មូលធន - La Reine Media

ក្រុមហ៊ុនមេរបស់ Google មានតម្លៃពីរលានលានដុល្លារ ព្រោះប្រាក់ចំណូលកើនឡើងខ្ពស់

កាលពីថ្ងៃទី 25 មេសា Alphabet ដែលជាក្រុមហ៊ុនមេរបស់ Google បានប្រកាសឯកសារ បង្ហាញថា ប្រាក់ចំណូលក្នុងត្រីមាសដំបូងនៃឆ្នាំ 2024 កើន 15%។ Alphabet ក៏បានប្រកាសអំពីការចែកភាគលាភដំបូងផងដែរ។

ជាក់ស្ដែង ប្រាក់ចំណូលរបស់ Alphabet បានកើនដល់ 80.5ពាន់លានដុល្លារ ពី 69.8ពាន់លានដុល្លារកាលពីឆ្នាំមុន។

មូលបត្រ Alphabet កើនរហូតដល់ 13% នៅក្នុងការជួញដូរក្រៅម៉ោងធ្វើការ ជួយឱ្យក្រុមហ៊ុនរកចំណូលបន្ថែមបានជាង 250ពាន់លានដុល្លារ នាំឱ្យតម្លៃមូលធនទីផ្សារកើនដល់ជាងពីរលានលាន (2,000,000,000,000) ដុល្លារ។ លទ្ធផលនេះក៏ជួយឱ្យ Alphabet មានឈ្មោះក្នុងបញ្ជីកំពូលក្រុមហ៊ុនដែលរួមមាន Microsoft, Apple និង Nvidia ផងដែរ។

April 26, 2024

Bitcoin ឡើងថ្លៃរហូតដល់ជាង 71,000 ដុល្លារអាម៉េរិក

Bitcoin បន្តឡើងថ្លៃដល់កម្រិតកំពូលថ្មី នៅពេលកើនលើសពី 71,000 ដុល្លារអាម៉េរិក/Bitcoin កាលពីល្ងាចថ្ងៃទី 11 មីនា។

Bitcoin បានឡើងថ្លៃជិត 2.6% ក្នុងរង្វង់ 24 ម៉ោង និងលើសពី 10% គិតចាប់ពីថ្ងៃទី 04 មីនា។ តម្លៃមូលធនទីផ្សាររបស់ប្រាក់ឌីជីថល់គ្រីបស្តូធំបំផុតលើពិភពលោកមួយនេះ បានកើនលើសពី 1.4 លានលានដុល្លារ (1,400,000,000,000.00) បន្ទាប់ពីតម្លៃមួយ Bitcoin បានឡើងផុតពី 71,000 ដុល្លារ។

តម្លៃរបស់ Bitcoin ត្រូវបានរុញឡើងដោយការទទួលយក និងការទទួលស្គាល់របស់អ្នកវិនិយោគ និងស្ថាប័ននានា ដែលនាំមកនូវរំហូរប្រាក់ដ៏សម្បើមសម្រាប់ថ្នាលវិនិយោគនេះ។

Michael Anderson ស្ថាបនិកក្រុមហ៊ុនវិនិយោគប្រាក់ឌីជីថល់គ្រីបស្តូ Framework Ventures អះអាងថា ការឡើងថ្លៃលើកនេះរបស់ Bitcoin គឺខុសគ្នាឆ្ងាយ បើធៀបនឹងឆ្នាំ 2021។ «នេះទំនងជាវដ្ដមួយដែលនាំមុខដោយបណ្ដាស្ថាប័នហិរញ្ញវត្ថុ» លោក Anderson និយាយដូច្នេះ។

សារព័ត៌មាន New York Times ក៏បានអះអាងដូចលោក Anderson ដោយផ្សាយថា ភាពខុសគ្នានៃការឡើងថ្លៃរបស់ Bitcoin បច្ចុប្បន្ន ធៀបនឹងឆ្នាំ 2021 គឺនៅត្រង់ថា លើកនេះមានការចូលរួមរបស់ស្ថាប័នហិរញ្ញវត្ថុធំៗ ដែលមានដូចជា BlackRock និង Fidelity ជាដើម។

ក្រៅពី Bitcoin ក៏នៅមានរូបិយប័ណ្ណឌីជីថល់គ្រីបស្តូជាច្រើនផ្សេងទៀតដែលឡើងថ្លៃដល់កម្រិតកំពូលថ្មីជាបន្តបន្ទាប់។ ប្រាក់ Ethereum (ETH) ក៏ឡើងថ្លៃលើសពី 4,000 ដុល្លារ ខណៈតម្លៃរបស់ Solana (SOL) ហក់ឡើងជិតដល់ 150 ដុល្លារអាម៉េរិក៕

