ផលិត - La Reine Media

កូរ៉េខាងត្បូងត្រៀមរួចរាល់ហើយសម្រាប់ការបាញ់បង្ហោះរ៉ុក្កែតអវកាស Nuri លើកទីបី

រ៉ុក្កែត Nuri ដែលមានប្រវែង 47.2 ម៉ែត្រ នឹងនាំយកផ្កាយរណបសរុប 8 គ្រឿង ឡើងទៅកាន់គន្លងតារាវិថី។

កូរ៉េខាងត្បូងបានត្រៀមរួចរាល់សម្រាប់ការបាញ់បង្ហោះរ៉ុក្កែតអវកាសផលិតក្នុងស្រុក Nuri នៅក្នុងថ្ងៃនេះ។ ក្រសួងវិទ្យាសាស្ត្រ និងព័ត៌មានវិទ្យា ក៏ដូចជាវិទ្យាស្ថានស្រាវជ្រាវអវកាសកូរ៉េខាងត្បូង (KARI) បានអះអាងថា ការត្រួតពិនិត្យចុងក្រោយបង្ហាញថា បញ្ហាបច្ចេកទេសនានាត្រូវបានធានា ហើយការព្យាករអំពីអាកាសធាតុក៏មានអំណោយផលល្អដល់ការបាញ់បង្ហោះ។

រ៉ុក្កែតអវកាស Nuri ឬហៅថា KSlV-II នឹងនាំយកផ្កាយរណបសរុប 8 គ្រឿង ឡើងទៅកាន់គន្លងតារាវិថី ក្នុងនោះក៏មានផ្កាយរណបបួនគ្រឿងដែលមានឈ្មោះកូដថា SNIPE ដែលអភិវឌ្ឍ និងផលិតដោយវិទ្យាស្ថានវិទ្យាសាស្ត្រអវកាស និងតារាសាស្ត្រកូរ៉េខាងត្បូង។

រ៉ុក្កែត Nuri មានប្រវែង 47.2 ម៉ែត្រ មុខកាត់ 3.5 ម៉ែត្រ និងទម្ងន់ 17.5 តោន។ ខុសពីរការបាញ់បង្ហោះលើកទីមួយ និងទីពីរដែលមានតែផ្កាយរណបក្លែងក្លាយ ការបាញ់បង្ហោះលើកទីបីនេះមានផ្ទុកផ្កាយរណបដែលអាចបំពេញបេសកកម្មដូចផ្កាយរណបដទៃ។ ក្នុងនោះមានផ្កាយរណបមួយគ្រឿងបំពាក់ជាប់លើរ៉ុក្កែត Nuri ផងដែរ។

រ៉ុក្កែត Nuri ត្រូវបានដំឡើងទៅក្នុងប្រព័ន្ធទម្រនៅមជ្ឈមណ្ឌលអវកាស Naro ក្នុងតំបន់ Goheung នៃខេត្ត Jeolla ខាងត្បូង កាលពីថ្ងៃទី 23 ឧសភា។ តាមផែនការ រ៉ុក្កែតនេះនឹងត្រូវបានបាញ់បង្ហោះនៅវេលាម៉ោងប្រហែល 18:24 (ម៉ោងក្នុងស្រុក) ក្នុងថ្ងៃទី 24 ឧសភានេះ។

មុននេះ កូរ៉េខាងត្បូងបានបាញ់បង្ហោះសាកល្បងរ៉ុក្កែត Nuri លើកទីមួយកាលពីខែតុលា 2021 ប៉ុន្តែរ៉ុក្កែតហោះមិនដល់គោលដៅ។ ក្នុងការបាញ់បង្ហោះរ៉ុក្កែត Nuri លើកទីពីរកាលពីខែមិថុនា 2022 បានទទួលជោគជ័យ។

