពាន់លានយន់សម្រាប់ការការពារ និងគ្រប់គ្រងការឆ្លងរាលដាលមេរោគវីរុសកូរ៉ូណាប្រភេទថ្មីទូទាំងប្រទេសចិន។ ក្នុងថវិកាចំនួននេះ ជាពិសេសមណ្ឌលហ៊ូពេយ(រួមទាំងវូហាន) ទទួលបានប្រមាណ 500លានយន់។

15. បញ្ជូនក្រុមគ្រូពេទ្យទូទាំងប្រទេសចិន ទាំងគ្រូពេទ្យស៊ីវិល និងគ្រូពេទ្យយោធា រួមទាំងធនធានមនុស្សខាងវេជ្ជសាស្ត្រផ្សេងៗ ចូលទៅជួយវូហាន និងមណ្ឌលហ៊ូពេយ ទីកន្លែងឆ្លងរាលដាលធ្ងន់ធ្ងរ រួមទាំងសាងសង់មន្ទីរពេទ្យពិសេស 2កន្លែង ដើម្បីទទួលអ្នកជំងឺ COVID-19 រួមទាំងយកអគារហាត់កីឡា អគារតាំងពិព័រណ៍ទំនិញ បន្ទប់ប្រជុំធំៗទូទាំងទីក្រុង មកធ្វើជាមន្ទីរពេទ្យបណ្ដោះអាសន្ន ដើម្បីឱ្យមានគ្រែសម្រាប់អ្នកជំងឺយ៉ាងគ្រប់គ្រាន់។

16. ទោះជាមានពាក្យចចាមអារ៉ាមជាច្រើននិយាយថា ប្រទេសចិនបានបិទព័ត៌មាន តែបើនរណាបានតាមដានព័ត៌មាន នឹងបានឃើញថា ទាំងខាងផ្នែកកណ្ដាល និងតាមទីក្រុងផ្សេងៗតែងមានការរាយការណ៍ព័ត៌មានអំពីអ្នកឆ្លងមេរោគជារៀងរាល់ថ្ងៃ រួមទាំងការថ្លែងព័ត៌មានរបស់អង្គភាពសាធារណៈសុខាភិបាល និងអ្នកជំនាញការ រួមទាំងអង្គភាពពាក់ព័ន្ធដទៃទៀតផងដែរ។

សារព័ត៌មានចិនខ្លួនឯង ក៏មានការរាយការណ៍ព័ត៌មានក្នុងន័យវិជ្ជមាន ដើម្បីផ្ដល់ជាកម្លាំងចិត្តដល់ប្រជាជនចិន ក្រៅពីការផ្ដល់ព័ត៌មានការឆ្លងមេរោគផងដែរ ដូចជា ព័ត៌មានស្ដីពីការចេញពីមន្ទីរពេទ្យរបស់អ្នកជាសះស្បើយ ដែលបានអាប់ឌែតរៀងរាល់ថ្ងៃ ជាពិសេសករណីមនុស្សចាស់ និងកុមារដែលបានជាសះស្បើយ…៕

ប្រភព៖ សារព័ត៌មានបរទេស

March 17, 2020

Tag: សុខភាព