វិស័យទេសចរណ៍

រថយន្ត Ford Transit ស៊េរីឆ្នាំ ២០២៤ បានមកដល់ទីផ្សារកម្ពុជាហើយ !

រាជធានីភ្នំពេញ ៖ រថយន្ត Ford Transit ស៊េរីឆ្នាំ ២០២៤ គឺជារថយន្តប្រភេទដឹកអ្នកដំណើរដ៏ពេញនិយមនៅទីផ្សារប្រទេសកម្ពុជា ដែលបានផ្តល់នូវភាពធន់ រឹងមាំ ផាសុកភាព ទំនើប និងសុវត្ថិភាពដល់អតិថិជនដែលទទួលបានគាំទ្រពីអតិថិជន មកពីសំណាកវិស័យទេសចរណ៍ វិស័យដឹកជញ្ជូនអ្នកដំណើរ និងវិស័យបដិសណ្ឋារកិច្ចកន្លងមក ។ សម្រាប់រថយន្ត Ford Transit ស៊េរីឆ្នាំ ២០២៤ គឺនៅតែបន្តផ្តល់នូវទំនុកចិត្តដល់អតិថិជនដោយបានបំពាក់នូវបច្ចេកវិទ្យាប្រព័ន្ធសុវត្ថិភាពចុងក្រោយដែលផ្តល់ផាសុកភាព សុវត្ថិភាពជូនដល់អ្នកបើកបរ និងអ្នករួមដំណើរផងដែរ ។

រថយន្ត Ford Transit ស៊េរីឆ្នាំ ២០២៤ ត្រូវបានរចនាឡើងដែលមានលក្ខណៈធំទូលាយ និងដំបូលខ្ពស់ស្រឡះភ្ជាប់មកជាមួយប្រព័ន្ធម៉ាស៊ីនត្រជាក់គ្រប់ជួរ ដែលផ្តល់នូវផាសុកភាព និងភាពស្រស់ស្រាយដល់អ្នកធ្វើដំណើរ មិនថាការធ្វើដំណើរកម្សាន្តទីជិត ឬទីឆ្ងាយ ។ ជាពិសេស រថយន្ត Ford Transit ក៏បានបំពាក់បន្ថែមនូវឈ្នាន់ជាន់អេឡិចត្រូនិច និងដែកបង្កាន់ដៃដ៏រឹងមាំដែលផ្តល់ភាពងាយស្រួលសម្រាប់អ្នកដំណើរក្នុងការឡើងចុះ និងចេញចូលរថយន្ត ។ សម្រាប់អ្នកបើកបរផ្នែកខាងមុខ ត្រូវបានរចនាឡើងដោយផ្តល់នូវផ្ទៃធំទូលាយងាយស្រួលក្នុងការមើលឃើញឧបសគ្គខាងមុខ មិនថាពេលថ្ងៃ ឬពេលយប់ បូករួមកញ្ចក់មើលក្រោយពីចំហៀងធំ រួមទាំងភ្លើងស៊ីញ៉ូរផ្តល់នូវសុវត្ថិភាព និងភាពងាយស្រួលដល់អ្នកបើកបរ ។

មិនតែប៉ុណ្ណោះ រថយន្ត Ford Transit ស៊េរីឆ្នាំ ២០២៤ គឺមានបំពាក់នូវប្រព័ន្ធសុវត្ថិភាពផ្សេងៗទៀតជាច្រើនដូចជា ប្រព័ន្ធការពារសុវត្ថិភាពពីចោរកម្ម ប្រព័ន្ធហ្វ្រាំងសុវត្ថិភាព ABS ប្រព័ន្ធបែងចែកកម្លាំងហ្វ្រាំងដោយស្វ័យប្រវត្ត EBD ប្រព័ន្ធជំនួយក្នុងការឡើងចំណោត ប្រព័ន្ធទប់លំនឹងនិងស្ថេរភាពនៃរថយន្តសម្រាប់ផ្លូវកោង ឬផ្លូវរអិល ប្រព័ន្ធទប់លំនឹងរថយន្តក្នុងការបើកបរ និងប្រព័ន្ធសេនស័រជំនួយក្នុងការចូលចតចំនួន ៨គ្រាប់ រួមទាំងប្រព័ន្ធកាមេរ៉ាមើលក្រោយចំនួន ១ ផងដែរ ។

