ប្រើប្រាស់ - La Reine Media

Facebook និង Messenger ជួបបញ្ហាធំ៖ អ្នកលេងខ្លះភ័យខ្លាចត្រូវគេ «ហែក»

អ្នកប្រើប្រាស់ Facebook និង Messenger មួយចំនួនមានការព្រួយបារម្ភខ្លាំងនៅពេលគណនីរបស់ពួកគេត្រូវចាកចេញ និងមិនអាចចូលប្រើវិញបាន ទាំងនៅលើ App ទាំងនៅលើវ៉ែប។

ម៉ោងប្រហែល 22 និង 30 នាទីយប់កន្លងទៅ Facebook និង Messenger របស់អ្នកប្រើប្រាស់ជាច្រើន ត្រូវបានធ្វើឱ្យចាកចេញដោយឯកឯង។ នៅពេលព្យាយាមចូលប្រើឡើងវិញ អ្នកខ្លះតែងតែទទួលបានសារដែលប្រាប់ថា «ទំព័រនេះមិនមាន តំណភ្ជាប់បានខូច ឬត្រូវបានលុប»។

បញ្ហាខាងលើបានធ្វើឱ្យអ្នកប្រើប្រាស់ភ័យស្លន់ស្លោ ព្រោះតែយល់ថា គណនី Facebook របស់ពួកគេ ត្រូវបានគេហែកចូលគ្រប់គ្រង។ «ក្រោយពីត្រូវខ្ទាតចេញពីគណនី និងមិនអាចប្រើវិញបាន ខ្ញុំគិតថា Facebook ពីរបីគណនីរបស់ខ្ញុំ ប្រាកដជាត្រូវគេលួចចូលប្រើហើយ» ផៃ ស្រីអ៊ីត អ្នកលេងបណ្ដាញសង្គមម្នាក់នៅភ្នំពេញ ឱ្យដឹងដូច្នេះ។ ស្រីអ៊ីត ក៏ប្រញាប់ចូលប្រើ App មួយចំនួនផ្សេងទៀតរបស់ Meta ដើម្បីស្វែងយល់ពីស្ថានភាពរបស់ ប៉ុន្តែ នៅតែមិនអាចប្រើបាន។

ក្រោយពីបញ្ហានេះកើតឡើងបានប៉ុន្មាននាទី អ្នកប្រើប្រាស់ជាច្រើនត្រូវបង្ខំចិត្តទូរស័ព្ទទៅកាន់មិត្តភ័ក្ដិ ដើម្បីសួរនាំ។ អ្នកខ្លះថា ប្រហែលជា Facebook មានបញ្ហា ឬកំពុងបន្ទាន់សម័យ ខណៈដែលអ្នកខ្លះថា ប្រហែលជា Facebook ត្រូវបានគេហែក និងប្រាប់ឱ្យឈប់ចុះឈ្មោះចូល ព្រោះលេខសម្ងាត់អាចនឹងត្រូវគេដឹង។

បញ្ហាមួយក្នុងចំណោមបញ្ហាដែលបានកើតឡើងលើបណ្ដាញសង្គមរបស់ Meta

លើទំព័រ Downdetector ដែលជាឧបករណ៍តាមដានស្ថានភាពរបស់សេវាអ៊ីនធើណិត ទទួលបានរបាយការណ៍ស្ដីពីកំហុសពីអ្នកប្រើប្រាស់បណ្ដាញសង្គមនានារបស់ Meta នៅទូទាំងពិភពលោក កើនជិតដល់ 400,000 លើក រួមទាំង Facebook, Messenger, Instagram, Threads លើកលែងតែ WhatsApp។

នៅវេលាម៉ោង 1 ថ្ងៃទី 06 មីនា គណនីផ្លូវការរបស់ Facebook បានប្រកាសព័ត៌មាន ប៉ុន្តែមិនបានបកស្រាយអ្វីឱ្យបានច្បាស់លាស់។ «យើងបានត្រលប់មកវិញ។ ពិតជាសូមអភ័យទោសចំពោះអ្នកទាំងឡាយដែលមិនអាចចូលប្រើ Facebook នៅថ្ងៃ» គណនីខាងលើសរសេរដូច្នេះ។

Andy Stone ប្រធានផ្នែកសារព័ត៌មានប្រចាំក្រុមហ៊ុន Meta ឱ្យដឹងថា បញ្ហាកើតឡើងពី «កំហុសបច្ចេកទេសមួយ» ប៉ុន្តែមិនបានរៀបរាប់លម្អិត។

