Tag: ជប៉ុន

បើកប្រវត្តិប្រុសស្អាត អភិបាលខេត្តហុកកៃដូ ប្រទេសជប៉ុន បុរសក្លាហាន ពុះពារស្ដារវិបត្តិ COVID-19
ខេត្តហុកកៃដូ ប្រទេសជប៉ុន កំពុងត្រូវវីរុសកូរ៉ូណាប្រភេទថ្មីរុករានរាតត្បាតយ៉ាងធ្ងន់ធ្ងរ រហូតដល់ត្រូវប្រកាសសភាវអាសន្ន សុំឱ្យប្រជាជនស្ថិតនៅតែក្នុងផ្ទះរយៈពេល 2សប្ដាហ៍…តែគ្រាន់តែមានសេចក្ដីប្រកាសនេះភ្លាម បណ្ដានារីៗទាំងនៅក្នុងប្រទេសជប៉ុន និងក្នុងប្រទេសជាច្រើនទៀត បែរជាផ្ដល់ចំណាប់អារម្មណ៍ទៅលើលោកអភិបាលខេត្តរូបសង្ហា ដែលមានឈ្មោះថា “ណាអូមិជិ ស៊ូស៊ិគិ” នេះទៅវិញ។
ណាអូមិជិ ស៊ូស៊ិគិ 鈴木直道 អាយុ 38ឆ្នាំ ជាអភិបាលខេត្តដែលមានអាយុតិចបំផុតនៅក្នុងប្រទេសជប៉ុន ទើបនឹងទទួលតំណែងថ្មីៗ កាលពីខែមេសា ឆ្នាំទៅ។ ក្រៅពីត្រូវបានដាក់រហស្សនាមឱ្យថា ជា “អភិបាលខេត្តរូបសង្ហា” ហើយ រូបគេថែមទាំងជាបុរសម្នាក់ដែលពូកែទាំងខាងទន់ភ្លន់ និងមាំមួនម៉ឺងម៉ាត់ផងដែរ គឺទាំងជាអ្នកជំនាញការខាងផ្នែកគ្រប់គ្រងកិច្ចការរាជការ និងជាកីឡាករដែលធ្លាប់បានចូលរួមប្រកួតក្នុងកម្រិតប្រទេសទៀតផង។
ណាអូមិជិ ស៊ូស៊ិគិ ជាអ្នកខេត្ត សៃតាម៉ៈ ជីវិតក្នុងវ័យកុមារហាក់ដូចជាក្រខ្សត់ និងអត្តខាត់ ព្រោះត្រូវរស់នៅជាមួយម្ដាយដែលលែងលះគ្នាជាមួយឪពុក។ គេរៀនរហូតដល់កម្រិតមធ្យមសិក្សា ក៏លែងអាចរៀនបន្តក្នុងកម្រិតមហាវិទ្យាល័យទៀតបាន ព្រោះមានបញ្ហារឿងហិរញ្ញវត្ថុរបស់គ្រួសារ ហើយត្រូវចេញមកធ្វើការចិញ្ចឹមខ្លួនឯង។ ពេលអាយុបាន 18ឆ្នាំ គេប្រឡងជាប់ក្នុងការប្រឡងជ្រើសរើសមន្ត្រីរាជការរបស់សាលាក្រុងតូក្យូ និងបន្ទាប់ពីធ្វើការបាន 1ឆ្នាំ រូបគេក៏មានឱកាសបានសិក្សាបន្តនៅមហាវិទ្យាល័យ ហូហ្សេ និងបញ្ចប់ការសិក្សាផ្នែកនីតិសាស្ត្រ។
ក្នុងអំឡុងពេលកំពុងរៀននៅមហាវិទ្យាល័យ គេបានធ្វើជាប្រធានជំរំអ្នកប្រដាល់ និងធ្លាប់បានចូលរួមប្រកួតកីឡាប្រដាល់កម្រិតជាតិ នៅឆ្នាំ2002 ទៀតផង។ ការងារនៅសាលាក្រុងតូក្យូ គេស្ថិតនៅក្នុងស្ថាប័នសាធារណៈសុខាភិបាល មើលការងារផ្នែកសុខភាព និងសុវត្ថិភាពរបស់ប្រជាជន និងត្រឹមតែជាមន្ត្រីរាជការធម្មតាៗម្នាក់ប៉ុណ្ណោះ។
ចំណុចផ្លាស់ប្ដូរនៅក្នុងជីវិតរបស់ ស៊ូស៊ិគិ បានកើតឡើងនៅពេលដែលគេត្រូវបានបញ្ជូនឱ្យទៅធ្វើការនៅទីក្រុងយូបារិ ខេត្តហុកកៃដូ នៅឆ្នាំ2008។ ក្រុងយូបារិ នៅខណៈពេលនោះ កំពុងស្ថិតក្នុងសភាវដួលរលំ ប្រជាជនក្នុងតំបន់មានបំណុលវ័ណ្ឌក ត្រូវសុំថវិកាពីរដ្ឋបាលកណ្ដាល ត្រូវកាត់បន្ថយមន្ត្រីរាជការពាក់កណ្ដាល និងត្រូវបញ្ជូនមន្ត្រីពីទីក្រុងតូក្យូទៅជួយការងារនៅទីនោះ។
ស្ថានការណ៍នៅយូបារិធ្ងន់ធ្ងរខ្លាំងជាងអ្វីដែលមន្ត្រីរាជការម្នាក់នឹងអាចដំណើរការទៅបាន តែ ស៊ូស៊ិគិ បែរជាក្លាយជាមនុស្សជាទីស្រឡាញ់របស់ប្រជាជននៅទីនោះយ៉ាងខ្លាំងទៅវិញ។ នៅថ្ងៃដែលរូបគេ ត្រូវត្រឡប់ទៅទីក្រុងតូក្យូវិញ ប្រជាជនហុកកៃដូចំនួនដ៏ច្រើនបានមករង់ចាំជូនដំណើររូបគេដោយក្ដីអាឡោះអាល័យ។ សម្ព័ន្ធភាពដ៏ល្អដែលមានជាមួយហុកកៃដូ បានធ្វើឱ្យគេសម្រេចចិត្តក្នុងគ្រាសំខាន់មួយ ដោយការសុំឈប់ពីការងាររាជការនៅសាលាក្រុងតូក្យូ ទៅចុះឈ្មោះធ្វើជាបេក្ខភាពក្នុងការបោះឆ្នោតជ្រើសរើសអភិបាលក្រុងយូបារិ ដោយធ្វើជាបេក្ខជនឥស្សរៈ(មិនចំណុះគណបក្សណាមួយ) តែបានទទួលការគាំទ្រពីគណបក្សរួមក្នុងរដ្ឋាភិបាល។ ស៊ូស៊ិគិបានទទួលការជ្រើសតាំងដោយអាយុត្រឹមតែ 30ឆ្នាំ ជាអភិបាលក្រុងដែលមានអាយុតិចបំផុតក្នុងប្រទេសជប៉ុន។
ស្ដារវិបត្តិទីក្រុងដួលរលំ ពង្រឹងសេដ្ឋកិច្ចដោយផ្លែឪឡឹក
ការបានធ្វើជាអភិបាលក្រុងនៅក្នុងតំបន់ដែលកំពុងដួលរលំ មិនមែនជាការងារដែលគួរឱ្យបេតីប៉ុន្មានឡើយ…យូបារិ ធ្លាប់ជាតំបន់ដែលផលិតធ្យូងថ្ម ធ្លាប់មានប្រជាជនច្រើនដល់ទៅ 120,000នាក់ តែនៅពេលរ៉ែធ្យូងថ្មបញ្ឈប់ការផលិត ធ្វើឱ្យទាំងប្រាក់ចំណូល និងចំនួនប្រជាជនរបស់ក្រុងមួយនេះ ថយចុះយ៉ាងច្រើនមហាសាល នៅសល់តែមនុស្សចាស់ជរា។ មានការវាយតម្លៃថា ត្រូវប្រើពេលវេលាយូរដល់ទៅ 18ឆ្នាំ ទើបអាចជម្រះបំណុលរបស់រដ្ឋបាលទីក្រុងនេះបានអស់។
ស៊ូស៊ិគិ ធ្វើការយ៉ាងធ្ងន់ធ្ងរ ដើម្បីកាត់បន្ថយការចំណាយ និងរៀបផែនការស្ដារទីក្រុងឡើងវិញ ដោយប្រើប្រយោជន៍ពីសាលារៀន និងបន្ទប់ស្នាក់នៅរបស់បុគ្គលិកក្រុមហ៊ុនធ្យូងថ្មដែលបានបោះបង់ចោល និងប្ដូរពីការពឹងអាស្រ័យតែលើធ្យូងថ្ម មកជាការអភិវឌ្ឍថាមពលវិលជុំវិញ។
