បច្ចេកវិទ្យា - La Reine Media

ក្រុមហ៊ុនធំៗនៅកូរ៉េខាងត្បូង ផ្ដល់ថវិការាប់ពាន់លានវ៉ុន ជួយដល់បេសកម្មប្រឆាំង និងទប់ស្កាត់កូរ៉ូណា Covid-19

ក្រុមហ៊ុនយក្សជាច្រើនរបស់កូរ៉េខាងត្បូងបានប្រកាសអំពីគម្រោងផ្ដល់ថវិកាបន្ទាន់ដើម្បីជួយដល់បេសកកម្មទប់ស្កាត់ការឆ្លងរាលដាលនៃអាសន្នរោគកូរ៉ូណា Covid-19។

Samsung Group បានឱ្យដឹងថា សាខាក្រុមហ៊ុន Samsung ទាំងអស់របស់ខ្លួននឹងរួមគ្នាផ្ដល់ថវិកាសរុប 30ពាន់លានវ៉ុន (ប្រហែល246លានដុល្លារអាមេរិក) ទៅឱ្យសមាគមសង្គ្រោះគ្រោះមហន្តរាយកូរ៉េ(Korea Disaster Relief Association) ដើម្បីធានាឱ្យបានថាមិនមានការខ្វះខាតសម្ភារ និងឧបករណ៍ការពាររោគចាំបាច់ ដូចជាថ្នាំសម្លាប់មេរោគ ទឹកកម្ចាត់មេរោគសម្រាប់លាងដៃ របស់របរចាំបាច់ប្រចាំថ្ងៃ និងសម្ភារវេជ្ជសាស្ត្រ។ល។

Samsung Electronics រួមនឹងសាខាទាំងអស់របស់ខ្លួន បានបើកកិច្ចប្រជុំក្រុមប្រឹក្សាភិបាលបន្ទាន់មួយដើម្បីធ្វើការអនុម័តទៅលើការចំណាយខាងលើ។

អគ្គនាយករងនៃក្រុមហ៊ុន Samsung Electronics លោក Lee Jae-yong មានប្រសាសន៍ថា “យើងបានរីកចម្រើនដូចសព្វថ្ងៃគឺដោយសារមានការគាំទ្ររបស់អ្នករាល់គ្នា ហើយយើងត្រូវតែចែករំលែកសុខទុក្ខក្នុងគ្រាអាសន្នបែបនេះ”។

ចំណែកក្រុមហ៊ុន Hyundai Motor Group មុននេះ ក៏បានផ្ដល់ថវិកា5ពាន់លានវ៉ុន(4,1លានដុល្លារសហរដ្ឋអាមេរិក) ទៅឱ្យសមគមសង្គ្រោះអ្នករងគ្រោះមហន្តរាយជាតិ(Hope Bridge Association of the National Disaster Relief) ដើម្បីជួយដល់បុគ្គលិកសុខាភិបាល និងផ្គត់ផ្គង់សម្ភារសង្គ្រោះបន្ទាន់ជាដើម។

ភាគី Hyundai Motor Group បាននិយាយថា ជំនួយទាំងនេះត្រូវបានធ្វើឡើងដើម្បីជួយដល់ប្រជាជននៅក្នុងតំបន់ Daegu និងខេត្ត Gyeongsang ខាងជើងដែលកំពុងរងផលប៉ះពាល់ខ្លាំងជាងគេពីអាសន្នរោគនៅកូរ៉េខាងត្បូង។

រីឯ LG Corp ដែលជាអ្នកគ្រប់គ្រងក្រុមហ៊ុន LG Group ក៏បានប្រកាសថានឹងផ្ដល់ជំនួយ5ពាន់លានវ៉ុនទៅឱ្យអង្គការមនុស្សធម៌កូរ៉េ Community Chest of Korea សម្រាប់ចាត់ចែងជួយដល់អ្នកជំងឺកូរ៉ូណា ពិសេសគឺអ្នកជំងឺនៅតំបន់ Daegu និងខេត្ត Gyeongsang ខាងជើង រួមនឹងអ្នកដែលងាយរងគ្រោះ។

ក្រុមហ៊ុន SK Group ឯណោះវិញ ក៏ផ្ដល់ជំនួយ5ពាន់លានវ៉ុនទៅឱ្យអង្គការមនុស្សធម៌កូរ៉េ Community Chest of Korea ដើម្បីជួយដល់ក្រុមអ្នកជំងឺកូរ៉ូណា និងអ្នកដែលត្រូវបានបង្ខាំងឱ្យនៅដាច់ដោយឡែកក្នុងខេត្ត Gyeongsang ខាងជើងផងដែរ។

ក្រៅពីនេះ ក្រុមហ៊ុន Lotte Group ក៏នឹងផ្ដល់ជំនួយដែលមានតម្លៃ1ពាន់លានវ៉ុន ដល់មូលនិធិ ChildFund Korea និងអង្គការ Salvation Army ដើម្បីជួយដល់កុមារ និងមនុស្សចាស់ក្នុងគ្រាកូរ៉េខាងត្បូងកំពុងរងគ្រោះដោយសារមេរោគបង្កជំងឺរលាកសួតប្រភេទថ្មី Covid-19៕

ប្រភព៖ សារព័ត៌មានបរទេស

February 26, 2020

ក្រុមហ៊ុនផលិតបច្ចេកវិទ្យាការពាររបស់អ៊ីស្រាអែល បង្កើតបានប្រព័ន្ធកម្ទេច Drone ពីចម្ងាយដោយប្រើឡាស៊ែរ (វីដេអូ)

យោងតាមប្រភពពី Popular Mechanics បានឱ្យដឹងថា ប្រព័ន្ធ “Drone Dome” អាចចាប់សញ្ញាវត្ថុដែលមានទំហំតូចដល់ 0,002ម៉ែត្រការ៉េ ក្នុងរយៈចម្ងាយពី 3.5 គីឡូម៉ែត្របាន។

Rafael Advanced Defense Systems Ltd គឺជាក្រុមហ៊ុនផលិតបច្ចេកវិទ្យាការពាររបស់អ៊ីស្រាអែល កាលពីថ្មីៗនេះបានបង្ហាញវីដេអូពិសេសនៃ “Drone Dome” ដែលជាប្រព័ន្ធកម្ទេច Drone ពីចម្ងាយ ដោយប្រើប្រាស់ឡាស៊ែរថាមពលខ្ពស់។

បើមើលតាមឃ្លីបវីដេអូ បានបង្ហាញថា Drone ដែលគេដាក់ឈ្មោះឱ្យថា “សត្រូវ” ត្រូវបានចាប់សញ្ញា ចាប់ទីតាំង និងដាក់ជាគោលដៅ ក្រោយមកប្រព័ន្ធ “Drone Dome” បានចាប់ផ្ដើមបាញ់ឡាស៊ែរធ្វើឱ្យ “សត្រូវ” ឆេះធ្លាក់តែម្ដង៕

