រលាកសួត - La Reine Media

នាឡិកាឆ្លាតវៃគ្រោះថ្នាក់ដល់សុខភាពជាងស្មាតហ្វូនទៅទៀត

នាឡិកាឆ្លាតវៃគឺជាឧបករណ៍មានប្រយោជន៍សម្រាប់សកម្មភាពប្រចាំថ្ងៃ ប៉ុន្តែគ្រប់គ្នាដែលពាក់វាជាប់នឹងដៃរាល់ថ្ងៃប្រហែលមិនបានដឹងទេថា ឧបករណ៍នេះមានផ្ទុកការពិតមួយដ៏គួរឱ្យខ្លាច។

នៅពេលទូរស័ព្ទឆ្លាតវៃបានក្លាយជារបស់ពេញនិយមក្នុងទសវត្សរ៍កន្លង ការសិក្សាស្រាវជ្រាវជាច្រើនបានបញ្ជាក់ថា របស់ដែលយើងចូលចិត្តកាន់រាល់ថ្ងៃនេះគឺមិនស្អាតសោះឡើយ។ ការសិក្សាស្រាវជ្រាវរបស់សាកលវិទ្យាល័យ Arizona បង្ហាញថា ស្មាតហ្វូនអាចកខ្វក់ជាងដបដងបើធៀបនឹងបង្គន់។

ក៏ប៉ុន្តែច្រើនឆ្នាំក្រោយមក មានឧបករណ៍ឆ្លាតវៃមួយទៀតដែលអ្នកស្រាវជ្រាវបានរកឃើញថា កខ្វក់ជាងទូរស័ព្ទឆ្លាតវៃទៅទៀត នោះគឺនាឡិកាឆ្លាតវៃ និងខ្សែដៃឆ្លាតវៃសម្រាប់ការហាត់ប្រាណ។

ក្រុមអ្នកសិក្សាស្រាវជ្រាវមកពីមហាវិទ្យាល័យវិទ្យាសាស្ត្រ Charles E. Schmidt នៃសាកលវិទ្យាល័យ Florida Atlantic បានសិក្សាស្វែងយល់ទៅលើខ្សែពាក់ដៃច្រើនប្រភេទ ហើយបានរកឃើញថា ជិត 95% ក្នុងចំណោមឧបករណ៍ទាំងនេះមានមេរោគច្រើនប្រភេទ។

ក្នុងចំណោមនោះ វត្ថុពាក់ជាប់នឹងដៃដែលផលិតពីជ័រកៅស៊ូត្រូវបានរកឃើញថា មានបរិមាណបាក់តេរីខ្ពស់ជាងគេបំផុត ស្របពេលដែលខ្សែពាក់ដៃដែលធ្វើពីលោហធាតុដូចជាមាស និងប្រាក់ជាដើម មានមេរោគតិចជាងគេបំផុត។

លទ្ធផលនៃការស្រាវជ្រាវដែលត្រូវបានចុះផ្សាយលើទស្សនាវដ្ដី Advances in Infectious Diseases ក៏បានបញ្ជាក់ថា បរិមាណតិច ឬច្រើននៃមេរោគដែលជាប់លើឧបករណ៍ទាំងឡាយខាងលើ គឺអាស្រ័យលើភេទ និងមុខរបររបស់អ្នកប្រើប្រាស់។ ក៏ប៉ុន្តែ ប្រការសំខាន់ជាងនេះគឺប្រភេទខ្សែរបស់ឧបករណ៍ដែលត្រូវបានប្រើប្រាស់ មានដូចជាខ្សែធ្វើពីជ័រកៅស៊ូ ស្បែក មាស និងប្រាក់ជាដើម។

ក្រុមស្រាវជ្រាវរកឃើញថា Staphylococci, Pseudomonas និង Enterobacteriaceae គឺជាមេរោគដែលមានច្រើនបំផុតលើខ្សែពាក់លើដៃ។ Staphylococci បង្កឱ្យមានជំងឺលើស្បែក រលាកសួត រលាកបេះដូង រលាកខួរឆ្អឹង នៅពេលវាចូលដល់ក្នុងឈាម។ Pseudomonas ក៏អាចធ្វើឱ្យរលាកសួត ឬអវយវៈដទៃបន្ទាប់ពីការវះកាត់។ ចំណែកបាក់តេរី Enterobacteriaceae វិញ អាចបង្កឱ្យមានជំងឺរាករូស៕

August 30, 2023

របស់មិនល្អ ពេលមានផ្ទៃពោះរបស់ស្រ្តី

ស្រ្តីមានផ្ទៃពោះត្រូវតែប្រយ័ត្នឱ្យបានច្រើនលើគ្រប់ៗរឿង ជាពិសេសក្នុងត្រីមាសដំបូង(1-3 ខែដំបូង) រឹតតែត្រូវប្រយ័ត្នខ្លាំងជាងអំឡុងពេលណាទាំងអស់ ព្រោះជារយៈពេលដែលអាចនឹងកើតការរលូតបានយ៉ាងងាយ។ ជាអំឡុងពេលដែលកូនកំពុងសាងអវយវៈ និងកំពុងតោងជាប់នឹងជញ្ជាំងស្បូន។ ក្នុងអំឡុងពេលមានគភ៌ ប្រព័ន្ធការពារជំងឺរបស់អ្នកម្តាយនឹងធ្លាក់ចុះទាប ដែលនេះជាការសម្របសម្រួលខ្លួន ដើម្បីបន្ថយការបដិសេធគភ៌ ដែលប្រៀបដូចជារឿងប្លែកចម្លែកមួយដែរ។

