Tag: វិស័យឯកជន

ភ្នំពេញ-ម៉ានីល ឯកភាពជំរុញការនាំចេញអង្ករពីកម្ពុជាទៅហ្វីលីពីន
នាព្រឹកថ្ងៃទី 4 ខែមីនា ឆ្នាំ 2024 ប្រមុខរាជរដ្ឋាភិបាលកម្ពុជា និងប្រមុខរដ្ឋាភិបាលហ្វ៊ីលីពីន បានជួបពិភាក្សាការងារទ្វេភាគី ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។
ជំនួបនេះត្រូវបានធ្វើឡើងក្នុងបំណងពិភាក្សាគ្នាលើការបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំបន្ថែមទៀត។ នេះបើតាមក្រសួងព័ត៌មាន។
ក្នុងជំនួបនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ និងឯកឧត្តម ហ្វឺឌីណាន់ ម៉ាកូស ជេអ (Ferdinand Romualdez Marcos Jr.) ប្រធានាធិបតី នៃសាធារណរដ្ឋហ្វីលីពីន បានពិភាក្សាគ្នាលើវិស័យសំខាន់ៗ ដែលជាកម្មវត្ថុនៃការពង្រឹង និងពង្រីកកិច្ចសហប្រតិបត្តិការបន្ថែម និងជាផលប្រយោជន៍រួមរវាងកម្ពុជា និងហ្វីលីពីន។ ក្នុងនោះក៏មាន វិស័យពាណិជ្ជកម្មផងដែរ។
ក្នុងវិស័យពាណិជ្ជកម្ម មេដឹកនាំទាំងពីរបានឯកភាពគ្នា ដើម្បីសម្របសម្រួល និងជំរុញការនាំចេញអង្ករពីកម្ពុជាទៅហ្វីលីពីន និងបានជំរុញបន្ថែមការភ្ជាប់ទំនាក់ទំនងរវាងវិស័យឯកជនបន្ថែមទៀត ដើម្បីបង្កើនកាលានុវត្តភាពពាណិជ្ជកម្មនៃប្រទេសទាំងពីរ។
កម្ពុជាបានចាប់ផ្តើមនាំចេញអង្ករទ្រង់ទ្រាយធំជាលើកដំបូង ទៅប្រទេសហ្វីលីពីន ក្នុងបរិមាណ 5,575 តោន កាលពីដើមឆ្នាំ 2023 បន្ទាប់ពីហ្វីលីពីន បានដូរគោលនយោបាយនៃការនាំចូលអង្ករ ពោលគឺពីការនាំចូលតាមរយៈរដ្ឋ មកឯកជនវិញ។
បើតាមរបាយការណ៍ដែលទាក់ទង ឱ្យដឹងថា ក្នុងឆ្នាំ 2024 នេះ ប្រទេសហ្វីលីពីន គ្រោងនាំចូលអង្ករពីបណ្ដាប្រទេស ក្នុងបរិមាណជាង 4.2 លានតោន។
យោងតាមរបាយការណ៍ពីសហព័ន្ធស្រូវអង្ករកម្ពុជា ក្នុងខែមករា ឆ្នាំ 2024 កម្ពុជាបាននាំចេញអង្ករជាង 46 ពាន់តោន គិតជាទឹកប្រាក់គឺជាង 32 លានដុល្លារអាម៉េរិក។ ដោយឡែកការនាំចេញស្រូវទៅប្រទេសជិតខាងវិញ សម្រេចបាន ជិត 60 ម៉ឺនតោន ដែលគិតជាទឹកប្រាក់សរុបជាង 184 លានដុល្លារ៕
March 4, 2024
កម្ពុជាគ្រោងនឹងទទួលបានជំនួយឥតសំណង 86 លានអឺរ៉ូពីសហភាពអឺរ៉ុប
ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី 15 មករា 2024 បានឱ្យដឹងថា កម្ពុជាគ្រោងនឹងទទួលបានហិរញ្ញប្បទានឥតសំណងចំនួន 86 លានអឺរ៉ូ (ជិត 94 លានដុល្លារអាម៉េរិក) ពីសហភាពអឺរ៉ុប (EU) ដើម្បីអភិវឌ្ឍកម្មវិធីមួយចំនួន។
