ថ្នាំ - La Reine Media

Trump ផ្ដល់អនុសាសន៍៖ ចាក់ពន្លឺ ឬថ្នាំសម្អាតមេរោគទៅក្នុងរាងកាយ ដើម្បីព្យាបាលCOVID-19

ការចាក់ថ្នាំសម្អាតមេរោគទៅក្នុងរាងកាយអ្នកជំងឺ អាចសម្លាប់COVID-19បាន ប៉ុន្តែក្រុមអ្នកជំនាញផ្នែកសុខាភិបាលយល់ថា គំនិតនេះ “គ្រោះថ្នាក់ណាស់”។

“ខ្ញុំឃើញថា សារធាតុរម្ងាប់មេរោគ អាចសម្លាប់វីរុសដោយប្រើពេលត្រឹមតែ1នាទី គឺ1នាទីតែប៉ុណ្ណោះ។ ហើយថា តើមានវិធីណាដែលយើងអាចធ្វើបែបនេះបាន ដោយការចាក់បញ្ចូលវាទៅក្នុងរាងកាយ ឬក៏មានវិធីណាមួយដែលអាចសម្លាប់វាបានដែរទេ?” ប្រធានាធិបតី Donald Trump ថ្លែងបែបនេះនៅក្នុងសន្និសីទសារព័ត៌មានមួយនៅសេតវិមានកាលពីថ្ងៃទី23មេសា។ ប៉ុន្តែ លោក Trump មិនបានលើកឡើងអំពីឈ្មោះថ្នាំណាមួយនោះទេ។

លោក Trump យល់ថា COVID-19 វាយលុកចូលទៅក្នុងសួតដោយចំនួនដ៏ច្រើន ដូច្នេះលោកមានការយកចិត្តទុកដាក់ទៅលើគំនិតមួយ នោះគឺ ការប្រើប្រាស់សារធាតុសម្អាតមេរោគ។ លោក Trump ថ្លែងថា “យើងទាំងអស់គ្នានឹងត្រូវពឹងលើក្រុមគ្រូពេទ្យ ប៉ុន្តែប្រការនេះចំពោះខ្ញុំ គឺពិតជាគួរឱ្យចាប់អារម្មណ៍”។

មន្ត្រីសុខាភិបាលជាន់ខ្ពស់ម្នាក់បានឱ្យដឹងបន្ទាប់ពីប្រសាសន៍របស់លោក Trump ថា បន្ទប់ពិសោធន៍នានារបស់សហរដ្ឋអាមេរិក កំពុងតែពិនិត្យ និងអភិវឌ្ឍវិធីសាស្ត្រព្យាបាល COVID-19 ដោយប្រើសារធាតុសម្អាតមេរោគនេះ។

យោបល់របស់ប្រធានាធិបតីសហរដ្ឋអាមេរិកនេះ ត្រូវបានលើកឡើងបន្ទាប់ពី Bill Bryan ដែលជាមន្ត្រីក្រសួងសន្តិសុខផ្ទៃក្នុង បានរាយការណ៍អំពីការពិសោធដែលក្រុមនេះបានធ្វើឡើង ដែលលទ្ធផលបង្ហាញថា COVID-19 មិនអាចរស់បានយូរនៅក្នងបរិយាកាសក្ដៅនិងសើមនោះឡើយ។ ការដែលលោក Bryan ថ្លែងថា “មេរោគនេះងាប់យ៉ាងលឿននៅក្រោមពន្លឺថ្ងៃ” ធ្វើឱ្យលោក Trump សួរខ្លួនឯងថា តើគេអាចនាំយកពន្លឺ “ចាក់បញ្ចូលទៅក្នុងរាងកាយ” ដើម្បីសម្លាប់វីរុសនេះដែរ ឬអត់?

ឆ្លើយតបបន្ថែមទៅនឹងសំណួររបស់អ្នកយកព័ត៌មាន លោក Bryan និយាយថា បើមានតែកម្ដៅ និងសំណើម នោះនឹងមិនអាចសម្លាប់ COVID-19 បានទេ បើសិនជាអ្នករាល់គ្នាមិនបន្តគោរពវិធានការបម្រាមគោចរ និងវិធានការផ្សេងៗ។

ក្រុមអ្នកជំនាញខាងសុខាភិបាលនៅសហរដ្ឋអាមេរិក ក្នុងនោះមាន Vin Gupta ដែលជាវេជ្ជបណ្ឌិតឯកទេសខាងជំងឺសួត អ្នកជំនាញផ្នែកខាងគោលនយោបាយសុខាភិបាលសកល បានច្រានចោល “អនុសាសន៍មិនសមស្រប” របស់ប្រធានាធិបតីអាមេរិកាំង។ Gupta បានថ្លែងថា “គំនិតស្ដីអំពីការចាក់បញ្ចូល ឬលេបផលិតផលអ្វីមួយទៅក្នុងរាងកាយដើម្បីសម្អាតមេរោគ គឺជារឿងដែលមិនអាចទៅរួច និងប្រកបដោយគ្រោះថ្នាក់។ នោះគឺជាវិធីដែលត្រូវបានគេប្រើប្រាស់ច្រើន នៅពេលពួកគេចង់សម្លាប់ខ្លួន”។

លោក Trump កន្លងមកធ្លាប់បានសរសើរចំពោះវិធីព្យាបាលអ្នកជំងឺCOVID-19 ដែលមិនទាន់ត្រូវបានត្រួតពិនិត្យ នៅក្នុងសន្និសីទសារព័ត៌មានស្ដីអំពី COVID-19។ លោកធ្លាប់គាំទ្រឱ្យប្រើថ្នាំព្យាបាលជំងឺគ្រុនចាញ់ hydroxychloroquine ដើម្បីព្យាបាល COVID-19 ហើយលោក Trump ថែមទាំងបានសរសើរថា នេះអាចជា “អំណោយរបស់ព្រះ” ទៀតផង។ ក៏ប៉ុន្តែ ក្រុមមន្ត្រីសុខាភិបាលបានព្រមានអំពីការប្រើប្រាស់ថ្នាំនេះសម្រាប់ព្យាបាលCOVID-19។

បុរសម្នាក់រស់នៅក្នុងរដ្ឋ Arizona នៃសហរដ្ឋអាមេរិក កាលពីខែមីនាបានបាត់បង់ជីវិត បន្ទាប់ពីលេបថ្នាំ chloroquine phosphate ព្រោះតែជឿថា វាជួយឱ្យគាត់ទប់ស្កាត់ COVID-19។ ប្រពន្ធរបស់បុរសដែលបានស្លាប់ខាងលើនេះ បានប្រាប់ NBC News ថា អ្នកស្រីធ្លាប់បានមើលកម្មវិធីទូរទស្សន៍មួយ ក្នុងនោះមានប្រធានាធិបតី Donald Trump បាននិយាយអំពីអត្ថប្រយោជន៍នានារបស់ថ្នាំ chloroquineនេះ។

ពិភពលោកទាំងមូល បច្ចុប្បន្នមានប្រទេស និងដែនដីចំនួន210ហើយ ដែលមានវត្តមានរបស់COVID-19។ វីរុសនេះ បានបណ្ដាលឱ្យមនុស្ស 2,725,920នាក់កើតរោគ ក្នុងនោះមាន191,061នាក់បានស្លាប់។ ចំណែកនៅសហរដ្ឋអាមេរិកវិញ មានអ្នកជំងឺសរុប 886,709នាក់ ក្នុងនោះមានអ្នកស្លាប់ 50,243នាក់ ខណៈអ្នកដែលបានជាសះស្បើយ មានចំនួន 85,922នាក់៕

ប្រភព៖ សារព័ត៌មានបរទេស

April 24, 2020

អូស្ត្រាលីរកឃើញថ្នាំកាត់បន្ថយ “ការបង្កើតកូនចៅ” របស់ COVID-19

អូស្ត្រាលី៖ ក្រុមអ្នកវិទ្យាសាស្ត្រនៅសាកលវិទ្យាល័យ Monash បានរកឃើញថា ថ្នាំប្រឆាំងប៉ារ៉ាស៊ីតឈ្មោះ Ivermectin មានប្រសិទ្ធភាពខ្ពស់ក្នុងការកាត់បន្ថយ “ការបង្កើតកូនចៅ” របស់វីរុសCOVID-19 នៅពេលពួកគេធ្វើការនៅក្នុងបន្ទប់ពិសោធន៍។

