Tag: បច្ចេកវិទ្យា

រថយន្តអគ្គិសនី Volvo លក់ក្នុងតម្លៃថ្លៃ នៅតែត្រូវអតិថិជនទិញអស់
តម្លៃ 8 ម៉ឺនដុល្លារអាម៉េរិក/គ្រឿង មិនអាចរារាំងអតិថិជនដែលចង់ប្រើរថយន្តអគ្គិសនីដ៏ទំនើបរបស់ក្រុមហ៊ុន Volvo បានឡើយ។
ថ្មីៗនេះ បន្ទាប់ពីដាក់ឱ្យបញ្ជាទិញជាមុនរថយន្តអគ្គិសនី EX90 ក្រុមហ៊ុនផលិតរថយន្ត Volvo ក៏ទទួលបានការគាំទ្រយ៉ាងច្រើនពីអ្នកប្រើប្រាស់ រហូតធ្វើឱ្យក្រុមហ៊ុននេះត្រូវផ្អាកការលក់បណ្ដោះអាសន្ន ព្រោះតែបរិមាណនៃរថយន្តដែលត្រូវបានបញ្ជាទិញ បានលើសពីគម្រោងនៃការផលិតលើកទីមួយ។ ប៉ុន្តែ ក្រុមហ៊ុនបានសន្យាថា នឹងបើកលក់ជាថ្មីនាពេលខាងមុខ។
Volvo EX90 ត្រូវបានអភិវឌ្ឍឡើងដោយយោងទៅតាមតួរថយន្តអគ្គិសនី SPA2 របស់ក្រុមហ៊ុនមេ Geely ដែលដូចទៅនឹង Polestar 3។ ក្នុងពេលដែល Polestar 3 មានកៅអីចំនួនប្រាំ Volvo EX90 មានកៅអីអាចឱ្យអង្គុយបាន 7 នាក់។
កំណែមូលដ្ឋានរបស់ Volvo EX90 ប្រើប្រាស់ម៉ូទ័រអគ្គិសនីដែលអាចផលិតកម្លាំងបាន 402 សេះ ខណៈដែលកំណែ Performance មានកម្លាំង 510 សេះ អាចបង្កើនល្បឿនពី 0-97 គីឡូម៉ែត្រ/ម៉ោង ដោយប្រើពេលតែ 4.7 វិនាទី។ កំណែទាំងពីរនេះប្រើប្រាស់ប្រព័ន្ធថ្មផ្ទុកថាមពល 107 kWh អាចឱ្យបើកបរបាន 580 គីឡូម៉ែត្រ ទៅតាមស្ដង់ដារបស់ WLTP ឬប្រហែល 483 គីឡូម៉ែត្រក្នុងការបើកបរជាក់ស្ដែង។
Volvo EX90 ត្រូវបានបំពាក់ប្រព័ន្ធ LiDAR ((Light Detection and Ranging) ដែលជាសេនស័រ 3D សម្រាប់បាញ់វាស់ចម្ងាយ និងវាស់ជម្រៅរបស់វត្ថុ ក៏ដូចជាដៅសម្គាល់ភាពជ្រៅនៃផ្ទៃលំហជាដើម) រយៈចម្ងាយឆ្ងាយមួយគ្រៀង, រ៉ាដាប្រាំគ្រឿង, កាមេរ៉ា 8 គ្រឿង និងសែនស័រចាប់រលកសញ្ញា 16 គ្រឿង។ ក្រៅពីនេះ រថយន្តអគ្គិសនី EX90 ក៏បំពាក់បច្ចេកវិទ្យាជាច្រើនទៀតនៅខាងក្នុងកាប៊ីន រួមមានទាំងអេក្រង់ទូរទស្សន៍ 14.5 អ៊ីញដែលបំពាក់កម្មវិធីជំនួយការរបស់ Google ផងដែរ៕

May 2, 2023
ប្រទេសចិនចាប់ផ្ដើមខួងអណ្ដូងប្រេងជ្រៅជាងគេបង្អស់នៅទ្វីបអាស៊ី
សាជីវកម្ម Sinopec ចាប់ផ្ដើមខួងអណ្ដូងប្រេង Yuejin 3-3 ជម្រៅ 9,472 ម៉ែត្រ នៅតំបន់បាតខ្ទះ Tarim ដែលស្ថិតក្នុងតំបន់ស្វយ័ត Xinjiang ប្រទេសចិន កាលពីថ្ងៃទី 01 ឧសភា 2023។
អណ្ដូងប្រេង Yuejin 3-3 នឹងជាជំហានដ៏ធំមួយនៅក្នុងសកម្មភាពរុករកប្រេងឧស្ម័នមហាជ្រៅ ជួយឱ្យប្រទេសចិនបង្កើនការផលិតប្រេងឆៅរបស់ខ្លួន។ តាមផែនការ សាជីវកម្មចិន Sinopec គ្រោងនឹងសម្រេចបានដំណាក់កាលខួងក្នុងរយៈពេល 170 ថ្ងៃ។
អណ្ដូងប្រេង Yuejin 3-3 ស្ថិតក្នុងគម្រោងខួងដីមហាជ្រៅ Deep Earth ដែលបច្ចុប្បន្នបខួងអណ្ដូងបានចំនួន 120 កន្លែងដែលមានជម្រៅជាង 8,000 ម៉ែត្រ នៅតំបន់បាតខ្ទះ Tarim ។ នេះគឺជាតំបន់បាតខ្ទះដែលផ្ទុករ៉េប្រេងធំជាងគេបង្អស់នៅប្រទេសចិន ដោយកាន់កាប់ជាង 60% នៃធនធានប្រេងឧស្ម័នក្នុងដីមហាជ្រៅរបស់ប្រទេសនេះ។
ថ្វីបើការខួងអណ្ដូងប្រេងជ្រៅខ្លាំងគឺជារឿងលំបាក ប៉ុន្តែបន្ទាប់ពីបានអភិវឌ្ឍបច្ចេកវិទ្យា និងបច្ចេកទេសទំនើប ប្រទេសចិនក៏អាចដោះស្រាយបញ្ហានេះបានប្រសើរជាងមុន។ នេះបើតាម Wang Long ដែលជាអ្នកជំនាញប្រចាំវិទ្យាស្ថានស្រាវជ្រាវបច្ចេកទេសប្រេងឧស្ម័ន Sinopec។