សេចក្ដីប្រកាសព័ត៌មានរបស់ក្រសួង ត្រូវបានធ្វើឡើងបន្ទាប់ពីមានជំនួបរវាង ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយនឹងឯកឧត្តម ទ្រីសម៉ាន់ ពីរហ្គាវ័ (Driesmans Igor) ឯកអគ្គរដ្ឋទូតសហភាពអឺរ៉ុបប្រចាំកម្ពុជា កាលពីពេលថ្មីៗនេះ។
យោងតាមក្រសួងសេដ្ឋកិច្ច និងហិរញ្ញវត្ថុ ជំនួយដែលសហភាពអឺរ៉ុបគ្រោងនឹងផ្ដល់ជូនកម្ពុជា តាមរយៈកម្មវិធី Global Gateway នេះ គឺសម្រាប់កម្មវិធីចំនួនបួន ដែលរួមមានដូចខាងក្រោម៖
ទីមួយ៖ កម្មវិធីភាពជាដៃគូរបស់កម្ពុជាសម្រាប់ប្រព័ន្ធកសិកម្ម និងអាហារប្រកបដោយចីរភាព
ទីពីរ៖ កម្មវិធីភាពជាដៃគូសហភាពអឺរ៉ុប សម្រាប់ការអនុវត្តថាមពលប្រកបដោយចីរភាពក្នុងឧស្សាហកម្មវិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ
ទីបី៖ កម្មវិធីភាពជាដៃគូសហភាពអឺរ៉ុប-កម្ពុជា សម្រាប់ការបណ្តុះបណ្តាលការអប់រំបច្ចេកទេស 2024-2027
ទីបួន៖ កម្មវិធីពាណិជ្ជកម្ម និងវិស័យឯកជន។
January 16, 2024
សេដ្ឋកិច្ចកម្ពុជា នឹងមានកំណើន 5.8% ក្នុងឆ្នាំ 2024 ខណៈឆ្នាំ 2023 មានកំណើន 5.4%
ធនាគារពិភពលោក (WB) បានទម្លាក់កំណើនសេដ្ឋកិច្ចកម្ពុជា ពី 5.5% មកនៅត្រឹម 5.4% សម្រាប់ឆ្នាំនេះ នៅក្នុងរបាយការណ៍ចុងក្រោយស្តីពីបច្ចុប្បន្នភាពសេដ្ឋកិច្ចរបស់កម្ពុជា ចេញផ្សាយនៅថ្ងៃទី22 វិច្ឆិកា 2023។
ទោះបីជាវិស័យទេសចរណ៍ និងសេវាដទៃទៀតបានងើបឡើងវិញ ប៉ុន្តែ ធនាគារពិភពលោក បានលើកពីកត្តារួមផ្សំរវាងសម្ពាធពីខាងក្រៅ និងបញ្ហាប្រឈមផ្នែករចនាសម្ព័ន្ធ ដែលបានដាក់សម្ពាធលើកំណើនសេដ្ឋកិច្ចកម្ពុជា។
ប្រសិនបើការកែទម្រង់រចនាសម្ព័ន្ធដើរអមគ្នាជាមួយការវិនិយោគលើហេដ្ឋារចនាសម្ព័ន្ធ និងកាលានុវត្តភាពពាណិជ្ជកម្ម នោះវានឹងនាំឱ្យកំណើនសេដ្ឋកិច្ចបន្តបង្កើនល្បឿននៅក្នុងរយៈពេលមធ្យម និងវែង។ នេះបើតាមអនុសាសន៍របស់ WB។
«កម្ពុជាចាំបាច់ត្រូវជួយដល់វិស័យឯកជនឱ្យបំពេញមុខងារជាក្បាលម៉ាស៊ីនលើកកម្ពស់កំណើនសេដ្ឋកិច្ច» លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជា លើកឡើងដូច្នេះ និងបន្តថា «កិច្ចការនេះអាចសម្រេចបាន ដោយការធ្វើសកម្មភាពភ្លាមៗនៅក្នុងការធ្វើឱ្យប្រសើរឡើងនូវការបំពេញការងាររបស់វិស័យសាធារណៈ» ខណៈការរក្សាស្ថិរភាពហិរញ្ញវត្ថុក៏ជាអាទិភាពមួយដែរ។