គិតត្រឹមបច្ចុប្បន្ន កូរ៉េខាងត្បូងបានក្លាយជាប្រទេសទី 7 លើពិភពលោក ដែលបានអភិវឌ្ឍយានបាញ់បង្ហោះទៅកាន់ទីអវកាសដែលអាចនាំយកផ្កាយរណបទម្ងន់ជាងមួយតោន បន្ទាប់ពីរុស្ស៊ី អាម៉េរិក បារាំង ចិន ជប៉ុន និងឥណ្ឌា៕

May 24, 2023

Bill Gates ថា «AI អាចជំនួស Google Search»

សហស្ថាបនិករបស់ Microsoft យល់ថា បញ្ញាសិប្បនិម្មិត (AI) អាចបង្កើតជំនួយការនិម្មិត និងអាចផ្លាស់ប្ដូរទម្លាប់របស់អ្នកប្រើប្រាស់ឧបករណ៍រុករក ដូចជា Google Search ជាដើម។

«ជំហានថ្មីបន្ទាប់នឹងជាជំនួយការ AI។ បច្ចេកវិទ្យានេះអាចផ្លាស់ប្ដូរទាំងស្រុងនូវឥរិយាបថរបស់អ្នកប្រើប្រាស់។ ពួកគេអាចនឹងលែងត្រូវការដល់បណ្ដាទំព័រស្វែងរក មានដូចជា Google Search ឬចូលទៅមើលហាងទំនិញអនឡាញដូចជា Amazon» មហាសេដ្ឋីអាម៉េរិក លោក Bill Gates ថ្លែងដូច្នេះ នៅក្នុងព្រឹត្តិការណ៍ស្ដីពី AI កាលពីថ្ងៃទី 22 ឧសភា។

យោងតាមលោក Gates ជំនួយការ AI អាចយល់ពីតម្រូវការ និងទម្លាប់របស់អ្នកប្រើប្រាស់ ជួយធ្វើការឱ្យពួកគេនៅក្នុង «ការចូលប្រើអ៊ីនធើណិត និងអានអ្វីៗដែលកន្លងមកធ្លាប់ត្រូវការពេលច្រើន»។ បណ្ដាក្រុមហ៊ុនបច្ចេកវិទ្យាធំៗ និងក្រុមហ៊ុនថ្មីៗ មានឱកាសស្មើគ្នាក្នុងការអភិវឌ្ឍប្រភេទ AI អនាគតនេះ។

លោក Gates អះអាងថា នឹងត្រូវការពេលវេលាបន្ថែមដើម្បីអាចនាំយកជំនួយការ AI មកប្រើប្រាស់ទូលំទូលាយ ខណៈដែលបណ្ដាក្រុមហ៊ុនបន្តបំពាក់ Generative AI មានដូចជា ChatGPT ជាដើម ទៅក្នុងផលិតផលរបស់ខ្លួន។ នេះបើតាមសារព័ត៌មាន CNBC។

ទោះជាយ៉ាងនេះក៏ដោយ នៅក្នុងព្រឹត្តិការណ៍ Google I/O 2023 កាលពីថ្ងៃទី 10 ឧសភា Google ក៏បានធ្វើបទបង្ហាញអំពីរបៀបដែល Google Search នឹងផ្លាស់ប្ដូរនៅពេលបំពាក់ «កំពូលបញ្ញាសិប្បនិម្មិត»។ ដោយមានមុខងារ Converse ជំនួសឱ្យការបង្ហាញលទ្ធផលជាតំណភ្ជាប់ (link) ជាច្រើនដូច Google Search បច្ចុប្បន្ន chatbot រុករកបែបថ្មីរបស់ Google នឹងប្រមូលផ្ដុំព័ត៌មាន ឧទាហរណ៍ដូចជា ការវាយតម្លៃចំពោះរថយន្តថ្មី គម្រោងដំណើរកម្សាន្ត ការថែទាំសត្វចិញ្ចឹមជាដើម តាមរយៈកម្មវិធីជជែកគ្នាជាមួយ AI៕

