សមត្ថភាព - La Reine Media

ព្រឹត្តិការណ៍ប្រណាំងឈុតហោះហើរល្បឿនលឿនលើអាកាសដំបូងគេលើពិភពលោក

ទីក្រុងឌូបៃប្រកាសថា នឹងប្រារព្ធព្រឹត្តិការណ៍នាំមុខគេ ប្រមូលផ្ដុំដោយក្រុមប្រណាំងដែលប្រើប្រាស់ឈុតហោះហើរល្បឿនលឿនមកពីជុំវិញពិភពលោក។

ក្រុមប្រឹក្សាកីឡាឌូបៃ ក្រោមការចង្អុលបង្ហាញរបស់រាជទាយាទឌូបៃ Sheikh Hamdan bin Mohammed bin Rashid AI Maktoum ថ្មីៗនេះបានប្រកាសអំពីការប្រារព្ធព្រឹត្តិការណ៍ប្រណាំងឈុតហោះហើរប្រតិកម្មឌូបៃ។ នេះនឹងជាព្រឹត្តិការណ៍ប្រណាំងឈុតហោះហើរល្បឿនលឿនដំបូងគេលើពិភពលោក ក្នុងនោះ កីឡាករចូលរួមនឹងប្រើប្រាស់ឈុតហោះហើរដើម្បីបង្ហាញសមត្ថភាព និងល្បឿននៅលើអាកាស។ នេះបើតាម Interesting Engineering ចុះផ្សាយកាលពីថ្ងៃទី 30 មករា 2024។

កីឡាករជំនាញ 8 នាក់ មកពីជុំវិញពិភពលោក រួមមាន Ahmed AI Shehhi របស់អេមីរ៉ាតអារ៉ាបរួម (UAE) ផងដែរ នឹងប្រឈមមុខដាក់គ្នាដើម្បីបញ្ជាក់ពីសមត្ថភាព។ ព្រឹត្តិការណ៍នេះនឹងត្រូវបានធ្វើឡើងក្រោមការឧបត្ថម្ភរបស់ Gravity Industries ជាក្រុមហ៊ុននាំមុខគេនៅក្នុងវិស័យបច្ចេកវិទ្យាឈុតសម្លៀកបំពាក់ហោះហើរល្បឿនលឿន។

យោងតាមការព្រមព្រៀងរវាងក្រុមប្រឹក្សាកីឡាឌូបៃ និង Gravity Industries ព្រឹត្តិការណ៍ប្រណាំងនេះនឹងកើតឡើងនៅថ្ងៃទី 28 កុម្ភៈ 2024 នៅក្នុងពិព័រណ៍នាវាឌូបៃ។ ភ្ញៀវដែលចូលរួមព្រឹត្តិការណ៍ពិព័រណ៍នេះនឹងមានឱកាសបានទស្សនាការប្រណាំងដ៏កម្រនេះ៕

January 31, 2024

ក្រសួងសាធារណការ សម្ពោធដាក់ឱ្យដំណើរការ ឃ្លាំងលើកដាក់ និងស្តុកទំនិញត្រជាក់

កាលពីព្រឹកថ្ងៃទី 24 មករានេះ ឯកឧត្ដម ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជុន បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ ឃ្លាំងលើកដាក់ និងស្តុកទំនិញត្រជាក់ របស់ក្រុមហ៊ុន ខ្មែរ ខូល ឆេន (Khmer Cold Chain) ដែលមានទីតាំងស្ថិតនៅក្នុងបរិវេណចំណតផែកុងតឺន័រ LM17 របស់កំពង់ផែស្វយ័តភ្នំពេញ ក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។ នេះបើតាមក្រសួងសាធារណការនិងដឹកជញ្ជូន។

យោងតាមក្រសួងខាងលើ ឃ្លាំងលើកដាក់ និងស្តុកទំនិញត្រជាក់នេះ ត្រូវបានសាងសង់ឡើងក្រោមគំនិតផ្តួចផ្តើមអភិវឌ្ឍន៍ដោយក្រុមហ៊ុន InfraCo Asia សហការជាមួយកំពង់ផែស្វយ័តភ្នំពេញ ដោយមានការគាំទ្រពីមូលនិធិអភិវឌ្ឍន៍ និង USAID ក្រោមជំនួយឧបត្ថម្ភពី ប្រទេសអង់គ្លេស អូស្ត្រាលី ស្វីស និងហូឡង់។

ឃ្លាំងនេះមានសមត្ថភាពស្តុកទំនិញបាន 5,827 ម៉ែត្រគូប ជាមួយនឹងកម្រិតសីតុណ្ហភាពចាប់ពី -22 អង្សាសេ ដល់ 15 អង្សាសេ។

