Tag: មេរោគរលាកសួតថ្មី

នាវាទេសចរណ៍មួយគ្រឿងដឹកភ្ញៀវ 4,500នាក់ កំពុងជួបបញ្ហាស្រដៀងនាវា MS Westerdam ដែលបានចតនៅឯកំពង់ផែខេត្តព្រះសីហនុ
ប្រទេសកោះ Jamaica និងប្រជុំកោះ Cayman (កោះ Jamaica និង Cayman ជាដែនដី2ក្នុងចំណោមដែនដីទាំង16របស់អង់គ្លេស ដែលគេហៅថា Commonwealth realm) បានបដិសេធមិនឱ្យនាវាទេសចរណ៍មួយគ្រឿងរបស់អាមេរិកចូលចតក្នុងកំពង់ផែរបស់ពួកគេ ដោយសារតែសមាជិកម្នាក់នៃក្រុមនាវិកមានជំងឺ។
កាលពីថ្ងៃទី25កុម្ភៈ នាវាទេសចរណ៍ MSC Mereviglia ដែលមានការិយាល័យកណ្ដាលនៅ Miami សហរដ្ឋអាមេរិក ត្រូវបានអាជ្ញាធរ Jamaica បដិសេធមិនឱ្យចូលចតក្នុងកំពង់ផែ នៅពេលដែលនាវានេះបានទៅជិតដល់ទីរួមស្រុក Ochos Rios ដោយសារតែសមាជិកម្នាក់នៃក្រុមនាវិករបស់កប៉ាល់នេះ មានអាការក្អក គ្រុនក្ដៅ និងឈឺសព្វរាងកាយ(រោគសញ្ញានៃជំងឺគ្រុន)។ ក្រសួងសុខាភិបាល Jamaica បានប្រកាសឱ្យដឹងថា បុគ្គលិកម្នាក់នេះ បច្ចុប្បន្នត្រូវបានបង្ខាំងឱ្យនៅដាច់ដោយឡែកពីគេនៅលើនាវានោះ។
នៅលើនាវា ដែលកំពុងដឹកភ្ញៀវចំនួនជាង4,500នាក់ និងបុគ្គលិកនាវាជាង1,600នាក់ កំពុងធ្វើដំណើរនៅលើសមុទ្រ Caribbean ក្នុងគម្រោងដំណើររយៈពេល14ថ្ងៃ។ ក្រោយពីត្រូវបានបដិសេធដោយ Jamaica នាវានេះបន្តដំណើរទៅកំពង់ផែរបស់ Grand Cayman ក៏ប៉ុន្តែ ជាអកុសល នាវា MSC Mereviglia នេះ ក៏ត្រូវបដិសេធទៀត។ មន្ត្រីផ្នែកសុខាភិបាល Cayman បានឱ្យដឹងថា ការបដិសេធនេះ គឺគ្រាន់តែដើម្បីការពារសុខភាព និងសុវត្ថិភាពជូនប្រជាជននៅលើកោះតែប៉ុណ្ណោះ។
ភាគីក្រុមហ៊ុននាវាទេសចរណ៍បានរិះគន់ទៅលើការសម្រេចខាងលើនេះ ហើយថា អាជ្ញាធរកោះ មិនបានស្រាវជ្រាវឱ្យបានត្រឹមត្រូវទៅលើឯកសារសុខាភិបាលដែលភាគីនាវាបានផ្ដល់ជូនពិនិត្យនោះទេ។ ឯកសារបានរៀបរាប់ថា សមាជិកដែលមានជំងឺគ្រុននោះ ធ្លាប់បានធ្វើដំណើរពីទីក្រុងម៉ានីល ប្រទេសហ្វីលីពីន ទៅកាន់តំបន់ Miami និងបានឡើងនាវានៅឯ Istanbul ប្រទេសទួរគី។ មុនពេលឡើងនាវា បុគ្គលិកនេះត្រូវបានគេពិនិត្យសុខភាពគ្រប់ផ្នែក និងមិនមានរោគសញ្ញាអ្វីនោះទេ។ ក្រោយពីបានឡើងនាវា ទើបបុគ្គលិកនេះកើតជំងឺ ហើយបន្ទាប់ពីពិនិត្យ ទើបគេដឹងថា មានផ្ទុកវីរុសគ្រុនផ្ដាសាយអេ(Influenza A virus)។
បច្ចុប្បន្ន នាវានេះកំពុងនៅតាមផ្លូវឆ្ពោះទៅកាន់កំពង់ផែបន្ទាប់ នៅឯ Cozumel ប្រទេសប្រេស៊ីល។ អ្នកគ្រប់គ្រងនាវានេះបានទំនាក់ទំនងទៅកាន់ការិយាល័យសុខាភិបាលក្នុងស្រុកដើម្បីធានាថា រដ្ឋាភិបាលប្រទេសនេះនឹងធ្វើការសម្រេចចិត្តដោយយោងទៅលើការវាយតម្លៃជាក់ស្ដែង។
អ្នកទេសចរម្នាក់នៅលើនាវាបានឱ្យដឹងថា ភ្ញៀវទេសចរជាច្រើននៅលើនាវានេះ ចាប់ផ្ដើមព្រួយបារម្ភកាន់តែខ្លាំងឡើងៗ។ ប៉ុន្តែ ភាគីនាវាបានផ្ញើពាក្យសុំទោសចំពោះភ្ញៀវទាំងអស់ ហើយថានាវានេះនឹងសងជំងឺចិត្តដែលបានរំលងចោលតំបន់ទេសចរណ៍នៅ Ocho Rios និង Grand Cayman ដែលមានតម្លៃសរុប200ដុល្លារអាមេរិក សម្រាប់ភ្ញៀវម្នាក់ៗ៕
ប្រភព៖ សារព័ត៌មានបរទេស
February 27, 2020
វីវរហើយ!! លទ្ធផលវិភាគ បង្ហាញច្បាស់ថា វិធានការពិនិត្យរកអ្នកឆ្លងមេរោគ COVID-19 នៅតាមអាកាសយានដ្ឋានទូទាំងពិភពលោក “បរាជ័យ” ពិនិត្យមិនឃើញអ្នកផ្ទុកមេរោគជាងពាក់កណ្ដាល!