ដូច្នេះ យើងនឹងមើលឃើញថា ស្រ្តីមានគភ៌មានឱកាសឆ្លងមេរោគបានយ៉ាងងាយជាងមនុស្សធម្មតាទូទៅ និងនៅពេលឆ្លងមេរោគហើយ ក៏នឹងកើតមានសភាវជ្រៀតជ្រែកពីជំងឺផ្សេងៗកាន់តែងាយឡើង ដូចជា បើឆ្លងមេរោគគ្រុនផ្តាសាយធំ ឱកាសក្នុងការកើតសភាវរលាកសួតមានខ្ពស់ជាងមនុស្សប្រក្រតីទូទៅ។ ប្រព័ន្ធរំលាយអាហារ ក៏ដូចគ្នាដែរ បើបានទទួលអាហារដែលមិនស្អាត ស្ទើរឆៅ ស្ទើរឆ្អិននោះ ក៏នឹងធ្វើឱ្យងាយមានការឆ្លងមេរោគក្នុងប្រព័ន្ធរំលាយអាហារ ដែលជាមូលហេតុធ្វើឱ្យស្រ្តីមានគភ៌មានអាការរាករូស ក្អួតចង្អោរ ឈឺពោះ និងត្រូវមកគេងសម្រាកព្យាបាលនៅក្នុងមន្ទីរពេទ្យ ដើម្បីបញ្ចូលសេរ៉ូមជំនួសជាតិទឹកដែលបានបាត់បង់ចេញពីរាងកាយដោយសារការក្អួត ឬបន្ទោបង់រាកជាទឹកច្រើនៗដង និងញ៉ាំថ្នាំសម្លាប់មេរោគ។ ដូច្នេះស្រ្តីមានគភ៌គួរតែផ្តល់ភាពសំខាន់ និងផ្ចិតផ្ចង់រឿងអាហារការហូបចុកឱ្យបានដិតដល់ជាពិសេស ដោយសារតែ បើសិនជាមានអាការធ្ងន់ធ្ងរខ្លាំងរហូតដល់រាងកាយទប់ទល់នឹងការឆ្លងមេរោគលែងរួច (ដូចជា ធ្ងន់ធ្ងររហូតទទួលទានអាហារ និងទឹកមិនបាន រហូតធ្វើឱ្យតុល្យភាពទឹក និងសារធាតុរ៉ែក្នុងរាងកាយខុសប្រក្រតី)នោះ រាងកាយអាចនឹងកាត់បន្ថយបន្ទុកការធ្វើការងារ ដោយការទម្លាក់កូនចេញ ដែលធ្វើឱ្យកើតមានការរលូតតាមមកហ្នឹងឯង។

ដូច្នេះហើយទើបអ្នកម្តាយដែលកំពុងមានគភ៌ គួរចៀសវាងអាហារទាំងនេះ ទោះជាក្នុងអំឡុងពេលមុនមានផ្ទៃពោះអាចទទួលទានបានក៏ដោយ ព្រោះសភាពរាងកាយស្ថិតក្នុងអំឡុងពេលដែលខុសប្លែកពីគ្នា។ គួរចៀសវាងអាហារឆៅ ដូចជា សាច់ត្រីឆៅផ្សេងៗ តែបើចង់ទទួលទានខ្លាំងមែនទែននោះ ក៏ត្រូវជ្រើសរើសហាងណាដែលជឿទុកចិត្តបានក្នុងរឿងភាពស្អាត និងអនាម័យ។

ចំណែក ទឹកតែ កាហ្វេ បើឈប់ញ៉ាំក្នុងខណៈពេលតាំងគភ៌បាន គឺជារឿងល្អខ្លាំងណាស់ ព្រោះទោះជាកាហ្វេអ៊ីននៅក្នុងទឹកតែ និងកាហ្វេគ្មានចំណែកធ្វើឱ្យកើតភាពពិការចំពោះកូននៅក្នុងផ្ទៃក៏ដោយ តែវាមានចំណែកជំរុញការធ្វើការងាររបស់បេះដូងស្ត្រីគភ៌ឱ្យធ្វើការកាន់តែខ្លាំងឡើង ព្រោះជាប្រក្រតី បេះដូងរបស់ស្រ្តីនឹងធ្វើការកើនឡើង 10 – 15ភាគរយស្រាប់ហើយក្នុងអំឡុងពេលមានគភ៌។ ការបន្ថែមបរិមាណកាហ្វេអ៊ីនចូលទៅទៀត អាចនឹងធ្វើឱ្យស្ត្រីមានគភ៌មានអារម្មណ៍ញ័រដើមទ្រូង ឆាប់ហត់ និងថាមពលផ្សេងៗដែលគួរបានបញ្ជូនទៅឱ្យកូនក្នុងផ្ទៃ អាចត្រូវបាននាំទៅប្រើក្នុងការធ្វើការងាររបស់ម្តាយវិញ ធ្វើឱ្យកូនក្នុងផ្ទៃបានទទួលសារជាតិអាហារផ្សេងៗថយចុះ ហើយបើស្ថិតក្នុងអាការបែបនេះក្នុងរយៈពេលវែង អាចនឹងហុចផលឱ្យកូនក្នុងគភ៌មានខ្លួនតូច ចម្រើនធំធាត់យឺត និងមានទម្ងន់ខ្លួនតិចនៅពេលកើតដំបូង។

ចំពោះស្រ្តីមានគភ៌ដែលញៀនកាហ្វេខ្លាំង ឬអ្នកខ្លះបើមិនបានញ៉ាំហើយ នឹងមានអាការឈឺក្បាលនោះ សូមណែនាំថា អាចញ៉ាំបានក្នុង 1ថ្ងៃ 1កែវ ដែលនេះជាបរិមាណដែលអាចទទួលយកបាន ឬជ្រើសរើសញ៉ាំកាហ្វេប្រភេទដែលចម្រាញ់យកជាតិកាហ្វេអ៊ីនចេញ គឺជាការល្អបំផុត៕

January 8, 2021

ពលរដ្ឋ2,5លាននាក់នៅកូរ៉េខាងត្បូង បង្ខំចិត្តបង្ខាំងខ្លួនក្នុងផ្ទះ ព្រោះមេរោគកូរ៉ូណា

ចំនួនអ្នកបានឆ្លងវីរុសកូរ៉ូណា COVID-19 បានកើនឡើងខ្លាំង ធ្វើឱ្យប្រជាជននៅក្នុងទីក្រុង Daegu របស់ប្រទេសកូរ៉េខាងត្បូងមានការភ័យខ្លាចចំពោះការចាប់ផ្ដើមរាតត្បាតនៃអាសន្នរោគនេះ។ ពលរដ្ឋប្រមាណជា2,5លាននាក់នៅក្នុងទីក្រុងនេះ ត្រូវបានស្នើឱ្យនៅតែក្នុងផ្ទះ។

