Tag: ប្រជាជនកម្ពុជា

រថយន្តផលិតនៅកម្ពុជា នឹងអាចនាំចេញទៅកាន់ទីផ្សារអន្តរជាតិនាពេលអនាគត
ក្រុមហ៊ុន GTV MOTOR បានឱ្យដឹងថា ប្រជាជនកម្ពុជា អាចបើកបររថយន្តដែលមានគុណភាព និងតម្លៃសមរម្យ ហើយក៏ជាម៉ាករថយន្តរបស់កម្ពុជាផ្ទាល់ គ្រាដែលក្រុមហ៊ុននេះបានចាប់ផ្តើមផលិតរថយន្តនៅកម្ពុជា។
GTV MOTOR គឺជាក្រុមហ៊ុនមួយដែលបង្កើតកេរ្តិ៍ឈ្មោះឱ្យកម្ពុជា តាមរយៈការផលិត និងដំឡើងរថយន្តនៅកម្ពុជា។ នេះបើតាមលោកបណ្ឌិត គី សេរីវឌ្ឍន៍ សេដ្ឋវិទូនៃរាជបណ្ឌិត្យសភាកម្ពុជា។ លោកបន្ថែមថា
ក្រុមហ៊ុននេះនឹងបង្កើតការងារដល់ប្រជាពលរដ្ឋកម្ពុជា ជាពិសេសកម្លាំងពលកម្មជំនាញ ដែលចេញពីការបណ្តុះបណ្តាលវិជ្ជាជីវៈ។
អ្នកកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ក៏ដូចអ្នកជំនាញដទៃ យល់ថា ការរួមចំណែករបស់ GTV MOTOR នឹងធ្វើឱ្យទីផ្សាររថយន្តនៅកម្ពុជា មានភាពល្អប្រសើរជាងមុន ព្រោះតែទីផ្សារមានជម្រើសបន្ថែម។
អ្នកកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា
យោងតាមអ្នកឧកញ៉ា លឹម ហេង វិស័យឧស្សាហកម្មដំឡើងរថយន្តក្នុងស្រុក នឹងជួយដល់កំណើនសេដ្ឋកិច្ចកម្ពុជា ដោយសារមិនត្រឹមតែផ្គត់ផ្គង់តម្រូវការក្នុងស្រុកប៉ុណ្ណោះទេ តែអ្នកផលិតរថយន្តក៏អាចនាំចេញផលិតផលនេះតាមកិច្ចព្រមព្រៀងពាណិជ្ជកម្មសេរីទាំងឡាយដែលកម្ពុជាកំពុងអនុវត្តផងដែរ៕
January 10, 2024
រឿង TikToker បន្ថែមទង់ជាតិថៃទៅក្នុងវីដេអូថតនៅអង្គរវត្ត ខាង «វៀតណាមកំពុងមានចំណាត់ការ»
តំណាងមន្ទីរវប្បធម៌ និងកីឡានៃទីក្រុងហូជីមិញ ឱ្យដឹងថា បានក្ដាប់បានព័ត៌មាន និងកំពុងសហការជាមួយនឹងភាគីពាក់ព័ន្ធ ដើម្បីមានចំណាត់ការលើ TikToker វៀតណាម ហឿ ក្វុកអាញ់ (Hua Quoc Anh) ដែលបានបង្ហោះវីដេអូបង្ហាញពីទិដ្ឋភាពអង្គរបស់កម្ពុជា ប៉ុន្តែបន្ថែមរូបភាពស្ដេចថៃ និងទង់ជាតិថៃ។
ការបញ្ជាក់ខាងលើនេះត្រូវបានធ្វើឡើងកាលពីថ្ងៃទី 16 វិច្ឆិកា 2023 ដោយលោក ឡាំ ង៉ូហ្វាំងអាញ់ ប្រធានមន្ទីរវប្បធម៌ និងកីឡា នៃទីក្រុងហូជីមិញ ជាទីដែល TikToker ហឿ ក្វុកអាញ់ រស់នៅ។
