ថៃ - La Reine Media

សូមប្រយ័ត្នរឿងញ៉ាំគ្រឿងស្រវឹង ពេលទៅដើរលេងនៅប្រទេសទាំងនេះ…

នៅក្នុងប្រទេសមួយចំនួន ដូចជាសិង្ហបុរី ប៊្រុយណេ អារ៉ាប់រួម (United Arab Emirates) ឬប៉ាគីស្ថាន ជាដើម ជាប្រទេសដែលមានច្បាប់តឹងរ៉ឹងបំផុតលើការប្រើប្រាស់ជាតិស្រវឹងនៅទីសាធារណៈ ដោយអនុវត្តទៅលើទាំងពលរដ្ឋក្នុងស្រុង ទាំងភ្ញៀវទេសចរបរទេស។
-នៅប្រទេសសិង្ហបុរី (Singapore) ប្រជាជនត្រូវបានហាមមិនឱ្យផឹកស្រាបៀរនៅកន្លែងសាធារណៈ ចាប់ពីម៉ោង22:30នាទី ដល់ម៉ោង 7ព្រឹក ជារៀងរាល់ថ្ងៃ។ ហាងលក់រាយទាំងឡាយក៏មិនត្រូវបានអនុញ្ញាតឱ្យលក់ស្រាបៀរឱ្យភ្ញៀវដែលចង់ទិញយកទៅក្រៅ ក្នុងអំឡុងម៉ោងនេះដែរ។ បើសិនរំលោភលើការហាមប្រាមនេះ អ្នកលក់នឹងត្រូវរដ្ឋពិន័យឱ្យបង់ប្រាក់1,000ដុល្លារសិង្ហបុរី (ប្រហែល742ដុល្លារអាមេរិក)។ ចំពោះអ្នកដែលល្មើសបំពានច្បាប់នេះជាលើកទី2 នឹងត្រូវជាប់ពន្ធនាគារ 3ខែ និងពិន័យជាប្រាក់ 2,000ដុល្លារសិង្ហបុរី (ប្រហែល 1480ដុល្លារអាមេរិក)។

-ចំណែកនៅប្រទេសឥណ្ឌាវិញ មានរដ្ឋមួយចំនួន ក៏មានច្បាប់តឹងតែងផងដែរទាក់ទិននឹងការជួញដូរ និងប្រើប្រាស់គ្រឿងស្រវឹងនេះ។ នៅតំបន់ Gujarat អ្នកទេសចរដែលចង់ផឹកស្រាឱ្យស្របតាមច្បាប់ ដាច់ខាតគឺត្រូវទិញអាជ្ញាប័ណ្ណ (លិខិតអនុញ្ញាត) ដែលមានអាយុកាល 30ថ្ងៃ។ អាជ្ញាប័ណ្ណនេះ មានលក់នៅតាមសណ្ឋាគារ ឬព្រលានយន្តហោះ។ នៅឯរដ្ឋ Manipur និងរដ្ឋ Nagaland ក្នុងប្រជុំកោះ Lakshadweep (លើកលែងតែតំបន់លម្ហែកាយលើកោះ Bangaram) ស្រាបៀរទាំងឡាយត្រូវបានហាមជួញដូរទាំងស្រុង។

-ជាប្រទេសកាន់សាសនាមូស្លីម ប៊្រុយណេក៏មានការហាមមិនឱ្យផឹកគ្រឿងស្រវឹងនៅទីសាធារណៈដែរ។ ភ្ញៀវទេសចរបរទេសដែលមកកម្សាន្តនៅប្រទេសនេះ ត្រូវបានអនុញ្ញាតឱ្យយកស្រាខ្លាំង 2ដង និងស្រាបៀរ 12កំប៉ុងតាមខ្លួន ហើយត្រូវរាយការណ៍ជូនអាជ្ញាធររៀងរាល់ 48ម៉ោង ប៉ុន្តែការផឹកស៊ី គឺត្រូវតែធ្វើឡើងនៅទីកំបាំង។

-នៅប្រទេសអារ៉ាប់រួម ឬអារ៉ាប់ អេមីរ៉េត បើទោះជាគេឃើញមានស្រាបៀរច្រើននៅក្នុងសណ្ឋាគារ ភោជនីយដ្ឋាន និងផ្សារទំនើបមែន ប៉ុន្តែការផឹកគ្រឿងស្រវឹងទាំងនោះនៅក្នុងទីសាធារណៈ ក៏នៅតែជារឿងខុសច្បាប់ដែរ។ នៅក្នុងរាជាណាចក្រ Sharjah (រាជាណាចក្រមួយក្នុងទឹកដីអារ៉ាប់រួម) គ្រឿងស្រវឹងត្រូវបានហាមលក់ដូរ និងផឹកទាំងស្រុង។

-ឯប្រជុំកោះ Maldives ដែលល្បីឈ្មោះថា មានឆ្នេរសមុទ្រដ៏ស្រស់ស្អាត រួមទាំងមានភ្ញៀវទេសចរលំដាប់អ្នកមានទៅកម្សាន្តច្រើននោះ ក៏ហាមអ្នកស្រុកប្រើប្រាស់គ្រឿងស្រវឹងដែរ។ ទេសចរបរទេសដែលទៅកាន់ទីនោះ អាចប្រើប្រាស់គ្រឿងស្រវឹងបានតែនៅក្នុងសណ្ឋាគារ និងរមណីយដ្ឋានដែលមានអាជ្ញាប័ណ្ណធ្វើជំនួញស្របច្បាប់តែប៉ុណ្ណោះ។

-ចាប់តាំងពីអតីតនាយករដ្ឋមន្ត្រី Zulfikar Ali Bhutto ចូលកាន់អំណាច ការប្រើប្រាស់ស្រាបៀរ ត្រូវបានហាមទាំងស្រុងនៅប្រទេសប៉ាគិស្ថាន។ សូម្បីតែក្រោយព្រឹត្តិការណ៍រដ្ឋប្រហារក្នុងឆ្នាំ1977 ច្បាប់នេះក៏នៅតែមានសុពលភាពដដែល។ ភ្ញៀវទេសចរបរទេសដែលមិនកាន់សាសនាមូស្លីម អាចទិញស្រាបៀរនៅឯសណ្ឋាគារផ្កាយ4 ឬផ្កាយ5បាន។