March 12, 2024

តម្លៃមូលធនទីផ្សារនៃក្រុមហ៊ុនមេរបស់ Facebook កើនជិត 200 ពាន់លានដុល្លារក្នុងមួយថ្ងៃ

អត្រាកំណើននៃតម្លៃមូលធនទីផ្សារកាលពីថ្ងៃទី 02 កុម្ភៈ 2024 របស់ក្រុមហ៊ុនមេរបស់បុត្រសម្ព័ន្ធ Facebook បង្កើតបានកំណត់ត្រាថ្មីនៅ Wall Street ដោយសារលទ្ធផលនៃការរកស៊ីមានភាពល្អប្រសើរ និងការប្រកាសអំពីការផ្ដល់ភាគលាភ។

ទីបញ្ចប់នៃវគ្គជួញដូរក្នុងថ្ងៃទី 02 កុម្ភៈ ភាគហ៊ុន Meta Platform កើន 20.3%។ នេះគឺជាកំណើនខ្ពស់បំផុតរបស់ភាគហ៊ុននេះនៅក្នុងមួយឆ្នាំកន្លង។ គិតចាប់ពីដើមឆ្នាំ ភាគហ៊ុន Meta បានកើន 35%។

តម្លៃមូលធនទីផ្សាររបស់ក្រុមហ៊ុននេះក៏កើនបន្ថែម 196 ពាន់លានដុល្លារអាម៉េរិក ដែលជាកំណើនខ្ពស់បំផុតក្នុងប្រវត្តិសាស្ត្រនៃបណ្ដាក្រុមហ៊ុនដែលបានចុះបញ្ជីនៅផ្សារហ៊ុនអាម៉េរិក។ អត្រានៃកំណើននេះខ្ពស់ជាងកំណត់ត្រាចាស់ 190 ពាន់លានដុល្លាររបស់ Amazon ដែលបង្កើតបានកាលពីខែកុម្ភៈ 2022។ តម្លៃមូលធនទីផ្សាររបស់ Meta បច្ចុប្បន្នគឺជាង 1,220 ពាន់លានដុល្លារ។

ភាគហ៊ុន Meta កើនឡើង បន្ទាប់ពីក្រុមហ៊ុននេះបានប្រកាសទិញភាគហ៊ុនតម្លៃ 50 ពាន់លានដុល្លារមកវិញ ព្រមទាំងផ្ដល់ភាគលាភជាលើកដំបូងក្នុងអត្រា 0.5 ដុល្លារក្នុងមួយហ៊ុន៕

February 3, 2024

Microsoft ផ្ដួល Apple និងក្លាយជាក្រុមហ៊ុនធំបំផុតលើពិភពលោក

ជាលើកដំបូងរាប់ពីឆ្នាំ 2021 តម្លៃមូលធនទីផ្សាររបស់ Microsoft បានលោតឡើងខ្ពស់ជាង Apple ហើយក៏ក្លាយជាក្រុមហ៊ុនដែលមានតម្លៃខ្ពស់បំផុតលើពិភពលោក។

បញ្ចប់ការជួញដូរកាលពីថ្ងៃទី 12 មករា ភាគហ៊ុន Apple បានកើន 0.2% ខណៈដែល Microsoft កើន 1%។ ដូច្នេះ តម្លៃមូលធនទីផ្សាររបស់ Microsoft ក៏ឡើងដល់ 2,887 ពាន់លានដុល្លារអាម៉េរិក ដែលជាតួលេខខ្ពស់ជាងគេបង្អស់នាបច្ចុប្បន្ន។ តម្លៃមូលធនទីផ្សាររបស់ Apple បច្ចុប្បន្នគឺ 2,875 ពាន់លានដុល្លារ។

ការបារម្ភអំពីតម្រូវការទូរស័ព្ទឆ្លាតវៃ បានអូសភាគហ៊ុន Apple ឱ្យធ្លាក់ចុះ 0.6% នៅក្នុងឆ្នាំនេះ បន្ទាប់ពីបានកើនដល់ 48% កាលពីឆ្នាំកន្លង។ ចំណែកភាគហ៊ុន Microsoft វិញ បានកើន 4% ក្រោយពីកើន 57% កាលពីឆ្នាំមុន។ យោងតាម Reuters អ្នកវិនិយោគមានការសប្បាយចិត្តខ្លាំងនៅពេល Microsoft វិនិយោគទៅលើ OpenAI ដែលជាក្រុមហ៊ុនមេរបស់ Chat GPT។

January 13, 2024

កម្ពុជា លើកទឹកចិត្តឱ្យធនាគារ រៀបចំឥណទានឡើងវិញចំពោះអ្នកទិញអចលនទ្រព្យដែលរងផលប៉ះពាល់ពីវិបត្តិសេដ្ឋកិច្ច

