រ៉ូបូត - La Reine Media

ឥណ្ឌាប្រកាសកាលបរិច្ឆេទនៃការចុះចតលើឋានព្រះចន្ទរបស់យានអវកាស Chandrayaan-3

អង្គការស្រាវជ្រាវអវកាសឥណ្ឌា (ISRO) បានប្រកាសថា ស្ថានីយចុះចតរបស់បេសកកម្ម Chandrayaan-3 នឹងចុះចតលើឋានព្រះចន្ទនៅវេលាម៉ោង 19 និង 34 នាទី ថ្ងៃទី 23 សីហា 2023 (ម៉ោងនៅកម្ពុជា)។

ដំណើរការចុះចតនឹងត្រូវបានផ្សាយផ្ទាល់លើគេហទំព័រផ្លូវការរបស់ ISRO និងលើទូរទស្សន៍ជាតិឥណ្ឌា Doordarshan រួមនឹងបណ្ដាញសង្គម Facebook និង YouTube ជាដើម។ នេះបើតាមអង្គការស្រាវជ្រាវអវកាសឥណ្ឌា ប្រកាសកាលពីថ្ងៃទី 20 សីហា។

«សមិទ្ធផលនេះនឹងជាជំហានសំខាន់មួយសម្រាប់វិទ្យាសាស្ត្រ បច្ចេកទេស និងបច្ចេកវិទ្យារបស់ឥណ្ឌា ដែលជានិមិត្តរូបនៃវឌ្ឍនភាពរបស់ប្រទេសជាតិក្នុងវិស័យស្រាវជ្រាវអវកាស» ISRO លើកឡើងដូច្នេះ។

រ៉ុក្កែត LVM3 នាំស្ថានីយចុះចត Vikram របស់បេសកកម្ម Chandrayaan-3 ហោះឡើងពីមជ្ឈមណ្ឌលអវកាស Satish Dhawan នៅវេលាម៉ោង 16 និង 05 នាទី ថ្ងៃទី 14 កក្កដា 2023 (ពេលវេលានៅកម្ពុជា)។ យាន Chandrayaan-3 បានហោះដល់គន្លងតារាវិថីព្រះចន្ទកាលពីថ្ងៃទី 05 សីហា 2023។

Vikram នាំយករ៉ូបូត Pragyan មួយគ្រឿងទៅតាមខ្លួន។ យានមួយគូដែលដំណើរដោយថាមពលព្រះអាទិត្យនេះនឹងស្រាវជ្រាវអំពីផ្ទៃរបស់ព្រះចន្ទក្នុងរយៈពេលមួយថ្ងៃលើឋាននេះ (ប្រហែលនឹង 14 ថ្ងៃនៅលើផែនដី) មុនពេលរាត្រីព្រះចន្ទមកដល់ ធ្វើឱ្យពួកវាអស់ថាមពល។

ស្ថានីយ Vikram បានទៅដល់គន្លងគោចរដែលមានចម្ងាយពីព្រះចន្ទពី 25 ទៅ 134 គីឡូម៉ែត្រ កាលពីថ្ងៃទី 20 សីហា 2023។ ស្ថានីយនេះនឹងត្រូវឆ្លងកាត់ការត្រួតពិនិត្យដោយស្វ័យប្រវត្ត និងរង់ចាំព្រះអាទិត្យរះនៅតំបន់ក្បែរប៉ូលខាងត្បូងរបស់ព្រះចន្ទដែលត្រូវបានកំណត់ជាទីតាំងចុះចត។ តំបន់ដែលអាចមានទឹកក្នុងទម្រង់កកនេះក៏ជាគោលដៅរបស់យានអវកាសរុស្ស៊ី Luna-25 ផងដែរ ប៉ុន្តែវាបានធ្លាក់ទៅបុកដីព្រះចន្ទ មិនអាចចុះចតនៅថ្ងៃទី 21 សីហា ទៅតាមផែនការ។ Vikram បំពាក់ឧបករណ៍វិទ្យាសាស្ត្រចំនួនបួនគ្រឿងសម្រាប់ការពិសោធវិទ្យាសាស្ត្រ៕

August 21, 2023

មន្ទីរពេទ្យមួយនៅវៀតណាមវះកាត់ខួរក្បាលដោយប្រើរ៉ូបូត AI៖ អ្នកជំងឺច្រៀងក្នុងពេលវះកាត់

អ្នកជំងឺវ័យ 58 ឆ្នាំម្នាក់ត្រូវដាច់សរសៃឈាមខួរក្បាលជាង 24 ម៉ោង និងមានអាការៈភ្លេចភ្លាំងស្មារតី មិនអាចកម្រើកបាន ដូច្នេះ បើសិនវះកាត់តាមធម្មតា នឹងមានហានិភ័យកើតជំងឺស្លាប់អវយវៈណាមួយ ប៉ុន្តែបើវះកាត់យកកំណកឈាមក្នុងខួរក្បាលដោយមិនចាក់ថ្នាំសន្លប់ និងប្រើប្រាស់បច្ចេកវិទ្យារ៉ូបូត AI (បញ្ញាសិប្បនិម្មិត) អ្នកជំងឺអាច «ច្រៀង» ជាមួយក្រុមវេជ្ជបណ្ឌិតបានក្នុងគ្រាកំពុងវះកាត់។

