Tag: ពិភពលោក

មនុស្សជាងកន្លះលាននាក់បានឆ្លងវីរុសCOVID-19 នៅទូទាំងពិភពលោក
ចំនួនអ្នកឆ្លងមេរោគCOVID-19 បន្តកើនឡើងខ្លាំងនៅសហរដ្ឋអាមេរិក អ៊ីតាលី និងអេស្ប៉ាញ ដែលនេះនាំឱ្យចំនួនអ្នកឆ្លងមេរោគកូរ៉ូណាសរុបនៅទូទាំងពិភពលោក ឡើងដល់ជាង529,000នាក់។
COVID-19 បានបង្ហាញវត្តមាននៅក្នុងប្រទេស និងដែនដីជិត200នៅទូទាំងពិភពលោក ហើយសហរដ្ឋអាមេរិកបានលោតរំលោងប្រទេសចិន និងអ៊ីតាលី និងក្លាយជាសម្បុកមេរោគCOVID-19 ធំជាងគេបង្អស់ក្នុងពិភពលោក។
សហរដ្ឋអាមេរិកបានរកឃើញអ្នកផ្ទុកមេរោគCOVID-19 ចំនួន14,933នាក់បន្ថែមទៀត ក្នុងរយៈពេល24ម៉ោងកន្លងទៅ ធ្វើឱ្យតួលេខនៃករណីឆ្លងមេរោគនៅទូទាំងប្រទេសនេះកើនដល់83,144នាក់។ ប្រទេសនេះក៏មានអ្នកស្លាប់ថ្មីចំនួន174នាក់បន្ថែមទៀតផងដែរ នាំឱ្យតួលេខនៃអ្នកស្លាប់សរុបឡើងដល់1,201នាក់។
ប្រទេសអ៊ីតាលី ជាសម្បុកមេរោគCOVID-19 ធំបំផុតលំដាប់ទី3 នៅក្នុងពិភពលោក និងទី1នៅឯទ្វីបអឺរ៉ុប ដោយមានអ្នកស្លាប់ថ្មី712នាក់ថែមទៀត។ ជាសរុប ប្រទេសអ៊ីតាលីបានប្រកាសឱ្យដឹងថា ប្រទេសនេះមានអ្នកឆ្លង COVID-19 ចំនួន80,589នាក់ និងបាត់បង់ជីវិតចំនួន8,215នាក់។ អត្រានៃការស្លាប់គឺ10% ពោលគឺខ្ពស់ជាង2ដង បើធៀបនឹងមធ្យមភាគ(4,6%) នៅទូទាំងពិភពលោក។
ប្រទេសអេស្ប៉ាញ នៅតែជាសម្បុកមេរោគកូរ៉ូណាធំទី2នៅអឺរ៉ុប ដោយមានអ្នកឆ្លងវីរុស 57,786នាក់(កើន8,271នាក់បន្ថែមទៀត) និង4,365នាក់បានស្លាប់(កើន718នាក់)។
អាល្លឺម៉ង់ បានរកឃើញអ្នកផ្ទុកមេរោគកូរ៉ូណាថ្មីចំនួន6,615នាក់ និងស្លាប់ 61នាក់បន្ថែមទៀត ធ្វើឱ្យចំនួនអ្នកឆ្លងវីរុសសរុប43,938នាក់ និងស្លាប់សរុប267នាក់។
ប្រទេសអ៊ីរ៉ង់គឺជាសម្បុកមេរោគធំទី2ប្រចាំអាស៊ី បន្ទាប់ពីប្រទេសចិន (ចិនដីគោក) ដោយមានអ្នកឆ្លងមេរោគ29,406នាក់ និងអ្នកបានស្លាប់ មានចំនួន2,234នាក់។
ប្រទេសចិន និងកូរ៉េខាងត្បូងមិនទាន់ឱ្យដឹងអំពីតួលេខថ្មីនៅឡើយ។
នៅតំបន់អាស៊ីអាគ្នេយ៍ ប្រទេសម៉ាឡេស៊ី គឺជាសម្បុកមេរោគធំបំផុត ដោយមានអ្នកជំងឺកូរ៉ូណា 2,031នាក់ និងស្លាប់23នាក់។
ឥណ្ឌូនេស៊ី គឺជា “វាលពិឃាត” ធំជាងគេបង្អស់របស់វីរុសCOVID-19 នៅក្នុងតំបន់អាស៊ីអាគ្នេយ៍ ដោយមានអ្នកស្លាប់78នាក់ក្នុងចំណោមអ្នកជំងឺ893នាក់។ អត្រានៃការស្លាប់ដោយសារវីរុសនេះ គឺ8,7% ដែលស្ថិតក្នុងលំដាប់ខ្ពស់បំផុតក្នុងពិភពលោក។
ជាសរុប ពិភពលោកទាំងមូល បច្ចុប្បន្នមានអ្នកឆ្លងវីរុសCOVID-19 ចំនួន529,148នាក់ ក្នុងនោះមាន23,968នាក់បានស្លាប់។ អ្នកជំងឺចំនួន123,380នាក់(ស្មើនឹង23%នៃអ្នកឆ្លងមេរោគសរុប) បានជាសះស្បើយ៕
ប្រភព៖ AFP, Worldometer
March 27, 2020
មនុស្សជាង 11,000នាក់ បានបាត់បង់ជីវិតដោយសារ COVID-19 នៅទូទាំងពិភពលោក
តួលេខស្ដីអំពីអ្នកស្លាប់ដោយសារឆ្លងវីរុស COVID-19 បានកើនឡើងយ៉ាងឆាប់រហ័សនៅអឺរ៉ុប ធ្វើឱ្យចំនួនអ្នកស្លាប់នៅទូទាំងពិភពលោក កើនដល់ 11,357នាក់ នៅក្នុងចំណោមអ្នកជំងឺកូរ៉ូណាសរុប 274,413នាក់។
COVID-19 បានបង្ហាញខ្លួននៅក្នុងប្រទេស និងដែនដីចំនួន185 នៅទូទាំងសកលលោក។ អេស្ប៉ាញ និងអាល្លឺម៉ង់ បានលោតរំលងផុតប្រទេសអ៊ីរ៉ង់ ហើយបានក្លាយជាសម្បុកមេរោគធំបំផុតទី3 និងទី4 ក្នុងពិភពលោក បន្ទាប់ពីប្រទេសចិន និងអ៊ីតាលី។ ចំនួនអ្នកស្លាប់ដោយសារកូរ៉ូណានៅអឺរ៉ុប កើនលើសពី 5,000ករណី។
