ឈ្នះ - La Reine Media

Mbappe ថា ខ្លួនស័ក្ដិសមនឹងការទទួលបានបាល់មាសនៅរដូវកាលនេះ

(បារាំង) – ខ្សែប្រយុទ្ធ Kylian Mbappe យល់ថា ដោយបានរួមចំណែកនៅក្នុងក្លឹបបាល់ទាត់ PSG និងក្រុមជម្រើសជាតិបារាំង គាត់ពិតជាបានបំពេញតាមលក្ខខណ្ឌនានាសម្រាប់ពានរង្វាន់គ្រាប់បាល់មាសឆ្នាំ 2023។

កាលពីព្រលប់ថ្ងៃទី 19 មិថុនា បន្ទាប់ពីទាត់ចូលទីបានមួយគ្រាប់ ជួយឱ្យបារាំងឈ្នះក្រិក 1-0 នៅក្នុងវគ្គជម្រុះ Euro 2024 Mbappe ត្រូវបានសួរថា តើមានអារម្មណ៍ថាខ្លួនឯងស័ក្ដិសមជាមួយនឹងគ្រាប់បាល់មាសឆ្នាំ 2023 ឬទេ។ Mbappe ឆ្លើយថា «ខ្ញុំនឹងនិយាយថាមាន។ ខ្ញុំបានបំពេញគ្រប់លក្ខខណ្ឌ។ ប៉ុន្តែពានរង្វាន់នេះអាស្រ័យទៅលើសន្លឹកឆ្នោត»។

ក្នុងការប្រកួតនៅលើទីលាន Stade de France កំពូលកីឡាករ Mbappe បានទាត់បាល់ពិន័យរកបានមួយគ្រាប់គត់នៅនាទីទី 55។ នេះគឺជាគ្រាប់បាល់ទី 54 របស់ Mbappe រាប់ចាប់តាំងពីដើមរដូវកាល 2022-2023 ដែលនេះគ្រប់គ្រាន់ដើម្បីក្លាយជាកីឡាករបារាំងដែលរកបានគ្រាប់បាល់ឈ្នះច្រើនជាងគេបំផុតក្នុងមួយរដូវកាល។

ពានរង្វាន់គ្រាប់បាល់មាសត្រូវបានរៀបចំឡើងដោយទស្សនាវដ្ដីបារាំង France Football។ អ្នកចូលរួមបោះឆ្នោតជ្រើសរើសម្ចាស់គ្រាប់បាល់មាសគឺជាអ្នកសារព័ត៌មានមកពីជុំវិញពិភពលោក។ ថ្ងៃទី 30 តុលា 2023 France Football នឹងប្រគល់ពានរង្វាន់នេះនៅទីក្រុងប៉ារីស។ Messi កំពុងកាន់កាប់កំណត់ត្រាគ្រាប់បាល់មាស ខណៈ Mbappe និង Haaland មិនទាន់ទទួលបានពានរង្វាន់នេះនៅឡើយ៕

Mbappe ទាត់ចូលទីបានមួយគ្រាប់ ជួយឱ្យបារាំងឈ្នះក្រិក 1-0 នៅក្នុងការប្រកួតវគ្គជម្រុះ Euro 2024 កាលពីថ្ងៃទី 19 មិថុនា 2023

https://www.youtube.com/watch?v=Topwjxtlbeo

June 20, 2023

ពានរង្វាន់ជើងឯកបាល់ទាត់អឺរ៉ុប Nations League បានទៅលើក្លឹបរបស់អេស្ប៉ាញ

(ហូឡង់) – អេស្ប៉ាញឈ្នះក្រូអាត 5-4 នៅក្នុងការទាត់ប៉េណាំងទីម្ដងម្នាក់ ក្រោយពីទទួលបានលទ្ធផល 0-0 ក្នុងរយៈពេល 120 នាទី នៅក្នុងវគ្គផ្ដាច់ព្រ័ត្រកាលពីព្រលប់ថ្ងៃទី 18 មិថុនា ដូច្នេះ អេស្ប៉ាញបានលើកពានជើងឯក Nations League។

ក្នុងការប្រកួត អេស្ប៉ាញគ្រប់គ្រងបាល់បាន 55% និងទាត់ផ្ដាច់បាន 21 លើក ច្រើនជាងឆ្ងាយធៀបនឹង 12 លើករបស់ក្រូអាត។ ក៏ប៉ុន្តែ ដោយសារតែនេះជាវគ្គចុងក្រោយ ក្រុមទាំងពីរសុទ្ធតែធ្វើបានល្អស្ទើរតែដូចគ្នា នាំឱ្យមានលទ្ធផល 0-0 នៅក្នុងការប្រកួតរយៈពេល 120 នាទី។