កាលពីថ្ងៃទី 10 សីហា អ្នកជំងឺខាងលើ (នៅក្រុងព្រៃនគរ) ត្រូវបានគ្រួសារនាំមកកាន់មន្ទីរពេទ្យពហុព្យាបាលតាមអាញ់ទីក្រុងហូជីមិញ (Tam Anh Hospital) ក្នុងស្ថានភាពរង្វេងរង្វាន់ ដៃជើងកម្រើនស្ទើរមិនបាន។ លទ្ធផលនៃការថត MRI 3 Tesla បញ្ជាក់ថា អ្នកជំងឺនេះមានដុំឈាមកកក្នុងខួរក្បាលទំហំ 4 សង់ទីម៉ែត្រ។ បើមិនវះកាត់បន្ទាន់ អ្នកជំងឺត្រូវប្រឈមនឹងបញ្ហាស្លាប់មួយចំហៀងខ្លួន ពិបាកក្នុងការនិយាយ ស្រវាំងភ្នែក ឬអាចបាត់បង់ជីវិត។

ក្រុមវេជ្ជបណ្ឌិតបានជ្រើសយកវិធីវះកាត់ខួរក្បាលបែបថ្មី ដែលអនុញ្ញាតឱ្យអ្នកជំងឺនៅដឹងខ្លួន ដោយចាក់តែថ្នាំស្ពឹក និងប្រើប្រាស់រ៉ូបូត AI Modus V Synaptive រួមនឹងប្រព័ន្ធកំណត់ទិស Neuro-Navigation AI ជំនាន់ថ្មីបំផុត។

ការវះកាត់បែបថ្មីនេះនឹងជួយឱ្យអ្នកជំងឺគេចផុតពីគ្រោះថ្នាក់បានលឿន ការវាយតម្លៃលើប្រសិទ្ធភាពនៃការវះកាត់មានភាពរលូន ដោយសារតែអ្នកជំងឺអាចកម្រើក និងឆ្លើយឆ្លងជាមួយក្រុមវេជ្ជបណ្ឌិត។ ក៏ប៉ុន្តែ វិធីវះកាត់ថ្មីនេះមានភាពស្មុគស្មាញច្រើន និងគ្រោះថ្នាក់ជាង ធៀបនឹងការវះកាត់ដោយចាក់ថ្នាំសន្លប់។ ក៏ប៉ុន្តែ បើចាក់ថ្នាំសន្លប់ វេជ្ជបណ្ឌិតនឹងមិនអាចវាយតម្លៃផ្ទាល់ដោយការសួរអ្នកជំងឺក្នុងពេលវះកាត់។

ក្នុងពេលវះកាត់ វេជ្ជបណ្ឌិតវៀតណាម និយាយជាមួយអ្នកជំងឺថា «ខ្ញុំកំពុងយកកំណកឈាមចេញពីខួរក្បាល លោកមានអារម្មណ៍ស្រួលខ្លួនជាងមុនទេ?»។ អ្នកជំងឺឆ្លើយថា «ធូរស្រាលជាងមុនឆ្ងាយណាស់ អរគុណគ្រូពេទ្យ»។

ក្រុមវេជ្ជបណ្ឌិតសួរនាំ និងស្នើឱ្យអ្នកជំងឺលើកដៃជើងជាបន្តបន្ទាប់ ដើម្បីប្រាកដថា សរសៃប្រសាទនានាត្រូវបានការពារក្នុងកម្រិតខ្ពស់បំផុត។

ដោយសារការត្រេកអរខ្លាំងបន្ទាប់ពីកំណកឈាមត្រូវបានយកចេញពីខួរក្បាល និងមានអារម្មណ៍ធូរស្រាល ទាំងវេជ្ជបណ្ឌិត ទាំងអ្នកជំងឺ នាំគ្នាច្រៀងរអ៊ូៗ គ្រាដែលក្រុមជំនួយការបន្តដាក់ភ្ជាប់លលាដ៍ក្បាល និងដេរស្បែកក្បាល។

ក្រោយរយៈពេលជាង 30 នាទីនៃការវះកាត់ ក្រុមវេជ្ជបណ្ឌិតដ៏នាំគ្នាហ៊ោក្នុងភាពត្រេកអរ នៅពេលប្រធានក្រុមវេជ្ជបណ្ឌិតប្រកាសថា «ការវះកាត់បានទទួលជោគជ័យ អបអរសាទរលោកហៃ និងអរគុណគ្រប់គ្នា»។

30 នាទីបន្ទាប់មកទៀត អ្នកជំងឺក៏បានជួបសាច់ញាតិ និងហៅទូរស័ព្ទទៅកាន់អ្នកផ្ទះ។ កន្លះថ្ងៃក្រោយមក លទ្ធផលនៃការថត CT 768 បង្ហាញថា លែងមានកំណកឈាមក្នុងខួរក្បាល ហើយអ្នកជំងឺក៏មានសភាពដូចធម្មតាទាំងស្រុង៕

ប្រព័ន្ធរ៉ូបូត AI Modus V Synaptive ដែលមានតែមួយគត់នៅប្រទេសវៀតណាម

August 15, 2023

អ្នកប្រដាល់រ៉ូបូតដែលធ្វើត្រាប់តាមលឿនជាងគេបំផុតលើពិភពលោក

(ប្រទេសចិន) – រ៉ូបូត Qibbot អាចត្រូវបានបញ្ជាពីចម្ងាយ និងធ្វើត្រាប់តាមយឺតជាងការបញ្ជាត្រឹមតែ 12 មិល្លីវិនាទី ដែលមិនទាន់ស្មើនឹង 1/15 បើធៀបនឹងថេរវេលានៃការធ្មេចភ្នែក។