(ភ្នំពេញ) – គ្រឹះស្ថានធនាគារ និងហិរញ្ញវត្ថុទទួលបានការលើកទឹកចិត្តពី ប្រមុខរាជរដ្ឋាភិបាលកម្ពុជា ទាក់ទងនឹងការរៀបចំឥណទានឡើងវិញ ជូនដល់អតិថិជនរបស់ខ្លួនដែលបានខ្ចីប្រាក់ដើម្បីទិញអចលនទ្រព្យ និងកំពុងរងផលប៉ះពាល់ដោយសារវិបត្តិសេដ្ឋកិច្ច។

«លើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខធមស 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន់» សម្តេច ហ៊ុន ម៉ាណែត បានថ្លែងដូច្នេះនៅឯវិមានសន្ដិភាព កាលពីព្រឹកថ្ងៃទី 13 វិច្ឆិកា 2023 ក្នុងឱកាសអញ្ជើញជាអធិបតីនៃវេទិកា «រាជរដ្ឋាភិបាល -ផ្នែកឯកជន» លើកទី 19 ដើម្បីបើកការជជែកលើបញ្ហាធុរកិច្ចនៅកម្ពុជា។

ដោយសារតែវិស័យអចលនទ្រព្យបាន និងកំពុងរងផលប៉ះពាល់ធ្ងន់ធ្ងរពីវិបត្តិសុខភាព និងវិបត្តិផ្សេងៗទៀត រាជរដ្ឋាភិបាលក៏ដាក់ចេញនូវវិធានការមួយចំនួនដើម្បីចូលរួមដោះស្រាយ។ វិធានការទាំងនេះ រួមមានដូចខាងក្រោម៖

បន្តពន្យារពេលការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ 2024 សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបាននឹងកំពុងប្រតិបត្តិការគម្រោងអភិវឌ្ឍន៍លំនៅឋាន ដែលមានអាជ្ញាបណ្ណអចលនវត្ថុផ្តល់ដល់និយ័តករអាជីវកម្មអចលនវត្ថុ និងបញ្ចាំ។ល។
បង្កើនរយៈពេលនៃការបង់ពន្ធជាកញ្ចប់តាមដំណាក់កាលពី 12 ខែ ដល់ 18 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធតិចជាងមួយលានដុល្លារ និងពី 24 ខែ ដល់ 38 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធលើសពីមួយលានដុល្លារ។
ក្រុមហ៊ុនអភិវឌ្ឍន៍លំនៅឋានជាបុរីថ្មី ឬក្រុមហ៊ុនមានគម្រោងអភិវឌ្ឍន៍លំនៅឋានជាបុរី ដែលមិនទាន់បានអភិវឌ្ឍន៍ត្រូវបង់ពន្ធស្របតាម និតិវិធីជាព័ត៌មានរបបពិត និងត្រូវកាន់បញ្ជីគណនីឱ្យបានត្រឹមត្រូវ។
បន្តពន្យារពេលការអនុវត្តលើពន្ធចំណេញមូលធន សម្រាប់តែវិស័យអចលនទ្រព្យរហូតដល់ដំណាច់ឆ្នាំ2024។
បន្តលើកលែងពន្ធប្រថាប់ត្រាលើការផ្ទេរសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរី និងដែលមានតម្លៃក្រោម ឬស្មើនឹង 7 ម៉ឺនដុល្លាររហូតដល់ដំណាច់ឆ្នាំ 2024។
លើកទឹកចិត្ត និងស្នើឱ្យគ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខ 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន។
លើកលែងការផាកពិន័យផ្សេងៗចំពោះគម្រោងអភិវឌ្ឍន៍លំនៅឋានជាបុរី ប៉ុន្តែក្រុមហ៊ុនអភិវឌ្ឍចាំបាច់ត្រូវបំពេញកាតព្វកិច្ចសមស្របតាមប្រកាសស្តីពីការគ្រប់គ្រងអាជីវកម្មអភិវឌ្ឍអចលនវត្ថុ។
ពន្យារពេលអនុវត្តរហូតដល់ដំណាច់ឆ្នាំ 2023 លើសេចក្តីប្រកាសស្តីពីកាតព្វកិច្ចដាក់រាយការណ៍ហិរញ្ញវត្ថុឱ្យសវកម្មឯករាជ្យ ចេញដោយក្រសួងសេដ្ឋកិច្ច និងហិរញ្ញវត្ថុ។

រាជរដ្ឋាភិបាលក៏បានបង្កើតក្រុមការងារអន្តរក្រសួងចំនួនពីរ ដើម្បីតាមដាន ដោះស្រាយបញ្ហាប្រឈម នៅក្នុងវិស័យនេះអចលនទ្រព្យផងដែរ។

