សម្ពោធ - La Reine Media

អត្តពលិកកម្ពុជា «ហោះ» ទៅលើអាកាស អុជព្រះអគ្គិជ័យស៊ីហ្គេមលើកទី 32 បញ្ជាក់ថា ព្រឹត្តិការណ៍កីឡាចាប់ផ្ដើមជាផ្លូវការ

ទិដ្ឋភាព «ហោះឡើង» ទៅអុជព្រះអគ្គិជ័យកីឡាស៊ីហ្គេម របស់កីឡាការិនីតៃក្វាន់ដូ ស៊ន សៀវម៉ី បានបិទបញ្ចប់ពិធីសម្ពោធបើកព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 កាលពីយប់ថ្ងៃទី 05 ឧសភា នៅពហុកីឡដ្ឋានជាតិមរតកតេជោ។

ប៉ុន្មានសប្ដាហ៍មុននោះ ព្រះអគ្គិជ័យកីឡា (ភ្លើងគប់) ស៊ីហ្គេម ត្រូវបានយកអណ្ដាតភ្លើងពីពន្លឺព្រះអាទិត្យនៅប្រាសាទអង្គរវត្ត។ នៅឯទីលានបាល់ទាត់ក្នុងពហុកីឡដ្ឋានជាតិមរតកតេជោ ពេលទទួលបានព្រះអគ្គិជ័យកីឡាពីប្រមុខរាជរដ្ឋាភិបាលកម្ពុជា កំពូលកីឡាការិនីជូជិតស៊ូ (Jujutsu) របស់ កម្ពុជា កញ្ញា ខាន់ ជេសា (Jessa Khan) ក៏កាន់រត់ចុះទៅលើឆាក ហើយប្រគល់ជូនជើងឯកកីឡាការិនីប៉េតង់ពិភពលោក កែ ឡេង។ បន្ទាប់ពីបានឆ្លងកាត់ដៃរបស់អត្តពលិកឆ្នើមជាច្រើនរូបរបស់កម្ពុជា ព្រះអគ្គិជ័យកីឡាក៏បានទៅដល់ដៃ សន សៀវម៉ី ដើម្បីឱ្យកំពូលកីឡាការិនីតៃក្វាន់ដូរូបនេះ ធ្វើសកម្មភាពចុងក្រោយនៃការអុជព្រះអគ្គិជ័យកីឡា។

សន សៀវម៉ី អាយុ 27 ឆ្នាំ មានកម្ពស់ 1.83 ម៉ែត្រ គឺជានិមិត្តរូបនៃជោគជ័យរបស់វិស័យកីឡាកម្ពុជា។ សៀវម៉ី ធ្លាប់ដណ្ដើមបានមេដាយមាសបីគ្រឿងនៅស៊ីហ្គេមឆ្នាំ 2013, 2017, 2019 ហើយក៏ជាអត្តពលិកកម្ពុជាដំបូងគេក្នុងប្រវត្តិសាស្ត្រដែលដណ្ដើមបានមេដាយមាសនៅព្រឹត្តិការណ៍កីឡាអាស៊ី (ASIAD) លើកទី 17 នៅ Incheon ឆ្នាំ 2014។

នៅក្នុងឈុតអុជព្រះអគ្គិជ័យ ខ្សែកាបបានជួយឱ្យ សៀវម៉ី ដែលមានគប់នៅនឹងដៃ «ហោះឡើង» លើអាកាស ទៅក្បែរទីតាំងអេក្រង់ hologram ដែលបន្ទាប់មកបញ្ចាំងទស្សនីយភាពដុំភ្លើងដ៏អស្ចារ្យ មុនពេលនាគទេពបង្ហាញខ្លួន និងលេបយក ហើយព្រួសបាល់ភ្លើងសំដៅគប់ស៊ីហ្គេម។ អណ្ដាតភ្លើងស៊ីហ្គេមក៏ឆេះឡើងនៅលើវិមានអគ្គិជ័យកីឡារបស់ពហុកីឡដ្ឋានមរតកតេជោ បញ្ជាក់ថា ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 បានចាប់ផ្ដើមជាផ្លូវការ។

ឈុតឆាកអុជព្រះអគ្គិជ័យស៊ីហ្គេមនេះក៏បានបិទបញ្ចប់ពិធីសម្ពោធបើកព្រឹត្តិការណ៍ស៊ីហ្គេមលើកទី 32 ដែលធ្វើឡើងរយៈពេល 150 នាទី កាលពីយប់ថ្ងៃទី 05 ឧសភា 2023 ផងដែរ៕

កីឡាការិនីតៃក្វាន់ដូ ស៊ន សៀវម៉ី «ហោះឡើង»