ក្រុមហ៊ុន Qibo Robot មានទីស្នាក់ការនៅភាគខាងកើតប្រទេសចិន អភិវឌ្ឍរ៉ូបូត Qibbot ដៃមួយ និងអាចបញ្ជាពីចម្ងាយ ដើម្បីបង្ហាញពីការធ្វើត្រាប់កាយវិការរបស់អ្នកប្រដាល់។ អ្នកគ្រប់គ្រង Qibbot អាចឈរក្បែរ និងបញ្ជាទៅលើរ៉ូបូតដោយកាយវិការ។

នៅក្នុងវីដេអូដែល Qibo Robot បានចែករំលែក រ៉ូបូត Qibbot ធ្វើត្រាប់តាមបញ្ជា យឺតជាងតែ 12 មិល្លីវិនាទីដែលមិនទាន់ស្មើនឹង 1/15 ផង បើធៀបនឹងថេរវេលានៃការធ្មេចភ្នែក ដែលនេះគឺជាកំណាត់ត្រាថ្មីមួយសម្រាប់ប្រព័ន្ធរ៉ូបូតបញ្ជាពីចម្ងាយ។ ក្រុមហ៊ុន Qibo Robot អះអាងថា នេះគឺជា telerobot (រ៉ូបូតបញ្ជាពីចម្ងាយ) ដែលធ្វើត្រាប់តាមបានលឿនបំផុតនៅលើពិភពលោក។

អ្នកប្រដាល់យន្ត Qibbot នេះមានកម្ពស់ 1.9 ម៉ែត្រ មានដៃម្ខាងប្រវែង 1.5 ម៉ែត្រ និងមានទម្ងន់សរុប 140 គីឡូក្រាម។

រ៉ូបូតនេះត្រូវបានចាប់ផ្ដើមអភិវឌ្ឍតាំងពីឆ្នាំ 2019 ហើយក្រុមការងារបានចំណាយពេលអស់ 3 ឆ្នាំទើបបង្កើតបានកំណែដំបូង។ ក្រោយមក ពួកគេក៏ចំណាយពេលអស់មួយឆ្នាំទៀតនៅក្នុងការកែលំអ មុនពេលបង្ហាញខ្លួន Qibbot កាលពីខែមិថុនា 2023។

ក្រុមហ៊ុនខាងលើគ្រោងនឹងអភិវឌ្ឍកំណែទីពីររបស់ Qibbot ដែលមានដៃពីរនៅចុងឆ្នាំនេះ។ Qibo Robotអះអាងថា រ៉ូបូតប្រភេទនេះអាចប្រើប្រាស់បាននៅក្នុងករណីបន្ទាន់ និងគ្រោះថ្នាក់ មានជាអាទិ៍ សកម្មភាពប្រឆាំងបទល្មើសឧក្រិដ្ឋ សកម្មភាពយោធា ឬលើកកម្ពស់ការផលិតក្នុងរោងចក្រជាដើម៕

August 4, 2023

រោងចក្រដំបូងគេបង្អស់នៅក្នុងទីអវកាស ចាប់ផ្ដើមដំណើរការ

(សហរដ្ឋអាម៉េរិក) – ក្រុមហ៊ុន Varda Space Industries នឹងផលិតឱសថ រួមនឹងវត្ថុធាតុផ្សេងៗទៀតនៅលើគន្លងតារាវិថីផែនដី តាមរយៈកាប៊ីនដែលហោះអមនឹងផ្កាយរណប។

ក្រុមហ៊ុន Varda Space Industries នៅរដ្ឋ California ប្រកាសថា បានទទួលជោគជ័យក្នុងការបាញ់បង្ហោះ W-Seres 1 ដែលជាផ្កាយរណបដំបូងរបស់ខ្លួន ឡើងទៅកាន់គន្លងគោចរផែនដី។ ក្រុមហ៊ុននេះកំពុងឆ្ពោះទៅរកការផលិតវត្ថុធាតុជាច្រើននៅក្នុងទីអវកាស។ វត្ថុធាតុទាំងនេះមិនអាចបង្កើតឡើងនៅលើផែនដី ឬអភិវឌ្ឍឆាប់រហ័សជាមួយនឹងគុណភាពខ្ពស់ជាង ធៀបនឹងនៅក្នុងស្ថានភាពគ្មានទំនាញផែនដី។

ផ្ទាំងសូឡារបស់រោងចក្រដំបូងក្នុងអវកាសនេះ បានបែរទៅរកព្រះអាទិត្យ និងចាប់ផ្ដើមពន្លាតខ្លួន។ នេះបើតាមការឱ្យដឹងរបស់ Varda បន្ទាប់ពីផ្កាយរណបបានហោះចូលដល់គន្លងគោចរ នៅក្នុងបេសកកម្ម Transporter-8 របស់ SpaceX កាលពីថ្ងៃទី 13 មិថុនា 2023។

