ប្រធាន - La Reine Media

តំបន់សេដ្ឋកិច្ចពិសេសកម្ពុជា – ជប៉ុន អាចនឹងបង្ហាញវត្តមាននៅកម្ពុជា នាពេលខាងមុខ

តំបន់សេដ្ឋកិច្ចពិសេសកម្ពុជា – ជប៉ុន កំពុងត្រូវបាន កម្ពុជា និងជប៉ុន រៀបគម្រោងសិក្សា និងអាចត្រូវបានបង្កើតឡើងនាពេលខាងមុខ ដើម្បីលើកទឹកចិត្ត និងទាក់ទាញអ្នកវិនិយោគជប៉ុន មកបណ្ដាក់ទុនរកស៊ីនៅកម្ពុជាបន្ថែមទៀត។

កាលពីថ្ងៃទី 25 ធ្នូ 2023 នៅក្នុងកិច្ចប្រជុំមួយដែលដឹកនាំដោយឯកឧត្ដម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា និងគណៈប្រតិភូនៃប្រទេសជប៉ុន ដែលដឹកនាំដោយលោក Ueno Atsushi ឯកអគ្គរាជទូតជប៉ុនប្រចាំនៅកម្ពុជា បានពិភាក្សាគ្នាអំពីការងារភស្ដុភារកម្ម ហេដ្ឋារចនាសម្ព័ន្ធដឹកជញ្ជូន និងកំពង់ផែនៅកម្ពុជា។

ជំនួបខាងលើនេះ ពិភាក្សាគ្នាដោយផ្ដោតលើ «ការពង្រីកវិសាលភាពកំពង់ផេស្វយ័តក្រុងព្រះសីហនុ» និងគម្រោងសិក្សា រៀបចំបង្កើតតំបន់សេដ្ឋកិច្ចពិសេសកម្ពុជា-ជប៉ុន» (Cambodia-Japan Special Economic Zone) ដើម្បីប្រែក្លាយកំពង់ផែស្វយ័តក្រុងព្រះសីហនុឱ្យក្លាយជាកំពង់ផែតំបន់។ នេះបើតាម ក្រុមប្រឹក្សាអភិវឌ្ឍន៍កម្ពុជា ចេញផ្សាយកាលពីថ្ងៃទី 25 ធ្នូ 2023៕

December 27, 2023

កម្ពុជា មានសមត្ថភាពកិនកែច្នៃអង្ករបាន 1,200 តោនក្នុងមួយម៉ោង

បច្ចុប្បន្ន កម្ពុជាមានរោងម៉ាស៊ីនខ្នាតមធ្យម និងធំចំនួន 240 ក្នុងនោះ រោងម៉ាស៊ីនចំនួន 130 មានសមត្ថភាពកិនកែច្នៃ និងឆ្លើយតបទៅតាមបទដ្ឋានស្តង់ដានាំចេញទៅទីផ្សារអន្តរជាតិ ហើយបច្ចុប្បន្នកំពុងទទួលបានចំណាប់អារម្មណ៍ពីទីផ្សារឥណ្ឌូណេស៊ី។

កាលពីថ្ងៃទី 22 ខែធ្នូ ឆ្នាំ 2023 ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានចូលរួមអមដំណើរ ឯកឧត្តម Santo Darmosumarto ឯកអគ្គរដ្ឋទូតសាធារណៈរដ្ឋឥណ្ឌូនេស៊ីប្រចាំនៅកម្ពុជា នៅក្នុងដំណើរទស្សនកិច្ចរោងចក្រកិនស្រូវមួយចំនួនដែលជាសមាជិកសហព័ន្ធស្រូវអង្ករកម្ពុជា នៅស្រុកឧត្តុង ខេត្តកំពង់ស្ពឺ ដើម្បីពិនិត្យ និងឈ្វេងយល់អំពីសង្វាក់ផលិតកម្មកិនស្រូវ សមត្ថភាពកិនកែច្នៃ បទដ្ឋានស្ដង់ដារសុវត្ថិភាពចំណីអាហារ និងបច្ចេកវិទ្យាក្នុងរោងចក្រកិនស្រូវនៅកម្ពុជា។ នេះបើតាម សហព័ន្ធស្រូវអង្ករកម្ពុជា។

បច្ចុប្បន្ន ប្រទេសឥណ្ឌូនេស៊ី គឺជាទីផ្សារថ្មីសម្រាប់ការនាំចេញអង្កររបស់កម្ពុជា ក្នុងនោះ ថ្មីៗនេះ កម្ពុជាទើបតែបាននាំចេញអង្ករប្រមាណជា 15,000 តោន ទៅកាន់ទីផ្សារមួយនេះ។

