ថ្ម - La Reine Media

ណាសាធ្វើតេស្តក្បាលបាញ់កម្លាំងរុញច្រានរបស់ម៉ាស៊ីនរ៉ុក្កែតដែលបោះពុម្ព 3D

ទីភ្នាក់ងារអវកាសអាម៉េរិក (ណាសា) ទើបតែបានធ្វើការសាកល្បងក្បាលបាញ់កម្លាំងរុញច្រានរបស់ម៉ាស៊ីនរ៉ុក្កែតអវកាស ដែលផលិតដោយបច្ចេកវិទ្យាបោះពុម្ព 3D នៅឯមជ្ឈមណ្ឌលអវកាស Marshall ក្នុងរដ្ឋ Alabama សហរដ្ឋអាម៉េរិក។

គម្រោងនេះត្រូវបានអនុវត្តដោយណាសា សហការជាមួយនឹងដៃគូចំនួនពីរគឺ Elementum 3D និង RPM Innovations។ នេះគឺជាផ្នែកមួយនៃគម្រោងផលិតសារធាតុបន្ថែមដែលមានប្រតិកម្ម សម្រាប់បដិវត្តន៍ឧស្សាហកម្មលើកទីបួន (RAMFIRE) របស់ណាសា។ RAMFIRE ប្រើប្រាស់ការរួមផ្សំជាមួយនឹងបច្ចេកវិទ្យាបោះពុម្ព 3D និងអាលុយមីញូម ដើម្បីកាត់បន្ថយពេលវេលា និងទម្ងន់ផលិតកម្ម ទន្ទឹមនឹងការកាត់បន្ថយចំណាយ និងអាចត្រូវបានផលិតនៅក្នុងទីអវកាស។

កន្លងមក អាលុយមីញូមមិនត្រូវបានប្រើប្រាស់ក្នុងការផលិតយានអវកាស ដោយសារតែវាងាយនឹងក្ដៅ និងប្រេះក្នុងពេលផ្សារភ្ជិត។ ក៏ប៉ុន្តែ បច្ចេកទេសបោះពុម្ព 3D ដែលណាសាប្រើប្រាស់ខាងលើ បានជួយដោះស្រាយបញ្ហាទាំងនេះ ដោយការលុបបំបាត់តម្រូវការផ្សារភ្ជាប់ និងបង្កើតបានចង្អូរតូចៗនៅខាងក្នុងលោហធាតុ អនុញ្ញាតឱ្យវាចុះត្រជាក់ ដែលជួយទប់ស្កាត់បញ្ហាក្ដៅរហូតដល់រលាយ។

John Vickers ប្រធានក្រុមស្រាវជ្រាវរបស់គម្រោង RAMFIRE បានឱ្យដឹងថា គម្រោងនានាដូច RAMFIRE នឹងជួយអភិវឌ្ឍបណ្ដាប្រព័ន្ធរុញច្រានថ្មីដែលគាំទ្រដល់បេសកកម្មប្រកបដោយមហិច្ឆតារបស់ណាសា ក្នុងការឆ្ពោះទៅកាន់ឋានព្រះចន្ទ ភពអង្គារ និងឆ្ងាយជាងនេះ៕

November 8, 2023

ប្រទេសចិនធ្វើតេស្តរ៉ុក្កែតរុញច្រានអាចប្រើប្រាស់ឡើងវិញដោយជោគជ័យ

កាលពីថ្ងៃទី 02 វិច្ឆិកា ប្រទេសចិនបានទទួលជោគជ័យក្នុងការសាកល្បងដំណើរការហោះឡើង និងចុះចតដោយឈរត្រង់នៃរ៉ុក្កែតពាណិជ្ជកម្ម SQX-2Y ដែលអាចប្រើប្រាស់ឡើងវិញ។ នេះគឺជាជំហានថ្មីរបស់ប្រទេសចិននៅក្នុងវិស័យអវកាស។

រ៉ុក្កែត SQX-2Y ត្រូវបានអភិវឌ្ឍដោយក្រុមហ៊ុន Beijing Interstellar Glory Space Technology។ រ៉ុក្កែតនេះមានអង្កត់ផ្ចិតប្រវែង 3.35 ម៉ែត្រ, បណ្ដោយប្រហែល 17 ម៉ែត្រ និងបំពាក់ម៉ាស៊ីនប្រើប្រាស់មេតានអុកស៊ីសែនរាវ។ នេះគឺជាលើកដំបូងដែលប្រទេសចិនធ្វើតេស្តលើការហោះឡើង ចុះចតដោយឈរត្រង់ និងប្រើប្រាស់ឡើងវិញបាននូវរ៉ុក្កែតប្រើឥន្ធនៈរាវមួយជាន់ក្នុងទម្រង់ពេញលេញ។

