Tag: ទេសចរណ៍

Hyundai អភិវឌ្ឍរថយន្តអគ្គិសនីនៅប្រទេសឥណ្ឌាដោយបណ្ដាក់ទុនជិត 2.5 ពាន់លានដុល្លារអាម៉េរិក
ក្រុមហ៊ុនរថយន្ត Hyundai កាលពីថ្ងៃទី 11 ឧសភា បានឱ្យដឹងថា នឹងវិនិយោគ 200 ពាន់លានរ៉ូពីឥណ្ឌា (2.45 ពាន់លានដុល្លារអាម៉េរិក) ក្នុងរង្វង់ 10 ឆ្នាំ នៅក្នុងរដ្ឋភាគខាងត្បូងរបស់ប្រទេសឥណ្ឌា ដើម្បីបង្កើនការផលិត និងអភិវឌ្ឍរថយន្តអគ្គិសនីម៉ូដែលថ្មី។
តាមរយៈក្រុមហ៊ុនបុត្រសម្ព័ន្ធ Hyundai Motor India ក្រុមហ៊ុន Hyundai នឹងបង្កើតស្ថាប័នមួយដែលទទួលខុសត្រូវក្នុងការដំឡើងថ្មរថយន្តអគ្គិសនីដែលអាចសម្រេចបាន 178,000 គ្រឿងជារៀងរាល់ឆ្នាំ និងដំឡើងស្ថានីយបញ្ចូលថាមពលសម្រាប់រថយន្តអគ្គិសនីចំនួន 100 កន្លែងនៅទូទាំងរដ្ឋ Tamil Nadu ភាគខាងត្បូងប្រទេសឥណ្ឌា។ ពួកគេមានគម្រោងបង្កើនសមត្ថភាពផលិតក្នុងស្រុកឱ្យបានដល់ 850,000 គ្រឿងក្នុងមួយឆ្នាំ។
ព័ត៌មានខាងលើលេចឡើងបន្ទាប់ពីប៉ុន្មានសប្ដាហ៍មុន រដ្ឋាភិបាលឥណ្ឌាបានឱ្យដឹងថា នឹងដំឡើងពន្ធអាករចំពោះរថយន្ត និងម៉ូតូ ក្នុងនោះមានទាំងយានយន្តអគ្គិសនីផងដែរ ដែលនាំចូលពីបរទេស ដើម្បីជំរុញការផលិតក្នុងស្រុក។
វិស័យឧស្សាហកម្មរថយន្តអគ្គិសនីនៅប្រទេសឥណ្ឌា បាន និងកំពុងរីកចម្រើនយ៉ាងឆាប់រហ័ស គ្រាដែលបណ្ដាក្រុមហ៊ុនផលិតរថយន្តក្នុងស្រុក មានដូចជា Tata Motors និង Mahindra & Mahindra ក៏ដូចជាដៃគូអន្តរជាតិ មានដូចជា BYD និង MG Motor ជាដើម នាំគ្នាបញ្ចេញរថយន្តអគ្គិសនីជាបន្តបន្ទាប់។
គិតមកដល់ខែមេសា ឆ្នាំ 2023 ក្រុមហ៊ុន Hyundai ក្ដោបក្ដាប់ទីផ្សាររថយន្តទេសចរណ៍ជិត 15% នៅប្រទេសឥណ្ឌា និងជាប់លេខពីរបន្ទាប់ពី Maruti Suzuki៕
May 12, 2023
សេវាទេសចរណ៍អវកាសតម្លៃ ៥១៤ លានរៀល ប្រើបាឡុងហោះរបស់ក្រុមហ៊ុនអាម៉េរិក
ទេសចរណ៍អវកាសប្រកបដោយសុវត្ថិភាព មិនបំភាយឧស្ម័នពុល ប៉ុន្តែនៅតែអាចគយគន់សម្រស់របស់ផែនដី និងអវកាសបាន គឺជាគោលដៅរបស់ក្រុមហ៊ុនអវកាសចរណ៍ធំៗលើពិភពលោក ក្នុងនោះក៏មាន Apace Perspective ផងដែរ។
ការប្រកួតប្រជែងក្នុងវិស័យទេសចរណ៍អវកាសកំពុងតែក្ដៅគគុកជាងពេលណាៗទាំងអស់។ ប៉ុន្តែ អ្វីដែលត្រូវបានគេរំពឹងថានឹងមានសក្ដានុពលខ្ពស់នាពេលដ៏ខ្លីខាងមុន នោះគឺសេវាទេសចរណ៍អវកាសតាមរយៈបាឡុងហោះដែលមិនបញ្ចេញឧស្ម័នពុល។
ក្រុមហ៊ុន Space Perspective នៅ Florida សហរដ្ឋអាម៉េរិក មានគម្រោងនាំអតិថិជនឡើងទៅកាន់កម្ពស់ជាង ៣០,០០០ ម៉ែត្រ តាមរយៈបាឡុងហោះ។ អតិថិជននឹងបានហោះហើរក្នុងទីអវកាសដោយជិះក្នុងបន្ទប់មួយដែលភ្ជាប់ពីខាងក្រោមបាឡុងហោះខ្នាតយក្ស បំពាក់បច្ចេកវិទ្យាទំនើប។ រូបភាពនានាដែលត្រូវបានប្រកាសកាលពីចុងខែកក្កដា បង្ហាញថា រចនារូបរាងថ្មីរបស់បន្ទប់ដែលមានឈ្មោះថា Space Neptune ទទួលបានវិញ្ញបនបត្រពីស្ថាប័នរដ្ឋរួចហើយ។
