មនុស្ស - La Reine Media

ស្រឡាងមានទ្រុងដាក់យានយន្តបង្វែរដោយដៃតែមួយគត់លើពិភពលោក

(ស្កុតឡែន) – ស្រឡាង MV Glenachulish ត្រូវបានរចនាឡើងតាមបែបតុបង្វិលដោយដៃ ដែលមនុស្សម្នាក់ក៏អាចបង្វែរទិសរបស់ទ្រុងដាក់រថយន្ត 6 គ្រឿង បានដោយងាយ។

ស្រឡាងនេះធ្វើដំណើរទៅមករវាង Glenelg នៃតំបន់ Maninald ប្រទេសស្កុតឡែន និង Kylerhea នៅលើកោះ Skye។ នេះគឺស្រឡាងបែបតុបង្វិលតែមួយគត់ដែលនៅសល់ក្នុងពិភពលោក។ ពុំមានយន្តការដែលប្រើកម្លាំងទឹក ពុំមានម៉ាស៊ីនស្មុគស្មាញអ្វីទាំងអស់ មានតែភាពសាមញ្ញដ៏ល្អប្រសើរ។ នេះបើតាមអ្នកស្រី Jo Crawford ដែលជាអ្នកគ្រប់គ្រងស្រឡាង MV Glenachulish។

ស្រឡាងនេះ ដំបូងឡើយត្រូវបានផលិតឡើងដើម្បីប្រើប្រាស់នៅ Ballachulish មុនពេលតំបន់នេះមានស្ពាន។ នោះគឺជាបេតិកភណ្ឌរស់នៅក្នុងវិស័យនាវាចរណ៍ និងប្រវត្តិសាស្ត្រស្កុតឡែន។

ស្រឡាង MV Glenachulish ត្រូវបានផលិតឡើងដោយយោងតាមប្រព័ន្ធបង្វិលក្នុងវិស័យផ្លូវដែក ហើយវាមានលំនឹងរហូតដល់ថ្នាក់ មនុស្សម្នាក់ក៏អាចបង្វិលទ្រុងដាក់រថយន្ត 6 គ្រឿងបានដោយងាយ។ គ្រប់គ្នាក៏មិនចាំបាច់បត់ក្បាលរថយន្តនៅពេលឡើងចុះពីស្រឡាងនេះ។

MV Glenachulish អាចធ្វើសកម្មភាពដឹកជញ្ជូនបានគ្រប់ពេល មិនថាទឹកជោរ ឬនាច។ វាក៏អាចចតនៅបាតសមុទ្រ បើសិនជាត្រូវការចាំបាច់។ ដូច្នេះ បើទោះជាត្រូវជាប់គាំង វាក៏មិនមានបញ្ហាអ្វីធំដុំដែរ។

ស្រឡាងនេះធ្វើសកម្មភាពនៅ Glenelg តាំងពីឆ្នាំ 1982 ប៉ុន្តែទីនេះមានស្រឡាងទៅមករាប់រយឆ្នាំមកហើយ។

May 16, 2023

រថភ្លើងអាកាស បរក្រោមផ្លូវដែកមួយជួរនៅប្រទេសចិន ដំណើរការស្វ័យប្រវត្ត

រថភ្លើងដែលមានល្បឿន 60 គីឡូម៉ែត្រ/ម៉ោង ស្ថិតនៅក្នុងទីក្រុង Wuhan ខេត្ត Hubei ប្រទេសចិន ដំណើរការដោយស្វ័យប្រវត្ត និងស្ងាត់ នាំមកនូវបទពិសោធន៍ផាសុកភាពដល់អ្នកដំណើរ។

រថភ្លើងដែលមានឈ្មោះថា «Optics valley photon» ត្រូវបានព្យួរក្រោមផ្លូវដែកមួយជួរ ធ្វើឱ្យវាដូចទៅនឹងការបរត្រលប់ពីលើមកក្រោម។ នៅពេលរត់ខាងលើទីក្រុងនៅពេលយប់ រថភ្លើងនេះមានពន្លឺដ៏ស្រស់ស្អាត។

ធៀបនឹងរថភ្លើងអគ្គិសនីក្រោមដីដែលបរលើផ្លូវដែកពីរជួរបច្ចុប្បន្ន រថភ្លើងព្យួរក្រោមផ្លូវដែកមួយជួរនេះស្ងាត់ ល្អ និងមានផាសុកភាពជាង។ រថភ្លើងនេះក៏មិនត្រូវបានរំខានដោយមនុស្ស ឬយានយន្តដទៃ។ អស្ចារ្យជាងនេះ នោះគឺអ្នកដំណើរអាចគយគនទេសភាពទីក្រុងពីជ្រុងមួយខុសពីរថភ្លើងធម្មតា តាមរយៈបាតធ្វើពីកញ្ចក់។

រថភ្លើងព្យួរបញ្ច្រាសក្រោមផ្លូវដែកមួយជួរនេះដំណើរការប្រកបដោយភាពឆ្លាតវៃ ក្នុងល្បឿនអតិបរមា 60 គីឡូម៉ែត្រ/ម៉ោង។ ដំណើរការទាំងស្រុងរបស់រថភ្លើងនេះ រួមមាន ការបើកបិទទ្វារ ការចាប់ផ្ដើមរត់ និងការចូលចតក្នុងស្ថានីយ គឺសុទ្ធតែធ្វើឡើងដោយស្វ័យប្រវត្ត មិនបាច់មានជំនួយពីមនុស្ស។

រថភ្លើងនេះកំពុងដំណើរការដូចទៅនឹងផ្លូវទស្សនកិច្ចសម្រាប់ទេសចរនៅតំបន់អភិវឌ្ឍបច្ចេកវិទ្យាជាន់ខ្ពស់ East Lake (East Lake Hi-tech Development Zone) របស់ទីក្រុង Wuhan។

May 15, 2023

ហាងសម្លៀកបំពាក់អេស្ប៉ាញលំដាប់ពិភពលោកដំបូងគេបង្អស់នៅកម្ពុជា «ZARA» សម្ពោធបើកដំណើរការនៅភ្នំពេញ

(ភ្នំពេញ) – តើនាងកញ្ញា លោក លោកស្រី គឺជាមនុស្សស៊ីវិល័យដែលចូលចិត្ត និងមានបំណងស្វែងរកម៉ូដសម្លៀកបំពាក់ទាន់សម័យ និងថ្លៃថ្នូរលំដាប់ពិភពលោកមែនទេ? ZARA បានមកដល់កម្ពុជាយើងហើយ!

