ថ្ម - La Reine Media

គុយបា នឹងដំឡើងតម្លៃសាំងរហូតដល់ 500%

អាជ្ញាធរប្រទេសគុយបា នឹងដំឡើងតម្លៃសាំងរហូតដល់ 500% ចាប់ពីថ្ងៃទី 01 ខែមីនា ឆ្នាំ 2024 យឺតជាងមួយខែបើធៀបនឹងគម្រោងដំបូង ប៉ុន្តែតម្លៃសំបុត្រយានជំនិះសាធារណៈនៅតែដដែល។

រដ្ឋមន្ត្រីហិរញ្ញវត្ថុគុយបា Vladimir Regueiro កាលពីថ្ងៃទី 28 កុម្ភៈ ប្រកាសថា ទន្ទឹមនឹងការដំឡើងតម្លៃសាំង តម្លៃអគ្គិសនីក៏នឹងត្រូវដំឡើង 25% ធៀបនឹងដំណាក់កាលដូចដដែល ចំពោះអតិថិជនដែលប្រើប្រាស់អគ្គិសនីច្រើននៅក្នុងតំបន់ប្រជុំជន។ ក៏ប៉ុន្តែ ថ្លៃធ្វើដំឡើងតាមយានជំនិះសាធារណៈនឹងនៅតែរក្សាដូចដើម ហើយការដំឡើងថ្លៃឧស្ម័នធម្មជាតិក៏ត្រូវពន្យារពេល។

រដ្ឋាភិបាលគុយបា ដែលជាអ្នកផ្ដល់ការឧបត្ថម្ភទំនិញ និងសេវាកម្មសំខាន់ៗស្ទើរតែទាំងអស់ ប្រកាសដំឡើងថ្លៃសាំងខ្ពស់ជាងមុន 5 ដង រាប់ចាប់ពីថ្ងៃទី 01 ខែកុម្ភៈ ដើម្បីរួមចំណែកកាត់បន្ថយឱនភាពថវិកាជាតិ។ តម្លៃសាំងធម្មតាមួយលីត្រនឹងកើនពី 25 ប៉េសូ (0.2 ដុល្លារអាម៉េរិក) ឡើងដល់ 132 ប៉េសូ ខណៈដែលសាំងល្អបំផុតកើនពី 30 ប៉េសូ ឡើងដល់ 156 ប៉េសូ ខ្ពស់ជាង 5 ដង ធៀបនឹងតម្លៃចាស់។ ទេសចរបរទេសដែលមកលេងប្រទេសគុយបា នឹងត្រូវទូទាត់ថ្លៃសាំងដោយរូបិយប័ណ្ណបរទេស។

ក៏ប៉ុន្តែ គម្រោងដំឡើងតម្លៃសាំងកាលពីខែមុនត្រូវបានពន្យារពេល ដោយសារតែ «បញ្ហាសន្តិសុខអ៊ីនធើណិត»។ បញ្ហានេះបានធ្វើឱ្យរដ្ឋមន្ត្រីក្រសួងសេដ្ឋកិច្ច Alejandro Gil បាត់បង់តំណែង នៅពីរបីថ្ងៃក្រោយមក។

យោងតាមអ្នកសេដ្ឋកិច្ចនៅសាកលវិទ្យាល័យ Havana របស់គុយបា សាំងនៅប្រទេសនេះមានតម្លៃទាបខ្លាំង បើធៀបនឹងបណ្ដាប្រទេសដទៃលើពិភពលោក ប៉ុន្តែគឺជាតម្លៃដែលខ្ពស់ខ្លាំង បើធៀបនឹងប្រាក់បៀវត្សរ៍ក្នុងស្រុក។ តម្លៃសាំងថ្មីនេះនឹងប៉ះពាល់ដល់សង្គមទាំងមូលនៅគុយបា។

ប្រទេសកោះដែលមានប្រជាជន 11 លាននាក់នេះ កំពុងឆ្លងកាត់ការលំបាកច្រើនក្នុងវិស័យសេដ្ឋកិច្ច ដោយសារតែវិបត្តិកូវីដ-19 និងទណ្ឌកម្មពីសហរដ្ឋអាម៉េរិក។ តាមការប៉ាន់ស្មាន សេដ្ឋកិច្ចគុយបា បានធ្លាក់ចុះ 2% ក្នុងឆ្នាំ 2023 ស្របពេលដែលអតិផរណាកើនឡើង 30%។

February 29, 2024

Apple លុបចោលគម្រោងរថយន្តអគ្គិសនី ក្រោយចំណាយអស់រាប់ពាន់លានដុល្លារ

ប្រហែលមួយទសវត្សរ៍ក្រោយពី Apple បានបង្ហាញ Project Titan គម្រោងផលិតរថយន្តអគ្គិសនីរបស់ក្រុមហ៊ុននេះ ក៏ត្រូវបានគេជឿថា ត្រូវបានលុបចោល។

យោងតាម Bloomberg ការសម្រេចចិត្តលុបចោលគម្រោងរថយន្តអគ្គិសនីនេះ ត្រូវបាន COO របស់ Apple Jeff Williams និង Kevin Lynch ប្រកាសនៅក្នុងកិច្ចប្រជុំផ្ទៃក្នុងកាលពីពេលថ្មីៗនេះ។