បន្ទប់ Space Neptune សម្រាប់ភ្ញៀវ ធំទូលាយជាង ធៀបនឹងកំណែមុន ជួយឱ្យអតិថិជនឈរត្រង់បានយ៉ាងស្រួលខ្លួន ក៏ដូចជាសមត្ថភាពនៃការស៊ូទ្រាំនឹងសម្ពាធមានកម្រិតខ្ពស់ជាងមុន។
Space Perspective សហការជាមួយ studio of My Imagination (OMI) ដែលមានទីស្នាក់ការកណ្ដាលនៅ ទីក្រុងឡុងដ៍ ដើម្បីរចនានូវរូបរាងរបស់បន្ទប់ Space Neptune ថ្មីនេះ។
ក្រុមហ៊ុន Space Perspective កំណត់ផែនការថា នៅចុងឆ្នាំ ២០២៤ នឹងចាប់ផ្ដើមនាំទេសចរ ៨ នាក់ ឡើងទៅគយគន់ផែនដី និងអវកាសពីចម្ងាយ ដោយប្រើប្រាស់ពេល ៦ ម៉ោង។ បាឡុងហោះនេះនឹងស្ថិតនៅលើស្រទាប់បរិយាកាស stratosphere របស់ផែនដី។
អតិថិជនដែលនឹងធ្វើដំណើរទេសចរណ៍ក្នុងកម្មវិធីបាឡុងហោះប្រើប្រាស់ឧស្ម័នអ៊ីដ្រូសែន របស់ Space Perspective នឹងមិនចាំបាច់ឆ្លងកាត់ការបណ្ដុះបណ្ដាលស៊ីជម្រៅដូចអ្នកអវកាសឡើយ។
តម្លៃសំបុត្រសម្រាប់មនុស្សម្នាក់គឺ ១២៥ ពាន់ដុល្លារអាម៉េរិក (ប្រហែល ៥១៤ លានរៀល)។ Space Perspective ឱ្យដឹងថា សំបុត្រចំនួនជាង ៩០០ ត្រូវបានលក់ឱ្យអតិថិជនរួចហើយ៕
>ទេសចរណ៍នាពេលអនាគត ៖ ជិតក្នុងបាឡុងហោះខ្នាតយក្សទស្សនាទិដ្ឋភាពភាពកោងរបស់ផែនដីពីលើមេឃ
>ទេសចរណ៍អវកាស! Virgin Galactic មានអតិថិជនជាង 600នាក់ក្នុងដៃ ខណៈ Blue Origin មិនទាន់ប្រកាសពីតម្លៃសំបុត្រធម្មតានៅឡើយ

August 20, 2022
ទិដ្ឋភាពដ៏ត្រជាក់ភ្នែកនៃជ្រោះទឹកធ្លាក់ Niagara Falls ដែលកំពុងកកស្ទើរទាំងស្រុង
ពេញមួយឆ្នាំ ទឹកធ្លាក់ Niagara Falls តែងតែទាក់ទាញភ្ញៀវទេសចរណ៍គ្រប់រូប មិនថារដូវណា ជារដូវណានោះឡើយ ក្នុងនោះ នារដូវរងា Niagara Falls តែងមានទិដ្ឋភាពពេញដោយមន្តស្នេហ៍យ៉ាងចម្លែក។
កាលពីថ្ងៃទី 21 កុម្ភៈ ការធ្លាក់ព្រឹលនៅភាគខាងជើងរដ្ឋ New York នៃសហរដ្ឋអាមេរិក បាននាំឱ្យទិដ្ឋភាពនៅ Niagara Falls កាន់តែអស្ចារ្យ។ ព្រឹលធ្លាក់ បានធ្វើឱ្យទឹកស្ទើរទាំងអស់របស់ជ្រោះ Niagara Falls ត្រូវកក នាំឱ្យស្រទាប់ថ្មតូចធំទាំងឡាយនៅជុំវិញ ត្រូវគ្របដណ្ដប់ដោយពណ៌សក្បុស ព្រមទាំងមានលេចរូបរងឥន្ទធនូ 7ពណ៌គួរឱ្យគយគន់ផងដែរ។
អាកាសធាតុនៅ Bufalo នៃរដ្ឋ New York ត្រូវបានព្យាករថានឹងបន្តចុះត្រជាក់ខ្លាំងក្នុងរយៈពេលច្រើនថ្ងៃទៀត។ ខាងក្រោមនេះគឺជាទិដ្ឋភាពមួយចំនួន ស្ដីអំពីសម្រស់ដ៏ស្រស់ត្រកាលរបស់ Niagara Falls ដែលត្រូវបានថតដោយអ្នកសារព័ត៌មានរបស់ Reuters កាលពីថ្ងៃទី 21 ធ្នូ ឆ្នាំ2021។
ទិដ្ឋភាពនៃផ្លូវដើរនៅទីតាំងទេសចរណ៍ Niagara Falls

ប្រភព៖ Reuters
ប្រែសម្រួល៖ បុត្រា
February 24, 2021
តើគួរធ្វើយ៉ាងណា បើរៀបការហើយ ស្រាប់តែមានគភ៌ដោយមិនបានតាំងចិត្ត?
