បាល់ទាត់ - La Reine Media

គ្រូបង្វឹកក្រុមបាល់ទាត់ U-22 របស់ឥណ្ឌូណេស៊ី សរសើរចំពោះទីលានបាល់ទាត់នៅកម្ពុជា

គ្រូបង្វឹក Indra Sjafri នៃក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ប្រទេសឥណ្ឌូណេស៊ី មានការភ្ញាក់ផ្អើលចំពោះហេដ្ឋារចនាសម្ព័ន្ធសម្រាប់បាល់ទាត់នៅស៊ីហ្គេមលើកទី 32 របស់ម្ចាស់ផ្ទះកម្ពុជា។

U-22 ឥណ្ឌូណេស៊ី ត្រូវបានរៀបចំឱ្យហ្វឹកហាត់នៅទីលានរបស់ក្លឹបវិសាខា ក្រោយពីបានមកដល់កម្ពុជា។ ថ្វីបើទីលាននេះនៅឆ្ងាយពីសណ្ឋាគារភ្នំពេញដែលក្រុមឥណ្ឌូណេស៊ីស្នាក់នៅ ប៉ុន្តែ ជំនួសមកវិញ វាលស្មៅរបស់ទីលាននេះបានធ្វើឱ្យគ្រូបង្វឹក Indra Sjafri មានការពេញចិត្ត។

នៅក្នុងសន្និសីទសារព័ត៌មានកាលពីពេលថ្មីៗនេះ គ្រូបង្វឹក Indra Sjafri និយាយថា «ខ្ញុំមានការភ្ញាក់ផ្អើល។ ឆ្នាំ 2019 ខ្ញុំបានទៅដល់ទីនោះ វាជាវាលស្មៅសិប្បនិម្មិត តែពេលនេះគឺជាស្មៅធម្មជាតិ។ នោះគឺជាការផ្លាស់ប្ដូរធំ ហើយផ្ទៃរបស់ទីលាននេះល្អណាស់»។

គ្រូបង្វឹក Indra Sjafri ក៏ពេញចិត្តនឹងគុណភាពរបស់ទីលានប្រកួត នៅពេលរួមដំណើរជាមួយក្រុមកូនសិស្ស ធ្វើទស្សនកិច្ចកីឡដ្ឋានជាតិអូឡាំពិក ជាទីដែលនឹងមានការប្រកួតរបស់បណ្ដាក្រុមនៅពូល A ។

នៅថ្ងៃទី 29 មេសានេះ ឥណ្ឌូណេស៊ីនឹងប្រកួតបើកឆាកជាមួយហ្វ៊ីលីពីន វេលាម៉ោង 16 ល្ងាច។ ម៉ោង 19 ក្បាលព្រលបនៃថ្ងៃដដែល ម្ចាស់ផ្ទះកម្ពុជានឹងប្រកួតជាមួយទីម័រខាងកើត។

April 29, 2023

គ្រូបង្វឹករបស់ Arsenal ឆ្លងវីរុស COVID-19 ៖ ការប្រកួតរវាងក្រុម Arsenal និង Brighton នៅថ្ងៃសៅរ៍នេះ អាចនឹងត្រូវពន្យាពេល

លោក Mikel Arteta ត្រូវបានក្រុមវេជ្ជបណ្ឌិតរកឃើញថា មានផ្ទុកវីរុស COVID-19 ហើយថាគ្រូបង្វឹករូបនេះ ប្រហែលជាបានចម្លងមេរោគទៅឱ្យសមាជិកផ្សេងៗក្នុងក្រុម ក៏ដូចជាក្រុមគ្រូបង្វឹកដទៃរបស់ Arsenal ផងដែរ។

ការប្រកាសរបស់ Arsenal ដែលបានធ្វើឡើងកាលពីយប់ម្សិលមិញ បានលើកឡើងថា “មជ្ឈមណ្ឌលហ្វឹកហាត់របស់យើង (London Colney) ត្រូវបានបិទបណ្ដោះអាសន្ន បន្ទាប់ពីប្រធានក្រុមគ្រូបង្វឹក លោក Mikel Arteta ត្រូវបានធ្វើតេស្ត និងរកឃើញថា មានផ្ទុកវីរុស COVID-19។ បុគ្គលិកទាំងអស់ក្នុងក្លឹប ដែលធ្លាប់បានប្រស្រ័យទាក់ទងផ្ទាល់ជាមួយ Mikel ក្នុងពេលកន្លង នឹងត្រូវបង្ខាំងខ្លួននៅដាច់ដោយឡែក ទៅតាមការណែនាំរបស់រដ្ឋាភិបាល”។