អណ្ដាតភ្លើងស៊ីហ្គេមក៏ឆេះឡើងនៅលើវិមានអគ្គិជ័យកីឡារបស់ពហុកីឡដ្ឋានមរតកតេជោ

មហាទស្សនីយភាពនៅមុនពិធីអុជព្រះអគ្គិជ័យកីឡា ៖

May 6, 2023

ថ្ងៃទី 05 ឧសភានេះ កម្ពុជាសម្ពោធបើកព្រឹត្តិការណ៍ស៊ីហ្គេមលើកទី 32 ជាផ្លូវការ

ពិធីសម្ពោធបើកព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ជាផ្លូវការនេះ នឹងត្រូវធ្វើឡើងនាវេលាម៉ោង 19 នៅឯពហុកីឡដ្ឋានជាតិមរតកតេជោ ដែលស្ថិតក្នុងរាជធានីភ្នំពេញ។

មកដល់បច្ចុប្បន្ន ម្ចាស់ផ្ទះកម្ពុជានៅតែមិនបញ្ចេញព័ត៌មានលំអិតអំពីកម្មវិធី និងការសំដែងនានានៅក្នុងពិធីសម្ពោធព្រឹត្តិការណ៍ស៊ីហ្គេមលើកទី 32 ក្រៅតែពីពេលវេលា ទីតាំង និងបណ្ដាមន្ត្រីជាន់ខ្ពស់ដែលអញ្ជើញចូលរួម។ ក្រុមអ្នកយកព័ត៌មានក៏មិនត្រូវបានអនុញ្ញាតឱ្យចូលទស្សនាការហាត់សម ព្រោះគណៈកម្មការស៊ីហ្គេមចង់បង្កើតកម្មវិធីដ៏ទាក់ទាញមួយទៅតាមស្ដង់ដាអូឡាំពិក។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ គណៈកម្មាធិការជាតិ CAMSOC កាលពីថ្ងៃទី 24 មេសា បានឱ្យដឹងថា កម្ពុជាត្រូវតែប្រារព្ធពិធីសម្ពោធបើកព្រឹត្តិការណ៍ប្រកបដោយការទាក់ទាញបំផុតក្នុងប្រវត្តិសាស្ត្រ ទៅតាមស្ដង់ដាអូឡាំពិក ពុំមែនលំដាប់តំបន់ដូចប្រទេសដទៃ។ គ្រប់គ្នានឹងបានឃើញចំណុចដ៏អស្ចារ្យរបស់ពិធីនេះ។

ប្រមុខរាជរដ្ឋាភិបាលកម្ពុជា សម្ដេចតោជោ ហ៊ុន សែន ក៏បានប្រកាសមិនយកថ្លៃសំបុត្រចូលទស្សនាពិធីសម្ពោធនេះផងដែរ។ សម្ដេចមានប្រសាសន៍ថា មនុស្សជាងកន្លះលាននាក់ចង់ចូលទស្សនា ប៉ុន្តែពហុកីឡដ្ឋានមរតកតេជោ អាចដាក់មនុស្សបានតែពី 60,000 ទៅ 70,000 នាក់ប៉ុណ្ណោះ។ ទោះជាយ៉ាងណាក៏ដោយ បញ្ហានេះត្រូវបានដោះស្រាយតាមរយៈការដំឡើងឆាកបញ្ចាំងស្លាយផ្សាយបន្តផ្ទាល់នៅតាមបណ្ដាខេត្ត-ក្រុង។

ទីលានបាល់ទាត់មរតកតេជោ ស្ថិតក្នុងពហុកីឡដ្ឋានមរតកតេជោ នៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ត្រូវបានសម្ពោធការដ្ឋានសាងសង់កាលពីខែសីហា 2017 ហើយបួនឆ្នាំក្រោយមកក៏បានសម្រេចជាស្ថាពរ។ ការចំណាយសម្រាប់ការសាងសង់ពហុកីឡដ្ឋាននេះគឺប្រហែល 160 លានដុល្លារអាម៉េរិក ជាជំនួយរបស់ប្រទេសចិន។

យោងតាមគេហទំព័រស៊ីហ្គេមលើកទី 32 ព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា មានសមាជិកចូលរួមប្រហែល 12,000 នាក់ មកពី 11 ប្រតិភូ ដោយមិនទាន់រាប់បញ្ចូលក្រុមអាជ្ញាកណ្ដាល។ អ្នកយកព័ត៌មានជាង 2,000 នាក់ក៏បានទទួលកាតចុះឈ្មោះចូលយកព័ត៌មាន ក្នុងនោះមាន 907 នាក់មកពីបរទេស។

