ទេសចរណ៍ - La Reine Media

ខេត្តបារៀ-វង់តាវវៀតណាម សហការជាមួយសមាគមទីភ្នាក់ងារទេសចរណ៍កម្ពុជាជំរុញវិស័យទេសចរណ៍

សមាគមទីភ្នាក់ងារទេសចរណ៍កម្ពុជា (CATA)បានចុះអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការអភិវឌ្ឍន៍វិស័យទេសចរណ៍ជាមួយសមាគមទីភ្នាក់ងារទេសចរណ៍ ខេត្តបារៀ-វង់តាវ (Baria-Vung Tau) ប្រទេសវៀតណាម ដើម្បីបង្កើតកញ្ចប់ទេសចរណ៍ពិសេសរួមគ្នាក្នុងការទាក់ទាញភ្ញៀវទេសចរវៀតណាមឱ្យមកទស្សនាកម្ពុជាបន្ថែមទៀត ខណៈដែលភ្ញៀវទេសចរវៀតណាមឈរនៅលេខរៀងទី2 បន្ទាប់ពីទេសចរចិន។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានថ្លែងថា ការចុះអនុស្សរណៈនៃការយោគយល់គ្នាមួយនេះ គឺដើម្បីជួយគ្នាធ្វើឱ្យគោលដៅទេសចរណ៍នៃប្រទេសជិតខាងទាំង2 កម្ពុជា-វៀតណាមកាន់តែមានសម្ទុះខ្លាំងជាងមុន។

លោកស្រីមានប្រសាសន៍ថា៖ “សមាគមទីភ្នាក់ងារទេសចរណ៍ខេត្តបារៀ-វង់តាវ របស់ប្រទេសវៀតណាមក៏ចង់ផ្សព្វផ្សាយតំបន់ទេសចរណ៍របស់គេ ក្នុងគោលដៅស្រូបទាញភ្ញៀវទេសចរ ពីកម្ពុជាឱ្យបានកាន់តែច្រើនឡើងថែមមួយកម្រិតទៀតផងដែរ”។

លោកជំទាវបានបន្តថា៖“យើងព្រមព្រៀងគ្នាក្នុងការជំរុញភ្ញៀវទេសចរទាំង 2កន្លែងនេះឱ្យកាន់តែបានច្រើនជាងមុន ជាពិសេសជួយជំរុញភ្ញៀវទេសចរខេត្តបារៀ-វង់តាវ ឱ្យចូលមកទស្សនាកម្ពុជា។ ដោយយើងមើលឃើញថា កម្រិតជីវភាពរបស់ប្រជាពលរដ្ឋយើងទាំង2 កាន់តែល្អប្រសើរឡើងពី 1ឆ្នាំទៅ 1ឆ្នាំអ៊ីចឹងហើយគុណភាពសេវាកម្មទាំងឡាយក៏ត្រូវការល្អជាងមុនដែរ”។

លោកស្រីថ្លែងថា សមាគមទីភ្នាក់ងារទេសចរណ៍ខេត្តវ៉ុងតាវ ប្រទេសវៀតណាមក៏ចង់ផ្សព្វផ្សាយតំបន់ទេសចរណ៍របស់គេក្នុងគោលដៅស្រូបទាញភ្ញៀវទេសចរពីកម្ពុជាឱ្យកាន់តែច្រើនឡើងថែមមួយកម្រិតទៀតផងដែរ ខណៈបច្ចុប្បន្នភ្ញៀវទេសចរកម្ពុជាទៅទស្សនាខេត្តនេះនៅមានចំនួនទាបនៅឡើយ។ លោកស្រីបន្តថា៖ “សម្រាប់ខេត្តបារៀ-វង់តាវ លំហូរភ្ញៀវទេសចរកម្ពុជានៅមានកម្រិតនៅឡើយ ដូច្នេះហើយទើបបានជាខាងវៀតណាមចាប់ផ្តើមចូលមកធ្វើការសហការជាមួយយើង”។

លោកស្រី ឆាយ ស៊ីវលីន ថ្លែងបញ្ជាក់ទៀតថា៖ ;“រំពឹងថា តាមរយៈការចុះអនុស្សរណៈនៃការយោគយល់គ្នានេះ កម្ពុជាក៏អាចស្រូបទាញភ្ញៀវទេសចរពីខាងវៀតណាមកាន់តែច្រើនឡើងជាងមុន ដោយសមាគមទីភ្នាក់ងារទេសចរណ៍នៃប្រទេសទាំង2 នឹងបង្កើតកញ្ចប់ទេសចរណ៍ពិសេសមួយ លើសពីសេវាកម្មទេសចរណ៍ធម្មតា ដើម្បីឱ្យមានភាពទាក់ទាញទាំងសងខាង”។

លោកស្រីបានថ្លែងបន្តទៀតថា៖ “យើងធ្វើការផ្សព្វផ្សាយ Promotion ដល់ភ្ញៀវរៀងៗខ្លួន។ នៅខេត្តបារៀ-វង់តាវ គេចាប់ផ្តើមផ្សព្វផ្សាយពីកម្ពុជាកាន់តែច្រើនជាងមុន មិនត្រឹមតែផ្សព្វផ្សាយទេ យើងនឹងធ្វើការ Promotion រួមគ្នា គឺយើងបន្ថែមតម្លៃឱ្យល្អ បន្ថែមសេវាកម្មពិសេសណាមួយដែលមិនធម្មតាដូចជាការផ្សព្វផ្សាយទូទៅទេ ដើម្បីឱ្យមានភាពទាក់ទាញទាំងសងខាង ទាំងខេត្តបារៀ-វង់តាវ ទាំងកម្ពុជាយើង”។

លោក ង្វៀន ហុងលិញ សមាជិកគណៈកម្មាធិការមជ្ឈិមបក្សកុម្មុយនីស្តវៀតណាម និងជាប្រធានក្រុមប្រឹក្សាប្រជាជនខេត្តបារៀ-វង់តាវ បានបង្ហាញពីសក្តានុពលទេសចរណ៍ និងចំណុចសំខាន់ៗនៃវិស័យទេសចរណ៍របស់ខេត្តបារៀ-វង់តាវដែលមានដូចជាទេសចរណ៍បែបវប្បធម៌ ពាណិជ្ជកម្ម ឆ្នេរសមុទ្រនិងតំបន់ទាក់ទាញភ្ញៀវទេសចរជាច្រើនទៀត។ ប្រទេសវៀតណាមចង់ទាក់ទាញភ្ញៀវទេសចរពីកម្ពុជាឱ្យបានច្រើនដើម្បីទៅទស្សនាខេត្តបារៀ-វង់តាវ ខណៈបច្ចុប្បន្ន លោកមើលឃើញថា ចំនួនភ្ញៀវទេសចរកម្ពុជាទៅកម្សាន្តនៅក្នុងខេត្តមួយនេះនៅមានកម្រិតតិចតួចនៅឡើយ។

ដោយឡែកមួយទៀតរដ្ឋបាលរាជធានីភ្នំពេញក្នុងឱកាសទទួលស្វាគមន៍ក្រុមគណៈប្រតិភូវៀតណាម ដែលដឹកនាំដោយលោក ង្វៀន ហុងលិញប្រធានក្រុមប្រឹក្សាប្រជាជនខេត្តបារៀ-វង់តាវ នៃប្រទេសវៀតណាម កាលពីថ្ងៃទី21 ខែតុលា ឆ្នាំ2019នេះ ក៏បានជំរុញការតភ្ជាប់វិស័យទេសចរណ៍រវាងរាជធានីភ្នំពេញជាមួយនឹងខេត្តបារៀ-វង់តាវប្រទេសវៀតណាមនេះផងដែរ ដើម្បីទាក់ទាញភ្ញៀវទេសចរ នៃប្រទេសទាំង2 ឱ្យទៅទស្សនាកម្សាន្តទៅវិញទៅមកឱ្យកាន់តែច្រើន និងពិភាក្សាលើគម្រោងភ្ជាប់កិច្ចសហប្រតិបត្តិការលើវិស័យជាច្រើន ដើម្បីជាប្រយោជន៍សម្រាប់ប្រជាជនទាំងសងខាង។

ឯកឧត្តម ឃួង ស្រេង អភិបាលរាជធានីភ្នំពេញចង់ឱ្យមានការភ្ជាប់ទំនាក់ទំនងរវាងវិស័យដឹកជញ្ជូនអ្នកដំណើរតាមរយៈរថយន្តក្រុងពីរាជធានីភ្នំពេញទៅខេត្តបារៀ-វង់តាវ នៃប្រទេសវៀតណាម ឬពីខេត្តបារៀ-វង់តាវ មកកាន់រាជធានីភ្នំពេញវិញ ដើម្បីបង្កលក្ខណៈងាយស្រួលដល់អ្នកទេសចរនៃប្រទេសទាំង2 បានទៅទស្សនាកម្សាន្តនៅតំបន់ទេសចរណ៍សំខាន់ៗ ទាំងនៅរាជធានីភ្នំពេញ និងខេត្តបារៀ-វង់តាវ ជាដើម។

ឯកឧត្តមបានអះអាងថា គម្រោងតភ្ជាប់វិស័យទេសចរណ៍រវាងរាជធានី-ខេត្តនៃប្រទេសទាំង2នេះ និងក្លាយជាកញ្ចប់ផលិតផលថ្មីក្នុងការទាក់ទាញភ្ញៀវទេសចរ ខណៈដែលរាជធានីភ្នំពេញ និងខេត្តបារៀ-វង់តាវ នៃប្រទេសវៀតណាម សម្បូរទៅដោយតំបន់ទេសចរណ៍ធម្មជាតិប្រវត្តិសាស្ត្រដ៏ច្រើនដូចគ្នា។លោកថ្លែងថា ឥលូវនេះ ក្រោមកំណើនសេដ្ឋកិច្ចជាង7% ជាង 2ទសវត្សរ៍មកនេះ ប្រជាជនកម្ពុជារស់នៅក្នុងភាពស៊ីវិល័យក្នុងការធ្វើដំណើរកម្សាន្តទាំងក្នុងប្រទេស និងក្រៅប្រទេស។

ឯកឧត្តម ឃួង ស្រេង បានបញ្ជាក់ថា៖“ស្របពេលដែលទីក្រុងបារៀ-វង់តាវ នៃប្រទេសវៀត ណាមនិងរាជធានីភ្នំពេញសម្បូរទៅដោយតំបន់ទេសចរណ៍ ដូច្នេះយើងត្រូវតែផ្លាស់ប្តូរវិស័យទេសចរណ៍គ្នាទៅវិញទៅមក ពិសេសការភ្ជាប់សេវារថយន្តក្រុងដោយផ្ទាល់ពីរាជធានីភ្នំពេញទៅបារៀ-វង់តាវ ឬពីបារៀ-វង់តាវមកកាន់រាជធានីភ្នំពេញវិញ។ បន្ថែមពីនេះទៀត គឺការផ្លាស់ប្តូរការវិនិយោគលើវិស័យទេសចរណ៍ដែលបង្កលក្ខណៈងាយស្រួលដល់ប្រជាជននៃប្រទេសទាំង2 បានធ្វើដំណើរកម្សាន្តទៅវិញទៅមក”។

