ប្រកួត - La Reine Media

ទិដ្ឋភាពស្ទើរតែមិនធ្លាប់មាននៅកម្ពុជា ទាក់ទិននឹងការគាំទ្រវិស័យបាល់ទាត់

មនុស្សរាប់ពាន់នាក់ប្រមូលផ្ដុំគ្នានៅទីតាំងចែកសំបុត្រចូលទស្សនាការប្រកួតបាល់ទាត់របស់ក្រុមជម្រើសជាតិបុរស និងនារីកម្ពុជា នៅស៊ីហ្គេមលើកទី 32។

បើទោះជាថ្ងៃក្ដៅខ្លាំង មនុស្សរាប់ពាន់នាក់ដែលជាអ្នកគាំទ្ររបស់កម្ពុជា នៅតែប្រមូលផ្ដុំគ្នាលើផ្លូវតាំងពីព្រឹកព្រលឹម ថ្ងៃទី 06 ឧសភា 2023 ដើម្បីរង់ចាំទទួលសំបុត្រដោយមិនគិតថ្លៃពីសហព័ន្ធបាល់ទាត់កម្ពុជា (FFC) សម្រាប់ការចូលទស្សនាការប្រកួតបាល់ទាត់របស់ក្រុម U-22 និងក្រុមនារីរបស់កម្ពុជានាពេលខាងមុខ។

ទិដ្ឋភាពមនុស្សរាប់ពាននាក់ប្រជ្រៀតគ្នានេះ ធ្វើឱ្យមនុស្សមួយចំនួនមានការព្រួយបារម្ភចំពោះសុវត្ថិភាព សុខភាពរបស់បងប្អូនកូនចៅដែលទៅកាន់កន្លែងចែកសំបុត្រ ព្រោះថា មនុស្សមានចំនួនប្រើន ខណៈកម្ដៅថ្ងៃក៏កាន់តែក្ដៅ។

ទោះជាយ៉ាងណាក៏ដោយ សមត្ថកិច្ចក៏បានបង្ហាញវត្តមាននៅខាងមុខកន្លែងចែកសំបុត្រ និងបានរៀបចំសណ្ដាប់ធ្នាប់ដើម្បីបង្ការបញ្ហាណាមួយកើតឡើងជាយថាហេតុ។

នៅស៊ីហ្គេមលើកទី 32 គិតត្រឹមម៉ោង 12 ថ្ងៃត្រង់ ថ្ងៃទី 06 ខែឧសភា ឆ្នាំ 2023 នេះ ម្ចាស់ផ្ទះកម្ពុជាដណ្ដើមបានមេដាយមាសចំនួន 6 គ្រឿង ឈរលើកំពូលតារាងចំណាត់ថ្នាក់ ខណៈដែលមេដាយសរុប កម្ពុជារកបាន 12 គ្រឿង។

May 6, 2023

អត្តពលិកកម្ពុជា «ហោះ» ទៅលើអាកាស អុជព្រះអគ្គិជ័យស៊ីហ្គេមលើកទី 32 បញ្ជាក់ថា ព្រឹត្តិការណ៍កីឡាចាប់ផ្ដើមជាផ្លូវការ

ទិដ្ឋភាព «ហោះឡើង» ទៅអុជព្រះអគ្គិជ័យកីឡាស៊ីហ្គេម របស់កីឡាការិនីតៃក្វាន់ដូ ស៊ន សៀវម៉ី បានបិទបញ្ចប់ពិធីសម្ពោធបើកព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 កាលពីយប់ថ្ងៃទី 05 ឧសភា នៅពហុកីឡដ្ឋានជាតិមរតកតេជោ។

ប៉ុន្មានសប្ដាហ៍មុននោះ ព្រះអគ្គិជ័យកីឡា (ភ្លើងគប់) ស៊ីហ្គេម ត្រូវបានយកអណ្ដាតភ្លើងពីពន្លឺព្រះអាទិត្យនៅប្រាសាទអង្គរវត្ត។ នៅឯទីលានបាល់ទាត់ក្នុងពហុកីឡដ្ឋានជាតិមរតកតេជោ ពេលទទួលបានព្រះអគ្គិជ័យកីឡាពីប្រមុខរាជរដ្ឋាភិបាលកម្ពុជា កំពូលកីឡាការិនីជូជិតស៊ូ (Jujutsu) របស់ កម្ពុជា កញ្ញា ខាន់ ជេសា (Jessa Khan) ក៏កាន់រត់ចុះទៅលើឆាក ហើយប្រគល់ជូនជើងឯកកីឡាការិនីប៉េតង់ពិភពលោក កែ ឡេង។ បន្ទាប់ពីបានឆ្លងកាត់ដៃរបស់អត្តពលិកឆ្នើមជាច្រើនរូបរបស់កម្ពុជា ព្រះអគ្គិជ័យកីឡាក៏បានទៅដល់ដៃ សន សៀវម៉ី ដើម្បីឱ្យកំពូលកីឡាការិនីតៃក្វាន់ដូរូបនេះ ធ្វើសកម្មភាពចុងក្រោយនៃការអុជព្រះអគ្គិជ័យកីឡា។