“Ivermectin ត្រូវបានប្រើប្រាស់យ៉ាងទូលំទូលាយ និងជាឱសថសុវត្ថិភាព។ ពេលនេះ យើងត្រូវការស្វែងយល់អំពីកម្រិតសុវត្ថិភាពដែលមនុស្សអាចប្រើប្រាស់បាន ហើយថាតើវាអាចមានប្រសិទ្ធភាពដែរ ឬអត់ ពេលប្រើនៅលើមនុស្ស។ នោះគឺជាជំហានបន្ទាប់” វេជ្ជបណ្ឌិត Kylie Wagstaff នៅសាកលវិទ្យាល័យ Monash ដែលជាប្រធានក្រុមអ្នកស្រាវជ្រាវខាងលើ បានឱ្យដឹងបែបនេះ។ លទ្ធផលនៃការសិក្សាស្រាវជ្រាវខាងលើនេះ ត្រូវបានចេញផ្សាយនៅលើទស្សាវដ្ដី Antiviral Research កាលពីថ្ងៃទី3មេសាកន្លងទៅ។

(ថ្នាំ Ivermectin ដែលគេប្រើសម្រាប់ព្យាបាលកមរមាស់ និងជំងឺមួយចំនួនទៀតដែលកើតឡើងដោយប៉ារ៉ាស៊ីត)។

ថ្នាំ Ivermectin កាត់បន្ថយម៉ូលេគុល ARN (RNA គឺ អាស៊ីត nucleic តែមួយដែលជាប់គ្នាដែលផ្សំឡើងពីនុយក្លូទ័រ។ RNA ដើរតួយ៉ាងសំខាន់ក្នុងការសំយោគប្រូតេអ៉ុននៅពេលដែលវាត្រូវបានបញ្ចូលក្នុងការ ចម្លង សំយោគនិង បកប្រែក្រមហ្សែន ដើម្បីផលិតប្រូតេអ៊ីន។ RNA តំណាងឱ្យអាស៊ីត ribonucleic) របស់វីរុសCOVID-19 នៅលើកោសិកាដែលបានបណ្ដុះ ដល់ទៅ93%ក្រោយប្រើថ្នាំនេះរយៈពេល24ម៉ោង និង99% ក្រោយរយៈពេល48ម៉ោង ពោលគឺថ្នាំនេះធ្វើឱ្យ ARN របស់វីរុស ត្រូវថយចុះប្រហែល5,000ដង។ “យើងបានរកឃើញថា គ្រាន់តែប្រើថ្នាំនេះមួយដង ក៏អាចកម្ចាត់ ARN របស់វីរុសស្ទើរតែទាំងអស់ដោយប្រើពេលត្រឹមតែ48ម៉ោង ហើយបើ24ម៉ោង វាក៏អាចកាត់បន្ថយបានច្រើនផងដែរ” Wagstaff ថ្លែងបែបនេះ។ ក្រុមអ្នកវិទ្យាសាស្ត្រមិនទាន់បានដឹងច្បាស់អំពីយន្តការនៃការកម្ចាត់វីរុសរបស់ថ្នាំនេះនៅឡើយ។ អ្នកស្រី Wagstaff យល់ថា ថ្នាំនេះអាចមានលទ្ធភាពទប់ស្កាត់មិនឱ្យវីរុសរារាំងកោសិកាមនុស្សកម្ចាត់ពួកវា។

(ARN គឺ អាស៊ីត nucleic តែមួយដែលជាប់គ្នាដែលផ្សំឡើងពីនុយក្លូទ័រ។ RNA ដើរតួយ៉ាងសំខាន់ក្នុងការសំយោគប្រូតេអ៉ុននៅពេលដែលវាត្រូវបានបញ្ចូលក្នុងការ ចម្លង សំយោគនិង បកប្រែក្រមហ្សែន ដើម្បីផលិតប្រូតេអ៊ីន។ RNA តំណាងឱ្យអាស៊ីត ribonucleic)។

ថ្នាំ Ivermectin ត្រូវបានប្រើប្រាស់ចាប់ពីទសវត្សរ៍ឆ្នាំ1980 ដើម្បីព្យាបាលជំងឺកមរមាស់ និងចៃ និងជំងឺមួយចំនួនទៀតដែលកើតឡើងដោយប៉ារ៉ាស៊ីត (ប៉ារ៉ាស៊ីតគឺជាពពួកមីក្រុបដែលរស់នៅដោយសារសរីរាង្គដទៃ)។ គ្រូពេទ្យក៏ប្រើថ្នាំនេះដើម្បីព្យាបាល rosacea ជាជំងឺដែលធ្វើឱ្យស្បែកមុខឡើងក្រហមផងដែរ៕

ប្រភព៖ Newsweek

April 5, 2020

ប្លាស្មាឈាមរបស់អ្នកជាពីជំងឺកូរ៉ូណា អាចកម្ចាត់មេរោគ Covid-19!

ប្រទេសចិន៖ ក្រុមអ្នកវិទ្យាសាស្ត្របានរកឃើញបរិមាណដ៏ច្រើននៃអង្គបដិប្រាណនៅក្នុងប្លាស្មាឈាមរបស់អ្នកជំងឺដែលមានជាសះស្បើយពីជំងឺកូរ៉ូណា Covid-19។

“លទ្ធផលដំបូងនានា បានបង្ហាញអំពីប្រសិទ្ធភាពនៃវិធីសាស្ត្របញ្ជូនប្លាស្មាឈាម ក្នុងការព្យាបាលអ្នកជំងឺកូរ៉ូណា Covid-19” នេះបើតាមលោក Zhang Dignyu ប្រធានមន្ទីរពេទ្យ Jinyintan នៅទីក្រុងអ៊ូហាន។ លោកបានអំពាវនាវដល់អ្នកដែលបានជាសះស្បើយពីជំងឺកូរ៉ូណា មកផ្ដល់ឈាម ដើម្បីជួយដល់អ្នកជំងឺដទៃ។

ក្រុមហ៊ុនបច្ចេកវិទ្យាជីវសាស្ត្រជាតិរបស់ចិន (CNBG) បានឱ្យដឹងថា ពួកគេបានត្រៀមដោយជោគជ័យនូវបណ្ដាផលិតផលប្លាស្មាឈាមការពារការឆ្លងរោគពិសេស ហើយនឹងប្រើប្រាស់វាក្នុងការព្យាបាលអ្នកជំងឺដែលកំពុងស្ថិតក្នុងស្ថានភាពធ្ងន់ធ្ងរ។ នេះបើតាមសារព័ត៌មាន Xinhua។

បណ្ដាផលិតផលនេះ សុទ្ធតែបានច្នៃចេញពីប្លាស្មាឈាម ដែលបានមកពីការបរិច្ចាគពីក្រុមអ្នកជំងឺដែលបានជាសះស្បើយពីជំងឺកូរ៉ូណា និងបានត្រៀមទុកក្រោយពីបានកម្ចាត់វីរុសរួចរាល់ និងការធ្វើតេស្តជាច្រើនទៀត។ នេះបើតាមការឱ្យដឹងពី CNBG។ អ្នកជំងឺជាង 10នាក់ បានយល់ព្រមទទួលការព្យាបាលដោយប្រើវិធីថ្មីជាមួយនឹងប្លាស្មាឈាមចម្ចាត់មេរោគពិសេសនេះ ហើយឃើញថា ស្ថានភាពជំងឺរបស់ពួកគេ បានប្រសើរឡើងគួរឱ្យកត់សម្គាល់ បន្ទាប់ពីបានព្យាបាលរយៈពេល 12-24ម៉ោង។

CNBG បានឱ្យដឹងដែរថា ភាគច្រើននៃអ្នកជំងឺដែលត្រូវបានព្យាបាលជាសះស្បើយ អាចបញ្ចេញអង់ទីគ័រដែលមានសមត្ថភាពកម្ចាត់វីរុស។ បច្ចុប្បន្ន នៅពេលដែលពិភពលោក មិនទាន់មានវ៉ាក់សាំង និងថ្នាំព្យាបាលពិសេស វិធីព្យាបាលដោយប្រើប្លាស្មាឈាមនេះ អាចជួយកាត់បន្ថយការស្លាប់បានមួយកម្រិត។