គួរបញ្ជាក់ថា ដើម្បីសម្រួលដល់ការធ្វើដំណើររបស់ភ្ញៀវទេសចរពីវៀតណាមមកកាន់កម្ពុជា កាលពីពេលថ្មីៗនេះ ក្រុមហ៊ុនអាកាសចរណ៍ក្នុងស្រុក Cambodia Angkor Air ក៏បានប្រកាសភ្ជាប់ជើងហោះហើរត្រង់ពីរាជធានីភ្នំពេញ ទៅខេត្តដាណាង ប្រទេសវៀតណាមផងដែរ៕

November 12, 2019

លើកកម្ពស់ទីផ្សារទេសចរណ៍ដោយជំរុញកម្ពុជាជាគោលដៅទេសចរណ៍ តាមរយៈ ពិព័រណ៍ អន្តរជាតិ

តំណាងគណៈប្រតិភូមកពីក្រសួងទេសចរណ៍បានលើកកម្ពស់ប្រទេសកម្ពុជាឱ្យក្លាយជាគោលដៅទេសចរណ៍ក្នុងអំឡុងពិធីតាំងពិព័រណ៍ទេសចរណ៍អន្តរជាតិលើកទី15 នៅទីក្រុងហូជីមិញ ប្រទេសវៀតណាមដែលបានប្រព្រឹត្តទៅកាលពីថ្ងៃទី4 ដល់ទី7 ខែកញ្ញា ឆ្នាំ2019 កន្លងទៅ។ ក្រសួងទេសចរណ៍កម្ពុជាដែលបានចូលរួមដែរនោះ ក៏បានរៀបចំពិធីជប់លៀងមួយដែលមានឈ្មោះថា “រាត្រីកម្ពុជាឆ្នាំ2019” យ៉ាងអធិកអធមនៅកណ្ដាលក្រុងហូជីមិញ ដើម្បីបង្កើននូវការផ្សព្វផ្សាយពីគោលដៅ និងសក្ដានុពលទេសចរណ៍របស់កម្ពុជាទៅកាន់ក្រុមហ៊ុនទីភ្នាក់ងារទេសចរណ៍ និងភ្ញៀវទេសចរវៀតណាម ក៏ដូចជាជំរុញកិច្ចសហប្រតិបត្តិការលើវិស័យទេសចរណ៍ផងដែរ។

ថ្លែងនៅក្នុងកម្មវិធី“រាត្រីកម្ពុជាឆ្នាំ2019”ដែលធ្វើឡើងនៅខាងក្រៅពិព័រណ៍នេះ ឯកឧត្តម ថោងខុន រដ្ឋមន្ត្រីក្រសួងទេសចរណ៍បានមានប្រសាសន៍ថា “ក្រសួងបានព្យាយាមបង្កើនប្រជាប្រិយភាពរបស់ព្រះរាជាណាចក្រកម្ពុជានៅបរទេសតាមរយៈការចូលរួមពិព័រណ៍ទេសចរណ៍ជុំវិញពិភពលោក។

យើងរំពឹងថា កម្ពុជានឹងស្វាគមន៍វិនិយោគិន និងភ្ញៀវទេសចរមកពីជុំវិញពិភពលោកជាពិសេស យើងអាចរំពឹងថា នឹងមានប្រជាជនមកពីប្រទេសវៀតណាមកាន់តែច្រើន ព្រោះយើងមានផលិតផលទេសចរណ៍ថ្មីៗកំពុងរង់ចាំពួកគេ”។

នៅក្នុងពិធីតាំងពិព័រណ៍នៅទីក្រុងហូជីមិញនេះ អ្នកចូលរួមក្នុងវិស័យទេសចរណ៍មកពីប្រទេសកម្ពុជានិងវៀតណាមបានពិភាក្សា និងធ្វើការជាមួយគ្នាដើម្បីលើកកម្ពស់ទីផ្សារទេសចរណ៍របស់ប្រទេសទាំង2។ ពួកគេបានពិភាក្សាលើកស្ទួយប្រទេសដែលជាទិសដៅតែមួយក្រោមពាក្យស្លោក“ស្រុក2 គោលដៅតែ1” នេះបើយោងតាមការបង្ហោះនៅលើទំព័រហ្វេសប៊ុករបស់ក្រសួងទេសចរណ៍។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា៖ “ក្រៅពីសក្តានុពលនៃទេសចរណ៍វប្បធម៌ និងធម្មជាតិដ៏សម្បូរបែបហើយ កម្ពុជាមានឆ្នេរសមុទ្រប្រវែង 420គីឡូម៉ែត្រ និងមានមោទនភាពដែលបានក្លាយជាសមាជិកក្លិបឆ្នេរសមុទ្រដែលស្អាតជាងគេលើពិភពលោកដូចវៀតណាមដែរ ដែលស័ក្តិសមនឹងការប្រសិទ្ធនាមថា“កម្ពុជា ព្រះរាជាណាចក្រអច្ឆរិយៈផ្តល់ភាពកក់ក្តៅ” ហើយរាជរដ្ឋាភិបាលក៏បានដាក់ចេញនូវគោលនយោបាយជាតិស្តីពីអេកូទេសចរណ៍ដើម្បីជំរុញវិស័យអេកូទេសចរណ៍ និងទេសចរណ៍សហគមន៍សំដៅទាក់ទាញទេសចរក្នុងតំបន់”។នាដើមឆ្នាំ2019 នេះ ចំពោះការធ្វើដំណើរដោយប្រើប្រាស់យានយន្តផ្ទាល់ខ្លួន (self-driving tour)ពីវៀតណាមមកកម្ពុជា គឺមិនតម្រូវឱ្យបង់ប្រាក់កក់ ឬធានារ៉ាប់រងទេ និងអាចវិលចូលទៅវៀតណាមវិញតាមច្រកអន្តរជាតិរបស់កម្ពុជាណាមួយក៏បាន។

យោងតាមស្មារតីនៃកិច្ចសហប្រតិបត្តិការច្រករបៀងខាងត្បូងនៃមហាអនុតំបន់ទន្លេមេគង្គ កម្ពុជាមានគោលបំណងក្នុងការបង្កើតផ្លូវសមុទ្រជាមួយវៀតណាម។ ប្រទេសកម្ពុជា និងប្រទេសវៀតណាមបានព្រមព្រៀងសហប្រតិបត្តិការលើវិស័យទេសចរណ៍សមុទ្រនៅពេលដែលកំពង់ផែទេសចរណ៍នៅខេត្តកំពតដែលត្រូវបានគេរំពឹងថា នឹងបញ្ចប់ការសាងសង់នៅឆ្នាំ2021 ដែលជាការរួមចំណែកដ៏សំខាន់មួយដល់ការអនុវត្តសេចក្តីប្រកាសអាស៊ានស្តីពីវិស័យទេសចរណ៍តាមនាវា។

ទន្ទឹមនឹងការខិតខំជំរុញការផ្សព្វផ្សាយ ការពង្រឹង និងអភិវឌ្ឍន៍ផលិតផលទេសចរណ៍ ការ សម្រួលការធ្វើដំណើរ និងដឹកជញ្ជូន កម្ពុជាក៏យកចិត្តទុកដាក់ពង្រឹងគុណភាពសេវាកម្មទេសចរណ៍ស្តង់ដាបៃតងផងដែរ។ តាមរយៈចលនាប្រឡងប្រណាំងរមណីយដ្ឋានស្អាត សេវាកម្មល្អ បដិសណ្ឋារកិច្ចល្អនិងការបណ្តុះបណ្តាលអប់រំវិជ្ជាជីវៈ“បុគ្គលិកម្នាក់ជំនាញមួយ” និង“សេវា1 ស្តង់ដា1” ឱ្យស្របតាមស្តង់ដាអាស៊ាន។ នេះបើតាមឯកឧត្តមរដ្ឋមន្ត្រីក្រសួងទេសចរណ៍ដែលបានបញ្ជាក់។

ឯកឧត្តមរដ្ឋមន្ត្រីក៏បានអញ្ជើញវិនិយោគិន និងភ្ញៀវទេសចរគ្រប់ជាតិសាសន៍ ជាពិសេសជនជាតិវៀតណាមទៅវិនិយោគ និងទស្សនានៅកម្ពុជា ដោយឯកឧត្តមបានអះអាងថា “កម្ពុជានឹងទទួលបានវិនិយោគិន និងទេសចរពីគ្រប់ទិសទី ពិសេសទេសចរវៀតណាមឱ្យកាន់តែច្រើនថែមទៀត ដើម្បីជំរុញចំនួនភ្ញៀវទេសចរ។ ក្រសួងក៏កំពុងខិតខំជំរុញប្រទេសកម្ពុជាជាគោលដៅទេសចរណ៍តាមរយៈការចូលរួមពិព័រណ៍អន្តរជាតិ។ កិច្ចខិតខំប្រឹងប្រែងទាំងនេះមានសារៈសំខាន់ណាស់ក្នុងការជំរុញវិស័យទេសចរណ៍”។

កិច្ចសហប្រតិបត្តិការលើវិស័យទេសចរណ៍រវាងប្រទេសទាំង2 មានការរីកចម្រើនគួរឱ្យកត់សម្គាល់ពី 1ឆ្នាំទៅ 1ឆ្នាំតាមរយៈការអនុវត្តកិច្ចសហប្រតិបត្តិការទ្វេភាគីស្តីពីកិច្ចសហការផ្សព្វផ្សាយរួមគ្នា “ប្រទេស2 គោលដៅតែ1” ដែលជាផ្នែកមួយនៃផែនការយុទ្ធសាស្ត្រសម្រេចបាននូវការទទួលបានភ្ញៀវទេសចរវៀតណាមឱ្យបានចំនួន 1លាននាក់មកកម្ពុជា និងភ្ញៀវទេសចរកម្ពុជា 50ម៉ឺននាក់ទៅប្រទេសវៀតណាមនៅឆ្នាំ2020។កាលពីឆ្នាំ2018 ប្រទេសកម្ពុជាទទួលបានភ្ញៀវទេសចរអន្តរជាតិចំនួន 6.2លាននាក់ កើនឡើង 10.7% ពី 1ឆ្នាំទៅ 1ឆ្នាំ។ ក្នុងចំណោមនោះមានភ្ញៀវទេសចរចំនួនប្រមាណ 800,000នាក់ជាជនជាតិវៀតណាម។

ទន្ទឹមគ្នានឹងការតាំងពិព័រណ៍ទេសចរណ៍អន្តរជាតិនេះដែរ វេទិកាស្តីពីការចាប់ផ្តើមអាជីវកម្មទេសចរណ៍ឆ្លាតវៃ (Startup Tourism Forum) ក្នុងចក្ខុវិស័យពិភពលោកក៏ត្រូវបានធ្វើឡើងកាលពីថ្ងៃទី4 ដល់ទី6 ខែកញ្ញា ឆ្នាំ2019 នាទីក្រុងហូជីមិញ សាធារណរដ្ឋសង្គមនិយមវៀតណាមផងដែរ។