សន សៀវម៉ី អាយុ 27 ឆ្នាំ មានកម្ពស់ 1.83 ម៉ែត្រ គឺជានិមិត្តរូបនៃជោគជ័យរបស់វិស័យកីឡាកម្ពុជា។ សៀវម៉ី ធ្លាប់ដណ្ដើមបានមេដាយមាសបីគ្រឿងនៅស៊ីហ្គេមឆ្នាំ 2013, 2017, 2019 ហើយក៏ជាអត្តពលិកកម្ពុជាដំបូងគេក្នុងប្រវត្តិសាស្ត្រដែលដណ្ដើមបានមេដាយមាសនៅព្រឹត្តិការណ៍កីឡាអាស៊ី (ASIAD) លើកទី 17 នៅ Incheon ឆ្នាំ 2014។

នៅក្នុងឈុតអុជព្រះអគ្គិជ័យ ខ្សែកាបបានជួយឱ្យ សៀវម៉ី ដែលមានគប់នៅនឹងដៃ «ហោះឡើង» លើអាកាស ទៅក្បែរទីតាំងអេក្រង់ hologram ដែលបន្ទាប់មកបញ្ចាំងទស្សនីយភាពដុំភ្លើងដ៏អស្ចារ្យ មុនពេលនាគទេពបង្ហាញខ្លួន និងលេបយក ហើយព្រួសបាល់ភ្លើងសំដៅគប់ស៊ីហ្គេម។ អណ្ដាតភ្លើងស៊ីហ្គេមក៏ឆេះឡើងនៅលើវិមានអគ្គិជ័យកីឡារបស់ពហុកីឡដ្ឋានមរតកតេជោ បញ្ជាក់ថា ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 បានចាប់ផ្ដើមជាផ្លូវការ។

ឈុតឆាកអុជព្រះអគ្គិជ័យស៊ីហ្គេមនេះក៏បានបិទបញ្ចប់ពិធីសម្ពោធបើកព្រឹត្តិការណ៍ស៊ីហ្គេមលើកទី 32 ដែលធ្វើឡើងរយៈពេល 150 នាទី កាលពីយប់ថ្ងៃទី 05 ឧសភា 2023 ផងដែរ៕

កីឡាការិនីតៃក្វាន់ដូ ស៊ន សៀវម៉ី «ហោះឡើង»

អណ្ដាតភ្លើងស៊ីហ្គេមក៏ឆេះឡើងនៅលើវិមានអគ្គិជ័យកីឡារបស់ពហុកីឡដ្ឋានមរតកតេជោ

មហាទស្សនីយភាពនៅមុនពិធីអុជព្រះអគ្គិជ័យកីឡា ៖

May 6, 2023

U-22 បួនក្រុមនៅស៊ីហ្គេមកម្ពុជា «ទាត់បាល់ចូលទីខ្លួនឯងក្នុងថ្ងៃតែមួយ» តើជាកំហុសរបស់នរណា?

ក្នុងពីរប្រកួតនៅពូល B ដែលបានធ្វើឡើងកាលពីល្ងាចថ្ងៃទី 04 ឧសភា នៅឯទីលានបាល់ទាត់ព្រីនស៍ បានកើតមានហេតុការណ៍កីឡាករទាត់បាល់ចូលទីខ្លួនឯងដល់ទៅបួនលើក ដែលនេះគឺជាកំណត់ត្រាមួយមិនធ្លាប់កើតឡើងនៅស៊ីហ្គេម នាំឱ្យមានការសង្ស័យថា ផ្ទៃទីលានដែលទើបតែត្រូវបានធ្វើឱ្យប្រសើរឡើងនេះគឺជាដើមហេតុ?

គេហទំព័រព័ត៌មានកីឡាមួយរបស់វៀតណាម បានសរសេរថា «បើទោះទើបតែត្រូវបានកែលំអ លើកកម្ពស់គុណភាព ប៉ុន្តែផ្ទៃស្មៅលើទីលានបាល់ទាត់ព្រីនស៍លែងនៅល្អដូចការប្រកួតបើកឆាក។ នៅក្នុងការប្រកួតជើងទីពីរ ទស្សនិកជនបានទស្សនាទិដ្ឋភាពកីឡាករយកជើងលុបក្រហូងដីលើទីលានប្រកួត។

ពិសេសនៅត្រង់ចំណុចដែលត្រូវកីឡាករជាន់ច្រើនជាងគេ ក្នុងនោះមានចំណុចខាងមុខអ្នកចាំទីជាដើម គុណភាពផ្ទៃដី និងស្មៅត្រូវធ្លាក់ចុះយ៉ាងឆាប់រហ័ស។

Ilhan Noor ខ្សែការពាររបស់ U-22 សង្ហបុរី «ក្បត់ទីខ្លួនឯង»

សារព័ត៌មានវៀតណាមមួយនេះបានសរសេរការពារកីឡាកររបស់ខ្លួនដែលបានទាត់បាល់ចូលទីខ្លួនឯងថា «ពិតជាពិបាកជឿ កីឡាករដែលស្ទាត់ជំនាញ និងធ្លាប់ប្រកួតនៅស៊ីហ្គេមពីរលើកដូចខ្សែបម្រើ Vu Tien Long បែរជាទាត់បាល់អន់ដូច្នេះនៅខាងមុខតំបន់គ្រោះថ្នាក់ ក្នុងគ្រាដែលមិនមានសម្ពាធខ្លាំង»។

