បញ្ហា - La Reine Media

ទឹកធ្លាក់សិប្បនិម្មិតដែលខ្ពស់ជាងគេបង្អស់លើពិភពលោក

(អ៊ីតាលី) – ទឹកធ្លាក់ Marmore ដែលមានកម្ពស់ 165 ម៉ែត្រ បានកើតឡើង នៅពេលប្រជាជនរ៉ូមបុរាណ កែប្រែទន្លេ Velino កាលពី 2,200 ឆ្នាំមុន។

ទឹកធ្លាក់បីជាន់ដ៏ស្រស់ស្អាត និងមានឈ្មោះថា Marmore នេះ ស្ថិតនៅចម្ងាយពីទីក្រុង Terni ក្នុងតំបន់ Umbria របស់ប្រទេសអ៊ីតាលី ប្រហែល 8 គីឡូម៉ែត្រទៅទិសខាងកើត។

ភាពល្បីល្បាញរបស់ទឹកធ្លាក់នេះ មិនត្រឹមតែស្ថិតនៅត្រង់ភាពអស្ចារ្យរបស់វា ប៉ុន្តែក៏កើតមានដោយសារនេះជាលទ្ធផលនៃអន្តរាគមន៍របស់មនុស្ស ទៅលើធម្មជាតិ។ នេះបើតាមការផ្សាយរបស់ Amusing Planet។

កាលពី 2,200 ឆ្នាំមុន ក្នុងតំបន់ខាងលើ ពុំមានទឹកធ្លាក់ណាមួយឡើយ។ លើទន្លេ Velino ជាទីដែលមានទឹកធ្លាក់ Marmore មានខ្សែទឹកខុសពីបច្ចុប្បន្ន ដោយវាហូរទៅកាន់បឹងភក់មួយនៅវាលរាប Reiti។ ទឹកដែលស្ថិតនៅក្នុងបឹងភក់នេះ មិនល្អសម្រាប់សុខភាព ដូច្នេះ មន្ត្រីចក្រភពរ៉ូមបុរាណ Manius Curius Dentatus ក៏ចេញបញ្ជាឱ្យជីកព្រែកមួយខ្សែដែលហៅថា ជ្រលង Curiano កាលពីឆ្នាំ 271 មុនគ្រិស្តសករាជ ដើម្បីបង្ហូរទឹកពីបឹងភក់ ឱ្យធ្លាក់ទៅលើជញ្ជាំងថ្មធម្មជាតិនៅ Marmore បង្កើតបានជាទឹកធ្លាក់។ ចាប់ពីពេលនេះមក ទឹកក៏ហូរចូលទន្លេ Nera នៅខាងក្រោម។

ក៏ប៉ុន្តែ មិនយូរប៉ុន្មាន បញ្ហាក៏បានកើតឡើងខុសពីការរំពឹងទុក ដោយសារតែដំណោះស្រាយខាងលើបាននាំឱ្យមានទឹកជំនន់នៅជ្រលងភ្នំ Reiti និង Terni។ បញ្ហានេះក៏ធ្វើឱ្យមានការខ្វែងគំនិតគ្នារវាងប្រជាជននៅ Reiti និង Terni ផងដែរ។

រហូតដល់សតវត្សរ៍ទី 15 ទើបសង្ឃរាជ Gregory XII ចេញបញ្ជាឱ្យជីកព្រែកថ្មីដើម្បីដោះស្រាយបញ្ហា។ ការជួសជុល និងធ្វើឱ្យប្រសើរឡើងនូវព្រែកជីកនេះ ត្រូវបានសង្ឃរាជ Paul III ដឹកនាំការអនុវត្តនៅពាក់កណ្ដាលសតវត្សរ៍ទី 16។ ការធ្វើឱ្យប្រសើរឡើងលើកចុងក្រោយដែលបានជួយឱ្យទឹកធ្លាក់ Marmore មានរូបរាងដូចសព្វថ្ងៃ គឺអនុវត្តដោយស្ថាបត្យករ Andrea Vici ក្រោមការដឹកនាំរបស់សង្ឃរាជ Pius V1 នៅចុងសតវត្សរ៍ទី 18៕

March 19, 2024

ណាសាទទួលបានរលកសញ្ញាអាចអានបាន ពីអវកាសចម្ងាយ 24,000 លានគីឡូម៉ែត្រ

ក្រោយពីជួបបញ្ហាផ្នែកទំនាក់ទំនងជាមួយយានអវកាស Voyager 1 អស់មួយរយៈពេល ទីភ្នាក់ងារអវកាសអាម៉េរិក (ណាសា – NASA) ក៏ទទួលបានរលកសញ្ញាដែលមានអត្ថន័យ ពីយានអវកាសដែលកំពុងហោះហើរក្នុងតំបន់អន្តរតារា។

