Tag: ចេក

អាហារបង្កើនទម្ងន់កូន និងតិចនិកល្អៗដែលអ្នកម្ដាយមិនគួរខកខាន
ក្មេងដែលមានទម្ងន់ខ្លួនទាបជាងប្រក្រតី ច្រើនតែមានមូលហេតុមកពីការចិញ្ចឹមថែទាំ កូនញ៉ាំតិច និងមិនគ្រប់គ្រាន់នឹងតម្រូវការរបស់រាងកាយ ឬញ៉ាំមិនត្រឹមត្រូវតាមក្បួនភោជនាហារ ទាំងក្នុងរឿងបរិមាណ និងជីវជាតិ បណ្ដោយតាមចិត្តកូនជ្រុលពេក ជាហេតុធ្វើឱ្យឪពុកម្ដាយកង្វល់ចិត្ត ខ្លាចកូនស្គមមានទម្ងន់ខ្លួនខុសប្រក្រតី ដូច្នេះទើបអាហារបន្ថែមទម្ងន់កូនក្លាយជារឿងសំខាន់ដែលឪពុកម្ដាយគួរតែយកចិត្តទុកដាក់ឱ្យបានច្រើនឡើង។
កូនមានទម្ងន់ខ្លួនតិចជាងប្រក្រតី(ស្គម)ច្រើនតែមានមូលហេតុមកពី ៈ
– ការចិញ្ចឹមថែទាំ ៈ ក្មេងញ៉ាំតិច មិនគ្រប់គ្រាន់នឹងតម្រូវការរបស់រាងកាយ ឬញ៉ាំមិនត្រឹមត្រូវទាំងបរិមាណ និងជីវជាតិអាហារដោយសារតែការមិនដឹង ឬបណ្ដោយតាមចិត្តក្មេង។
– សភាវឈឺថ្កាត់របស់រាងកាយ ៈ អាចមានជំងឺរ៉ាំរ៉ៃ ឬបញ្ហារបស់ភាពពិការតាំងពីកំណើត ធ្វើឱ្យមានការចម្រើនធំធាត់យឺត ដូចជាជំងឺបេះដូង ជាដើម។ល។
– ការគេងសម្រាក ៈ គេងលក់សម្រាកមិនបានគ្រប់គ្រាន់ ឬចូលគេងយប់ជ្រៅជាប្រចាំ។
វិធីជួយបង្កើនទម្ងន់ខ្លួនកូន
កូនមានទម្ងន់ខ្លួនតិច(ស្គម)ជារឿងលំបាកចិត្តរបស់អ្នកម្ដាយ ដូច្នេះយើងនាំគ្នាមកមើលពីតិចនិក 4យ៉ាងដែលនឹងជួយអ្នកម្ដាយក្នុងការបង្កើនទម្ងន់ខ្លួនកូនថា តើមានអ្វីខ្លះ?
1. សង្កេតរឿងអាហារ ៈ ក្រុមអាហារដែលកូនញ៉ាំនោះ មានប្រយោជន៍ដល់រាងកាយច្រើនប៉ុនណា ដូចជា សាច់ ទឹកដោះ ស៊ុត មិនគ្រប់គ្រាន់ ក៏ធ្វើឱ្យកូនស្គមបានដែរ រួមទាំងបរិមាណអាហារក៏ត្រូវតែសមល្មមនឹងការប្រើកម្លាំងថាមពលដែរ។
2. កែសម្រួលវិធីចម្អិន ៈ សម្រាប់ក្មេងដែលមានទម្ងន់ខ្លួនតិច អ្នកម្ដាយអាចប្ដូរពីអាហារស្ងោរ មកជាអាហារឆា ឬចៀនឱ្យបានញឹកញាប់ឡើង តែអ្នកម្ដាយត្រូវប្រយ័ត្នរឿងប្រព័ន្ធរំលាយអាហាររបស់កូនផង។
3. បន្ថែមគ្រឿងផ្សំ ៈ ការបន្ថែមចំណែកផ្សំរបស់អាហារដែលនឹងធ្វើឱ្យកូនញ៉ាំបាន ដូចជា ទឹកដោះ ប៊័រ ម្សៅ ឬស្ករខ្លះៗ ក៏នឹងជួយបង្កើនទម្ងន់ខ្លួនកូនបានដែរ។
4. រៀបចំអាហារញ៉ាំបន្ថែមពេលទំនេរ ៈ ការរៀបចំអាហារញ៉ាំពេលទំនេរ ដូចជា នំសាំងវិច ជាមួយទឹកដោះគោ ឬទឹកផ្លែឈើក្រឡុកដែលផ្សំដោយទឹកដោះគោ ឬទឹកស្ករ ក៏ជាការបំពេញកម្លាំងថាមពលដែលបាត់បង់ទៅក្នុងចន្លោះពេលបាយចម្បងៗដល់កូនបានដែរ។
វត្ថុធាតុដើម 6យ៉ាងក្នុងការផ្សំម្ហូបអាហារបង្កើនទម្ងន់កូន