អណ្ដូងប្រេង Yuejin 3-3 ស្ថិតក្នុងគម្រោងខួងដីមហាជ្រៅ Deep Earth
លោក Wang Long ឱ្យដឹងថា «រយៈពេលនៃការខួងកាលពីបីឆ្នាំមុនគឺ 280 ថ្ងៃ ប៉ុន្តែបច្ចុប្បន្នបានថយមកនៅត្រឹម 97 ថ្ងៃ ខណៈដែលសុក្រឹតភាពនៅពេលខួងក៏កើនពី 60% ឡើងដល់ជាង 90%»៕
May 2, 2023
កសិដ្ឋានក្រោមទឹកសមុទ្រដំបូងគេបង្អស់លើពិភពលោក ប្រើបច្ចេកវិទ្យាទំនើប
កសិដ្ឋាននៅក្រោមទឹកសមុទ្ររបស់អ៊ីតាលី ផលិតបន្លែ មើមស្អាតនៅក្នុងប្រព័ន្ធដែលមានរាងដូចផ្សិតដែលគេហៅថាជីវមណ្ឌល ត្រូវបានបណ្ដែតខាងលើបាតសមុទ្រ។
កសិដ្ឋាន Nemo គឺជាប្រព័ន្ធដាំរុក្ខជាតិខាងក្រោមទឹកសមុទ្រដំបូងគេលើពិភពលោក។ ស្ថិតនៅក្រោមសមុទ្រ Noli ប្រទេសអ៊ីតាលី ភាគនិរតី Genoa កសិដ្ឋាននេះរួមមានបណ្ដាញផ្ទះកញ្ចក់រាងពាក់កណ្ដាលមូលបោះយុថ្កាអណ្ដែតក្នុងទឹកសមុទ្រ។
«ភារកិច្ចរបស់បច្ចេកវិទ្យានេះគឺការផ្លាស់ប្ដូរកសិកម្ម បង្កើនសមត្ថភាពផលិតស្បៀងអាហារនៅតាមតំបន់ឆ្នេរសមុទ្ររបស់ផែនដី ទៅតាមវិធីស្ថិរភាព និងមិនប៉ះពាល់ដល់បរិស្ថាន» សហស្ថាបនិក Luca Gamberini ឱ្យដឹងដូច្នេះ។
Sergio Gamberini ដែលជាឪពុករបស់ Gamberini និងជាសហស្ថាបនិកក្រុមហ៊ុន Ocean Reef Group ឱ្យដឹងថា គំនិតដែលនាំឱ្យមានកសិដ្ឋាននេះឡើងគឺដើម្បីបូកផ្សំចំណង់ចំណូលចិត្តចំនួនពីរគឺការមុជទឹក និងការធ្វើចំការ។ ឆ្នាំ 2012 គម្រោងត្រូវបានចាប់ផ្ដើមដោយការដាំជីរនាងល័ក្ខ (basil) នៅក្នុងបាឡុងខ្យល់ក្រោមទឹក។ ដប់ឆ្នាំក្រោយមក ចំការ Nemo កំពុងតែរីកចម្រើន នេះបើតាម CNN។
កសិដ្ឋាន Nemo ប្រើប្រាស់បច្ចេកទេសអ៊ីដ្រូប៉ូនិច ដែលប្រើសារជាតិបំប៉នក្នុងទឹកជំនួសដី និងប្រើពន្លឺពីអំពូលភ្លើងជំនួសពន្លឺពីព្រះអាទិត្យនៅពេលចាំបាច់។ គ្រប់យ៉ាងត្រូវបានតាមដានពីកន្លែងគ្រប់គ្រងនៅលើដី។
ដល់ពេលត្រូវប្រមូលផល អ្នកមុជទឹកនឹងហែលទៅកាត់បន្លែ ដាក់ចូលក្នុងថង់ និងនាំឡើងមកលើគោក។ ដោយសារតែផ្ទះកញ្ចក់ទាំងនេះមានរូបរាងតូចមិនអាចដាំរុក្ខជាតិធំៗ ប៉ុន្តែក៏អាចដាំបន្លែ ជីរពី 70 ទៅ 100 ដើម។ Gamberini និងសហការីបានដាំសាកល្បងប្រភេទបន្លែផ្សេងៗតាំងពីស្ត្រប៊េរី រហូតដល់ប៉េងប៉ោះ សណ្ដែក និងជីរនានា។
ការពិសោធជាច្រើនក៏ត្រូវបានធ្វើឡើងនៅចំការក្រោមទឹកសមុទ្រ Nemo ក្នុងនោះមានទាំងផលិតផលឱសថ និងអាហារផងដែរ។
ក្រុមបុគ្គលិករបស់កសិដ្ឋាន Nemo កំពុងរៀបគម្រោងសង់ជីវមណ្ឌលធំជាងបច្ចុប្បន្នក្នុងអនាគត និងដំឡើងកសិដ្ឋានបែបនេះបន្ថែមទៀតនៅតំបន់ដទៃ ដូចជានៅសហរដ្ឋអាម៉េរិកជាដើម។ Gamberini ជឿថា បច្ចេកវិទ្យាខាងលើអាចកែសម្រួលទៅតាមប្រភេទនីមួយៗនៃបរិស្ថាន៕

May 2, 2023
Ford Ranger Raptor ម៉ាស៊ីនម៉ាស៊ូត 2.0L Bi-Turbo ត្រូវបានដាក់សម្ពោធជាផ្លូវការ