ការសាកល្បងខាងលើនេះត្រូវបានធ្វើឡើងក្នុងមជ្ឈមណ្ឌលបាញ់បង្ហោះផ្កាយរណប Tửu Tuyền នៅភាគពាយព្យប្រទេសចិន។ ក្នុងការធ្វើតេស្តនេះ រ៉ុក្កែតបានហោះឡើងដល់កម្ពស់ 178.42 ម៉ែត្រ ខណៈរយៈពេលហោះហើរគឺ 50.82 វិនាទី និងសុក្រឹតភាពនៃទីតាំងចុះចតគឺប្រហែល 1.68 ម៉ែត្រ រួមនឹងល្បឿនចុះចតគឺ 0.025 ម៉ែត្រ/វិនាទី។

ក្រុមហ៊ុន Beijing Interstellar Glory Space Technology ឱ្យដឹងថា ការធ្វើតេស្តនេះមិនត្រឹមតែជួយដល់ការវាយតម្លៃលើគម្រោងអភិវឌ្ឍរ៉ុក្កែតដែលអាចប្រើឡើងវិញបាននោះទេ ប៉ុន្តែក៏ប្រមូលបាននូវទិន្នន័យសំខាន់ និងផ្ដល់ជាជំនួយផ្នែកបច្ចេកទេសសម្រាប់ការអភិវឌ្ឍរ៉ុក្កែតខ្នាតមធ្យម និងធំ ក៏ដូចជាការប្រើប្រាស់មេតានអុកស៊ីសែនរាវ ដែលអាចប្រើប្រាស់ឡើងវិញបានផងដែរ។

រ៉ុក្កែតមានពីរប្រភេទគឺ រ៉ុក្កែតឥន្ធនៈរឹង និងរ៉ុក្កែតឥន្ធនៈរាវ បើសិនបែងចែកទៅតាមប្រភេទឥន្ធនៈដែលប្រើប្រាស់សម្រាប់ម៉ាស៊ីន។ រ៉ុក្កែតឥន្ធនៈរាវមានចំណុចវិជ្ជមានត្រង់ថា វាជួយកាត់បន្ថយការចំណាយ កម្រិតនៃការស៊ីឥន្ធនៈ ការកែប្រែកម្លាំងរុញច្រាន និងលទ្ធភាពនៃការប្រើប្រាស់ឡើងវិញ។ បច្ចុប្បន្ន ប្រទេសនានាកំពុងផ្ដោតទៅលើការស្រាវជ្រាវ អភិវឌ្ឍរ៉ុក្កែតរុញច្រានពាណិជ្ជកម្មដែលអាចប្រើប្រាស់ឡើងវិញបាន។ ការប្រើប្រាស់ឡើងវិញនេះ មិនត្រឹមតែកាត់បន្ថយការចំណាយលើផ្នែករឹងរបស់រ៉ុក្កែតនោះទេ ប៉ុន្តែក៏ធ្វើឱ្យសកម្មភាព និងឧបករណ៍នៅលើដីមានភាពសាមញ្ញ ដូច្នេះក៏កាត់បន្ថយការចំណាយលើដំណើរការនៅលើដី និងបង្កើនការបាញ់បង្ហោះ៕

November 7, 2023

Honda បង្ហាញកង់អគ្គិសនីដំបូងបង្អស់របស់ខ្លួន

ក្រុមហ៊ុនជប៉ុន Honda កំពុងតែពង្រីកមុខជំនួញរបស់ខ្លួននៅក្នុងវិស័យយានយន្តប្រើប្រាស់ថាមពលអគ្គិសនី ដោយការបញ្ចេញកង់អគ្គិសនីដំបូងបង្អស់របស់ខ្លួន នោះគឺ Honda e-MTB Concept។

កង់អគ្គិសនីនេះទើបតែត្រូវបានដាក់បង្ហាញនៅក្នុងព្រឹត្តិការណ៍តាំងពិព័រណ៍ Japan Mobility Show នៅតូក្យូ ជាទីដែល Honda រួមនឹងបណ្ដាក្រុមហ៊ុនផលិតម៉ូតូ និងរថយន្តលំដាប់កំពូលៗដទៃទៀតនៅប្រទេសជប៉ុន បង្ហាញផលិតផលដែលមានលក្ខណៈជាអនាគត និង/ឬពង្រីកយីហោរបស់ពួកគេ។

