ប្រកួត - La Reine Media

តើ U22 កម្ពុជាមានសង្ឃឹមអត់ ពេលប៉ះ U22 ឥណ្ឌូណេស៊ី នៅព្រលប់ថ្ងៃទី 10 ឧសភានេះ?

នៅព្រលប់ថ្ងៃទី 10 ឧសភានេះ ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U22) របស់កម្ពុជា នឹងត្រូវប្រកួតជាមួយ U22 ឥណ្ឌូណេស៊ី។

U22 កម្ពុជា បានចាប់ផ្ដើមយ៉ាងល្អនៅស៊ីហ្គេមលើកនេះ ដោយបានផ្ដួល U22 ទីម័រខាងកើត 4-0។ ប៉ុន្តែ ការប្រកួតដែលមានលទ្ធផលស្មើជាមួយហ្វ៊ីលីពីន និងចាញ់មីយ៉ាន់ម៉ា បានរុញច្រាន U22 កម្ពុជាឱ្យធ្លាក់ក្នុងស្ថានភាពលំបាក។

នៅក្នុងជើងចុងក្រោយរបស់វគ្គចែកពូលនៅក្រុម A នាព្រលប់នេះ U22 កម្ពុជាត្រូវតែឈ្នះ U22 ឥណ្ឌូណេស៊ី ដើម្បីបន្តក្ដីសង្ឃឹមឡើងទៅវគ្គពាក់កណ្ដាលផ្ដាច់ព្រ័ត្រ។ បញ្ហានៅត្រង់ថា U22 កម្ពុជាមិនមានសិទ្ធិសម្រេចនៅទេនៅពេលនេះ។ សូម្បីតែនៅក្នុងករណីផ្ដួលឥណ្ឌូណេស៊ីបានសម្រេច ក៏ U22 កម្ពុជាត្រូវរង់ចាំមើលថាតើ មីយ៉ាន់ម៉ាបរាជ័យនៅក្នុងម៉ោងដូចគ្នានេះ ឬអត់។

ទោះជាយ៉ាងណាក៏ដោយ ឱកាសសម្រាប់ U22 កម្ពុជាយកឈ្នះលើ U22 ឥណ្ឌូណេស៊ី ក៏ខ្ពស់គួរសម ព្រោះថា U22 ឥណ្ឌូណេស៊ីទំនងជានឹងប្រើប្រាស់ក្រុមកីឡាករបម្រុងក្នុងពេលប៉ះកម្ពុជា ដើម្បីរក្សាកម្លាំងរបស់ក្រុមជើងខ្លាំងសម្រាប់ប្រកួតនៅវគ្គពាក់កណ្ដាលផ្ដាច់ព្រ័ត្រ ជាទីដែល U22 ឥណ្ឌូណេស៊ីត្រូវប៉ះ U22 ថៃ ឬ U22 វៀតណាម។

តាមការគ្រោងទុកដំបូង ការប្រកួតរវាង U22 មីយ៉ាន់ម៉ា និង U22 ហ្វ៊ីលីពីន នឹងត្រូវធ្វើឡើងនៅវេលាម៉ោង 16 ថ្ងៃទី 10 ឧសភា ប៉ុន្តែ គណៈកម្មការរៀបចំស៊ីហ្គេមលើកទី 32 បានប្ដូរកាលវិភាគនៃការប្រកួតនេះពីម៉ោង 16 ទៅម៉ោង 19 វិញ។

May 10, 2023

ក្រុមបាល់ទាត់ U-22 មីយ៉ាន់ម៉ា នឹងប្រកួត «ជូនដំណើរ» U-22 ហ្វ៊ីលីពីន នៅព្រលប់នេះ

ការប្រកួតជើងចុងក្រោយបង្អស់របស់ពូល A ដែលនឹងធ្វើឡើងនៅព្រលប់ថ្ងៃទី 10 ឧសភា នេះ គឺជាការប៉ះគ្នារបស់ U-22 មីយ៉ាន់ម៉ា និង U-22 ហ្វ៊ីលីពីន។

U-22 មីយ៉ាន់ម៉ា កំពុងមានឱកាសធំក្នុងការដណ្ដើមយកសំបុត្រឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32 ក្រោយពីបានយកឈ្នះលើ U-22 កម្ពុជា។ បើសិនជាបានឈ្នះ U-22 ហ្វ៊ីលីពីននៅក្នុងការប្រកួតជើងចុងក្រោយបង្អស់របស់ពូល A នៅព្រលប់នេះ U-22 មីយ៉ាន់ម៉ា នឹងមានសិទ្ធិសម្រេចវាសនាមួយកម្រិតទៀត។