ការព្យាយាមពិនិត្យលម្អិតរកអ្នកមានមេរោគវីរុសកូរ៉ូណាប្រភេទថ្មី ឬ COVID-19 ទូទាំងពិភពលោកដើម្បីការពារការឆ្លងរាលដាលនៃមេរោគនេះ មើលទៅហាក់ដូចជា “នឹងបរាជ័យ” ហើយ។ តាមរយៈលទ្ធផលនៃការវិភាគថ្មីមួយដែលបានព្រមានថា ទោះជាមានការពិនិត្យលម្អិតដែលល្អបំផុតទៅលើអ្នកដំណើរដែលសញ្ចរតាមផ្លូវអាកាស ក៏មានការភ្លាត់ភ្លាំង រកមិនឃើញអ្នកឆ្លងមេរោគជាងពាក់កណ្ដាលដែរ។ នេះបើតាមការរាយការណ៍របស់ទីភ្នាក់ងារសារព័ត៌មានAFP។
មានអ្នកឆ្លងមេរោគវីរុសកូរ៉ូណាប្រភេទថ្មីនេះរួចមកហើយច្រើនជាង 80,000នាក់នៅទូទាំងពិភពលោក រាប់ចាប់ពីមេរោគនេះចាប់ផ្ដើមបង្ហាញខ្លួនឡើងនៅក្នុងភាគកណ្ដាលនៃប្រទេសចិនកាលពីខែកន្លងទៅ។
អ្នកដំណើរដែលសញ្ចរតាមផ្លូវអាកាសនឹងត្រូវបានពិនិត្យសុខភាពលម្អិតដោយម៉ាស៊ីនពិនិត្យសីតុណ្ហភាព និងបំពេញលើទម្រង់ក្រដាសសួរ-ឆ្លើយក្នុងវិធានការទប់ទល់រោគឆ្លង តែកាលពីថ្ងៃពុធ(ទី26កុម្ភៈ)អង្គការសុខភាពពិភពលោកបានបញ្ជាក់ជាលើកដំបូងថា ចំនួនអ្នកឆ្លងមេរោគនៅក្រៅប្រទេសចិនដីគោក បានវ៉ាដាច់ចំនួនអ្នកឆ្លងមេរោគនៅក្នុងប្រទេសចិនរួចស្រេចបាត់ហើយមកដល់ថ្ងៃនេះ។ នេះគឺដោយសារតែការពិនិត្យរករោគសញ្ញានៅលើអ្នកដំណើរតាមផ្លូវអាកាស(យន្តហោះ)មិនទទួលបានលទ្ធផលល្អហ្នឹងឯង។
អង្គការសុខភាពពិភពលោកប្រាប់ថា រយៈពេលសម្ងំខ្លួននៅក្នុងរាងកាយមនុស្សរបស់មេរោគ COVID-19 ឬចន្លោះពេលដែលអ្នកជំងឺម្នាក់ៗឆ្លងមេរោគ ជាមួយនឹងការបង្ហាញអាការ ស្ថិតក្នុងអំឡុងពេលប្រមាណជា 10-14ថ្ងៃ នោះទើបមានន័យថា អ្នកជំងឺអាចចម្លងមេរោគបានដោយមិនដឹងខ្លួនក្នុងអំឡុងពេលនោះ និងធ្វើឱ្យការពិនិត្យសីតុណ្ហភាពអ្នកដំណើរដើម្បីរកមើលអាការគ្រុនក្ដៅខ្លួន ឬសូម្បីតែសាមីខ្លួនចូលបង្ហាញខ្លួនដោយខ្លួនឯងថា ឆ្លងមេរោគក៏ដោយនោះ បានក្លាយជារឿងដែលឥតប្រយោជន៍ក្នុងការទប់ស្កាត់ការឆ្លងមេរោគនេះ។
ឃែតធ្លីន ហ្កស្ទិក អ្នកជំនាញការមកពីមហាវិទ្យាល័យ ឈិកាហ្គោ ដែលជាអ្នកសរសេរអត្ថបទម្នាក់បានប្រាប់AFP ថា “យើងប៉ាន់ប្រមាណថា ជាមធ្យម វិធានការពិនិត្យលម្អិត នឹងមិនរកឃើញអ្នកដំណើរដែលឆ្លងមេរោគ ប្រមាណជា 2/3”
“អ្នកខ្លះមិនបង្ហាញអាការអ្វីទាំងអស់ អ្នកខ្លះនឹងបង្ហាញអាការនៅច្រើនថ្ងៃបន្ទាប់មក តាមរយៈទាំង 2យ៉ាងនេះ រឿងរ៉ាវទាំងនេះ គឺជាឧទាហរណ៍មួយនៃការពិបាកក្នុងការពិនិត្យលម្អិតលើអ្នកធ្វើដំណើរតាមយន្តហោះ ដែលយើងមានបំណងពិនិត្យរកឱ្យឃើញអ្នកឆ្លងមេរោគតាំងពីដំបូងៗឱ្យបានលឿនបំផុតតាមដែលអាចធ្វើទៅបាន តែអ្នកដំណើរជាច្រើនមិនបង្ហាញអាការរោគដែលអាចឱ្យយើងពិនិត្យរកឃើញក្នុងដំណាក់កាលដំបូងនៃការឆ្លងមេរោគនេះទេ” ឃែតធ្លីន រៀបរាប់បន្ថែម។