ក្រៅពីវិធីការចម្អិនអាហារហើយ ការជ្រើសរើសវត្ថុធាតុដើមមកធ្វើជាគ្រឿងផ្សំរបស់ម្ហូបអាហារ ក៏មានភាពសំខាន់ចំពោះទម្ងន់ខ្លួនរបស់កូនដូចគ្នាដើម្បីឱ្យអ្នកម្ដាយបានបង្កើនទម្ងន់ខ្លួនកូនពីសារធាតុអាហារប្រភេទម្សៅ និងខ្លាញ់ដែលល្អចំពោះសុខភាព។
1. ទឹកដោះគោឆៅ ឬទឹកដោះគោដែលកូនញ៉ាំជាប្រចាំ ព្រោះជាទឹកដោះដែលមានជាតិខ្លាញ់អាចយកមកផ្សំធ្វើជាម្ហូបអាហារបាន។
2. ត្រីដែលមានជាតិខ្លាញ់ច្រើន ដូចជាត្រីសណ្ដាយ ត្រីអណ្ដែង ដែលនឹងជួយក្នុងការសាងជាតិខ្លាញ់បានល្អ។
3. សណ្ដែកផ្សេងៗ ជាពិសេស សណ្ដែកដី មានប្រយោជន៍ជួយបង្កើនកម្លាំងថាមពល តែមិនគួរញ៉ាំច្រើនជ្រុលពេកដែរ ព្រោះវានឹងធ្វើឱ្យហើមពោះ។
4. ស៊ុត ជាអាហារពហុប្រយោជន៍ដែលបន្ថែមកម្លាំងថាមពលដល់កូន។
5. បន្លែដែលមានជាតិម្សៅច្រើន និងផ្ដល់ថាមពលខ្ពស់ ដូចជាពោត ល្ពៅ មានជាតិម្សៅច្រើន និងផ្ដល់ថាមពលខ្ពស់។
6. ផ្លែឈើស្រស់ផ្សេងៗ ក្រៅពីមុខម្ហូបអាហារចម្បងៗហើយនោះ ផ្លែឈើក៏អាចធ្វើជាអាហារញ៉ាំពេលទំនេរដើម្បីបង្កើនថាមពលក្នុងចន្លោះពេលថ្ងៃបានដែរ ថែមទាំងមានប្រយោជន៍ច្រើនទៀតផង។
អាហារបន្ថែមទម្ងន់កូនវ័យ 6 – 12ឆ្នាំ
ឱ្យកូនបានញ៉ាំអាហារឱ្យគ្រប់ 5ប្រភេទក្រុមក្នុងមួយពេលៗដែលប្រកបដោយ ៈ
- បាយ 2 – 3វែក។
- សាច់សត្វ 2ស្លាបព្រាបាយ ឬស៊ុត(ស៊ុតជាប្រូតេអ៊ីនគុណភាព ក្មេងមានទម្ងន់ខ្លួនតិចគួរឱ្យញ៉ាំមួយថ្ងៃ 1គ្រាប់)។
- ឆាបន្លែ 1វែក។
- ផ្លែឈើ ដូចជាក្រូច 1ផ្លែ ឬចេក 1ផ្លែ ឬល្ហុងទុំ 4 – 5ចំណិត ឬផ្លែឈើផ្សេងៗទៀត។
- ទឹកដោះគោ 1កែវ។
បើកូនញ៉ាំអាហារបានតិច ចូរបែងចែកពេលញ៉ាំអាហារចម្បងៗទៅជាពេលតូចៗ អាចបបួលកូនឱ្យមានចំណែករួមក្នុងការត្រៀមរៀបចំអាហារ ឱ្យសាកភ្លក្ស និងអង្គុយញ៉ាំដំណាលគ្នាជាមួយប៉ាម៉ាក់យ៉ាងរីករាយ។ នាំកូនទៅហាត់ប្រាណ រត់លេង ព្រោះនៅពេលកូនបានបញ្ចេញកម្លាំងថាមពលហើយ នឹងធ្វើឱ្យកូនឃ្លាន និងញ៉ាំបានច្រើន។ មិនគួរឱ្យកូនញ៉ាំនំ បៀមស្ករគ្រាប់ ឬទឹកដោះគោមុនពេលបាយឡើយ ព្រោះនឹងធ្វើឱ្យកូនឆាប់ឆ្អែត និងញ៉ាំបាយបានតិច។
ការមើលថែទាំកូនឱ្យគេងលក់សម្រាកឱ្យគ្រប់គ្រាន់ ហាត់ប្រាណជាប់ជានិច្ច ជាផ្នែកសំខាន់ក្នុងការបង្កើនទម្ងន់ខ្លួន និងកម្ពស់ដល់កូនៗដំណាលគ្នានឹងភាពរឹងមាំរបស់រាងកាយ និងដែលសំខាន់គឺ សេចក្ដីស្រឡាញ់ ការយកចិត្តទុកដាក់អំពីឪពុកម្ដាយ ជាវិធីដែលនឹងធ្វើឱ្យកូនមានសុខភាពរាងកាយដែលរឹងមាំ និងមានទម្ងន់ខ្លួនតាមស្តង់ដារបានល្អបំផុត៕
