ពិសោធ - La Reine Media

ចិនបង្ហើបឱ្យដឹងអំពីស្ថានីយស្រាវជ្រាវលើឋានព្រះចន្ទគំរូដំបូង

ស្ថានីយស្រាវជ្រាវព្រះចន្ទដែលមានរូបរាងដូចទៅនឹងគ្រាប់ស៊ុត ក្នុងនោះមានកន្លែងសម្រាប់អ្នកអវកាសធ្វើការពិសោធ និងកន្លែងសម្រាប់ជីវភាពប្រចាំថ្ងៃ។

ក្រុមអ្នកវិទ្យាចិនទើបតែបានបង្ហើបឱ្យដឹងអំពីគំរូដំបូងនៃស្ថានីយស្រាវជ្រាវលើឋានព្រះចន្ទ។ ស្ថានីយដែលមានឈ្មោះថា Moon Pot និងមានរូបរាងដូចទៅនឹងគ្រាប់ស៊ុតនេះ ត្រូវបានរចនាឡើងដោយក្រុមអ្នកស្រាវជ្រាវមកពីសាកលវិទ្យាល័យវិទ្យាសាស្ត្រ និងបច្ចេកវិទ្យា Huazhong University។

លោក Li Bin ដែលជាលេខារបស់សាកលវិទ្យាល័យខាងលើ ឱ្យដឹងថា តាមរយៈការបង្កើតស្ថានីយស្រាវជ្រាវមួយលើឋានព្រះចន្ទ អវកាសចរនឹងមានកន្លែងសម្រាប់ស្រាវជ្រាវ និងធ្វើកិច្ចការប្រចាំថ្ងៃ ព្រោះស្ថានីយនេះផ្ដល់សុវត្ថិភាព និងអាចរស់នៅបាន។

បច្ចុប្បន្ន ក្រុមអ្នកវិទ្យាសាស្ត្រកំពុងផ្ដោតទៅលើការរចនាម៉ូដសម្រាប់ Moon Pot ដើម្បីអាចសាងសង់បានដោយការបោះពុម្ពបែប 3D ដែលប្រើប្រាស់វត្ថុធាតុដែលត្រូវបាននាំយកមកពីឋានព្រះចន្ទដោយយាន Chang’e 5។

យោងតាមអង្គការអវកាសចិន (CNSA) បេសកកម្មអវកាសនាពេលអនាគតដែលរួមមាន Chang’e 7 (2026), Chang’e 8 (2028) នឹងបង្កើតរូបមន្តមូលដ្ឋានសម្រាប់ស្ថានីយស្រាវជ្រាវព្រះចន្ទដំបូងរបស់ចិន។

April 26, 2024

ទីក្រុងឆ្លាតវៃតម្លៃដប់ពាន់លានដុល្លាររបស់ក្រុមហ៊ុនតូយ៉ូតា

(ជប៉ុន) – ទីក្រុង Woven City នៅជើងភ្នំហ្វ៊ូជី (Fuji) នឹងប្រើប្រាស់អគ្គិសនីព្រះអាទិត្យ ថ្មឥន្ធនៈឆ្លាតវៃ និងរថយន្តមិនបំភាយឧស្ម័នពុល។

ត្រូវបានរចនាឡើងដោយក្រុមហ៊ុនតូយ៉ូតា (Toyota) ទីក្រុង Women City មានចម្ងាយតែប៉ុន្មានគីឡូម៉ែត្រប៉ុណ្ណោះ ពីភ្នំហ្វ៊ូជី នៃប្រទេសជប៉ុន និងត្រូវបានកសាងតាំងពីឆ្នាំ 2021។ យោងតាមទំព័រ Sun ទីក្រុងអនាគតនេះ ដើរតួនាទីដូចទៅនឹង «បន្ទប់ពិសោធន៍» របស់ក្រុមហ៊ុន ដើម្បីធ្វើតេស្តបណ្ដារថយន្តបើកបរស្វ័យប្រវត្តសន្សំសំចៃថាមពល ដែលមានរហ័សនាមថា «E-palettes»។

មនុស្ស 2ពាន់នាក់ដំបូងនឹងរើមករស់នៅក្នុងទីក្រុងឆ្លាតវៃនេះនៅចុងឆ្នាំ 2024 តាមរយៈគម្រោងសិក្សាស្រាវជ្រាវមួយដែលមានតម្លៃជិត 10ពាន់លានដុល្លារអាម៉េរិក ដើម្បីស្វែងយល់អំពីរូបមន្តក្នុងឥរិយាបថនៃការបើកបររថយន្ត និងអ្នកថ្មើរជើង។

នៅក្នុងទីក្រុងឆ្លាតវៃ ពលរដ្ឋទាំងឡាយនឹងរស់នៅក្នុងផ្ទះដែលដំណើរការដោយអ៊ីដ្រូសែនស្ទើរតែទាំងស្រុង ធ្វើឱ្យទីក្រុងនេះមានភាពស្រស់ស្រាយខ្លាំង។ គ្រប់ផ្ទះសុទ្ធតែមានផ្ទាំងសូឡានៅលើដំបូល រួមនឹងបច្ចេកវិទ្យាបញ្ញាសិប្បនិម្មិតតាមដានសុខភាពអ្នកនៅខាងក្នុង។