សម្តេចធិបតី ក៏បានដាក់ចេញនូវវិធានការមួយចំនួនទៀត ដើម្បីជួយដល់វិស័យអចលទ្រព្យ និងសំណង់ ក្នុងនោះសម្រាប់ផ្ទះមានតម្លៃលើស 7 ម៉ឺនដុល្លារអាមេរិក ត្រូវបានអនុញ្ញាតឱ្យដកតម្លៃ 7 ម៉ឺនដុល្លារអាមេរិកចេញពីមូលដ្ឋាន នៃការគិតពន្ធប្រថាប់ត្រា ក៏ដូចជាការលើកលែងពន្ធប្រថាប់ត្រាដល់អចលនទ្រព្យដែលត្រូវបានទិញ-លក់ក្នុងតម្លៃក្រោម 7 ម៉ឺនដុល្លារ រហូតដល់ឆ្នាំ 2024 ផងដែរ៕

November 14, 2023

ពិភពលោករកចំណូលបន្ថែមបាន 250 ពាន់លានដុល្លារ បើសិនក្រុមមហាសេដ្ឋីត្រូវបានយកពន្ធអប្បបរមា

គម្រោងស្រាវជ្រាវ EU Tax Observatory បានរកឃើញថា ប្រទេសនានានឹងមានប្រាក់ចំណូលបន្ថែមរាប់រយពាន់លានដុល្លារជារៀងរាល់ឆ្នាំ បើសិនយកពន្ធអប្បបរមា 2% នៅទូទាំងសកលលោកចំពោះក្រុមមហាសេដ្ឋី។

នៅក្នុងលទ្ធផលនៃការសិក្សាស្រាវជ្រាវដែលបានចុះផ្សាយនាថ្ងៃទី 23 តុលា 2023 EU Tax Observatory យល់ថា ដោយគ្រាន់តែយកពន្ធ 2% ចំពោះទ្រព្យសម្បត្តិជិត 13 ទ្រីលាន (13,000,000,000,000) ដុល្លារអាម៉េរិក របស់មហាសេដ្ឋី 2,700 នាក់នៅទូទាំងផែនដី ពិភពលោកនឹងមានប្រាក់ចំណូលបន្ថែម 250 ពាន់លានដុល្លារជារៀងរាល់ឆ្នាំ។ បច្ចុប្បន្ន ជាក់ស្ដែង អត្រាពន្ធលើប្រាក់ចំណូលបុគ្គលរបស់ក្រុមមហាសេដ្ឋី គឺទាបជាងឆ្ងាយ បើធៀបនឹងក្រុមដទៃ ដោយសារតែពួកគេអាចទុកដាក់ទ្រព្យទៅក្នុងបណ្ដាក្រុមហ៊ុនដែលមានតែឈ្មោះ ដើម្បីគេចពន្ធ។

ស្ថាប័នខាងលើបានរកឃើញថា ប្រាក់ចំណូលពីការបង់ពន្ធធៀបនឹងប្រាក់ចំណូលរបស់មហាសេដ្ឋីអាម៉េរិក គឺប្រហែលតែ 0.5% ប៉ុណ្ណោះ។ នៅបណ្ដាប្រទេសដូចបារាំងជាដើម អត្រានេះគឺប្រហែល 0%។

EU Tax Observatory ឱ្យដឹងថា ការប្រឹងប្រែងដើម្បីយកពន្ធលើទ្រព្យរបស់ក្រុមអ្នកមានជាងគេនៅទូទាំងសកលលោកនឹងត្រូវចំណាយពេលច្រើនឆ្នាំទៀត។ ក៏ប៉ុន្តែ ពួកគេនៅតែមានក្ដីសង្ឃឹម បើទោះមានការលំបាកក្នុងការកំណត់តម្លៃមូលធនរបស់ក្រុមហ៊ុនឯកជន៕

October 23, 2023

អតីតភរិយារបស់ស្ថាបនិក Google និយាយពីរឿងសហាយស្មន់នឹងម្ចាស់ SpaceX

មួយឆ្នាំក្រោយពីមានពាក្យចចរាមអារ៉ាមដែលថា បានសហាយស្មន់នឹង Elon Musk អ្នកស្រី Nicole Shanahan អតីតភរិយារបស់ស្ថាបនិក Google បានចេញមុខបដិសេធ និងបកស្រាយ ហើយថា «បានធ្លាក់ទឹកចិត្តទាំងស្រុង»។

ឆ្លើយតបនឹងសំណួររបស់ People កាលពីថ្ងៃទី 05 កក្កដា អ្នកស្រី Nicole Shanahan និយាយថា មិនមានរឿងសហាយស្មន់ជាមួយនឹងមហាសេដ្ឋី Elon Musk ទាល់តែសោះ។ អ្នកស្រីឱ្យដឹងថា គ្រាន់តែជជែកជាមួយ CEO របស់ SpaceX និង Tesla ដូចទៅនឹងមិត្តរួមការងារ។