ឈាមជាសារធាតុរាវយ៉ាងសំខាន់សម្រាប់រាងកាយរបស់មនុស្សម្នាក់ៗ រួមមានសមាសធាតុផ្សំ4សំខាន់ៗគឺ ប្លាស្មា កោសិកាឈាមក្រហម កោសិកាឈាមស និងផ្លាកែត ដែលមានតួនាទី ដឹកនាំអុកស៊ីសែន និងសារធាតុចិញ្ចឹម បង្កើតឲ្យមានកំណកឈាម ដឹកនាំកាកសំណល់ទៅតម្រងនោម និងថ្លើម គ្រប់គ្រងសីតុណ្ហភាពក្នុងរាងកាយទៀតផង៕

ប្រភព៖ សារព័ត៌មានបរទេស

February 14, 2020

ដំណឹងល្អមួយទៀត! ក្រុមហ៊ុនចិនផលិតថ្នាំរំងាប់មេរោគ សម្រាប់ព្យាបាលជំងឺកូរ៉ូណា Covid-19

ប្រទេសចិន៖ ក្រុមហ៊ុនផលិតឱសថមួយរបស់ចិន បានចាប់ផ្ដើមផលិតថ្នាំ Remdesivir ទៅតាមបច្ចេកវិទ្យារបស់សហរដ្ឋអាមេរិក ហើយគេរំពឹងថា នឹងមានប្រសិទ្ធភាពអាចទប់ស្កាត់មេរោគកូរ៉ូណា Covid-19។

នៅក្នុងរបាយការណ៍មួយផ្ញើទៅកាន់ផ្សារហ៊ុនសៀងហៃ កាលពីយប់ថ្ងៃទី 11កុម្ភៈ ក្រុមហ៊ុនបច្ចេកវិទ្យាជីវវេជ្ជសាស្ត្រ BrightGene មានទីតាំងនៅក្នុងទីក្រុង Suzhou នៃខេត្ត Jiangsu ប្រទេសចិន បានឱ្យដឹងថា ខ្លួនបានអភិវឌ្ឍបច្ចេកវិទ្យាសំយោគសារធាតុថ្នាំរបស់ Remdesivir។ នេះគឺជាថ្នាំរំងាប់មេរោគមួយប្រភេទដែលត្រូវបានផលិតឡើងដោយក្រុមហ៊ុន Gilead នៃសហរដ្ឋអាមេរិក។

ព័ត៌មានរបស់ក្រុមហ៊ុន BrightGene ត្រូវបានគេបញ្ចេញឱ្យដឹង អំឡុងមួយសប្ដាហ៍ប៉ុណ្ណោះ ក្រោយពីអាជ្ញាធរចិន បានយល់ព្រមសាកល្បងប្រើថ្នាំ Remdesivir ។

ថ្នាំ Remdesivir ត្រូវបានគេចាត់ទុកថាជា “បេក្ខភាព” លំដាប់កំពូល ក្នុងយុទ្ធនាការប្រឆាំងនឹងមេរោគកូរ៉ូណា Covid-19។ បច្ចុប្បន្ន Remdesivir មិនទាន់ត្រូវបានអនុញ្ញាតឱ្យផលិត ឬដាក់លក់នៅទីផ្សារណាមួយក្នុងពិភពលោកនៅឡើយ។ ក្រុមហ៊ុន BrightGene បានឱ្យដឹងថា ពួកគេមានគម្រោងសុំច្បាប់ពីក្រុមហ៊ុន Gilead ប៉ុន្តែ បានសម្រេចចិត្តងាកទៅផលិត Remdesivir ដោយសារតែការសិក្សាស្រាវជ្រាវផលិតថ្នាំថ្មី ទើបតែស្ថិតក្នុងដំណាក់កាលដំបូង។

មេធាវី Wang Yanyu មកពីការិយាល័យមេធាវី AllBright ដែលមានទីស្នាក់ការនៅទីក្រុង ប៉េកាំង បាននិយាយថា ៖ “និយាយរួម ការផលិតនេះគឺរំលោភទៅលើច្បាប់កម្មសិទ្ធិបញ្ញា ប៉ុន្តែ វានឹងជាករណីលើកលែង បើសិនជាការផលិតនោះ មិនមែនដើម្បីដាក់លក់ក្នុងទីផ្សារ”។

ផលិតផលនេះរបស់ក្រុមហ៊ុន Gilead ត្រូវបានចាត់ទុកថាមានសក្ដានុពល ព្រោះវាបាននាំមកនូវលទ្ធផលល្អ នៅពេលប្រើប្រាស់វាក្នុងការព្យាបាលអ្នកជំងឺកូរ៉ូណា នៅសហរដ្ឋអាមេរិក។ ក្រុមគ្រូពេទ្យនៅប្រទេសចិន កំពុងសាកល្បងថ្នាំនេះ នៅលើអ្នកជំងឺ 761 នៅទីក្រុង Wuhan។

លោក Wang Chen (ស្ដាំបង្អស់) ជាអនុប្រធានបណ្ឌិតសភាវិស្វកម្មចិន និងជាប្រធានបណ្ឌិតសភាវិទ្យាសាស្ត្រវេជ្ជសាស្ត្រចិន ថ្លែងនៅក្នុងសន្និសីទមួយនៅទីក្រុងវូហាន ខេត្តហ៊ូប៉ី ប្រទេសចិន កាលពីថ្ងៃទី5 ខែកុម្ភៈ ឆ្នាំ2020។

ក្រុមហ៊ុន BrightGene បានឱ្យដឹងថា ពួកគេត្រូវសុំច្បាប់ពីក្រុមហ៊ុន Gilead ក្រោយមកទើបធ្វើការពិសោធ និងត្រូវមានការអនុញ្ញាត មុនពេលដាក់លក់ថ្នាំនេះក្នុងទីផ្សារ។ ថ្នាំ Remdesivir ដែលចិនកំពុងផលិត នឹងមិនមានប្រយោជន៍ បើសិនមិនមានលទ្ធផលល្អក្នុងការពិសោធដែលកំពុងត្រូវបានធ្វើឡើង ឬក៏ថ្នាំនេះផលិតឡើងក្រោយអាសន្នរោគត្រូវបានគ្រប់គ្រង។ នេះបើយោងតាមសារព័ត៌មាន Bloomberg។

ភាគីខាងក្រុមហ៊ុន Gilead មិនទាន់បានបញ្ចេញមតិអ្វីទាក់ទិននឹងការប្រកាសរបស់ក្រុមហ៊ុន BrightGene ប៉ុន្តែ ពួកគេបានឱ្យដឹងថា កំពុងតែផ្ដោតទៅលើការសិក្សាស្រាវជ្រាវលើថ្នាំនេះ។ ក្រុមហ៊ុន Gilead កំពុងធ្វើការជាមួយអាជ្ញាធរចិន អាមេរិក និងអង្គការសុខភាពពិភពលោក ដើម្បីឱ្យប្រាកដថា ថ្នាំនេះ អាចត្រូវបានអនុញ្ញាតឱ្យប្រើប្រាស់ក្នុងការព្យាបាលជំងឺកូរ៉ូណា Covid-19 ដែរ ឬអត់៕

ប្រភព៖ សារព័ត៌មានបរទេស

February 13, 2020

ប្រទេសចិនកំពុងពិសោធវ៉ាក់សាំងថ្មី ប្រឆាំងវីរុសកូរ៉ូណា nCoV

សកលវិទ្យាល័យថុងជី (Tongji University) និងក្រុមហ៊ុនមួយនៅសៀងហៃ កំពុងធ្វើការពិសោធវ៉ាក់សាំងប្រភេទ m-RNA សម្រាប់ទប់ស្កាត់វីរុសកូរ៉ូណា nCoV នៅលើសត្វកណ្ដុរតូចៗចំនួនជាង100ក្បាល។

ការពិសោធនៅលើសត្វគឺជាជំហានមួយដែលត្រូវធ្វើជាចាំបាច់ បើទោះវាជាវ៉ាក់សាំងប្រភេទណាក៏ដោយ នៅមុនការប្រើប្រាស់សម្រាប់មនុស្ស។ ក្រុមអ្នកវិទ្យាសាស្ត្រនៅសកលវិទ្យាល័យថុងជី នៃក្រុងសៀងហៃ កំពុងប្រើប្រាស់សត្វកណ្ដុរមាំមួនដើម្បីធ្វើការពិសោធវ៉ាក់សាំងថ្មីបំផុត សម្រាប់ប្រឆាំងនឹងវីរុសកូរ៉ូណាប្រភេទថ្មី nCoV។