WB សង្កត់ធ្ងន់ថា កំណើនសេដ្ឋកិច្ចអាចនៅតែរងផលប៉ះពាល់បន្ថែមទៀតពីការចុះខ្សោយនៃតម្រូវការពិភពលោក ឬពីការឡើងថ្លៃប្រេងឥន្ធនៈ និងថ្លៃស្បៀងអាហារកើនឡើងវិញ។ ចំណែកនៅក្នុងស្រុក ការកើនឡើងនៃបំណុលគ្រួសារ និងឥណទានក្នុងស្រុកនៅក្នុងវិស័យអចលនទ្រព្យ នៅតែជាហានិភ័យដដែល។
WB ក៏បានផ្ដល់អនុសាសន៍អំពីកំណែទម្រង់រចនាសម្ព័ន្ធ ដែលអាចជួយកម្ពុជាជំរុញឱ្យមានកំណើនប្រកបដោយចីរភាព រួមមាន ការកែលម្អបរិយាកាសធុរកិច្ចដើម្បីបង្កើនផលិតភាព និងការប្រកួតប្រជែង, ការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងបណ្តាញតភ្ជាប់ផ្លូវ និងការធ្វើឱ្យប្រសើរឡើងនូវជំនាញរបស់កម្លាំងពលកម្ម ។
កាលពីឆ្នាំ 2022 សេដ្ឋកិច្ចរបស់កម្ពុជាមានកំណើន 5.2% ខណៈឆ្នាំ 2023 នេះ ត្រូវបាន WB ព្យាករថា នឹងមានកំណើន 5.4% ថយចុះបន្តិចបើធៀបនឹង 5.5% ដែលត្រូវបានព្យាករកាលពីខែឧសភា។ WB ក៏បានព្យាករថា កំណើនសេដ្ឋកិច្ចកម្ពុជា នឹងឡើងដល់ 5.8% ក្នុងឆ្នាំ 2024 និង 6.1% ក្នុងឆ្នាំ 2025៕
November 23, 2023
ពិព័រណ៍ផលិតផលខ្មែរ និងទំនិញនាំចេញ-នាំចូលលើកទី 16 នឹងធ្វើឡើងនៅក្នុងខែធ្នូ ឆ្នាំ 2023
(ភ្នំពេញ) – ក្រសួងពាណិជ្ជកម្ម គ្រោងនឹងបន្តរៀបចំពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជាលើកទី 16 កម្រិតអន្តរជាតិ ដែលនឹងប្រព្រឹត្តទៅនៅមជ្ឈមណ្ឌលតាំងពិព័រណ៍ និងសន្និបាតកោះពេជ្រ ចាប់ពីថ្ងៃទី 15 ដល់ថ្ងៃទី 18 ខែធ្នូ ឆ្នាំ 2023។
យោងតាមសេចក្តីប្រកាសពត៌មានរបស់ក្រសួងពាណិជ្ជកម្ម ក្នុងឱកាសនៃការរៀបចំពិព័រណ៍ខាងលើនេះ ក្រសួងក៏នឹងរៀបចំព្រឹត្តិការណ៍អមសំខាន់ៗមួយចំនួនផងដែរ ដែលមានដូចជា កម្មវិធីសិក្ខាសាលាស្តីពី ការជំរុញសកម្មភាពពាណិជ្ជកម្ម វេទិកាធុរកិច្ច និងវិនិយោគ ជំនួបពាណិជ្ជកម្ម និងកម្មវិធី ចុះអនុស្សរណៈយោគយល់លើកិច្ចការពាណិជ្ជកម្ម ដែលត្រូវបានរៀបចំឡើងដើម្បីជួយគាំទ្រ និងអភិវឌ្ឍវិស័យឯកជន។
ការរៀបចំព្រឹត្តិការណ៍ពិព័រណ៍នេះធ្វើឡើង ក្នុងគោលបំណងជំរុញសកម្មភាពពាណិជ្ជកម្ម និងវិនិយោគនៅកម្ពុជា ជាពិសេសជំរុញការនាំចេញផលិតផល និងសេវា ឱ្យដល់គោលដៅទីផ្សារ ដែលជាផ្នែកមួយជួយជំរុញកំណើនសេដ្ឋកិច្ចជាតិ។ នេះបើតាមប្រកាសរបស់ ក្រសួងពាណិជ្ជកម្ម ចុះថ្ងៃទី 05 ខែឧសភា ឆ្នាំ 2023៕