ប្រភព៖ សារព័ត៌មានបរទេស

February 19, 2020

ក្រុមហ៊ុនអាមេរិកាំង ឧទ្ទេសនាមបច្ចេកវិទ្យាថ្មី តម្លៃទាប ដែលអាចជួយទប់ស្កាត់អាសន្នរោគកូរ៉ូណា 2019-nCoV

ក្រុមហ៊ុនថ្មី GenapSys មានទីស្នាក់ការកណ្ដាលនៅតំបន់ជ្រលងភ្នំ Silicon Valley បានស្នើឱ្យប្រទេសចិន ប្រើប្រាស់ម៉ាស៊ីនពិនិត្យលំដាប់ហ្សែន (Gene Sequencer) ខ្នាតតូច (mini) ដើម្បីទប់ទល់នឹងការរាតត្បាតនៃមេរោគកូរ៉ូណាប្រភេទ nCoV។

អ្នកនាំពាក្យនៃក្រុមហ៊ុន GenapSys កំពុងតែចរចាជាមួយមជ្ឈមណ្ឌលគ្រប់គ្រង និងបង្ការោគឆ្លង (CDC) របស់ចិន ដើម្បីស្វែងរកវិធីសាស្ត្រដែលមានប្រសិទ្ធភាពខ្ពស់បំផុត សម្រាប់ទប់ស្កាត់អាសន្នរោគ nCoV ដែលមកដល់ពេលនេះ វាបានសម្លាប់មនុស្សចំនួន 910នាក់ និងបានឆ្លងទៅកាន់មនុស្សជាង 40,547នាក់ផ្សេងទៀតនៅទូទាំងពិភពលោក។ នេះបើតាមទីភ្នាក់ងារសារព័ត៌មានចិន South China Morning Post។

ក្រុមហ៊ុនបច្ចេកវិទ្យាជីវសាស្ត្ររបស់អាមេរិក GenapSys បានប្រកាសថា ខ្លួនកំពុងកាន់កាប់បច្ចេកវិទ្យាបកស្រាយ ឬពិនិត្យលំដាប់ហ្សែន (gene sequencer) ដែលទំនើបបំផុតក្នុងពិភពលោក។ ម៉ាស៊ីននេះ មានទំហំប៉ុន iPad ពោលគឺតូចជាង100ដង បើធៀបនឹងម៉ាស៊ីនពិនិត្យលំដាប់ហ្សែនផ្សេងៗដែលកំពុងមាននៅក្នុងទីផ្សារ។ ឧបករណ៍នេះអាចបំពាក់ដោយងាយនៅតាមន្ទីរពេទ្យ ព្រលានយន្តហោះជាដើម ដែលជួយឱ្យមន្ត្រីសុខាភិបាលអាចពិនិត្យរកមេរោគផ្សេងៗបានយ៉ាងឆាប់រហ័ស ដូច្នេះ គេអាចគ្រប់គ្រងស្ថានភាពអាសន្នរោគបានប្រសើរជាងមុន។

បច្ចុប្បន្ន ការបកស្រាយ ឬពិនិត្យលំដាប់ហ្សែន ភាគច្រើនត្រូវបានធ្វើឡើងនៅក្នុងបន្ទប់ពិសោធន៍ធំៗរបស់ក្រុមហ៊ុន Illumina ដែលមានទីស្នាក់ការនៅអាមេរិក ជាកន្លែងដែលមានម៉ាស៊ីនទំនើបៗ ដែលមានតម្លៃជិត1លានដុល្លារអាមេរិក។ ឆ្នាំ2018 ក្រុមហ៊ុន Illumina បានដាក់លក់ម៉ាស៊ីនពិនិត្យលំដាប់ហ្សែនខ្នាតតូច ប៉ុនកុំព្យូទ័រ desktop ប៉ុន្តែវានៅតែមានតម្លៃដល់ទៅ20,000ដុល្លារ ខ្ពស់ជាងទ្វេដង បើធៀបនឹងតម្លៃម៉ាស៊ីនរបស់ក្រុមហ៊ុន GenapSys។

ការពិនិត្យលំដាប់ហ្សែន (Genetic sequencing) គឺពិតជាមានសារសំខាន់ ព្រោះថា វានឹងជួយឱ្យយើងយល់កាន់តែច្បាស់អំពីវីរុស ដែលក្រុមគ្រូពេទ្យអាចតាមដានការវិវដ្ដរបស់ពួកមេរោគ និងអាចបង្កើតវ៉ាក់សាំង ឬរកវិធីព្យាបាលបានឆាប់រហ័ស។

ក្រុមហ៊ុន GenapSys សង្ឃឹមថា បច្ចេកវិទ្យារបស់ពួកគេ នឹងឆាប់បានចូលខ្លួនទៅជួយទប់ស្កាត់អាសន្នរោគកូរ៉ូណាដែលកំពុងសម្លាប់មនុស្សជារៀងរាល់ថ្ងៃនេះ។ ការចរចារវាងក្រុមហ៊ុន GenapSys ជាមួយរដ្ឋាភិបាលចិន កំពុងស្ថិតក្នុងតំណាក់កាលដំបូង។ អ្នកនាំពាក្យរបស់ក្រុមហ៊ុននេះ និយាយថា ពួកគេនឹងគោរពទៅតាមរាល់ច្បាប់ទម្លាប់ និងការកំណត់នៃច្បាប់អន្តរជាតិ។ សារព័ត៌មាន SCMP បានរាយការណ៍ថា បច្ចុប្បន្ន ភាគីខាងប្រទេសចិន មិនទាន់ឆ្លើយតបជាផ្លូវការទៅនឹងសំណើររបស់ក្រុមហ៊ុននេះនៅឡើយ៕

ប្រភព៖ សារព័ត៌មានបរទេស

February 10, 2020

ក្រុមហ៊ុន SkyDrive ត្រៀមសាកល្បងឡានហោះមានមនុស្សបើកលើកដំបូងនៅជប៉ុន

ក្រុមហ៊ុនអភិវឌ្ឍន៍ឡានហោះ SkyDrive មានគម្រោងធ្វើការហោះហើរសាកល្បងជាច្រើនលើកទៀត ដើម្បីធានាឱ្យបានប្រាកដថា ឡានហោះរបស់ខ្លួននឹងមានសុវត្ថិភាព100% មុននឹងដាក់លក់ចាប់ពីឆ្នាំ2023។

ក្រុមហ៊ុន SkyDrive ទើបតែបានប្រកាសថា ក្រុមហ៊ុនបានចាប់ផ្ដើមធ្វើការហោះហើរសាកល្បងនូវឡានហោះកាលពីខែមុន នេះបើតាមការចេញផ្សាយរបស់សារព័ត៌មានជប៉ុន Asahi កាលពីថ្ងៃទី21មករាកន្លងទៅ។