Live Science កាលពីថ្ងៃទី 15 មីនា បានចេញផ្សាយថា បន្ទាប់ពីភាពតានតឹងអស់រយៈពេល 4 ខែ ចុងក្រោយ ណាសាក៏បានទទួលរលកសញ្ញាដែលអាចអានបាន ពីយានអវកាស Voyager។ ចាប់ពីខែវិច្ឆិកា 2023 យាន Voyager 1 ដែលមានអាយុជិត 50 ឆ្នាំ បានជួបបញ្ហាកុំព្យូទ័រនៅលើយាន។ បើទោះជាយាននេះនៅតែបញ្ជូនរលកសញ្ញាវិទ្យុមកកាន់ផែនដីជាទៀងទាត់ ប៉ុន្តែរលកសញ្ញាទាំងនោះមិនមានទិន្នន័យដែលមានប្រយោជន៍ ធ្វើឱ្យអ្នកវិទ្យាសាស្ត្រព្រួយបារម្ភ។

ប៉ុន្តែ កាលពីថ្ងៃទី 01 មីនា យាន Voyager 1 ក៏បានឆ្លើយតបដោយរលកសញ្ញាថ្មីដែលវិស្វករណាសាអាចយល់បាន បន្ទាប់ពីពួកគេបានបញ្ជូនរលកវិទ្យុបញ្ជាពីផែនដី។ ពួកគេយល់ថា ព័ត៌មាននេះអាចជួយឱ្យវិស្វករនៅណាសា បកស្រាយបាននូវបញ្ហាទំនាក់ទំនងរបស់ Voyager 1 នាពេលកន្លង។

ក៏ប៉ុន្តែ ណាសាត្រូវការពេលវេលាបន្ថែមទៀតដើម្បីបកស្រាយរកមូលហេតុនៃបញ្ហា ដោយសារតែរយៈពេលនៃការបញ្ជូនរលកសញ្ញាពីផែនដី និងទទួលពីយានដែលកំពុងស្ថិតនៅចម្ងាយជាង 24 ពាន់លានគីឡូម៉ែត្រ ស៊ីពេលអស់ 45 ម៉ោង៕

March 16, 2024

រ៉ុក្កែត Space One របស់ជប៉ុន ផ្ទុះខ្ទេច ពេលទើបហោះឡើងពីប្រព័ន្ធទម្រ

ការបាញ់បង្ហោះរ៉ុក្កែតជាលើកដំបូងរបស់ Space One ដែលជាក្រុមហ៊ុនធុរកិច្ចថ្មី មានមូលដ្ឋាននៅប្រទេសជប៉ុន បានទទួលបរាជ័យ នៅពេលរ៉ុក្កែតផ្ទុះ ខណៈទើបហោះឡើងពីជើងទ្រ។

កាលពីព្រឹកថ្ងៃទី 13 មីនា ក្រុមហ៊ុនអវកាសជប៉ុន បានបាញ់បង្ហោះរ៉ុក្កែតមួយគ្រឿងដែលមានឈ្មោះថា KAIROS លេខ 1 ដើម្បីនាំយកផ្កាយរណបសិប្បនិម្មិតទៅកាន់គន្លងគោចរ។

បើសិនបានឆ្លងផុតឧបសគ្គនេះ Space One នឹងក្លាយជាក្រុមហ៊ុនឯកជនដំបូងគេរបស់ជប៉ុន ដែលបាញ់បង្ហោះរ៉ុក្កែតឡើងទៅកាន់គន្លងតារាវិថីដោយជោគជ័យ។

នៅក្នុងដំណាក់កាលត្រៀម ក្រុមការងារមិនបានរកឃើញបញ្ហាណាមួយឡើយ។ រ៉ុក្កែតដែលមាន 4 ជាន់ ប្រវែង 18 ម៉ែត្រ និងទម្ងន់ 23 តោន របស់ Space One ក៏ហោះឡើងត្រូវទៅតាមការគ្រោងទុក នៅវេលាម៉ោង 11:01 (ម៉ោងនៅប្រទេសជប៉ុន)។

ក៏ប៉ុន្តែ រ៉ុក្កែតបានផ្ទុះ បន្ទាប់ពីហោះឡើងពីប្រព័ន្ធទម្របានតែប៉ុន្មានវិនាទីប៉ុណ្ណោះ។ បំណែកខ្លះរបស់វាបានធ្លាក់ទៅលើភ្នំនៅក្បែរនោះ ចំណែកខ្លះទៀតក៏ធ្លាក់ទៅលើសមុទ្រ។