យោងតាមប្រធានក្រុមហ៊ុនតូយ៉ូតា Akio Toyoda រាល់មធ្យោបាយធ្វើដំណើរ និងផ្ទះ សុទ្ធតែត្រូវបានតភ្ជាប់តាមរយៈប្រព័ន្ធទិន្នន័យ និងសេនស៊ើរ។ នៅតាមផ្ទះដែលត្រូវបានសង់ពីឈើ នឹងមានរ៉ូបូតជួយធ្វើកិច្ចការប្រចាំថ្ងៃ ជួយឱ្យម្ចាស់ផ្ទះមានភាពឯករាជ្យជាងមុន។

ក្រុមហ៊ុនតូយ៉ូតាឱ្យដឹងថា ការកសាងទីក្រុងពេញលេញមួយ បើទោះទោះក្នុងទ្រង់ទ្រាយតូចក៏ពិតមែន ប៉ុន្តែវាគឺជាឱកាសពិសេសដើម្បីអភិវឌ្ឍបច្ចេកវិទ្យាថ្មី។

ក្រុមមនុស្សដែលនឹងមករស់នៅក្នុងទីក្រុង Woven City រួមមាន ចាប់ពីក្រុមគ្រួសារ គូស្វាមីភរិយាចូលនិវត្សរ៍ អ្នកលក់រាយ រហូតដល់អ្នកវិទ្យាសាស្ត្រ។

April 24, 2024

«បើកបររថយន្តអគ្គិសនីបីឆ្នាំនៅជនបទ» ជាបទពិសោធន៍របស់អតីតគ្រូបង្រៀនម្នាក់នៅអាម៉េរិក

នៅក្នុងតំបន់ជនបទដែលមានស្ថានីយបញ្ចូលថាមពលថ្មមិនច្រើន លោក Frank Johnson អតីតគ្រូបង្រៀនមួយរូប រស់នៅក្នុងតំបន់ Dade រដ្ឋ Missouri សហរដ្ឋអាម៉េរិក បានចែករំលែកអំពីជីវភាពដែលលោកបានប្រើប្រាស់រថយន្តអគ្គិសនីតាំងពីឆ្នាំ 2021។

ចំណុចវិជ្ជមានរបស់រថយន្តអគ្គិសនី

នៅលើទំព័រ Springfield News-Leader លោក Frank Johnson ឱ្យដឹងថា រថយន្តអគ្គិសនីរបស់លោក ភាគច្រើនត្រូវបានបញ្ចូលថាមពលអគ្គិសនីក្នុងផ្ទះនៅពេលយប់ ហើយសាកថ្មល្បឿនលឿននៅលើផ្លូវល្បឿនលឿន គ្រាដែលលោកធ្វើដំណើរផ្លូវឆ្ងាយ។ កូនស្រីរបស់លោក ថែមទាំងបើកបររថយន្តអគ្គិសនីពាសពេញសហរដ្ឋអាម៉េរិក ដោយការបញ្ចូលថាមពលអគ្គិសនីនៅតាមស្ថានីយចល័ត។

ដោយសារតែមានបណ្ដាញស្ថានីយសាកថ្មនៅតាមបណ្ដោយផ្លូវល្បឿនលឿន (160 គីឡូម៉ែត្រ/ស្ថានីយ) លោក Frank Johnson លែងបារម្ភអំពីរយៈចម្ងាយដែលរថយន្តអគ្គិសនីរបស់លោកត្រូវធ្វើដំណើរ។

អតីតគ្រូបង្រៀនរូបនេះ ក៏បានឱ្យដឹងថា រថយន្តអគ្គិសនីមានភាពធន់ និងត្រូវការការថែទាំតិចជាងបើធៀបនឹងរថយន្តម៉ាស៊ីនចំហេះក្នុង។ លោកថា រថយន្តអគ្គិសនីសមស្របនឹងការប្រើប្រាស់ជាលក្ខណៈគ្រួសារ អ្នកប្រគល់ទំនិញ ក៏ដូចជាសិស្សសាលានៅជនបទ ដោយសារតែការចំណាយទៅលើអគ្គិសនីទាបជាង 5 ដង ធៀបនឹងតម្លៃសាំង។

លោក Frank បានផ្ដល់ជាយោបល់ថា សម្រាប់អ្នកដែលត្រូវធ្វើដំណើរផ្លូវឆ្ងាយជាញឹកញាប់ គួរតែជិះរថយន្តឈ្នួល បើសិនមិនទាន់ចង់បោះបង់រថយន្តសាំង។

លោក Frank Johnson អតីតគ្រូបង្រៀនមួយរូប រស់នៅក្នុងតំបន់ Dade រដ្ឋ Missouri សហរដ្ឋអាម៉េរិក