ឃែតធ្លីន ហ្កស្ទិក បានព្រមានថា ពិភពលោកអាចនឹងស្ថិតក្នុងចំណុចប្រែប្រួលមួយ ចំណុចដែលការពិនិត្យលម្អិត ឬសូម្បីតែវិធានការបង្ខាំងដើម្បីទប់ស្កាត់ការចម្លងមេរោគផ្សេងៗបែបដូចៗគ្នា ដែលយើងបានឃើញនៅក្នុងទីក្រុងវូហាននោះ លែងបានលទ្ធផលតទៅទៀត “ពេលនោះ រដ្ឋាភិបាលនៃប្រទេសនានា គួរតែចាប់ផ្ដើមគិតជាថ្មីពាក់ព័ន្ធនឹងការឆ្លងរាលដាលដ៏ធំទូទាំងទ្វីប ឬទូទាំងពិភពលោកបានហើយ”៕
ប្រភព ៖ សារព័ត៌មានបរទេស
February 27, 2020
សហរដ្ឋអាមេរិកត្រៀមវ៉ាក់សាំង Covid-19 ថ្មីរួចរាល់ហើយ សម្រាប់ធ្វើតេស្តនៅលើមនុស្ស នាពេលខាងមុខ
វ៉ាក់សាំងទប់ស្កាត់មេរោគ Covid-19 ឈុតដំបូងបង្អស់ ត្រូវបានផលិតរួចរាល់ហើយ ដោយប្រើធាតុហ្សែន mARN ដើម្បីបង្កើតជាប្រូតេអ៊ីនជួយឱ្យកោសិកាអាចស្គាល់វីរុស និងកម្ចាត់វាចោល។
Moderna Therapeutics ដែលជាក្រុមហ៊ុនបច្ចេកវិទ្យាជីវសាស្ត្រមួយនៅក្នុងតំបន់ Cambridge រដ្ឋ Massachusetts សហរដ្ឋអាមេរិក បាននាំយកវ៉ាក់សាំង Covid-19 ឈុតដំបូង មកកាន់វិទ្យាស្ថានជាតិគ្រប់គ្រងផ្នែកអាឡែរហ្សី និងជំងឺឆ្លង(National Institute of Allergy and Infectious Diseases/NIAID) នៃមន្ទីរសុខាភិបាលអាមេរិក(National Institutes of Health/NIH) នៅតំបន់ Bethesda ក្នុងរដ្ឋ Marryland ដើម្បីត្រៀមសម្រាប់ការពិសោធនៅលើមនុស្សនាដើមខែមេសាខាងមុខ។ វ៉ាក់សាំងនេះត្រូវបានបង្កើតឡើងក្រោយរយៈពេលត្រឹមតែ42ថ្ងៃប៉ុណ្ណោះ បន្ទាប់ពីប្រទេសចិនប្រកាសអំពីរបកគំហើញទាក់ទិននឹងលំដាប់ហ្សែនរបស់មេរោគកូរ៉ូណាកាលពីពាក់កណ្ដាលខែមករា។
វ៉ាក់សាំង Covid-19 របស់ Moderna ត្រូវបានអភិវឌ្ឍឡើងដោយប្រើពេលដ៏ខ្លី ដោយសារការប្រើប្រាស់វិធីសាស្ត្រថ្មីទាក់ទិននឹងហ្សែន ដែលនេះមិនទាមទារឱ្យមានការបណ្ដុះមេរោគនោះទេ។ ជំនួសមកវិញ វ៉ាក់សាំងនេះមានផ្ទុក mARN ដែលជាអង្គធាតុតំណពូជបានមកពី DNA ដែលអាចជួយបង្កើតប្រូតេអ៊ីន។ នៅពេលត្រូវបានចាក់បញ្ចូលទៅក្នុងរាងកាយអ្នកជំងឺ វ៉ាក់សាំងនេះនឹងជួយជំរុញឱ្យកោសិកានៅត្រង់កូនកណ្ដុរ(lymph nodes) ទទួលយក mARN ហើយបន្ទាប់មកវានឹងចាប់ផ្ដើមបង្កើតប្រូតេអ៊ីនដែលជួយកោសិកានៃប្រព័ន្ធការពាររាងកាយស្គាល់មេរោគ និងកម្ចាត់វាចោល។
“mRNA ដូចទៅនឹង Software ជីវសាស្ត្រ។ វ៉ាក់សាំងរបស់យើង ដូចទៅនឹងកម្មវិធី software សម្រាប់រាងកាយ វាជំរុញឱ្យរាងកាយបង្កើតប្រូតេអ៊ីនដើម្បីអាចបង្កើតប្រតិកម្មការពាររាងកាយ” នេះបើតាមបណ្ឌិត Stephen Hoge ប្រធានក្រុមហ៊ុន Moderna។ លោកបន្តថា វ៉ាក់សាំងប្រភេទនេះ អាចត្រូវបានផលិតបានឆាប់រហ័សក្នុងបរិមាណច្រើន ដែលនេះអាចជួយកាត់បន្ថយពេលវេលាក្នុងការប្រយុទ្ធប្រឆាំងនឹងអាសន្នរោគ Covid-19៕
ប្រភព៖ សារព័ត៌មានបរទេស
February 27, 2020