បញ្ហាដូចគ្នានេះរបស់ក្រុមហ៊ុន Meta ក៏ធ្លាប់បានកើតឡើងពីរលើកមកហើយ ក្នុងនោះមានម្ដងក្នុងឆ្នាំ 2019 និងម្ដងក្នុងឆ្នាំ 2021។

March 6, 2024

ក្រសួងពាណិជ្ជកម្ម៖ មន្ត្រីជំនាញរាប់សិបនាក់នឹងចាំឆ្លើយសំណួររបស់សាធារណជនតាមទូរស័ព្ទ

ក្រសួងពាណិជ្ជកម្ម នឹងដាក់ឱ្យដំណើរការជាផ្លូវការប្រព័ន្ធទទួលទូរស័ព្ទសាធារណៈរបស់ក្រសួងពាណិជ្ជកម្ម ដែលមានលេខ 1266 ដោយមានមន្ត្រីជំនាញចំនួន 60 នាក់ ដើម្បីឆ្លើយតបនឹងចម្ងល់ ឬបញ្ហានានា ក្នុងពេលឆាប់ៗខាងមុខ។

កាលពីរសៀលថ្ងៃទី 04 ខែមីនា ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ថា ប្រព័ន្ធទូរស័ព្ទសាធារណៈ របស់ក្រសួងពាណិជ្ជកម្ម ដែលមានលេខ1266 នឹងក្លាយទៅជាភ្នាក់ងារ Call Center ក្នុងការឆ្លើយតបរាល់ចម្ងល់ ឬបញ្ហានានា ដោយបងប្អូនគ្រាន់តែចុចលេខ 1266 ភ្នាក់ងារស្វ័យប្រវត្តនឹងទទួលការហៅចូលដោយឥតគិតថ្លៃ និងស្នើជ្រើសរើសភាសា ក្នុងនោះ លេខ 1 គឺជាភាសាខ្មែរ និងលេខ 2 គឺជាភាសាអង់គ្លេស។

បន្ទាប់ពីនេះ ភ្នាក់ងារស្វ័យប្រវត្តិនឹងណែនាំបញ្ជីព័ត៌មាន និងលេខបណ្ដាញតភ្ជាប់ ដែលសាធារណៈជនអាចភ្ជាប់ និងធ្វើការសន្ទនាជាមួយភ្នាក់ងារទទួលព័ត៌មានរបស់ក្រសួងដោយផ្ទាល់។ បណ្ដាញតភ្ជាប់ទៅកាន់ព័ត៌មានសំខាន់ៗ មានដូចខាងក្រោម៖

– លេខ (1) សម្រាប់ព័ត៌មានទូទៅ

– លេខ (2) សម្រាប់ព័ត៌មានអំពីការចុះបញ្ជីពាណិជ្ជកម្ម

– លេខ (3) សម្រាប់ព័ត៌មានអំពីការចុះបញ្ជីម៉ាក

– លេខ (4) សម្រាប់ព័ត៌មានអំពីការនាំចេញ-នាំចូលទំនិញ ឬ CO

– លេខ (5) សម្រាប់ព័ត៌មានអំពីកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.)

– លេខ (6) សម្រាប់ព័ត៌មានអំពីសេវាពាណិជ្ជកម្មផ្សេងៗរបស់ក្រសួងពាណិជ្ជកម្ម ដូចជាប្រតិបត្តិការដែលមានកិច្ចធានា និងព័ត៌មានអំពីការតាំងពិព័រណ៌។

មន្ត្រីជំនាញរបស់ក្រសួងពាណិជ្ជកម្ម រង់ចាំទទួលទូរស័ព្ទ និងធ្វើការឆ្លើយតប នៅរៀងរាល់ម៉ោង និងថ្ងៃធ្វើការ ចាប់ពីថ្ងៃច័ន្ទ ដល់ថ្ងៃសុក្រ វេលាម៉ោង 8 ព្រឹក ដល់ម៉ោង 5 រសៀល។

March 5, 2024

ក្រុមហ៊ុនបច្ចេកវិទ្យាថាមពលមួយរបស់អូស្ត្រាលី កំពុងស្វែងរកឱកាសវិនិយោគនៅកម្ពុជា

(អូស្ត្រាលី) – នាថ្ងៃទី 2 ខែមីនានេះ ប្រមុខរាជរដ្ឋាភិបាលកម្ពុជា បានអនុញ្ញាតឱ្យ លោក Mario Vecchio នាយកប្រតិបត្តិ និងជាប្រធានក្រុមហ៊ុន FreshStart Energy ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។