ឯកឧត្តម សូ វិសុទ្ធី អនុរដ្ឋលេខាធិការក្រសួងទេសចរណ៍បានបង្ហាញចំណាប់អារម្មណ៍ក្នុងវេទិកាស្តីពីការចាប់ផ្តើមអាជីវកម្មទេសចរណ៍ឆ្លាតវៃដោយប្រើប្រាស់ប្រព័ន្ធបច្ចេកវិទ្យា (SmartTourism Startup) គឺជាឱកាសដ៏ប្រសើរបំផុតមួយដែលថ្នាក់ដឹកនាំ និងប្រតិភូមកពីប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម(CLMTV) ជួបគ្នាដើម្បីពិភាក្សាផ្លាស់ប្តូរបទពិសោធ និងព័ត៌មានជាមួយនឹងអ្នកជំនាញ ធុរជន និងវិនិយោគិន អំពីកាវិវឌ្ឍថ្មីៗដ៏ឆាប់រហ័សនៃបច្ចេកវិទ្យាដែលពិភពលោកកំពុងប្រឈមនាពេលបច្ចុប្បន្ន ក៏ដូចជាពង្រឹងកិច្ចសហប្រតិបត្តិការ និងផ្សព្វផ្សាយទេសចរណ៍រួមគ្នា “ប្រទេស5 គោលដៅទេសចរណ៍តែ1” សំដៅប្រើប្រាស់អត្ថប្រយោជន៍ និងនវានុវត្តន៍ថ្មីនៃបច្ចេកវិទ្យាដើម្បីធ្វើឱ្យមានភាពងាយស្រួលរលូនប្រកបដោយភាពឆ្នាតវៃ និងចីរភាពដល់វិស័យទេសចរណ៍ និងឧត្តមភាពប្រកួតប្រជែងក្នុងយុគសម័យនៃបដិវត្តន៍ឧស្សាហកម្មទី4។

តាមរបាយការណ៍ពីក្រសួងទេសចរណ៍បានបង្ហាញថា សម្រាប់រយៈពេល 7ខែនៃឆ្នាំ2019 នេះកម្ពុជាទទួលបានភ្ញៀវទេសចរអន្តរជាតិជាង 3.8លាននាក់ កើនឡើង 11.1% ធៀបនឹងរយៈពេលដូចគ្នាក្នុងឆ្នាំ2018 ដោយតាមការព្យាករនៅឆ្នាំ2020កម្ពុជានឹងអាចទទួលបានភ្ញៀវទេសចរអន្តរជាតិប្រមាណ 7លាននាក់ និងបង្កើតការងារដោយផ្ទាល់ប្រមាណជិត 1លាននាក់។ ទន្ទឹមនេះ តម្រូវការផ្សេងៗក្នុងឧស្សាហកម្មមួយនេះនឹងមានការកើនឡើងបន្ថែមទៀត ដោយក្នុងនោះតម្រូវការបន្ទប់ស្នាក់នៅលំដាប់ស្ដង់ដាអាចនឹងកើនឡើងក្នុងរង្វង់ប្រមាណ7,000 ទៅ 16,000បន្ទប់នៅឆ្នាំ2020 ខាងមុខនេះ៕

September 20, 2019

ខេត្តក្រចេះនឹងក្លាយជាគោលដៅទេសចរណ៍លំដាប់ទី2 និងជាទីក្រុងបេតិកភណ្ឌ

រាជរដ្ឋាភិបាលមានគម្រោងរៀបចំខេត្តក្រចេះឱ្យក្លាយទៅជាគោលដៅទេសចរណ៍លំដាប់ទី2 (Secondary Destination) និងជាទីក្រុងបេតិកភណ្ឌដើម្បីទាក់ទាញភ្ញៀវទេសចរទៅទស្សនាខេត្តក្រចេះឱ្យបានច្រើនថែមទៀត និងធ្វើពិពិធកម្មផលិតផលទេសចរណ៍ក្រៅពីតំបន់រមណីយដ្ឋានអង្គរ។ នេះបើយោងតាមក្រសួងទេសចរណ៍។

ឯកឧត្ដម ថោង ខុន រដ្ឋមន្ត្រីក្រសួងទេសចរណ៍មានប្រសាសន៍ថា សភាពការណ៍វិវឌ្ឍន៍រីកចម្រើននៃវិស័យទេសចរណ៍សកលលោក និងក្នុងតំបន់ បានធ្វើឱ្យកម្ពុជារំលេចអំពីសារៈសំខាន់នៃវិស័យទេសចរណ៍ដើម្បីរួមចំណែកអភិវឌ្ឍសេដ្ឋកិច្ចជាតិ បង្កើតការងារ បង្កើនប្រាក់ចំណូល និងកាត់បន្ថយភាពក្រីក្ររបស់ប្រជាពលរដ្ឋ។

ឯកឧត្ដមរដ្ឋមន្ត្រីបានលើកឡើងអំពីសារៈសំខាន់នៃសត្វផ្សោតទន្លេមេគង្គដែលជាភាពទោលដោយឡែកពីគេរបស់កម្ពុជា ហើយដែលអង្គការទេសចរណ៍ពិភពលោក (UNWTO) បានផ្តល់ជំនួយតាមរយៈគម្រោងអភិរក្ស និងអភិវឌ្ឍន៍សត្វផ្សោត ដែលមានឈ្មោះថា Mekong Discovery Trails និងបានធ្វើឱ្យពិភពលោកស្គាល់ច្បាស់ពីសត្វផ្សោតទន្លេមេគង្គរបស់កម្ពុជា។

ឯកឧត្ដមរដ្ឋមន្ត្រីបានលើកឡើងនូវពាក្យស្លោកមួយថា៖“មានផ្សោតទើបមានទេសចរ គ្មានផ្សោត គឺគ្មានទេសចរ” ដូច្នេះយើងទាំងអស់គ្នាត្រូវតែរួមគ្នាថែរក្សា អភិរក្ស និងអភិវឌ្ឍតំបន់ទេសចរណ៍អន្លង់ផ្សោតនេះឱ្យបានល្អ និងមាននិរន្តរភាព (សព្វថ្ងៃ ផ្សោតបានបង្កើតកូនបន្តថែមទៀតហើយ)”។

ឯកឧត្ដម ថោង ខុន បានបន្តទៀតថា ក្រៅពីសត្វផ្សោត ខេត្តក្រចេះក៏មានផលិតផលទេសចរណ៍ល្បីៗជាច្រើនទៀតដែរ (ដូចជានំក្រឡាន ផ្លែក្រូចថ្លុង-ល-) មានតំបន់ទេសចរណ៍ និងសហគមន៍ទេសចរណ៍ជាច្រើនដែលត្រូវយកចិត្តទុកដាក់ពង្រឹង និងលើកកម្ពស់គុណភាពផលិតផល និងសេវាកម្មឱ្យស្របតាមស្តង់ដា។

ឯកឧត្ដមមានប្រសាសន៍ថា៖“មន្ទីរទេសចរណ៍ខេត្តក្រចេះត្រូវរៀបចំឱ្យមានផែនការយុទ្ធសាស្ត្រលើវិស័យទេសចរណ៍ក្នុងខេត្តក្រចេះ ឆ្លើយតបតាមផែនការយុទ្ធសាស្ត្រទេសចរណ៍ជាតិ ក្នុងតំបន់ និងសកលលោក ពង្រឹងគុណភាពផលិតផល និងសេវាកម្មទេសចរណ៍ក្នុងទូទាំងខេត្ត បង្កើតផលិតផលទេសចរណ៍ថ្មីៗ (ពង្រឹងផលិតផលដែលមានស្រាប់ និងបង្កើតថ្មី) ខិតខំអភិវឌ្ឍខេត្តក្រចេះឱ្យក្លាយជាគោលដៅទេសចរណ៍លំដាប់ទី2 និងជាទីក្រុងបេតិកភណ្ឌ បង្កើតឱ្យមានព្រឹត្តិការណ៍ទេសចរណ៍ថ្មីៗដូចជា សកម្មភាពទេសចរណ៍នៅលើឆ្នេរខ្សាច់ កីឡាលើឆ្នេរ លើទឹក ពង្រឹងចលនាប្រឡងប្រណាំងទីក្រុងស្អាតដោយត្រូវដំឡើងឱ្យមានបញ្ជរព័ត៌មានទេសចរណ៍ បង្គន់អនាម័យសាធារណៈ សោភណភាព អនាម័យ បរិស្ថានប្រកបដោយភាពស្អាត និងបៃតង”។

ឯកឧត្ដមបញ្ជាក់ទៀតថា៖“មន្ទីរទេសចរណ៍ខេត្តក្រចេះត្រូវខិតខំដណ្តើមឱ្យបានផ្ការំដួល 3ទង និងរង្វាន់ទីក្រុងទេសចរណ៍ស្អាតអាស៊ាននៅឆ្នាំ2023 ត្រូវពង្រឹងគុណភាព និងសេវាកម្មកាណូត និងទូកទេសចរណ៍ឱ្យបានល្អត្រឹមត្រូវតាមបច្ចេកទេស និងស្តង់ដា រួមទាំងឯកសណ្ឋានអ្នកបើកបរកាណូតទេសចរណ៍ផងដែរ”។

គួរបញ្ជាក់ថា ខេត្តក្រចេះស្ថិតនៅតំបន់ខ្ពង់រាបប៉ែកឦសាននៃប្រទេសកម្ពុជា តាមដងទន្លេមេគង្គ សម្បូរទៅដោយសម្បត្តិវប្បធម៌‌ប្រវត្តិសាស្ត្រ និងធម្មជាតិជាច្រើនដែលទាក់ទាញចំណាប់អារម្មណ៍ភៀ្ញវជាតិ និងអន្តរជាតិឱ្យមកទស្សនាកម្សាន្ត និងសិក្សាស្រាវជ្រាវដើម្បីបានឃើញ បានយល់ និងបានស្គាល់ពីទិដ្ឋភាពពិតនៃសម្បតិ្តទេសចរណ៍ទាំងនោះដោយមិនអាចខានបាន។

លោក ជុក ជំនោរ អ្នកនាំពាក្យក្រសួងទេសចរណ៍បានឱ្យដឹងថា តំបន់រមណីយដ្ឋានអង្គរវត្ត គឺជាគោលដៅអាទិភាព ដោយឡែកយើងចង់ឱ្យខេត្តក្រចេះក្លាយជាគោលដៅគាំទ្រ ឬជាគោលដៅទេសចរណ៍លំដាប់ទី2 ដោយសារតែខេត្តនេះមានសក្តានុពលខាងទេសចរណ៍ជាច្រើននៅភូមិភាគឦសាន ជាពិសេសសត្វផ្សោតទន្លេមេគង្គ ជាអេកូទេសចរណ៍សម្រាប់ខេត្តក្រចេះ និងនៅភូមិភាគឦសាន ហើយមួយទៀតខេត្តក្រចេះមានសហគមន៍កោះទ្រង់ (ក្រូចថ្លុងកោះទ្រង់) កោះផ្តៅ វត្តសសរមួយរយ ដែលអាចនិយាយបានថា ខេត្តក្រចេះ គឺជាឋានសួគ៌អេកូទេសចរណ៍សម្រាប់ភូមិឦសាន។