May 23, 2023

រថយន្តអគ្គិសនីកៅអីបីជួររបស់ Ford ធ្វើដំណើរបាន 563 គីឡូម៉ែត្រ

នៅដើមខែនេះ អគ្គនាយកប្រតិបត្តិរបស់ Ford Motor Company លោក Jim Farley បានប្រកាសថា ក្រុមហ៊ុនមានគម្រោងផលិតរថយន្តអគ្គិសនីប្រភេទ SUV 7 កៅអី។

លោក Jim Farley និយាយថា គំនិតស្ដីពីរថយន្តអគ្គិសនីកៅអីបីជួរនឹងបង្កើតបាននូវភាពខុសប្លែកសម្រាប់រថយន្តអគ្គិសនីរបស់ Ford នៅក្នុងទីផ្សារ។

បច្ចុប្បន្ន ព័ត៌មានស្ដីពីរថយន្តអគ្គិសនី 7 កៅអីរបស់ Ford ត្រូវបានបញ្ចេញខ្លះៗហើយ។ «ប្រធានផ្នែកបច្ចេកវិទ្យា និងអភិវឌ្ឍផលិតផលរបស់ Ford គឺ Doug Field បានចែករំលែកព័ត៌មានខ្លះអំពី Ford EV។ គាត់ប្រាប់ថា រថយន្តប្រភេទ SUV កៅអីបីជួរនេះនឹងបង្ហាញខ្លួននៅឆ្នាំ 2025 ដែលអាចធ្វើដំណើរបាន 563 គីឡូម៉ែត្រ» អ្នកយកព័ត៌មានរបស់ទំព័រ Autonews បានសរសេរលើបណ្ដាញសង្គមដូច្នេះ។

ចំណែកទំព័រ Electrek ក៏បានរាយការណ៍ថា រថយន្តអគ្គិសនីប្រភេទ SUV កៅអីបីជួររបស់ Ford អាចបើកបរក្នុងល្បឿន 120 គីឡូម៉ែត្រ/ម៉ោង។

ដោយឡែក ក្រុមហ៊ុន Ford មកដល់ពេលនេះមិនទាន់បញ្ចេញព័ត៌មានលំអិតស្ដីពីរថយន្តអគ្គិសនីប្រភេទ SUV កៅអីបីជួររបស់ខ្លួននៅឡើយ៕

May 23, 2023

SpaceX ធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

(សហរដ្ឋអាម៉េរិក) – SpaceX កំពុងពិសោធបច្ចេកវិទ្យាដែលជួយពង្រឹងផ្ទៃខាងក្រោមនៃប្រព័ន្ធទម្រដើម្បីអាចទ្រាំទ្រកម្លាំងដ៏ខ្លាំងរបស់ម៉ាស៊ីនរុញច្រានរ៉ុក្កែត Starship នៅពេលបាញ់បង្ហោះម្ដងៗ។

ប្រព័ន្ធទម្រនៅមូលដ្ឋាន Starbase របស់ SpaceX ក្នុងតំបន់ Texas ខាងត្បូង បានរងការខូចខាតធ្ងន់ធ្ងរក្នុងការបាញ់បង្ហោះសាកល្បងដំបូងរបស់យាន Starship ដែលជារ៉ុក្កែតកម្លាំងខ្លាំងបំផុត កាលពីថ្ងៃទី 20 មេសា 2023។ កម្លាំងដ៏ខ្លាំងរបស់ម៉ាស៊ីន Raptor ចំនួន 33 គ្រឿងនៅជាន់ក្រោមបង្អស់របស់ Starship បានទម្លុះជារណ្ដៅនៅខាងក្រោមជើងរបស់ប្រព័ន្ធទម្រ ធ្វើឱ្យផ្ទាំងបេតុងត្រូវបែកបាក់ និងប៉ើងចេញឆ្ងាយពីកន្លែងដើម។ មួយថ្ងៃក្រោយការបាញ់បង្ហោះសាកល្បងខាងលើ SpaceX ក៏បានឱ្យដឹងថា ពួកគេកំពុងរកវិធីបង្កើតខែលទប់ទល់នឹងបញ្ហានេះ។