យោងតាមក្រសួងព័ត៌មាន ក្នុងជំនួបនេះ លោក Mario Vecchio បានជម្រាបជូន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា អំពីវឌ្ឍនភាពនៃអាជីវកមុ្មរបស់ក្រុមហ៊ុន FreshStart Energy ដែលជាបុត្រសម្ព័ន្ធរបស់ក្រុមហ៊ុន FreshStart កំពុងមានប្រតិបត្តិការនៅប្រទេសអូស្រ្តាលី និងប្រទេសមួយលើពិភពលោក។ ក្នុងប្រទេស អូស្ត្រាលី ក្រុមហ៊ុនរបស់លោក បានប្រើប្រាស់បច្ចេកវិទ្យាទំនើបក្នុងការគ្រប់គ្រងការប្រើប្រាស់ថាមពលអគ្គិសនីនៅតាមសាលារៀន មន្ទីរពេទ្យ និង ស្ថានីយប្រេងឥន្ធនៈជាដើម។

នាយកប្រតិបត្តិរបស់ FreshStart Energy បានបន្ថែមទៀតថា ក្រុមហ៊ុនអភិវឌ្ឍបច្ចេកវិទ្យាទំនើបៗ សម្រាប់ការប្រើប្រាស់ថាមពលអគ្គីសនី ប្រកបដោយប្រសិទ្ធភាព គុណភាព និងសន្សំសំចៃខ្ពស់។

លោកនាយកប្រតិបត្តិ បានបង្ហាញបំណងវិនិយោគនៅកម្ពុជាដោយការនាំយកបច្ចេកវិទ្យាទំនើបនៃការគ្រប់គ្រងការប្រើប្រាស់ថាមពលអគ្គិសនី។

ជាការឆ្លើយតប ប្រមុខរាជរដ្ឋាភិបាលកម្ពុជា បានសម្តែងនូវការស្វាគមន៍ និងរីករាយដែលបានជួបពិភាក្សាការងារជាមួយលោកនាយកប្រតិបត្តិ និងអរគុណចំពោះក្រុមហ៊ុន FreshStart Energy ដែលបានបង្ហាញពីបំណងក្នុងការបណ្តាក់ទុនវិនិយោគនៅកម្ពុជា និងលើកទឹកចិត្តដល់ក្រុមហ៊ុននេះ នៅក្នុងការបណ្ដាក់ទុននៅកម្ពុជា៕

March 2, 2024

ឆ្នាំ 2024 ទីផ្សាររថយន្តថ្មី នឹងមានសន្ទុះកើនឡើងខ្ពស់បន្ថែមទៀត

សហព័ន្ធឧស្សាហកម្មយានយន្តកម្ពុជា (CAIF) ឱ្យដឹងថា សន្ទុះនៃការលក់រថយន្តថ្មីក្នុងឆ្នាំ 2023 បានកើនឡើង ក្នុងនោះកំណើននៃការលក់រថយន្តថ្មីគ្រប់គ្រងចំណែកទីផ្សាររថយន្តប្រមាណ 45%។

ទិន្នន័យនៃការលក់រថយន្តសរុបសម្រាប់ឆ្នាំ 2023 បង្ហាញថា ក្នុងឆ្នាំកន្លង សន្ទុះនៃការលក់រថយន្តថ្មីមានការកើនឡើងគួរឱ្យកត់សម្គាល់ ពោលគឺរួមចំណែក 45% នៅក្នុងទីផ្សាររថយន្ត ខណៈដែលរថយន្តជជុះបានបន្តធ្លាក់ចុះ ដោយរក្សាបានត្រឹមតែ 55%។

CAIF ព្យាករណ៍ថា ក្នុងឆ្នាំ 2024 នេះ ទីផ្សាររថយន្តថ្មី នឹងមានសន្ទុះកើនឡើងខ្ពស់បន្ថែមទៀត តាមរយៈការងើបឡើងវិញនៃសេដ្ឋកិច្ចកម្ពុជា និងកំណើននៃរោងចក្រផ្គុំដំឡើងក្នុងស្រុក ស្របពេលដែលរថយន្តជជុះនឹងមានកំណើនតិចតួចប៉ុណ្ណោះ។

ស្ថាប័ននេះពន្យល់ថា កត្តាមួយចំនួនដែលជំរុញឱ្យមានការផ្លាស់ប្តូរខាងលើនេះ មានជាអាទិ៍ កំណើននៃចំណេះដឹងរបស់អ្នកប្រើប្រាស់ ការយល់ដឹងពីអត្ថប្រយោជន៍របស់រថយន្តថ្មី និងផលវិបាកនៃការប្រើប្រាស់រថយន្តជជុះ ខណៈដែលតំលៃរថយន្តថ្មីក៏ប្រហាក់ប្រហែលនឹងរថយន្តជជុះ ព្រមទាំងមានការធានាពីរោងចក្រ ជាមធ្យម 5 ឆ្នាំផងដែរ៕