លោក Liu Zhongmin ប្រធានមន្ទីរពេទ្យ Shanghai East Hospital នៃសកលវិទ្យាល័យថុងជី បានឱ្យដឹងថា ការពិសោធនៅលើសត្វកណ្ដុរ គឺដើម្បីជ្រើសរើសប្រភេទវ៉ាក់សាំងដែលសមស្រប។ បន្ទាប់ពីក្រុមអ្នកវិទ្យាសាស្ត្រពិនិត្យឃើញថា អង្គបដិប្រាណមានប្រសិទ្ធភាពក្នុងការប្រឆាំងវីរុស វ៉ាក់សាំងដែលមានសក្ដានុពលនោះនឹងត្រូវឆ្លងកាត់ការពិសោធនៅលើសត្វដែលមានរូបរាងធំជាងកណ្ដុរ ដូចជាសត្វស្វាជាដើម។ តំណាក់កាលនេះ នឹងអនុញ្ញាតឱ្យអ្នកវិទ្យាសាស្ត្រវាយតម្លៃទៅលើកម្រិតសុវត្ថិភាពរបស់វ៉ាក់សាំង មុនពេលធ្វើការពិសោធនៅលើមនុស្ស។

លោក Liu Zhongmin បន្តថា ក្រុមអ្នកវិទ្យាសាស្ត្រត្រូវការសត្វកណ្ដុរសរុបជាង 100ក្បាល ដើម្បីយកមកពិសោធ កាលពីថ្ងៃទី 9កុម្ភៈកន្លងទៅ។ ដើម្បីឱ្យមានសុក្រឹតភាព ការពិសោធនៅលើសត្វជាមួយនឹងវ៉ាក់សាំងនេះ ក៏ត្រូវបានធ្វើឡើងទន្ទឹមគ្នា នៅឯមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ចិន និងនាយកដ្ឋានគ្រប់គ្រងអាហារ និងឱសថជាតិនៃក្រុងប៉េកាំងផងដែរ។ បើតាមលោក Liu វ៉ាក់សាំងដែលយោងទៅលើ m-RNA គឺជាបច្ចេកវិទ្យាមួយក្នុងចំណោមបច្ចេកវិទ្យាផលិតវ៉ាក់ដ៏ទំនើបបំផុតនាបច្ចុប្បន្ន ដែលអាចជួយកាត់បន្ថយពេលវេលានៃការត្រៀមផលិត និងមានប្រសិទ្ធភាពខ្ពស់។

វ៉ាក់សាំងប្រភេទនេះ ត្រូវបានអភិវឌ្ឍឡើងក្នុងកម្មវិធីសហការ រវាង CDC ចិន រួមជាមួយសកលវិទ្យាល័យ Dongji University និងក្រុមហ៊ុនផលិតវ៉ាក់សាំងមួយនៅសៀងហៃ។ ក្រោយពីបានទទួលយកអង់ទីករ ពី CDC របស់ប្រទេសចិន កាលពីចុងខែមករា បណ្ឌិត Li Hangwen អគ្គនាយកប្រតិបត្តិនៃក្រុមហ៊ុន Stemirna Therapeutics LLC និងក្រុមការងារ ត្រូវចំណាយពេល2សប្ដាហ៍ដើម្បីផលិតវ៉ាក់សាំងគំរូ m-RNA ។ លោកបណ្ឌិតបានបន្តថា ពួកគេបានត្រៀមអង់ទីករចំនួនចាប់ពី9-12ប្រភេទផ្សេងគ្នា សម្រាប់វ៉ាក់សាំងគំរូដែលធ្វើការពិសោធនៅលើសត្វ។

បណ្ឌិត Li បានសង្កត់ធ្ងន់ថា ជាធម្មតា វ៉ាក់សាំងត្រូវឆ្លងកាត់ការពិសោធសាកល្បងចំនួន3តំណាក់កាល។ ពេលវេលានៃការពិសោធនេះ អាចមានរយៈពេលច្រើនខែ រហូតដល់ច្រើនឆ្នាំ អាស្រ័យទៅលើប្រភេទជំងឺ។ បើសិនការពិសោធនៅលើសត្វ ប្រព្រឹត្តទៅដោយរលូន ពួកគេនឹងចាប់ផ្ដើមពិសោធស៊ីជម្រៅជាងនេះ នៅដើមខែមេសាខាងមុខ។

ការស្វែងរកវ៉ាក់សាំងទប់ស្កាត់វីរុសកូរ៉ូណា nCoV កំពុងត្រូវបានពិភពលោក យកចិត្តទុកដាក់ខ្លាំង។ មកដល់ពេលនេះ មានក្រុមហ៊ុន និងស្ថាប័នរាប់សិប នៅទូទាំងពិភពលោក កំពុងវិនិយោគក្នុងទំហំទឹកប្រាក់ដ៏ច្រើនសន្ធឹក ដើម្បីបង្កើតវ៉ាក់សាំងសម្រាប់ទប់ស្កាត់មេរោគកូរ៉ូណាប្រភេទថ្មីដែលគេហៅថា 2019-nCoV។

គិតមកដល់ថ្ងៃនេះ (2កុម្ភៈ 2020) មេរោគបង្ករលាកសួតថ្មីនេះ បានសម្លាប់មនុស្ស 910នាក់ នៅទូទាំងពិភពលោក។ ដោយឡែកថ្ងៃនេះ មានមនុស្សចំនួន 97នាក់បានស្លាប់ដោយសារវីរុសកូរ៉ូណា គឺកើន11,9% បើធៀបនឹងថ្ងៃទី1កុម្ភៈ៕

ប្រភព៖ សារព័ត៌មានបរទេស

February 10, 2020

ពលរដ្ឋចិននាំគ្នារកទិញថ្នាំអេដស៍ ដើម្បីទុកទប់ទល់វីរុសកូរ៉ូណា! អ្នកឆ្លៀតឱកាសរកលុយ និងសប្បុរសជនក៏បង្ហាញខ្លួន

ដោយសារតែមិនទាន់មានវិធីសាស្ត្រ ឬថ្នាំព្យាបាលពិសេស ពលរដ្ឋជាច្រើននៅប្រទេសចិន បាននាំគ្នាស្វែងរកទិញថ្នាំព្យាបាលជំងឺអេដស៍មកជំនួសបណ្ដោះអាសន្ន ដោយសង្ឃឹមថាពួកគេអាចឆ្លងផុតគ្រាលំបាក និងនៅមានជីវិតក្រោយការរាតត្បាតនៃអាសន្នរោគកូរ៉ូណានេះ។

បច្ចុប្បន្ន ក្នុងពិភពលោក មិនទាន់មានថ្នាំពិសេស និងមានប្រសិទ្ធភាពខ្ពស់សម្រាប់ព្យាបាលអ្នកជំងឺកូរ៉ូណានៅឡើយ បណ្ដាលឱ្យវីរុសនេះ សម្លាប់មនុស្សដល់ទៅ 724នាក់ គិតមកត្រឹមថ្ងៃទី8កុម្ភៈ ឆ្នាំ2020។ បើទោះបីជាមិនទាន់មានភ័ស្ដុតាងបង្ហាញពីលទ្ធផលនៃការពិសោធន៍ស៊ីជម្រៅក៏ដោយ ប៉ុន្តែ គណៈកម្មការសុខាភិបាលកណ្ដាលរបស់ចិន បានឱ្យដឹងថា ថ្នាំ lopinavir/ritonavir ដែលគេប្រើសម្រាប់ព្យាបាលជំងឺអេដស៍ ក៏អាចប្រើប្រាស់ដើម្បីព្យាបាលអ្នកមានផ្ទុកមេរោគកូរ៉ូណាផងដែរ ថ្វីបើមិនទាន់បានបកស្រាយអំពីយន្តការព្យាបាលនៃថ្នាំនេះ។