លោក ជំនោរ បន្ថែមថា៖ “ក្រសួងទេសចរណ៍កំពុងតែសហការជាមួយក្រសួងវប្បធម៍ធ្វើការជាមួយអង្គការ យូណេស្កូក្នុងការជំរុញការចុះបញ្ជីទីក្រុងបាត់ដំបង ទីក្រុងកំពត និងទីក្រុងក្រចេះជាទីក្រុងបេតិកភណ្ឌ ដោយសារតែភ្ញៀវអឺរ៉ុបចូលចិត្តទៅទស្សនាកន្លែងដូច្នេះ”។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (Pacific Asia Travel Association) នៅប្រទេសកម្ពុជា បានឱ្យដឹងថា គោលដៅទេសចរណ៍លំដាប់ទី2 គឺជាយុទ្ធសាស្ត្រនៃការគាំទ្រ និងបង្កើនឱកាសសម្រាប់អភិវឌ្ឍន៍សេដ្ឋកិច្ចសង្គម តាមរយៈការវិនិយោគ និងការអភិវឌ្ឍលើវិស័យទេសចរណ៍។

លោកបន្តថា កម្ពុជាមានសម្បត្តិវប្បធម៌ និងធនធានធម្មជាតិជាច្រើនសម្រាប់ផ្តល់ជូនភ្ញៀវបរទេសម្យ៉ាងវិញទៀតគោលដៅទេសចរណ៍លំដាប់ទី2 គឺជាការធ្វើពិពិធកម្មវិស័យទេសចរណ៍ និងជាប្រភពនៃការបង្កើតប្រាក់ចំណូលក្នុងវិស័យទេសចរណ៍ ដោយសារតែវាធ្វើឱ្យភ្ញៀវទេសចរបរទេសអាចមកកម្សាន្តនៅតំបន់ផ្សេងៗក្រៅពីអង្គរវត្ត និងទាក់ទាញឱ្យពួកគេស្នាក់នៅកម្ពុជាបានយូរ និងចំណាយប្រាក់ច្រើន។

លោក ស៊ីណាន បានបន្តទៀតថា៖ “នៅពេលដៃគូអភិវឌ្ឍន៍សហការជិតស្និទ្ធ និងជាដៃគូយុទ្ធសាស្ត្រជាមួយរដ្ឋាភិបាល អ៊ីចឹងហើយហេដ្ឋារចនាសម្ព័ន្ធគាំទ្រនឹងត្រូវបានអភិវឌ្ឍតាមហ្នឹងដែរ ប៉ុន្តែវាទាមទារឱ្យមាននូវប្លង់មេ ដើម្បីដាក់ចេញ និងឱ្យផែនការដើរទៅមុខដោយរលូន”។

នៅឆ្នាំ2018 ខេត្តក្រចេះទទួលបានទេសចរសរុបចំនួន 349,186នាក់ (កើនឡើង15.22%ធៀបនឹងរយៈពេលដូចគ្នានៅឆ្នាំ2017) ក្នុងនោះទេសចរជាតិមានចំនួន 323,196នាក់ និងទេសចរអន្តរជាតិចំនួន25,990នាក់ (ក្នុងនោះភាគច្រើនជាជនជាតិបារាំង)៕

February 27, 2019

ទីតាំងទេសចរណ៍ 10កន្លែងនៅទីក្រុងម៉ាកាវ “ឡាស វេហ្គាស នៃទ្វីបអាស៊ី”

“ឡាស វេហ្គាស នៃទ្វីបអាស៊ី” នេះគឺជាឈ្មោះដែលមនុស្សជាច្រើនហៅ ទីក្រុងម៉ាកាវ (Macau) ទីក្រុងកំពង់ផែដែលបំបែកខ្លួនពីប្រទេសចិនដីគោក។ ម៉ាកាវជាតំបន់ដែលមានផ្ទៃដីទំហំតូច និងមានប្រជាជនរស់នៅតិចដូចគ្នា។ ទីនេះ គឺជាដែនដីដែលបានធ្វើការចាក់ដីបំពេញសមុទ្រដើម្បីសាងផែនដីថ្មីឡើងនៅលើឆ្នេរទល់មុខទីក្រុង ជូហៃ មណ្ឌលក្វាងទុង ប្រទេសចិន និងមានប្រវត្តិយូរលង់ណាស់មកហើយ។ ដូចដែលយើងបានដឹងខ្លះៗមកហើយថា នៅក្នុងទីក្រុងមួយនេះពោរពេញទៅដោយភាពសម្បូរបែបខាងវប្បធម៌ ស្ថាបត្យកម្ម និងដែលសំខាន់បំផុតគឺ ភាពរីកចម្រើនទៅមុខរបស់ទីក្រុងនេះដែលអាចចាត់ទុកបានថា ស្ថិតក្នុងលំដាប់ជួរមុខគេរបស់ទ្វីបអាស៊ីតែម្ដង។ ថ្ងៃនេះ ទំព័រទេសចរណ៍ របស់ទស្សនាវដ្ដី ឡារ៉ែន នឹងនាំប្រិយមិត្តអ្នកអានទៅកម្សាន្តនៅទីតាំងទេសចរណ៍ចំនួន10កន្លែងដែលមិនអាចខកខានបាន បើសិនជាមានឱកាសបានទៅលេងទីក្រុងម៉ាកាវ…។

1. សំណាកព្រះវិហារ St. Paul

ចាប់ផ្ដើមកន្លែងដំបូងដោយលែនម៉ាកលំដាប់លេខមួយរបស់ម៉ាកាវជាមួយនឹងសំណាកព្រះវិហារ St. Paul ជាសំណាកព្រះវិហារដែលរួចផុតពីហេតុការណ៍អគ្គិភ័យដ៏ធំមួយកាលពីអតីត។ បច្ចុប្បន្នទីនោះបានក្លាយជាលែនម៉ាកដែលអ្នកទេសចរតែងធ្វើដំណើរមកថតរូប និងទស្សនាភាពល្អស្អាតរបស់សំណាកព្រះវិហារមួយនេះ។

2. ចតុរស្ស Senado

បន្ទាប់ពីសំណាកព្រះវិហារ St. Paul ដើរកាត់មកខាងផ្សារបន្តិចក៏នឹងបានជួបចំណុចឆេកអ៊ីនមួយទៀតរបស់ទីក្រុងម៉ាកាវគឺរង្វង់មូល Senado។ នៅទីតាំងចតុរស្សមួយនេះលោកអ្នកនឹងបានជួបនឹងក្លិនចំហាយនៃវប្បធម៌លោកខាងលិចយ៉ាងពេញទំហឹង ទាំងអគារផ្ទះសំបែង និងព្រះវិហារបែប ឈីណូ ព័រទុយគីស មានភោជនីយដ្ឋាន និងហាងលក់ទំនិញជាច្រើន និងមានចំណុចកណ្ដាលគឺទីលានបាញ់ទឹកនៅផ្នែកខាងមុខជាចំណុចថតរូបដ៏ស្រស់ស្អាតរបស់ចតុរស្សមួយនេះ។

3. វត្ត អាម៉ា A Ma Temple

វត្តមួយនេះ គឺជាដើមកំណើតនៃឈ្មោះទីក្រុង ម៉ាកាវ ក៏អាចថាបានដែរ ព្រោះតាមប្រវត្តិសាស្រ្ត វត្តអាម៉ានេះមានការបង្កបង្កើតឡើងមុននឹងមានដែនដីម៉ាកាវនេះទៅទៀត ដោយកាលពីអតីតកាលមានជនជាតិព័រទុយហ្គាល់ធ្វើដំណើរតាមទូកមកជួបដែនដីម៉ាកាវ និងបានចង្អុលសួរទៅអ្នកម៉ាកាវខាងឆ្នេរឈូងសមុទ្រខាងមុខថា មានឈ្មោះអ្វីដែរ? អ្នកម៉ាកាវក៏ឆ្លើយថា A Ma Gao ព្រោះបរិវេណដែលជនជាតិព័រទុយហ្គាល់ចង្អុលទៅនោះគឺ វត្តអាម៉ាហ្នឹងឯង ហើយចាប់ពីពេលនោះមកជនជាតិលោកខាងលិចក៏ហៅតំបន់នោះថា ម៉ាកាវៗតាមសំនៀងរបស់ជនជាតិព័រទុយហ្គាល់។ គេនាំគ្នាជឿថា អ្នកទេសចរណ៍បើសិនជាបានមកថ្វាយបង្គំព្រះសំពះសុំពរនៅទីនេះ នឹងធ្វើឱ្យមានជោគសំណាង មានសេចក្ដីសុខរហូតក្នុងការធ្វើដំណើរ។ នៅខាងក្នុងវត្តមានម្លប់ឈើត្រជាក់ត្រឈឹងត្រឈៃ ស្រស់ស្អាត អ្នកណាដែលបានទៅលេងម៉ាកាវ កុំភ្លេចឆៀងចូលទៅបូជាសក្ការៈវត្តអាម៉ាមួយនេះកុំខានឱ្យសោះ។

4. រូបចម្លាក់ព្រះម៉ែ គង់ស៊ីអីុម កណ្ដាលសមុទ្រ

បើយើងជិះរថយន្តទស្សនាចរមកប៉ែកខាងត្បូងរបស់ទីក្រុងម៉ាកាវ និងកាត់តាមឆ្នេរសមុទ្រយើងនឹងបានឃើញរូបចម្លាក់ព្រះម៉ែ គង់ស៊ីអីុមដ៏ធំមួយតាំងលេចធ្លោនៅក្នុងបរិវេណ Outer harbour។ រូបចម្លាក់ព្រះម៉ែ គង់ស៊ីអីុមមួយអង្គនេះជាវត្ថុស័ក្តិសិទ្ធិមួយទៀតដែលប្រជាជនទីក្រុងម៉ាកាវគ្រប់រូបផ្ដល់នូវការគោរពសក្ការៈ ជាពិសេសអ្នកដែលនិយមចូលចិត្តរឿងហុងស៊ុយ។ បើសង្កេតមើលឱ្យច្បាស់ រូបចម្លាក់រួមទាំងទីធ្លាជុំវិញនោះផង ត្រូវបានសាងឡើងដោយសំអាងលើគោលការណ៍ខាងហុងស៊ុយទាំងអស់។ គេនាំគ្នាជឿថា អ្នកណាដែលបានទៅថ្វាយបង្គំសុំពរនៅកន្លែងរូបចម្លាក់ព្រះម៉ែគង់ស៊ីអីុម នេះ នឹងបានទទួលពរវិសេសពីខ្សែគង្គា និងអាចនាំសេចក្ដីទុក្ខសោកក្នុងជីវិតទាំងប៉ុន្មានមកបោះចោលនៅទីនេះបានទៀតផង។