October 9, 2020
នៅពេលកូនតូចឈានចូលខែទី 10
ខែទី 10
លក្ខណៈរបស់កូនតូច
រយៈនេះកូនច្រើនមានធ្មេញខាងមុខដុះឡើងគ្រប់ 4 គ្រាប់ហើយ តែនៅមិនទាន់ដល់ថ្នាក់ត្រូវដុសធ្មេញឱ្យបានទេ គ្រាន់តែយកក្រណាត់ស្អាតមកជូតឱ្យក៏គ្រប់គ្រាន់ហើយ។ ថ្ងៃនេះអត្រាកើនឡើងនៃទម្ងន់ខ្លួននឹងថយចុះប្រមាណជា 5 – 10ក្រាមក្នុងមួយថ្ងៃជាមធ្យម។
ខែនេះចាប់ផ្ដើមមានភាពជាខ្លួនឯងច្រើនឡើងហើយ ចេះតតាំងនឹងអ្វីដែលមិនចង់ធ្វើច្រើនឡើង ដូចជាមិនចូលចិត្តឱ្យគេចាប់ដាក់អង្គុយលើកន្ថោរដើម្បីជុះ ជាដើម។ អំឡុងពេលនេះអ្នកម្ដាយអាចនឹងបណ្ដោយកូនឱ្យលេងតែឯងខ្លះ ហើយការលេងកូននឹងបង្កប់ទៅដោយការចង់ដឹងចង់ឃើញ និងចងចាំជាបណ្ដើរៗហើយ។
ដល់ពេលញ៉ាំអាហារបន្ថែម
វ័យនេះ ញ៉ាំអាហារបរិមាណប៉ុនណា អាស្រ័យលើសេចក្ដីត្រូវការ មិនចាំបាច់ធ្វើទុកឱ្យញ៉ាំជាពិសេសនោះទេ អាចបែងពីអាហាររបស់មនុស្សធំមកញ៉ាំបាន។ បើអាហារដែលញ៉ាំមានទាំងម្សៅ បន្លែ សាច់ និងសណ្ដែកហើយ ក៏មិនចាំបាច់បារម្ភថា កូននឹងខ្វះសារជាតិអាហារនោះឡើយ។ ចំណែកកាលវិភាគអាហារបន្ថែមដែលថាកូនគួរតែបានទទួលប៉ុន្មានក្នុងមួយថ្ងៃ 2ពេល ឬ3ពេលនោះគ្រាន់តែជាគោលការណ៍ប៉ុណ្ណោះ។ បើញ៉ាំបាយអស់ក្នុងរយៈពេល 10 – 15 នាទីនោះ ចង់ឱ្យញ៉ាំមួយថ្ងៃ 3ពេលក៏បាន តែបើបញ្ចុកបាយម្ដងៗចំណាយពេលដល់ទៅ 1 ម៉ោងនោះ បើឱ្យញ៉ាំមួយថ្ងៃ 3ពេល កូននឹងគ្មានពេលចេញទៅលេងខាងក្រៅផ្ទះ ព្រោះយ៉ាងហោចណាស់ក៏ត្រូវឱ្យបានចេញទៅលេងនៅក្រៅផ្ទះនៅពេលព្រឹក និងពេលល្ងាចម្ដងៗពី 1ម៉ោង – 1ម៉ោងកន្លះដែរ ហើយពេលវេលានៅសល់ចូរទុកជាពេលវេលាគេង ពេលញ៉ាំបាយ តាមភាពស័ក្តិសមរបស់ក្មេងម្នាក់ៗវិញប្រសើរជាង។
នំនែក ជារឿងដែលត្រូវតែបណ្ដោយខ្លះៗហើយ
អ្នកខ្លះមិនព្រមឱ្យកូនញ៉ាំនំឡើយ ព្រោះខ្លាចឆ្អែតរហូតមិនញ៉ាំបាយ តែកូនក៏នៅតែចង់ញ៉ាំដដែលហ្នឹងឯង ដូច្នេះគួរអនុញ្ញាតឱ្យកូនបានញ៉ាំខ្លះចុះ ដូចជានំប៉័ងស្រួយៗ នំប៉ាវ នំបារាំង នំខេក នំចេក នំអាកោ ឬនំខ្មែរផ្សេងៗ តែគួរឱ្យស្អាតមានអនាម័យ រសជាតិផ្អែមល្មមៗ។ ចំណែកផ្លែឈើវិញ គួរឱ្យញ៉ាំជាចំណិតៗ មិនចាំបាច់កិនឱ្យម៉ដ្ឋទៀតទេ។ កំណត់ពេលឱ្យញ៉ាំមិនលើស 2 ដងក្នុងមួយថ្ងៃ ដូចជាឱ្យញ៉ាំទឹកដោះមុនពេលរសៀលជាដើម មិនមែនចេះតែឱ្យញ៉ាំពេញមួយថ្ងៃនោះទេ ព្រោះនឹងធ្វើឱ្យដល់ពេលញ៉ាំបាយ ញ៉ាំបានតិច។
អាការរោគដែលអាចកើតឡើង
– នឹកដល់ជំងឺរាតត្បាត