ផ្កាយរណប W-Series 1 ត្រូវបានបំពាក់កាប៊ីនទម្ងន់ 90 គីឡូក្រាម ដែលត្រូវបានរចនាឡើងដើម្បីស្រាវជ្រាវឱសថ។ កាប៊ីននេះនឹងផ្ដាច់ខ្លួន មុនពេលចាប់ផ្ដើមហោះហើរក្នុងអវកាស ប៉ុន្តែនៅតែភ្ជាប់ជាមួយនឹងបណ្ដាញថាមពល កម្លាំងរុញច្រាន និងទំនាក់ទំនងចាំបាច់ដើម្បីកំណត់ទិស។ ក្នុងភារកិច្ចដំបូង បណ្ដាញខាងលើត្រូវបានផ្គត់ផ្គង់ដោយក្រុមហ៊ុន Rocket Lab។ បន្ទាប់មក ការពិសោធនឹងត្រូវបានធ្វើឡើងដោយរ៉ូបូតក្នុងកាប៊ីន។

សកម្មភាពរបស់ Varda គឺយោងទៅតាមការសិក្សាស្រាវជ្រាវផ្នែកវិទ្យាសាស្ត្រដែលបញ្ជាក់ថា ប្រូតេអ៊ីនក្នុងអវកាសអាចកកើតរចនាសម្ព័ន្ធល្អជាងធៀបនឹងនៅលើផែនដី ដោយសារតែបរិស្ថានមាន និងគ្មានទំនាញផែនដី។

បេសកកម្មដំបូងរបស់ Varda នឹងផ្ដោតទៅលើការអភិវឌ្ឍ ritonavir ក្នុងអវកាស។ Ritonavir គឺជាថ្នាំដែលតែងត្រូវបានប្រើប្រាស់សម្រាប់ប្រឆាំងនឹង HIV ដែលជាវីរុសបង្កឱ្យមានជំងឺអេដស៍ ប៉ុន្តែប៉ុន្មានឆ្នាំចុងក្រោយនេះ វាក៏ត្រូវបានប្រើប្រាស់ដើម្បីព្យាបាលជំងឺកូវីដ-19។

ក្រោយពីការពិសោធរបស់ Varda បានបញ្ចប់ កាប៊ីននេះនឹងត្រូវបានផ្កាយរណបរុញទម្លាក់មកកាន់ផែនដី និងចុះចតដោយប្រើប្រាស់ឆត្រយោង មុនពេលអ្នកវិទ្យាសាស្ត្រប្រមូលយកវត្ថុធាតុឱសថ។

ក្រុមហ៊ុន Varda ត្រូវបានបង្កើតឡើងដោយអតីតវិស្វករអេឡិចត្រូនិចអាកាសចរណ៍របស់ SpaceX លោក Will Bruye និង Delian Asparouhov។ គោលដៅរបស់ពួកគេគឺបង្កើតផលិតផលនានានៅក្នុងអវកាស ដែលរោងចក្រនៅលើផែនដីមិនអាច ឬពិបាកធ្វើបានល្អ៕

June 15, 2023

ភាពយន្តរឿង «Transformers 7» ពោរពេញដោយបច្ចេកទេសកុំព្យូទ័រ

ដោយប្រើប្រាស់ខ្ទង់វិនិយោគ 200 លានដុល្លារអាម៉េរិក ភាពយន្ត Transformers វគ្គ 7 មិនទាន់ជាគម្រោងដែលត្រូវចំណាយច្រើនបំផុតរបស់យីហោ Transformers នៅឡើយ ប៉ុន្តែ វាទទួលបានចំណាប់អារម្មណ៍ខ្លាំងដោយសារតែផ្នែករូបភាពត្រូវបានវិនិយោគច្រើន។

ធៀបនឹងវគ្គមុនៗ Transformers 7 (Transformers: Rise of the Beasts) មានប្រព័ន្ធតួអង្កសម្បូរបែប។ Transformers 7 បង្ហាញតួអង្គថ្មីជាច្រើន ដែលទាក់ទាញចំណាប់អារម្មណ៍របស់ទស្សនិកជនដែលស្មោះស្ម័គ្រ។ ក្នុងនោះ លេចធ្លោជាងគេគឺក្រុម Maximals ជាសម្ព័ន្ធមិត្តថ្មីរបស់ក្រុម Autobots ដែលមានក្រុមរ៉ូបូតអាចប្រែកាយជាសត្វសាហាវ។

ផលិតករបញ្ចេញតួអង្គថ្មីជាបន្តបន្ទាប់ ចាប់ពីស្វា Optimus Primal, សត្វឥន្ទ្រី Airazor, ខ្លា Cheetor និងរមាស Rhinox។ តួអង្គនីមួយៗសុទ្ធតែបង្ហាញខ្លួនក្នុងរូបរាងដ៏គួរឱ្យចាប់អារម្មណ៍តាំងពីដំបូង។

បច្ចេកទេសកុំព្យូទ័រដើរតួនាទីសំខាន់នៅក្នុងការបង្កើតតួអង្គរ៉ូបូតខ្នាតយក្ស។ គ្រប់តួអង្គរ៉ូបូតសុទ្ធតែមានភាពរស់រវើកដូចពិតៗ អមនឹងទិដ្ឋភាពប្រែកាយដ៏អស្ចារ្យ។

អ្នកដឹកនាំរឿង Steven Caple Jr. ក៏ដឹកនាំបានល្អនៅក្នុងទិដ្ឋភាពសកម្មនានា នាំមកនូវសកម្មភាពដេញតាម និងប្រយុទ្ធគ្នាដ៏គួរឱ្យជក់ចិត្ត។ កាន់តែជិតដល់ទីបញ្ចប់ ទិដ្ឋភាពផ្ទុះឆេះ វាយប្រហារក៏កាន់តែមានទ្រង់ទ្រាយធំឡើងៗ។

យោងតាមទិន្នន័យពី Comscore ដែលបានប្រកាសកាលពីថ្ងៃទី 11 មិថុនា “Transformers: Rise of the Beasts” រកប្រាក់ចំណូលបាន 170.5 លានដុល្លារក្នុងបីថ្ងៃនៅចុងសប្ដាហ៍ដំបូង ហើយគ្រោងនឹងរកបានច្រើនជាងនេះនាពេលខាងមុខ៕

June 14, 2023

លោក Elon Musk ថា «មនុស្សបានក្លាយជា Cyborg» រួចទៅហើយ!

