Tag: មជ្ឈមណ្ឌលពាណិជ្ជកម្

ព្រោះតែរៀបការគគ្រឹកគគ្រេងឱ្យសុនក ស្ត្រីពីរនាក់ត្រូវគេជេរពេញបណ្ដាញសង្គម
(ឥណ្ឌូណេស៊ី) – ស្ត្រីពីរនាក់នៅរដ្ឋធានីហ្សាការតា ត្រូវសាធារណជនរិះគន់យ៉ាងចាស់ដៃ ហើយត្រូវធ្វើការសូមអភ័យទោស បន្ទាប់ពីបានធ្វើពិធីរៀបការយ៉ាងគគ្រឹកគគ្រេងឱ្យសុនកសំណព្វនៅក្នុងមជ្ឈមណ្ឌលពាណិជ្ជកម្ម។
សុនកពីរក្បាលដែលជាពូជ Alaska Malamute ត្រូវបានម្ចាស់ធ្វើពិធីរៀបការឱ្យនៅមជ្ឈមណ្ឌលពាណិជ្ជកម្មមួយក្នុងរដ្ឋធានីហ្សាការតា កាលពីថ្ងៃទី 17 កក្កដា 2023។ ពួកវាស្លៀកពាក់ឈុតប្រពៃណីរបស់ជនជាតិជ្វា ដែលភាគច្រើនរស់នៅលើកោះជ្វារបស់ឥណ្ឌូណេស៊ី។ ពិធីចម្លែកនេះបានចំណាយប្រាក់អស់ 200 លានរូពៀឥណ្ឌូណេស៊ី ដែលប្រហែលនឹង 13,300 ដុល្លារអាម៉េរិក។
រូបភាពស្ដីពីពិធីរៀបការសុនកនេះត្រូវបានចែករំលែកលើបណ្ដាញសង្គម ហើយក៏ក្លាយជាប្រធានបទជជែកគ្នា និងនាំឱ្យមានការរិះគន់ធ្ងន់ៗ។ ម្ចាស់របស់សុនកខាងលើ កាលពីថ្ងៃទី 19 កក្កដា បានធ្វើសន្និសីទសារព័ត៌មាន ដើម្បីសូមការអភ័យទោស។
Indira Ratnasari ដែលជាម្ចាស់របស់សុនកញី ឈ្មោះ Luna បកស្រាយថា «ពួកយើងមិនមានចេតនាប្រមាថមើលងាយវប្បធម៌ឥណ្ឌូណេស៊ី និងជ្វានោះទេ»។ យោងតាមសារព័ត៌មានក្នុងស្រុក Indira Ratnasari គឺជាបុគ្គលិកការិយាល័យប្រធានាធិបតីឥណ្ឌូណេស៊ី។
ចំណែក Valentine Cahandra ដែលជាម្ចាស់របស់សុនកឈ្មោល Jojo បានអះអាងថា ពិធីរៀបការនេះធ្វើឡើងដើម្បីផ្សព្វផ្សាយវប្បធម៌ជ្វា។ ក៏ប៉ុន្តែ ជនជាតិឥណ្ឌូណេស៊ីជាច្រើនមិនពេញចិត្ត ក្នុងនោះអ្នកខ្លះក៏សរសេរថា ការរៀបការឱ្យសុនកគឺជារឿងខ្ជះខ្ជាយ៕

July 21, 2023
Tesla បើក Showroom លំដាប់ប្រណិតនៅរាជធានីរបស់ប្រទេសថៃ
ក្រុមហ៊ុនផលិតរថយន្តអគ្គិសនី Tesla នឹងបើកសាលតាំងបង្ហាញ (showroom) លំដាប់ប្រណិតនៅប្រទេសថៃ នៅក្រោយខែមិថុនា ក្នុងមជ្ឈមណ្ឌលពាណិជ្ជកម្មនៅភាគខាងកើតរាជធានីបាងកក ដើម្បីជំរុញការលក់រថយន្តអគ្គិសនីដែលកំពុងកើនឡើងយ៉ាងរហ័សនៅប្រទេសថៃ និងដើម្បីតាមទាន់គូប្រកួតចិន ក្នុងនោះមាន BYD ជាដើម។
យោងតាមបណ្ដាញផ្សព្វផ្សាយក្នុងស្រុក ក្រុមហ៊ុនផលិតរថយន្តអាម៉េរិកមួយនេះកំពុងតែជួសជុល និងកែលំអទីតាំងដែលធ្លាប់ជាសាលតាំងបង្ហាញរបស់ Toyota។ នៅប្រទេសថៃ ក្រៅពីសាលតាំងបង្ហាញនេះ Tesla ក៏នឹងមានមជ្ឈមណ្ឌលសេវាកម្ម ឃ្លាំងគ្រឿងបន្លាស់ និងស្ថានីយបញ្ចូលថាមពលរហ័សផងដែរ។
ទាក់ទងនឹងដំណឹងខាងលើ តំណាងមួយរូបរបស់ Tesla បានឱ្យដឹងថា ព័ត៌មានលម្អិតនឹងត្រូវបានប្រកាសឆាប់ៗខាងមុខ។