February 29, 2024

ព្រឹត្តិការណ៍ពិសេសៗពីការសម្ពោធជាផ្លូវការនូវស្មាតហ្វូន OPPO Reno11 Series 5G

កម្មវិធីសម្ពោធស្មាតហ្វូនស៊េរីថ្មី OPPO Reno11 Series 5G បានសម្ពោធជាផ្លូវការហើយ ជាមួយនឹងបរិយាកាសដ៏អធិកអធម ក្រោមការយាងចូលរួមពីភ្ញៀវកិត្តិយសពិសេស ព្រះនាងតូច ជេនណា ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងរ៉េត ស៊ូហ្សាណា ព្រមទាំងតារាប្រុសស្រីល្បីៗជាច្រើនរូប ដែលបានអញ្ជើញចូលរួមនៅក្នុងកម្មវិធីនេះ។

OPPO បានដាក់បង្ហាញស្មាតហ្វូន OPPO Reno11 Series 5G ជំនាន់ថ្មីរបស់ខ្លួនរហូតទៅដល់ 3 ម៉ូដែល ដែលរួមមាន Reno11 5G, Reno11 F និង Reno11 Pro 5G ទាំងការឌីហ្សាញ ប្រព័ន្ធកាមេរ៉ា កម្លាំងម៉ាស៊ីន និងបច្ចេកវិទ្យា AI គឺសុទ្ធសឹងតែជាបច្ចេកវិទ្យាចុងក្រោយ។

សម្រាប់ការរចនាឌីហ្សាញដ៏ថ្មីស្រឡាងដែលមិនធ្លាប់មានពីមុនមក បានបំផុសគំនិតពីធម្មជាតិពិតៗ ដែលផ្តល់ជូននូវភាពស្រស់ស្រាយរាល់ពេលដែលយើងសម្លឹងមើល។ រីឯ គុណភាពប្រព័ន្ធកាមេរ៉ាថតរូប Portrait បានអាប់ដេតកាន់តែប្រសើរជាងមុន ដែលធ្វើឲ្យអ្នកទទួលបានរូបភាពហាក់ដូចជាថតរូបក្នុងស្ទីឌីយោ ទាំងគុណភាព ការចាប់ប្លង់ និងពន្លឺនោះទេ។ បន្ថែមពីនេះជាមួយមុខងារ 2x optical zoom អាចទាញផ្ទៃខាងក្រោយមកកាន់តែកៀករូបមនុស្ស និងធ្វើឲ្យព្រាលផ្ទៃខាងក្រោយ ធ្វើឲ្យរូបភាព Portrait កាន់តែលេចធ្លោ និងនៅតែអាចរក្សាទម្រង់មុខមនុស្សបានស្អាតធម្មជាតិ មិនធ្វើឲ្យខូចទ្រង់ទ្រាយនោះទេ។ លើសពីនេះ OPPO Reno11 Series 5G ទាំងនៅលើកាមេរ៉ាមុខ និងក្រោយអាចថតវីដេអូបានកម្រិត 4K ។ ចំពោះអេក្រង់វិញ OPPO Reno11 Series 5G បំពាក់ជាមួយអេក្រង់ប្រភេទ 3D គាំទ្រដោយកញ្ចក់ AMOLED Display មានគែមកោង និងមានទំហំ 6.7Inch ព្រមទាំងមានសមត្ថភាពខ្ពស់អាចបង្ហាញរូបភាព និងវីដេអូចេញបានក្នុងកម្រិត FHD+ ថែមទៀតផង។ ចំណែកថាមពលថ្មវិញ Reno11 និង Reno11 F មានកម្លាំង 5000mAh និងគាំទ្របច្ចេកវិទ្យា 67W SUPERVOOC ដោយឡែក Reno11 Pro មានកម្លាំងថ្ម 4600mAh និងគាំទ្របច្ចេកវិទ្យា 80W SUPERVOOC ។

ក្រៅពីនេះ OPPO ក៏មានសម្ពោធប្រព័ន្ធប្រតិបត្តិការថ្មី ColorOS 14 ដែលមានមុខងារពិសេសៗជាច្រើនដូចជា Smart Image Matting, File Dock, Smart Touch និងមុខងារ LinkBoost ។ លើសពីនេះទៅទៀត ក៏មានការប្រកាសផលិតផល IOT ដូចជា OPPO Pad Neo, OPPO Watch X និងកាសឥតខ្សែ OPPO Enco Bud2 ពណ៌ថ្មីផងដែរ។