ចំណុចអវិជ្ជមានរបស់រថយន្តអគ្គិសនី

យោងតាមលោក Frank ចំណុចអវិជ្ជមានមួយចំនួនរបស់រថយន្តអគ្គិសនី រួមមាន រថយន្តថ្មីរបស់លោក ដំបូងឡើយសាកថ្មមួយពេញជិតបាន 490 គីឡូម៉ែត្រ ប៉ុន្តែបីឆ្នាំក្រោយមក សាកថ្មម្ដងជិះបាន 467 គីឡូម៉ែត្រ។ រថយន្តអគ្គិសនីក៏មានអាគុយផ្ទុកអគ្គិសនីដូចរថយន្តសាំង ដូច្នេះវាត្រូវការផ្លាស់ប្ដូរក្រោយរយៈពេលពី 5 ទៅ 7 ឆ្នាំ។

ថាមពលថ្មរបស់រថយន្តអគ្គិសនីនឹងឆាប់អស់នៅពេលអាកាសធាតុចុះត្រជាក់ ដូចជាពេលមេឃភ្លៀង ឬធ្លាក់ព្រឹលជាដើម បើធៀបនឹងរដូវក្ដៅ។

ប្រភេទរថយន្តអគ្គិសនី

រថយន្តដែលធ្វើដំណើរដោយអគ្គិសនី បច្ចុប្បន្នមានបីប្រភេទធំៗ រួមមាន រថយន្តអគ្គិសនីសុទ្ធ (BEVs), រថយន្តកូនកាត់សាំង-អគ្គិសនីថ្មធំ (Plug-In Hybrid / PHEV) និងរថយន្តកូនកាត់សាំង-អគ្គិសនីថ្មតូច (Hybrid / HEV)។

រថយន្តអគ្គិសនីសុទ្ធ (BEVs) គឺជារថយន្តដែលប្រើប្រាស់តែអគ្គិសនីពីថ្មដ៏ធំរបស់វា។ ថ្មរបស់រថយន្តនេះអាចបញ្ចូលអគ្គិសនីនៅតាមផ្ទះ ឬតាមស្ថានីយនានា។

រថយន្តអគ្គិសនីកូនកាត់សាំង-អគ្គិសនីថ្មធំ (Plug-In Hybrid / PHEV) គឺជាប្រភេទរថយន្តដែលប្រើប្រាស់ថាមពលចេញពីម៉ូទ័រអាគុយដ៏ធំរបស់វាទាំងស្រុង ដើម្បីធ្វើដំណើរនៅលើគ្រប់ស្ថានភាពផ្លូវ និងល្បឿន។

ការប្រើប្រាស់នូវថាមពលដែលចេញពីម៉ូទ័រថ្មអាគុយនឹងបន្តររហូតដល់ថាមពលថ្មអាគុយនោះស្ថិតនៅកម្រិតមួយដ៏ទាបបំផុត ទើបវាធ្វើការផ្លាស់ប្តូរទៅយកថាមពលដែលចេញពីម៉ាស៊ីនសាំងដើម្បីធ្វើការជំនួសវិញ។ អ្វីដែលជាផ្នែកមួយដ៏អស្ចារ្យរបស់រថយន្ត Plug-In Hybrid (PHEV) ដែលពុំមាននៅក្នុងរថយន្ត Hybrid (HEV) នោះគឺ ការបំពេញថាមពលថ្មឲ្យបានពេញវិញយ៉ាងរហ័ស តាមរយៈការបញ្ចូលថ្មពីប្រភពអគ្គីសនីតាមផ្ទះ ដែលវាមានលក្ខណៈដូចទៅនឹងការបញ្ចូលថ្មទូរស័ព្ទដៃរបស់យើងដែរ។

រថយន្តកូនកាត់សាំង-អគ្គិសនីថ្មតូច (Hybrid / HEV) គឺជាប្រភេទរថយន្តដែលប្រើប្រាស់កំលាំងថាមពលពីម៉ូទ័រថ្មអាគុយនៅពេលដែលរថយន្តនេះរត់នៅក្នុងរយៈល្បឿនយឺត។ នៅពេលដែលអ្នកបើកបរចង់បង្កើនល្បឿន រថយន្តនេះត្រូវការបន្ថែមថាមពល តាមរយៈការទាញយកថាមពលពីម៉ាស៊ីនដែលប្រើប្រាស់សាំង។ ការបង្កើនល្បឿននៃការបើកបរនេះនឹងធ្វើឲ្យរថយន្តផ្លាស់ប្តូរពីការប្រើប្រាស់ថាមពលថ្មអាគុយ ទៅប្រើប្រាស់ថាមពលពីម៉ាស៊ីនសាំងវិញ។ លើសពីនេះប្រសិនបើរថយន្តត្រូវការថាមពលច្រើនក្នុងពេលបើកបរ ដូចជាការបើកបរឡើងទីទួល ទាំងម៉ូទ័រថ្មអាគុយ និងម៉ាស៊ីនសាំងនឹងត្រូវបានប្រើប្រាស់ ដើម្បីឱ្យមានថាមពលគ្រប់គ្រាន់សំរាប់ស្ថានភាពផ្លូវបែបនេះ។