អ្នកវិទ្យាសាស្ត្រព្រមាន មេរោគ COVID-19 អាចនឹងទប់ទល់មិនឈ្នះ មនុស្សជាតិអាចឆ្លងមេរោគនេះ 70% និងស្លាប់ពី 10-100លាននាក់
បណ្ដាញអ្នកសារព័ត៌មាន បានរាយការណ៍កាលពីថ្ងៃទី26 កុម្ភៈម្សិលមិញថា The Atlantic បានបោះពុម្ពផ្សាយអត្ថបទយោងតាមអ្នកជំនាញខាងផ្នែកជំងឺឆ្លងវិទ្យា នៃមហាវិទ្យាល័យហាវ៉ាដ សហរដ្ឋអាមេរិកដែលបានព្រមានថា ការឆ្លងរាលដាលរបស់មេរោគវីរុស COVID-19 ដែលបានចម្លងមេរោគទៅមនុស្សជាង 80,000នាក់ និងមានអ្នកស្លាប់រួចទៅហើយចំនួនជិត 3,000នាក់នោះ អាចនឹងមិនអាចគ្រប់គ្រងបាន។
ក្រៅពីនេះ អត្ថបទនោះនៅបានបង្ហើបឱ្យដឹងទៀតថា ទោះជាគ្រូពេទ្យនៅប្រទេសចិន អ៊ីរ៉ង់ អ៊ីតាលី និងប្រទេសជាច្រើនទៀតកំពុងព្យាយាមយ៉ាងខ្លាំងក្លាក្នុងការពិនិត្យរកអ្នកឆ្លងមេរោគ និងបង្ខាំងពួកគេទាំងនោះក៏ដោយ តែនៅទីបំផុតទៅ មេរោគនេះក៏នៅតែឆ្លងរាលដាល និងចម្លងទៅប្រជាជននៅទូទាំងពិភពលោកក្នុងចំណែកប្រមាណជា 40-70%ក្នុងអំឡុងដំណាច់ឆ្នាំនេះ។
“ខ្ញុំគិតថា លទ្ធផលដែលចេញមក វាអាចទៅរួចខ្លាំងជាងដែលថា ទីបំផុតទៅ ពិភពលោកនឹងមិនអាចគ្រប់គ្រងមេរោគនេះបាន” ម៉ាក លិបស៊ិតឆ៍ អ្នកជំនាញខាងជំងឺឆ្លងវិទ្យាបានបញ្ជាក់ប្រាប់ The Atlantic។ ក្រៅពីនេះ លិបស៊ីតឆ៍ បានបញ្ជាក់ទៀតថា មេរោគវីរុសនេះនឹងឆ្លងរាលដាលបានមួយចំណែក ព្រោះអ្នកឆ្លងមេរោគដែលមានអាការមិនធ្ងន់ធ្ងរនឹងមិនអាចរារាំងមិនឱ្យពួកគេចេញក្រៅផ្ទះទៅធ្វើកិច្ចការងារប្រចាំថ្ងៃបានទេ ទើបធ្វើឱ្យមេរោគវីរុសមានឱកាសចម្លងមេរោគបានច្រើនឡើង ជាពិសេស ចំពោះអ្នកឆ្លងមេរោគជាច្រើនដែលមិនបង្ហាញអាការ។
ខណៈដែលសាស្ត្រាចារ្យ នីលស៍ ហ្គីលមែន មកពី Berggruen Institute បានសរសេរនៅក្នុងបណ្ដាញសង្គមធ្វីតធ្វើរ៍ផ្ទាល់ខ្លួនថា មានភាពអាចទៅរួចដែលថា មនុស្សជាតិនឹងឆ្លងមេរោគនេះ 70% និងបើគិតពីអត្រាការស្លាប់របស់អ្នកឆ្លងមេរោគត្រឹមតែ 1-3% ក៏អាចនឹងមានអ្នកស្លាប់ចាប់ពី 10-100លាននាក់ដែរ។
ទាំងអស់នេះ ទោះជាអ្នកស្លាប់ពីការឆ្លងមេរោគ COVID-19 ភាគច្រើនជាមនុស្សដែលមានអាយុច្រើនស្រាប់ហើយក៏ពិតមែន តែក៏មានអ្នកស្លាប់នៅក្នុងប្រទេសចិន ជាមន្ត្រីពេទ្យដែលមានអាយុនៅតិចដូចគ្នាដែរ៕
ប្រភព៖ សារព័ត៌មានបរទេស
February 27, 2020
ចំនួនអ្នកស្លាប់ដោយសារមេរោគកូរ៉ូណា កើនដល់ 492នាក់ ខណៈអ្នកជំងឺជាង 2,500នាក់ ស្ថិតក្នុងស្ថានភាពធ្ងន់ធ្ងរ
គិតមកដល់ព្រឹកនេះ (5កុម្ភៈ) ចំនួនអ្នកស្លាប់ដោយសារមេរោគកូរ៉ូណា កើនដល់ 492នាក់ ក្នុងនោះ 490នាក់នៅចិនដីគោក ចំណែកអ្នកដែលកំពុងផ្ទុកមេរោគនេះ កើនឡើងដល់ 24,551នាក់។