ប្រធានមន្ទីររូបនេះឱ្យដឹងថា ក្រោយពីមានរបាយការណ៍ផ្លូវការ មន្ទីរវប្បធម៌ និងកីឡារបស់ទីក្រុងហូជីមិញ នឹងសហការ ក៏ដូចជាមានមិតសមស្របចំពោះបញ្ហាដែលពាក់ព័ន្ធ។
ចំណែកលោក ហ្វាំ ង៉ុក អនុប្រធានមន្ទីរខាងលើក៏បានឱ្យដឹងថា ដោយសារតែការរំលោភបំពានច្បាប់របស់ TikToker វៀតណាម ហឿ ក្វុកអាញ់ កើតឡើងនៅខាងក្រៅប្រទេសវៀតណាម ទើបអាជ្ញាធរវៀតណាមត្រូវការការបញ្ជាក់ឱ្យបានច្បាស់លាស់ មុននឹងមានចំណាត់ការ។
លោក ង៉ូ ឡាំហ្វាងអាញ់ ប្រធានការិយាល័យនៃមន្ទីរវប្បធម៌ និងកីឡាទីក្រុងហូជីមិញ បានឆ្លើយតបអ្នកសារព័ត៌មានអំពីហេតុការណ៍ដែលពាក់ព័ន្ធនឹង TikToker ហឿ ក្វុកអាញ់ (Hua Quoc Anh)
មុននោះ នៅលើទំព័រ TikTok របស់ខ្លួន ហឿ ក្វុកអាញ់ បានបង្ហោះវីដេអូមួយបង្ហាញពីនារីម្នាក់ស្លៀកឈុតពណ៌ផ្កាឈូក កាន់ដំបង ដើរក្នុងបរិវេណប្រាសាទអង្គរវត្តរបស់កម្ពុជា។ វីដេអូនេះបានធ្វើឱ្យមានការរិះគន់យ៉ាងខ្លាំងក្លាពីអ្នកលេងបណ្ដាញសង្គម ពិសេសគឺប្រជាជនកម្ពុជា ព្រោះថា ក្នុងវីដេអូដែលថតទិដ្ឋភាពអង្គរវត្ត បែរជាត្រូវបានបញ្ចូលរូបភាពទង់ជាតិថៃ ក៏ដូចជាស្ដេចថៃ និងសំឡេងនិយាយ «Hello Thailand» ជាបន្តបន្ទាប់។
ក្រោយមក នៅថ្ងៃទី 12 វិច្ឆិកា អាជ្ញាធរជាតិអប្សរា ក៏ប្រកាសថា វីដេអូដែលបាននិយាយខាងលើនេះគឺប៉ះពាល់ដល់វប្បធម៌ និងបេតិកភណ្ឌរបស់កម្ពុជា។
ក្រោយពីត្រូវបានមហាជនរិះគន់ខ្លាំងក្លានៅលើបណ្ដាញសង្គម ជនជាតិវៀតណាម ហឿ ក្វុកអាញ់ ក៏បានបង្ហោះវីដេអូសូមអភ័យទោសកាលពីព្រឹកថ្ងៃទី 14 វិច្ឆិកា។
ជនបង្កភាពហេតុ ហឿ ក្វុកអាញ់ (Hứa Quốc Anh)
បន្ទាប់មក TikToker រូបនេះក៏បានលុបវីដេអូនេះលើ Facebook, TikTok។ ទំព័រ TikTok របស់ជននេះដែលមានអ្នកតាមដានជាង 700,000 នាក់ក៏ត្រូវបានបិទ ក្រោយពីមានបញ្ហានេះ។ ក៏ប៉ុន្តែ ទោះជាយ៉ាងណាក៏ដោយ កំហឹងរបស់មហាជន ពិសេសគឺជនជាតិខ្មែរ នៅតែមិនអាចរសាយ។
នេះមិនមែនជាលើកដំបូងឡើយដែល TikToker ម្នាក់នេះ បង្កឱ្យមានការរិះគន់លើបណ្ដាញសង្គម។ កន្លងមក ជននេះក៏ធ្លាប់បានបញ្ចេញមតិខុសឆ្គងទាក់ទងនឹងរឿងសាសនា វប្បធម៌របស់ជនជាតិមួយចំនួនផងដែរ៕