មហាសេដ្ឋីអាម៉េរិក លោក Elon Musk យល់ថា មនុស្សកំពុងតែរស់នៅតាមបែប Cyborg (ពាក់កណ្ដាលមនុស្ស ពាក់កណ្ដាលម៉ាស៊ីន) ព្រោះប្រើប្រាស់ម៉ាស៊ីនសម្រាប់ការចងចាំព័ត៌មាន។

កាលពីថ្ងៃទី 06 មិថុនា Marc Andreessen ដែលជាអ្នកវិនិយោគម្នាក់នៅជ្រលងភ្នំ Silicon បានបង្ហោះអត្ថបទមួយនិយាយពី AI (បញ្ញាសិប្បនិម្មិត) នៅលើប្លក់ផ្ទាល់ខ្លួនដែលពិភាក្សាគ្នាអំពីថា តើមនុស្សប្រើប្រាស់ AI នៅក្នុងជីវភាពប្រចាំថ្ងៃដល់កម្រិតណា។ លោក Marc ក៏ច្រានចោលគំនិតដែលលើកឡើងអំពីការព្រួយបារម្ភចំពោះ AI។ អ្នកវិនិយោគនេះជឿថា បច្ចេកវិទ្យានេះកំពុងជួយឱ្យគ្រប់យ៉ាងប្រសើរឡើង។

កាលពីថ្ងៃទី 12 មិថុនា មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk ក៏បានឆ្លើយតបនឹងអត្ថបទខាងលើ ដោយនិយាយថា «ពេលនេះ យើងគ្រប់គ្នាបានក្លាយជា Cyborg រួចទៅហើយ។ ការចងចាំរបស់យើងត្រូវបានប្រគល់ឱ្យកុំព្យូទ័រ។ ពួកវាចងចាំគ្រប់យ៉ាងបានល្អក្នុងកម្រិតខ្ពសខ្លាំង»។ Cyborg គឺជាពាក្យប្រើសម្រាប់ហៅសត្វមួយប្រភេទដែលពាក់កណ្ដាលជាមនុស្ស និងពាក់កណ្ដាលជាម៉ាស៊ីន។

យោងតាមលោក Musk បញ្ញាសិប្បនិម្មិតនៅតែអាចបង្កហានិភ័យដ៏គ្រោះថ្នាក់សម្រាប់មនុស្ស។ លើបណ្ដាញសង្គម កាលពីថ្ងៃទី 13 មិថុនា លោក Musk សរសេរថា «តើមនុស្សជាតិនៅសល់ប៉ុន្មានឆ្នាំទៀត មុននឹងត្រូវ AI សម្លាប់?»។

កាលពីចុងខែមីនា 2023 លោក Musk រួមនឹងបុគ្គលល្បីឈ្មោះក្នុងវិស័យបច្ចេកវិទ្យា ជាង 1,000 នាក់ បានចុះហត្ថលេខាលើលិខិតមួយដែលអំពាវនាវសូមឱ្យបណ្ដាក្រុមហ៊ុន ស្ថាប័នទូទាំងសកលលោក ផ្អាកសកម្មភាពរត់ប្រណាំងផ្នែក AI ក្នុងរយៈពេល 6 ខែដើម្បីរួមគ្នាបង្កើតគោលការណ៍រួមស្ដីពីបច្ចេកវិទ្យាបញ្ញាសិប្បនិម្មិត។

ក៏ប៉ុន្តែ សារព័ត៌មាន Business Insider បានផ្សាយថា លោក Musk ក៏បានទិញ GPU 10,000 គ្រឿង ដើម្បីត្រៀមសម្រាប់ការបណ្ដុះបណ្ដាល AI នៅលើ Twitter។ ទន្ទឹមនឹងនេះ ក្រុមហ៊ុន Tesla ដែលលោក Musk ធ្វើជា CEO ក៏កំពុងអភិវឌ្ឍរ៉ូបូតរាងមនុស្សមួយប្រភេទដែលមានឈ្មោះថា Optimus ដោយរំពឹងថានឹងអាចប្រើប្រាស់ជាក់ស្ដែងបាននៅក្នុងវិស័យ AI។ លោក Musk ក៏បានព្យាករដែរថា ចុងក្រោយ រ៉ូបូតនឹងមានចំនួនច្រើនជាងមនុស្សលោក៕

June 14, 2023

ស្បែករ៉ូបូតអាច «ជាសះស្បើយ» ដោយស្វ័យប្រវត្តក្នុងរង្វង់ 24 ម៉ោង

(សហរដ្ឋអាម៉េរិក) – ស្បែកអេឡិចត្រូនិចសម្រាប់រ៉ូបូតដែលអភិវឌ្ឍដោយក្រុមអ្នកជំនាញនៅសាកលវិទ្យាល័យ Stanford អាច «ជាសះស្បើយ» ដោយឯកឯងក្នុងរង្វង់ 24 ម៉ោង នៅពេលកម្ដៅក្នុងសីតុណ្ហភាព 70 អង្សាសេ។