. បើក្មេងណាមិនដែលគ្រុនក្ដៅខ្លួនពីមុនមក ពេលមិនស្រួលខ្លួនចូរនឹកដល់ជំងឺគ្រុនផ្ដាសាយ បើស្ថិតក្នុងរដូវដែលជំងឺគ្រុនឈាមរាតត្បាត ចូរនឹកដល់ជំងឺគ្រុនឈាម។ ព្យាយាមឱ្យកូនបានញ៉ាំទឹកឱ្យច្រើនក្នុងពេលគ្រុនក្ដៅខ្លួន។ ត្រូវប្រយ័ត្នកុំឱ្យកូនកើតជំងឺដែលឆ្លងមកពីក្មេងដែលលេងជាមួយគ្នា។
. ចូរនាំកូនទៅចាក់ថ្នាំវ៉ាក់សាំងការពារជំងឺផ្សេងៗតាមអំឡុងអាយុ និងកាលកំណត់របស់ពេទ្យ។
– ខាងក្រោយត្រចៀកកូនមានដុំអ្វីម្យ៉ាងរឹងៗ
. អ្នកម្ដាយអាចប្រទះឃើញមានដុំរឹងៗប៉ុនគ្រាប់សណ្ដែកនៅក្រោយស្លឹកត្រចៀក អាចមានតែម្ខាង ឬទាំងសងខាងក៏មាន ពេលចុច ឬសង្កត់ប៉ះ កូនមិនបានបង្ហាញអាការឈឺចាប់អ្វីឡើយ។ ការពិតដុំសាច់នេះគឺ ក្រពេញទឹករងៃដែលធំឡើងខ្លាំង ជាពិសេសបើមានបូសរមាស់នៅលើក្បាល ហើយកូនចូលចិត្តអេះផង មេរោគដែលជាប់នឹងក្រចកដៃនឹងចូលទៅក្នុងក្រោមស្បែកក្បាល ហើយក្រពេញទឹករងៃដែលធ្វើការទប់ស្កាត់នោះនឹងរីកធំឡើង តែក្រោយមកនឹងបាត់ទៅវិញដោយឯកឯង។ តែបើក្រពេញទឹករងៃរលាកក្លាយ បរិវេណនោះនឹងឡើងក្រហម ឈឺនៅពេលចុចចំ។ វិធីការពារ គឺកុំឱ្យកូនកើតបូសរមាស់នៅលើក្បាល កាត់ក្រចកដៃឱ្យខ្លី ហើយបើដុំរឹងៗនោះធំឡើង ត្រូវនាំកូនទៅឱ្យគ្រូពេទ្យពិនិត្យ។
វិវឌ្ឍនាការរបស់កូនតូច
– រាងកាយ
. ចេះតោងតុ ឬឱ្យដឹកដៃ ហើយដើរទៅមកជុំវិញបានហើយ
. ចាប់ផ្ដើមហាត់ឈរដោយមិនបាច់តោងអ្វីបានហើយ អាចឈរដោយខ្លួនឯងបានមួយភ្លែតៗ។
. សម្រាប់ក្មេងដែលឆាប់ចេះដើរ អាចដើរបានហើយក្នុងអំឡុងពេលនេះ។
. ចេះចង្អុលប្រាប់ពីអវយវៈរបស់ខ្លួនឯងបាន។
. ចាប់ផ្ដើមចេះកាន់របស់ដោយដៃម្ខាងបានហើយ តែនៅមិនទាន់អាចបញ្ជាក់បានថា កូនថ្នឹកប្រើដៃខាងណាបាននៅឡើយ។
. ចេះទាញមួកចេញពីក្បាលខ្លួនឯងបានហើយ។
– សង្គមជុំវិញខ្លួន
. ចេះភ្ជាប់ពាក្យសម្ដីជាមួយអាកប្បកិរិយា ដូចជា ការបញ្ជូនស្នាមថើប ញញឹមស្រស់ស្រាយជាដើម។
. ញ៉ាំចំណីដោយខ្លួនឯងកាន់តែថ្នឹកឡើង និងលើកកែវទឹកញ៉ាំដោយខ្លួនឯងបាន។
. ចេះធ្វើត្រាប់អាកប្បកិរិយា និងទឹកមុខរបស់អ្នកនៅជិតដិតនឹងខ្លួនបាន។
. ចេះស្ដាប់បទចម្រៀង និងយោលខ្លួនតាមនៅពេលបានឮសំឡេងបទភ្លេង។
– ឧស្សាហ៍លេងជាមួយកូនផង
. កូនចូលចិត្តលេងបិទភ្នែកវាក់អ៊ើ ធ្វើមាត់ចំបូញ ចូលចិត្តលេងបើក-បិទគម្របដបហើយចាក់ទឹកចោល ឬលេងជាមួយពពុះសាប៊ូពេលងូតទឹក ជាដើម។
. គួរឱ្យកូនបានហាត់ប្រាណខ្លះ ដោយឱ្យតោងធុង ឬកេសធំៗដែលមានដាក់ឥវ៉ាន់ធ្ងន់ៗ ហើយរុញដើរ តែមិនគួរឱ្យដើររុញរទេះដែលមានកង់រអិលៗឡើយ ព្រោះរទេះនឹងរអិលទៅមុខលឿន តែបើកៅអីធ្ងន់ៗដែលមានកង់ អាចឱ្យក្មេងរុញលេងបាន តែឪពុកម្ដាយត្រូវនៅមើល នៅចាំជួយ និងប្រុងប្រយ័ត្ន។