គណៈកម្មការសុខាភិបាលខេត្ត Hubei ថ្ងៃនេះ បានបញ្ជាក់ថា មានអ្នកស្លាប់ថ្មីចំនួន 65នាក់ ដែលនេះបានធ្វើឱ្យចំនួនអ្នកស្លាប់សរុបក្នុងខេត្តនេះ ឡើងដល់ 479នាក់។ ខេត្ត Hebei ក៏បានរកឃើញអ្នកជំងឺថ្មីចំនួន 3,156នាក់ផងដែរ ធ្វើឱ្យចំនួនអ្នកមានផ្ទុកមេរោគសរុបដល់ទៅ 16,678នាក់។ ក្នុងចំណោមអ្នកកំពុងមានផ្ទុកមេរោគកូរ៉ូណា មានអ្នកជំងឺជាង 2,500នាក់ កំពុងស្ថិតក្នុងស្ថានភាពធ្ងន់ធ្ងរ និងធ្ងន់ធ្ងរបំផុត។
យោងតាមគណៈកម្មការសុខាភិបាលចិន ចំនួនអ្នកមានផ្ទុកមេរោគរលាកសួតកើនបន្ថែម 3,887 នាក់ ធ្វើឱ្យចំនួនអ្នកឆ្លងសរុបឡើងដល់ 24,324នាក់៕
ប្រភព៖ សារព័ត៌មានបរទេស
February 5, 2020
ក្រសួងទេសចរណ៍ ដាក់ចេញវិធានការឆ្លើយតបនឹងការឆ្លងរាលដាលនៃជំងឺផ្លូវដង្ហើមថ្មី Corona
ក្រសួងទេសចរណ៍របស់កម្ពុជា ថ្មីៗនេះបានចេញសេចក្ដីប្រកាសព័ត៌មានមួយទាក់ទិននឹងវិធានការទប់ស្កាត់មេរោគរលាកសួត Corona។
នៅលើទំព័រ Facebook របស់ខ្លួន ក្រសួងទេសចរណ៍បានសរសេរថា៖ “ទោះជាពិភពលោកកំពុងប្រឈមនឹងជំងឺរលាកផ្លូវដង្ហើមថ្មី ដែលបង្កឡើងដោយវីរុសកូរ៉ូណា (Coronavirus)ក៏ដោយ ប៉ុន្តែកម្ពុជានៅតែជាគោលដៅទេសចរណ៍ដែលមានសុខសុវត្ថិភាពសម្រាប់ភ្ញៀវទេសចរគ្រប់គ្នា ដោយធានាបាននូវការគ្រប់គ្រងបញ្ហាជំងឺថ្មីនេះ ដោយហ្មត់ចត់”។
ក្រសួងទេសចរណ៍បានសរសេរទៀតថា៖ “ទោះជាយ៉ាងនេះក្តី ដើម្បីឆ្លើយតបនឹងស្ថានភាពដែលកំពុងផ្ទុះជំងឺនេះ ក្រសួងទេសចរណ៍បានដាក់ចេញនូវវិធានការមួយចំនួនផងដែរ”។
ឯកឧត្ដម បណ្ឌិត ថោង ខុន រដ្ឋមន្ត្រីក្រសួងទេសចរណ៍ ធ្លាប់បានប្រកាសដោយភាពជឿជាក់ថា កម្ពុជានៅតែជាគោលដៅទេសចរណ៍ដ៏កក់ក្តៅសម្រាប់ភ្ញៀវទេសចរគ្រប់គ្នា ដែលនៅតែមានការការពារសុវត្ថិភាព សន្តិសុខ សណ្តាប់ធ្នាប់ នៅតែត្រៀមទទួលស្វាគមន៍ វត្តមានភ្ញៀវអន្តរជាតិជានិច្ច ពិសេសគឺធានាបានការគ្រប់គ្រងបញ្ហាជំងឺរលាកសួតប្រភេទថ្មី (coronavirus) បានយ៉ាងជឿជាក់បំផុត។
ខាងក្រោមនេះជាសេចក្តីប្រកាសរបស់ក្រសួងទេសចរណ៍ អំពីវិធានការមួយចំនួនដែលឆ្លើយតបនឹងការផ្ទុះជំងឺផ្លូវដង្ហើមថ្មី Corona ៖

ប្រភព៖ ក្រសួងទេសចរណ៍
January 30, 2020
ចិនប្រើថ្នាំព្យាបាលអេដស៍ ព្យាបាលជំងឺរលាកសួតថ្មី Wuhan
គណៈកម្មាធិការសុខាភិបាលក្រុងប៉េកាំង បានឱ្យដឹងថា មន្ទីរពេទ្យចំនួន3 ផ្សេងគ្នា កំពុងប្រើថ្នាំព្យាបាលជំងឺអេដស៍ដើម្បីទប់ទល់ជំងឺរលាកសួតថ្មី nCoV (corona)។
ព័ត៌មានខាងលើនេះ ត្រូវបានគេចុះផ្សាយឱ្យដឹងនៅថ្ងៃទី26 ខែមករានេះ។ នេះគឺជាផ្នែកមួយនៃកិច្ចខិតខំរបស់ក្រុមមន្ត្រីសុខាភិបាលចិនក្នុងយុទ្ធនាការប្រយុទ្ធប្រឆាំងនឹងអាសន្នរោគ nCoV (ជាមេរោគបង្កឱ្យរលាកសួតថ្មី corona)។
វេជ្ជបណ្ឌិតកំពុងព្យាបាលអ្នកជំងឺរលាកសួតថ្មីដែលបង្កឡើងដោយមេរោគ nCoV