ប៉ុន្មានថ្ងៃកន្លងមកនេះ តួលេខនៃករណីឆ្លងមេរោគកូរ៉ូណា នៅកូរ៉េខាងត្បូង បានចាប់ផ្ដើមកើនឡើងយ៉ាងលឿន ក្នុងនោះកាលពីម្សិលមិញ(20កុម្ភៈ) វាបានកើនឡើងទ្វេដង បើធៀបនឹងប៉ុន្មានថ្ងៃមុន ដោយពេលនេះអ្នកផ្ទុកមេរោគដែលត្រូវបានគេរកឃើញ មានចំនួន104ករណី ក្នុងនោះភាគច្រើនគឺនៅក្នុងទីក្រុង Daegu ដែលជាទីក្រុងធំបំផុតទី4របស់កូរ៉េខាងត្បូង ដោយមានប្រជាជនសរុប2,5លាននាក់។ កាលពីម្សិលមិញនេះដែរ ប្រទេសនេះក៏មានអ្នកស្លាប់ដំបូងដោយសារវីរុសកូរ៉ូណា។ ករណីនេះកាន់តែធ្វើឱ្យមានការព្រួយបារម្ភខ្លាំងក្នុងស្រទាប់ប្រជាជន ខណៈដែលនៅទូទាំងពិភពលោក អាសន្នរោគកូរ៉ូណា COVID-19 បានសម្លាប់មនុស្ស 2,247នាក់់់់់ និងបានឆ្លងទៅមនុស្ស76,295នាក់។

អភិបាលក្រុង Daegu លោក Kwon Young-jin បានស្នើពលរដ្ឋទាំងអស់ឱ្យនៅតែក្នុងផ្ទះ បន្ទាប់ពីអ្នកដែលធ្លាប់បានចូលរួមក្នុងពិធីបុណ្យនៅឯវិហារ Shincheonji មានរោគសញ្ញានៃជំងឺរលាកសួតថ្មី COVID-19 ខណៈមនុស្សរាប់សិបនាក់ផ្សេងទៀត ត្រូវបានគេពិនិត្យឃើញថា មានផ្ទុកមេរោគនេះ។

ប៉ុន្មានថ្ងៃមុននេះ ស្ត្រីអាយុ61ឆ្នាំម្នាក់ ដែលត្រូវបានគេរកឃើញថា មានផ្ទុកមេរោគកូរ៉ូណា COVID-19 ធ្លាប់បានចូលរួមក្នុងពិធីបុណ្យនៅឯវិហារ Shincheonji នោះដែរ ហើយត្រូវគេអះអាងថា បានចម្លងទៅមនុស្សយ៉ាងតិច37នាក់។

“យើងកំពុងប្រឈមនឹងវិបត្តិមួយដែលមិនធ្លាប់មានពីមុនមក។ យើងមានគម្រោងនឹងធ្វើតេស្តរកមេរោគចំពោះអ្នកទាំងឡាយណាដែលបានចូលរួមក្នុងពិធីបួងសួងនៅឯវិហារ Shincheonji។ យើងបានស្នើឱ្យពួកគេនៅក្នុងផ្ទះ និងមិនត្រូវនៅក្បែរសមាជិកផ្សេងៗក្នុងគ្រួសារ” នេះជាសម្ដីរបស់អភិបាលក្រុង Daegu លោក Kwon Young-jin។

ទីក្រុង “ស្ងាត់ជ្រងំ”

ដងផ្លូវនានាក្នុងទីក្រុង Daegu ស្ទើរតែក្លាយទៅជាទីក្រុងខ្មោច ព្រោះមិនមានមនុស្សធ្វើដំណើរដូចមុន បន្ទាប់ពីមនុស្សរាប់សិបនាក់នៅក្នុងទីក្រុងនេះ បានឆ្លងមេរោគកូរ៉ូណា។ មជ្ឈមណ្ឌលពាណិជ្ជកម្ម រោងភាពយន្ត ភោជនីយដ្ឋានជាដើម ក៏ស្រាប់តែលែងមានមនុស្សដូចសព្វមួយដង។ នេះបើតាមការចេញផ្សាយរបស់ Reuters។

បុរសវ័យ28ឆ្នាំម្នាក់ មានឈ្មោះថា Kim Geun-woo បានប្រាប់អ្នកយកព័ត៌មាន Reuters ថា៖ “មានអារម្មណ៍ថា ដូចជាមានអ្នកណាម្នាក់ទម្លាក់គ្រាប់បែបចំកណ្ដាលទីក្រុង។ ស្ថានភាពដូចជាកំពុងស្ថិតនៅក្នុងថ្ងៃភ្លើងឆេះកាល្បដូច្នោះដែរ”។

អាជ្ញាធរទីក្រុង Daegu បានស្នើឱ្យបិទទ្វារមជ្ឈមណ្ឌលថែរក្សាកុមារទាំងអស់ ខណៈដែលសាលារៀន ត្រូវលើកពេលចូលរៀនទៅអាទិត្យក្រោយ ដែលនេះជាប្រការមិនធ្លាប់មានពីមុនមក។ ក្រសួងការពារជាតិកូរ៉េខាងត្បូងក៏បានហាមមិនឱ្យទាហាននៅក្នុងតំបន់ Daegu ចាកចេញពីបន្ទាយ ឬទទួលភ្ញៀវ ក្រោយពីមានទាហានម្នាក់ ថ្មីៗនេះ បានទៅលេងផ្ទះនៅឯទីក្រុង Daegu ហើយបានឆ្លងមេរោគកូរ៉ូណា។ មូលដ្ឋានទ័ពសហរដ្ឋអាមេរិកនៅក្នុងតំបន់នេះក៏បានអនុវត្តវិធានការដូចគ្នានេះដែរ។

អនុរដ្ឋមន្ត្រីក្រសួងសុខាភិបាលកូរ៉េខាងត្បូង Kim Kang-lip ក្នុងសន្និសីទកាសែតមួយកាលពីម្សិលមិញបាននិយាយថា ស្ថានការណ៍អាសន្នរោគនៅប្រទេសនេះ “ពិតជាគួរឱ្យព្រួយបារម្ភមែន”៕

ប្រភព៖ សារព័ត៌មានបរទេស

February 21, 2020

អ្នកស្លាប់ដោយសារមេរោគកូរ៉ូណា COVID-19 ឡើងដល់2,009នាក់

នៅប្រទេសចិន មានអ្នកស្លាប់បន្ថែមដោយសារមេរោគកូរ៉ូណាចំនួន136នាក់ ធ្វើឱ្យអ្នកស្លាប់សរុបនៅទូទាំងពិភពលោក ឡើងដល់2,009នាក់។

អាជ្ញាធរខេត្ត Hubei ដែលជាសម្បុកមេរោគកូរ៉ូណា COVID-19 ថ្ងៃនេះបានប្រកាសថា មានអ្នកជំងឺថ្មី1,693នាក់ និងអ្នកស្លាប់បន្ថែមចំនួន132នាក់ ធ្វើឱ្យអ្នកឆ្លងមេរោគសរុបក្នុងខេត្តនេះ ឡើងដល់61,682នាក់ ហើយអ្នកស្លាប់សរុបក្នុងខេត្តនេះក៏ឡើងដល់1,921នាក់។ ក្នុងចំនួននេះ ទីក្រុង Wuhan មានអ្នកជំងឺថ្មី 1,660នាក់ និង116នាក់បាត់បង់ជីវិត។