យោងតាម សហព័ន្ធស្រូវអង្ករកម្ពុជា គិតមកដល់ពេលនេះ វិស័យស្រូវអង្ករកម្ពុជា មានរោងម៉ាស៊ីនខ្នាតមធ្យម និងធំចំនួន 240 ក្នុងនោះ មានរោងម៉ាស៊ីនចំនួន 130 ដែលមានសមត្ថភាពកិនកែច្នៃ និងឆ្លើយតបទៅតាមបទដ្ឋានស្តង់ដានាំចេញទៅទីផ្សារអន្តរជាតិ។ ចំណែកឯសមត្ថភាពកិនកែច្នៃអង្ករវិញ រោងម៉ាស៊ីនកិនស្រូវទាំងនេះ អាចកែច្នៃបាន 1,200 តោនក្នុងមួយម៉ោង ខណៈដែលឡសម្ងួតវិញ មានសមត្ថភាពសម្ងួតបានជាង 42,000 តោនក្នុងមួយថ្ងៃ។

សហព័ន្ធស្រូវអង្ករកម្ពុជា ក៏បានឱ្យដឹងថា រោងម៉ាស៊ីននៅកម្ពុជា អាចរក្សាទុកស្រូវបាន 2 លានតោនក្នុងមួយវគ្គ ហើយអាចកិនកែច្នៃ និងផ្គត់ផ្គង់អង្ករបានរហូតដល់ជាង 4 លានតោនក្នុងមួយឆ្នាំ៕

ឧកញ៉ា ចាន់ សុឃាំង ប្រធានសហព័ន្ធស្រូវ-អង្ករកម្ពុជា

December 26, 2023

កម្ពុជា នឹងខ្វះអង្ករនាំចេញនៅដើមឆ្នាំក្រោយ មុននឹងងើបឡើងវិញនៅត្រីមាសទីពីរ

យោងតាមសហព័ន្ធស្រូវអង្ករកម្ពុជា ឆ្នាំ 2023 កម្ពុជានាំចេញអង្ករប្រមាណ 670,000 តោន ប៉ុន្តែអាចនឹងខ្វះអង្ករសម្រាប់ការនាំចេញនៅក្នុងត្រីមាសទីមួយនៃឆ្នាំ 2024។

ឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា ឱ្យដឹងថា ឆ្នាំ 2023 កម្ពុជានាំចេញអង្ករប្រមាណ 670,000 តោន ដែលកើនពី 5 ទៅ 10% បើធៀបនឹងដំណាក់កាលដូចគ្នាក្នុងឆ្នាំ 2022។ ប៉ុន្តែ លោកឧកញ៉ាបានសង្កត់ធ្ងន់ថា បើទោះជាការនាំចេញកើនឡើងបន្តិច ប៉ុន្តែតម្លៃអង្ករកម្ពុជាលក់បានថ្លៃជាង បើធៀបនឹងតម្លៃមធ្យមភាគនៅក្នុងទីផ្សារ។

ក៏ប៉ុន្តែ អ្នកជំនួញរូបនេះបានព្យាករថា តម្លៃអង្ករកម្ពុជាក្នុងឆ្នាំ 2024 នឹងកើនឡើងបន្តទៀត គ្រាដែលកម្ពុជាអាចនឹងខ្វះអង្ករសម្រាប់ការនាំចេញនៅក្នុងត្រីមាសទីមួយនៃឆ្នាំ 2024។ ទន្ទឹមនឹងនេះ លោកក៏សង្ឃឹមថា ចាប់ពីត្រីមាសទីពីរនៃឆ្នាំ 2024 កំណើននៃការនាំចេញអង្កររបស់កម្ពុជា នឹងកើនឡើងខ្ពស់។

យោងតាមអ្នកជំនួញខាងលើ មូលហេតុនៃបញ្ហាកង្វះអង្ករនាំចេញនេះ គឺដោយសារទិន្នផលស្រូវដែលប្រមូលបានក្នុងអំឡុងពីខែមករាដល់ខែមីនា មិនអាចឆ្លើយតបបានចំពោះតម្រូវការនាំចេញ។ «ដូច្នេះ យើងមិនសង្ឃឹមថា ការនាំចេញអង្ករនឹងកើននៅក្នុងត្រីមាសទីមួយ ប៉ុន្តែយើងសង្ឃឹមទៅលើត្រីមាសទីពីរ ព្រោះពេលនោះយើងប្រមូលផល ហើយបរិមាណអង្ករនាំចេញនឹងកើនឡើង។ តម្លៃស្រូវក្នុងស្រុកក៏នឹងកើនឡើង ព្រោះតែអង្ករឡើងថ្លៃ» ឧកញ៉ា សុង សារ៉ន បញ្ជាក់ដូច្នេះ។

នៅក្នុង 11 ខែដំបូងនៃឆ្នាំ 2023 កម្ពុជាបាននាំចេញអង្ករជិត 600,000 តោន ដែលមានតម្លៃសរុបជាង 420 លានដុល្លារអាម៉េរិក។ ក្នុងនោះ ចិនគឺជាទីផ្សារនាំចេញអង្ករធំជាងគេរបស់កម្ពុជា ដោយបានទិញ 198,761 តោន។ ទីផ្សារធំបន្ទាប់គឺ បណ្ដាប្រទេសនៅអឺរ៉ុប អាស៊ីអាគ្នេយ៍ និងអាហ្វ្រិក៕

December 25, 2023

ហេតុអ្វីសហរដ្ឋអាម៉េរិក គេចផុតពីវិបត្តិសេដ្ឋកិច្ច?