ស៊ីហ្គេមលើកទី 32 ធ្វើឡើងនៅរាជធានីភ្នំពេញ និងទីក្រុងបួនផ្សេងទៀត ចាប់ពីថ្ងៃទី 29 មេសាដល់ 16 ឧសភា ដោយមានកីឡា 36 ប្រភេទ ចែកជា 584 វិញ្ញាសា។ កាលពីថ្ងៃទី 04 ឧសភា គណៈកម្មការស៊ីហ្គេមបានប្រគល់មេដាយចំនួន 9 គ្រឿងដំបូងជូនអត្តពលិក ក្នុងនោះម្ចាស់ផ្ទះកម្ពុជានាំមុខគេដោយដណ្ដើមបានមេដាយមាសប្រាំគ្រឿង។ ហ្វ៊ីលីពីនដណ្ដើមបានមេដាយមាសពីរគ្រឿង ខណៈថៃ និងឡាវទទួលបានមួយគ្រឿង ពីប្រភេទកីឡាគុន ជូជិតស៊ូ (Jujutsu) និងល្បុក្កតោ។

នៅក្នុងថ្ងៃទី 05 ឧសភានេះ ស៊ីហ្គេមលើកទី 32 នឹងមិនមានការប្រកួតកីឡាណាមួយឡើយ ដោយផ្ដោតទៅលើតែពិធីសម្ពោធជាផ្លូវការ។

បទចម្រៀងផផ្លូវការរបស់ស៊ីហ្គេមលើកនេះគឺបទ Cambodian Pride ដែលបច្ចុប្បន្នចំនួនអ្នកចូលមើលបានកើនឡើងដល់ជាង 65 លានលើកនៅលើ YouTube ក្រោយពីបង្ហោះបានជាងបីសប្ដាហ៍។ រូបតំណាងស៊ីហ្គេមលើកទី 32 គឺកូនទន្សាយពីរក្បាល មួយឈ្មោះ រំដួល និងមួយឈ្មោះ បុរី។

ចំណែកពិធីបិទស៊ីហ្គេមលើកទី 32 វិញ នឹងត្រូវធ្វើឡើងក្នុងថ្ងៃទី 17 ឧសភា នៅឯពហុកីឡដ្ឋានមរតកតេជោ៕

May 5, 2023

ស្ពានសម្រាប់ផ្លូវរថភ្លើងខ្ពស់ជាងគេបង្អស់លើពិភពលោក

(ឥណ្ឌា) – ស្ពាន Chenab ដែលមានកម្ពស់ 359 ម៉ែត្រធៀបនឹងផ្ទៃទឹកទន្លេ Chenab ក្នុងតំបន់ Jammu និង Kashmir គ្រោងនឹងត្រូវបានដាក់ឱ្យប្រើប្រាស់ចាប់ពីចុងខែធ្នូ 2023 ឬដើមខែមករា 2024។

ស្ពានដែលមានប្រវែង 1,315 ម៉ែត្រនេះ ស្ថិតក្នុងគម្រោងនាំយកបណ្ដាញផ្លូវដែកទៅកាន់តំបន់ជ្រលងភ្នំ Kashmir។ ក្រៅពីស្ពាន Chenab គម្រោងផ្លូវដែក Udhampur-Srinagar-Baramulla (USBRL) ក៏មានទាំងផ្លូវរូងក្រោមដីវែងជាងគេប្រចាំប្រទេស និងស្ពានខ្សែកាបដំបូងសម្រាប់ផ្លូវដែកឥណ្ឌាផងដែរ។ នេះបើតាមទីភ្នាក់ងារសារព័ត៌មាន CNN។

សម្រាប់នាយករដ្ឋមន្ត្រីឥណ្ឌា Narendra Modi ការវិនិយោគទៅលើហេដ្ឋារចនាសម្ព័ន្ធដូចស្ពាន Chenab និងគម្រោង USBRL ជាដើម គឺជាវិធីដែលមានប្រសិទ្ធភាពដើម្បីបង្កើនការតភ្ជាប់ក្នុងសង្គម ភ្ជាប់តំបន់ដាច់ស្រយាលជាមួយនឹងទីក្រុងធំៗ។ ការតភ្ជាប់ Kashmir និងតំបន់ដទៃទៀតនេះ នឹងពង្រឹងការអភិវឌ្ឍឧស្សាហកម្ម និងកសិកម្មក្នុងតំបន់។

មុននោះ ផ្លូវតែមួយខ្សែគត់ដែលតភ្ជាប់តំបន់ Kashmir ជាមួយនឹងតំបន់នានានៅឥណ្ឌា គឺផ្លូវជាតិ Sringar-Jammu ប្រវែង 300 គីឡូម៉ែត្រដែលបត់បែនខ្លាំង។ ផ្លូវនេះត្រូវបិទនៅរដូវរងា ហើយតែងតែកើតមានគ្រោះថ្នាក់ចរាចរណ៍។