ថ្លែងក្នុងឱកាសនេះ ឯកឧត្តមរដ្ឋមន្ត្រី បានលើកឡើងថា ឃ្លាំងត្រជាក់មួយខ្នងនេះ នឹងជួយបំពេញបន្ថែមនូវមុខងាររបស់ចំណតផែកុងតឺន័រ LM17 ដែលនឹងធ្វើឱ្យកំពង់ផែស្វយ័តភ្នំពេញទទួលបាននូវកំណើនបរិមាណកុងតឺន័រឆ្លងកាត់ ដោយឃ្លាំងនេះ នឹងផ្តល់នូវតម្លៃសេវាបន្ថែម ជាពិសេស សេវាស្តុកទំនិញត្រជាក់ ស្របតាមស្តង់ដារអន្តរជាតិ។

ជាងនេះទៅទៀត ឃ្លាំងនេះនឹងចូលរួមគាំទ្រផែនការអាទិភាព របស់ក្រសួងសាធារណការ និងដឹកជញ្ជូន ដែលបានដាក់ចេញដើម្បីពង្រឹង និងលើកកម្ពស់ការអភិវឌ្ឍវិស័យឡូជីស្ទីក និងកំពង់ផែនៅកម្ពុជា រួមទាំងការធ្វើកំណែទម្រង់ធ្វើយ៉ាងណាឱ្យតម្លៃឡូជីស្ទីកកាន់តែមានភាពប្រកួតប្រជែង និងការផ្តល់សេវាកាន់តែមានភាពឆាប់រហ័ស្ថ តម្លាភាព និងប្រសិទ្ធភាព៕

January 24, 2024

ផ្កាយរណបរ៉ាដារបស់វៀតណាម នឹងហោះឡើងទៅកាន់គន្លងគោចរនៅដើមឆ្នាំ 2025

LOTUSat-1 ដែលជាផ្កាយរណបបច្ចេកវិទ្យារ៉ាដាដំបូងរបស់វៀតណាម គ្រោងនឹងអភិវឌ្ឍរួចរាល់នៅក្នុងខែមីនា និងត្រូវបាញ់បង្ហោះឡើងទៅកាន់គន្លងគោចរនៅដើមឆ្នាំ 2024។ នេះបើតាមអគ្គនាយករងនៃមជ្ឈមណ្ឌលអវកាសវៀតណាម។

ផ្កាយរណប LOTUSat-1 មានទម្ងន់ 600 គីឡូក្រាម ប្រើប្រាស់បច្ចេកវិទ្យារ៉ាដាថ្មីបំផុត អាចមើលឃើញវត្ថុទំហំចាប់ពីមួយម៉ែត្រនៅលើដី ព្រមទាំងមានសមត្ថភាពសង្កេតមើលទាំងថ្ងៃទាំងយប់។ LOTUSat-1 នឹងផ្ដិតយករូបភាព និងផ្ដល់ទិន្នន័យច្បាស់ការណ៍ដើម្បីកាត់បន្ថយផលប៉ះពាល់នៃគ្រោះធម្មជាតិ ការប្រែប្រួលអាកាសធាតុ ការគ្រប់គ្រងធនធានធម្មជាតិ និងបរិស្ថាន។

ក្រុមហ៊ុន NEC គឺជាអ្នកអភិវឌ្ឍ ផលិតផ្កាយរណប LOTUSat-1 និងបណ្ដុះបណ្ដាលធនធានមនុស្សដល់វៀតណាម នៅប្រទេសជប៉ុន។ ការបណ្ដុះបណ្ដាលធនធានមនុស្សនេះគឺក្នុងបំណងផ្ទេរបច្ចេកវិទ្យានៃការអភិវឌ្ឍ ការដឹកជញ្ជូន និងការប្រើប្រាស់រូបភាពពីផ្កាយរណប។

យោងតាមមជ្ឈមណ្ឌលអវកាសវៀតណាម ផ្កាយរណប LOTUSat-1 ស្ថិតក្នុងគម្រោង «បង្ការ ទប់ទល់គ្រោះធម្មជាតិ និងការប្រែប្រួលអាកាសធាតុ ដោយប្រើប្រាស់ផ្កាយរណបសង្កេតផែនដី»។ គម្រោងនេះត្រូវបានបើកដំណើរការនៅហាណូយ ចាប់ពីខែកញ្ញា 2012 ដោយប្រើប្រាស់ទុន ODA របស់ជប៉ុន និងទុនបដិភាគរបស់វៀតណាម។

