ពលករ - La Reine Media

ថៃរកឃើញពលករបរទេសខុសច្បាប់រាប់ពាន់នាក់

អាជ្ញាធរថៃ កំពុងតែបង្កើនការតាមរកពលករបរទេសខុសច្បាប់ នៅទូទាំងប្រទេស។

សមត្ថកិច្ចថៃអះអាងថា មូលហេតុនៃការរឹតបន្តឹងនេះគឺដើម្បីការពារការងារសម្រាប់ពលរដ្ឋថៃ និងបង្កើនប្រសិទ្ធភាពនៃការគ្រប់គ្រងពលករបរទេស។

បន្ទាប់ពីបានចាប់ផ្ដើមការងារនេះ អាជ្ញាធរថៃបានត្រួតពិនិត្យជនបរទេសជាង 300,000 នាក់ ក្នុងនោះបានរកឃើញជាង 1,600 នាក់ ជាពលករខុសច្បាប់។

យោងតាមគោលការណ៍ច្បាប់ប្រទេសនេះ ពលករខុសច្បាប់នឹងត្រូវបានពិន័យពី 5,000 ដល់ 50,000 បាត និងត្រូវចាប់បញ្ជូនត្រឡប់ទៅកាន់ប្រទេសដើម ហាមចូលប្រទេសថៃរយៈពេលពីរឆ្នាំ។

ចំណែកនិយោជកដែលប្រើប្រាស់ពលករបរទេសខុសច្បាប់ នឹងត្រូវពិន័យពី 10,000 ដល់ 100,000 បាត។ នៅពេលរំលោភច្បាប់នេះពីរដង នឹងត្រូវដាក់ពន្ធនាគារមិនលើសពីមួយឆ្នាំ ហើយត្រូវបង់ប្រាក់ពិន័យពី 50,000 ដល់ 200,000 បាត/ពលករម្នាក់ និងហាមប្រើប្រាស់ពលករបរទេសបីឆ្នាំ។

March 25, 2024

ប្រាំពាន់លាននាក់កំពុងតែក្រទៅៗ ខណៈអ្នកមានជាងគេប្រាំនាក់កាន់តែមានឡើង

របាយការណ៍ថ្មីបំផុតរបស់ Oxfam International បានឱ្យដឹងថា មនុស្សប្រមាណ 5 ពាន់លាននាក់នៅលើពិភពលោកកំពុងតែក្រទៅៗ ស្របពេលដែលកំពូលមហាសេដ្ឋី 5 រូប បែរជាមានជាងមុនទ្វេដងក្នុងរង្វង់ 3 ឆ្នាំចុងក្រោយនេះ។

អង្គការមនុស្សធម៌ Oxfam International ដែលជាសម្ព័ន្ធអន្តរជាតិមានអង្គការចំនួន 21 ជាសមាជិក និងធ្វើសកម្មភាពនៅក្នុងប្រទេសជាង 80 កាលពីថ្ងៃទី 14 មករា 2024 បានបញ្ចេញរបាយការណ៍ប្រចាំឆ្នាំស្ដីពីគម្លាតរវាងអ្នកមាន និងអ្នកក្រ។ របាយការណ៍នេះបង្ហាញថា ចាប់ពីឆ្នាំ 2020 ទ្រព្យសម្បត្តិរបស់កំពូលមហាសេដ្ឋី 5 រូបរបស់ពិភពលោក បានកើន 114% ឡើងដល់ 869 ពាន់លានដុល្លារអាម៉េរិក។

បុគ្គលទាំង 5 រូបខាងលើនេះ រួមមាន នាយកប្រតិបត្តិ Tesla លោក Elon Musk, ម្ចាស់ LVMH លោក Bernard Arnault, លោក Jeff Bezos ស្ថាបនិករបស់ Amazon, សហស្ថាបនិករបស់ Oracle លោក Larry Ellison និងមហាសេដ្ឋី Warren Buffett។