គម្រោងនេះនឹងចាប់ផ្ដើមលុបចោល ហើយបុគ្គលិកជាច្រើននឹងត្រូវបានប្ដូរទៅកាន់ផ្នែកបញ្ញាសិប្បនិម្មិត (AI) របស់ Apple។ Apple បានសម្ងំទិញក្រុមហ៊ុនបច្ចេកវិទ្យា AI និងម៉ាស៊ីនសិក្សាជាង 20 ស្ថាប័ន ចាប់តាំងពីឆ្នាំ 2017 ហើយបច្ចុប្បន្ន ក្រុមហ៊ុននេះកំពុងបង្កើនការប្រើប្រាស់បច្ចេកវិទ្យា AI នៅក្នុងមុខងារនានារបស់ផលិតផលថ្មី។

បុគ្គលិកជិត 2,000 នាក់ បានធ្វើការនៅក្នុងគម្រោងរថយន្តអគ្គិសនីរបស់ Apple ក្នុងនោះមានរាប់រយនាក់ជាអ្នករចនារថយន្ត និងជាវិស្វករផ្នែករឹង។ បើទោះបុគ្គលិកទាំងនេះត្រូវបាន Apple ប្រកាសថា នឹងមានការងារថ្មីក្នុងក្រុមហ៊ុនដដែល ប៉ុន្តែតាមការសន្និដ្ឋាន ស្ថានភាពបញ្ចប់កុងត្រាការងារទំនងជានឹងនៅតែមាន។

ដំណឹងស្ដីពី Apple លុបចោលគម្រោងរថយន្តអគ្គិសនី ក៏ត្រូវបាន អគ្គនាយកប្រតិបត្តិរបស់ក្រុមហ៊ុន Tesla លោក Elon Musk ក៏បានចែករំលែកបន្តកាលពីពេលថ្មីៗនេះផងដែរ៕

February 28, 2024

កាមេរូន និងប៉ូឡូញអភិវឌ្ឍ «កាក់ហោះ» ដូច UFO ដំបូងគេលើពិភពលោក

ធនាគារជាតិកាមេរូន និងរោងចក្រស្លកាក់ប្រាក់ប៉ូឡូញ Mennica Polska ថ្មីៗនេះបានអភិវឌ្ឍជោគជ័យនូវកាក់ UFO MP-1766 ដែលជាឧបករណ៍ហោះហើរស្របច្បាប់ដំបូងគេលើពិភពលោក។

យោងតាមទំព័រ Oddity Central (អង់គ្លេស) ឈ្មោះរបស់កាក់នេះត្រូវបានដាក់ទៅតាមលំនាំនៃថាសហោះ និងសមត្ថភាពវិលយឺតក្នុងអាកាសដូចទៅនឹងយានអវកាសរបស់មនុស្សពិភពផ្កាយ (UFO)។ ចំណែកលេខ 1766 គឺជាថ្ងៃបង្កើតនាយកដ្ឋានស្លកាក់ប្រាក់ប៉ូឡូញ ក៏ដូចជាតម្លៃរបស់កាក់ 1,766 ហ្វ្រង់កាមេរូន ដែលប្រហែលនឹង 2.91 ដុល្លារអាម៉េរិក។

កាក់ប្រាក់នេះអាចត្រូវបានប្រើប្រាស់ដោយស្របច្បាប់នៅប្រទេសកាមេរូន។ ជាងនេះ តម្លៃរបស់វាក៏ខ្ពស់ជាងបើធៀបនឹងតម្លៃផ្លូវការរបស់វា។ ដោយសារតែបរិមាណមានកំណត់ត្រឹមតែ 510 កាក់ នៅទូទាំងសកលលោក មួយកាក់ UFO MP-1766 មានតម្លៃជាង 1,000 ដុល្លារអាម៉េរិក នៅពេលកក់មុន។

Mennica Polska មិនទាន់បង្ហើបឱ្យដឹងព័ត៌មានលម្អិតអំពីបច្ចេកវិទ្យានៅពីក្រោយ UFO MP-1766 ប៉ុន្តែបើតាមព័ត៌មានដែលបានលេចធ្លាយ កាក់នេះត្រូវបានបំពាក់កូនម៉ាស៊ីនមួយគ្រឿងនៅខាងក្នុង និងត្រូវបញ្ឆេះដោយកម្លាំងម៉ាញ៉េទិចដែលបង្កើតឡើងរវាងកាក់ និងរចនាសម្ព័ន្ធពិសេសដែលអមជាមួយ។ ប្រការនេះអនុញ្ញាតឱ្យកាក់ UFO MP-1766 អាចបណ្ដែតខ្លួន និងវិលដូចទៅនឹងថាសហោះ (UFO)។

ក្រៅពីនេះ UFO MP-1766 ក៏ត្រូវបានបំពាក់សមាសធាតុដែលបញ្ចេញពន្លឺក្នុងទីងងឹត ធ្វើឱ្យវាកាន់តែមានភាពទាក់ទាញ៕

February 28, 2024

ក្រុមហ៊ុនទូរស័ព្ទចិន បង្ហាញរថយន្តអគ្គិសនី SU7 EV រត់បានឆ្ងាយជាងរាល់រថយន្តអគ្គិសនីបច្ចុប្បន្ន

ក្រុមហ៊ុនចិន Xiaomi បានធ្វើឱ្យមានចំណាប់អារម្មណ៍ខ្លាំងនៅក្នុងព្រឹត្តិការណ៍ Mobile World Congress នៅ Barcelona គ្រាដែលតាំងបង្ហាញ SU7 ដែលជារថយន្តអគ្គិសនីដំបូងរបស់ខ្លួន។ នេះគឺជាលើកដំបូងហើយដែល SU7 ត្រូវបានបង្ហាញដោយផ្ទាល់ បន្ទាប់ពីត្រូវបានប្រកាសព័ត៌មានជាលើកដំបូងនៅប្រទេសចិន កាលពីចុងឆ្នាំមុន។