ការអភិវឌ្ឍផ្កាយរណប LOTUSat-1 គ្រោងនឹងរួចរាល់ជាស្ថាពរនៅក្នុងខែមីនា ឆ្នាំ 2024 ហើយអាចបាញ់បង្ហោះឡើងទៅកាន់គន្លងតារាវិថីក្នុងរង្វង់ពីខែធ្នូឆ្នាំ 2024 ដល់ខែកុម្ភៈ 2025។

សូមបញ្ជាក់ថា ផ្កាយរណបរ៉ាដាអាចថតរូបភាពនៅក្នុងស្ថានភាពអាកាសធាតុគ្រប់ប្រភេទ សូម្បីតែពេលមានពពក សន្សើម អ័ព្វ និងពន្លឺមិនគ្រប់គ្រាន់ជាដើម។

វៀតណាម និងជប៉ុន បានចាប់ផ្ដើមសហការគ្នាក្នុងវិស័យបច្ចេកវិទ្យាអវកាសចាប់ពីឆ្នាំ 2006។ កន្លងមក ក្រោមការជួយជ្រោមជ្រែងរបស់អង្គការអវកាសជប៉ុន (JAXA) បណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម (VAST) បានស្រាវជ្រាវ អភិវឌ្ឍ និងផលិតផ្កាយរណបខ្នាតតូចចំនួនបីគ្រឿង រួមមាន PicoDragon, Nano Dragon និង MicroDragon ហើយត្រូវបានបាញ់បង្ហោះឡើងទៅកាន់គន្លងគោចរដោយជោគជ័យ ក្រោមជំនួយពី JAXA របស់ប្រទេសជប៉ុន៕

January 22, 2024

មហាក្សត្រ និងមហេសីរបស់ម៉ាឡេស៊ី ធ្វើជាអ្នកដឹកនាំកម្មវិធីទូរទស្សន៍

មហាក្សត្រ រួមនឹងមហេសីរបស់ប្រទេសម៉ាឡេស៊ី ដឹកនាំកម្មវិធីព័ត៌មានទូរទស្សន៍ក្នុងម៉ោងពិសេស និងទទួលបានការកោតសរសើរពីប្រជាជនយ៉ាងខ្លាំង។

មហាក្សត្រម៉ាឡេស៊ី Abdullah Ahmad Shah និងមហេសី Tunku Azizah Aminah Maimunah Iskandariah កាលពីថ្ងៃទី 17 មករា 2024 បានបង្ហាញព្រះកាយក្នុងកម្មវិធីព័ត៌មាននៅវេលាម៉ោង 20 របស់ទូរទស្សន៍ TV3។ កម្មវិធីរាយការណ៍ព័ត៌មាននេះត្រូវបានថតជាមុននៅពេលព្រឹកថ្ងៃដដែល ពេលទ្រង់យាងទៅធ្វើទស្សនកិច្ចក្រុមហ៊ុនប្រព័ន្ធផ្សព្វផ្សាយ Media Prima Group ដែលជាស្ថាប័នគ្រប់គ្រងទូរទស្សន៍ TV3 នៅ Selangor។

ក្នុងអំឡុង 10 នាទីនៃការដឹកនាំកម្មវិធីព័ត៌មាន មហាក្សត្រ Abdullah ព្រះជន្ម 64 វស្សា និងមហេសី បានដឹកនាំសេចក្ដីរាយការណ៍ព័ត៌មានចំនួនបី ដែលចាប់ផ្ដើមដោយការសម្ភាសជាមួយនឹងប្រជាជនម៉ាឡេស៊ី ទាក់ទងនឹងសាមគ្គីភាព។

ក្នុងសេចក្ដីរាយការណ៍ព័ត៌មានទីពីរ មហាក្សត្រ និងមហេសីរបស់ម៉ាឡេស៊ី មានបន្ទូលអំពីតួនាទីរបស់ត្រីប្រាចំពោះសេដ្ឋកិច្ច និងទេសចរណ៍នៅ Pahang។ ចុងក្រោយ ទ្រង់ទាំងពីរអង្គមានបន្ទួលអំពីដំណើរទស្សនកិច្ចរបស់ទ្រង់នៅ Media Prima Group។

ការដឹកនាំកម្មវិធីព័ត៌មានរបស់មហាក្សត្រ និងមហេសីម៉ាឡេស៊ី ទទួលបានចំណាប់អារម្មណ៍ច្រើនពីអ្នកលេងបណ្ដាញសង្គម។ អ្នកខ្លះនិយាយថា ពួកគេមានមោទកភាពយ៉ាងខ្លាំងចំពោះការបង្ហាញសមត្ថភាពរបស់មហាក្សត្រ និងមហេសី៕