ចូលដល់វគ្គទាត់ប៉េណាំងទីម្ដងម្នាក់ដើម្បីស្វែងរកអ្នកឈ្នះ អ្នកចាំទី Unai Simon បានក្លាយជាវីរបុរសរបស់ប្រទេសអេស្ប៉ាញ។ Unai Simon រារាំងបាល់ប៉េណាំងទីបានពីរគ្រាប់របស់ Majer នៅគ្រាប់ទី 4 និង Bruno Petkovic នៅគ្រាប់ទី 6។ ចំណែក Nikola Vlasic, Marcelo Brozovic, Modric និង Ivan Perisic ទាត់បានសម្រេចជូនក្រូអាត ខណៈ Joselu, Rodri, Mikel Merino, Marco Asensio និង Dani Carvajal សម្រេចបានភារកិច្ចសម្រាប់អេស្ប៉ាញ។ បន្ទាប់ពីអ្នកចាំទី Simon របស់អេស្ប៉ាញ រារាំងគ្រាប់បាល់របស់ Petkovic បានសម្រេច Carvajal ក៏ទាត់ផ្ដាច់បានជោគជ័យ ជួយឱ្យអេស្ប៉ាញឈ្នះ 5-4។

នេះជាលើកដំបូងហើយដែលក្លឹបបាល់ទាត់របស់ប្រទេសអេស្ប៉ាញ ដណ្ដើមបានពានរង្វាន់ជើងឯក Nations League។

Nations League គឺជាការប្រកួតដណ្ដើមពានរង្វាន់បាល់ទាត់អន្តរជាតិដែលត្រូវបានធ្វើឡើងពីរឆ្នាំម្ដង រវាងបណ្ដាក្រុមជម្រើសជាតិបុរសលំដាប់កំពូលរបស់បណ្ដាសមាគមជាសមាជិករបស់ UEFA។ UEFA គឺជាស្ថាប័នគ្រប់គ្រងផ្នែកបាល់ទាត់របស់អឺរ៉ុប។ ការប្រកួតដណ្ដើមពានរង្វាន់នេះ បានចាប់ផ្ដើមលើកដំបូងកាលពីខែកញ្ញា ឆ្នាំ 2018៕

June 19, 2023

រថយន្ត Concept Nyobolt EV បញ្ចូលអគ្គិសនីមួយពេញក្នុងរយៈពេល 6 នាទី

ការចំណាយពេលយូរក្នុងការបញ្ចូលថាមពលថ្មគឺជារឿងដែលត្រូវបានរិះគន់បំផុតរបស់រថយន្តអគ្គិសនី មិនថាជាប្រភេទទំនើប ឬតម្លៃថ្លៃ ហើយវាមិនអាចយកឈ្នះលើរថយន្តប្រើម៉ាស៊ីនចំហេះក្នុង នាបច្ចុប្បន្ន។ ប៉ុន្តែ ពេលនេះមានក្រុមហ៊ុនមួយបានប្រកាសព័ត៌មានដ៏ប្រសើរសម្រាប់រថយន្តអគ្គិសនី។

ក្រុមហ៊ុន Nyobolt ដែលជាអ្នកអភិវឌ្ឍថ្មផ្ទុកអគ្គិសនី មានទីស្នាក់ការកណ្ដាលនៅចក្រភពអង់គ្លេស បានប្រកាសថា ពួកគេមានបច្ចេកវិទ្យាថ្មី អនុញ្ញាតឱ្យបញ្ចូលថាមពលអគ្គិសនីបានរហ័សបំផុត។ ក្រុមហ៊ុននេះកំពុងដាក់តាំងបង្ហាញរថយន្តប្រភេទកីឡាគំរូមួយគ្រឿងដែលដំណើរការដោយអគ្គិសនី បំពាក់ថ្មផ្ទុកថាមពលដែលអាចបញ្ចូលអគ្គិសនីមួយពេញក្នុងរយៈពេលមិនដល់ 6 នាទី។