គ្រូពេទ្យចិនប្រើថ្នាំព្យាបាលអេដស៍ ដើម្បីព្យាបាលជំងឺរលាកសួតថ្មីកូរ៉ូណា

អ្នកវិទ្យាសាស្ត្រក៏កំពុងដុតដៃដុតជើងក្នុងការរកវិធីបង្កើតថ្នាំប្រឆាំងមេរោគកូរ៉ូណានេះដែរ

ប្រការខាងលើនេះ បានធ្វើឱ្យមានការភ្ញាក់ផ្អើលខ្លាំង ពិសេសគឺចំពោះថ្នាំ Kaletra ឬហៅថា Aluvia។ នេះគឺជាថ្នាំ lopinavir/ritonavir ដែលត្រូវបានដាក់់លក់ក្រោមឈ្មោះ Kaletra និងជាថ្នាំប្រឆាំងមេរោគអេដស៍តែមួយប្រភេទគត់ដែលត្រូវបានដាក់លក់នៅប្រទេសចិន។

Devy អាយុ38ឆ្នាំ មកពីខេត្ត Shandong បានឱ្យដឹងថា គាត់គឺជាមនុស្សម្នាក់ក្នុងចំណោមរាប់រយនាក់ដែលបានព្យាយាមស្វែងរកជួបអ្នកមានផ្ទុកមេរោគអេដស៍ ដើម្បីសុំថ្នាំនេះ។

បើទោះបីជាថ្មីៗនេះ Devy មិនធ្លាប់បានទៅកាន់ខេត្ត Hubei ឬ ក្រុង Wuhan ដែលជាសម្បុកមេរោគកូរ៉ូណាក៏ដោយ ប៉ុន្តែគាត់នៅតែព្រួយបារម្ភខ្លាចឆ្លងជំងឺនេះ ព្រោះថា គាត់មានអាការក្ដៅខ្លួន និងរកកលក្អួត។ ក្នុងពេលមានអារម្មណ៍អស់សង្ឃឹម គាត់ក៏បានស្គាល់បុរសម្នាក់ដែលមានផ្ទុកមេរោគអេដស៍។ បុរសម្នាក់នេះ មានរហ័សនាមថា Brother Squirrel ហើយគាត់កំពុងផ្ដត់ថ្នាំ Kaletra ដោយមិនគិតថ្លៃចំពោះអ្នកណាដែលកំពុងសង្ស័យថា ខ្លួនឯងមានផ្ទុកមេរោគកូរ៉ូណា។ Devy បានទៅជួប Brother Squirrel ហើយទទួលបានថ្នាំនេះចំនួន 30គ្រាប់។

ថ្នាំវ៉ាក់សាំងទប់ស្កាត់មេរោគកូរ៉ូណា nCoV នឹងត្រូវបានពិសោធនៅដើមសប្ដាហ៍ក្រោយ

ឱសថបុរាណចិនក៏ត្រូវបានគេយកមកប្រើសម្រាប់ព្យាបាលជំងឺកូរ៉ូណា

សូម្បីតែក្រោយពេលគាត់ត្រូវគ្រូពេទ្យពិនិត្យឃើញថា មិនមានផ្ទុកមេរោគកូរ៉ូណាប្រភេទ nCoV ក៏ដោយ ប៉ុន្តែ Devy នៅតែជឿថា ការស្វែងរកថ្នាំអេដស៍ គឺជាជម្រើសត្រឹមត្រូវ។

“អ្នកមានរក្សាខ្សត់”

នៅលើទំព័រសារព័ត៌មាន Reuters លោក Brother Squirrel (ឈ្មោះពិត Andy Li) បានឱ្យដឹងថា បន្ទាប់ពីបានឮថា មន្ត្រីសុខាភិបាលចិន ណែនាំឱ្យប្រើថ្នាំសម្រាប់អ្នកជំងឺអេដស៍ ដើម្បីព្យាបាលជំងឺកូរ៉ូណា លោក និងអ្នកជំងឺអេដស៍ជាច្រើននាក់ ក៏បាននាំគ្នាចែករំលែក និងប្រមូលបានថ្នាំអេដស៍ Kaletra ប្រហែល 5,400គ្រាប់ ក្នុងរយៈពេលមិនដល់1សប្ដាហ៍។ ក្រោយមក ពួកគេបានបង្ហោះសារនៅលើបណ្ដាញសង្គម Weibo ដើម្បីស្វែងរកអ្នកត្រូវការថ្នាំនេះ។

Andy យល់ថា ក្រុមរបស់គាត់ដូចជា “កំពុងអនុវត្តភារកិច្ចយោធា” ដូច្នោះដែរ។ ក្នុងរយៈពេល3ថ្ងៃដំបូងបន្ទាប់ពីបង្ហោះសារ លោក Andy បានទទួលសាររាប់រយ ធ្វើឱ្យគាត់រវល់រកតែពេលហូបបាយមិនចង់បាន ព្រោះមមាញឹកនឹងការរៀបចំថ្នាំធ្វើទៅឱ្យអ្នកដែលកំពុងត្រូវការ។

Andy បន្ថែមថា ៖ “មានមនុស្សច្រើនណាស់ដែលកំពុងត្រូវការថ្នាំនេះ ហើយខ្ញុំក៏មិនចង់ខ្ជះខ្ជាយពេលវេលា ព្រោះពេលវេលានៅពេលនេះ គឺជាអាយុជីវិត”។

ឱកាសចំណេញពីថ្នាំអេដស៍

ទន្ទឺមនិងសប្បុរជនដូច Andy ក៏មានមនុស្សជាច្រើនកំពុងរកបានផលចំណេញពីតម្រូវការថ្នាំអេដស៍នេះ។

មនុស្សជាង 34,893នាក់ ត្រូវបានគេបញ្ជាក់ថា បានឆ្លងមេរោគកូរ៉ូណានៅប្រទេសចិន ដែលភាគច្រើនគឺជាអ្នកស្រុក Wuhan នៅខេត្ត Hubei។ ក៏ប៉ុន្តែ កង្វះខាតឧបករណ៍ពិសោធន៍ បានធ្វើឱ្យមនុស្សជាច្រើនសង្ស័យថា ជាក់ស្ដែងមានមនុស្សច្រើនជាងនេះកំពុងផ្ទុកមេរោគ តែមិនទាន់បានពិនិត្យ។

វ៉ាក់សាំងការពារមេរោគរលាកសួត Wuhan នឹងមានក្នុងអំឡុង3ខែទៀត

Gatsby Fang ដែលជាអ្នកនាំទំនិញឆ្លងដែននៅប្រទេសចិន បានប្រាប់ថា គាត់បានបញ្ជាទិញថ្នាំអេដស៍ Kaletra ពីប្រទេសឥណ្ឌាកាលពីថ្ងៃទី 23មករា បន្ទាប់ពីមានដំណឹងថា ប្រភេទថ្នាំនេះអាចជួយទប់ទល់មេរោគកូរ៉ូណាបាន។

Gatsby បង្ហើបឱ្យដឹងថា ថ្នាំមួយដបដែលមាន60គ្រាប់ គាត់លក់ក្នុងតម្លៃ600យន់ (ប្រហែល85ដុល្លារអាមេរិក) គឺគាត់ចំណេញចាប់ពី 200-300យន់ (28-42ដុល្លារ) ក្នុងមួយដប។ ជាធម្មតា តម្លៃរបស់ថ្នាំនេះ ត្រឹមតែ100យន់ (14ដុល្លារ) ប៉ុណ្ណោះ តែពេលនេះ វាបានឡើងដល់ 300-400យន់ (42-57ដុល្លារ) ក្នុងមួយដប។ ក្រោយការនាំចូលទំនិញបាន2ថ្ងៃ Gatsby បានលក់ដាច់គ្មានសល់។ មានអតិថិជនខ្លះ បានបញ្ជាទិញដល់ទៅ 600ដបក្នុងពេលតែមួយ។

តាមការឱ្យដឹងពីអ្នកជំនួញឆ្លងដែនខាងលើ អតិថិជនរបស់គាត់មានច្រើនប្រភេទ ចាប់ពីអ្នកដែលមានផ្ទុកមេរោគកូរ៉ូណា គ្រូពេទ្យជួរមុខនៅខេត្ត Hubei រហូតដល់អ្នកដែលមិនមានផ្ទុកមេរោគនេះសោះ ក៏ទិញទុកការពារផងដែរ។ ក្រៅពីនេះ ក៏មានអ្នកខ្លះក្លែងធ្វើជាអ្នកជំងឺមកទិញថ្នាំអេដស៍ដើម្បីយកទៅលក់បន្ត រកចំណេញ។