ក្រោយពីរៀបការរួចហើយ គូស្នេហ៍ជាច្រើនគូអាចកំពុងតែនឹកស្រមៃដល់ផែនការការធ្ចើដំណើរទេសចរណ៍ទៅទីឆ្ងាយៗ ផែនការទិញផ្ទះ កែសម្រួលគេហដ្ឋាន ឬសន្សំលុយទិញឡានថ្មីជាដើម តែ ស្រាប់តែមកដឹងខ្លួនថា ខែនេះអ្នកកំពុងតែជិតក្លាយខ្លួនជាអ្នកម្តាយថ្មីម្នាក់ទៅវិញ នោះគឺការមានគភ៌ដោយមិនបានតាំងចិត្ត ដែលវាអាចកើតឡើងដោយសារការពន្យារកំណើតខុសឆ្គង។ ទាំងអស់នេះ វាអាចធ្វើឱ្យគូស្វាមីភរិយាខ្លះស្រាប់តែកើតមានសភាវតានតឹងក្នុងអារម្មណ៍ដោយមិនដឹងខ្លួន ឬមិនដឹងជារៀបចំខ្លួនយ៉ាងណាជាមួយនឹងការជិតមានសមាជិកថ្មីម្នាក់នៅក្នុងផ្ទះ។
ថ្ងៃនេះឡា រ៉ែនមានដំបូន្មានល្អៗអំពីរឿងនេះមកជម្រាបជូនដូចខាងក្រោម៖
– តាំងស្មារតី
អាចមិនមែនជារឿងងាយប៉ុន្មានឡើយក្នុងការរៀបចំផ្លូវចិត្តដើម្បីទទួលយកការប្រែប្រួលដ៏ធំធេងលើកនេះ ដូច្នេះអ្វីដែលល្អបំផុតគឺ សូមកុំភ្ញាក់ផ្អើល ឬភិតភ័យអ្វីខ្លាំងជ្រុលពេក។ អាចនឹងសុំឈប់សម្រាកពីការងារ 1ថ្ងៃ ដើម្បីពិនិត្យមើលភាពត្រៀមខ្លួនជាស្រេចក្នុងផ្នែកផ្សេងៗ ដែលទោះជាជួនកាលអាចមើលឃើញថា មិនទាន់ពេញលេញល្អប៉ុន្មានក្ដី ទាំងរឿងប្រាក់ចំណូល ពេលវេលា ឬលក្ខណៈការងារក៏ដោយ តែគួរសម្លឹងមើលក្នុងន័យវិជ្ជមានជាមុនសិន ព្រោះជួនកាលការមានសមាជិកថ្មីនៅក្នុងផ្ទះ អាចជាអ្វីមួយដែលក្រុមគ្រួសាររបស់អ្នកប្រាថ្នាចង់បានស្រាប់ទៅហើយ គ្រាន់តែបន្ថយពេលវេលាឱ្យឆាប់ជាងមុន និងពិភាក្សាគ្នាដើម្បីកែសម្រួលផែនការជីវិតជាថ្មីប៉ុណ្ណោះ ដូច្នេះចូរនាំគ្នាគិតម្តង 1ចំណុចៗ ជឿថា អ្វីៗគ្រប់យ៉ាងនឹងមិនមែនជារឿងពិបាកឡើយ។
– ប្រឹក្សាជាមួយមនុស្សចាស់ និងអ្នកជិតដិត
កុំសន្សំទុកភាពតានតឹងនៅក្នុងខ្លួនតែម្នាក់ឯង បើមានអារម្មណ៍ថាខ្លាចក្នុងការបង្ហើបប្រាប់ទៅមិត្តរួមការងារ សាច់ញាតិ ឬមនុស្សក្នុងគ្រួសារ ក្នុងករណីដែលអ្នកមិនធ្លាប់ប្រាប់ពួកគេពីមុនមកថា មានផែនការចង់បានបុត្រនោះ ចូរគិតជាប់ជានិច្ចថា អ្វីៗគ្រប់យ៉ាងសុទ្ធតែមានការប្រែប្រួលជានិច្ច ហើយមនុស្សដែលសំខាន់បំផុតគឺ ខ្លួនអ្នកហ្នឹងឯង។ បើការមានគភ៌ គឺជាដំណឹងល្អរបស់អ្នក ចូរព្យាយាមរកពេលវេលាល្អៗប្រាប់ទៅអ្នកដទៃ និងជឿថា គ្រប់គ្នានឹងច្បាស់ជាសប្បាយចិត្តដែរមិនខាន បើខ្លួនអ្នកមានសេចក្តីសុខ រួចហើយចូរកុំភ្លេចសុំពាក្យណែនាំ ឬដំបូន្មានល្អៗពីមនុស្សចាស់ដែលធ្លាប់មានបទពិសោធពីមុនផង។
– ទៅពិនិត្យរាងកាយភ្លាម
នេះគឺជារឿងទី1 ដែលត្រូវតែធ្វើ បន្ទាប់ពីដឹងខ្លួនថាមានគភ៌ ដែលវាមានភាពសំខាន់ខ្លាំងណាស់ចំពោះការសម្រេចចិត្តថាតើអ្នកមានភាពត្រៀមខ្លួនជាស្រេចសម្រាប់ការមានគភ៌នេះឬទេ? ជាពិសេសភាពត្រៀមជាស្រេចរបស់រាងកាយ ដែលកម្មវិធីការពិនិត្យនោះ នឹងមានទាំងការពិនិត្យឈាម ពិនិត្យរកមើលរោគប្រចាំកាយ និងផ្សេងៗទៀត ដើម្បីគ្រូពេទ្យបានផ្តល់នូវពាក្យណែនាំដែលល្អៗបំផុតសម្រាប់ការមើលថែទាំគភ៌របស់អ្នកម្តាយ។