លើសពីនេះទៅទៀត រថយន្ត Ford Transit ស៊េរីឆ្នាំ ២០២៤ មិនមែនត្រឹមតែជារថយន្តដឹកដំណើរនោះទេ ប៉ុន្តែរថយន្តនេះ ក៏អាចត្រូវបានកែឆ្នៃពិសេសដែលតម្រូវទៅតាមវិស័យផ្សេងៗដូចជារថយន្តសង្គ្រោះបន្ទាន់ បម្រើដល់វិស័យសុខាភិបាល រថយន្តមន្ទីរពិសោធន៍ចល័ត រថយន្តបំពាក់នូវទូដែក សម្រាប់វិស័យធនាគារ និងអាចកែឆ្នៃជាហាងកាហ្វេចល័ត ផ្ទះចល័ត ផងដែរ ។

សម្រាប់ការទំនាក់ទំនងផ្នែកលក់ និង ទទួលព័ត៌មានផ្សេងៗអំពីរថយន្ត Ford Transit ស៊េរីឆ្នាំ ២០២៤ សូមទំនាក់ទំនងទៅកាន់លេខទូរស័ព្ទ ៖ 088 6777 200 / 087 777 200 ៕

February 17, 2024

ថៃ ម៉ាឡេស៊ី សិង្ហបុរី លើកលែងទិដ្ឋាការដើម្បីទាក់ទាញទេសចរចិន

ប្រទេសសិង្ហបុរី ម៉ាឡេស៊ី និងប្រទេសថៃ កំពុងអនុវត្តយុទ្ធសាស្ត្រមួយដើម្បីអូសទាញភ្ញៀវទេសចរណ៍មកពីប្រទេសចិន នោះគឺគោលនយោបាយលើកលែងទិដ្ឋាការ (Visa) ដែលមិនធ្លាប់មានពីមុនមក។

ដោយការលើកលែងទិដ្ឋាការនេះ ប្រទេសនៅអាស៊ីអាគ្នេយ៍ទាំងបីខាងលើ កំពុងប្រើប្រាស់ភាពទាក់ទាញនៃការដើរហើរដោយសេរី ដើម្បីជំរុញ និងស្ដារវិស័យទេសចរណ៍ ដែលបានរងផលប៉ះពាល់ធ្ងន់ធ្ងរដោយសារវិបត្តិសុខភាពនាប៉ុន្មានឆ្នាំកន្លង។ នេះបើតាម Reuters ចុះផ្សាយកាលពីថ្ងៃទី 09 កុម្ភៈ 2024។

វិស្វករជនជាតិចិន លោក Wei Ming គឺជាសាក្សីមួយសម្រាប់បញ្ជាក់អំពីប្រសិទ្ធភាពនៃយុទ្ធសាស្ត្រខាងលើ នៅពេលគាត់ប្ដូរគម្រោងទេសចរណ៍របស់ខ្លួនពីអូស្ត្រាលី មកសិង្ហបុរី គ្រាដែលទិដ្ឋាការត្រូវបានលើកលែង។ ថ្នាក់ដឹកនាំរបស់ប្រទេសថៃ សិង្ហបុរី និងម៉ាឡេស៊ី សង្ឃឹមថា ការលើកលែងទិដ្ឋាការនឹងទាក់ទាញទេសចរចិនបានច្រើននៅក្នុងរដូវបុណ្យនិទាឃរដូវឆ្នាំនេះ ដែលជារដូវឈប់សម្រាកដំបូង រាប់ចាប់តាំងពីទីក្រុងប៉េកាំង បានបន្ធូរបន្ថយការរឹតត្បិតលើការដើរហើរព្រោះតែកូវីដ-19។