-នៅក្នុងប្រទេសមួយចំនួន ដូចជាប្រទេសថៃ ហ្វីលីពីន ឬវ៉េណេហ្ស៊ូអេឡា ជាដើម ការហាមប្រាមប្រើគ្រឿងស្រវឹង មានសភាពធូរស្រាលបន្តិច ប៉ុន្តែក្នុងអំឡុងពេលបោះឆ្នោត ឬព្រឹត្តិការណ៍សំខាន់ៗមួយចំនួន ការផឹកគ្រឿងស្រវឹងត្រូវបានរឹតត្បិត។ រីឯប្រទេសហ្វីលីពីនវិញ ការជួញដូរគ្រឿងស្រវឹងត្រូវបានហាមក្នុងរយៈពេល 2ថ្ងៃ មុនថ្ងៃបោះឆ្នោត។ វេណេហ្ស៊ូអេឡា ហាមលក់គ្រឿងស្រវឹងក្នុងអំឡុង 21ម៉ោងមុនបោះឆ្នោត៕

ប្រភព៖ សារព័ត៌មានបរទេស

January 17, 2020

ថៃសុំចែករំលែកបទពិសោធន៍និងចំណេះដឹងអំពីការជួសជុលនិងអភិរក្សប្រាសាទឥដ្ឋបុរាណ

តាមរយៈទំព័រផេចក្រសួងវប្បធម៌និងវិចិត្រសិល្បៈបានឱ្យដឹងថា អ្នកជំនាញថៃ ដែលកំពុងបម្រើការងារនៅក្នុងវិស័យបេតិកភណ្ឌវប្បធម៌ សុំចែករំលែកបទពិសោធន៍និងចំណេះដឹងអំពីការជួសជុលនិងអភិរក្សប្រាសាទឥដ្ឋបុរាណពីអ្នកជំនាញអភិរក្សប្រាសាទ បុរាណខ្មែរ។

តបតាមការអញ្ជើញរបស់នាយកដ្ឋានវិចិត្រសិល្បៈថៃកាលពីថ្ងៃទី១៧ ដល់ថ្ងៃទី២១ ខែមិថុនា ឆ្នាំ២០១៩កន្លងមក អ្នកជំនាញអភិរក្សប្រាសាទ បុរាណខ្មែរចំនួនបីរូបនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការនៃអាជ្ញាធរជាតិអប្សរា បាន អញ្ជើញចូលរួមក្នុងសិក្ខាសាលាស្តីពី “ការស្វែងយល់អំពីបច្ចេកទេសបុរាណនិងការប្រើសម្ភារៈបុរាណ ដើម្បីជួសជុលប្រាសាទឥដ្ឋនៅតំបន់អង្គរ”នៅខេត្តស្រះកែវ ។

ក្នុងសិក្ខាសាលានេះ អ្នកជំនាញខ្មែរទាំងបីរូបមាន៖ លោក លី វណ្ណា បុរាណវិទូនិងជាប្រធាននាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ លោក តាន់ សុផល អ្នកអភិរក្សឥដ្ឋ និងលោក ហួន សុខជាតិ វិស្វករ បានចែករំលែកបទពិសោធន៍ ចំណេះដឹងអំពីបច្ចេកទេសបុរាណ និងការប្រើសម្ភារៈបុរាណដើម្បីជួសជុលប្រាសាទបុរាណសាងអំពីឥដ្ឋដល់អ្នកជំនាញថៃជាង៣០នាក់ ដែលកំពុងបម្រើការងារនៅក្នុងវិស័យបេតិកភណ្ឌវប្បធម៌ មកពីការិយាល័យប្រចាំតំបន់ទូទាំងប្រទេសនៃនាយកដ្ឋានវិចិត្រសិល្បៈនៃប្រទេសថៃ។

លោក លី វណ្ណា បានឱ្យដឹងថា សិក្ខាសាលានេះគឺផ្តើមចេញពីការយល់ឃើញថា ដើម្បីអភិរក្សនិងជួសជុលប្រាសាទមួយឱ្យរក្សាបាននូវតម្លៃដើម យើងត្រូវប្រើបច្ចេកទេសបុរាណនិងសម្ភារៈបុរាណគួបផ្សំជាមួយនឹងតម្រូវការក្នុងពេលចាំបាច់នៃការប្រើបច្ចេកទេសនិងសម្ភារៈទំនើបដែលមិនប៉ះពាល់ដល់លក្ខណៈសម្បត្តិបុរាណរបស់ប្រាសាទ។ នេះក៏ដោយសារកន្លងមក ការជួសជុលប្រាសាទឥដ្ឋនៅប្រទេសថៃប្រើបាយអរដែលជាល្បាយបានមកពីការលាយបញ្ចូលគ្នានៃខ្សាច់ កំបោរ និងស៊ីម៉ង់តិ៍ផតឡែនដ៍ពណ៌សដើម្បីបិទ បៀក និងភ្ជាប់ឥដ្ឋ។ ការប្រើប្រភេទល្បាយស៊ីម៉ង់តិ៍ដូចនេះ មិនត្រូវគ្នាជាមួយឥដ្ឋបុរាណឡើយ ដោយសារសម្ភារៈសំណង់ទាំងពីរប្រភេទនេះមានលក្ខណៈរឹងមាំខុសគ្នាខ្លាំង ម៉្យាងទៀតស៊ីម៉ង់តិ៍អាចនាំមកនូវការកកើតអំបិលបំផ្លាញដល់ឥដ្ឋបុរាណនៃប្រាសាទ។

លោកបុរាណវិទូរូបនេះបន្តថា កត្តានេះហើយដែលនាយកដ្ឋានវិចិត្រសិល្បៈនៃប្រទេសថៃមានកង្វល់យ៉ាងខ្លាំងអំពីបញ្ហានៃការប្រើស៊ីម៉ង់តិ៍ ហើយក៏ងាកមកគិតអំពីការរិះរកមធ្យោបាយប្រើបច្ចេកទេសជួសជុលប្រាសាទឥដ្ឋតាមបែបបុរាណនិងប្រើបាយអរបុរាណ។ល។ ទើបនាយកដ្ឋានវិចិត្រសិល្បៈនៃប្រទេសថៃផ្តួចផ្តើមគំនិតរៀបចំសិក្ខាសាលានេះឡើង ដើម្បីយកបច្ចេកបុរាណនេះទៅអនុវត្តនៅក្នុងគម្រោងជួសជុលប្រាសាទខាវលួនដែលជាប្រាសាទឥដ្ឋមួយមិនទាន់ដឹងកាលបរិច្ឆេទច្បាស់លាស់ស្ថិតនៅក្នុងស្រុកតាប្រាយ៉ានៃខេត្តសាកែវ ។