គេហទំព័រកីឡានេះបានសរសេរទៀតថា «គេអាចមើលឃើញច្បាស់បំផុតគឺការ «ក្បត់ទីខ្លួនឯង» របស់ Ilhan Noor។ ខ្សែការពាររបស់ U-22 សង្ហបុរីរូបនេះទំនងជាចំពប់ជើង ធ្វើឱ្យសកម្មភាពកាត់ចង្វាក់បាល់ត្រូវបាត់បង់ម្ចាស់ការ»។

23 ក្រុមម៉ាឡេស៊ី បែរជាត្រូវចាញ់មួយគ្រាប់វិញ បន្ទាប់ពីខ្សែការពារទាត់ចូលទីខ្លួនឯង

ប្រការដ៏ស្ទើរតែមិនគួរឱ្យជឿដូចខាងលើបន្តកើតឡើងនៅក្នុងការប្រកួតរវាង U-22 ឡាវ និង U-22 ម៉ាឡេស៊ី។ ថ្វីបើរកបានមួយគ្រាប់ដំបូងគេនៅនាទីទីបួន ប៉ុន្តែដល់នាទីទី 23 ក្រុមម៉ាឡេស៊ី បែរជាត្រូវចាញ់មួយគ្រាប់វិញ បន្ទាប់ពីខ្សែការពារទាត់ចូលទីខ្លួនឯង។ ប៉ុន្មាននាទីក្រោយមក ដល់វេន U-22 ឡាវ ទាត់បាល់ចូលទីខ្លួនឯងវិញម្ដង នៅពេលខ្សែបម្រើ Najmudin របស់ម៉ាឡេស៊ី ប្លោងបាល់ចូលក្បែរតំបន់គ្រោះថ្នាក់។

យោងតាមសារព័ត៌មានខាងលើ ផ្ទៃរបស់វាលស្មៅនៅទីលានបាល់ទាត់ព្រីនស៍ ត្រូវខូចខាតច្រើនក្រោយពីមានការប្រកួតជាបន្តបន្ទាប់ ហើយគេអាចមើលឃើញដោយផ្នែកទទេ។ នេះអាចជាដើមហេតុដែលធ្វើឱ្យកីឡាករទាត់បាល់មិនបានល្អ នាំឱ្យមានហេតុការណ៍ទាត់ចូលទីខ្លួនឯងច្រើនដងមិនធ្លាប់មានពីមុនមកដូច្នេះ៕

May 5, 2023

Ford ជិតបង្ហាញរថយន្តអគ្គិសនីប្រភេទ SUV 7 កៅអី

អគ្គនាយកប្រតិបត្តិរបស់ Ford លោក Jim Farley ថ្មីៗនេះបានឱ្យដឹងថា ក្រុមហ៊ុននេះមានគម្រោងផលិតរថយន្ត SUV អគ្គិសនីដែលមានកៅអីបីជួរ និងអង្គុយបាន 7 នាក់ ដែលនេះបង្ហាញថា Ford កំពុងតែពង្រឹងការប្រកួតប្រជែងជាមួយ Tesla និងបណ្ដាក្រុមហ៊ុនផលិតរថយន្តអគ្គិសនីលើពិភពលោក។

នៅពេល Farley ឡើងកាន់អំណាចនៅ Ford ក្រុមហ៊ុននេះក៏បានបញ្ចេញរថយន្តប្រភេទ crossover Mustang ដើរដោយថាមពលអគ្គិសនី និង F-150 Lightning ដែលជារថយន្តភីកអាប់អគ្គិសនីដំបូងរបស់ Ford។

យោងតាមលោក Farley ក្រុមហ៊ុន Ford ត្រូវតែផ្ដោតទៅលើប្រភេទរថយន្តអគ្គិសនីដែលមានកៅអីច្រើនជាងពីរជួរ ព្រោះយល់ថា រថយន្តអគ្គិសនីកៅអីពីរជួរមានច្រើនណាស់ហើយនៅក្នុងទីផ្សារ។ Ford គណនាឃើញថា នឹងមានរថយន្ត SUV អគ្គិសនីដែលមានកៅអីពីរជួរចំនួន 45 ម៉ូដែលក្នុងទីផ្សារនៅឆ្នាំ 2025។

ការសម្រេចចិត្តខាងលើអាចនឹងធ្វើឱ្យ Ford ខាត យ៉ាងហោចណាស់ក៏នៅក្នុងដំណាក់កាលដំបូង។ ប៉ុន្តែ ចុងក្រោយ Ford នឹងចំណេញ។ លោក Farley និយាយថា រថយន្តអគ្គិសនីរបស់ Ford នឹងចំណេញ 8% នៅឆ្នាំ 2026។