U-22 មីយ៉ាន់ម៉ា មានប្រៀបជាងគូប្រកួត ដោយសារថា U-22 ហ្វ៊ីលីពីន ត្រូវបានជម្រុះរួចហើយ និងមិនមានឱកាសឡើងទៅវគ្គពាក់កណ្ដាលផ្ដាច់ព្រ័ត្រ។ ក៏ប៉ុន្តែ U-22 មីយ៉ាន់ម៉ា ក៏ត្រូវតែប្រុងប្រយ័ត្ន បើសិនមិនចង់បាក់មុខ។

U-22 ហ្វ៊ីលីពីន បើទោះជាត្រូវបានជម្រុះហើយក្ដី ប៉ុន្តែពួកគេក៏ចង់ដណ្ដើមបានជ័យជម្នះលើ U-22 មីយ៉ាន់ម៉ា ដើម្បីជាការលើកទឹកចិត្តខ្លួនឯង ក៏ដូចជាធ្វើឱ្យអ្នកគាំទ្របានរីករាយបន្តិច មុននឹងត្រលប់ទៅកាន់ប្រទេស។

ស្ថិតិចុងក្រោយបានបង្ហាញថា U-22 ហ្វ៊ីលីពីន រកបានតែមួយគ្រាប់គត់ ក្រោយបីប្រកួតដំបូងនៅស៊ីហ្គេមលើកនេះ។ នៅក្នុងការប៉ះគ្នាថ្មីៗនេះ U-22 មីយ៉ាន់ម៉ា បានផ្ដួល U-22 ហ្វ៊ីលីពីន ដោយលទ្ធផល 5-1។

ការប្រកួតជើងចុងក្រោយបង្អស់របស់ពូល A រវាង U-22 មីយ៉ាន់ម៉ា និង U-22 ហ្វ៊ីលីពីន នឹងធ្វើឡើងនៅវេលាម៉ោង 19 ថ្ងៃទី 10 ឧសភា 2023 នៅឯពហុកីឡដ្ឋានជាតិអូឡាំពិក ក្នុងរាជធានីភ្នំពេញ។

នៅក្នុងការប៉ះគ្នានេះ Admin យល់ថា U-22 មីយ៉ាន់ម៉ា នឹងឈ្នះ U-22 ហ្វ៊ីលីពីន ក្នុងលទ្ធផល 2-1៕

May 10, 2023

ក្រុមហ៊ុន MG បង្ហាញរថយន្តអគ្គិសនីតម្លៃទាបបំផុតនៅឥណ្ឌា

MG ថ្មីៗនេះបានបញ្ចេញរថយន្តអគ្គិសនីតម្លៃធូរថ្លៃបំផុតនៅលើទីផ្សារប្រទេសឥណ្ឌា។ MG Motor ជាកម្មសិទ្ធិរបស់ក្រុមហ៊ុនរដ្ឋចិន SAIC Motor ប្រកួតប្រជែងនៅឥណ្ឌាជាមួយនឹងក្រុមអ្នកផលិតរថយន្តមួយចំនួន ក្នុងនោះមាន Tata Motors ជាដើម។

ប្រទេសចិនគឺជាទីផ្សាររថយន្តអគ្គិសនីធំជាងគេលំដាប់លេខមួយលើពិភពលោក ហើយក៏ជាចំណុចក្ដៅនៃរថយន្តអគ្គិសនីនាបច្ចុប្បន្ន។ ក្រុមអ្នកផលិតរថយន្តនៅប្រទេសឥណ្ឌា បានជោគជ័យនៅពេលដាក់លក់រថយន្តអគ្គិសនីតម្លៃទាប ហើយពេលនេះ ក្រុមហ៊ុនមួយផ្សេងទៀតរបស់ចិន កំពុងឆ្ពោះទៅក្នុងទីផ្សាររថយន្តធំជាងគេលំដាប់ទីបីលើពិភពលោកមួយនេះ។

យោងតាមទំព័រ Autocar រថយន្ត MG Motor Comet EV (តាមពិតវាគឺជារថយន្ត Wuling Air EV ដែលត្រូវបានកែលំអ) គឺជាប្រភេទដែលមានទ្វារចំនួនពីរ និងកៅអីចំនួនបួន។ រថយន្តនេះអាចបើកបរបានចម្ងាយ 230 គីឡូម៉ែត្រ និងមានតម្លៃចាប់ពី 798,000 រ៉ូពីឥណ្ឌា (9,763 ដុល្លារអាម៉េរិក)។ ដើម្បីប្រៀបធៀប រថយន្តអគ្គិសនី Tiago EV របស់ Tata ដែលមានតម្លៃចាប់ពី 849,000 រ៉ូពីឥណ្ឌា (10,400 ដុល្លារអាម៉េរិក) មានទ្វារបួន និងបរបានចម្ងាយ 315 គីឡូម៉ែត្រ។