November 17, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
ចន្ទ្រគ្រាសនៅយប់ថ្ងៃទី 05 ឧសភានេះ នឹងងាយស្រួលគយគន់សម្រាប់កម្ពុជាទាំងមូល
នៅយប់នេះ ដែនដីកម្ពុជាទាំងមូលនឹងស្ថិតក្នុងតំបន់ដែលអាចមើលឃើញទាំងស្រុងនូវបាតុភូតរាហូចាប់ចន្ទ ដែលអូបន្លាយពេលជាងពីរម៉ោង ធ្វើឱ្យព្រះចន្ទប្រែជាងងឹតជាងមុន ប៉ុន្តែមិនមានពណ៌ក្រហមខ្លាំង។
ចន្ទ្រគ្រាសពាក់កណ្ដាលវង់នឹងកើតឡើងនៅវេលាម៉ោង 22 និង 15 នាទីយប់នៃថ្ងៃទី 05 ឧសភា (ម៉ោងនៅកម្ពុជា)។ ប្រជាជនស្ទើរតែទាំងអស់ដែលរស់នៅក្នុងតំបន់នានារបស់ទ្វីបអាស៊ី អឺរ៉ុប អង់តាក់ទិក រុស្ស៊ី អូសេអានី អាហ្វ្រិកខាងកើត និងអាហ្វ្រិកកណ្ដាល សុទ្ធតែអាចគយគន់បាតុភូតនេះ។
អ្នកវិទ្យាសាស្ត្រឱ្យដឹងថា ខុសពីចន្ទ្រគ្រាសទាំងស្រុង ឬមួយចំណិត ចន្ទ្រគ្រាសពាក់កណ្ដាលវង់ ឬពាក់កណ្ដាលងងឹតមិនប្រែពណ៌ជាក្រហមខ្លាំង និងងងឹតនោះទេ តែវាគ្រាន់តែមានពណ៌ក្រហមស្រាល និងងងឹតជាងបន្តិចបើធៀបនឹងចន្ទពេញវង់ធម្មតា។
បាតុភូតរាហូចាប់ចន្ទលើកនេះនឹងមានភាពងាយស្រួលសម្រាប់ការទស្សនារបស់ប្រជាជនកម្ពុជា ព្រោះថា វានឹងកើតឡើងនៅជិតពាក់កណ្ដាលយប់ ពេលដែលព្រះចន្ទរះឡើងខ្ពស់។
បាតុភូតចន្ទ្រគ្រាសលើកនេះនឹងគ្រាន់តែមានពណ៌ក្រហមស្រាល និងងងឹតជាងបន្តិចបើធៀបនឹងចន្ទពេញវង់ធម្មតា
ដូចទៅនឹងប្រភេទនៃបាតុភូតរាហូចាប់ចន្ទដទៃ ចន្ទគ្រាសមួយចំហៀងកើតឡើងដោយសារផែនដីគោចរឆ្លងកាត់តំបន់ចន្លោះរវាងព្រះចន្ទ និងព្រះអាទិត្យ។ ប្រការនេះធ្វើឱ្យពន្លឺដែលព្រះអាទិត្យជះទៅលើព្រះចន្ទត្រូវបាំងបិទដោយផែនដី គ្រាដែលស្រមោលរបស់ផែនដីជះទៅលើព្រះចន្ទ ហើយជាលទ្ធផល ព្រះចន្ទត្រូវងងឹតមួយផ្នែក មួយចំហៀង ឬងងឹតទាំងស្រុងទៅតាមទីតាំងរបស់ផែនដី ព្រះចន្ទ និងព្រះអាទិត្យ៕
May 5, 2023
ទិញរថយន្តក្នុងក្តីស្រមៃដោយមិនចាំបាច់មានប្រាក់កក់ និងបង់រំលស់គ្មានការប្រាក់ដល់ទៅមួយឆ្នាំ
[ភ្នំពេញ – ថ្ងៃទី ០១ ខែឧសភា ឆ្នាំ២០២៣] ផ្នែករថយន្ត Ford នៃ ក្រុមហ៊ុន អ អិម អេ (ខេមបូឌា) ម.ក បានរៀបចំកម្មវិធី ពិធីចុះអនុស្សរណៈយោគយល់គ្នារវាង ក្រុមហ៊ុន អ អិម អេ (ខេមបូឌា) ម.កដែលជាក្រុមហ៊ុននាំចូល និងចែកចាយផ្តាច់មុខរថយន្ត ហ្វដ ប្រចាំប្រទេសកម្ពុជា និងធនាគារ វីង (ខេមបូឌា) ម.ក ដែលជាធនាគារឈានមុខគេនៅកម្ពុជា។