ទោះជាយ៉ាងណាក៏ដោយ ក្រុមអ្នកវិភាគព្រមានថា ឱនភាពសេដ្ឋកិច្ចរបស់ប្រទេសចិន ស្ថានភាពអស្ថិរភាពក្នុងមុខរបរ ការងារ និងប្រាក់ចំណូលធ្លាក់ចុះ អាចកាត់បន្ថយដំណើរទេសចរណ៍ក្រៅប្រទេសរបស់ពលរដ្ឋចិន នាំឱ្យគោលនយោបាយលើកលែងទិដ្ឋាការខាងលើមិនសូវមានប្រសិទ្ធភាព៕

February 9, 2024

ថៃ និងចិនចុះហត្ថលេខាលើកលែងទិដ្ឋាការរួម ដើម្បីទេសចរណ៍ និងពាណិជ្ជកម្ម

ប្រទេសថៃ និងចិន បានចុះហត្ថលេខាលើកិច្ចព្រមព្រៀងលើកលែងទិដ្ឋាការរួម ដែលនឹងមានសុពលភាពចាប់ពីថ្ងៃទី 01 មីនា 2024។ កិច្ចព្រមព្រៀងនេះមិនត្រឹមតែក្នុងបំណងពង្រឹង និងពង្រីកវិស័យទេសចរណ៍នោះទេ ប៉ុន្តែក៏ជួយជំរុញពាណិជ្ជកម្ម និងបង្កលក្ខណៈងាយស្រួលដល់ការដោះដូរក្នុងវិស័យផ្សេងៗរបស់ប្រទេសទាំងពីរនេះផងដែរ។

ក្នុងសន្និសីទសារព័ត៌មានក្រោយពីបានចូលរួមពិធីចុះហត្ថលេខានៅរាជធានីបាងកកជាមួយនឹងសមភាគីថៃ Parnpree Bahiddha-Nukara រដ្ឋមន្ត្រីការបរទេសចិន លោក Wang Yi បាននិយាយថា នៅពេលប្រទេសទាំងពីរឈានចូលដល់ «សម័យលើកលែងទិដ្ឋាការ» កិច្ចព្រមព្រៀងនេះមិនត្រឹមតែនាំមកនូវផលប្រយោជន៍ដល់វិស័យទេសចរណ៍នោះទេ ប៉ុន្តែក៏នឹងបង្កើតបានជាទំព័រថ្មីនៅក្នុងការប្ដូរផ្លាស់វប្បធម៌ និងមនុស្សទៅវិញទៅមកទៀតផង។

យោងតាមកិច្ចព្រមព្រៀងនេះ ពលរដ្ឋចិន និងថៃ នៅពេលមានលិខិតឆ្លងដែន នឹងត្រូវបានអនុញ្ញាតឱ្យចូលប្រទេសគ្នា ដោយមិនត្រូវការទិដ្ឋាការ ហើយអាចស្នាក់នៅបាន 30 ថ្ងៃ។ តាមការរំពឹងទុក ក្រោយពីកិច្ចព្រមព្រៀងនេះចូលជាធរមាន ចំនួនភ្ញៀវចិនទៅលេងនៅប្រទេសថៃ ប្រាកដជានឹងកើនឡើងច្រើន គ្រាដែលពលរដ្ឋថៃក៏នឹងទទួលបានការសាទរយ៉ាងកក់ក្ដៅ នៅពេលទៅលេងប្រទេសចិន។

ក្រៅពីប្រទេសថៃ ប្រទេសចិន ក៏បានចុះហត្ថលេខាលើកិច្ចព្រមព្រៀងលើកលែងទិដ្ឋាការរួមជាមួយនឹងសិង្ហបុរីផងដែរ ក្នុងនោះ កិច្ចព្រមព្រៀងនេះនឹងមានសុពលភាពចាប់ពីថ្ងៃទី 09 កុម្ភៈខាងមុខ។ ក្រៅពីនេះ ម៉ាឡេស៊ីដែលជាប្រទេសមួយនៅតំបន់អាស៊ីអាគ្នេយ៍ ក៏បានលើកលែងទិដ្ឋាការចំពោះពលរដ្ឋចិត្តផងដែរ៕