April 11, 2024

កាមេរ៉ាឌីជីថល់ធំជាងគេលើពិភពលោក៖ សង្កេតរកអាថ៌កំបាំងនៃចក្រវាល

LSST 3,200 megapixel ត្រូវបានអភិវឌ្ឍដោយមន្ទីរពិសោធន៍ជាតិបង្កើនល្បឿន SLAC របស់សហរដ្ឋអាម៉េរិក គឹជាកាមេរ៉ាឌីជីថល់ធំជាងគេបង្អស់លើពិភពលោក។ វានឹងត្រូវបានដំឡើងនៅឯស្ថានីយសង្កេត Vera C. Rubin នៅប្រទេសស៊ីលី។

បេសកកម្មរបស់ LSST

ស្រាវជ្រាវអាថ៌កំបាំងនៃវត្ថុធាតុ និងថាមពលងងឹតក្នុងចក្រវាល ដែលមានភាគច្រើននៅក្នុងចក្រវាល ប៉ុន្តែមិនអាចមើលឃើញដោយភ្នែកទទេ។
វាក៏នឹងតាមដានកាឡាក់ស៊ីរាប់ពាន់លាន ផ្កាយប្រហែល 17 ពាន់លានដួងក្នុងកាឡាក់ស៊ីមេលគីវ៉េ និងវត្ថុអវកាសរាប់ពាន់លានក្នុងប្រព័ន្ធព្រះអាទិត្យ។
កាមេរ៉ានេះក៏អាចសង្កេតមើលបាតុភូតអវកាសនានា មានដូចជា ការផ្ទុះផ្កាយ ការរីកមាឌរបស់ចក្រវាលជាដើម។

សមត្ថភាពរបស់ LSST

ទំហំធំ៖ ប៉ុនកូនរថយន្ត និងមានទម្ងន់ 3 តោន។
សមត្ថភាពសង្កេត៖ លម្អិតដល់ថ្នាក់ អាចមើលឃើញកូលគោលពីចម្ងាយ 24 គីឡូម៉ែត្រ។.
សមត្ថភាពថតូប៖ អាចថតទិដ្ឋភាពផ្ទៃមេឃ ដើម្បីតាមដានការប្រែប្រួលក្នុងរង្វង់ 10 ឆ្នាំ។
កាមេរ៉ា LSST គ្រោងនឹងត្រូវបានដាក់ឱ្យដំណើរការនៅចុងឆ្នាំនេះ និងត្រូវបានរំពឹងថា នាំមកនូវរបកគំហើញថ្មីៗស្ដីពីចក្រវាល។

April 4, 2024

នាវេទេសចរណ៍មុជទឹកអគ្គិសនី-ម៉ាស៊ូតនេះ អាចធ្វើដំណើរបានជាង 11 ពាន់គីឡូម៉ែត្រ

Deep Sea Dreamer ដែលជានាវាទេសចរណ៍កូនកាត់នាវាមុជទឹកប្រភេទប្រណិត ត្រូវបានគេរំពឹងថា នឹងនាំមកនូវបទពិសោធន៍ក្រោមផ្ទៃទឹកដ៏អស្ចារ្យសម្រាប់អតិថិជន។

នាវា Deep Sea Dreamer មានបណ្ដោយ 33 ម៉ែត្រ អាចបរលើផ្ទៃទឹក និងអាចមុជក្រោមទឹកជម្រៅរហូតដល់ 100 ម៉ែត្រ។ នាវានេះអាចដាក់មនុស្សបាន 6 នាក់ និងមានបង្អួចជាច្រើន អនុញ្ញាតឱ្យភ្ញៀវគយគន់សម្រស់ដ៏ស្រស់ស្អាតរបស់ជីវិតក្រោមផ្ទៃទឹកសមុទ្រ។

នាវានេះបំពាក់ប្រព័ន្ធរុញច្រានកូនកាត់ប្រេងម៉ាស៊ូត-អគ្គិសនី ក្នុងនោះរួមមានម៉ាស៊ីន Cummins ពីរគ្រឿង ម៉ូទ័រអគ្គិសនីមួយគ្រឿង និងប្រព័ន្ធកំណត់ទិសចំនួន 10 ផងដែរ។

បើសិនប្រើប្រាស់អគ្គិសនីទាំងស្រុង Deep Sea Dreamer អាចធ្វើដំណើរបាន 161 គីឡូម៉ែត្រ។ ល្បឿនអតិបរមារបស់វាគឺ 18.5 គីឡូម៉ែត្រ/ម៉ោង ខណៈដែលល្បឿនធម្មតាគឺ 11 គីឡូម៉ែត្រ/ម៉ោង។ នៅពេលមានថាមពលពេញលេញ នាវានេះអាចធ្វើដំណើរបាន 11,112 គីឡូម៉ែត្រ និងចតក្រោមផ្ទៃទឹករហូតដល់ 7 ថ្ងៃ។

តាមការគណនា ការផលិតនាវា Deep Sea Dreamer របស់ Kozloff នឹងត្រូវចំណាយប្រហែល 250 លានដុល្លារអាម៉េរិក៕

April 1, 2024

ស្ថានីយចុះចតលើឋានព្រះចន្ទរបស់អាម៉េរិក មិនអាច «រស់» ឡើងវិញ

ស្ថានីយចុះចតឯកជនដំបូងដែលបានចុះចតលើផ្ទៃព្រះចន្ទ មិនអាចងើបឡើងវិញ បន្ទាប់ពី «ដេក» អស់ជាច្រើនសប្ដាហ៍នៅក្នុងស្បៃរាត្រីនៃឋានរណបមួយនេះ។