បច្ចុប្បន្ន គេមិនទាន់ដឹងថា គ្រូបង្វឹករូបនេះ បានឆ្លងមេរោគពីអ្នកណានៅឡើយ ប៉ុន្តែ គេសង្ស័យថា គ្រូបង្វឹករូបនេះ ប្រហែលជាបានឆ្លងពីលោក Evangelos Marinakis។ មុននេះ លោក Evangelos Marinakis ដែលជាម្ចាស់ក្លឹប Olympiacos ធ្លាប់បានជួបផ្ទាល់ជាមួយក្រុមមេដឹកនាំ ក៏ដូចជាកីឡាករមួយចំនួនរបស់ក្លឹប Arsenal នៅពេលដែលក្លឹបទាំង2នេះ បានប្រកួតជាមួយគ្នានៅ Europa League កាលពីខែកុម្ភៈ។ ក្រោយមកមិនយូរប៉ុន្មាន បន្ទាប់ពីការប្រកួតតង់ទី2 នៅ Emirates លោក Marinakis ប្រកាសថា លោកមានផ្ទុកវីរុស COVID-19។ បញ្ហានេះក៏បានធ្វើឱ្យការប្រកួតបន្ថែមម៉ោងរវាង Arsenal និង Man City កាលពីពាក់កណ្ដាលសប្ដាហ៍នេះ ត្រូវបានពន្យាពេលផងដែរ។

សារព័ត៌មាន Sky Sports បានឱ្យដឹងថា តាមគម្រោង ក្រុម Arsenal នឹងត្រូវប្រកួតជាមួយក្រុម Brighton នៅថ្ងៃសៅរ៍ខាងមុខនេះ នៅក្នុងក្របខណ្ឌ English Premier League។ ប៉ុន្តែ ដោយមានការប្រែប្រួលទាក់ទិននឹងរោគរាតត្បាត COVID-19 នៅក្នុងក្លឹប Arsenal ការប្រកួតនោះប្រាកដជាត្រូវបានលើកពេលមិនខាន។

នៅព្រឹកថ្ងៃសុក្រ(ម៉ោងក្នុងស្រុក) គណៈកម្មការនៃពានរង្វាន់បាល់ទាត់ English Premier League នឹងត្រូវបើកកិច្ចប្រជុំបន្ទាន់មួយដើម្បីកែសម្រួលកាលបរិច្ឆេទនៃការប្រកួត៕

March 13, 2020

ប្រទេសអធិរាជបាល់ទាត់ក្នុងទ្វីបអាស៊ី ប្រកាសផ្អាកការប្រកួតលីកកំពូលរៀងៗខ្លួន ព្រោះមេរោគកូរ៉ូណាកំពុងរុករានខ្លាំង

ការប្រកួតបាល់ទាត់ក្របខ័ណ្ឌលីកកំពូលរបស់ប្រទេសអធិរាជបាល់ទាត់ទ្វីបអាស៊ី និងអាស៊ាន ដូចជាចិន ជប៉ុន កូរ៉េខាងត្បូង ថៃ និងវៀតណាម បានផ្អាកការប្រកួតរបស់ខ្លួនទាំងអស់ជាបណ្ដោះអាសន្នហើយ។

មូលហេតុនៃការផ្អាកការប្រកួតបណ្តោះអាសន្ននេះ គឺដោយសារតែការឆ្លងរាតត្បាតនៃមេរោគវីរុស COVID-19 ដែលកំពុងតែបង្កើនល្បឿនឆ្លងរបស់ខ្លួននៅក្នុងប្រទេសទាំងនោះ។

ចំពោះការបរិច្ឆេទក្នុងការបន្តការប្រកួតឡើងវិញនោះ នៅមិនទាន់ច្បាស់នៅឡើយទេ ដោយត្រូវរង់ចាំអ៊ុតមើលថាតើ វីរុសនេះមានការថមថយការឆ្លង ឬក៏យ៉ាងណាសិន។