គេថែមទាំងបានគិតក្នុងការប្រើ “ឪឡឹកយូបារិ” ដែលមានរសជាតិផ្អែមឆ្ងាញ់ និងមានក្លិនក្រអូបឈ្ងុយ ធ្វើជានិមិត្តសញ្ញាដើម្បីស្ដារសេដ្ឋកិច្ច ដោយបានធ្វើការប្រូម៉ូតផ្លែឪឡឹកយូបារិ រហូតក្លាយជាផ្លែឈើដ៏ល្បីឈ្មោះរបស់ប្រទេសជប៉ុន។ ស៊ូស៊ិគិ ថែមទាំងបានប្រូម៉ូតនៅក្រៅប្រទេសទៀតផងដោយបាននាំយកផ្លែឪឡឹកយូបារិចំនួន 50ផ្លែ ទៅថ្វាយសមាជិករាជវង្ស និងរដ្ឋមន្ត្រីការបរទេសរបស់ប្រទេសកាតារ រហូតប្រទេសកាតារបញ្ជាឱ្យនាំចូលលែឪឡឹកយូបារិនៅឆ្នាំបន្ទាប់មកទៀតផង។ តែការធ្វើដំណើរទៅប្រទេសកាតារក្នុងគ្រានោះ គេត្រូវចំណាយប្រាក់ដោយខ្លួនឯងទាំងអស់ ទាំងសំបុត្រយន្តហោះ និងកន្លែងស្នាក់នៅខ្ពស់រហូតដល់ 300,000យេន ទាំងប្រាក់ខែរបស់អភិបាលទីក្រុងយូបារិ មានត្រឹមតែ 260,000យេនប៉ុណ្ណោះ។ ជាអភិបាលក្រុងដែលមានប្រាក់ខែតិចបំផុតនៅប្រទេសជប៉ុន តិចជាងបុគ្គលិករបស់ក្រុមហ៊ុនមួយចំនួនទៀតផង។
ក្នុងអំឡុងពេលដែលរូបគេធ្វើជាអភិបាលក្រុង 10ឆ្នាំ បន្ទាប់ពីក្រុងយូបារិដួលរលំ រដ្ឋបាលទីក្រុងមួយនេះ អាចជម្រះបំណុលបានច្រើនជាង 1ភាគ3។ ស៊ូស៊ិគិ បានទទួលនូវការជឿទុកចិត្តពីប្រជាជនក្នុងតំបន់ បោះឆ្នោតឱ្យធ្វើជាអភិបាលក្រុង 2សម័យកាលជាប់ៗគ្នា។ គេបានចែករំលែកបទពិសោធនៃការស្ដារទីក្រុងមួយនេះឡើងវិញនៅក្នុងសៀវភៅ 1ក្បាលដែលមានឈ្មោះថា “មិនធ្វើអ្វីសោះ ស្មើនឹងសូន្យ”។
ខែមករា ឆ្នាំ2019 ណាអូមិជី ស៊ូស៊ិគិ បានសម្រេចចិត្តក្នុងគ្រាសំខាន់ម្ដងទៀត ដោយការប្រកាសចុះឈ្មោះជាបេក្ខភាពក្នុងការបោះឆ្នោតជ្រើសរើសអភិបាលខេត្តហុកកៃដូ ក្នុងនាមជាបេក្ខជនឥស្សរៈ តែបានទទួលការគាំទ្រពីបក្សរួមរដ្ឋាភិបាលដូចកាលពិមុនដែរ។ គេទទួលបានជោគជ័យ បានទទួលការជ្រើសតាំងឱ្យក្លាយជាអភិបាលខេត្ត ដែលមានអាយុតិចបំផុតនៅក្នុងប្រទេស និងថែមទាំងជាលើកដំបូងទៀតផង ដែលបេក្ខជនមកពីខាងរដ្ឋាភិបាលបានយកឈ្នះនៅក្នុងខេត្តហុកកៃដូ មណ្ឌលបោះឆ្នោតដែលបក្សប្រឆាំងគ្រប់គ្រងមករហូត។
ឯរឿងជីវិតផ្ទាល់ខ្លួនវិញ(នារីៗទាំងឡាយ អាចនឹងខកចិត្ត) ណាអូមិជិ ស៊ូស៊ិគិ អភិបាលខេត្តរូបសង្ហា រៀបអាពាហ៍ពិពាហ៍រួចហើយ ជាមួយ ម៉ាណាមិ ថាម៉ាគិ កាលពីខែឧសភា 2011។ ទាំង 2នាក់សេពគប់គ្នាយូរដល់ទៅ 6ឆ្នាំ និងរស់នៅជាមួយគ្នាយូរដល់ទៅ 9ឆ្នាំ ពុះពារឆ្លងកាត់ក្ដីលំបាកលំបិន ទាំងរឿងក្នុងគ្រួសារ និងកិច្ចការរដ្ឋ…។ សូមកុំភ្លេចតាមដានរឿងរ៉ាវស្នេហារបស់ពួកគេទាំង2 នៅក្នុងវគ្គបន្ត…។
ប្រភព៖ សារព័ត៌មានបរទេស
March 4, 2020
សណ្ឋាគារត្រូវក្ស័យធន ព្រោះតែអាសន្នរោគកូរ៉ូណា Covid-19
ជប៉ុន៖ សណ្ឋាគារមួយនៅក្នុងខេត្ត Aichi បានក្លាយជាក្រុមហ៊ុនដំបូងគេបង្អស់នៅប្រទេសជប៉ុន ដែលបានដាក់ពាក្យសុំក្ស័យធន ដោយសារតែចំនួនភ្ញៀវមកស្នាក់នៅ បានថយចុះយ៉ាងគំហុក ខណៈអាសន្នរោគកំពុងរាតត្បាតប្រទេសនេះ។
សណ្ឋាគារ Fujimiso នៅក្នុងតំបន់ Gamagori នៃខេត្ត Aichi កាលពីសប្ដាហ៍មុនបានប្រកាសថានឹងដាក់ពាក្យសុំក្ស័យធនទៅកាន់តុលាការខណ្ឌ Nagoya ក្នុងទីក្រុង Toyohashi ខេត្ត Aichi ប្រទេសជប៉ុន។ នេះគឺជាក្រុមហ៊ុនដំបូងគេបង្អស់នៃប្រទេសជប៉ុន ដែលត្រូវក្ស័យធនទាក់ទិននឹងវិបត្តិអាសន្នរោគ Covid-19។ នេះបើតាមការឱ្យដឹងពីក្រុមហ៊ុនស្រាវជ្រាវ Tokyo Shoko Research។
សណ្ឋគារ Fujimiso បានចាប់ផ្ដើមផ្ដោតទៅលើការទាក់ទាញភ្ញៀវទេសចរពីប្រទេសចិនក្នុងអំឡុងប៉ុន្មានឆ្នាំចុងក្រោយនេះ។ ប៉ុន្តែ ចាប់ពីខែមករា ភ្ញៀវទេសចរពីប្រទេសចិន បានលុបចោលការកក់បន្ទប់ជាបន្តបន្ទាប់ ធ្វើឱ្យសណ្ឋាគារនេះជួបបញ្ហាហិរញ្ញវត្ថុ។ សណ្ឋាគារនេះ បានបង្កើតឡើងកាលពីឆ្នាំ1956 ហើយបច្ចុប្បន្ន មានទុន96លានយ៉េន។
មន្ត្រីផ្នែកទេសចរណ៍បានឱ្យដឹង ភ្ញៀវទេសចរចិនដែលលុបចោលការកក់សណ្ឋាគារនៅជប៉ុន នឹងកើនឡើងដល់ 400,000ក្រុមនៅចុងខែនេះ ដោយសារតែការរាតត្បាតខ្លាំងនៃអាសន្នរោគកូរ៉ូណា។ សមាគមក្រុមហ៊ុនទេសចរណ៍ជប៉ុនយល់ថា តួលេខពិតអាចនឹងខ្ពស់ជាងនេះច្រើន ព្រោះថាពួកគេមិនទាន់បានបូករួមទាំងក្រុមអ្នកទេសចរដែលមកក្នុងនាមបំពេញបេសកកម្មនៅឡើយ។