នៅឯខាងក្រៅខេត្ត Hubei ចំនួនអ្នកជំងឺថ្មី មានការថយចុះបន្តិច ហើយមន្ត្រីសុខាភិបាលចិន បានវាយតម្លៃថា នេះគឺជាសញ្ញាមួយបង្ហាញថា អាសន្នរោគនេះ កំពុងត្រូវបានគ្រប់គ្រងប្រកបដោយប្រសិទ្ធភាព។

គណៈកម្មការសុខាភិបាលចិន ក៏បានប្រកាសឱ្យដឹងដែរថា ទូទាំងប្រទេសចិន (ចិនដីគោក) មានអ្នកស្លាប់ដោយសារវីរុសកូរ៉ូណាបន្ថែម136នាក់ និងអ្នកជំងឺថ្មីមានចំនួន 1,749នាក់។ បច្ចុប្បន្ន ប្រទេសនេះ មានអ្នកផ្ទុកមេរោគសរុប74,185នាក់ និងអ្នកស្លាប់សរុប2,004នាក់។

នៅទូទាំងពិភពលោក មានអ្នកផ្ទុកមេរោគកូរ៉ូណា COVID-19 ចំនួន75,184នាក់ និងអ្នកស្លាប់2,009នាក់ ខណៈដែលអ្នកបានជាសះស្បើយមានចំនួន14,555នាក់។ នៅខាងក្រៅប្រទេសចិន (ដីគោក) អ្នកស្លាប់ដោយសារមេរោគនេះ មានចំនួន5ករណី គឺនៅជប៉ុន1ករណី ហុងកុង1ករណី បារាំង1ករណី ហ្វីលីពី1ករណី និងតៃវ៉ាន់1ករណី៕

ប្រភព៖ សារព័ត៌មានបរទេស

February 19, 2020

ធនាគារសម្រេចចិត្ត “ដុតកម្ទេច” សាច់ប្រាក់ ដើម្បីទប់ស្កាត់ការឆ្លងវីរុសកូរ៉ូណា COVID-19

ធនាគារកណ្ដាលរបស់ប្រទេសចិន សាខាក្វាងចូវ (Guangzhou) សម្រេចចិត្តថានឹងដុតកម្ទេចក្រដាសប្រាក់មួយចំនួន ដែលធ្លាប់ចរាចរនៅក្នុងមន្ទីរពេទ្យ ផ្សារលក់អាហារ និងចំណត់រថយន្ត ដើម្បីរួមចំណែកទប់ស្កាត់ការឆ្លងរាលដាលនៃមេរោគកូរ៉ូណា។

ដើម្បីអនុវត្តបាន បណ្ដាធនាគារពាណិជ្ជកម្មក្នុងខេត្ត នឹងត្រូវញែកក្រដាសប្រាក់ដែលធ្លាប់បានចរាចរនៅក្នុងតំបន់ដែលមានហានិភ័យខ្ពស់ក្នុងការឆ្លងមេរោគកូរ៉ូណា ទុកមួយឡែក ដើម្បីងាយស្រួលសម្លាប់មេរោគ។ ក្រោយមក ក្រដាសប្រាក់នោះនឹងត្រូវបញ្ជូនទៅកាន់ធនាគារកណ្ដាលរបស់ចិន សាខាខេត្តក្វាងចូវ ដើម្បីដុតសម្លាប់មេរោគ។ នេះបើតាមសារព័ត៌មាន SCMP។

ទាក់ទិននឹងវិធានការនេះ អគ្គនាយករងនៃធនាគារធំមួយនៅក្នុងខេត្តក្វាងចូវ សុំមិនបញ្ចេញឈ្មោះ បាននិយាយថា អតិថិជននឹងត្រូវស្នើឱ្យបញ្ជាក់អំពីប្រភពនៃក្រដាសប្រាក់របស់ពួកគេដែលបានផ្ញើនៅក្នុងសាខាធនាគាររបស់ពួកគេ។ ប៉ុន្តែ មន្ត្រីធនាគាររូបនេះ ជឿថា វិធានការបែបនេះ ពិបាកនឹងធ្វើឱ្យមានប្រសិទ្ធភាព។

ដំណោះស្រាយខាងលើរបស់ខេត្តក្វាងចូវ ត្រូវបានដាក់ចេញ បន្ទាប់ពីអគ្គនាយករងធនាគារ PBOC បានឱ្យដឹងថា ប្រាក់ប្រភេទក្រដាសថ្មី ចំនួន600ពាន់លានយន់ (85,6ពាន់លានដុល្លារអាមេរិក) ត្រូវបានដាក់ឱ្យប្រើប្រាស់ទូទាំងប្រទេសចាប់ពីថ្ងៃទី17មករា ឆ្នាំ2020 រួមទាំងប្រាក់ថ្មីចំនួន4ពាន់លានយន់ ត្រូវបានបញ្ជូនទៅកាន់ក្រុង Wuhan ខណៈដែលប្រាក់ចំនួន7,8ពាន់លានយន់ជាសាច់ប្រាក់សុទ្ធ ត្រូវបានដកចេញពីការចរាចរ។

PBOC បានឱ្យដឹងថា ខ្លួននឹងប្រើប្រាស់កម្ដៅខ្ពស់ ឬកាំរស្មី UV (ultraviolet ray) ដើម្បីរម្ងាប់មេរោគនៅលើក្រដាសប្រាក់ទាំងនោះ បន្ទាប់មកដាក់វាទុកដាច់ដោយឡែករយៈពេល14ថ្ងៃ មុនពេលដាក់ឱ្យប្រើប្រាស់ឡើងវិញ៕

ប្រភព៖ សារព័ត៌មានបរទេស

February 17, 2020

អាជ្ញាធរទីក្រុងក្វាងចូវ ហាមអ្នកទិញហូបអាហារនៅក្នុងភោជនីយដ្ឋាន

ប្រទេសចិន៖ អាជ្ញាធរនៃទីក្រុងក្វាងចូវ (Guangzhou) បានហាមមនុស្សម្នា ហូបអាហារនៅក្នុងអាហារដ្ឋាន ឬភោជនីយដ្ឋាន ប៉ុន្តែ អនុញ្ញាតឱ្យបញ្ជាទិញតាមអ៊ីនធើណិត និងខ្ចប់យកទៅផ្ទះ ដើម្បីទប់ស្កាត់ការឆ្លងរាលដាលបន្ថែមនៃជំងឺរលាកសួតថ្មីកូរ៉ូណា Covid-19។