ការព្យាករជាច្រើនបានបង្ហាញថា សហរដ្ឋអាម៉េរិក អាចធ្លាក់ទៅក្នុងវិបត្តិសេដ្ឋកិច្ចនៅក្នុងឆ្នាំ 2023 ប៉ុន្តែពេលនេះ ស្ថានការណ៍បានផ្លាស់ប្ដូរទាំងស្រុង។

រយៈពេលប៉ុន្មានឆ្នាំមកនេះ Wall Street តែងតែយល់ថា សេដ្ឋកិច្ចអាម៉េរិកនឹងធ្លាក់ទៅក្នុងវិបត្តិ មុនពេលរដូវបោះឆ្នោតជ្រើសរើសប្រធានាធិបតីមកដល់នៅចុងឆ្នាំ 2024។ ក្នុងដំណាក់កាលនោះដែរ ក៏មានសេដ្ឋវិទូជាច្រើនបានព្យាករថា អាម៉េរិកជិតជួបវិបត្តិសេដ្ឋកិច្ច។

ក៏ប៉ុន្តែ មួយឆ្នាំក្រោយមក ពួកគេបានផ្លាស់ប្ដូរយោបល់។ ថ្វីបើពុំមានអ្វីជារឿងប្រាកដ ប៉ុន្តែលទ្ធភាពដែល សហរដ្ឋអាម៉េរិក ជួបវិបត្តិសេដ្ឋកិច្ចក្នុងឆ្នាំរយៈពេលខ្លី កំពុងតែថយចុះបន្តិចម្ដងៗ។

ដូច្នេះ តើហេតុអ្វីបានជា សហរដ្ឋអាម៉េរិក គេចផុតពីវិបត្តិសេដ្ឋកិច្ច?

ក្នុង 20 ខែកន្លង ធនាគារកណ្ដាលអាម៉េរិក (Fed) បានធ្វើគ្រប់យ៉ាងដើម្បីគ្រប់គ្រងសេដ្ឋកិច្ចអាម៉េរិក ក្នុងបំណងកាត់បន្ថយអតិផរណា។ ពួកគេយល់ច្បាស់ថា ប្រការនេះអាចធ្វើឱ្យមនុស្សរាប់លាននាក់បាត់បង់ការងារ។

ក្នុងអំឡុងពេលនោះ Fed បានដំឡើងការប្រាក់ 11 លើក។ ប៉ុន្តែ Fed មិនបានដំឡើងការប្រាក់លឿន និងខ្លាំងដូចកាលពី 40 ឆ្នាំមុន។ កាលពីទសវត្សរ៍ឆ្នាំ 1980 Fed បានដំឡើងការប្រាក់យ៉ាងខ្ពស់ ធ្វើឱ្យសេដ្ឋកិច្ចធ្លាក់ក្នុងវិបត្តិអាក្រក់បំផុតនៅក្នុងអំឡុង 50 ឆ្នាំ។

Fed ក៏បានលក់ចោលមូលបត្របំណុលរាប់ទ្រីលានដុល្លារអាម៉េរិក ដែលបានទិញក្នុងរយៈពេលច្រើនឆ្នាំមុននោះ។ ទង្វើនេះបានកាត់បន្ថយតម្រូវការមូលបត្របំណុលរបស់រដ្ឋាភិបាល នាំឱ្យអត្រាការប្រាក់កើនឡើងខ្ពស់។ អត្រាការប្រាក់នៃកម្ចីប្រើប្រាស់ កម្ចីទិញផ្ទះ បណ្ណឥណទានជាដើម ក៏ត្រូវបានអូសឡើងទៅតាម ធ្វើឱ្យទីផ្សារអចលនទ្រព្យអាម៉េរិកធ្លាក់ចុះ។

ទោះយ៉ាងនេះក៏ដោយ ក្រោយពីអនុវត្តគោលនយោបាយគ្រប់គ្រងសេដ្ឋកិច្ចបានពីរឆ្នាំ Fed ក៏ធ្វើបានសម្រេចនូវអ្វីដែលគ្រប់គ្នាគិតថាមិនអាចទៅរួច នោះគឺការគ្រប់គ្រងអតិផរណាបាន ដោយមិនរុញសេដ្ឋកិច្ចឱ្យធ្លាក់ក្នុងវិបត្តិ បើទោះមិនអាចបំពេញចិត្តមនុស្សគ្រប់រូបបានក៏ដោយ៕

December 22, 2023

ឥណ្ឌណេស៊ី ចាប់ផ្ដើមដំណាក់កាលទីបីនៃគម្រោងកសាងរដ្ឋធានីថ្មី

កាលពីថ្ងៃទី 20 ធ្នូ 2023 ឥណ្ឌូណេស៊ី បានសម្ពោធដំណាក់កាលទីបីនៃគម្រោងកសាងរដ្ឋធានីថ្មី (IKN) Nusantara នៅក្នុងខេត្ត Kalimantan ខាងកើត ដែលស្ថិតនៅលើកោះ Borneo ក្រោមអធិបតីភាពប្រធានាធិបតី Joko Widodo ។