ក្រុមហ៊ុនគ្រប់គ្រង ម៉ាក ZARA បានសម្ពោធបើកដំណើរការហាងសម្លៀកបំពាក់លំដាប់ពិភពលោកដំបូងរបស់ខ្លួននៅកម្ពុជា ស្ថិតនៅផ្សារទំនើប ជីប ម៉ុង 271 មេហ្កាម៉ល ជាកន្លែងប្រមូលផ្ដុំនូវម៉ូដសម្លៀកបំពាក់ទាន់សម័យ និងសម្បូបែបសម្រាប់មនុស្សគ្រប់វ័យ។

នាងកញ្ញា លោក លោកស្រី អាចរកទិញសម្លៀកបំពាក់ថ្មីៗ ទាន់សម័យ សម្បូរបែប សម្រាប់គ្រប់វ័យ នៅឯហាង ZARA ក្នុងផ្សារទំនើប ជីប ម៉ុង 271 មេហ្កាម៉ល នៅរាជធានីភ្នំពេញ ដែលបើកដំណើរការលក់ចាប់ពីថ្ងៃទី13 ខែឧសភា ឆ្នាំ 2023 និងរកទិញបានតាមអនឡាញ តាមរយៈគេហទំព័រ Zara.com/kh។

ហាងសម្លៀកបំពាក់អន្តរជាតិដំបូងគេក្នុងប្រទេសកម្ពុជា របស់យីហោ ZARA ស្ថិតនៅក្នុងបរិវេណទំហំសរុប 3,300 ម៉ែត្រការ៉េ ដែលលាតសន្ធឹងពេញមួយជាន់នៃផ្សារទំនើប ជីប ម៉ុង 271 មេហ្កាម៉ល។ ផ្នែកខាងក្នុងរបស់ហាងនេះ ត្រូវបានរចនាដោយស្ទូឌីយោ ស្ថាបត្យកម្ម ZARA (Zara Architectural Studio) ដែលភាគច្រើនមានពណ៌ស្រស់ស្អាត ស៊ីគ្នានឹងពណ៌នានារបស់សម្លៀកបំពាក់ រួមគ្រឿងសង្ហារឹមធ្វើពីឈើ និងផ្ទៃពណ៌ធម្មជាតិដ៏ទាក់ទាញ។

ហាង ZARA មានទំហំធំទូលាយ ប្រមូលផ្ដុំសម្លៀកបំពាក់កីឡា ស្បែកជើង និងប្រដាប់ប្រដារផ្សេងៗដ៏ទាន់សម័យ។ ក្នុងហាង មានការតុបតែង និងរចនាគ្រឿងសង្ហារឹមប្លែកៗ និងរៀបចំទីតាំងស្តុកទំនិញថ្មីនៅជាប់ៗ គ្នា ផ្ដល់ភាពងាយស្រួលដល់អតិថិជន។

ហាង ZARA ត្រូវបានបំពាក់ឧបករណ៍បច្ចេកវិទ្យាដ៏មានប្រសិទ្ធភាព ដើម្បីផ្តល់ជូនអតិថិជននូវបទពិសោធន៍ម៉ូដែលសម្លៀកបំពាក់មួយគ្មានពីរ ដែលរួមបញ្ចូលជាមួយវេទិកាអនឡាញថ្មីបំផុតនៅកម្ពុជា ក្នុងនោះមានដូចជា Zara.com/kh តាមរយៈកម្មវិធី Zara និងមុខងារ Store Mode ជាដើម។ ZARA ផ្ដល់ភាពងាយស្រួលដល់អតិថិជន ដោយសារមានកម្មវិធីស្វែងរកទំនិញនៅក្នុងហាង តាមរយៈអ៊ីនធើណិត។ ទំនិញដែលលក់តាមអនឡាញមានតម្លៃដូចគ្នាទៅនឹងទំនិញលក់នៅក្នុងហាង ZARA ហើយអតិថិជនអាចសម្រេចចិត្តទិញមុខទំនិញដោយការដឹកជញ្ជូនដល់ផ្ទះ ឬទៅទិញផ្ទាល់នៅហាងក៏បាន។

មុខងារ «Store Mode» តាមរយៈកម្មវិធី ZARA ភ្ជាប់ប្រព័ន្ធអនឡាញជាមួយហាងនៅរាជធានីភ្នំពេញ។ មុខងារនេះអនុញ្ញាតឱ្យអតិថិជនរកមើលមុខទំនិញនៅក្នុងហាង និងបញ្ជាទិញទំនិញក្នុងរយៈពេលដ៏ខ្លី។ អតិថិជនក៏អាចប្រើបាស់កម្មវិធីនេះ ដើម្បីរកទីតាំងមុខទំនិញ នៅក្នុងហាងផងដែរ។