យោងតាមសេចក្ដីប្រកាសកាលពីម្សិលមិញ អាហារដ្ឋាន និងភោជនីយដ្ឋានទាំងអស់នៅក្នុងទីក្រុងក្វាងចូល ខេត្តក្វាងតុង ភាគខាងត្បូងប្រទេសចិន ត្រូវបានហាមមិនឱ្យលក់អាហារដែលហូបនៅនឹងកន្លែងដូចសព្វដង។ ជំនួសមកវិញ អតិថិជនត្រូវតែបញ្ជាទិញតាមអនឡាញ និងទូរស័ព្ទ ឬទៅទិញយកមកហូបនៅឯផ្ទះ។ ប៉ុន្តែ អាជ្ញាធរបានផ្ដល់អនុសាសន៍ថា ការទិញតាមទូរស័ព្ទ ឬតាមអ៊ីនធើណិត គឺជាវិធីដែលមានសុវត្ថិភាពជាងគេ។

អ្នកនៅក្នុងក្រុងក្វាងចូវ ក៏ដូចជាបណ្ដាក្រុងផ្សេងៗ បានចាប់ផ្ដើមត្រឡប់ចូលធ្វើការវិញ បន្ទាប់ពីបានឈប់សម្រាកបុណ្យចូលឆ្នាំចិនមួយរយៈពេលវែង ព្រោះតែអាសន្នរោគកូរ៉ូណា។ ដូច្នេះ ដើម្បីទប់ស្កាត់ការឆ្លងមេរោគបន្ថែមទៀត អាជ្ញាធរក៏បានប្រើវិធីនេះ។ បទបញ្ជានេះ អនុវត្តតែទៅលើអាហារដ្ឋានខាងក្រៅ និងភោជនីយដ្ឋានតែប៉ុណ្ណោះ ចំណែកបុគ្គលិកការិយាល័យវិញ នៅតែអាចហូបអាហារក្នុងអាហារដ្ឋានរបស់ក្រុមហ៊ុនដែលពួកគេកំពុងធ្វើការនោះបាន។

ការទៅកាន់ភោជនីយដ្ឋានដើម្បីផឹកតែ និងហូបអាហារចិន Dim sum (Dim sum គឺជាម្ហូបចិនមួយបែប ដែលអាហារទាំងនោះ ត្រូវបានគេរៀបចំជាផ្នែកតូចៗ ដាក់ក្នុងកន្ត្រកចំហុយតូច ឬនៅលើចានតូចទាបមួយៗ) គឺជាទម្លាប់របស់អ្នកក្រុងក្វាងចូវ។

លោក He Zhijuan អាយុ 73ឆ្នាំ បាននិយាយថា ៖ “សូម្បីតែនៅពេលប្រទេសចិន ជួបនឹងគ្រោះអត់ឃ្លានកាលពីឆ្នាំ1959 ដល់1961 ខ្ញុំនៅចាំថា អាហារដ្ឋាននានានៅតែបើកដំណើរការ។ ខ្ញុំពិតជាមានការភ្ញាក់ផ្អើលណាស់ ពេលអាជ្ញាធរចេញបទបញ្ជាហាមបែបនេះ។ ខ្ញុំគិតថា អាសន្នរោគនេះ ប្រាកដជាធ្ងន់ធ្ងរណាស់ហើយ ទើបក្វាងចូវ ប្រើយុទ្ធសាស្ត្រនេះ”។

អាសន្នរោគកូរ៉ូណា Covid-19 បានចាប់ផ្ដើមផ្ទុះឆ្លងរាលដាល តាំងពីខែធ្នូ ឆ្នាំ2019 នៅទីក្រុងអ៊ូហាន (Wuhan) ប្រទេសចិន។ មកដល់ពេលនេះ ពិភពលោកទាំងមូល មានអ្នកស្លាប់ដោយសារមេរោគនេះ កើនដល់ 1,383នាក់ និងអ្នកមានផ្ទុកមេរោគនេះ កើនដល់ទៅ 64,437នាក់ ក្នុងនោះមានអ្នកជំងឺរាប់ពាន់នាក់ កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

ប្រភព៖ សារព័ត៌មានបរទេស

February 14, 2020

ក្រុមហ៊ុនអាមេរិកាំង ឧទ្ទេសនាមបច្ចេកវិទ្យាថ្មី តម្លៃទាប ដែលអាចជួយទប់ស្កាត់អាសន្នរោគកូរ៉ូណា 2019-nCoV

ក្រុមហ៊ុនថ្មី GenapSys មានទីស្នាក់ការកណ្ដាលនៅតំបន់ជ្រលងភ្នំ Silicon Valley បានស្នើឱ្យប្រទេសចិន ប្រើប្រាស់ម៉ាស៊ីនពិនិត្យលំដាប់ហ្សែន (Gene Sequencer) ខ្នាតតូច (mini) ដើម្បីទប់ទល់នឹងការរាតត្បាតនៃមេរោគកូរ៉ូណាប្រភេទ nCoV។

អ្នកនាំពាក្យនៃក្រុមហ៊ុន GenapSys កំពុងតែចរចាជាមួយមជ្ឈមណ្ឌលគ្រប់គ្រង និងបង្ការោគឆ្លង (CDC) របស់ចិន ដើម្បីស្វែងរកវិធីសាស្ត្រដែលមានប្រសិទ្ធភាពខ្ពស់បំផុត សម្រាប់ទប់ស្កាត់អាសន្នរោគ nCoV ដែលមកដល់ពេលនេះ វាបានសម្លាប់មនុស្សចំនួន 910នាក់ និងបានឆ្លងទៅកាន់មនុស្សជាង 40,547នាក់ផ្សេងទៀតនៅទូទាំងពិភពលោក។ នេះបើតាមទីភ្នាក់ងារសារព័ត៌មានចិន South China Morning Post។

ក្រុមហ៊ុនបច្ចេកវិទ្យាជីវសាស្ត្ររបស់អាមេរិក GenapSys បានប្រកាសថា ខ្លួនកំពុងកាន់កាប់បច្ចេកវិទ្យាបកស្រាយ ឬពិនិត្យលំដាប់ហ្សែន (gene sequencer) ដែលទំនើបបំផុតក្នុងពិភពលោក។ ម៉ាស៊ីននេះ មានទំហំប៉ុន iPad ពោលគឺតូចជាង100ដង បើធៀបនឹងម៉ាស៊ីនពិនិត្យលំដាប់ហ្សែនផ្សេងៗដែលកំពុងមាននៅក្នុងទីផ្សារ។ ឧបករណ៍នេះអាចបំពាក់ដោយងាយនៅតាមន្ទីរពេទ្យ ព្រលានយន្តហោះជាដើម ដែលជួយឱ្យមន្ត្រីសុខាភិបាលអាចពិនិត្យរកមេរោគផ្សេងៗបានយ៉ាងឆាប់រហ័ស ដូច្នេះ គេអាចគ្រប់គ្រងស្ថានភាពអាសន្នរោគបានប្រសើរជាងមុន។