ក្រុមហ៊ុន Intuitive Machines នៅសហរដ្ឋអាម៉េរិក កាលពីថ្ងៃទី 23 មីនា បានប្រកាសថា ស្ថានីយចុះចត Odysseus មិនបញ្ជូនទិន្នន័យមកកាន់ផែនដី បើទោះតាមការគ្រោងទុក ផ្ទាំងសូឡារបស់វានឹងទទួលបានពន្លឺព្រះអាទិត្យគ្រប់គ្រាន់ ដើម្បីបើកវិទ្យុ។

Odysseus បានចុះចតប្រកបដោយភាពប្រថុយប្រថានកាលពីថ្ងៃទី 22 កុម្ភៈ ប៉ុន្តែនៅតែអាចធ្វើការពិសោធមួយចំនួន និងបញ្ជូនរូបថតមកកាន់ផែនដី មុនពេលក្រុមអ្នកគ្រប់គ្រងសម្រេចចិត្តបញ្ចប់បេសកកម្ម ក្រោយរយៈពេលមួយសប្ដាហ៍ នៅពេលវាបានឆ្លងកាត់រាត្រីព្រះចន្ទច្រើនសប្ដាហ៍។ នេះបើតាមការចុះផ្សាយរបស់ AFP។

March 25, 2024

ឱសថមានប្រសិទ្ធភាពដូចការហាត់ប្រាណ ជិតមានក្នុងទីផ្សារ!

ក្រុមអ្នកស្រាវជ្រាវឱ្យដឹងថា ពួកគេកំពុងតែឆ្ពោះទៅជិតដល់គោលដៅនៃការអភិវឌ្ឍជោគជ័យនូវប្រភេទថ្នាំដែលមានប្រសិទ្ធភាពដូចទៅនឹងការហាត់ប្រាណ។

យោងតាមទំព័រ Newsweek ចុះផ្សាយកាលពីថ្ងៃទី 18 ខែមីនា ឆ្នាំ 2024 នៅក្នុងកិច្ចប្រជុំរបស់សមាគមគីមីសាស្ត្រអាម៉េរិក (ACS) ក្រុមអ្នកវិទ្យាសាស្ត្របានបង្ហាញប្រភេទថ្នាំដែលពួកគេកំពុងអភិវឌ្ឍ។ ថ្នាំនេះមានផ្ទុកសមាសធាតុដែលមានប្រសិទ្ធភាពប្រហាក់ប្រហែលនឹងការហាត់ប្រាណ។

នៅពេលហាក់ប្រាណ រាងកាយនឹងធ្វើឱ្យមានប្រតិកម្មគីមី ដែលហៅថា មេតាបូលីស។ នៅពេលលេបថ្នាំដែលមានឈ្មោះថា SLU-PP-332 នេះ រាងកាយអ្នកលេបនឹងមានប្រតិកម្មគីមីដូចទៅនឹងការហាត់ប្រាណ។

លទ្ធផលនៃការពិសោធលើសត្វកណ្ដុរបង្ហាញថា ថ្នាំនេះជួយពង្រឹងសរសៃសាច់ដុំ កាត់បន្ថយអាការអស់កម្លាំង និងកែលម្អសុខភាពរបស់សត្វកណ្ដុរ។ ការស្រាវជ្រាវក្រោយមក បានផ្ដោតទៅលើការបង្កើនប្រសិទ្ធភាពនៃស្ថិរភាព និងកាត់បន្ថយហានិភ័យកើតមានជាតិពុលរបស់ថ្នាំ។

ទោះជាយ៉ាងណាក៏ដោយ ក្រុមអ្នកស្រាវជ្រាវឱសថនេះក៏មិនលើកទឹកចិត្តឱ្យប្រើប្រាស់ថ្នាំ SLU-PP-332 ជំនួសឱ្យការហាត់ប្រាណ។ ឱសថនេះផ្ដោតទៅលើតែក្រុមមនុស្សដែលបាត់បង់លទ្ធភាពបញ្ចេញកម្លាំងដោយសារតែបញ្ហាសុខភាព ក៏ដូចជាការបង្កើនប្រសិទ្ធភាពនៃការធ្វើលំហាត់ប្រាណរបស់មនុស្សចាស់ អ្នកស្វិតសាច់ដុំ ឬមានជំងឺប្រចាំកាយណាមួយ។

លោក Bahaa Elgendy សាស្ត្រាចារ្យប្រចាំសាលាវេជ្ជសាស្ត្រនៃសាកលវិទ្យាល័យ Washington ដែលជាប្រធានក្រុមស្រាវជ្រាវនេះ ឱ្យដឹងថា បើសិនជាជោគជ័យក្នុងការអភិវឌ្ឍថ្នាំនេះ ក្រុមអ្នកវិទ្យាសាស្ត្រអាចរកវិធីព្យាបាលជំងឺមួយចំនួន មានជាអាទិ៍ ជំងឺខ្សោយសរសៃប្រសាទ និងខ្សោយបេះដូងជាដើម។