ឥណ្ឌាបាន និងកំពុងតែវិនិយោគជាច្រើនទៅលើការស្ដារ និងធ្វើឱ្យប្រសើរឡើងហេដ្ឋារចនាសម្ព័ន្ធរបស់ខ្លួន។ កាលពីខែកុម្ភៈ 2023 លោក Modi បានសម្ពោធដាក់ឱ្យប្រើប្រាស់កំណាត់ផ្លូវដំបូងរបស់ផ្លូវល្បឿនលឿនប្រវែង 1,386 គីឡូម៉ែត្រ តភ្ជាប់រដ្ឋធានីញូវដែលី ជាមួយនឹងមជ្ឈមណ្ឌលហិរញ្ញវត្ថុមុមបៃ។ ដំណើរការសាងសង់ផ្លូវរបៀងដឹកជញ្ជូននៅភាគខាងលិចប្រទេសក៏កំពុងត្រូវបានធ្វើឡើង ដែលនេះនឹងជួយកាត់បន្ថយសម្ពាធនៃបណ្ដាញផ្លូវដែកនៅឥណ្ឌា៕

May 3, 2023

Ford Ranger Raptor ម៉ាស៊ីនម៉ាស៊ូត 2.0L Bi-Turbo ត្រូវបានដាក់សម្ពោធជាផ្លូវការ

(ភ្នំពេញ-ថ្ងៃទី 28 ខែមេសា ឆ្នាំ 2023) – ជួបគ្នាម្ដងទៀតហើយជាមួយនឹងព្រឹត្តិការណ៍ដ៏អស្ចារ្យដែលត្រូវបានរៀបចំឡើយដោយក្រុមហ៊ុន អ អិម អេ (ខេមបូឌា) ម.ក ផ្នែករថយន្ត Ford នោះគឺពិធីសម្ពោធជាផ្លូវការរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលកម្មវិធីនេះបានប្រារព្ធឡើងនៅ ដឹ ព្រេមៀ សេនធ័រ សែនសុខ ដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។

កម្មវិធីនេះប្រារព្ធឡើងដើម្បីណែនាំនូវជម្រើសម៉ាស៊ីនថ្មីមួយទៀតដល់អតិថិជន នោះគឺម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលជាប្រភេទម៉ាស៊ីនមានកម្លាំងខ្លាំង សន្សំសំចៃខ្ពស់ និងទទួលបានការពេញនិយមយ៉ាងច្រើនកុះករពីសំណាក់អតិថិជន។ ចំណុចដែលកាន់តែពិសេសគួរឱ្យភ្ញាក់ផ្អើលនោះគឺ តម្លៃបង់ពន្ធផ្លូវសម្រាប់រថយន្តទំនើប Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតមួយនេះគឺត្រឹមតែ 20 ម៉ឺនរៀលតែប៉ុណ្ណោះ។

អតិថិជនដែលទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសរបស់ Ford ដើម្បីសាកល្បងនូវមុខងារនៃប្រព័ន្ធសុវត្ថិភាព និងបច្ចេកវិទ្យាទំនើបចុងក្រោយដែលបានបំពាក់នៅលើរថយន្តនេះ។

ជាពិសេសជាងនេះទៀតគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនម៉ាស៊ូត 2.0L Bi-Turbo (Diesel0 Inline4 ដែលអាចផលិតកម្លាំងសេះបានរហូតដល់ 210 PS និងកម្លាំងរមួលកង់រហូតដល់ 500 Nm ដែលផ្ដល់នូវសន្ទុះដ៏ខ្លាំងក្នុងការបើកបរ។

មិនតែប៉ុណ្ណោះ នៅមានមុខងារច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖

ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
បំពាក់នូវបូម Fox Racing Shocks ទំហំ 2.5 អ៊ីញ ដែលផ្ដល់នូវផាសុកភាពក្នុងពេលបើកបរ ជាពិសេសសម្រាប់ការបើកបរលើផ្លូវដែលមានឧបសគ្គ និងផ្លូវ Off-Road Performance
អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងចង្កូតពិជាធ្វើឱ្យការចុលរលូនខ្លាំង
បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពិចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Tochscreen 12 អ៊ីញបានយ៉ាងងាយស្រួល
ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ និងប្រព័ន្ធជំនួយលើចង្កូតបញ្ចៀសចេញពីគ្រោះថ្នាក់
ប្រព័ន្ធចង្កៀងឆ្លាតដែលអាចរេតាមចង្កូតដោយស្វ័យប្រវត្ត និងអាចបែងចែកពន្លឺដោយស្វ័យប្រវត្ត
ប្រព័ន្ធចាប់ហ្វ្រាំងបន្ទាន់ពេលថយក្រោយដោយស្វ័យប្រវត្ត
ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឱ្យរថយន្តនេះជម្នះបានគ្រប់ឧបសគ្គនៃការបើកបរ និងស័ក្ដិសមជាកំពូលរថយន្តភីកអាប់ Off-Road Performance ។