យោងតាមការស្ទង់មតិអនឡាញដែល Tokyo Shoko Research បានធ្វើឡើងទៅលើក្រុមហ៊ុនចំនួនជាង12,300ចាប់ពីថ្ងៃទី7កុម្ភៈ ដល់26កុម្ភៈ បានឱ្យដឹងថា 66% បានប្រាប់ថា ពួកគេទទួលរងផលប៉ះពាល់ពីអាសន្នរោគកូរ៉ូណា ដូចជាបញ្ហាអតិថិជនលុបចោលដំណើរទេសចរណ៍ សង្វាក់ផ្គត់ផ្គង់ត្រូវអាក់ខាន និងប្រាក់ចំណូលត្រូវថយចុះជាដើម។ នេះបើតាមទីភ្នាក់ងារសារព័ត៌មាន Japan Times។
គិតមកដល់ពេលនេះ ប្រទេសជប៉ុន មានអ្នកស្លាប់ដោយសារជំងឺកូរ៉ូណាចំនួន 6នាក់ និងមានអ្នកជំងឺចំនួន 256នាក់ ដែលនេះមិនទាន់បានបូករួមទាំងអ្នកជំងឺនៅលើនាវា Diamond Princess នៅឡើយ។ នៅទូទាំងពិភពលោក អ្នកស្លាប់ដោយសារអាសន្នរោគ Covid-19 បានកើនដល់3,048នាក់ និងអ្នកបានឆ្លងមេរោគនេះ មានចំនួនជាង 89,198នាក់៕
ប្រភព៖ សារព័ត៌មានបរទេស
March 2, 2020
ជប៉ុនចំណាយ 2,5ពាន់លានដុល្លារ សម្រាប់ប្រយុទ្ធប្រឆាំងនឹងឥទ្ធិពលនៃអាសន្នរោគ Covid-19
នាយករដ្ឋមន្ត្រីជប៉ុន បានឱ្យដឹងថា រាជរដ្ឋាភិបាលប្រទេសនេះនឹងប្រើប្រាស់ថវិកាជាតិចំនួន 270ពាន់លានយ៉េន(2,5ពាន់លានដុល្លារអាមេរិក) ដើម្បីទប់ទល់នឹងឥទ្ធិពលរបស់អាសន្នរោគកូរ៉ូណា Covid-19 ដែលកំពុងធ្វើឱ្យជប៉ុនទទួលរងការខាតបង់ច្រើន។
ថវិកាចំនួន 2,5ពាន់លានដុល្លារនេះនឹងត្រូវបានប្រើប្រាស់ដើម្បីជួយដល់បណ្ដាក្រុមហ៊ុនខ្នាតមធ្យម និងខ្នាតតូច នៅចំពោះមុខការខូចខាតផ្នែកហិរញ្ញវត្ថុ។ នេះបើតាមប្រសាសន៍របស់នាយករដ្ឋមន្ត្រីជប៉ុន Shinzo Abe នៅក្នុងកិច្ចប្រជុំសភានាព្រឹកនេះ។
ក្រៅពីនេះ កញ្ចប់ថវិកាទីពីរសម្រាប់ទប់ស្កាត់ការឆ្លងរាលដាលនៃមេរោគ Covid-19 និងជួយកាត់បន្ថយការខូចខាតផ្នែកសេដ្ឋកិច្ច នឹងត្រូវបានប្រកាសឱ្យដឹងនាថ្ងៃទី10មិនាខាងមុខ។
សេចក្ដីសម្រេចរបស់រាជរដ្ឋាភិបាលជប៉ុនដូចខាងលើ ត្រូវបានលើកឡើងក្នុងគ្រាដែលប្រទេសនេះមានអ្នកឆ្លងមេរោគកូរ៉ូណាចំនួន250នាក់ និង6នាក់បានស្លាប់ រួមនឹងអ្នកជំងឺជាង 700នាក់កំពុងទទួលការព្យាបាល និងអ្នកស្លាប់ចំនួន 7នាក់ដែលមកពីនាវាទេសចរណ៍ Diamond Princess។ នេះបើតាមសារព័ត៌មាន Reuters។
អាសន្នរោគ Covid-19 នៅប្រទេសជប៉ុន ធ្វើឱ្យមានការព្រួយបារម្ភអំពីរដូវកាលកីឡាអូឡាំពិករដូវក្ដៅ (Summer Olympics)ឆ្នាំនេះ ដែលតាមគម្រោងនឹងត្រូវធ្វើឡើងនៅថ្ងៃទី24កក្កដាខាងមុខ។ ប៉ុន្តែ គណៈកម្មការកីឡាអូឡាំពិកអន្តរជាតិ បានឱ្យដឹងថា ពួកគេ “សន្យា” ថា កីឡាអូឡាំពិករដូវក្ដៅនេះនឹងនៅតែត្រូវបានធ្វើឡើងតាមការគ្រោងទុក បើទោះជាត្រូវប្រឈមនឹងការភ័យខ្លាចអាសន្នរោគកូរ៉ូណាក៏ដោយ។
ដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង ទៅកាន់ប្រទេសជប៉ុន នឹងត្រូវធ្វើឡើងនៅខែមេសាខាងមុខ អាចនឹងត្រូវបានពន្យាពេល ដើម្បីផ្ដោតទៅលើការប្រយុទ្ធប្រឆាំងនឹងអាសន្នរោគ Covid-19។ នេះបើតាមការឱ្យពីមន្ត្រីជាន់ខ្ពស់ក្នុងរាជរដ្ឋាភិបាលជប៉ុន។
អាសន្នរោគកូរ៉ូណា បានចាប់ផ្ដើមឆ្លងរាលដាលចេញពីទីក្រុង Wuhan ប្រទេសចិន កាលពីខែធ្នូ ឆ្នាំ2019 ហើយបានឆ្លងរាលដាលទៅកាន់ប្រទេស និងដែនដីចំនួនជាង67 បណ្ដាលឱ្យមានអ្នកស្លាប់3,044នាក់ និងអ្នកបានឆ្លងមេរោគនេះចំនួនដល់ទៅជាង89,073នាក់។ ប្រទេសចិន(ចិនដីគោក) ថ្ងៃនេះ មានអ្នកឆ្លងមេរោគកូរ៉ូណាបន្ថែមជាង 200នាក់ និងអ្នកស្លាប់បន្ថែម42នាក់ ធ្វើឱ្យចំនួនអ្នកសា្លប់សរុបក្នុងប្រទេសនេះ ឡើងដល់ 2,912នាក់៕
ប្រភព៖ សារព័ត៌មានបរទេស
March 2, 2020
ទូរទស្សន៍ជប៉ុន រាយការណ៍ថា អ្នកដំណើរក្នុងនាវាទេសចរណ៍ “ស្លាប់” 2នាក់ហើយ ដោយសារវីរុស Covid-19
ស្ថានីយទូរទស្សន៍ NHK របស់ជប៉ុនបានរាយការណ៍នៅថ្ងៃនេះ(ទី20កុម្ភៈ)ថា អ្នកដំណើរលើនាវាទេសចរណ៍ Diamond Princess បានស្លាប់បាត់បង់ជីវិតហើយចំនួន 2នាក់ ដោយសារឆ្លងមេរោគវីរុសកូរ៉ូណាប្រភេទថ្មី(Covid-19) ខណៈដែលអាជ្ញាធរបាននិងកំពុងចាប់ផ្ដើមជម្លៀសអ្នកដំណើរឈុតទី2 ចុះពីលើនាវានោះ ក្រោយពីឆ្លងផុតរយៈពេលបង្ខាំងខ្លួនពិនិត្យមេរោគ 14ថ្ងៃរួចមក។
រដ្ឋបាលជប៉ុន មានបញ្ជាឱ្យអ្នកដំណើរ និងក្រុមនាវិកចំនួន 3,700នាក់នៅលើនាវាទេសចរណ៍ Diamond Princess ធ្វើតាមកម្មវិធីបង្ខាំងខ្លួនដោយឡែកដើម្បីតាមដានមេរោគ ក្រោយពីធ្វើដំណើរមកដល់ទីក្រុងយ៉ូកូហាម៉ាកាលពីថ្ងៃទី3 កុម្ភៈ ដែលថ្មីៗបំផុតនេះ លទ្ធផលនៃការពិនិត្យបានអះអាងថា មានអ្នកដំណើរចំនួនជាង 620នាក់ បានឆ្លងមេរោគវីរុសកូរ៉ូណាដែលមានដើមកំណើតពីទីក្រុងវូហានរបស់ចិន។