យ៉ាងណាក៏ដោយ លោក Gatsby បានឱ្យដឹងថា អតិថិជនភាគច្រើនរបស់គាត់ គឺជាអ្នកដែលមិនទាន់ទទួលបានការព្យាបាល ឬមិនទាន់ដឹងច្បាស់ថាខ្លួនមានផ្ទុកមេរោគដ៏សាហាវនេះដែរឬអត់។

សូមបញ្ជាក់ថា ថ្វីបើមានការប្រើប្រាស់ថ្នាំអេដស៍ដើម្បីព្យាបាលអ្នកជំងឺកូរ៉ូណានៅប្រទេសចិន ប៉ុន្តែ អង្គការសុខភាពពិភពលោក WHO បានប្រកាសថា បច្ចុប្បន្ន គេមិនទាន់រកឃើញថ្នាំ ឬវិធីព្យាបាលពិសេសណាមួយសម្រាប់មេរោគនេះនៅឡើយ៕

ប្រភព៖ សារព័ត៌មានបរទេស

February 8, 2020

ចិនប្រើថ្នាំព្យាបាលអេដស៍ ព្យាបាលជំងឺរលាកសួតថ្មី Wuhan

គណៈកម្មាធិការសុខាភិបាលក្រុងប៉េកាំង បានឱ្យដឹងថា មន្ទីរពេទ្យចំនួន3 ផ្សេងគ្នា កំពុងប្រើថ្នាំព្យាបាលជំងឺអេដស៍ដើម្បីទប់ទល់ជំងឺរលាកសួតថ្មី nCoV (corona)។

ព័ត៌មានខាងលើនេះ ត្រូវបានគេចុះផ្សាយឱ្យដឹងនៅថ្ងៃទី26 ខែមករានេះ។ នេះគឺជាផ្នែកមួយនៃកិច្ចខិតខំរបស់ក្រុមមន្ត្រីសុខាភិបាលចិនក្នុងយុទ្ធនាការប្រយុទ្ធប្រឆាំងនឹងអាសន្នរោគ nCoV (ជាមេរោគបង្កឱ្យរលាកសួតថ្មី corona)។

វេជ្ជបណ្ឌិតកំពុងព្យាបាលអ្នកជំងឺរលាកសួតថ្មីដែលបង្កឡើងដោយមេរោគ nCoV

យោងតាមសេចក្ដីប្រកាសរបស់គណៈកម្មាធិការវេជ្ជសាស្ត្រក្រុងប៉េកាំង ប្រភេទថ្នាំដែលកំពុងប្រើប្រាស់មានឈ្មោះថា Lopinavir និង Ritonavir នេះ ត្រូវបានគេពិសោធឃើញថា មានប្រសិទ្ធភាពក្នុងការព្យាបាលប្រឆាំងនឹងមេរោគដ៏មហាប្រល័យ corona នេះ។

មន្ទីរពេទ្យទាំង3 ដែលទទួលបញ្ជាឱ្យពិសោធថ្នាំអេដស៍ទៅលើអ្នកជំងឺរលាកសួតថ្មីនេះ រួមមាន មន្ទីរពេទ្យ Beijing Ditan មន្ទីរពេទ្យ Beijing You’an និងមជ្ឈមណ្ឌលវេជ្ជសាស្ត្រលេខ5 នៃមន្ទីរពេទ្យពហុព្យាបាលយោធានៃប្រទេសចិន។

ប្រភពព័ត៌មានបានឱ្យដឹងថា លទ្ធផលនៃការប្រើប្រាស់ថ្នាំ Lopinavir រួមជាមួយនឹងថ្នាំ Ritonavir មកទល់នឹងពេលនេះ គឺមានប្រសិទ្ធភាពច្រើន។

សូមរំឭកថា កាលពីថ្ងៃទី25 មករា(ម្សិលមិញ) លោកវេជ្ជបណ្ឌិត Liang Wudong អាយុ 62ឆ្នាំ ដែលជាអ្នកព្យាបាលអ្នកជំងឺរលាកសួត wuhan បានស្លាប់បាត់បង់ជីវិត(ដោយសារឆ្លងមេរោគដ៏សាហាវនេះ)។ ទីភ្នាក់ងារសារព័ត៌មានចិននានា បានចេញផ្សាយថា លោក Liang Wudong គឺជាវេជ្ជបណ្ឌិតសំខាន់ជាងគេ ដែលចំណាយពេលច្រើននៅក្បែរ និងព្យាបាលអ្នកជំងឺរលាកសួតដោយមេរោគ nCoV នៅមន្ទីរពេទ្យ Hubei Xinhua ចាប់តាំងពីអាសន្នរោគនេះបានផ្ទុះឡើង៕

ប្រភព៖ សារព័ត៌មានបរទេស

January 26, 2020

ញ៉ាំថ្នាំយ៉ាងណាឱ្យត្រឹមត្រូវ និងមានសុវត្ថិភាព?

ការប្រើថ្នាំឱ្យត្រូវនឹងរោគដែលលោកអ្នកកំពុងឈឺថ្កាត់នោះគឺជារឿងត្រឹមត្រូវ តែរឿងសំខាន់បំផុតគឺ “ការប្រើថ្នាំឱ្យត្រូវវិធី” ដោយសារថ្នាំដែលវេជ្ជបណ្ឌិតបញ្ជាឱ្យប្រើនោះ មានទាំងថ្នាំមុនញ៉ាំបាយ ក្រោយញ៉ាំបាយ និងមានចំណុចហាមឃាត់ផ្សេងទៀតក្នុងការញ៉ាំថ្នាំប្រភេទខ្លះ ហើយត្រូវញ៉ាំថ្នាំយ៉ាងណាឱ្យត្រឹមត្រូវតាមស្លាកបង្ហាញ។ ថ្ងៃនេះ ឡារ៉ែន មានចម្លើយមកជម្រាបជូន…។

វិធីការប្រើថ្នាំតាមស្លាកណែនាំឱ្យបានត្រឹមត្រូវ សម្រាប់ថ្នាំញ៉ាំមុនពេលបាយ
នៅពេលឃើញពាក្យថា “ថ្នាំញ៉ាំមុនពេលបាយ” នៅលើស្លាកណែនាំ មនុស្សជាច្រើនអាចយល់ថា ចាំនៅសល់4-5នាទី មុនក្រោកទៅញ៉ាំបាយ សឹមយកថ្នាំនោះមកលេបក៏បាន តែនេះគឺជាការយល់ខុសហើយ ព្រោះថ្នាំញ៉ាំមុនពេលបាយ ការពិតទៅគឺជាថ្នាំដែលលោកអ្នកត្រូវញ៉ាំមុនពេលបាយប្រមាណជា30-60នាទី និងគួរញ៉ាំខណៈដែលពោះទំនេរ(មិនមានអាហារនៅក្នុងពោះ)។

ថ្នាំញ៉ាំក្រោយពេលបាយ
ក្រោយពេលញ៉ាំបាយរួច លោកអ្នកមិនទាន់ចាំបាច់ត្រូវយកកញ្ចប់ថ្នាំមកបើកដើម្បីលេបនោះទេ ចូរអង្គុយលេងឱ្យបាយធ្លាក់ចូលក្នុងក្រពះឱ្យរួចរាល់ប្រមាណជា15-30នាទីសិន សឹមក្រោកទៅញ៉ាំថ្នាំតាមវេជ្ជបញ្ជាក៏បាន។

ថ្នាំញ៉ាំដំណាលពេលបាយ
បើសិនជាស្លាកណែនាំប្រាប់ថា “ថ្នាំញ៉ាំដំណាលពេលបាយ” នោះមានន័យថា បន្ទាប់ពីអ្នកញ៉ាំបាយមួយម៉ាត់ដំបូងហើយ អ្នកត្រូវញ៉ាំថ្នាំនោះចូលទៅភ្លាម ឬអ្នកអាចញ៉ាំថ្នាំនោះបន្ទាប់ពីញ៉ាំបាយអស់ពាក់កណ្ដាលហើយក៏បាន។