រថយន្ត រថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះមានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ 8 ជម្រើស រួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស ជាមួយនឹងតម្លៃពិសេសត្រឹមតែ $75,900 តែប៉ុណ្ណោះ។

សម្រាប់ព័ត៌មានបន្ថែម លោកអ្នកអាចអញ្ជើញទៅសាកសួរ និងបើកបរសាកល្បងរថយន្តFord Ranger Raptor ស៊េរីឆ្នាំ 2023 ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នៅតាមបណ្ដាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លូវព្រះមុនីវង្ស ជាប់ទូតវៀតណាម លេខទូរស័ព្ទ៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្ដោយផ្លូវទៅព្រលានយន្តហោះ លេខទូរស័ព្ទ៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 និងផ្សារសាំហាន់ លេខទូរស័ព្ទ៖ 078 959 935
អគារតាំងបង្ហាញរថយន្ត Ford Trade-In ដែលស្ថិតនៅតាមបណ្ដោយផ្លូវទៅកាន់ព្រលានយន្តហោះ លេខទូរស័ព្ទ៖ 077 722 999 ឬ 011 255 229
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្ដោយផ្លូវជាតិលេខ 6A លេខទូរស័ព្ទ៖ 077 666 357 ឬ 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្ដោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទ៖ 078 999 883 ឬ 088 3 999 883 ។

April 29, 2023

អ៊ីស៊ុយហ្ស៊ុយបើកសម្ពោធរថយន្ត ISUZU MU-X ថ្មី

ក្រោយដណ្ដើមបានចំណែកទីផ្សាររថយន្តប្រភេទ Pickup បានចំនួន 30% ក្រុមហ៊ុនអ៊ីស៊ុយហ្ស៊ុយ (Isuzu) បានធ្វើការបើកបង្ហាញនូវរថយន្តប្រភេទ SUV ថ្មីមួយម៉ូដែលទៀត សម្រាប់ទីផ្សារប្រទេសកម្ពុជា ជាមួយនឹងរូបរាងស្អាត កម្លាំងខ្លាំង និងមានបំពាក់បច្ចេកវិទ្យាទំនើបៗជាច្រើន ដែលជួយសម្រួលដល់ការបើកបរប្រកបដោយផាសុកភាព។

លោក Akira Odagaki ប្រធានក្រុមហ៊ុន ទ្រីផេដ អ៊ីស៊ុយហ្ស៊ុយ ខេមបូឌា ឯ.ក ដែលជាក្រុមហ៊ុនចែកចាយរថយន្តអ៊ីស៊ុយហ្ស៊ុយ ប្រភេទ Pickups និង SUV ផ្តាច់មុខនៅក្នុងព្រះរាជាណាចក្រកម្ពុជាបានឱ្យដឹងថា ភាពជោគជ័យក្នុងទីផ្សាររថយន្តកម្ពុជាបានជំរុញឱ្យក្រុមហ៊ុនបន្តដាក់បង្ហាញរថយន្តថ្មីៗមកកាន់ប្រទេសមួយនេះ។ លោកបន្ដថា រថយន្ត The New ISUZU MU-X ដែលទើបដាក់បង្ហាញនេះត្រូវបានរៀបចំរចនាម៉ូតឡើងវិញ ទាំងផ្ទៃខាងក្នុង និងខាងក្រៅនៃរថយន្ត ដើម្បីធ្វើឱ្យកាន់តែស្រស់ស្អាត ឆើតឆាយ និងផ្តល់ផាសុកភាពពេញលេញទាំងនេះឆ្លុះបញ្ចាំងពីភាពល្អដាច់គេ បើប្រៀបធៀបជាមួយនឹងរថយន្តផ្សេងទៀត។

លោកថ្លែងថា៖ «ខ្ញុំជឿជាក់ថា រថយន្ត The New ISUZU MU-X នឹងត្រូវចិត្តលោកអ្នកហើយវានឹងជាកម្លាំងមួយរុញច្រានការលក់របស់ក្រុមហ៊ុនកាន់តែខ្ពស់ និងសម្រេចបានគោលដៅ»។