យោងតាមសារព័ត៌មាននានា នៅក្នុងពិធីសម្ពោធបើកការដ្ឋានសាងសង់មន្ទីរពេទ្យពហុព្យាបាលមជ្ឈិម ដែលមានឯកទេសខាងបេះដូង និងជំងឺដាច់សរសៃឈាមខួរក្បាល ប្រធានាធិបតី Joko Widodo លើកឡើងថា នេះគឺជាមន្ទីរពេទ្យទីបួនដែលត្រូវបានសាងសង់នៅ Nusantara ក្នុងរយៈពេលបីខែកន្លងមកនេះ។

លោកសម្ដែងក្ដីសង្ឃឹមថា នៅពេលមន្ទីរពេទ្យទាំងនេះផ្ដើមដំណើរការចាប់ពីឆ្នាំ 2024 ប្រជាជននឹងមិនចាំបាច់ធ្វើដំណើរទៅកាន់ប្រទេសជិតខាងដូច ម៉ាឡេស៊ី សិង្ហបុរី ឬទៅកាន់ប្រទេសជប៉ុន និងសហរដ្ឋអាម៉េរិក ដើម្បីព្យាបាលជំងឺដូចមុនទៀតឡើយ។

មុននោះ អាជ្ញាធរគ្រប់គ្រង IKN (OIKN) បានឱ្យដឹងថា ពិធីសម្ពោធបើកការដ្ឋានដំណាក់កាលទីបីនៃគម្រោងកសាងរដ្ឋធានីថ្មីដែលមានតម្លៃជាង 30 ពាន់លានដុល្លារអាម៉េរិកនេះ នឹងត្រូវបានធ្វើឡើងនៅថ្ងៃទី 20-21 ខែធ្នូ 2023 នៅក្នុងតំបន់ចំនួនបី គឺ តំបន់បៃតង តំបន់ស្ថាប័នរដ្ឋ និងតំបន់អេកូឡូស៊ី។

យោងតាមអ្នកនាំពាក្យរបស់ OIKN លោក Troy Pantouw ដំណាក់កាលទីបីរួមមាន បណ្ដាគម្រោងដាំព្រៃឈើ ប្រព័ន្ធគមនាគមន៍ដែលដំណើរការដោយអគ្គិសនី សណ្ឋាគារ មន្ទីរពេទ្យ រួមនឹងគម្រោងជាច្រើនផ្សេងទៀត ដែលមានទុនវិនិយោគសរុបប្រមាណ 645 លានដុល្លារអាម៉េរិក។

ឥណ្ឌូណេស៊ី បានប្រកាសអំពីគម្រោងរើរដ្ឋធានីចេញពីកោះជ្វា (Java) ដែលមានប្រជាជនច្រើនជាងគេលើពិភពលោក កាលពីខែមេសា 2019។ ប៉ុន្មានខែក្រោយមក ប្រធានាធិបតីប្រទេសនេះក៏បានប្រកាសថា ស្រុក Penajam Paser ខាងជើង និង Kutai Kertanegara នៃខេត្ត Kalimantan ខាងកើត ត្រូវបានជ្រើសរើសជាទីតាំងសម្រាប់កសាងរដ្ឋធានីថ្មី។

បើតាមផែនការ Nusantara នឹងដើរតួនាទីជាមជ្ឈមណ្ឌលរដ្ឋបាលរបស់ឥណ្ឌូណេស៊ី ក្នុងគ្រាដែលរដ្ឋធានីបច្ចុប្បន្ន គឺ ហ្សាការតា នឹងក្លាយជាមជ្ឈមណ្ឌលសេដ្ឋកិច្ច និងហិរញ្ញវត្ថុ។ Nusantara នឹងត្រូវបានគ្រប់គ្រងដូចទៅនឹងតំបន់ស្វយ័ត ទៅតាមរដ្ឋធម្មនុញ្ញ ក្នុងនោះ មេដឹកនាំរដ្ឋធានីថ្មីនេះនឹងមានឋានៈជារដ្ឋមន្ត្រី៕

December 22, 2023

ណាសាបញ្ជូនវីដេអូមកកាន់ផែនដី ពីចម្ងាយជាង 30 លានគីឡូម៉ែត្រ

នេះជាលើកដំបូងហើយដែល ទីភ្នាក់ងារអវកាសអាម៉េរិក (ណាសា-NASA) បញ្ជូនវីដេអូដែលមានភាពច្បាស់ខ្ពស់ ពីទីអវកាសដ៏ឆ្ងាយ មកកាន់ផែនដី ដោយប្រើប្រាស់ពន្លឺឡាស៊ែរ នៅក្នុងការពិសោធនៅលើយាន Psyche។