ក្រុមអ្នកវិទ្យាសាស្ត្រនៅសាកលវិទ្យាល័យ Stanford អភិវឌ្ឍស្បែកអេឡិចត្រូនិចមួយប្រភេទដែលមានច្រើនស្រទាប់ អាចដឹង និងកែតម្រូវឡើងវិញបន្ទាប់ពីបានរងរបួស អនុញ្ញាតឱ្យស្បែកធ្វើសកម្មភាពបន្តក្នុងពេលព្យាបាល និងជាសះស្បើយដោយស្វ័យប្រវត្ត។ នេះបើតាម New Atlas ចុះផ្សាយកាលពីថ្ងៃទី 04 មិថុនា។ ស្បែកនេះត្រូវបានយកតម្រាប់តាមស្បែកពិតរបស់មនុស្ស។

វត្ថុធាតុថ្មីនេះអាចទទួលដឹងអំពីការប្រែប្រួលសីតុណ្ហភាព សាច់ដុំ ឬអគ្គិសនីនៅជុំវិញ និងដឹងអំពីសម្ពោធផងដែរ។ «ស្បែកអេឡិចត្រូនិចនេះមានសភាពទន់ និងតឹងណែន មិនយារ។ ប៉ុន្តែ បើសិនអ្នកចាក់ទម្លុះ កាត់ ឬអារវា នោះស្រទាប់នីមួយៗរបស់វានឹងជាសះស្បើយដោយឯកឯងប្រកបដោយការជ្រើសរើសកម្រិតខ្ពស់នៅក្នុងការជួសជុលមុខងារទាំងមូលរបស់វា។ ប្រការនេះដូចទៅនឹងស្បែកពិត» Sam Root សហការីក្នុងគម្រោងស្រាវជ្រាវនេះ អះអាងដូច្នេះ។

ស្បែកសិប្បនិម្មិតនេះអាចជាសះស្បើយក្នុងរង្វង់ 24 ម៉ោង នៅពេលត្រូវបានកម្ដៅដល់ 70 អង្សាសេ ឬក្នុងរង្វង់មួយសប្ដាហ៍នៅក្នុងសីតុណ្ហភាពក្នុងបន្ទប់ធម្មតា។ ក្រុមអ្នកវិទ្យាសាស្ត្រនេះជឿថា ស្បែកសិប្បនិម្មិតនេះនឹងមានសភាពដូចស្បែករបស់មនុស្សពិតៗនៅពេលពួកគេបន្តការអភិវឌ្ឍ៕

June 5, 2023

(វីដេអូ)-រ៉ូបូតជើង ៦ ខ្នាតយក្ស កើតឡើងពីការបំផុសគំនិតដោយខ្សែភាពយន្តវិទ្យាសាស្ត្រប្រឌិត

វិស្វករអង់គ្លេស បានច្នៃរ៉ូបូតកម្ពស់ ២.៨ ម៉ែត្រ និងទម្ងន់ ២.២ តោន អាចធ្វើដំណើរនៅលើសណ្ឋានដីលំបាកៗក្នុងល្បឿន ១ គីឡូម៉ែត្រ/ម៉ោង។

រ៉ូបូតខ្នាតយក្សនេះត្រូវបានបង្កើតឡើងដោយយោងទៅតាមចំណាប់អារម្មណ៍ពីខ្សែភាពយន្តវិទ្យាសាស្ត្រប្រឌិត។ រ៉ូបូតដែលមានឈ្មោះថា Mantis នេះ មានជើងចំនួន ៦ និងកំពុងកាន់កាប់អត្តទគ្គកម្មពិភពលោក Guinness ស្ដីអំពីរ៉ូបូតជើង ៦ ធំបំផុត ដែលអាចបញ្ជាបាន។

Mantis មានកម្ពស់ ២.៨ ម៉ែត្រ និងទម្ងន់ ២.២ តោន។ វាត្រូវបានបង្កើតឡើងដើម្បីអាចដើរនៅលើភូមិសាស្ត្រលំបាក។ តើវាបោះជំហានដោយរបៀបណា?

Mantis ដំណើរការដោយម៉ាស៊ីនម៉ាស៊ូត ២.២ លីត្រ និងដើរក្នុងល្បឿនលឿនបំផុតគឺ ១ គីឡូម៉ែត្រ/ម៉ោង។ វាមានដងបញ្ជាចំនួន ២ ដែលមានគ្រាប់ចុចចំនួន ២៨ គ្រាប់ និងអាចត្រូវបានបញ្ជាពីចម្ងាយតាមរយៈប្រព័ន្ធ Wi-Fi ឬបញ្ជាពីខាងក្នុងបន្ទប់បញ្ជាក្នុងរ៉ូបូតនេះ។

រ៉ូបូត Mantis ត្រូវបានច្នៃដោយវិស្វករ Matt Denton នៅ Hampshire ប្រទេសអង់គ្លេស។ Denton ធ្លាប់ច្នៃរ៉ូបូតដូចគ្នានេះ ប៉ុន្តែជាកំណែខ្នាតតូច នៅឯផ្ទះរបស់គាត់។