សូមបញ្ជាក់ថា នេះជាលើកទី១ដែលអ្នកជំនាញអភិរក្សប្រាសាទបុរាណខ្មែរបានបំពេញបេសកកម្មជាប្រវត្តិសាស្រ្តលើកដំបូងនិងជាទីមោទនភាពសម្រាប់ប្រទេសកម្ពុជា ដែលមានធនធានមនុស្សដ៏មានសមត្ថភាពក្នុងការផ្តល់នូវចំណេះដឹង បទពិសោធន៍អំពីការជួសជុលប្រាសាទឥដ្ឋក្នុងតំបន់អង្គរទៅកាន់អន្តរជាតិ៕

June 26, 2019

ថៃផ្តល់សេវាអប់រំដល់កូនពលករខ្មែរ ឱ្យសិក្សារហូតដល់អាយុ15ឆ្នាំដោយឥតគិតថ្លៃ…

ស្របពេលសង្គមកំពុងត្រូវការការអភិវឌ្ឍ និងប្រកួតប្រជែងផ្នែកទីផ្សារការងារ ការអប់រំជាផ្នែកមួយដ៏សំខាន់ដែលមិនអាចខ្វះបានសម្រាប់កម្ពុជា តែកន្លងមកកុមារកម្ពុជាជាច្រើនដែលជាកូនរបស់ពលករទៅធ្វើការងារនៅបរទេស បានប្រឈមនឹងបញ្ហាការសិក្សារៀនសូត្រ ប្រសិនបើពួកគេទៅតាមម្តាយឪពុកដែលធ្វើចំណាកស្រុក។ ដោយមើលឃើញពីបញ្ហានេះ ភាគីកម្ពុជា និងថៃ បានពិភាក្សាគ្នាដើម្បីធ្វើយ៉ាងណាឱ្យកុមារកម្ពុជា ដែលរស់នៅជាមួយឪពុកម្តាយដែលជាពលករទៅធ្វើការងារនៅប្រទេសថៃទទួលបានសេវាអប់រំសម្រាប់អភិវឌ្ឍសមត្ថភាពដើម្បីកសាងអនាគតឱ្យបានល្អប្រសើរ។

លោកជំទាវ ជូ ប៊ុនអេង អនុប្រធានអចិន្ត្រៃយ៍នៃគណៈកម្មការជាតិប្រយុទ្ធប្រឆាំងអំពើជួញដូរមនុស្ស បានលើកឡើងថា រដ្ឋាភិបាលថៃ នឹងផ្តល់ការសិក្សាដល់កុមារកម្ពុជារយៈពេល 15ឆ្នាំពេញ ដើម្បីសិក្សានៅប្រទេសថៃដោយឥតគិតថ្លៃ។ ជាលក្ខខណ្ឌ កុមារដែលអាចទទួលបានសេវាអប់រំនេះ ចាំបាច់ត្រូវតែជាកុមារដែលមានអាណាព្យាបាលជាទេសន្តរប្រវេសន៍ស្របច្បាប់នៅប្រទេសថៃ ចំពោះអ្នកចំណាកស្រុកខុសច្បាប់មិនអាចទទួលបានការឧបត្ថម្ភនេះទេ។

លោកជំទាវ ជូ ប៊ុនអេង មានប្រសាសន៍ថា៖ “បច្ចុប្បន្ននេះពលករខ្មែរប្រមាណ 1លាននាក់កំពុងស្នាក់នៅជាទេសន្តរប្រវេសន៍នៅប្រទេសថៃ ដោយក្នុងនោះកុមារដែលកើត និងរស់នៅជាមួយឪពុកម្តាយមានចំនួនប្រមាណចន្លោះពី 6% ទៅ10% នៅប្រទេសថ”។

លោកជំទាវបានបន្ថែមទៀតថា កុមារដែលរស់នៅជាមួយឪពុកម្តាយចំណាកស្រុកទៅប្រទេសថៃទាំងអស់នោះមានបញ្ហាប្រឈមជាច្រើនដែលអាចប៉ះពាល់ដល់ស្ថានភាពរស់នៅបច្ចុប្បន្ន និងអនាគតរបស់គេ។ កុមារទាំងអស់នោះភាគច្រើនមិនចេះអក្សរ ហើយថែមទាំងមិនចេះនិយាយភាសាកំណើតទៀតផង ដែលបញ្ហានេះអាចធ្វើឱ្យពួកគេមានបញ្ហាប្រឈមមួយបន្ថែមទៀត គឺមិនមានសញ្ជាតិច្បាស់លាស់។ លោកជំទាវក៏បានលើកឡើងផងដែរថា ស្ថានភាពពលករកម្ពុជាឆ្លងដែនចូលក្នុងប្រទេសថៃ បច្ចុប្បន្នមានទាំងស្របច្បាប់ និងមិនស្របច្បាប់ ហើយចំពោះការឆ្លងដែនមិនស្របច្បាប់ គឺកាន់តែប្រឈមនឹងបញ្ហាជាច្រើន ព្រោះពួកគេមានជីវភាពខ្វះខាត ហើយធ្វើការងារឆ្លងដែនផ្សងព្រេងទាំងប្រថុយគ្រោះថ្នាក់ដើម្បីចូលទៅធ្វើការងារនៅប្រទេសថៃ។ ប្រជាជនចំណាកស្រុកចូលទៅក្នុងប្រទេសថៃគិតត្រឹមឆ្នាំ 2014កន្លងទៅ មានចំនួន1,830,000នាក់ ហើយចាប់ពីឆ្នាំ 2017 រហូតមកដល់បច្ចុប្បន្ននេះ មានកំណើនប្រមាណជាង 1លាននាក់ ដោយក្នុងនោះអ្នកចូលទៅធ្វើការងារមិនស្របច្បាប់ក៏មានចំនួនច្រើនដែរ។

ស្ថាបនិក និងនាយកមូលនិធិបណ្តាញជំរុញសិទ្ធិការងាររបស់ប្រទេសថៃ លោក Sopong Sravaenបានលើកឡើងថា ការផ្តល់ឱកាសដល់កុមារកម្ពុជាឱ្យទទួលបានការសិក្សានេះ ត្រូវបានធ្វើឡើងក្រោយពេលរដ្ឋាភិបាលថៃមើលឃើញថា កុមារកម្ពុជាជាច្រើនមិនទាន់ទទួលបានការសិក្សា ហើយមិនចេះទាំងភាសាកំណើតរបស់ខ្លួនទៅទៀត ដែលកត្តាទាំងនេះអាចនឹងធ្វើឱ្យពួកគេធំឡើងក្នុងស្ថានភាពគ្មានជំនាញ។ ក្រៅពីនេះពួកគេក៏អាចប្រឈមច្រើនផងដែរពីការចាញ់បោកក្រុមជួញដូរមនុស្សទៀតផង។