«ខ្ញុំជជែកជាមួយ Musk អំពីកូនស្រីដែលមានជំងឺអូទីស្សឹម ព្រោះគាត់គ្រប់គ្រង Neuralink ជាក្រុមហ៊ុនជំនាញខាងស្រាវជ្រាវប្រព័ន្ធប្រសាទ» អ្នកស្រី Shanahan រៀបរាប់ដូច្នេះ។ មុននោះ លោក Musk ធ្លាប់បាននិយាយថា ឈីបខួរក្បាលរបស់ Neuralink នៅថ្ងៃណាមួយប្រាកដជាអាចព្យាបាលជំងឺអូទីស្សឹម និងជំងឺវិកលចរិតមិនខាន។

អ្នកស្រី Shanahan បញ្ជាក់ថា «នោះគឺជាការជជែកប្រកបដោយអត្ថន័យ។ ក៏ប៉ុន្តែ វាបែរជាត្រូវបានលាបពណ៌ដោយវិធីមិនសមស្រប។ រឿងនោះមិនយុត្តិធម៌»។

កាលពីខែកក្កដាឆ្នាំមុន WSJ បានរាយការណ៍ថា លោក Musk មានទំនាក់ទំនងរយៈពេលខ្លីជាមួយនឹង Shanahan នៅក្នុងពិធីបុណ្យ Art Basel នៅ Miami កាលពីខែធ្នូ 2021។ ពេលនោះ Sergey Brin ដែលជាសហស្ថាបនិករបស់ Google និងភរិយា កំពុងតែស្ថិតក្នុងដំណាក់កាលមុនបែកគ្នា ប៉ុន្តែនៅតែរស់ជាមួយគ្នា។

ក្នុងពិធីជប់លៀងមួយកាលពីដើមឆ្នាំ 2022 Musk ត្រូវបានគេជឿថា បានលុតជង្គង់សូមទោសនៅចំពោះមុខ Brin អំពីទង្វើរបស់ខ្លួន។ Brin ទទួលយកការសូមអភ័យទោសនេះ ប៉ុន្តែទំនាក់ទំនងរបស់ពួកគេមិនបានល្អដូចមុន។ យោងតាមឯកសារដែលបានដាក់ឡើងតុលាការនៅខណ្ឌ Santa Clara កាលពីខែមករា 2022 លោក Brin បានដាក់ពាក្យសូមលែងលះ ដោយលើកមូលហេតុថា «មានបញ្ហាមិនចុះសម្រុងគ្នាដែលមិនអាចផ្សះផ្សារបាន»។

Shanahan ឱ្យដឹងថា អ្នកស្រី និង Brin ទើបតែបានលែងលះជាផ្លូវការកាលពីពេលថ្មីៗនេះ បន្ទាប់ពីបានដោះស្រាយបញ្ហាផ្លូវច្បាប់ដែលបានស៊ីពេលអស់ 17 ខែ។

Shanahan បច្ចុប្បន្នគឺជាមេធាវីធ្វើការនៅ California ហើយក៏ជាស្ថាបនិករបស់ក្រុមហ៊ុនច្បាប់ ClearAccessIP និងមូលនិធិ Bia-Echo។ Brin និង Shanahan បានស្គាល់គ្នាកាលពីឆ្នាំ 2015 ហើយបានរៀបការកាលពីឆ្នាំ 2019 និងមានកូនស្រីម្នាក់។ មុនការចាប់ដៃគ្នា ពួកគេសុទ្ធតែជាមនុស្សដែលធ្លាប់បានលែងលះប្ដីប្រពន្ធម្ដងរួចហើយ។

យោងតាម Business Insider មហាសេដ្ឋី Brin និង Larry Page បានបង្កើតក្រុមហ៊ុន Google កាលពីឆ្នាំ 1998 និងបានរួមចំណែកជួយឱ្យក្រុមហ៊ុនអ៊ីនធើណិតនេះក្លាយជាក្រុមហ៊ុនដែលមានតម្លៃមូលធនទីផ្សារខ្ពស់ជាងគេមួយនៅក្នុងពិភពលក៕

July 6, 2023

ក្រុមហ៊ុនផលិតរថយន្តអគ្គិសនីវៀតណាម ច្របាច់បញ្ចូលគ្នានឹងក្រុមហ៊ុនអាម៉េរិក

ក្រុមហ៊ុនផលិតរថយន្តអគ្គិសនីវៀតណាម VinFast បានដាក់ឯកសារទៅកាន់ស្ថាប័នគ្រប់គ្រងមូលបត្រនៅសហរដ្ឋអាម៉េរិក ប្រកាសថា នឹងសម្រេចបានការច្របាច់បញ្ចូលគ្នាជាមួយ Black Spade Acquisition ក្នុងឆ្នាំ 2023។