កាលពីថ្ងៃទី 11 ធ្នូ 2023 កម្មវិធីពិសោធផ្នែកទំនាក់ទំនងដោយពន្លឺក្នុងអវកាសឆ្ងាយ (DSOC) នៃបន្ទប់ពិសោធន៍កម្លាំងរុញច្រានល្បឿនលឿន (JPL) របស់ណាសា បានបញ្ជូនវីដេអូដែលមានភាពច្បាស់កម្រិតខ្ពស់ខ្លាំង ស្ដីពីសត្វឆ្មាមួយក្បាលដែលមានឈ្មោះថា Taters កំពុងដេញតាមព្រួញពន្លឺឡាស៊ែរ ពីចម្ងាយប្រហែល 31 លានគីឡូម៉ែត្រ។ ការធ្វើតេស្តនេះ ត្រូវបានធ្វើឡើងនៅលើយានអវកាស Psyche របស់ណាសា ដែលបច្ចុប្បន្នកំពុងហោះហើរទៅកាន់ 16 Psyche ដែលជាអាចម៍ផ្កាយលោហធាតុស្ថិតក្នុងតំបន់ខ្សែក្រវាត់អាចម៍ផ្កាយចម្បងគេ នៅចន្លោះភពអង្គារ និងភពព្រហស្បតិ៍ ក្រោយពីត្រូវបានបាញ់បង្ហោះតាមរយៈរ៉ុក្កែត Falcon Heavy របស់ SpaceX កាលពីថ្ងៃទី 13 តុលា។

«ការបង្កើនកម្រិតបញ្ជូនគឺជារឿងចាំបាច់ដើម្បីសម្រេចបានគោលដៅវិទ្យាសាស្ត្រ និងការស្រាវជ្រាវក្នុងអនាគត។ យើងឆ្ពោះទៅកាន់ជោគជ័យនៃបច្ចេកវិទ្យាគន្លឹះនេះ ហើយផ្លាស់ប្ដូរវិធីទាក់ទងនៅក្នុងបេសកកម្មអន្តរភព» Pam Melroy អនុប្រធានរបស់ណាសា ឱ្យដឹងដូច្នេះ។

វីដេអូស្ដីពី Taters ត្រូវបានបញ្ជូនដោយឧបករណ៍ថ្មីដែលអភិវឌ្ឍដោយ JPL និងត្រូវបានហៅថា ប្រព័ន្ធបញ្ជូន និងទទួលឡាស៊ែរក្នុងជើងហោះហើរ។ ឧបករណ៍នេះបញ្ជូនពន្លឺឡាស៊ែរក្បែរអ៊ីហ្វ្រារ៉េដ ទៅកាន់តេឡេស្កុប Hale នៅឯស្ថានីយ Palomar របស់វិទ្យាស្ថានបច្ចេកវិទ្យា California។ រលកសញ្ញានេះចំណាយពេល 101 វិនាទី ដើម្បីធ្វើដំណើរមកដល់ផែនដី ក្នុងល្បឿន 267 មេហ្គាប៊ិត/វិនាទី (Mbps)។

Ryan Rogalin អ្នកវិទ្យាសាស្ត្រដែលទទួលខុសត្រូវលើឧបករណ៍អេឡិចត្រូនិចទទួលរលកសញ្ញារបស់គម្រោងនេះ និយាយថា «បើទោះបញ្ជូនពីចម្ងាយរាប់សិបលានគីឡូម៉ែត្រ ប្រព័ន្ធនេះនៅតែអាចបញ្ជូនវីដេអូបានលឿនជាងអ៊ីនធើណិតស្ទើរតែទាំងអស់នៅលើផែនដី»។

ប្រព័ន្ធបញ្ជូន និងទទួលឡាស៊ែរក្នុងជើងហោះហើរ បានធ្វើការពិសោធដំបូងកាលពីខែវិច្ឆិកា ដោយការបញ្ជូនរលកសញ្ញាមកកាន់ផែនដី ពីចម្ងាយ 16 លានគីឡូម៉ែត្រ។

យានអវកាស Psyche នឹងហោះកាត់ភពអង្គារនៅក្នុងឆ្នាំ 2026 និងថតរូបរបស់ភពក្រហមនេះ មុននឹងហោះឆ្ពោះទៅកាន់គោលដៅចុងក្រោយ គឺ អាចម៍ផ្កាយ 16 Psyche ដែលគ្រោងនឹងទៅដល់នៅក្នុងឆ្នាំ 2029៕

December 21, 2023

វិស័យស្រូវអង្ករថៃ នឹងផ្ដោតលើគុណភាព ជំនួសឱ្យបរិមាណ

វិស័យស្រូវអង្កររបស់ប្រទេសថៃ នាពេលខាងមុខ នឹងផ្ដោតសំខាន់ទៅលើគុណភាពជាជាងបរិមាណ នៅពេលប្រទេសនេះដាក់គោលដៅទាញយកចំណែកទីផ្សារធំជាងបច្ចុប្បន្ន នៅលើទីផ្សារអង្ករគុណភាពខ្ពស់នៅទូទាំងពិភពលោក។