Tesla បានចាប់ផ្ដើមលក់អនឡាញនូវរថយន្តបែបកីឡាពហុមុខងារប្រភេទមធ្យម Model Y និងរថយន្ត Model 3 នៅប្រទេសថៃ តាំងពីខែធ្នូឆ្នាំមុន ក្នុងតម្លៃចាប់ពីប្រហែល 1.96 លានបាត (56,500 ដុល្លារអាម៉េរិក) និង 1.76 លានបាត (50,700 ដុល្លារអាម៉េរិក)។ តួលេខនេះខ្ពស់ជាងបើធៀបនឹងតម្លៃ 1 លានបាត់របស់បណ្ដារថយន្តចិនដែលមានលក្ខណៈប្រហាក់ប្រហែលនេះ។
យោងតាមរបាយការណ៍របស់ទំព័រ Autolife នៅប្រទេសថៃ ចំនួនរថយន្ត Model Y ក្នុងខែមីនាបានកើនឡើងជិតទ្វេដងធៀបនឹងខែកុម្ភៈ ដោយលក់បាន 1,034 គ្រឿង ជួយឱ្យម៉ូដែលរថយន្តនេះកាន់កាប់ 17% នៅក្នុងទីផ្សាររថយន្តអគ្គិសនីនៅប្រទេសថៃ។ Model Y ក្លាយជាម៉ូដែលរថយន្តអគ្គិសនីដែលលក់ដាច់ជាងគេលំដាប់ទីពីរនៅប្រទេសថៃ បន្ទាប់ពី Atto 3 របស់ BYD និងនៅពីលើ SAIC Motor និង Great Wall Motor។
Showroom របស់ Tesla នៅរាជធានីរបស់ប្រទេសថៃ
Showroom របស់ Tesla នៅរាជធានីរបស់ប្រទេសថៃ
រថយន្តអគ្គិសនី Tesla
May 30, 2023
អគារខ្ពស់ជាងគេនៅតំបន់អាស៊ានកំពុងកែប្លង់ដើម្បីដាក់បញ្ចូលរចនាប័ទ្មខ្មែរ
ភ្នំពេញៈ មជ្ឈមណ្ឌលពាណិជ្ជកម្មភ្លោះថៃ ប៊ុនរ៉ុង ដែលជាអគារខ្ពស់ជាងគេនៅតំបន់អាស៊ាន និងអាស៊ីប៉ាស៊ីហ្វិក បាននិងកំពុងកែប្រែប្លង់ជាថ្មី ដើម្បីដាក់បញ្ចូលនូវរចនាប័ទ្មបែបខ្មែរក្នុងអគារនេះ។
លោកសាស្រ្តាចារ្យ ទួស សាភឿន ប្រធានផ្តួចផ្តើមសម្រាប់គម្រោងប្លង់អគារនេះ និងជាអគ្គលេខាធិការរងនៃគណៈស្ថាបត្យករកម្ពុជា បានថ្លែងឲ្យដឹងតាមទូរស័ព្ទនាថ្មីៗនេះថា ប្លង់របស់អគារនេះកំពុងកែប្រែប្រមាណ ៤០ភាគរយពីប្លង់អគារចាស់។ ការកែប្រែនេះ គឺដើម្បីបង្កើនសោភ័ណភាព រចនាប័ទ្ម ស្ថាបត្យកម្មពិសេស ការដាក់បញ្ចូលនូវអ្វីជារចនាប័ទ្មរបស់ខ្មែរទៅក្នុងអគារនេះ។
លោកសាស្រ្តាចារ្យបានបន្តថា “តាមគម្រោងការសាងសង់អគារជាមជ្ឈមណ្ឌលពាណិជ្ជកម្មធំជាងគេ និងខ្ពស់ជាងគេនៅអាស៊ាននេះនឹងចាប់ផ្តើមនៅថ្ងៃទី១ សីហា”។ លោកបន្តថា “ការកែប្រែប្លង់អគារនេះនឹងបញ្ចប់នៅពេលឆាប់ៗនេះ ហើយមិនប៉ះពាល់ដល់កាលបរិច្ឆេទសាងសង់អគារនេះទេ”។
អគារនេះត្រូវបានវិនិយោគក្នុងទំហំទឹកប្រាក់៥១០០លានដុល្លារ ក្នុងនោះទឹកប្រាក់២១០០លានដុល្លារប្រើប្រាស់សម្រាប់សាងសង់ និង៣០០០លានដុល្លារសម្រាប់ធ្វើឲ្យអគារនេះដំណើរការរស់រវើក។
លោកសាស្រ្តាចារ្យទួស សាភឿនបានបន្តថា តាមគម្រោងអគារនេះនឹងបញ្ចប់ការសាងសង់រយៈពេលបីឆ្នាំ ព្រោះការសាងសង់នឹងធ្វើទាំងយប់ទាំងថ្ងៃ និងសាងសង់ដោយប្រើបច្ចេកវិទ្យាទំនើបបំផុត៕