May 5, 2023

អត្តពលិកហែលទឹកកម្ពុជាឈ្នះមេដាយមាសនៅស៊ីហ្គេមនឹងទទួលបានមួយម៉ឺនដុល្លារថែមពីលើប្រាក់ឧបត្ថម្ភ

ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជា ប្រធានសហព័ន្ធខ្មែរកីឡាហែលទឹក បានប្រកាសផ្តល់ប្រាក់លើកទឹកចិត្តចំនួនមួយម៉ឺនដុល្លារដល់អត្តពលិកទាំងឡាយណាដែលឈ្នះមេដាយមាសក្នុងព្រឹត្តិការណ៍ស៊ីហ្គេម បន្ថែមលើថវិកាដែលឧបត្តម្ភដោយរាជរដ្ឋាភិបាល។

ក្នុងពិធីជួបសំណេះសំណាលជាមួយគ្រូបង្វឹក កីឡាករ កីឡាការិនី ចំនួន 49 រូប កាលពីថ្ងៃទី 04 ឧសភា នាទីស្តីការក្រសួងសាធារណការនិងដឹកជញ្ជូន ប្រធានសហព័ន្ធខ្មែរកីឡាហែលទឹក បានឧបត្ថម្ភដល់កីឡាករ កីឡាការិនី និងគ្រូបង្វឹកវិញ្ញាសាកីឡាហែលទឹក ដែលនឹងចូលរួមប្រកួតក្នុងព្រឹត្តិការណ៍ ស៊ីហ្គេមលើកទី 32 ក្នុងម្នាក់ៗ 200 ដុល្លារអាមេរិក បន្ថែមពីលើទឹកប្រាក់ដែលឧបត្ថម្ភចំនួន 500 ដុល្លាររបស់ប្រមុខរាជរដ្ឋាភិបាលកម្ពុជា។ ជាពិសេស ចំពោះអត្តពលិកដែលដណ្តើមបានមេដាយមាស នឹងទទួលបានរង្វាន់លើកទឹកចិត្តមួយម៉ឺនដុល្លារបន្ថែមទៀត។

ឯកឧត្តម ទេសរដ្ឋមន្ត្រី និងជាប្រធានសហព័ន្ធ បានថ្លែងកោតសរសើរ និងអរគុណដល់កីឡាករ កីឡាការិនី និងគ្រូបង្វឹកគ្រប់រូប ដែលបានចំណាយទាំងកម្លាំងកាយចិត្ត និងពេលវេលា ក្នុងការហ្វឹកហាត់តាំងពីដើមរហូតមកដល់ការប្រកួតនាពេលនេះ។

ប្រាក់រង្វាន់លើកទឹកចិត្ដរបស់ រាជរដ្ឋាភិបាលកម្ពុជា សម្រាប់ជ័យលាភីមេដាយអត្តពលិកកម្ពុជា នៅក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមលើកទី 32 រួមមាន អត្តពលិកដណ្ដើមបានមេដាយមាសនឹងទទួលបាន 40 លានរៀល មេដាយប្រាក់នឹងទទួលបាន 30 លានរៀល និងមេដាយសំរឹទ្ធនឹងទទួលបាន 16 លានរៀល៕

May 5, 2023

ក្ដៅ! ក្រុមបាល់ទាត់ដំបូងគេបង្អស់ដែលត្រូវជម្រុះនៅស៊ីហ្គេមលើកទី 32

ក្រុមបាល់ទាត់មួយក្រុមត្រូវហាលអាវត្រឹមវគ្គចែកពូលនៅស៊ីហ្គេមលើកទី 32 បន្ទាប់ពីទទួលបានលទ្ធផលមិនល្អនៅក្នុងបីប្រកួតដំបូងរបស់ខ្លួន។

វិញ្ញាសាបាល់ទាត់បុរសនៅស៊ីហ្គេមលើកនេះ បានឆ្លងកាត់ជាងពាក់កណ្ដាលផ្លូវរបស់វគ្គចែកពូល។ ក៏ប៉ុន្តែ ក្នុងដំណាក់កាលនេះមិនទាន់មានក្រុមណាមួយដែលប្រាកដថាដណ្ដើមបានសំបុត្រឡើងទៅកាន់វគ្គពាក់កណ្ដាលផ្ដាច់ព្រ័ត្រនៅឡើយ។ នៅពូល A បណ្ដាក្រុមបាល់ទាត់បានបញ្ចប់ការប្រកួតជើងទីបី ហើយដំណាក់កាលក្ដុកក្ដួលក៏បានកើតឡើង។

នៅមុនការប្រកួត ថ្វីបើជាក្រុមដែលត្រូវបានវាយតម្លៃថាល្អជាងឆ្ងាយធៀបនឹង U-22 ទីម័រខាងកើត ប៉ុន្តែ U-22 ហ្វ៊ីលីពីន បែរជាទទួលបរាជ័យយ៉ាងធ្ងន់ធ្ងរទៅវិញ។ ការប្រកួតចាញ់ U-22 ទីម័រខាងកើតក្នុងលទ្ធផល 0-3 ធ្វើឱ្យ U-22 ហ្វ៊ីលីពីនធ្លាក់ទៅក្នុងបាតតារាងនៅពូល A ខណៈដណ្ដើមបានតែ 1 ពិន្ទុគត់ពីលទ្ធផល 1-1 នៃការប្រកួតជាមួយ U-22 កម្ពុជា។