នេះត្រូវបានចាត់ទុកថា ជាបរាជ័យដ៏ធំមួយសម្រាប់ការប្រឹងប្រែងរបស់ជប៉ុន ដើម្បីចូលប្រកួតប្រជែងក្នុងទីផ្សារបាញ់បង្ហោះផ្កាយរណប ដែលមានសក្តានុពលក្នុងការរកផលចំណេញ។

March 14, 2024

ផ្លូវដែលវែងជាងគេបង្អស់លើពិភពលោក

យោងតាមសៀវភៅកំណត់ត្រាពិភពលោក Guinness ផ្លូវ Pan-American Highway គឺជាផ្លូវល្បឿនលឿនដែលវែងជាងគេលើពិភពលោក ដោយមានប្រវែង 30,000 គីឡូម៉ែត្រ រាប់ចាប់ពី Alaska របស់សហរដ្ឋអាម៉េរិក រហូតដល់តំបន់ចុងភាគខាងត្បូងរបស់អាហ្សង់ទីន។

ការផ្ដួចផ្ដើមគំនិតស្ដីពីផ្លូវល្បឿនលឿនតភ្ជាប់ទ្វីបអាម៉េរិក ត្រូវបានលើកឡើងជាលើកដំបូងកាលពីឆ្នាំ 1923 ដោយសហរដ្ឋអាម៉េរិក។ ឆ្នាំ 1924 ការចរចារវាងសហរដ្ឋអាម៉េរិក និងបណ្ដាប្រទេសនៅតំបន់អាម៉េរិកឡាទីន ក៏សម្រេចបានកិច្ចព្រមព្រៀងរួម និងត្រូវបានចុះហត្ថលេខាកាលពីឆ្នាំ 1937។

ក៏ប៉ុន្តែ ជាក់ស្ដែង មកដល់បច្ចុប្បន្ន ផ្លូវល្បឿនលឿន Pan-American នេះ មិនទាន់ត្រូវបានតភ្ជាប់គ្នាទាំងស្រុងនៅឡើយ។ តំបន់មួយដែលមិនទាន់តភ្ជាប់នឹងផ្លូវល្បឿនលឿននេះ ស្ថិតនៅ Darien Gap ប្រវែង 160 គីឡូម៉ែត្រ ដែលជាចំណុចភ្ជាប់រវាងប្រទេសប៉ាណាម៉ា និងប្រទេសកូឡុំប៊ី។ តំបន់ Darien Gap ពុំទាន់មានផ្លូវណាមួយរត់ឆ្លងកាត់ ព្រោះតែជាតំបន់ព្រៃ មានភ្លៀងធ្លាក់ទៅតាមរដូវ និងបញ្ហាបរិស្ថាន ហើយជាពិសេស តំបន់នេះត្រូវបានគេចាត់ទុកថា សម្បូរគ្រោះថ្នាក់ អសន្តិសុខ ព្រោះតែមានក្រុមប្រដាប់អាវុធ ក្រុមជួញដូរគ្រឿងញៀនជាច្រើនធ្វើសកម្មភាព។

ផ្លូវល្បឿនលឿន Pan-American និងតំបន់ដែលមិនទាន់តភ្ជាប់

បើទោះជាតំបន់ខាងលើមិនត្រូវបានភ្ជាប់ក៏ដោយ ផ្លូវល្បឿនលឿន Pan-American នៅតែរក្សាបានកំណត់ត្រាពិភពលោក Guinness សម្រាប់ «ផ្លូវវែងជាងគេលើពិភពលោកដែលអាចបើកបរឆ្លងកាត់»។

March 11, 2024

ចិន ចាកផុតពីបញ្ហាបរិត្តផរណា ដែលជួយបន្ធូរបន្ថយសម្ពាធលើសេដ្ឋកិច្ច

ជាលើកដំបូងក្រោយរយៈពេលជិតកន្លះឆ្នាំ តម្លៃទំនំនិញប្រើប្រាស់នៅប្រទេសចិន បានកើនឡើងជាថ្មី ជួយឱ្យសេដ្ឋកិច្ចប្រទេសនេះចាកផុតពីបរិត្តផរណា។

កាលពីថ្ងៃទី 09 មីនា វិទ្យាស្ថានជាតិស្ថិតិចិន ប្រកាសទិន្នន័យឱ្យដឹងថា សន្ទស្សន៍ថ្លៃទំនិញ (CPI) ប្រទេសនេះ កើន 0.7% ក្នុងខែកុម្ភៈ។ នេះគឺជាលើកដំបូងក្នុងអំឡុងជិតកន្លះឆ្នាំ ដែល CPI ចិន កើនឡើង។