Oxfam យល់ថា បើសិនទំនោរនេះចេះតែបន្ត ពិភពលោកអាចនឹងមានមនុស្សដែលមានទ្រព្យសម្បត្តិខ្ទង់លានលាន (ទ្រីលាន) ដុល្លារអាម៉េរិកដំបូងគេ នៅក្នុងមួយទសវត្សរ៍ទៀត។

ចំណែកមនុស្សជិត 5 ពាន់លាននាក់នៅលើពិភពលោកបែរជាក្រទៅៗ ដោយសារអតិផរណា សង្គ្រាម និងការប្រែប្រួលអាកាសធាតុ។ ជាមួយនឹងល្បឿនដូចបច្ចុប្បន្ន ពិភពលោកនឹងត្រូវការពេលវេលាជិត 230 ឆ្នាំទៀត ទើបអាចលុបបំបាត់អស់ភាពក្រីក្រ។ យោងតាម Oxfam ពលករពិភពលោកជិត 800 លាននាក់ ទទួលបានប្រាក់ខែក្នុងអំឡុងពីរឆ្នាំកន្លង «មិនអាចតាមទាន់អតិផរណា»។

របាយការណ៍របស់ Oxfam ត្រូវបានធ្វើឡើងដោយយោងទៅតាមអង្គការពលកម្មអន្តរជាតិ (ILO), ធនាគារពិភពលោក (WB), Wealth-X និង Forbes។ ពួកគេឱ្យដឹងថា មនុស្ស 1% ដែលមានបំផុតនៅលើពិភពលោក បច្ចុប្បន្នក្ដោបក្ដាប់ 43% នៃហិរញ្ញវត្ថុទូទាំងសកលលោក។ នៅសហរដ្ឋអាម៉េរិក អត្រានេះគឺ 32% ខណៈនៅអឺរ៉ុបគឺ 47% និងអាស៊ីគឺ 50%៕

January 15, 2024

ថៃបញ្ចុះថ្លៃទិដ្ឋាការ និងការស្នាក់នៅសម្រាប់ពលករកម្ពុជា

ក្រសួងការងារថៃ បានចេញអនុក្រឹត្យថ្មីមួយដែលកំណត់តម្លៃថ្មីទៅលើការត្រួតពិនិត្យ និងផ្ដល់លិខិតពលកម្ម ចំពោះពលករបរទេសដែលមកពី កម្ពុជា និងប្រទេសមួយចំនួនទៀតដែលស្ថិតក្នុងតំបន់អាស៊ីអាគ្នេយ៍។

យោងតាមសារព័ត៌មានក្នុងស្រុក អនុក្រឹត្យខាងលើមានសុពលភាពរយៈពេល 4 ឆ្នាំ ដោយចាប់ផ្ដើមអនុវត្តពីថ្ងៃទី 10 វិច្ឆិកា 2023 និងអនុវត្តសម្រាប់ពលករដែលធ្វើការក្នុងក្របខណ្ឌកិច្ចសន្យា ឬអនុស្សរណៈនៃការយោគយល់ (MoU) ដែលទាក់ទងនឹងការជ្រើសរើសពលករ។

សេចក្ដីសម្រេចថ្មីនេះកំណត់ថា ថ្លៃទិដ្ឋាការសម្រាប់ពលករមកពីប្រទេសកម្ពុជា ឡាវ មីយ៉ាន់ម៉ា និងវៀតណាម ត្រូវបានកាត់បន្ថយពី 2,000 បាតនាបច្ចុប្បន្ន មកនៅត្រឹម 500 បាត ស្របពេលដែលថ្លៃស្នាក់នៅបណ្ដោះអាសន្ន (ថ្លៃពន្យារពេលទិដ្ឋាការរៀងរាល់ឆ្នាំ) ក៏ត្រូវបានបន្ថយពី 1,900 បាតនាបច្ចុប្បន្ន មកនៅត្រឹម 500 បាតផងដែរ។