គួរបញ្ជាក់ផងដែរថា បច្ចុប្បន្ននេះភាគីកម្ពុជា និងភាគីថៃ កំពុងព្យាយាមខិតខំប្រឹងប្រែងដើម្បីបង្កើនកិច្ចសហប្រតិបត្តិការល្អលើការទប់ស្កាត់ការជួញដូរមនុស្ស និងការគាំពារសិទ្ធិអ្នកចំណាកស្រុកដោយធ្វើយ៉ាងណាជំរុញឱ្យពួកគេធ្វើចំណាកស្រុកដោយស្របច្បាប់ និងផ្តល់ការអប់រំដើម្បីឱ្យពួកគេទទួលបានវិជ្ជាជីវៈសម្រាប់យកធ្វើជាអាជីពដើម្បីចិញ្ចឹមជីវិតនៅថ្ងៃខាងមុខ។\

កិច្ចប្រជុំរវាងភាគីពាក់ព័ន្ធ កម្ពុជា ថៃ ដើម្បីពង្រឹងកិច្ចសហការក្នុងការដោះស្រាយបញ្ហាទេសន្តរប្រវេសន៍

សម្រាប់កម្មវិធីចុះហត្ថលេខាជាផ្លូវការស្តីពីគម្រោងផ្តល់ការអប់រំរយៈពេល 15ឆ្នាំដោយឥតគិតថ្លៃនេះ ភាគីទាំង2 បានរៀបចំគម្រោងរួចរាល់ហើយ តែមិនទាន់បានកំណត់ថ្ងៃចុះអនុស្សរណៈយោគយល់គ្នាជាក់លាក់នៅឡើយទេ៕

June 4, 2019

សិស្សស្រីតែងខ្លួនឈុតបុរាណចូលប្រលង បង្កឱ្យភ្ញាក់ផ្អើលអស់ទាំងគ្រូនិងមិត្តរួមថ្នាក់

ពិតជាមានរឿងប្លែកៗកើតនៅក្នុងសង្គម ដែលនៅថ្ងៃទី 9 ខែមករា ឆ្នាំ 2019 នេះសារព័ត៌មានថៃ kapook បានចេញផ្សាយឱ្យដឹងថា សិស្សស្រីម្នាក់តែងខ្លួនក្នុងឈុតបុរាណថៃ ចូលប្រលងនៅក្នុងថ្នាក់បង្កឱ្យមានភាពភ្ញាក់ផ្អើលអស់មណ្ឌុលប្រលង។

តាមការបង្ហោះរបស់ហ្វេសប៊ុកមានឈ្មោះ Keem Phanthong បានឱ្យដឹងថា ខណៈដែលមិត្តភ័ក្តនៅក្នុងសាលារៀនស្លៀកសម្លៀកបំពាក់របស់សាលាតាមធម្មតាមកប្រលង ភ្លាមៗស្រាប់តែគ្រប់គ្នាភ្ញាក់ព្រឺត នៅពេលបានឃើញនាងមកប្រលងក្នុងសម្លៀកបំពាក់ឈុតបុរាណថៃ ព្រមទាំងមានបួងសក់ និងពាក់មកុដ ហាក់បីដូចជា គ្រូកំពុងចូលរូប។ សិស្សស្រីរូបនេះ ត្រូវបានមិត្តរួមថ្នាក់ថតរូបឱ្យបង្ហោះឱ្យដឹងថា « ទីនេះសាលារៀន Prakhonchai Pittayakhon តែងខ្លូនមកប្រលងមធម្យៗ តែសប្ដាហ៍ក្រោយគឺមិនធានាទេ»។

សិស្សស្រីដែលបានរៀបរាប់ខាងលើ ត្រូវបានអ្នកសារព័ត៌មានទម្លាយអត្តសញ្ញាណឱ្យដឹងថា នាងមានឈ្មោះ ពិយៈធិតា ម៉ាលីគុន ឬហៅក្រៅ នាង ហ្វីមល៍ រៀនថ្នាក់ទី 10 នៃសាលារៀន Prakhonchai Pittayakhon ហើយនាងគឺជាអ្នករបាំ និងជាអ្នកចម្រៀងប្រចាំសាលា។ នាងថា នាងមិនបានប្ដូរឈុតដោយសារតែ នាងត្រូវប្រលងផ្នែកមុខវិជ្ជាតម្រង់ទិស និង ផ្នែករបាំក្នុងថ្ងៃតែមួយ៕

January 10, 2019

កម្ពុជា-ថៃគ្រោងបង្កើនពាណិជ្ជកម្មទ្វេភាគីដល់ 15ប៊ីលានដុល្លារត្រឹមឆ្នាំ2020

ក្នុងគោលដៅពង្រឹងទំនាក់ទំនងពាណិជ្ជកម្មឱ្យកាន់តែមានភាពល្អប្រសើរឡើង រដ្ឋាភិបាលកម្ពុជា និងរដ្ឋាភិបាលថៃ បានសន្យាបង្កើនពាណិជ្ជកម្មទ្វេភាគីយ៉ាងហោចឱ្យបានត្រឹម 15ប៊ីលានដុល្លារនៅត្រឹមឆ្នាំ2020។

ឯកឧត្តម សុខ សុភ័ក្ត្រ អនុរដ្ឋលេខាធិការក្រសួងពាណិជ្ជកម្ម បានមានប្រសាសន៍បង្ហាញពីវឌ្ឍនភាពនៃកិច្ចសហប្រតិបត្តិការល្អរវាងរាជរដ្ឋាភិបាលនៃប្រទេសទាំង2 ជាពិសេសលទ្ធផលនៃកិច្ចប្រជុំលើកទី3 នៃគណៈរដ្ឋមន្ត្រីចម្រុះកាលពីខែកញ្ញា ឆ្នាំ2017កន្លងទៅដែលដឹកនាំដោយប្រមុខរាជរដ្ឋាភិបាលនៃប្រទេសទាំង2 ក្នុងនោះកិច្ចប្រជុំបានដាក់ចេញនូវគោលដៅពាណិជ្ជកម្មទ្វេភាគីឱ្យកើនដល់ 15ប៊ីលានដុល្លារត្រឹមឆ្នាំ2020 និងកិច្ចប្រជុំលើកទី6 នៃគណៈកម្មាធិការចម្រុះផ្នែកពាណិជ្ជកម្ម កាលពីខែកុម្ភៈ ឆ្នាំ2018 ដឹកនាំដោយរដ្ឋមន្ត្រីពាណិជ្ជកម្មរបស់ប្រទេសទាំង2 សម្រាប់ជាយន្តការទ្វេភាគីដើម្បីតាមដាន និងអនុវត្តនូវទំនាក់ទំនងពាណិជ្ជកម្មទ្វេភាគីនេះ។