មុននោះ ប្រទេសចិនបានឃើញបរិត្តផរណាក្នុងរយៈពេល 4 ខែបន្តបន្ទាប់។ ខែមករា ឆ្នាំ 2024 CPI ចិន ធ្លាក់ចុះ 0.8% ដែលនេះគឺជាជាតួលេខធ្លាក់ចុះជ្រៅបំផុតក្នុងរង្វង់ 15 ឆ្នាំកន្លង។

បរិត្តផរណា (ពាក្យអង់គ្លេសថា Deflation) គឺជាពាក្យសំដៅទៅលើការធ្លាក់ថ្លៃជារួមរបស់ទំនិញ និងសេវាកម្ម។ បរិត្តផរណា គឺជាការដកចំនួនរូបិយវត្ថុមួយភាគ ចេញពីទីផ្សារដែលលើសចំនួនត្រូវការចរាចរណ៍របស់សាច់ប្រាក់ ដើម្បីធ្វើឲ្យចំនួនរូបិយវត្ថុសមាមាត្រនឹងតម្រូវការចាំបាច់សម្រាប់ចរាចរណ៍។ នេះមិនមែនជាប្រការល្អសម្រាប់សេដ្ឋកិច្ចឡើយ ព្រោះថា នៅពេលអ្នកប្រើប្រាស់ និងក្រុមហ៊ុននានាពន្យារពេលលើការផ្អាកការចំណាយដើម្បីរង់ចាំទំនិញ ឬសេវាកម្មធ្លាក់ថ្លៃបន្ថែមទៀត សកម្មភាពសេដ្ឋកិច្ចនឹងត្រូវរឹតត្បិត។

ធៀបនឹងខែមុន CPI ចិន ក្នុងខែកុម្ភៈបានកើន 1%។ ល្បឿននេះខ្ពស់ជាងការព្យាកររបស់ក្រុមអ្នកសេដ្ឋកិច្ចដែលត្រូវបានចុះផ្សាយដោយ Reuters។

តួលេខថ្មីបំផុតនេះបានបន្ថយសម្ពាធមួយផ្នែកសម្រាប់សេដ្ឋកិច្ចចិន នៅក្នុងស្ថានភាពតម្រូវការក្នុងស្រុកធ្លាក់ចុះ អចលនទ្រព្យមិនទាន់ចាកផុតពីវិបត្តិ និងបំណុលរបស់រដ្ឋនៅតែស្ថិតក្នុងកម្រិតខ្ពស់៕

March 10, 2024

Facebook និង Messenger ជួបបញ្ហាធំ៖ អ្នកលេងខ្លះភ័យខ្លាចត្រូវគេ «ហែក»

អ្នកប្រើប្រាស់ Facebook និង Messenger មួយចំនួនមានការព្រួយបារម្ភខ្លាំងនៅពេលគណនីរបស់ពួកគេត្រូវចាកចេញ និងមិនអាចចូលប្រើវិញបាន ទាំងនៅលើ App ទាំងនៅលើវ៉ែប។

ម៉ោងប្រហែល 22 និង 30 នាទីយប់កន្លងទៅ Facebook និង Messenger របស់អ្នកប្រើប្រាស់ជាច្រើន ត្រូវបានធ្វើឱ្យចាកចេញដោយឯកឯង។ នៅពេលព្យាយាមចូលប្រើឡើងវិញ អ្នកខ្លះតែងតែទទួលបានសារដែលប្រាប់ថា «ទំព័រនេះមិនមាន តំណភ្ជាប់បានខូច ឬត្រូវបានលុប»។

បញ្ហាខាងលើបានធ្វើឱ្យអ្នកប្រើប្រាស់ភ័យស្លន់ស្លោ ព្រោះតែយល់ថា គណនី Facebook របស់ពួកគេ ត្រូវបានគេហែកចូលគ្រប់គ្រង។ «ក្រោយពីត្រូវខ្ទាតចេញពីគណនី និងមិនអាចប្រើវិញបាន ខ្ញុំគិតថា Facebook ពីរបីគណនីរបស់ខ្ញុំ ប្រាកដជាត្រូវគេលួចចូលប្រើហើយ» ផៃ ស្រីអ៊ីត អ្នកលេងបណ្ដាញសង្គមម្នាក់នៅភ្នំពេញ ឱ្យដឹងដូច្នេះ។ ស្រីអ៊ីត ក៏ប្រញាប់ចូលប្រើ App មួយចំនួនផ្សេងទៀតរបស់ Meta ដើម្បីស្វែងយល់ពីស្ថានភាពរបស់ ប៉ុន្តែ នៅតែមិនអាចប្រើបាន។