5. ម៉ាកាវ ថាវវើរ Macau Tower

លែនម៉ាកដែលអាចមើលឃើញបានសឹងតែគ្រប់ទីកន្លែងក្នុងទីក្រុងម៉ាកាវនេះ គឺអគារដែលតាំងជ្រងោរនៅកណ្ដាលទីក្រុងដែលមានកម្ពស់ដល់ទៅ 338ម៉ែត្រ។ ចង់ណែនាំថា ចូរសាកល្បងនាំគ្នាឡើងទៅលើម៉ាកាវ ថាវវើរនៅពេលល្ងាច យើងនឹងអាចមើលឃើញទិដ្ឋភាពទូទាំងទីក្រុងម៉ាកាវទាំងមូល ព្រមជាមួយទេសភាពព្រះអាទិត្យពេលអស្ដង្គតក្នុងអំឡុងពេល Magic Hour បានបែបរ៉ូមែនទិកបំផុត ហើយនិងហាយឡាយមួយទៀតក្នុងការមកលេងកម្សាន្តនៅម៉ាកាវ ថាវវើរនេះ សម្រាប់អ្នកដែលចូលចិត្តភាពរំភើបស្រៀវស្រើប គឺនៅជាន់លើបំផុតនៃម៉ាកាវ ថាវវើរមានល្បែងកម្សាន្តលោតខ្សែ បាន់ជី ចាំផ៍ (Bangee Jump) ពីកំពូលអគារនេះ និង Sky Walk គឺការដើរនៅលើគែមអគារឱ្យភ្ញៀវទេសចរបានលេងកម្សាន្តទៀតផង។ អ្នកណាដែលគិតថា ខ្លួនឯងក្លាហាន គួរតែទៅសាកល្បងឱ្យបានម្ដង។ (មានតនៅទស្សនាវដ្តីលេខក្រោយ)

November 26, 2018

ទេសចរណ៍ សំណង់ និងវិទ្យាសាស្ត្រ ជាជំនាញដែលកម្ពុជាត្រូវការសម្រាប់បង្កើនសក្តានុពលអភិវឌ្ឍន៍

កម្ពុជាជាប្រទេសដែលស្ថិតនៅចំណុចកណ្តាលនៃអាស៊ាន និងជាកន្លែងដែលមានភូមិសាស្ត្រ ក៏ដូចជាមានភាពងាយស្រួលក្នុងការធ្វើដំណើរកម្សាន្តការធ្វើជំនួញ និងការវិនិយោគ តែទន្ទឹមនឹងលក្ខខណ្ឌល្អប្រសើរនេះ កម្ពុជាក៏មានបញ្ហាប្រឈមមួយចំនួនផងដែរដែលទាមទារឱ្យមានការដោះស្រាយ ជាពិសេសលើបញ្ហាធនធានមនុស្ស។

អ្នកជំនាញផ្នែកធនធានមនុស្សជាច្រើនបានសង្កត់ធ្ងន់លើវិសមភាពនៃការជ្រើសរើសជំនាញកង្វះសាលាបណ្តុះបណ្តាលជំនាញដែលកំពុងមានតម្រូវការខ្ពស់ និងបញ្ហាជាច្រើនផ្សេងទៀតដែលប្រជាជនមិនទាន់ទទួលបានព័ត៌មានគ្រប់គ្រាន់សម្រាប់ការចូលរួមក្នុងវិស័យទាំងអស់នោះ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានលើកឡើងថា កម្ពុជាជាប្រទេសដែលកំពុងមានសក្តានុពលខ្លាំងលើវិស័យទេសចរណ៍ព្រោះប្រទេសយើងមានភាពអំណោយផលច្រើនដូចជាអេកូទេសចរណ៍សម្បូរបែប មានភាពទាក់ទាញ និងមានកន្លែងកម្សាន្តប្រណីតៗជាច្រើន។ កម្ពុជាក៏មានផលិត-ផលទេសចរណ៍ជាច្រើនផ្សេងទៀតជុំវិញតំបន់ទេសចរណ៍វប្បធម៌ ដែលមានប្រាសាទបុរាណប្រកបដោយរចនាប័ទ្មល្បីល្បាញជាច្រើននៅលើពិភពលោក។ ជាក់ស្តែងប្រាសាទអង្គរវត្ត និងតំបន់ជាច្រើនផ្សេងទៀតត្រូវបានចាត់ចូលជាតំបន់ទេសចរណ៍ដ៏ទាក់ទាញបំផុតដែលអាចរកចំណូលជាច្រើនលានដុល្លារចូលទៅក្នុងកញ្ចប់ថវិកាជាតិ។ ដោយមើលឃើញពីឱកាសដ៏សំខាន់ទាំងអស់នេះ ក្រសួងក៏បានបង្កើនកិច្ចសហការល្អជាមួយវិស័យឯកជនដើម្បីបង្កើនផលិតផលទេសចរណ៍ឱ្យកាន់តែសម្បូរបែប ហើយតភ្ជាប់តំបន់ទេសចរណ៍ដែលនៅឆ្ងាយឱ្យកាន់តែមានភាពងាយស្រួលសម្រាប់ភ្ញៀវទេសចរ តែអ្វីដែលកម្ពុជាកំពុងប្រឈមគឺកត្តាធានធានមនុស្សក្នុងវិស័យទេសចរណ៍។

ឯកឧត្តម ថោង ខុន បានមានប្រសាសន៍ថា៖ “ចំនួនភ្ញៀវទេសចរមកកាន់កម្ពុជាមានកំណើនជារៀងរាល់ឆ្នាំ ស្របពេលដែលប្រទេសយើងមានស្ថិរភាព និងស្ថានភាពអំណោយផលជាច្រើនសម្រាប់ភ្ញៀវទេសចរនៅទូទាំងពិភពលោក ហេតុនេះទាំងវិស័យរដ្ឋ និងឯកជន ចាំបាច់ត្រូវតែពង្រីកផលិតផលទេសចរណ៍ថ្មីៗដើម្បីឱកាន់តែមានភាពទាក់ទាញ”។

ឯកឧត្ដមរដ្ឋមន្ត្រីក្រសួងទេសចរណ៍បានលើកឡើងផងដែរថា ដើម្បីសម្រេចបាននូវគោលដៅអភិវឌ្ឍន៍ផលិតផលទេសចរណ៍ថ្មីៗ និងទាក់ទាញនៅកម្ពុជា អ្វីដែលត្រូវការជាចាំបាច់នោះគឺ ធនធានមនុស្សនៅក្នុងវិស័យនេះ។ កម្ពុជាត្រូវការបន្ថែមសាលាបណ្តុះបណ្តាលជំនាញដល់យុវជនឱ្យបានច្រើននាក់បន្ថែមទៀត ដើម្បីបម្រើការងារនៅក្នុងវិស័យដែលផ្តល់ផលចំណេញយ៉ាងច្រើនសម្រាប់សេដ្ឋកិច្ចជាតិនេះ។

នាពេលថ្មីៗនេះជំនាញទេសចរណ៍ត្រូវបានបញ្ជ្រាបចូលជាមួយនឹងមុខវិជ្ជាអប់រំរបស់ក្រសួងអប់រំ យុវជន និងកីឡា ដើម្បីបង្កើនភាពទាក់ទាញកាន់តែខ្លាំងសម្រាប់យុវជនឱ្យជ្រើសរើសជំនាញទេសចរណ៍ធ្វើជាអាជីពសម្រាប់ចូលរួមអភិវឌ្ឍសង្គមផង និងទទួលបានកម្រិតជីវភាពល្អប្រសើរសម្រាប់ខ្លួនឯងផង។

ទន្ទឹមនឹងវិស័យទេសចរណ៍ វិស័យសំណង់ក៏ត្រូវបានគេមើលឃើញថា មានសារៈសំខាន់ខ្លាំងផងដែរដើម្បីបង្កើនល្បឿននៃការអភិវឌ្ឍ និងទាក់ទាញការវិនិយោគនៅកម្ពុជា ព្រោះហេដ្ឋារចនាសម្ព័ន្ធប្រកបដោយគុណភាព និងសោភណភាពអាចជាចំណុចមួយក្នុងចំណោមចំណុចសំខាន់ៗដែលជំរុញឱ្យមានការមកកម្សាន្ត រស់នៅ និងធ្វើអាជីវកម្មកាន់តែច្រើននៅកម្ពុជា។

បង្ហាញលើគំនិតនេះ សាស្ត្រាចារ្យ សុខ ខុម ព្រឹទ្ធបុរសមហាវិទ្យាល័យវិស្វកម្ម និងស្ថាបត្យកម្ម នៃសាកលវិទ្យាល័យបៀលប្រាយ បានលើកឡើងថា សំណង់ និងស្ថាបត្យកម្មជាផ្នែកដ៏សំខាន់មួយដែលកម្ពុជាកំពុងត្រូវការ ហើយវាកំពុងមានសម្ទុះខ្លាំងនាពេលបច្ចុប្បន្ននេះ។ សព្វថ្ងៃបើទោះបីជាយើងមើលឃើញថា គម្រោងសាងសង់នានាមានការកើនឡើងច្រើនហើយក៏ដោយ តែកម្ពុជានៅត្រូវការគម្រោងជាច្រើនផ្សេងទៀតដើម្បីឆ្លើយតបជាមួយនឹងតម្រូវការសម្រាប់ការរស់នៅ ការកម្សាន្ត សេវាស្នាក់នៅផ្លូវថ្នល់ និងស្ពានធំៗជាច្រើនទៀតដើម្បីដើរឱ្យទាន់ប្រទេសនានាក្នុងតំបន់ និងស្ថានភាពជាក់ស្តែងនៃការរីកចម្រើនផ្នែកសេដ្ឋកិច្ច។

លោកសាស្ត្រាចារ្យ សុខ ខុម បានមានប្រសាសន៍ថា៖ “កម្ពុជាយើងត្រូវការអ្នកជំនាញវិស្វកម្មច្រើនណាស់ ហើយកុំគិតថាចំនួននិស្សិតដែលយើងមានសព្វថ្ងៃនេះគ្រប់គ្រាន់។ វាស្ថិតក្នុងចំនួនមួយតែប៉ុណ្ណោះតែយើងនៅត្រូវការច្រើនទៀត ព្រោះទីក្រុងរបស់យើងនៅទូលាយ និងត្រូវការអភិវឌ្ឍបន្ថែមទៀត មិនទាន់ឆ្អែតនៅឡើយទេ។ ទន្ទឹមនឹងនេះតម្រូវការនៃការអភិវឌ្ឍជីវភាពរបស់ប្រជាជននៅតំបន់ជនបទក៏មានការកើនឡើងដែរ”។