យោងតាមសារព័ត៌មាន Reuters ការច្របាច់បញ្ចូលគ្នារវាងក្រុមហ៊ុនវៀតណាម VinFast និងក្រុមហ៊ុនអាម៉េរិក Black Spade នេះកំពុងស្ថិតក្នុងដំណាក់កាល Black Spade ស្នើសូមឱ្យអ្នកវិនិយោគពន្យារពេលធ្វើសកម្មភាពពីថ្ងៃទី 20 កក្កដា 2023 ទៅថ្ងៃទី 20 កក្កដា 2024។

VinFast មានតម្លៃមូលធនទីផ្សារប្រហែល 23 ពាន់លានដុល្លារអាម៉េរិក។ តម្លៃនេះគឺយោងទៅតាមការសម្រេចរបស់ក្រុមហ៊ុនអាម៉េរិក Black Spade។

Black Spade Acquisition គឺជាក្រុមហ៊ុន SPAC (បង្កើតឡើងក្នុងគោលដៅពិសេស)។ បណ្ដាក្រុមហ៊ុន SPAC ប្រមូលទុនតាមរយៈការធ្វើ IPO និងប្រើប្រាស់ខ្ទង់វិនិយោគដែលប្រមូលបានទៅទិញភាគហ៊ុនរបស់ក្រុមហ៊ុនគោលដៅដទៃ។ ការធ្វើ IPO លើផ្សារមូលបត្រតាមរយៈការច្របាច់បញ្ចូលជាមួយ SPAC កំពុងក្លាយជានិន្នាការថ្មី ព្រោះតែជួយឱ្យបណ្ដាក្រុមហ៊ុនរំលងចោលដំណើរការតាមទម្លាប់មុនៗរបស់ Wall Street។

VinFast ត្រូវបានដំណើរការតាំងពីឆ្នាំ 2019 ដោយមានរោងចក្រផលិតរថយន្តអគ្គិសនីនៅប្រទេសវៀតណាម និងកំពុងរៀបគម្រោងសាងសង់រោងចក្រទីពីរនៅសហរដ្ឋអាម៉េរិក។ ថ្មីៗនេះ លោក Pham Nhat Vuong ដែលជាប្រធានក្រុមហ៊ុន VinGroup (ក្រុមហ៊ុនមេរបស់ VinFast) និយាយថា VinFast អាចមានប្រាក់ចំណេញចាប់ពីឆ្នាំ 2025៕

June 19, 2023

តើត្រូវធ្វើដូចម្តេចទើបសហគ្រាសធុនតូច និងមធ្យមអាចទទួលបានការវិនិយោគមូលធនពីមូលនិធិឯកជន?

ការពង្រីកដើមទុនជារឿងសំខាន់មួយសម្រាប់ម្ចាស់សហគ្រាសធុនតូច និងមធ្យម ដែលកំពុងពង្រីកខ្លួនទៅកាន់សហគ្រាសខ្នាតធំ និងស្តង់ដា តែកន្លងមកការទទួលបានទុនវិនិយោគបន្ថែម ឬកម្ចីពង្រីកខ្លួនមិនមែនជារឿងងាយនោះទេសម្រាប់ម្ចាស់សហគ្រាស។

លោក សាន្ត ចន្ទកុម្ភៈ ជាគណនេយ្យករជំនាញ និងជាទីប្រឹក្សាហិរញ្ញវត្ថុសម្រាប់ជំនួយរបស់ក្រុមហ៊ុនធំៗមួយចំនួន បានលើកឡើងថា ការរៀបចំខ្លួនដើម្បីទទួលបានទុនវិនិយោគរបស់សហគ្រាសធុនតូច និងមធ្យមជារឿងលំបាកបន្តិច តែមិនមែនមានន័យថា យើងធ្វើមិនបានសោះនោះទេ។ វាទាមទារឱ្យមានការរៀបចំយុទ្ធសាស្ត្រត្រឹមត្រូវ និងរៀបចំខ្លួនឱ្យបានល្អដើម្បីបង្កើនជំនឿជាក់ដល់អ្នកវិនិយោគ។ លោកបញ្ជាក់ថា ដើម្បីឱ្យគេទុកចិត្ត លុះត្រាតែសហគ្រាសរបស់យើងមានរបាយការណ៍ហិរញ្ញវត្ថុដែលបានធ្វើសវនកម្មហិរញ្ញវត្ថុជាទៀងទាត់ ព្រោះការមានរបាយការណ៍ហិរញ្ញវត្ថុដែលត្រូវបានធ្វើសវនកម្មជារៀងរាល់ឆ្នាំយ៉ាងទៀងទាត់មានសារៈសំខាន់ខ្លាំងណាស់ចំពោះតម្លាភាពចំណូលចំណាយ និងទ្រព្យសកម្មរបស់ក្រុមហ៊ុន។ អ្នកវិនិយោគនឹងមានទំនុកចិត្តជាងមុនប្រសិនបើរបាយការណ៍ហិរញ្ញវត្ថុរបស់យើងមានភាពប្រក្រតី និងធានាសមហេតុផលដោយស្នងការគណនេយ្យអាជីព។ បើរបាយការណ៍ហិរញ្ញវត្ថុរបស់ក្រុមហ៊ុនរបស់យើងមិនមានតម្លាភាពទេនោះ យើងនឹងមិនអាចទទួលទុនបានច្រើននោះទេបើទោះបីជាគំរូអាជីវកម្មល្អក៏ដោយ។