រថយន្តនេះផ្តល់ជូននូវសមត្ថភាពបើកបរដ៏ពិសេសតាមរយៈម៉ាស៊ីន “Blue Power” ដែលផ្តល់ថាមពលខ្លាំង សន្សំសំចៃប្រេង និងផ្តល់ជូននូវកម្រិតសុវត្ថិភាពខ្ពស់បំផុតទៅតាមបទដ្ឋានរបស់អ៊ីស៊ុយហ្ស៊ុយ ដែលទទួលបានទំនុកចិត្តពីអតិថិជននៅជុំវិញពិភពលោក និងបានឆ្លើយតបទៅគ្រប់បែបផែននៃជីវិតរស់នៅខុសៗគ្នា ហើយការជ្រៀតចូលក្នុងទីផ្សារនៃរថយន្ត Pickup និង SUV នៅក្នុងទីផ្សារសំខាន់ៗ ដូចជាកម្ពុជា និងឡាវ គឺជាជំហានសំខាន់បន្ទាប់ទៀតសម្រាប់ក្រុមហ៊ុន ទ្រីផេដ អ៊ីស៊ុយហ្ស៊ុយ សេល និងសាខាក្រុមហ៊ុន អ៊ីស៊ុយហ្ស៊ុយ នៅក្នុងទីផ្សារតំបន់អាស៊ាន។ រថយន្ត “The New ISUZU MU-X” ដែលជាប្រភេទរថយន្ត SUV ថ្មីបំផុត សម្រាប់ទីផ្សារពិភពលោក ជាមួយនឹងគោលគំនិត “Uniquely You” ដោយវាមានរចនាបទថ្មី ផ្ទៃខាងក្នុងពណ៌លឿង ប្រព័ន្ធជើងក្រោមមានលំនឹងល្អ មានពោងសុវត្ថិភាព SRS ចំនួន 6 និងប្រព័ន្ធគ្រប់គ្រងល្បឿនពេលបើកបរចុះចំណោត (HDC) ជាដើម។

ក្រៅពីលក្ខណៈខាងលើវា ក៏មានចង្កៀងមុខថ្មីបែប Bi-LED ផ្តល់ពន្លឺភ្លឺច្បាស់ជាងមុន និងមានប្រព័ន្ធកែតម្រូវកម្រិតពន្លឺបានដោយស្វ័យប្រវត្តិជាមួយនឹងអំពូល Daytime Running Light។ ផ្នែកខាងក្នុងប្រើនូវប្រព័ន្ធ iConnect Multimedia លើអេក្រង់ Touch Screen ទំហំ 8 អ៊ីញអាចភ្ជាប់ជាមួយទូរស័ព្ទស្មាតហ្វូនតាមរយៈ Mirroring និងរន្ធ USB ។ កៅអីអូតូ អនុញ្ញាតឱ្យអ្នកបើកបរប្តូរទីតាំងកៅអីបានយ៉ាងត្រឹមត្រូវ 6 ទិសហើយក៏អាចបត់បាន ងាយស្រួលសម្រាប់ដាក់អីវ៉ាន់។ រថយន្តនេះ មានម៉ាស៊ីនប្រើប្រេងម៉ាស៊ូត Ddi 3.0 VGS, TURBO ដែលមានកម្លាំង 163 សេះ នៅ3,200 ជុំ/នាទី កម្លាំងបង្វិលអតិបរមា 380 ញីវតុនម៉ែត្រ នៅ 1,800 – 2,200 ជុំ/នាទី ហើយប្រព័ន្ធបើកបរថ្មី និងប្រអប់លេខអូតូ 5 លេខជាមួយនឹងតម្លៃចាប់ពី 48,900 ដុល្លារឡើងទៅ៕

June 17, 2017

ទីបំផុតទូរស័ព្ទ Nokia ប្រើប្រព័ន្ធ Android បើកសម្ពោធនៅកម្ពុជាហើយ!!

បន្ទាប់ពីបង្ហាញខ្លួនកាលពីដើមឆ្នាំ ក្នុងពិព័រណ៍ Mobile World Congress នៅទីក្រុងបាសេឡូណា ទូរស័ព្ទស៊េរីថ្មីប្រើប្រាស់ប្រព័ន្ធប្រតិបត្តិការ Android របស់ក្រុមហ៊ុន Nokia បានបើកសម្ពោធជាផ្លូវការហើយក្នុងទីផ្សារកម្ពុជា កាលពីល្ងាចថ្ងៃទី 14 ខែមិថុនា ឆ្នាំ 2017 ម្សិលមិញនេះ។

Nokia បានបង្ហាញរាល់ស្មាតហ្វូន Android ថ្មីៗទាំងអស់ រួមមានទូរស័ព្ទ Nokia3 Nokia5 និង Nokia6 ហើយក្នុងនោះទូរស័ព្ទស៊េរីចាស់តែផ្លាស់ប្ដូរជំនាន់ថ្មី Nokia 3310 ឆ្នាំ 2017 ក៏មានវត្តមានក្នុងកម្មវិធីនោះដែរ។ អ្នកតំណាងក្រុមហ៊ុន Nokia កម្ពុជា ឱ្យដឹងថា ក្រុមហ៊ុននឹងដាក់លក់ Nokia3 និង 3310 ក្នុងទីផ្សារស្រុកខ្មែរនៅចុងខែមិថុនានេះ ចំណែកទូរស័ព្ទ Nokia5 និង Nokia6 នឹងចាប់ផ្តើមដាក់លក់នៅពាក់កណ្ដាលខែកញ្ញាខាងមុខ។