ក្រោយពីបញ្ហានេះកើតឡើងបានប៉ុន្មាននាទី អ្នកប្រើប្រាស់ជាច្រើនត្រូវបង្ខំចិត្តទូរស័ព្ទទៅកាន់មិត្តភ័ក្ដិ ដើម្បីសួរនាំ។ អ្នកខ្លះថា ប្រហែលជា Facebook មានបញ្ហា ឬកំពុងបន្ទាន់សម័យ ខណៈដែលអ្នកខ្លះថា ប្រហែលជា Facebook ត្រូវបានគេហែក និងប្រាប់ឱ្យឈប់ចុះឈ្មោះចូល ព្រោះលេខសម្ងាត់អាចនឹងត្រូវគេដឹង។

បញ្ហាមួយក្នុងចំណោមបញ្ហាដែលបានកើតឡើងលើបណ្ដាញសង្គមរបស់ Meta

លើទំព័រ Downdetector ដែលជាឧបករណ៍តាមដានស្ថានភាពរបស់សេវាអ៊ីនធើណិត ទទួលបានរបាយការណ៍ស្ដីពីកំហុសពីអ្នកប្រើប្រាស់បណ្ដាញសង្គមនានារបស់ Meta នៅទូទាំងពិភពលោក កើនជិតដល់ 400,000 លើក រួមទាំង Facebook, Messenger, Instagram, Threads លើកលែងតែ WhatsApp។

នៅវេលាម៉ោង 1 ថ្ងៃទី 06 មីនា គណនីផ្លូវការរបស់ Facebook បានប្រកាសព័ត៌មាន ប៉ុន្តែមិនបានបកស្រាយអ្វីឱ្យបានច្បាស់លាស់។ «យើងបានត្រលប់មកវិញ។ ពិតជាសូមអភ័យទោសចំពោះអ្នកទាំងឡាយដែលមិនអាចចូលប្រើ Facebook នៅថ្ងៃ» គណនីខាងលើសរសេរដូច្នេះ។

Andy Stone ប្រធានផ្នែកសារព័ត៌មានប្រចាំក្រុមហ៊ុន Meta ឱ្យដឹងថា បញ្ហាកើតឡើងពី «កំហុសបច្ចេកទេសមួយ» ប៉ុន្តែមិនបានរៀបរាប់លម្អិត។

បញ្ហាដូចគ្នានេះរបស់ក្រុមហ៊ុន Meta ក៏ធ្លាប់បានកើតឡើងពីរលើកមកហើយ ក្នុងនោះមានម្ដងក្នុងឆ្នាំ 2019 និងម្ដងក្នុងឆ្នាំ 2021។

March 6, 2024

ក្រសួងពាណិជ្ជកម្ម៖ មន្ត្រីជំនាញរាប់សិបនាក់នឹងចាំឆ្លើយសំណួររបស់សាធារណជនតាមទូរស័ព្ទ

ក្រសួងពាណិជ្ជកម្ម នឹងដាក់ឱ្យដំណើរការជាផ្លូវការប្រព័ន្ធទទួលទូរស័ព្ទសាធារណៈរបស់ក្រសួងពាណិជ្ជកម្ម ដែលមានលេខ 1266 ដោយមានមន្ត្រីជំនាញចំនួន 60 នាក់ ដើម្បីឆ្លើយតបនឹងចម្ងល់ ឬបញ្ហានានា ក្នុងពេលឆាប់ៗខាងមុខ។

កាលពីរសៀលថ្ងៃទី 04 ខែមីនា ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ថា ប្រព័ន្ធទូរស័ព្ទសាធារណៈ របស់ក្រសួងពាណិជ្ជកម្ម ដែលមានលេខ1266 នឹងក្លាយទៅជាភ្នាក់ងារ Call Center ក្នុងការឆ្លើយតបរាល់ចម្ងល់ ឬបញ្ហានានា ដោយបងប្អូនគ្រាន់តែចុចលេខ 1266 ភ្នាក់ងារស្វ័យប្រវត្តនឹងទទួលការហៅចូលដោយឥតគិតថ្លៃ និងស្នើជ្រើសរើសភាសា ក្នុងនោះ លេខ 1 គឺជាភាសាខ្មែរ និងលេខ 2 គឺជាភាសាអង់គ្លេស។

បន្ទាប់ពីនេះ ភ្នាក់ងារស្វ័យប្រវត្តិនឹងណែនាំបញ្ជីព័ត៌មាន និងលេខបណ្ដាញតភ្ជាប់ ដែលសាធារណៈជនអាចភ្ជាប់ និងធ្វើការសន្ទនាជាមួយភ្នាក់ងារទទួលព័ត៌មានរបស់ក្រសួងដោយផ្ទាល់។ បណ្ដាញតភ្ជាប់ទៅកាន់ព័ត៌មានសំខាន់ៗ មានដូចខាងក្រោម៖

– លេខ (1) សម្រាប់ព័ត៌មានទូទៅ

– លេខ (2) សម្រាប់ព័ត៌មានអំពីការចុះបញ្ជីពាណិជ្ជកម្ម

– លេខ (3) សម្រាប់ព័ត៌មានអំពីការចុះបញ្ជីម៉ាក

– លេខ (4) សម្រាប់ព័ត៌មានអំពីការនាំចេញ-នាំចូលទំនិញ ឬ CO

– លេខ (5) សម្រាប់ព័ត៌មានអំពីកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.)