សម្រាប់ថេប្លេតជំនាន់ថ្មី OPPO Pad Neo រចនាមកជាមួយអេក្រង់ ReadFit កម្រិត 2.4K ទំហំ 14” និងអាចប្រើប្រាស់ស៊ីមកាតដោយគាំទ្រសេវា 4G LTE និង Wifi ជាមួយថាមពលថ្មធំ 8000mAh ដែលមានបច្ចេកវិទ្យាសាកថ្មរហ័ស 33W SUPERVOOC ព្រមទាំង RAM 16GB ((8+8GB) និង ROM 128GB ផ្តល់ជូនលោកអ្នកនូវភាពរីករាយគ្មានដែនកំណត់គ្រប់ទីកន្លែង។
សម្រាប់ OPPO Enco Buds2 ជាកាសឥតខ្សែជំនាន់ថ្មីនឹងផ្តល់ឲ្យអ្នកនូវបទពិសោធសំឡេងដ៏អស្ចារ្យឥតដែនកំណត់ និងអាចឲ្យអ្នកប៉ះបញ្ជាផ្ទាល់លើកាស រាល់ពេលចង់ផ្លាស់ប្តូរបទចម្រៀង បន្ថយឬបន្ថែមសំឡេង និងទទួលការហៅចូលបានយ៉ាងងាយស្រួលដោយមិនចាំបាច់ចុចផ្ទាល់លើទូរស័ព្ទ។
សម្រាប់ OPPO Watch X នាឡិកាវៃឆ្លាតជំនាន់ថ្មី ដែលមានរចនាបថរូបរាងកាលីបស្រស់ស្អាត ទាន់សម័យ កម្រាស់ស្តើង ស័ក្កសមជាមួយជីវិតប្រចាំថ្ងៃ ដោយភ្ជាប់មកនូវមុខងារប្រើប្រាស់ទំនើបៗជាច្រើន។

តោះ! កក់ទុកមុនចាប់ពីថ្ងៃនេះរហូតដល់ថ្ងៃទី02 មីនា 2024 លើស្មាតហ្វូនស៊េរីថ្មី OPPO Reno11 Series 5G ទាំង 3 ម៉ូដែល Reno11 Pro 5G $599 | Reno11 5G $449 | Reno11 F 5G $339 នឹងទទួលបានកាដូរួមមានដូចជា ៖

រាល់ការកក់ទុកមុន Reno11 Pro 5G | Reno11 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $89
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54
រាល់ការកក់ទុកមុន Reno11 F 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $69
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54

សម្រាប់ផលិតផល IoT រួមមាន OPPO Pad Neo តម្លៃ $299 | OPPO Watch X | OPPO Enco Buds2 អាចរកទិញបានចាប់ពីថ្ងៃទី03 ខែមីនា 2024 នេះតទៅ៕

February 24, 2024

AirAsia ងាកទៅរករូបមន្តពាណិជ្ជកម្មថ្មី ត្រៀមពង្រីកមកទីផ្សារកម្ពុជា

ក្រុមហ៊ុនអាកាសចរណ៍ AirAsia កំពុងរៀបគម្រោងប្ដូរមកជាក្រុមហ៊ុនដឹកជញ្ជូនដែលដំណើរការទៅតាមរូបមន្ត «កង់រទេះ» ជំនួសឱ្យការផ្ដោតទៅលើតែជើងហោះហើរត្រង់ពីទីក្រុងមួយទៅទីក្រុមមួយដូចបច្ចុប្បន្ន។

ក្រុមហ៊ុនសាជីវកម្ម Capital A Bhd ដែលគ្រប់គ្រង AirAsia ប្រកាសថា ក្រុមហ៊ុនអាកាសចរណ៍នេះនឹងប្រើប្រាស់យុទ្ធសាស្ត្រពហុមណ្ឌល តាមរយៈវត្តមាននៅម៉ាឡេស៊ី ថៃ ឥណ្ឌូណេស៊ី ហ្វ៊ីលីពីន ហើយគ្រោងនឹងនៅកម្ពុជាផងដែរ ដើម្បីអនុវត្តគម្រោងដឹកជញ្ជូនតាមបណ្ដាញដែលមានការចំណាយទាប។