SU7 គឺជាម៉ូដែលសេដានកីឡា ដែលមានពណ៌ខៀវខ្ចីដ៏ទាក់ទាញ។ រថយន្តនេះបើប្រាស់ម៉ូទ័រអគ្គិសនីរបស់ Xiaomi និងអាចបង្កើនល្បឿនពី 0 ទៅ 100 គីឡូម៉ែត្រ/ម៉ោង ដោយប្រើពេលតែ 2.78 វិនាទី។

Xiaomi SU7 នឹងបំពាក់ថ្មផ្ទុកថាមពល 101 kWh ដែលអាចធ្វើដំណើរបានជាង 800 គីឡូម៉ែត្រ ឆ្ងាយជាងច្រើនបើធៀបនឹងបណ្ដារថយន្តអគ្គិសនីនាបច្ចុប្បន្ន។ រថយន្តនេះក៏មានបំពាក់មុខងារបញ្ចូលថាមពលលឿន ដែលអាចធ្វើដំណើរបាន 500 គីឡូម៉ែត្រ ក្រោយពីសាកថ្មបាន 15 នាទី។

អំពីបច្ចេកវិទ្យាវិញ SU7 ត្រូវបានបំពាក់ប្រព័ន្ធអង្គញាណដែលអនុញ្ញាតឱ្យវាបើកបរដោយស្វ័យប្រវត្ត រួមនឹងអេក្រង់កម្សាន្ត 16 អ៊ិញ និងអេក្រង់បង្ហាញព័ត៌មានសម្រាប់អ្នកបើកបរ ក៏ដូចជាប្រព័ន្ធបញ្ជាដែលអាចបង្វិលបានផងដែរ។

យោងតាម Absolute Geeks បើទោះ Xiaomi មិនទាន់បង្ហើបឱ្យដឹងអំពីតម្លៃ ឬថ្ងៃដាក់លក់ជាផ្លូវការ ប៉ុន្តែពួកគេកំពុងឆ្ពោះទៅរកគោលដៅក្លាយជាអ្នកផលិតរថយន្តនៅក្នុង top 5 របស់ពិភពលោក។ ប្រការនេះមានន័យថា Xiaomi SU7 អាចត្រូវបាននាំចេញទៅលក់ក្នុងទីផ្សារបរទេស បើទោះតម្លៃរបស់វាទំនងជាខ្ពស់៕

February 27, 2024

យានអវកាសឯកជនអាម៉េរិក បញ្ជូនរូបថតដំបូងពីឋានព្រះចន្ទមកកាន់ផែនដី

យាន Odysseus បញ្ជូនរូបថតពីរសន្លឹកស្ដីពីផ្ទៃព្រះចន្ទ មកកាន់ផែនដី នៅមុនពេលបញ្ចប់បេសកកម្មឆាប់ជាងច្រើនថ្ងៃ បើធៀបនឹងគម្រោងដំបូង។

យោងតាមសារព័ត៌មាន Space កាលពីថ្ងៃទី 26 កុម្ភៈ ក្រុមហ៊ុន Intuitive Machines ប្រកាសលើបណ្ដាញសង្គម X ថា យាន Odysseus នៅតែភ្ជាប់ទំនាក់ទំនងជាមួយនឹងក្រុមគ្រប់គ្រងនៅលើផែនដី បើទោះវាដួលផ្អៀងទៅម្ខាង បន្ទាប់ពីបានចុះចតលើផ្ទៃព្រះចន្ទ។ យាននេះក៏បញ្ជូនរូបថតពីរសន្លឹកពីឋានព្រះចន្ទមកកាន់ផែនដី ក្នុងនោះមានមួយសន្លឹកត្រូវបានថតនៅពេលយានចុះដល់ទីតាំងចុះចតដែលមានឈ្មោះថា Malapert A ខណៈរូបមួយសន្លឹកទៀតគឺជារូបថតលើផ្ទៃព្រះចន្ទដោយផ្ទាល់ជាលើកដំបូងស្ដីពីផ្ទៃភពរណបនេះ។

យាន Lunar Reconnaissance របស់ណាសា ដែលមានជំនាញខាងស្កេនព្រះចន្ទពីគន្លងតារាវិថីតាំងពីឆ្នាំ 2009 ក៏បានថតរូបភាពរបស់យាន Odysseus ពីកម្ពស់ 90 គីឡូម៉ែត្រ។ រូបភាពពីកាម៉េរិករបស់យាន Lunar Reconnaissance បញ្ជាក់ថា Odysseus បានចុះចតដោយជោគជ័យ ពីកម្ពស់ 2,759 ម៉ែត្រ។

Intuitive Machines ឱ្យដឹងថា ក្រោយពីបានហោះហើរជាង 965,600 គីឡូម៉ែត្រ យាន Odysseus ក៏បានចុះចតលើទីតាំងដែលមានចម្ងាយពីគោលដៅ Malapert A 1.5 គីឡូម៉ែត្រ។ ក្រុមគ្រប់គ្រងបេសកកម្មបញ្ជាក់ថា Odysseus រអិលដួលផ្អៀងទៅម្ខាង សង្កត់លើថ្មមួយដុំ ធ្វើឱ្យអង់តែនមួយចំនួនរបស់វាត្រូវបែរទិសខុសពីការកំណត់។ ផ្អែកលើទីតាំងរបស់ផែនដី និងព្រះចន្ទ ក្រុមហ៊ុនខាងលើគណនាឃើញថា ក្រុមអ្នកគ្រប់គ្រងយានអាចបន្តទាក់ទងជាមួយ Odysseus រហូតដល់ព្រឹកថ្ងៃទី 27 កុម្ភៈ 2024 ឆាប់ជាងច្រើនថ្ងៃ បើធៀបនឹង 9 ថ្ងៃ ដែលជាការគ្រោងទុកដំបូង។