ឯកឧត្តមបញ្ជាក់ថា ដើម្បីសម្រេចគោលដៅនេះ កន្លងមកភាគីកម្ពុជា និងថៃបានចុះហត្ថលេខាលើកិច្ចព្រមព្រៀងស្តីពីការមិនយកពន្ធត្រួតគ្នាកាលពីថ្ងៃទី7 ខែកញ្ញា ឆ្នាំ2017 ដែលកិច្ចការនេះបានជួយសម្រួលដល់ការវិយោគ និងធ្វើពាណិជ្ជកម្មដោយមិនតម្រូវឱ្យបង់ពន្ធនៅប្រទេសថៃទៀតទេ និងកសាងហេដ្ឋារចនាសម្ព័ន្ធតភា្ជប់តាមព្រំដែន ដំឡើងថ្នាក់ព្រំដែន ដូចជាចុះហត្ថលេខាលើ MoU ជាច្រើន ដើម្បីជួយសម្រួលដល់ពាណិជ្ជកម្មឆ្លងកាត់ព្រំដែន។

ក្នុងជំនួបជាមួយប្រតិភូសភាពាណិជ្ជកម្មថៃកាលពីសប្ហាហ៍មុន ឯកឧត្តមបានស្នើសភាពាណិជ្ជកម្មថៃឱ្យជួយជំរុញរាជរដ្ឋាភិបាលថៃលើបញ្ហាមួយចំនួនដូចជា 1.ពន្លឿនការចុះហត្ថលេខាលើអនុស្សរណៈយោគយល់គ្នាលើទំនិញឆ្លងកាត់ព្រំដែន។ 2.អនុញ្ញាតជំរុញឱ្យចុះហត្ថលេខាលើ MoU ដើម្បីឱ្យមានការដឹកជញ្ជូនឆ្លងកាត់ព្រំដែនតាមគ្រប់ច្រកដែលកន្លងមកទើបបានអនុញ្ញាតត្រឹមតែតាមច្រកប៉ោយប៉ែត-អារញ្ញប្រាថេតតែមួយប៉ុណ្ណោះ និងបន្ថែមកូតាអនុញ្ញាតឱ្យរថយន្តឆ្លងកាត់ពី150 ទៅ300 និងទៅ500គ្រឿងជាដំណាក់កាល និង3.សម្របសម្រួលនីតិវិធីក្នុងការនាំចូលទំនិញកសិកម្មពីកម្ពុជាទៅថៃ ចៀសវាងការដាក់ចេញនូវឧបសគ្គនានាដែលធ្វើឱ្យកម្ពុជា-ថៃពុំអាចសម្រេចគោលដៅពាណិជ្ជកម្មបាន 15ប៊ីលានដុល្លារសហរដ្ឋអាមេរិកក្នុងឆ្នាំ2020។ ក្នុងគោលនយោបាយលើកទឹកចិត្តវិនិយោគិនបរទេសឱ្យមកបណ្តាក់ទុននៅកម្ពុជាឱ្យបានកាន់តែច្រើន រដ្ឋាភិបាលកម្ពុជាបានដាក់ចេញគោលនយោបាយបើកចំហ គ្មានការរើសអើងចំពោះអ្នកវិនិយោគបរទេស ហើយវិនិយោគិនបរទេសអាចកាន់កាប់ភាគហ៊ុន100% គ្មានការកំណត់តម្លៃលើទំនិញ និងសេវា និងគ្មានការតម្រូវក្នុងការប្តូរសាច់ប្រាក់ ឬយកប្រាក់ចេញ-ចូលក្រៅប្រទេសឡើយ។

ក្នុងដំណើរទស្សនកិច្ចដឹកនាំក្រុមអ្នកវិនិយោគមកសិក្សាបរិយាកាសធុរកិច្ចនៅកម្ពុជាកាលពីសប្តាហ៍មុន លោកស្រី Doungjai Chanthon ប្រធានអនុគណៈកម្មការពាណិជ្ជកម្មតាមព្រំដែន និងឆ្លងព្រំដែនសម្រាប់ប្រទេសកម្ពុជា និងវៀតណាមនៃសភាពាណិជ្ជកម្មថៃ បានមានប្រសាសន៍ថា ដោយមើលឃើញឱកាសវិនិយោគនៅកម្ពុជា វិនិយោគិនថៃចំនួន 20ក្រុមហ៊ុនគ្រោងមកបណ្តាក់ទុនរកស៊ីនៅកម្ពុជានៅពេលខាងមុខ។ ប្រតិភូធុរជនថៃទាំង 20ក្រុមហ៊ុននោះកំពុងធ្វើពាណិជ្ជកម្មនៅក្នុងប្រទេសរបស់ខ្លួនលើវិស័យអេឡិចត្រូនិក ភេសជ្ជៈ បរិក្ខារពេទ្យ សម្ភារប្រើប្រាស់ ផលិតផលថែរក្សាសម្ផស្ស ចំណីអាហារ ផលិតផលកសិកម្ម និងគ្រឿងសំណង់ជាដើម។ល។

លោកស្រី Doungjai Chanthon ប្រធានអនុគណៈកម្មការពាណិជ្ជកម្មតាមព្រំដែន

លោកស្រីអះអាងថា កម្ពុជា និងថៃមានវប្បធម៌ប្រពៃណី រួមទាំងការបណ្តាក់ទុនរកស៊ីស្រដៀងគ្នាហើយកម្ពុជានៅមានឱកាសច្រើនសម្រាប់ធ្វើការវិនិយោគ ទៅតាមវិស័យផ្សេងៗជាច្រើន ដូចជាឧស្សាហកម្មចំណីអាហារ និងភេសជ្ជៈ សុខាភិបាល សំណង់ វិស័យអគ្គិសនី អេឡិចត្រូនិក និងកសិកម្មជាដើម ទើបលោកស្រីដឹកនាំអ្នកវិនិយោគទាំងនេះមកពិភាក្សាជាមួយថ្នាក់ដឹកនាំ និងមន្ត្រីជាន់ខ្ពស់កម្ពុជា ដើម្បីស្វែងយល់ឱ្យបានច្បាស់អំពីបរិយកាសធ្វើពាណិជ្ជកម្ម មុននឹងសម្រេចចិត្តបោះទុនវិនិយោគជាផ្លូវការ។ ហើយលោកស្រីបានសន្យាពាំនាំនូវសំណើថ្នាក់ដឹកនាំក្រសួងពាណិជ្ជកម្មកម្ពុជា ទៅជូនបណ្តាក្រសួងស្ថាប័នធុរកិច្ចពាក់ព័ន្ធរបស់ថៃ ដើម្បីជំរុញការធ្វើពាណិជ្ជកម្មទ្វេភាគីឱ្យឈានដល់គោលដៅ ដែលបានកំណត់ដោយរដ្ឋាភិបាលនៃប្រទេសទាំង2។