នេះគឺជាលើកទី1 ហើយនៅជប៉ុន ដែលមានការសាកល្បងបើកបរឡានហោះដែលមានមនុស្សជិះនៅខាងក្នុង។ ការហោះហើរសាកល្បងលើកមុនៗ ត្រូវបានគេធ្វើឡើងដោយប្រើប្រព័ន្ធបញ្ជាពីចម្ងាយ និងគ្មានមនុស្សជិះ។

SkyDrive គឺជាក្រុមហ៊ុនបច្ចេកវិទ្យាមួយដែលបង្កើតឡើងកាលពីខែកក្កដា ឆ្នាំ2018 នៅទីក្រុង Tokyo ដោយក្រុមវិស្វករវ័យក្មេងដែលធ្លាប់ធ្វើការឱ្យក្រុមហ៊ុនផលិតរថយន្ត Toyota។ ក្រុមហ៊ុននេះកំពុងតែរៀបចំគម្រោងប្រារព្ធព្រឹត្តិការណ៍ហោះហើរសម្ដែងឱ្យទស្សនិកជនទស្សនានៅក្នុងរដូវក្ដៅឆ្នាំនេះ បន្ទាប់មកនឹងចាប់ផ្ដើមដាក់លក់ចាប់ពីឆ្នាំ2023 ទៅ។

ឡានហោះ SkyDrive នេះមានកម្ពស់ 1.6ម៉ែត្រ បណ្ដោយ និងទទឹងប្រវែង 3.6ម៉ែត្រស្មើគ្នា និងមានកៅអីអង្គុយចំនួន1។ ជ្រុងនីមួយៗនៃឡានហោះនេះមានបំពាក់ស្លាបកង្ហារចំនួន 1គ្រឿង ដែលកង្ហារនេះនឹងជួយឱ្យឡានហោះអាចសំកាំងខ្លួននៅលើអាកាសបានយ៉ាងស្រួល។

មកដល់ពេលនេះ SkyDrive មិនទាន់បង្ហើបឱ្យដឹងលម្អិតអំពីការហោះហើរសាកល្បងនេះនៅឡើយទេ ប៉ុន្តែក្រុមហ៊ុននេះបានបញ្ជាក់ថា នឹងធ្វើការហោះហើរសាកល្បងជាច្រើនលើកទៀតដើម្បីធានាសុវត្ថិភាពឱ្យបាន100%។
បច្ចុប្បន្ន ក្រៅពី SkyDrive គេឃើញមានក្រុមហ៊ុនផ្សេងមួយចំនួន ក៏កំពុងយកចិត្តទុកដាក់ទៅលើការអភិវឌ្ឍឡានហោះនេះដែរ ក្នុងនោះក៏មានក្រុមហ៊ុន Airbus និង Uber ផងដែរ។

គំរូឡានហោះមានមនុស្សបើកនេះត្រូវបានអភិវឌ្ឍដោយក្រុមហ៊ុន SkyDrive

ឡានហោះត្រូវបានគេរំពឹងថា នឹងជួយកាត់បន្ថយការកកស្ទះចរាចរណ៍ និងជួយសង្គ្រោះមនុស្សក្នុងករណីបន្ទាន់។ ប៉ុន្តែ មុនពេលឡានហោះនេះត្រូវបានគេប្រើប្រាស់ទូលំទូលាយ ពិភពលោកត្រូវតែបង្កើតឱ្យមានស្ដង់ដាសុវត្ថិភាព និងច្បាប់ចរាចរណ៍សម្រាប់ឡានហោះ រួមនឹងប្រព័ន្ធគ្រប់គ្រងពេញលេញមួយដើម្បីបញ្ចៀសគ្រោះថ្នាក់ចរាចរណ៍ផ្លូវអាកាស៕

ប្រភព៖ សារព័ត៌មានបរទេស

January 23, 2020

Samsung Galaxy S20 នឹងបំពាក់ RAM ខ្លាំងជាងកុំព្យូទ័រ laptop ទៅទៀត

លក្ខណសម្បត្តិស្ដង់ដានៃ RAM របស់ស្មាតហ្វូនលំដាប់ខ្ពស់ដែលជិតបង្ហាញខ្លួនរបស់ Samsung នឹងត្រូវបំពាក់ RAM ទំហំ 12GB ហើយកំណែលំដាប់ខ្ពស់បំផុតនៃសែស្រឡាយនេះមាន RAM 16GB។

បណ្ដាស្មាតហ្វូនស្រឡាយ Galaxy S10 ស្ទើរតែទាំងអស់ មាន RAM ត្រឹមតែ 8GBប៉ុណ្ណោះ ចំណែកកំណែលំដាប់ខ្ពស់បំផុតនៃ Galaxy S10+ ក៏មាន RAM ត្រឹមតែ 12GBដែរ។ ជាមួយនឹងស្មាតហ្វូនស្រឡាយ Galaxy S20 ក្រុមហ៊ុន Samsung នឹងបំពាក់ RAM 12GB ទាំងអស់ លើកលែងតែ S20 Ultra មួយគត់ដែលនឹងក្លាយជាទូរស័ព្ទឆ្លាតវៃដំបូងគេបង្អស់ក្នុងពិភពលោកដែលប្រើ RAM 16GB។

Galaxy S20 Ultra គឺជាស្មាតហ្វូនដំបូងគេក្នុងលោក ដែលមាន RAM 16 GB

ស្មាតហ្វូនស្រឡាយ Galaxy S20 ទាំង 3ប្រភេទនេះ សុទ្ធតែត្រូវបានបំពាក់សេនស័រ (sensor) ISOCELL Bright HMX ទំហំ 108 megapixel ដែលត្រូវបានក្រុមហ៊ុន Samsung ផលិតផ្ទាល់ដៃ។ ក្នុងនោះ ម៉ូដែលដែលគួរឱ្យចង់ប្រើប្រាស់បំផុតនោះគឺ Galaxy S20 Ultra ដោយសារវាមានកាមេរ៉ាទំហំ 48megapixel។ ស្មាតហ្វូនម៉ូដែលនេះ អាច zoom បែបអប់ទិខល (optical zoom) 10x និង zoom បែបឌីជីថល (digital zoom) 100x ដែលខ្លាំងជាងច្រើន បើធៀបនឹង P30 Pro របស់ Hauwei ដែលមាន optical zoom 5x និង digital zoom 30x។

ម៉ូដែល Galaxy S20 នឹងមានបំពាក់ឈីប Snapdragon 865 ឬឈីប Exynos 9830 អាស្រ័យលើទីផ្សារនីមួយៗ។ ស្មាតហ្វូន Galaxy S20 Ultra មានថ្មដែលមានថាមពល 5.000mAh និងមានមុខងារបញ្ចូលថាមពលល្បឿនលឿនកម្រិត 45W និងប្រើពេល 74នាទីក្នុងការបញ្ជូលថាមពលឱ្យពេញម្ដងៗ។