យាន Odysseus ត្រូវបានបាញ់បង្ហោះលើរ៉ុក្កែត Falcon 9 របស់ SpaceX ពីមជ្ឈមណ្ឌលអវកាស Kennedy របស់ណាសា នៅ Cape Canaveral រដ្ឋ Florida កាលពីថ្ងៃទី 15 កុម្ភៈ 2024 និងហោះចូលដល់គន្លងតារាវិថីព្រះចន្ទកាលពីថ្ងៃទី 21 កុម្ភៈ។ យាននេះបានចុះចតលើដីក្បែរមាត់រណ្ដៅ Malapert A នៅប៉ូលខាងត្បូងរបស់ព្រះចន្ទ។ យោងតាមណាសា នេះគឺជាតំបន់ដែលទាក់ទាញចំណាប់អារម្មណ៍របស់អ្នកវិទ្យាសាស្ត្រតាំងពីយូរមកហើយ ព្រោះតែវត្តមានរបស់ផ្ទាំងទឹកកក ដែលអាចបំបែកទៅជាអ៊ីដ្រូសែន និងអុកស៊ីសែន សម្រាប់ប្រើប្រាស់ជាឥន្ធនៈរបស់រ៉ុក្កែតនាពេលអនាគត។

បេសកកម្ម Odysseus ស្ថិតក្នុងកម្មវិធី Commercial Lunar Payload Services របស់ណាសា ដែលជួយជំរុញការអភិវឌ្ឍយានចុះចតឯកជន។ ណាសាបានចុះកិច្ចព្រមព្រៀងជាមួយនឹងបណ្ដាក្រុមហ៊ុនឯកជន ដើម្បីដឹកទំនិញ និងឧបករណ៍វិទ្យាសាស្ត្រឡើងទៅកាន់ឋានព្រះចន្ទ។ នៅមុនជោគជ័យរបស់ Odysseus ក៏មានយាន 5 គ្រឿងបានបរាជ័យក្នុងការចុះចតលើផ្ទៃព្រះចន្ទនាពេលថ្មីៗនេះ ក្នុងនោះក៏មានបេសកកម្មឯកជន Peregrine ដែលបានបរាជ័យកាលពីខែមុនផងដែរ៕

February 27, 2024

ប្រទេសពីរក្នុងចំណោមមហាអំណាចសេដ្ឋកិច្ចធំៗទាំងដប់របស់ពិភពលោក កំពុងជួបវិបត្តិសេដ្ឋកិច្ច

ចក្រភពអង់គ្លេស និងជប៉ុន បាន និងកំពុងធ្លាក់ចូលក្នុងវិបត្តិសេដ្ឋកិច្ចចាប់ពីដំណាក់កាលចុងឆ្នាំ 2023 ខណៈដែលសហរដ្ឋអាម៉េរិក បន្តទទួលបានសញ្ញាណវិជ្ជមានគួរឱ្យមានសុទិដ្ឋិនិយមជាងមុន។

មហាអំណាចសេដ្ឋកិច្ចទាំងដប់របស់ពិភពលោក រួមចំណែកយ៉ាងធំធេងទៅក្នុងផលិតផលក្នុងស្រុកសរុប (GDP) ទូទាំងសកលលោក និងមានឥទ្ធិពលយ៉ាងខ្លាំងក្លាដល់គោលនយោបាយសេដ្ឋកិច្ច និងពាណិជ្ជកម្មអន្តរជាតិ។ ក៏ប៉ុន្តែ ពីរប្រទេសក្នុងចំណោមនោះ ពោលគឺ ជប៉ុន និងអង់គ្លេស ថ្មីៗនេះបានប្រកាសអំពីស្ថានភាពសេដ្ឋកិច្ច ដែលធ្លាក់ចូលក្នុងវិបត្តិ ក្នុងរយៈពេលពីរត្រីមាសជាបន្តបន្ទាប់។ ចំណែកមហាអំណាចសេដ្ឋកិច្ចទាំង 8 ផ្សេងទៀត បានឃើញកំណើនសេដ្ឋកិច្ចងើបឡើងវិញប្រកបដោយទំនុកចិត្ត។

ខាងក្រោមនេះគឺជាស្ថានភាពសេដ្ឋកិច្ចរបស់ Top 10 នៃប្រទេសមហាអំណាចសេដ្ឋកិច្ចទាំងដប់ លើពិភពលោក នៅក្នុងឆ្នាំ 2024 ដោយយោងទៅលើការវិភាគទិន្នន័យរបស់មូលនិធិរូបិយវត្ថុអន្តរជាតិ (IMF) ដែលគិតត្រឹមថ្ងៃទី 07 ខែកុម្ភៈ ឆ្នាំ 2024៖

សហរដ្ឋអាម៉េរិក

GDP៖ 27,974 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 83 ពាន់ដុល្លារ
កំណើន GDP ប្រចាំឆ្នាំ៖ 1.5%

ចាប់ពីឆ្នាំ 1960 ដល់បច្ចុប្បន្ន សហរដ្ឋអាម៉េរិក នៅតែរក្សាបានតំណែងជាមហាអំណាចសេដ្ឋកិច្ចទីមួយលើពិភពលោក។

ប្រទេសចិន

GDP៖ 18,566 ពាន់លានដុល្លារអាម៉េរិក
GDP ជាមធ្យមសម្រាប់មនុស្សម្នាក់៖ 13 ពាន់ដុល្លារ
កំណើន GDP ប្រចាំឆ្នាំ៖ 4.2%