ការប្រឹងប្រែងរកវិធីទប់ទល់ក៏បានចាប់ផ្ដើមតាំងពីបីខែមុន។ ប្រព័ន្ធខែលនេះមិនទាន់បានត្រៀមខ្លួនរួចរាល់នៅឡើយសម្រាប់ការបាញ់បង្ហោះកាលពីថ្ងៃទី 20 មេសា ប៉ុន្តែ SpaceX នៅតែសម្រេចចិត្តធ្វើតេស្ត ព្រោះយល់ថា ស្រទាប់បេតុងខាងក្រោមប្រព័ន្ធជើងទម្រ Starship អាចទ្រាំទ្រការបាញ់បង្ហោះបានពីរលើក។ ក៏ប៉ុន្តែ បញ្ហានៅតែកើតឡើង ដូច្នេះ SpaceX ក៏បង្កើនសកម្មភាពដើម្បីបង្ហើយកិច្ចការបង្កើតខែលការពារដែលធ្វើពីដែកថែប។

ថ្មីៗនេះ SpaceX បានពិសោធកម្លាំងរបស់ខែលទប់ទល់កំណែដំបូង ដោយការប្រើប្រាស់កម្លាំងរបស់ម៉ាស៊ីន Raptor មួយគ្រឿង។ នៅក្នុងវីដេអូ 20 វិនាទី ដែល SpaceX បានចែករំលែកកាលពីថ្ងៃទី 19 ឧសភា គេឃើញថា នៅពេលចំហាយទឹកបានរសាត់អស់ នៅខាងចុងវីដេអូ ខែលនេះហាក់នៅរក្សាបានទម្រង់ដើម។

SpaceX កំពុងតែអភិវឌ្ឍយាន Starship ដើម្បីដឹកអ្នកអវកាសឡើងទៅកាន់ឋានព្រះចន្ទ និងភពអង្គារ។ ណាសាក៏ជ្រើសរើស Starship ធ្វើជាស្ថានីយចុះចតដំបូងដែលនាំមនុស្សទៅជាន់ដីរបស់ឋានព្រះចន្ទនៅក្នុងកម្មវិធី Artemis។

ការធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

បច្ចុប្បន្ន SpaceX កំពុងដុតដៃដុតជើងនៅក្នុងការផលិតយាន Starship ជាច្រើនគ្រឿងនៅឯមូលដ្ឋាន Starbase ហើយគ្រោងនឹងបាញ់បង្ហោះកំណែបន្ទាប់នៅប្រហែលពីរខែទៀត បើសិនប្រព័ន្ធខែលដែកការពារផ្ទៃជើងទម្របានត្រៀមខ្លួនរួចរាល់ និងបន្ទាប់ពីទទួលបានការអនុញ្ញាតពីរដ្ឋបាលអាកាសចរណ៍អាម៉េរិក៕

May 23, 2023

ក្រុមហ៊ុនផលិតរថយន្តចិនបញ្ចុះតម្លៃរថយន្តអគ្គិសនី HongGuang Mini EV

(ប្រទេសចិន) – នៅថ្ងៃទី 22 ឧសភានេះ ក្រុមហ៊ុនចិន Wuling Motors បានបញ្ចុះតម្លៃរថយន្តអគ្គិសនីដែលលក់ដាច់ជាងគេមួយនៅលើពិភពលោករបស់ខ្លួន មកនៅទាបបំផុតគឺត្រឹម 29,800 យន់ (4,300 ដុល្លារអាម៉េរិក)។

ម៉ូដែលរថយន្តមួយចំនួនផ្សេងទៀតរបស់ Wuling ក៏ត្រូវបានបញ្ចុះតម្លៃរហូតដល់ 13,000 យន់ (1,850 ដុល្លារអាម៉េរិក)។ នេះបើតាមប្រកាសរបស់ Wuling Motors។

Wuling HongGuang Mini EV គឺជារថយន្តបួនកៅអី មានបណ្ដោយ 2.9 ម៉ែត្រ និងកម្ពស់ 1.5 ម៉ែត្រ។ រថយន្តអគ្គិសនីនេះមានល្បឿនអតិបរមា 100 គីឡូម៉ែត្រ/ម៉ោង និងអាចបើកបរបានចម្ងាយ 170 គីឡូម៉ែត្រ បន្ទាប់ពីបានបញ្ចូលអគ្គិសនីមួយពេញ។

