វៀតណាម - La Reine Media

កំពូលមហាសេដ្ឋីនៅវៀតណាម “បាត់បង់” ទ្រព្យអស់មួយចំណែក ប៉ុន្តែនៅតែអាចគ្រប់គ្រង “តំណែង” លេខ1របស់ខ្លួនដដែល

ទ្រព្យសម្បត្តិមហាសាលរបស់មហាសេដ្ឋីលេខ1នៅវៀតណាម គឺលោក Pham Nhat Vuong បានថយចុះមួយកម្រិត នៅក្នុងដើមឆ្នាំ2020នេះ។

យោងតាមទិន្នន័យបច្ចុប្បន្នភាពនៃតារាងចំណាត់ថ្នាក់ស្ដីអំពីមហាសេដ្ឋីក្នុងលោក របស់ទស្សនាវដ្ដីអាមេរិកាំង Forbes គិតមកដល់ខែមីនា ឆ្នាំ2020នេះ ទ្រព្យសម្បត្តិរបស់មហាសេដ្ឋីទី1នៃប្រទេសវៀតណាម លោក Pham Nhat Vuong មានការថយចុះមួយកម្រិត។ ទ្រព្យរបស់់មហាសេដ្ឋីរូបនេះ ត្រូវបាន Forbes ចុះផ្សាយ កាលពីថ្ងៃទី5មីនាថា មានចំនួន 6.6ពាន់លានដុល្លារអាមេរិក ដែលតួលេខនេះបង្ហាញថា បានថយចុះ 1.2ពាន់លានដុល្លារ បើធៀបនឹងខែមីនា ឆ្នាំមុន។ ជាងនេះ មកដល់ថ្ងៃនេះ (17មីនា ឆ្នាំ2020) តួលេខនៃទំហំទ្រព្យរបស់បុរសវ័យ 51ឆ្នាំនេះ ត្រូវបាន Forbes បន្ថយមកនៅត្រឹម 5.7ពាន់លានដុល្លារអាមេរិក ប៉ុន្តែ នៅ Vuong នៅតែឈរលំដាប់លេខ1 ក្នុងចំណោមមហាសេដ្ឋីនៅប្រទេសវៀតណាមដដែល។

មហាសេដ្ឋីវៀតណាម Tran Ba Duong និង Ho Hung Anh ក៏ជួបបញ្ហាស្រដៀងគ្នានេះដែរ ដោយទ្រព្យរបស់ Tran Ba Duong បានបាត់បង់ (ថយចុះ) 0.2ពាន់លានដុល្លារ និងមហាសេដ្ឋី Ho Hung Anh បាត់បង់ 0.6ពាន់លានដុល្លារ។

រោងចក្រផលិតរថយន្ត Vinfast របស់លោក Pham Nhat Vuong

មហាសេដ្ឋី Pham Nhat Vuong មានស្រុកកំណើត និងទីលំនៅក្នុងទីក្រុងហាណូយ ប្រទេសវៀតណាម។ លោក Vuong មានអាយុ51ឆ្នាំ និងមានកូន3នាក់។ លោកគឺជាមហាសេដ្ឋីពិភពលោក លំដាប់ទី239 នៅក្នុងតារាងចំណាត់ថ្នាក់ របស់ Forbes។

លោក Pham Nhat Vuong ធ្លាប់បានសិក្សានៅឯប្រទេសរុស្ស៊ី និងបានចាប់ផ្ដើមអាជីវកម្មមីដ៏ពេញនិយម នៅអ៊ុយក្រែន អំឡុងទសវត្សរ៍ 1990 មុនពេលត្រឡប់មកប្រទេសវៀតណាម។

Pham Nhat Vuong គឺជាអគ្គនាយកនៃក្រុមហ៊ុន Vingruop ជាក្រុមហ៊ុនធំជាងគេមួយនៅវៀតណាម ដែលរកស៊ីក្នុងវិស័យអចលនទ្រព្យ លក់រាយ និងសុខាភិបាល។ លោក Pham Nhat Vuong ក៏ជាស្ថានិកនៃក្រុមហ៊ុនផលិតរថយន្ត VinFast ផងដែរ។ ក្រៅពីនេះ ក្រុមហ៊ុន Vingroup របស់លោក Pham Nhat Vuong ក៏មានក្រុមហ៊ុនបុត្រសម្ព័ន្ធជាច្រើនផ្សេងទៀង។

ក្នុងឆ្នាំ 2018 លោក Vuong បានចុះបញ្ជីក្រុមហ៊ុន Vinhomes ដែលជាក្រុមហ៊ុនបុត្រសម្ព័ន្ធផ្នែកអចលនទ្រព្យរបស់ Vingroup ទៅក្នុងផ្សារហ៊ុន ហើយប្រមូលទុនបាន 1.3ពាន់លានដុល្លារអាមេរិក នៅក្នុងការបោះផ្សាយមូលបត្រ (IPO)លើកដំបូងមួយ ដែលបានកំណត់តម្លៃរបស់ក្រុមហ៊ុននេះ ឡើងដល់ 13ពាន់លានដុល្លារអាមេរិក៕

ប្រភព៖ សារព័ត៌មានបរទេស

March 17, 2020

វៀតណាមនឹងផលិតម៉ាស់ 30លានបន្ទះ ក្នុងរយៈពេល3ខែ បន្ទាប់ពីចាប់បានករណីប្រមូលទិញម៉ាស់មួយទឹករាប់តោន ដែលត្រៀមបញ្ចេញលក់ក្នុងទីផ្សារ

ចាប់ពីថ្ងៃនេះ (16មីនា ឆ្នាំ2020) វៀតណាមនឹងចាប់បង្ខំឱ្យពលរដ្ឋរបស់ខ្លួន ពាក់ម៉ាស់នៅក្នុងផ្សារទំនើប ព្រលានយន្តហោះ ស្ថានីយរថភ្លើង ចំណតរថយន្ត និងនៅលើមធ្យោបាយធ្វើដំណើរសាធារណៈ។ល។ បណ្ដាក្រុមហ៊ុនផលិតម៉ាស់ក្នុងស្រុក ក៏បានត្រៀមខ្លួនរួចរាល់ ដើម្បីផ្គត់ផ្គង់តាមតម្រូវការរបស់អ្នកប្រើប្រាស់ នៅក្នុង “សង្គ្រាម” ប្រឆាំងនឹងមេរោគ COVID-19។

អនុរដ្ឋមន្ត្រីក្រសួងសុខាភិបាលវៀតណាម លោក Truong Quoc Cuong កំពុងពិនិត្យការផលិតម៉ាស់នៅក្នុងរោងចក្រមួយកន្លែងនៅវៀតណាម

នៅក្នុងកិច្ចប្រជុំមួយស្ដីអំពីការទប់ស្កាត់ និងប្រយុទ្ធប្រឆាំងជំងឺ COVID-19 នាយករដ្ឋមន្ត្រីវៀតណាម លោក Nguyen Xuan Phuc បានចេញបញ្ជាឱ្យមានការអនុវត្តវិធានការពាក់ម៉ាស់នៅតាមទីសាធារណៈ ឱ្យបានតឹងរ៉ឹងបំផុត។ នាយករដ្ឋមន្ត្រីរូបនេះ ក៏បានស្នើឱ្យក្រសួងពាក់ព័ន្ធ គ្រប់គ្រងស្ថានការណ៍ផលិតម៉ាស់ឱ្យបានគ្រប់គ្រាន់តាមតម្រូវការ និងមានគុណភាព។