ទោះជាយ៉ាងនេះក្តី ក្នុងដំណាក់កាលដំបូងនេះ ពួកគេបានប្រកាសផ្អាកការប្រកួតទាំងនោះត្រឹមថ្ងៃទី15 ខែមីនាសិន ហើយរង់ចាំមើលស្ថានការណ៍ជាបន្តទៀត៕

February 28, 2020

នៅតែលេចធ្លោ! ធារី ចន្ថាប៊ីន បង្ហាញទម្រង់លេងល្អ ជួយក្រុមថ្មីឱ្យឈ្នះពាន1

កីឡាករជម្រើសជាតិកម្ពុជា ធារី ចន្ថាប៊ីន បានជួយឱ្យក្លិបថ្មីរបស់ខ្លួន គឺក្លឹប Perak FA ឈ្នះពានរង្វាន់ Community Shield នៅប្រទេសម៉ាឡេស៊ី។

កីឡាករខ្សែបម្រើការពារកូនកាត់ខ្មែរ-បារាំងរូបនេះ បានធ្វើឱ្យគ្រូបង្វឹកចាប់អារម្មណ៍ និងបានដាក់រូបគេឱ្យចូលលេងជាជម្រើសដំបូងស្ទើរតែគ្រប់ការប្រកួតក្នុងពានរង្វាន់មួយនេះ។

គួរបញ្ជាក់ផងដែរថា ពានរង្វាន់ខាងលើនេះ ជាពានរង្វាន់មុនរដូវកាលមួយដែលធ្វើឡើងដោយក្លិប Kedah FC នឹងមានក្លិបមកពីលីកកំពូលម៉ាឡេស៊ីចំនួន6 ចូលរួមប្រកួតប្រជែង៕

February 18, 2020

ជំនួបជើងទី១ អគ្គស្នងការនគរបាលជាតិ លត់វេស្ទើន ២-០ ក្នុងពានបាល់ទាត់ Hun Sen Cup

កាលពីម្សិលមិញនេះ នៅកីឡដ្ឋានស្ដាតចាស់ក្រុមបាល់ទាត់អគ្គស្នងការដ្ឋាននគរបាលជាតិ ប្រកួតឈ្នះក្រុម វេស្ទភ្នំពេញ ក្នុងដំណាក់កាលទី៣ នៃពាន Hun Sen Cup 2017 ជើងទី១។ ជ័យជម្នះបើកទំព័ររដូវកាលថ្មី ដោយ សម្រេចដោយកីឡាករ អ៊ុល រ៉ាវី នៅនាទីទី៣៩ និងកីឡាករ នួន បូរី នៅនាទីទី៧៥ ។

ជាបណ្ដោះអាសន្នក្រុមអគ្គស្នងការដ្ឋាននគរបាលជាតិ គឺមានមានគ្រាប់បាល់ចំណេញ ២គ្រាប់ក្នុងដៃ ប៉ុន្ដែត្រូវចាំអ៊ុតលទ្ធផលនៃជំនួបជើងទី២ ដែលនឹងធ្វើឡើងលើទឹកដីវេស្ទើនវិញម្ដង ដើម្បីកាត់សេចក្ដី តើក្រុមណានឹងបន្ដដំណើរទៅដំណាក់កាលទី៤ ខណៈប៉ូលិសទាមទារត្រឹមស្មើ រីឯវេស្ទើន ត្រូវការឈ្នះលើសពី ២គ្រាប់នោះ?៕

May 5, 2017

Tag: បាល់ទាត់

គ្រូបង្វឹក​​ក្រុម​បាល់​ទាត់ U-22 របស់​ឥណ្ឌូណេស៊ី សរសើរ​ចំពោះ​ទីលាន​បាល់ទាត់​នៅ​កម្ពុជា

នៅតែលេចធ្លោ! ធារី ចន្ថាប៊ីន បង្ហាញទម្រង់លេងល្អ ជួយក្រុមថ្មីឱ្យឈ្នះពាន1

ជំនួបជើងទី១ អគ្គស្នងការនគរបាលជាតិ លត់វេស្ទើន ២-០ ក្នុងពានបាល់ទាត់ Hun Sen Cup

គ្រូបង្វឹកក្រុមបាល់ទាត់ U-22 របស់ឥណ្ឌូណេស៊ី សរសើរចំពោះទីលានបាល់ទាត់នៅកម្ពុជា