បើទោះរថយន្តខ្នាតតូចខាងលើ ទំនងជាមិនអាចទាក់ទាញចំណាប់អារម្មណ៍របស់អតិថិជននៅលោកខាងលិច ប៉ុន្តែវាអាចជាជម្រើសដ៏សមស្របសម្រាប់អតិថិជននៅប្រទេសឥណ្ឌា ដោយសារស្ថានភាពផ្លូវ និងប្រជាជនមានចំនួនច្រើន។

ក្រៅពីរថយន្តអគ្គិសនីខាងលើ MG Motor ក៏កំពុងលក់រថយន្តអគ្គិសនីប្រភេទ crossover ខ្នាតធំនៅប្រទេសឥណ្ឌាផងដែរ។ MG Motor រំពឹងថា ក្នុងឆ្នាំនេះ ចំនួនរថយន្តអគ្គិសនីនឹងកាន់កាប់ប្រហែលពី 25 ទៅ 30% នៅក្នុងចំណោមរថយន្តសរុបដែលខ្លួនបានលក់នៅប្រទេសឥណ្ឌា។

រថយន្តជិតបួនលានគ្រឿងត្រូវបានលក់នៅប្រទេសឥណ្ឌាកាលពីឆ្នាំកន្លង ក្នុងនោះមានរថយន្តអគ្គិសនីតែ 2% ប៉ុណ្ណោះ។ Tata Motors គឺជាក្រុមហ៊ុនដែលនាំមុខគេក្នុងឆ្នាំ 2022 ខណៈ BYD ក៏បានបង្ហាញរថយន្តអគ្គិសនីដំបូងរបស់ខ្លួននៅក្នុងទីផ្សារឥណ្ឌា កាលពីឆ្នាំ 2022 និងបានកំណត់គោលដៅកាន់កាប់ចំណែកទីផ្សាររថយន្តអគ្គិសនីឱ្យបាន 40% នៅប្រទេសនេះ ក្នុងឆ្នាំ 2030។

រដ្ឋាភិបាលរបស់នាយករដ្ឋមន្ត្រីឥណ្ឌា Narendra Modi សង្ឃឹមថា នឹងជំរុញការប្រើប្រាស់រថយន្តអគ្គិសនីឱ្យបាន 30% ក្នុងចំណោមរថយន្តទាំងអស់ដែលបានលក់ចេញនៅប្រទេសនេះ នៅឆ្នាំ 2030៕

May 10, 2023

តារាងចំណាត់ថ្នាក់បាល់ទាត់បុរសនៅស៊ីហ្គេមលើកទី 32 សម្រាប់ថ្ងៃនេះ

ខាងក្រោមនេះគឺជាតារាងចំណាត់ថ្នាក់ថ្មីបំផុតរបស់វិញ្ញាសាបាល់ទាត់បុរសនៅស៊ីហ្គេមលើកទី 32។ បច្ចុប្បន្ន U-22 កម្ពុជាស្ថិតនៅលំដាប់ថ្នាក់ទីបីក្នុងពូល A ដោយមាន 4 ពិន្ទុ និងនៅពីក្រោមឥណ្ឌូណេស៊ី (9 ពិន្ទុ) និងមីយ៉ាន់ម៉ា (6 ពិន្ទុ)។

នៅពូល B ក្រុម U-22 ថៃ មាន 9 ពិន្ទុ ត្រូវឈរកំពូលតារាង ខណៈវៀតណាមមាន 9 ពិន្ទុ ត្រូវឈរលេខពីរ ដោយសារគ្រាប់បាល់ចំណេញ (+5) ទាបជាងថៃ (+7)។

មកដល់ពេលនេះ U-22 ថៃ និង U-22 វៀតណាម បានឡើងដល់វគ្គពាក់កណ្ដាលផ្ដាច់ព្រ័ត្រ។ ក្នុងការប្រកួតជើងចុងក្រោយដែលនឹងធ្វើឡើងនៅថ្ងៃទី 11 ឧសភា ថៃ និងវៀតណាម នឹងប៉ះគ្នាដើម្បីដណ្ដើមតំណែងកំពូលតារាង (B)។

ដោយមានគ្រាប់បាល់ចំណេញខ្ពស់ជាង ដូច្នេះ ឱ្យតែមានលទ្ធផលស្មើជាមួយវៀតណាម ក្រុមថៃនឹងគ្រប់គ្រងពូល B។ បើសិនដណ្ដើមបានតំណែងកំពូលតារាង U-22 ថៃ ឬ U-22 វៀតណាម នឹងប៉ះគូប្រកួត «ខ្សោយ» នៅក្នុងវគ្គពាក់កណ្ដាលផ្ដាច់ព្រ័ត្រ។