លោកសាស្ត្រាចារ្យ សុខ ខុម បានបន្ថែមទៀតថាបន្តិចទៀតការរស់នៅនឹងមានតម្រូវការកាន់តែខ្ពស់ហើយតំបន់អភិវឌ្ឍន៍នឹងខិតទៅជិតតំបន់ជនបទ ដែលធ្វើឱ្យអ្នកនៅតំបន់ជនបទក៏ចាប់ផ្តើមត្រូវការលំនៅឋានដែលមានលក្ខណៈស្តង់ដារ និងមានសោភណភាពល្អដែរ។ លោកសាស្ត្រាចារ្យបញ្ជាក់ផងដែរថាអ្នកណាក៏ស្រឡាញ់ផ្ទះដែរ ហេតុនេះនៅពេលពួកគាត់មានលទ្ធភាព គាត់នឹងចាប់ផ្តើមសាងសង់ ហើយគម្រោងកាន់តែច្រើនឡើងៗនឹងកើតមានឡើងដែលទាមទារឱ្យមានអ្នកជំនាញសាងសង់មាននៅគ្រប់ទីកន្លែង។ ម្យ៉ាងវិញទៀត យើងក៏ត្រូវការអ្នករៀបចំគម្រោងអគារសំខាន់ៗក្នុងទីក្រុងឱ្យមានសោភណភាព និងភាពងាយស្រួលសម្រាប់ទាក់ទាញអ្នកវិនិយោគផងដែរ ព្រោះមុននឹងវិនិយោគ ឬសម្រេចចិត្តមកកម្ពុជា គេតែងតែមើលជាមុនសិនដែរថា កន្លែងនេះមានសុវត្ថិភាពគ្រប់គ្រាន់ដែរឬទេ? មានភាពងាយស្រួល និងផាសុកភាពល្អដែរឬទេសម្រាប់ការស្នាក់នៅយូរអង្វែង?។

ងាកមកវិស័យវិទ្យាសាស្ត្រវិញ ក៏ជាវិស័យសំខាន់មួយក្នុងជំនាញ STEM ដែលត្រូវបានគេមើលឃើញថា មានទីផ្សាខ្លាំងដូចគ្នានៅកម្ពុជា និងជាផ្នែកដែលត្រូវការជាចាំបាច់នៅ 10ឆ្នាំក្រោយ។

រដ្ឋលេខាធិការក្រសួងអប់រំ យុវជន និងកីឡា ឯកឧត្តម អុឹម កុច បានលើកឡើងថា កម្ពុជាពិតជាត្រូវការអ្នកជំនាញជាច្រើនជាពិសេសផ្នែកវិទ្យាសាស្ត្រ ដែលជាផ្នែកដ៏សំខាន់ក្នុងការបង្កើតសមិទ្ធផលថ្មីៗដើម្បីដោះស្រាយបញ្ហារបស់ប្រជាជន។ តាមរយៈអ្នកជំនាញវិទ្យាសាស្ត្រ កម្ពុជានឹងកាន់តែមានភាពទាក់ទាញសម្រាប់ការវិនិយោគ ព្រោះក្រុមហ៊ុនធំៗទាំងអស់ដែលចង់បង្កើតរោងចក្រ ឬចង្វាក់ផលិតកម្មនៅកម្ពុជាសុទ្ធតែត្រូវការជាចាំបាច់នូវធនធានមនុស្សដើម្បីបង្កើតភាពច្នៃប្រឌិត និងរីកចម្រើនដល់ស្ថាប័នរបស់គេ។

ឯកឧត្តម អុឹមកុច បានមានប្រសាសន៍ថា៖ “បន្តិចទៀតប្រទេសយើងនឹងត្រូវអភិវឌ្ឍកាន់តែច្រើន ហើយការប្រកួតប្រជែងក៏កាន់តែខ្លាំងដែរ ហេតុនេះប្រសិនបើយើងមានអ្នកជំនាញច្រើន យើងនឹងអាចកសាងសមិទ្ធផលជាច្រើន បានលឿន ហើយចំណាយតិច”។

អ្នកជំនាញអប់រំខាងលើបានលើកឡើងផងដែរថាដោយមើលឃើញពីតម្រូវការលើវិស័យសំខាន់ៗទាំងអស់នេះ ក្រសួងអប់រំបានបង្កើតសកម្មភាពជាច្រើនដើម្បីជំរុញឱ្យយុវជនជំនាន់ថ្មីកាន់តែមានសមត្ថភាពងាយស្រួលក្នុងការសិក្សាលើផ្នែកវិទ្យាសាស្ត្រ និងលើកទឹកចិត្តឱ្យចាប់អាជីពនេះកាន់តែច្រើនឡើង៕

November 24, 2018

អ្នកជំនាញអចលនទ្រព្យស្វែងរកចំណុចរួមលើការវិនិយោគវិស័យទេសចរណ៍

ការវិនិយោគលើវិស័យទេសចរណ៍នៅក្នុងប្រទេសកម្ពុជាបច្ចុប្បន្នកំពុងមានសម្ទុះខ្លាំងដោយសារតែវិស័យដីធ្លី និងអចលនទ្រព្យ ក៏មានចំណែកពាក់ព័ន្ធជាមួយផងដែរបើទោះបីជាមានការបោះឆ្នោតជាតិក៏ដោយក៏គេមើលឃើញថា មិនមានការថមថយណាមួយកើតឡើងទេ ក្នុងនោះក៏មានការវិនិយោគទៅលើកន្លែងស្នាក់នៅ រមណីយដ្ឋាន ដែលសញ្ញាណនេះ សមាគមទីភ្នាក់ងារទេសចរណ៍កម្ពុជាក៏ចង់បានការវិនិយោគណាដែលមាននិរន្តរភាពនៅក្នុងវិស័យទេសចរណ៍នេះផងដែរ។ នេះបើតាមការឱ្យដឹងពីលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា CATA (The Cambodia Association of Travel Agents)។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឱ្យដឹងថា បច្ចុប្បន្នតំបន់ឆ្នេរ និងកោះនានារបស់កម្ពុជា បាននិងកំពុងត្រូវបានវិនិយោគដោយក្រុមហ៊ុនឯកជនមួយចំនួនដោយទទួលបានការជំរុញ និងបង្ហាញទិសដៅពីក្រសួងពាក់ព័ន្ធក្នុងការអភិវឌ្ឍតំបន់ឆ្នេរឱ្យក្លាយជាគោលដៅទេសចរណ៍ថ្មី បន្ទាប់ពីកម្ពុជាសម្បូរដោយតំបន់ទេសចរណ៍វប្បធម៌ ដូចជាប្រាង្គប្រាសាទជាដើម។ កិច្ចខំប្រឹងប្រែងនេះ ធ្វើឡើងដើម្បីត្រៀមឆ្លើយតបទៅនឹងកំណើនអ្នកទេសចរអន្តរជាតិដែលនឹងអាចកើនដល់ 7លាននាក់ក្នុងឆ្នាំ2020 ខាងមុខនេះ ខណៈដែលកម្ពុជាកំពុងផ្តោតសំខាន់ទៅលើទេសចរណ៍បែបធម្មជាតិ។

លោកស្រីបន្ថែមថា បច្ចុប្បន្នចំនួនភ្ញៀវទេសចរជាងកន្លះលាននាក់បានទៅទស្សនានៅតំបន់ឆ្នេរ ដែលស្មើនឹង3 ទៅ4ដងនៃតំបន់ទេសចរណ៍ផ្សេងៗ ដូច្នេះយើងត្រូវមានផែនការមេមួយសម្រាប់អភិវឌ្ឍតំបន់ឆ្នេរ ដើម្បីធានាលើការអភិវឌ្ឍ និងរក្សាបាននូវចំណុចល្អៗដែលយើងគួរមានការអភិវឌ្ឍ ដូចជាការស្នាក់នៅ ហូបចុក និងសេវាកម្សាន្តជាដើម។

សមាគមទីភ្នាក់ងារទេសចរណ៍កម្ពុជាបានលើកឡើងថា ការអភិរក្សតំបន់ឆ្នេរ និងការរុករក រមណីយដ្ឋានទេសចរណ៍បន្ថែម ក៏ជាផ្នែកមួយសំខាន់ក្នុងការទាក់ទាញភ្ញៀវទេសចរអន្តរជាតិឱ្យមកទស្សនានៅកម្ពុជាឱ្យមានការកើនឡើងដែរ។ លោកស្រីបញ្ជាក់ថា រមណីយដ្ឋានថ្មីៗដែលត្រូវបានរកឃើញ រួមមានរមណីយដ្ឋានដូងទេរ ក្នុងខេត្តកំពត រមណីយដ្ឋានឆ្នេរកោះឋានសួគ៌ ក្នុងខេត្តព្រះសីហនុ និងរមណីយដ្ឋានកោះរ៉ុងសន្លឹមជាដើម។

ឧកញ៉ា សៀ រិទ្ធី ប្រធានក្រុមហ៊ុនវើលប្រ៊ីដ (Worldbride Groups) បានមានប្រសាសន៍ទាក់ទងនឹងវិស័យទេសចរណ៍នេះថា ខ្ញុំមិនមែនអ្នកប្រកបរបរខាងវិស័យទេសចរណ៍ទេ តែជាការសង្កេត និងពិនិត្យទៅលើវិស័យទេសចរណ៍ខ្មែរ អ្នកប្រកបអាជីវកម្មទេសចរណ៍នាំគ្នាធ្វើអ្វីដោយសារការកើនឡើងជាចរន្តនៃវិស័យទេសចរណ៍ (Trend) ដែលមានលំហូរចូលមកស្រុកខ្មែរ។ ខ្ញុំបានឃើញប្រតិបត្តិករទេសចរណ៍(Tour Operator) ដែលចង់ឱ្យទេសចរមកលេងនៅស្រុកយើង និងគិតថាត្រូវធ្វើយ៉ាងម៉េចឱ្យគេមកលេងម្តងហើយម្តងទៀត ព្រោះកន្លងមកប្រទេសយើងគេមកលេងបានតែម្តងទេ គេមិនដែលមកជាលើកទី2 ឬទី3ឡើយ។

ឧកញ៉ា សៀ រិទ្ធី ប្រធានក្រុមហ៊ុនវើលប្រ៊ីដគ្រុប (Worldbride Groups)

លោកឧកញ៉ាបន្តថា បើគេមកមើលអង្គរវត្តគេមិនមកជាលើកទី2 ទេ ព្រោះអង្គរវត្តមានតែមួយ វាអត់មានដំណាក់កាលថ្មី ដូច្នេះត្រូវស្វែងរកដំណាក់កាលថ្មីថា តើទេសចរមកមើលអង្គរ គេនឹងទៅកន្លែងណាទៀត? ខ្ញុំជឿថា Tour Operator បានគិត គ្រាន់តែថាការគិតនោះអាចទៅរួច ឬទៅមិនរួចតែប៉ុណ្ណោះ?។ ប្រតិបត្តិករទេសចរណ៍ និងក្រសួងទេសចរណ៍ត្រូវគិតថា តើត្រូវដើរទៅផ្លូវណា? យើងមានភ្ញៀវច្រើនឬទេ? ឬគិតតែត្រឹមថា យើងមានរដូវមានភ្ញៀវ(High season) រដូវអត់ភ្ញៀវ(Low season) បើយើងគិតតែ 2ចំណុចហ្នឹង យើងមិនអាចគិតពីផលិតផល(Product)ថ្មីកើតទេ។ ឥឡូវយើងមើលទៅកោះវិញ កោះគឺជា Product ថ្មីរបស់វិស័យទេសចរណ៍ក្នុងស្រុកយើងតែការអភិវឌ្ឍកោះយើងអាចធ្វើទៅបាន គឺអាស្រ័យលើអ្នកអភិវឌ្ឍអចលនទ្រព្យដែរ នេះបើយើងនិយាយពីការអភិវឌ្ឍនៅលើកោះ ហើយបើនិយាយពីការអភិវឌ្ឍ វិស័យទេសចរណ៍ និងវិស័យអចលនទ្រព្យត្រូវតែស្របទៅជាមួយគ្នា។