លោក សាន្ត ចន្ទកុម្ភៈ បាននិយាយថា៖ “ការពង្រឹងជំនាញបុគ្គលិកក្នុងក្រុមហ៊ុនទាំងជំនាញទន់ និងជំនាញរឹង ក៏ជាផ្នែកដ៏សំខាន់ផងដែរក្នុងការទាក់ទាញការវិនិយោគបន្ថែម ព្រោះដូចអ្នកទាំងអស់គ្នាដឹងស្រាប់ហើយថា ក្រុមហ៊ុនដែលមានធនធានមនុស្សពូកែៗច្រើនតែរីកចម្រើនបានលឿន និងមាននិរន្តរភាព។ អ្នកវិនិយោគដែលចាប់អារម្មណ៍លើក្រុមហ៊ុនរបស់យើង និងវិភាគពីចំណេះដឹង និងជំនាញរបស់បុគ្គលិកក្នុងក្រុមហ៊ុនរបស់យើងជាពិសេសអ្នកគ្រប់គ្រងផ្នែក។ គេអាចនឹងដាក់ពិន្ទុតាមលក្ខខណ្ឌជាក់ស្តែងមុននឹងធ្វើការបណ្តាក់ទុន”។

អ្នកជំនាញគណនេយ្យ និងជាទីប្រឹក្សាហិរញ្ញវត្ថុខាងលើបានលើកឡើងផងដែរថា ក្រៅពីកត្តាទាំងប៉ុន្មានខាងលើនេះម្ចាស់សហគ្រាសខ្នាតតូចដែលចង់ទទួលបានការវិនិយោគក៏គូរតែព្យាយាមពង្រីកមូលដ្ឋានអតិថិជនឱ្យបានល្អ ព្រោះអាជីវកម្មមួយដែលពឹងតែប្រាក់ចំណូលពីអតិថិជន2-3នាក់មិនមែនជាអាជីវកម្មដែលអាចរីកចម្រើនប្រកបដោយនិរន្តរភាពនោះទេ។ ការពង្រីកមូលដ្ឋានអតិថិជន គឺជាចំណុចទាក់ទាញយ៉ាងសំខាន់ក្នុងក្រសែភ្នែករបស់អ្នកវិនិយោគ។ វាជាភស្តុតាងបញ្ចាក់ថាអាជីវកម្មរបស់យើងមានសុខភាពល្អហើយមិនពឹងផ្អែកលើអតិថិជន។ ទន្ទឹមនឹងនេះដើម្បីបង្កើនទំនុកចិត្តល្អដល់អ្នកវិនិយោគ យើងក៏គួរបង្កើនគម្រោងចាកចេញពីអាជីវកម្មផងដែរ។ អ្នកវិនិយោគមិនដែលចង់ធ្វើជាភាគហ៊ុននិកជាមួយក្រុមរបស់យើងមួយជីវិតនោះទេ ភាគច្រើនគេចង់មានពេល និងច្រកចេញពីការវិនិយោគក្នុងអាជីវកម្មដោយការលក់ភាគហ៊ុនរបស់ពួកគេក្នុងទឹកប្រាក់ចំណេញសមរម្យណាមួយនឹងផ្តល់អាទិភាពច្រើនចំពោះការពិចារណារបស់ពួកគេ។

លោកបានបន្ថែមទៀតថាដើម្បីឱ្យកាន់តែប្រសើរម្ចាស់អាជីវកម្មគួរសម្រួលកិច្ចសន្យាលក់ធ្វើយ៉ាងណាឱ្យមានកិច្ចសន្យាលក់ជាប្រចាំជាមួយអតិថិជនដែលមានស្រាប់ឱ្យបានកាន់តែច្រើនកាន់តែល្អ ព្រោះអាជីវកម្មមួយដែលមានកិច្ចសន្យាទិញលក់ជាប្រចាំទាំងទំនិញ ឬសេវាកម្មនឹងមានភាពរឹងមាំផ្នែកចំណូល និងសាច់ប្រាក់។ ដូច្នេះហើយយើងគួរតែព្យាយាមចុះកិច្ចសន្យាទិញលក់ជាប្រចាំដើម្បីយកទៅបង្ហាញអ្នកវិនិយោគ។ ទន្ទឹមនឹងនេះយើងគួរបង្កើតផលិតផល ឬសេវាកម្មថ្មីៗជានិច្ចផងដែរដើម្បីទ្រទ្រង់ដល់និរន្តរភាពអាជីវកម្ម ព្រោះភាពច្រំដែលជាសត្រូវនៃអាជីវកម្ម។ ម្ចាស់អាជីវកម្មត្រូវបង្កើតផលិតផល ឬសេវាកម្មថ្មីៗដែលបម្រើដល់តម្រូវការជាក់ស្តែង ឬជួយកាត់បន្ថយការចំណាយជូនអតិថិជន។ យើងអាចវាយតម្លៃផលិតផលរបស់ក្រុមហ៊ុន និងសក្តានុពលសាច់ប្រាក់នៅពេលអនាគតដែលបានមកពីផលិតផលរបស់យើង។ ការមានផលិតផលល្អក៏ជាចំណុចដ៏មានសក្តានុពលផងដែរសម្រាប់ទាក់ទាញអ្នកវិនិយោគ។