គួររំឭកផងដែរថា ទំហំពាណិជ្ជកម្មកម្ពុជា-ថៃកាលពីឆ្នាំ2017កន្លងមក មានរហូតដល់ជាង 6ពាន់លានដុល្លារ កើនឡើង 10ភាគរយ បើធៀបឆ្នាំ2016 ដែលមានចំនួនជាង 5ពាន់លានដុល្លារ៕

August 28, 2018

អ្នកគាំទ្រលាន់មាត់ ប៉ូប និង ទែវ សមគ្នាខ្លាំងណាស់នៅពេលសម្ដែងរឿងថ្មីក្នុងឈុតបុរាណ

តាមរយៈសារព័ត៌មាន Teenee ដែលចេញផ្សាយមុននេះបន្ដិចបានឱ្យដឹងថា បន្ទាប់ពីទទួលបានភាពជោគជ័យយ៉ាងខ្លាំងពីរឿងភាគបុរាណថៃ «បុព្វេសន្និវាស» ខណៈនេះ តារាសម្ដែងប្រុស ប៉ូប ថនៈវ៉ាន់ បានត្រៀមបង្ហាញខ្លួនក្នុងរឿងភាគថ្មីម្ដងទៀតហើយ ដែលនឹងសម្ដែងជាតួឯកប្រុសជាមួយតារាស្រី ទែវ ណថៈផន ដែលធ្លាប់ទទួលបានភាពជោគជ័យជាតារាស្រីឆ្នើមប្រចាំឆ្នាំ2016 ដូចគ្នា នៅក្នុងរឿងភាគ «ណាឃី» ដ៏ល្បីល្បាញ។

ក្នុងឱកាសបង្ហាញឈុតបុរាណថៃនោះ អ្នកទាំងពីរត្រូវបានអ្នកគាំទ្រលាន់មាត់សរសើរថា អ្នកទាំងពីរពិតជាស័ក្ដិសមគ្នាខ្លាំងមែនទែន បើសិនជាបានសម្ដែងរឿងភាគបុរាណជាមួយគ្នាបែបនេះមែននោះ។ គួរបញ្ជាក់ផងដែរថា រឿងភាគថ្មីមួយនេះ មានចំណងជើងថា «កែវរ៉ាហ៊ូ» ដែលដកស្រង់ចេញពីប្រលោមលោកបែបបុរាណល្បីបំផុតរបស់ប្រទេសថៃ និងគ្រោងដាក់បញ្ចាំងនាពេលឆាប់ៗខាងមុខនេះ។ តារាសម្ដែងប្រុស ប៉ូប នៅតែមានក្ដីរំពឹងទុកថា រឿងភាគថ្មីរបស់ខ្លួននឹងទទួលបានការគាំទ្រខ្លាំងជាងមុនទៅទៀត ព្រោះថា ទាំងសាច់រឿង និងអ្នកដឹកនាំរឿងមានភាពសម្រិតសម្រាំងខ្លាំងជាងរឿងមុនៗ។

សូមជម្រាបដែរថា ខណៈនេះ ប៉ូប ថនៈវ៉ាន់ បានផ្អាកការងារសម្ដែងរឿងសម័យមួយរយៈសិនហើយ ដោយងាកមកសម្រុកថតរឿងភាគបុរាណជាបន្ដបន្ទាប់មិនសម្រាកដៃឡើយ ដោយរឿងភាគមួយទៀតបន្ទាប់ពីរឿង «បុព្វេសន្និវាស» គឺរឿង «ព្រហ្មលិខិត» ដែលមានអ្នកដឹកនាំសម្ដែងរឿងតែម្នាក់៕

August 2, 2018

អ្នកដឹកនាំរឿង « សសរកន្លោង » ចេញមុខពន្លាស់អ្នកបំផ្លើសព័ត៌មានបាត់ខ្លួនសមាជិកកីឡាករក្មេងៗទាំង 12 នាក់នៅប្រទេសថៃ

ពិតជារឿងមួយដ៏ហួសចិត្តដែលអ្នកលេងបណ្ដាញសង្គមខ្មែរមួយចំនួន ចង់បានចំនួនអ្នក Like Page ឱ្យមានកំនើនឡើងខ្លាំង បានសរសេរព័ត៌មានប្រឌិតរឿង ដោយអះអាងថា ម៉ោង 4 ទាបភ្លឺនេះ ក្រុមអ្នកជំនាញរបស់អង់គ្លេស បានរកឃើញសាកសពក្មេងទាំង 12 នាក់ ក្នុងចំនោម 13 ហើយ។ ការសន្និដ្ឋានរបស់ក្រុមអ្នកសង្គ្រោះ បានប្រាប់មានសង្ឃឹមរស់តិចតួចណាស។ ដែលព័ត៌មានមិនពិតនេះ បានធ្វើឱ្យមហាជនខ្មែរជាច្រើននាក់ មានទឹកចិត្តអាណិតអាសូរ និងកំពុងតាមដានសកម្មភាពជួយសង្គ្រោះនេះ មានក្ដីខឹងយ៉ាងសម្បាទៅកាន់ Page ព័ត៌មានមួយនេះ។

នៅក្នុងនោះដែរ លោក រ៉ូណាន អ្នកដឹកនាំរឿង « សសរកន្លោង » ចេញមុខពន្លាស់ដែរថា « ពួកអ្នកឆក់ឳកាស ដោយមិនគិតពិចារណា ដើម្បីតែប្រយោជន៍ខ្លួន បង្កើត Page បោកប្រាស់ ឱ្យបងប្អូនមានការចុច Like កាលណាបានច្រើន K ហើយ វានិងប្រកាសលក់ Page ឬស្វែងរកលុយតាមរយៈ Page នេះពេលល្បី។ ដូចនេះ សូមបងប្អូនជួយ ចុច Report Page នេះ ម្នាក់មួយៗ ឱ្យបានគ្រប់ៗគ្នា ដើម្បី Page បាត់ស្រមោលលេងដំណើរការណ៍។ កែប្រែ មនុស្សអាក្រក់ក្នុងសង្គមខ្មែរ យើងត្រូវចាប់ផ្តើមពីខ្លួនយើងទៅ »។ មិននឹកស្មានថា ហ៊ានបំភ្លីព័ត៌មានដើម្បីផលប្រយោជន៍ផ្ទាល់ខ្លួនបែបនេះឡើយ។