អ៊ីតាលី ដែលជាសម្បុកមេរោគធំបំផុតនៅអឺរ៉ុប និងធំលំដាប់ទី2នៅលើលោក បានរកឃើញអ្នកជំងឺ COVID-19 សរុប 47,021នាក់ ក្នុងនោះ 4,032នាក់បានស្លាប់។ អត្រានៃការស្លាប់គឺ 8.5% ខ្ពស់ជាងទ្វេដង ធៀងនឹងអត្រាមធ្យម 4.1% នៅទូទាំងពិភពលោក។ កត្តាចម្បងដែលនាំឱ្យមានអ្នកស្លាប់ច្រើនបែបនេះ គឺដោយសារប្រទេសនេះមានមនុស្សចាស់ច្រើនជាងគេនៅអឺរ៉ុប ហើយ99%នៃអ្នកស្លាប់ សុទ្ធតែមានរោគប្រចាំកាយស្រាប់។
អេស្ប៉ាញគឺជាសម្បុកមេរោគ COVID-19 ធំទី2ក្នុងលោក។ បច្ចុប្បន្ន ប្រទេសនេះ មានអ្នកឆ្លងរោគសរុប21,510ករណី និងស្លាប់1,093ករណី ដោយមានអ្នកឆ្លងរោគថ្មីចំនួន 3,433ករណី និងអ្នកស្លាប់ថ្មី 262ករណី។
អាល្លឺម៉ង់ រកឃើញអ្នកឆ្លងរោគថ្មី4,528ករណី និងអ្នកស្លាប់24ករណីបន្ថែមទៀត ធ្វើឱ្យចំនួនអ្នកផ្ទុកមេរោគសរុបកើនដល់19,848នាក់ និងស្លាប់68នាក់។ បើទោះបានក្លាយជាសម្បុកមេរោគធំបំផុតលំដាប់ទី3ក្នុងពិភពលោក ប៉ុន្តែ អត្រានៃការស្លាប់នៅប្រទេសនេះ មានត្រឹមតែ 0.3% ប៉ុណ្ណោះ។
អ៊ីរ៉ង់គឺជាសម្បុកមេរោគធំបំផុតលំដាប់ទី2នៅអាស៊ី បន្ទាប់ពីប្រទេសចិន (ចិនដីគោក) ដោយមានអ្នកឆ្លងរោគសរុប19,644ករណី និងអ្នកស្លាប់សរុប1,433ករណី។
ប្រទេសចិន បានប្រកាសថា មិនបានរកឃើញអ្នកផ្ទុកមេរោគកូរ៉ូណាក្នុងស្រុកនោះទេ ប៉ុន្តែ បានរកឃើញ41ករណី ដែលជាអ្នកជំងឺ “នាំចូល” ពីបរទេស។ ចំណែកកូរ៉េខាងត្បូង មិនទាន់បានបញ្ចេញរបាយការណ៍ថ្មីនៅឡើយ។
សហរដ្ឋអាមេរិកបានរកឃើញករណីឆ្លងរោគថ្មីចំនួន 5,087នាក់បន្ថែមទៀត នាំឱ្យចំនួនអ្នកបានឆ្លង COVID-19 សុរបឡើងដល់ 18,876ករណី ក្នុងនោះមាន 237នាក់បានបាត់បង់ជីវិត។ បុគ្គលិកម្នាក់ធ្វើការក្នុងការិយាល័យអនុប្រធានាធិបតី Mike Pence ដែលជាអ្នកចាត់ចែងយុទ្ធនាការប្រឆាំង COVID-19 ក៏បានឆ្លងវីរុសនេះដែរ។
នៅតំបន់អេស៊ីអាគ្នេយ៍វិញ ប្រទេសម៉ាឡេស៊ី នៅតែបន្តជាសម្បុកមេរោគធំជាងគេ ដោយមានអ្នកជំងឺ 1,030នាក់ ក្នុងនោះមាន3នាក់បានបាត់បង់ជីវិត។ ចំណែកឥណ្ឌូនេស៊ីវិញ គឺជាប្រទេសដែលមានអ្នកស្លាប់ដោយសារ COVID-19 ច្រើនជាងគេក្នុងតំបន់ ដោយមានអ្នកស្លាប់ចំនួន32ករណី ក្នុងចំណោមអ្នកជំងឺសរុប369នាក់។
សរុបមក ពិភពលោកទាំងមូល មានករណីស្លាប់ថ្មីចំនួន 1,326នាក់ ដែលភាគច្រើនកើតឡើងនៅអឺរ៉ុប ធ្វើឱ្យចំនួនអ្នកស្លាប់សរុបកើនដល់ 11,357នាក់។ អ្នកជំងឺចំនួន 90,942នាក់ (ស្មើនឹង33.1% ធៀបនឹងអ្នកជំងឺសរុប) បានជាសះស្បើយពីជំងឺ។ ប្រទេស Papua New Guinea និងប្រទេស Cabo Verde រួមនឹង Angola គឺជាប្រទេសដែលទើបតែបានរកឃើញករណីឆ្លង COVID-19 ដំបូងបង្អស់របស់ខ្លួន៕
ប្រភព៖ សារព័ត៌មានបរទេស
March 21, 2020
ចំនួនអ្នកស្លាប់ដោយសារវីរុសកូរ៉ូណា COVID-19 ឡើងដល់2,247នាក់
ខេត្ត Hubei មានអ្នកស្លាប់បន្ថែម115នាក់ កើន5,6% បើធៀបនឹងតួលេខកាលពីម្សិលមិញ និងធ្វើឱ្យខេត្តនេះ មានអ្នកស្លាប់ដោយសារវីរុសកូរ៉ូណា COVID-19 ឡើងដល់2,144នាក់។