រថយន្តម៉ូដែលនេះមានការពេញនិយមខ្លាំងនៅប្រទេសចិន ដោយមានជាង 119,000 គ្រឿងត្រូវបានលក់ក្នុងឆ្នាំ 2020 និងបានក្លាយជារថយន្តអគ្គិសនីដែលលក់ដាច់ជាងគេលំដាប់ទីបីនៅទូទាំងសកលលោកក្នុងឆ្នាំនោះ៕

May 22, 2023

ពិព័រណ៍បច្ចេកវិទ្យាយានយន្តសាំង និងយានយន្តអគ្គិសនី ឆ្នាំ 2023 នៅវៀតណាម ទាក់ទាញក្រុមហ៊ុនបានរាប់រយស្ថាប័ន

ក្រុមហ៊ុនជាង 200 ស្ថាប័ននៅវៀតណាម និងបរទេស បានចូលរួមព្រឹត្តិការណ៍តាំងបង្ហាញផលិតផលក្នុងបញ្ជរជិត 300 នៅក្នុងពិព័រណ៍បច្ចេកវិទ្យាយានយន្តសាំង និងយានយន្តអគ្គិសនី ឆ្នាំ 2023។

កាលពីថ្ងៃទី 18 ឧសភា ពិព័រណ៍អន្តរជាតិលើកទី 19 ស្ដីពីបច្ចេកវិទ្យារថយន្ត ម៉ូតូ រថយន្តអគ្គិសនី និងឧស្សាហកម្មគ្រឿងបន្លាស់ (Autotech & Accessories 2023) ឆ្នាំ 2023 ត្រូវបានធ្វើឡើងនៅឯសាលពិព័រណ៍សៃហ្គន (SECC) ក្នុងទីក្រុងហូជីមិញ ប្រទេសវៀតណាម។

ពិព័រណ៍ Autotech & Accessories 2023 ទាក់បានក្រុមហ៊ុនជាង 200 ស្ថាប័ននៅវៀតណាម និងបរទេសចូលរួមតាំងបង្ហាញផលិតផលនៅក្នុងបញ្ជរជិត 300 របស់ពួកគេ។ ពិព័រណ៍នេះផ្ដល់ឱកាសក្នុងការតភ្ជាប់ទំនាក់ទំនងផ្នែកធុរកិច្ចរវាងបណ្ដាក្រុមហ៊ុនក្នុងស្រុក និងបរទេស។

ក្នុងបញ្ជរតាំងបង្ហាញ គេឃើញមានតាំងពីរថយន្តគ្រូសារ រថយន្តដឹកទំនិញ រថយន្តអគ្គិសនី ម៉ូតូ រហូតដល់ផលិតផលគ្រឿងបន្លាស់សម្រាប់យានយន្ត និងដំណោះស្រាយបច្ចេកវិទ្យាទំនើបសម្រាប់យានយន្ត។ល។ ពិព័រណ៍នេះក៏មានវត្តមានរបស់យីហោល្បីៗ មានដូចជា Blueone, Jaan –E, Daichi, Minamoto ជាដើមផងដែរ។

ពិព័រណ៍ប្រចាំឆ្នាំ Autotech & Accessories ត្រូវបានធ្វើឡើងនៅវៀតណាម តាំងពីឆ្នាំ 2006 រហូតដល់បច្ចុប្បន្ន។ Autotech & Accessories 2023 ត្រូវបានរៀបចំ និងតាំងបង្ហាញចាប់ពីថ្ងៃទី 18 ដល់ 21 ឧសភា ឆ្នាំ 2023៕