កង់អគ្គិសនី Honda e-MTB Concept ត្រូវបានគេជឿថា ប្រើប្រាស់ម៉ូទ័រ Brose ដែលមានស្រាប់នាបច្ចុប្បន្ន។ វាប្រើប្រាស់ប្រព័ន្ធបើកបរ SRAM Eagle AXS, ហ្វ្រាំងកម្លាំងទឹក Shimano, ប្រព័ន្ធជើងទប់ក្រោម Fox នៅខាងមុខ និងខាងក្រោយ, ទម្រកែប RockShox Reverb, កង់ DT Swiss XM 1700 និងសំបកកង់ Maxxis Minion DHF។

សម្រាប់ Honda គោលដៅរបស់ពួកគេគឺការបូកបញ្ចូលគ្នារវាងម៉ូតូ និងកង់ទៅក្នុងផលិតផលមួយដែលអាចជិះលើភ្នំ នៅតំបន់ដែលមានឧបសគ្គច្រើន។

Honda មិនមែនជាអ្នកផលិតរថយន្ត ឬម៉ូតូដំបូងគេដែលយកកង់អគ្គិសនីធ្វើជាអ្នកនាំផ្លូវដ៏មានសក្ដានុពលដើម្បីពង្រីកយីហោនោះទេ។ ក្រុមហ៊ុនជាច្រើនបានធ្វើដូច្នេះ ក្នុងនោះមានដូចជា Harley-Davidson, Porsche និង Peugeot ជាដើម។

ថ្មីៗនេះ HUMMER និង Jeep ក៏បាន និងកំពុងប្រឹងប្រែងដើម្បីពង្រីកយីហោរបស់ខ្លួនទៅកាន់វិស័យកង់អគ្គិសនីផងដែរ។

November 6, 2023

សូមស្វាគមន៍ «បើកសម្ពោធ OPPO Flagship Store និង Find N3 Series First Sale» ក្នុងពេលតែមួយ គួរឲ្យភ្ញាក់ផ្អើល!

នៅថ្ងៃទី05 ខែវិច្ឆិកា ឆ្នាំ2023 គឺជាថ្ងៃពិសេសសម្រាប់ក្រុមហ៊ុន OPPO ប្រចាំប្រទេសកម្ពុជា ដែលបានបើកសម្ពោធនិងបើកដំណើរការនូវ OPPO Flagship Store យ៉ាងកក្រើកនៅក្នុងផ្សារទំនើប AEON Mall (ជាន់ទី1) ហើយក្នុងថ្ងៃតែមួយនេះផងដែរក៏ជាថ្ងៃ Find N3 Series First Sale ជាស្មាតហ្វូនអធិរាជអេក្រង់បត់របស់ OPPO ដែលទើបដាក់សម្ពោធកាលពីថ្ងៃទី27 ខែតុលា ឆ្នាំ2023 រំលងទៅថ្មីៗនេះ។

តួយ៉ាង នៅក្នុងកម្មវិធីសម្ពោធ OPPO Flagship Store & Find N3 Series First Sale ក៏ឃើញមានការចូលរួមពីបណ្តាដៃគូសហការ តារាល្បីៗជាច្រើនរូបដូចជា រ៉េត ស៊ូហ្សាណា, ជូរី ល្អហួស, ភឹម ស្រីនោ, តាន់ ជេស៊ី, គុយ អេណា, Lee Xin និង Chma ព្រមទាំងបងប្អូនសារព័ត៌មានជាច្រើនស្ថាប័នក្នុងស្រុក។

រឹតតែពិសេសឃើញថាក្រុមហ៊ុន OPPO ក៏បានផ្តល់ជូនកាដូ Free Free ដល់ហ្វេនៗគ្រប់ៗគ្នាដែលបានអញ្ជើញចូលរួមកម្មវិធី។ មិនតែប៉ុណ្ណោះ OPPO ក៏បានផ្តល់ជូនឱកាសពិសេសដែលមិនធ្លាប់មានជាមួយការបញ្ចុះតម្លៃលើ OPPO Pad Air និងរាល់ការទិញស្មាតហ្វូន OPPO គ្រប់ម៉ូដែលនឹងទទួលបានកាដូពិសេសៗជាច្រើនពី OPPO ដែលឱកាសនេះមិនធ្លាប់មានពីមុននោះទេ។