នៅពេលមានតែ 1 ពិន្ទុក្រោយការប្រកួតបីជើងបែបនេះ U-22 ហ្វ៊ីលីពីនប្រាកដជានឹងត្រូវហាលអាវត្រឹមនេះនៅស៊ីហ្គេម។ 1 ពិន្ទុរបស់ U-22 ហ្វ៊ីលីពីន ត្រូវស្ថិតនៅក្រោមក្រុមនាំមុខគេក្នុងពូល A គឺ U-22 ឥណ្ឌូណេស៊ី (5 ពិន្ទុ) និងក្រុមលំដាប់ទីពីរ U-22 កម្ពុជា (4 ពិន្ទុ)។ ប៉ុន្តែ គ្រាដែល U-22 ឥណ្ឌូណេ និង U-22 កម្ពុជា នៅសល់ពីរប្រកួតទៀត U-22 ហ្វ៊ីលីពីន នៅសល់តែមួយប្រកួតប៉ុណ្ណោះ។ ការប្រកួតចុងក្រោយរបស់ U-22 ហ្វ៊ីលីពីន នឹងត្រូវប៉ះ U-22 មីយ៉ាន់ម៉ា នៅថ្ងៃទី 10 ឧសភា។

U-22 ហ្វ៊ីលីពីនធ្លាក់ទៅក្នុងបាតតារាងនៅពូល A ខណៈដណ្ដើមបានតែ 1 ពិន្ទុគត់នៅក្នុងការប្រកួតជាមួយ U-22 កម្ពុជា ដែលមានលទ្ធផល 1-1

ចំណែក U-22 កម្ពុជា និង U-22 មីយ៉ាន់ម៉ា វិញ នឹងត្រូវប៉ះគ្នាមួយប្រកួតទៀត នៅថ្ងៃទី 07 ឧសភា។ ក្នុងករណីលទ្ធផលស្មើគ្នា U-22 កម្ពុជានឹងមាន 5 ពិន្ទុ ហើយប្រាកដជាឈរលើ U-22 ហ្វ៊ីលីពីន។ រីឯ U-22 មីយ៉ាន់ម៉ា ដែលបច្ចុប្បន្នមាន 3 ពិន្ទុដែរនោះ បើសិនជាឈ្នះម្ចាស់ផ្ទះកម្ពុជា ក្រុមនេះនឹងមាន 6 ពិន្ទុ (មិនទាន់គិតទាំងការប្រកួតជាមួយ U-22 ហ្វ៊ីលីពីន)។

ដូច្នេះ ស្ថិតក្នុងស្ថានភាពបច្ចុប្បន្ន U-22 ហ្វ៊ីលីពីន ត្រូវបានជម្រុះនៅស៊ីហ្គេមលើកទី 32 ត្រឹមនេះទៅហើយ គ្រាន់តែមិនទាន់ត្រូវបានប្រកាសជាផ្លូវការ។

ដោយឡែកនៅក្នុងពូល B វិញ U-22 ឡាវ និង U-22 សិង្ហបុរី ក៏ជួបការលំបាកច្រើន។ ក្រុមទាំងពីរនេះនៅតែមិនទាន់មាន 1 ពិន្ទុ ក្រោយពីរប្រកួតដំបូង។ ការប្រជែងដណ្ដើមសំបុត្រចំនួនពីរដើម្បីបន្តដំណើររបស់ក្រុមនៅពូល B ត្រូវបានព្យាករថានឹងកើតឡើងយ៉ាងកកើតទីលានប្រកួត រវាងបីក្រុម រួមមាន U-22 ថៃ, U-22 វៀតណាម និង U-22 ម៉ាឡេស៊ី៕

May 5, 2023

ថ្ងៃទី 05 ឧសភានេះ កម្ពុជាសម្ពោធបើកព្រឹត្តិការណ៍ស៊ីហ្គេមលើកទី 32 ជាផ្លូវការ

ពិធីសម្ពោធបើកព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ជាផ្លូវការនេះ នឹងត្រូវធ្វើឡើងនាវេលាម៉ោង 19 នៅឯពហុកីឡដ្ឋានជាតិមរតកតេជោ ដែលស្ថិតក្នុងរាជធានីភ្នំពេញ។