យោងតាមសេចក្ដីប្រកាសរបស់គណៈកម្មាធិការវេជ្ជសាស្ត្រក្រុងប៉េកាំង ប្រភេទថ្នាំដែលកំពុងប្រើប្រាស់មានឈ្មោះថា Lopinavir និង Ritonavir នេះ ត្រូវបានគេពិសោធឃើញថា មានប្រសិទ្ធភាពក្នុងការព្យាបាលប្រឆាំងនឹងមេរោគដ៏មហាប្រល័យ corona នេះ។
មន្ទីរពេទ្យទាំង3 ដែលទទួលបញ្ជាឱ្យពិសោធថ្នាំអេដស៍ទៅលើអ្នកជំងឺរលាកសួតថ្មីនេះ រួមមាន មន្ទីរពេទ្យ Beijing Ditan មន្ទីរពេទ្យ Beijing You’an និងមជ្ឈមណ្ឌលវេជ្ជសាស្ត្រលេខ5 នៃមន្ទីរពេទ្យពហុព្យាបាលយោធានៃប្រទេសចិន។
ប្រភពព័ត៌មានបានឱ្យដឹងថា លទ្ធផលនៃការប្រើប្រាស់ថ្នាំ Lopinavir រួមជាមួយនឹងថ្នាំ Ritonavir មកទល់នឹងពេលនេះ គឺមានប្រសិទ្ធភាពច្រើន។
សូមរំឭកថា កាលពីថ្ងៃទី25 មករា(ម្សិលមិញ) លោកវេជ្ជបណ្ឌិត Liang Wudong អាយុ 62ឆ្នាំ ដែលជាអ្នកព្យាបាលអ្នកជំងឺរលាកសួត wuhan បានស្លាប់បាត់បង់ជីវិត(ដោយសារឆ្លងមេរោគដ៏សាហាវនេះ)។ ទីភ្នាក់ងារសារព័ត៌មានចិននានា បានចេញផ្សាយថា លោក Liang Wudong គឺជាវេជ្ជបណ្ឌិតសំខាន់ជាងគេ ដែលចំណាយពេលច្រើននៅក្បែរ និងព្យាបាលអ្នកជំងឺរលាកសួតដោយមេរោគ nCoV នៅមន្ទីរពេទ្យ Hubei Xinhua ចាប់តាំងពីអាសន្នរោគនេះបានផ្ទុះឡើង៕
ប្រភព៖ សារព័ត៌មានបរទេស
January 26, 2020
វៀតណាមបញ្ជូនអ្នកដំណើរ 10នាក់ទៅកាន់មន្ទីរពេទ្យ ដោយសង្ស័យថាបានឆ្លងមេរោគរលាកសួតថ្មី wuhan
មន្ទីរពេទ្យ Da Nang នៃប្រទេសវៀតណាម បានរកឃើញ និងបានដាក់អ្នកដំណើរចំនួន 10នាក់ឱ្យនៅដាច់ដោយឡែក ក្នុងនាយកដ្ឋានវេជ្ជសាស្ត្រត្រូពិក ដើម្បីរង់ចាំលទ្ធផលនៃការធ្វើតេស្តរកមេរោគរលាកសួត Wuhan។
កាលពីព្រឹកមិញ (26 មករា) អគ្គនាយករងនៃមន្ទីរពេទ្យ Da Nang លោក Nguyen Thanh Trung បានឱ្យដឹងថា ក្នុងចំណោមមនុស្សទាំង10នាក់ដែលត្រូវដាក់ឱ្យនៅដាច់ដោយឡែកទាំងនោះ គឺមានជនជាតិចិន 6នាក់ ជនជាតិឆែកម្នាក់ និងជនជាតិវៀតណាម 3នាក់។
វេជ្ជបណ្ឌិតវៀតណាមម្នាក់បានឱ្យដឹងថា ក្នុងចំណោមជនជាតិចិនទាំងនោះ មិនមានអ្នកណាម្នាក់មកពីក្រុង Wuhan ទេ។
យោងតាមរបាយការណ៍ដំបូងពីអាជ្ញាធរ មានមនុស្សប្រហែល 15នាក់ ត្រូវបានគេដាក់ឱ្យនៅដាច់ដោយឡែកក្នុងមន្ទីរពេទ្យ Da Nang ប្រទេសវៀតណាម។ មនុស្សមួយចំនួនទៀត ត្រូវបានអនុញ្ញាតឱ្យចេញពីមន្ទីរពេទ្យ បន្ទាប់ពីមានលទ្ធផលបញ្ជាក់ថា មិនមានផ្ទុកមេរោគរលាកសួត corona ។
លោក Nguyen Thanh Trung បានឱ្យដឹងថា អ្នកដំណើរខាងលើទាំងអស់ត្រូវបានគេរកឃើញថា មានអាការក្ដៅខ្លួនខ្លាំង ពិសេសគឺអ្នកទេសចរជនជាតិចិន។ ក្រៅពីនេះ គឺជាបុគ្គលិកសណ្ឋាគារ រីហ្សត និងបុគ្គលិកនៅព្រលានយន្តហោះដែលធ្លាប់បាននៅក្បែរអ្នកទេសចរចិន។