លោក Denton បានចំណាយពេលអស់ ៣ ឆ្នាំ ដើម្បីបង្កើត Mantis។ រ៉ូបូតនេះមិនមែនត្រូវបានបង្កើតឡើងសម្រាប់លក់នោះទេ ប៉ុន្តែ ដំណើរការរបស់រ៉ូបូតនេះពិតជាគួរឱ្យចាប់អារម្មណ៍៕

February 7, 2022

(វីដេអូ)-រ៉ូបូតមានជីវិត «xenobot» ដែលបង្កើតឡើងអំពីកោសិកាកង្កែប បានចាប់ផ្ដើមរស់ និងបង្កើតកូនចៅដោយខ្លួនឯង

ក្រុមអ្នកវិទ្យាសាស្ត្រមកពីបណ្ដាប្រទេសបានរកឃើញសមត្ថភាពនៃការរស់រានរបស់ រ៉ូបូតមានជីវិត ដែលត្រូវបានគេបង្កើតឡើងពីកោសិកាដើមរបស់សត្វកង្កែប។

ក្រុមអ្នកវិទ្យាសាស្ត្រអាម៉េរិក ទើបតែបានបង្កើតប្រព័ន្ធរ៉ូបូតមានជីវិតដំបូង និងបានដាក់ឈ្មោះឱ្យវាថា xenobot។ ពួកគេនិយាយថា ទម្រង់នៃជីវិតថ្មីអាចរស់រានមានជីវិតទៅតាមវិធីដែលមិនមាននៅក្នុងធម្មជាតិ ទាំងនៅលើសត្វលោក ទាំងនៅលើរុក្ខជាតិ។

ដោយត្រូវបានបង្កើតឡើងពីកោសិកាដើមរបស់កង្កែបអាហ្វ្រិក (Xenopus laevis) ប្រវែងទទឹងនៃដងខ្លួនរបស់ រ៉ូបូត xenobot នេះ មិនដល់ ១ មិល្លីម៉ែត្រនោះទេ។ ព័ត៌មានអំពីរ៉ូបូតមានជីវិតទាំងនេះត្រូវបានប្រកាសលើកដំបូងកាលពីឆ្នាំ ២០២០ បន្ទាប់ពីមានការពិសោធមួយអំពីសមត្ថភាពនៃការផ្លាស់ទីដោយខ្លួនឯង ការសហការគ្នាជាមួយនឹងរ៉ូបូតមានជីវិតដទៃ និងការជាសះស្បើយដោយឯកឯង។

ក្នុងរបាយការណ៍នៃការស្រាវជ្រាវថ្មី ក្រុមអ្នកវិទ្យាសាស្ត្រនៅសាកលវិទ្យាល័យ Vermont, សាកលវិទ្យាល័យ Tufts និង វិទ្យាស្ថានស្រាវជ្រាវនៃសាកលវិទ្យាល័យ Harvard ឱ្យដឹងថា ពួកគេបានរកឃើញរបៀបនៃការបង្កើតកូនចៅបែបជីវសាស្ត្រដែលមិនទាន់កើតមាននៅលើទម្រង់ជីវិតណាមួយដែលក្រុមអ្នកវិទ្យាសាស្ត្រធ្លាប់បានដឹង។ អ្នកវិទ្យាសាស្ត្រមានការភ្ញាក់ផ្អើលជាខ្លាំងចំពោះទម្រង់ជីវិតបែបនេះ។

«កង្កែបមានរបៀបបន្តពូជដោយឡែក ប៉ុន្តែនៅពេលអ្នក…បំបែកកោសិកាចេញពី អំប្រ៊ីយ៉ុង (Embryo) និងបង្កើតឱកាសឱ្យពួកវាស្វែងរកវិធីរស់ក្នុងបរិស្ថានថ្មី។ ពួកវាមិនត្រឹមតែរកឃើញវិធីផ្លាស់ទីនោះទេ តែក៏ទំនងជាបានរកឃើញវិធីថ្មីក្នុងការបន្តពូជទៀតផង»។

ជារ៉ូបូត ឬជាទម្រង់នៃជីវិត?

កោសិកាដើម (stem cell) គឺជាកោសិកាដែលមិនមានមុខងារជាក់លាក់ មានសមត្ថភាពរីកចម្រើនទៅជាទម្រង់កោសិកាផ្សេង។ ដើម្បីបង្កើតរ៉ូបូតមានជីវិត xenobot ក្រុមអ្នកវិទ្យាសាស្ត្របានកោសកោសិការស់ពី អំព្រីយ៉ុង របស់សត្វកង្កែប ហើយទុកឱ្យពួកវារីកចម្រើនដោយខ្លួនឯង។

Josh Bongard សាស្ត្រាចារ្យផ្នែកវិទ្យាសាស្ត្រកុំព្យូទ័រ និងជាអ្នកឯកទេសខាងរ៉ូបូតប្រចាំសាកលវិទ្យាល័យ Vermont អះអាងថា៖ «មនុស្សភាគច្រើនយល់ថា រ៉ូបូត ត្រូវបានបង្កើតឡើងពីលោហធាតុ និងសេរ៉ាមិច ប៉ុន្តែ និយមន័យនៃ រ៉ូបូត ដែលយោងទៅតាមសកម្មភាពរបស់វា នោះគឺ ការធ្វើការជំនួសមនុស្ស»។