ក្រសួងការងារថៃសង្កត់ធ្ងន់ថា អនុក្រឹត្យខាងលើគឺស្របនឹងវិធីសាស្ត្ររបស់រដ្ឋាភិបាលក្នុងការគ្រប់គ្រងការជ្រើសរើសពលករបរទេស ដើម្បីពង្រឹងសមត្ថភាពប្រកួតប្រជែងរបស់ប្រទេសនេះ ក៏ដូចជាការរួមចំណែកស្ដារសេដ្ឋកិច្ចក្រោយសម័យកូវីដ-19។

យោងតាមព័ត៌មានរបស់នាយកដ្ឋានរដ្ឋបាលការងារបរទេសនៃប្រទេសថៃ ក្នុងខែកញ្ញា ប្រទេសនេះមានពលករបរទេសចំនួន 2,593,439 នាក់ និងប្រហែលមួយលាននាក់ទៀតកំពុងស្ថិតក្នុងដំណាក់កាលដាក់ពាក្យស្នើសុំលិខិតអនុញ្ញាតការងារ ទៅតាមអនុក្រឹត្យចុះថ្ងៃទី 03 តុលា ឆ្នាំ 2023 របស់រដ្ឋាភិបាលថៃ៕

November 1, 2023

ឡាវដំណើរការកម្មវិធី «ផ្ទេរប្រាក់ដោយងាយ» សម្រាប់ពលករនៅបរទេស

កាលពីពេលថ្មីៗនេះ ធនាគារជាតិឡាវ (BOL) ទើបតែបានសហការជាមួយក្រសួងការងារ និងសុខុមាលភាពសង្គម ដាក់ឱ្យដំណើរការយន្តការគ្រប់គ្រងការផ្ទេរប្រាក់ឆ្លងប្រទេសសម្រាប់ពលករឡាវនៅបរទេស និងពលករបរទេសនៅប្រទេសឡាវ។

ក្នុងដំណាក់កាលដំបូងនៃកម្មវិធីនេះ ភាគីទាំងឡាយនឹងដំណើរការសាកល្បងនូវបណ្ដាញផ្ទេរប្រាក់រវាងប្រទេសឡាវ និងប្រទេសកូរ៉េខាងត្បូង តាមរយៈកិច្ចសហប្រតិបត្តិការរវាងធនាគារពាណិជ្ជកម្មបរទេសឡាវ និងក្រុមហ៊ុន GLN របស់កូរ៉េខាងត្បូង ក្នុងបំណងជួយដល់ពលករឡាវនៅកូរ៉េខាងត្បូងអាចផ្ញើប្រាក់របស់ខ្លួនមកកាន់គ្រួសារដោយមានភាពងាយស្រួល។

បច្ចុប្បន្ន ពលករឡាវកំពុងមានការលំបាកក្នុងការបើកគណនីធនាគារនៅបរទេស ដោយសារតែត្រូវបំពេញលិខិតស្នាមច្រើនបែបច្រើនយ៉ាង និងត្រូវចំណាយប្រាក់ច្រើន នាំឱ្យមានសេវាកម្មផ្ទេរប្រាក់មិនស្របច្បាប់ និងបង្កការខាតបង់ដល់ពលករ។

គម្រោងនេះត្រូវបានចាត់ទុកថាជាយន្តការសហប្រតិបត្តិការដ៏ល្អរវាងពីរស្ថាប័ននៃរដ្ឋាភិបាលឡាវ ក្នុងទិសដៅបង្កលក្ខណៈងាយស្រួលដល់ពលករ ពលការិនី នៅក្នុងការផ្ញើប្រាក់មកស្រុក លើកទឹកចិត្តឱ្យមានសកម្មភាពទូទាត់ក្នុងបណ្ដាញធនាគារ រក្សាលំនឹងនៃប្រព័ន្ធហិរញ្ញវត្ថុ និងកាត់បន្ថយលំហូរហិរញ្ញវត្ថុមិនស្របច្បាប់៕