November 22, 2023
ចំណីអាហារខូចគុណភាព ឬគុណភាពទាបពីបរទេស នឹងត្រូវបានហាមឃាត់យ៉ាងតឹងរ៉ឹងបន្ថែមទៀត
(ភ្នំពេញ) – ក្នុងឱកាសអញ្ជើញជួបវិស័យឯកជន និងប្រកាសដាក់ចេញកិច្ចអន្តរាគមន៍នានា ដើម្បីលើកកម្ពស់ការធ្វើធុរកិច្ចនៅកម្ពុជា នៅឯវិមានសន្តិភាព កាលពីថ្ងៃទី 13 វិច្ឆិកា 2023 ប្រមុខរាជរដ្ឋាភិបាលកម្ពុជា បានជំរុញឱ្យក្រសួង ស្ថាប័នពាក់ព័ន្ធ ពង្រឹងឱ្យបានម៉ត់ចត់បំផុតនូវការហាមនាំចូលម្ហូប ឬចំណីអាហារណាដែលមានគុណភាពទាប។
នាពេលកន្លង វិស័យឯកជន បានស្នើឱ្យមានការពង្រឹងការគ្រប់គ្រងលើការនាំចូលសាច់ជ្រូកបង្កក មាន់ ស៊ុត និងត្រីខុសច្បាប់ ដែលមានតម្លៃថោក និងគុណភាពទាប។ ព្រោះថា វាធ្វើឱ្យអ្នកចិញ្ចឹមក្នុងស្រុកមិនអាចប្រកួតប្រជែងបានដោយស្មើភាព ព្រមទាំងប៉ះពាល់ដល់សុខភាពរបស់ប្រជាពលរដ្ឋ។ នេះបើតាមប្រសាសន៍របស់សម្ដេច ហ៊ុន ម៉ាណែត។
«…ដើម្បីលើកកម្ពស់ការប្រកួតប្រជែងដោយស្មើភាព និងការពារសុខភាពរបស់ប្រជាពលរដ្ឋ រាជរដ្ឋាភិបាលសម្រេចដាក់ចេញនូវវិធានការ ក្រសួង ស្ថាប័នពាក់ព័ន្ធ ត្រូវពង្រឹងឱ្យបានម៉ត់ចត់ការហាមនាំចូលម្ហូប ឬចំណីអាហារណាដែលខូចគុណភាព ឬគុណភាពទាប ដែលប៉ះពាល់ដល់សុខភាព មិនថាឡើយតែសាច់ជ្រូកបង្កក មាន់ ស៊ុត និងត្រូវខុសច្បាប់មកព្រះរាជាណាចក្រកម្ពុជា» សម្ដេចថ្លែងដូច្នេះដើម្បីជាការឆ្លើយតបនឹងសំណើរបស់វិស័យឯកជនក្នុងស្រុក។
ប្រមុខរាជរដ្ឋាភិបាល ក៏បានបញ្ជាឱ្យអាជ្ញាធរពាក់ព័ន្ធ ត្រូវកំណត់ទ្វារព្រំដែនដែលអនុញ្ញាតឱ្យមានការនាំចូលសាច់ជ្រូក បង្កក មាន់ ស៊ុត និងត្រី ដើម្បីបង្កភាពងាយស្រួលនៅក្នុងការគ្រប់គ្រង និងត្រួតពិនិត្យលើការនាំចូលខុសច្បាប់ក្នុងរូបភាពផ្សេងៗផងដែរ៕
November 14, 2023
WB ថា អត្រានៃភាពក្រីក្រនៅកម្ពុជា អាចនឹងកើន 6% នៅឆ្នាំ 2040
របាយការណ៍ស្តីពីអាកាសធាតុ និងការអភិវឌ្ឍន៍សម្រាប់ប្រទេសកម្ពុជា (CCDR) របស់ធនាគារពិភពលោក (World Bank – WB) ដែលត្រូវបានចេញផ្សាយកាលពីថ្ងៃទី 16 តុលា 2023 បានបញ្ជាក់អំពីភាពបន្ទាន់នៃការដោះស្រាយបញ្ហាអាកាសធាតុ ការបំភាយឧស្ម័នផ្ទះកញ្ចក់ និងផ្ដល់អនុសាសន៍សម្រាប់ការដោះស្រាយបញ្ហានេះផងដែរ។