រថយន្តគំរូនេះមានថ្ម 35 គីឡូវ៉ាតម៉ោង ដែលអាចឱ្យរត់បានចម្ងាយប្រហែល 250 គីឡូម៉ែត្រ ក្រោយពីបញ្ចូលអគ្គិសនីមួយពេញ នៅពេលត្រូវបានដំឡើងក្នុងរថយន្ត coupe កីឡា ដែលមានទម្ងន់ប្រហែលជាង 1,500 គីឡូក្រាម។

Nyobolt ប្រកាសថា ថ្មផ្ទុកថាមពលថ្មីរបស់ពួកគេត្រូវបានធ្វើតេស្តដោយការបញ្ចូលថាមពលអគ្គិសនីជាង 2,000 លើក និងទទួលបានលទ្ធផលល្អ។

June 16, 2023

Messi រកគ្រាប់បាល់បានលឿនបំផុតក្នុងអាជីព ពេលប៉ះអូស្ត្រាលីនៅប្រទេសចិន

(ប្រទេសចិន) – កំពូលតារាបាល់ទាត់ Lionel Mess បានបង្ហាញកំពូលថ្វីជើងរបស់ខ្លួននៅវិនាទីទី 79 ដែលបានជួយឱ្យក្រុមជម្រើសជាតិអាហ្សង់ទីនឈ្នះអូស្ត្រាលី 2-0 នៅក្នុងការប្រកួតមិត្តភាពនៅទីក្រុងប៉េកាំងប្រទេសចិន កាលពីព្រលប់ម្សិលមិញ។

គ្រាប់បាល់ឈ្នះរបស់ Messi កើតឡើងបន្ទាប់ពីខ្សែបម្រើ Enzo Fernadez ដណ្ដើមបានបាល់ពីកីឡាករអូស្ត្រាលី រួចបញ្ជូនទៅឱ្យប្រធានក្រុម។ Messi ទទួលបានបាល់នៅត្រង់ខ្សែកណ្ដាល អូសបាល់បញ្ច្រាសទិសរត់របស់គូប្រជែង នាំឱ្យកីឡាករអូស្ត្រាលីម្នាក់ដួល រួចទាត់ប្លោងសំដៅជ្រុងម្ខាង ផុតពីដៃអ្នកចាំទី Matthew Ryan។ គ្រាប់បាល់នេះពេញដោយស្ទីលរបស់ Messi ព្រោះកីឡាករនេះធ្លាប់រកបានគ្រាប់បាល់រាប់សិបគ្រាប់តាមរយៈវិធីទាត់បែបនេះនៅក្នុងអាជីព។

នេះគឺជាគ្រាប់បាល់ដែលរកបានឆាប់បំផុតក្នុងអាជីពរបស់ Messi ដោយសារកើតឡើងនៅក្នុងនាទីទីពីរ។ ក្នុង 90 នាទីនៃការប្រកួតមិត្តភាពរវាងអាហ្សង់ទីន និងអូស្ត្រាលី នៅប្រទេសចិន Messi គ្រាន់តែមិនអាចរកបានគ្រាប់បាល់នៅនាទីដំបូងប៉ុណ្ណោះ។ នៅក្នុង 807 គ្រាប់ដែល Messi រកបានក្នុងអាជីព មាន 45 គ្រាប់រកបានក្នុងពេលថែមម៉ោងតង់ទីពីរ និង 22 គ្រាប់ក្នុងពេលថែមម៉ោងតង់ទីមួយ។ ក្រៅពីនេះ ពេលវេលាដែល M10 រកបានគ្រាប់បាល់ច្រើនបំផុតក្នុង 90 នាទី គឺនៅនាទីទី 43 និង 55។

នៅពេល Messi ស៊ុតចូលទី ទស្សនិកជននៅឯកីឡដ្ឋានពលករក្នុងទីក្រុងប៉េកាំង នាំគ្នាស្រែកហ៊ោដូចទៅនឹងក្រុមជម្រើសជាតិចិនទើបតែបានទាត់ចូលទី។ ថ្វីបើទាត់នៅប្រទេសចិន ប៉ុន្តែការប្រកួតរវាងក្រុមជម្រើសជាតិអាហ្សង់ទីន និងអូស្ត្រាលី ទទួលបានការគាំទ្រពីទស្សនិកជនជិត 70,000 នាក់នៅឯកីឡដ្ឋាន។ ទស្សនិកជនភាគច្រើនពាក់អាវ M10 របស់ Messi ដើម្បីលើកទឹកចិត្តក្រុមអាហ្សង់ទីន។