– ទៅពិនិត្យគភ៌ក្នុងអំឡុង 2 – 3 ខែ
ការពិនិត្យគភ៌ មិនត្រឹមតែនឹងធ្វើឱ្យអ្នកដឹងពីការប្រែប្រួលរបស់គភ៌ប៉ុណ្ណោះទេ តែនៅបានដឹងពីពាក្យណែនាំក្នុងការថែទាំគភ៌ ការថែទាំខ្លួនរបស់ស្ត្រីក្នុងអំឡុងពេលមានគភ៌រហូតដល់ពេលប្រសូត្រ។ ការកែបញ្ហាសភាវជ្រៀតជ្រែកផ្សេងៗ និងបានទទួលការពិនិត្យគភ៌ជាដំណាក់កាលយ៉ាងជាប់លាប់ទៀតផង។ ក្នុងករណីដែលកូននៅក្នុងផ្ទៃមានភាពខុសប្រក្រតីណាមួយ ក៏នឹងអាចជួយកែបញ្ហាបានទាន់ពេលវេលា។
– រៀបចំតារាងពេលវេលារង់ចាំទទួលកូនសម្លាញ់
កត់ជាកំណត់ហេតុទុកនូវគ្រប់រឿងរ៉ាវដែលកើតឡើង និងសាកល្បងគិតទៅដល់ 9ខែខាងមុខទៀត ដើម្បីរាប់ពេលវេលាថយក្រោយថា ក្នុងខែនីមួយៗ ក្នុងអំឡុងពេលនីមួយៗ តើអ្នកត្រូវត្រៀមអ្វីខ្លះ ដើម្បីផ្តល់ពេលវេលាមួយរយៈសម្រាប់ការត្រៀមខ្លួនជាស្រេច។ ឡារ៉ែនជឿថា ទំរាំតែដល់ថ្ងៃនោះ អ្នកនឹងមានភាពត្រៀមខ្លួនជាស្រេច និងមានសេចក្តីសុខសម្រាប់ការប្រសូតសមាជិកតូចមួយចេញមក ដោយគ្មានអ្វីមួយរញ៉េរញ៉ៃ ឬតក់ក្រហល់ឡើយ៕
December 1, 2020
5ខែដើមឆ្នាំនេះ ភ្ញៀវទស្សនាតំបន់អង្គរធ្លាក់ចុះជាង 60% ធ្វើឱ្យកម្ពុជាទទួលបានចំណូលត្រឹមជាង 18លានដុល្លារ
គ្រឹះស្ថានអង្គរបានបញ្ជាក់ប្រាប់បណ្តាញសារព័ត៌មានថា ក្នុងរយៈពេល 5ខែដើមឆ្នាំ 2020 នេះ ភ្ញៀវទេសចរដែលទិញសំបុត្រចូលទស្សនារមណីដ្ឋានអង្គរធ្លាក់ចុះយ៉ាងកំហុកបើប្រៀបធៀបនឹងរយៈពេលដូចគ្នាកាលពីឆ្នាំមុន។
គ្រឹះស្ថានខាងលើបានបញ្ជាក់ថា ភ្ញៀវបរទេសដែលបានទិញសំបុត្រចូលទស្សនារមនីយដ្ឋានអង្គរមានចំនួន 386,093នាក់ ធ្លាក់ចុះ 65.46% បើធៀបនឹងរយៈពេលដូចគ្នាកាលពីឆ្នាំ 2019 ដោយក្នុងនោះយើងទទួលបានចំណូលសរុបប្រម៉ាណ 18,021,336ដុល្លារ ធ្លាក់ចុះ 64.18%។ ចំពោះការចាត់ចែងថវិកាវិញ ក្នុងចំណោមចំណួលជាង 18លានដុល្លារអាមេរិកនេះ គ្រឹះស្ថានអង្គរបានចំណាយសម្រាប់ឧបត្ថម្ភដល់មូលនិធិគន្ធបុប្ផាចំនួន 77ម៉ឺនដុល្លារ។
ជាដំណោះស្រាយដើម្បីបន្ថយផលប៉ះពាល់លើវិស័យទេសចរណ៍នៅខេត្តសៀមរាប រាជរដ្ឋាភិបាលកម្ពុជាបានសម្រេចបន្ថែមចំនួនថ្ងៃជូនភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរដោយសម្រាប់សំបុត្ររយៈពេល1ថ្ងៃអាចចូលទស្សនាបាន 2ថ្ងៃ ហើយសំបុត្រសម្រាប់រយៈពេល3ថ្ងៃអាចទស្សនាបានរយៈពេល5ថ្ងៃ។ បន្ថែមពីលើនេះសម្រាប់សំបុត្ររយៈពេល7ថ្ងៃ ភ្ញៀវទេសចរអាចទស្សនាបានរយៈពេល10ថ្ងៃ៕
June 1, 2020
ពលរដ្ឋចិនជាង100លាននាក់ដើរទេសចរណ៍ពេញផ្ទៃប្រទេស! វិស័យទេសចរណ៍ចិន “មានទឹកមាត់លេប” ខ្លះៗហើយ
មនុស្សប្រមាណជា104លាននាក់នៅប្រទេសចិន បានសម្រុកទៅកាន់តំបន់ទេសចរណ៍នានា នៅក្នុងឱកាសថ្ងៃឈប់សម្រាកចំនួន5ថ្ងៃនៅដើមខែឧសភា បន្ទាប់ពីប្រទេសនេះប្រកាសថា បានគ្រប់គ្រង COVID-19។