January 19, 2024

រ៉ុក្កែតពាណិជ្ជកម្មកម្លាំងខ្លាំងបំផុតរបស់ចិន បាញ់បង្ហោះបានជោគជ័យ

ប្រទេសចិន កាលពីថ្ងៃទី 11 មករា 2024 បានបាញ់បង្ហោះរ៉ុក្កែតឥន្ធនៈរឹង Gravity-1 ដែលមានកម្លាំងរុញច្រាន 600 តោន ចេញពីតំបន់សមុទ្ររបស់ខេត្តសានទុង (Shandong) ដោយជោគជ័យ។

ក្នុងជើងហោះហើរដំបូង រ៉ុក្កែត Gravity-1 ដែលអភិវឌ្ឍដោយក្រុមហ៊ុនអវកាសពាណិជ្ជកម្មចិន Orienspace បាននាំយកផ្កាយរណបឧតុនិយម Yunyao-1 ចំនួន 3 គ្រឿង ឡើងទៅកាន់គន្លងតារាវិថីដោយជោគជ័យ។ ការសម្រេចបាននេះបានជួយឱ្យ Gravity-1 ក្លាយជារ៉ុក្កែតពាណិជ្ជកម្មដែលមានកម្លាំងខ្លាំងបំផុតរបស់ប្រទេសចិន និងជារ៉ុក្កែតដែលប្រើប្រាស់ឥន្ធនៈរឹងដែលមានកម្លាំងខ្លាំងបំផុតដែលធ្លាប់បានទទួលជោគជ័យក្នុងបេសកកម្មអវកាស។

រ៉ុក្កែតនេះមានកម្ពស់ប្រហែល 30 ម៉ែត្រ ខណៈដែលទម្ងន់គឺប្រហែល 400 តោន និងមានសមត្ថភាពរុញច្រាន 600 តោន។ វាអាចនាំយកបន្ទុកប្រហែល 6,500 គីឡូក្រាមឡើងទៅកាន់គន្លងតារាវិថីផែនដីកម្រិតទាប (LEO) ឬ 4,200 គីឡូក្រាមឡើងទៅកាន់គន្លងតារាវិថីសមកាលកម្មព្រះអាទិត្យ (Sun Synchronous Orbit – SSO) ដែលមានកម្ពស់ពីផែនដីប្រហែល 500 គីឡូម៉ែត្រ។

ប្រភេទគន្លងតារាវិថីជុំវិញផែនដី

Gravity-1 អាចនាំយកផ្កាយរណប 30 គ្រឿង ដែលក្នុងមួយគ្រឿងៗមានទម្ងន់ 100 គីឡូក្រាម ឡើងទៅកាន់គន្លងតារាវិថីកម្រិតទាប និងមធ្យម។

យោងតាម Orienspace រ៉ុក្កែតនេះមានបីជាន់សំខាន់ៗ និងប្រព័ន្ធរុញច្រានចំនួនបួន ដែលទាំងអស់សុទ្ធតែទទួលបានថាមពលពីម៉ូទ័រឥន្ធនៈរឹង។ ក្រុមហ៊ុនផលិតនិយាយថា ម៉ូទ័ររបស់ជាន់ទីបីអាចត្រូវបានផ្លាស់ប្ដូរដោយម៉ាស៊ីនម៉ាស៊ូត kerosene និងអុកស៊ីសែន ដើម្បីបង្កើនកម្លាំងដឹកជញ្ជូន៕

January 13, 2024

ការនាំចេញអង្កររបស់ប្រទេសថៃ ទំនងនឹងថយចុះក្នុងឆ្នាំ 2024

ស្ថានភាពនៃការនាំចេញអង្កររបស់ប្រទេសថៃ នៅក្នុងឆ្នាំ 2024 ត្រូវបានគេជឿថា នឹងមានការថយចុះ ប្រមាណ 15% ដោយសារតែល្បឿននៃការដណ្ដើមទិញស្រូវអង្ករដើម្បីបំពេញឃ្លាំងនៅលើពិភពលោក បានថមថយកម្លាំង។ នេះបើតាមទំព័រ Bloomberg ចុះផ្សាយកាលពីពេលថ្មីៗនេះ។

លោក Chookiat Ophaswongse ប្រធានកិត្តិយសនៃសមាគមអ្នកនាំចេញអង្ករថៃ ឱ្យដឹងថា ប្រទេសនេះអាចនឹងជួបប្រទះតម្រូវការទាបជាងមុនពីអ្នកបញ្ជាទិញអង្ករនៅឥណ្ឌូណេស៊ី ដែលជាដៃគូជំនួញធំរបស់ប្រទេសថៃ កាលពីឆ្នាំកន្លង។ លោក Chookiat ថ្លែងថា ការប្រែប្រួលតម្លៃរបស់ប្រាក់បាតអាចបង្កផលប៉ះពាល់ដល់សមត្ថភាពប្រកួតប្រជែងរបស់ថៃ ជាមួយនឹងបណ្ដាប្រទេសនាំចេញអង្ករធំៗរបស់ពិភពលោក។