ដោយសារតែកម្លាំង និងបច្ចេកទេសខ្លាំងក្លា អាហ្សង់ទីនក៏រកបានមួយគ្រាប់ទៀតនៅនាទីទី 68 ហើយនេះក៏ជាគ្រាប់បាល់ដែលកំណត់ឱ្យអាហ្សង់ទីនឈ្នះអូស្ត្រាលី 2-0។ គ្រាប់បាល់នេះក៏មានការរួមចំណែកពី Messi នៅពេលគាត់បញ្ជូនបាល់ឱ្យ Rodrigo de Paul ដើម្បីឱ្យខ្សែបម្រើនេះប្លោងបាល់បន្ត ជួយឱ្យ German Pezzella តែតបញ្ចូលទីបានសម្រេច។

បន្ទាប់ពីការប្រកួតនេះ អាហ្សង់ទីននឹងហោះទៅកាន់ហ្សាការតា ដើម្បីប្រកួតមិត្តភាពជាមួយក្រុមឥណ្ឌូណេស៊ី ប៉ុន្តែ Messi ទំនងជានឹងអវត្តមាន។ ព្រោះថា គាត់បានយល់ព្រមលេងបាល់ក្នុងការប្រកួតផ្ដល់កិត្តិយស និងសម្ដែងការដឹកគុណដល់អតីតខ្សែបម្រើ Juan Roman Riquelme នៅថ្ងៃទី 26 មិថុនា នៅអាហ្សង់ទីន៕

June 16, 2023

ប្រធានាធិបតីបារាំងថ្លែងអំពីរឿងអនាគតរបស់ Kylian Mbappe

ប្រធានាធិបតីបារាំងលោក Emmanuel Macron បានថ្លែងថា លោកនឹងព្យាយាមបញ្ចុះបញ្ចូល Kylian Mbappe ឱ្យនៅជាមួយក្លឹប Paris Saint-Germain ម្ដងទៀត នៅរដូវក្ដៅឆ្នាំនេះ។

លោក Emmanuel Macron បញ្ជាក់ថា លោកបានត្រៀមខ្លួនរួចហើយសម្រាប់ការជជែកគ្នាម្ដងទៀតជាមួយនឹង Mbappe ក្នុងបំណងបញ្ចុះបញ្ចូលឱ្យកីឡាករបារាំងរូបនេះលេងបាល់ឱ្យក្លឹបក្នុងស្រុក។ ប្រសាសន៍របស់លោក Emmanuel Macron ត្រូវបានធ្វើឡើងបន្ទាប់ពី Mbappe កាលពីពេលថ្មីៗនេះ បានប្រកាសជាផ្លូវការថា មិនមានបំណងពន្យារកិច្ចព្រមព្រៀងជាមួយក្លឹប PSG និងត្រូវចាកចេញក្រោយពីចប់កិច្ចសន្យា។ ចំណែក PSG ក៏បានប្រកាសអំពីតម្លៃខ្លួន 200 លានអឺរ៉ូរបស់ Mbappe។

លោក Emmanuel Macron ថ្លែងថា «Mbappe គឺជាកីឡាករឆ្នើម និងស្ថិតក្នុងលំដាប់កំពូល ដូចដែលគ្រប់គ្នាបានដឹង។ ដូច្នេះ គាត់មានទំនោរទៅរកការធ្វើចំណាកស្រុកដើម្បីអភិវឌ្ឍសមត្ថភាព និងយកឈ្នះលើឧបសគ្គថ្មីក្នុងអាជីព»។ លោកបន្ថែមថា «ក៏ប៉ុន្តែ បច្ចុប្បន្ន ខ្ញុំមិនមានដំណឹងល្អណាមួយសម្រាប់គ្រប់គ្នា តែយ៉ាងណាក៏ដោយ ខ្ញុំនឹងប្រឹងប្រែងឱ្យអស់ពីលទ្ធភាព (ក្នុងការបញ្ចុះបញ្ចូល Mbappe) ដូចអ្វីដែលខ្ញុំបានធ្វើកន្លងមក»។