មកដល់បច្ចុប្បន្ន ម្ចាស់ផ្ទះកម្ពុជានៅតែមិនបញ្ចេញព័ត៌មានលំអិតអំពីកម្មវិធី និងការសំដែងនានានៅក្នុងពិធីសម្ពោធព្រឹត្តិការណ៍ស៊ីហ្គេមលើកទី 32 ក្រៅតែពីពេលវេលា ទីតាំង និងបណ្ដាមន្ត្រីជាន់ខ្ពស់ដែលអញ្ជើញចូលរួម។ ក្រុមអ្នកយកព័ត៌មានក៏មិនត្រូវបានអនុញ្ញាតឱ្យចូលទស្សនាការហាត់សម ព្រោះគណៈកម្មការស៊ីហ្គេមចង់បង្កើតកម្មវិធីដ៏ទាក់ទាញមួយទៅតាមស្ដង់ដាអូឡាំពិក។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ គណៈកម្មាធិការជាតិ CAMSOC កាលពីថ្ងៃទី 24 មេសា បានឱ្យដឹងថា កម្ពុជាត្រូវតែប្រារព្ធពិធីសម្ពោធបើកព្រឹត្តិការណ៍ប្រកបដោយការទាក់ទាញបំផុតក្នុងប្រវត្តិសាស្ត្រ ទៅតាមស្ដង់ដាអូឡាំពិក ពុំមែនលំដាប់តំបន់ដូចប្រទេសដទៃ។ គ្រប់គ្នានឹងបានឃើញចំណុចដ៏អស្ចារ្យរបស់ពិធីនេះ។

ប្រមុខរាជរដ្ឋាភិបាលកម្ពុជា សម្ដេចតោជោ ហ៊ុន សែន ក៏បានប្រកាសមិនយកថ្លៃសំបុត្រចូលទស្សនាពិធីសម្ពោធនេះផងដែរ។ សម្ដេចមានប្រសាសន៍ថា មនុស្សជាងកន្លះលាននាក់ចង់ចូលទស្សនា ប៉ុន្តែពហុកីឡដ្ឋានមរតកតេជោ អាចដាក់មនុស្សបានតែពី 60,000 ទៅ 70,000 នាក់ប៉ុណ្ណោះ។ ទោះជាយ៉ាងណាក៏ដោយ បញ្ហានេះត្រូវបានដោះស្រាយតាមរយៈការដំឡើងឆាកបញ្ចាំងស្លាយផ្សាយបន្តផ្ទាល់នៅតាមបណ្ដាខេត្ត-ក្រុង។

ទីលានបាល់ទាត់មរតកតេជោ ស្ថិតក្នុងពហុកីឡដ្ឋានមរតកតេជោ នៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ត្រូវបានសម្ពោធការដ្ឋានសាងសង់កាលពីខែសីហា 2017 ហើយបួនឆ្នាំក្រោយមកក៏បានសម្រេចជាស្ថាពរ។ ការចំណាយសម្រាប់ការសាងសង់ពហុកីឡដ្ឋាននេះគឺប្រហែល 160 លានដុល្លារអាម៉េរិក ជាជំនួយរបស់ប្រទេសចិន។

យោងតាមគេហទំព័រស៊ីហ្គេមលើកទី 32 ព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា មានសមាជិកចូលរួមប្រហែល 12,000 នាក់ មកពី 11 ប្រតិភូ ដោយមិនទាន់រាប់បញ្ចូលក្រុមអាជ្ញាកណ្ដាល។ អ្នកយកព័ត៌មានជាង 2,000 នាក់ក៏បានទទួលកាតចុះឈ្មោះចូលយកព័ត៌មាន ក្នុងនោះមាន 907 នាក់មកពីបរទេស។

ស៊ីហ្គេមលើកទី 32 ធ្វើឡើងនៅរាជធានីភ្នំពេញ និងទីក្រុងបួនផ្សេងទៀត ចាប់ពីថ្ងៃទី 29 មេសាដល់ 16 ឧសភា ដោយមានកីឡា 36 ប្រភេទ ចែកជា 584 វិញ្ញាសា។ កាលពីថ្ងៃទី 04 ឧសភា គណៈកម្មការស៊ីហ្គេមបានប្រគល់មេដាយចំនួន 9 គ្រឿងដំបូងជូនអត្តពលិក ក្នុងនោះម្ចាស់ផ្ទះកម្ពុជានាំមុខគេដោយដណ្ដើមបានមេដាយមាសប្រាំគ្រឿង។ ហ្វ៊ីលីពីនដណ្ដើមបានមេដាយមាសពីរគ្រឿង ខណៈថៃ និងឡាវទទួលបានមួយគ្រឿង ពីប្រភេទកីឡាគុន ជូជិតស៊ូ (Jujutsu) និងល្បុក្កតោ។

នៅក្នុងថ្ងៃទី 05 ឧសភានេះ ស៊ីហ្គេមលើកទី 32 នឹងមិនមានការប្រកួតកីឡាណាមួយឡើយ ដោយផ្ដោតទៅលើតែពិធីសម្ពោធជាផ្លូវការ។

បទចម្រៀងផផ្លូវការរបស់ស៊ីហ្គេមលើកនេះគឺបទ Cambodian Pride ដែលបច្ចុប្បន្នចំនួនអ្នកចូលមើលបានកើនឡើងដល់ជាង 65 លានលើកនៅលើ YouTube ក្រោយពីបង្ហោះបានជាងបីសប្ដាហ៍។ រូបតំណាងស៊ីហ្គេមលើកទី 32 គឺកូនទន្សាយពីរក្បាល មួយឈ្មោះ រំដួល និងមួយឈ្មោះ បុរី។

ចំណែកពិធីបិទស៊ីហ្គេមលើកទី 32 វិញ នឹងត្រូវធ្វើឡើងក្នុងថ្ងៃទី 17 ឧសភា នៅឯពហុកីឡដ្ឋានមរតកតេជោ៕