– លេខ (6) សម្រាប់ព័ត៌មានអំពីសេវាពាណិជ្ជកម្មផ្សេងៗរបស់ក្រសួងពាណិជ្ជកម្ម ដូចជាប្រតិបត្តិការដែលមានកិច្ចធានា និងព័ត៌មានអំពីការតាំងពិព័រណ៌។

មន្ត្រីជំនាញរបស់ក្រសួងពាណិជ្ជកម្ម រង់ចាំទទួលទូរស័ព្ទ និងធ្វើការឆ្លើយតប នៅរៀងរាល់ម៉ោង និងថ្ងៃធ្វើការ ចាប់ពីថ្ងៃច័ន្ទ ដល់ថ្ងៃសុក្រ វេលាម៉ោង 8 ព្រឹក ដល់ម៉ោង 5 រសៀល។

March 5, 2024

ស្ថានភាពបច្ចុប្បន្នរបស់យានរុករកភាវៈរស់របស់ណាសាលើភពអង្គារ

មូលហេតុពិតប្រាកដដែលនៅពីក្រោយ «ការស្លាប់» របស់យានស្វែងរកភាវៈរស់ Ingenuity ទើបតែត្រូវបានបង្ហើបឱ្យដឹងនៅក្នុងរូបដែលថតដោយមិត្តរួមការងាររបស់វា។

Ingenuity គឺជាយានស្រាវជ្រាវដែលមានរូបរាងជាកូនឧទ្ធម្ភាគចក្រ ដែលបានចុះចតជាមួយនឹងយាន Perseverance លើផ្ទៃភពអង្គារ កាលពីខែកុម្ភៈ 2021។

Ingenuity គឺជាអ្នកនាំផ្លូវរបស់ Perseverance ដែលមានមាឌធំជាង និងបំពាក់ឧបករណ៍វិទ្យាសាស្ត្រច្រើន។ បន្ទាប់ពី Ingenuity បានបញ្ចប់បេសកកម្មរបស់ខ្លួនដោយឧបទ្ទវហេតុកាលពីចុងខែមករាឆ្នាំនេះ ណាសានៅតែបន្តស្វែងរកមូលហេតុនៃបញ្ហានេះ។

មុននោះ ណាសាយល់ថា បញ្ហាបាក់ស្លាបចក្រ គឺជាមូលហេតុដែលនាំឱ្យ Ingenuity ជួបត្រូវ «ស្លាប់»។ វាទំនងជាបានធ្លាក់ពីកម្ពស់មួយម៉ែត្រ នៅពេលកំពុងចុះចត នាំឱ្យស្លាបចក្រត្រូវបាក់។

ក៏ប៉ុន្តែ រូបថតថ្មីដែលត្រូវបានថត និងបញ្ជូនមកកាន់ផែនដីដោយយាន Perseverance ក្រោយពីការស្វែងរកមិត្តរួមការងារ អស់មួយរយៈពេល បង្ហាញថា ស្ថានភាពរបស់ Ingenuity ធ្ងន់ធ្ងរជាងការសន្និដ្ឋានមុននេះទៅទៀត។ នេះបើតាម Space.com។

នៅក្នុងរូបថតថ្មីបំផុត Ingenuity បានបាត់បង់ស្លាបចក្រមួយទាំងស្រុង នៅក្នុងចំណោមស្លាបចក្រទាំងបួនរបស់វា។

ណាសាឱ្យដឹងថា សេណារីយ៉ូដែលអាចកើតឡើងបំផុតគឺ ដោយសារតំបន់ដែល Ingenuity ចុះចតចុងក្រោយ និងបានជួបបញ្ហានេះ គឺសុទ្ធតែជាដីខ្សាច់ ខណៈវាមិនអាចមើលឃើញផ្ទៃដីតាមភាពជាក់ស្ដែង នៅពេលចុះចត នាំឱ្យវាត្រូវផ្អៀង ហើយស្លាបក៏ត្រូវកាប់ទៅលើដីពេញទំហឹង។