លោក ហាន ប៉េង ក្វាង អគ្គនាយក ធនាគារ វីង បានមានប្រសាសន៍ថា៖ “យើងពិតជាមានសេចក្តីសោមន្សរីករាយ ដែលបានក្លាយជាដៃគូសហការជាមួយ ក្រុមហ៊ុន អ អិម អេ (ខេមបូឌា) ដើម្បីរួមគ្នាផ្តល់ដំណោះស្រាយដ៏មានសារៈសំខាន់មួយសម្រាប់អតិថិជន” ។
“យើងជឿជាក់ថាគ្រប់គ្នាស័ក្កិសមនឹងទទួលបានឱកាសក្លាយជាម្ចាស់រថយន្តក្នុងក្តីស្រមៃរបស់ពួកគេ។ ហើយយើងចង់ធ្វើឲ្យក្តីស្រមៃនោះក្លាយជាការពិត សម្រាប់អតិថិជនមិនថាជាប្រជាជនកម្ពុជា ឬជនជាតិបរទេសកំពុងរស់នៅប្រទេសកម្ពុជា នោះគឺអតិថិជនមិនបារម្មណ៍លើការចំណាយប្រាក់កក់ ហើយថែមទាំងមិនចំណាយបង់ការប្រាក់រហូតដល់ ១២ ខែ”។
លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ សម្រាប់អតិថិជនដែលមានបំណងចង់ក្លាយជាម្ចាស់រថយន្ត ឥឡូវនេះយើងមានការផ្តល់ជូនពិសេសគឺ ការទិញរថយន្តដោយមិនតម្រូវមានប្រាក់កក់ និងការបង់រំលស់ដោយមិនចំណាយការប្រាក់ពេញមួយឆ្នាំពេញសម្រាប់រថយន្តម៉ូដែល Ford Ranger Wildtrak, Everest, EcoSport, Territory ស៊េរីឆ្នាំ ២០២២ ដែលនេះជាលើកទី១ ដែលមានការសហការបែបនេះកើតឡើងរវាង អ អិម អេ (ខេមបូឌា) ជាមួយធនាគារ វីង ហើយនេះគ្រាន់តែជាការចាប់ផ្តើមតែប៉ុណ្ណោះ ៕
ឆ្លៀតក្នុងឱកាសនេះដែរ លោក លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានបន្ថែមថា “ បច្ចុប្បន្នក្រុមហ៊ុន ហ្វដ បានពង្រីកនូវវិសាលភាពនៃគ្រឿងបន្លាស់ និងសេវាកម្មជួសជុលរថយន្តនៅតាមបណ្តាខេត្តផ្សេងៗដូចជា ខេត្តកំពង់ចាម និងខេត្តសៀមរាប ហើយយើងក៏មានយានដ្ឋានដៃគូសហការជាច្រើននៅទូទាំង២៥ខេត្តក្រុងក្នុងប្រទេសកម្ពុជាផងដែរ។ ជាពិសេស ថ្មីៗនេះយើងក៏បានបង្កើតនូវ ការិយាល័យផ្នែកទំនាក់ទំនងអតិថិជន (Call Center) ដើម្បីផ្តល់នូវសេវាកម្មឆាប់រហ័ស និងផ្តល់ភាពងាយស្រួលដល់អតិថិជនក្នុងការសាកសួរព័ត៌មាន ក៏ដូចជាធ្វើការទំនាក់ទំនងដោយផ្ទាល់ជាមួយអ្នកជំនាញរបស់យើង ។ ”