យោងតាមទិន្នន័យនៅក្នុងស្ថិតិរបស់ក្រសួងវប្បធម៌និងទេសចរណ៍ប្រទេសចិន ក្នុងរយៈពេល4ថ្ងៃដំបូងនៃថ្ងៃឈប់សម្រាក5ថ្ងៃដែលចាប់ផ្ដើមពីទិវាពលកម្មអន្តរជាតិ1ឧសភា និងបញ្ចប់នៅថ្ងៃនេះ(5ឧសភា) ត្រូវបានគេចាត់ទុកជា “សប្ដាហ៍មាស” នៅប្រទេសចិន។
ក្រសួងវប្បធម៌និងទេសចរណ៍ចិន បានឱ្យដឹងថា ភ្ញៀវទេសចរណ៍ដែលមានចំនួនច្រើន នៅក្នុងថ្ងៃឈប់សម្រាករយៈពេលវែងបែបនេះ នឹងនាំមកចំណូលប្រមាណជា6ពាន់លានដុល្លារអាមេរិក។
គិតដោយឡែកក្នុងថ្ងៃទី1ឧសភា តំបន់ទេសចរណ៍ក្នុងស្រុកនានា បានទទួលភ្ញៀវជាង23លាននាក់ ក្នុងនោះទីក្រុង Wuhan ដែលជាសម្បុកមេរោគកូរ៉ូណាដំបូងគេ មានពលរដ្ឋច្រើនជាងគេបង្អស់ក្នុងចំណោមទីក្រុងនានាក្នុងប្រទេសចិនដែលបានចេញទៅទេសចរណ៍នៅតំបន់ផ្សេងៗ។ យោងតាមក្រុមហ៊ុនអ៊ីនធើណិត Baidu Inc ចំនួនមនុស្សដែលបានចាកចេញពីទីក្រុង Wuhan ដើម្បីទៅទេសចរណ៍ក្រៅតំបន់ បានកើនឡើងជិត50% ក្នុងថ្ងៃទី1ឧសភា បើធៀបនឹងថ្ងៃធម្មតា។
ទីក្រុងប៉េកាំង ទីក្រុងតាលាន(Dalian) ទីក្រុងធៀនជីន(Tianjin) និងទីក្រុងជីណាន(Jinan) ជាដើម ក៏មានពលរដ្ឋជាច្រើនចេញទៅទេសចរណ៍ផងដែរ នៅក្នុងកាលៈទេសៈដែលប្រទេសចិនកំពុងតែបន្ធូរបន្ថយការរឹតត្បិតលើការដើរហើរ។
ក្រសួងដឹកជញ្ជូនរបស់ចិន មុននេះបានព្យាករថា មនុស្សប្រមាណជា23.36លាននាក់នឹងចេញទៅទេសចរណ៍ក្នុងថ្ងៃឈប់សម្រាកនេះ ដែលតួលេខនេះ ខ្ពស់ជាង19.9លាននាក់បើធៀបនឹងរដូវឆេងមេង(QingMing Festival) កាលពីខែមុនទៅទៀត។
ការកើនឡើងនៃចំនួនទេសចរក្នុងថ្ងៃឈប់សម្រាកនេះ អាចជួយលើកស្ទួយវិស័យទេសចរណ៍ និងសណ្ឋាគារនៅប្រទេសចិនបានមួយកម្រិត បន្ទាប់ពីត្រូវលិចលង់ដោយសារ COVID-19 ដែលបានធ្វើឱ្យប្រជាជនចិនជាង83,000នាក់បានឆ្លងមេរោគ ក្នុងនោះមាន4,637នាក់បានបាត់បង់ជីវិត៕
ប្រភព៖ សារព័ត៌មានបរទេស
May 5, 2020
ក្រសួងទេសចរណ៍ប្រកាសដាក់ឱ្យប្រើប្រាស់ប្រព័ន្ធអនឡាញគ្រប់គ្រងវត្តមានស្នាក់នៅទេសចរណ៍នៅតាមសណ្ឋាគារ និងផ្ទះសំណាក់ដើម្បីចូលរួមវិធានការទប់ស្កាត់ជំងឺឆ្លង Covid-19
ក្រសួងទេសចរណ៍ បានជម្រាបជូន និងអំពាវនាវដល់ ម្ចាស់សេវាកម្មស្នាក់នៅទេសចរណ៍ទាំងអស់ ដោយអនុវត្តតាម នូវសេចក្តីជូនដំណឹងលេខ147 សជណ.អគឧ ចុះថ្ងៃទី25 ខែមីនា ឆ្នាំ2020 ស្តីពីការតម្រូវឱ្យប្រើប្រាស់ជាកាតព្វកិច្ចនូវ “ប្រព័ន្ធចុះបញ្ជីស្នាក់នៅទេសចរណ៍” ដែល មានគេហទំព័រផ្លូវការ “www.accommodationregistrar.net” ។
“ការគ្រប់គ្រងបញ្ជីស្នាក់នៅទេសចរណ៍” តាមអនឡាញនេះផ្តល់ភាពងាយស្រួលដល់ក្រសួងទេសចរណ៍អាចសហការផ្តល់ព័ត៌មានជូនអជ្ញាធរមានសមត្ថកិច្ចក្នុងការត្រួតពិនិត្យ ឬតាមដានវត្តមានឈ្មោះភ្ញៀវទេសចរជាតិ អន្តរជាតិ ដែលមកស្នាក់នៅក្នុងសេវាកម្មស្នាក់នៅទេសចរណ៍ក្នុងករណីដែលចាំបាច់ និងមានតំរូវការ ក្នុងការចូលរួមដល់វិធានការរបស់រាជរដ្ឋាភិបាលកម្ពុជា ក្នុងការទប់ស្កាត់ការរីករាលដាលនៃជំងឺ Covid-19 ដែលមានការកើតឡើងចេញពីភ្ញៀវទេសចរក្នុងករណីជាយថាហេតុណាមួយ។