បើទោះជានោះគឺជាដំណឹងអាក្រក់ ប៉ុន្តែ Ingenuity បានបង្ហាញអំពីសមត្ថភាពដ៏អស្ចារ្យ បន្ទាប់ពីដំណើរការបានពីរឆ្នាំនៅលើភពអង្គារ គ្រាដែលគម្រោងដំបូង ណាសាបានរំពឹងថា Ingenuity អាចដំណើរការល្អក្នុងរយៈពេលតែ 30 ថ្ងៃប៉ុណ្ណោះ៕

នៅក្នុងរូបថតថ្មីបំផុត Ingenuity បានបាត់បង់ស្លាបចក្រមួយទាំងស្រុង នៅក្នុងចំណោមស្លាបចក្រទាំងបួនរបស់វា។

March 2, 2024

គុយបា នឹងដំឡើងតម្លៃសាំងរហូតដល់ 500%

អាជ្ញាធរប្រទេសគុយបា នឹងដំឡើងតម្លៃសាំងរហូតដល់ 500% ចាប់ពីថ្ងៃទី 01 ខែមីនា ឆ្នាំ 2024 យឺតជាងមួយខែបើធៀបនឹងគម្រោងដំបូង ប៉ុន្តែតម្លៃសំបុត្រយានជំនិះសាធារណៈនៅតែដដែល។

រដ្ឋមន្ត្រីហិរញ្ញវត្ថុគុយបា Vladimir Regueiro កាលពីថ្ងៃទី 28 កុម្ភៈ ប្រកាសថា ទន្ទឹមនឹងការដំឡើងតម្លៃសាំង តម្លៃអគ្គិសនីក៏នឹងត្រូវដំឡើង 25% ធៀបនឹងដំណាក់កាលដូចដដែល ចំពោះអតិថិជនដែលប្រើប្រាស់អគ្គិសនីច្រើននៅក្នុងតំបន់ប្រជុំជន។ ក៏ប៉ុន្តែ ថ្លៃធ្វើដំឡើងតាមយានជំនិះសាធារណៈនឹងនៅតែរក្សាដូចដើម ហើយការដំឡើងថ្លៃឧស្ម័នធម្មជាតិក៏ត្រូវពន្យារពេល។

រដ្ឋាភិបាលគុយបា ដែលជាអ្នកផ្ដល់ការឧបត្ថម្ភទំនិញ និងសេវាកម្មសំខាន់ៗស្ទើរតែទាំងអស់ ប្រកាសដំឡើងថ្លៃសាំងខ្ពស់ជាងមុន 5 ដង រាប់ចាប់ពីថ្ងៃទី 01 ខែកុម្ភៈ ដើម្បីរួមចំណែកកាត់បន្ថយឱនភាពថវិកាជាតិ។ តម្លៃសាំងធម្មតាមួយលីត្រនឹងកើនពី 25 ប៉េសូ (0.2 ដុល្លារអាម៉េរិក) ឡើងដល់ 132 ប៉េសូ ខណៈដែលសាំងល្អបំផុតកើនពី 30 ប៉េសូ ឡើងដល់ 156 ប៉េសូ ខ្ពស់ជាង 5 ដង ធៀបនឹងតម្លៃចាស់។ ទេសចរបរទេសដែលមកលេងប្រទេសគុយបា នឹងត្រូវទូទាត់ថ្លៃសាំងដោយរូបិយប័ណ្ណបរទេស។

ក៏ប៉ុន្តែ គម្រោងដំឡើងតម្លៃសាំងកាលពីខែមុនត្រូវបានពន្យារពេល ដោយសារតែ «បញ្ហាសន្តិសុខអ៊ីនធើណិត»។ បញ្ហានេះបានធ្វើឱ្យរដ្ឋមន្ត្រីក្រសួងសេដ្ឋកិច្ច Alejandro Gil បាត់បង់តំណែង នៅពីរបីថ្ងៃក្រោយមក។

យោងតាមអ្នកសេដ្ឋកិច្ចនៅសាកលវិទ្យាល័យ Havana របស់គុយបា សាំងនៅប្រទេសនេះមានតម្លៃទាបខ្លាំង បើធៀបនឹងបណ្ដាប្រទេសដទៃលើពិភពលោក ប៉ុន្តែគឺជាតម្លៃដែលខ្ពស់ខ្លាំង បើធៀបនឹងប្រាក់បៀវត្សរ៍ក្នុងស្រុក។ តម្លៃសាំងថ្មីនេះនឹងប៉ះពាល់ដល់សង្គមទាំងមូលនៅគុយបា។

ប្រទេសកោះដែលមានប្រជាជន 11 លាននាក់នេះ កំពុងឆ្លងកាត់ការលំបាកច្រើនក្នុងវិស័យសេដ្ឋកិច្ច ដោយសារតែវិបត្តិកូវីដ-19 និងទណ្ឌកម្មពីសហរដ្ឋអាម៉េរិក។ តាមការប៉ាន់ស្មាន សេដ្ឋកិច្ចគុយបា បានធ្លាក់ចុះ 2% ក្នុងឆ្នាំ 2023 ស្របពេលដែលអតិផរណាកើនឡើង 30%។