ទូរស័ព្ទ Nokia3 ប្រើអេក្រង់ IPS HD ទំហំ 5.0 អ៊ីញ ស្រោបដោយផ្ទៃកញ្ចក់ Corning® Gorilla® និងមានស្រទាប់អេក្រង់ប្រភេទ Polarised ធ្វើឱ្យមានចំណាំងផ្លាតតិច ដែលផ្តល់នូវរូបភាពកាន់តែច្បាស់ល្អ ទោះបីស្ថិតនៅក្រោមពន្លឺថ្ងៃខ្លាំងក៏ដោយហើយវាក៏មានកាមេរ៉ាមុខក្រោយទំហំ 8MP ដូចគ្នា និងមាន 4 ពណ៌ខុសៗគ្នា គឺ ខ្មៅ ទឹកប្រាក់ ខៀវ និងទង់ដែង។

សម្រាប់ទូរស័ព្ទ Nokia5 អេក្រង់ធំទំហំ 5.2 អ៊ីញ ប្រភេទ IPS HD ដំណើរការដោយអង្គប្រតិបត្តិការ Qualcomm® Snapdragon ™ 430 មានកាមេរ៉ាក្រោយទំហំ 13MP បំពាក់មុខងារ Auto Focus និងមានភ្លើង Flash ពីរ រួមទាំងកាមេរ៉ាមុខទំហំ 8MP កម្រិតចាប់រូបភាព 84 ដឺក្រេដែលធ្វើឱ្យការថតរូបបែបស៊ែលហ្វ៊ីរបស់លោកអ្នកកាន់តែធំទូលាយ និងភ្លឺច្បាស់ត្រជាក់ភ្នែកពិសេសវាមានមុខងារចាប់រូបភាពបានល្អទាំងនៅកន្លែងភ្លឺ និងទីងងឹត។ Nokia5 មាន 4 ពណ៌ខុសៗគ្នាគឺ ខ្មៅ ទឹកប្រាក់ ខៀវ និងទង់ដែង។

ស្មាតហ្វូនចុងក្រោយ គឺ Nokia6 ដែលវាមានអេក្រង់ធំជាងគេ ទំហំ 5.5 អ៊ីញ Full HD និងមានតួខ្លួនផលិតចេញពីលោហធាតុអាលុយមីញ៉ូមកម្រិត 6000 មីល្លីម៉ែត្រដែលស័ក្តិសមបំផុតសម្រាប់អ្នកដែលចង់បានទូរស័ព្ទដែលរឹងមាំជាមួយកម្មវិធីកម្សាន្តយ៉ាងច្រើនសម្បូរបែប។

វាបំពាក់ដោយប្រព័ន្ធសំឡេងឆ្លាតវៃមានរន្ធសំឡេងចំនួន 2 ដែលអាចឱ្យអ្នកប្រើប្រាស់ទទួលបាននូវសំឡេងឮច្បាស់ល្អ ខណៈដែលប្រព័ន្ធសំឡេង Dolby Atmos® នឹងផ្តល់នូវបទពិសោធការកម្សាន្តផ្នែកភាពយន្តដ៏អស្ចារ្យមួយទៀតដែលពុំធ្លាប់មាន។

ទូរស័ព្ទនេះប្រើបន្ទះឈីប Qualcomm® Snapdragon ™ 430 និងអង្គក្រាហ្វិកQualcomm® Adreno™ 505 ផ្តល់តុល្យភាពរវាងការប្រើប្រាស់ និងថាមពលថ្មបានល្អប្រើបានរយៈពេលយូរ។ Nokia6 មាន 4 ពណ៌ខុសៗគ្នាគឺ ខ្មៅ ទឹកប្រាក់ ខៀវនិងទង់ដែង។

ដោយឡែកទូរស័ព្ទមួយចុងក្រោយគេនេះ គឺ Nokia 3310 ចាស់ផ្លាស់ប្ដូររូបរាងថ្មីស៊េរីឆ្នាំ 2017 ជាមួយនឹងរូបរាងស្តើងស្រាលជាទូរស័ព្ទដែលលក់ដាច់បំផុតមួយក្នុងប្រវត្តិសាស្ត្ររបស់ Nokia។ 3310 ត្រូវបានផលិតជាថ្មីជាមួយកំណែប្រែថ្មី ជាមួយនឹងពណ៌ស្រស់ស្អាតការរចនាមានលក្ខណៈទំនើបពិសេស កាន់ថ្មបានយូរ ដោយអាចនិយាយបានរហូតដល់ 22 ម៉ោង និងទុកចោលបានដល់ទៅមួយខែ។