October 31, 2023

Messi រកគ្រាប់បាល់បានលឿនបំផុតក្នុងអាជីព ពេលប៉ះអូស្ត្រាលីនៅប្រទេសចិន

(ប្រទេសចិន) – កំពូលតារាបាល់ទាត់ Lionel Mess បានបង្ហាញកំពូលថ្វីជើងរបស់ខ្លួននៅវិនាទីទី 79 ដែលបានជួយឱ្យក្រុមជម្រើសជាតិអាហ្សង់ទីនឈ្នះអូស្ត្រាលី 2-0 នៅក្នុងការប្រកួតមិត្តភាពនៅទីក្រុងប៉េកាំងប្រទេសចិន កាលពីព្រលប់ម្សិលមិញ។

គ្រាប់បាល់ឈ្នះរបស់ Messi កើតឡើងបន្ទាប់ពីខ្សែបម្រើ Enzo Fernadez ដណ្ដើមបានបាល់ពីកីឡាករអូស្ត្រាលី រួចបញ្ជូនទៅឱ្យប្រធានក្រុម។ Messi ទទួលបានបាល់នៅត្រង់ខ្សែកណ្ដាល អូសបាល់បញ្ច្រាសទិសរត់របស់គូប្រជែង នាំឱ្យកីឡាករអូស្ត្រាលីម្នាក់ដួល រួចទាត់ប្លោងសំដៅជ្រុងម្ខាង ផុតពីដៃអ្នកចាំទី Matthew Ryan។ គ្រាប់បាល់នេះពេញដោយស្ទីលរបស់ Messi ព្រោះកីឡាករនេះធ្លាប់រកបានគ្រាប់បាល់រាប់សិបគ្រាប់តាមរយៈវិធីទាត់បែបនេះនៅក្នុងអាជីព។

នេះគឺជាគ្រាប់បាល់ដែលរកបានឆាប់បំផុតក្នុងអាជីពរបស់ Messi ដោយសារកើតឡើងនៅក្នុងនាទីទីពីរ។ ក្នុង 90 នាទីនៃការប្រកួតមិត្តភាពរវាងអាហ្សង់ទីន និងអូស្ត្រាលី នៅប្រទេសចិន Messi គ្រាន់តែមិនអាចរកបានគ្រាប់បាល់នៅនាទីដំបូងប៉ុណ្ណោះ។ នៅក្នុង 807 គ្រាប់ដែល Messi រកបានក្នុងអាជីព មាន 45 គ្រាប់រកបានក្នុងពេលថែមម៉ោងតង់ទីពីរ និង 22 គ្រាប់ក្នុងពេលថែមម៉ោងតង់ទីមួយ។ ក្រៅពីនេះ ពេលវេលាដែល M10 រកបានគ្រាប់បាល់ច្រើនបំផុតក្នុង 90 នាទី គឺនៅនាទីទី 43 និង 55។

នៅពេល Messi ស៊ុតចូលទី ទស្សនិកជននៅឯកីឡដ្ឋានពលករក្នុងទីក្រុងប៉េកាំង នាំគ្នាស្រែកហ៊ោដូចទៅនឹងក្រុមជម្រើសជាតិចិនទើបតែបានទាត់ចូលទី។ ថ្វីបើទាត់នៅប្រទេសចិន ប៉ុន្តែការប្រកួតរវាងក្រុមជម្រើសជាតិអាហ្សង់ទីន និងអូស្ត្រាលី ទទួលបានការគាំទ្រពីទស្សនិកជនជិត 70,000 នាក់នៅឯកីឡដ្ឋាន។ ទស្សនិកជនភាគច្រើនពាក់អាវ M10 របស់ Messi ដើម្បីលើកទឹកចិត្តក្រុមអាហ្សង់ទីន។

ដោយសារតែកម្លាំង និងបច្ចេកទេសខ្លាំងក្លា អាហ្សង់ទីនក៏រកបានមួយគ្រាប់ទៀតនៅនាទីទី 68 ហើយនេះក៏ជាគ្រាប់បាល់ដែលកំណត់ឱ្យអាហ្សង់ទីនឈ្នះអូស្ត្រាលី 2-0។ គ្រាប់បាល់នេះក៏មានការរួមចំណែកពី Messi នៅពេលគាត់បញ្ជូនបាល់ឱ្យ Rodrigo de Paul ដើម្បីឱ្យខ្សែបម្រើនេះប្លោងបាល់បន្ត ជួយឱ្យ German Pezzella តែតបញ្ចូលទីបានសម្រេច។