បច្ចុប្បន្ន ការបកស្រាយ ឬពិនិត្យលំដាប់ហ្សែន ភាគច្រើនត្រូវបានធ្វើឡើងនៅក្នុងបន្ទប់ពិសោធន៍ធំៗរបស់ក្រុមហ៊ុន Illumina ដែលមានទីស្នាក់ការនៅអាមេរិក ជាកន្លែងដែលមានម៉ាស៊ីនទំនើបៗ ដែលមានតម្លៃជិត1លានដុល្លារអាមេរិក។ ឆ្នាំ2018 ក្រុមហ៊ុន Illumina បានដាក់លក់ម៉ាស៊ីនពិនិត្យលំដាប់ហ្សែនខ្នាតតូច ប៉ុនកុំព្យូទ័រ desktop ប៉ុន្តែវានៅតែមានតម្លៃដល់ទៅ20,000ដុល្លារ ខ្ពស់ជាងទ្វេដង បើធៀបនឹងតម្លៃម៉ាស៊ីនរបស់ក្រុមហ៊ុន GenapSys។

ការពិនិត្យលំដាប់ហ្សែន (Genetic sequencing) គឺពិតជាមានសារសំខាន់ ព្រោះថា វានឹងជួយឱ្យយើងយល់កាន់តែច្បាស់អំពីវីរុស ដែលក្រុមគ្រូពេទ្យអាចតាមដានការវិវដ្ដរបស់ពួកមេរោគ និងអាចបង្កើតវ៉ាក់សាំង ឬរកវិធីព្យាបាលបានឆាប់រហ័ស។

ក្រុមហ៊ុន GenapSys សង្ឃឹមថា បច្ចេកវិទ្យារបស់ពួកគេ នឹងឆាប់បានចូលខ្លួនទៅជួយទប់ស្កាត់អាសន្នរោគកូរ៉ូណាដែលកំពុងសម្លាប់មនុស្សជារៀងរាល់ថ្ងៃនេះ។ ការចរចារវាងក្រុមហ៊ុន GenapSys ជាមួយរដ្ឋាភិបាលចិន កំពុងស្ថិតក្នុងតំណាក់កាលដំបូង។ អ្នកនាំពាក្យរបស់ក្រុមហ៊ុននេះ និយាយថា ពួកគេនឹងគោរពទៅតាមរាល់ច្បាប់ទម្លាប់ និងការកំណត់នៃច្បាប់អន្តរជាតិ។ សារព័ត៌មាន SCMP បានរាយការណ៍ថា បច្ចុប្បន្ន ភាគីខាងប្រទេសចិន មិនទាន់ឆ្លើយតបជាផ្លូវការទៅនឹងសំណើររបស់ក្រុមហ៊ុននេះនៅឡើយ៕

ប្រភព៖ សារព័ត៌មានបរទេស

February 10, 2020

ប្រជាជនចិនកំពុងអាណិត ស្រណោះ “អ្នកក្លាហានដំបូងគេ ដែលបានព្រមានអំពីអាសន្នរោគកូរ៉ូណា”

អ្នកប្រើបណ្ដាញសង្គមនៅប្រទេសចិន បាននាំគ្នាសម្ដែងការស្ដាយស្រណោះចំពោះការចាកចេញដោយគ្មានថ្ងៃត្រឡប់របស់វេជ្ជបណ្ឌិត Li Wenliang ហើយថា អាជ្ញាធរនៅជំពាក់ពាក្យសុំទោសចំពោះគាត់។

មន្ទីរពេទ្យធំរបស់ក្រុង Wuhan កាលពីព្រឹកមិញ បានបញ្ជាក់នៅលើទំព័រ Weibo របស់ខ្លួនថា វេជ្ជបណ្ឌិត Li Wenliang អាយុ34ឆ្នាំ ដែលជាមនុស្សម្នាក់ក្នុងចំណោមមនុស្សដែលបានបញ្ចេញសារព្រមានអំពីអាសន្នរោគរលាកសួតថ្មី ពិតជាបានបាត់បង់ជីវិតនៅវេលាម៉ោង2និង58នាទី (ប្រហែលម៉ោង2 នៅភ្នំពេញ) ក្រោយពីបានប្រយុទ្ធនឹងជំងឺរលាកសួត nCoV អស់មួយរយៈពេលមកនេះ។

ព័ត៌មានស្ដីអំពីការស្លាប់របស់គ្រូពេទ្យខាងលើនេះត្រូវបានសារព័ត៌មាន Global Times ដែលគ្រប់គ្រងដោយទីភ្នាក់ងារសារព័ត៌មាន People’s Daily (អ្នកនាំពាក្យផ្លូវការរបស់បក្សកុម្មុយនីសចិន) បានបង្ហោះសារដំបូងនៅលើបណ្ដាញសង្គម Twetter កាលពីវេលាម៉ោងប្រហែល20និង40នាទីនៃថ្ងៃទី6កុម្ភៈកន្លងទៅ។ មិត្តភក្ដិ និងក្រុមគ្រូពេទ្យនៅមន្ទីរពេទ្យ Wuhan ប្រាប់ថា ការស្លាប់របស់់គ្រូពេទ្យ Li Wenliang គឺបណ្ដាលមកពីជំងឺរលាកសួតដែលបង្កឡើងដោយមេរោគកូរ៉ូណា nCoV នេះបើតាមសារព័ត៌មាន Global Times។

បន្ទាប់ពីការបានបង្ហោះសារដំបូងនៅលើបណ្ដាញសង្គម Twetter ត្រឹមតែប៉ុន្មាននាទីប៉ុណ្ណោះ អ្នកលេងបណ្ដាញសង្គមរាប់ពាន់នាក់បានបញ្ចេញមតិសោកស្ដាយ និងអាណិតអាសូរចំពោះការស្លាប់របស់វេជ្ជបណ្ឌិតរូបនេះ។