អនុរដ្ឋមន្ត្រីក្រសួងសុខាភិបាលវៀតណាម លោក Truong Quoc Cuong បានឱ្យដឹងថា ចាប់ពីថ្ងៃទី30មីនា វៀតណាមត្រូវការម៉ាស់ចំនួន30លានបន្ទះ ដើម្បីទប់ទល់នឹង COVID-19។ កន្លងមក វៀតណាម ខ្វះខាតវត្ថុធាតុដើមដើម្បីផលិតម៉ាស់ ប៉ុន្តែ បច្ចុប្បន្ន វៀតណាមបានរកឃើញវត្ថុធាតុដើមផ្សេងទៀតដែលអាចជំនួសវត្ថុធាតុដើមដែលកំពុងខ្វះខាត។

អ្នកនាំពាក្យក្រសួងពាណិជ្ជកម្ម និងឧស្សាហកម្ម (Ministry of Industry and Trade) បានឱ្យដឹងថា បច្ចុប្បន្ន វៀតណាមមានវត្ថុធាតុដើមក្នុងស្រុក ដែលអាចផ្គត់ផ្គង់ឱ្យការផលិតម៉ាស់ចំនួន 30លានបន្ទះ នាចុងខែមីនានេះ។

ចាប់តាំងពីរោគរាតត្បាត COVID-19 បានរីករាលដាលខ្លាំងនៅទូទាំងពិភពលោក តម្រូវការម៉ាស់ក៏បានកើនឡើងជាបន្តបន្ទាប់ រហូតដល់ធ្វើឱ្យប្រទេសជាច្រើនត្រូវខ្វះខាតម៉ាស់ ហើយធ្វើឱ្យម៉ាស់ឡើងថ្លៃមិនគួរឱ្យជឿ រហូតដល់មានករណីអ្នករកស៊ីអមនុស្សធម៌ខ្លះ បានប្រមូលម៉ាស់ដែលគេបោះចោលបន្ទាប់ពីប្រើរួច យកទៅលក់ឱ្យអ្នកប្រើប្រាស់ទៀតផង។

ទាក់ទិននឹងបញ្ហាខាងលើ កាលពីថ្ងៃទី28កុម្ភៈ នៅប្រទេសវៀតណាម អាជ្ញាធរបានចូលត្រួតពិនិត្យកន្លែងប្រមូលទិញសំណល់អេតចាយមួយកន្លែងនៅក្នុងទីក្រុងហូជីមិញ ហើយក៏បានរកឃើញម៉ាស់ដែលគេប្រើរួចរាប់សិបការុង មានតូច មានធំ លាយឡំគ្នា។ សមត្ថកិច្ចបានឱ្យដឹងថា ម៉ាស់ទាំងនេះមានទម្ងន់ដល់ទៅ2តោន។ ក្នុងចំណោមម៉ាស់ទាំងអស់នេះ មានម៉ាស់ខ្លះជាប់ស្នាមប្រឡាក់ ខ្លះខ្ញុកខ្ញុវ ខ្លះទៀតក៏នៅជាប់ស្លាកយីហោផងដែរ។

ក្រៅពីករណីខាងលើនេះ អាជ្ញាធរវៀតណាម ក៏បានរកឃើញកន្លែងទទួលទិញម៉ាស់ប្រើរួច មួយកន្លែងផ្សេងទៀត។ ដែលនេះ បានធ្វើឱ្យក្រសួងសុខាភិបាលវៀតណាម ចាត់វិធានការ ហាមមិនឱ្យមានការប្រមូលទិញ ឬដឹកជញ្ជូនម៉ាស់ និងសម្ភារការពារសុខភាពបុគ្គល ដើម្បីរួមចំណែកក្នុងការទប់ស្កាត់ការឆ្លងរាលដាលមេរោគកូរ៉ូណា COVID-19៕

ប្រភព៖ សារព័ត៌មានបរទេស

March 16, 2020

កម្ពុជាមានអ្នកឆ្លងរោគ COVID-19 ចំនួន8នាក់ ខណៈវៀតណាមមាន53នាក់ ចំណែកទូទាំងពិភពលោក មានជាង162.187នាក់

កម្ពុជាគឺជាប្រទេសដែលមិនមានព្រំដែនជាប់នឹងប្រទេសចិន ដែលជាសម្បុកវីរុស COVID-19 នោះទេ ចំណែកវៀតណាមវិញ គឺមានព្រំដែនប្រវែង1.435គីឡូម៉ែត្រ ជាប់ជាមួយនឹងប្រទេសចិន ដូច្នេះ តួលេខស្ដីអំពីចំនួនករណីឆ្លងមេរោគកូរ៉ូណា COVID-19 ក៏មានចំនួនលើសខ្វះគ្នាច្រើន។

តួលេខអ្នកឆ្លងរោគ COVID-19 នៅកម្ពុជា៖

គិតមកដល់ថ្ងៃនេះ (15មីនា ឆ្នាំ2020) កម្ពុជាបានរកឃើញអ្នកផ្ទុកមេរោគកូរ៉ូណា COVID-19 ចំនួន8ករណី ក្នុងនោះមាន 7ករណីជាជនជាតិបរទេស និង1ករណីជាជនជាតិខ្មែរ។

-ករណីទី1 គឺជាជនជាតិចិន អាយុ60ឆ្នាំ ត្រូវបានរកឃើញនៅខេត្តព្រះសីហនុ និងត្រូវបានព្យាបាលជាសះស្បើយ ហើយបានវិលត្រឡប់ទៅប្រទេសចិនវិញហើយ។

-ករណីទី2 គឺជាបុរសជនជាតិខ្មែរ អាយុ38ឆ្នាំនៅខេត្តសៀមរាប ដែលបច្ចុប្បន្ន កំពុងទទួលការព្យាបាលនៅមន្ទីរពេទ្យក្នុងខេត្តសៀមរាប និងនៅមានសុខភាពល្អធម្មតា។

-ករណីទី3-4-5 ត្រូវបានរកឃើញនៅឯខេត្តកំពង់ចាម ដែលជាអ្នកទេសចរ ធ្វើដំណើរតាមនាវា Viking Cruise (នាវាដែលធ្វើដំណើរមកពីប្រទេសវៀតណាម) និងសុទ្ធតែជាជនជាតិអង់គ្លេស ហើយបច្ចុប្បន្ន ទទួលការព្យាបាលនៅក្នុងទីក្រុងភ្នំពេញ។

-ករណីទី6 អ្នកជំងឺជាបុរសជាតិកាណាដា ដែលបម្រើការនៅសាលាអន្តរជាតិមួយនៅភ្នំពេញ និងទើបតែបានធ្វើដំណើរមកពីប្រទេសថៃ។

-ករណីទី7 គឺជាជនជាតិបែលហ្ស៊ិក ដែលបម្រើការនៅអង្គការអន្តរជាតិមួយ និងទើបតែបានធ្វើដំណើរពីអឺរ៉ុបមកកម្ពុជា។

