វិស័យហិរញ្ញវត្ថុក្នុងស្រុកបានបន្តកំណើនយ៉ាងខ្លាំងដែលថ្មីៗនេះធនាគារជាតិនៃកម្ពុជា (NBC = National Bank of Cambodia) បានបង្ហាញពីធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ (MFIs)ដែលកំពុងត្រូវបានមើលឃើញថា កំណើនឥណទាន និងប្រាក់បញ្ញើមានកំណើនលូតលាស់រឹងមាំនៅឆមាសទី1 ឆ្នាំ2018។ នេះបើយោងតាមរបាយការណ៍ពាក់កណ្តាលឆ្នាំរបស់ធនាគារជាតិនៃកម្ពុជា (NBC) ។
បច្ចុប្បន្ននេះមានគណនីប្រាក់បញ្ញើ 5.6 លាននៅក្នុងធនាគារពាណិជ្ជ និងMDI និងគណនីប្រាក់កម្ចី 2,6 លាននៅក្នុងធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ។ នៅក្នុងធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ ឬMDIs(Microfinance Deposit-taking Institutions)ប្រាក់បញ្ញើបានកើនឡើង22% ដែលមានចំនួនច្រើនជាង 21ពាន់លានដុល្លារ ខណៈប្រាក់កម្ចីកើនឡើង18,8%ស្មើនឹងជិត22,5ពាន់លានដុល្លារ។ទន្ទឹមនឹងនោះ ក្នុងវិស័យធនាគារប្រាក់កម្ចីភាគច្រើនបានលក់រាយ(17,4%)លក់ដុំ(11,7%)សំណង់(9,9%) និងកសិកម្ម ព្រៃឈើ និងជលផល(9,8%)។
របាយការណ៍ក៏បានបញ្ជាក់ដែរថា ប្រាក់កម្ចីក្នុងវិស័យមីក្រូហិរញ្ញវត្ថុបានកើនឡើង 4.85 ពាន់លានដុល្លារក្នុងអំឡុងឆមាសទីមួយនៃឆ្នាំ2018 ពោលគឺកើនឡើង34.2%។ ប្រជាជនកម្ពុជារហូតដល់ 1.8លាននាក់បានខ្ចីប្រាក់ជាមួយគ្រឹះស្ថានមីក្រូហិរញ្ញវត្ថុនៅចំណុចខ្លះអំឡុងឆមាសទីមួយនៃឆ្នាំនេះ។ ប្រាក់កម្ចីភាគច្រើនត្រូវបានយកចេញដោយសហគ្រិនតូចៗនៅក្នុងវិស័យកសិកម្ម (23.8%) ពាណិជ្ជកម្ម(18.2%) សេវាកម្ម (10.3%)ការដឹកជញ្ជូន(4.7%) និងសំណង់(4.3%)។
របាយការណ៍នេះបានឱ្យដឹងទៀតថា “គ្រឹះស្ថានមីក្រូហិរញ្ញវត្ថុបានធ្វើឱ្យសេវាហិរញ្ញវត្ថុរបស់ខ្លួនមានលក្ខណៈចម្រុះបែបជាមួយសេវាផ្ទេរប្រាក់ធនាគារចល័ត សេវាអេធីអឹម និងសេវាធានារ៉ាប់រងខ្នាតតូច”។ ការគ្រប់គ្រងប្រាក់កម្ចីនៅតែមានប្រសិទ្ធភាពដោយសារតែកម្រិតនៃប្រាក់កម្ចីមិនដំណើរការគឺមានកម្រិតទាប 3.1 ភាគរយសម្រាប់ធនាគារ និង5ភាគរយសម្រាប់គ្រឹះស្ថានមីក្រូហិរញ្ញវត្ថុ។
ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុបានកើនឡើង17.5%(ឆ្នាំលើឆ្នាំ)ដល់149ទ្រីលានរៀល ដែលគាំទ្រដោយកំណើនមូលនិធិកម្ចីដើមទុនរបស់គ្រឹះស្ថាន និងប្រាក់បញ្ញើរបស់អតិថិជន។ មូលនិធិកម្ចីបានកើនឡើង29% ដល់15.8ទ្រីលានរៀល ដើមទុនមានកំណើន23.3% ដល់17.5ទ្រីលានរៀល ប្រាក់បញ្ញើរបស់អតិថិជន21.9%ដល់86.6ទ្រីលានរៀល និងឥណទានកើនឡើង18.8% ដល់90.8ទ្រីលានរៀល។ ទន្ទឹមនឹងនេះចំនួនគណនីប្រាក់បញ្ញើបានកើនឡើងដល់5.6លានគណនីហើយគណនីឥណទានមានចំនួន 2.6លានគណនី។