អឹន អេច ខេ ដែលយោងតាមប្រភពព័ត៌មានក្នុងរដ្ឋាភិបាលជប៉ុន បានរាយការណ៍ថា អ្នកស្លាប់ទាំង 2នាក់នោះ ជាបុរស និងស្ត្រីដែលមានអាយុប្រមាណ 80ឆ្នាំ។
ជប៉ុនមានចំនួនអ្នកឆ្លងមេរោគវីរុសនេះក្នុងលំដាប់ទី2 បន្ទាប់ពីចិន ដែលធ្វើឱ្យរដ្ឋាភិបាលត្រូវរងការរិះគន់យ៉ាងខ្លាំងថា ប្រើវិធានការបង្ខាំងការពារមេរោគគ្មានប្រសិទ្ធភាព ត្រឹមតែប៉ុន្មានខែមុនទីក្រុងតូក្យូនឹងក្លាយជាម្ចាស់ផ្ទះរៀបចំការប្រកួតកីឡាអូឡាំពិករដូវក្ដៅឆ្នាំ2020។
ខាត់ស៊ឺណូប៊ុ ខាតូ រដ្ឋមន្ត្រីក្រសួងសាធារណៈសុខាភិបាលជប៉ុន បានចេញមកការពារវិធានការទប់ទល់មេរោគរបស់រដ្ឋាភិបាលនៅថ្ងៃនេះ(ទី20) ដោយបានអះអាងនៅចំពោះមុខរដ្ឋសភាថា ក្រុមមន្ត្រីបានប្រតិបត្តិតាមការណែនាំរបស់អ្នកជំនាញការយ៉ាងតឹងរ៉ឹងម៉ឺងម៉ាត់ និងមានវិធានការកែបញ្ហាបែបប្រចាំថ្ងៃទៀតផង។
ទាំងអស់នេះ ក្រសួងសាធារណៈសុខាភិបាលជប៉ុននៅបានចេញសេចក្ដីថ្លែងការណ៍ជាភាសាជប៉ុន និងអង់គ្លេស ដោយបានអះអាងថា អ្នកដំណើរនៅលើនាវាកម្សាន្ត Diamond Princess ត្រូវបានបញ្ជាឱ្យបង្ខាំងខ្លួននៅតែក្នុងបន្ទប់ស្នាក់នៅ តាំងពីថ្ងៃទី5 កុម្ភៈមកម្ល៉េះ ដើម្បីទប់ស្កាត់ការចម្លងមេរោគវីរុស។ យ៉ាងណាក្ដី ចរន្តការរិះគន់ក្នុងខណៈនេះនៅតែល្បីខ្ចរខ្ចាយទូទាំងពិភពបណ្ដាញសង្គម។
ខេនថារ៉ូ អ៊ីវ៉ាដៈ អ្នកជំនាញការពិសេសខាងជំងឺឆ្លងមកពីមហាវិទ្យាល័យកូបេ បានផូស្តឃ្លីបវីដេអូរិះគន់វិធានការទប់ទល់ការឆ្លងមេរោគរបស់រដ្ឋាភិបាលជប៉ុនយ៉ាងធ្ងន់ៗ មុននឹងលុបឃ្លីបនោះចេញវិញ ដោយឱ្យហេតុផលថា ស្ថានការណ៍នៅលើនាវាកម្សាន្តនោះ ចាប់ផ្ដើមល្អប្រសើរឡើងហើយ និង “គ្មានភាពចាំបាច់អី ដែលត្រូវរិះគន់រឿងនេះតទៅទៀតទេ”។
អាជ្ញាធរជប៉ុនបាននាំអ្នកដំណើរ 1ឈុតដំបូងដែលមានលទ្ធផលពិនិត្យវីរុសអវិជ្ជមាន(គ្មានមេរោគ) និងគ្មានអាការឈឺថ្កាត់ ចុះពីលើនាវាតាំងពីថ្ងៃពុធ(ទី19) ខណៈដែលអ្នកដំណើរប្រមាណជា 500នាក់ទៀត នឹងបានទទួលការអនុញ្ញាតឱ្យចុះពីនាវានៅថ្ងៃនេះ(ទី20) និង 100នាក់ទៀតកំពុងឡើងយន្តហោះដែលជួលម៉ៅដាច់ 1គ្រឿង ត្រឡប់ទៅប្រទេសកំណើតវិញ។
សម្រាប់អ្នកដំណើរដែលធ្លាប់ចែករំលែកបន្ទប់ស្នាក់នៅជាមួយអ្នកឆ្លងមេរោគ នៅតែចាំបាច់ត្រូវបង្ខាំងខ្លួនការពារមេរោគបន្តទៀត ដូចគ្នានឹងក្រុមនាវិក ដែលក្រសួងសាធារណៈសុខាភិបាលជប៉ុន មិនអាចអះអាងបានថា នៅសល់មនុស្សនៅលើនាវានោះប៉ុន្មាននាក់ និងការជម្លៀសនឹងបញ្ចប់នៅពេលណាឡើយ។
ដោយឡែក មន្ត្រីក្រសួងការបរទេស នៃសហរដ្ឋអាមេរិក បានអះអាងថា នៅសល់អ្នកដំណើរជនជាតិអាមេរិកនៅលើនាវាកម្សាន្តនោះប្រមាណជា 45នាក់ទៀតនៅថ្ងៃនេះ(ទី20) ដែលរដ្ឋបាលសហរដ្ឋអាមេរិក បានកំណត់ឱ្យជនជាតិអាមេរិកដែលត្រឡប់ទៅដល់ប្រទេស ត្រូវតែឆ្លងកាត់ការបង្ខាំងឱ្យនៅដោយឡែកដើម្បីការពារមេរោគឆ្លង 14ថ្ងៃបន្ថែមទៀត។
ក្រៅពីអ្នកឆ្លងមេរោគនៅលើនាវាកម្សាន្តនោះ និងអ្នកដែលធ្វើដំណើរត្រឡប់មកពីទីក្រុងវូហានរបស់ចិនហើយ ជប៉ុននៅបានរកឃើញការឆ្លងរាលដាលរបស់មេរោគ Covid-19 នៅក្នុងតំបន់ប្រមាណជា 70ករណី រួមទាំងអ្នកឆ្លងមេរោគ 25នាក់នៅក្នុងទីក្រុងតូក្យូផងដែរ។ នេះបើតាមការរាយការណ៍របស់ស្ថានីយទូរទស្សន៍ NHK ៕
ប្រភព សារព័ត៌មានបរទេស
February 20, 2020
អាមេរិកមិនទទួលយកពលរដ្ឋរបស់ខ្លួនដែលឆ្លងវីរុសកូរ៉ូណា នៅលើនាវា Diamond Princess
ពលរដ្ឋអាមេរិកាំង40នាក់ដែលឆ្លងមេរោគកូរ៉ូណានៅលើនាវាទេសចរណ៍ Diamond Princess មិនត្រូវបាននាំត្រឡប់ទៅកាន់ប្រទេសតាមជើងហោះហើរចំនួន2 ដែលក្រសួងការបរទេសអាមេរិកបានរៀបចំនោះទេ។
“40នាក់ក្នុងចំណោមពួកគេ បានឆ្លងមេរោគ។ ពួកគេនឹងមិនទៅណាទាំងអស់ ពួកគេកំពុងត្រូវបានបញ្ជូនទៅកាន់មន្ទីរពេទ្យផ្សេងៗនៅជប៉ុន” នេះគឺជាប្រសាសន៍របស់លោក Anthony Fauci មន្ត្រីជាន់ខ្ពស់នៃមន្ទីរសុខាភិបាលជាតិអាមេរិកាំង ដែលបានឆ្លើយនៅក្នុងកិច្ចសម្ភាសមួយជាមួយសារព័ត៌មាន CBS កាលពីម្សិលមិញ។ លោកបន្តថា អ្នកជំងឺទាំងនោះមិនស្ថិតក្នុងបញ្ជីឈ្មោះដែលត្រូវជម្លៀសទៅកាន់សហរដ្ឋអាមេរិកវិញនោះទេ។