គណៈកម្មការសុខាភិបាលខេត្ត Hubei ព្រឹកនេះបានប្រកាសថា ចំនួនអ្នកដែលបានឆ្លងមេរោគកូរ៉ូណា COVID-19 ក្នុងខេត្តនេះ មាន 62,442នាក់ កើន411ករណី បើធៀបនឹងម្សិលមិញ។ ខេត្តនេះក៏មានអ្នកស្លាប់បន្ថែម115នាក់ កើន5,6% ធៀបនឹងថ្ងៃមុន ដូច្នេះអ្នកស្លាប់ដោយសារមេរោគកូរ៉ូណាក្នុងខេត្ត Hubei ឡើងដល់2,144នាក់។
តួលេខខាងលើនេះ បានបញ្ចប់ការថយចុះនៃចំនួនអ្នកឆ្លងមេរោគថ្មី និងចំនួនអ្នកស្លាប់នៅក្នុងខេត្ត Hubei ប៉ុន្តែវានៅតែទាបជាងច្រើន បើធៀបនឹងដំណាក់មុនៗនោះ។ ទីក្រុង Wuhan ដែលជាតំបន់ក្ដៅនៃអាសន្នរោគរលាកសួតកូរ៉ូណា បានរកឃើញអ្នកផ្ទុកមេរោគថ្មីចំនួន 319នាក់ ដែលនេះជាតួលេខទាបបំផុតគិតចាប់ពីថ្ងៃទី 28មករា។ ទីក្រុងនេះក៏មានអ្នកស្លាប់បន្ថែមចំនួន99នាក់។
គណៈកម្មការសុខាភិបាលចិន (NHC) មិនទាន់បានប្រកាសអំពីតួលេខថ្មីនៅឡើយសម្រាប់ព្រឹកនេះ។
អាសន្នរោគរលាកសួតថ្មី COVID-19 បានឆ្លងរាលដាលដល់28ប្រទេស និងតំបន់នៅលើពិភពលោក បណ្ដាលឱ្យមានអ្នកឆ្លង76,214នាក់ និងអ្នកស្លាប់2,247នាក់។ អ្នកជំងឺដែលបានជាសះស្បើយ មានចំនួន18,404នាក់ និង12,064នាក់ កំពុងស្ថិតក្នុងគ្រោះថ្នាក់។
កូរ៉េខាងត្បូង កាលពីម្សិលមិញបានបញ្ជាក់ថា ប្រទេសនេះមានអ្នកស្លាប់ដំបូងគេហើយទាក់ទិននឹងជំងឺកូរ៉ូណានេះ។
ជាសរុប ចំនួនអ្នកស្លាប់នៅខាងក្រៅប្រទេសចិន (ចិនដីគោក) រួមមានប្រទេសជប៉ុន កូរ៉េខាងត្បូង បារាំង ហ្វីលីពីន តៃវ៉ាន់ ហុងកុង និងប្រទេសអ៊ីរ៉ង់៕
ប្រភព៖ សារព័ត៌មានបរទេស
February 21, 2020
ឆ្នាំ2050 មនុស្សលើពិភពលោកជាង22% នឹងក្លាយជាមនុស្សចាស់ តើនឹងមានអ្វីកើតឡើង?
បញ្ហាអាយុរបស់ប្រជាជនមិនទាន់ក្លាយជាបញ្ហាប្រឈមខ្លាំងនោះទេសម្រាប់កម្ពុជា ព្រោះប្រទេសយើងមានប្រជាជនវ័យក្មេងច្រើនជាងគេក្នុងតំបន់។ បញ្ហានេះបានធ្វើឱ្យប្រទេសកម្ពុជាកំពុងស្ថិតក្នុងចំណាប់អារម្មណ៍របស់អ្នកវិនិយោគ និងបណ្តាប្រទេសមួយចំនួនក្នុងតំបន់ ខណៈពេលដែលប្រទេសអភិវឌ្ឍន៍នានាដូចជាជប៉ុនជាដើមកំពុងប្រឈមនឹងបញ្ហាចំនួនមនុស្សចាស់កាន់តែច្រើនឡើងៗ តែទោះជាយ៉ាងនេះក្តី កំណើនប្រជាជននឹងចាប់ផ្តើមកើនឡើងពី 1ឆ្នាំទៅ 1ឆ្នាំ ហើយចំនួនប្រជាជនវ័យក្មេងដ៏ច្រើននាពេលបច្ចុប្បន្ននឹងក្លាយជាមនុស្សចាស់នៅប្រមាណជាង 30ឆ្នាំទៅមុខទៀត ដែលវាអាចនឹងក្លាយជាបញ្ហាប្រឈមសម្រាប់យើងទាំងអស់គ្នា ដែលទាមទារឱ្យមានការគិតគូរ និងត្រៀមខ្លួនដោះស្រាយ។
យោងតាមប្រភពពីធនាគារ Deutsche Bank ដែលបានដកស្រង់ការផ្សាយដោយវេទិកាសេដ្ឋកិច្ចពិភពលោកបានឱ្យដឹងថា បច្ចុប្បន្ននេះនៅលើពិភពលោកមានមនុស្សវ័យច្រើនជាង 65ឆ្នាំ និងតិចជាង 5ឆ្នាំកាន់តែកើនឡើងជាបន្តបន្ទាប់ ដែលចំនួននេះបានបង្កើតនូវក្តីព្រួយបារម្ភសម្រាប់គ្រប់ប្រទេសទាំងអស់ក្នុងពិភពលោក។ ទន្ទឹមនឹងនេះទិន្នន័យរបស់អង្គការសហប្រជាជាតិក៏បានបញ្ជាក់ដែរថា មនុស្សចំនួន22% នៅលើពិភពលោកនឹងមានអាយុច្រើនជាង 60ឆ្នាំ ដែលជាអាយុត្រូវចូលនិវត្តន៍នៅឆ្នាំ 2050ខាងមុខនេះ។ បញ្ហានេះបានក្លាយជាកត្តាប្រឈមធំមួយសម្រាប់វិស័យសេដ្ឋកិច្ចនៅលើពិភពលោក នាថ្ងៃអនាគត បើទោះបីជាសេដ្ឋកិច្ចបច្ចុប្បន្ននេះកំពុងមានការអភិវឌ្ឍ និងប្រែប្រួលយ៉ាងលឿនដោយសារវត្តមាននៃបច្ចេកវិទ្យាយ៉ាងណាក៏ដោយ។