. វ័យនេះចូលចិត្តលេងអង្គុយអង្រឹង ដូច្នេះបើចង់ឱ្យលេង ឪពុកម្ដាយត្រូវអង្គុយជាមួយ ហើយរកបន្ទះអ្វីទន់ៗមកក្រាលពីក្រោម ឬមានដីខ្សាច់ពីក្រោមអង្រឹង ដើម្បីការពារពេលកូនធ្លាក់មកកុំឱ្យមានគ្រោះថ្នាក់។
. កូនមិនទាន់ឈរបានមាំនៅឡើយ ដូច្នេះគួរជួយបង្ហាត់បន្ថែម ដោយឱ្យកូនចាប់ដៃឪពុកម្ដាយទាំងសងខាង ហើយជួយទាញឱ្យឈរឡើង។ បង្ហាត់បែបនេះមួយថ្ងៃ 2ដង មួយដង 5 – 6 នាទីបានហើយ។ បើជាក្មេងដែលមាឌធំ ខ្លួនធ្ងន់រហូតក្រោកឈរមិនរួច មិនគួរបង្ហាត់ឱ្យរៀនក្រោកឈរទេ តែគួរបណ្ដោយឱ្យទៅលេងនៅក្រៅផ្ទះ ឬហាត់ប្រាណលើទីធ្លា យ៉ាងហោចណាស់មួយថ្ងៃ 2 – 3 ម៉ោងប្រសើរជាង៕
September 22, 2020
ដំណាំចេកមាសស្ងួន អាចកែច្នៃជាចេកឆាបចូលរួមបំពេញតម្រូវការទីផ្សារក្នុងស្រុក
ថ្វីដ្បិតតែកសិករកម្ពុជានិយមដាំជាងគេ គឺដំណាំចេកមែន តែដំណាំចេកមានសណ្ឋាន និងពូជច្រើនប្រភេទ ច្រើនយ៉ាងប្លែកៗពីគ្នា។ ម្យ៉ាងវិញទៀត ដំណាំមួយប្រភេទនេះ នៅពេលបានផល ហើយ ផ្លែវាក៏ជាតម្រូវការរបស់គ្រប់ៗគ្នាក្នុងការយកទៅធ្វើម្ហូប ជាបង្អែម និងធ្វើជាផលិតផលកែច្នៃ(តំណាប់ចេក ចេកងៀត ចេកហាល ចេកឆាប-ល-)តាមចំណង់ចំណូលចិត្ត។
ផ្លែចេកត្រូវបានពលរដ្ឋខ្មែរយកទៅធ្វើជាផលិតផលកែច្នៃម្យ៉ាងដែលរក្សាទុកហូបបានយូរ ហើយគ្មានប្រជាពលរដ្ឋខ្មែរណាម្នាក់និយាយថា មិនធ្លាប់ស្គាល់នោះទេ តែថែមទាំងធ្លាប់ឃើញ និងធ្លាប់ទាំងហូបស្ទើរតែគ្រប់គ្នាទៀតផង នោះគឺ “ចេកឆាប”។
ដោយមើលឃើញពីផលប្រយោជន៍ជាច្រើនរបស់ផ្លែចេក កសិករនៅសហគមន៍ខេត្តកោះកុង បាននាំគ្នាដាំចេកពូជម្យ៉ាងដែលមានឈ្មោះថា ចេកមាសស្ងួន ដើម្បីផ្គត់ផ្គង់ទីផ្សារក្នុងស្រុក បំពេញតម្រូវការប្រជាពលរដ្ឋខ្មែរ និងរក្សាពូជចេកក្នុងស្រុក ដែលពលរដ្ឋគ្រប់រូបបាននិយមទទួលទានគ្រប់ជំនាន់កន្លងមក។ ជាពិសេស ចេកមាសស្ងួននេះ គេអាចយកទៅកែច្នៃជាផលិតផលចេកឆាបបានយ៉ាងល្អទៀតផង។
ចេកឆាប ជាអាហារសម្រន់ដែលត្រូវបានពលរដ្ឋខ្មែរនិយមចូលចិត្ត និងចាត់ទុកចេកឆាប ជាបង្អែមមួយបែបផងដែររបស់ខ្មែរ។ ចេកឆាបដែលប្រជាពលរដ្ឋតែងតែនាំគ្នាធ្វើ និងដាក់លក់នៅលើទីផ្សារ ក៏ផលិតពីប្រភេទចេកផ្សេងៗពីគ្នាដែរ តែភាគច្រើនគេតែងតែយកចេកណាំវ៉ាមកកែច្នៃជាចេកឆាប ប៉ុន្តែអ្នកខ្លះគេក៏យកចេកមាសស្ងួនមកកែច្នៃជាចេកឆាបដែរដោយសារវាមានភាពស្រួយ និងឈ្ងុយឆ្ងាញ់ជាងចេកដទៃ និងមានឱជារសផ្អែមជាប់ចិត្តទាំងរសជាតិ ទាំងក្លិន និងគុណភាព។