ពូល A
លរ	ក្រុម	ចំនួនប្រកួត	ឈ្នះ	ស្មើ	ចាញ់	គ្រាប់បាល់ឈ្នះ	គ្រាប់បាល់ចាញ់	គ្រាប់បាល់ចំណេញ	ពិន្ទុ
1	ឥណ្ឌូណេស៊ី	3	3	0	0	11	0	11	9
2	មីយ៉ាន់ម៉ា	3	2	0	1	3	5	-2	6
3	កម្ពុជា	3	1	1	1	5	3	2	4
4	ទីម័រខាងកើត	4	1	0	3	3	8	-5	3
5	ហ្វ៊ីលីពីន	3	0	1	2	1	7	-6	1

ពូល B
លរ	ក្រុម	ចំនួនប្រកួត	ឈ្នះ	ស្មើ	ចាញ់	គ្រាប់បាល់ឈ្នះ	គ្រាប់បាល់ចាញ់	គ្រាប់បាល់ចំណេញ	ពិន្ទុ
1	ថៃ	3	3	0	0	9	2	7	9
2	វៀតណាម	3	3	0	0	7	2	5	9
3	ម៉ាឡស៊ី	3	1	0	2	6	5	1	3
4	សិង្ហបុរី	3	0	1	2	2	6	-4	1
5	ឡាវ	4	0	1	3	2	11	-9	1

May 10, 2023

គូប្រកួតដែលត្រូវប៉ះគ្នាក្នុងវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់នារីនៅស៊ីហ្គេមលើកទី 32

គូប្រកួតនានានៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់នារីរបស់ស៊ីហ្គេមលើកនេះ បានបង្ហាញខ្លួនជាផ្លូវការហើយ បន្ទាប់ពីការប្រកួតកាលពីថ្ងៃទី 09 ឧសភា ក្នុងនោះ កម្ពុជានឹងត្រូវប៉ះវៀតណាម។

ក្រោយពីវគ្គចែកពូលនៃវិញ្ញាសាបាល់ទាត់នារីរបស់ស៊ីហ្គេមលើកទី 32 ត្រូវបានបញ្ចប់ ក្រុមបាល់ទាត់ពីរគូដែលត្រូវប៉ះគ្នានៅវគ្គពាក់កណ្ដាលផ្ដាច់ព្រ័ត្រក៏ត្រូវបានកំណត់រួចហើយដែរ។ យោងតាមលក្ខន្តិក ក្រុមកម្ពុជាដែលជាប់លេខពីរនៅពូល B នឹងត្រូវប្រកួតជាមួយវៀតណាមដែលជាក្រុមជាប់លេខមួយនៅពូល A នៅក្នុងវគ្គពាក់កណ្ដាលផ្ដាច់ព្រ័ត្រ។

ចំណែកក្រុមថៃដែលជាប់លេខមួយនៅពូល B នឹងត្រូវប្រកួតជាមួយក្រុមមីយ៉ាន់ម៉ាដែលជាប់លេខពីរនៅពូល A នៅក្នុងវគ្គពាក់កណ្ដាលផ្ដាច់ព្រ័ត្រ។ ការប្រកួតទាំងពីរគូខាងលើនេះនឹងត្រូវធ្វើឡើងនៅថ្ងៃទី 12 ឧសភាខាងមុខ។

ក្រុមបាល់ទាត់នារីជម្រើសជាតិកម្ពុជា បានឡើងដល់វគ្គពាក់កណ្ដាលផ្ដាច់ព្រ័ត្រជាលើកដំបូងនៅស៊ីហ្គេម និងបានលឿនជាងមួយជើង។ នេះគឺជាប្រវត្តិសាស្ត្រដ៏លេចធ្លោរបស់ក្រុមបាល់ទាត់នារីជម្រើសជាតិរបស់កម្ពុជា។

នៅក្នុងវគ្គពាក់កណ្ដាលផ្ដាច់ព្រ័ត្រនេះ ទោះជាមានសង្ឃឹមតិចតួចក៏ដោយ តែបើសិនឈ្នះក្រុមវៀតណាម ដែលជាម្ចាស់ជើងឯកស៊ីហ្គេម ក្រុមកម្ពុជានឹងមានភាគរយខ្ពស់ដែលត្រូវប៉ះថៃនៅវគ្គផ្ដាច់ព្រ័ត្រ។ ក្នុងករណីចាញ់ ក្រុមកម្ពុជានឹងនៅមានឱកាសក្នុងការដណ្ដើមមេដាយសំរឹទ្ធ។