SLU-PP-332 និងសមាសធាតុផ្សេងទៀត ក៏ត្រូវបានគេជឿថា មានប្រសិទ្ធភាពក្នុងការទប់ស្កាត់ជំងឺខ្សោយតម្រងនោម ខ្សោយបេះដូង លើសទម្ងន់ និងជំងឺភ្លេចភ្លាំង (Alzheimer) ទៀតផង។

March 21, 2024

ក្រុមហ៊ុន RMA Cambodia បានប្រារព្ធពិធីសម្ពោធជាផ្លូវការទីតាំងប្រគល់រថយន្ត ហ្វដ លំដាប់អន្តរជាតិ

ក្រុមហ៊ុន អ អិម អេ (ខេមបូឌា) – RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត ហ្វដ មកកាន់ទីផ្សារព្រះរាជាណាចក្រកម្ពុជា បានប្រារព្ធពិធី “សម្ពោធជាផ្លូវការទីតាំងប្រគល់រថយន្ត ហ្វដ សាខាបឹងបៃតង” ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានប្រមាណជាង ២០០ នាក់។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ក្រុមហ៊ុន អ អិម អេ ជាក្រុមហ៊ុនដែលមានចំណែកទីផ្សាររថយន្តថ្មីធំជាងគេនៅក្នុងប្រទេសកម្ពុជា ដែលទទួលបានចំណាត់ថ្នាក់លេខ១ អស់រយៈពេល៥ឆ្នាំជាប់ៗគ្នា គិតចាប់ពីឆ្នាំ ២០១៩ មកដល់ពេលបច្ចុប្បន្ន។ កត្តាដែលធ្វើអោយយើងទទួលបានចំណែកទីផ្សារលេខ១នេះ មិនមែនដោយសារតែការលក់រថយន្តថ្មី តែមួយមុខប៉ុណ្ណោះទេ ប៉ុន្តែគឺដោយសារគុណភាពនៃសេវាកម្មដែលផ្តល់ជូនទៅកាន់អតិថិជន ដូចជាមជ្ឈមណ្ឌលផ្តល់សេវាកម្មថែទាំ និងជួសជុលរថយន្តគ្រប់ខេត្តក្រុង សេវាជំនួយជួសជុលចល័តដល់កន្លែង ២៤ម៉ោង ទទួលបានអត្ថប្រយោជន៍ និងព័ត៌មានផ្សេងៗពីកម្មវិធី Ford Cambodia Mobile App ចំណេញពេលវេលា និងថវិការក្នុងការប្តូរប្រេងម៉ាស៊ីន (រៀងរាល់ 10,000km ម្តង) មាន‍ឱកាសចូលរួមដំណើរកម្សាន្តគ្រួសារ ហ្វដ ជារៀងរាល់ឆ្នាំ និងសេវាកម្មទទួលយករថយន្តចាស់ផ្លាស់ប្តូរយករថយន្តថ្មីជាដើម។ លើសពីនេះទៅទៀត យើងក៏មានបង្កើតនូវការិយាល័យទំនាក់ទំនងអតិថិជន (Call Center) ដែលមានតួនាទីផ្តល់ប្រឹក្សាយោបល់អំពីចម្ងល់ផ្សេងៗទៅកាន់អតិថិជន មិនអោយលើសពី ១៥នាទី។”

លោក ងន សាំង ក៏បានមានប្រសាសន៍បន្ថែមទៀតថា៖ “ទីតាំងប្រគល់រថយន្ត ហ្វដ នេះ គឺជាមជ្ឈមណ្ឌលប្រគល់រថយន្តធំជាងគេ និងដំបូងគេបង្អស់ក្នុងទីផ្សារប្រទេសកម្ពុជាយើង នៅពេលដែលអតិថិជនចូលមកក្នុងទីតាំងប្រគល់រថយន្តនេះ នោះអតិថិជននឹងមានអារម្មណ៍ហាក់ដូចជា កន្លែងតាំងបង្ហាញរថយន្ត ឬការិយាល័យ ឬក៏ជាហាងកាហ្វេដ៏ធំមួយ ដែលមានកន្លែងអង្គុយបំពាក់នូវគ្រឿងបរិក្ខារទំនើបៗ ផ្តល់នូវផាសុកភាព និងភាពងាយស្រួលដល់អតិថិជនដែលមកទទួលយករថយន្តនៅទីនេះ ដើម្បីទទួលបាននូវបទពិសោធន៍ថ្មី និងសេវាកម្មប្រកបដោយទំនុកចិត្ត ពីក្រុមហ៊ុន អ អិម អេ និងក្រុមហ៊ុន ហ្វដ។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “ការសម្ពោធជាផ្លូវការនូវទីតាំងប្រគល់រថយន្ត ហ្វដ នេះ គឺជាព្រឹត្តិការណ៍ដ៏សំខាន់មួយរបស់ក្រុមហ៊ុន អ អិម អេ ខេមបូឌា តាមរយៈការបង្តើតនូវស្តង់ដារគុណនៃការប្រគល់រថយន្តលំដាប់អន្តរជាតិដំបូងគេបំផុតសម្រាប់ទីផ្សារប្រទេសកម្ពុជា។ យើងចង់ឱ្យអតិថិជនរបស់យើងមានអារម្មណ៍ថាកក់ក្តៅ និងមានទំនុកចិត្តលើរថយន្តរបស់ពួកគាត់ ជាពិសេសទទួលបានការណែនាំ និងការពន្យល់អំពីរបៀបប្រើប្រាស់មុខងាររថយន្ត បច្ចេកវិទ្យា ក៏ដូចជាប្រព័ន្ធសុវត្ថិភាពផ្សេងៗនៅក្នុងរថយន្តថ្មីរបស់ពួកគាត់ មុនពេលពួកគាត់បើកបររថយន្តនៅលើដងផ្លូវ។”