នៅពេលត្រូវបានសួរអំពីកម្រិតនៃភាពធ្ងន់ធ្ងររបស់ពលរដ្ឋអាមេរិកាំង ដែលមានផ្ទុកមេរោគកូរ៉ូណា COVID-19 លោក Anthony Fauci ថ្លែងថា ប្រការនេះគឺមានច្រើនបែប។ លោកបន្តថា “អ្នកអាចត្រូវឆ្លងមេរោគ ហើយជំងឺនេះមានរោគសញ្ញាតិចតួចណាស់ ប៉ុន្តែ អ្នកអាចចម្លងមេរោគនេះទៅអ្នកដទៃបាន”។
មជ្ឈមណ្ឌលគ្រប់គ្រង និងបង្ការជំងឺឆ្លងនៃសហរដ្ឋអាមេរិក Centers for Disease Control and Prevention (CDC) កាលពីថ្ងៃទី15កុម្ភៈ បានប្រកាសថា ក្រសួងការបរទេសអាមេរិកាំងនឹងបញ្ជូនយន្តហោះ2គ្រឿងទៅកាន់ប្រទេសជប៉ុន ដើម្បីនាំយកពលរដ្ឋរបស់ខ្លួនចំនួនប្រហែល400នាក់ ដែលស្ថិតនៅលើនាវា Diamond Princess ដែលកំពុងចតនៅកំពង់ផែ Yokohama ប្រទេសជប៉ុន ត្រឡប់មកស្រុកវិញ។
បន្ទាប់ពីបានត្រឡប់ទៅកាន់សហរដ្ឋអាមេរិក អ្នកទាំងនោះអាចត្រូវបានបញ្ជូនទៅកាន់មូលដ្ឋានទ័ពអាកាស Travis ក្នុងរដ្ឋ California ដើម្បីតាមដានសុខភាព។ ពលរដ្ឋមួយចំនួនធំដែលស្ថិតក្នុងចំណោមពលរដ្ឋខាងលើនេះ អាចត្រូវបានរៀបចំឱ្យនៅដាច់ដោយឡែកក្នុងមូលដ្ឋានទ័ពអាកាស Travis ក្នុងរយៈពេល14ថ្ងៃ។ ក្រៅពីនេះ មនុស្សមួយចំនួនទៀតអាចត្រូវបានបញ្ជូនទៅកាន់មូលដ្ឋានទ័ពអាកាស Lackland ក្នុងរដ្ឋ Texas ដើម្បីពិនិត្យរកមេរោគ។
ចំណែកអាជ្ញាធរទីក្រុងហុងកុង កាលពីម្សិលមិញក៏បានប្រកាសថា នឹងបញ្ជូនយន្តហោះទៅកាន់ប្រទេសជប៉ុន ដើម្បីនាំពលរដ្ឋរបស់ខ្លួនចេញពីនាវា Diamond Princess ។ ពលរដ្ឋហុងកុងដែលកំពុងស្ថិតនៅលើនាវានេះ មានចំនួនប្រហែល330នាក់ ហើយអ្នកទាំងនេះនឹងត្រូវដាក់ឱ្យនៅដាច់ដោយឡែករយៈពេល14ថ្ងៃដូចគ្នា នៅពេលបានទៅដល់ទីក្រុងហុងកុង។
ប្រទេសកាណាដាវិញ បានឱ្យដឹងថា ពលរដ្ឋដែលមានរោគសញ្ញានៃជំងឺកូរ៉ូណា នឹងមិនត្រូវបានអនុញ្ញាតឱ្យឡើងយន្តហោះត្រឡប់ទៅប្រទេសកំណើតវិញនោះដែរ ប៉ុន្តែពួកគេត្រូវនៅទទួលការព្យាបាលក្នុងប្រទេសជប៉ុន។ អ្នកដំណើរទាំងអស់នឹងត្រូវបានដាក់ឱ្យនៅដាច់ដោយឡែក ពេលវិលត្រឡប់ទៅដល់កាណាដា។ ពលរដ្ឋកាណាដាចំនួន 255នាក់ កំពុងស្ថិតនៅក្នុងនាវាទេសចរណ៍ Damond Princess នេះ។
សួមបញ្ជាក់ថា នាវាទេសចរណ៍ Diamond Princess មានផ្ទុកមនុស្សចំនួន 3,711នាក់ បូករួមទាំងក្រុមនាវិក ត្រូវបានដាក់ឱ្យនៅដាច់ដោយឡែកក្នុងកំពង់ផែ Yokohama ប្រទេសជប៉ុន បន្ទាប់ពីអ្នកដំណើរមកពីទីក្រុងហុងកុងម្នាក់ កាលពីខែមុនបានឆ្លងមេរោគកូរ៉ូណា។ នាវាខាងលើនេះ កាលពីម្សិលមិញបានរកឃើញអ្នកមានផ្ទុកមេរោគកូរ៉ូណាចំនួន70នាក់បន្ថែមទៀត ដូច្នេះ នៅលើនាវានេះ មានអ្នកផ្ទុកមេរោគសរុបចំនួន355នាក់៕
ប្រភព៖សារព័ត៌មានបរទេស
February 17, 2020
ជនជាតិជប៉ុនម្នាក់បានស្លាប់ដំបូងគេបង្អស់ ដោយសារមេរោគកូរ៉ូណា Covid-19
ស្ដ្រីម្នាក់ បានក្លាយជាមនុស្សដំបូងគេបង្អស់នៅជប៉ុន ស្លាប់ដោយសារឆ្លងមេរោគកូរ៉ូណា ប៉ុន្តែនេះគ្រាន់តែជាការសន្និដ្ឋានដំបូងប៉ុណ្ណោះ។
សារព័ត៌មាន NHK បានឱ្យដឹងថា អ្នកជំងឺគឺជាស្ត្រីវ័យប្រហែល 80ឆ្នាំ ដែលបានឆ្លងមេរោគកូរ៉ូណា Covid-19 នៅខេត្ត Kanagawa ក្បែរទីក្រុង Tokyo ប្រទេសជប៉ុន។
សារព័ត៌មាន NHK ដកស្រង់សម្ដីរដ្ឋមន្ត្រីក្រសួងសុខាភិបាលជប៉ុន លោក Katsunobu Kato បញ្ជាក់ថា ៖ “បច្ចុប្បន្ន មិនទាន់ដឹងច្បាស់ថា តើការស្លាប់នេះ មានជាប់ពាក់ព័ន្ធនឹងវីរុសកូរ៉ូណាដែរ ឬយ៉ាងណានោះទេ។ នេះគឺជាមនុស្សដំបូងដែលមានផ្ទុកវីរុសកូរ៉ូណា បានបាត់បង់ជីវិត”។
ទាក់ទិននឹងមេរោគកូរ៉ូណា អ្នកបើកបររថយន្តតាក់ស៊ីម្នាក់នៅឯទីក្រុង Tokyo ក៏បានឆ្លងមេរោគនេះ ខណៈដែលជប៉ុនកំពុងខឹតខំទប់ស្កាត់ការរាលដាលនៃមេរោគនេះ ក្នុងនោះក៏មានវិធានការបង្ខាំងនាវាទេសចរណ៍ Diamond Princess នៅឯកំពង់ផែ Yokohama ផងដែរ។
សារព័ត៌មានជប៉ុន ចុះផ្សាយថា អ្នកបើកបរខាងលើប្រាប់ថា គាត់ប្រហែលជាឆ្លងវីរុសកូរ៉ូណា ពីអតិថិជនរបស់ខ្លួន ក្នុងនោះក៏មានជនជាតិចិនម្នាក់ផងដែរ។ បច្ចុប្បន្ន មន្ត្រីសុខាភិបាលជប៉ុនកំពុងស្រាវជ្រាវរកមូលហេតុដំបូងដែលនាំឱ្យអ្នករត់តាក់ស៊ីនេះត្រូវឆ្លងមេរោគ។