របាយការណ៍នេះរបស់ WB បានអះអាងថា សមិទ្ធផលសេដ្ឋកិច្ចរីកចម្រើនដែលកម្ពុជាសម្រេចបានកន្លងមក កំពុងមានការគំរាមកំហែងពីបញ្ហាអាកាសធាតុ។ គោលដៅរបស់កម្ពុជាដែលចង់ក្លាយជាប្រទេសចំណូលមធ្យមកម្រិតខ្ពស់នៅឆ្នាំ 2030 អាចនឹងនៅតែមិនទាន់សម្រេចបាន ប្រសិនបើមិនមានវិធានការតឹងរ៉ឹង និងគ្រប់គ្រាន់ នៅក្នុងការដោះស្រាយបញ្ហាអាកាសធាតុ។
របាយការណ៍នេះក៏បានព្រមានអំពីការធ្លាក់ចុះនៃផលិតផលក្នុងស្រុកសរុបរបស់កម្ពុជា រហូតដល់ 9% នៅឆ្នាំ 2050 និងការកើនឡើងរបស់អត្រានៃភាពក្រីក្ររហូតដល់ 6% នៅឆ្នាំ 2040។
WB បានរៀបរាប់អំពីកត្តាជាច្រើនដែលជាមូលហេតុនាំឱ្យមានការព្រួយបារម្ភខាងលើ ក្នុងនោះក៏មានទាំងឧបសគ្គផ្នែកច្បាប់ដែលទាក់ទងនឹងពាណិជ្ជកម្ម ហេដ្ឋារចនាសម្ព័ន្ធពាណិជ្ជកម្ម ការវិនិយោគក្នុងស្រុកនៅតិច និងការកើនឡើងបំណុលឯកជនជាដើម។ ក្រៅពីនេះ កត្តាម៉ាក្រូសេដ្ឋកិច្ចពីខាងក្រៅ ដែលមានដូចជាបញ្ហាទីផ្សារ ឬប្រភពហិរញ្ញប្បទាននៅមានកម្រិតជាដើម ក៏អាចនឹងធ្វើឱ្យសេដ្ឋកិច្ចកម្ពុជានៅតែប្រឈមនឹងការប៉ះពាល់។
លើសពីនេះ “ភាពងាយរងគ្រោះផ្នែកសេដ្ឋកិច្ចរបស់កម្ពុជា កើនឡើងបន្ថែមទៀត ដោយសារបញ្ហាអាកាសធាតុ ដែលបន្ថែមភាពស្មុគស្មាញដល់ការអភិវឌ្ឍន៍» លោក Mariam Sherman នាយកធនាគារពិភពលោកប្រចាំប្រទេសមីយ៉ាន់ម៉ា កម្ពុជា និងឡាវ បញ្ជាក់ដូច្នេះ។
លោក Manuela V Ferro អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក និយាយថា កម្ពុជាត្រូវដោះស្រាយផលប៉ះពាល់ធ្ងន់ធ្ងរនៃការប្រែប្រួលអាកាសធាតុមកលើសេដ្ឋកិច្ច និងដាក់វិធានការតឹងរ៉ឹងក្នុងការកាត់បន្ថយការបំភាយកាបូន។
ការប្រែប្រួលអាកាសធាតុគឺជាដើមហេតុនៃគ្រោះធម្មជាតិនានា។ ឧទាហរណ៍ គិតពីឆ្នាំ 2019 មកនេះ កម្ពុជា បានខាតបង់គិតជាតម្លៃសេដ្ឋកិច្ចប្រហែល 100 លានដុល្លារក្នុងផលិតកម្មស្រូវ ដែលបណ្តាលមកពីគ្រោះរាំងស្ងួតបង្កឡើងដោយបាតុភូតអាកាសធាតុ El Nino។ ក្រៅពីនេះ ក្នុងខែកញ្ញា ឆ្នាំ 2022 ប្រទេសកម្ពុជា ក៏បានជួបនឹងជំនន់ទឹកភ្លៀងខ្លាំងបំផុតក្នុងអំឡុងបីឆ្នាំ ប៉ះពាល់ដល់គ្រួសាររាប់ម៉ឺនគ្រួ។
ធនាគារពិភពលោក ក៏បានលើកទឹកចិត្តឱ្យវិស័យឯកជន បញ្ជូលវិធានការឆ្លើយតបនឹងបញ្ហាអាកាសធាតុ ទៅក្នុងការវិនិយោគផងដែរ៕
November 6, 2023
ចំណេញភ្លាមៗពី Samsung Galaxy A ស៊េរី ជាមួយការផ្ដល់ជូនដ៏ពិសេស…!