នេះគឺជាសារដែលត្រូវបានលោក Arnont Nonsi អនុប្រធាននាយកដ្ឋានស្រូវអង្ករ នៃក្រសួងកសិកម្មនិងសហករណ៍ថៃ លើកឡើងនៅក្នុងពិធីបុណ្យស្រូវអង្ករថៃឆ្នាំ 2023 ដែលធ្វើឡើងនៅរាជធានីបាងកក ចាប់ពីថ្ងៃទី 14 ដល់ 17 ខែធ្នូ។

លោក Arnont ឱ្យដឹងថា ថៃអស់លទ្ធភាពក្នុងការប្រកួតប្រជែងយកតំណែង «ប្រទេសនាំចេញអង្ករច្រើនជាងគេ» ជាមួយនឹងបណ្ដាប្រទេសនាំចេញអង្ករនានា ពិសេសគឺ ប្រទេសឥណ្ឌា ដែលមានដីស្រែធំសម្បើម។ ជំនួសមកវិញ លោក Arnont ថ្លែងថា ប្រទេសថៃ ចង់ «លើកកម្ពស់គុណភាព» ទីផ្សារអង្កររបស់ខ្លួន ក្នុងនោះ ពាក្យថា «លើកកម្ពស់គុណភាព» នេះ រួមមាន គុណភាពនៃសារជាតិបំប៉ន ដំណើរការដាំស្រូវដែលល្អសម្រាប់បរិស្ថាន តម្លៃកើនឡើងពីការផ្លាស់ប្ដូរ និងបច្ចេកវិទ្យា ក៏ដូចជាស្ថិរភាពរបស់កសិកម្ម។

ក្រៅពីនេះ លោក Arnont ក៏បង្ហើបឱ្យដឹងដែរថា នាយកដ្ឋានស្រូវអង្ករថៃ គ្រោងនឹងសហការជាមួយស្ថាប័នពាក់ព័ន្ធ ដើម្បីបន្ថែមតម្លៃ និងកែលម្អអង្ករថៃ ដើម្បីអាចប្រើប្រាស់បាននៅក្នុងផលិតផលមួយចំនួន មានជាអាទិ៍ គ្រឿងសម្អាង ភេសជ្ជៈ និងទឹកអប់ជាដើម។

December 16, 2023

ហេតុអ្វីបានជាចិនទិញទុរេនពីវៀតណាមច្រើនជាងមុន 30 ដង?

ក្នុង 10 ខែដំបូងនៃឆ្នាំ 2023 ទុរេនរបស់វៀតណាម ដែលនាំចេញទៅកាន់ទីផ្សារចិន សម្រេចបានជាង 451,000 តោន កើនជាង 30 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

ទុរេនគឺជាប្រភេទផ្លែឈើដែលមានតម្លៃបំផុតសម្រាប់ការនាំចេញរបស់វិស័យបន្លែផ្លែឈើវៀតណាម នៅក្នុង 11 ខែដំបូងនៃឆ្នាំ 2023 ដោយមានតម្លៃជាង 2.1 ពាន់លានដុល្លារអាម៉េរិក។ ទុរេនភាគច្រើនរបស់វៀតណាម ត្រូវបាននាំចេញទៅកាន់ប្រទេសចិន។ នេះបើតាមសមាគមបន្លែផ្លែឈើវៀតណាម ដែលបានឱ្យដឹងកាលពីពេលថ្មីៗនេះ។

ក្នុង 10 ខែដំបូងនៃឆ្នាំ 2023 ប្រទេសចិនបាននាំចូលទុរេនជាង 1.3 លានតោន ដែលមានតម្លៃជិតស្មើនឹង 6.4 ពាន់លានដុល្លារ ក្នុងនោះ បរិមាណសរុបបានកើន 88% និងតម្លៃសរុបបានកើន 81% បើធៀបនឹង 10 ខែដំបូងនៃឆ្នាំ 2022។

ប្រទេសថៃ គឺជាប្រភពផ្គត់ផ្គង់ទុរេនធំបំផុតរបស់ប្រទេសចិន ដោយបាននាំចេញទៅកាន់ទីផ្សារនេះជិត 904,000 តោន ដែលមានតម្លៃសរុបជាង 4.4 ពាន់លានដុល្លារអាម៉េរិក ដោយកើន 28%។

វៀតណាម គឺជាអ្នកផ្គត់ផ្គង់ទុរេនធំជាងគេទីពីររបស់ទីផ្សារចិន ប៉ុន្តែជាប់លេខមួយស្ដីពីកំណើននៃការនាំចេញទៅកាន់ប្រទេសចិន។ ក្នុង 10 ខែដំបូងនៃឆ្នាំ 2023 បរិមាណទុរេនដែល វៀតណាម បាននាំចេញទៅកាន់ទីផ្សារមួយនេះ គឺជាង 451,600 តោន ដោយកើនជាង 30 ដង និងរកចំណូលបានជិត 1.9 ពាន់លានដុល្លារអាម៉េរិក កើនជាង 31 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

អ្នកផ្គត់ផ្គង់ទុរេនលំដាប់ទីបីសម្រាប់ទីផ្សារចិន គឺ ហ្វ៊ីលីពីន ដោយបាននាំចេញទៅកាន់ទីផ្សារនេះចំនួន 3,333 តោន រកចំណូលបានជិត 12 លានដុល្លារ។