(ភ្នំពេញ-ថ្ងៃទី 28 ខែមេសា ឆ្នាំ 2023) – ជួបគ្នាម្ដងទៀតហើយជាមួយនឹងព្រឹត្តិការណ៍ដ៏អស្ចារ្យដែលត្រូវបានរៀបចំឡើយដោយក្រុមហ៊ុន អ អិម អេ (ខេមបូឌា) ម.ក ផ្នែករថយន្ត Ford នោះគឺពិធីសម្ពោធជាផ្លូវការរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលកម្មវិធីនេះបានប្រារព្ធឡើងនៅ ដឹ ព្រេមៀ សេនធ័រ សែនសុខ ដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។
កម្មវិធីនេះប្រារព្ធឡើងដើម្បីណែនាំនូវជម្រើសម៉ាស៊ីនថ្មីមួយទៀតដល់អតិថិជន នោះគឺម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលជាប្រភេទម៉ាស៊ីនមានកម្លាំងខ្លាំង សន្សំសំចៃខ្ពស់ និងទទួលបានការពេញនិយមយ៉ាងច្រើនកុះករពីសំណាក់អតិថិជន។ ចំណុចដែលកាន់តែពិសេសគួរឱ្យភ្ញាក់ផ្អើលនោះគឺ តម្លៃបង់ពន្ធផ្លូវសម្រាប់រថយន្តទំនើប Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតមួយនេះគឺត្រឹមតែ 20 ម៉ឺនរៀលតែប៉ុណ្ណោះ។
អតិថិជនដែលទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសរបស់ Ford ដើម្បីសាកល្បងនូវមុខងារនៃប្រព័ន្ធសុវត្ថិភាព និងបច្ចេកវិទ្យាទំនើបចុងក្រោយដែលបានបំពាក់នៅលើរថយន្តនេះ។
ជាពិសេសជាងនេះទៀតគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនម៉ាស៊ូត 2.0L Bi-Turbo (Diesel0 Inline4 ដែលអាចផលិតកម្លាំងសេះបានរហូតដល់ 210 PS និងកម្លាំងរមួលកង់រហូតដល់ 500 Nm ដែលផ្ដល់នូវសន្ទុះដ៏ខ្លាំងក្នុងការបើកបរ។
មិនតែប៉ុណ្ណោះ នៅមានមុខងារច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖
- ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
- បំពាក់នូវបូម Fox Racing Shocks ទំហំ 2.5 អ៊ីញ ដែលផ្ដល់នូវផាសុកភាពក្នុងពេលបើកបរ ជាពិសេសសម្រាប់ការបើកបរលើផ្លូវដែលមានឧបសគ្គ និងផ្លូវ Off-Road Performance
- អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងចង្កូតពិជាធ្វើឱ្យការចុលរលូនខ្លាំង
- បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
- អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពិចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Tochscreen 12 អ៊ីញបានយ៉ាងងាយស្រួល
- ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ និងប្រព័ន្ធជំនួយលើចង្កូតបញ្ចៀសចេញពីគ្រោះថ្នាក់
- ប្រព័ន្ធចង្កៀងឆ្លាតដែលអាចរេតាមចង្កូតដោយស្វ័យប្រវត្ត និងអាចបែងចែកពន្លឺដោយស្វ័យប្រវត្ត
- ប្រព័ន្ធចាប់ហ្វ្រាំងបន្ទាន់ពេលថយក្រោយដោយស្វ័យប្រវត្ត
- ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឱ្យរថយន្តនេះជម្នះបានគ្រប់ឧបសគ្គនៃការបើកបរ និងស័ក្ដិសមជាកំពូលរថយន្តភីកអាប់ Off-Road Performance ។
រថយន្ត រថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះមានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ 8 ជម្រើស រួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស ជាមួយនឹងតម្លៃពិសេសត្រឹមតែ $75,900 តែប៉ុណ្ណោះ។