គួរបញ្ជាក់ផងដែរថា ទីតាំងប្រគល់រថយន្តថ្មីនេះ លាតសន្ធឹងលើផ្ទៃដីទំហំ ៦,៥៧៥ ម៉ែត្រការ៉េ ដែលមានទីតាំងប្រគល់រថយន្តធំ ស្តង់ដារអន្តរជាតិ ចំនួន ១២កន្លែង ដែលមានសមត្ថភាពអាចប្រគល់រថយន្តបានចំនួនច្រើនគ្រឿងក្នុងពេលតែមួយ។ ទីតាំងប្រគល់រថយន្ត ហ្វដ សាខាបឹងបៃតងនេះ គឺមានអាស័យដ្ឋានស្ថិតនៅតាមបណ្តោយវិថីឧកញ៉ាម៉ុងរិទ្ធី (ក្បែរផ្សារបឹងបៃតង) ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ សម្រាប់ព័ត៌មានផ្នែកលក់ សូមទំនាក់ទំនងតាមលេខទួរស័ព្ទ 099 999 747 និងសម្រាប់ផ្នែកសេវាកម្ម សូមទំនាក់ទំនង 078 992 992។

March 16, 2024

ក្រុមហ៊ុន RMA Cambodia បានប្រារព្ធពិធីចុះអនុស្សរណៈយោគយល់គ្នាជាមួយនឹងក្រុមហ៊ុន ឡារីតា អ៊ិចប្រេស

ក្រុមហ៊ុន អ អិម អេ (ខេមបូឌា) – RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត ហ្វដ មកកាន់ទីផ្សារព្រះរាជាណាចក្រកម្ពុជា បានប្រារព្ធពិធី “ពិធីចុះអនុស្សរណៈយោគយល់គ្នារវាងក្រុមហ៊ុន អ អិម អេ (ខេមបូឌា)ម.ក និងក្រុមហ៊ុន ឡារីតា អ៊ិចប្រេស” ក្រោមអធិបតីភាពរបស់ លោក សេង វឹង នាយកគ្រប់គ្រងទូទៅនៃក្រុមហ៊ុន ហ្វដ និង លោក មឿន សម្បត្តិ នាយកគ្រប់គ្រងទូទៅនៃក្រុមហ៊ុន ឡារីតា អ៊ិចប្រេស រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានជាច្រើន។

លោក សេង វឹង នាយកគ្រប់គ្រងទូទៅនៃក្រុមហ៊ុន ហ្វដ បានមានប្រសាសន៍ថា៖ “ថ្ងៃនេះ ខ្ញុំមានកិត្តិយសដ៏ខ្ពង់ខ្ពស់ និងសេចក្តីសោមនស្សរីករាយ ដែលបានរៀបចំពិធីចុះអនុស្សរណៈយោគយល់គ្នារវាងក្រុមហ៊ុន អ អិម អេ (ខេមបូឌា) ម.ក និង ក្រុមហ៊ុន ឡារីតា អ៊ិចប្រេស។ កិច្ចសហប្រតិបត្តិការនេះអាចកើតមានឡើង ដោយសារភាពរឹងមាំរបស់ក្រុមហ៊ុន អ អិម អេ ដែលចាក់ឬសគល់ក្នុងទីផ្សារព្រះរាជាណាចក្រកម្ពុជា អស់រយៈកាលជាង ៣០ឆ្នាំកន្លងមកនេះ។ ជាពិសេសនោះ គឺភាពជឿជាក់របស់ក្រុមហ៊ុន ឡារីតា និងទំនុកចិត្ត មកលើគុណភាព សុវត្ថិភាព បច្ចេកវិទ្យា និងសេវាកម្មរបស់ ហ្វដ ដែលជាកត្តាជំរុញដល់ក្រុមហ៊ុន ឡារីតា សម្រេចចិត្តជ្រើសរើសយករថយន្ត ហ្វដ មកប្រើប្រាស់ជាធ្យោបាយដឹកជញ្ជូនអតិថិជនរបស់ខ្លួន។”