បន្ទាប់ពីការប្រកួតនេះ អាហ្សង់ទីននឹងហោះទៅកាន់ហ្សាការតា ដើម្បីប្រកួតមិត្តភាពជាមួយក្រុមឥណ្ឌូណេស៊ី ប៉ុន្តែ Messi ទំនងជានឹងអវត្តមាន។ ព្រោះថា គាត់បានយល់ព្រមលេងបាល់ក្នុងការប្រកួតផ្ដល់កិត្តិយស និងសម្ដែងការដឹកគុណដល់អតីតខ្សែបម្រើ Juan Roman Riquelme នៅថ្ងៃទី 26 មិថុនា នៅអាហ្សង់ទីន៕

June 16, 2023

វីដេអូបង្ហាញពីទិដ្ឋភាព Messi និយាយភាសាចិន មុនការប្រកួតជាមួយអូស្ត្រាលី

Lionel Messi បានចូលរួមកិច្ចសម្ភាសមួយនៅទីក្រុងប៉េកាំង ហើយពិធីករក៏បានបង្រៀនគាត់ឱ្យចេះហៅឈ្មោះខ្លួនឯងជាភាសាចិន។

ថ្ងៃទី 14 មិថុនា នៅមុនការប្រកួតមិត្តភាពជាមួយនឹងអូស្ត្រាលីនៅឯកីឡដ្ឋានបាល់ទាត់ពលករប៉េកាំង Messi បានចូលរួមកិច្ចសម្ភាសមួយរបស់ទីភ្នាក់ងារសារព័ត៌មានធំជាងគេរបស់ប្រទេសចិន ហើយពិធីករក៏បានបង្រៀនគាត់ក្នុងការហៅឈ្មោះខ្លួនឯងជាភាសាចិន។

នៅក្នុងភាពច្របូកច្របល់ និងរំភើប ចុងក្រោយ Messi ក៏អាចសើច និងនិយាយឈ្មោះខ្លួនឯងជាភាសាចិនឡើងវិញយ៉ាងរដិបរដុប ធ្វើឱ្យអ្នកដែលមានវត្តមាននៅក្នុងបន្ទប់ថតនោះ ផ្ទុះសំណើចគ្រប់គ្នា។ វីដេអូនេះក៏ត្រូវបានគេចែករំលែកតគ្នាពេញបណ្ដាញសង្គម បន្ទាប់ពីត្រូវបានបង្ហោះ។

https://www.youtube.com/watch?v=lYHf5Miyv8Q

អំពីការប្រកួតបាល់ទាត់វិញ អាហ្សង់ទីន និងអូស្ត្រាលី នឹងប៉ះគ្នានៅវេលាម៉ោង 19 ថ្ងៃទី 15 មិថុនា (ម៉ោងនៅកម្ពុជា)។ នៅក្នុងការប្រកួតនេះ Messi ទំនងជានឹងចូលទាត់តាំងពីដំបូង និងត្រូវបានរំពឹងថា នឹងបង្ហាញថ្វីជើងប្រកបដោយភាពអស្ចារ្យកម្រិតកំពូលជូនទស្សនិកជន។

June 15, 2023

ហុងកុងចាប់ផ្តើមទទួលពលករកម្ពុជាទៅធ្វើការ

ភ្នំពេញៈ ទីក្រុងហុងកុងចាប់ផ្តើមអនុញ្ញាតឲ្យកម្ពុជាបញ្ជូនពលករទៅធ្វើការនៅតំបន់រដ្ឋបាលពិសេសរបស់ខ្លួនហើយ ដោយក្រុមហ៊ុនចំនួន6ត្រូវបានអនុញ្ញាតឲ្យជ្រើសរើសពលករពីក្រសួងការងារ។