សម្រាប់ការដឹកជញ្ជូន គឺត្រូវបានរៀបចំឡើងដើម្បីផ្តល់ជូននូវផលិតផល ដែលបានបញ្ជាទិញតាមអនឡាញ ដោយការវេចខ្ចប់យ៉ាងប្រុងប្រយ័ត្ន មិនធ្វើឱ្យប៉ះពាល់ដល់បរិស្ថាន និងការពារមុខទំនិញក្នុងអំឡុងពេលដឹកជញ្ជូន។

មុខទំនិញត្រូវបានដឹកជញ្ជូនដោយឥតគិតថ្លៃ ដោយមិនគិតពីចំនួនមុខទំនិញ នៅពេលអតិថិជនសម្រេចចិត្តទិញមុខទំនិញនៅក្នុងហាង តាមរយៈសេវាដឹកជញ្ជូនស្តង់ដារពី 7 ទៅ 8 ថ្ងៃនៃថ្ងៃធ្វើការ។

អតិថិជនដែលជ្រើសរើសការដឹកជញ្ជូនដល់ផ្ទះ សម្រាប់ការដឹកជញ្ជូនតាមស្ទង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃលើសពី 320,000 រៀល នឹងមិនគិតថ្លៃដឹកជញ្ជូន។ ចំពោះការដឹកជញ្ជូនតាមស្តង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃក្រោម 320,000 រៀល នឹងមានការគិតថ្លៃដឹកជញ្ជូន 20,000 រៀល។

ចំពោះអតិថិជនដែលចង់ផ្លាស់ប្តូរទំនិញ តាមគោលការណ៍ផ្លាស់ប្តូរ និងប្រគល់ទំនិញត្រលប់ គឺដូចគ្នាសម្រាប់ទាំងការទិញនៅហាង និងតាមអនឡាញ ក្នុងនោះ អតិថិជនអាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ 30 ថ្ងៃ បន្ទាប់ពីបានទិញ។ ការប្រគល់ទំនិញគឺឥតគិតថ្លៃ សម្រាប់ការប្រគល់ទំនិញផ្ទាល់នៅហាង និងគិតថ្លៃ 20,000 រៀល សម្រាប់ការប្រគល់ទំនិញពីអាសយដ្ឋានរបស់អតិថិជន។

យីហោ Zara គឺជាផ្នែកមួយនៃក្រុមហ៊ុន Inditex ដែលជាក្រុមហ៊ុនលក់រាយសម្លៀកបំពាក់ទូទាំងពិភពលោក។ Inditex ក៏ជាម្ចាស់កម្មសិទ្ធិលើក្រុមហ៊ុនជាច្រើនទៀត រួមមាន ក្រុមហ៊ុន Pull&Bear, Massimo Dutti, Bershka, Stradivarius, Oysho, Zara Home និង Uterque ផងដែរ។ រឿងរ៉ាវស្ដីពី ZARA បានចាប់ផ្តើមជាមួយនឹងការបើកហាងដំបូង របស់ខ្លួននៅប្រទេសអេស្ប៉ាញ ក្នុងឆ្នាំ 1975 ហើយ បច្ចុប្បន្ននេះ ZARA មានវត្តមានទាំងនៅហាងផ្ទាល់ និងនៅលើហាងអនឡាញ នៅក្នុងទីផ្សារជាង 200 កន្លែង នៅទូទាំងពិភពលោក។ ដោយផ្តោតលើការច្នៃប្រឌិតឥតឈប់ឈរ ZARA ផ្តល់ជូននូវផលិតផលឈានមុខគេសម្រាប់ស្រ្តី បុរស និងកុមារ តាមរយៈគំរូអាជីវកម្មដែលធ្វើឱ្យអតិថិជនមានចំណាប់អារម្មណ៍លើអ្វីគ្រប់យ៉ាងដែលយើងមាន។

លើសពីនេះទៅទៀត ថ្នាក់ដឹកនាំរបស់យីហោ ZARA ក៏ដូចជា Inditex ក៏បានសន្យាថា នឹងសម្រេចឱ្យបានគោលដៅស្ដីពីការបន្សាបកាបូនដែលនឹងជួយទប់ស្កាត់ការឡើងកម្ដៅផែនដីនៅត្រឹមឆ្នាំ 2040 ផងដែរ៕

ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល

May 13, 2023

មហាសេដ្ឋី Elon Musk រកបាន CEO ថ្មី សម្រាប់ Twitter

មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk បានឱ្យដឹងថា រកបានមនុស្សសម្រាប់តំណែងនាយកប្រតិបត្តិរបស់ Twitter ហើយមនុស្សថ្មីនេះនឹងចូលមកដឹកនាំបណ្ដាញសង្គមនេះ នាពេលឆាប់ៗ។

«រីករាយប្រកាសថា ខ្ញុំបានជ្រើសរើស CEO ថ្មីសម្រាប់ X/Twitter។ គាត់នឹងចាប់ផ្ដើមធ្វើការក្រោយរយៈពេលប្រហែល 6 សប្ដាហ៍ទៀត។ ខ្ញុំនឹងងាកទៅបំពេញតួនាទីជាប្រធាន និង CTO (Chief Technology Officer) ដែលគ្រប់គ្រងផលិតផល សបវ៉ែ និងប្រព័ន្ធ» លោក Elon Musk សរសេរលើ Twitter ដូច្នេះ។

លោក Musk មិនទាន់បង្ហើបឱ្យដឹងថា CEO ថ្មីនេះជាអ្នកណា ប៉ុន្តែ បើយោងតាមទំព័រ Wall Street Journal នាយកប្រតិបត្តិថ្មីនេះអាចជា Linda Yaccarino ប្រធានផ្នែកទំនាក់ទំនងភាពជាដៃគូសហការ និងផ្សព្វផ្សាយសាកលរបស់ NBCUniversal ដែលជាក្រុមហ៊ុនកំសាន្ត និងផ្សព្វផ្សាយ ជាកម្មសិទ្ធិរបស់ Comcast មានទីស្នាក់ការកណ្ដាលនៅ New York សហរដ្ឋអាម៉េរិក។