លោក Nguyen Tien Hong អនុប្រធានមន្ទីរសុខាភិបាលក្រុង Da Nang ក៏បានឱ្យដឹងដែរថា កាលពីថ្ងៃទី25 កន្លងទៅ អ្នកទេសចរម្នាក់មកពីខេត្ត Hunan ប្រទេសចិន ត្រូវបានបញ្ជូនទៅកាន់មន្ទីរពេទ្យភ្លាមៗ បន្ទាប់ពីបានពិនិត្យឃើញថា មានកម្ដៅខ្លួនឡើងដល់ 38,8អង្សាសេ។
បច្ចុប្បន្ន ក្រុង Da Nang មិនទាន់មានករណីឆ្លងមេរោគរលាកសួតថ្មី Corona nCoV នៅឡើយ ប៉ុន្តែ ប៉ុន្មានថ្ងៃមុន អាជ្ញាធរក្រុង Da Nang ក៏ធ្លាប់បានរកឃើញភ្ញៀវទេសចរ 2នាក់ដែលមានកម្ដៅខ្លួនខ្ពស់ ទើបបញ្ជូនទៅកាន់មន្ទីរពេទ្យ ប៉ុន្តែ សំណាងល្អ ពួកគេមិនបានឆ្លងមេរោគដ៏សាហាវនេះទេ៕
ប្រភព៖ សារព័ត៌មានបរទេស
January 26, 2020
មេរោគរលាកសួតថ្មី Wuhan បានឆ្លងដល់ប្រទេសជិតខាងកម្ពុជា
ឱពុក និងកូនជនជាតិចិន 2នាក់ ដែលបានចូលសម្រាកព្យាបាលនៅមន្ទីរពេទ្យ Cho Ray ប្រទេសវៀតណាម ត្រូវបានគេរកឃើញថា មានផ្ទុកមេរោគដែលបង្កជំងឺរលាកសួតថ្មី Wuhan (មេរោគ corona)។ នេះជាករណីដំបូងដែលត្រូវបានគេកត់សម្គាល់នៅក្នុងប្រទេសនេះ។
កាលពីយប់ម្សិលមិញ (23 ធ្នូ) តំណាងមន្ទីរពេទ្យ Cho Ray នៃប្រទេសវៀតណាម បានបញ្ជាក់ថា ក្រុមគ្រូពេទ្យបានរកឃើញ 2នាក់ឱពុក និងកូនជនជាតិចិន មានផ្ទុកមេរោគរលាកសួតថ្មីនេះ។ អ្នកជំងឺជាឱពុកមានឈ្មោះថា Li Ding អាយុ 66ឆ្នាំ និងកូនប្រុសឈ្មោះ Li Zichao អាយុ 28ឆ្នាំ។
មូលហេតុដំបូងដែលនាំឱ្យឱពុក និងកូនប្រុសមានផ្ទុកមេរោគនេះ គេនៅមិនទាន់ដឹងនៅឡើយ ប៉ុន្តែគេជឿថា ម្នាក់ក្នុងចំណោមពួកគេអាចឆ្លងពីអ្នកដទៃ រួចក៏ចម្លងបន្ត។
Cho Ray គឺជាមន្ទីរពេទ្យធំ និងល្បីឈ្មោះបំផុតមួយរបស់វៀតណាម។ មន្ទីរពេទ្យនេះស្ថិតក្នុងក្រុងហូជីមិញ (សៃហ្គន ឬព្រៃនគរ) ដែលមានចម្ងាយពីក្រុងបាវិត ខេត្តស្វាយរៀង របស់កម្ពុជាប្រហែល 70គីឡូម៉ែត្រ បើធ្វើដំណើរតាមផ្លូវជាតិលេខ1។
សូមបញ្ជាក់ថា មេរោគ Corona ប្រភេទថ្មី ដែលធ្វើឱ្យកើតជំងឺរលាកសួត និងសម្លាប់មនុស្សយ៉ាងឆាប់រហ័សនេះ បានរាលដាលដល់ប្រទេសថៃ ជប៉ុន កូរ៉េខាងត្បូង និងកោះតៃវ៉ាន់ ហើយថ្មីៗនេះវាបានឆ្លងមកដល់ប្រទេសវៀតណាម ធ្វើឱ្យប្រជាជននៅក្បែរប្រទេសទាំងនេះមានការភ័យខ្លាច៕
ប្រភព៖ សារព័ត៌មានបរទេស
មេរោគបង្ករលាកសួតថ្មី Wuhan – 6 ចំណុចដែលអ្នកត្រូវដឹងពីវា ដើម្បីការពារជីវិត
ហាងទំនិញនៅជប៉ុន ដាក់បដា “ហាមជនជាតិចិន” មិនឱ្យចូលទិញ ព្រោះខ្លាច…
អ្នកស្លាប់ដោយសារឆ្លងជម្ងឺរលាកសួត Wuhan កើនជិតទ្វេដង៖ ពលរដ្ឋចិនកំពុងភ័យខ្លាច…
January 24, 2020
តើអាសន្នរោគនៅចិន បង្កផលវិបាកយ៉ាងណាដល់តម្លៃប្រេងពិភពលោក ខណៈមានបម្រាមគោចរនៅតំបន់មួយចំនួន
មកដល់ពេលបច្ចុប្បន្ន ប្រទេសចិនបានដាក់បម្រាមគោចរទៅលើរាល់សកម្មភាពចេញ-ចូលតំបន់ Wuhan ជាកន្លែងដែលមេរោគបង្កជំងឺរលាកសួត corona ដែលបានរកឃើញកាលពីខែមុន ហើយដែលក្រោយមកវាបាននិងកំពុងឆ្លងរាលដាលទៅតំបន់ផ្សេងៗក្នុងពិភពលោក។