លោក អ៊ិត សំហេង រដ្ឋមន្រ្តីក្រសួងការងារបានថ្លែងក្នុងសិក្ខាសាលាស្តីពីការផ្សព្វផ្សាយ និងនីតិវិធីនៃការជ្រើសរើសបណ្តុះបណ្តាលបញ្ជូននិងគ្រប់គ្រងពលការិនីជំនួយការមេផ្ទះទៅធ្វើការនៅតំបន់រដ្ឋបាលពិសេសហុងកុង នៅព្រឹកថ្ងៃទី9ខែសីហានេះថា ទីភ្នាក់ងារជ្រើសរើសពលករកម្ពុជាចំនួន6ដែលមានសិទ្ធិស្របច្បាប់ជ្រើសរើសនោះរួមមាន ក្រុមហ៊ុនថប មេនផៅវ័រ ក្រុមហ៊ុន អានីរីតា បេស មែនផៅវ័រ, ក្រុមហ៊ុន អ៉ឹង រិទ្ធី គ្រុប, ក្រុមហ៊ុន អេលីត មេនផៅវ័រ អេជេនស៊ី និងក្រុមហ៊ុន វីន វីន មេនផៅវ័រ។ ក្នុងនោះមានទីភ្នាក់ងារខ្លះមានបទពិសោធក្នុងការជ្រើសរើស បណ្តុះបណ្តាល បញ្ជូន និងគ្រប់គ្រងពលការិនី ជំនួយការមេផ្ទះនៅប្រទេសសិង្ហបុរីនាពេលកន្លងមក និងមានមួយចំនួនទៀតជាទីភ្នាក់ងារមានការគ្រប់គ្រងបានល្អ និងពុំសូវមានវិវាទជាមួយពលករ។

ជាមួយគ្នានេះ លោករដ្ឋមន្រ្តីក្រសួងការងារក៏បានស្នើសុំឲ្យក្រសួងស្ថាប័នពាក់ព័ន្ធបង្កើនកិច្ចសហប្រតិបត្តិការដើម្បីទប់ស្កាត់ និងចាត់វិធានការតឹងរ៉ឹងចំពោះមេខ្យល់ខុសច្បាប់ឬក្រុមហ៊ុនដែលគ្មានអាជ្ញាប័ណ្ណក្នុងការជ្រើសរើសបណ្តុះបណ្តាល បញ្ជូន និងគ្រប់គ្រងពលការិនីជំនួយការមេផ្ទះធ្វើយ៉ាងណាកុំឲ្យបងប្អូនប្រជាពលរដ្ឋខាតបង់ប្រាក់ដោយការចាញ់បោកជនខិលខូចទាំងនេះនិងស្នើឲ្យទីភ្នាក់ងារទាំង6ដែលទទួលបានអាជ្ញាប័ណ្ណពីក្រសួងយកចិត្តទុកដាក់លើការបណ្តុះបណ្តាលធ្វើយ៉ាងណាត្រូវផ្គត់ផ្គង់ធនធានមនុស្សដែលមានគុណភាពដល់និយោជកនៅហុងកុង៕

August 9, 2017

រាជរដ្ឋាភិបាលកម្ពុជា ស្នើភាគីថៃជួយគាំពារ និងសង្រ្គោះពលករដែលត្រូវគេជួញដូរ

ភ្នំពេញៈ មន្រ្តីជាន់ខ្ពស់ក្រសួងការងារបានស្នើសុំភាគីថៃជួយផ្តល់សេវាគាំពារ និងសង្រ្គោះពលករកម្ពុជាដែលត្រូវបានគេជួញដូរទៅកាន់ប្រទេសថៃ។

ក្នុងជំនួបជាមួយលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍន៍សង្គមថៃកាលពីថ្ងៃម្សិលមិញ លោកអ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានស្នើទៅកាន់ភាគីថៃលើចំណុចមិនប្រក្រតីមួយចំនួនផងដែរ ក្នុងនោះគឺរឿងពលករដែលត្រូវបាននាំចូលទៅធ្វើការនៅប្រទេសថៃខុសច្បាប់ គឺជាជនរងគ្រោះដែលត្រូវបានគេជួញដូរដែលគួរតែមានការគាំពារ ជួយសង្រ្គោះ និងផ្តល់សេវា។ នេះជាចំណុចដែលភាគីទាំងពីរគួរនាំគ្នាដោះស្រាយ។ មួយវិញទៀត រដ្ឋមន្រ្តីក្រសួងការងារកម្ពុជាក៏បានលើកឡើងពីប្រពន្ធ និងកូនដែលទៅជាមួយពលករខ្មែរយើងនោះផងដែរ ដែលគួរតែមានការគាំពារ ផ្តល់សេវាកម្មផ្សេងៗ អប់រំ និងសេវាសុខាភិបាលដល់ពួកគេ។

លោករដ្ឋមន្រ្តីក្រសួងការងារក៏បានលើកពីគម្រោងដែលចង់ឲ្យភាគីថៃបង្កើតឱ្យមានជាមជ្ឈមណ្ឌលគាំពារពលករមួយសម្រាប់ទទួលយកពលករដែលជាជនរងគ្រោះដោយការជួញដូរដើម្បីធ្វើការប្រឹក្សាណែនាំដល់ពួកគេកុំឱ្យចាញ់បោកមេខ្យល់ទៀត ហើយភាគីថៃអាចបញ្ជូនពួកគេមកវិញតាមរយៈមជ្ឈមណ្ឌលនេះ។

ជាការឆ្លើយតបលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍសង្គមថៃបានទទួលយក និងឯកភាពនឹងការលើកឡើងរបស់ភាគីកម្ពុជា ហើយលោកនឹងបន្តឆន្ទៈអនុវត្តខ្លឹមសារក្នុងអនុស្សរណៈដែលបានចុះកិច្ចព្រមព្រៀងគ្នាកន្លងមក។ ជាក់ស្តែងថ្មីៗនេះភាគីថៃបានដោះស្រាយបញ្ហាជួញដូរមនុស្សបានជាង100ករណី ហើយរឹបអូសទ្រព្យសម្បត្តិបានជាង790លានបាត និងកាត់ទោសឱ្យជាប់គុកលើមន្ត្រី និងអ្នកនយោបាយរបស់ខ្លួនដែលបានប្រព្រឹត្តបទល្មើសនេះប្រមាណជា130នាក់ផងដែរ។

ពលករកម្ពុជាដែលបម្រើការងារនៅក្នុងប្រទេសថៃបច្ចុប្បន្នមានប្រមាណជា 1,050,000 នាក់ ក្នុងនោះជាង70ម៉ឺននាក់មានភាពស្របច្បាប់ហើយ និងប្រមាណ30ម៉ឺននាក់ទៀតមិនទាន់មានភាពស្របច្បាប់នៅឡើយ។ ហើយថ្មីៗនេះ រដ្ឋាភិបាលថៃបានធ្វើការកែទម្រង់ច្បាប់ថ្មីដើម្បីគ្រប់គ្រងពលករបរទេសដែលមានភាពតឹងរ៉ឹងជាមុន ហើយធ្វើការផាកពិន័យធ្ងន់ធ្ងរជាងមុនចំពោះនិយោជក។ ភាគីថៃក៏បានចេញសេចក្តីប្រកាសឱ្យមានការពន្យាពេលក្នុងការអនុវត្តច្បាប់នេះ៦ខែដែលឯកឧត្តមមើលឃើញថា
នេះជាឱកាសមួយសម្រាប់ប្រទេសទាំងពីររួមគ្នាដោះស្រាយបញ្ហាពលករទេសន្តរប្រវេសន៍ សំដៅបង្កើតភាពស្របច្បាប់ និងការការពារសិទ្ធិ ព្រមទាំងការរំលោភបំពានផ្សេងៗ៕