February 29, 2024

យុទ្ធសាស្ត្រ «លើកលែងទិដ្ឋាការ» របស់ថៃ និងសិង្ហបុរី អូសទាញភ្ញៀវចិនបានច្រើនជាងមុន

ដោយការអនុវត្តយុទ្ធសាស្ត្រលើកលែងទិដ្ឋាការ (visa) ប្រទេសមួយចំនួននៅអាស៊ីអាគ្នេយ៍កំពុងតែក្លាយជាជម្រើសដំបូងរបស់ទេសចរចិន។

នៅក្នុងរដូវបុណ្យចូលឆ្នាំប្រពៃណីចិនឆ្នាំនេះ ទេសចរចិនត្រូវគិតគូរដល់កត្តាជាច្រើនដែលទាក់ទងនឹងភូមិសាស្ត្រ គោលនយោបាយ និងការចំណាយផ្សេងៗ។ ចំពោះបញ្ហាទាំងនេះ តំបន់ទេសចរណ៍ល្បីៗមួយចំនួនដូចជាអូស្ត្រាលីជាដើម មិនអាចប្រកួតប្រជែងបានជាមួយនឹងអាស៊ីអាគ្នេយ៍។ នេះបើតាមប្រភពព័ត៌មានទេសចរណ៍ និងទិន្នន័យរបស់ Reuters។

អូស្ត្រាលីធ្លាប់ជា «ដែកឆក់» ចំពោះភ្ញៀវពីប្រទេសចិន។ ក៏ប៉ុន្តែ លក្ខខណ្ឌនៃទិដ្ឋាការបានកាត់បន្ថយភាពទាក់ទាញរបស់ប្រទេសនេះ។ ផ្ទុយទៅវិញ ប្រទេសមួយចំនួននៅអាស៊ីអាគ្នេយ៍ ដូចជា សិង្ហបុរី ថៃ និងម៉ាឡេស៊ី ជាដើម បានប្រើប្រាស់កត្តាតម្លៃទាបជាង ក៏ដូចជាគោលនយោបាយបន្ធូរបន្ថយទិដ្ឋាការ ដើម្បីអូសទាញភ្ញៀវពីប្រទេសចិន។

លោក John Nee ប្រធានក្រុមហ៊ុនទេសចរណ៍ Easy Going នៅតំបន់ Perth ភាគខាងលិចរបស់អូស្ត្រាលី បានទទួលស្គាល់អំពីបរាជ័យរបស់អូស្ត្រាលីនៅចំពោះមុខអាស៊ីអាគ្នេយ៍។ លោកបានឱ្យដឹងថា គិតត្រឹមរដូវបុណ្យចូលឆ្នាំចិនកន្លង ក្រុមហ៊ុនរបស់លោកបានងើបឡើងវិញត្រឹមតែ 40% ប៉ុណ្ណោះ បើធៀបនឹងដំណាក់កាលមុនកូវីដ-19។ ផ្ទុយទៅវិញ សិង្ហបុរី ថៃ និងម៉ាឡេស៊ី បានឃើញកំណើនភ្ញៀវបរទេស និងការចំណាយច្រើនជាង បើធៀបនឹងដំណាក់កាលមុនវិបត្តិសុខភាពសកលទៅទៀត។

«គោលនយោបាយលើកលែងទិដ្ឋាការរបស់ប្រទេសថៃ និងសិង្ហបុរី ទាក់ទាញភ្ញៀវបានច្រើន ហើយខ្ញុំគិតថា ប្រការនោះបានជួយអូសទាញភ្ញៀវចិនឱ្យចេញផុតពីប្រទេសអូស្ត្រាលី» លោក John Nee អះអាងដូច្នេះ។

នៅក្នុងរដូវបុណ្យចូលឆ្នាំចិនឆ្នាំនេះ ភ្ញៀវចិនរួមចំណែក 26% ធៀបនឹងភ្ញៀវបរទេសសរុបដែលមកលេងប្រទេសអូស្ត្រាលី។ តួលេខនេះទាបខ្លាំង បើធៀបនឹងជាង 50% កាលពីដំណាក់កាលមុនកូវីដ-19 ឆ្នាំ 2019។

បណ្ដាក្រុមហ៊ុនទេសចរណ៍ក្នុងប្រទេសអូស្ត្រាលី រកបានប្រាក់ចំណូលទាបជាង 50% បើធៀបនឹងឆ្នាំ 2019៕

February 21, 2024

Tag: បញ្ហា