ក្រៅពីការផ្តល់ជូនដ៏ពិសេសខាងលើ គោលបំណងធំដែលក្រុមហ៊ុន OPPO នៅកម្ពុជាបើកដំណើរការនូវ Flagship Store ដំបូងរបស់ខ្លួនគឺដើម្បីផ្តល់ជូននូវភាពងាយស្រួល សេវាកម្មដ៏ទាន់ចិត្ត និងផ្តល់បទពិសោធដ៏ល្អប្រសើរដល់អតិថិជនក្នុងការមកតេស្តទូរស័ព្ទ OPPO គ្រប់ស៊េរីគ្រប់ម៉ូដែលដោយផ្ទាល់នៅក្នុងហាង ព្រមទាំងមានបុគ្គលិកជំនាញៗដែលអាចប្រឹក្សាមតិយោបល់។ អ្វីដែលកាន់តែពិសេស រាល់ការអញ្ជើញមកជាវស្មាតហ្វូន OPPO គ្រប់ម៉ូដែលនៅ Flagship Store អតិថិជននឹងទទួលបានការបិត Screen ដោយឥតគិតថ្លៃ៕

November 5, 2023

កម្ពុជា គ្រោងនឹងទទួលបានទុនវិនិយោគថ្មី តម្លៃ 500 លានដុល្លារពីក្រុមហ៊ុនមួយរបស់ចិន

ទីតាំងនៃតំបន់សេដ្ឋកិច្ចពិសេសពីរកន្លែងនៅកម្ពុជា កំពុងត្រូវបានសិក្សាពីសំណាក់ក្រុមហ៊ុនធំមួយរបស់ចិន ដែលគ្រោងនឹងបណ្ដាក់ទុនវិនិយោគចំនួន 500 លានដុល្លារអាម៉េរិក។

កាលពីថ្ងៃទី 31 តុលា 2023 ក្នុងពេលចុះធ្វើទស្សនកិច្ចតំបន់សេដ្ឋកិច្ចពិសេសក្នុងខេត្តស្វាយរៀង ឯកឧត្ដម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទីមួយនៃក្រុមប្រឹក្សាអភិវឌ្ឍកម្ពុជា បានថ្លែងថា ក្រុមហ៊ុនចិនដ៏ធំមួយ កំពុងសិក្សាទីតាំងនៃតំបន់សេដ្ឋកិច្ចពិសេសចំនួនពីរកន្លែង សម្រាប់ការវិនិយោគ 500 លានដុល្លាររបស់ខ្លួន។

ឯកឧត្ដម ស៊ុន ចាន់ថុល ធ្លាប់បានឱ្យដឹងថា ក្នុងរយៈពេលទស្សនកិច្ចនៅក្នុងប្រទេសចិនចាប់ពីថ្ងៃទី 20 ដល់ថ្ងៃទី 24 តុលា ឯកឧត្តម បានជួបពិភាក្សាជាមួយក្រុមហ៊ុនធំៗរបស់ចិនចំនួន 12 ក្រុមហ៊ុន និងបានពន្យល់ពួកគេអំពីគោលនយោបាយគាំពារអ្នកវិនិយោគរបស់រាជរដ្ឋាភិបាលកម្ពុជាផងដែរ។ ក្នុងនោះ មានក្រុមហ៊ុនធំមួយរបស់ចិន បានសម្រេចចិត្តមកវិនិយោគនៅកម្ពុជា ហើយបច្ចុប្បន្នកំពុងជ្រើសរើសទីតាំងបណ្ដាក់ទុនមួយក្នុងចំណោមពីរ ដែលមួយគឺតំបន់សេដ្ឋកិច្ចពិសេសខេត្តព្រះសីហនុ និងពីរគឺ តំបន់សេដ្ឋកិច្ចពិសេសក្នុងខេត្តស្វាយរៀង៕

November 4, 2023

វៀតណាមចង់ទិញម៉ាស៊ីនព្យាបាលជំងឺមហារីកទំនើបចុងក្រោយបង្អស់ តម្លៃជាងមួយរយលានដុល្លារអាម៉េរិក/គ្រឿង

ប្រធានមន្ទីរពេទ្យជោរៃរបស់វៀតណាម បានដាក់សំណើទិញម៉ាស៊ីនវិទ្យុសកម្មប្រូតុងដើម្បីព្យាបាលជំងឺមហារីក ចំនួនពីរគ្រឿង សម្រាប់រដ្ឋធានីហាណូយ និងទីក្រុងហូជីមិញ ក្នុងនោះ ម៉ាស៊ីននេះមានតម្លៃយ៉ាងតិចប្រហែលពី 101,719,000.00 ដុល្លារអាម៉េរិក។