បណ្ដាក្រុមហ៊ុនអាកាសចរណ៍តម្លៃទាបតែងតែប្រើប្រាស់រូបមន្ត «ទីតាំង – ទីតាំង» ដែលផ្ដោតទៅលើតែផ្លូវហោះហើរត្រង់រវាងទីក្រុងពីរ ដើម្បីកាត់បន្ថយការចំណាយ ដោយសារតែមិនមានការចុះចតតាមផ្លូវហោះហើរ។ ចំណែករូបមន្ត «កង់រទេះ» វិញ គឺតែងតែត្រូវបានបណ្ដាក្រុមហ៊ុនអាកាសចរណ៍ផ្ដល់សេវាគ្រប់ជ្រុងជ្រោយ ដូចទៅនឹងអ្វីដែល Emirates Airlines កំពុងអនុវត្ត។

ចំណុចពិសេសនៃរូបមន្ត «កង់រទេះ» គឺការផ្ដោតទៅលើសកម្មភាពហោះហើរជុំវិញមជ្ឈមណ្ដលអាកាសយានដ្ឋានធំមួយ ដែលក្នុងនោះមានជើងហោះហើរជាច្រើនដែលហោះទៅកាន់គោលដៅផ្សេងៗ។

February 23, 2024

ក្រុមហ៊ុនអាកាសចរណ៍ថៃ ទិញយន្តហោះ 45 គ្រឿងពី Boeing

អគ្គនាយកប្រតិបត្តិរបស់ក្រុមហ៊ុន Thai Airways ឱ្យដឹងថា បណ្ដាយន្តហោះ Dreamliner ដែលបានបញ្ជាទិញពី Boeing នឹងត្រូវបានបំពាក់ម៉ាស៊ីនសន្សំសំច័យឥន្ធនៈ ដើម្បីជួយកាត់បន្ថយការបំភាយឧស្ម័នកាបូន។

ក្រុមហ៊ុនផលិតយន្តហោះ Boeing នាថ្ងៃទី 20 កុម្ភៈនេះ បានប្រកាសថា ក្រុមហ៊ុនអាកាសចរណ៍ថៃ Thai Airways បានបញ្ជាទិញយន្តហោះ Dreamliner ចំនួន 45 គ្រឿង ដែលនេះគឺជាការលក់ដ៏ធំលើកទីមួយរបស់ក្រុមហ៊ុនអាម៉េរិកនៅក្នុងពិព័រណ៍អាកាសចរណ៍សិង្ហបុរី។

ប្រកាសរបស់ Boeing ឱ្យដឹងថា Thai Airways បានជ្រើសយកយន្តហោះ 787-9 ដើម្បីគាំទ្រដល់យុទ្ធសាស្ត្រយូរអង្វែងរបស់ក្រុមហ៊ុននេះ នៅក្នុងការប្ដូរផ្លាស់ថ្មី និងបង្កើនក្រុមហោះហើរសម្រាប់ប្រភេទយន្តហោះសន្សំសំច័យឥន្ធនៈ ក៏ដូចជាការពង្រីកជើងហោះហើរថ្មីរបស់ខ្លួន។

អគ្គនាយកប្រតិបត្តិរបស់ក្រុមហ៊ុន Thai Airways ឱ្យដឹងថា បណ្ដាយន្តហោះ Dreamliner ដែលបានបញ្ជាទិញពី Boeing នឹងត្រូវបានបំពាក់ម៉ាស៊ីនសន្សំសំច័យឥន្ធនៈ ដើម្បីជួយកាត់បន្ថយការបំភាយឧស្ម័នកាបូន។ យោងតាម Boeing យន្តហោះ Dreamliner ជួយកាត់បន្ថយការប្រើប្រាស់ឥន្ធនៈ និងការបំភាយឧស្ម័នពុលបានរហូតដល់ 25% បើធៀបនឹងបណ្ដាយន្តហោះដែលជំនួសដោយ Dreamliner។

តម្លៃនៃការជួញដូរនេះមិនទាន់ត្រូវបានបង្ហើបឱ្យដឹងនៅឡើយ ប៉ុន្តែបើយោងតាមតម្លៃយន្តហោះខាងលើដែលត្រូវបានប្រកាស ការទិញដូរនេះអាចមានតម្លៃសរុបឡើងដល់ 13.16 ពាន់លានដុល្លារអាម៉េរិក៕

February 21, 2024

អណ្ដូងរ៉ែជ្រៅបំផុតនៅអឺរ៉ុប ក្លាយជាថ្មផ្ទុកថាមពលអគ្គិសនី

តំបន់អណ្ដូងរ៉ែជ្រៅជាង 1,400 ម៉ែត្រនៅប្រទេសហ្វាំងឡង់ នឹងរក្សាទុកថាមពលកកើតឡើងវិញ ហើយផ្គត់ផ្គង់អគ្គិសនីទៅតាមតម្រូវការនៃបណ្ដាញអគ្គិសនី។