លោក Emmanuel Macron លើកទឹកចិត្ត Kylian Mbappe នៅ World Cup 2022

កាលពីឆ្នាំមុន ប្រធានាធិបតីបារាំង ក៏បានជជែកគ្នាជាមួយ Mbappe ទាក់ទងនឹងអនាគតរបស់កីឡាករនេះ ហើយ PSG ក៏រក្សាបាន Mbappe មួយឆ្នាំទៀត។ ក៏ប៉ុន្តែ លើកនេះ ស្ថានភាពនៅក្លឹប PSG ហាក់មិនល្អប្រសើរ គ្រាដែលកីឡាករកំពូលៗរបស់ក្លឹបនេះ មានដូចជា Messi ជាដើម ត្រូវបានអ្នកគាំទ្ររបស់ PSG ធ្វើបាបផ្លូវចិត្ត ហើយជើងខ្លាំងខ្លះក៏ចាកចេញ ឬមានបំណងចាកចេញជាបន្តបន្ទាប់ ស្របពេលដែលទីផ្សារក្រៅប្រទេសកំពុងមានភាពទាក់ទាញខ្លាំង៕

June 15, 2023

UEFA ប្រកាសអំពីម្ចាស់ពានរង្វាន់ «កីឡាករឆ្នើមបំផុតនៅ Champions League»

ក្នុងនាមជាម្ចាស់ជើងឯកបាល់ទាត់ Champions League យើងងាយយល់បានថា ហេតុអ្វីកីឡាកររបស់ Man City ក្លាយជាម្ចាស់ពានរង្វាន់កីឡាឆ្នើមបំផុតប្រចាំព្រឹត្តិការណ៍នេះ។

Man City បានក្លាយជាម្ចាស់ជើងឯកពានរង្វាន់បាល់ទាត់ Champions League ជាលើកដំបូងក្នុងប្រវត្តិសាស្ត្រ បន្ទាប់ពីបានផ្ដួល Inter Milan ដោយលទ្ធផល 1-0 នៅវគ្គផ្ដាច់ព្រ័ត្រកាលពីវេលាទៀបភ្លឺថ្ងៃទី 11 មិថុនា 2023 (ម៉ោងនៅកម្ពុជា)។ នេះគឺជាសមិទ្ធផលដ៏សក្ដិសមសម្រាប់កូនសិស្ស និងគ្រូបង្វឹក Pep Guardiola ក្រោយពីអ្វីដែលពួកគេបានធ្វើនៅក្នុងរដូវកាលនេះ។

មិនយូរប៉ុន្មានបន្ទាប់ពីពានរង្វាន់ជើងឯកបាល់ទាត់ Champions League ត្រូវបានប្រគល់ សហព័ន្ធកីឡាបាល់ទាត់អឺរ៉ុប (UEFA) ក៏បានប្រកាសឈ្មោះម្ចាស់ជ័យលាភី «កីឡាករឆ្នើមបំផុតរបស់ Champions League 2022/2023»។ កំពូលកីឡាករ Erling Haaland ពុំមែនជាអ្នកបានទទួលពានរង្វាន់នេះ បើទោះរកបាន 12 គ្រាប់ឱ្យ Man City។ ពានរង្វាន់នេះបានទៅលើកីឡាករ Rodri (Rodrigo Hernández Cascante)។

Rodri គឺជាអ្នកបានជួយឱ្យ Man City ឈ្នះនៅវគ្គផ្ដាច់ព្រ័ត្រ Champions League។ នេះក៏ជាលើកទីមួយក្នុងប្រវត្តិសាស្ត្រដែល Man City បានក្លាយជាក្រុមបាល់ទាត់ទីពីរនៅអង់គ្លេស ដែលដណ្ដើមបានពានរង្វាន់ជើងឯកចំនួនបីក្នុងមួយរដូវកាល បន្ទាប់ពី Man Utd ដណ្ដើមបានកាលពីឆ្នាំ 1999៕

June 12, 2023

ប្រាក់រង្វាន់ Champions League 2022-2023 ៖ ក្រុមនីមួយៗនឹងទទួលបានប៉ុន្មាន?

ការដែលបានឡើងទាត់ដណ្ដើមពានរង្វាន់ Champions League មិនត្រឹមតែជាកិត្តិយសនោះទេ ប៉ុន្តែក៏អមជាមួយនឹងផលប្រយោធន៍ជាច្រើនដែលទាក់ទងនឹងហិរញ្ញវត្ថុផងដែរ។

UEFA Champions League គឺជាគោលដៅធំរបស់ក្រុមបាល់ទាត់ជាច្រើន នៅពេលពួកគេចាត់ទុកថា នេះគឹជាឱកាសល្អដើម្បីបង្កើនប្រាក់ចំណូល។ កាន់តែចូលដល់វគ្គសំខាន់ៗ ក្លឹបនីមួយៗទទួលបានប្រាក់រង្វាន់កាន់តែច្រើន។