គិតមកដល់ល្ងាចថ្ងៃទី13កុម្ភៈនេះ ជប៉ុនមានអ្នកផ្ទុកមេរោគ Covid-19 ចំនួន 250នាក់ បើបូករួមទាំងអ្នកជំងឺ 218នាក់ ដែលកំពុងដាក់ឱ្យនៅដោយឡែកលើកប៉ាល់ទេសចរណ៍ Diamond Princess។ ជប៉ុន ក៏ជាប្រទេសដែលមានអ្នកផ្ទុកមេរោគកូរ៉ូណា Covid-19 ច្រើនជាងគេបង្អស់ក្នុងពិភពលោក ក្រៅតែពីប្រទេសចិន។
ដើម្បីទប់ស្កាត់ការឆ្លងរាលដាលបន្ថែមនៅលើនាវាដែលមានផ្ទុកមនុស្សជាង 3,700នាក់ រាជរដ្ឋាភិបាលជប៉ុន បានសម្រេចចិត្តថានឹងជម្លៀសមនុស្សចាស់ និងអ្នកដែលមានជំងឺប្រចាំកាយ ចេញពីនាវានេះនៅថ្ងៃស្អែក ដើម្បីយកទៅដាក់នៅកន្លែងដាច់ដោយឡែកនៅឯដីគោក និងដើម្បីធ្វើការព្យាបាលឱ្យបានត្រឹមត្រូវបំផុត។
ជប៉ុន ក៏បានសម្រេចចិត្ត ចំណាយប្រាក់ 140លានដុល្លារអាមេរិក សម្រាប់បេសកកម្មប្រឆាំងអាសន្នរោគកូរ៉ូណា Covid-19 នេះផងដែរ៕
ប្រភ៖ សារព័ត៌មានបរទេស
February 13, 2020
រកឃើញអ្នកផ្ទុកមេរោគកូរ៉ូណា 41នាក់បន្ថែមទៀត នៅលើកប៉ាល់ទេសចរណ៍យក្សរបស់ជប៉ុន
កប៉ាល់ទេសចរណ៍យក្ស Diamond Princess ដែលតម្រូវឱ្យចូលចតនៅឯកំពង់ផែ Yokohamn បានរកឃើញអ្នកឆ្លងមេរោគកូរ៉ូណាចំនួន41នាក់បន្ថែមទៀត ធ្វើឱ្យចំនួនអ្នកជំងឺនៅលើកប៉ាល់នេះ កើនដល់ 61នាក់ នេះបើតាមការចុះផ្សាយរបស់សារព័ត៌មាន AFP។
“លទ្ធផលនៃការពិនិត្យរកមេរោគកូរ៉ូណានៅលើភ្ញៀវទេសចចំនួន 171នាក់ បានបង្ហាញថា មាន41នាក់មានផ្ទុកមេរោគនេះ។ ថ្ងៃនេះ ពួកគេនឹងត្រូវបញ្ជូនទៅកាន់មន្ទីរពេទ្យ ហើយយើងខ្ញុំកំពុងរៀបចំសម្រាប់កិច្ចការនេះ។ ជាសរុប ក្នុងចំណោមអ្នកទេសចរ 273នាក់ដែលបានធ្វើតេស្ត យើងបានរកឃើញ61នាក់មានផ្ទុកមេរោគកូរ៉ូណា” នេះបើតាមការឱ្យដឹងរបស់រដ្ឋមន្ត្រីក្រសួងសុខាភិបាលជប៉ុន លោក Katsunobu Kato ដែលបានចុះផ្សាយដោយសារព័ត៌មាន Tokyo នៅព្រឹកនេះ។
ក្រុមមន្ត្រីសុខាភិបាលជប៉ុន បានចាប់ផ្ដើមធ្វើតេស្តរកមេរោគនៅលើអ្នកដំណើរ 3,700នាក់ និងក្រុមនាវិកទាំងអស់នៅលើកប៉ាល់ទេសចរណ៍យក្ស Diamond Princess ដែលគ្រប់គ្រងដោយក្រុមហ៊ុន Carnival Japan Inc បន្ទាប់ពីមានអ្នកដំណើរវ័យចំណាស់ម្នាក់អាយុ 80ឆ្នាំ មានផ្ទុកមេរោគកូរ៉ូណា nCoV។
កប៉ាល់ទេសចរណ៍យក្ស Diamond Princess មុននេះ បានរកឃើញអ្នកដំណើរ 20នាក់ ដែលមានផ្ទុកមេរោគកូរ៉ូណា ហើយបាននាំពួកគេទៅកាន់មន្ទីរពេទ្យនៅក្នុងខេត្ត Kanagawa ប្រទេសជប៉ុន។ ក្រៅពីនេះ ភ្ញៀវទេសចរទាំងអស់ និងក្រុមនាវិក ត្រូវបានគេស្នើឱ្យនៅក្នុងកប៉ាល់រយៈពេលយ៉ាងតិច 2សប្ដាហ៍ ដើម្បីតាមដានរកមេរោគ៕
ប្រភព៖ សារព័ត៌មានបរទេស
February 7, 2020
ជប៉ុនរកឃើញអ្នកដំណើរក្នុងនាវាទេសចរណ៍កម្សាន្តមួយ ឆ្លងមេរោគ “វីរុសកូរ៉ូណា” យ៉ាងតិច 10នាក់
រដ្ឋមន្ត្រីក្រសួងសាធារណៈសុខាភិបាលរបស់ប្រទេសជប៉ុនបានអះអាងនៅថ្ងៃនេះថា អ្នកដំណើរយ៉ាងតិច 10នាក់នៅលើនាវាទេសចរណ៍កម្សាន្តដែលត្រូវបានឃាត់ទុកពិនិត្យមេរោគនៅឯកំពង់ផែយ៉ូកូហាម៉ា មានលទ្ធផលពិនិត្យមេរោគវីរុសកូរ៉ូណាប្រភេទថ្មី “វិជ្ជមាន” និងរំពឹងថា នឹងរកឃើញអ្នកឆ្លងមេរោគនេះបន្ថែមទៀត ក្នុងអំឡុងពេលដែលក្រុមគ្រូពេទ្យកំពុងធ្វើការត្រួតពិនិត្យរាងកាយអ្នកដំណើរ និងក្រុមនាវិកជាង 3,000នាក់។
ខាត់ស៊ីណូប៊ុ ខាតូ រដ្ឋមន្ត្រីក្រសួងសាធារណៈសុខាភិបាលជប៉ុន បានបញ្ជាក់នៅក្នុងសន្និសីទសារព័ត៌មានកាលពីព្រឹកមិញ(ថ្ងៃទី5 កុម្ភៈ)ថា អ្នកឆ្លងមេរោគទាំង 10នាក់ នឹងត្រូវបញ្ជូនទៅមន្ទីរព្យាបាលរោគមួយកន្លែង ចំណែកអ្នកដំណើរ និងក្រុមនាវិកប្រមាណជា 3,700នាក់ទៀត នឹងត្រូវបង្ខាំងការពាររោគនៅលើនាវាទេសចរណ៍កម្សាន្តរបស់ក្រុមហ៊ុន ខានីវ៉ាល់ ខប់ រយៈពេល 14ថ្ងៃ។
លោក ខាតូ បានបញ្ជាក់ទៀតថា គ្រប់គ្នានៅលើនាវាទេសចរណ៍កម្សាន្តនោះ ធ្លាប់បានឆ្លងកាត់ការពិនិត្យសុខភាពរយៈដំបូងរួចមកហើយ ដែលតាមរយៈដំណាក់កាលនោះ នឹងនាំឆ្ពោះទៅរកការសុំពិនិត្យសុខភាពអ្នកដំណើរ និងក្រុមនាវិកចំនួនត្រឹមតែ 273នាក់ប៉ុណ្ណោះ ដោយក្នុងចំនួនអ្នកដែលដឹងលទ្ធផលហើយមានចំនួន 31នាក់ រកឃើញអ្នកផ្ទុកមេរោគវីរុសកូរ៉ូណា 10នាក់។ ទាំងអស់នេះ មន្ត្រីសុខាភិបាលជប៉ុននឹងនៅតែតាមដានសង្កេតមើលអ្នកដំណើរ និងក្រុមនាវិកទាំងនោះថា តើនឹងមានអាការឈឺថ្កាត់ដែរឬទេ និងអាចនឹងត្រូវមានការសុំពិនិត្យសុខភាពបន្ថែមទៀត។