-ករណីទី8 ដែលទើបត្រូវបានរកឃើញក្នុងថ្ងៃនេះ (15មីនា) ត្រូវបានក្រសួងសុខាភិបាលកម្ពុជាឱ្យដឹងថា ជាជនជាតិបារាំង អាយុ35ឆ្នាំ មកពីប្រទេសបារាំង និងចូលមកកម្ពុជាតាមជើងហោះហើរ MI 602 ពីប្រទេសសិង្ហបុរី។ អ្នកនាំពាក្យក្រសួងសុខាភិបាល លោកស្រី ឱ វណ្ណាឌីន បានឱ្យដឹងថា ជនជាតិបារាំងរូបនេះ មានប្រពន្ធ និងកូនប្រុសអាយុ4ខែ ដែលធ្វើដំណើរជាមួយគ្នា។ អាជ្ញាធរសិង្ហបុរី បានធ្វើតេស្តវត្ថុវិភាគរបស់បុរសនេះ កាលពីយប់ថ្ងៃទី13មីនា និងទើបតែចេញលទ្ធផលវិជ្ជមាននាពេលថ្មីៗនេះ បន្ទាប់ពីបានមកដល់កម្ពុជា។ បុរសជនជាតិបារាំងខាងលើនេះ ត្រូវបានអាជ្ញាធរកម្ពុជានាំទៅព្យាបាលនៅមន្ទីរពេទ្យរុស្ស៊ី (មន្ទីរពេទ្យខ្មែរ-សូវៀត)។ ចំណែកប្រពន្ធ និងកូនរបស់គាត់ កំពុងស្នាក់នៅក្នុងផ្ទះប្អូនរបស់គាត់ នៅក្នុងសង្កាត់ទួលទំពូង ទីក្រុងភ្នំពេញ ក្រោមការតាមដានពីអាជ្ញាធរ និងមន្ត្រីសុខាភិបាល។

តួលេខអ្នកឆ្លងរោគ COVID-19 នៅប្រទេសវៀតណាម៖

គិតមកដល់ល្ងាចនេះ ប្រទេសវៀតណាម បានរកឃើញអ្នកផ្ទុកមេរោគ COVID-19 សរុបចំនួន 53នាក់ ក្នុងនោះមាន 16នាក់បានជាសះស្បើយ។ ក្នុងចំណោម37ករណីថ្មីដែលទើបបានរកឃើញថ្មីៗនេះ មាន13នាក់ជាជនជាតិបរទេស និង24នាក់ ជាជនជាតិវៀតណាម។ អ្នកទាំងនេះ កំពុងទទួលការព្យាបាលនៅក្នុងមន្ទីរពេទ្យផ្សេងៗ នៅគ្រប់តំបន់នៃប្រទេសនេះ។

-នៅភាគខាងជើង មន្ទីរពេទ្យនានា (ទីក្រុង Ha Noi ខេត្ត Ninh Binh និងខេត្ត Quang Ninh) កំពុងព្យាបាលអ្នកជំងឺកូរ៉ូណា COVID-19 ចំនួន17នាក់ ក្នុងនោះមាន 9នាក់ ជាជនជាតិវៀតណាម។

-នៅភាគកណ្ដាល (ខេត្ត Thua Thien Hue ទីក្រុង Da Nang និងខេត្ត Binh Thuan) មានអ្នកជំងឺកំពុងទទួលការព្យាបាលចំនួន16នាក់ ក្នុងនោះមាន10នាក់ ជាជនជាតិវៀតណាម។

-ចំណែកនៅឯភាគខាងត្បូង (ទីក្រុងហូជីមិញ) វិញ មានអ្នកជំងឺចំនួន4នាក់ ក្នុងនោះ មាន3នាក់ជាជនជាតិវៀតណាម។

តួលេខអ្នកឆ្លងរោគ COVID-19 នៅទូទាំងពិភពលោក៖

COVID-19 បានចាប់ផ្ដើមឆ្លងរាលដាលនៅឯទីក្រុង Wuhan ប្រទេសចិន កាលពីចុងឆ្នាំ2019 ហើយមកដល់ពេលនេះ វាបានធ្វើឱ្យមនុស្សជាង 162.187នាក់ បានឆ្លងរោគ ក្នុងនោះមាន 5.974នាក់បានបាត់បង់ជីវិត និង 75.967នាក់បានជាសះស្បើយ៕

March 15, 2020

វៀតណាមមានអ្នកផ្ទុក Covid-19 ជាង30នាក់ ខណៈសាលារៀន22ខេត្តក្រុងត្រូវបានបិទ

ក្រសួងសុខាភិបាលវៀតណាម នៅល្ងាចនេះ (9មីនា) បានប្រកាសឱ្យដឹងថា បុរសជនជាតិអង់គ្លេសម្នាក់ អាយុ49ឆ្នាំ ធ្វើដំណើរតាមជើងយន្តហោះ VN0054 មានផ្ទុកមេរោគ Covid-19។

វត្ថុវិភាគដែលយកពីអ្នកដំណើរនេះ ត្រូវបានមជ្ឈមណ្ឌលគ្រប់គ្រងរោគ Quang Nam ផ្ញើទៅកាន់មន្ទីរពេទ្យ Pasteur Nha Trang ដើម្បីពិសោធរកមេរោគ។ អ្នកជំងឺនេះ កំពុងទទួលការព្យាបាលនៅមន្ទីរពេទ្យ Quang Nam ខាងជើង (Hospital northern mountainous Quang Nam)។ នេះបើតាមសារព័ត៌មាន VNexpress។

នៅក្នុងចំណោមអ្នកមានផ្ទុកមេរោគ Covid-19 ចំនួន 15នាក់ដែលទើបបានប្រកាសឱ្យដឹងថ្មីៗនេះ គឺមានម្នាក់មកពីប្រទេសកូរ៉េខាងត្បូង ចំណែក14នាក់ផ្សេងទៀត បានធ្វើដំណើរតាមជើងយន្តហោះ London-Hanoi ឬមានជាប់ទាក់ទិននឹងជើងហោះហើរនេះ។

អាជ្ញាធរវៀតណាម បានរកឃើញមនុស្សរាប់រយនាក់ ដែលជាប់ទាក់ទិនផ្ទាល់ និងប្រយោលជាមួយនឹងអ្នកជំងឺដែលធ្វើដំណើរតាមជើងយន្តហោះ VN0054ខាងលើ។

បច្ចុប្បន្ន ប្រទេសវៀតណាម មានអ្នកជំងឺកូរ៉ូណា Covid-19 ចំនួន 31នាក់ ក្នុងនោះមាន 16នាក់បានជាសះស្បើយ។ ក្រៅពីនេះ មនុស្សរាប់ពាន់នាក់ត្រូវបានដាក់ឱ្យនៅដាច់ដោយឡែក ក្រោមការតាមដានរបស់ក្រសួងសុខាភិបាលវៀតណាម។ ថ្នាក់ដឹកនាំជាច្រើនរូបនៃប្រទេសនេះ ក៏កំពុងបង្ខាំងខ្លួនឯងរយពេល 14ថ្ងៃ ព្រោះតែមានជាប់ទាក់ទិនផ្ទាល់ជាមួយនៃអ្នកជំងឺ Covid-19។

ទន្ទឹមនឹងនេះ សាលារៀននៅក្នុងបណ្ដាខេត្តក្រុងចំនួន22នៃប្រទេសនេះ ក៏ត្រូវបានបិទជាបណ្ដោះអាសន្ន ក្នុងនោះមានទីក្រុងហូជីមិញ ដែលមានជនជាតិខ្មែររាប់សែននាក់កំពុងធ្វើការនៅទីនេះ។ សាលារៀននៅក្នុងខេត្តត្រាវិញ (Travinh/ព្រះត្រពាំង) ដែលជាខេត្ត1មានជនជាតិខ្មែរជាង 30% និងជនជាតិចិន 1,65% ក៏ត្រូវបានបិទបណ្ដោះអាសន្នផងដែរ៕

March 9, 2020

ករណីជប៉ុនរកឃើញអ្នកផ្ទុកមេរោគកូរ៉ូណា ដែលបានធ្វើដំណើរតាមយន្តហោះវៀតណាមចេញពីសៀមរាប៖ កម្ពុជាកំពុងស្រាវជ្រាវរឿងនេះ ខណៈជប៉ុនមិនទាន់ប្រកាសជាផ្លូវការ ឯវៀតណាមប្រកាសលម្អិតអំពី…