សម្រាប់អតិថិជនដែលចង់សាកសួរព័ត៌មាន ឬមានបំណងចង់ទិញរថយន្ត Ford អាចធ្វើការទំនាក់ទំនងតាមលេខទូរស័ព្ទ 012 333 975 ឬ 077 666 357 ឬ 078 999 883
សម្រាប់លោកអ្នកដែលមានតម្រូវការកម្ចីឥណទានតាមរយៈធនាគារ វីង សូមធ្វើការទំនាក់ទំនងតាមលេខទូរស័ព្ទ 078 989 767/078 989 511 ឬអញ្ជើញមកកាន់សាខាណាមួយដែលនៅជិតលោកអ្នកបំផុត៕

May 1, 2023
ភាសាចិនបានក្លាយជាចំណុចអាទិភាពមួយសម្រាប់ប្រជាជនកម្ពុជាជំនាន់ថ្មី
ការសិក្សាភាសាបរទេសបានក្លាយជាជម្រើសដ៏ពេញនិយមសម្រាប់ប្រជាជនខ្មែរក្នុងសម័យថ្មីនេះ ព្រោះប្រសិនបើមនុស្សម្នាក់ៗមិនចេះភាសាបរទេសដែលជាភាសាសម្រាប់ទំនាក់ទំនងអន្តរជាតិទេ ពួកគេអាចប្រឈមនឹងការបាត់បង់ឱកាសការងារ ឬឱកាសអាជីវកម្មផ្សេងៗជាដើម។
កាលពីមុន ភាសាអង់គ្លេស ជាជម្រើសសំខាន់ដែលប្រជាជនកម្ពុជាជំរុញឱ្យកូនសិក្សា ព្រោះវាជាភាសាសកលដែលមនុស្សជាច្រើនលើពិភពលោកប្រើប្រាស់ តែមកដល់បច្ចុប្បន្ននេះ បន្ទាប់ពីភាសាអង់គ្លេសត្រូវបានគេប្រើប្រាស់ទូលំទូលាយ ឬស្ទើរតែចេះគ្រប់គ្នាទៅហើយនោះ ភាសាចិនបានវិវឌ្ឍខ្លួនបន្តិចម្តងៗ ក្លាយជាភាសាអាទិភាពមួយដែលប្រជាជនខ្មែរចាប់អារម្មណ៍។
លោក លន់ ភារិន នាយកសិក្សាធិការនៃក្រុមហ៊ុន វេសឡាញ អេឌ្យូខេសិនគ្រុប បានលើកឡើងថា ការឱ្យកូនសិក្សាភាសាចិន មិនមែនជារឿងថ្មីនោះទេសម្រាប់ប្រជាជនខ្មែរយើង ព្រោះប្រជាជនយើងបានជ្រើសរើសសិក្សាភាសានេះជាយូរណាស់មកហើយ តែអ្វីដែលជាចំណុចគួរឱ្យកត់សម្គាល់នោះ គឺកំណើននៃការសិក្សាភាសាចិននាពេលបច្ចុប្បន្នមានការកើនឡើង។
បើមើលតាមចំនួននៃការចុះឈ្មោះសិក្សារបស់សិស្សនៅសាលាវេសឡាញន៍ យើងឃើញថា កាលពីសាលាបើកបង្រៀនភាសាចិនដំបូងៗកាលពី4ឆ្នាំមុន មានអ្នកសិក្សាតែជាង 100នាក់ប៉ុណ្ណោះ តែបច្ចុប្បន្ននេះ មានសិស្សចុះឈ្មោះសិក្សារហូតដល់ប្រមាណ 500នាក់។ ចំណុចនេះបង្ហាញឱ្យឃើញថា អាណាព្យាបាលកំពុងចាប់អារម្មណ៍ឱ្យកូនសិក្សាភាសាចិនមានចំនួនកាន់តែច្រើនឡើងពី 1ឆ្នាំទៅ 1ឆ្នាំ។
លោក លន់ ភារិន បាននិយាយថា៖ «មូលហេតុដែលនាំឱ្យមានការកើនឡើងនូវចំនួនអ្នកសិក្សាភាសាចិន ដោយសារតែបច្ចុប្បន្ននេះយើងមើលឃើញថា រាជរដ្ឋាភិបាលកម្ពុជា មានទំនាក់ទំនងល្អជាមួយនឹងរដ្ឋាភិបាលចិន ដែលធ្វើឱ្យទំហំនៃការវិនិយោគ ក៏ដូចជាការរកស៊ីជាមួយគ្នាមានសកម្មភាពកាន់តែច្រើនឡើង។