ស្ថានីយទូរទស្សន៍ NHK បានរាយការណ៍ថា ក្នុងចំណោមអ្នកឆ្លងមេរោគទាំងនោះ មានពលរដ្ឋជប៉ុន 3នាក់ និងទាំង 10នាក់នោះ មិនមានអាការធ្ងន់ធ្ងរទេ។ អ្នកឆ្លងមេរោគដែលរកឃើញ បានធ្វើឱ្យចំនួនអ្នកឆ្លងមេរោគវីរុសកូរ៉ូណាក្នុងប្រទេសជប៉ុនដែលបានអះអាងហើយ កើនឡើងដល់ 33នាក់។ កាលពីពេលមុននេះ NHK ធ្លាប់បានបញ្ជាក់ថា ក្រុមមន្ត្រីជប៉ុននឹងធ្វើការពិនិត្យសុខភាពអ្នកដែលបង្ហាញអាការគួរឱ្យសង្ស័យ ដូចជាមានអាការគ្រុនក្ដៅខ្លួន ឬធ្លាប់មានទំនាក់ទំនងជិតស្និទ្ធជាមួយបុគ្គលដែលមានអាការដូចខាងដើម ខណៈដែលមន្ត្រីក្រសួងសាធារណៈសុខាភិបាលម្នាក់បានអះអាងថា “មិនមែនគ្រប់គ្នាទេ” ដែលនឹងត្រូវឆ្លងកាត់ការពិនិត្យ PCR ឬ Polymerase Chain Reaction នេះ ដោយសារតែប្រើពេលវេលាយូរ និងមិនមានភាពចាំបាច់។
ប្រតិបត្តិការពិនិត្យសុខភាពអ្នកដំណើរ និងក្រុមនាវិក បានចាប់ផ្ដើមតាំងពីពេលល្ងាចថ្ងៃចន្ទ(ទី3) បន្ទាប់ពីមានអ្នកក្រុងហុងកុងវ័យ 60ឆ្នាំម្នាក់ដែលធ្លាប់ធ្វើដំណើរតាមនាវាទេសចរណ៍កម្សាន្តនេះកាលពីខែមករា បានឆ្លងមេរោគវីរុសកូរ៉ូណា។
ខានីវ៉ាល់ ជេភែន បានបញ្ជាក់កាលពីថ្ងៃអង្គារ ម្សិលមិញថា នាវាកម្សាន្តមួយទៀត គឺដាយម៉ន់ដ៍ ព្រីនសេស ចាំបាច់ត្រូវពន្យារពេលការចេញដំណើរចេញពីយ៉ូកូហាម៉ា និងកំពង់ផែកូបេ ក្នុងសប្ដាហ៍នេះ ដោយសារតែមានបញ្ជាឱ្យបង្ខាំងពិនិត្យមេរោគ។
ជំងឺឆ្លងរាលដាលដែលមានដើមកំណើតមកពីមណ្ឌលហ៊ូពេយរបស់ចិន បានសម្លាប់ជីវិតមនុស្សរួចទៅហើយជាង 400នាក់ និងមានអ្នកឆ្លងជំងឺនេះជាង 20,000នាក់ទៀត៕
ប្រភព៖ សារព័ត៌មានបរទេស
February 5, 2020
តើទីក្រុងតូក្យូនឹងទៅជាយ៉ាងណា ពេលភ្នំភ្លើង Fuji ផ្ទុះ?
រដ្ឋាភិបាលប្រទេសជប៉ុនបានធ្វើការវាយតម្លៃថា បើសិនជាភ្នំភ្លើង ហ្វូជិ កើតការផ្ទុះដ៏ធំមួយឡើង អាចធ្វើឱ្យមានកម្អែភ្នំភ្លើងគ្របដណ្ដប់ទូទាំងទីក្រុងតូក្យូ និងតំបន់ជុំវិញ និងអាចធ្វើឱ្យការចែកចាយចរន្តអគ្គិសនី និងការធ្វើចរាចរណ៍គាំងស្ទះដំណើរការមិនខាន។
អ្នកវិទ្យសាស្ត្រល្បីៗលំដាប់ជួរមុខ បាននាំគ្នាចេញមកដាស់តឿនថា សភាវផែនដីឡើងកម្ដៅ នឹងធ្វើឱ្យកើតការរញ្ជួយផែនដីកើនច្រើនឡើងទូទាំងពិភពលោក ហើយភ្នំភ្លើងនឹងផ្ទុះឡើង និងដោយសារតែសីតុណ្ហភាពពិភពលោកដែលកាន់តែក្ដៅឡើង ធ្វើឱ្យទឹកកកនៅកំពូលផែនដីរលាយ…នៅពេលទឹកកករលាយ ក៏នឹងគ្មានអ្វីទាញសង្កត់ផ្ទាំងសម្បកផែនដី…បន្ទះផែនដីនឹងកម្រើក ធ្វើឱ្យផែនដីកាន់តែរញ្ជួយខ្លាំងឡើង និងម៉េកម៉ាខាងក្រោមដីនឹងហូរមកផ្ដុំគ្នា រហូតរង់ចាំកម្លាំងរុញឱ្យផ្ទុះចេញមកនៅកន្លែងណាមួយលើផែនដី…។
ភ្នំហ្វូជិ និមិត្តសញ្ញារបស់ប្រទេសជប៉ុនដែលនៅស្ងៀមនឹងមកអស់រយៈពេលជាង 300ឆ្នាំហើយនោះ នឹងមិនមែននៅស្ងប់ស្ងៀមដូចដែលអ្នកណាៗមើលឃើញនោះទៀតទេ តែគឺជាភ្នំភ្លើងដែលមានថាមពលសកម្ម(Active Volcano) អ្នកជំនាញការជនជាតិជប៉ុនបញ្ជាក់ថា ភ្នំហ្វូជិ នឹងផ្ទុះឡើងម្ដងទៀតយ៉ាងពិតប្រាកដ គ្រាន់តែនៅមិនទាន់ដឹងថា នឹងកើតឡើងនៅពេលណាប៉ុណ្ណោះ។
ក្រុមការងារមួយរបស់រដ្ឋបាលជប៉ុន បានប៉ាន់ប្រមាណការណ៍ថា បើសិនភ្នំភ្លើងហ្វូជិកើតការផ្ទុះដ៏ធំឡើង អាចនឹងមានកម្អែភ្នំភ្លើងហូរធ្លាក់មកប្រមូលសន្សំក្នុង 1ម៉ោងកម្ពស់ប្រមាណ 1-2សង់ទីម៉ែត្រនៅក្នុងទីក្រុងកូតិមបាក់ របស់ខេត្តឈិស៊ូអូកាក់ ដែលនៅជិតជើងភ្នំ ហើយបើភ្នំភ្លើងបាក់ហូរធ្លាក់មកគ្របសង្កត់ទីនោះទាំងអស់ អាចនឹងមានកម្ពស់ដល់ទៅ 1.2ម៉ែត្រ។
ក្នុងតំបន់ស៊ិនជូកុ របស់ទីក្រុងតូក្យូ ដែលឆ្ងាយពីភ្នំហ្វូជិប្រមាណ 90គីឡូម៉ែត្រ ទោះជាមិនមានកម្អែភ្នំភ្លើងធ្លាក់មកគរភ្លាមៗមែន តែនឹងខ្ទាតមកដល់នៅថ្ងៃទី13 ក្រោយការផ្ទុះ និងអាចមានកម្អែភ្នំភ្លើងគ្រប់សង្កត់កម្ពស់ប្រមាណ 1.3សង់ទីម៉ែត្រ។
អ្នកជំនាញការបញ្ជាក់ថា បើកម្អែភ្នំភ្លើងធ្លាក់នៅក្នុងទីក្រុងតូក្យូ និងតំបន់ជុំវិញ មនុស្សម្នាចំនួនដ៏ច្រើនអាចនឹងមិនអាចត្រឡប់ទៅផ្ទះបាន ក្រៅពីនេះការដឹកជញ្ជូនអាហារ និងវត្ថុប្រើប្រាស់ចាំបាច់ផ្សេងៗក្នុងជីវិតប្រចាំថ្ងៃ អាចនឹងជាប់គាំងស្ទះនៅមួយកន្លែង ហើយបើសិនមានហេតុការណ៍រញ្ជួយផែនដីកើតឡើងផងនោះ អាចនឹងមានអ្នកស្លាប់រាប់ពាន់នាក់ ជា “មហាគ្រោះវិបត្តិ” ធំមួយក្នុងទីក្រុងនៃដែនដីកោះមួយនេះ។