January 29, 2024

«សេដ្ឋកិច្ចរាត្រី» បានជួយទាញវិស័យទេសចរណ៍ថៃឱ្យងើបឡើងវិញ

កំណើននៃប្រាក់ចំណូលបានពីវិស័យទេសចរណ៍ ក៏ដូចជាកំណើននៃការចំណាយរបស់ទេសចរ នៅក្នុងរដូវបុណ្យចូលឆ្នាំថ្មីនៅប្រទេសថៃ ត្រូវបានជំរុញដោយសកម្មភាពកម្សាន្តនាពេលរាត្រី បន្ទាប់ពីរាជរដ្ឋាភិបាលប្រទេសនេះ បានអូសបន្លាយពេលវេលាសម្រាប់អ្នករកស៊ីនៅពេលយប់។

ចាប់ពីថ្ងៃទី 15 ធ្នូ 2023 គណៈរដ្ឋមន្ត្រីថៃ បានអនុម័តសំណើមួយដែលអនុញ្ញាតឱ្យក្លឹបរាត្រី បារ និងទីតាំងកម្សាន្តផ្សេងៗ បើកទ្វាររហូតដល់ម៉ោង 4 ទៀបភ្លឺ ជំនួសឱ្យម៉ោង 2 ទៀបភ្លឺ ដើម្បីជំរុញឱ្យទេសចរចាយលុយច្រើនជាងមុននៅពេលរាត្រី។

ការបន្ធូរបន្ថយពេលវេលាសម្រាប់ការកម្សាន្តនៅពេលរាត្រី បាននាំឱ្យភ្ញៀវទេសចរណ៍ស្នាក់នៅក្នុងប្រទេសថៃយូរជាងមុន និងចំណាយប្រាក់ច្រើនជាងមុន។

កាលពីពេលថ្មីៗនេះ ក្រសួងទេសចរណ៍ និងកីឡាថៃ បានឱ្យដឹងថា ប្រទេសនេះរកចំណូលបានរហូតដល់ 1.6 ពាន់លានដុល្លារអាម៉េរិក ពីវិស័យទេសចរណ៍ ត្រឹមតែនៅក្នុងខែធ្នូ 2023 ដែលនេះបានកើន 44% បើធៀបនឹងមួយឆ្នាំមុននោះ។ ជោគជ័យនេះ សម្រេចបានក៏ដោយសារការបន្ធូរបន្ថយការរឹតត្បិតលើវិស័យកម្សាន្តនៅពេលយប់៕

January 11, 2024

កម្ពុជា វៀតណាម និងឡាវ អភិវឌ្ឍរូបមន្តទេសចរណ៍ «មួយដំណើរ បីគោលដៅ»

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីឡាវ Sonexay Siphandone រួមនឹងនាយករដ្ឋមន្ត្រីវៀតណាម Pham Minh Chinh បានឯកភាពគ្នាក្នុងកិច្ចសហប្រតិបត្តិការណ៍អភិវឌ្ឍរូបមន្តទេសចរណ៍ «មួយដំណើរ បីគោលដៅ» ដើម្បីជំរុញវិស័យទេសចរណ៍របស់ប្រទេសទាំងបី។

កាលពីថ្ងៃទី 17 ធ្នូ ក្នុងឱកាសចូលរួមសន្និសីទកំពូល ខួប 50 ឆ្នាំ នៃទំនាក់ទំនងអាស៊ាន – ជប៉ុន នៅរាជធានីតូក្យូ (ប្រទេសជប៉ុន) ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានអញ្ជើញជួបពិភាក្សាការងារជាមួយសមាសភាគីឡាវ និងវៀតណាម។

នៅក្នុងជំនួបនេះ មេដឹកនាំរបស់កម្ពុជា វៀតណាម និងឡាវ បានឯកភាព លើការវាយតម្លៃដែលថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងបី កំពុងត្រូវបានធ្វើឱ្យប្រសើរឡើង និងរីកចម្រើនក្នុងវិស័យជាច្រើន។