ក្រុមហ៊ុនរក្សាទុកថាមពលនៅប្រទេសអង់គ្លេស ឈ្មោះ Gravitricity នឹងចាប់ផ្ដើមប្រែក្លាយអណ្ដូងរ៉ែជ្រៅបំផុតលើពិភពលោក ឱ្យទៅជាថ្មផ្ទុកថាមពលបែបទំនាញដំបូងគេ។ នេះបើតាម Interesting Engineering ចុះផ្សាយកាលពីថ្ងៃទី 05 មករា។ តំបន់អណ្ដូងរ៉ែ Pyhasalmi នេះ មានជម្រៅ 1,444 ម៉ែត្រ ស្ថិតនៅ Pyhajarvi មានចម្ងាយ 450 គីឡូម៉ែត្រទៅទិសខាងជើង ធៀបនឹងរដ្ឋធានីហែលស៊ីនគី របស់ប្រទេសហ្វាំងឡង់។

ជាកម្មសិទ្ធិរបស់ក្រុមហ៊ុន First Quantum Minerals នៅប្រទេសកាណាដា អណ្ដូងរ៉ែជ្រៅបំផុតនៅអឺរ៉ុបនេះគឺជាប្រភពផ្គត់ផ្គង់ស័ង្កសី និងទង់ដែង។ កាលពីឆ្នាំ 2022 ការផលិតនៅក្នុងតំបន់អណ្ដូងរ៉ែនេះបានឈប់ដំណើរការ ហើយចាប់ផ្ដើមងាកទៅទាញយកអត្ថប្រយោជន៍ផ្សេងនៅនឹងកន្លែង។

ក្រុមហ៊ុន Gravitricity នៅប្រទេសអង់គ្លេស អភិវឌ្ឍ Gravistore ដែលជាប្រព័ន្ធមួយដែលយោងទៅលើកម្លាំងទំនាញផែនដី អាចដើរតួនាទីជាថ្មផ្ទុកថាមពលដែលសល់ពីប្រភពកកើតឡើងវិញ។ ក្នុងថ្ងៃមានកម្ដៅ ឬខ្យល់ខ្លាំង គ្រាដែលស្ថានីយផលិតអគ្គិសនីដើរដោយកម្លាំងខ្យល់ ឬកម្ដៅព្រះអាទិត្យផលិតអក្គិសនីច្រើនជាងតម្រូវការ ប្រព័ន្ធខាងលើនឹងលើកដុំដែកដែលដាក់នៅលើអណ្ដូងរ៉ែនេះ ដើម្បីរក្សាទុកថាមពល។ នៅពេលតម្រូវការអគ្គិសនីកើនឡើង ដុំដែកអាចត្រូវបានទម្លាក់ចុះដើម្បីផលិតថាមពល ក្នុងនោះ ខ្សែរ៉តនឹងដើរតួនាទីដូចទៅនឹងម៉ាស៊ីនផលិតអគ្គិសនី។

Gravitricity នឹងប្រើប្រាស់ស្នូលដែលស្ថិតក្នុងជម្រៅ 530 ម៉ែត្រ ដើម្បីសាងសង់ប្រព័ន្ធគំរូមួយដែលមានអានុភាព 2 MW ដើម្បីបញ្ជាក់អំពីបច្ចេកវិទ្យានេះ។

February 7, 2024

រថភ្លើង «ហោះលើផ្លូវដែក» របស់ចិន បង្កើតបានកំណត់ត្រាល្បឿនថ្មី

សាជីវកម្មឧស្សាហកម្ម និងវិទ្យាសាស្ត្រអវកាសចិន (CASIC) បង្កើតបានកំណត់ត្រាល្បឿនថ្មីរបស់រថភ្លើងអណ្ដែតដើរដោយកម្លាំងមេដែក ឬហៅថា Maglev Train (Maglev ជាពាក្យកាត់របស់ពាក្យ magnetic levitation) បើកផ្លូវសម្រាប់ប្រព័ន្ធរថភ្លើង Hyperloop ល្បឿនមហាលឿន នាពេលអនាគត។

បើទោះជាល្បឿនពិតប្រាកដដែលខ្សែរថភ្លើងនេះសម្រេចបានគឺជាព័ត៌មានសម្ងាត់ ប៉ុន្តែ CASIC ឱ្យដឹងថា ពួកគេបានឈានដល់ជំហានដ៏សំខាន់នៅក្នុងការធ្វើតេស្តនាពេលថ្មីៗនេះ។ នេះបើតាម Sun ចុះផ្សាយកាលពីថ្ងៃទី 22 កុម្ភៈ 2024។