កាលពីអតីតកាល បណ្ដាទីក្រុងនានាដែលស្ថិតនៅជុំវិញភ្នំហ្វូជិ តែងចៀសគេចពីការពិភាក្សារឿងផែនការការពារគ្រោះវិបត្តិ ព្រោះបារម្ភខ្លាចក្រែងថា នឹងបង្កឱ្យកើតមានការភិតភ័យភ្ញាក់ផ្អើលដល់ទីប្រជុំជនដែលស្ថិតនៅជុំវិញនោះ តែក្រោយពីភ្នំហ្វូជិបានចុះបញ្ជីជាបេតិកភណ្ឌពិភពលោករបស់អង្គការយូណេស្កូ កាលពីឆ្នាំ2012 មក អ្នកទេសចរ និងអ្នកឡើងភ្នំដែលបានមកដល់ភ្នំហ្វូជិ មានចំនួនកាន់តែច្រើនឡើងៗ ធ្វើឱ្យអង្គភាពផ្សេងៗនៅទីនោះត្រូវធ្វើសេចក្ដីព្រាងវិធានការផ្នែកសុវត្ថិភាពឡើង។
អ្នកជំនាញការជនជាតិជប៉ុនបានរៀបរាប់ថា ភ្នំភ្លើង អាចធ្វើឱ្យមានការខូចខាតយ៉ាងខ្លាំង បើសិនជាវាផ្ទុះឡើង តែបើសម្លឹងមើលក្នុងរយៈពេលវែងវិញ ភ្នំភ្លើងក៏សាងនូវគុណប្រយោជន៍ឱ្យច្រើនដែរ ដូចជា ទស្សនីយភាពដ៏ស្រស់ស្អាតប្លែកភ្នែក ទឹកនៅក្រោមដីដែលនឹងមានយ៉ាងបរិបូរណ៍ និងផ្ទៃដីជើងភ្នំដ៏ធំទូលាយ ដែលស័ក្តិសមបំផុតក្នុងការដំណើរការកិច្ចការងារខាងសេដ្ឋកិច្ចដ៏សម្បូរបែប។
អំឡុងពេលដែលភ្នំភ្លើងផ្ទុះនោះ ជាអំឡុងពេលដែលខ្លីបំផុត បើប្រៀបធៀបនឹងអំឡុងពេលដែលវានៅស្ងប់ស្ងៀម បើសិនមានការត្រៀមរួចជាស្រេច និងដំណើរការវិធានការទប់ទល់ដែលគ្រប់គ្រាន់ បណ្ដាភ្ញៀវទេសចរ និងអ្នករស់នៅក្នុងបរិវេណជុំវិញភ្នំ ក៏នឹងបានរំភើបរីករាយជាមួយនឹងភាពស្រស់ស្អាតរបស់ភ្នំភ្លើងបានយ៉ាងមានសុវត្ថិភាព។
ក្ដីព្រួយកង្វល់រឿងភ្នំភ្លើងហ្វូជិ ថានឹងផ្ទុះឡើងម្ដងទៀតនោះ អាចទប់ទល់បានដោយការត្រៀមរួចជាស្រេចនូវផែនការគ្រោះវិបត្តិ និងការធ្វើឱ្យមនុស្សម្នាទាំងឡាយយល់ដឹងពីគ្រោះអន្តរាយរបស់ភ្នំភ្លើង តែមិនភ័យឆ្លេឆ្លាភ្ញាក់ផ្អើល…ប្រជាជនគួរត្រៀមខ្លួនឱ្យរួចជាស្រេចចំពោះការផ្ទុះដែលអាចនឹងកើតឡើង តែក៏នឹងនៅតែបានស្ងើចសរសើរចំពោះទស្សនីយភាព និងប្រើប្រាស់ប្រយោជន៍ពីភ្នំភ្លើងបានដែរ៕
ប្រភព៖ សារព័ត៌មានបរទេស
February 4, 2020
ក្រុមហ៊ុន SkyDrive ត្រៀមសាកល្បងឡានហោះមានមនុស្សបើកលើកដំបូងនៅជប៉ុន
ក្រុមហ៊ុនអភិវឌ្ឍន៍ឡានហោះ SkyDrive មានគម្រោងធ្វើការហោះហើរសាកល្បងជាច្រើនលើកទៀត ដើម្បីធានាឱ្យបានប្រាកដថា ឡានហោះរបស់ខ្លួននឹងមានសុវត្ថិភាព100% មុននឹងដាក់លក់ចាប់ពីឆ្នាំ2023។
ក្រុមហ៊ុន SkyDrive ទើបតែបានប្រកាសថា ក្រុមហ៊ុនបានចាប់ផ្ដើមធ្វើការហោះហើរសាកល្បងនូវឡានហោះកាលពីខែមុន នេះបើតាមការចេញផ្សាយរបស់សារព័ត៌មានជប៉ុន Asahi កាលពីថ្ងៃទី21មករាកន្លងទៅ។
នេះគឺជាលើកទី1 ហើយនៅជប៉ុន ដែលមានការសាកល្បងបើកបរឡានហោះដែលមានមនុស្សជិះនៅខាងក្នុង។ ការហោះហើរសាកល្បងលើកមុនៗ ត្រូវបានគេធ្វើឡើងដោយប្រើប្រព័ន្ធបញ្ជាពីចម្ងាយ និងគ្មានមនុស្សជិះ។
SkyDrive គឺជាក្រុមហ៊ុនបច្ចេកវិទ្យាមួយដែលបង្កើតឡើងកាលពីខែកក្កដា ឆ្នាំ2018 នៅទីក្រុង Tokyo ដោយក្រុមវិស្វករវ័យក្មេងដែលធ្លាប់ធ្វើការឱ្យក្រុមហ៊ុនផលិតរថយន្ត Toyota។ ក្រុមហ៊ុននេះកំពុងតែរៀបចំគម្រោងប្រារព្ធព្រឹត្តិការណ៍ហោះហើរសម្ដែងឱ្យទស្សនិកជនទស្សនានៅក្នុងរដូវក្ដៅឆ្នាំនេះ បន្ទាប់មកនឹងចាប់ផ្ដើមដាក់លក់ចាប់ពីឆ្នាំ2023 ទៅ។
ឡានហោះ SkyDrive នេះមានកម្ពស់ 1.6ម៉ែត្រ បណ្ដោយ និងទទឹងប្រវែង 3.6ម៉ែត្រស្មើគ្នា និងមានកៅអីអង្គុយចំនួន1។ ជ្រុងនីមួយៗនៃឡានហោះនេះមានបំពាក់ស្លាបកង្ហារចំនួន 1គ្រឿង ដែលកង្ហារនេះនឹងជួយឱ្យឡានហោះអាចសំកាំងខ្លួននៅលើអាកាសបានយ៉ាងស្រួល។
មកដល់ពេលនេះ SkyDrive មិនទាន់បង្ហើបឱ្យដឹងលម្អិតអំពីការហោះហើរសាកល្បងនេះនៅឡើយទេ ប៉ុន្តែក្រុមហ៊ុននេះបានបញ្ជាក់ថា នឹងធ្វើការហោះហើរសាកល្បងជាច្រើនលើកទៀតដើម្បីធានាសុវត្ថិភាពឱ្យបាន100%។
បច្ចុប្បន្ន ក្រៅពី SkyDrive គេឃើញមានក្រុមហ៊ុនផ្សេងមួយចំនួន ក៏កំពុងយកចិត្តទុកដាក់ទៅលើការអភិវឌ្ឍឡានហោះនេះដែរ ក្នុងនោះក៏មានក្រុមហ៊ុន Airbus និង Uber ផងដែរ។
គំរូឡានហោះមានមនុស្សបើកនេះត្រូវបានអភិវឌ្ឍដោយក្រុមហ៊ុន SkyDrive
ឡានហោះត្រូវបានគេរំពឹងថា នឹងជួយកាត់បន្ថយការកកស្ទះចរាចរណ៍ និងជួយសង្គ្រោះមនុស្សក្នុងករណីបន្ទាន់។ ប៉ុន្តែ មុនពេលឡានហោះនេះត្រូវបានគេប្រើប្រាស់ទូលំទូលាយ ពិភពលោកត្រូវតែបង្កើតឱ្យមានស្ដង់ដាសុវត្ថិភាព និងច្បាប់ចរាចរណ៍សម្រាប់ឡានហោះ រួមនឹងប្រព័ន្ធគ្រប់គ្រងពេញលេញមួយដើម្បីបញ្ចៀសគ្រោះថ្នាក់ចរាចរណ៍ផ្លូវអាកាស៕
ប្រភព៖ សារព័ត៌មានបរទេស
January 23, 2020