ទន្ទឹមនឹងបញ្ហាសំខាន់ៗដទៃ សម្ដេចធិបតី ហ៊ុន ម៉ាណែត ក៏ទទួលបានការសាទរពីសមាសភាគីវៀតណាម និងឡាវ ចំពោះសំណើបើកកិច្ចប្រជុំថ្នាក់រដ្ឋមន្ត្រីនៃក្រសួងទេសចរណ៍របស់ប្រទេសទាំងបីនៅកម្ពុជា នាពេលឆាប់ៗខាងមុខ ដើម្បីជំរុញបន្ថែមទៀតនូវកិច្ចសហប្រតិបត្តិការក្នុងវិស័យទេសចរណ៍រវាងប្រទេសទាំងបី ពិសេសគឺការអភិវឌ្ឍរូបមន្តទេសចរណ៍ «មួយដំណើរ បីគោលដៅ» (One Journey – Three Destinations/Three Countries One Destination)។

យោងតាមអ្នកជំនាញ កិច្ចសហប្រតិបត្តិការនេះនឹងនាំមកនូវផលប្រយោជន៍ជាច្រើនសម្រាប់កម្ពុជា។ ទេសចរម្នាក់មកពីលោកខាងលិច ឬគ្រួសារដែលមានថវិកាខ្ទង់ 10,000 ដុល្លារអាម៉េរិក នឹងពេញចិត្តក្នុងការដើរទេសចរណ៍នៅបីប្រទេសក្នុងមួយជើង។

December 18, 2023

ភ្ញៀវទេសចរណ៍បរទេសមកទស្សនាកម្ពុជា កើនឡើងកាន់តែខ្ពស់

នៅក្នុងរយៈពេល 10 ខែដំបូងនៃឆ្នាំ 2023 នេះ កម្ពុជាបានទទួលភ្ញៀវបរទេសជាង 4 លាននាក់ កើនឡើងច្រើនបើធៀបនឹងដំណាក់កាលដូចគ្នាក្នុងឆ្នាំកន្លង។

យោងតាមទិន្នន័យពីក្រសួងទេសចរណ៍ ដែលបានចេញផ្សាយកាលពីចុងសប្ដាហ៍កន្លង ក្នុង 10 ខែដំបូងនៃឆ្នាំ 2023 មានទេសចរបរទេសជាង 4.4 លាននាក់មកទស្សនាកម្ពុជា ដែលតួលេខនេះកើន 179.7% បើធៀបនឹង 10 ខែដំបូងនៃឆ្នាំ 2022។ ក្រសួងឱ្យដឹងថា ទេសចរថៃរួមចំណែករហូតដល់ 1 លាននាក់ ស្មើនឹង 34.1% នៃចំនួនភ្ញៀវបរទេសសរុប ខណៈដែលវៀតណាមរួមចំណែកជាង 8 សែននាក់ ស្មើនឹង 18.7% ស្របពេលដែលចិនរួមចំណែកជាង 4 សែននាក់ ស្មើនឹង 10.3%។

ដោយឡែក ក្នុងខែតុលា កម្ពុជាបានទទួលភ្ញៀវទេសចរណ៍បរទេសចំនួនជាង 480,000 នាក់ កើន 54.9% បើធៀបនឹងខែតុលាឆ្នាំកន្លង។

ក្រៅពីភ្ញៀវមកពីប្រទេសថៃ វៀតណាម និងចិន ពលរដ្ឋនៃប្រទេសមួយចំនួនផ្សេងទៀតក៏រួមចំណែកច្រើននៅក្នុងកំណើនទេសចរបរទេសរបស់កម្ពុជា មានជាអាទិ៍ ឡាវ អាម៉េរិក កូរ៉េខាងត្បូង ឥណ្ឌូណេស៊ី បារាំង អង់គ្លេស និងអូស្ត្រាលី ជាដើម។