នេះគឺជាម៉ាស៊ីនបាញ់កាំរស្មីពីក្រៅទំនើបបំផុតនាបច្ចុប្បន្ន ដែលអនុញ្ញាតឱ្យបាញ់វិទ្យុសកម្មសមស្រប និងសុក្រឹតទៅកាន់ដុំគីស សូម្បីតែពួកវាមានរូបរាងស្មុគស្មាញ និងស្ថិតនៅក្បែរអវយវៈមិនមានជំងឺ និងងាយប្រតិកម្ម។ វិធីសាស្ត្រនេះនឹងដោះស្រាយបាននូវចំណុចអវិជ្ជមាននៃការព្យាបាលដោយម៉ាស៊ីនបង្កើនល្បឿនលីនេអ៊ែរ LINAC (Linear Accelerator) ដែលអាចបង្កផលប៉ះពាល់ច្រើន។

ការព្យាបាលដោយម៉ាស៊ីនបង្កើនល្បឿនលីនេអ៊ែរ Linear Accelerator (ឆ្វេង) អាចបង្កផលប៉ះពាល់ច្រើន បើធៀបនឹងម៉ាស៊ីនវិទ្យុសកម្មប្រូតុង (ស្ដាំ)

ការស្រាវជ្រាវមួយបង្ហាញថា វៀតណាមមានអ្នកជំងឺមហារីកប្រមាណ 9,000 នាក់ ដែលត្រូវការការព្យាបាលដោយម៉ាស៊ីនបច្ចេកវិទ្យាថ្មីបំផុតនេះ។ បន្ទប់វិទ្យុសកម្មប្រូតុងមួយអាចព្យាបាលអ្នកជំងឺប្រហែល 300 នាក់ ក្នុងមួយឆ្នាំ ដូច្នេះ វៀតណាម ត្រូវការម៉ាស៊ីនទំនើបចុងក្រោយនេះប្រហែល 30 គ្រឿង។ ក៏ប៉ុន្តែ បច្ចុប្បន្ន ប្រទេសនេះមិនទាន់មានមួយគ្រឿងណានៅឡើយ។

មូលហេតុនេះហើយ ក្នុងកិច្ចប្រជុំមួយនៅសភាជាតិវៀតណាម កាលពីថ្ងៃទី 01 វិច្ឆិកា ប្រធានមន្ទីរពេទ្យជោរៃ លោក ង្វៀន ទ្រីធឹក យល់ថា ការបំពាក់ម៉ាស៊ីនវិទ្យុសកម្មប្រូតុងគឺជារឿងចាំបាច់ និងបន្ទាន់។ លោកបានដាក់សំណើទិញម៉ាស៊ីនវិទ្យុសកម្មប្រូតុងដើម្បីព្យាបាលជំងឺមហារីក ចំនួនពីរគ្រឿង សម្រាប់រដ្ឋធានីហាណូយ និងទីក្រុងហូជីមិញ ក្នុងនោះ ម៉ាស៊ីនមួយគ្រឿងៗមានតម្លៃប្រហែលពី 101,719,000.00 ទៅ 122,062,800.00 ដុល្លារអាម៉េរិក។

ម៉ាស៊ីនវិទ្យុសកម្មប្រូតុងមួយគ្រឿងមានតម្លៃប្រហែលពី 101,719,000.00 ទៅ 122,062,800.00 ដុល្លារអាម៉េរិក

បច្ចុប្បន្ន នៅលើពិភពលោកមានមជ្ឈមណ្ឌលព្យាបាលជំងឺមហារីកជាង 120 កន្លែង កំពុងប្រើប្រាស់ម៉ាស៊ីនវិទ្យុសកម្មប្រូតុង។ បណ្ដាប្រទេសអភិវឌ្ឍលើពិភពលោក មានជាអាទិ៍ សហរដ្ឋអាម៉េរិក ជប៉ុន អាល្លឺម៉ង់ បារាំង អង់គ្លេស រុស្ស៊ី ចិន និងប្រទេសមួយចំនួននៅអាស៊ីអាគ្នេយ៍ (សិង្ហបុរី និងថៃ) សុទ្ធតែមានម៉ាស៊ីនទំនើបនេះ៕

November 2, 2023

ថៃបញ្ចុះថ្លៃទិដ្ឋាការ និងការស្នាក់នៅសម្រាប់ពលករកម្ពុជា

ក្រសួងការងារថៃ បានចេញអនុក្រឹត្យថ្មីមួយដែលកំណត់តម្លៃថ្មីទៅលើការត្រួតពិនិត្យ និងផ្ដល់លិខិតពលកម្ម ចំពោះពលករបរទេសដែលមកពី កម្ពុជា និងប្រទេសមួយចំនួនទៀតដែលស្ថិតក្នុងតំបន់អាស៊ីអាគ្នេយ៍។