យោងតាម CASIC នេះគឺជាលើកដំបូងដែលរថភ្លើង Maglev ឈានដល់កម្រិតអណ្ដែតស្ថិរភាព នៅពេលផ្លាស់ទីក្នុងបំពង់សុញ្ញកាសកម្រិតទាប ដោយប្រើប្រាស់ផ្លូវរថភ្លើងសម្រាប់ការពិសោធ ប្រវែង 2 គីឡូម៉ែត្រ ដែលស្ថាបនារួចរាល់កាលពីខែវិច្ឆិកា 2023។ CASIC បង្ហើបឱ្យដឹងថា លទ្ធផលបានបំបែកកំណត់ត្រាមុននោះ (623 គីឡូម៉ែត្រ/ម៉ោង) របស់រថភ្លើង Maglev មួយខ្សែដែលធ្វើដំណើរក្នុងបរិស្ថានធម្មតាកាលពីខែតុលា 2023។

ទូរថភ្លើងដែលត្រូវបានធ្វើតេស្តលើផ្លូវដែកសុញ្ញកាសកម្រិតទាប

បច្ចេកវិទ្យា Maglev ជួយឱ្យរថភ្លើងអណ្ដែតពីលើផ្លូវដែក លុបបំបាត់ភាពកកិតនៅពេលធ្វើដំណើរតាមបំពង់សុញ្ញកាសកម្រិតទាប។ ស្ថានភាពក្បែរសុញ្ញកាស (ស្ទើរតែគ្មានខ្យល់ ឬម៉ូលេគុល) កាត់បន្ថយកម្លាំងកកិតរបស់ខ្យល់ បង្កើតបានជា «ជើងហោះហើរទាបក្បែរដី» ក្នុងល្បឿនលឿនខ្លាំង។

February 3, 2024

ព្រឹត្តិការណ៍ប្រណាំងឈុតហោះហើរល្បឿនលឿនលើអាកាសដំបូងគេលើពិភពលោក

ទីក្រុងឌូបៃប្រកាសថា នឹងប្រារព្ធព្រឹត្តិការណ៍នាំមុខគេ ប្រមូលផ្ដុំដោយក្រុមប្រណាំងដែលប្រើប្រាស់ឈុតហោះហើរល្បឿនលឿនមកពីជុំវិញពិភពលោក។

ក្រុមប្រឹក្សាកីឡាឌូបៃ ក្រោមការចង្អុលបង្ហាញរបស់រាជទាយាទឌូបៃ Sheikh Hamdan bin Mohammed bin Rashid AI Maktoum ថ្មីៗនេះបានប្រកាសអំពីការប្រារព្ធព្រឹត្តិការណ៍ប្រណាំងឈុតហោះហើរប្រតិកម្មឌូបៃ។ នេះនឹងជាព្រឹត្តិការណ៍ប្រណាំងឈុតហោះហើរល្បឿនលឿនដំបូងគេលើពិភពលោក ក្នុងនោះ កីឡាករចូលរួមនឹងប្រើប្រាស់ឈុតហោះហើរដើម្បីបង្ហាញសមត្ថភាព និងល្បឿននៅលើអាកាស។ នេះបើតាម Interesting Engineering ចុះផ្សាយកាលពីថ្ងៃទី 30 មករា 2024។

កីឡាករជំនាញ 8 នាក់ មកពីជុំវិញពិភពលោក រួមមាន Ahmed AI Shehhi របស់អេមីរ៉ាតអារ៉ាបរួម (UAE) ផងដែរ នឹងប្រឈមមុខដាក់គ្នាដើម្បីបញ្ជាក់ពីសមត្ថភាព។ ព្រឹត្តិការណ៍នេះនឹងត្រូវបានធ្វើឡើងក្រោមការឧបត្ថម្ភរបស់ Gravity Industries ជាក្រុមហ៊ុននាំមុខគេនៅក្នុងវិស័យបច្ចេកវិទ្យាឈុតសម្លៀកបំពាក់ហោះហើរល្បឿនលឿន។

យោងតាមការព្រមព្រៀងរវាងក្រុមប្រឹក្សាកីឡាឌូបៃ និង Gravity Industries ព្រឹត្តិការណ៍ប្រណាំងនេះនឹងកើតឡើងនៅថ្ងៃទី 28 កុម្ភៈ 2024 នៅក្នុងពិព័រណ៍នាវាឌូបៃ។ ភ្ញៀវដែលចូលរួមព្រឹត្តិការណ៍ពិព័រណ៍នេះនឹងមានឱកាសបានទស្សនាការប្រណាំងដ៏កម្រនេះ៕

January 31, 2024

Tag: ប្រើប្រាស់