បន្ថែមពីលើនេះបើចង់លក់ភាគហ៊ុនឱ្យឆាប់បាន លុះត្រាតែភាគហ៊ុននេះមានតម្លៃសមរម្យ។ ត្រង់ចំណុចនេះយើងចង់សំដៅថាប្រសិនបើយើងចង់លក់ភាគហ៊ុនយើងដើម្បីបានទុនពង្រីកអាជីវកម្ម យើងមិនគួរលក់វាក្នុងតម្លៃដែលមិនអាចទទួលយកបាននោះទេ។ ការចូលហ៊ុនគ្នាប្រៀបបានទៅនឹងការរៀបការដូច្នោះដែរ ការវិនិយោគចំណេញតែងតែកើតឡើងនៅពេលមានការទិញហ៊ុនអាជីវកម្មនោះ។ ទន្ទឹមនឹងនេះម្ចាស់អាជីវកម្មក៏គួររៀនពីរបៀបទិញលក់ក្រុមហ៊ុនដោយអនុវត្តជាក់ស្តែងផងដែរ ព្រោះប្រសិនបើយើងមានអាជីវកម្មច្រើន យើងនឹងត្រូវរៀនពីរបៀបលក់ភាគហ៊ុនបន្ថែមទុនវិនិយោគ។ ការលក់ភាគហ៊ុនជូនអ្នកវិនិយោគអាជីពមានភាពស្មុគស្មាញដែលតម្រូវឱ្យយើងមានបទពិសោធជាក់ស្តែង។ យើងអាចរកមិត្តភក្តិដែលមានបទពិសោធផ្នែកនោះ ឬរកអ្នកប្រឹក្សាយោបល់បន្ថែមដើម្បីរៀបចំដំណើរការឱ្យរលូន។

លោក កុម្ភៈ បានបន្ថែមទៀតថា ការរៀបចំប្រព័ន្ធគ្រប់គ្រងល្អអាចជាវិធីដែលមិនអាចភ្លេចបានសម្រាប់អ្នកចង់លក់ភាគហ៊ុនសម្រាប់ពង្រីកខ្លួន។ ប្រព័ន្ធគ្រប់គ្រងផ្ទៃក្នុងល្អគួរតែធានានូវប្រសិទ្ធភាពការងារ ចំណាយតិចជាងមុន កាត់បន្ថយហានិភ័យអាជីវកម្មនិងធានានូវតម្លាភាពហិរញ្ញវត្ថុ។ វាថែមទាំងជួយកាត់បន្ថយពេល និងប្រាក់កាសដើម្បីធ្វើការវិភាគក្រុមហ៊ុនរបស់យើងដោយជំនាញថែមទៀតផង។ នៅពេលអ្នកវិនិយោគបានឃើញពីប្រព័ន្ធដ៏រឹងមាំនេះ គេនឹងមិនខ្លាចក្នុងការវិនិយោគនោះទេ។ តែទោះជាយ៉ាងនេះក្តីនៅមានចំណុចសំខាន់មួយទៀតផងដែរដែលត្រូវយកចិត្តទុកដាក់ នោះគឺចុះបញ្ជីកម្មសិទ្ធិបញ្ញាចំពោះទ្រព្យអរូបិយទាំងអស់របស់ក្រុមហ៊ុន។ ការធ្វើបែបនេះនឹងធ្វើឱ្យផលិតផល ឬសេវាកម្មទាំងអស់អាចការពារបានដោយច្បាប់កម្មសិទ្ធបញ្ញាសកលតាមអនុសញ្ញាទីក្រុង នីសទៀតផង។ វាអាចបូកតម្លៃបន្ថែមដល់អាជីវកម្ម និងធានាថាគ្មានអ្នកណាអាចបន្លំស្លាកសញ្ញាអាជីវកម្ម ផលិតផល ឬសេវាកម្មរបស់យើងបានពេញពិភពលោក៕

June 25, 2019

Tag: មូលធន