យោងតាមសារព័ត៌មានក្នុងស្រុក អនុក្រឹត្យខាងលើមានសុពលភាពរយៈពេល 4 ឆ្នាំ ដោយចាប់ផ្ដើមអនុវត្តពីថ្ងៃទី 10 វិច្ឆិកា 2023 និងអនុវត្តសម្រាប់ពលករដែលធ្វើការក្នុងក្របខណ្ឌកិច្ចសន្យា ឬអនុស្សរណៈនៃការយោគយល់ (MoU) ដែលទាក់ទងនឹងការជ្រើសរើសពលករ។

សេចក្ដីសម្រេចថ្មីនេះកំណត់ថា ថ្លៃទិដ្ឋាការសម្រាប់ពលករមកពីប្រទេសកម្ពុជា ឡាវ មីយ៉ាន់ម៉ា និងវៀតណាម ត្រូវបានកាត់បន្ថយពី 2,000 បាតនាបច្ចុប្បន្ន មកនៅត្រឹម 500 បាត ស្របពេលដែលថ្លៃស្នាក់នៅបណ្ដោះអាសន្ន (ថ្លៃពន្យារពេលទិដ្ឋាការរៀងរាល់ឆ្នាំ) ក៏ត្រូវបានបន្ថយពី 1,900 បាតនាបច្ចុប្បន្ន មកនៅត្រឹម 500 បាតផងដែរ។

ក្រសួងការងារថៃសង្កត់ធ្ងន់ថា អនុក្រឹត្យខាងលើគឺស្របនឹងវិធីសាស្ត្ររបស់រដ្ឋាភិបាលក្នុងការគ្រប់គ្រងការជ្រើសរើសពលករបរទេស ដើម្បីពង្រឹងសមត្ថភាពប្រកួតប្រជែងរបស់ប្រទេសនេះ ក៏ដូចជាការរួមចំណែកស្ដារសេដ្ឋកិច្ចក្រោយសម័យកូវីដ-19។

យោងតាមព័ត៌មានរបស់នាយកដ្ឋានរដ្ឋបាលការងារបរទេសនៃប្រទេសថៃ ក្នុងខែកញ្ញា ប្រទេសនេះមានពលករបរទេសចំនួន 2,593,439 នាក់ និងប្រហែលមួយលាននាក់ទៀតកំពុងស្ថិតក្នុងដំណាក់កាលដាក់ពាក្យស្នើសុំលិខិតអនុញ្ញាតការងារ ទៅតាមអនុក្រឹត្យចុះថ្ងៃទី 03 តុលា ឆ្នាំ 2023 របស់រដ្ឋាភិបាលថៃ៕

November 1, 2023

ឡាវដំណើរការកម្មវិធី «ផ្ទេរប្រាក់ដោយងាយ» សម្រាប់ពលករនៅបរទេស

កាលពីពេលថ្មីៗនេះ ធនាគារជាតិឡាវ (BOL) ទើបតែបានសហការជាមួយក្រសួងការងារ និងសុខុមាលភាពសង្គម ដាក់ឱ្យដំណើរការយន្តការគ្រប់គ្រងការផ្ទេរប្រាក់ឆ្លងប្រទេសសម្រាប់ពលករឡាវនៅបរទេស និងពលករបរទេសនៅប្រទេសឡាវ។

ក្នុងដំណាក់កាលដំបូងនៃកម្មវិធីនេះ ភាគីទាំងឡាយនឹងដំណើរការសាកល្បងនូវបណ្ដាញផ្ទេរប្រាក់រវាងប្រទេសឡាវ និងប្រទេសកូរ៉េខាងត្បូង តាមរយៈកិច្ចសហប្រតិបត្តិការរវាងធនាគារពាណិជ្ជកម្មបរទេសឡាវ និងក្រុមហ៊ុន GLN របស់កូរ៉េខាងត្បូង ក្នុងបំណងជួយដល់ពលករឡាវនៅកូរ៉េខាងត្បូងអាចផ្ញើប្រាក់របស់ខ្លួនមកកាន់គ្រួសារដោយមានភាពងាយស្រួល។

បច្ចុប្បន្ន ពលករឡាវកំពុងមានការលំបាកក្នុងការបើកគណនីធនាគារនៅបរទេស ដោយសារតែត្រូវបំពេញលិខិតស្នាមច្រើនបែបច្រើនយ៉ាង និងត្រូវចំណាយប្រាក់ច្រើន នាំឱ្យមានសេវាកម្មផ្ទេរប្រាក់មិនស្របច្បាប់ និងបង្កការខាតបង់ដល់ពលករ។