សម្រាប់ព័ត៌មានបន្ថែម លោកអ្នកអាចអញ្ជើញទៅសាកសួរ និងបើកបរសាកល្បងរថយន្តFord Ranger Raptor ស៊េរីឆ្នាំ 2023 ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នៅតាមបណ្ដាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
- អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លូវព្រះមុនីវង្ស ជាប់ទូតវៀតណាម លេខទូរស័ព្ទ៖ 078 999 773
- អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្ដោយផ្លូវទៅព្រលានយន្តហោះ លេខទូរស័ព្ទ៖ 095 939 939
- អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 និងផ្សារសាំហាន់ លេខទូរស័ព្ទ៖ 078 959 935
- អគារតាំងបង្ហាញរថយន្ត Ford Trade-In ដែលស្ថិតនៅតាមបណ្ដោយផ្លូវទៅកាន់ព្រលានយន្តហោះ លេខទូរស័ព្ទ៖ 077 722 999 ឬ 011 255 229
- អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្ដោយផ្លូវជាតិលេខ 6A លេខទូរស័ព្ទ៖ 077 666 357 ឬ 088 9 666 357
- អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្ដោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទ៖ 078 999 883 ឬ 088 3 999 883 ។
April 29, 2023
ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR
គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។
ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។
នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។
គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។
កីឡដ្ឋាន EDC កាលពីឆ្នាំ 2018
ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។
លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។
នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕
April 29, 2023
ឪពុកម្ដាយសម័យថ្មី កុំភ្លេចជួយជំរុញកូនតូចឱ្យចេះសរសេរ ព្រោះជាវិវឌ្ឍនាការសំខាន់របស់កុមារតូច
ទោះជាបច្ចុប្បន្នជាយុគសម័យនៃបច្ចេកវិទ្យាទំនើប ដែលងាកទៅខាងណាក៏ឃើញតែស្មាតហ្វូន និងកុំព្យូទ័រក៏ដោយ តែការបង្ហាត់កូនតូចឱ្យចេះកាន់ប៊ិច ឬខ្មៅដៃសរសេរ គឺជារឿងមួយសំខាន់ណាស់សម្រាប់ក្មេងវ័យមុនចូលរៀនមត្តេយ្យ ព្រោះការសរសេរមានចំណុចល្អច្រើនណាស់សម្រាប់កុមារតូចៗ ដូចជាការជួយហ្វឹកហាត់សាច់ដុំប្រអប់ដៃរបស់កុមារ ជួយឱ្យកុមារចេះសង្កេត និងចេះប្រើខួរក្បាលផងដែរ។ ខាងក្រោមនេះជាដំណាក់កាលនៃការចេះកាន់ខ្មៅដៃសរសេរ ឬគូសវាសរបស់កុមារតូចៗតាមវ័យដែលអាណាព្យាបាលគួរតែដឹង។
ដំណាក់កាលទី1 គូសវាស (ក្មេងតូចវ័យ 2 – 3ឆ្នាំ) គ្រវាសគ្រវាត់គ្មានគោលដៅ។ ចាប់ខ្មៅដៃបាន ក៏គូសវាសជាខ្សែផ្សេងៗជំពាក់វាក់វ័ណ្ឌគ្នាពេញក្រដាស ទាំងភ្នែកអាចនឹងមិនបានមើលដៃ ឬក្រដាស(ដែលខ្លួនឯងសរសេរ)ផង។
ដំណាក់កាលទី2 គ្រប់គ្រងការគូសវាស (អាយុ 3ឆ្នាំ) ទោះជាស្នាមគូសវាសមិនខុសគ្នាពីដំណាក់កាលដំបូងមែន តែយ៉ាងហោចណាស់ ក៏គេចាប់ផ្តើមចេះគ្រប់គ្រងការធ្វើចលនារបស់សាច់ដុំដៃរបស់ខ្លួនឯងបានហើយ និងចេះសរសេរយ៉ាងមានទិសដៅច្រើនជាងមុនបន្តិចហើយ។