May 20, 2023

ភាពយន្តរឿង «Guardians of the Galaxy Vol. 3» បន្តរកបានប្រាក់ចំណូលលើសពីការរំពឹងទុក

ការថយចុះនៃប្រាក់ចំណូលបានពីការលក់សំបុត្រកាលពីចុងសប្ដាហ៍ទីពីរ របស់ភាពយន្តរឿង «Guardians of the Galaxy Vol. 3» (ក្រុមការពារកាឡាក់ស៊ី វគ្គបី) ស្ថិតក្នុងកម្រិតល្អជាង បើធៀបនឹងរាល់ភាពយន្តរបស់Marvel រាប់ចាប់ពីឆ្នាំ 2018។

នៅពេលដំណើរផ្សងព្រេងទីបី ហើយក៏ជាលើកចុងក្រោយរបស់អ្នកដឹករឿង James Gunn ជាមួយនឹង Star-Lord, Gamora, Rocket Raccoon រួមនឹងអ្នកដទៃ ត្រូវបានចាប់បញ្ចាំងកាលពីចុងសប្ដាហ៍កន្លង «ក្រុមការពារកាឡាក់ស៊ី វគ្គបី» រកចំណូលបាន 118.4 លានដុល្លារអាម៉េរិកក្នុងរយៈពេលបីថ្ងៃដំបូង នៅអាម៉េរិកខាងជើង និង 289 លានដុល្លារនៅទូទាំងសកលលោក។

នោះគឺជាតួលេខមួយដែលមិនអន់ប៉ុន្មានឡើយ ប៉ុន្តែនៅទាបជាងធៀបនឹង 146.5 លានដុល្លាររបស់ «Guardians of the Galaxy Vol. 2» កាលពីឆ្នាំ 2017 ហើយអាចធ្វើឱ្យផលិតករភាពយន្ត Disney/Marvel ព្រួយបារម្ភ។ ក៏ប៉ុន្តែ ពេលនេះពួកគេអាចធូរស្រាលក្នុងចិត្ត នៅពេលដឹងថា «Guardians of the Galaxy Vol. 3»កំពុងតែបញ្ជាក់ថា អាចរកបានប្រាក់ចំណូលក្នុងកម្រិតល្អសម្រាប់រយៈពេលយូរអង្វែង នៅពេលបន្តនាំមុខគេនៅសប្ដាហ៍ទីពីរ ដោយមានអត្រាធ្លាក់ចុះកម្រិតទាបជាងគេ។

ជាក់ស្ដែង គិតមកដល់បច្ចុប្បន្ន «Guardians of the Galaxy Vol. 3» រកចំណូលបាន 216.6 លានដុល្លារអាម៉េរិកនៅទីផ្សារអាម៉េរិកខាងជើង និង 530.9 លានដុល្លារនៅទូទាំងពិភពលោក។ តួលេខនេះក៏មានន័យថា «Guardians of the Galaxy Vol. 3» បានយកឈ្នះលើភាពយន្ត Marvel រឿង “Ant-Man and the Wasp: Quantumania” (ដែលរកបាន 475.8 លានដុល្លារពីរាល់ការបញ្ចាំងនៅរោងកុន ចាប់តាំងពីដើមឆ្នាំនេះ) ក្រោយពីបញ្ចាំងជាផ្លូវការបានជាងមួយសប្ដាហ៍។

«ក្រុមការពារកាឡាក់ស៊ី វគ្គបី» គឺជាខ្សែភាពយន្តស្ដីពីកំពូលអ្នកក្លាហានអាម៉េរិក ដែលផលិតឡើងទៅតាមសាច់រឿង «ក្រុមកំពូលអ្នកក្លាហានការពារកាឡាក់ស៊ីមីលគីវ៉េ» របស់ Marvel Comics។ «Guardians of the Galaxy Vol. 3» ត្រូវបានផលិតដោយ Marvel Studios និងចាក់បញ្ចាំងដោយ Walt Disney Studios Motion Pictures។ នៅក្នុងវគ្គបីនេះ ក្រុមពិសេសដែលយើងធ្លាប់បានស្គាល់ មានការផ្លាស់ប្ដូរមួយចំនួន។ Peter Quill នៅតែមានការឈឺចាប់ព្រោះតែបាត់បង់ Gamora ប៉ុន្តែនៅតែបំពេញកាតព្វកិច្ចជាអ្នកប្រមូលកម្លាំងរបស់ក្រុមដើម្បីការពារចក្រវាលទាំងមូល។ ពួកគេត្រូវរ៉ាប់រងភារកិច្ចដ៏លំបាក ហើយបើសិនជាបរាជ័យ បេសកកម្មរបស់ពួកគេអាចនឹងត្រូវបានបញ្ចប់៕