គម្រោងនេះត្រូវបានចាត់ទុកថាជាយន្តការសហប្រតិបត្តិការដ៏ល្អរវាងពីរស្ថាប័ននៃរដ្ឋាភិបាលឡាវ ក្នុងទិសដៅបង្កលក្ខណៈងាយស្រួលដល់ពលករ ពលការិនី នៅក្នុងការផ្ញើប្រាក់មកស្រុក លើកទឹកចិត្តឱ្យមានសកម្មភាពទូទាត់ក្នុងបណ្ដាញធនាគារ រក្សាលំនឹងនៃប្រព័ន្ធហិរញ្ញវត្ថុ និងកាត់បន្ថយលំហូរហិរញ្ញវត្ថុមិនស្របច្បាប់៕

October 31, 2023

ថៃបញ្ជាក់ថា កម្មវិធី «កាបូបលុយ 10,000 បាត» នឹងត្រូវបានអនុវត្ត

នាយករដ្ឋមន្ត្រីថៃ លោក Srettha Thavisin កាលពីថ្ងៃទី 29 តុលា ប្រកាសថា កម្មវិធី «កាបូបលុយ 10,000 បាត» ប្រាកដជានឹងត្រូវបានអនុវត្តចាប់ពីខែកុម្ភៈ 2024 ដូចបានកំណត់ ហើយថា ថ្នាលបច្ចេកវិទ្យា និងតម្លៃជាគោលរបស់កម្មវិធីនេះក៏ប្រាកដជានឹងត្រូវបានរក្សាដូចដើម។

បន្ទាប់ពីការអះអាងរបស់នាយករដ្ឋមន្ត្រី ឧបនាយករដ្ឋមន្ត្រី Phumtham Wechayachai ក៏បានបញ្ជាក់ថា សេដ្ឋកិច្ចថៃបានធ្លាក់ទៅក្នុងភាពយឺតយ៉ាវក្នុងអំឡុងប្រហែល 10 ឆ្នាំកន្លង និងត្រូវការយន្តការជំរុញខ្លាំងក្លា ដើម្បីបង្កើតសម្ទុះសម្រាប់ការអភិវឌ្ឍ។

យោងតាមលោក Phumtham បញ្ហាទាំងឡាយដែលត្រូវបានព្យាករថា អាចនឹងកើតឡើងនៅពេលអនុវត្តកម្មវិធី «10,000 បាត» នេះ រដ្ឋាភិបាលមានដំណោះស្រាយរួចហើយ។

កន្លងមក កម្មវិធី «កាបូបលុយ 10,000 បាត» ត្រូវរងសម្ពាធច្រើនពីសាធារណមតិ នៅពេលពួកគេយល់ថា កម្មវិធីនេះអាចប្រឈមនឹងភាពមិនស្របច្បាប់ លទ្ធភាព និងប្រសិទ្ធភាព នាំឱ្យរដ្ឋាភិបាលថៃ ត្រូវធ្វើការកែតម្រូវ។ ថ្មីៗនេះ កាលពីថ្ងៃទី 25 តុលា នាយករដ្ឋមន្ត្រីថៃក៏បានយល់ស្របតាមសំណើរបស់ធនាគារជាតិថៃ ស្ដីពីការដកអ្នកមានចេញពីក្រុមគោលដៅដែលត្រូវចូលរួមទទួលផលពីកម្មវិធីនេះផងដែរ។

តាមផែនការដំបូង កម្មវិធី «កាបូបលុយ 10,000 បាត» នឹងត្រូវបានអនុវត្តចាប់ពីថ្ងៃទី 01 កុម្ភៈ 2024 និងអនុវត្តសម្រាប់ពលរដ្ឋថៃគ្រប់រូបដែលមានអាយុចាប់ពី 16 ឆ្នាំឡើងទៅ ក្នុងនោះ ម្នាក់ៗនឹងទទួលបានប្រាក់ជំនួយ 10,000 បាត (ប្រហែល 270 ដុល្លារអាម៉េរិក) ដែលរដ្ឋផ្ទេរទៅក្នុងកាបូបលុយអេឡិចត្រូនិចរបស់ពួកគេ៕