ដំណាក់កាលទី3 (អាយុ 3 – 4 ឆ្នាំ) កូនតូចនឹងចូលចិត្តគូសតាមស្នាមពង្រាងអុចៗ ឬគូសជាន់ពីលើតាមតួអក្សរដែលគេចង់សរសេរ តែឪពុកម្ដាយក៏កុំទៅនឹកសង្ឃឹមថា កូនតូចនឹងសរសេរជាន់ពីលើពង្រាងនោះបានស្អាតល្អឱ្យសោះ ព្រោះវានៅតែវៀចទៅឆ្វេង ទៅស្តាំ និងទ្រេតទ្រោតដដែល ដូច្នេះអ្នកម្តាយគួរកុំគិតតែពីទិញសៀវភៅគំរូហាត់សរសេរឱ្យកូនហាត់សរសេរច្រើនពេកអី និងកុំភ្លេចថា ការចូលចិត្តរបស់កូនតូច វាគ្រាន់តែជាវិវឌ្ឍនាការមួយអំឡុងពេលប៉ុណ្ណោះ មិនដូច្នោះទេកូនអាចនឹងធុញទ្រាន់ និងហត់បានដូចគ្នា។
ដំណាក់កាលទី4 អាចសរសេរឈ្មោះខ្លួនឯងបាន សរសេរតាមពាក្យផ្សេងៗបាន (អាយុ 4ឆ្នាំ) ចាប់ផ្តើមសរសេរពាក្យដែលមានអត្ថន័យចំពោះខ្លួនឯងបាន ដូចជាឈ្មោះរបស់ខ្លួនឯង ឬប្រយោគដែលអ្នកគ្រូ(សាលាមត្តេយ្យ)ធ្លាប់និយាយប្រាប់ ហើយគេចង់សរសេរ(រឿងនិទាន ឬទីកន្លែងដែលគេចូលចិត្ត) ពេលអ្នកគ្រូសរសេរឱ្យមើល គេនឹងព្យាយាមសរសេរតាម។
ដំណាក់កាលទី5 គិតរកនឹកសរសេរពាក្យ (អាយុ 4 – 5ឆ្នាំ) ពេលកូនតូចបានឮ បានស្តាប់ពាក្យអ្វីមក ដូចជា ស្រឡាញ់ម៉ាក់ ជាដើម គេនឹងយកពាក្យនោះមកគិត និងសរសេរលើក្រដាស់ថា “ស្រឡាញ់ម៉ាក់” ទោះជាអក្សរមិនសូវស្អាតមែន តែក៏អាចនិយាយបានថា កូនតូចចេះសរសេរហើយ។
ដំណាក់កាលទី6 សរសេរបានយ៉ាងត្រឹមត្រូវ (អាយុ 5 – 7ឆ្នាំ) ពេលអ្វីគ្រប់យ៉ាងត្រៀមជាស្រេចរួចហើយ ពេលនោះគេនឹងសរសេរពាក្យផ្សេងៗបានដោយខ្លួនឯងយ៉ាងចំណាន និងកាន់តែត្រឹមត្រូវឡើងទៀតផង។
ទម្រាំតែគេអភិវឌ្ឍឡើងបានជាដំណាក់ៗបែបនេះ មិនមែនចេះតែត្រឹមត្រូវទៅតាមអាយុប៉ាច់ៗនោះទេ។ កូនតូចអាចនឹងវិវឌ្ឍយឺត-លឿនមិនស្មើគ្នាទេ អាស្រ័យលើបទពិសោធដែលក្មេងម្នាក់ៗប្រមូលសន្សំបានមក។ ការហ្វឹកហាត់វិវឌ្ឍនាការនេះ មាននៅក្នុងកិច្ចការងារប្រចាំថ្ងៃបែបងាយៗដូចជា ការហែកក្រដាស កាត់ក្រដាស ជួយម៉ាក់ដួសបាយ កៀបដុំទឹកកក បើក-បិទគម្របដប និងកិច្ចការងារដែលធ្វើរួមគ្នា មិនថាតែការអានសៀវភៅ និយាយរឿងនិទាន លេងហ្គេមដែលពាក់ព័ន្ធនឹងពាក្យ ដូចជាលេងតពាក្យចុងជួន សង្កេតពាក្យដែលដូចគ្នាតាមស្លាកឃោសនាពាណិជ្ជកម្មនៅតាមផ្លូវថ្នល់ ជាដើម។
ធ្វើកិច្ចការងារបែបនេះឱ្យក្លាយទៅជារឿងប្រក្រតី ពេលនោះកុមារនឹងសរសេរបានដោយខ្លួនឯង និងសរសេរយ៉ាងមានសេចក្តីសុខទៀតផង៕
December 3, 2020
Apple គ្រោងនឹងអាប់ឌែត មុខងារ Face ID ប្រើដើម្បី Login នៅលើ Safari បាន
ដោយមានការសហការរវាងក្រុមហ៊ុន Apple ជាមួយសម្ព័ន្ធភាពបញ្ជាក់អត្តសញ្ញាណតាមអ៊ីនធើណិត (FIDO) ក្នុងការផ្ទៀងផ្ទាត់ភាពត្រឹមត្រូវដោយមិនចាំបាច់ប្រើលេខកូដ កាលពីដើមឆ្នាំនេះ ក្រុមហ៊ុន Apple បានប្រកាសពីការប្រើប្រាស់ទាក់ទងទៅនឹងការផ្ទៀងផ្ទាត់ភាពត្រឹមត្រូវដោយគ្មានលេខកូដនេះ នៅលើកម្មវិធី Safari 14 នៅក្នុងសន្និសីទអ្នកអភិវឌ្ឍន៍ WWDC កាលពីពេលថ្មីៗនេះ។
ជាមួយនឹងមុខងារថ្មីនេះ ក្រុមហ៊ុន Apple នឹងអនុញ្ញាតឱ្យលោកអ្នកចូលទៅក្នុងកម្មវិធីផ្សេងៗ ដោយប្រើ Face ID ឬ Touch ID នៅក្នុងកម្មវិធី Safari Browser ដែលមាននៅលើប្រព័ន្ធប្រតិបត្តិការ iOS 14 និង macOS 11.0 នៅចុងឆ្នាំនេះ។