មុននោះ Business Insider ដកស្រង់ប្រភពព័ត៌មានក្នុងវិស័យប្រព័ន្ធផ្សព្វផ្សាយ ឱ្យដឹងថា Yaccarino មានបំណងក្លាយជា CEO របស់ Twitter ។ អ្នកស្រីក៏ត្រូវបានគេដឹងថា បាននិយាយរឿងនេះប្រាប់មិត្តភក្ដិមួយចំនួនផងដែរ។

ទាក់ទងនឹងពាក្យចចាមអារ៉ាមស្ដីពីអ្នកស្រី Yaccarino ភាគីខាង Twitter ក៏ដូចជាលោក Musk មិនទាន់មានការអធិប្បាយអ្វីនៅឡើយ។

ក្រៅពីអ្នកស្រី Yaccarino តំណែង CEO របស់ Twitter នេះក៏អាចធ្លាក់ទៅលើដៃ Ella Irwin ដែលបច្ចុប្បន្នកំពុងដឹកនាំផ្នែកគ្រប់គ្រងទំនុកចិត្ត និងសុវត្ថិភាពរបស់ Twitter។ ក៏ប៉ុន្តែ ចំណាប់អារម្មណ៍របស់សាធារណជន កំពុងផ្ដោតខ្លាំងទៅលើ អ្នកស្រី Yaccarino៕

May 12, 2023

មហាគម្រោងស្ពានបង្ហូរទឹកប្រវែងជាង 700 គីឡូម៉ែទ្រនៅប្រទេសចិន

គម្រោងស្ពានបង្ហូរទឹកពីទន្លេ Yangtze ទៅកាន់ទន្លេ Huaihe ដែលមានកម្មករ 20,000 នាក់ សាងសង់ក្នុងរយៈពេល 6 ឆ្នាំ នាំមកនូវផលប្រយោជន៍យ៉ាងច្រើនដល់មនុស្ស និងប្រព័ន្ធជីវចម្រុះ។

«សួស្ដីគ្រប់គ្នា ខ្ញុំឈ្មោះ Wendy មកពីប្រទេសគុយបា។ ដូចដែលគ្រប់គ្នាបានឃើញ មានទន្លេមួយនៅក្បែរខ្ញុំ ហើយនៅក្រោមជើងខ្ញុំក៏មានទន្លេមួយដែរ ដែលដូចទៅនឹងស្ពានអាកាសឆ្លងផ្លូវទឹក» Wendy ដែលជានិស្សិតគុយបា នៃសាកលវិទ្យាល័យបច្ចេកវិទ្យា Hefei (Hefei University of Technology) នៅប្រទេសចិន ណែនាំអំពីមហាគម្រោងស្ពានបង្ហូរទឹកប្រវែងជាង 700 គីឡូម៉ែទ្រនៅប្រទេសចិន។

«ទិដ្ឋភាពដ៏អស្ចារ្យនេះបង្កើតឡើងដោយស្ពាននាំទឹកដ៏វែងមួយ ហើយក៏ជាកន្លែងដែលខ្ញុំកំពុងឈរ។ ស្ពានបង្ហូរទឹកនេះមានចន្លោះសសរវែងបំផុត ក្នុងចំណោមហេដ្ឋារចនាសម្ព័ន្ធប្រភេទនេះនៅលើពិភពលោក និងដើរតួនាទីសំខាន់នៅក្នុងគម្រោងបង្ហូរទឹក ដែលមានគោលដៅផ្លាស់ទិសរបស់លំហូរទឹកទន្លេ Yangtze ទៅកាន់ទន្លេ Huaihe»។

«គម្រោងប្ដូរទិសទឹកទន្លេនេះ បានចាប់ផ្ដើមដំណើរការសាកល្បងកាលពីចុងឆ្នាំកន្លង បន្ទាប់ពីការសាងសង់អស់រយៈពេល 6 ឆ្នាំ ដែលប្រើប្រាស់កម្មករជាង 20,000 នាក់»។

ដោយមានប្រវែង 723 គីឡូម៉ែត្រ គម្រោងនេះផ្គត់ផ្គង់ទឹកដល់ទីក្រុងចំនួន 15 នៅក្នុងខេត្ត Anhui ភាគខាងកើតប្រទេសចិន និងខេត្ត Henan ភាគកណ្ដាលប្រទេសចិន នាំមកនូវផលប្រយោជន៍ដល់មនុស្សជាង 50 លាននាក់។

ក្រៅពីការផ្គត់ផ្គង់ទឹក និងអភិវឌ្ឍវិស័យដឹកជញ្ជូន គម្រោងនេះក៏បម្រើដល់ការស្រោចស្រពដំណាំ និងជួយស្ដារបរិស្ថានរបស់ទន្លេ Huaihe និងបឹង Chaohu។

យោងតាមលោក Zhang Jianjin ដែលជាវិស្វករនៃគម្រោងខាងលើ ស្ពានដែកនេះគឺជាផ្លូវផ្គត់ផ្គង់ទឹកសំខាន់ជាងគេសម្រាប់ទីក្រុង Hefei និង Lu’an ក្នុងខេត្ត Anhui។ ស្ពាននេះមានកម្ពស់ជាង 30 ម៉ែត្រ ធៀបទៅនឹងព្រែករបស់មហាគម្រោងបង្ហូរទឹកនេះ។ ចន្លោះរវាងសសរប្រវែង 110 ម៉ែត្ររបស់ស្ពាននេះ គឺវែងជាង 3.8 ម៉ែត្រ ធៀបនឹងចន្លោះសសររបស់ស្ពានទឹក Magdeburg (Magdeburg Water Bridge) ទៅទៀត។ ស្ពាននេះមានចន្លោះសសរវែងជាងគេបង្អស់ធៀបនឹងហេដ្ឋារចនាសម្ព័ន្ធប្រភេទនេះនៅលើពិភពលោក។