បើតាមគម្រោង ក្រុមហ៊ុន Samsung នឹងឧទ្ទេសនាម Galaxy S20 នៅក្នុងព្រឹត្តិការណ៍ Galaxy Unpacked ដែលនឹងត្រូវរៀបចំធ្វើឡើងនៅថ្ងៃទី11 កុម្ភៈ នៅ San Francisco សហរដ្ឋអាមេរិក៕

ប្រភព៖ សារព័ត៌មានបរទេស

January 14, 2020

អ្នកវិទ្យាសាស្ដ្រស្នើបង្កើតស្ថានីយអវកាសយក្សដើម្បីបំផ្លាស់់ទីប្រព័ន្ធព្រះអាទិត្យ ចេញពីតំបន់គ្រោះថ្នាក់

អ្នកវិទ្យាសាស្ដ្រស្នើបង្កើតស្ថានីយអវកាសខ្នាតយក្សមួយដើម្បីបំផ្លាស់ទីប្រព័ន្ធព្រះអាទិត្យ ចេញពីតំបន់គ្រោះថ្នាក់

អ្នកវិទ្យាសាស្ដ្រគិតថា មធ្យោបាយដែលពួកគេនឹងប្រើប្រាស់នោះ មានកម្លាំងគ្រប់គ្រាន់ដើម្បីបម្លាស់ទីប្រព័ន្ធព្រះអាទិត្យរបស់យើង ចេញពីតំបន់គ្រោះថ្នាក់បាន។

របៀបដំណើរការរបស់ស្ថានីយបំផ្លាស់ទីប្រព័ន្ធព្រះអាទិត្យ

នៅក្នុងលម្ហអវកាស គេសង្កេតឃើញថា មានអាចម៍ផ្កាយតូច-ធំរាប់មិនអស់ កំពុងហោះក្នុងល្បឿនរាប់រយគីឡូម៉ែត្រ/វិនាទី ហើយអនាគតខាងមុខ ពួកវាអាចហោះមកបុកផែនដីបាន។ ជាងនេះទៀត គេក៏សង្កេតឃើញមានផ្កាយខ្លះកំពុងតែផ្ទុះយ៉ាងកក្រើកមេឃផងដែរ ដែលគេហៅថា Supernova។ ដូច្នេះ មានតែតំបន់លម្ហអវកាសធំធេងចន្លោះផ្កាយនានានោះទេ ដែលមានសុវត្ថិភាព។ ទោះជាយ៉ាងនេះក្ដី ប្រព័ន្ធព្រះអាទិត្យ ក៏ដូចជាផែនដីដែរ នឹងនៅតែប្រឈមនឹងហានិភ័យដូចគ្នា។

ដើម្បីដោះស្រាយបញ្ហាខាងលើ បណ្ឌិត Matthew Caplan មកពីសាកលវិទ្យាល័យ Illinois សហរដ្ឋអាមេរិក បានស្នើឱ្យមានការបង្កើតស្ថានីយអវកាសខ្នាតយក្សមួយ ដែលមានឈ្មោះថា Caplan Thruster។ ស្ថានីយអវកាសនេះ អាចបំផ្លាស់ទីប្រព័ន្ធព្រះអាទិត្យចេញពីតំបន់គ្រោះថ្នាក់បាន។ ស្ថានីយអវកាស Caplan Thruster នឹងយកថាមពលពីព្រះអាទិត្យមកធ្វើជាកម្លាំងរុញដែលដូចនឹងគ្រាប់រ៉ុក្កែតដែរ។

ស្ថានីយអវកាសខ្នាតយក្សនេះ នឹងត្រូវបំពាក់ម៉ាស៊ីនប្រើថាមពលនុយក្លេអ៊ែរចំនួន2 ក្នុងនោះម៉ាស៊ីនមួយនឹងប្រើដើម្បីបំប្លែងអេលីយ៉ូមពីព្រះអាទិត្យទៅជាអុកស៊ីហ្ស៊ែនវិទ្យុសកម្មដែលមានកម្ដៅ 1ពាន់លានអង្សាសេ ដើម្បីរុញច្រានផ្កាយនានាទាំងនោះ។

Caplan Thruster មិនត្រឹមតែអាចបំលាស់ទីប្រព័ន្ធព្រះអាទិត្យចេញពីតំបន់គ្រោះថ្នាក់ក្នុង Milky Way នោះទេ តែអាចចេញផុតពីទីនេះផងដែរ

លោកបណ្ឌិត Matthew Caplan បន្តថា វិធីខាងលើមិនត្រឹមតែអាចបំផ្លាស់ទីប្រព័ន្ធព្រះអាទិត្យទៅរកតំបន់គ្មានគ្រោះថ្នាក់នោះទេ ប៉ុន្តែក៏អាចបំផ្លាស់ទីប្រព័ន្ធព្រះអាទិត្យ ឱ្យចេញក្រៅលម្ហហ្គាឡាក់ស៊ី មីលគី វេយ៍ (Milky Way Galaxy) បានផងដែរ។

ស្ដាប់ទៅ ដូចជាខ្សែភាពយន្តប្រឌិតបែបវិទ្យាសាស្ដ្ររបស់ផលិតកម្មហូលីវូដអ៊ីចឹង មែនទេប្រិយមិត្ត? ពីព្រោះគំនិតរបស់លោកបណ្ឌិត Matthew Caplan រូបនេះហាក់ដូចជាហក់ទៅឆ្ងាយពេកហើយ បើធៀបនឹងបច្ចេកវិទ្យាបច្ចុប្បន្ន ក៏ប៉ុន្តែ ក្រុមអ្នកវិទ្យាសាស្រ្ដនៅតែមានជំនឿថា មនុស្សជំនាន់ក្រោយៗនឹងអាចធ្វើបាន៕

January 13, 2020

កសិករគួរបង្កើនសមត្ថភាពដោយការប្រើប្រាស់បច្ចេកវិទ្យាដែលបង្កើតឡើងដោយខ្មែរ

កម្ពុជា ជាប្រទេសដែលមានប្រជាជនភាគច្រើនជាកសិករ ខណៈផ្ទៃដីទំនេរសម្រាប់ធ្វើកសិកម្មមានចំនួនច្រើននៅពាសពេញផ្ទៃប្រទេស។ បើផ្អែកលើស្ថានភាពនេះ ប្រជាជនគួរតែសម្បូរហូរហៀរទៅដោយភោគផលកសិកម្ម តែអ្វីដែលជាឧបសគ្គគឺ ប្រជាជនមិនទាន់មានចំណេះដឹងគ្រប់គ្រាន់ដើម្បីប្រើប្រាស់ដីឱ្យអស់លទ្ធភាពនៅឡើយ។