ប្រទេសនេះបានហក់ពីចំណាត់ថ្នាក់មហាអំណាចសេដ្ឋកិច្ចទីបួនកាលពីឆ្នាំ 1960 ឡើងមកចំណាត់ថ្នាក់ទីពីរនៅក្នុងប៉ុន្មានឆ្នាំចុងក្រោយនេះ។

ប្រទេសអាល្លឺម៉ង់

GDP៖ 4,730 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 56 ពាន់ដុល្លារ
កំណើន GDP ប្រចាំឆ្នាំ៖ 0.9%

ប្រទេសជប៉ុន

GDP៖ 4,291 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 34 ពាន់ដុល្លារ
កំណើន GDP ប្រចាំឆ្នាំ៖ 1.0%

ប្រទេសឥណ្ឌា

GDP៖ 4,112 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 2.8 ពាន់ដុល្លារ
កំណើន GDP ប្រចាំឆ្នាំ៖ 6.3%

ចក្រភពអង់គ្លេស

GDP៖ 3,592 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 52 ពាន់ដុល្លារ
កំណើន GDP ប្រចាំឆ្នាំ៖ 0.6%

ប្រទេសបារាំង

GDP៖ 3,182 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 48 ពាន់ដុល្លារ
កំណើន GDP ប្រចាំឆ្នាំ៖ 1.3%

ប្រទេសអ៊ីតាលី

GDP៖ 2,280 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 38 ពាន់ដុល្លារ
កំណើន GDP ប្រចាំឆ្នាំ៖ 0.7%

ប្រទេសប្រេស៊ីល

GDP៖ 2,272 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 11 ពាន់ដុល្លារ
កំណើន GDP ប្រចាំឆ្នាំ៖ 1.5%

ប្រទេសកាណាដា

GDP៖ 2,242 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 55 ពាន់ដុល្លារ
កំណើន GDP ប្រចាំឆ្នាំ៖ 1.6%

February 26, 2024

ព្រឹត្តិការណ៍ពិសេសៗពីការសម្ពោធជាផ្លូវការនូវស្មាតហ្វូន OPPO Reno11 Series 5G

កម្មវិធីសម្ពោធស្មាតហ្វូនស៊េរីថ្មី OPPO Reno11 Series 5G បានសម្ពោធជាផ្លូវការហើយ ជាមួយនឹងបរិយាកាសដ៏អធិកអធម ក្រោមការយាងចូលរួមពីភ្ញៀវកិត្តិយសពិសេស ព្រះនាងតូច ជេនណា ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងរ៉េត ស៊ូហ្សាណា ព្រមទាំងតារាប្រុសស្រីល្បីៗជាច្រើនរូប ដែលបានអញ្ជើញចូលរួមនៅក្នុងកម្មវិធីនេះ។

OPPO បានដាក់បង្ហាញស្មាតហ្វូន OPPO Reno11 Series 5G ជំនាន់ថ្មីរបស់ខ្លួនរហូតទៅដល់ 3 ម៉ូដែល ដែលរួមមាន Reno11 5G, Reno11 F និង Reno11 Pro 5G ទាំងការឌីហ្សាញ ប្រព័ន្ធកាមេរ៉ា កម្លាំងម៉ាស៊ីន និងបច្ចេកវិទ្យា AI គឺសុទ្ធសឹងតែជាបច្ចេកវិទ្យាចុងក្រោយ។

សម្រាប់ការរចនាឌីហ្សាញដ៏ថ្មីស្រឡាងដែលមិនធ្លាប់មានពីមុនមក បានបំផុសគំនិតពីធម្មជាតិពិតៗ ដែលផ្តល់ជូននូវភាពស្រស់ស្រាយរាល់ពេលដែលយើងសម្លឹងមើល។ រីឯ គុណភាពប្រព័ន្ធកាមេរ៉ាថតរូប Portrait បានអាប់ដេតកាន់តែប្រសើរជាងមុន ដែលធ្វើឲ្យអ្នកទទួលបានរូបភាពហាក់ដូចជាថតរូបក្នុងស្ទីឌីយោ ទាំងគុណភាព ការចាប់ប្លង់ និងពន្លឺនោះទេ។ បន្ថែមពីនេះជាមួយមុខងារ 2x optical zoom អាចទាញផ្ទៃខាងក្រោយមកកាន់តែកៀករូបមនុស្ស និងធ្វើឲ្យព្រាលផ្ទៃខាងក្រោយ ធ្វើឲ្យរូបភាព Portrait កាន់តែលេចធ្លោ និងនៅតែអាចរក្សាទម្រង់មុខមនុស្សបានស្អាតធម្មជាតិ មិនធ្វើឲ្យខូចទ្រង់ទ្រាយនោះទេ។ លើសពីនេះ OPPO Reno11 Series 5G ទាំងនៅលើកាមេរ៉ាមុខ និងក្រោយអាចថតវីដេអូបានកម្រិត 4K ។ ចំពោះអេក្រង់វិញ OPPO Reno11 Series 5G បំពាក់ជាមួយអេក្រង់ប្រភេទ 3D គាំទ្រដោយកញ្ចក់ AMOLED Display មានគែមកោង និងមានទំហំ 6.7Inch ព្រមទាំងមានសមត្ថភាពខ្ពស់អាចបង្ហាញរូបភាព និងវីដេអូចេញបានក្នុងកម្រិត FHD+ ថែមទៀតផង។ ចំណែកថាមពលថ្មវិញ Reno11 និង Reno11 F មានកម្លាំង 5000mAh និងគាំទ្របច្ចេកវិទ្យា 67W SUPERVOOC ដោយឡែក Reno11 Pro មានកម្លាំងថ្ម 4600mAh និងគាំទ្របច្ចេកវិទ្យា 80W SUPERVOOC ។