មហាគម្រោងស្ពានបង្ហូរទឹកប្រវែងជាង 700 គីឡូម៉ែទ្រនៅប្រទេសចិន

ស្ពានបង្ហូរទឹកទន្លេខាងលើមានស្ថានីយបូមទឹកធំជាងគេនៅអាស៊ី ដោយធ្វើឱ្យស្ពានទឹកនេះមានលំហូរសរុប 340 ម៉ែត្រគូប/វិនាទី។ ស្ពាននេះក៏យកចិត្តទុកដាក់លើបរិស្ថានដែលពាក់ព័ន្ធផងដែរ៕

May 9, 2023

រុស្ស៊ី ប្រារព្ធពិធីដង្ហែព្យុហយាត្រាអបអរជ័យជម្នះនៅថ្ងៃនេះ

ព្រឹត្តិការណ៍ដង្ហែក្បួនព្យុហយាត្រាអបអរជ័យជម្នះរបស់រុស្ស៊ី គ្រោងនឹងធ្វើឡើងនៅល្ងាចនេះនៅឯទីលានក្រហម ដោយមានការចូលរួមរបស់ទាហានរុស្ស៊ីជាង 10,000 នាក់ រួមនឹងអាវុធនានារបស់ប្រទេសនេះ។

ពិធីដង្ហែក្បួនព្យុហយាត្រាអបអរជ័យជម្នះ 78 ឆ្នាំនៃថ្ងៃកងទ័ពក្រហមសូវៀត បានផ្ដួលរំលំរបបហ្វាស៊ីសអាល្លឺម៉ង់ បញ្ចប់សង្គ្រាមស្នេហាជាតិដ៏អស្ចារ្យ (Great Patriotic War) នេះ នឹងធ្វើឡើងនៅវេលាម៉ោង 10 ថ្ងៃទី 09 ឧសភា (ម៉ោងប្រហែល 14 នៅកម្ពុជា) នៅទីលានក្រហម (Red Square) ក្នុងរដ្ឋធានីមូស្គូ។ ទាហានរុស្ស៊ីជាង 10,000 នាក់ រួមនឹងអង្គភាពអាវុធចំនួន 125 នឹងចូលរួមពិធីខាងលើនេះ។

ប្រធានាធិបតីរុស្ស៊ី លោក ពូទីន រួមនឹងមេដឹកនាំប្រទេសមួយចំនួន ក្នុងនោះមាន បេឡារុស អាមេនី កៀហ្ស៊ីស៊ីស្ថាន តាហ្ស៊ីគីស្ថាន អ៊ូសបេគីស្ថាន និងកាហ្សាក់ស្ថានជាដើម នឹងបង្ហាញវត្តមាននៅក្នុងព្រឹត្តិការណ៍នេះផងដែរ។

ពិធីដង្ហែព្យុហយាត្រាអបអរជ័យជម្នះនៅក្នុងឆ្នាំនេះរបស់រុស្ស៊ី ធ្វើឡើងក្នុងស្ថានការណ៍សន្តិសុខត្រូវបានរឹតបន្តឹងខ្លាំងនៅទូទាំងប្រទេស បន្ទាប់ពីមានការវាយប្រហារពីយន្តហោះគ្មានមនុស្សបើកបរ (UAV) ទៅលើហេដ្ឋារចនាសម្ព័ន្ធជាច្រើនករណី គ្រាដែលកងទ័ពប្រទេសនេះកំពុងឈ្លានពានទឹកដីអ៊ុយក្រែន។

សង្គ្រាមស្នេហាជាតិដ៏អស្ចារ្យ (1941-1945) គឺជាសង្គ្រាមធំបំផុត និងបង្កឱ្យមានមនុស្សស្លាប់ និងរបួសច្រើនបំផុតក្នុងប្រវត្តិសាស្ត្រមនុស្សជាតិ ក្នុងនោះមានទាហាន និងប្រជាជនសូវៀត ប្រហែល 27 លាននាក់បានបាត់បង់ជីវិតដើម្បីការពារប្រទេស និងមនុស្សជាតិពីពួកហ្វាស៊ីសនិយម។

សង្គ្រាមនេះបានបញ្ចប់នៅថ្ងៃទី 09 ឧសភា 1945 នៅពេលតំណាងហ្វាស៊ីសអាល្លឺម៉ង់ ចុះហត្ថលេខាទទួលស្គាល់ការចុះចាញ់ដោយគ្មានលក្ខខណ្ឌនៅចំពោះមុខតំណាងសម្ព័ន្ធមិត្តនៅបែរឡាំង។ កងទ័ពក្រហមសូវៀតបានប្រារព្ធពិធីដង្ហែក្បួនព្យុហយាត្រាអបអរជ័យជម្នះជាលើកដំបូងកាលពីថ្ងៃទី 24 មិថុនា 1945។ ក្រោយមក ព្រឹត្តិការណ៍នេះក៏ត្រូវបានធ្វើឡើងនៅថ្ងៃទី 09 ឧសភា ក្នុងឆ្នាំ 1965, 1985 និង 1990។

ក្រោយពីសូវៀតបានដួលរលំ រុស្ស៊ីក៏បានប្រារព្ធពិធីនេះឡើងវិញនៅមូស្គូចាប់ពីឆ្នាំ 1995។ ចាប់តាំងពីពេលនោះមក ព្រឹត្តិការណ៍នេះក៏ត្រូវបានធ្វើឡើងជារៀងរាល់ឆ្នាំនៅថ្ងៃទី 09 ឧសភា។ ក៏ប៉ុន្តែ កាលពីឆ្នាំ 2020 ព្រឹតត្តិការណ៍នេះត្រូវបានលើកទៅធ្វើនៅថ្ងៃទី 24 មិថុនា ដោយសារតែវិបត្តិកូវីដ-19៕