May 5, 2023

បើសិនឈ្នះការប្រកួតនៅល្ងាចនេះ U-22 វៀតណាមនឹងឈរលើកំពូលតារាង

ក្រុមបាល់ទាត់បុរសអាយុក្រោម 22 ឆ្នាំ (U-22) របស់វៀតណាម និងប៉ះ U-22 សិង្ហបុរី នៅល្ងាចថ្ងៃទី 03 ឧសភា ជាទីដែល វៀតណាមមានឱកាសគ្រប់គ្រងតំណែងកំពូលនៅពូល B បើសិនជាឈ្នះ។

U-22 វៀតណាម បានបង្ហាញភាពខ្លាំងរបស់ខ្លួននៅស៊ីហ្គេមលើកទី 32 ដោយបានឈ្នះលើ U-22 ឡាវ ក្នុងលទ្ធផល 2-0។ ប៉ុន្តែ របៀបលេងរបស់ U-22 វៀតណាម មិនទាន់ល្អនៅឡើយ។

នៅក្នុងការប្រកួតជើងទីពីរនៃពូល B ក្រុម U-22 វៀតណាម នឹងប៉ះ U-22 សង្ហបុរី ជាក្រុមដែលបានចាញ់ U-22 ថៃ ក្នុងលទ្ធផល 1-3 នៅថ្ងៃបើកឆាករបស់ខ្លួន។ ល្ងាចនេះគឺជាពេលដែល U-22 វៀតណាម អាចរកបានបីពិន្ទុទៀត។

យ៉ាងណាក៏ដោយ U-22 វៀតណាម ប្រហែលជាមិនឈ្នះដោយងាយឡើយ ព្រោះថា U-22 សិង្ហបុរី លេងបាល់ខ្ពស់បានល្អ ហើយខ្សែការពារក៏រឹងមាំទៀត។ កីឡាករវៀតណាម បាននិយាយថា U-22 សិង្ហបុរី មានមាឌធំៗ និងអាចបង្កផលលំបាកខ្លាំង ព្រោះចូលចិត្តលេងការពារមុនប្រយុទ្ធ។

ការប្រកួតរវាង U-22 សិង្ហបុរី និង U-22 វៀតណាម នៅថ្ងៃទី 03 ឧសភានេះ នឹងធ្វើឡើងវេលាម៉ោង 16 នៅឯកីឡដ្ឋានព្រីនស៍ ស្ថិតក្នុងភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។

May 3, 2023

U-22 ម៉ាឡេស៊ី និង U-22 ឡាវ ដែលនឹងប្រកួតនៅល្ងាចនេះ តើក្រុមណាមានប្រៀបជាង?

បន្ទាប់ពីការប្រកួតដែលបានចាញ់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់វៀតណាម ក្រុម U-22 ឡាវ នឹងត្រូវប្រឈមនឹងក្រុមខ្លាំងមួយផ្សេងទៀតនៅពូល B នោះគឺ U-22 ម៉ាឡេស៊ី។

ការប៉ះគ្នារវាង U-22 ម៉ាឡេស៊ី និង U-22 ឡាវ នៅវគ្គចែកពូលនៃការប្រកួតបាល់ទាត់បុរសរបស់ស៊ីហ្គេមលើក 32 នឹងត្រូវធ្វើឡើងនាវេលាម៉ោង 19 ថ្ងៃទី 03 ឧសភា 2023 នៅឯកីឡដ្ឋានព្រីនស៍ ស្ថិតនៅភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។

នៅមុនការប្រកួត U-22 ម៉ាឡេស៊ីត្រូវបានវាយតម្លៃថា មានកីឡាករដែលមានកម្លាំងខ្លាំងក្លាបំផុត ខណៈដែល U-22 ឡាវ មានកីឡាករមួយចំនួនមិនមានកម្លាំងខ្លាំងបំផុត បន្ទាប់ពីការប្រកួតចាញ់ U-22 វៀតណាម នាពេលថ្មីៗនេះ។
ប្រវត្តិប៉ះគ្នារវាងក្រុម U-22 ម៉ាឡេស៊ី និង U-22 ឡាវ នៅក្នុងពីរប្រកួតចុងក្រោយ៖

ពេលវេលា	គូប្រកួត	លទ្ធផល
21/02/2022	U-22 ម៉ាឡេស៊ី vs U-22 ឡាវ	0-2
18/02/2022	U-22 ឡាវ vs U-22 ម៉ាឡេស៊ី	2-1

កម្លាំងរបស់ U-22 ម៉ាឡេស៊ី ក្នុងប្រាំប្រកួតចុងក្រោយបំផុត

ពេលវេលា	គូប្រកួត	លទ្ធផល
26/03/2023	U-22 ហុងកុង vs U-22 ម៉ាឡេស៊ី	1-2
24/03/2023	U-22 កម្ពុជា vs U-22 ម៉ាឡេស៊ី	2-4
21/02/2022	U-22 ម៉ាឡេស៊ី vs U-22 ឡាវ	0-2
18/02/2022	U-22 ឡាវ vs U-22 ម៉ាឡេស៊ី	2-1
22/02/2019	U-22 ម៉ាឡេស៊ី vs U-22 ទីម័រខាងកើត	1-0