កញ្ញា ម៉េង ស្រីលីន សហស្ថាបនិកកម្មវិធី Smart Farm Assistance ដែលជាកម្មវិធីគ្រប់គ្រងប្រព័ន្ធទឹកក្នុងកសិដ្ឋានតាមបច្ចេកវិទ្យា បានលើកឡើងថា កសិករគួរចាប់ផ្តើមបង្វែរការធ្វើកសិកម្មតាមបែបប្រពៃណីទាំងស្រុង មកប្រើប្រាស់បច្ចេកវិទ្យាមួយចំនួនដែលបង្កើតឡើងដោយអ្នកជំនាញដែលជាប្រជាជនខ្មែរយើងវិញ។

ផលប្រយោជន៍សំខាន់ដែលអាចធ្វើឱ្យគាត់មានភាពងាយស្រួល និងប្រើប្រាស់ប្រកបដោយប្រសិទ្ធភាពនោះ គឺដោយសារតែក្រុមដែលបង្កើតកម្មវិធីបច្ចេកវិទ្យានៅក្នុងស្រុក គឺរៀបចំឡើងដើម្បីដោះស្រាយបញ្ហាប្រឈមផ្ទាល់នៅក្នុងមូលដ្ឋាន ឬនៅក្នុងតំបន់នានាក្នុងប្រទេស។ ហេតុនេះគម្រោងទាំងអស់នោះ អាចនឹងមានភាពសុីចង្វាក់គ្នាល្អជាមួយនឹងស្ថានភាពជាក់ស្តែងនៅក្នុងប្រទេស។ ពាក់ព័ន្ធនឹងតម្លៃ ក៏ជាចំណុចមួយគួរពិចារណាផងដែរ ព្រោះគម្រោងនានាដែលធ្វើឡើងនៅក្នុងប្រទេស គឺរៀបចំដើម្បីឆ្លើយតបជាមួយនឹងកសិករ ឬអ្នកដែលមានបំណងចង់ប្រើប្រាស់បច្ចេកវិទ្យាដើម្បីជួយដល់កសិកម្មនៅក្នុងស្រុក ហេតុនេះរាល់គម្រោងគឺគណនាធ្វើយ៉ាងណាដើម្បីឱ្យកសិករអាចមានលទ្ធភាពប្រើប្រាស់បាន។

កញ្ញា ម៉េង ស្រីលីន បាននិយាយថា៖ «កសិករ ឬអ្នកដែលចង់ប្រើប្រាស់បច្ចេកវិទ្យាកសិកម្ម កុំមានការបារម្ភថា វាជារឿងលំបាក។ តាមពិតទៅ វាមិនលំបាកយល់ ឬលំបាកប្រើប្រាស់នោះទេ។ ប្រជាជនយើងម្នាក់ៗសុទ្ធតែមានប្រើប្រាស់ទូរស័ព្ទដៃឆ្លាតវៃ ហើយកម្មវិធីខ្លះ ប្រើត្រឹមតែ SMS តែប៉ុណ្ណោះ ហេតុនេះវាអាចនឹងងាយជាងកម្មវិធីបណ្តាញសង្គមមួយចំនួនផង»។

អ្នកជំនាញបច្ចេកវិទ្យាខាងលើបានបន្ថែមទៀតថា ការប្រើប្រាស់បច្ចេកវិទ្យាសម្រាប់វិស័យកសិកម្ម ជាការវិនិយោគដ៏ឆ្លាតវៃមួយ ព្រោះវានឹងធ្វើឱ្យកសិករចំណាយច្រើនតែម្តង តែទទួលបានចំណូលច្រើនជាងមុន សន្សំសំចៃច្រើនជាងមុន និងអាចធ្វើឱ្យគាត់មានភាពងាយស្រួលច្រើនជាងមុន។ ការចំណាយដែលកសិករត្រូវធ្វើ គឺចំណាយលើការដំឡើងឧបករណ៍ តែឧបករណ៍ដែលដំឡើងនោះ គាត់អាចប្រើប្រាស់បានយូរឆ្នាំ។ ក្រៅពីនេះ គាត់ទទួលបានផលចំណេញយ៉ាងច្រើនមកវិញ ដូចជាគាត់ចំណេញថ្លៃពលកម្ម ព្រោះកាលណាគាត់ប្រើប្រាស់បច្ចេកវិទ្យា គាត់មិនចាំបាច់ប្រើប្រាស់មនុស្សច្រើនដើម្បីគ្រប់គ្រងកសិដ្ឋានរបស់គាត់ទៀតនោះទេ។ ក្រៅពីនេះ គាត់អាចនឹងចំណេញធនធានផ្សេងៗបន្ថែមទៀត ដូចជាចំណេញឥន្ធនៈសម្រាប់បូមទឹក និងការប្រើប្រាស់ធនធានប្រកបដោយប្រសិទ្ធភាព។ ជាក់ស្តែង ប្រសិនបើគាត់ប្រើប្រាស់បច្ចេកវិទ្យាដើម្បីគ្រប់គ្រងទឹកក្នុងកសិដ្ឋាន គាត់នឹងមិនបាច់បារម្ភថា ប្រើប្រាស់ទឹកលើសកម្រិតឥតប្រយោជន៍នោះទេ ព្រោះនៅពេលមានទឹកគ្រប់គ្រង ប្រព័ន្ធនឹងបង្ហាញសញ្ញាឱ្យបិទ ឬបើកបានពីចម្ងាយតាមរយៈទូរស័ព្ទដៃភ្លាម។

បង្ហាញលើចំណុចស្រដៀងគ្នានេះដែរ លោក ស្វែងឌី សិទ្ធីផន សហស្ថាបនិកកម្មវិធីបច្ចេកវិទ្យាគ្រប់គ្រងសំណើមសម្រាប់ការចិញ្ចឹមចង្រិត បានលើកឡើងថា កសិករគួរចាប់ផ្តើមសិក្សា និងស្វែងយល់ពីបច្ចេកវិទ្យាមួយចំនួនដែលត្រូវបានគេអភិវឌ្ឍឡើងដើម្បីបង្កើនភាពងាយស្រួលក្នុងការធ្វើកសិកម្ម ឬចិញ្ចឹមសត្វជាដើម។ សម្រាប់អ្នកគ្មានដីកសិកម្មធំៗ ក៏អាចប្រើប្រាស់បច្ចេកវិទ្យាដើម្បីប្រើប្រាស់លើទីតាំងតូចៗរបស់គាត់ឱ្យមានប្រសិទ្ធភាពខ្ពស់បានផងដែរ ដូចជាការចិញ្ចឹមចង្រិត ឬការធ្វើកសិដ្ឋានខ្នាតតូចជាដើម។ ការធ្វើបែបនេះ នឹងធ្វើឱ្យគាត់មានលទ្ធភាពក្នុងការអភិវឌ្ឍជីវភាពបានល្អផង និងបង្កើនទិន្នផលកសិកម្មសម្រាប់ចែកចាយក្នុងទីផ្សារស្រុកផង។ លោក ស្វែងឌី សិទ្ធីផន បាននិយាយថា៖ «នៅពេលយើងចាប់ផ្តើមប្រើប្រាស់បច្ចេកវិទ្យា មានន័យថា យើងបានចាប់ផ្តើមឈានជើងបន្តិចម្តងៗទៅរកការអភិវឌ្ឍសម្រាប់ការប្រកួតប្រជែង។ ជាក់ស្តែង នៅបណ្តាប្រទេសនានា គេប្រើប្រាស់បច្ចេកវិទ្យាទំនើបៗទៅបាន ក៏ដោយសារតែគេចាប់ផ្តើមពីបច្ចេកវិទ្យាងាយៗទៅសិនដែរ»។