ការប្រើប្រាស់មុខងារនេះ គឺវាដូចគ្នានឹងការប្រើ Face ID ឬ Touch ID ដែលលោកអ្នកកំពុងប្រើ ដើម្បីបើកសោទូរស័ព្ទ ដោយមិនចាំបាច់ប្រើឈ្មោះ និងលេខសម្ងាត់ដែលមានភាពសាំញ៉ាំច្រើននោះ។
បើតាមការបង្ហាញរបស់ក្រុមហ៊ុន Apple ក្រុមអ្នកបច្ចេកវិទ្យាគិតថា ដោយសារ Apple បានប្រើស្តង់ដារ multi-factor ដើម្បីផ្ទៀងផ្ទាត់ដោយប្រើ ទូរស័ព្ទជាសម្គាល់ និងទិន្នន័យ Face ID ឬ Touch ID នោះ វិធីសាស្ត្រនៃការផ្ទៀងផ្ទាត់នេះ នឹងជួយកាត់បន្ថយការវាយប្រហារ Phishing ឱ្យកាន់តែទាបផងដែរ។
កាលពីឆ្នាំមុន ក្រុមហ៊ុន Google បានចាប់ផ្តើមប្រើមុខងារនេះនៅលើ Chrome Browser សម្រាប់ប្រព័ន្ធដំណើរការ Android ដើម្បីធ្វើការផ្ទៀងផ្ទាត់ភាពត្រឹមត្រូវតាមរយៈ Biometric ដោយប្រើបច្ចេកវិទ្យា FIDO2 ដូចគ្នានឹង ក្រុមហ៊ុន Microsoft ដែលបានប្រើបច្ចេកវិទ្យានេះ សម្រាប់ Windows Hello របស់គេផងដែរ៕
ទស្សនាការពន្យល់ពីមុខងារសុវត្ថិភាពខាងក្រោម៖
https://www.youtube.com/watch?v=11UfySDn7_I&feature=emb_title
ប្រភព៖ នាយកដ្ឋានប្រឆាំងបទល្មើសបច្ចេកវិទ្យា
June 29, 2020
Facebook នឹងចេញមុខងារថ្មី ប្រាប់អ្នកចង់ចែកចាយព័ត៌មានថា ជាព័ត៌មានចាស់ ឬថ្មី” នាពេលឆាប់ៗនេះ!
ការផ្សព្វផ្សាយព័ត៌មានចាស់ៗ ក៏អាចនាំឱ្យមានភាពច្របូកច្របល់ដល់សង្គមបានដែរ ព្រោះខ្លឹមសារដែលមាននៅក្នុងអត្ថបទចាស់ៗទាំងនោះ វាអាចមិនពិតសម្រាប់ស្ថានភាពបច្ចុប្បន្ន។
ដោយមើលឃើញពីគុណវិបត្តិនេះហើយ ទើបក្រុមហ៊ុនហ្វេសប៊ុកបានចាប់ផ្ដើមដាក់ឱ្យប្រើប្រាស់មុខងាររំឭកមួយ ដើម្បីឱ្យអ្នកប្រើប្រាស់បណ្តាញសង្គមហ្វេសប៊ុកបានដឹងថា ព័ត៌មានដែលពួកគេចង់ចែកចាយនោះ គឺជាព័ត៌មានចាស់។ មុខងារនេះនឹងបង្ហាញជាសារប្រាប់ដល់អ្នកប្រើប្រាស់ភ្លាមៗ ប្រសិនបើព័ត៌មាននោះ ជាព័ត៌មានចាស់ជាង 3ខែមកហើយ តែទោះយ៉ាងនេះក្តី ក៏លោកអ្នកត្រូវតែមានការប្រុងប្រយ័ត្នផងដែរ ព្រោះមុខងារនេះគ្រាន់តែអាចប្រាប់លោកអ្នកអំពីព័ត៌មាននោះត្រឹមតែរយៈពេល 3ខែកន្លងទៅប៉ុណ្ណោះ មិនមែនជារយៈពេលដែលព័ត៌មាននោះត្រូវបានផ្សព្វផ្សាយកាលពីដំបូងទេ។ ដោយឡែកក្រុមហ៊ុនបណ្តាញសង្គម Twitter ក៏មិនខុសពីហ្វេសប៊ុកដែរ គឺបានខិតខំប្រឹងប្រែងដើម្បីកាត់បន្ថយការចែកចាយព័ត៌មានក្លែងក្លាយផងដែរ ដូចជាកាលពីពេលថ្មីៗនេះ ក្រុមហ៊ុនបានធ្វើការសាកល្បងជាមួយមុខងារថ្មីមួយ ដែលបានបញ្ជាក់អ្នកប្រើប្រាស់ ឱ្យអានអត្ថបទជាមុនសិន មុននឹងចែកចាយបន្ត។
ការបង្ហោះ ឬចែកចាយព័ត៌មានក្លែងក្លាយ ឬព័ត៌មានដែលកើតឡើងយូរហើយ គឺជាបញ្ហាដ៏ធំមួយ ដែលប្រទេសជាច្រើនកំពុងប្រឈម ដូចជាការផ្សព្វផ្សាយដែលថាជំងឺកូវីដ-19 កើតឡើងដោយសារប្រព័ន្ធ 5G ជាដើមនោះ បានបង្កឱ្យមានភាពចលាចលដល់សង្គម ដែលនាំឱ្យមានការវាយកម្ទេចបង្គោលអង់តែនជាច្រើនកន្លែងនៅអឺរ៉ុប៕
ប្រភព៖ នាយកដ្ឋានប្រឆាំងបទល្មើសបច្ចេកវិទ្យា
June 29, 2020
តើមានរឿងអ្វីកើតឡើង ពេលលោក ត្រាំ សួរមេ Apple រឿងបង្កើតបច្ចេកវិទ្យា 5G ?