អ្នកដំណើរម្នាក់ដែលបានធ្វើដំណើរតាមយន្តហោះដែលហោះចេញពីទីក្រុងសៀមរាប ទៅកាន់ប្រទេសវៀតណាម និងបានបន្តដំណើរទៅកាន់ប្រទេសជប៉ុន ត្រូវបានអាជ្ញាធរប្រទេសជប៉ុនរកឃើញថា មានផ្ទុកមេរោគកូរ៉ូណា ប៉ុន្តែព័ត៌មាននេះមិនទាន់ត្រូវបានជប៉ុនប្រកាសជាផ្លូវការនៅឡើយ ចំណែកកម្ពុជាក៏កំពុងធ្វើការលើរឿងនេះ។

យន្តហោះមួយគ្រឿងដែលមានលេខសម្គាល់ជើងហោះហើរ VN814 បានចាកចេញពីទីក្រុងសៀមរាប ឆ្ពោះទៅកាន់វៀតណាម មុននឹងបានបន្តដំណើរទៅកាន់ប្រទេសជប៉ុន។ អ្នកដំណើរ6នាក់ក្នុងចំណោមអ្នកដំណើរទាំងអស់ដែលធ្វើដំណើរតាមជើងហោះហើរនេះ បានបំពេញបែបបទចូលទៅទេសចរនៅប្រទេសវៀតណាម។

វេជ្ជបណ្ឌិត Nguyen Tri Dung ប្រធានមជ្ឈមណ្ឌលគ្រប់គ្រងជំងឺនៃទីក្រុងហូជីមីញ បានឱ្យដឹងថា មជ្ឈមណ្ឌលនេះបានទទួលព័ត៌មានពីក្រុមមន្ត្រីគ្រប់គ្រងព្រលានយន្តហោះ Tan Son Nhat ឱ្យដឹងថា ជើងហោះហើរ VN814 ដែលបានហោះចេញពីទីក្រុងសៀមរាប ឆ្ពោះទៅកាន់ព្រលានយន្តហោះ Tan Son Nhat នៅវេលាម៉ោង 22:03នាទី ថ្ងៃទី3មីនា គឺមានអ្នកដំណើរម្នាក់ ដែលត្រូវបានគេធ្វើតេស្តឃើញថា មានផ្ទុកវីរុស Covid-19 បន្ទាប់ពីបានទៅដល់ប្រទេសជប៉ុន។

ក្នុងចំណោមអ្នកដំណើរ67នាក់នៅក្នុងជើងហោះហើរ VN814 នេះ មានអ្នកដំណើរ6នាក់ បានបំពេញបែបបទចូលលេងប្រទេសវៀតណាម រួមមានជនជាតិបារាំង3នាក់ អូស្ត្រាលីម្នាក់ វៀតណាមម្នាក់ និងម្នាក់ទៀតជាជនជាតិហ្វីលីពីន។ ជនជាតិហ្វីលីពីនម្នាក់នេះ បានត្រឡប់ទៅប្រទេសខ្លួនវិញនាថ្ងៃទី4មីនា។ អ្នកដំណើរ5នាក់ខាងលើ កំពុងត្រូវបានដាក់ឱ្យនៅដាច់ដោយឡែក។

ចំណែកអ្នកដំណើរ 61នាក់ ដែលធ្វើដំណើរក្នុងជើងហោះហើរ VN814 បានបន្តដំណើរទៅកាន់ប្រទេសផ្សេងៗ ក្នុងនោះ មានជនជាតិអង់គ្លេស50នាក់ ធ្វើដំណើរទៅកាន់ទីក្រុងឡុងដ៍(ប្រទេសអង់គ្លេស) 7នាក់ទៅកាន់ Narita(ជប៉ុន) ម្នាក់ទៅកាន់ Nagoya(ជប៉ុន) 2នាក់ទៅកាន់ Busan(កូរ៉េខាងត្បូង) និងម្នាក់ទៀតទៅកាន់ទីក្រុងម៉ានិល ប្រទេសហ្វីលីពីន។

អ្នកដំណើរម្នាក់ក្នុងចំណោមអ្នកដំណើរជនជាតិជប៉ុនខាងលើ បានបន្តដំណើរទៅកាន់ Nagoya(ជប៉ុន) តាមជើងយន្តហោះ VN340 នាយប់ថ្ងៃទី3មីនា ហើយពេលទៅដល់អាកាសយានដ្ឋាន Nagoya ក៏មានអាការក្ដៅខ្លួន។ បន្ទាប់ពីបានធ្វើតេស្តពិនិត្យសុខភាព ក្រុមមន្ត្រីសុខាភិបាលជប៉ុនក៏បានរកឃើញថា អ្នកដំណើរម្នាក់នេះមានផ្ទុកមេរោគកូរ៉ូណា Covid-19។

ជាក់ស្ដែង អ្នកដំណើរជនជាតិជប៉ុនម្នាក់ដែលត្រូវបានរកឃើញថា មានផ្ទុកមេរោគកូរ៉ូណានេះ បានធ្វើដំណើរចេញពីទីក្រុងសៀមរាប និងបានចុះចតនៅឯព្រលានយន្តហោះ Tan Son Nhat (វៀតណាម) កាលពីថ្ងៃទី3មីនា ដោយធ្វើដំណើរតាមជើងហោះហើរ VN814 របស់ក្រុមហ៊ុនអាកាសចរណ៍ Vietnam Airlines និងបានអង្គុយកៅអីលេខ 33D ហើយក្រោយមកក៏បានប្ដូរទៅជើងហោះហើរ VN340 របស់ក្រុមហ៊ុន Vietnam Airlines ដដែល ដើម្បីបន្តដំណើរទៅជប៉ុន ដោយអង្គុយកៅអីលេខ 2C។ នេះបើតាមការចុះផ្សាយរបស់សារព័ត៌មាន BBC។

ឆ្លើយតបនឹងព័ត៌មានខាងលើនេះ លោក ទៀ សីហា អភិបាលនៃគណៈអភិបាលខេត្ត សៀមរាប បានបញ្ជាក់ថា ជនជាតិជប៉ុនម្នាក់ខាងលើនេះ គឺជាអ្នករស់នៅ និងប្រកបអាជីវកម្មនៅក្នុងខេត្តសៀមរាប មិនមែនជាអ្នកទេសចរនោះទេ។ អាជ្ញាធរខេត្ត សៀមរាប បានយកចិត្តទុកដាក់ខ្ពស់លើបញ្ហានេះ ដោយបានសហការជាមួយនឹងកុងស៊ុលជប៉ុនប្រចាំខេត្តសៀមរាប មន្ទីរ និងក្រសួងសុខាភិបាលសុខាភិបាលផងដែរ។ តាមការបញ្ជាក់របស់មន្ត្រីសុខាភិបាលខេត្ត និងភាគីកុងស៊ុលជប៉ុនប្រចាំខេត្តបានបញ្ជាក់ថា មុនចេញដំណើរការពិនិត្យសុខភាពជនជាតិជប៉ុនរូបនេះ បានបង្ហាញថា ពុំមានរោគសញ្ញានៃជំងឺផ្លូវដង្ហើម COVID-19នោះទេ។ នេះបើតាមការចេញផ្សាយរបស់សារព័ត៌មាន Kampucheathmey។