ក្រៅពីនេះ OPPO ក៏មានសម្ពោធប្រព័ន្ធប្រតិបត្តិការថ្មី ColorOS 14 ដែលមានមុខងារពិសេសៗជាច្រើនដូចជា Smart Image Matting, File Dock, Smart Touch និងមុខងារ LinkBoost ។ លើសពីនេះទៅទៀត ក៏មានការប្រកាសផលិតផល IOT ដូចជា OPPO Pad Neo, OPPO Watch X និងកាសឥតខ្សែ OPPO Enco Bud2 ពណ៌ថ្មីផងដែរ។

សម្រាប់ថេប្លេតជំនាន់ថ្មី OPPO Pad Neo រចនាមកជាមួយអេក្រង់ ReadFit កម្រិត 2.4K ទំហំ 14” និងអាចប្រើប្រាស់ស៊ីមកាតដោយគាំទ្រសេវា 4G LTE និង Wifi ជាមួយថាមពលថ្មធំ 8000mAh ដែលមានបច្ចេកវិទ្យាសាកថ្មរហ័ស 33W SUPERVOOC ព្រមទាំង RAM 16GB ((8+8GB) និង ROM 128GB ផ្តល់ជូនលោកអ្នកនូវភាពរីករាយគ្មានដែនកំណត់គ្រប់ទីកន្លែង។
សម្រាប់ OPPO Enco Buds2 ជាកាសឥតខ្សែជំនាន់ថ្មីនឹងផ្តល់ឲ្យអ្នកនូវបទពិសោធសំឡេងដ៏អស្ចារ្យឥតដែនកំណត់ និងអាចឲ្យអ្នកប៉ះបញ្ជាផ្ទាល់លើកាស រាល់ពេលចង់ផ្លាស់ប្តូរបទចម្រៀង បន្ថយឬបន្ថែមសំឡេង និងទទួលការហៅចូលបានយ៉ាងងាយស្រួលដោយមិនចាំបាច់ចុចផ្ទាល់លើទូរស័ព្ទ។
សម្រាប់ OPPO Watch X នាឡិកាវៃឆ្លាតជំនាន់ថ្មី ដែលមានរចនាបថរូបរាងកាលីបស្រស់ស្អាត ទាន់សម័យ កម្រាស់ស្តើង ស័ក្កសមជាមួយជីវិតប្រចាំថ្ងៃ ដោយភ្ជាប់មកនូវមុខងារប្រើប្រាស់ទំនើបៗជាច្រើន។

តោះ! កក់ទុកមុនចាប់ពីថ្ងៃនេះរហូតដល់ថ្ងៃទី02 មីនា 2024 លើស្មាតហ្វូនស៊េរីថ្មី OPPO Reno11 Series 5G ទាំង 3 ម៉ូដែល Reno11 Pro 5G $599 | Reno11 5G $449 | Reno11 F 5G $339 នឹងទទួលបានកាដូរួមមានដូចជា ៖

រាល់ការកក់ទុកមុន Reno11 Pro 5G | Reno11 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $89
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54
រាល់ការកក់ទុកមុន Reno11 F 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $69
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54

សម្រាប់ផលិតផល IoT រួមមាន OPPO Pad Neo តម្លៃ $299 | OPPO Watch X | OPPO Enco Buds2 អាចរកទិញបានចាប់ពីថ្ងៃទី03 ខែមីនា 2024 នេះតទៅ៕

February 24, 2024

AirAsia ងាកទៅរករូបមន្តពាណិជ្ជកម្មថ្មី ត្រៀមពង្រីកមកទីផ្សារកម្ពុជា

ក្រុមហ៊ុនអាកាសចរណ៍ AirAsia កំពុងរៀបគម្រោងប្ដូរមកជាក្រុមហ៊ុនដឹកជញ្ជូនដែលដំណើរការទៅតាមរូបមន្ត «កង់រទេះ» ជំនួសឱ្យការផ្ដោតទៅលើតែជើងហោះហើរត្រង់ពីទីក្រុងមួយទៅទីក្រុមមួយដូចបច្ចុប្បន្ន។

ក្រុមហ៊ុនសាជីវកម្ម Capital A Bhd ដែលគ្រប់គ្រង AirAsia ប្រកាសថា ក្រុមហ៊ុនអាកាសចរណ៍នេះនឹងប្រើប្រាស់យុទ្ធសាស្ត្រពហុមណ្ឌល តាមរយៈវត្តមាននៅម៉ាឡេស៊ី ថៃ ឥណ្ឌូណេស៊ី ហ្វ៊ីលីពីន ហើយគ្រោងនឹងនៅកម្ពុជាផងដែរ ដើម្បីអនុវត្តគម្រោងដឹកជញ្ជូនតាមបណ្ដាញដែលមានការចំណាយទាប។

បណ្ដាក្រុមហ៊ុនអាកាសចរណ៍តម្លៃទាបតែងតែប្រើប្រាស់រូបមន្ត «ទីតាំង – ទីតាំង» ដែលផ្ដោតទៅលើតែផ្លូវហោះហើរត្រង់រវាងទីក្រុងពីរ ដើម្បីកាត់បន្ថយការចំណាយ ដោយសារតែមិនមានការចុះចតតាមផ្លូវហោះហើរ។ ចំណែករូបមន្ត «កង់រទេះ» វិញ គឺតែងតែត្រូវបានបណ្ដាក្រុមហ៊ុនអាកាសចរណ៍ផ្ដល់សេវាគ្រប់ជ្រុងជ្រោយ ដូចទៅនឹងអ្វីដែល Emirates Airlines កំពុងអនុវត្ត។