ទិន្នន័យដែលចេញដោយវេទិកាសេដ្ឋកិច្ចពិភពលោកបានបញ្ជាក់ថា បញ្ហាប្រឈមដែលអាចនឹងកើតឡើង គឺចំនួនមនុស្សចាស់ដ៏ច្រើននេះនឹងធ្វើឱ្យរដ្ឋាភិបាលនៃប្រទេសនីមួយៗត្រូវបង្កើនការចំណាយលើវិស័យសុខាភិបាល និងការថែទាំសុខភាពមនុស្សចាស់ព្រោះមនុស្សចាស់ត្រូវតែទៅមន្ទីរពេទ្យច្រើនជាងវ័យកណ្តាល។ ក្រៅពីនេះ មនុស្សចាស់ដែលចូលនិវត្តន៍ និងឈប់ធ្វើការងារកាន់តែមានចំនួនច្រើនឡើងៗ ដែលធ្វើឱ្យចំណូលរបស់គាត់ថយចុះ ហើយការបង់ពន្ធលើប្រាក់ចំណូលក៏ត្រូវធ្លាក់ចុះផងដែរ។ កត្តានេះធ្វើឱ្យរដ្ឋាភិបាលនៃប្រទេសនីមួយៗត្រូវបង្កើនការចំណាយស្របពេលដែលចំណូលមួយផ្នែកតូចត្រូវថយចុះ។
ដើម្បីឆ្លើយតបនឹងបញ្ហានេះ រដ្ឋាភិបាលនៃប្រទេសនីមួយៗចាំបាច់ត្រូវខិតខំប្រឹងប្រែងក្នុងការអភិវឌ្ឍធនធានមនុស្សដល់ប្រជាជនជំនាន់ថ្មី ជាពិសេសប្រជាជនសកម្ម ឱ្យធ្វើការងារកាន់តែខ្លាំង និងបង្កើនប្រសិទ្ធភាពការងារឱ្យកាន់តែខ្ពស់ដើម្បីប្រមូលធនធានទប់ទល់នឹងការចំណាយ។ បញ្ហានេះត្រូវបានគេមើលឃើញថា វានឹងក្លាយជាកត្តាប្រឈមក្នុងវិស័យសេដ្ឋកិច្ចនៅក្នុងសតវត្សរ៍ទី21នេះ ដែលវាមិនត្រឹមតែទាមទារឱ្យយកចិត្តទុកដាក់ខ្លាំងសម្រាប់រដ្ឋាភិបាលប៉ុណ្ណោះទេ តែយុវជនខ្លួនឯងក៏ត្រូវតែដឹង និងត្រៀមខ្លួនសម្រាប់ខិតខំដើម្បីបង្កើនប្រសិទ្ធភាពការងារផងដែរ។
ម្យ៉ាងវិញទៀត បញ្ហាដែលអាចនឹងកើតឡើងមួយផ្សេងទៀតគឺ មនុស្សចាស់នៅគ្រប់ប្រទេសទាំងអស់លើពិភពលោកត្រូវបានគេមើលឃើញថា ចូលចិត្តសន្សំច្រើនជាងចំណាយលុយរបស់គាត់ ដែលបញ្ហានេះធ្វើឱ្យសេដ្ឋកិច្ចនៅលើពិភពលោកនាពេលអនាគតអាចមានកំណើនយឺត។
ទោះជាយ៉ាងនេះក្តី ដើម្បីត្រៀមខ្លួនដោះស្រាយជាមួយបញ្ហាទាំងអស់នេះ បណ្តាប្រទេសមួយចំនួនដែលកំពុងប្រឈមជាមួយនឹងបញ្ហាទាំងអស់នេះបានចាប់ផ្តើមខិតខំប្រឹងប្រែងរិះរកវិធីសាស្ត្រដើម្បីសម្រាលបន្ទុក និងប្រែក្លាយបញ្ហាឱ្យទៅជារឿងល្អសម្រាប់មនុស្សជាតិទូទៅនៅថ្ងៃអនាគត។
នៅប្រទេសមួយចំនួន គឺចាប់ផ្តើមរៀបចំ និងបង្កើតជំនាញថ្មីៗជាច្រើនដើម្បីឱ្យមនុស្សចាស់អាចមានលទ្ធភាពធ្វើការងារដែលស្របនឹងវ័យរបស់ពួកគាត់។ ការធ្វើបែបនេះនឹងធ្វើឱ្យមនុស្សចាស់មានលទ្ធភាពកាន់តែខ្ពស់ និងកាត់បន្ថយភាពឯកោបានទៀតផង។ ម្យ៉ាងវិញទៀតដើម្បីដោះស្រាយបញ្ហាសេដ្ឋកិច្ចដែលកើតឡើងនៅថ្ងៃអនាគត មនុស្សក៏ចាប់ផ្តើមរិះរកច្រកបន្ថែមដើម្បីទប់ស្កាត់ និងធ្វើឱ្យកាន់តែប្រសើរឡើងលើវិស័យគាំពារមនុស្សចាស់ដោយចំណាយតិចតែទទួលបានផលិតភាពខ្ពស់។
ចំពោះបច្ចេកវិទ្យាវិញ ដោយសារបច្ចុប្បន្ននេះការធ្វើស្វ័យប្រវត្តិកម្មចាប់ផ្តើមត្រូវបានគេប្រើប្រាស់ច្រើននោះ វាក៏ជាច្រកសំខាន់មួយដែលអាចឱ្យមនុស្សចាស់ប្រើប្រាស់វា និងទទួលយកផលប្រយោជន៍ពីវាបានកាន់តែច្រើនផងដែរ។ ជាក់ស្តែងនៅប្រទេសជប៉ុន មានហាងមួយបានចាប់ផ្តើមឱ្យមនុស្សដែលមានពិការភាព ប្រើប្រាស់មនុស្សយន្តឱ្យធ្វើការជំនួសដើម្បីបង្កើតការងារដល់ពួកគេ និងបង្កើតប្រាក់ចំណូល ដោយពួកគេគ្រាន់តែនៅបញ្ជាមនុស្សយន្តពីលើគ្រែ ឬកន្លែងរស់នៅរបស់ពួកគេប៉ុណ្ណោះ៕
April 27, 2019
ល្អាងស្អាតបំផុតលើពិភពលោក 9កន្លែង ត្រូវតែទៅឱ្យបានម្ដង!