May 10, 2023

ក្រុមបាល់ទាត់នារីជម្រើសជាតិកម្ពុជា នឹងប៉ះក្រុមជម្រើសជាតិថៃ នៅម៉ោង 20 យប់នេះ

ការប្រកួតរវាង ក្រុមបាល់ទាត់នារីជម្រើសជាតិកម្ពុជា និងថៃ សម្រាប់ថ្ងៃទី 09 ឧសភានេះ នឹងធ្វើឡើងនៅម៉ោង 20 យប់ ដើម្បីដណ្ដើមតំណែងកំពូលតារាង B នៃវិញ្ញាសាបាល់ទាត់នារីនៅស៊ីហ្គេមលើកទី 32។

ក្រុមបាល់ទាត់នារីកម្ពុជា បានបង្កើតប្រវត្តិសាស្ត្រថ្មីនៅពេលបានផ្ដួលក្រុមសិង្ហបុរីដោយលទ្ធផល 1-0 នៅក្នុងការប្រកួតកន្លងទៅថ្មីៗនេះនៅស៊ីហ្គេមលើកទី 32 និងដណ្ដើមបានសំបុត្រចូលទៅវគ្គពាក់កណ្ដាលផ្ដាច់ព្រ័ត្រ។ នេះទើបតែជាលើកទីពីរប៉ុណ្ណោះដែលក្រុមបាល់ទាត់នារីកម្ពុជាបានចូលរួមប្រកួតនៅស៊ីហ្គេម ប៉ុន្តែ ពួកគេបានធ្វើឱ្យមានការភ្ញាក់ផ្អើលខ្លាំង ដោយមុននោះក៏បានឈ្នះឡាវ 2-0 នៅក្នុងការប្រកួតបើកឆាក។

កាលពីប្រាំឆ្នាំមុន ក្រុមបាល់ទាត់នារីកម្ពុជាធ្លាប់បានចាញ់ថៃ 0-11 នៅ AFF Cup 2018 ប៉ុន្តែបច្ចុប្បន្ន គម្លាតនៃកម្លាំងរបស់ក្រុមទាំងពីរនេះកំពុងត្រូវបានកាត់បន្ថយ។ ពេលនេះ ក្រុមបាល់ទាត់នារីកម្ពុជា និងថៃនឹងត្រូវប្រកួតជាមួយគ្នាដើម្បីដណ្ដើមយកតំណែងកំពូលតារាង B។

គេឃើញថា ពេលនេះ ថៃកំពុងមានប្រៀបជាងកម្ពុជា ដោយសារបានឈ្នះគូប្រកួតពីរក្រុមនៅពូល B ដែលរកបានគ្រាប់បាល់សរុប 10-0 ខណៈដែលកម្ពុជា ទើបតែឈ្នះសរុបបាន 3-0។

ក៏ប៉ុន្តែ ការប្រកួតជាក់ស្ដែងអាចមានភាពខុសគ្នាខ្លះ។ ការទាត់នៅលើទីលានម្ចាស់ផ្ទះគឺជាការមានប្រៀបមួយសម្រាប់កម្ពុជា។ ពិសេសជាងនេះ កម្លាំងកាយរបស់ក្រុមបាល់ទាត់នារីកម្ពុជា ក៏ត្រូវបានវាយតម្លៃថា មិនអន់ប៉ុន្មានឡើយធៀបនឹងក្រុមថៃ។ កម្លាំងចិត្តដ៏ពុះកញ្ជ្រោលបន្ទាប់ពីបានបង្កើតប្រវត្តិសាស្ត្រថ្មីនៅស៊ីហ្គេម ក៏នឹងអាចជួយឱ្យក្រុមបាល់ទាត់នារីកម្ពុជា បង្កការភ្ញាក់ផ្អើលបន្តទៀតនៅយប់នេះ។

កីឡាការិនីលេចធ្លោរបស់ ក្រុមបាល់ទាត់នារីជម្រើសជាតិកម្ពុជា

May 9, 2023

កីឡាករថៃថានឹងផ្ដួលវៀតណាមដើម្បីនាំមុខនៅពូល A មុនការប្រកួតពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមកម្ពុជា

ខ្សែការពារ Jonathan Khemdee អះអាងថា នឹងផ្ដួលវៀតណាម ដើម្បីគ្រប់គ្រងពូល B និងបង្កើនកម្លាំងចិត្តមុនពេលចូលប្រកួតក្នុងវគ្គពាក់កណ្ដាលផ្ដាច់ព្រ័ត្រនៅស៊ីហ្គេមលើកទី 32។