ចំណុចពិសេសនៃរូបមន្ត «កង់រទេះ» គឺការផ្ដោតទៅលើសកម្មភាពហោះហើរជុំវិញមជ្ឈមណ្ដលអាកាសយានដ្ឋានធំមួយ ដែលក្នុងនោះមានជើងហោះហើរជាច្រើនដែលហោះទៅកាន់គោលដៅផ្សេងៗ។

February 23, 2024

BYD បង្ហាញរថយន្តអគ្គិសនីតម្លៃទាបជាងមុន ដើម្បីប្រជែងនឹងរថយន្តសាំង

ក្រុមហ៊ុនចិន BYD កំពុងចាប់ផ្ដើម «សង្គ្រាមតម្លៃ» ជាមួយនឹងរថយន្តប្រើម៉ាស៊ីនចំហេះក្នុង (ICE) នៅពេលបណ្ដារថយន្តអគ្គិសនីថ្មីដែលមានតម្លៃទាបជាងមុន ចាប់ផ្ដើមបង្ហាញខ្លួនក្នុងទីផ្សារ។ បន្ទាប់ពីបង្ហាញវត្តមាន Qin Plus EV Honor Edition ថ្មីកាលពីថ្ងៃអង្គារ ក្រុមហ៊ុន BYD ក៏បានឱ្យដឹងថា ពួកគេចាប់ផ្ដើមជាផ្លូវការនូវយុគសម័យថ្មីស្ដីពីអគ្គិសនីតម្លៃទាបជាងប្រេងឥន្ធនៈ។

ក្រោយពីដណ្ដើមបានតំណែងជាអ្នកផលិតរថយន្តអគ្គិសនីដែលលក់ដាច់ជាងគេលើពិភពលោកនៅក្នុងត្រីមាសទីបួននៃឆ្នាំ 2023 ពី Tesla របស់អាម៉េរិក បច្ចុប្បន្នក្រុមហ៊ុនចិន BYD កំពុងជំរុញផែនការរក្សាល្បឿននៃការរីកចម្រើននេះសម្រាប់ឆ្នាំ 2024។

កាលពីថ្ងៃទី 20 កុម្ភៈ 2024 BYD បានបង្ហាញកំណែថ្មីរបស់រថយន្តអគ្គិសនីប្រភេទសេដានរបស់ខ្លួន ដើម្បីបន្តដណ្ដើមយកចំណែកទីផ្សារពីរថយន្តសាំង។ កំណែ Qin Plus EV របស់ BYD មានតម្លៃចាប់ពី 15,200 ដុល្លារ ដល់ 19,400 ដុល្លារអាម៉េរិក។

កំណែដំណើរការដោយអគ្គិសនី រួមមាន ម៉ូទ័រអគ្គិសនីមួយគ្រឿងដែលមានអានុភាពរហូតដល់ 134 កម្លាំងសេះ (100 kW) និងកម្លាំងរមួលកង់ 132 lb-ft (180 Nm)។ វានឹងត្រូវបានផ្គត់ផ្គង់អគ្គិសនីពីថ្មផ្ទុកថាមពល 48 kWh ឬ 57.6 kWh សម្រាប់រង្វង់ប្រតិបត្តិការ CLTC ឡើងដល់ 420 គីឡូម៉ែត្រ និង 510 គីឡូម៉ែត្រ។

កាលពីឆ្នាំមុន BYD បានបញ្ចេញ Qin Plus Champion Edition ដែលមានតម្លៃប្រហាក់ប្រហែលនឹងរថយន្តសាំង (14,000 ដុល្លារ) ដែល «លុបបំបាត់កម្លាំងទាក់ទាញរបស់រថយន្ត ICE ដោយផ្ទាល់»។

ពេលនេះ BYD បានបង្ហាញស៊េរីថ្មីរបស់ម៉ូដែលរថយន្តហាយព្រីត BYD Seal DM-i ដែលត្រូវបានហៅថា Glory Edition មានតម្លៃចាប់ពីជាង 11,000 ដុល្លារ និងកំណែអគ្គិសនីសុទ្ធ (EV) មានតម្លៃចាប់ពី 15,200 ដុល្លារ។

យោងតាម CnEVPost ក្រុមហ៊ុន BYD ក៏កំពុងបង្ហាញវត្តមានកំណែ Champion Edition Dolphin EV ថ្មី ដែលធ្វើដំណើរបានឆ្ងាយជាង និងមានតម្លៃទាបជាងស៊េរីមុន។ Dolphin បច្ចុប្បន្នមានតម្លៃចាប់ពី 14,500 ដុល្លារអាម៉េរិក៕

February 22, 2024

សេណារីយ៉ូណាដែលធ្វើឱ្យតម្លៃមាសពិភពលោកឡើងដល់ 361 ដុល្លារ/ជី

តម្លៃមាសអាចកើន 50% ឡើងដល់ 3,000 ដុល្លារអាម៉េរិកក្នុងមួយអោន (1 អោន (ounce) = 8.29426 ជី) នៅក្នុងរង្វង់ពី 12 ទៅ 18 ខែទៀត បើសិនសេដ្ឋកិច្ចពិភពលោកធ្លាក់ចូលក្នុងឱនភាពជ្រៅជាងបច្ចុប្បន្ន និងបណ្ដាធនាគារកណ្ដាលបង្កើនការទិញ។ នេះបើតាមធនាគារ Citi។