គ្រាន់តែទិញស្មាតហ្វូន Galaxy A ស៊េរីណាមួយពីសាមសុងនឹងទទួលបានប្រាក់ត្រលប់មកវិញភ្លាមៗ…!
(ភ្នំពេញ) ថ្ងៃទី 16 ខែមិថុនា ឆ្នាំ 2023 ៖ បើអតិថិជនត្រូវទិញ…ទិញឱ្យហើយទៅ…កុំនៅឡើយបង្អង់យូរ… ប្រយ័ត្នប្រម៉ូសិនអស់ធ្វើមុខជូរ…ស្មាតហ្វូនល្អលក់ដាច់មិនយូរ…ទិញប្រើភ្លាមជាប់ចិត្តភ្លែត…! អតិថិជនទាំង អស់នឹងទទួលបានប្រាក់ត្រលប់មកវិញភ្លាមៗ ព្រមទាំងរង្វាន់ម៉ាគាប់ចិត្តតែម្ដង…ចាប់ពីថ្ងៃទី 16 រហូតដល់ ថ្ងៃទី 30 មិថុនា 2023 ដោយគ្រាន់តែទិញស្មាតហ្វូន Galaxy A ស៊េរីណាមួយដូចក្រោម៖
*Galaxy A34 | A54 5G
– បានប្រាក់ត្រលប់មកវិញចំនួន 81,000៛
– កៅអីបត់ពិចនិក
– កាបូបរក្សាសីតុណ្ហភាពដ៏ស្រស់ស្អាត
*Galaxy A24
– បានប្រាក់ត្រលប់មកវិញចំនួន 61,000៛
– ស្រោមទូរស័ព្ទថ្លា និងកញ្ចក់ការពារអេក្រង់
– ឆ្នាំងសាកល្បឿនលឿនរហូតដល់ 15W
*Galaxy A14 | A14 5G
– បានប្រាក់ត្រលប់មកវិញចំនួន 61,000៛
– ឆ្នាំងសាកល្បឿនលឿនរហូតដល់ 15W
*ចំណែក Galaxy A04s
– បានប្រាក់ត្រលប់មកវិញចំនួន 61,000៛
អ៊ែមណាស់…! ឡូយណាស់…! នៅចាំអីទៀត…ប្រញាប់រួសរាន់ឡើងណាហ្វេនៗ! ទិញទូរស័ព្ទបាន ទាំងរង្វាន់…បានទាំងប្រាក់ត្រលប់មកវិញ…រកឯណាទៀត! មានតែក្រុមហ៊ុន សាមសុង ប៉ុណ្ណោះ…!
សូមបញ្ជាក់ផងដែរថាក្នុងចំណោមស្មាតហ្វូនស៊េរី A ខាងលើដែលក្រុមហ៊ុន សាមសុង ផ្តល់ប្រូម៉ូសិនជូន អតិថិជននាពេលនេះគឺសុទ្ធសឹងជាស្មាតហ្វូនដែលអាចឆក់យកបេះដូងអ្នកប្រើប្រាស់លើទីផ្សារទាំងអស់ដែលមានតម្លៃប្រហាក់ប្រហែលគ្នា…និងទទួលបានការពេញនិយមគាំទ្រយ៉ាងខ្លាំងនឹកស្មានមិនដល់! តើមានអ្វីដែលពិសេសសម្រាប់ជោគជ័យដ៏អស្ចារ្យនេះ? ព្រោះថាស្មាតហ្វូន A34 5G, A54 5G, A24 , A14, A14 5G, ឬ A04s ត្រូវបានផលិតឡើងជាមួយនឹងគុណភាពខ្ពស់…បំពាក់បច្ចេកវិទ្យាចុងក្រោយនិងមានតម្លៃ សមរម្យបំផុតស្ទើរមិនគួរឱ្យជឿ…!