យោងតាមតំណាងសមាគមនាំចេញអង្ករថៃ «ឥណ្ឌូណេស៊ី អាចនឹងកាត់បន្ថយការនាំចូលអង្ករ ក្រោយការបោះឆ្នោតសកលរបស់ប្រទេសនេះ» ខណៈដែលតម្លៃនៃប្រាក់បាតរបស់ប្រទេសថៃ ក៏ប្រែប្រួល ធ្វើឱ្យតម្លៃអង្កររបស់ប្រទេសនេះ ពិបាកប្រកួតប្រជែងក្នុងទីផ្សារ។

ទិន្នន័យបឋមបង្ហាញថា ការនាំចេញអង្កររបស់ថៃ បានកើនឡើងខ្ពស់បំផុតក្នុងរង្វង់ 5 ឆ្នាំមកនេះ។ ក្នុងឆ្នាំ 2023 ថៃបាននាំចេញអង្ករប្រមាណ 8.8 លានតោន ច្រើនជាងឆ្ងាយ បើធៀបនឹង 656,000 តោនរបស់កម្ពុជា៕

January 8, 2024

ណាសាបង្ហាញគំរូយន្តហោះប្រើថាមពលព្រះអាទិត្យសម្រាប់ភពអង្គារ

យន្តហោះ MAGGIE អាចហោះចម្ងាយ 179 គីឡូម៉ែត្រ នៅលើកម្ពស់ 1,000 ម៉ែត្រ ជួយស្រាវជ្រាវបរិយាកាស និងភូគព្ភសាស្ត្រនៃភពអង្គារ។

ក្រោយពីជោគជ័យរបស់ឧទ្ធម្ភាគចក្រ Ingenuity នៅលើភពអង្គារ ក្រុមអ្នកជំនាញកំពុងឆ្ពោះទៅរកការផលិតយន្តហោះប្រើប្រាស់ថាមពលព្រះអាទិត្យ។ នេះបើតាម Interesting Engineering ចុះផ្សាយកាលពីថ្ងៃទី 05 មករា 2024។ យន្តហោះនេះមានឈ្មោះថា អ្នកស្រាវជ្រាវឆ្លាតវៃលើដី និងលើអាកាសភពអង្គារ (MAGGIE) នេះ ត្រូវបានប្រកាសនៅក្នុងកម្មវិធីគំនិតច្នៃប្រឌិតកម្រិតខ្ពស់របស់ណាសា (NASA Innovative Advanced Concepts – NIAC)។

នេះគឺជាយន្តហោះដែលមានប្រសិទ្ធភាពខ្ពស់ ប្រើប្រាស់ថាមពលព្រះអាទិត្យ អាចហោះនៅក្នុងបរិយាកាសភពអង្គារ។ គំរូយន្តហោះ MAGGIE ដែលស្នើដោយក្រុមហ៊ុនអាកាសចរណ៍អវកាសអាម៉េរិក Coflow Jet អាចស្រាវជ្រាវបរិយាកាសទូទាំងភពអង្គារ។ បច្ចេកវិទ្យា CoFlow Jet (CFJ) អនុញ្ញាតឱ្យយន្តហោះនេះហោះហើរក្នុងបរិយាកាសស្ដើងរបស់ភពក្រហមនេះ។

តាមគម្រោង MAGGIE អាចហោះបាន 179 គីឡូម៉ែត្រ នៅលើកម្ពស់ 1,000 ម៉ែត្រ បន្ទាប់ពីបានបញ្ចូលថាមពលមួយពេញដែលប្រើពេល 7.6 ថ្ងៃនៅលើភពអង្គារ។ យន្តហោះនេះអាចដំណើរការឡើងដល់ 16,048 គីឡូម៉ែត្រនៅក្នុងមួយឆ្នាំនៃភពក្រហម។

តាមផែនការបឋម យន្តហោះនេះនឹងបំពេញភារកិច្ចស្រាវជ្រាវយ៉ាងតិចចំនួនបី ទាក់ទងនឹងបរិយាកាស និងភូគព្ភសាស្ត្រ។ ទិន្នន័យដែលប្រមូលបាន នឹងជួយលើកកម្ពស់ការយល់ដឹងអំពីភពអង្គារ បង្កើនសមត្ថភាពស្រាវជ្រាវក្នុងអនាគត៕