May 19, 2023

Volkswagen ចរចាជាមួយក្រុមហ៊ុនចិន ដើម្បីទិញសបវ៉ែរសម្រាប់រថយន្តអគ្គិសនី

Volkswagen បានចរចាដើម្បីទិញសបវ៉ែរផ្នែករថយន្តអគ្គិសនីពីក្រុមហ៊ុន Huawei ដោយសង្ឃឹមថា នឹងដណ្ដើមបានចំណែកទីផ្សារធំជាងមុន ក្នុងវិស័យរថយន្តអគ្គិសនីនៅប្រទេសចិន។

យោងតាមរបាយការណ៍របស់ Financial Times ដែលបានចុះផ្សាយនាថ្ងៃនេះ ក្រុមហ៊ុនអន្តរជាតិអាល្លឺម៉ង់ Volkswagen បានចរចាជាមួយក្រុមហ៊ុនចិន Huawei ដើម្បីអាចប្រើប្រាស់បច្ចេកវិទ្យារបស់ក្រុមនេះនៅក្នុងរថយន្តរបស់ខ្លួន។ ប្រភពព័ត៌មានខ្លះថា VW ក៏បាន និងកំពុងចរចាជាមួយក្រុមហ៊ុនចិនដទៃ ទាក់ទងនឹងរឿងទិញដូរនេះដែរ។

Volkswagen គឺជាមួយក្នុងចំណោមក្រុមហ៊ុនផលិតរថយន្តដែលលក់ដាច់ជាងគេនៅប្រទេសចិន ប៉ុន្តែបែរជាអន់ថយនៅក្នុងទីផ្សាររថយន្តអគ្គិសនី បើធៀបនឹងបណ្ដាក្រុមហ៊ុនក្នុងស្រុករបស់ចិន ពិសេសគឺ BYD។ ប៉ុន្តែ បច្ចុប្បន្ន VW ត្រូវបានគេមើលឃើញ កំពុងសកម្មខ្លាំងនៅក្នុងការងាកទៅរកទីផ្សាររថយន្តអគ្គិសនី៕

May 18, 2023

រថយន្តអគ្គិសនី Cybertruck គំរូដើមថ្មីរបស់ Tesla នៅក្នុងកិច្ចប្រជុំប្រចាំឆ្នាំ

ក្រុមហ៊ុនផលិតរថយន្តអគ្គិសនីអាម៉េរិក Tesla កំពុងតាំងបង្ហាញរថយន្តអគ្គិសនីប្រភេទទ្រុង Cybertruck នៅក្នុងព្រឹត្តិការណ៍ជួបជុំម្ចាស់ភាគហ៊ុនប្រចាំឆ្នាំ ហើយវាកំពុងនាំមកនូវរូបភាពផ្ទាល់ស្ដីពីរថយន្តគំរូដើមថ្មីបំផុតរបស់ Cybertruck។

Cybertruck ទំនងជានឹងត្រូវបានផលិតចាប់ពីប៉ុន្មានសប្ដាហ៍ខាងមុខ ហើយ Tesla ក៏ត្រូវបានគេរកឃើញថា កំពុងសាកល្បងប្រព័ន្ធនានារបស់រថយន្តគំរូនេះ មុននឹងឈានដល់ដំណាក់កាលផលិតជាផ្លូវការ។