លោក ខៀវ ធី ប្រធានសមាគមមគ្គុទ្ទេសក៍ទេសចរខ្មែរអង្គរ (KATGA) យល់ថា យុទ្ធសាស្ត្រឃោសនា និងទាក់ទាញ់វិនិយោគពីបរទេសមកកាន់កម្ពុជា របស់រាជរដ្ឋាភិបាល បាន និងកំពុងដើរតួនាទីសំខាន់នៅក្នុងការជំរុញកំណើនវិស័យទេសចរណ៍។

«ការបើកដំណើរការព្រលានយន្តហោះអន្តរជាតិសៀមរាបអង្គរ និងការដាក់ចេញគោលនយោបាយជំរុញកំណើនវិស័យទេសចរណ៍ នឹងបន្តជួយអូសទាញភ្ញៀវបរទេសបន្ថែមទៀត» លោក ខៀវ ធី ថ្លែងដូច្នេះ។

យោងតាមក្រសួងទេសចរណ៍ កាលពីឆ្នាំ 2022 កម្ពុជាបានទទួលភ្ញៀវទេសចរណ៍បរទេសជិត 2.28 លាននាក់ កើន 1,059% បើធៀបនឹងឆ្នាំ 2021។ ក្នុងនោះ ទេសចរពីប្រទេសថៃ វៀតណាម ឡាវ និងចិន រួមចំណែក 1,516,855 នាក់ ស្មើនឹង 66.62% ធៀបនឹងភ្ញៀវបរទេសសរុប៕

November 30, 2023

អាជ្ញាធរថៃអនុញ្ញាតឱ្យក្លឹបរាត្រី និងបារ បើកទ្វារដល់ម៉ោងបួនទៀបភ្លឺដើម្បីទាក់ទាញទេសចរ

គណៈរដ្ឋមន្ត្រីថៃ អនុម័តសេចក្ដីសម្រេចថ្មីដែលអនុញ្ញាតឱ្យទីតាំងកម្សាន្ត រួមមាន ក្លឹបរាត្រី និងបារជាដើម បើកទ្វារដល់ម៉ោង 4 ទៀបភ្លឺ ដើម្បីទាក់ទាញភ្ញៀវ និងជំរុញវិស័យទេសចរណ៍។

យោងតាមសារព័ត៌មាន Reuters សេចក្ដីសម្រេចថ្នាក់ក្រសួងនេះត្រូវបានអនុម័តកាលពីថ្ងៃទី 28 វិច្ឆិកា 2023 ។

អ្នកនាំពាក្យរបស់រាជរដ្ឋាភិបាលថៃ លោកស្រី Traisulee Traisaranakul ឱ្យដឹងថា ទីតាំងកម្សាន្តដូចជា ក្លឹបរាត្រី បារ ហាងការ៉ាអូខេជាដើម នៅរាជធានីបាងកក និងបណ្ដាទីក្រុង Phuket, Pattaya, Chiang Mai និង Samui ត្រូវបានអនុញ្ញាតឱ្យបើកទ្វារ 2 ម៉ោងទៀតបន្ថែមទៀត ពោលគឺរហូតដល់ម៉ោង 4 ទៀបភ្លឺ។ សេចក្ដីសម្រេចនេះគឺជាយុទ្ធសាស្ត្រមួយរបស់រាជរដ្ឋាភិបាលថៃ ដើម្បីទាក់ទាញភ្ញៀវបរទេសបន្ថែមទៀត។

មុននោះ កាលពីខែកញ្ញា 2023 អាជ្ញាធរថៃបានលើកលែងទិដ្ឋាការចំពោះភ្ញៀវទេសចរណ៍ចិន ដែលជាប្រភពទេសចរសំខាន់របស់ប្រទេសនេះ។

នៅមុនវិបត្តិកូវីដ-19 ប្រទេសថៃធ្លាប់ទទួលភ្ញៀវបរទេសបាន 39.9 លាននាក់/ឆ្នាំ ក្នុងនោះមាន 11 លាននាក់មកពីប្រទេសចិន។