អ្នកជំនាញខាងលើបានបញ្ជាក់ផងដែរថា ប្រទេសយើងមានដី មានភោគផលច្រើន តែយើងខ្វះបច្ចេកវិទ្យាដើម្បីកែច្នៃទិន្នផលកសិកម្មរបស់យើងឱ្យមានការរីកចម្រើន។ បន្ថែមពីលើនេះ កសិករមួយចំនួនក៏មិនបានព្យាយាមក្នុងការស្វែងយល់ ឬសាកល្បងអ្វីដែលថ្មីដែរ។ ហេតុនេះប្រសិនបើគាត់ចាប់ផ្តើមសាកល្បងប្រើប្រាស់បច្ចេកវិទ្យាក្នុងការធ្វើកសិកម្ម គាត់នឹងមើលឃើញថា តាមពិតវាមិនលំបាកនោះទេ ហើយវាងាយស្រួលជាងអ្វីដែលគាត់ធ្លាប់ធ្វើកន្លងមកទៀតផង។ បន្ថែមពីលើនេះ ចំនួនទិន្នផលដែលគាត់ទទួលបានអាចនឹងមានកំណើនល្អជាងមុន ព្រោះតាមរយៈបច្ចេកវិទ្យាគាត់អាចគ្រប់គ្រងបាននូវរាល់ព័ត៌មាន និងកត្តាប្រឈមនានាដែលពាក់ព័ន្ធនឹងកសិដ្ឋានរបស់គាត់។ ហេតុនេះនៅពេលគាត់ដឹងច្បាស់ពីបញ្ហា គាត់នឹងអាចងាយស្រួលក្នុងការដោះស្រាយប្រកបដោយប្រសិទ្ធភាពខ្ពស់ ដែលធ្វើឱ្យទិន្នផលក៏មានការកើនឡើងទៅតាមនោះដែរ។

គួរបញ្ចាក់ថា បច្ចុប្បន្ននេះ និស្សិត និងអ្នកជំនាញថ្មីៗមួយចំនួន បានចាប់ផ្តើមព្យាយាមស្វែងយល់ពីបញ្ហាប្រឈមនានាលើវិស័យកសិកម្ម និងវិស័យផ្សេងៗទៀត ដើម្បីយកបញ្ហាទាំងអស់នោះមកដោះស្រាយដោយប្រើប្រាស់នវានុវត្តន៍ថ្មីៗ។ ការគាំទ្រដល់គម្រោងបច្ចេកវិទ្យា និងនវានុវត្តន៍របស់យុវជនជំនាន់ថ្មី គឺជាការចូលរួមចំណែកអភិវឌ្ឍ ឬជំរុញកំណើននៃទំនើបកម្ម ក៏ដូចជាផលិតកម្មនៅក្នុងស្រុកឱ្យមានការកើនឡើងដូចប្រទេសជិតខាងដែរ។ ប្រសិនបើយើងមានផលិតករច្រើន ដែលអាចមានសមត្ថភាពបង្កើតផលិតផលថ្មីៗដោយខ្លួនឯង ហើយឆ្លើយតបជាមួយនឹងតម្រូវការរបស់ប្រជាជនកាន់តែច្រើន នោះយើងនឹងទទួលបានផលចំណេញសម្រាប់ប្រទេសទាំងមូល៕

December 23, 2019

បច្ចេកវិទ្យា 5G ចាប់ផ្តើមផ្លាស់ប្តូរវិស័យសុខាភិបាលលើពិភពលោក

មួយរយៈចុងក្រោយនេះ មានបញ្ហាជាច្រើនរវាងប្រទេសធំៗ ដែលកើតចេញពីការប្រកួតប្រជែងផ្នែកពាណិជ្ជកម្ម និងបច្ចេកវិទ្យា ដែលធ្វើឱ្យម្ចាស់ឧស្សាហកម្ម រួមទាំងអ្នកវិនិយោគជាច្រើនរងផលប៉ះពាល់ ស្របពេលដែលប្រទេសមួយចំនួនកំពុងចាប់ឱកាសអភិវឌ្ឍន៍សមត្ថភាពបច្ចេកវិទ្យា 5G ដែលជាបច្ចេកវិទ្យាថ្មីនិងមានឥទ្ធិពលបំផុត។

បច្ចេកវិទ្យា 5G ត្រូវបានគេមើលឃើញថា អាចមានឥទ្ធិពលរុញច្រានឱ្យការរស់នៅរបស់មនុស្សមានការផ្លាស់ប្តូរ ដោយក្នុងនោះមានទាំងគុណវិបត្តិនិងគុណសម្បត្តិយ៉ាងច្រើន។ ថ្មីៗនេះវេទិកាសេដ្ឋកិច្ចពិភពលោកបានបង្ហាញឱ្យឃើញពីគុណសម្បត្តិថ្មីមួយរបស់បច្ចេកវិទ្យា 5G ដែលត្រូវបានគេយកទៅប្រើប្រាស់ប្រកបដោយប្រសិទ្ធភាពខ្ពស់ក្នុងវិស័យសុខាភិបាលលើពិភពលោក។

បើយោងតាមវេទិកាសេដ្ឋកិច្ចពិភពលោកបានបង្ហាញថា បច្ចេកវិទ្យា 5G បច្ចុប្បន្ននេះ អាចជួយអ្នកជំនាញទាំងអស់លើពិភពលោកឱ្យមានភាពងាយស្រួល និងធ្វើការងារប្រកបដោយសុវត្ថិភាពជាងមុន។អ្វីដែលបច្ចេកវិទ្យានេះអាចធ្វើបាន គឺអាចធ្វើឱ្យគ្រូពេទ្យជំនាញធ្វើការវះកាត់ពីចម្ងាយ ដោយគ្រប់គ្រងម៉ាស៊ីនវះកាត់តាមរយៈកញ្ចក់ឧបករណ៍អេឡិចត្រូនិក ជាមួយនឹងរូបភាពដែលត្រូវគេពង្រីកបានយ៉ាងច្បាស់ មិនចាញ់ការវះកាត់ដោយផ្ទាល់នោះឡើយ។ ការវះកាត់ដោយវិធីថ្មីនេះ អាចត្រូវបានគេមើលឃើញថា មានភាពច្បាស់លាស់ និងសុវត្ថិភាពខ្ពស់ថែមទៀតផង។