ប្រភពដដែលបានបន្តថា ភាគីជប៉ុនបានបញ្ជាក់ថា ក្រសួងសុខាភិបាលជប៉ុន ពុំទាន់បានជូនដំណឹងជាផ្លូវការ ថាជនជាតិជប៉ុនរូបនេះ មានឆ្លងមេរោគ COVID-19 នៅឡើយដែរ។ ទន្ទឹមនឹងនេះ លោកអភិបាល ខេត្ត សៀមរាប បានណែនាំឲ្យមន្ត្រីសុខាភិបាល និងសមត្ថកិច្ចពាក់ព័ន្ធ សហការជាមួយក្រសួងសុខាភិបាលដាក់ចេញនូវ វិធានការនានាដើម្បីត្រៀមបង្ការ និងស្រាវជ្រាវករណីនេះ បើទោះបីជាមិនទាន់មានការបញ្ជាក់ជាផ្លូវការក៏ដោយ។

រដ្ឋបាលខេត្តសៀមរាប ក៏បានអំពាវនាវឲ្យសាធារណជន អ្នកសារព័ត៌មានជាតិ និងអន្តរជាតិ រង់ចាំការអះអាងជាផ្លូវការលើករណីនេះពីភាគីជប៉ុន ក៏ដូចជាក្រសួងសុខាភិបាលរបស់កម្ពុជា៕

ប្រភព៖ សារព័ត៌មានបរទេស

March 5, 2020

កូរ៉ូណា! វៀតណាមស្នើឱ្យឈប់ចាប់ដៃគ្នានៅពេលស្វាគមន៍ ខណៈអនុសាសន៍ជាច្រើនផ្សេងទៀតត្រូវបានលើកឡើងដើម្បី…

ក្រសួងសុខាភិបាលវៀតណាម កាលពីថ្ងៃទី23កុម្ភៈ បានស្នើឱ្យអ្នករកស៊ី និងអ្នកធ្វើការជាដើម កាត់បន្ថយការចាប់ដៃគ្នាជាមួយអតិថិជននៅពេលស្វាមគន៍ ឬលាគ្នា ហើយពេលជួបភ្ញៀវក៏ត្រូវតែឈរឱ្យឆ្ងាយពីគ្នាប្រហែល1ម៉ែត្រ។

អនុសាសន៍ខាងលើនេះ ត្រូវបានក្រសួងសុខាភិបាលវៀតណាមធ្វើឡើងដើម្បីទប់ស្កាត់ និងប្រឆាំងការរីករាលដាលនៃមេរោគបង្កជំងឺរលាកសួតប្រភេទថ្មី COVID-19។ អនុសាសន៍នេះ សំដៅទៅលើអ្នកធ្វើការ អ្នករកស៊ីទាំងអស់ ពិសេសគឺបុគ្គលិកនៅសណ្ឋាគារ ភោជនីយដ្ឋាន មជ្ឈមណ្ឌលពាណិជ្ជកម្ម និងតំបន់ទេសចរណ៍ជាដើម។

ក្រសួងក៏បានណែនាំឱ្យអ្នកធ្វើការ និងអ្នករកស៊ីទាំងអស់ ត្រូវវាស់កម្ដៅខ្លួន មុនពេលចេញទៅបំពេញភារកិច្ច។ បើសិនក្ដៅខ្លួនខ្លាំង ឬក្អក ថប់ដង្ហើម ត្រូវតែប្រញាប់រាយការណ៍ទៅអ្នកគ្រប់គ្រងបុគ្គលិក និងមន្ត្រីសុខាភិបាល ហើយត្រូវនៅដាច់ដោយឡែកក្នុងផ្ទះ ដើម្បីតាមដានសុខភាព។ ពេលចាំបាច់ អ្នកដែលមានអាការដូចខាងលើនេះ ត្រូវតែប្រញាប់ទៅកាន់មន្ទីរពេទ្យដែលនៅក្បែរបំផុត ដើម្បីពិនិត្យពិគ្រោះយោបល់ និងព្យាបាលឱ្យទាន់ពេលវេលា។ អ្នកដែលត្រូវបានសង្ស័យថាមានផ្ទុកមេរោគ ត្រូវតែនៅក្នុងផ្ទះ និងនៅដាច់ដោយឡែកទៅតាមការស្នើរបស់មន្ត្រីសុខាភិបាល។

អ្នកដែលធ្វើការនៅកន្លែងដែលមានមនុស្សច្រើន ឬត្រូវជួបអតិថិជន ពួកគេត្រូវតែពាក់ម៉ាស់ឱ្យបានត្រឹមត្រូវ និងកាត់បន្ថយការចាប់ដៃឱ្យបានជាអតិបរមា និងឈរ ឬអង្គុយឆ្ងាយពីអតិថិជនឱ្យបាន1ម៉ែត្រ ហើយត្រូវលាងដៃនឹងសាប៊ូ និងទឹកស្អាតឱ្យបានញាប់ញាប់នៅមុនពេលធ្វើការ ក្រោយម៉ោងសម្រាក និងមុន និងក្រោយការទទួលទានអាហារ មុននិងក្រោយការចម្អិនអាហារ ក្រោយពីចូលបន្ទប់ទឹក ក្រោយពីក្អក កណ្ដាស់ ពេលដៃបែកញើស ឬប្រឡាក់អ្វីមួយ និងក្រោយពីនៅក្បែរ ឬចាប់ដៃអ្នកណាម្នាក់។

ពេលកណ្ដាស់ ឬក្អក ត្រូវបិទមាត់ និងច្រមុះដោយប្រើដៃអាវត្រង់សន្លាក់កែងដៃខាងក្នុង ក្រដាស់ជូតមាត់ ឬកន្សែងដៃជាដើម ដើម្បីកាត់បន្ថយការជះកម្ទេចជាតិរាវចេញពីផ្លូវដង្ហើម ហើយត្រូវបោះក្រដាស់នោះចោលទៅក្នុងធុងសម្រាមភ្លាមៗ ឬបោកសម្អាតកន្សែងដៃដែលបានប្រើហើយនោះ និងលាងសម្អាតដៃដើម្បីកម្ចាត់មេរោគ។ ត្រូវចៀសវាងការយកដៃទៅប៉ះមាត់ ច្រមុះ និងភ្នែកដើម្បីកុំឱ្យឆ្លងមេរោគ។ មិនត្រូវប្រើប្រាស់របស់រួមមួយចំនួនដូចជា កែវទឹក ដបទឹក កន្សែងជូតដៃ។ល។ និងមិនត្រូវខាកស្ដោះគ្មានរបៀប។

នៅពេលខ្លួនឯង ឬអ្នករួមការងារ ឬមួយអតិថិជន មានអាការក្ដៅខ្លួន ក្អក ពិបាកដកដង្ហើម អ្នកត្រូវតែរាយការណ៍ទៅកាន់អ្នកគ្រប់គ្រងដើម្បីបានទទួលយោបល់ និងព្យាបាលទាន់ពេលវេលាន។

នៅឯប្រទេសវៀតណាម ក្រុមហ៊ុន និងរោងចក្រជាដើម ក៏ត្រូវបានអាជ្ញាធរស្នើឱ្យផ្ដល់ម៉ាស់ដល់បុគ្គលិកឱ្យបានគ្រប់ៗគ្នាផងដែរ។

គិតមកដល់ពេលនេះ ប្រទេសវៀតណាម មានអ្នកឆ្លងមេរោគសរុបចំនួន16នាក់ ក្នុងនោះមាន14នាក់បានជាសះស្បើយ។ ចំណែកនៅទូទាំងពិភពលោកវិញ មានអ្នកផ្ទុកមេរោគ COVID-19 ចំនួន79,360នាក់ អ្នកស្លាប់មានចំនួន2,619នាក់ និងអ្នកបានជាសះស្បើយមានចំនួន24,963នាក់៕