សម្រាប់អ្នកទេសចរវិញ មិនថាតែឡើងភ្នំ ឬចុះទឹកនោះទេ ពួកគេអាចទៅបានគ្រប់ទីកន្លែងមិនខ្លាចញញើតអ្វីទាំងអស់រឹតតែជាអ្នកដែលស្រឡាញ់ចូលចិត្តធម្មជាតិដែលស្រស់ស្អាត និងចម្លែកភ្នែកផងនោះ ឡារ៉ែន សូមទាយថា 9ល្អាងធម្មជាតិដែលយើងនឹងនាំយកមកជូនទស្សនានៅពេលនេះ ច្បាស់ជាធ្វើឱ្យបេះដូងរបស់ពួកគេញ័ររញ្ជួយយ៉ាងពិតប្រាកដ។
1. ល្អាងទឹកកក (Ice Cave) ប្រទេស Iceland

ឬឈ្មោះមួយទៀតហៅថា ល្អាងគ្រីស្តាល់ជាល្អាងដែលកើតឡើងនៅក្នុងបឹងទឹកកកទឹកសាប ដែលស្ថិតនៅក្នុងតំបន់ ស្កាហ្វតាហ្វេល (Skaftafell) ជាល្អាងមួយក្នុងចំណោមល្អាងទឹកកក ដែលស្អាតបំផុតក្នុងពិភពលោក និងល្បីឈ្មោះបំផុត។
2. ល្អាង បាទូ (Batu Caves) ប្រទេសម៉ាឡេស៊ី

ល្អាងថ្មកំបោរ បាទូ ស្ថិតនៅប៉ែកខាងជើងនៃទីក្រុងកួឡាឡាំពួ ដែលក្រៅពីជានិមិត្តសញ្ញារបស់រដ្ឋ សាឡាំងង៉រ ហើយនោះ ទីកន្លែងមួយនេះថែមទាំងជាវត្តអារាម និងជាកន្លែងប្រតិបត្តិពិធីខាងសាសនាហ៊ីនឌូ ហើយថែមទាំងបានទទួលការពេញនិយមពីបណ្ដាអ្នកទេសចរទូទាំងពិភពលោកទៀតផង។
3. ល្អាងគ្រីស្តាល់ (Cave of the Crystals) ប្រទេសម៉ិកស៊ិក

ស្ថិតនៅក្នុងខេត្ត ណៃកា ភាគខាងជើងនៃប្រទេសម៉ិកស៊ិក។ នៅខាងក្នុងល្អាង ត្រូវបានគេរកឃើញកំណករ៉ែ យីបសាំ ដ៏ធំអស្ចារ្យ ដែលកើតឡើងពីសារធាតុរ៉ែ ដែលរលាយដោយសារទឹកក្ដៅដែលមកពីបណ្ដុំថ្មស្អិត ម៉ែកម៉ា ដែលនៅខាងក្រោម ជ្រៅទៅក្រោមដីជម្រៅជាង300ម៉ែត្រ។
4. ល្អាងទឹកកក ក្បែរភ្នំភ្លើង (The Mutnovsky) ប្រទេសរុស្ស៊ី

ដោយសារតែល្អាងទឹកកកនេះស្ថិតនៅក្បែរភ្នំភ្លើង Mutnovsky ទើបធ្វើឱ្យកើតមានការផ្ដុំគ្នារបស់ទឹកកកកើតចេញជាក្បូរក្បាច់ និងធ្វើឱ្យទីកន្លែងនេះក្លាយជាល្អាងទឹកកកដែលមើលទៅស្អាតប្លែកភ្នែកបំផុត។
5. ល្អាង Blue Cave ប្រទេស Croatia

ឬមានឈ្មោះមួយទៀតថា Modra Spilja ស្ថិតនៅក្នុងឈូងសមុទ្រ Balun របស់កោះ Bisevo។ ភាពពិសេសរបស់ល្អាងមួយនេះ គឺ បាតុភូតឆ្លុះពន្លឺពណ៌ផ្ទៃមេឃខៀវដែលកើតឡើងក្នុងចន្លោះម៉ោង 11.00 – 12.00 ដោយសារតែពន្លឺព្រះអាទិត្យដែលចាំងចូលមកតាមចន្លោះថ្មកំបោរមករហូតកើតចេញជាពន្លឺពណ៌ផ្ទៃមេឃខៀវឡើងហ្នឹងឯង។
6. ល្អាង សុន ទុង (Son Doong) ល្អាងដែលធំបំផុតក្នុងពិភពលោក

ប្រទេសវៀតណាមស្ថិតនៅក្នុងតំបន់ឧទ្យានជាតិ ហ្វុងយ៉ា-គែបាង ស្រុក បូចាក់ ខេត្ត កួងប៊ីន (Quang Binh) គេល្បីថា ជាល្អាងដែលមានភាពលំបាកបំផុត ព្រោះអ្នកទេសចរដែលទៅទីនោះត្រូវតែចេះស៊ូទ្រាំ អត់ធន់ និងមានភាពក្លាហានហ៊ានប្រថុយប្រថានខ្លាំងទើបអាចចូលទៅទស្សនាបាន។
7. ល្អាង ហ្វ៊ីងហ្កាលស៍ (Fingals Cave)

ប្រទេសស្កត់លែនដ៍ជាល្អាងដែលស្ថិតនៅក្នុងសមុទ្រ លើកោះស្តាហ្វហ្វា ខាងក្រៅឆ្នេរទិសខាងលិចរបស់ប្រទេស ស្កុតលែនដ៍។ កោះនេះមានឈ្មោះល្បីល្បាញរឿងកំណប់បុរាណ ក្នុងល្អាងមានថ្ម បៈសូលរូបរាងបួនជ្រុង មានប្រវែងខាងក្នុង 70ម៉ែត្រ និងផ្នែកខាងមុខល្អាងមានកម្ពស់ស្មើអគារ 6ជាន់ឯណោះ។
8. ល្អាងថ្លើមថ្ម (Cavernas De Marmol)

ប្រទេសឈីលីជាល្អាងដែលកើតឡើងពីចរន្តទឹកហូរដែលច្រោះដាច់រយៈពេលរាប់លានឆ្នាំ រហូតដល់ភ្នំថ្លើមថ្មកើតចេញជាគ្រោងល្អាងថ្លើមថ្មដ៏សែនស្រស់ស្អាតនេះឡើង។ ល្អាងនេះស្ថិតនៅក្នុងតំបន់បឹងទឹកសាប ការេរ៉ា នៅខាងក្នុងល្អាងនោះពេញទៅដោយទឹកថ្លាឈ្វេងស្អាតបរិសុទ្ធ ចាំងឆ្លុះពន្លឺពីផ្ទៃមេឃប៉ះនឹងផ្ទៃទឹករបស់បឹងទឹកសាបដ៏ធំបំផុតលំដាប់លេខពីររបស់ទ្វីបអាមេរិកខាងត្បូង។
9. ល្អាង ផូស្តូតណា (Postojna Cave)

ប្រទេសស្លូវេនៀ (Slovenia) ស្ថិតនៅក្នុងតំបន់ទីប្រជុំជន ផូស្តូតណា ជាល្អាងដែលស្អាតបំផុតក្នុងទ្វីបអឺរ៉ុប មានអាយុចំណាស់ជាង2លានឆ្នាំ និងបើកឱ្យភ្ញៀវទេសចរចូលទស្សនាតាំងពីឆ្នាំ1884 មកម្លេ៉ះ។ នៅខាងក្នុងល្អាងមានទាំងថ្មដុះឡើង និងថ្មដុះធ្លាក់សំយ៉ុង ខ្សែទឹកហូរ អាងទំនប់ទឹក ហើយថែមទាំងមាន ត្រីមនុស្ស (Human Fish) ឬ Olm វត្ថុមានជីវិតខ្នាតតូច មានសម្បុរស្បែកស្រដៀងមនុស្ស តែដងខ្លួនវែងស្រដៀងសត្វពស់ មានដៃ និងជើង ត្រូវបានរកឃើញលើកដំបូងនៅឆ្នាំ1768៕
September 1, 2018
គុក 11កន្លែង ដែលល្បីល្បាញថា មានភាពសាហាវឃោរឃៅខ្លាំងបំផុតលើពិភពលោក…
តើលោកអ្នកចង់ដឹងទេថា គុកដែលជាប់លេខ 1 ស្ថិតនៅក្នុងប្រទេសណា?!