អ្នកលេងបណ្ដាញសង្គមម្នាក់បញ្ចេញមតិនៅខាងក្រោមសេចក្ដីប្រកាសរបស់មន្ទីរពេទ្យក្រុង Wuhan ថា ៖ “យើងខ្ញុំនឹងចងចាំមិនភ្លេចចំពោះលោកគ្រូពេទ្យដែលបានបញ្ចេញព័ត៌មានដំបូងគេទាក់ទិននឹងអាសន្នរោគនេះ ហើយដែលត្រូវគេចាត់ទុកថាជាព័ត៌មានមិនពិត។ តើយើងខ្ញុំអាចធ្វើអ្វីបានខ្លះ? ប្រការដែលយើងខ្ញុំអាចធ្វើបាននោះគឺមិនភ្លេចគាត់”។

Hashtag “គ្រូពេទ្យ Li បាត់បង់ជីវិត” ភ្លាមនោះ ទទួលបានការចូលមើល និងការបញ្ចេញមតិរាប់លានដង នៅលើបណ្ដាញសង្គម Weibo។ ប៉ុន្តែប៉ុន្មានម៉ោងក្រោយមក អត្ថបទដែលបានបង្ហោះនៅលើគណនី Twitter របស់ Global Times ក៏ត្រូវបានគេលុបចោល។ ទំព័រសារព័ត៌មានផ្សេងៗរបស់រដ្ឋចិន ក៏បានលុបចោលព័ត៌មានដែលទាក់ទិននឹងការស្លាប់របស់វេជ្ជបណ្ឌិតវ័យក្មេង ដោយមិនមានការបកស្រាយអ្វីទាំងអស់។

អង្គការសុខភាពពិភពលោក WHO ដំបូងក៏បានសម្ដែងការសោកស្ដាយចំពោះវេជ្ជបណ្ឌិត Li Wenliang នៅលើទំិព័រ Twetter ៖ “យើងខ្ញុំពិតជាក្ដុកក្ដួលចំពោះមរណភាពរបស់វេជ្ជបណ្ឌិត Li Wenliang។ យើងទាំងអស់គ្នាត្រូវតែលើកតម្កើងកិត្តិយសនៃកិច្ចការដែលគាត់បានធ្វើ ទាក់ទិននឹង #nCoV2019″។ ប៉ុន្តែ ក្រោយមក មិនដឹងមានមូលហេតុអ្វី WHO ក៏បានកែប្រែអត្ថបទរបស់ខ្លួន ដោយសរសេរថា ពួកគេពុំមានព័ត៌មានអ្វីស្ដីអំពីស្ថានភាពរបស់លោក Li Wenliang នោះឡើយ។

មនុស្សជាច្រើនកំពុងតែសង្ឃឹមទៅលើអព្ភូតហេតុដ៏អស្ចារ្យមួយកើតឡើង ខណៈដែលមន្ទីរពេទ្យធំរបស់ក្រុង Wuhan កាលពីវេលាម៉ោង 00និង45នាទី ថ្ងៃទី7កុម្ភៈ ប្រកាសថា គ្រូពេទ្យ Li “កំពុងស្ថិតក្នុងស្ថានភាពគ្រោះថ្នាក់” ប៉ុន្តែ មិនទាន់បាត់បង់ជីវិតដូចការរាយការណ៍របស់សារព័ត៌មាននោះទេ។

“យប់នេះ ពួកយើងមិនដេកនោះទេ ពួកយើងគឺនៅរង់ចាំអព្ភូតហេតុ។ យប់នេះយើងខ្ញុំមិនបាច់ដេកទេ ប៉ុន្តែ Li Wenliang ត្រូវតែរស់”។

មនុស្សជាច្រើនបានបញ្ចេញមតិនៅលើគណនីបណ្ដាញសង្គម Weibo របស់លោកគ្រូ Li ដោយបួងសួងឱ្យគាត់អាចបន្តបង្ហោះសារនៅលើទំព័ររបស់គាត់តទៅទៀត។ ប្រហែល 2ម៉ោងក្រោយការប្រកាសលើកទីមួយរបស់មន្ទីរពេទ្យធំនៅក្រុង Wuhan មន្ទីរពេទ្យនេះបានចេញសេចក្ដីប្រកាសជាលើកទីពីរ។ អព្ភូតហេតុដែលមនុស្សគ្រប់គ្នាកំពុងរង់ចាំ ពេលនេះមិនបានកើតសោះឡើយ។ មន្ទីរពេទ្យធំនៃក្រុង Wuhan បានបញ្ជាក់ថា លោកគ្រូពេទ្យ Li បានបាត់បង់ជីវិតក្រោយការប្រកាសព័ត៌មានលើកទីមួយ។

“អ្នកដែលរក្សាអណ្ដាតភ្លើងឱ្យហ្វូងមនុស្ស នឹងក្លាយជាមនុស្សដែលស្លាប់កកប្រាណ ព្រោះតែខ្យល់ និងព្រឹល” អ្នកលេងបណ្ដាញសង្គម នាំគ្នាចែករំលែកតៗគ្នានូវពាក្យមួយឃ្លានេះ ដើម្បីសម្ដែងការសោកស្ដាយចំពោះការលាចាកលោករបស់លោកគ្រូពេទ្យ Li Wenliang។

ប្រធានបទ ” អាជ្ញាធរក្រុង Wuhan នៅជំពាក់ពាក្យសុំទោសលោកគ្រូ Li Wenliang” ដែលគេយកមកជជែកគ្នានៅលើបណ្ដាញសង្គមចិន Weibo បានទាក់ទាញចំណាប់អារម្មណ៍អ្នកប្រើប្រាស់អ៊ីនធើណិតរាប់ម៉ឺននាក់ចូលមកបញ្ចេញមតិ មុនពេលប្រធានបទនេះត្រូវបានលុបចេញ។

“មនុស្សពេញវ័យជាច្រើននឹងដឹងខ្លួនបន្ទាប់ពីយប់នេះ ៖ ពិភពលោកមិនស្រស់ស្អាតដូចអ្វីដែលយើងបានស្រមៃនោះទេ។ អ្នកទាំងអស់មានការខឹងសម្បាខ្លាំងដែរទេ បើសិនអ្នកណាម្នាក់ក្នុងចំណោមពួកយើង មានសំណាងគ្រប់គ្រាន់ក្នុងការបញ្ចេញមតិដើម្បីអនាគតសង្គម? សូមមេត្តាធានាឱ្យបានប្រាកដថា អ្នកទាំងអស់គ្នានឹងចងចាំការខឹងសម្បានាយប់នេះ” នេះគឺជាមតិមួយដែលត្រូវគេយកចិត្តទុកដាក់ច្រើនបំផុត ក្នុងចំណោមមតិដែលត្រូវបានបង្ហោះនៅខាងក្រោមសេចក្ដីប្រកាសរបស់មន្ទីរពេទ្យធំ Wuhan។