ប្រភព៖ សារព័ត៌មានបរទេស

February 24, 2020

អ្នកជំងឺកូរ៉ូណាអាយុ3ខែនៅវៀតណាម បានជាសះស្បើយ បន្ទាប់ពីការព្យាបាល9ថ្ងៃ

នៅព្រឹកថ្ងៃទី20កុម្ភៈនេះ ក្មេងស្រីអាយុ3ខែដែលបានឆ្លងមេរោគកូរ៉ូណា COVID-19 ត្រូវបានអនុញ្ញាតឱ្យចេញពីមន្ទីរពេទ្យ បន្ទាប់ពីទទួលការព្យាបាលរយៈពេល9ថ្ងៃ។

ប្រធានមន្ទីរពេទ្យកុមារជាតិ បានឱ្យដឹងថា ក្មេងស្រីរូបនេះអាចញ៉ាំទឹកដោះគោ និងលែងមានមេរោគកូរ៉ូណានៅក្នុងខ្លួនទៀតហើយ ក្រោយការធ្វើតេស្ត2លើកបានបង្ហាញថាអវិជ្ជមានជាមួយនឹងមេរោគនេះ ដូច្នេះអាចចេញពីមន្ទីរពេទ្យបានហើយ។

នេះគឺជាអ្នកជំងឺដែលមានអាយុតិចជាងគេបំផុតក្នុងចំណោមអ្នកជំងឺករ៉ូណា16នាក់នៅវៀតណាម។ ក្មេងស្រីនេះ បានឆ្លងវីរុសកូរ៉ូណាពីជីដូនខាងម្ដាយ ចំណែកជីដូនរូបនេះបានឆ្លងពីស្ត្រីម្នាក់ផ្សេងទៀត។ ក្មេងស្រីអាយុ3ខែនេះ ត្រូវបានគេចាត់ទុកថាជាករណីឆ្លងពីមនុស្សក្នុងស្រុកទីមួយនៅប្រទេសវៀតណាម ក្នុងអំឡុងការរាតត្បាតនៃអាសន្នរោគកូរ៉ូណា COVID-19 នេះ។

សូមរំឭកថា ក្រោយពីធ្វើតេស្តរកឃើញថាមានផ្ទុកមេរោគរលាកសួតប្រភេទថ្មី ក្មេងស្រីអាយុ3ខែនេះ ត្រូវបានបញ្ជូនទៅកាន់មន្ទីរពេទ្យកុមារជាតិក្នុងទីក្រុងហាណូយ កាលពីថ្ងៃទី11កុម្ភៈ។ ក្នុងអំឡុងពេលនៃការព្យាបាល ក្មេងស្រីនេះត្រូវគេដាក់ឱ្យគេងនៅក្នុងអង្រឹងប្រអប់នៅដាច់ដោយឡែកពីគេ និងមានវេជ្ជបណ្ឌិត2នាក់ និងអ្នកមើលថែ2នាក់ ប្ដូរវេនគ្នាមើលថែអ្នកជំងឺតូចនេះ។ ទន្ទឹមនឹងការមើលថែអ្នកជំងឺតូច អ្នកទាំង4នាក់នេះ ក៏ត្រូវបានឱ្យនៅស្ថិតដាច់ដោយឡែកផងដែរដើម្បីតាមដានសុខភាពពួកគេ។

ម្ដាយរបស់ទារិកាខាងលើ គឺជាអ្នកមើលថែកូនរបស់ខ្លួនដោយផ្ទាល់ក្នុងអំឡុងពេលព្យាបាល។ ម្ដាយទារិកានេះ ក៏ត្រូវបានណែនាំឱ្យប្រើប្រាស់វិធីការពារមេរោគយ៉ាងត្រឹមត្រូវពីក្រុមគ្រូពេទ្យ។

វេជ្ជបណ្ឌិតនៃមន្ទីរពេទ្យកុមារជាតិខាងលើ បានឱ្យដឹងថា លទ្ធផលនៃការធ្វើតេស្តមេរោគកូរ៉ូណា COVID-19 បានបង្ហាញថា ម្ដាយរបស់ទារិកានេះ មិនមានផ្ទុកមេរោគនេះទេ ប៉ុន្តែ គាត់ក៏នៅតែត្រូវបានគេដាក់ឱ្យនៅដាច់ដោយឡែកដើម្បីតាមដានសុខភាព។

បច្ចុប្បន្ន វៀតណាម មានអ្នកជំងឺកូរ៉ូណាសរុប 16នាក់ ក្នុងនោះមាន15នាក់ហើយបានជាសះស្បើយ។ ចំណែកអ្នកជំងឺម្នាក់ទៀតកំពុងទទួលការព្យាបាលនៅឡើយ។

គិតមកដល់ពេលនេះ នៅទូទាំងពិភពលោក មានអ្នកឆ្លងមេរោគ COVID-19 ចំនួន75,725នាក់ និងអ្នកស្លាប់មានចំនួន2,128នាក់។ អ្នកជំងឺដែលបានជាសះស្បើយមានចំនួន16,342នាក់ និងអ្នកជំងឺដែលកំពុងប្រឈមនឹងការស្លាប់មានចំនួនជាង12,064នាក់៕

ប្រភព៖ សារព័ត៌មានបរទេស

February 20, 2020

វៀតណាម៖ មនុស្សរាប់រយនាក់ប្រជ្រៀតគ្នា ដណ្ដើមទិញម៉ាស់ តាំងពីព្រឹកដល់រសៀល (មានវីដេអូ)

វៀតណាម៖ នៅប្រហែលម៉ោង 2រសៀលថ្ងៃទី3 កុម្ភៈ(ម្សិលមិញ) មនុស្សចំនួនរាប់រយនាក់បានប្រជ្រៀតគ្នា ដណ្ដើមទិញម៉ាស់ នៅឯហាងលក់ផលិតផលសុខាភិបាលមួយកន្លែងដែលមានទីតាំងនៅលើផ្លូវ Nguyen Gian Thanh ក្នុងទីក្រុងហូជីមិញ។ នេះបើតាមការចុះផ្សាយរបស់សារព័ត៌មាន VNexpress។

នៅហាងនេះ មនុស្សម្នាក់មានសិទ្ធិទិញម៉ាស់ បានត្រឹមតែ 3ប្រអប់ប៉ុណ្ណោះ ក្នុងតម្លៃ105,000ដុងក្នុង 1ប្រអប់ (ប្រហែល4.5ដុល្លារអាមេរិក)។

នៅក្នុងរូបភាពវីដេអូនេះ មានអតិថិជនជាច្រើនបានបង្ហាញអំពីការលំបាកក្នុងការរកទិញម៉ាស់ ព្រោះថា មិនសូវមានគេដាក់លក់ដូចធម្មតាទេ ហើយបើមានគេលក់ ក៏លក់ក្នុងតម្លៃថ្លៃហួសហេតុ។ ប៉ុន្តែ អ្នកខ្លះក៏បានបង្ហាញពីអារម្មណ៍សប្បាយចិត្តដែរ ព្រោះទិញបានដូចបំណង។

អតិថិជនម្នាក់ឈ្មោះ Nguyen Van Hung នៅទីក្រុងហូជីមិញបាននិយាយថា៖ “ថប់ដណ្ហើមចង់សន្លប់ មិនទាន់បានហូបបាយថ្ងៃត្រង់ផង”។

អតិថិជនម្នាក់ទៀតប្រាប់ថា៖ “ដើររកមើលនៅក្បែរៗនេះ មិនឃើញមានអ្នកណាគេលក់សោះ។ ឃើញតែកន្លែងនេះដែលមានលក់ ទើបប្រជ្រៀតចូលទិញនឹងគេ”។