មានឈ្មោះថាគុកហើយនោះ ប្រាកដណាស់ថា គ្មាននរណាម្នាក់ចង់ចូលទៅនៅក្នុងទីនោះឡើយ តែនៅពេលធ្វើខុសក៏ត្រូវតែនិយាយគ្នាទៅតាមច្បាប់ និងពេលចូលទៅនៅក្នុងគុកហើយ លោកអ្នកនឹងមិនដឹងឡើយថា នឹងត្រូវជួបអ្វីខ្លះ? អាចនឹងត្រូវជួបនឹងសេចក្តីឈឺចាប់ សេចក្តីលំបាកវេទនា ឬសេចក្តីស្លាប់ ឬអ្នកខ្លះអាចនឹងបានជួបនឹងមិត្តភាពល្អៗនៅក្នុងគុកក៏អាចថាបានដែរ។
ខាងក្រោមនេះគឺ គុកដ៏សាហាវៗលើពិភពលោកទាំង 11 កន្លែង តែមានគុកណាខ្លះនោះ សូមតាមដានជាបន្ត (និងសូមកុំភ្លេចថា នៅក្នុងចំណោមនោះមានគុកនៅក្នុងស្រុកខ្មែរយើងមួយដែរ)
11 . គុក បាងខ្វាង ប្រទេសថៃ
ជាប់ឈ្មោះនៅក្នុងលំដាប់ចុងប៉ូចគេរបស់បញ្ជីនេះ ល្បីល្បាញរឿងមានភាពសាហាវឃោរឃៅគួរសម អ្នករៀបរៀងសំណៅរឿងនេះបានឱ្យហេតុផលថា គឺជាគុកដែលមានទាំងទង្វើអំពើហិង្សាទៅលើអ្នកទោស ការរស់នៅចង្អៀតណែន គ្មានអនាម័យ ដល់ថ្នាក់លើកឱ្យក្លាយជាគុកដែល Hardcore មួយដែរនៅលើពិភពលោកនេះ។
10 . គុក Rikers Island នីវយ៉ក ប្រទេសសហរដ្ឋអាមេរិក
ជាគុកដែលល្បីល្បាញរឿងធ្វើអំពើហិង្សាលើអ្នកទោស និងធ្លាប់មានអ្នកទោសស្លាប់ដោយសារអំពើហិង្សានៅក្នុងទីនោះរួចមកហើយ។
9 . គុក San Quentin
កសាងឡើងនៅឆ្នាំ 1852 ជាគុកដែលចំណាស់បំផុតនៅក្នុងរដ្ឋ កាលីហ្វ័រនៀ ជាកន្លែងដែលគេល្បីល្បាញថា មានបញ្ហារឿងអំពើហិង្សាកើតឡើងជាបន្តបន្ទាប់ ដោយក្នុងឆ្នាំ 2006 មានកើតការចលាចលមួយឡើង ដោយសារពួកអ្នកទោសបានព្យាយាមហែកគុករត់ ធ្វើឱ្យមានអ្នករងរបួសច្រើនជាង 100 នាក់ និងស្លាប់ 2 នាក់ ធ្វើឱ្យខាងសមត្ថកិច្ចត្រូវតែបន្ថែមភាពម៉ឺងម៉ាត់នៅក្នុងគុកមួយនេះកាន់តែខ្លាំងឡើង។
8 . គុក Alcatraz Island
តាំងនៅលើកោះ Alcatraz ដែលស្ថិតនៅខាងក្រៅឈូងសមុទ្ររបស់ សានហ្វ្រានស៊ីស្កូ។ ជាគុកសម្រាប់ដាក់អ្នកទោសឧក្រិដ្ឋដែលគ្រោះថ្នាក់បំផុតក្នុងប្រវត្តិសាស្រ្ត តែនៅទីបំផុតក៏ត្រូវបានបញ្ជាឱ្យបិទក្នុងឆ្នាំ 1963 ដោយសារតែថវិកាមិនគ្រប់គ្រាន់ក្នុងការជួសជុលឱ្យល្អឡើងវី្។
7 . គុក La Sabaneta
ស្ថិតនៅក្នុងប្រទេសវេណេហ្សូ៊អេឡា ដែលកសាងឡើងសម្រាប់ដាក់អ្នកទោស 15,000 នាក់ តែបែរជាមានអ្នកទោសរស់នៅបញ្ច្រៀតគ្នាណែនដល់ទៅ 2,5000 ទៅវិញ ខណៈដែលអ្នកយាមគុកក៏មានការខ្វះខាតដូចគ្នា គឺអ្នកយាមគុកម្នាក់ត្រូវមើលឃុំគ្រងអ្នកទោសដល់ទៅ 150 នាក់។ ក្នុងឆ្នាំ 1994 មានអ្នកស្លាប់ដល់ទៅ 108 នាក់ និងឆ្នាំបន្ទាប់មក មានអ្នកទោសរងរបួស 624 នាក់ ស្លាប់ 196 នាក់ ដោយសារអំពើហិង្សានៅក្នុងគុក។
6 . គុក Gitarama
ជាគុកដែលកសាងឡើងសម្រាប់ដាក់អ្នកទោសត្រឹមតែ 500 នាក់ប៉ុណ្ណោះ តែបែរជាមានអ្នកទោសច្រើនដល់ទៅ 6,000 នាក់ត្រូវបានដាក់នៅក្នុងទីនោះ ហើយដោយចំនួនដែលច្រើនហៀរគុកយ៉ាងនេះ ជំងឺដំបៅក្លាយរាលដាលក៏កើតមានឡើងយ៉ាងធ្ងន់ធ្ងរនិងដោយគ្មានការព្យាបាលអ្វីទាំងអស់ តែបណ្តោយទុកឱ្យដំបៅនោះស្អុយរលួយ រហូតដល់ត្រូវកាត់អវយវៈដែលកើតដំបៅនោះចោលនៅទីបំផុត ឬអ្នកខ្លះដល់ថ្នាក់ស្លាប់ក៏មាន។ អ្នកទោសភាគច្រើននៅក្នុងគុកនេះបានមកពីការសម្លាប់បំបាត់ពូជសាសន៍ក្នុងប្រទេស Rwanda។
5 . គុក La Sante