ទេសចរណ៍គឺជាកត្តាជំរុញសំខាន់បំផុតរបស់សេដ្ឋកិច្ចថៃ។ ប៉ុន្តែ បច្ចុប្បន្ន ល្បឿននៃកំណើនរបស់វិស័យនេះ មានភាពយឺតយ៉ាវជាងវិស័យដទៃ។ ដូច្នេះ រដ្ឋាភិបាលរបស់លោកនាយករដ្ឋមន្ត្រី Srettha Thavisin កំពុងប្រឹងប្រែងចាត់វិធានការដើម្បីជំរុញកំណើនវិស័យទេសចរណ៍បន្ថែមទៀត។

រាប់ចាប់ពីដើមឆ្នាំ 2023 រហូតដល់បច្ចុប្បន្ន ប្រទេសថៃទទួលបានភ្ញៀវបរទេសប្រមាណ 24.5 លាននាក់ ហើយត្រូវបានព្យាករថា នឹងកើនដល់ 28 លាននាក់នៅដំណាច់ឆ្នាំនេះ៕

November 29, 2023

សេដ្ឋកិច្ចកម្ពុជា នឹងមានកំណើន 5.8% ក្នុងឆ្នាំ 2024 ខណៈឆ្នាំ 2023 មានកំណើន 5.4%

ធនាគារពិភពលោក (WB) បានទម្លាក់កំណើនសេដ្ឋកិច្ចកម្ពុជា ពី 5.5% មកនៅត្រឹម 5.4% សម្រាប់ឆ្នាំនេះ នៅក្នុងរបាយការណ៍ចុងក្រោយស្តីពីបច្ចុប្បន្នភាពសេដ្ឋកិច្ចរបស់កម្ពុជា ចេញផ្សាយនៅថ្ងៃទី22 វិច្ឆិកា 2023។

ទោះបីជាវិស័យទេសចរណ៍ និងសេវាដទៃទៀតបានងើបឡើងវិញ ប៉ុន្តែ ធនាគារពិភពលោក បានលើកពីកត្តារួមផ្សំរវាងសម្ពាធពីខាងក្រៅ និងបញ្ហាប្រឈមផ្នែករចនាសម្ព័ន្ធ ដែលបានដាក់សម្ពាធលើកំណើនសេដ្ឋកិច្ចកម្ពុជា។

ប្រសិនបើការកែទម្រង់រចនាសម្ព័ន្ធដើរអមគ្នាជាមួយការវិនិយោគលើហេដ្ឋារចនាសម្ព័ន្ធ និងកាលានុវត្តភាពពាណិជ្ជកម្ម នោះវានឹងនាំឱ្យកំណើនសេដ្ឋកិច្ចបន្តបង្កើនល្បឿននៅក្នុងរយៈពេលមធ្យម និងវែង។ នេះបើតាមអនុសាសន៍របស់ WB។

«កម្ពុជាចាំបាច់ត្រូវជួយដល់វិស័យឯកជនឱ្យបំពេញមុខងារជាក្បាលម៉ាស៊ីនលើកកម្ពស់កំណើនសេដ្ឋកិច្ច» លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជា លើកឡើងដូច្នេះ និងបន្តថា «កិច្ចការនេះអាចសម្រេចបាន ដោយការធ្វើសកម្មភាពភ្លាមៗនៅក្នុងការធ្វើឱ្យប្រសើរឡើងនូវការបំពេញការងាររបស់វិស័យសាធារណៈ» ខណៈការរក្សាស្ថិរភាពហិរញ្ញវត្ថុក៏ជាអាទិភាពមួយដែរ។

WB សង្កត់ធ្ងន់ថា កំណើនសេដ្ឋកិច្ចអាចនៅតែរងផលប៉ះពាល់បន្ថែមទៀតពីការចុះខ្សោយនៃតម្រូវការពិភពលោក ឬពីការឡើងថ្លៃប្រេងឥន្ធនៈ និងថ្លៃស្បៀងអាហារកើនឡើងវិញ។ ចំណែកនៅក្នុងស្រុក ការកើនឡើងនៃបំណុលគ្រួសារ និងឥណទានក្នុងស្រុកនៅក្នុងវិស័យអចលនទ្រព្យ នៅតែជាហានិភ័យដដែល។