ពលរដ្ឋវៀតណាមម្នាក់ទៀត លោក Ngo Thanh Truong និយាយថា៖ មកតម្រង់ជួរតាំងពីម៉ោង 9ព្រឹករហូតមកដល់ពេលនេះ។ និយាយរួម គឺនឿយហត់ណាស់ តែពេលទិញបានម៉ាស់ហើយ ក៏មានអារម្មណ៍ថា ស្ងប់ចិត្ត”។

អតិថិជនម្នាក់ទៀតឈ្មោះ On Thi Ngoc Tram ប្រាប់ថា៖ “មកពីគេតម្រង់ជួរគ្មានរបៀប ទើបប្រជ្រៀតគ្នាហត់បែបនេះ។ ធម្មតា ខ្ញុំមកទីនេះ ទិញតាមធម្មតា ទិញបានភ្លាម ត្រឡប់ទៅវិញភ្លាម មិនដែលប្រជ្រៀតគ្នាឱ្យហត់បែបនេះទេ។ ប៉ុន្តែ ខ្ញុំនៅតែអាចទទួលយកបាន ព្រោះថានៅទីនេះ តម្លៃថោកជាងច្រើន បើធៀបនឹងនៅខាងក្រៅ(កន្លែងផ្សេង)។

ដោយសារតែមានអ្នកទិញច្រើនពេក ទើបបណ្ដាលឱ្យចរាចរណ៍នៅទីនោះត្រូវកកស្ទះយ៉ាងខ្លាំង។

ម្ចាស់ហាងទំនិញនេះ គឺលោក Nguyen Ngoc Duy បានឱ្យដឹងថា៖ ប្រអប់ដែលមានម៉ាស់ច្រើនបំផុត គឺមានតម្លៃ 36,000ដុង (1,55ដុល្លារ)។ យើងខ្ញុំជួយបងប្អូន ទើបលក់តម្លៃបែបនេះ។ មានអ្នកផ្សេងគេមកទិញក្នុងតម្លៃ 100,000ដុងក្នុង 1ប្រអប់ឯណោះ ប៉ុន្តែខ្ញុំនៅតែមិនលក់ឱ្យ។ ផលិតផលនេះ យើងខ្ញុំរក្សាទុកតាំងពីមុនចូលឆ្នាំ បើពេលនេះវិញ គឺអស់ទំនិញហើយ។ ល្ងាចនេះ លក់ 6ឡាំងទៀត គឺអស់ហើយ។

បច្ចុប្បន្ន ម៉ាស់បានក្លាយជាទំនិញមួយដែលកំពុងខ្វះខាតយ៉ាងខ្លាំង ខណៈដែលអាសន្នរោគរលាកសួតកំពុងឆ្លងរាលដាលស្ទើរគ្រប់ទិសទីក្នុងពិភពលោក។

វៀតណាម បានរកឃើញអ្នកមានផ្ទុកមេរោគ Corona ចំនួន 8ករណី ដែលត្រូវបានដាក់ឱ្យនៅដាច់ដោយឡែក និងកំពុងទទួលការព្យាបាល៕

ប្រភព៖ សារព័ត៌មានបរទេស

February 4, 2020

វៀតណាមប្រើកម្លាំងចម្រុះជាង ៥០០នាក់ ឡោមព័ទ្ធចាប់បុរសម្នាក់ ដែលសង្ស័យថាបានសម្លាប់មនុស្ស ៥នាក់

នគរបាលចម្រុះជាង 500នាក់ ដែលមានអាវុធគ្រប់ដៃ មានអាវក្រោះការពារ ត្រូវបានដាក់ពង្រាយ និងឡោមព័ទ្ធចាប់ជនសង្ស័យម្នាក់ដែលមានឈ្មោះ Le Quoc Tuan (ជាមន្ត្រីនគរបាលខណ្ឌ11 នៃក្រុងព្រៃនគរ) ដែលត្រូវបានសង្ស័យថា បានបាញ់សម្លាប់មនុស្សចំនួន 4នាក់ នៅស្រុក Cu Chi ជាយក្រុងហូជីមិញ (Sai Gon/ព្រៃនគរ)។

ព្រឹកព្រលឹមថ្ងៃទី30 មករា អាជ្ញាធរក្រុងហូជីមិញ នាំមុខដោយរថពាសដែក រួមនឹងនគរបាលរាប់រយនាក់ និងសុនខជំនាញហិតក្លិន បានឡោមព័ទ្ធតំបន់ព្រៃកៅស៊ូមួយនៅឃុំ Trung An ជាយក្រុងព្រៃនគរ ជាតំបន់ដែលជនសង្ស័យអាយុ 33ឆ្នាំខាងលើបានលាក់ខ្លួន បន្ទាប់ពីបានបាញ់សម្លាប់មនុស្សចំនួន 4នាក់ ដោយសារមានជម្លោះក្នុងពេលលេងល្បែង នៅក្នុងឃុំ Tan Than Dong ជាយក្រុងព្រៃនគរ កាលពីម្សិលមិញ (29មករា 2020)។

ក្រុមនគរបាលមូលដ្ឋានបានបើកឡាន និងម៉ូតូទៅកាន់តំបន់ដែលជនសង្ស័យកំពុងជ្រកពួន ហើយប្រកាសប្រាប់ឱ្យប្រជាជនទាំងអស់សម្ងំនៅក្នុងផ្ទះដើម្បីការពារសុវត្ថិភាព។

ក្នុងការចុះព័ទ្ធចាប់ជនសង្ស័យនេះ គេឃើញមានវត្តមានរបស់អនុរដ្ឋមន្ត្រីក្រសួងសន្តិសុខសាធារណៈ រួមនឹងមន្ត្រីជាន់ខ្ពស់មួយចំនួនទៀតនៃក្រសួងនេះ។

ពលរដ្ឋនៅតំបន់ក្បែរនោះបាននិយាយថា ពួកគេបានឃើញកងកម្លាំងសមត្ថកិច្ចចម្រុះមានវត្តមាននៅក្បែរផ្ទះពួកគេតាំងតែពីម៉ោង 4:30នាទីទៀបភ្លឺ។

នៅប្រហែលម៉ោងជាង 10ព្រឹក គេឮសូរស្នូរកាំភ្លើងលាន់ឮឡើងជាច្រើនគ្រាប់។ ក្រុមនគរបាលដែលស្លៀកពាក់ស៊ីវិលរាប់រយនាក់ បានដឹកគ្នាដោយម៉ូតូ បើកបរយ៉ាងលឿនចូលទៅក្នុងព្រៃដើម្បីឡោមព័ទ្ធចាប់ជនសង្ស័យ។ ក្រោយមកបន្តិច ទាហានយ៉ាងច្រើនក៏បង្ហាញខ្លួននៅជុំវិញតំបន់ដែលត្រូវឡោមព័ទ្ធ។ នៅពេលងើបមើលទៅលើអាកាស គេឃើញមានកូនយន្តហោះគ្មានមនុស្សបើក (drone) ជាច្រើនគ្រឿង ហោះឆ្វែលស្វែងរកជនសង្ស័យ។

ជនសង្ស័យឈ្មោះ Le Quoc Tuan គឺជាមន្ត្រីនគរបាលម្នាក់ដែលធ្វើការនៅមន្ទីរឃុំឃាំងបណ្ដោះអាសន្ននៃអធិការដ្ឋាននគរបាលសង្កាត់11 ដែលមានឋានន្តរស័ក្តិអនុសេនីយ៍ទោពិសេស(ស័ក្តិ2 ត្រៀមឡើងស័ក្តិ3)។ ជនសង្ស័យនេះមានកូន 2នាក់ និងជាមនុស្សញៀនល្បែងស៊ីសងរយៈពេលច្រើនឆ្នាំមកហើយ។