January 6, 2024

កម្ពុជា មានសមត្ថភាពកិនកែច្នៃអង្ករបាន 1,200 តោនក្នុងមួយម៉ោង

បច្ចុប្បន្ន កម្ពុជាមានរោងម៉ាស៊ីនខ្នាតមធ្យម និងធំចំនួន 240 ក្នុងនោះ រោងម៉ាស៊ីនចំនួន 130 មានសមត្ថភាពកិនកែច្នៃ និងឆ្លើយតបទៅតាមបទដ្ឋានស្តង់ដានាំចេញទៅទីផ្សារអន្តរជាតិ ហើយបច្ចុប្បន្នកំពុងទទួលបានចំណាប់អារម្មណ៍ពីទីផ្សារឥណ្ឌូណេស៊ី។

កាលពីថ្ងៃទី 22 ខែធ្នូ ឆ្នាំ 2023 ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានចូលរួមអមដំណើរ ឯកឧត្តម Santo Darmosumarto ឯកអគ្គរដ្ឋទូតសាធារណៈរដ្ឋឥណ្ឌូនេស៊ីប្រចាំនៅកម្ពុជា នៅក្នុងដំណើរទស្សនកិច្ចរោងចក្រកិនស្រូវមួយចំនួនដែលជាសមាជិកសហព័ន្ធស្រូវអង្ករកម្ពុជា នៅស្រុកឧត្តុង ខេត្តកំពង់ស្ពឺ ដើម្បីពិនិត្យ និងឈ្វេងយល់អំពីសង្វាក់ផលិតកម្មកិនស្រូវ សមត្ថភាពកិនកែច្នៃ បទដ្ឋានស្ដង់ដារសុវត្ថិភាពចំណីអាហារ និងបច្ចេកវិទ្យាក្នុងរោងចក្រកិនស្រូវនៅកម្ពុជា។ នេះបើតាម សហព័ន្ធស្រូវអង្ករកម្ពុជា។

បច្ចុប្បន្ន ប្រទេសឥណ្ឌូនេស៊ី គឺជាទីផ្សារថ្មីសម្រាប់ការនាំចេញអង្កររបស់កម្ពុជា ក្នុងនោះ ថ្មីៗនេះ កម្ពុជាទើបតែបាននាំចេញអង្ករប្រមាណជា 15,000 តោន ទៅកាន់ទីផ្សារមួយនេះ។

យោងតាម សហព័ន្ធស្រូវអង្ករកម្ពុជា គិតមកដល់ពេលនេះ វិស័យស្រូវអង្ករកម្ពុជា មានរោងម៉ាស៊ីនខ្នាតមធ្យម និងធំចំនួន 240 ក្នុងនោះ មានរោងម៉ាស៊ីនចំនួន 130 ដែលមានសមត្ថភាពកិនកែច្នៃ និងឆ្លើយតបទៅតាមបទដ្ឋានស្តង់ដានាំចេញទៅទីផ្សារអន្តរជាតិ។ ចំណែកឯសមត្ថភាពកិនកែច្នៃអង្ករវិញ រោងម៉ាស៊ីនកិនស្រូវទាំងនេះ អាចកែច្នៃបាន 1,200 តោនក្នុងមួយម៉ោង ខណៈដែលឡសម្ងួតវិញ មានសមត្ថភាពសម្ងួតបានជាង 42,000 តោនក្នុងមួយថ្ងៃ។

សហព័ន្ធស្រូវអង្ករកម្ពុជា ក៏បានឱ្យដឹងថា រោងម៉ាស៊ីននៅកម្ពុជា អាចរក្សាទុកស្រូវបាន 2 លានតោនក្នុងមួយវគ្គ ហើយអាចកិនកែច្នៃ និងផ្គត់ផ្គង់អង្ករបានរហូតដល់ជាង 4 លានតោនក្នុងមួយឆ្នាំ៕