ថ្នាំសម្លាប់មេរោគ
ពេលឈឺថ្កាត់ មនុស្សជាច្រើនដើរទ្រេតទ្រោតទៅរកពេទ្យ ពេលបានថ្នាំមកទទួលទានឱ្យអាការធូរស្រាលហើយ ក៏មានអារម្មណ៍ថា អាការឈឺថ្កាត់របស់យើងបានជាសះស្បើយហើយ មិនចាំបាច់ត្រូវញ៉ាំថ្នាំទៀតទេ… នេះគឺជារឿងដែលខុស ព្រោះថ្នាំសម្លាប់មេរោគ ដូចជាថ្នាំព្យាបាលការរលាកក្លាយ ជាថ្នាំដែលអ្នកជំងឺត្រូវតែទទួលទានបន្តទៀតតាមវេជ្ជបញ្ជា ដើម្បីការពារការឌឺថ្នាំរបស់មេរោគ ព្រោះបើកើតមានអាការឌឺថ្នាំហើយ វានឹងហុចផលនៅលើកក្រោយៗទៀតដែលមិនអាចប្រើថ្នាំដដែល កម្រិតដដែលក្នុងការព្យាបាលបានទៀតទេ។

ថ្នាំញ៉ាំមុនពេលគេង
សម្រាប់ថ្នាំញ៉ាំមុនពេលចូលគេងវិញ បើលោកអ្នកដឹងខ្លួនថា កំពុងប្រុងបិទទូរទស្សន៍ បិទភ្លើងគេងហើយនោះ ក៏គួរតែក្រោកឡើងមកទទួលទានថ្នាំមុនពេលចូលគេងប្រមាណជា 15-30នាទី។

ថ្នាំដែលត្រូវញ៉ាំមួយសប្ដាហ៍ 1ដង
បើគ្រូពេទ្យ ឬឱសថការីមិនបានបញ្ជាក់ថ្ងៃទីឱ្យបានច្បាស់នោះ លោកអ្នកអាចជ្រើសរើសដោយខ្លួនឯងថា ត្រូវការញ៉ាំថ្នាំនោះនៅថ្ងៃណា ដូចជា ចាប់ផ្ដើមញ៉ាំថ្នាំនៅថ្ងៃពុធ ក៏សុំឱ្យញ៉ាំថ្នាំនោះរៀងរាល់ថ្ងៃពុធជាដើម។

ថ្នាំព្យាបាលតាមអាការ
ដូចជា ថ្នាំប៉ារ៉ាសេតាម៉ុល ដែលប្រើសម្រាប់បំបាត់អាការគ្រុនក្ដៅ និងអាការឈឺចុកចាប់ជាដើម ភាគច្រើនត្រូវបានកំណត់ទុកថា មនុស្សធំ បើមានអាការឈឺថ្កាត់ ចូរលេបម្ដង2គ្រាប់ រៀងរាល់ 4ម៉ោងម្ដង ដូច្នេះបើលេបថ្នាំហើយ កន្លងទៅប្រមាណជា2-3ម៉ោងនៅតែមានអា-ការឈឺថ្កាត់ដដែល ក៏យើងនៅមិនទាន់អាចលេបថ្នាំបន្ថែមទៀតបានដែរ ព្រោះបើលេបថែមទៀតភ្លាមៗ អាចធ្វើឱ្យមានបញ្ហាពុលថ្នាំដោយសារការលេបថ្នាំលើសកម្រិតបាន។

បើភ្លេចលេបថ្នាំ…
ជឿថា មនុស្សជាច្រើនប្រហែលជាធ្លាប់ភ្លេចលេបថ្នាំជាញឹកញាប់ លុះពេលនឹកឃើញ ក៏ប្រញាប់ស្ទុះទៅយកថ្នាំមកលេបភ្លាមតែម្ដង តែបើសិនអំឡុងពេលដែលអ្នកភ្លេចលេបថ្នាំនោះជិតដល់ពេលដែលត្រូវលេបម្ដងទៀតនោះ ក៏សុំឱ្យលេបរំលងពេលដែលភ្លេចនោះចោលទៅ កុំគិតប្រុងលេបថែមជំនួសពេលដែលភ្លេចដោយការបន្ថែមចំនួនថ្នាំជា 2ដងនៅពេលដែលនឹកឃើញនោះអី៕

January 24, 2019

វិធីងាយៗក្នុងការលេបថ្នាំគ្រាប់ ឱ្យកាន់តែងាយស្រួលឡើង

មនុស្សជាច្រើនមានបញ្ហាជាមួយការលេបថ្នាំគ្រាប់ មិនថាតែកូនក្មេង ឬមនុស្សធំពេញវ័យហើយនោះឡើយ អ្នកខ្លះដល់ថ្នាក់ក្អួតចេញមកវិញបន្ទាប់ពីខំព្យាយាមលេបគ្រាប់ថ្នាំឱ្យបានទៀតផង ហើយអ្នកខ្លះទៀតដល់ថ្នាក់ត្រូវយកថ្នាំគ្រាប់ទាំងនោះទៅដាក់ក្នុងទឹកឱ្យរលាយ ឬកិនជាម្សៅ និងជួនកាលថែមទាំងដកស្រោមកាប់ស៊ូលចេញយកតែម្សៅថ្នាំខាងក្នុងមកលាយជាមួយទឹកដើម្បីលេបក៏មាន។

វិធីលេបថ្នាំគ្រាប់យ៉ាងងាយៗ
ការសិក្សាស្រាវជ្រាវ ពីមហាវិទ្យាល័យ Heidelberg នៅក្នុងប្រទេសអាល្លឺម៉ង់ បានណែនាំបង្ហាញពីតិចនិកងាយៗក្នុងការជួយឱ្យយើងលេបថ្នាំគ្រាប់បានយ៉ាងងាយស្រួលដូចតទៅ ៖
1. ចាក់ទឹកចូលទៅក្នុងដបប្លាស្ទិក ឬដបទឹកភេសជ្ជៈ។
2. ដាក់គ្រាប់ថ្នាំនៅលើអណ្ដាត ឬអាចដាក់ទៅជិតគល់អណ្ដាតក៏បាន។
3. ប្រើបបូរមាត់ទាំងខាងលើ និងខាងក្រោមពាំមាត់ដបឱ្យជាប់ និងជិតកុំឱ្យទឹក ឬខ្យល់ហៀរចេញទៅក្រៅមាត់បាន។
4. លើកគូទដបទឹកឡើងឱ្យទឹកហូរចូលទៅក្នុងមាត់ ហើយក្នុងពេលដែលទឹកកំពុងហូរចូលមាត់នោះ ចូរបន្ថែមកម្លាំងបឺតទឹកចូលទៅក្នុងមាត់ដំណាលគ្នាផង។ កុំឱ្យមានខ្យល់ចូលទៅក្នុងអំឡុងពេលញ៉ាំទឹក។

អ្នកដែលធ្វើការសាកល្បងលេបថ្នាំដោយវិធីនេះប្រមាណជា140នាក់បានរកឃើញថាការលេបថ្នាំដោយវិធីនេះ (បិទភ្នែកខណៈ ពេលលេបថ្នាំផង) ជួយឱ្យការលេបថ្នាំគ្រាប់កាន់តែងាយស្រួលឡើងជាង 60% បើប្រៀបធៀបនឹងការលេបថ្នាំគ្រាប់ដោយញ៉ាំទឹកពីកែវ។

ក្រៅពីនេះនៅមាន 1វិធីទៀតដែលអាចជួយឱ្យការលេបថ្នាំគ្រាប់កាន់តែងាយស្រួលឡើង និងទទួលជោគជ័យដែលស័ក្តិសមជាមួយថ្នាំគ្រាប់ប្រភេទកាប់ស៊ូល នោះគឺ៖
1. ដាក់ថ្នាំគ្រាប់កាប់ស៊ូលនៅលើអណ្ដាត។
2. ក្រេបទឹកចូលទៅក្នុងមាត់មួយក្អឹក តែបៀមទុកសិន កុំអាលលេប។
3. ឱនមុខ ឱ្យចង្កាចង្អុលមកដើមទ្រូង។
4. រួចលេបទឹកចូលទៅដំណាលគ្នានឹងថ្នាំខណៈពេលកំពុងឱនមុខនោះ។ ភាគច្រើនថ្នាំគ្រាប់កាប់ស៊ូល ច្រើនតែមានទម្ងន់ស្រាល និង អណ្ដែតលើទឹក នៅពេលយើងឱនមុខ ហើយលេបថ្នាំដែលកំពុងអណ្ដែតលើទឹកនោះ វានឹងធ្វើឱ្យការលេបថ្នាំគ្រាប់កាប់ស៊ូលក្លាយជារឿងដែលកាន់តែងាយស្រួលឡើង។ វិធីនេះអាច បង្កើនប្រសិទ្ធភាពក្នុងការលេបថ្នាំបានច្រើន ដល់ទៅ 89% បើប្រៀបធៀបនឹងការញ៉ាំទឹក ដើម្បីលេបថ្នាំពីកែវទឹកដោយវិធីធម្មតា។