ស្ថិតនៅក្នុងទីក្រុងប៉ារីស ប្រទេសបារាំង អ្នកទោសជាច្រើនបានធ្វើអត្តឃាត ដោយសារតែមិនអាចទ្រាំនិងស្ថានភាពក្នុងគុកនេះបាន។ ក្រៅពីអ្នកយាមគុកហើយ នៅមានអ្នកទោសមួយចំនួនតាំងខ្លួនជាអ្នកមានអំណាច និងគំរាមកំហែងធ្វើបាបអ្នកទោសដែលទន់ខ្សោយជាង។ ខាងពន្ធនាគារព្យាយាមកែបញ្ហានេះ ដោយការពន្លែងអ្នកទោសចេញពីបន្ទប់ឃុំឃាំង 4 ម៉ោងក្នុងមួយថ្ងៃ ដើម្បីបន្ធូរភាពតានតឹងក្នុងអារម្មណ៍ឱ្យបានច្រើនឡើង។
4 . គុក Diyarbakir
ស្ថិតនៅក្នុងប្រទេសទុរគី អំពើហិង្សានៅក្នុងគុកមួយនេះមិនបានកើតចេញពីពួកអ្នកទោសទេ តែកើតចេញពីបណ្តាអ្នកយាមគុកទាំងឡាយទៅវិញ។ ក្នុងឆ្នាំ 1996 ប៉ូលិស និងក្រុមមន្រ្តីគុកបានប្រើអំពើហិង្សាទៅលើអ្នកទោស ធ្វើឱ្យមានអ្នកស្លាប់ 10 នាក់ និងរងរបួស 23 នាក់ទៀត។
3 . គុក Tadmor
ជាគុកដែលបង្កើតឡើងមកដើម្បីកាត់បន្ថយគុណតម្លៃនៃភាពជាមនុស្សរបស់អ្នកទោស ដោយសារហេតុកាណ៍ក្នុងឆ្នាំ 1980 នៅពេលប្រធានាធិបតី Hafez Al-Assad ត្រូវកងកម្លាំងប្រឆាំងវាយលុក គាត់បានបញ្ជាឱ្យទាហាននាំពួកអ្នកទោសចេញពីគុកនេះទៅវាយប្រហារសត្រូវវិញដែរ បន្ទាប់ពីនោះគុកនេះក៏ត្រូវបានបិទទ្វារក្នុងឆ្នាំ 2001 តែក៏ត្រឡប់មកបើជាថ្មីឡើងវិញនៅឆ្នាំ 2011។
2 . គុក Carandiru Penitentiary
ស្ថិតនៅក្នុងប្រទេស ប្រេស៊ីល ជាគុកជាប់លំដាប់លេខ 2 ខាងផ្នែកកាចសាហាវឃោរឃៅ និងពោរពេញដោយអំពើហិង្សា និងថែមទាំងមានអ្នកទោសចំនួន 1 ភាគ 5 របស់គុកនេះឆ្លងមេរោគ HIV ទៀតផង។ នៅក្នុងគុកនេះមានទាំងរឿង ប្រើអំណាចឥទ្ធិពលងងឹត រោគរាតត្បាត និងអំពើហិង្សាគ្រប់សព្វទាំងអស់។
1 . មន្ទីសន្តិសុខ ស 21 ឬគុកទួលស្លែង
ជាគុកដែលជាប់លំដាប់លេខ 1 ក្នុងពិភពលោកលើភាពសាហាវឃោរឃៅហួសពីការនឹកស្មាន និងត្រូវបានបង្កើតឡើងដោយពួកខ្មែក្រហមក្នុងអំឡុងឆ្នាំ 1975។ អំពើសាហាវយង់ឃ្នងហួសវិស័យមនុស្សត្រូវបានធ្វើឡើងដោយពួកក្រុមអ្នកយាមគុកវ័យក្មេងៗដែលបានប្រើអំពើហិង្សាលើអ្នកទោសដែលពួកគេចោទថាជាជនក្បត់បក្សដូចជាសត្វធាតុ។ មានអ្នកទោសដែលត្រូវស្លាប់នៅក្នុងគុកនេះក្នុងចន្លោះឆ្នាំ1975 – 1978 ប្រមាណជាជិត 30.000 នាក់។ គេនិយាយថា អ្នកទោសដែលសំណាងល្អបំផុតរបស់គុកនេះគឺ អ្នកទោសដែលចូលមកហើយត្រូវគេយកទៅសម្លាប់ចោលតែម្តង ព្រោះអ្នកទោសនោះមិនចាំបាច់រងទុក្ខវេទនាដោយការធ្វើទារុណកម្មយ៉ាងសាហាវឃោរឃៅរហូតដល់ស្លាប់ពីសំណាក់ពួកអ្នកយាមគុកវ័យក្មេងទាំងនោះ៕
ស្រាវជ្រាវដោយៈ តាវ៉ែនតា
May 26, 2017
ធនាគារពិភពលោកអះអាងថា អត្រាកំណើនសេដ្ឋកិច្ចកម្ពុជាឈរលំដាប់ទី6 នៅលើពិភពលោក
បន្ទាប់ពីកំណើនសេដ្ឋកិច្ចមានភាពរឹងមាំអស់រយៈពេលជាងពីរទសវត្សរ៍កន្លងមក កម្ពុជាបានទទួលចំណាត់ថ្នាក់ជាប្រទេសដែលមានចំណូលមធ្យមកម្រិតទាប គិតត្រឹមឆ្នាំ 2015 ដែលមានចំណូលជាតិសរុបក្នុងមនុស្សម្នាក់កើនឡើងដល់ 1070ដុល្លារអាមេរិក។ ដឹកនាំដោយផ្នែកនាំចេញសម្លៀកបំពាក់ និងទេសចរណ៍ កម្ពុជារក្សាបាននូវអត្រាកំណើនសេដ្ឋកិច្ចជាមធ្យម 7.6 ភាគរយនៅចន្លោះពីឆ្នាំ 1994 ដល់ ឆ្នាំ 2015 ដែលបានឈរក្នុងលំដាប់ថ្នាក់ទី6នៅលើពិភពលោក។