កាលពីថ្ងៃទី 16 ឧសភា Tesla ប្រារព្ធពិធីជួបជុំភាគហ៊ុនិកប្រចាំឆ្នាំនៅ Giga Texas និងបាននាំមកនូវរថយន្តគំរូដើម Cybertruck ដែលត្រូវបានបង្ហាញ និងដាក់ឱ្យបញ្ជាទិញកាលពីពេលកន្លង។

ព័ត៌មានថ្មីបំផុតដែលប្រកាសដោយ Tesla បង្ហាញថា ការចាប់ផ្ដើមផលិតរថយន្ត Cybertruck នៅរដូវក្ដៅឆ្នាំនេះ នឹងត្រូវប្រគល់ជូនអតិថិជនដំបូងៗនៅចុងត្រីមាសទីបីនៃឆ្នាំ 2023។

ខាងក្រោមនេះគឺជាវីដេអូ និងរូបភាព ស្ដីពីរថយន្តប្រភេទទ្រុងដើរដោយថាមពលអគ្គិសនី Cybertruck របស់ក្រុមហ៊ុន Tesla ដែលត្រូវបានចែករំលែកលើបណ្ដាញសង្គម៖

May 17, 2023

ស្រឡាងមានទ្រុងដាក់យានយន្តបង្វែរដោយដៃតែមួយគត់លើពិភពលោក

(ស្កុតឡែន) – ស្រឡាង MV Glenachulish ត្រូវបានរចនាឡើងតាមបែបតុបង្វិលដោយដៃ ដែលមនុស្សម្នាក់ក៏អាចបង្វែរទិសរបស់ទ្រុងដាក់រថយន្ត 6 គ្រឿង បានដោយងាយ។

ស្រឡាងនេះធ្វើដំណើរទៅមករវាង Glenelg នៃតំបន់ Maninald ប្រទេសស្កុតឡែន និង Kylerhea នៅលើកោះ Skye។ នេះគឺស្រឡាងបែបតុបង្វិលតែមួយគត់ដែលនៅសល់ក្នុងពិភពលោក។ ពុំមានយន្តការដែលប្រើកម្លាំងទឹក ពុំមានម៉ាស៊ីនស្មុគស្មាញអ្វីទាំងអស់ មានតែភាពសាមញ្ញដ៏ល្អប្រសើរ។ នេះបើតាមអ្នកស្រី Jo Crawford ដែលជាអ្នកគ្រប់គ្រងស្រឡាង MV Glenachulish។

ស្រឡាងនេះ ដំបូងឡើយត្រូវបានផលិតឡើងដើម្បីប្រើប្រាស់នៅ Ballachulish មុនពេលតំបន់នេះមានស្ពាន។ នោះគឺជាបេតិកភណ្ឌរស់នៅក្នុងវិស័យនាវាចរណ៍ និងប្រវត្តិសាស្ត្រស្កុតឡែន។

ស្រឡាង MV Glenachulish ត្រូវបានផលិតឡើងដោយយោងតាមប្រព័ន្ធបង្វិលក្នុងវិស័យផ្លូវដែក ហើយវាមានលំនឹងរហូតដល់ថ្នាក់ មនុស្សម្នាក់ក៏អាចបង្វិលទ្រុងដាក់រថយន្ត 6 គ្រឿងបានដោយងាយ។ គ្រប់គ្នាក៏មិនចាំបាច់បត់ក្បាលរថយន្តនៅពេលឡើងចុះពីស្រឡាងនេះ។

MV Glenachulish អាចធ្វើសកម្មភាពដឹកជញ្ជូនបានគ្រប់ពេល មិនថាទឹកជោរ ឬនាច។ វាក៏អាចចតនៅបាតសមុទ្រ បើសិនជាត្រូវការចាំបាច់។ ដូច្នេះ បើទោះជាត្រូវជាប់គាំង វាក៏មិនមានបញ្ហាអ្វីធំដុំដែរ។

ស្រឡាងនេះធ្វើសកម្មភាពនៅ Glenelg តាំងពីឆ្នាំ 1982 ប៉ុន្តែទីនេះមានស្រឡាងទៅមករាប់រយឆ្នាំមកហើយ។

May 16, 2023

Tag: ផលិត