លោក មឿន សម្បត្តិ នាយកគ្រប់គ្រងនៃក្រុមហ៊ុន ឡារីតា អ៊ិចប្រេស បានមានប្រសាសន៍ថា៖ “ក្រុមហ៊ុន ឡារីតា បានសម្រេចចិត្តយករថយន្ត Ford Transit ដើម្បីធ្វើជាមធ្យោបាយដឹកអ្នកដំណើរ ដោយសាររថយន្តនេះ មានបច្ចេកវិទ្យាទំនើប សុវត្ថិភាពខ្ពស់ ជាពិសេស ក្រុមហ៊ុន ហ្វដ មានជាងជំនាញដែលទទួលបានការបណ្តុះបណ្តាលពីរោងចក្រផ្ទាល់ និងអ្នកជំនាញខ្មែរ និងបរទេសដែលមានបទពិសោធន៍យូរឆ្នាំ ដើម្បីធ្វើការថែទាំ និងជួសជុលរថយន្ត។ ដោយសារតែកត្តាចម្បងទាំងអស់នេះ ទើបធ្វើអោយក្រុមហ៊ុន ឡារីតា សម្រេចជ្រើសរើសយកក្រុមហ៊ុន ហ្វដ ធ្វើជាដៃគូសហប្រតិបត្តិការជាយូរអង្វែង។”

ពិធីចុះអនុស្សរណៈយោគយល់គ្នានេះ គឺឆ្លុះបញ្ជាំងអំពីកិច្ចសហប្រតិបត្តិការរវាងក្រុមហ៊ុនទាំងពីរ ដែលបានទំនាក់ទំនងជាយូរឆ្នាំណាស់មកហើយ រួមទាំងបានផ្តល់នូវអត្ថប្រយោជន៍ផ្សេងៗជាច្រើនទៅខាងដៃគូសហការផងដែរ។ មិនត្រឹមតែប៉ុណ្ណោះ កិច្ចសហការនេះក៏ចង់បន្តលើស្ទួយនូវវិស័យដឹកជញ្ជូនអ្នកដំណើររបស់ក្រុមហ៊ុន ឡារីតា អ៊ិចប្រេស អោយកាន់តែល្អប្រសើរ និងបន្តជាមិត្តដៃគូស្អិតល្មួតរវាងគ្នាទៅវិញទៅមក។

March 13, 2024

ស្ថានីយអវកាសនៅលើដីដំបូងរបស់ប្រទេសចិន

មូលដ្ឋានថ្មីដែលមានសមត្ថភាពបង្ហាញត្រាប់តាមបរិស្ថានស្ថានីយអវកាសចំនួន 9 យ៉ាង អនុញ្ញាតឱ្យអ្នកវិទ្យាសាស្ត្រធ្វើការពិសោធផ្នែកអវកាសជាច្រើនប្រភេត នៅលើផែនដីដោយផ្ទាល់។

ហេដ្ឋារចនាសម្ព័ន្ធស្រាវជ្រាវ និងធ្វើត្រាប់តាមបរិស្ថានអវកាស (SESRI) ដែលត្រូវបានចាត់ទុកថា ជាស្ថានីយអវកាសលើដីដំបូងរបស់ប្រទេសចិន បានឆ្លងផុតដំណាក់កាលវាយតម្លៃនៅខេត្ត Heilongjiang ភាគឦសានប្រទេសចិន កាលពីថ្ងៃទី 27 កុម្ភៈ។

ស្ថានីយអវកាសលើកដីនេះ ត្រូវបានសាងសង់ដោយវិទ្យាស្ថានស្រាវជ្រាវអវកាស និងវិទ្យាសាស្ត្រវត្ថុធាតុ នៃវិទ្យាស្ថានបច្ចេកវិទ្យាខេត្ត Heilongjiang (HIT) សហការជាមួយក្រុមហ៊ុនបច្ចេកវិទ្យា និងវិទ្យាសាស្ត្រអាកាសចរណ៍អវកាសចិន។

នៅក្នុងមូលដ្ឋាននេះ មានអគារពិសោធន៍ចំនួនបួន រួមមាន អគារបរិស្ថានអវកាសទាំងស្រុង, អគារវិទ្យាសាស្ត្រផ្លាស្មាអវកាស, អគារបរិស្ថានម៉ាញ៉េទិចអវកាស និងទីតាំងពង្រីកពូជសត្វ។

តាមផែនការ SESRI អាចធ្វើត្រាប់តាមកត្តាបរិស្ថានអវកាសចំនួន 9 ប្រភេទ មានជាអាទិ៍ សុញ្ញកាស សីតុណ្ហភាពខ្ពស់ និងទាប ភាគល្អិតផ្ទុកអគ្គិសនី វិទ្យុសកម្មអេឡិចត្រូម៉ាញ៉េទិច ធូលីអវកាស ផ្លាស្មា កម្លាំងទំនាញខ្សោយ ឧស្ម័នអព្យាក្រឹត និងមីក្រូទំនាញ។

យោងតាមអ្នកស្រាវជ្រាវនៅសភាវិទ្យាសាស្ត្រចិន ស្ថានីយអវកាសលើដីនេះនឹងក្លាយជាកន្លែងបណ្ដុះបណ្ដាលធនធានមនុស្សជាន់ខ្ពស់នៅប្រទេសចិន។ គិតត្រឹមខែមិថុនា 2023 មានស្ថាប័នជាង 110 មកពីប្រទេស និងដែនដីជាង 30 បានចុះឈ្មោះប្រើប្រាស់ស្ថានីយ SESRI៕

February 29, 2024

Tag: ពិសោធ