តម្លៃមាសប្រគល់ភ្លាមពិភពលោក បច្ចុប្បន្នត្រូវបានជួញដូរក្នុងតម្លៃ 2,016 ដុល្លារក្នុងមួយអោន ទាបជាងឆ្ងាយបើធៀបនឹង 2,135 ដុល្លារកាលពីខែធ្នូ 2023។ ក៏ប៉ុន្តែ ក្រុមអ្នកវិភាគនៅធនាគារ Citi យល់ថា តម្លៃមាសនេះអាចឡើងដល់ 3,000 ដុល្លារ/អោន នៅក្នុងរង្វង់ពី 12 ទៅ 18 ខែខាងមុខ។

យោងតាម Aakash Doshi ប្រធានក្រុមអ្នកវិភាគទំនិញតំបន់អាម៉េរិកខាងជើង ប្រចាំធនាគារ Citi សេណារីយ៉ូដែលមានភាគរយកើតឡើងខ្ពស់ជាងគេ ដែលនាំឱ្យមាសឡើងថ្លៃដល់ 3,000 ដុល្លារ/អោន គឺនិន្នាការ «មិនប្រើប្រាស់ប្រាក់ដុល្លារអាម៉េរិក» នៅតាមធនាគារជាតិនៃបណ្ដាប្រទេសទើបលេចធ្លោ។ ប្រការនេះអាចនាំឱ្យកម្លាំងទិញមាសរបស់ធនាគារទាំងនេះកើនឡើងទ្វេដង។ បច្ចុប្បន្ន គ្រឿងអលង្ការគឺជាកម្លាំងរុញច្រានចម្បងគេសម្រាប់តម្រូវការមាសលើពិភពលោក។

«និន្នាការនេះកំពុងកើតឡើង ប៉ុន្តែមានសភាពយឺតយ៉ាវខ្លាំង។ បើសិនត្រូវបានជំរុញល្បឿន វិបត្តិទំនុកចិត្តលើប្រាក់ដុល្លារអាម៉េរិក នឹងកើតឡើង» Aakash Doshi ឱ្យដឹងដូច្នេះ។

Citi ឱ្យដឹងថា ប៉ុន្មានឆ្នាំចុងក្រោយនេះ កម្លាំងទិញមាសរបស់បណ្ដាធនាគារកណ្ដាល បានកើនឡើងដល់កម្រិតខ្ពស់បំផុត នៅពេលពួកគេស្វែងរកវិធីធ្វើពិពិធកម្មទុនបម្រុង និងកាត់បន្ថយហានិភ័យឥណទាន។ ធនាគារជាតិចិន និងរុស្ស៊ី ទិញមាសច្រើនជាងគេបំផុត និងតាមពីក្រោយដោយប្រទេសឥណ្ឌា តួកគី និងប្រេស៊ីល។

របាយការណ៍របស់ក្រុមប្រឹក្សាមាសពិភពលោក (WGC) កាលពីខែមករា បង្ហាញថា បណ្ដាធនាគារកណ្ដាលបានទិញមាសជាង 1,000 តោន ក្នុងរយៈពេលពីរឆ្នាំជាប់ៗគ្នា។ «បើសិនតួលេខនេះច្រើនជាងទ្វេដង ពោលគឺឡើងដល់ 2,000 តោន យើងយល់ថា នេះនឹងជាកម្លាំងទាញដ៏ធំសម្រាប់តម្លៃមាស» Doshi បញ្ជាក់ដូច្នេះ។

ទន្ទឹមនឹងនេះ ការដែលសេដ្ឋកិច្ចពិភពលោកធ្លាក់ចូលក្នុងឱនភាពជ្រៅ ក៏អាចទាញតម្លៃមាសឱ្យឡើងដល់ 3,000 ដុល្លារក្នុងមួយអោន ព្រោះថា សេណារីយ៉ូនេះធ្វើឱ្យធនាគារកណ្ដាលអាម៉េរិក (Fed) បញ្ចុះអត្រាការប្រាក់កម្រិតខ្ពស់បំផុត។ ប៉ុន្តែ Citi ឱ្យដឹងថា សេណារីយ៉ូនេះមានលទ្ធភាពកើតឡើងមិនខ្ពស់។

ក្រៅពីនេះ Stagflation (កំណើនសេដ្ឋកិច្ចទាប អមនឹងអតិផរណា) ក៏អាចជាកត្តារុញតម្លៃមាសឱ្យឡើងខ្ពស់ ដោយសារមាសគឺជាទ្រព្យសុវត្ថិភាពក្នុងពេលមានអស្ថិរភាពសេដ្ឋកិច្ច – នយោបាយ។ ក៏ប៉ុន្តែ សេណារីយ៉ូនេះក៏មានលទ្ធភាពកើតឡើងក្នុងកម្រិតទាប។

ក្នុងស្ថានភាពធម្មតា Citi ព្យាករថា តម្លៃមាសជាមធ្យមនឹងត្រូវបានជួញដូរក្នុងរង្វង់ 2,000 ដុល្លារ/អោន នៅពាក់កណ្ដាលដើមឆ្នាំ និងឡើងដល់ 2,150 ដុល្លារ នៅពាក់កណ្ដាលចុងឆ្នាំ 2024។ ធនាគារនេះរំពឹងថា នៅចុងឆ្នាំនេះ តម្លៃមាសអាចមានលទ្ធភាពហក់ឡើងដល់កម្រិតថ្មីមួយទៀត៕

February 22, 2024

Tag: ថ្ម