នៅក្នុងរដូវកាលនេះ Man City និង Inter Milan បានឡើងដល់វគ្គផ្ដាច់ព្រ័ត្រដែលគ្រោងនឹងប្រកួតនៅឯទីលាន Ataturk Olympic នៃប្រទេសតួកគី នៅវេលាម៉ោង 02 ថ្ងៃទី 11 មិថុនា (ម៉ោងនៅកម្ពុជា)។

ថ្មីៗនេះ សហព័ន្ធកីឡាបាល់ទាត់អឺរ៉ុប (UEFA) ទើបតែបានប្រកាសទិន្នន័យស្ដីពីប្រាក់រង្វាន់សម្រាប់សម្រាប់ក្រុមដែលទាត់នៅ Champions League រដូវកាល 2022-2023 ដែលមានតម្លៃរហូតដល់ 2.032 ពាន់លានអឺរ៉ូ (ប្រហែល 1.98 ពាន់លានដុល្លារអាម៉េរិក)។

ខាងក្រោមនេះគឺជាស្ថិតិស្ដីពីខ្ទង់ប្រាក់ដែលក្រុមបាល់ទាត់នីមួយៗនឹងអាចទទួលបានពេលចូលរួមលេងនៅឯពានរង្វាន់ Champions League រដូវកាល 2022-2023។

ប្រាក់រង្វាន់នៅ Champions League 2022-2023
វគ្គ	ប្រាក់រង្វាន់
ផ្ដាច់ព្រ័ត្រ	20 លានអឺរ៉ូ
លេខពីរ	15.5 លានអឺរ៉ូ
ពាក់កណ្ដាលផ្ដាច់ព្រ័ត្រ	12.5 លានអឺរ៉ូ
8 ក្រុមចុងក្រោយ	10.6 លានអឺរ៉ូ
16 ក្រុម	9.6 លានអឺរ៉ូ
ឈ្នះនៅវគ្គវិលជុំ	2.8 លានអឺរ៉ូ
ស្មើនៅវគ្គវិលជុំ	930 ពាន់អឺរ៉ូ
ចូលរួមនៅវគ្គវិលជុំ	15.64 ពាន់អឺរ៉ូ

June 10, 2023

គ្រូបង្វឹក Mourinho «ជេរធ្ងន់ៗ» លើអាជ្ញាកណ្ដាល បន្ទាប់ពីក្រុមអេស្ប៉ាញឈ្នះក្រុមអ៊ីតាលីនៅ Europa League

(ហុងគ្រី) – គ្រូបង្វឹក Jose Mourinho ស្ដីបន្ទោសអាជ្ញាកណ្ដាល Anthony Taylor យ៉ាងចាស់ដៃ ពេលជួបគ្នានៅចំណតឡាន ក្រោយពីការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League។

«អ…ចង្រៃ អ…ថោកទាប» លោក Mourinho និយាយជាភាសាអង់គ្លេស ជេរទៅលើអាជ្ញាកណ្ដាល Taylor ដូច្នេះ។ បន្ទាប់មក គ្រូបង្វឹកក្រុម Roma របស់អ៊ីតាលីរូបនេះក៏ជេរបន្តជាភាសាអ៊ីតាលីថា «អ…ងា.ប់»។ ជាងនេះ មុនពេលឡើងឡានរបស់ក្រុម Roma លោក Mourinho ក៏បន្តថា «សូមអបអរ អ…ថោក»។

មុននោះ លោក Mourinho និងក្រុមកីឡាកររបស់ក្លឹប Roma យល់ថា អាជ្ញាកណ្ដាល Taylor លំអៀងទៅរក Sevilla។ ពួកគេចោទថា អាជ្ញាកណ្ដាលជនជាតិអង់គ្លេស មិនពិន័យកាតលឿងទីពីរចំពោះ Erik Lamela ពេលមានករណីប៉ះទង្គិចគ្នានៅចុងម៉ោង។ ក្រោយមក Lamela ក៏ចូលរួមទាត់មួយគ្រាប់នៅក្នុងការប្រកួតទាត់ប៉េណាំងទីម្ដងម្នាក់ឱ្យ Sevilla។ ខាងក្រុម Roma ក៏ក្ដៅចិត្តខ្លាំងនៅពេលអាជ្ញាកណ្ដាលមិនផ្លុំកញ្ចែពិន័យប៉េណាំងទី បន្ទាប់ពីដៃរបស់ Fernando ប៉ះបាល់ក្នុងតំបន់គ្រោះថ្នាក់ផងដែរ។