កម្លាំងរបស់ U-22 ឡាវ ក្នុងប្រាំប្រកួតចុងក្រោយបំផុត

ពេលវេលា	គូប្រកួត	លទ្ធផល
30/04/2023	U-22 វៀតណាម vs U-22 ឡាវ	2-0
24/02/2022	U-22 ឡាវ vs U-22 ថៃ	0-2
21/02/2022	U-22 ឡាវ vs U-22 ម៉ាឡេស៊ី	2-0
18/02/2022	U-22 ឡាវ vs U-22 ម៉ាឡស៊ី	2-1
04/07/2012	U-22 ឡាវ vs U-22 កម្ពុជា	3-3

តាមការស្មានរបស់ Admin ការប្រកួតនៅព្រលប់ថ្ងៃទី 03 ឧសភានេះ U-22 ម៉ាឡេស៊ី អាចនឹងឈ្នះ U-22 ឡាវ 2-1៕

May 3, 2023

អ្នកគាំទ្ររៀបចំខ្លួនដូចគ្រូបង្វឹក Honda របស់ U-22 កម្ពុជា បង្កការភ្ញាក់ផ្អើលលើវេទិកាទស្សនិកជននៅស៊ីហ្គេម

អ្នកគាំទ្រពិសេសមួយរូបមកពីប្រទេសជប៉ុន ដែលមានរូបរាងមុខមាត់ និងស្លៀកពាក់ដូចទៅនឹងគ្រូបង្វឹក Keisuke Honda របស់ U-22 កម្ពុជា បានធ្វើឱ្យមានការភ្ញាក់ផ្អើលខ្លាំងពេលបង្ហាញវត្តមាននៅឯកីឡដ្ឋានជាតិអូឡាំពិកកម្ពុជាក្នុងព្រឹត្តិការណ៍ស៊ីហ្គេមលើកទី 32។

ការប្រកួតពីរលើករបស់ U-22 កម្ពុជា មានវត្តមានអ្នកគាំទ្រពិសេសម្នាក់នៅលើវេទិកាសម្រាប់ទស្សនិកជនក្នុងកីឡដ្ឋានជាតិអូឡាំពិក។ អ្នកគាំទ្រដែលមកពីប្រទេសជប៉ុននេះ មានរូបរាងមុខមាត់ដូចទៅនឹងគ្រូបង្វឹក Keisuke Honda នៃក្រុមបាល់ទាត់បុរសវ័យក្រោម 22 ឆ្នាំ (U-22) របស់កម្ពុជា។

ពេលបង្ហាញខ្លួននៅលើវេទិកាទស្សនិកជនភ្លាម «Honda ក្លែងក្លាយ» ក៏ទទួលបានចំណាប់អារម្មណ៍ច្រើនពីអ្នកគាំទ្រកម្ពុជា។ អ្នកគាំទ្រកម្ពុជាក៏ចូលចិត្តអ្នកគាំទ្រពិសេសរូបនេះ។

បុរសសង្ហាម្នាក់នេះ តាមពិតគឺជា Makihika ដែលជា KOL (Key Opinion Leader ឬអ្នកផ្ដល់យោបល់ដែលមានឥទ្ធិពល) ជនជាតិជប៉ុនមួយរូប។ Makihika ត្រូវបានគេស្គាល់ច្រើននៅលើបណ្ដាញសង្គម ដោយមានឆានែល TikTok និង YouTube មានអ្នកតាមដានជាង 600,000 នាក់។

Makihika កំពុងតែល្បីឈ្មោះខ្លាំង ដោយសារមានរូបរាងមុខមាត់ដូចទៅនឹងគ្រូបង្វឹក Keisuke Honda។ Makihika និយាយថា «ខ្ញុំគាំទ្រ Honda ទើបបានជាតាមដានដំណើររបស់គាត់។ ខ្ញុំបានស្វែងយល់អំពីឥរិយាបថ ការស្លៀកពាក់ ការធ្វើខ្លួនរបស់ Honda ដើម្បី «សំដែង» ជារូបគាត់»។

Makihika តែងតែមកកាន់កម្ពុជានៅពេលមានព្រឹត្តិការណ៍ប្រកួតធំៗរបស់ក្រុមបាល់ទាត់កម្ពុជា។ Makihika និយាយថា គាត់មកកាន់កម្ពុជាច្រើនថ្ងៃមកហើយ និងមានវត្តមាននៅលើវេទិកាទស្សនិកជនរបស់កីឡដ្ឋានជាតិអូឡាំពិកដើម្បីផ្ដល់កម្លាំងចិត្តដល់ U-22 កម្ពុជា។

Makihika នឹងធ្វើដំណើរជាមួយក្រុម U-22 កម្ពុជា ក៏ដូចជានិមិត្តរូប Honda របស់គាត់ នៅក្នុងការប្រកួតទាំងឡាយនាពេលខាងមុខនៅស៊ីហ្គេមលើកទី 32 នេះ៕