កសិករឈ្មោះ ឡាក់ ហាក់ ជាសមាជិកសហគមន៍កសិកម្មស្រុកថ្មបាំង ខេត្តកោះកុង បានប្រាប់កាសែតឡារ៉ែនពាណិជ្ជឱ្យដឹងថា៖“ចេកដែលខ្ញុំបានដាំសព្វថ្ងៃ ភាគច្រើនជាចេកមាសស្ងួន ដែលគេនិយមយកទៅធ្វើជាចេកឆាបនេះឯង។ បច្ចុប្បន្នខ្ញុំមានផ្ទៃដីដាំចេកប្រមាណតែជាង 7ហិកតាប៉ុណ្ណោះដោយអាចកាប់លក់បានជារៀងរាល់ថ្ងៃនៅលើទីផ្សារ ហើយមួយចំណែកទៀតក៏ដឹកជញ្ជូនទៅឱ្យម៉ូយដល់ភ្នំពេញផងដែរ”។
លោកបានមានប្រសាសន៍ថា ការដាំចេកមាសស្ងួននេះ មានភាពងាយស្រួល និងមិនលំបាកថែទាំនោះទេ គឺដូចការដាំចេកណាំវ៉ាដែរ ដោយគ្រាន់តែជីកដី រួចដាក់កូនចេកក្នុង 1រណ្តៅ 1គុម្ព(1ដើម) ដាំទុកចន្លោះពី 1ដើមទៅ 1ដើម ចម្ងាយទទឹង 3ម៉ែត្រ បណ្តោយ 4ម៉ែត្រ ពេលដាំហើយ បូមទឹកស្រោចប្រមាណជា 2ដង ដើម្បីឱ្យចេកចាប់ឫស និងអាចរស់បាន តែប៉ុណ្ណឹងជាការស្រេច។ ឯការមើលថែទាំវិញ នៅពេលវាអាយុបាន 1ខែ យើងត្រូវដាក់ជី(ប្រភេទ10 -5-15 ឬ 10-0-20) ចំនួន 80ក្រាមក្នុង 1ដើម។ ដល់ពេលវាអាយុបាន 3ខែ យើងត្រូវដាក់ជីម្ដងទៀត(ប្រភេទ10 -5-15 ឬ 10-0-20) 250ក្រាមក្នុង 1ដើម។ លុះដល់វាអាយុបាន 4ខែ យើងត្រូវដាក់ជីកំប៉ុស ដើម្បីជំនួយដល់ការលូតលាស់របស់វា និងជំនួយដល់ផ្លែឱ្យមានរសជាតិឆ្ងាញ់ និងត្រូវធ្វើការសម្អាតស្មៅជាប្រចាំ។
បន្ទាប់មកយើងមិនបាច់ឱ្យទឹកទៀតទេ គ្រាន់តែមើលថែស្មៅកុំឱ្យដុះ ដោយគ្រាន់តែជម្រះស្មៅពេលដើមចេកនៅតូចៗម្តងម្កាលទៅបានហើយ។ លុះដាំបានរយៈពេលត្រឹម 7ខែ ចេកនឹងចាប់ផ្តើមធ្លាក់ត្រយូង ចេញផ្លែ និងឱ្យផល។ ដល់ពេលវាធំឡើងស្លឹកវានឹងធ្វើឱ្យម្លប់ដីទាំងមូលហើយ ដូច្នេះរុក្ខជាតិផ្សេងៗនឹងមិនដុះនាំឱ្យប៉ះពាល់ដល់ដំណាំចេកនោះទេ។
លោក ហាក់ បានបញ្ជាក់ថា៖“ដំណាំចេកដែលខ្ញុំមានលើផ្ទៃដីប្រមាណជាង 7ហិកតានោះ គឺបានប្រមូលផលក្នុង 1អាទិត្យបាន 400គីឡូក្រាមដែរ គឺក្នុង1ខែ 4ដង ដោយបាននាំចេញទៅឱ្យក្រុមហ៊ុនផលិតនំស្រួយលីលីនៅភ្នំពេញ ហើយចំនួននេះមិនទាន់គ្រប់តាមការបញ្ជាទិញរបស់គេនៅឡើយទេ”។
លោកបានបញ្ជាក់ទៀតថា៖“ចេកមាសស្ងួន ដែលខ្ញុំលក់ទៅឱ្យក្រុមហ៊ុន គឺលក់ក្នុងតម្លៃ 1,600រៀលក្នុង 1គីឡូក្រាម ដោយសារក្រុមហ៊ុនបានឱ្យថ្លៃលើសទីផ្សារ 100-200រៀលក្នុង 1គីឡូក្រាម។ ដូច្នេះក្នុង1ខែ ខ្ញុំអាចទទួលបានប្រាក់ប្រមាណជាង 2លានរៀល(2,560,000រៀល)ដែរ”។