July 21, 2017

ហុងកុងយល់ព្រមឱ្យកម្ពុជា បញ្ជូនពលកររបស់ខ្លួនទៅបម្រើការងារនៅទីនោះ

ក្នុងអនុស្សរណៈនៃកិច្ចព្រមព្រៀងរវាងរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈកម្ពុជា និងរដ្ឋមន្រ្តីទទួលបន្ទុកអភិវឌ្ឍពាណិជ្ជកម្ម និងសេដ្ឋកិច្ចហុងកុងកាលពីពេលថ្មីៗនេះ។ ភាគីទាំងពីរបានឯកភាពគ្នាលើកិច្ចសហប្រតិបត្តិការផ្តល់សេវាគាំទ្រដល់ប្រជាពលរដ្ឋកម្ពុជាដែលត្រូវបានជ្រើសរើសឱ្យបម្រើការងារនៅទីក្រុងហុងកុង ជាពិសេសស្ត្រីបម្រើការងារផ្ទះ។

ប្រភពព័ត៌មានលើគេហទំព័រហ្វេប៊ុករបស់ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈកម្ពុជា បានឱ្យដឹងថា ភាគីទាំងពីរបានសម្តែងការពេញចិត្តចំពោះកិច្ចសហប្រតិបត្តការនេះ ដែលជាផ្នែកមួយនៃគោលនយោបាយខ្សែក្រវ៉ាត់មួយ វិថីមួយរបស់ចិន ហើយសង្ឃឹមថា តាមរយៈកិច្ចសហប្រតិបត្តិការនេះ នឹងបើកច្រកដល់កិច្ចសហប្រតិបត្តិលើវិស័យជាច្រើនទៀត ដើម្បីពង្រឹង ពង្រីកវិស័យពាណិជ្ជកម្ម វិនិយោគរវាងកម្ពុជា និងតំបន់រដ្ឋបាលពិសេសហុងកុង។

បន្ថែមលើនេះ អនុស្សរណៈនៃកិច្ចព្រមព្រៀងនេះ ភាគីទាំងពីរក៏បានឯកភាពគ្នាលើកិច្ចសហប្រតិបត្តិការដូចជា៖
1/ ចូលរួមសហការគ្រប់គ្រងសហគ្រាសដែលមិនអនុវត្តត្រឹមត្រូវតាមច្បាប់ ដើម្បីការពារប្រយោជន៍ពលករទេសន្តរកម្ពុជា។
2/ ចូលរួមសហការប្រមូលគំនិតយោបល់ពីទីភ្នាក់ងារមុខរបរ និងរាយការណ៍ជូនតំបន់រដ្ឋបាលពិសេសហុងកុង ក្រសួងការងារ និងបណ្តុះបណ្តាលវិជ្ជាជីវៈ សម្រាប់ធ្វើការពិនិត្យឡើងវិញ និងកែលម្អគោលនយោបាយមុខរបរសម្រាប់ពលករទេសន្តរប្រវេសន៍កម្ពុជា។
3/ ចូលរួមសហការគ្រប់គ្រង និងផ្តល់ការណែនាំដល់សមាជិកសមាគម និងក្រុមហ៊ុន ឱ្យអនុវត្តស្របតាមច្បាប់ និងបទបញ្ញត្តិនានារបស់រាជរដ្ឋាភិបាលកម្ពុជា និងរដ្ឋាភិបាលតំបន់សេដ្ឋកិច្ចពិសេសហុងកុង ដើម្បីបង្កើតលក្ខខណ្ឌការងារល្អសម្រាប់ពលករទេសន្តរប្រវេសន៍កម្ពុជា។
4/ ចូលរួមសហការជាមួយទីភ្នាក់ងារមុខរបរ និងនិយោជកហុងកុង ដើម្បីគ្រប់គ្រងប្រព័ន្ធទិន្នន័យពលករទេសន្តរប្រវេសន៍កម្ពុជា៕

April 27, 2017

Tag: ពលករ