គួរបញ្ជាក់ផងដែរថា ពាក់ព័ន្ធជាមួយករណីតាមជួយសង្គ្រោះក្មេងៗទាំង 12 នាក់ មកដល់ខ្ទង់ម៉ោង 10 យប់ថ្ងៃព្រហស្បតិ៍ម្សិលមិញនេះ ប្រតិបត្តិការជួយសង្គ្រោះត្រូវបានផ្អាកជាបណ្តោះអាសន្ន ខណៈភ្លៀងធ្លាក់យ៉ាងសន្ធប់បានកើតមានឡើងនាំឲ្យទឹកចាប់ផ្តើមជោរជន់មកវិញរឹងតែខ្លាំង នៅតំបន់រូងភ្នំ ថាំហ្លួង ក្នុងខេត្តឈៀងរ៉ៃ ដែលក្មេង១២នាក់ និងគ្រូបង្វឹកម្នាក់កំពុងជាប់ខ្លួននោះ ។ នេះបើតាមការចេញផ្សាយដោយ Bangkok Post ៕

June 29, 2018

រឿង “វិកលចរិត” នឹងដកចំណូលពីការលក់សំបុត្រទាំង 3 ប្រទេសទៅជួយកុមារកំព្រា

ដើម្បីអបអរការដាក់បញ្ចាំងរឿង “វិកលចរិត” ក្នុង 3 ប្រទេសដំណាលគ្នា រួមមាន កម្ពុជា ថៃ ឡាវ នៅថ្ងៃទី3 ខែសីហា ឆ្នាំ 2017 ខាងមុខនេះ រាល់ការទិញសំបុត្រទស្សនារឿងនេះ និងត្រូវបរិច្ចាគជួយដល់កុមារកំព្រា និងក្មេងៗបាត់បង់សតិបញ្ញានៅកម្ពុជាចំនួន 1 ដុល្លារសហរដ្ឋអាមេរិកក្នុងមួយសន្លឹក ដែលទង្វើសប្បុរសធម៌នេះនឹងក្លាយជាកម្លាំងជំរុញចិត្តដល់កុមារនៅកម្ពុជាផងដែរ។

ក្នុងនាមជាកូនខ្មែរដែលស្នេហាជាតិ និងគោរពដូនតាប្រទេសកំណើតរបស់ខ្លួន លោក ហ៊ុយ យ៉ាឡេង ឬឈ្មោះហៅក្រៅថា មាតុចក្រ ដែលជាអ្នកដឹកនាំរឿង និងជាតួសម្ដែងនៅក្នុងរឿងខាងលើនេះបានចេញសារមួយនៅលើទំព័រ Facebook Page ថា “ដើម្បីតបស្នងសងគុណដល់ប្រជាជាតិខ្ញុំ! ដើម្បីអបអរសាទររឿង “វិកលចរិត” ដែលបានចាក់បញ្ចាំងក្នុង៣ប្រទេសព្រមគ្នា ខ្មែរ ថៃ ឡាវនោះ រាល់តម្លៃសំបុត្រ១សន្លឹកទូទាំងបីប្រទេសនោះនឹងត្រូវដកចំនួន១ដុល្លារដើម្បីជួយដល់កុមារកំព្រា និងក្មេងៗបាត់បង់សតិបញ្ញានៅកម្ពុជា”។ ទន្ទឹមនឹងនោះលោកក៏បានប្រាប់អ្នកសារព័ត៌មាន ឡារ៉ែន ថា ” រឿង វិកលចរិត គ្រោងធ្វើការសម្ពោធជាថ្មីម្ដងទៀតនៅថ្ងៃទី26 ខែកក្កដា ឆ្នាំ2017 នេះ”។

គួររំឭកផងដែរថា ដោយសារតែអ្នកដឹកនាំរឿងរូបនេះសង្កេតឃើញថា នៅមានកូនខ្មែរជាអ្នកស្រឡាញ់ និងគាំទ្រវិស័យភាពយន្ដខ្មែរជាច្រើននាក់ទៀតមិនទាន់បានទស្សនារឿង “វិកលចរិត” នេះ និងដើម្បីបានទស្សនាជាថ្មីម្ដងទៀតនោះ លោកសង្ឃឹមថា កូនខ្មែរគ្រប់រូបនឹងមិនខកខានក្នុងការទស្សនារឿងដ៏ល្អមើលមួយនេះឡើយ ដូចគ្នានោះដែរ ទស្សនិកក៏នឹងបានចូលរួមចំណែកក្នុងការចូលរួមបរិច្ចាគថវិកាជួយដល់កុមារកំព្រា និងក្មេងៗបាត់បង់សតិបញ្ញានៅកម្ពុជាផងដែរ។ ដូច្នោះហើយ ប្រសិនបើជាជនរួមជាតិណាមិនទាន់បានទស្សនារឿងនោះ សូមកុំឱ្យឱកាសដ៏ល្អនេះកន្លងផុតទៅឱ្យសោះ សូមអញ្ជើញទៅទស្សនាទាំងអស់គ្នានៅគ្រប់រោងភាពយន្តទូទាំងរាជធានីភ្នំពេញ និងខេត្តសៀមរាប៕