ក្រុមបាល់ទាត់បុរសជម្រើសជាតិថៃ និងវៀតណាម សុទ្ធតែបានឈ្នះក្នុងបីប្រកួតកន្លង និងដណ្ដើមបានសំបុត្រឡើងទៅកាន់វគ្គពាក់កណ្ដាលផ្ដាច់ព្រ័ត្រនៅស៊ីហ្គេមឆ្នាំ 2023។ ការប៉ះគ្នារវាង U-22 ថៃ និង U-22 វៀតណាម ដែលនឹងធ្វើឡើងនៅថ្ងៃទី 11 ឧសភា គ្រាន់តែជាការដណ្ដើមតំណែងគ្រប់គ្រងពូល B តែប៉ុណ្ណោះ។ ដោយសារតែមានគ្រាប់បាល់ចំណេញ (+7) ខ្ពស់ជាងគេ ដូច្នេះ U-22 ថៃ ត្រូវការស្មើមួយប្រកួតទៀតប៉ុណ្ណោះ គឺរក្សាបានតំណែងកំពូលតារាង។

Jonathan Khemdee បានអះអាងថា គាត់ និងមិត្តរួមក្រុមកំពុងឆ្ពោះទៅរកជ័យជម្នះ។ «ទាំងថៃ ទាំងវៀតណាម សុទ្ធតែបានឡើងដល់វគ្គពាក់កណ្ដាលផ្ដាច់ព្រ័ត្រ ប៉ុន្តែការប្រកួតដែលជិតមកដល់នៅតែសំខាន់។ … ការផ្ដួលវៀតណាមនឹងជួយឱ្យស្មារតីរបស់ពួកយើងឡើងដល់កម្រិតខ្ពស់ មានទំនុកចិត្តដើម្បីប្រកួតនៅវគ្គពាក់កណ្ដាលផ្ដាច់ព្រ័ត្រ» Jonathan Khemdee បញ្ជាក់ដូច្នេះ។

ថៃគឺជាក្រុមបាល់ទាត់ដែលមានសមិទ្ធផលល្អច្រើនជាងគេនៅស៊ីហ្គេម ដោយដណ្ដើមបានមេដាយមាស 16 លើក ខណៈដែលវៀតណាម គឺជាម្ចាស់ជើងឯកបន្តបន្ទាប់នៅពីររដូវកាលចុងក្រោយនេះ។ នៅស៊ីហ្គេមលើកទី 31 (ឆ្នាំ 2022) ថៃបានចាញ់វៀតណាម ក្នុងលទ្ធផល 0-1 ក្នុងវគ្គផ្ដាច់ព្រ័ត្រ នាំឱ្យវៀតណាមដណ្ដើមបានមេដាយមាសជាថ្មី។

Jonathan Khemdee បញ្ជាក់ថា «វៀតណាមជាគូប្រជែងខ្លាំង…ប៉ុន្តែ ជ័យជម្នះនឹងបានមកលើថៃ។ ឆ្នាំនេះ យើងប្ដេជ្ញាថានឹងផ្ដួលរាល់គូប្រកួត នាំមេដាយមាសមកប្រទេសថៃ»។

Jonathan Khemdee កើតឆ្នាំ 2001 នៅប្រទេសដាណឺម៉ាក និងត្រូវបានបណ្ដុះបណ្ដាលនៅក្នុងក្លឹបបាល់ទាត់ Odense Boldklub។ ឆ្នាំ 2023 ខ្សែការពារកណ្ដាលរូបនេះទាត់ឱ្យក្លឹប Ratchaburi របស់ប្រទេសថៃ។ កីឡាករនេះត្រូវបានថៃចុះឈ្មោះឱ្យចូលរួមប្រកួតនៅស៊ីហ្គេមលើកទី 32 ប៉ុន្តែក្នុងបីប្រកួតដំបូង មិនបានចូលរួម។ Jonathan Khemdee ទើបតែមកដល់កម្ពុជាកាលពីម្សិលមិញ ដោយសារតែមួយថ្ងៃមុននោះត្រូវទាត់ក្នុងការប្រកួតរវាង Ratchaburi និង Buriam នៅ Thai League។

កាលពីពេលថ្មីៗនេះ Jonathan Khemdee ឱ្យដឹងថា បច្ចុប្បន្នថ្វីបើអស់កម្លាំងបន្តិចមែន ប៉ុន្តែបានអះអាងថា បានត្រៀមខ្លួនរួចរាល់ហើយដើម្បីចូលទាត់ក្នុងការប្រកួតរវាង U-22 ថៃ និង U-22 វៀតណាម ដែលនឹងធ្វើឡើងនៅវេលាម៉ោង 19 ថ្ងៃទី 11 ឧសភា នៅលើទីលានរបស់កីឡដ្ឋានព្រីនស៍ (កីឡដ្ឋានក្លិបវិសាខា) ស្ថិតនៅភូមិឃ្មួញ សង្កាត់ឃ្មួញ ខណ្ឌសែនសុខ រាជធាននីភ្នំពេញ៕