ប្រធានាធិបតីនៃសហរដ្ឋអាមេរិក លោក ដូណាល់ ត្រាំ បានសរសេរនៅលើ Twitter ថា៖ “លោកបានសួរនាំលោក Tim Cook នាយកប្រតិបត្តិក្រុមហ៊ុន Apple ឱ្យបង្កើតបច្ចេកវិទ្យា 5G ឡើង ព្រោះសហរដ្ឋអាមេរិក មានស្ទើរតែទាំងអស់ទៅហើយ ដូចជា ថវិកា បច្ចេកវិទ្យា ទស្សនវិស័យ និងជាពិសេសមានមេ Apple ថែមទៀតផង” ដោយលោកបានសួរបែបនេះ នៅក្នុងអំឡុងដំណើរទស្សនកិច្ចនៅការិយាល័យកណ្ដាល របស់ Apple តម្លៃ ១ លានដុល្លារ នៅរដ្ឋតិចសាស់ កាលពីថ្ងៃ21 ខែវិឆ្ឆិកា ឆ្នាំ2019 កន្លងទៅ។
មិនបានប៉ុន្មាននាទីផង បណ្ដាញសារព័ត៌មានបរទេសធំៗបានចុះផ្សាយព្រោងព្រាត។ ជាក់ស្ដែងគេហទំព័របច្ចេកវិទ្យាឈានមុខ The Verge បានសរសេរចំណងជើងធំៗថា៖ ត្រាំ ពឹងឱ្យមេ Apple បង្កើត 5G ទាំងដែលក្រុមហ៊ុន Apple មិនមែនជាអ្នកផ្គត់ផ្គង់សេវាណិតវើកសោះឡើយ។ ប្រភពដដែលបានលើកជាចម្ងល់ថា ហេតុអ្វីបានលោក ត្រាំ មិន Mentions ឬពឹងក្រុមហ៊ុនជំនាញដូចជា Verizon, AT&T, T-Mobile និង Sprint ផង? ពួកគេសុទ្ធតែជាជើងខ្លាំងខាងផ្គត់ផ្គង់សេវាណិតវើក ទូទាំងសហរដ្ឋអាមេរិកដែរតើ?!។
The Verge បកស្រាយថា ជាការពិត បើនិយាយអំពីបច្ចេកវិទ្យា 5G ទោះជា Apple អាចបង្កើត iPhone 5G ចេញលក់នៅខែក្រោយបានក៏ពិតមែន តែវាក៏មិនអាចទទួលបានដែនសេវា 5G ពេញលេញដែរ។ ប្រការនេះ គឺហាក់ដូចជា ប្រើមនុស្សធ្វើការ មិនចំជំនាញអ៊ីចឹងដែរ។
ម្យ៉ាងទៀត ក្រុមហ៊ុន Apple មិនមែនជាអ្នកផលិតម៉ូឌឹម 5G និងផ្នែករឹងជាច្រើនទៀត(Hardware) ស្ទើរទាំងស្រុងលើ iPhone និង iPad នោះដែរ ព្រោះមានការសហការបង្កើតដោយ Intel ជាពិសេសក្រោយមានរឿងរ៉ាវប្ដឹងផ្តល់គ្នាកាលពីពេលមុនរួចមក ឆាប់ៗនេះ Apple កំពុងតែចង់ចាប់ដៃ Qualcomm ជំនួសវិញ។
ត្រឡប់ទៅកាលពីឆ្នាំ2016 នាយកប្រតិបត្តិ Apple ក៏ធ្លាប់បានផ្តល់បទសម្ភាសមួយដែរត្រង់ចំណុចនេះថា៖ “អ្នកជំនាញរបស់យើង ពុំមានឯកទេសផ្នែកផ្គត់ផ្គង់សេវាណិតវើកទេ យើងប្រឹងប្រែងបង្កើតបច្ចេកវិទ្យា e-SIMs ប៉ុន្តែការងារនេះ វាពាក់ព័ន្ធនឹងផ្នែកខាងសេវាណិតវើកឯណោះទេ”
ប្រភព៖ https://www.theverge.com/2019/11/21/20975733/trump-tim-cook-build-5g-network-united-states-carrier?fbclid=IwAR3WUJMAXFeoBaXrfK-V2DBqVqmpP3B6JFTI2FlgVodpFfxSttCYF3qMAeo
June 2, 2020
Facebook នឹងធ្វើតេស្ត មុខងារផ្ទៀងផ្ទាត់អត្តសញ្ញាណប័ណ្ណ របស់បុគ្គល ដោយនឹងចាប់ផ្តើមមុនគេ នៅសហរដ្ឋអាមេរិក