WB ក៏បានផ្ដល់អនុសាសន៍អំពីកំណែទម្រង់រចនាសម្ព័ន្ធ ដែលអាចជួយកម្ពុជាជំរុញឱ្យមានកំណើនប្រកបដោយចីរភាព រួមមាន ការកែលម្អបរិយាកាសធុរកិច្ចដើម្បីបង្កើនផលិតភាព និងការប្រកួតប្រជែង, ការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងបណ្តាញតភ្ជាប់ផ្លូវ និងការធ្វើឱ្យប្រសើរឡើងនូវជំនាញរបស់កម្លាំងពលកម្ម ។

កាលពីឆ្នាំ 2022 សេដ្ឋកិច្ចរបស់កម្ពុជាមានកំណើន 5.2% ខណៈឆ្នាំ 2023 នេះ ត្រូវបាន WB ព្យាករថា នឹងមានកំណើន 5.4% ថយចុះបន្តិចបើធៀបនឹង 5.5% ដែលត្រូវបានព្យាករកាលពីខែឧសភា។ WB ក៏បានព្យាករថា កំណើនសេដ្ឋកិច្ចកម្ពុជា នឹងឡើងដល់ 5.8% ក្នុងឆ្នាំ 2024 និង 6.1% ក្នុងឆ្នាំ 2025៕

November 23, 2023

តម្លៃនៃការនាំចេញទំនិញរបស់ឡាវ ក្នុង 9 ខែដំបូងនៃឆ្នាំនេះ សម្រេចបានជិត 6 ពាន់លានដុល្លារ

(ឡាវ) – 9 ខែដំបូងនៃឆ្នាំនេះ តម្លៃសរុបនៃការនាំចេញទំនិញរបស់ប្រទេសឡាវ សម្រេចបានជិត 6 ពាន់លានដុល្លារអាម៉េរិក ស្មើនឹង 72.94% ធៀបនឹងផែនការសម្រាប់ឆ្នាំ 2023 ហើយគ្រោងនឹងសម្រេចបានជាង 8 ពាន់លានដុល្លារ នៅក្នុងរយៈពេលពេញមួយឆ្នាំនេះ ដែលស្មើនឹង 97.71% នៃផែនការ។

ចំណែកតម្លៃនៃការនាំចូលទំនិញវិញ ក្នុង 9 ខែនេះ ឡាវសម្រេចបានជាង 5 ពាន់លានដុល្លារអាម៉េរិក ស្មើនឹងជាង 70% នៃផែនការប្រចាំឆ្នាំ ហើយគ្រោងនឹងសម្រេចបានជិត 7 ពាន់លានដុល្លារនៅត្រឹមដំណាច់ឆ្នាំ ដែលស្មើនឹង 97.71% បើធៀបនឹងផែនការសម្រាប់ឆ្នាំ 2023។

លោក Khamchen Vongphosy រដ្ឋមន្ត្រីក្រសួងផែនការនិងវិនិយោគឡាវ បានឱ្យដឹងថា 9 ខែដំបូងនៃឆ្នាំ 2023 សេដ្ឋកិច្ចឡាវបន្តមានកំណើន ពិសេសគឺវិស័យកសិកម្ម-ព្រៃឈើ ដែលអាចមានកំណើន 3.4% និងរួមចំណែក 17.3% ទៅក្នុង GDP (ផលិតផលក្នុងស្រុកសរុប) ហើយអាចកើនដល់ 21.4% នៃ GDP នៅត្រឹមដំណាច់ឆ្នាំនេះ។

ទន្ទឹមនឹងនេះ វិស័យឧស្សាហកម្មរបស់ឡាវ ក៏មានកំណើន 3.5% ស្មើនឹង 34.5% នៃ GDP ខណៈវិស័យទេសចរណ៍មានកំណើន 5.6% ស្មើនឹង 37.2% នៃ GDP នៅក្នុង 9 ខែដំបូងនៃឆ្នាំនេះ៕

November 18, 2023

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

Tag: វិស័យទេសចរណ៍