May 9, 2023

ក្រុមបាល់ទាត់ U-22 ថៃ រកគ្រាប់បាល់បានលឿនបំផុតនៅស៊ីហ្គេម 2023 គិតត្រឹមបច្ចុប្បន្ន

ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ ចំណាយពេលតែបីនាទីប៉ុណ្ណោះក្នុងការស៊ុតពីរគ្រាប់ចូលទីរបស់ U-22 ឡាវ កាលពីល្ងាចថ្ងៃទី 08 ឧសភា។ នេះក៏ជាល្បឿននៃការស៊ុតបញ្ចូលទីពីរគ្រាប់ក្នុងរយៈពេលខ្លីបំផុតសម្រាប់វិញ្ញាសាកីឡាបាល់ទាត់បុរសនៅស៊ីហ្គេមលើកទី 32។

នៅក្នុងជ័យជម្នះលើកលើ U-22 ឡាវ ក្នុងលទ្ធផល 4-1 U-22 ថៃ បានបង្ហាញវិធីសាស្ត្រវាយសម្រុកដ៏លឿន ក្នុងនោះ U-22 ថៃ ចំណាយពេលតែប្រាំនាទីដំបូងនៃការប្រកួត ក៏រកបានពីរគ្រាប់។ អ្វីដែលអស្ចារ្យគឺថា ការស៊ុតបញ្ចូលទីបានពីរគ្រាប់នេះ កើតឡើងនៅក្នុងរយៈពេលតែបីនាទីប៉ុណ្ណោះ។

គិតមកដល់បច្ចុប្បន្ន U-22 ថៃ បានឈ្នះ 9 គ្រាប់ និងចាញ់ 2 គ្រាប់។ អ្នកជំនាញនិយាយថា U-22 ថៃ បច្ចុប្បន្នមានខ្សែប្រយុទ្ធខ្លាំងជាងគេនៅពូល B។ U-22 ថៃ នឹងក្លាយជាគូប្រជែងចុងក្រោយរបស់ U-22 វៀតណាម នៅពូល B ហើយអាចដណ្ដើមបានតំណែងជើងឯកពី U-22 វៀតណាម នៅស៊ីហ្គេមលើកនេះ។

ក្នុងការប៉ះគ្នានៅថ្ងៃទី 11 ឧសភាខាងមុខ ខ្សែប្រយុទ្ធ U-22 ថៃ នឹងត្រូវផ្ដាច់ខ្សែការពារដ៏រឹងមាំរបស់ U-22 វៀតណាមឱ្យបាន បើសិនចង់បានមេដាយមាសនៅស៊ីហ្គេមលើកទី 32។ U-22 វៀតណាម មកដល់ពេលនេះក៏ត្រូវប៉ើងសំណាញ់ទីពីរគ្រាប់ដូចទៅនឹង U-22 ថៃ។

May 9, 2023

ក្រុមបាល់ទាត់នារីវៀតណាមមានឱកាសជម្រះបញ្ជីចាស់ដែលចាញ់ហ្វ៊ីលីពីន 0-4 ក្នុងវគ្គពាក់កណ្ដាលផ្ដាច់ព្រ័ត្រនៅ AFF ឆ្នាំមុន

នៅស៊ីហ្គេមបីរដូវកាលជាប់ៗគ្នា ក្រុមបាល់ទាត់នារីជម្រើសជាតិវៀតណាម សុទ្ធតែគ្រប់គ្រងតំណែងជើងឯក ហើយបច្ចុប្បន្ន ហ្វ៊ីលីពីនកំពុងតែក្លាយជាគូប្រជែងធំបំផុតរបស់វៀតណាម។ ក្រុមបាល់ទាត់មួយគូដែលទើបតែដណ្ដើមបានសិទ្ធិឡើងទៅប្រកួតនៅ World Cup នារី 2023 នេះ នឹងបន្ថែមកម្ដៅដល់ស៊ីហ្គេមនៅកម្ពុជាជាក់ជាមិនខាន។

ក្រោយពីការប្រកួតពីរជើងនៅពូល A ក្រុមបាល់ទាត់នារីជម្រើសជាតិវៀតណាម កំពុងនាំមុខគេក្នុងគម្លាត 3 ពិន្ទុ ធៀបនឹងគូប្រជែងពីរក្រុមផ្សេងទៀត។ វៀតណាមត្រូវការស្មើមួយប្រកួតទៀតប៉ុណ្ណោះនឹងបានឡើងដល់វគ្គពាក់កណ្ដាលផ្ដាច់ព្រ័ត្រ ប៉ុន្តែ វៀតណាមប្រាកដជាត្រូវជម្រះបញ្ជីចាស់ដែលខ្លួនបានចាញ់ហ្វ៊ីលីពីន 0-4 ក្នុងវគ្គពាក់កណ្ដាលផ្ដាច់ព្រ័ត្រនៅ AFF Cup នារី ដែលធ្វើឡើងនៅហ្វ៊ីលីពីនកាលពីឆ្នាំកន្លង។