ប៉ុន្តែយ៉ាងណាក៏ដោយការប្រើប្រាស់ប្រព័ន្ធនេះទាមទារឱ្យមានកិច្ចសហការ និងការចូលរួមពីម្ចាស់អាជីវកម្មសណ្ឋាគារ និងផ្ទះសំណាក់ ក្នុងការបញ្ចូលព័ត៌មានរបស់ភ្ញៀវរបស់ខ្លួនក្នុងពេលស្នាក់នៅក្នុងមូលដ្ឋានអាជីវកម្មទេសចរណ៍របស់ខ្លួន។
ក្នុងដំណាក់កាលនៃវិបត្តិ Covid-19 នេះ ក្រសួងទេសចរណ៍សូមស្នើដល់គ្រប់មូលដ្ឋានអាជីវកម្មសេវាកម្ម ស្នាក់នៅទេសចរណ៍ទាំងអស់ ចូលរួមប្រើប្រាស់ជាកាតព្វកិច្ច “ប្រព័ន្ធចុះបញ្ជីស្នាក់នៅទេសចរណ៍” ឱ្យបានគ្រប់គ្នា និងធ្វើការចុះវត្តមានរបស់ភ្ញៀវទេសចរ ឱ្យបានគ្រប់គ្នាៗ និងទៀតទាត់។
របៀបប្រើប្រាស់ប្រព័ន្ធចុះវត្តមានស្នាក់នៅទេសចរណ៍អនឡាញមានបង្ហាញក្នុងសេចក្តីជូនដំណឹង និងវីដេអូពន្យល់ខាងក្រោម៖
ប្រភព៖ ក្រសួងទេសចរណ៍ Ministry of Tourism, Cambodia
March 25, 2020
ទស្សនាទិដ្ឋភាពខាងក្នុងនាវាទេសចរណ៍ ដែលត្រូវគេដាក់ឱ្យនៅដាច់ដោយឡែកដោយសារតែ…
ក្នុងអំឡុងពេលនៃការដាក់ឱ្យនៅដាច់ដោយឡែក សកម្មភាពកម្សាន្តនៅកន្លែងរួមទាំងអស់លើនាវា ទេសចរណ៍ Diamond Princess ក៏ត្រូវបានលុបចោល។
នាវាទេសចរណ៍យក្ស ឈ្មោះ Diamond Princess ត្រូវបានដាក់ឱ្យនៅដាច់ដោយឡែកនៅលើផ្ទៃសមុទ្រនៃទីក្រុង Yokohama ក្បែររាជធានី Tokyo ប្រទេសជប៉ុន ចាប់ពីថ្ងៃទី4កុម្ភៈ បន្ទាប់ពីមានមនុស្សម្នាក់ក្នុងចំណោមអ្នកនៅលើនាវា ត្រូវបានគេរកឃើញថា មានផ្ទុកមេរោគកូរ៉ូណា COVID-19។ មកដល់ថ្ងៃទី17កុម្ភៈ មានអ្នកផ្ទុកមេរោគនេះ យ៉ាងតិច454នាក់ ក្នុងចំណោមអ្នកទេសចរ 3,700នាក់ រួមទាំងបុគ្គលិកនាវា។ មុននោះ នាវាទេសចរណ៍នេះ ទើបតែបានបញ្ចប់ដំណើរទេសចរណ៍តាមសមុទ្រចំនួន14ថ្ងៃ ក្នុងអំឡុងរដូវបុណ្យចូលឆ្នាំចិន។
នៅពេលនាវា Diamond Princess នេះ ត្រូវបានដាក់ឱ្យនៅដាច់ដោយឡែក អ្នកទេសចរចំណាយពេលស្ទើរតែទាំងអស់របស់ខ្លួន សម្ងំនៅក្នុងបន្ទប់។ ប៉ុន្តែ មិនមែនបន្ទប់ណាក៏មានបង្អួចនោះដែរ។ បន្ទប់ធំបំផុតមានទំហំ86ម៉ែត្រក្រឡា និងបន្ទប់តូចបំផុតមានទំហំប្រហែល14ម៉ែត្រក្រឡា និងបំពាក់ដោយសម្ភារគ្រប់ប្រភេទ រួមទាំងបន្ទប់ទឹកធំទូលាយ។ល។
អ្នកទេសចរអាចមើលភាពយន្តដោយមិនគិតថ្លៃនៅលើ TV ក្នុងបន្ទប់របស់ពួកគេផ្ទាល់…មេចុងភៅទាំងអស់នៅតែធ្វើការក្នុងអំឡុងពេលនាវាត្រូវបានដាក់ឱ្យនៅដាច់ដោយឡែក ដើម្បីបម្រើដល់ភ្ញៀវនៅតាមបន្ទប់នីមួយៗ ជាមួយនឹងបញ្ជីមុខម្ហូបប្ដូរផ្លាស់រាល់ថ្ងៃ។
ក្នុងអំឡុងពេលទប់ស្កាត់ការឆ្លងរាលដាលនៃមេរោគកូរ៉ូណា ភ្ញៀវទាំងអស់មិនអាចប្រើប្រាស់កន្លែងកម្សាន្តរួមនៅលើនាវានោះទេ។ ប៉ុន្តែ ពួកគេអាចដើរនៅលើដំបូលនាវាដើម្បីលំហែកាយ ទៅតាមការចាត់ចែងរបស់ភាគីនាវា ដោយផ្ដល់អាទិភាពឱ្យអ្នកទេសចរដែលស្នាក់នៅក្នុងបន្ទប់ដែលមិនមានបង្អួច។
នាវានេះ មាន18ជាន់ ហើយជាន់នីមួយៗ ត្រូវបានតុបតែងទៅតាមប្រធានបទនៃមហាសមុទ្រនីមួយៗ។