May 9, 2023

ទិដ្ឋភាពស្ទើរតែមិនធ្លាប់មាននៅកម្ពុជា ទាក់ទិននឹងការគាំទ្រវិស័យបាល់ទាត់

មនុស្សរាប់ពាន់នាក់ប្រមូលផ្ដុំគ្នានៅទីតាំងចែកសំបុត្រចូលទស្សនាការប្រកួតបាល់ទាត់របស់ក្រុមជម្រើសជាតិបុរស និងនារីកម្ពុជា នៅស៊ីហ្គេមលើកទី 32។

បើទោះជាថ្ងៃក្ដៅខ្លាំង មនុស្សរាប់ពាន់នាក់ដែលជាអ្នកគាំទ្ររបស់កម្ពុជា នៅតែប្រមូលផ្ដុំគ្នាលើផ្លូវតាំងពីព្រឹកព្រលឹម ថ្ងៃទី 06 ឧសភា 2023 ដើម្បីរង់ចាំទទួលសំបុត្រដោយមិនគិតថ្លៃពីសហព័ន្ធបាល់ទាត់កម្ពុជា (FFC) សម្រាប់ការចូលទស្សនាការប្រកួតបាល់ទាត់របស់ក្រុម U-22 និងក្រុមនារីរបស់កម្ពុជានាពេលខាងមុខ។

ទិដ្ឋភាពមនុស្សរាប់ពាននាក់ប្រជ្រៀតគ្នានេះ ធ្វើឱ្យមនុស្សមួយចំនួនមានការព្រួយបារម្ភចំពោះសុវត្ថិភាព សុខភាពរបស់បងប្អូនកូនចៅដែលទៅកាន់កន្លែងចែកសំបុត្រ ព្រោះថា មនុស្សមានចំនួនប្រើន ខណៈកម្ដៅថ្ងៃក៏កាន់តែក្ដៅ។

ទោះជាយ៉ាងណាក៏ដោយ សមត្ថកិច្ចក៏បានបង្ហាញវត្តមាននៅខាងមុខកន្លែងចែកសំបុត្រ និងបានរៀបចំសណ្ដាប់ធ្នាប់ដើម្បីបង្ការបញ្ហាណាមួយកើតឡើងជាយថាហេតុ។

នៅស៊ីហ្គេមលើកទី 32 គិតត្រឹមម៉ោង 12 ថ្ងៃត្រង់ ថ្ងៃទី 06 ខែឧសភា ឆ្នាំ 2023 នេះ ម្ចាស់ផ្ទះកម្ពុជាដណ្ដើមបានមេដាយមាសចំនួន 6 គ្រឿង ឈរលើកំពូលតារាងចំណាត់ថ្នាក់ ខណៈដែលមេដាយសរុប កម្ពុជារកបាន 12 គ្រឿង។

May 6, 2023

ម៉ាស៊ីនប្រតិកម្មនុយក្លេអែរខ្នាតតូចរបស់ Westinghouse អាចផ្គត់ផ្គង់អគ្គិសនីដល់មនុស្ស 300,000 គ្រួសារ

(សហរដ្ឋអាម៉េរិក) – ម៉ាស៊ីនប្រតិកម្មនុយក្លេអែរ ឬរ៉េអាក់ទ័រនុយក្លេអែរ AP300 របស់ក្រុមហ៊ុន Westinghouse មានកម្លាំង 300 ម៉េហ្គាវ៉ាត់ គ្រប់គ្រាន់សម្រាប់ផ្គត់ផ្គង់អគ្គិសនីដល់តម្រូវការរបស់មនុស្ស 300,000 គ្រួសារ។

ក្រុមហ៊ុន Westinghouse ថ្មីៗនេះ បានបង្ហាញ AP300 ដែលជាកំណែតូចរបស់ម៉ាស៊ីនប្រតិកម្មនុយក្លេអែរ AP1000 នៅក្នុងកិច្ចប្រឹងប្រែងដើម្បីពង្រីកសមត្ថភាពប្រើប្រាស់ថាមពលនុយក្លេអែរ ដោយសារតែតម្រូវការ ថាមពលស្អាតកើនឡើងខ្ពស់។ តាមផែនការ ម៉ាស៊ីនប្រតិកម្មនុយក្លេអែរ AP300 នឹងដំណើរការចាប់ពីឆ្នាំ 2027 និងផ្គត់ផ្គង់អគ្គិសនីក្នុងបរិមាណស្មើនឹង ¼ នៃថាមពលរបស់ម៉ាស៊ីន AP1000។ នេះបើតាមរបាយការណ៍របស់ក្រុមហ៊ុន Westinghouse ដែលបានប្រកាសកាលពីថ្ងៃទី 04 ឧសភា។

ម៉ាស៊ីនប្រតិកម្មនុយក្លេអែរ មិនបញ្ចេញឧស្ម័នផ្ទះកញ្ចក់ ហើយម៉ាស៊ីនកាន់តែតូច ការចំណាយក្នុងការអភិវឌ្ឍក៏កាន់តែទាប។ AP300 នឹងមានការចំណាយប្រហែលមួយពាន់លានដុល្លារអាម៉េរិក/គ្រឿង ខណៈដែល AP1000 ត្រូវចំណាយ 6.8 ពាន់លានដុល្លារ។ AP300 នឹងផលិតអគ្គិសនីបានប្រហែល 300 ម៉េហ្កាវ៉ាត់ ស្មើនឹង ¼ បើធៀបនឹង 1,200 ម៉េហ្កាវ៉ាត់របស់ AP1000។ អគ្គិសនី 300 ម៉េហ្កាវ៉ាត់អាចផ្គត់ផ្គង់ដល់តម្រូវការរបស់មនុស្សប្រហែល 300,000 គ្រួសារ។