Li Wenliang ត្រូវបានគេចាត់ទុកថា ជាមនុស្សម្នាក់ក្នុងចំណោមមនុស្សដំបូងគេដែលបានចែករំលែកព័ត៌មាន និងព្រមានអំពីអាសន្នរោគរលាកសួតដែលបង្កឡើងដោយមេរោគកូរ៉ូណា (nCoV) នៅប្រទេសចិន។ ក្នុងថ្ងៃទី30 ខែធ្នូ ឆ្នាំ2019 Li Wenliang បានផ្ញើសារចូលក្នុងក្រុម WeChat របស់គាត់ដែលមានមិត្តភក្ដិរបស់គាត់ 150នាក់ ដែលជាមិត្តចាស់។ គាត់បានព្រមានអំពីអ្នកជំងឺ 7នាក់ដែលបានឆ្លងមេរោគមួយប្រភេទដែលគាត់យល់ថា ដូចទៅនឹងមេរោគផ្លូវដង្ហើម SARS (Severe Acute Respiratory Syndrome) ដែលធ្លាប់បានកើតឡើងនៅប្រទេសចិនកាលពីឆ្នាំ2002 និងបានសម្លាប់មនុស្សប្រមាណជា800នាក់ នៅទូទាំងពិភពលោក។

សាររបស់លោកគ្រូ Li បានទាក់ទាញចំណាប់អារម្មណ៍របស់ក្រុមមន្ត្រីអាជ្ញាធរក្រុង បន្ទាប់ពីមនុស្សម្នាក់ក្នុងក្រុមរបស់គាត់ បានបង្ហោះរូបភាពនៃការជជែករបស់ពួកគេនៅលើបណ្ដាញសង្គម។ ក្រោយមកទៀត គ្រូពេទ្យ7នាក់ដែលស្ថិតក្នុងក្រុមជជែករបស់លោកគ្រូ Li ក៏បានចែករំលែកព័ត៌មាននេះទៅកាន់ក្រុមជជែកចំនួន3ផ្សេងទៀត។

នៅក្នុងយប់ដដែលនោះ ក្រុមមន្ត្រីសុខាភិបាលនៃក្រុង Wuhan បានកោះហៅលោកគ្រូ Li ដោយស្នើឱ្យគាត់និយាយអំពីមូលហេតុដែលគាត់បានចែករំលែកព័ត៌៌មាននេះ។ ថ្ងៃទី3មករា ក្រុមនគរបាលបានហៅគាត់ទៅសួរនាំ ហើយបង្ខំឱ្យគាត់សន្យាថា “បានចែករំលែកព័ត៌មានមិនពិត ធ្វើឱ្យច្របូកច្របល់ក្នុងសង្គមជាតិ”។

ថ្ងៃទី8មករា លោកគ្រូ Li បានពិនិត្យសុខភាពអ្នកជំងឺកូរ៉ូណាម្នាក់។ ពីរថ្ងៃក្រោយមក លោកគ្រូ Li ចាប់ផ្ដើមមានអាការក្អក និងពិបាកដកដង្ហើម ប៉ុន្តែ ការពិនិត្យជាច្រើនលើកបង្ហាញថា គាត់មិនមានផ្ទុកមេរោគកូរ៉ូណា nCoV នោះទេ។ យ៉ាងនេះក្ដី គាត់នៅតែនៅឆ្ងាយពីប្រពន្ធដែលកំពុងមានផ្ទៃពោះ និងកូនតូចរបស់គាត់។ ឪពុកម្ដាយរបស់គាត់ក៏កំពុងសម្រាកព្យាបាលដោយសារជំងឺគ្រុនក្ដៅ ប៉ុន្តែ ពេលនេះមិនដឹងថា ពួកគេបានឆ្លងមេរោគនេះដែរឬយ៉ាងណា? សារព័ត៌មានក្នុងស្រុកមួយចំនួន ចេញផ្សាយថា ប្រពន្ធរបស់គាត់ក៏បានឆ្លងមេរោគនេះដែរ។

ថ្ងៃទី12មករា គ្រូពេទ្យ Li បានចូលសម្រាកព្យាបាលក្នុងមន្ទីរពេទ្យ ហើយថ្ងៃទី1កុម្ភៈ គាត់ត្រូវគេបញ្ជាក់ថា មានផ្ទុកមេរោគកូរ៉ូណា។ នៅក្នុងសំណេរចុងក្រោយនៅលើគណនី Weibo លោកគ្រូ Li រៀបរាប់អំពីស្ថានភាពជំងឺរបស់គាត់ ហើយទទួលបានមតិរាប់ម៉ឺនដែលបង្ហាញការអាណិតអាសូរចំពោះគាត់។

ក្នុងចំណោមមតិទាំងនោះ គេឃើញមានមតិមួយដែលទទួលបានការចុចចូលចិត្តជាង 100,000លើក ដោយបានសរសេរថា ៖ “លោកគ្រូ Li លោកជាគ្រូពេទ្យដែលល្អ និងមានបេះដូង”។

មនុស្សម្នាក់ទៀត បានហៅលោកគ្រូ Li ថាជាមនុស្សម្នាក់ក្នុងចំណោម “ព្យាការី” ទាំង8រូប ៖ “ប្រជាជនទូទាំងប្រទេស រួមគ្នាសាមគ្គីជាមួយលោក”។

តុលាការកំពូលចិន កាលពីថ្ងៃទី28មករា បានបង្ហោះសារនៅលើបណ្ដាញសង្គម រិះគន់ទៅលើចំណាត់ការរបស់មន្ត្រីនៅ Wuhan ដែលបានចោទប្រកាន់លោកគ្រូ Li និងក្រុមគ្រូពេទ្យមួយចំនួនទៀតថាបានចែករំលែកព័ត៌មានចចាមអារ៉ាម។ មានឃ្លាមួយសរសេរថា “បើសិនសាធារណជនស្ដាប់ “ពាក្យចចាមអារ៉ាម” នោះ ហើយអនុវត្តវិធានការទប់ស្កាត់ ដូចជាពាក់ម៉ាសការពារ ឬសម្អាតមេរោគ និងជៀសវាងការទៅកាន់ផ្សារលក់សត្វរស់ជាដើម ប្រាកដជាអាចទប់ស្កាត់ការឆ្លងរាលដាលនៃមេរោគនេះបាន”៕

ប្រភព៖ សារព័ត៌មានបរទេស

February 7, 2020

Tag: រលាកសួត