October 30, 2023

ក្រុមហ៊ុនវៀតណាម បញ្ចេញម៉ូតូអគ្គិសនី អាចធ្វើដំណើរបាន 270 គីឡូម៉ែត្រ

ម៉ូដែលម៉ូតូ Quantum ទើបតែត្រូវបានក្រុមហ៊ុនវៀតណាម Dat Bike ប្រកាសដាក់លក់ក្នុងទីផ្សារ អាចធ្វើដំណើរបានរហូតដល់ 270 គីឡូម៉ែត្រ ខណៈក្រុមហ៊ុនមួយផ្សេងទៀតរបស់វៀតណាម ថា ផលិតផលរបស់ខ្លួន «ធ្វើដំណើរមិនកំណត់រយៈចម្ងាយ»។

កាលពីថ្ងៃទី 21 តុលា Dat Bike បញ្ចេញម៉ូដែលម៉ូតូអគ្គិសនីជំនាន់ទីបួនដែលមានឈ្មោះថា Quantum មានរូបរាងសាមញ្ញ និងធ្វើដំណើរបានឆ្ងាយជាងគេបង្អស់នៅវៀតណាម។ Quantum អាចបរបាន 270 គីឡូម៉ែត្រ/សាកថ្មម្ដង និងល្បឿនអតិបរមា 100 គីឡូម៉ែត្រ/ម៉ោង។ ម៉ូតូនេះស៊ីពេល 4 ម៉ោងសម្រាប់បញ្ចូលអគ្គិសនីមួយពេញនៅតាមផ្ទះ និង 1 ម៉ោងនៅតាមស្ថានីយរបស់ Dat Bike។ ក្រៅពីនេះ វាក៏ស៊ីពេលតែ 1 ម៉ោងក្នុងការបញ្ចូលថាមពលនៅតាមផ្ទះ នឹងអាចបរបាន 100 គីឡូម៉ែត្រ។ អាយុកាលថ្មផ្ទុកអគ្គិសនីរបស់ Quantum ឡើងដល់ 25 ឆ្នាំ។

ប៉ុន្តែ ពីរបីថ្ងៃបន្ទាប់ពីការប្រកាសរបស់ Dat Bike ក៏មានក្រុមហ៊ុនវៀតណាមមួយទៀត គឺ Selex Motors អះអាងថា រយៈចម្ងាយផ្លូវអតិបរមា «មិនស្ថិតក្នុងវច្ចនានុក្រម» នៅពេលប្រើប្រាស់ម៉ូតូអគ្គិសនីរបស់ពួកគេ។

Selex Motors ដែលកំពុងវាយលុកទីផ្សារម៉ូតូអគ្គិសនីសម្រាប់ការដឹកជញ្ជូន បញ្ជាក់ថា ដើម្បីឱ្យអ្នកបើកបរអាចធ្វើសកម្មភាពបានច្រើនបំផុត Selex Motors ប្រើប្រាស់ដំណោះស្រាយប្ដូរថ្មដែលស៊ីពេលតែ 2 នាទីប៉ុណ្ណោះ ដោយមិនបាច់រង់ចាំបញ្ចូលថាមពលច្រើនម៉ោងដូចម៉ូតូអគ្គិសនីដទៃ។

Selex Motors មានប្រព័ន្ធគាំទ្រចំនួន 4 ផ្នែក ដែលរួមមាន ម៉ូតូ Selex Camel, ថ្មផ្ទុកអគ្គិសនី Selex, ស្ថានីយប្ដូរថ្មស្វ័យប្រវត្ត និងកម្មវិធីទូរស័ព្ទ (App) ដែលជួយគ្រប់គ្រងប្រព័ន្ធនេះទាំងមូល។ បច្ចុប្បន្ន ក្រុមហ៊ុននេះមានស្ថានីយប្ដូរថ្មសរុប 54 នៅទូទាំងប្រទេស។

ដើម្បីប្ដូរថ្ម អ្នកប្រើប្រាស់គ្រាន់តែចូល App និងជ្រើសរើសស្ថានីយដែលនៅជិតបំផុត ពេលនោះ app នឹងបង្ហាញទីតាំង និងចំនួនថ្មដែលកំពុងមានក្នុងស្ថានីយនេះ។ មកដល់ស្ថានីយ អ្នកប្រើប្រាស់ចុះឈ្មោះចូលប្រព័ន្ធនៅក្នុងស្ថានីយដោយគណនីដេលបានចុះឈ្មោះពេលទិញម៉ូតូ ឬស្កេនកូដ QR រួចធ្វើតាមការណែនាំលើអេក្រង់។ ម៉ូដែលម៉ូតូអគ្គិសនី Selex Camel របស់ Selex Motors អាចដាក់ថ្មរហូតដល់ 3 គ្រាប់ និងអាចធ្វើដំណើរបាន 150 គីឡូម៉ែត្រ៕

October 30, 2023

Tag: ថ្ម