លោកបន្តថា៖ «យល់ទៅតាមរបៀបនេះ រ៉ូបូតមានជីវិត (xenobot) គឺជា រ៉ូបូត ផង និងជាទម្រង់នៃជីវិតមួយផងដែរ ដែលបង្កើតឡើងពីកោសិកាកង្កែបដែលមិនមានការកែប្រែហ្សែន។

យោងតាមលោក Bongard ក្រុមអ្នកវិទ្យាសាស្ត្របានរកឃើញសមត្ថភាពនៃការបង្កើតកូនចៅរបស់ រ៉ូបូត xenobot ដែលជាសត្វមានជីវិតត្រូវបានបង្កើតឡើងពីកោសិកាចំនួន ៣,០០០ របស់សត្វកង្កែប។ ក៏ប៉ុន្តែ ដំណាក់កាលនៃការកកើតកូនចៅរបស់ពួកវា កើតឡើងតែក្នុងរយៈពេលមួយមានកំណត់។

បច្ចេកវិទ្យារ៉ូបូត xenobot នេះ កំពុងស្ថិតនៅក្នុងដំណាក់កាលក្មេងខ្ចីនៅឡើយ ដែលវាអាចប្រៀបបានទៅនឹងកុំព្យូទ័រមួយគ្រឿងកាលពីជំនាន់ឆ្នាំ ១៩៤០៕

December 2, 2021

“សុនកដែកឃ្វាលចៀមជំនួសសុនកសាច់” ជាគន្លឹះជោគជ័យក្នុងវិស័យកសិកម្ម(វីដេអូ)

ពីមួយថ្ងៃទៅមួយថ្ងៃ គេឃើញមានរ៉ូបូតជាច្រើនប្រភេទត្រូវបានគេប្រើប្រាស់នៅក្នុងអាជីវកម្ម ក៏ដូចជានៅក្នុងជីវភាពប្រចាំថ្ងៃ ដូច្នេះយុគសម័យនៃរ៉ូបូតដំណើរការដោយស្វ័យប្រវត្តជិតមកដល់មែនទែនហើយ។

ពួកវាបានបង្ហាញវត្តមានកាន់តែច្រើននៅលើវាលដំណាំ ចំការឈើហូបផ្លែ។ល។ រ៉ូបូតស្វ័យប្រវត្តទាំងនេះ មិនត្រឹមតែជាម៉ាស៊ីនជំនួយ ឬម៉ាស៊ីនប្រមូលផលដ៏អស្ចារ្យនោះទេ ប៉ុន្តែពួកវាគឺជាសុនកយន្ត និងយន្តហោះគ្មានមនុស្សបើកជាដើមដែលមានប្រភេទខ្លះមានរូបរាងតូចច្រឡឹង អាចដើរ រត់ ហក់លោតបានដោយស្វ័យប្រវត្ត ក្នុងនោះក៏មានសុនកយន្ត Boston Dynamics ជាឧទាហរណ៍។

ពួកវាត្រូវបានបំពាក់កម្មវិធីគ្រប់ប្រភេទ ចាប់ពីកាមេរ៉ា កាំរស្មីអ៊ីនហ្វ្រារ៉េដ បច្ចេកវិទ្យាស្កេនរូបភាព3D រហូតដល់ថ្នាក់មានសមត្ថភាពបង្កើតផែនទីទៅតាមពេលវេលាជាក់ស្ដែងទៀតផង។

បណ្ដារ៉ូបូត ដូចជា Dynamics នេះ កាន់តែមានភាពឆ្លាតវៃ និងរហ័យរហួនជាងមុន និងអាចដើរនៅលើផ្ទៃដែលមានឧបសគ្គច្រើន ព្រមទាំងអាចធ្វើការម្នាក់ឯងបានល្អនៅក្នុងកសិដ្ឋាននានា។

ពួកវាអាចធ្វើការជំនួសសុនកដែលមានជំនាញខាងឃ្វាលចៀម ដោយមិនបាច់មានការឃ្លាំមើលច្រើនពីមនុស្ស។ សុនកយន្តអាចដេញហ្វូងចៀមទៅកាន់ទីតាំងដែលត្រូវបានកំណត់នៅក្នុងកម្មវិធីកុំព្យូទ័រ ព្រមទាំងអាចគ្រប់គ្រងតួលេខចៀមក្នុងហ្វូន និងបញ្ជូនព័ត៌មានជាបន្តបន្ទាប់ទៅកាន់ម៉ាស៊ីនផ្ទុកទិន្នន័យគ្រប់ពេល និងគ្រប់ទីកន្លែង។

នេះគឺជាគន្លឹះជោគជ័យមួយរបស់វិស័យកសិកម្ម។ នៅក្នុងអនាគត រដូវកាល ផលិតភាព ឬទិន្នផលនឹងត្រូវព្យាករបានយ៉ាងសុក្រឹត ហើយបញ្ហានៃការប្រើប្រាស់កម្លាំងមនុស្សក៏នឹងត្រូវបានដោះស្រាយ។

ស្វ័យប្រវត្តភាពកំពុងតែប្ដូរផ្លាស់វិធីដែលកសិករកំពុងធ្វើនាបច្ចុប្បន្ន។ រ៉ូបូតនេះនឹងជួយបង្កើនទិន្នផលកសិកម្ម ក៏ដូចជាផលិតភាពនៃកម្លាំងពលកម្ម។ល។

ប្រភព៖ សារព័ត៌មានបរទស

May 24, 2020

Tag: រ៉ូបូត