បន្តិចទៀត ប្រសិនបើការបង្ហោះរបស់លោកអ្នក ទទួលបានប្រជាប្រិយភាពខ្លាំង នោះ អ្នកគួរតែត្រៀមបង្ហាញអត្តសញ្ញាណប័ណ្ណឱ្យហើយទៅ។
នាពេលបច្ចុប្បន្ននេះមានមនុស្សដ៏ច្រើនរាប់លាននាក់ បាននិងកំពុងប្រើប្រាស់កម្មវិធីបណ្តាញសង្គមជាច្រើន ស្របពេលជាមួយគ្នានេះដែរ មានអ្នកខ្លះក៏បានប្រើប្រាស់ព័ត៌មានពិតប្រាកដរបស់ខ្លួន ក្នុងការបង្កើត និងប្រើប្រាស់កម្មវិធីទាំងអស់នោះ ដូចជា ឈ្មោះ រូបថត អាសយដ្ឋាន ជាដើម។ ប៉ុន្តែក៏មានមនុស្សជាច្រើនដែលកំពុងតែប្រើប្រាស់ព័ត៌មានមិនពិតរបស់ខ្លួនផងដែរ។
ដើម្បីកាត់បន្ថយការប្រើប្រាស់ព័ត៌មានមិនពិតនេះ ក្រុមហ៊ុនហ្វេសប៊ុកបានធ្វើការផ្ទៀងផ្ទាត់អត្តសញ្ញាណនេះតាំងពីឆ្នាំ2018 មកម្ល៉េះ សម្រាប់អ្នកគ្រប់គ្រងផេច ហើយឥឡូវនេះ បាននិងកំពុងពង្រីកការផ្ទៀងផ្ទាត់អ្នកប្រើប្រាស់មួយចំនួនទៀត ដែលមានអ្នកតាមដានច្រើននៅសហរដ្ឋអាមេរិកផងដែរ។
ក្រុមហ៊ុនក៏បានផ្សព្វផ្សាយផងដេរថា តទៅមុខទៀត នឹងមានការផ្ទៀងផ្ទាត់អត្តសញ្ញាណរបស់បុគ្គលដែលធ្លាប់មានអាកប្បកិរិយាឆបោក នៅលើបណ្តាញសង្គមហ្វេសប៊ុក និងការបង្ហោះរបស់ពួកគេត្រូវបានរីករាលដាលយ៉ាងឆាប់រហ័សទៀតផងនោះ ព្រោះក្រុមហ៊ុនចង់ឱ្យអ្នកប្រើប្រាស់មានជំនឿទុកចិត្តថា បុគ្គលដែលគេបានឃើញនៅលើហ្វេសប៊ុកនោះ ពិតជាមានបំណងចង់ផ្សព្វផ្សាយព័ត៌មានដែលត្រឹមត្រូវប្រាកដមែន។
ប្រសិនបើនរណាម្នាក់ជ្រើសរើសមិនបញ្ជាក់ពីអត្តសញ្ញាណរបស់ពួកគេ ឬមានអត្តសញ្ញាណប័ណ្ណមិនត្រូវគ្នានឹងគណនីហ្វេសប៊ុក ដែលបានភ្ជាប់មកជាមួយនោះ ការបង្ហោះចែកចាយរបស់ពួកគេនឹងត្រូវបានកំណត់ ដូច្នេះមានតែមនុស្សចំនួនតិចតួចប៉ុណ្ណោះដែលនឹងបានឃើញ ប៉ុន្តែប្រសិនបើវាជាផេចវិញនោះ អ្នកគ្រប់គ្រងនឹងពុំអាចផ្សព្វផ្សាយបានទៀតឡើយ។
ដំណើរការនៃការផ្ទៀងផ្ទាត់នេះគឺជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់របស់ក្រុមហ៊ុនហ្វេសប៊ុក ដើម្បីបង្កើតគណនេយ្យភាពកាន់តែច្រើននៅលើហ្វេសប៊ុក និងកែលម្អបទពិសោធក្នុងការប្រើប្រាស់របស់មនុស្ស នៅលើកម្មវិធីរបស់ហ្វេសប៊ុក។
ការផ្ទៀងផ្ទាត់អត្តសញ្ញាណនេះត្រូវបានអនុវត្តនៅ សហរដ្ឋអាមេរិកមុនគេ ហើយអាចនឹងបន្តធ្វើនៅតាមបណ្តាប្រទេសផ្សេងៗទៀត ក្នុងពេលអនាគត៕
ប្រភព៖ https://www.engadget.com/facebook-to-verify-id-for-viral-accounts-182559625.html
នាយកដ្ឋានប្រឆាំងបទល្មើសបច្ចេកវិទ្យា
June 2, 2020