អ្នកទេសចរមានសណ្ឋានខុសៗគ្នា អ្នកទេសចរខ្លះគាត់ចូលចិត្តបែបអេកូ អ្នកខ្លះគាត់ចូលចិត្តបែបវប្បធម៌ អ្នកខ្លះចូលចិត្តបែបធម្មជាតិ អ្នកខ្លះទៀតចូលចិត្តបែបឆ្នេរសមុទ្រ ទាំងអស់ហ្នឹងជាចំណុចមួយដែលបង្ហាញថា អចលនទ្រព្យក៏ជាចង្កោមរបស់វិស័យទេសចរណ៍ដែរ ដូច្នេះការអភិវឌ្ឍកោះដំណើរការទៅបាន ទាល់តែគិតជាថ្មី និងត្រូវតែគិតថា នៅលើកោះ តើត្រូវសាងសង់សណ្ឋាគារ ឬសង់រីសត? យើងមិនត្រូវមើលតែលើរដូវមានភ្ញៀវ ឬរដូវអត់ភ្ញៀវនោះទេ ព្រោះស្រុកខ្មែរយើងពីដីគោកទៅកោះជិះត្រឹមតែ40នាទី ឬ1ម៉ោងប៉ុណ្ណោះ ហើយយើងមានអ្នករកស៊ីកាណូតដ និងកប៉ាល់ដឹកអ្នកដំណើរច្រើនប៉ុន្តែមិនទាន់មានស្តង់ដារនៅឡើយ។

ប្រតិបត្តិករទេសចរណ៍ត្រូវធ្វើអ្វីឱ្យមានស្តង់ដារដើម្បីឱ្យមានភាពទាក់ទាញនៅលើកោះ។ បើវិស័យឆ្នេរ ផ្នែកខាងរីសតគេអត់មានគិតពីមានរដូវមានភ្ញៀវ ឬរដូវអត់ភ្ញៀវទេ យើងត្រូវគិតថាអ្នកទេសចរគេមិនមែនមកគ្រាន់តែគេង ឬហែលទឹកនោះទេ តែយើងត្រូវបង្កើតសកម្មភាព(Activity) ឬសេវាកម្ម(service) ផ្សេងទៀតដើម្បីឱ្យទេសចរគេមកលេង។ ដូច្នេះត្រូវសំណូមពរទៅរដ្ឋាភិបាលឱ្យគិតគូរលើកោះ ដោយអភិវឌ្ឍបែបថែរក្សាបរិស្ថាន បើមិនគិតទេ យើងនឹងជួបបញ្ហានៅថ្ងៃក្រោយដូច កោះនៅអ៊ុយរូហ្គាយ និងហ្វ៊ីលីពីនអ៊ីចឹង។

ប្រតិបត្តិករទេសចរណ៍ត្រូវគិតពីការអភិវឌ្ឍជាសណ្ឋាគារ រីសត ឬបាងហ្គាឡូ ដែលជាការទាក់ទាញទេសចរឱ្យមកស្រុកយើងឱ្យបាន តែយើងត្រូវការជួបជជែកពិភាក្សាឱ្យបានច្រើនរវាងអ្នកអភិវឌ្ឍន៍អចលនទ្រព្យ និងប្រតិបត្តិករទេសចរណ៍ ទើបកោះយើងមានសកម្មភាព និងឈានទៅរកការអភិវឌ្ឍវិស័យទេសចរណ៍ឱ្យរីកចម្រើនឡើង។

លោក តេង រិទ្ធី ស្ថាបនិក និងនាយកក្រុមហ៊ុន Founder & Director, Property Investment Realty Partner បានមានប្រសាសន៍ថា ខ្ញុំយល់ថា ដីនៅកម្ពុជានៅសល់ពីការវិនិយោគនៅមានវិសាលភាពធំនៅឡើយ។ យើងនៅមានព្រៃឈើ សម្បត្តិធម្មជាតិ អរិយធម៌ វប្បធម៌យើងល្អជាងគេច្រើន។ ភាគខាងលិចប្រទេសមានឆ្នេរស្រស់ កោះស្អាត មានព្រៃកោងកាងជាចំណុចទាក់ទាញដល់ភ្ញៀវទេសចរណ៍ បើប្រៀបធៀបនឹងប្រទេសជិតខាង។

លោក រិទ្ធី បន្តថា ពិតមែនតែយើងមានអំណោយផលក្នុងវិស័យទេសចរណ៍មែន តែយើងនៅខ្វះអ្នករៀបចំ មិនទាន់មានអ្នករៀបចំឱ្យល្អ ឱ្យត្រូវស្តង់ដារ ទើបមិនទាន់មានការទាក់ទាញខ្លាំង។ ការស្នាក់នៅលំដាប់ខ្ពស់ តែសេវាកម្មមិនបានល្អ ការទទួលបដិសណ្ឋារកិច្ចមិនទាន់ទៅដល់លំដាប់នោះ។ តែយើងទទួលស្គាល់ថា វិស័យនេះរីកចម្រើនខ្លាំង ក្នុងនោះយើងត្រូវគិតដល់សេវាកម្ម អនាម័យ សណ្តាប់ធ្នាប់ដែលកត្តានេះជាការទាក់ទាញសម្រាប់ប្រតិបត្តិករទេសចរណ៍ ប្រៀបដូចជាច្បាប់ដែលយើងត្រូវគោរព នោះភ្ញៀវទេសចរដែលមកកម្សាន្តគេនឹងគោរពតាម។

ឥឡូវរដ្ឋាភិបាលរៀបចំបានច្រើន ដែលមានការផ្សព្វផ្សាយយ៉ាងទូលំទូលាយរហូតដល់អឺរ៉ុប អាមេរិកទាំងក្នុងស្រុកក៏បានល្អប្រសើរជាងមុនដែរ តែក៏មិនត្រូវភ្លេចពង្រឹងនូវវិស័យនេះដែរ ដោយធ្វើយ៉ាងណាឱ្យភ្ញៀវពេញចិត្ត សប្បាយ នៅកម្សាន្តឱ្យបានយូរ ឬមកលេងលើកក្រោយទៀត ដោយត្រូវផ្តល់នូវស្នាមញញឹមដល់គាត់ ដោយប្រើសិទ្ធិប្រកួតប្រជែងដើម្បីឱ្យវិស័យនេះរីកចម្រើនទាំងអស់គ្នា។ ការប្រើសិទ្ធិបាន ទាល់តែយើងមានភាពស្អាត សេវាល្អ សណ្តាប់ធ្នាប់ល្អ និងសុវត្ថិភាព។

តាមការព្យាកររបស់ក្រសួងទេសចរណ៍បានបង្ហាញថា នៅឆ្នាំ2020 ខាងមុខនេះ កម្ពុជានឹងទទួលបានភ្ញៀវទេសចរអន្តរជាតិ កើនឡើងដល់ប្រមាណជា 7លាននាក់ ក្នុងនោះភ្ញៀវទេសចរជនជាតិចិនមកលេងកម្ពុជាយ៉ាងតិចក៏ 2លាននាក់ដែរ ដោយនឹងនាំមកនូវចំណូលសរុបប្រមាណជា 5ពាន់លានដុល្លារ និងបង្កើតឱកាសការងារដោយផ្ទាល់ដល់ប្រជាពលរដ្ឋប្រមាណជាជិត 1លាននាក់៕

August 15, 2018

ស្ថាប័នហិរញ្ញវត្ថុ 6 ផ្តល់កម្ចីលើការអប់រំវិស័យទេសចរណ៍

ស្ថាប័នហិរញ្ញវត្ថុចំនួន6 ចាប់ផ្តើមផ្តល់ប្រាក់កម្ចីជាពិសេសដើម្បីជួយដល់និស្សិតសម្រាប់ការអប់រំវិស័យទេសចរណ៍។ កម្មវិធីនេះព្យាយាមដោះស្រាយបញ្ហាកង្វះអ្នកជំនាញទេសចរណ៍ដោយលើកកម្ពស់លទ្ធភាពទទួលបានឥណទានរបស់និស្សិតដែលនឹងត្រូវប្រើប្រាស់ដើម្បីផ្តល់ហិរញ្ញប្បទានដល់វគ្គសិក្សានៅតាមសាកលវិទ្យាល័យ និងមជ្ឈមណ្ឌលវិជ្ជាជីវៈ។ នេះបើតាមសេចក្តីប្រកាសរបស់ក្រសួងទេសចរណ៍។

សេចក្តីប្រកាសនេះបានឱ្យដឹងថា ស្ថាប័នហិរញ្ញវត្ថុចំនួន6 រួមមានៈ ធនាគារ អេស៊ីលីដា(ACLEDA Bank) ធនាគារ កាណាឌីយ៉ា (Canadia Bank) ហ្វូតាបាមីក្រូហិរញ្ញវត្ថុ (Futaba Micro Finance) ហត្ថាកសិករ លីមីតធីត (Hattha Kaksekar Limited) គ្រឹះស្ថានមីក្រូហិរញ្ញវត្ថុ ក្រេឌីត(KREDIT Microfinance Institution Ltd) និងគ្រឹះស្ថានមីក្រូហិរញ្ញវត្ថុ សេអឹមកា CMK Microfinance Institution បានចូលរួមក្នុងគម្រោងហិរញ្ញប្បទានដែលដឹកនាំដោយរដ្ឋាភិបាល។

ក្រសួងបានបន្តឱ្យដឹងថា ដំណើរការទាក់ទងនឹងការធានាប្រាក់កម្ចី គឺមានលក្ខណៈសាមញ្ញហើយលក្ខខណ្ឌត្រូវបានរក្សាទុកទាប រួមទាំងមិនមានតម្រូវការវត្ថុបញ្ចាំ។ ការទូទាត់នឹងមានរយៈពេលប្រហែល 7ឆ្នាំ ដោយអ្នកខ្ចីអាចមានជម្រើសផ្សេងៗដើម្បីសងប្រាក់កម្ចីក្នុងអត្រាការប្រាក់ទាប។