អ្នកប្រើប្រាស់អាចផ្ញើសារ និយាយបានពេញមួយថ្ងៃ ថតរូប ស្តាប់ចម្រៀង និងលេងហ្គេមពស់ដ៏ល្បីល្បាញជាថ្មីម្តងទៀតដោយប្រើថាមពលថ្មតែមួយ។ ជាមួយនឹងសមត្ថភាពកាន់ថ្មបានយូររហូតដល់ពេញមួយខែ Nokia 3310 មានអ្វីគ្រប់យ៉ាងដែលលោកអ្នកធ្លាប់ស្គាល់ និងស្រឡាញ់ ដូចជាមានស៊ុមផលិតពីប៉ូលីកាបូនរលោងទាន់សម័យជាដើម៕

June 15, 2017

Vespa សម្ពោធម៉ូតូស៊េរីថ្មី 2 ម៉ូដែលក្នុងទីផ្សារកម្ពុជា

ក្រោយជោគជ័យលើទីផ្សារម៉ូតូបែបប្រណីតរួចមក ក្រុមហ៊ុន Narita Vespa Cambodia ដែលជាក្រុមហ៊ុននាំចូល និងចែកចាយម៉ូតូ Vespa បានធ្វើការដាក់សម្ពោធម៉ូតូស៊េរីថ្មីគឺ Vespa Primavera និង Sprint មកក្នុងទីផ្សារកម្ពុជា ជាមួយនឹងការបំពាក់បច្ចេកវិទ្យាទំនើប កម្លាំងខ្លាំង តែស៊ីសាំងតិចជាងមុន។

លោក ឡុង ណារិទ្ធ អគ្គនាយកក្រុមហ៊ុនណារីតា វេស្ប៉ា បានឱ្យដឹងថា ម៉ូតូដែលក្រុមហ៊ុនទើបដាក់បង្ហាញនេះ វាជាម៉ូតូជំនាន់ថ្មីដ៏ទំនើប ត្រូវបានផលិតឡើងតាមបច្ចេកវិទ្យារបស់អ៊ីតាលី មានសមត្ថភាពអាចបើកបរកាន់តែប្រសើរ ស៊ីសាំងតិច សំឡេងស្ងាត់ និងមានលំនឹងល្អទោះបើកបរក្នុងស្ថានភាពផ្លូវបែបណាក៏ដោយ។ មួយវិញទៀត ម៉ូតូទាំងពីរនេះក៏មានបំពាក់នូវប្រព័ន្ធហ្វ្រាំងសុវត្ថិភាព ABS និងមានប្រភេទម៉ាស៊ីន ដែលជួយកាត់បន្ថយផលប៉ះពាល់ដល់បរិស្ថានដែលកើតចេញពីការបញ្ចេញផ្សែងពុលទៀតផង។

ក្នុងឆ្នាំ 2014 ម៉ូតូទាំងពីរបានចាប់បដិសន្ធិឡើងសម្រាប់ជំនួសឱ្យម៉ូដែល Vespa ស៊េរីចាស់ដែលមានទំហំតូចៗ ហើយត្រូវបានកែលម្អលក្ខណៈបច្ចេកទេសដូចគ្នាទាំងអស់ ខុសតែការរចនារូបរាងមួយចំនួនតែប៉ុណ្ណោះ ដោយ Vespa Primavera នេះមានចង្កៀងមុខមូល ខណៈSprint មានចង្កៀងមុខជ្រុង។ ម៉ូតូ Vespa Primavera និង Sprint ត្រូវបានបំពាក់នូវម៉ាស៊ីនកម្លាំង 2 ជម្រើស 125cc និង 150 cc ហើយមានរង្វង់កង់ 12 អ៊ីញ។ ក្រៅពីនេះវាក៏មានរន្ធ USB សម្រាប់ការសាកថ្មទូរស័ព្ទ និងមានប្រអប់សម្រាប់ដាក់ឥវ៉ាន់ធំទូលាយ រួមនឹងបំពាក់ប្រព័ន្ធការពារចោរលួចដ៏ទំនើបផងដែរ៕

May 20, 2017

Tag: សម្ពោធ

ថ្ងៃ​ទី 05 ឧសភា​នេះ កម្ពុជា​សម្ពោធ​បើក​ព្រឹត្តិការណ៍​ស៊ី​ហ្គេម​លើក​ទី 32 ជា​ផ្លូវការ

ស្ពាន​សម្រាប់​ផ្លូវរថភ្លើង​​ខ្ពស់​ជាងគេ​បង្អស់​លើ​ពិភពលោក

Ford Ranger Raptor ម៉ាស៊ីន​ម៉ាស៊ូត 2.0L Bi-Turbo ត្រូវ​បាន​ដាក់​សម្ពោធ​ជា​ផ្លូវ​ការ​