ហេតុនេះហើយ ទើបអាណាព្យាបាលកាន់តែច្រើនបានមើលឃើញថា ការចេះភាសាចិនជាឱកាសល្អមួយសម្រាប់កូនៗរបស់គាត់ ដើម្បីទទួលបានឱកាសការងារល្អ ឬភ្ជាប់ទំនាក់ទំនងអាជីវកម្មបានកាន់តែងាយស្រួល»។
លោកភារិន បានបន្ថែមទៀតថា បច្ចុប្បន្ននេះ ភាសាចិនត្រូវបានគេប្រើប្រាស់ច្រើនឡើងៗនៅលើពិភពលោកសម្រាប់ការទំនាក់ទំនងផ្នែកជំនួញ ហេតុនេះប្រសិនបើប្រជាជនយើងចេះប្រើប្រាស់ភាសាចិនបានល្អ បន្ថែមពីលើភាពច្បាស់លាស់នៃភាសាជាតិរបស់យើងផងនោះ នោះពួកគាត់នឹងអាចទទួលបានឱកាសការងារល្អនៅថ្ងៃអនាគត។
ជាក់ស្តែងយើងឃើញថា ទំហំនៃការបណ្តាក់ទុនវិនិយោគពីចិនមកកាន់កម្ពុជានាពេលបច្ចុប្បន្ន មានការកើនឡើងកាន់តែធំ ហេតុនេះបណ្តាក្រុមហ៊ុនសហគ្រាស និងចង្វាក់ផលិតកម្មជាច្រើននឹងត្រូវការធនធានមនុស្សដែលមានសមត្ថភាពប្រើប្រាស់ភាសាចិនបាន។
ប្រសិនបើយើងចេះប្រើប្រាស់ភាសាចិន យើងនឹងអាចស្ថិតក្នុងបញ្ជីបុគ្គលអាទិភាពក្នុងការស្រូបបានឱកាសការងារទាំងអស់នោះ។ បន្ថែមពីលើនេះ សម្រាប់ការធ្វើអាជីវកម្មក៏មិនខុសពីការធ្វើការងារប៉ុន្មានដែរ។
នៅពេលដែលយើងចេះប្រើប្រាស់ភាសាចិនបានល្អ យើងនឹងមានភាពងាយស្រួលក្នុងការទំនាក់ទំនង ឬរកស៊ីជាមួយនឹងអ្នកវិនិយោគចិន ដែលធ្វើឱ្យអាជីវកម្មរបស់យើងកាន់តែអភិវឌ្ឍបានយ៉ាងឆាប់រហ័ស។
បច្ចុប្បន្ននេះយើងឃើញហើយថា អ្នករកស៊ីចិនបានមកបោះទុនយ៉ាងច្រើនលើវិស័យអចលនទ្រព្យ និងបានបើកចំហរឱកាសជាច្រើនសម្រាប់ភ្ជាប់ទំនាក់ទំនងដែលប្រជាជនយើងអាចទាញផលចំណេញបាន។
ជាយោបល់ចំពោះសិស្សានុសិស្ស និងអាណាព្យាបាល អ្នកអប់រំខាងលើបានលើកឡើងថា អាណាព្យាបាលអាចពិចារណាក្នុងការកំណត់ភាសាចិនជាភាសាបន្ថែមមួយ ដែលអាចឱ្យកូនៗជ្រើសរើសសិក្សាបាន បន្ថែមពីលើភាសាអង់គ្លេស។
កាលណាពួកគាត់បានយល់ដឹងពីភាសាកាន់តែច្រើន ជាពិសេសភាសាដែលមានសក្តានុពលសម្រាប់ទំនាក់ទំនងនានា ពួកគាត់នឹងអាចបន្តស្វែងយល់ពីអ្វីដែលជាប្រភពចំណេះដឹងបន្ថែម និងអាចបំពេញភាពខ្វះខាតមួយចំនួនឱ្យក្លាយជាមនុស្សដែលមានបញ្ញាកាន់តែខ្លាំង ក្នុងការចូលរួមចំណែកអភិវឌ្ឍន៍សង្គម