សូមរំលឹកថា ក្រុមហ៊ុន សាមសុង គឺជាសមាជិកសកម្មក្នុងវិស័យឯកជនដែលធ្វើសកម្មភាពគាំទ្រដល់ទីក្រុង ប៊ូសាន នៃប្រទេសកូរ៉េ ក្លាយជាម្ចាស់ផ្ទះនៃព្រឹត្តិការណ៍ពិព័រណ៍ពិភពលោក World Expo 2030 នាពេលខាង មុខផងដែរ។
សម្រាប់ព័ត៌មានលម្អិតបន្ថែមសូមអញ្ជើញមកទស្សនាផលិតផលដោយផ្ទាល់ ឬតេស្តដោយផ្ទាល់ដៃនៅតាម ហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាច ចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬ ក៏អាចធ្វើការទំនាក់ទំនងទៅកាន់ផ្នែកសេវាបម្រើ អតិថិជន 24/7 ឥតគិតថ្លៃតាម រយៈទូរស័ព្ទលេខ៖ 1800-20 32 32!
*លក្ខខណ្ឌផ្សេងៗត្រូវបានអនុវត្ត…!!

June 16, 2023
វិស័យឯកជនចូលរួមលើកកម្ពស់ចលនាទេសចរម្នាក់ដើមឈើ 1ដើម
ភ្នំពេញៈ វិស័យឯកជន បាននិងកំពុងចូលរួមកាន់តែសកម្មឡើងក្នុងគោលនយោបាយទេសចរម្នាក់ដើមឈើមួយដើម ជាផ្នែកមួយនៃការលើកកម្ពស់បរិស្ថាន និងទេសចរណ៍។
លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងក្នុងពិធីចូលរួមដាំកូនឈើនៅក្នុងសាលាបឋមសិក្សាភូមិថ្មី សង្កាត់សាមគ្គី ក្រុងស្ទឹងត្រែងកាលពីព្រឹកថ្ងៃម្សិលមិញថា ក្រុមហ៊ុនរបស់លោក ក៏ដូចជាសមាគមដែរ គឺតែងតែផ្សារភ្ជាប់នឹងការងារសង្គម តាមរយៈកម្មវិធីលើកកម្ពស់បរិស្ថាន និងដាំដើមឈើ។ ជាក់ស្តែងថ្ងៃនេះ លោក និងក្រុមការងារបានចុះមកដាំដើមឈើគ្រញូងនៅសាលាបឋមសិក្សាភូមិថ្មីចំនួនជាង 100ដើមដើម្បីធ្វើយ៉ាងណាឲ្យប្រជាពលរដ្ឋ សិស្សានុសិស្សបានស្គាល់ឈើគ្រញូងដ៏មានតម្លៃ និងចូលរួមថែរក្សាបរិស្ថានទាំងអស់គ្នា។
លោកបន្តថា “បរិស្ថានជាជីវិតរបស់យើងទាំងអស់គ្នា ហេតុនេះការចូលរួមដាំកូនឈើ និងសម្អាតបរិស្ថានជាការងាររបស់យើងទាំងអស់គ្នា ហើយការងារនេះផ្តើមចេញពីយើងម្នាក់ៗ”។ លោកបន្តថា “នេះជាសកម្មភាពមួយចូលរួមក្នុងគោលនយោបាយរបស់ក្រសួងទេសចរណ៍ គឺទេសចរម្នាក់ដើមឈើមួយដើម”។
លោក អែល អូន នាយកសាលាបឋមសិក្សាភូមិថ្មីបានមានប្រសាសន៍ឲ្យដឹងថា បរិស្ថានជាអាយុជីវិតរបស់កុមារ និងមនុស្សទូទៅ ព្រោះបើបរិស្ថានមិនស្អាត នាំឲ្យមានបញ្ហាសុខភាព និងបង្កជាជំងឺមួយចំនួនដល់ប្រជាពលរដ្ឋរស់នៅក្នុងសហគមន៍នោះ ដូចជាមេរោគគ្រុនចាញ់ មេរោគគ្រុនឈាមជាដើម។ លោកបន្តថា ការដាំដើមឈើនេះ ជាការឆ្លើយតបតាមអ្វីដែលសាលាត្រូវការជាយូរមកហើយ ប៉ុន្តែសាលាមិនទាន់មានលទ្ធភាពដាំ ហេតុនេះការនាំយកកូនឈើគ្រញូងមកដាំនាពេលនេះ ជាការប្រពៃណាស់សម្រាប់សាលា និងសហគមន៍ទាំងមូល។