July 25, 2017

ក្លិបយក្សជប៉ុន FC Tokyo ខ្ចីជើងខ្សែបម្រើឆ្នើមពីក្លិប Bangkok United របស់ថៃ

ក្លិបយក្សរបស់ជប៉ុន FC Tokyo បានចុះហត្ថលេខាជាមួយនឹងខ្សែបម្រើដ៏ឆ្នើមអន្តរជាតិថៃ Jakkit Wachpirom ពីក្លិប Bangkok United ក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ។ នេះបើយោងតាមការប្រកាសរបស់ក្លិបស្ថិតក្នុងក្របខ័ណ្ឌកំពូល J-League មួយនេះ កាលពីថ្ងៃពុធ។ Jakkit វ័យ20ឆ្នាំ បានលេងឲ្យក្រុមជម្រើសជាតិថៃអាយុក្រោម23ឆ្នាំ និងបានស្ថិតជាសមាជិករបស់ក្រុមជម្រើសជាតិថៃដែលបានបញ្ចប់ក្នុងចំណាត់ថ្នាក់លេខ2ក្នុងព្រឹត្តិការណ៍ Asian Under-19 Championship កាលពីឆ្នាំមុន។ Jakkit គឺជាកីឡាករថៃទី2ដែលបានចូលរួមជាមួយនឹងក្របខ័ណ្ឌកំពូលជប៉ុន J-League ក្រោយពីខ្សែបម្រើដ៏ឆ្នើម Chanathip Songkrasin បានផ្ទេរទៅកាន់ក្លិប Consadole Sapporo។ កីឡាករ Jakkit បានឲ្យដឹងថា៖ «ខ្ញុំពិតជារីករាយណាស់ក្នុងការមានឱកាសទៅលេងនៅក្រៅប្រទេសនៅឯក្លិបល្បីដូចជា FC Tokyo នេះ។ ខ្ញុំនឹងខិតខំព្យាយាមឲ្យអស់ពីសមត្ថភាពតាមដែលខ្ញុំអាចធ្វើបាន និងព្យាយាមដណ្តើមលទ្ធផលឲ្យបានល្អបំផុត»។ ស្របពេលជាមួយគ្នានេះ ក្លិប FC Tokyo ក៏បានបញ្ជាក់ផងដែរថា ពួកគេបានចុះហត្ថលេខាជាមួយនឹងខ្សែបម្រើ Lipe Veloso ដែលជាអតីតកីឡាកររបស់ក្លិបប្រេស៊ីល Palmeiras និងខ្សែការពារអន្តរជាតិកូរ៉េខាងត្បូង Jang Hyun-soo ពីក្លិប Guangzhou R&F។ Jang ធ្លាប់បានលេងឲ្យក្លិប FC Tokyo ពីររដូវកាលមុនពេលផ្ទេរទៅកាន់ក្លិប Guangzhou កាលពីឆ្នាំ2014៕

ប្រភពពី៖ Bangkok Post

July 13, 2017

ឯកឧត្តម ម៉ៅ អាយុទ្ធ ៖ “ទៅសុំពឹងថៃថត ពិបាកជាងទៅសុំភ្លើងយក្ស…”

កាលពីរសៀលថ្ងៃម្សិលមិញនេះ មជ្ឈមណ្ឌលបណ្តុះបណ្តាលជំនាញ និងទទួលថតភាពយន្តបរទេសនៅកម្ពុជា ដែលស្ថិតក្រោមការដឹកនាំរបស់ក្រសួងវប្បធម៌ និងវិចិត្រសិល្បៈបានរៀបចំកម្មវិធីសិក្ខាសាលាមួយស្ដីអំពីការតាក់តែងនិពន្ធសិល្បៈ និងអារម្មណ៍របស់ភាពយន្ដនៅវិទ្យាស្ថានបារាំងក្នុងសាលាភាពយន្ដដែលវគ្គបណ្ដុះបណ្ដាលលើកទី2នេះ មានយុវវ័យជាផលិតករវ័យក្មេងដែលមានចំណាប់អារម្មណ៍និង ស្រឡាញ់វិស័យផលិតខ្សែភាពយន្ដចូលរួមយ៉ាងច្រើនកុះករ។

នៅក្នុងថ្ងៃដ៏វិសេសវិសាលនេះ ឯកឧត្តម ម៉ៅ អាយុទ្ធ ជារដ្ឋលេខាធិការក្រសួងព័ត៌មាន និងជាអ្នកទទួលបន្ទុកថតខ្សែភាពយន្ដខ្នាតធំរបស់ប្រទេសកម្ពុជា ជារឿងប្រវត្តិសាស្ត្រ គឺរឿង “ហ្លួងព្រះស្ដេចកន” នោះបានផ្ដល់កិត្តិយសធ្វើជាវាគ្មិនពិសេសក្នុងការចែករំលែកបទពិសោធនៃការសរសេរសេណារីយ៉ូ និងអារម្មណ៍នៃការតាក់តែងនិពន្ធអត្ថបទភាពយន្ដ។ លោកបានថ្លែងថា “កុនមានរយៈពេលជាង 2ម៉ោង ដូច្នេះយើងត្រូវគិតថា ក្នុងរយៈពេល1 ទៅ 2 នាទី និងរាល់នាទីទាំងអស់ដែលយើងបានបែងចែកនោះ តើយើងមានអ្វីឱ្យគេទស្សនានេះជាអ្វីដែលយើងត្រូវគិតមុនពេលធ្វើកុន”។

ជុំវិញបទពិសោធក្នុងការសរសេរកុន លោកបានបញ្ជាក់ទៀតថា “ការសរសរអត្ថបទភាពយន្ដត្រូវបានបែកចែកជា 6 ចំណុចធំៗគឺ អក្សរសិល្ប៍ ទិដ្ឋភាព នាដកម្មភ្លេងប្រកប និងចម្រៀងទើបសម្រេចបានចំណុចទី7 គឺជាភាពយន្ដហ្នឹងហើយ”។ មិនតែប៉ុណ្ណោះលោកបានរៀបរាប់ពីបទពិសោធជាច្រើនទៀតក្នុងការផលិតភាពយន្តខ្នាតធំរឿង “ហ្លួងព្រះស្ដេចកន” ដែលបានឆ្លងកាត់បទពិសោធលំបាកៗជាច្រើន ជាពិសេសការគ្រប់គ្រងសត្វ និងបញ្ជាសត្វសេះ ដែលលោកហៅថា សេះសម្លព្រោះត្រូវការបង្វឹកឱ្យសត្វទាំងនេះស៊ាំជាមួយតារាសម្ដែង អាវុធ និងសម្លៀកបំពាក់គឺប្រើប្រាស់រយៈពេលយូរ ។

ពាក់ព័ន្ធជាមួយបញ្ហាដែលបានចោទសួរថាមានការសហការថតរឿងប្រវត្តិសាស្ដ្រនេះជាមួយប្រទេសថៃឬទេនោះ លោកបានថ្លែងថា “ធ្លាប់បានពិភាក្សា និងពឹងថៃឱ្យជួយថតដែរ តែវាពិបាកជាងទៅសុំភ្លើងយក្សទៅទៀតទើបមិនចង់ពឹងថៃសោះ ព្រោះសមត្ថភាពយើងមានដែរ ខ្លាចអ្វីនឹងធ្វើ”។ ជាចុងក្រោយឯកឧត្តមបានបញ្ជាក់ទៀតថា លោកជាអ្នកស្រឡាញ់ការផលិតភាពយន្ដសូម្បីគ្រប់ទង្វើ និងកាយវិការដែលលោកធ្វើ គឺគិតពីប្លង់របស់ភាពយន្ដគ្រប់ពេលហើយលោកបានសិក្សាជំនាញនេះ មុនពេលសម័យខ្មែរក្រហមចូលមកទៅទៀតព្រមទាំងបានសរសេរនិក្ខេបបទពីភាពយន្ដឱ្យសាស្ត្រាចារ្យបារាំងទៀតផង៕

July 1, 2017

Tag: ថៃ