ការរីកចម្រើននៃបច្ចេកវិទ្យាហិរញ្ញវត្ថុ និងការកើនឡើងនៃតម្រូវការពីប្រជាជនកម្ពុជាបានជំរុញឱ្យធនាគារ និងមីក្រូហិរញ្ញវត្ថុអភិវឌ្ឍ និងធ្វើឱ្យប្រសើរឡើងដោយការបង្កើតសាខាបន្ថែមសេវាកម្មជាច្រើនដើម្បីបង្កើនប្រសិទ្ធភាព និងគុណភាពនៃផលិតផល និងប្រតិបត្តិការបង្កើនសាច់ប្រាក់ និងពង្រឹងអភិបាលកិច្ចល្អ។ នេះជាការឆ្លុះបញ្ចាំងថា គ្រឹះស្ថានមីក្រូ-ហិរញ្ញវត្ថុ និងវិស័យធនាគារនៅតែបន្តបង្ហាញពីកំណើនដ៏រឹងមាំ និងមានសុខភាពល្អដែលឆ្លុះបញ្ចាំងពីការពិតដែលថា មានដើមទុន និងសាច់ប្រាក់គ្រប់គ្រាន់។
លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេសនៃធនាគារជាតិនៃកម្ពុជាបានថ្លែងថា ហានិភ័យនៅក្នុងឧស្សាហកម្មធនាគារត្រូវបានគ្រប់គ្រងប្រកបដោយប្រសិទ្ធភាពដែលបានធ្វើឱ្យមានកំណើនយ៉ាងរឹងមាំ។
លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេសនៃធនាគារជាតិនៃកម្ពុជាលោកជំទាវបានមានប្រសាសន៍ថា៖ “បច្ចុប្បន្នប្រទេសកម្ពុជាមានតុល្យភាពនៃការទូទាត់ប្រាក់លើសពី 289.4 លានដុល្លារ ឬ2.4% នៃផលិតផលក្នុងស្រុកសរុបដែលទាបជាងកាលពីឆ្នាំមុននៅពេលវាមានចំនួន 8.5% នៃផលិតផលក្នុងស្រុកសរុប”។
ទោះជាឱនភាពគណនីចរន្តបានកើនឡើងពី 8.4 ភាគរយនៃផលិតផលក្នុងស្រុកសរុបផ.ស.សក្នុងអំឡុងពាក់កណ្ដាលទីមួយនៃឆ្នាំ2017 ដល់9.5ភាគរយនៃផលិតផលក្នុងស្រុកសរុប (1.1 ពាន់លានដុល្លារ)នាពេលបច្ចុប្បន្នក្ដី ក៏លំហូរនៃការវិនិយោគផ្ទាល់ពីបរទេសបានកើនឡើង28.4% ដែរក្នុងអំឡុងពេល 6ខែដំបូងនៃឆ្នាំនេះ។
បច្ចុប្បន្នគិតត្រឹមពាក់កណ្តាលឆ្នាំ2018 ធនាគារ និងគ្រឹះស្ថានមីក្រូហិរញ្ញវត្ថុព្រមទាំងគ្រឹះស្ថានឥណទានជនបទនៅកម្ពុជាសរុបមានចំនួន433។ ក្នុងរបាយការណ៍បញ្ជាក់ថា បច្ចុប្បន្ននៅកម្ពុជាមានធនាគារ54 រួមមាន ធនាគារពាណិជ្ជ39(ធនាគារបរទេស12 ធនាគារក្នុងស្រុក12 និងបុត្រសម្ព័ន្ធធនាគារ 15) រួមទាំងធនាគារឯកទេសចំនួន15(ធនាគាររដ្ឋ1)។ ចំណែកគ្រឹះស្ថានហិរញ្ញវត្ថុវិញ មានចំនួនសរុប 379 ក្នុងនោះគ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជនមាន 7ស្ថាប័ន គ្រឹះស្ថានមីក្រូហិរញ្ញវត្ថុ 70ស្ថាប័ន និងគ្រឹះស្ថានឥណទានជនបទចំនួន 302ស្ថាប័ន។ គ្រឹះស្ថានមីក្រូហិរញ្ញវត្ថុបានធ្វើប្រតិបត្តិការគ្របដណ្តប់ទូទាំងរាជធានី-ខេត្តដោយមានការិយាល័យសរុបចំនួន1,375កន្លែង និងបានផ្តល់ការងារដល់បុគ្គលិកចំនួន32,171នាក់។
បន្ថែមពីលើនេះ បណ្តាញប្រតិបត្តិការរបស់គ្រឹះស្ថានធនាគារ និងហិរញ្ញវត្ថុ នៅតែបន្តពង្រីកនៅតាមតំបន់នានា ជាពិសេសតំបន់ជនបទ ដែលបានរួមចំណែកយ៉ាងសំខាន់ដល់យន្តការជំរុញបរិយាប័ន្នហិរញ្ញវត្ថុ និងកម្រិតជីវភាពប្រជាជន និងបានឆ្លើយតបទៅនឹងតម្រូវការសេវាហិរញ្ញវត្ថុរបស់អតិថិជនក្នុងការប្រកបអាជីវកម្មប្រចាំថ្ងៃ។ ជាក់ស្តែងសព្វថ្ងៃនេះ គ្រឹះស្ថានធនាគារ និងហិរញ្ញវត្ថុ មានសាខារហូត 2,262កន្លែង និងម៉ាស៊ីនដក និងដាក់ប្រាក់ស្វ័យប្រវត្តិអេធីអឹម (ATM) ចំនួន1,910ម៉ាស៊ីន៕