June 5, 2017
កម្ពុជាមានមជ្ឈមណ្ឌលពាណិជ្ជកម្មលើកដំបូងនៅខេត្តសានស៊ីប្រទេសចិន
មជ្ឈមណ្ឌលពាណិជ្ជកម្មកម្ពុជា-ស៊ីអាន «Qujiang Culture Building» ប្រចាំទីក្រុងស៊ីអានខេត្តសានស៊ីប្រទេសចិន ត្រូវបានសម្ភោធដាក់ឱ្យដំណើរការជាផ្លូវការហើយនៅខែឧសភានេះ ដោយមានការអញ្ជើញចូលរួមក្នុងពិធីកាត់ខ្សែបូដោយប្រមុខរដ្ឋាភិបាលកម្ពុជា និងមន្រ្តីជាន់ខ្ពស់នៃរដ្ឋាភិបាលចិន។
មជ្ឈមណ្ឌលពាណិជ្ជកម្មកម្ពុជា-ស៊ីអាន ស្ថិតក្នុងទីតាំងនៃអគារពាណិជ្ជកម្មរបស់សមាគមសេដ្ឋកិច្ចវប្បធម៌កម្ពុជា-ចិន ស្ថិតនៅតាមបណ្តោយផ្លូវលេខ292 សង្កាត់គូយាន ទីក្រុងស៊ីអាន ខេត្តសានស៊ី។ មជ្ឈមណ្ឌលនេះគ្រប់គ្រងដោយសមាគមខ្មែរនៅប្រទេសចិន ទាំងហេដ្ឋារចនាសម្ព័ន្ធរដ្ឋបាល និងពាណិជ្ជកម្ម និងជាកន្លែងផ្តល់ព័ត៌មានដល់ពាណិជ្ជករ អ្នកទេសចរ និងវិនិយោគិនទាំងចិន និងជនជាតិបរទេសដទៃទៀតដែលចង់ស្វែងយល់ព័ត៌មានអំពីកម្ពុជា។ នៅក្នុងមជ្ឈមណ្ឌលនេះ គឺមានដាក់តាំងពិព័រណ៌ផលិតផលខ្មែរជាច្រើន ខិត្តប័ណ្ណផ្សព្វផ្សាយពាណិជ្ជកម្ម ព័ត៌មានទាក់ទិនទៅនឹងការវិនិយោគ និងឯកសារផ្សេងៗអំពីកម្ពុជា។
ប្រមុខរដ្ឋាភិបាលកម្ពុជា សម្តេចនាយករដ្ឋមន្រ្តី ហ៊ុន សែន បានមានប្រសាសន៍ក្នុងពិធីកាត់ខ្សែបូសម្ពោធមជ្ឈមណ្ឌលពាណិជ្ជកម្មកម្ពុជា-ស៊ីអានបើកឲ្យដំណើរការជាផ្លូវការថា ការបើកសម្ភោធមជ្ឈមណ្ឌលពាណិជ្ជកម្មនេះធ្វើឡើងបន្ទាប់ពីកម្ពុជាបានបើកស្ថានអគ្គកុងស៊ុលនៅទីក្រុងស៊ីអាន ខេត្តសានស៊ី កាលពីថ្ងៃទី17 ខែមិថុនា ឆ្នាំ2015 ដោយគ្របដណ្តប់លើខេត្តសានស៊ី ខេត្តកានស៊ូ និងតំបន់ស្វយ័តនីងសែ។ ចំពោះទំនាក់ទំនងពាណិជ្ជកម្ម និងវិនិយោគ គឺកម្ពុជាបាននាំចូលផលិតផលទៅកាន់ខេត្តសានស៊ីមានទំហំទឹកប្រាក់ជាង 42លានដុល្លាក្នុងឆ្នាំ2015 និងជិត53លានដុល្លារក្នុងឆ្នាំ2016។
ទឹកប្រាក់វិនិយោគរបស់វិនិយោគិនខេត្តសានស៊ី នៅកម្ពុជាមានទំហំ 1,33លានដុល្លារក្នុងឆ្នាំ2015 និងក្នុងឆ្នាំ2015កន្លងទៅនេះដែរ ចំនួនភ្ញៀវទេសចរពីខេត្តសានស៊ី មកកម្ពុជាគឺមានចំនួន1ម៉ឺននាក់។ បច្ចុប្បន្នមាននិស្សិតខ្មែរ 47នាក់ និងមានប្រជាជនខ្មែរ ចំនួន 247 នាក់ស្នាក់នៅខេត្តសានស៊ីផងដែរ។ កាលពីថ្ងៃទី3-5 ខែសីហា ឆ្នាំ2016 ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា ព្រះអង្គយាងបំពេញព្រះរាជទស្សនកិច្ចផ្លូវរដ្ឋនៅខេត្តសានស៊ី។ ជាមួយគ្នានេះដែរមេដឹកនាំខេត្តសានស៊ីក៏ធ្លាប់បានអញ្ជើញមកបំពេញទស្សនកិច្ចផ្លូវការជាបន្តបន្ទាប់នៅកម្ពុជាផងដែរ៕
May 20, 2017