ចាប់ពីជាន់ទី5 ដល់ទី7 គឺជាកន្លែងដែលមានសកម្មភាពរស់រវើកបំផុត។ Grand Plaza ស្ថិតនៅលើជាន់ទី6 និងទី7 ជាកន្លែងដែលប្រធាននាវាបង្ហាញខ្លួនក្នុងពិធីជប់លៀងធំៗ។ សកម្មភាពទាំងនេះ ត្រូវបានផ្អាកបណ្ដោះអាសន្នក្នុងពេលមានវិបត្តិសុខភាពកូរ៉ូណា។
ស្នាដៃសិល្បៈទាំងឡាយត្រូវបានដាក់បង្ហាញក្នុងបន្ទប់ធំមួយនៅលើនាវា ដើម្បីឱ្យភ្ញៀវទស្សនា ឬទិញដោយការលក់ដេញថ្លៃ។
នាវានេះ មានភោជនីយដ្ឋាន ហាងកាហ្វេ និងបូហ្វេចំនួន14កន្លែង ដោយមានអាហារច្រើនប្រភេទ និងសម្បុរបែប។ ប៉ុន្តែ ពេលនេះ ភ្ញៀវទេសចរបានត្រឹមតែហូបអាហារនៅក្នុងបន្ទប់របស់ខ្លួនតែប៉ុណ្ណោះ។
នាវាប្រវែង290ម៉ែត្រនេះ ត្រូវបានសាងសង់ឡើងដូចទៅនឹងទីក្រុងអណ្ដែតដូច្នោះដែរ។ ជាន់ខាងលើបង្អស់ គឺជាកន្លែងដែលភ្ញៀវលំហែកាយ នៅក្បែរអាងហែលទឹក បារ និងរោងភាពយន្តនៅខាងក្រៅ។
នាវាយក្សផ្កាយ5នេះ ក៏មានអាងទឹកក្ដៅបែបជប៉ុនផងដែរ។ បន្ទប់ងួតទឹក Izumi ដ៏ធំ នៅផ្នែកខាងក្រោយនៃនាវា និងស្ថិតនៅជាន់ទី15 ដែលមានបន្ទប់ដាច់ដោយឡែកជាច្រើន និងអាចគយគន់ទេសភាពនៃសមុទ្រដ៏ធំល្វឹងល្វើយ៕
ប្រភព៖ សារព័ត៌មានបរទេស
February 18, 2020
វិធីការពារសុខភាព និងសុវត្ថិភាព ពេលទៅលេងតំបន់ឆ្ងាយៗ ឬទៅទេសចរណ៍ក្រៅប្រទេស
នៅក្នុងស្ថានភាពដែលមេរោគបង្កជំងឺរលាកសួតថ្មី Corona កំពុងរាតត្បាតពិភពលោកនេះ សូមមានការប្រុងប្រយ័ត្ន ឱ្យបានខ្ពស់ ចំពោះ មេរោគឆ្លងផ្សេងៗ មិនថាតែមេរោគ Corona នោះទេ។
Health Direct ដែលជាអង្គការសុខភាពមួយរបស់ប្រទេសអូស្ត្រាលី បានលើកឡើងនូវប្រការមួយចំនួនដែលលោកអ្នកត្រូវតែយកចិត្តទុកដាក់ មុននឹងគិតធ្វើដំណើរទៅលេងតំបន់ឆ្ងាយៗ ឬទៅក្រៅប្រទេស។
អង្គការសុខភាពមួយនេះ បានលើកឡើងថា ការស្វែងយល់អំពីគុណភាពនៃប្រភពទឹកនៅក្នុងតំបន់ដែលអ្នកនឹងទៅលេងនោះ គឺជាការចាំបាច់ ដើម្បីធានាសុវត្ថិភាព និងសុខភាពល្អ។

ប្រភព៖ សារព័ត៌មានបរទេស
January 31, 2020
ចូលឆ្នាំចិន 3ថ្ងៃ ហេតុអ្វីខេត្តព្រះសីហនុ ទទួលបានកំណើនទេសចរគួរឱ្យកត់សម្គាល់បែបនេះ?
ក្នុងរយៈពេល3ថ្ងៃនៃពិធីចូលឆ្នាំចិន ឆ្នាំនេះ (2020) គេបានកត់សម្គាល់ឃើញថា កំណើននៃភ្ញៀវទេសចរដែលបានទៅកម្សាន្ត និងស្នាក់នៅក្នុងខេត្តព្រះសីហនុ មានការកើនឡើងគួរឱ្យកត់សម្គាល់។
កាលពីថ្ងៃទី26 មករា ម្សិលមិញ ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្តគ្រឹះស្នា បានថ្លែងថា ក្នុងអំឡុងពេល 3ថ្ងៃនៃឱកាសបុណ្យចូលឆ្នាំចិន គឺចាប់ពីថ្ងៃទី24 ដល់ទី26 មករា ភ្ញៀវទេសចរជាតិ និងអន្តរជាតិ ដែលមកសម្រាកកម្សាន្តនៅខេត្តព្រះសីហនុ មានប្រមាណ 87,000នាក់កើនឡើង 24.52% បើប្រៀបធៀបនឹងឆ្នាំ2019 ដែលមានភ្ញៀវត្រឹមតែ 70.480នាក់។ ក្នុងនោះ ភ្ញៀវទេសចរជាតិមានប្រមាណ 74,495នាក់ កើនឡើង 67.17% បើធៀបនឹងឆ្នាំ2019 ដែលមាន 44.560នាក់។