លោក ឡាក់ ហាក់ បានបញ្ជាក់ថា៖“ដូច្នេះទិន្នផលចេក ដើម្បីឱ្យប្រមូលបានតាមតម្រូវការនៃការបញ្ជាទិញរបស់ក្រុមហ៊ុន យើងចាំបាច់ត្រូវតែបង្កើនចំនួន ព្រោះយើងមានកិច្ចព្រមព្រៀងជាមួយគ្នា ដោយត្រូវផ្គត់ផ្គង់សម្រាប់ផលិតជាផលិតផលផ្លែឈើក្រៀម(ចេកឆាប) ដែលបច្ចុប្បន្នការផ្គត់ផ្គង់ស្ថិតក្នុងលក្ខណៈតិចតួចណាស់ សម្រាប់ការផ្គត់ផ្គង់ទីផ្សារក្នុងស្រុក ប៉ុន្តែយើងនឹងពង្រីកការផលិតបន្ថែមនៅពេលខាងមុខ”។
ថ្វីដ្បិតតែផលដំណាំចេករបស់លោក ឡាក់ ហាក់បានបញ្ជូនទៅឱ្យក្រុមហ៊ុន ដើម្បីផលិតជាផលិតផលកែច្នៃ(ចេកឆាប)តាមបច្ចេកទេសទំនើបមែន តែការធ្វើចេកឆាបដែលប្រជាពលរដ្ឋខ្មែរធ្លាប់បានធ្វើ និងរូបលោកធ្លាប់បានធ្វើជាលក្ខណៈគ្រួសារនោះ ក៏លោកធ្លាប់មានបទពិសោធខ្លះដែរ។
លោក ឡាក់ ហាក់ បានបញ្ជាក់ថា៖ “ប្រជាពលរដ្ឋយើង ប្រាកដជាធ្លាប់ស្គាល់ និងធ្លាប់ពិសា ចេកឆាបនេះហើយ ព្រោះវាសម្បូរណាស់នៅក្នុងស្រុកខ្មែរយើង។ ប៉ុន្តែសម្រាប់បងៗមួយចំនួនប្រហែលជាមិនទាន់ដឹងពីវិធីធ្វើនៅឡើយទេ ដូច្នេះពេលនេះខ្ញុំសូមធ្វើការណែនាំពីការផ្សំគ្រឿង និងវិធីធ្វើដូចខាងក្រោម៖យើងត្រូវមានគ្រឿងផ្សំ គឺចេកណាំវ៉ា ឬចេកមាសស្ងួនស្រគាល 1ស្និត ស្ករស 250ក្រាមខ្លាញ់រាវ 400ក្រាម(សម្រាប់ចេក 1ស្និត)។ បើយើងមានធាតុផ្សំរួចនោះ វិធីធ្វើមិនជាលំបាកឡើយ ដោយវិធីធ្វើ គឺយើងត្រូវបកសម្បកផ្លែចេកឱ្យស្អាត បន្ទាប់មកធ្វើការឈូសវាជាចំណិតស្តើងៗ ដាក់ហាលថ្ងៃឱ្យស្ងួត។ បន្ទាប់ពីហាលស្ងួតហើយ យើងដាក់ខ្ទះដាំឱ្យក្តៅ បន្ទាប់មកដាក់ខ្លាញ់ចូល រួចធ្វើការបំពងឱ្យស្រួយ រួចស្រង់ឡើង ទុកឱ្យស្រស់ខ្លាញ់។
បន្ទាប់មកដាក់ដាំទឹកស្ករ រម្ងាស់ឱ្យឡើងជើងអង្ក្រង ហើយចាក់ចេកដែលបំពងស្រួយហើយនោះចូលទៅ។ ជ្រួយត្រឡប់វាឱ្យស្ងួតទឹក បន្ទាប់មកស្រង់ឡើង ដាក់ហាលថ្ងៃរហូតដល់ស្ងួត ទើបដាក់ក្នុងកែវគ្របឱ្យជិត ដើម្បីរក្សាទុកពិសាបានយូរថ្ងៃ។
លោក ហាក់ បានប្រាប់កាសែតឡារ៉ែនពាណិជ្ជទៀតថា៖“ខ្ញុំមានគោលបំណងពង្រីកការដាំដុះដំណាំចេករបស់ខ្ញុំនេះបន្ថែមទៀត ព្រោះតាមការផ្គត់ផ្គង់សព្វថ្ងៃ ក្រុមហ៊ុននៅមានតម្រូវការ និងបញ្ជាទិញច្រើនទៀតណាស់ ហើយក្រុមហ៊ុនក៏បានទុកលទ្ធភាពជូនសហគមន៍ឱ្យរៀបចំផែនការដាំដុះច្បាស់លាស់ ដើម្បីឱ្យបានគ្រប់ចំនួនដែលក្រុមហ៊ុនត្រូវការ”។