បច្ចុប្បន្ន វៀតណាមកំពុងមានប្រៀបជាងហ្វ៊ីលីពីន។ ក្រោយការប្រកួតពីរជើង ហ្វ៊ីលីពីនរកបានតែមួយគ្រាប់ និងចាញ់មួយគ្រាប់ ខណៈដែលវៀតណាមរកបាន 6 គ្រាប់។

ថ្វីបើហ្វ៊ីលីពី បច្ចុប្បន្នហាក់បានចុះខ្សោយ ប៉ុន្តែវៀតណាមក៏ត្រូវតែមានការប្រុសប្រយ័ត្ន ព្រោះថា ក្រុមបាល់ទាត់នារីរបស់វៀតណាម ធ្លាប់ចាញ់ក្រុមបាល់ទាត់នារីហ្វ៊ីលីពីន 0-4 កាលពីឆ្នាំកន្លង ហើយហ្វ៊ីលីពីនក៏មានកីឡាការិនីច្រើនរូបដែលកំពុងលេងឱ្យបរទេស។

ការប៉ះគ្នារវាងក្រុមដែលនឹងមានវត្តមាននៅ World Cup នារី 2023 នេះ ប្រាកដជានឹងធ្វើឱ្យកក្រើកទីលានបាល់ទាត់នៅកម្ពុជានាពេលខាងមុខមិនខាន។

May 9, 2023

តារាងចំណាត់ថ្នាក់បាល់ទាត់បុរសស៊ីហ្គេមលើកទី32 គិតត្រឹមព្រឹកថ្ងៃទី 08 ឧសភា

គិតត្រឹមព្រឹកនេះ U-22 កម្ពុជា ឈរលំដាប់លេខបីនៅក្នុងពូល A ដោយមាន 4 ពិន្ទុ និងកំពុងតែមានហានិភ័យត្រូវបានជម្រុះត្រឹមវគ្គចំពូល។

នៅពូល A កាលពីព្រលប់ថ្ងៃទី 07 ឧសភា មានការប្រែប្រួលខ្លាំង។ ក្រុមបាល់ទាត់ U-22 របស់ម្ចាស់ផ្ទះកម្ពុជា មានហានិភ័យខ្ពស់ត្រូវជម្រុះត្រឹមវគ្គចែកពូល បន្ទាប់ពីបានចាញ់ U-22 មីយ៉ាន់ម៉ា 0-2។ ចំណែកឥណ្ឌូណេស៊ីវិញ បានចូលដល់វគ្គពាក់កណ្ដាលផ្ដាច់ព្រ័ត្រ ក្រោយពីបានឈ្នះទីម័រខាងកើតក្នុងលទ្ធផល 3-0 កាលពីម្សិលមិញ។

ខាងក្រោមនេះគឺជាតារាងចំណាត់ថ្នាក់វិញ្ញាសាបាល់ទាត់បុរសនៅស៊ីហ្គេមលើកទី 32 គិតត្រឹមព្រឹកថ្ងៃទី 08 ខែឧសភា 2023៖

តារាងចំណាត់ពូល A នៃបាល់ទាត់បុរស៖

លរ	ក្រុម	ចំនួនប្រកួត	ឈ្នះ/ប្រកួត	ស្មើ/ប្រកួត	ចាញ់/ប្រកួត	គ្រាប់បាល់ឈ្នះ	គ្រាប់បាល់ចាញ់	គ្រាប់បាល់ចំណេញ	ពិន្ទុ
1	ឥណ្ឌូណេស៊ី	3	3	0	0	11	0	11	9
2	មីយ៉ាន់ម៉ា	3	2	0	1	3	5	-2	6
3	កម្ពុជា	3	1	1	1	5	3	2	4
4	ទីម័រខាងកើត	4	1	0	3	3	8	-5	3
5	ហ្វ៊ីលីពីន	3	0	1	2	1	7	-6	1

តារាងចំណាត់ពូល B នៃបាល់ទាត់បុរស៖

លរ	ក្រុម	ចំនួនប្រកួត	ឈ្នះ/ប្រកួត	ស្មើ/ប្រកួត	ចាញ់/ប្រកួត	គ្រាប់បាល់ឈ្នះ	គ្រាប់បាល់ចាញ់	គ្រាប់បាល់ចំណេញ	ពិន្ទុ
1	វៀតណាម	2	2	0	0	5	1	4	6
2	ថៃ	2	2	0	0	5	1	4	6
3	ម៉ាឡេស៊ី	2	1	0	1	5	3	2	3
4	សិង្ហបុរី	3	0	1	2	2	6	-4	1
5	ឡាវ	3	0	1	2	1	7	-6	1

May 8, 2023

Tag: ប្រកួត