ឱ្យកាន់តែរីកចម្រើននាថ្ងៃអនាគត៕
January 21, 2020
ប្រជាជនកម្ពុជា នឹងមានចំណូលមធ្យមកម្រិតខ្ពស់នៅត្រឹមឆ្នាំ2030
ភ្នំពេញ៖ ដោយឈរលើកំណើនសេដ្ឋកិច្ចរឹងមាំថេរ 7% ជារៀងរាល់ឆ្នាំក្នុងរយៈពេលជិត2ទសវត្សរ៍ចុងក្រោយនេះ បានធ្វើឱ្យកម្ពុជាចេញផុតពីប្រទេសដែលមានចំណូលទាបទៅជាប្រទេសដែលមានចំណូលមធ្យមកម្រិតទាបកាលពីឆ្នាំ2016 កន្លងទៅ។
តាមរបាយការណ៍របស់វិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវរបស់ក្រសួងពាណិជ្ជកម្មបានឱ្យដឹងថា ប្រសិនបើគ្មានឧបសគ្គ ឬមិនមានវិបត្តិសេដ្ឋកិច្ចទេនោះ កម្ពុជានឹងក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅត្រឹមឆ្នាំ2030 ហើយចាប់តាំងពីការផ្លាស់ប្ដូរប្រព័ន្ធទីផ្សារមកកាន់សេដ្ឋកិច្ចទីផ្សារសេរីក្នុងឆ្នាំ1998មក កម្ពុជាបានធ្វើការកែទម្រង់ស៊ីជម្រៅ និងបានអនុវត្តផែនការអភិវឌ្ឍន៍យុទ្ធសាស្រ្តជាតិប្រកបដោយប្រសិទ្ធភាពរហូតសម្រេចបានកំណើនសេដ្ឋកិច្ចដ៏ខ្លាំងក្លាគិតជាមធ្យម 7% រៀងរាល់ឆ្នាំចាប់ពីឆ្នាំ2000ដល់ឆ្នាំ2017នេះ។
ជាមួយនឹងកំណើនរឹងមាំក្នុងឆ្នាំ2017នេះ ផលិតផលសរុបក្នុងស្រុក(ផ.ស.ស) បច្ចុប្បន្នត្រូវបានប៉ាន់ប្រមាណថា នឹងកើនឡើងដល់ 22.2 ប៊ីលានដុល្លារអាមេរិកដែលធ្វើឱ្យផ.ស.ស សម្រាប់មនុស្សម្នាក់អាចនឹងកើនចំណូលឡើងដល់ 1,434 ដុល្លារអាមេរិកក្នុង1ឆ្នាំ។
លើសពីនេះកម្ពុជាអាចរក្សាបាននូវអតិផរណាដែលស្ថិតក្នុងកម្រិតទាប និងអាចគ្រប់គ្រងបាន ដោយអតិផរណាជាមធ្យមប្រចាំឆ្នាំត្រូវបានប៉ាន់ប្រមាណថា នឹងមានអត្រា 3.8% ក្នុងឆ្នាំ 2017 កើនពី 3.0% ក្នុងឆ្នាំ2016 ដោយសារនិន្នាការកើនឡើងនៃថ្លៃប្រេងក្នុងទីផ្សារអន្តរជាតិ និងតម្លៃម្ហូបអាហារក្នុងស្រុក។
យោងតាមរបាយការណ៍របស់ធនាគារអភិវឌ្ឍន៍អាស៊ី(ADB)ឱ្យដឹងថា នៅក្នុងប្រទេសកម្ពុជាសមាមាត្រនៃប្រជាជនដែលមានការងារធ្វើ រកចំណូលបានក្រោម 1.90 ដុល្លារក្នុងមួយថ្ងៃស្មើនឹង33.6% ហើយប្រជាជនដែលរស់នៅក្រោមបន្ទាត់ក្រីក្រមានចំនួន 14%៕
July 21, 2017