តាមការបង្ហាញរបស់ស្ថាប័នខាងលើបានឱ្យដឹងផងដែរថា ការប្រើប្រាស់បច្ចេកវិទ្យា 5G នេះក៏អាចបញ្ជាពីចម្ងាយនូវបរិក្ខារពេទ្យផ្សេងៗទៀតផងដែរនៅក្នុងមន្ទីរពេទ្យ។ ហើយគេជឿជាក់ថា វានឹងរីកសាយភាយយ៉ាងលឿនចូលទៅក្នុងមន្ទីរពេទ្យនានាលើពិភពលោកនៅពេលឆាប់ៗនេះ ដែលធ្វើឱ្យការព្យាបាលអ្នកជំងឺកាន់តែមានលក្ខណៈងាយស្រួល ទំនើប និងយកចិត្តទុកដាក់បានល្អិតល្អន់ជាងមុន ព្រោះមនុស្សមានម៉ាស៊ីនជាច្រើនដែលចាំជួយការងារ 24ម៉ោងក្នុង 1ថ្ងៃ។

ពីការចាប់ផ្តើមអនុវត្តបច្ចេកវិទ្យា 5G ក្នុងមន្ទីរពេទ្យ គេរំពឹងទុកថា អត្រាសង្ឃឹមរស់របស់មនុស្សនឹងមានការកើនឡើង ហើយបញ្ហាសុខភាពលំបាកៗជាច្រើនក៏ត្រូវបានដោះស្រាយផងដែរ ដែលធ្វើឱ្យគុណភាពនៃការរស់នៅរបស់មនុស្សនឹងមានភាពប្រសើរឡើងជាងមុន។

ចំពោះទីកន្លែងដែលបានប្រើប្រាស់បច្ចេកវិទ្យា 5G ក្នុងការវះកាត់ដំបូងបំផុត គឺនៅទីក្រុង Barcelona ប្រទេសអេស្បាញ ដែលវាបានផ្តល់ភាពជោគ-ជ័យយ៉ាងធំបំផុតសម្រាប់អ្នកជំនាញបច្ចេកវិទ្យា និងវេជ្ជបណ្ឌិតអ្នកជំនាញវះកាត់ព្យាបាលជំងឺ។ ក្រៅពីនេះ មិនត្រឹមតែជួយមនុស្សក្នុងការវះកាត់ឱ្យមានសុវត្ថិភាពប៉ុណ្ណោះទេ តែវាក៏បានធ្វើឱ្យមានការភ្ញាក់ផ្អើលផងដែរ ដោយវីដេអូនៃការវះកាត់នេះអាចយកទៅបណ្តុះបណ្តាលក្រុមការងារវះកាត់ និងនិស្សិតពេទ្យជាច្រើនទៀតប្រកបដោយភាពជាក់ស្តែង និងច្បាស់លាស់។

វាជាបច្ចេកវិទ្យាដែលត្រូវបានគេជឿជាក់ ថាមានបញ្ហាតិចតួចបំផុត និងស្ទើរតែមិនមានភាពរអាក់រអួលដែលអាចជួយជីវិតមនុស្សបានដោយមិនមានហានិភ័យអ្វីទាំងអស់៕

July 27, 2019

បច្ចេកវិទ្យាទំនើបរបស់ OPPO អាចតេរកគ្នាបាន ទោះជាអត់សេវាសោះក៏ដោយ

OPPO បានប្រកាសចេញបច្ចេកវិទ្យាទំនាក់ទំនងថ្មីដែលទើបផលិតឡើង ដោយអាចឱ្យអ្នកប្រើប្រាស់ហៅទូរស័ព្ទ ឬផ្ញើសារទៅវិញទៅមកបានក្នុងរយៈចម្ងាយឆ្ងាយគួរសមមួយ ដោយមិនចាំបាច់ប្រើប្រាស់សេវាទូរស័ព្ទ Wi-Fi ឬ Bluetooth អ្វីនោះទេ។បច្ចេកវិទ្យានេះមានឈ្មោះថា MeshTalk ជាប្រព័ន្ធដែលមានការការពារខ្ពស់មួយ ដែល OPPO និយាយថា អាចគ្របដណ្ដប់ក្នុងរយៈចម្ងាយដល់ 3គីឡូម៉ែត្រ (នៅទីធ្លាខាងក្រៅ) ឬអាចឆ្ងាយជាងនេះ បើស្ថិតនៅក្នុងទីប្រជុំជនដែលអាចបាញ់ចេញសេវាតាមឧបករណ៍បាន។ឧបករណ៍ OPPO នឹងអាចបង្កើតបានជា Local Area Network មួយ និងអាចទំនាក់ទំនងដោយផ្ទាល់ជាមួយគ្នា ដោយមិនត្រូវការអង់តែន។

ក្រុមហ៊ុនបានអះអាងថា MeshTalk មិនមានប៉ះពាល់ដល់ថ្មរបស់ឧបករណ៍ឡើយ និងមានគម្រោងថា នឹងបញ្ចូលបច្ចេកវិទ្យានេះជាមួយ Mode Stanby 72ម៉ោង ដូច្នេះទូរស័ព្ទនឹងនៅតែអាចទំនាក់ទំនងគ្នាបាន ទោះជាពេលដែលថ្មនៅសល់តិចតួចក៏ដោយ។

ទោះមិនទាន់មានការបញ្ជាក់ថា បច្ចេកវិទ្យា MeshTalk នឹងអាចប្រើជាមួយស្មាតហ្វូន OPPO នាពេលបច្ចុប្បន្ន ឬយ៉ាងណាក្ដី ក៏ប៉ុន្តែបច្ចេកវិទ្យានេះកំពុងធ្វើការបង្ហាញមុខក្នុងកម្មវិធី MWC Shanghai ដែលកំពុងប្រព្រឹត្តធ្វើឡើងចាប់ពីថ្ងៃទី26 ដល់28 ខែមិថុនាសប្ដាហ៍នេះដែរ៕