ក្រសួងបានបញ្ជាក់ទៀតថា ការទូទាត់សងមានច្រើនជម្រើសដែលរួមមាន៖
-នៅក្នុងអំឡុងពេលសិក្សា អ្នកខ្ចីអាចបង់សងតែការប្រាក់ប្រមាណ 4ដុល្លារក្នុង 1ខែសម្រាប់ទំហំប្រាក់កម្ចីចំនួន 500ដុល្លារ។
-នៅក្នុងអំឡុងពេលសិក្សា អ្នកខ្ចីអាចបង់ប្រាក់ដើម និងការប្រាក់ប្រមាណ 46ដុល្លារក្នុង 1ខែក្នុងរយៈពេល 1ឆ្នាំសម្រាប់ទំហំទឹកប្រាក់កម្ចីចំនួន 500ដុល្លារ។
-បន្ទាប់ពីបញ្ចប់ការសិក្សា ពេលរកការងារធ្វើបានហើយ ទើបអ្នកខ្ចីបង់សងក៏បាន ដែលមានទាំងប្រាក់ដើម និងការប្រាក់ប្រមាណ 46ដុល្លារក្នុង 1ខែក្នុងរយៈពេល 1ឆ្នាំ សម្រាប់ទំហំទឹកប្រាក់កម្ចីចំនួន 500ដុល្លារ។

លោក ហូ វណ្ឌី អគ្គលេខាធិការនៃសម្ព័ន្ធភាពទេសចរណ៍ជាតិកម្ពុជា បានកោតសរសើរកម្មវិធីនេះដោយនិយាយថា វានឹងបង្កើនធនធានមនុស្សនៅក្នុងឧស្សាហកម្មនេះ។ “វាគឺជាឱកាសដ៏ល្អមួយសម្រាបនិស្សិតក្នុងការពង្រឹងជំនាញរបស់ពួកគេហើយវាចាំបាច់ខ្លាំងណាស់ព្រោះវិស័យបដិសណ្ឋារកិច្ចនៅកម្ពុជាបច្ចុប្បន្ន ខ្វះអ្នកជំនាញ ជាពិសេសនៅក្នុងសណ្ឋាគារ ផ្ទះសំណាក់ ក្រុមហ៊ុនអាកាសចរណ៍ ទីភ្នាក់ងារទេសចរណ៍ និងភោជនីយដ្ឋាន”។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានថ្លែងជារឿយៗថា វិស័យទេសចរណ៍មានសក្ដានុពលយ៉ាងសំខាន់ក្នុងការរួមចំណែកអភិវឌ្ឍសេដ្ឋកិច្ចសង្គមកម្ពុជាដោយបានបង្កើតការងារជូនពលរដ្ឋកាត់បន្ថយការចំណាកស្រុកទៅរកការងារធ្វើនៅក្រៅប្រទេសព្រមទាំងជួយកាត់បន្ថយភាពក្រីក្រផងដែរ។

ឯកឧត្តមបានបន្តថា ដើម្បីរក្សាតម្រូវការក្នុងវិស័យទេសចរណ៍កម្ពុជាត្រូវការការបណ្ដុះបណ្ដាលយ៉ាងហោចណាស់ចំនួន 5ម៉ឺននាក់ក្នុងមួយឆ្នាំ។“គោលនយោបាយរបស់យើងនៅតែបន្តជំរុញឱ្យមានអ្នកជំនាញទេសចរណ៍នៅកម្ពុជា ហើយយើងជឿថា នេះជាមធ្យោបាយដ៏ល្អក្នុងការធ្វើដូច្នេះ”។ គិតត្រឹមរយៈពេល 5ឆ្នាំមកនេះវិស័យទេសចរណ៍បានរកចំណូលចូលក្នុងសេដ្ឋកិច្ចជាតិប្រមាណ 15.145លានដុល្លារអាមេរិក។

សូមបញ្ជាក់ថា គិតត្រឹមឆ្នាំ2017 កម្ពុជាមានរមណីយដ្ឋានទេសចរណ៍ចុះបញ្ជីផ្លូវការប្រមាណ394កន្លែង រួមមានរមណីយដ្ឋានទេសចរណ៍វប្បធម៌ប្រវត្តិសាស្ត្រចំនួន 114កន្លែង រមណីយដ្ឋានវប្បធម៌ប្រវត្តិសាស្ត្រធម្មជាតិ 21កន្លែង រមណីយដ្ឋានកែច្នៃ33កន្លែង រមណីយដ្ឋានទេសចរណ៍វប្បធម៌ធម្មជាតិ27កន្លែង និងរមណីយដ្ឋានទេសចរណ៍ធម្មជាតិ 196កន្លែង។

រមណីយដ្ឋានទាំងអស់នេះបានទាក់ទាញភ្ញៀវទេសចរអន្តរជាតិនៅរយៈពេល 4ខែដើមឆ្នាំ2018នេះមានចំនួនជាង 2លាននាក់កើនឡើងជិត14% បើធៀបនឹងរយៈពេលដូចគ្នាកាលពីឆ្នាំ2017។ ទន្ទឹមគ្នានេះបើតាមការព្យាករកម្ពុជានឹងទទួលបានភ្ញៀវទេសចរអន្តរជាតិប្រមាណ 6លាន 2សែននាក់នៅដំណាច់ឆ្នាំ2018នេះ និងប្រមាណ 7លាននាក់នៅឆ្នាំ2020 ហើយអាចនាំមកនូវចំណូលប្រមាណ 5,000លានដុល្លារអាមេរិក និងអាចបង្កើតឱកាសការងារបានប្រមាណ 1លាននាក់ផងដែរ។

របាយការណ៍បានបញ្ជាក់ថា នៅឆ្នាំ2013 ចំណូលបានមកពីវិស័យទេសចរណ៍មានចំនួន 2,547លានដុល្លារ ឆ្នាំ2014 មានចំនួន 2,736លានដុល្លារ ឆ្នាំ2015មានចំនួន 3,012លានដុល្លារ ឆ្នាំ2016 មានចំនួន3,212លានដុល្លារ និងឆ្នាំ2017 មានចំនួន 3,638លានដុល្លារ។ សរុបក្នុងរយៈពេល 5ឆ្នាំមកនេះ វិស័យទេសចរណ៍រកចំណូលបានចំនួន 15,145លានដុល្លារអាមេរិក៕

July 20, 2018

រដ្ឋមន្រ្តីទេសចរណ៍ 21ប្រទេស នឹងជួបប្រជុំគ្នានៅក្រុងសៀមរាបអង្គរ

បន្ទាប់ពីអង្គវត្តជាប់ចំណាត់ថ្នាក់លេខ1 ជាតំបន់ទាក់ទាញទេសចរណ៍ខ្លាំងបំផុត លើពិភពលោកសម្រាប់ឆ្នាំ 2017នេះ រដ្ឋមន្ត្រីទេសចរណ៍ វប្បធម៌ និងប្រតិភូជាន់ខ្ពស់មកពី 21ប្រទេស នឹងមកជួបជុំគ្នាក្នុងកិច្ចប្រជុំរដ្ឋមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី2 និងសន្និសីទអន្តរជាតិលើកទី1 ស្តីពីទេសចរណ៍ប្រកបដោយនិរន្តរភាព និងទីក្រុងបេតិកភណ្ឌនៅខេត្តសៀមរាបចាប់ពីថ្ងៃទី11-16 មិថុនា ឆ្នាំ2017 ដើម្បីពិភាក្សាអំពីគំរូថ្មីៗនៃភាពជាដៃគូ និងតួនាទីអភិបាលកិច្ចល្អក្នុងការគ្រប់គ្រងការពារ ការអភិរក្ស និងការអភិវឌ្ឍប្រកបដោយនិរន្តរភាពនៃទីក្រុងបេតិកភណ្ឌ។

ឯកឧត្តម ថោង ខុន រដ្ឋមន្រ្តីក្រសួងទេសចរណ៍បានថ្លែងនៅក្នុងកិច្ចប្រជុំគណៈកម្មាធិការអន្តរក្រសួង កាលពីរសៀលថ្ងៃទី06 ខែមិថុនា ឆ្នាំ2017 ថា វេទិកានេះនឹងដាក់ចេញនូវវិធានការ និងទិសដៅថ្មីៗសម្រាប់ពិពិធកម្មផលិតផលទេសចរណ៍ និងការតម្រង់ទិសសម្រាប់ការអភិវឌ្ឍទេសចរណ៍បេតិកភណ្ឌវប្បធម៌ ប្រកបដោយនិរន្តរភាពនៅកម្ពុជា ផ្សារភ្ជាប់ទៅនឹងទស្សនទាននៃការកសាងភាពជាដៃគូសហប្រតិបត្តិការថ្មីនៃទេសចរណ៍ និងវប្បធម៌ដែលបានដាក់ចេញនៅក្នុងសេចក្តីថ្លែងការរួមមួយនៅសៀមរាបនៅក្នុងសន្និសីទពិភពលោកស្តីពីទេសចរណ៍ និងវប្បធម៌ កាលពីអំឡុងខែកញ្ញា ឆ្នាំ2015 នៅកម្ពុជាកន្លងមក។

ឯកឧត្តមរដ្ឋមន្ត្រីក៏បានគូសបញ្ជាក់ផងដែរថា ទស្សនទាននៃកិច្ចប្រជុំនេះក៏ឆ្លើយតបទៅនឹងគំនិតផ្តួចផ្តើមខ្សែក្រវាត់ និងផ្លូវសូត្ររបស់ចិន ក្នុងក្របខ័ណ្ឌនៃការអភិវឌ្ឍឧស្សាហកម្មទេសចរណ៍ ប្រកបដោយនិរន្តរភាព និងការទទួលខុសត្រូវកម្ពុជា-ចិន ដោយបានចុះហត្ថលេខាលើផែនការអនុវត្តសកម្មភាពការងារ សម្រាប់អនុស្សារណៈយោគយល់គ្នា ស្តីពីកិច្ចសហប្រតិបត្តិការទេសចរណ៍ កាលពីថ្ងៃទី16 ខែឧសភា ឆ្នាំ2017 បន្ទាប់ពីកិច្ចប្រជុំខ្សែក្រវាត់ និងផ្លូវសូត្រនៅទីក្រុងប៉េកាំង ដោយផ្តោតសំខាន់លើការសិក្សារៀបចំ បង្កើតផែនការអភិវឌ្ឍន៍ទេសចរណ៍គ្រប់ជ្រុងជ្រោយមួយសម្រាប់តំបន់សៀមរាបផ្តោតលើបេតិកភណ្ឌវប្បធម៌ពិភពលោកអង្គរវត្ត។

គួរកត់សម្គាល់ផងដែរថា កិច្ចប្រជុំរដ្ឋមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី1 ត្រូវបានរៀបចំឡើងក្នុងឆ្នាំ2016 នៅទីក្រុង Tabriz សាធារណរដ្ឋអ៊ីស្លាមអ៊ីរ៉ង់ ហើយដែលពិធីបើកកិច្ចប្រជុំរដ្ឋមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី2នេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន សែន នៅថ្ងៃទី12 ខែមិថុនា ឆ្នាំ2017 ខាងមុខនេះនៅទីក្រុងសៀមរាបអង្គរ៕

June 8, 2017

Tag: ទេសចរណ៍