ការជួញដូរក្នុងផ្សារមូលបត្រកាលពីថ្ងៃទី23 តម្លៃប្រេងបានធ្លាក់ថ្លៃជាលើកទី3។ តម្លៃមូលបត្រប្រេងនៅអាមេរិកបានធ្លាក់ថ្លៃក្នុងកម្រិតទាបបំផុតរាប់ចាប់ពីចុងខែវិច្ឆិកា ឆ្នាំ2019 ដោយសារមានការព្រួយបារម្ភអំពីកំណើនសេដ្ឋកិច្ច និងតម្រូវការប្រេងនឹងទទួលរងឥទ្ធិពលអាក្រក់ពីបញ្ហាអាសន្នរោគ Wuhan ឬហៅថា មេរោគរលាកសួត corona ដែលកំពុងរីករាលដាលយ៉ាងខ្លាំងក្លានៅក្នុងប្រទេសចិន។
ហានិភ័យទាក់ទិននឹងប្រភពផ្គត់ផ្គង់កើនឡើងខ្លាំង បើទោះជាការផលិតប្រេងរបស់លីប៊ី កំពុងអាក់ខានក៏ដោយ។ បញ្ហានេះក៏បានបង្កការបារម្ភកាន់តែច្រើនឡើងចំពោះអ្នកវិនិយោគដែរ។ បិទទ្វារក្នុងថ្ងៃព្រហស្បតិ៍ម្សិលមិញ តម្លៃប្រេងឆៅសម្រាប់ខែមិនា ឆ្នាំ2020 បានធ្លាក់ថ្លៃ 1.15ដុល្លារ/បារ៉ែល (ប្រហែល2%) ចុះមកនៅ 55.59ដុល្លារ/បារ៉ែល ជាតម្លៃទាបបំផុត បើគិតចាប់ពីថ្ងៃទី29 វិច្ឆិកា2019។ នេះបើយោងតាមការគណនាលើតារាងសន្ទស្សន៍មូលបត្រ Dow Jones Market Data។
តម្លៃប្រេង Brent សម្រាប់ខែមិនា ឆ្នាំ2020 ធ្លាក់ថ្លៃ 1.17ដុល្លារ/បារ៉ែល(ប្រហែល1.9%) មកនៅត្រឹម 62.04ដុល្លារ/បារ៉ែល។ នេះជាតម្លៃទាបបំផុត គិតចាប់ពីថ្ងៃទី3 ធ្នូ ឆ្នាំ2019។
និយាយអំពីបញ្ហាអាសន្នរោគ corona នៅប្រទេសចិនដែលធ្វើឱ្យប៉ះពាល់ដល់តម្លៃប្រេងនេះ បច្ចុប្បន្នចិនបានដាក់បម្រាមគោចរ ហាមមិនឱ្យមានសកម្មភាពចេញ-ចូលក្នុងតំបន់ Wuhan ជាកន្លែងដែលមេរោគរលាកសួត corona កំពុងឆ្លងរាលដាលខ្លាំង។ ប្រទេសសិង្ហបុរី កាលពីម្សិលមិញ (23 មករា 2020) ក៏បានបញ្ជាក់ថា ប្រទេសនេះមានករណីឆ្លងរោគ corona ជាលើកដំបូងផងដែរ។
គិតមកដល់បច្ចុប្បន្ន មេរោគរលាកសួត corona បានសម្លាប់មនុស្សយ៉ាងតិច17នាក់ និងជាង600នាក់ផ្សេងទៀតកំពុងផ្ទុកមេរោគនេះ។ ទីផ្សារហិរញ្ញវត្ថុនៃបណ្ដាប្រទេសធំៗក្នុងលោក កំពុងទទួលរងផលប៉ះពាល់ពីអាសន្នរោគ corona ក្នុងនោះផ្សារមូលបត្រចិន បានដាំក្បាលចុះកាលពីម្សិលមិញ នៅពេលអាសន្នរោគនេះកំពុងគ្រប់គ្រងបរិយាកាសបុណ្យចូលឆ្នាំចិននៅអាស៊ី។
ប្រធានផ្នែកហិរញ្ញវត្ថុនៃមូលនិធិ Velandera Energy លោក Manish Raj បានវាយតម្លៃថា ៖ “មកទល់នឹងពេលនេះ អាសន្នរោគ corona មិនទាន់ធ្វើឱ្យមានការប្រែប្រួលណាមួយទៅលើតម្រូវការប្រេង។ ប៉ុន្តែ នៅពេលអាជ្ញាធរចិនដាក់បម្រាមគោចរក្នុងក្រុងមួយចំនួន រួមទាំងតំបន់ Wuhan និងទីក្រុងចំនួន 2ផ្សេងទៀតនៅក្បែរនោះ។ សកម្មភាពធ្វើដំណើរ ប្រាកដជាថយចុះ ជើងហោះហើរនានានឹងត្រូវលុបចោលខ្លះ ហើយសកម្មភាពសេដ្ឋកិច្ចនៅចិនក៏នឹងត្រូវរួមតូចដែរ៕
ប្រភព៖ សារព័ត៌មានបរទេស
January 24, 2020