ម៉ាស៊ីនប្រតិកម្មនុយក្លេអែរ ឬរ៉េអាក់ទ័រនុយក្លេអែរ AP300 របស់ក្រុមហ៊ុន Westinghouse ធៀបនឹងទីលានបាល់ទាត់

ប្រព័ន្ធបញ្ចុះកម្ដៅរបស់ម៉ាស៊ីនប្រតិកម្មនុយក្លេអែររបស់ក្រុមហ៊ុន Westinghouse នឹងមិនបង្កឱ្យមានបញ្ហាឡើយ បើសិនត្រូវបានប្រើប្រាស់នៅ Fukushima ជាទីដែលរោងចក្រផលិតអគ្គិសនីដើរដោយថាមពលនុយក្លេអែរ…

ហេតុការណ៍កើតឡើងនៅឯរោងចក្រផលិតអគ្គិសនីដើរដោយថាមពលនុយក្លេអែរ Fukushima Daiichi កាលពីឆ្នាំ 2011

…Fukushima Daiichi ត្រូវបានបំផ្លាញ នាំឱ្យវិទ្យុសកម្មសាយភាយពេញមួយតំបន់ធំនៅប្រទេសជប៉ុន បន្ទាប់ពីមានគ្រោះរញ្ជួយដី និងរលកយក្សកើតឡើង កាលពីថ្ងៃទី 11 មីនា 2011។

May 6, 2023

រ៉េអាក់ទ័រនុយក្លេអ៊ែរខ្នាតតូចអាចផ្គត់ផ្គង់អគ្គិសនីគ្រប់គ្រាន់សម្រាប់មួយពាន់គ្រួសារ

(សហរដ្ឋអាម៉េរិក) – ម៉ាស៊ីនប្រតិកម្មនុយក្លេអែរ ឬហៅថា រ៉េអាក់ទ័រនុយក្លេអ៊ែរខ្នាតតូចរបស់ក្រុមហ៊ុន Radiant Industries អាចផ្គត់ផ្គង់អគ្គិសនីមួយម៉េហ្កាវ៉ាត់ និងបំពាក់បច្ចេកវិទ្យាទំនើបជាច្រើនដើម្បីទប់ស្កាត់បញ្ហារលាយ ដោយសារកម្ដៅ។

Doug Bernauer អតីតវិស្វករអេឡិចត្រូនិចអាកាសចរណ៍របស់ SpaceX កាលពីឆ្នាំ 2019 បានបង្កើតក្រុមហ៊ុន Radiant Industries ដែលជំនាញខាងអភិវឌ្ឍម៉ាស៊ីនប្រតិកម្មនុយក្លេអែរចល័តដែលអាចដាក់នៅក្នុងកុងតឺន័រ។ ក្រុមហ៊ុននេះមានគោលដៅអភិវឌ្ឍរ៉េអាក់ទ័រនុយក្លេអែរខ្នាតតូចដែលអាចដាក់នៅតំបន់ដាច់ស្រយាលបំផុតរបស់ផែនដី និងអាចផ្គត់ផ្គង់អគ្គិសនីមិនថាក្នុងវិស័យយោធា ឬស៊ីវិល។

ទំព័រ Interesting Engineering ឱ្យដឹងថា ផែនការរបស់ Radiant គឺការបង្កើតម៉ាស៊ីនប្រតិកម្មនុយក្លេអែរដែលអាចផលិតអគ្គិសនីមួយម៉េហ្កាវ៉ាត់ គ្រប់គ្រាន់សម្រាប់ផ្គត់ផ្គង់ដល់មនុស្សប្រហែល 1,000 គ្រួសារ។

ម៉ាស៊ីនប្រតិកម្មនុយក្លេអែរចល័តរបស់ Radiant Industries អាចដាក់នៅក្នុងកុងតឺន័រ

យោងតាមកម្មវិធីថ្នាក់ជាតិមួយរបស់សហរដ្ឋអាម៉េរិក ក្រុមហ៊ុន Radiant កំពុងធ្វើការជាមួយបន្ទប់ពិសោធន៍ជាតិ Idaho និង Argonne ដើម្បីកែលំអផលិតផល។ បច្ចុប្បន្ន ក្រុមហ៊ុននេះក៏កំពុងផ្ដោតលើបច្ចេកទេសរបស់ម៉ាស៊ីនរ៉េអាក់ទ័រ និងការសុំច្បាប់អនុញ្ញាតសម្រាប់ការរចនា ក៏ដូចជាកម្មសិទ្ធិបញ្ញាលើបច្ចេកវិទ្យានេះ។

May 5, 2023

ថ្ងៃទី 05 ឧសភានេះ កម្ពុជាសម្ពោធបើកព្រឹត្តិការណ៍ស៊ីហ្គេមលើកទី 32 ជាផ្លូវការ

ពិធីសម្ពោធបើកព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ជាផ្លូវការនេះ នឹងត្រូវធ្វើឡើងនាវេលាម៉ោង 19 នៅឯពហុកីឡដ្ឋានជាតិមរតកតេជោ ដែលស្ថិតក្នុងរាជធានីភ្នំពេញ។