June 27, 2019

មហោស្រពវិទ្យាសាស្ត្រ និងវិស្វកម្មកម្ពុជា នឹងចូលមកដល់ជាថ្មីនៅពាក់កណ្តាលសប្តាហ៍នេះ

ក្រសួងអប់រំ យុវជន និងកីឡា បានប្រកាសពីកាលកំណត់ជាក់លាក់ក្នុងការរៀបចំមហាស្រពវិទ្យាសាស្ត្រ និងវិស្វកម្មកម្ពុជាលើកទី5 ដែលនឹងប្រព្រឹត្តទៅនៅថ្ងៃទី21ដល់ថ្ងៃទី23 ខែកុម្ភៈ ខាងមុខនេះនៅពហុកីឡដ្ឋានជាតិអូឡាំពិក។ មហោស្រពវិទ្យាសាស្ត្រ និងវិស្វកម្មនៅឆ្នាំនេះមានគោលបំណងជំរុញសិស្សានុសិស្ស និស្សិត យុវជនលោកគ្រូ អ្នកគ្រូ បុគ្គលទូទៅ គ្រឹះស្ថានសិក្សា អង្គភាព និងស្ថាប័នពាក់ព័ន្ធឱ្យកាន់តែមានចំណាប់អារម្មណ៍ និងការយកចិត្តទុកដាក់លើការសិក្សា ការអប់រំ ការបណ្តុះបណ្តាល ការងារ អាជីព វិជ្ជាជីវៈ ការប្រកួតប្រជែង ការស្រាវជ្រាវ និងនវានុវត្តន៍ លើមុខជំនាញទាក់ទងនឹងវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យាដែលជាមុខវិជ្ជាជំនាញដ៏មានសក្តានុពលសម្រាប់ចូលរួមចំណែកអភិវឌ្ឍសេដ្ឋកិច្ច ឧស្សាហកម្ម កសិឧស្សាហកម្ម និងពាណិជ្ជនីយកម្មកម្ពុជា។

សកម្មភាពសំខាន់ៗក្នុងមហោស្រពនេះមានដូចជា ពិព័រណ៍វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា រួមទាំងសិក្ខាសាលា និងវេទិកា STEM និងការប្រគំតន្ត្រីជាដើម។

រដ្ឋលេខាធិការ ក្រសួងអប់រំ យុវជន និងកីឡា ឯកឧត្តម អុឹម កុច បានមានប្រសាសន៍ថា ជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជាជំនាញដែលសង្គមកម្ពុជាកំពុងត្រូវការខ្ពស់ ព្រោះជំនាញទាំងអស់នេះជាជំនាញដែលមានទីផ្សារធំទូលាយ និងជាជំនាញដែលអាចប្រកួតប្រជែងជាមួយបណ្តាប្រទេសក្នុងតំបន់បាន។ ហេតុនេះហើយទើបក្រសួងអប់រំ បានខិតខំប្រឹងប្រែងជំរុញឱ្យមានការផ្សព្វផ្សាយ និងកំណត់ផែនការសកម្មភាពជាច្រើនដើម្បីផ្តល់ឱកាសឱ្យសិស្សានុសិស្សកម្ពុជានៅគ្រប់ទីកន្លែងនៅកម្ពុជាបានយល់កាន់តែច្បាស់ពីគុណតម្លៃនៃមុខវិជ្ជា STEM នេះ ហើយចាប់យកផ្នែកណាមួយនៃមុខវិជ្ជាដ៏មានសារៈសំខាន់នេះដើម្បីយកជាអាជីពការងារនាពេលអនាគត។

ឯកឧត្តម អុឹម កុច មានប្រសាសន៍ថា៖ “នៅពេលយុវជនជំនាន់ថ្មីរបស់កម្ពុជាបានយល់ដឹងពីសារៈសំខាន់នៃមុខវិជ្ជា STEM នេះ យើងនឹងមានអ្នកជំនាញកាន់តែច្រើនដែលជួយជំរុញឱ្យវិស័យនានាកាន់តែមានសក្តានុពល និងអាចស្រូបទាញបានកម្លាំងពលកម្មជាច្រើនពីការវិនិយោគ”។

ឯកឧត្តមរដ្ឋលេខាធិការបានបន្ថែមទៀតថា ក្នុងសតវត្សរ៍ទី21 នេះ ជំនាញទាំងអស់នេះកំពុងក្លាយជាផ្នែកយ៉ាងសំខាន់ដើម្បីធ្វើឱ្យការងារ ការផលិត និងការរស់នៅកាន់តែមានភាពងាយស្រួល ហើយបង្កើនប្រសិទ្ធភាពលើរាល់ការងារក្នុងសង្គម។ ជាក់ស្តែងប្រសិនបើយើងមានអ្នកជំនាញផ្នែកវិស្វកម្មច្រើន ការងារសាងសង់ហេដ្ឋារចនាសម្ព័ន្ធ និងការងារសាងសង់សំណង់អគារផ្សេងៗទៀតនឹងកាន់តែអាចធ្វើបានដោយឆាប់រហ័ស ព្រោះបច្ចេកវិទ្យាបច្ចុប្បន្នមានកម្មវិធីឆ្លាតវៃជាច្រើនដែលអាចធ្វើឱ្យការងារធំៗអាចសម្រេចបានយ៉ាងងាយ។ ក្រៅពីនេះជំនាញ STEM ក៏ជាផ្នែកដែលគាំទ្រឱ្យវិស័យជាច្រើនផ្សេងទៀត ដូចជាសុខាភិបាល កសិកម្ម ផលិតកម្ម បច្ចេកវិទ្យាព័ត៌មានវិទ្យា និងការរុករកផលិតផលថ្មីៗសម្រាប់ដោះស្រាយបញ្ហាមនុស្សជាដើម។

ការបង្កើតកម្មវិធីផ្សព្វផ្សាយ ពិព័រណ៍ និងមហោស្រពវិទ្យាសាស្ត្រ នៅកម្ពុជាជាយន្តការសំខាន់មួយក្នុងការជំរុញឱ្យយុវជនកម្ពុជាសម្លឹងឃើញកាន់តែច្បាស់ពីឱកាសដើម្បីអភិវឌ្ឍសមត្ថភាពរបស់ខ្លួនឱ្យស្របតាមសេចក្តីត្រូវការរបស់សង្គមលើគ្រប់មុខជំនាញ និងអាជីពសំខាន់ៗជាច្រើនដែលសុទ្ធតែជាមុខវិជ្ជាមានទីផ្សារខ្ពស់នៅម្ពុជាទាំងអស់។ សម្រាប់កម្មវិធីមហោស្រពវិទ្យាសាស្ត្រនិងវិស្វកម្មកម្ពុជា លើកទី5 នេះ នឹងចាប់ផ្តើមបើកឱ្យចូលរួមដោយឥតគិតថ្លៃចាប់ពីម៉ោង 9ព្រឹក ដល់ម៉ោង5ល្ងាច ដោយនឹងប្រព្រឹត្តឡើងនៅថ្ងៃទី21 ដល់ថ្ងៃទី23ខែកុម្ភៈខាងមុខ នៅពហុកីឡដ្ឋានជាតិអូឡាំពិក៕

February 25, 2019

Tag: បច្ចេកវិទ្យា