ក្រោយការប្រកួត លោក Mourinho ក៏បាននិយាយថា «អាជ្ញាកណ្ដាលទំនងជាជនជាតិអេស្ប៉ាញ។ ភាពអយុត្តិធម៌បានបង្ហាញតាមរយៈ Lamela ដែលគួរណាស់តែត្រូវបានពិន័យកាតលឿងទីពីរ»។

អាជ្ញាកណ្ដាល Taylor បានពិន័យកាតលឿងចំនួន 14 ដែលនេះគឺជាកំណត់ត្រាថ្មីក្នុងការប្រកួតផ្ដាច់ព្រ័ត្រមួយប្រកួតនៅទ្វីបអឺរ៉ុប។

នេះមិនមែនជាលើកដំបូងឡើយដែលលោក Mourinho បានទៅរកអាជ្ញាកណ្ដាលដើម្បីស្ដីបន្ទោស បន្ទាប់ពីការប្រកួត។ កាលពីឆ្នាំ 2012 ក្រោយការប្រកួតចាញ់ Barca នៅពានរង្វាន់ Copa del Rey របស់អេស្ប៉ាញ គ្រូបង្វឹករូបនេះក៏ត្រូវរងការចោទប្រកាន់ដូចគ្នានេះដែរ។

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League។

June 1, 2023

ក្លឹបបាល់ទាត់អេស្បាញ ក្លាយជាជើងឯក Europa League ពេលបានឈ្នះក្លឹបអ៊ីតាលី

(ហុងគ្រី) – គ្រូបង្វឹក Jose Mourinho បានបរាជ័យជាលើកដំបូងនៅវគ្គផ្ដាច់ព្រ័ត្រនៃការប្រកួតដណ្ដើមពានរង្វាន់បាល់ទាត់ Europa League នៅពេល Roma ដែលជាក្រុមបាល់ទាត់របស់ក្លឹបអ៊ីតាលី បានចាញ់ក្រុមរបស់ក្លឹបអេស្បាញ Sevilla 1-4 ក្នុងការទាត់ប៉េណាំងទីម្ដងម្នាក់នៅចុងការប្រកួត។

កីឡាករខ្សែបម្រើពីររូបគឺ Gianluca Mancini និង Roger Ibanez សុទ្ធតែទាត់បាល់មិនបានល្អ ធ្វើឱ្យ Roma ចាញ់ 1-4 នៅក្នុងការទាត់ប៉េណាំងទីម្ដងម្នាក់ ហើយក៏បាត់បង់តំណែងជើងឯក Europa League និងមិនអាចចូលរួមប្រកួតនៅ Champions League រដូវកាលក្រោយ។

កូនសិស្ស និងគ្រូបង្វឹក Mourinho ប្រាកដជាស្ដាយក្រោយខ្លាំងណាស់ នៅពេលធ្វើឱ្យរបូតឱកាសល្អជាច្រើននៅក្នុងតង់ទីមួយ ទីពីរ ក៏ដូចជានៅក្នុងម៉ោងបន្ថែមដែលទទួលបានលទ្ធផល 1-1 មុននឹងចាញ់ 1-4 នៅក្នុងការទាត់ប៉េណាំងទី។

ចំណែក Sevilla វិញ បានបង្ហាញភាពខ្លាំង និងភាពជាអ្នកសម្បូរសមិទ្ធផលជាងគេនៅក្នុងប្រវត្តិ Europa League ដោយការទាត់ប៉េណាំងទីម្ដងម្នាក់បានសម្រេច។ ក្រុមនេះក៏សុទ្ធតែបានឈ្នះនៅក្នុងការប្រកួតផ្ដាច់ព្រ័ត្រទាំង 7 លើកនៅ Europa League បើរាប់ទាំងជ័យជម្នះលើ Roma នៅលើកនេះ។

ជាថ្មីម្ដងទៀត បណ្ដាក្លឹបតំណាងរបស់អេស្ប៉ាញបានបង្ហាញ «អំណាច» របស់ខ្លួននៅទ្វីបអារ៉ុប ដោយសារបានឈ្នះការប្រកួតវគ្គផ្ដាច់ព្រ័ត្រចំនួន 18 លើកជាប់ៗគ្នានៅចំពោះមុខគូប្រកួតមកពីប្រទេសផ្សេងក្នុងទ្វីបនេះ។ បណ្ដាក្រុមបាល់ទាត់របស់អេស្ប៉ាញ ក៏មិនបានចាញ់នៅក្នុងវគ្គផ្ដាច់ព្រ័ត្រចំនួន 23 លើកនៅ Champions League និង Europa League រាប់ចាប់តាំងពីឆ្នាំ 2001។ សមិទ្ធផលនេះនឹងអូសបន្លាយពេលយូរ យ៉ាងហោចក៏ដល់ឆ្នាំ 2024៕