ឆ្លើយតបនឹងសំណួរដែលសួរថា «ហេតុអ្វីទីផ្សារចិនទិញទុរេនពីវៀតណាមច្រើនជាងមុនឆ្ងាយម្ល៉េះ?» លោក ង្វៀន ឌិញទុង អនុប្រធានសមាគមបន្លែផ្លែឈើវៀតណាម បានឱ្យដឹងថា កំណើននេះគឺដោយសារប្រទេសចិន និងវៀតណាម បានចុះកិច្ចព្រមព្រៀងមួយកាលពីខែកក្កដា 2022។

កិច្ចព្រមព្រៀងខាងលើដែលបានជួយឱ្យការនាំចេញទុរេនរបស់វៀតណាម ទៅកាន់ទីផ្សារចិន មានកូតាកាន់តែធំ គ្រាដែលចម្ការទុរេន និងការវេចខ្ចប់ត្រូវបានធ្វើទៅតាមស្ដង់ដានៃទីផ្សារចិន បានរួមចំណែកធ្វើឱ្យបរិមាណនាំចេញមានការកើនឡើងខ្ពស់។

ទន្ទឹមនឹងនេះ កត្តាទឹកដីធំទូលាយ អាចប្រមូលផលទុរេនបានពេញមួយឆ្នាំ ក៏ដូចជាកត្តាព្រំដែនជាប់នឹងប្រទេសចិនជាដើម ក៏ជាមូលហេតុដែលបាន និងកំពុងជួយឱ្យប្រទេសវៀតណាម មានប្រៀបជាងប្រទេសនាំចេញទុរេនដទៃ។

ទុរេនស្រស់ដែលដាក់លក់នៅទីផ្សារប្រទេសចិន មានតម្លៃខ្ពស់ ពោលគឺចាប់ពី 10 ដុល្លារអាម៉េរិកក្នុងមួគីឡូក្រាម។ តម្លៃនេះ ខ្ពស់ជាងឆ្ងាយបើធៀបនឹងប្រហែល 6 ដុល្លារ/គីឡូក្រាម នៅក្នុងទីផ្សារអាស៊ាន៕

December 15, 2023

ក្រុមហ៊ុនវៀតណាមមួយ គ្រោងនឹងវិនិយោគទ្រង់ទ្រាយធំលើវិស័យកសិកម្មនៅកម្ពុជា

កាលពីថ្ងៃទី 12 ធ្នូ 2023 ប្រធានក្រុមប្រឹក្សាភិបាលក្រុមហ៊ុន THACO លោក ត្រឹង បាយឿង បានចូលរួមវេទិកា ជំរុញវិនិយោគ និងពាណិជ្ជកម្មកម្ពុជា – វៀតណាម ឆ្នាំ 2023 ដែលធ្វើឡើងនៅ ហាណូយ ប្រទេសវៀតណាម និងបានទទួលជួបពិភាក្សាការងារជាមួយនឹងសម្ដេចធិបតី ហ៊ុន ម៉ាណែត ដែលបំពេញទស្សនកិច្ចនៅវៀតណាម។

នៅក្នុងជំនួបខាងលើ លោក ត្រឹង បាយឿង បានរាយការណ៍អំពីគម្រោង និងសកម្មភាពវិនិយោគ ផលិត ក្នុងវិស័យកសិកម្មទ្រង់ទ្រាយធំរបស់ក្រុមហ៊ុន THACO នៅ កម្ពុជា។

បន្ទាប់ពីចូលគ្រប់គ្រងក្រុមហ៊ុនចំនួន 6 របស់ HAGL Agrico កាលពីឆ្នាំ 2020 THACO AGRI (ឈ្មោះថ្មី) មានកម្មករក្នុងដៃជាង 17,000 នាក់នៅ កម្ពុជា។ ចាប់ពីឆ្នាំ 2022 ដល់បច្ចុប្បន្ន THACO AGRI បានចាប់ផ្ដើមវិនិយោគសាកល្បងលើការដាំចេក ឈើហូបផ្លែ – ចិញ្ចឹមគោ និងពពែ។

បច្ចុប្បន្ន សកម្មភាពវិនិយោគសាកល្បងរបស់ក្រុមហ៊ុនខាងលើនៅ កម្ពុជា បានទទួលជោគជ័យ និងអាចវិនិយោគទ្រង់ទ្រាយធំ។ ប្រការនេះត្រូវបានបញ្ជាក់ដោយប្រធានក្រុមហ៊ុន THACO AGRI តាមរយៈការស្នើសូមការអនុញ្ញាតពីសម្ដេចធិបតី ហ៊ុន ម៉ាណែត ដើម្បីបង្កើតក្រុមហ៊ុនវិនិយោគកសិកម្មទ្រង់ទ្រាយធំចំនួនពីរនៅក្នុងស្រុកស្នួល ខេត្តក្រចេះ និងស្រុកលំផាត់ ខេត្តរតនគីរី។ គម្រោងនេះអាចនឹងត្រូវបានអនុវត្តចាប់ពីត្រីមាសទីមួយនៃឆ្នាំ 2024។