ឧកញ៉ា ចាន់ សុឃាំង ប្រធានសហព័ន្ធស្រូវ-អង្ករកម្ពុជា

December 26, 2023

Ford Territory ទទួលបានពានរង្វាន់ជារថយន្ត Compact SUV ដែលល្អបំផុតប្រចាំឆ្នាំ ២០២៣

[ភ្នំពេញ – ថ្ងៃទី ២៩ ខែវិច្ឆិកា ឆ្នាំ២០២៣] ថ្មីៗនេះរថយន្ត Next-Generation Ford Territory បានទទួលពានរង្វាន់ជារថយន្ត Compact SUV ដែលល្អបំផុតប្រចាំឆ្នាំ ២០២៣ បន្ទាប់ពីត្រូវបានឆ្លងកាត់ការវាយតម្លៃយ៉ាងម៉ត់ច៉ត់លើគ្រប់ផ្នែកនៃរថយន្តទាំងអស់ក្នុងទីផ្សារប្រទេសភីលីពីនដែលរួមមាន៖ ការវាយតម្លៃលើកម្លាំងនិងសមត្ថភាពរបស់រថយន្តជារួម ការរចនា/រូបរាង មុខងារ/ស្តង់ដាររបស់រថយន្ត ផាសុកភាព សុវត្ថិភាព ប្រសិទ្ធភាព គុណភាព កញ្ចប់សេវាធានា សេវាថែទាំយានយន្ត និងការគាំទ្រពីសំណាក់អតិថិជនជាដើម។

គួរបញ្ជាក់ផងដែរថា រថយន្ត Next-Generation Ford Territory បានត្រឡប់មកជាថ្មីម្តងទៀតក្នុងតំណែងជារថយន្ត Compact SUV ដែលលក់ដាច់បំផុត ជាពិសេសក្នុងទីផ្សារប្រទេស ភីលីពីន។ អ្វីដែលគួរអោយភ្ញាក់ផ្អើលបំផុតនោះគឺ ត្រឹមតែរយៈពេល ៥ ខែប៉ុណ្ណោះ បន្ទាប់ពីពិធីសម្ពោធជាផ្លូវការនៅឯពិព័រណ៍រថយន្តអន្តរជាតិ Manila International Auto Show (MIAS) ក្នុងខែមេសា រថយន្ត Ford Territory ត្រូវបានលក់ដាច់អស់ដល់ទៅ ៥០០០ គ្រឿងឯណោះ! ដែលនាំឱ្យចំនួនលក់សរុបកើនឡើងដល់ជាង 25,000 គ្រឿងគិតចាប់តាំងពីការចេញលក់ក្នុងខែសីហា ឆ្នាំ 2020 កន្លងមក។ ព្រឹត្តិការណ៍ដ៏សំខាន់នេះ គឺជាសក្ខីភាពមួយដែលសបង្ហាញពីប្រជាប្រិយភាពនៃរថយន្ត Next-Generation Ford Territory ក្នុងចំណោមអតិថិជនថ្មីៗ អ្នកជំនួញវ័យក្មេង និងគ្រួសារខ្នាតតូចដែលស្វែងរករថយន្ត SUV ដែលឆ្លាតវៃ សុវត្ថិភាព ទំនើប និងទាន់សម័យ។

រថយន្ត Next-Generation Ford Territory ជារថយន្ត SUV ស៊េរីថ្មីឆ្នាំ ២០២៣ ឆ្លងកាត់នូវកំណែទម្រង់ថ្មីទាំងស្រុងទាំងផ្នែកខាងក្នុង និងផ្នែកខាងក្រៅ ផ្តល់នូវផាសុកភាព និងសុវត្ថិភាពក្នុងការធ្វើដំណើរគ្រប់ស្ថានភាពផ្លូវ។

ផ្នែកខាងក្នុងនៃរថយន្តនេះត្រូវបានបំពាក់មកជាមួយនូវ៖

កៅអីស្បែកប្រណិតផ្តល់ផាសុកភាពក្នុងពេលធ្វើដំណើរ និងមានមុខងារកៅអីត្រជាក់មិនធ្វើអោយអ្នកបើកបរមានអារម្មណ៍ថាហត់នឿយជាពិសេសពេលធ្វើដំណើរផ្លូវឆ្ងាយ
កុងទ័រឌីជីថលទំនើបទាន់សម័យទំហំ 3 អ៊ីញផ្តល់រូបភាពភ្លឺច្បាស់ត្រជាក់ភ្នែក
អេក្រង់កម្សាន្ត Touch Screen កណ្តាលទំហំ 12 អ៊ីញ អាចភ្ជាប់មុខងារ Apple CarPlay, Android Auto & Google Maps ដោយមិនចាំបាច់ប្រើខ្សែ
ប្រព័ន្ធសាកថ្មទូរស័ព្ទឥតខ្សែ Wireless Charge

មិនតែប៉ុណ្ណោះ រថយន្តនេះក៏បានបំពាក់ជាមួយនឹងប្រព័ន្ធសុវត្ថិភាព ក៏ដូចជាបច្ចេកវិទ្យាទំនើបជំនាន់ចុងក្រោយដូចជា៖