June 1, 2023

ប្ដីឡើងលើឆាកបោកកម្ទេចមកុដបវរកញ្ញា ព្រោះតែប្រពន្ធមិនទទួលបានតំណែងលេខមួយ

(ប្រេស៊ីល) – ប្ដីរបស់បេក្ខនារីមួយរូបបានលោតឡើងលើឆាក ឆក់យកមកុដរបស់បវរកញ្ញាឯក ហើយបោកទៅលើឆាក នៅពេលដឹងថា ប្រពន្ធមិនបានគ្រងតំណែងបវរកញ្ញាឯកនៅ Miss Gay Mato Grosso 2023។

ហេតុការណ៍នេះបានកើតឡើងនៅក្នុងវគ្គផ្ដាច់ព្រ័ត្រនៃការប្រលងបវរកញ្ញាប្ដូរភេទ Miss Gay Mato Grosso 2023 នៅទីក្រុង Cuiaba របស់ប្រេស៊ីល កាលពីថ្ងៃទី 27 ឧសភា 2023។ មុនពេលកើតហេតុ បេក្ខនាទី Nathally Becker (តំណាងឱ្យ Cuiaba) និង Emannuelly Belini (តំណាងឱ្យ Varzea Grande) បានឡើងដល់ Top 2 នៃបេក្ខនារីសម្រាប់តំណែងបវរកញ្ញាឯក។

នៅពេលដែលគណៈកម្មការប្រកាសថា Belini ជាអ្នកឈ្នះ ស្រាប់តែប្ដីរបស់ Becker ឈ្មោះ Matheus Oliveira រត់ឡើងឆាក ឆក់យកមកុដពីដៃរបស់អ្នកដែលកំពុងត្រៀមបំពាក់ឱ្យបវរកញ្ញា រួចបោកទៅលើឆាក។ នៅចំពោះមុខការភ្ញាក់ផ្អើលរបស់ទស្សនិក Oliveira ក៏ទាញសក់ និងប្រុងអូសប្រពន្ធចាកចេញ។ ប៉ុន្តែ កម្លាំងសន្តិសុខក៏បានឡើងទៅលើឆាក និងបានប្រទាញប្រទង់គ្នាមុនពេលចាប់ឃាត់ខ្លួន Oliveira។

Malone Haenisch ដែលជាអ្នករៀបចំកម្មវិធីប្រលងនេះ បាននិយាយថា «គាត់យល់ថា លទ្ធផលនេះមិនមានយុត្តិធម៌ ហើយក៏បង្កហេតុនេះឡើង។ យើងគោរពតាមការសម្រេចរបស់គណៈកម្មការផ្ដល់ពិន្ទុ ហើយក៏មានការអធ្យាស្រ័យចំពោះ Belini ក៏ដូចជា Becker ព្រោះថា នាងមិនទាក់ទងនឹងសកម្មភាពរបស់ស្វាមីនាងឡើយ»។

Emannuelly Belini ដែលជាប់ជាបវរកញ្ញាឯកនៅ Miss Gay Mato Grosso 2023

យោងតាម Daily Mail បន្ទាប់ពីមកុដខាងលើបានបែកបាក់ Haenisch ក៏បានប្រគល់មកុដថ្មីដល់បវរកញ្ញាឯក Belini។ អ្នកដឹកនាំស្ថាប័ន Miss Gay Mato Grosso ក៏បាននិយាយថា នឹងមានចំណាត់ការផ្លូវច្បាប់ចំពោះសកម្មភាពបំផ្លិចបំផ្លាញរបស់ Oliveira។ ចំណែកបវរកញ្ញារងទីមួយ Becker វិញ មិនទាន់មានការអធិប្បាយអ្វីនៅឡើយ ទាក់ទិននឹងទង្វើរបស់ប្ដី៕

Revolta na final do concurso Miss Brasil Gay 2023. Torcedor arranca coroa da vencedora e joga no chão durante a cerimônia de premiação. pic.twitter.com/rb6duFvAEn
— Bruno Guzzo® (@brunoguzzo) May 28, 2023

May 30, 2023

Tag: ឈ្នះ