ក្រសួងទេសចរណ៍ជាច្រើនឆ្នាំមកនេះបានដាក់ចេញគោលនយោបាយមួយចំនួន ដើម្បីលើកកម្ពស់បរិស្ថានដូចជា ចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ គោលនយោបាយទេសចរម្នាក់ដើមឈើមួយដើមជាដើម៕
July 17, 2017
វិស័យឯកជនស្នើកុំឲ្យសាងសង់ស្ថានីយប្រេងនៅលើកោះ
ភ្នំពេញៈ ក្រុមការងារឯកជនផ្នែកវិស័យទេសចរណ៍ បានស្នើរដ្ឋាភិបាលកុំឲ្យមានការសាងសង់ស្ថានីយប្រេងនៅតាមបណ្តាកោះនានា ពិសេសកោះរ៉ុង ដើម្បីធ្វើយ៉ាងណាកុំឲ្យមានការបំពុលបរិស្ថាន និងធនធានធម្មជាតិនៅក្នុងតំបន់ទាំងនោះ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងឲ្យដឹងតាមទូរស័ព្ទកាលពីម្សិលមិញថា ការសាងសង់ស្ថានីយប្រេងនឹងធ្វើឲ្យប៉ះពាល់ដល់ជីវចម្រុះ និងបរិស្ថាននៅលើកោះ ព្រោះពេលមានរថយន្តបើកបរច្រើននឹងធ្វើឲ្យខូចបរិស្ថាន ហេតុនេះនៅតាមបណ្តាកោះនានាគួរមានត្រឹមតែម៉ូតូ ឬរថយន្តអគ្គិសនី គឺជាការប្រសើរបំផុត។ លោកបន្តថា នៅពេលមានការបំពុលបរិស្ថាន វានឹងបំផ្លាញអ្វីៗទាំងអស់ ហើយយើងនឹងបាត់បង់ទាំងអស់ ប្រសិនជាយើងមិនយកចិត្តទុកដាក់ពីឥឡូវនេះទៅទេនោះ។

លោក ហូ វណ្ឌី បានបន្តថា ការបំពុលទឹកតាមរយៈការបង្ហូរកាកសំណល់ ចូលប្រភពទឹក ការបោះចោលថង់ផ្លាស្ទិក និងសំរាមនៅតាមតំបន់ឆ្នេរ និងលើឆ្នេរជាការបំផ្លាញវិស័យទេសចរណ៍ដ៏ខ្លាំងសម្បើម ហេតុនេះសូមបងប្អូនប្រជាពលរដ្ឋ និងអាជ្ញាធរមូលដ្ឋានជួយយកចិត្តទុកដាក់ចំពោះបញ្ហានេះផង។
សហប្រធានក្រុមការងារឯកជនផ្នែកវិស័យទេសចរណ៍លោក លូ ម៉េង បានបន្ថែមថា សំរាម និងការបំពុលបរិស្ថានជាបញ្ហារបស់យើងទាំងអស់គ្នាដែលទាមទារឲ្យមានការចូលរួមពីប្រជាពលរដ្ឋទាំងអស់គ្នា ដើម្បីលើកកម្ពស់បរិស្ថាន និងទីក្រុងឲ្យបានស្អាត ព្រោះសំរាមជាសត្រូវរបស់ទេសចរណ៍ដែលភ្ញៀវទេសចរមកពីប្រទេសមួយចំនួនពួកគេមានការខ្លាចរអា មិនចង់មកកាន់ប្រទេសដែលមានការបំពុលបរិស្ថាន និងការបោះចោលសំរាមពាសវាលពាសកាលនោះទេ។
លោកបន្តថា “សូមចាប់ផ្តើមឥឡូវនេះពីយើងទាំងអស់គ្នា កុំបោះសំរាម ឬថង់ផ្លាស្ទិកចោលពាសវាលពាសកាល ដើម្បីធ្វើឲ្យប្រទេសយើងស្អាត និងទីក្រុងរបស់យើងគ្មានសំរាម”៕
June 23, 2017