តាមការសន្និដ្ឋានរបស់ភ្ញៀវទេសចរដែលបានទៅកាន់ទីនោះ បានឱ្យដឹងថា ការកើនឡើងនៃភ្ញៀវទេសចរក្នុងស្រុកក្នុងឱកាសបុណ្យចូលឆ្នាំចិនឆ្នាំនេះ អាចដោយសារសកម្មភាពវិជ្ជមាននានាក្នុងតំបន់ បន្ទាប់ពីឯកឧត្តម គួច ចំរើន បានចូលមកដឹកនាំខេត្តព្រះសីហនុ។
ម្យ៉ាងវិញទៀត ការកើនឡើងនៃវត្តមានទេសចរក្នុងស្រុកនៅខេត្តនេះ ក៏អាចជាប់ទាក់ទិននឹងការបិទកាស៊ីណូរាប់សិបកន្លែងនៅក្រុងព្រះសីហនុផងដែរ ព្រោះថា ការបិទកាស៊ីណូនេះ បានធ្វើឱ្យវត្តមានជនជាតិបរទេសថយចុះ ជាពិសេសអ្នករកស៊ី និងបុគ្គលិកជាជនជាតិចិនដែលពួកគេមានប្រាក់ច្រើន ហ៊ានទិញទំនិញ និងសេវាកម្មថ្លៃៗ។
នៅពេលអ្នករកស៊ី និងអ្នកទេសចរជនជាតិចិនវិលត្រឡប់ទៅស្រុកវិញ (បន្ទាប់ពីរាជរដ្ឋភិបាលប្រកាសបិទកាស៊ីណូអនឡាញ) ហាងទំនិញ ភោជនីយដ្ឋាន ផ្ទះសំណាក់ជាដើម ត្រូវបានប្រគល់មកម្ចាស់ដើមដែលជាពលរដ្ឋក្នុងស្រុកវិញ។ ការដែលបងប្អូនជនជាតិចិនភាគច្រើនបានវិលទៅស្រុកវិញបែបនេះ ធ្វើឱ្យម្ចាស់ហាងទំនិញ ភោជនីយដ្ឋាន ឬម្ចាស់ផ្ទះសំណាក់ទាំងនោះ ត្រូវបង្ខំចិត្តបញ្ចុះតម្លៃទំនិញ អាហារ និងសេវាកម្មរបស់ខ្លួនឱ្យស្របទៅនឹងស្ថានភាពជាក់ស្ដែង ពោលគឺ អតិថិជនភាគច្រើនរបស់ពួកគេ ពេលនេះគឺជាភ្ញៀវក្នុងស្រុក មិនមែនអតិថិជនជាជនជាតិចិនដូចមុនទេ នេះបើតាមសម្ដីលោក រតនា ប្រធានផ្សារទំនើបមួយនៅភ្នំពេញ។
ការបញ្ចុះតម្លៃទំនិញ ឬសេវាកម្មដូចខាងលើនេះហើយ ដែលនាំឱ្យភ្ញៀវក្នុងស្រុកមួយចំនួនធំគិតថា ខេត្តជាប់មាត់សមុទ្រមួយនេះ កំពុងវិលត្រឡប់ទៅដូចកាលពីបណ្ដាឆ្នាំមុនៗ ដែលមិនទាន់មានវត្តមានបងប្អូនជនជាតិចិនច្រើន។ ការគិតបែបនេះហើយ ដែលធ្វើឱ្យពួកគេ (ភ្ញៀវជាតិ)សម្រេចចិត្ត វិលមកស្នាក់នៅ និងដើរលេងកម្សាន្តនៅខេត្តនេះឡើងវិញ ព្រោះពួកគាត់គិតថា ទំនិញ ឬសេវាកម្មនានា មានតម្លៃទាបដូចដើម។
កត្តាសំខាន់មួយទៀតដែលភ្ញៀវទេសចរមួយចំនួនគិតថា មានជាប់ទាក់ទិននឹងការកើនឡើងនៃភ្ញៀវក្នុងស្រុកដែរនោះគឺ សន្តិសុខ និងសណ្ដាប់ធ្នាប់។ នៅក្នុងឆ្នាំ2019 នៅលើបណ្ដាញសារព័ត៌មាន និងបណ្ដាញសង្គមជាដើម គេតែងបានឃើញអំពើចោរកម្ម និងឧក្រិដ្ឋកម្មជាច្រើនកើនឡើងនៅខេត្តព្រះសីហនុ ដូចជា អំពើចាប់ជំរិតមនុស្ស អំពើឆក់ប្លន់ អំពើហិង្សាតាមទីសាធារណៈ អំពើឆបោកជាដើម ប៉ុន្តែ មួយរយៈពេលចុងក្រោយនេះ បន្ទាប់ពីមានការបិទកាស៊ីណូ និងការភ្នាល់ល្បែងតាមអ៊ីនធើណិតរាប់សិបកន្លែងមក អំពើខុសច្បាប់ដែលបានរៀបរាប់ខាងលើ បានស្ងប់ស្ងាត់ទៅវិញគួរឱ្យកត់សម្គាល់។ នេះជាកត្តាមួយដែលហាក់ដូចជាការធានាដល់ភ្ញៀវដែលនឹងមកកម្សាន្តខេត្តព្រះសីហនុ។
ជាងនេះទៀត មន្ត្រីអាជ្ញាធរខេត្តព្រះសីហនុម្នាក់បានប្រាប់សារព័ត៌មានក្នុងស្រុកកាលពីពេលថ្មីៗនេះថា ខេត្តព្រះសីហនុនឹងមានភ្ញៀវទេសចរកាន់តែច្រើនមកកម្សាន្ត នៅឆ្នាំ2021 ខាងមុខនេះ បន្ទាប់ពីផ្លូវល្បឿនលឿន និងហេដ្ឋារចនាសម្ព័ន្ធជាច្រើនក្នុងខេត្ត ត្រូវបានសាងសង់រួចរាល់ជាស្ថាពរ៕
January 27, 2020