កាមេរ៉ាសុវត្ថិភាព ៣៦០ ដឺក្រេ កម្រិតខ្ពស់ជុំវិញរថយន្តផ្តល់រូបភាពច្បាស់ល្អ
ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត
ប្រព័ន្ធបន្ថយល្បឿន រក្សាគម្លាតសុវត្ថិភាព ឈប់ និងទៅមុខដោយស្វ័យប្រវត្តតាមរថយន្តខាងមុខ និងតម្រង់គន្លងផ្លូវ
ប្រព័ន្ធជំនួយចូលចតដោយស្វ័យប្រវត្តបែបអក្សរ (P) បែបអក្សរ (T) និងប្រព័ន្ធជំនួយចាកចេញពីចំណត
ប្រព័ន្ធបើក/បិទឃ្លុបក្រោយដោយស្វ័យប្រវត្តគ្រាន់តែគ្រវាសជើង។

November 30, 2023

ចិនកំពុងដំណើរការសាកល្បងស្ថានីយអគ្គិសនីព្រះអាទិត្យអវកាស

(ប្រទេសចិន) – គំរូដំបូងរបស់ SSPS ដែលជាប្រព័ន្ធទាញយក និងប្រើប្រាស់អគ្គិសនីពីព្រះអាទិត្យនៅទីអវកាស ដើម្បីបាញ់បញ្ជូនមកកាន់ផែនដី និងបញ្ចូលថាមពលឱ្យផ្កាយរណប ត្រូវបានស្ថាបនារួចរាល់ និងកំពុងដាក់ឱ្យដំណើរការសាកល្បង។

ប្រទេសចិនកំពុងតែអភិវឌ្ឍស្ថានីយអគ្គិសនីព្រះអាទិត្យអវកាស (SSPS – Space Solar Power System) ដែលមានសមត្ថភាពបាញ់បញ្ជូនអគ្គិសនីចុះមកកាន់ផែនដី និងបញ្ចូលអគ្គិសនីឱ្យផ្កាយរណបនៅលើគន្លងតារាវិថីផែនដី។ ស្ថានីយគំរូរបស់ SSPS ត្រូវបានស្ថាបនារួចរាល់ និងកំពុងត្រូវបានដាក់ឱ្យដំណើរការសាកល្បងនៅទីក្រុងស៊ីអាន (Xi An) នៃខេត្តសានស៊ី (Shaanxi)។

គម្រោងអភិវឌ្ឍ SSPS ត្រូវបានដាក់ឈ្មោះឱ្យថា Zhu Ri ដែលមានន័យថា «ដេញតាមព្រះអាទិត្យ» ចាប់ផ្ដើមដំណើរការតាំងពី 6 ឆ្នាំមុន។ ស្ថានីយគំរូដំបូងនេះរួមមាន គ្រោងដែកកម្ពស់ 75 ម៉ែត្រ និងមានចានដែកបំពាក់ផ្ទាំសូឡាដ៏ធំមួយនៅខាងលើ ដែលត្រូវបានរចនាឡើងដើម្បីធ្វើតេស្តប្រព័ន្ធផលិតអគ្គិសនីពេញលេញមួយនៅទីអវកាស និងបាញ់បញ្ជូនមកកាន់ផែនដី ដើម្បីបំប្លែង និងផ្គត់ផ្គង់តាមតម្រូវការ។

SSPS នឹងបញ្ជាក់អំពីលទ្ធភាព និងសក្ដានុពលនៃដំណើរការទាំងស្រុង តាំងពីការបំប្លែងពន្លឺឱ្យទៅជាអគ្គិសនី ការបំប្លែងអគ្គិសនីឱ្យទៅជារលកកម្ដៅមីក្រូវ៉េវ ការបាញ់បញ្ជូនរលកមីក្រូវ៉េវ និងការបំប្លែងរលកកម្ដៅមីក្រូវ៉េវឱ្យទៅជាអគ្គិសនីចរន្តជាប់។ នេះគឺជាប្រព័ន្ធដំបូងដែលស្ថិតក្នុងប្រភេទនេះនៅលើពិភពលោក ដែលបានឆ្លងកាត់ការសាកល្បងបែបនេះ។

«យើងសម្រេចបានការសាកល្បងគំរូដំបូងនៅលើផែនដី» លោក Duan Baoyan ប្រធានគម្រោង Zhu Ri មកពីបណ្ឌិត្យសភាបច្ចេកទេសចិន ឱ្យដឹងដូច្នេះ។ លោក Baoyan បន្តថា កាលពីថ្ងៃទី 05 មិថុនា 2022 ប្រព័ន្ធនេះបានឆ្លងផុតការត្រួតពិនិត្យរបស់ក្រុមប្រឹក្សាជំនាញមួយរួចទៅហើយ៕

November 29, 2023

Tag: សមត្ថភាព