លទ្ធផលនៃការស្រាវជ្រាវបានបង្ហាញថា នៅថ្ងៃទី29 មករា ឆ្នាំ2020 ជនសង្ស័យ Le Quoc Tuan ជាមួយឈ្មោះ Le Quoc Minh បានទៅដល់វង់ល្បែងក្នុងចម្ការមៀនក្បែរផ្ទះ ដែលមានចម្ងាយពីមជ្ឈមណ្ឌលក្រុងព្រៃនគរប្រហែល 30គីឡូម៉ែត្រ ដើម្បីលេងល្បែង។ ពេលលេងបានមិនយូរប៉ុន្មាន Le Quoc Tuan ក៏មានទំនាស់ជាមួយអ្នកលេងក្នុងវង់ល្បែង ហើយក៏បានស្រែកជេរគេយ៉ាងខ្លាំងៗ ប៉ុន្តែបន្ទាប់មកក៏បានចេញបាត់ទៅ។ មួយសន្ទុះក្រោយមក Le Quoc Tuan បានត្រឡប់មកវិញជាមួយនឹងកាំភ្លើង AK 1ដើម រួចហើយក៏ “ប៉័ងៗៗៗៗៗៗ!!” ស្នូរកាំភ្លើងបានផ្ទុះឡើងយ៉ាងគួរឱ្យភ័យខ្លាច ហើយអ្នកលេងល្បែងក្នុងវង់ទាំងប៉ុន្មាន ក៏បានចែកជើងគ្នារត់បាត់ស្រមោលអស់ នៅសល់តែមនុស្សប្រហែល 4នាក់ ដែលកំពុងដេកដួលលើដីក្នុងថ្លុកឈាម ក្នុងនោះ មានម្នាក់រងរបួសធ្ងន់ និង 3នាក់ទៀតបានស្លាប់ភ្លាមៗនៅនឹងកន្លែងកើតហេតុ។

តាមរយៈកាមេរ៉ាសុវត្ថិភាព បានបង្ហាញថា ជនសង្ស័យ Le Quoc Tuan បានជិះម៉ូតូ ពាក់ម៉ាស់បាំងមុខ និងដាក់កាំភ្លើងនៅពីមុខ ជិះគេចខ្លួនពីកន្លែងកើតហេតុភ្លាមៗដែរ។ លុះដល់ម៉ោង 3 និង 10នាទីរសៀលថ្ងៃដដែល Le Quoc Tuan ដែលកាន់កាំភ្លើងក្នុងដៃ បានភ្ជង់ប្លន់ស្ត្រីម្នាក់យកម៉ូតូ 1គ្រឿងទៅបាត់ទៀត។

ជនសង្ស័យដែលកំពុងត្រូវសមត្ថកិច្ចតាមចាប់ខ្លួន

លុះព្រឹកឡើង គេបានប្រទះឃើញសាកសពបុរសម្នាក់ត្រូវខ្មាន់កាំភ្លើងបាញ់សម្លាប់នៅក្បែរតំបន់ដែលកងកម្លាំងចម្រុះកំពុងឡោមព័ទ្ធនោះ។ ក្រុមនគរបាលបានរកឃើញសម្បកគ្រាប់កាំភ្លើងដូចគ្នានឹងប្រភេទគ្រាប់ដែលជនសង្ស័យ Le Quoc Tuan បានបាញ់សម្លាប់មនុស្សនៅក្នុងវង់ល្បែងដែរ។
មកដល់ពេលនេះសមត្ថកិច្ចចម្រុះជាង 500នាក់នោះ នៅតែកំពុងដុតដៃដុតជើងឡោមព័ទ្ធ និងតាមរកចាប់ខ្លួនជនសង្ស័យរូបនោះនៅឡើយ។

ព័ត៌មានថ្មីៗបន្ថែមទៀត គេហទំព័រឡារ៉ែន នឹងយកមកជម្រាបជូនមិត្តអ្នកអានជាបន្តបន្ទាប់នៅពេលក្រោយទៀត៕

ប្រភព៖ សារព័ត៌មានបរទេស

January 30, 2020

វៀតណាមទៀតហើយ! អ្នកជំងឺដែលគេសង្ស័យថា មានផ្ទុកមេរោគ corona មានវត្តមានចាប់ពីហាណូយដល់កោះត្រល់

ក្នុងចំណោមអ្នកជំងឺគួរឱ្យសង្ស័យចំនួន 59នាក់ដែលត្រូវអាជ្ញាធរវៀតណាមដាក់ឱ្យនៅដាច់ដោយឡែក (isolated areas) មាន 22នាក់ត្រូវបានគេពិនិត្យឃើញថា មិនមានផ្ទុកមេរោគរលាកសួត Wuhan (corona)។ ចំណែក 35នាក់កំពុងរង់ចាំលទ្ធផលនៃការធ្វើតេស្ត និង 2នាក់ទៀតត្រូវបានរកឃើញថា មានផ្ទុកមេរោគនេះ។

កាលពីល្ងាចថ្ងៃទី26 ម្សិលមិញ ក្រសួងសុខាភិបាលវៀតណាម បានប្រកាសថា ក្នុងចំណោមមនុស្សខាងលើ គឺមានអ្នកជំងឺ 15នាក់នៅតំបន់ភាគខាងជើងនៃប្រទេសវៀតណាម ទើបនឹងត្រឡប់មកពីទីក្រុង Wuhan ប្រទេសចិន រួមមានជនជាតិវៀតណាម 13នាក់ និងជនជាតិចិន 2នាក់។

ក្នុងនោះដែរ មាន 2ករណីនៅមន្ទីរពេទ្យ E (ហាណូយ) កំពុងមានសុខភាពប្រសើរឡើង។ មន្ទីរពេទ្យ National Hospital Of Tropical Diseases មានអ្នកជំងឺ 10នាក់កំពុងរង់ចាំលទ្ធផលនៃការពិនិត្យសុខភាព។

ក្រៅពីនេះ នៅមានករណីជាច្រើននៅមន្ទីរពេទ្យ Vinmec មន្ទីរពេទ្យពហុព្យាបាលខេត្ត Hai Duong និងមន្ទីរពេទ្យខេត្ត Thanh Hoa ជាដើម សុទ្ធតែមានអ្នកជំងឺកំពុងរង់ចាំលទ្ធផលពិនិត្យសុខភាព បន្ទាប់ពីសង្ស័យថា មានផ្ទុកមេរោគរលាកសួត corona (Wuhan)។ នេះបើតាមទីភ្នាក់ងារសារព័ត៌មានវៀតណាម Vnexpress។

ចំណែកនៅភាគខាងត្បូងវិញ ក៏មាន 2ករណីនៅកោះត្រល់ និងជនជាតិចិន 2នាក់ផ្សេងទៀតកំពុងសម្រាកព្យាបាលនៅក្នុងមន្ទីរពេទ្យ Cho Ray ក្នុងក្រុងហូជីមិញ។

រីឯមនុស្ស 39នាក់ មាន 20នាក់ជាបុគ្គលិកនៃមន្ទីរពេទ្យ Cho Ray ធ្លាប់បាននៅក្បែរជនជាតិចិន 2នាក់ខាងលើ និង19នាក់ផ្សេងទៀតធ្លាប់បាននៅក្បែរអ្នកជំងឺ 2នាក់នៅឯកោះត្រល់ ក៏កំពុងត្រូវបានដាក់ឱ្យនៅដាច់ដោយឡែកពីគេដែរ៕

ប្រភព៖ សារព័ត៌មានបរទេស

January 27, 2020

Tag: វៀតណាម