យោងតាមការប៉ាន់ស្មានបឋមរបស់ធនាគារពិភពលោក ដែលបានចេញផ្សាយនៅពេលថ្មីៗនេះបានឲ្យដឹងថា កំណើនសេដ្ឋកិច្ចបានថយចុះបន្តិចបន្តួចពី 7.0 ភាគរយក្នុងឆ្នាំ 2015 មកនៅ 6.9 ភាគរយក្នុងឆ្នាំ 2016 ក៏ប៉ុន្តែគេរំពឹងថាកំណើននេះនឹងនៅតែមានភាពរឹងមាំក្នុងរយៈពេលពីរឆ្នាំទៅមុខទៀត ព្រោះការងើបឡើងវិញនៃវិស័យទេសចរណ៍ រួមជាមួយនឹងការពង្រីកសារពើពន្ធ នឹងជួយបំពេញការថយចុះលើផ្នែកនាំចេញសម្លៀកបំពាក់ និងកំណើនលើផ្នែកសំណង់។
របាយការណ៏បច្ចុប្បន្នភាពចុងក្រោយនេះបញ្ជាក់ថា ភាពក្រីក្របន្តធ្លាក់ចុះនៅក្នុងប្រទេសកម្ពុជា ទោះបីជាការធ្លាក់ចុះនេះមានសភាពយឺតជាងកាលពីឆ្នាំកន្លងទៅក្តី។ នៅក្នុងឆ្នាំ 2014 អត្រានៃភាពក្រីក្រមាន 13.5 ភាគរយ បើធៀបនឹងឆ្នាំ 2007 ដែលមានដល់ទៅ 47.8 ភាគរយ ខណៈដែលកម្ពុជាបានសម្រេចគោលដៅអភិវឌ្ឍន៍សហសវត្សរ៍ ដោយបានកាត់បន្ថយអត្រាភាពក្រីក្របាន 50ភាគរយក្នុងឆ្នាំ 2009។
គ្រួសារប្រជាពលរដ្ឋខ្មែរភាគច្រើនលើសលប់ដែលបានរួចចាកផុតពីភាពក្រីក្រ និងមានជីវភាពរីកចម្រើនត្រឹមតែតិចតួចប៉ុណ្ណោះ ចំណែកឯប្រជាពលរដ្ឋប្រហែល4.5លាននាក់ទៀតកំពុងរស់នៅក្បែរបន្ទាត់នៃភាពក្រីក្រ។
វិស័យសុខាភិបាល និងអប់រំនៅតែជាបញ្ហាប្រឈមធំ និងជាអាទិភាពសម្រាប់ការអភិវឌ្ឍរបស់កម្ពុជា។ 33 ភាគរយ (ឬប្រហែល 0.5លាននាក់) នៃកុមារអាយុក្រោម 5ឆ្នាំ មានកាយសម្បទាក្រិនមិនលូតលាស់ ខណៈដែលចំនួនកុមារចុះឈ្មោះចូលរៀនពិតប្រាកដ នៅកម្រិតបឋមសិក្សាបានកើនឡើងពី 82 ភាគរយក្នុងឆ្នាំ 1997 ដល់ 97 ភាគរយនៅឆ្នាំ 2016។ អត្រាបញ្ចប់កម្រិតមធ្យមសិក្សាបឋមភូមិមាន 43 ភាគរយនៅក្នុងឆ្នាំ 2013 ដែលអត្រានេះមានកម្រិតទាបក្រោមធម្យមភាគសម្រាប់បណ្តាប្រទេសដែលមានប្រាក់ចំណូលមធ្យមកម្រិតទាប។ 79 ភាគរយនៃប្រជាពលរដ្ឋទូទាំងកម្ពុជា (12.3លាននាក់) មិនទាន់មានទឹកស្អាតប្រើប្រាស់ និង 58 ភាគរយ (9.3លាននាក់) មិនបានទទួលសេវាអនាម័យសាធារណៈដែលមានលក្ខណៈល្អប្រសើរនៅឡើយទេ (ឆ្នាំ 2015)។
កម្ពុជាមានការរីកចម្រើនល្អក្នុងការកែលម្អកម្មវិធីសុខភាពមាតា កម្មវិធីអភិវឌ្ឍន៍កុមារតូចៗ និងកម្មវិធីអប់រំថ្នាក់បឋមសិក្សានៅតំបន់ជនបទ។ អត្រាស្លាប់របស់់ម្តាយក្នុង 1សែនកំណើតរស់ បានថយចុះពី 472 នៅឆ្នាំ 2005 មកនៅត្រឹម 161នាក់ នៅឆ្នាំ 2015 អត្រាស្លាប់របស់កុមារអាយុក្រោម5ឆ្នាំ បានថយចុះពី 83 ក្នុង 1ពាន់កំណើតរស់ក្នុងឆ្នាំ 2005 មកនៅត្រឹមតែ 28.7 នៅឆ្នាំ 2015។
ទោះបីជាសម្រេចបានសមិទ្ធផលទាំងនេះក្តី ក៏កម្ពុជានៅតែមានបញ្ហាប្រឈមសម្រាប់ការអភិវឌ្ឍមួយចំនួនទៀតដែរ ដូចជា ការផ្គត់ផ្គង់សេវាសាធារណៈដែលមានគុណភាពមិនល្អធ្វើឲ្យរាំងស្ទះដល់ការងារអភិវឌ្ឍន៍លើគ្រប់វិស័យ រដ្ឋបាលដីធ្លី និងការគ្រប់គ្រងធនធានធម្មជាតិ ចីរភាពបរិស្ថាន និងអភិបាលកិច្ចល្អ។ ការបោះជំហានទៅមុខ និងជោគជ័យនៃការដោះស្រាយបញ្ហាប្រឈមទាំងនេះនឹងមិនមែនពឹងផ្អែកតែទៅលើការថែរក្សាស្ថេរភាពម៉ាក្រូសេដ្ឋកិច្ច ការបង្កើនភាពសម្បូរបែបនៃសេដ្ឋកិច្ច និងភាពប្រកួតប្រជែងសម្រាប់ការនាំចេញប៉ុណ្ណោះទេ ប៉ុន្តែវាត្រូវតែពឹងផ្អែកលើការកែលម្អគុណភាពនៃការផ្គត់ផ្គង់សេវាសាធារណៈ រួមទាំងការបង្កើនការបែងចែក និងប្រើប្រាស់ធនធានហិរញ្ញវត្ថុសាធារណៈ និងធនធានមនុស្សផងដែរ៕
May 19, 2017