មកដល់បច្ចុប្បន្ន ម្ចាស់ផ្ទះកម្ពុជានៅតែមិនបញ្ចេញព័ត៌មានលំអិតអំពីកម្មវិធី និងការសំដែងនានានៅក្នុងពិធីសម្ពោធព្រឹត្តិការណ៍ស៊ីហ្គេមលើកទី 32 ក្រៅតែពីពេលវេលា ទីតាំង និងបណ្ដាមន្ត្រីជាន់ខ្ពស់ដែលអញ្ជើញចូលរួម។ ក្រុមអ្នកយកព័ត៌មានក៏មិនត្រូវបានអនុញ្ញាតឱ្យចូលទស្សនាការហាត់សម ព្រោះគណៈកម្មការស៊ីហ្គេមចង់បង្កើតកម្មវិធីដ៏ទាក់ទាញមួយទៅតាមស្ដង់ដាអូឡាំពិក។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ គណៈកម្មាធិការជាតិ CAMSOC កាលពីថ្ងៃទី 24 មេសា បានឱ្យដឹងថា កម្ពុជាត្រូវតែប្រារព្ធពិធីសម្ពោធបើកព្រឹត្តិការណ៍ប្រកបដោយការទាក់ទាញបំផុតក្នុងប្រវត្តិសាស្ត្រ ទៅតាមស្ដង់ដាអូឡាំពិក ពុំមែនលំដាប់តំបន់ដូចប្រទេសដទៃ។ គ្រប់គ្នានឹងបានឃើញចំណុចដ៏អស្ចារ្យរបស់ពិធីនេះ។

ប្រមុខរាជរដ្ឋាភិបាលកម្ពុជា សម្ដេចតោជោ ហ៊ុន សែន ក៏បានប្រកាសមិនយកថ្លៃសំបុត្រចូលទស្សនាពិធីសម្ពោធនេះផងដែរ។ សម្ដេចមានប្រសាសន៍ថា មនុស្សជាងកន្លះលាននាក់ចង់ចូលទស្សនា ប៉ុន្តែពហុកីឡដ្ឋានមរតកតេជោ អាចដាក់មនុស្សបានតែពី 60,000 ទៅ 70,000 នាក់ប៉ុណ្ណោះ។ ទោះជាយ៉ាងណាក៏ដោយ បញ្ហានេះត្រូវបានដោះស្រាយតាមរយៈការដំឡើងឆាកបញ្ចាំងស្លាយផ្សាយបន្តផ្ទាល់នៅតាមបណ្ដាខេត្ត-ក្រុង។

ទីលានបាល់ទាត់មរតកតេជោ ស្ថិតក្នុងពហុកីឡដ្ឋានមរតកតេជោ នៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ត្រូវបានសម្ពោធការដ្ឋានសាងសង់កាលពីខែសីហា 2017 ហើយបួនឆ្នាំក្រោយមកក៏បានសម្រេចជាស្ថាពរ។ ការចំណាយសម្រាប់ការសាងសង់ពហុកីឡដ្ឋាននេះគឺប្រហែល 160 លានដុល្លារអាម៉េរិក ជាជំនួយរបស់ប្រទេសចិន។

យោងតាមគេហទំព័រស៊ីហ្គេមលើកទី 32 ព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា មានសមាជិកចូលរួមប្រហែល 12,000 នាក់ មកពី 11 ប្រតិភូ ដោយមិនទាន់រាប់បញ្ចូលក្រុមអាជ្ញាកណ្ដាល។ អ្នកយកព័ត៌មានជាង 2,000 នាក់ក៏បានទទួលកាតចុះឈ្មោះចូលយកព័ត៌មាន ក្នុងនោះមាន 907 នាក់មកពីបរទេស។

ស៊ីហ្គេមលើកទី 32 ធ្វើឡើងនៅរាជធានីភ្នំពេញ និងទីក្រុងបួនផ្សេងទៀត ចាប់ពីថ្ងៃទី 29 មេសាដល់ 16 ឧសភា ដោយមានកីឡា 36 ប្រភេទ ចែកជា 584 វិញ្ញាសា។ កាលពីថ្ងៃទី 04 ឧសភា គណៈកម្មការស៊ីហ្គេមបានប្រគល់មេដាយចំនួន 9 គ្រឿងដំបូងជូនអត្តពលិក ក្នុងនោះម្ចាស់ផ្ទះកម្ពុជានាំមុខគេដោយដណ្ដើមបានមេដាយមាសប្រាំគ្រឿង។ ហ្វ៊ីលីពីនដណ្ដើមបានមេដាយមាសពីរគ្រឿង ខណៈថៃ និងឡាវទទួលបានមួយគ្រឿង ពីប្រភេទកីឡាគុន ជូជិតស៊ូ (Jujutsu) និងល្បុក្កតោ។

នៅក្នុងថ្ងៃទី 05 ឧសភានេះ ស៊ីហ្គេមលើកទី 32 នឹងមិនមានការប្រកួតកីឡាណាមួយឡើយ ដោយផ្ដោតទៅលើតែពិធីសម្ពោធជាផ្លូវការ។

បទចម្រៀងផផ្លូវការរបស់ស៊ីហ្គេមលើកនេះគឺបទ Cambodian Pride ដែលបច្ចុប្បន្នចំនួនអ្នកចូលមើលបានកើនឡើងដល់ជាង 65 លានលើកនៅលើ YouTube ក្រោយពីបង្ហោះបានជាងបីសប្ដាហ៍។ រូបតំណាងស៊ីហ្គេមលើកទី 32 គឺកូនទន្សាយពីរក្បាល មួយឈ្មោះ រំដួល និងមួយឈ្មោះ បុរី។

ចំណែកពិធីបិទស៊ីហ្គេមលើកទី 32 វិញ នឹងត្រូវធ្វើឡើងក្នុងថ្ងៃទី 17 ឧសភា នៅឯពហុកីឡដ្ឋានមរតកតេជោ៕

May 5, 2023

Tag: មនុស្ស