ក្រៅពីវិធីទាំង2ខាងលើ ដែលជួយឱ្យការលេបថ្នាំគ្រាប់ក្លាយជារឿងងាយស្រួលហើយនោះ បើសិនជាសាកល្បងធ្វើហើយនៅតែមិនបានផលទៀត ចូរសាកល្បងញាត់គ្រាប់ថ្នាំចូលទៅក្នុងនំទន់ៗ ដូចជា ចាហួយ ឬនំអាកោជាដើមមុននឹងដួសជាដុំតូចៗ ហើយលេប ចូល ទៅទាំងដុំ ឬក៏កិនថ្នាំឱ្យម៉ដ្ឋ ហើយលាយជាមួយនំទន់ៗ ឬហាន់គ្រាប់ថ្នាំជាបំណែកតូចៗ ហើយលេបម្ដង 1បំណែកៗក៏អាចជួយឱ្យការលេបថ្នាំប្រព្រឹត្តទៅបានងាយស្រួលដែរ៕

January 2, 2019

តើគួរព្យាបាលមុន ដោយទទួលទានថ្នាំ ឬប្រើថ្នាំលាបទើបល្អ?

ជាធម្មតា បញ្ហាមុខមុនបានក្លាយទៅជាបញ្ហាដ៏ធំដែលតែងកើតមានចំពោះបុរសនារីសម័យ
ថ្មីនេះ ដូច្នេះនៅក្នុងលេខនេះ ឡារ៉ែន សូមណែនាំប្រិយមិត្តអ្នកអានទាំងអស់មកស្វែងយល់ពី
របៀបបំបាត់បញ្ហាមុន ដោយប្រើថ្នាំទទួលទាន ឬថ្នាំលាបបំបាត់មុនដូចខាងក្រោមនេះ៖

ក្រុមថ្នាំទទួលទានបំបាត់មុន (ថ្នាំគ្រាប់)
• ថ្នាំនៅក្នុងក្រុមវីតាមីន A (Isotretinoin)អាចប្រើសម្រាប់អ្នកជំងឺដែលកើតមុនខ្លាំងក្លាឬមិនបានផលពីការព្យាបាលដោយថ្នាំផ្សេងៗ។ថ្នាំបំបាត់មុន គឺហាមប្រើចំពោះស្ត្រីមានផ្ទៃពោះព្រោះមានឱកាសកើតពិការភាពចំពោះទារកនៅក្នុងគភ៌បាន។ អ្នកគួរធ្វើការបរិច្ចាគឈាមក្នុងអំឡុងពេលព្យាបាល និងក្រោយពេលព្យា-បាលមុនយ៉ាងហោច3ខែ និងមិនគួរប្រើប្រាស់ថ្នាំប្រភេទនេះចំពោះក្មេងមានអាយុក្រោម18ឆ្នាំនោះទេ ព្រោះអាចហុចផលប៉ះពាល់ខ្លាំងចំពោះសុខភាពក្មេង។

• ថ្នាំប្រភេទអ័រម៉ូនបែបនេះ នឹងជួយកាត់បន្ថយជាតិខ្លាញ់លើស្បែកមុខប្រមាណពី20%-30%។ ដូច្នេះមិនគួរអនុញ្ញាតិឱ្យក្មេងប្រើនោះទេ ព្រោះអាចកើតកំណកឈាមនៅក្នុងសរសៃឈាម និងបេះដូង ព្រមទាំងក្រុមអ្នកជំងឺដែលមានប្រវត្តិកើតមានជំងឺមហារីកសុដន់ផងដែរ។ក្រៅពីនេះ ថ្នាំនេះអាចនឹងមានផលប៉ះពាល់ចំពោះបញ្ហាទម្ងន់ រោគលើសឈាម បង្កអាការឈឺក្បាលប្រកាំងបានផងដែរ។

• ក្រុមថ្នាំអង់ទីប៊ីយូទិក មានផ្សំច្រើនប្រភេទដូចជា Tetracyclin, Doxycycline, Erythromycin ដូច្នេះការទទួលទានថ្នាំអង់ទីប៊ីយូក-ទិក ដើម្បីព្យាបាលមុនយូរៗទៅ អាចនឹងហុចផលដល់ការកើតផ្សិតក្នុងទ្វារមាស។ ដូច្នេះអ្នកមិនត្រូវប្រើគ្រប់ប្រភេទថ្នាំ មិនគួររកឈ្មោះថ្នាំទិញទទួលទានដោយខ្លួនឯងនោះទេ គួរតែប្រឹក្សាជាមួយគ្រូពេទ្យសើស្បែកជាមុនសិន ដើម្បីឱ្យបានដឹងពីផលប៉ះពាល់ និងភាពប្រុងប្រយ័ត្នចំពោះការប្រើប្រាស់ថ្នាំ។ ដោយឡែក ថ្នាំ ដែលមានបន្សំដោយវីតាមីន A ឬវីតាមីន A មានគុណសម្បត្តិព្យាបាលមុនបានផងដែរ។ក្រុមប្រភេទថ្នាំលាបបំបាត់មុន

ក្រុមប្រភេទថ្នាំលាបបំបាត់មុន
• ថ្នាំលាបក្នុងក្រុមវីតាមីន A ឬថ្នាំដែលមានធាតុផ្សំជាមួយវីតាមីន A ដូចជា Tretinoin, Adapalene និង Tazarotene ទទួលបានប្រសិទ្ធភាពល្អចំពោះមុនកប់ក្នុងសាច់ និងអាចប្រើប្រាស់សម្រាប់ការពារមុនមិនឱ្យកើតឡើងវិញបាន ឬបន្ថយរយៈពេលនៃការកើតមុន។ តែថ្នាំប្រភេទនេះមានឥទ្ធិពលធ្វើឱ្យក្រហាយស្បែកខ្លះៗជាពិសេសនៅពេលដែលចាប់ផ្ដើមប្រើប្រាស់ដំបូង។

• ថ្នាំលាបក្នុងក្រុមអង់ទីប៊ីយូទិកដូចជា Clindamycin, Erythromycin និង Metronidazole មានប្រសិទ្ធភាពក្នុងការកាត់បន្ថយចំនួនបាក់តេរីដែលបង្កឱ្យកើតមានអាប់សែលើស្បែក ដូច្នេះអ្នកមិនគួរប្រើប្រាស់ថ្នាំប្រភេទនេះតែមួយមុខនោះទេ ព្រោះអាចបណ្ដាលឱ្យមុនប្រឆាំងនឹងថ្នាំនេះវិញបាន។

• ថ្នាំក្នុងក្រុម Benzyl peroxide មានប្រ-សិទ្ធភាពក្នុងការកាត់បន្ថយចំនួនបាក់តេរី និងបន្ថយការរលាករបស់មុន ក៏ប៉ុន្ដែមានសភាពក្រហាយខ្លះៗ និងអាចកាត់សម្លៀកពាក់របស់អ្នកបាន ត្រូវប្រុងប្រយ័ត្នមិនឱ្យថ្នាំប្រលាក់ជា-មួយក្រណាត់ឡើយ ជាពិសេសសម្លៀកបំពាក់ពណ៌ដិត។

• ថ្នាំ Azelaic Acid អាចសម្លាប់បាក់តេរី និងការកកើតមុនប្រភេទ Comedone បាន។

• ថ្នាំក្រុមផ្សេងៗដូចជា ថ្នាំចាក់ Steroids បរិមាណតិចតួច អាចជួយបញ្ហាអាប់សែមុន និងកាត់បន្ថយការកើតអាប់សែយ៉ាងឆាប់រហ័ស៕

September 5, 2018

Tag: ថ្នាំ