ប្រធានក្រុមប្រឹក្សាភិបាលក្រុមហ៊ុន THACO លោក ត្រឹង បាយឿង ទទួលជួបពិភាក្សាការងារជាមួយនឹងសម្ដេចធិបតី ហ៊ុន ម៉ាណែត កាលពិថ្ងៃទី 12 ធ្នូ 2023 នៅ ហាណូយ ប្រទេសវៀតណាម

THACO AGRI ក៏គ្រោងនឹងវិនិយោគនៅតំបន់សេដ្ឋកិច្ចក្បែរព្រំដែន គម្រោងផលិតម៉ាស៊ីន ឧស្សាហកម្មជំនួយ ក៏ដូចជាពាណិជ្ជកម្ម និងសេវាកម្មជាដើម។ល។

ក្នុងជំនួបជាមួយថ្នាក់ដឹកនាំក្រុមហ៊ុន THACO AGRI សម្ដេចធិបតី ហ៊ុន ម៉ាណែត បានអបអរសាទរ និងវាយតម្លៃខ្ពស់ចំពោះការវិនិយោគរបស់ THACO AGRI ក្នុងវិស័យកសិកម្មនៅ កម្ពុជា ព្រមទាំងគាំទ្រចំពោះការអនុវត្តគម្រោងវិនិយោគនាពេលខាងមុខ របស់ក្រុមហ៊ុនវៀតណាមមួយនេះផងដែរ៕

December 14, 2023

កម្ពុជា គឺជាអ្នកផ្គត់ផ្គង់គ្រាប់ស្វាយចន្ទីឆៅធំលំដាប់ទីពីររបស់ វៀតណាម

វៀតណាមបាន និងកំពុងនាំចូលគ្រាប់ស្វាយចន្ទីឆៅយ៉ាងច្រើនពីទីផ្សារធំៗចំនួន 5 រួមមាន កូតឌឺវ័រ កម្ពុជា នីហ្សេរីយ៉ា ហ្គាណា និង តង់សានី។

គ្រាប់ស្វាយចន្ទីឆៅដែល កម្ពុជា និង កូតឌឺវ័រ បាននាំចូលទីផ្សារវៀតណាម គ្របដណ្ដើប់ប្រមាណ 57.5% ធៀបនឹងតម្លៃសរុបនៃការនាំចូលគ្រាប់ស្វាយចន្ទីរឆៅរបស់ វៀតណាម នៅក្នុងរយៈពេល 11 ខែដំបូងនៃឆ្នាំ 2023។ ក៏ប៉ុន្តែ ការនាំចូលនេះមានការប្រែប្រួល ដោយសារ វៀតណាម កាត់បន្ថយការនាំចូលទំនិញមួយមុខនេះពី កម្ពុជា និង តង់សានី ហើយងាកទៅបង្កើនការនាំចូលពី កូតឌឺវ័រ នីហ្សេរីយ៉ា និង ហ្គាណា។

ជាក់ស្ដែង បរិមាណគ្រាប់ស្វាយចន្ទីឆៅដែល វៀតណាម នាំចូលពី កូតឌឺវ័រ គឺមានរហូតដល់ 850 ពាន់តោន ដែលមានតម្លៃ 919.3 លានដុល្លារអាម៉េរិក ដោយបរិមាណកើន 86.6% និងតម្លៃសរុបកើន 56.7% បើធៀបនឹង 11 ខែដំបូងនៃឆ្នាំ 2022។

គ្រាប់ស្វាយចន្ទីឆៅដែល វៀតណាម នាំចូលពី កម្ពុជា ក្នុងរយៈពេល 11 ខែដំបូងនៃឆ្នាំនេះ បានថយចុះនៅត្រឹម 613.2 ពាន់តោន ដែលមានតម្លៃ 835.3 លានដុល្លារអាម៉េរិក ពោលគឺ បរិមាណបានថយចុះ 13.8% និងតម្លៃសរុបបានថយចុះ 23.3%។ ទោះជាយ៉ាងនេះក៏ដោយ កម្ពុជា នៅតែជាអ្នកផ្គត់ផ្គង់គ្រាប់ស្វាយចន្ទីឆៅធំជាងគេលំដាប់ទីពីររបស់ វៀតណាម បន្ទាប់ពី កូតឌឺវ័រ។

លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានឱ្យដឹងថា ទីផ្សារនាំចេញគ្រាប់ស្វាយចន្ទីមិនទាន់កែច្នៃធំបំផុតរបស់ កម្ពុជា គឺ វៀតណាម ដោយសារទីផ្សារនេះបានរួមចំណែកជាង 90%។ ចំណែក កម្ពុជា វិញ ក៏ជាអ្នកផ្គត់ផ្គង់គ្រាប់ស្វាយចន្ទីឆៅធំជាងគេបង្អស់ របស់ វៀតណាម ប្រចាំនៅអាស៊ីអាគ្នេយ៍៕

December 13, 2023

Tag: ប្រធាន