លោកជំទាវ កែវ មុំ អគ្គនាយិកាក្រុមហ៊ុន លីលីហ្វ៊ូដ ផលិតនំស្រួយ ធ្លាប់បានប្រាប់កាសែតឡារ៉ែនពាណិជ្ជអំពីមូលហេតុនៃការបង្កើតរោងចក្រកែច្នៃបន្លែ និងផ្លែឈើនេះថា៖ “វាជាផ្នែកមួយនៃទីផ្សារសម្រាប់កសិផលរបស់ខ្មែរយើង ដោយក្រុមហ៊ុនបានចុះកិច្ចសន្យាជាមួយកសិករនៅខេត្តកំពត កោះកុង ព្រះវិហារ មណ្ឌលគិរី និងខេត្ដកំពង់ចាម ដើម្បីឱ្យពួកគាត់បង្កើនការផលិតឱ្យច្រើន សម្រាប់ផ្គត់ផ្គង់មកក្រុមហ៊ុនតាមការកំណត់ ដើម្បីផលិតឱ្យបានតាមតម្រូវការទីផ្សារ”។
លោកជំទាវបានឱ្យដឹងថា៖ “តាមរយៈគម្រោងនេះ ក្រុមហ៊ុនបានបញ្ជាទិញបន្លែ ផ្លែឈើពីកសិករក្នុងកម្រិតប្រមាណ3 ទៅ 5តោនក្នុង 1ថ្ងៃៗ ដែលការយកបន្លែ-ផ្លែឈើមកកែច្នៃជាបន្លែផ្លែឈើក្រៀម យើងនឹងជួយដល់កសិករបានច្រើន។ បច្ចុប្បន្ន រោងចក្របណ្តោះអាសន្ននេះអាចធ្វើការផលិតបន្លែផ្លែឈើក្រៀមបានក្នុង 1ថ្ងៃពី2 ទៅ 3តោន។ នៅពេលរោងចក្រសាងសង់រួចរាល់នាពេលខាងមុខ រោងចក្រមួយនេះនឹងពង្រីកចង្វាក់ផលិតកម្មបន្ថែមទៀត ដើម្បីនាំចេញទៅលក់នៅក្រៅប្រទេសផងដែរ”៕
December 17, 2019
ដីដាំចេកជាង 20អា មួយសប្តាហ៍កាប់ផ្លែលក់បាន 20 ទៅ 30ម៉ឺនរៀល
ចេកជាដំណាំមួយប្រភេទដែលងាយស្រួលដាំដុះជាងដំណាំផ្សេងៗទៀត ព្រោះមិនចាំបាច់ចំណាយពេលវេលា ឬកម្លាំងពលកម្មក្នុងថែទាំជាប្រចាំនោះទេ ហើយនៅពេលបានផល ផ្លែវាគឺជាតម្រូវការរបស់គ្រប់ៗគ្នាក្នុងការយកទៅធ្វើជាបង្អែមញ៉ាំ ធ្វើនំអន្សមចេក អន្សមអាំង ឬយកទៅសែនជារៀងរាល់ថ្ងៃបុណ្យទានមិនសូវដែលខានឡើយ។
លោក ប្រុស សុវណ្ណ កសិករដាំចេកនៅក្នុងភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាលបានឱ្យដឹងថា គ្រួសាររបស់គាត់បានធ្វើរបរកសិកម្មដាំចេកណាំវ៉ា ប្រមាណជាជាង 3ឆ្នាំមកហើយ ដោយដាំនៅលើផ្ទៃដីទំហំក្បាល 30ម៉ែត្រ និងទទឹង 80ម៉ែត្រ ដែលអាចដាំដើមចេកបានប្រមាណជា 300គុម្ព។ នៅពេលវាឱ្យផលអាចកាប់លក់បានប្រមាណពី 20 ទៅ 30ម៉ឺនរៀល ហើយមានម៉ូយមកទិញដល់ចម្ការតែម្តង មិនចាំបាច់យកទៅលក់ខ្លួនឯងទេ។
លោកបន្តថា តម្លៃចេកមួយស្និតលក់នៅនឹងចម្ការមានតម្លៃចន្លោះពី 1,500រៀល ទៅ 2,000រៀល ហើយម៉ូយយកទៅលក់បន្តបានមួយស្និតតម្លៃចន្លោះពី 2,000 ទៅ3,000រៀល ទៅតាមស្និតតូច និងស្និតធំហើយក៏មិនពិបាកលក់ដែរ ដោយសារចេកនេះដាំនៅក្នុងចម្ការក្រោយផ្ទះ មិនប្រើថ្នាំគីមី100%។ នៅពេលអ្នកម៉ៅទិញគាត់ដឹង គាត់មកចាំទិញរៀងរាល់ថ្ងៃសីល ហើយបើយកទៅលក់មុខរោងចក្រវិញ ក៏មានកម្មករទិញដែរដោយចំណាយពេលលក់ប្រហែលតែជាង1ម៉ោងប៉ុណ្ណោះ អាចចំណេញប្រាក់បាន10ម៉ឺនរៀលឬច្រើនជាងនេះទៅតាមចំនួនចេកតិច ឬច្រើន។
កសិករម្នាក់ទៀតឈ្មោះ តាន់ វុធ ឱ្យដឹងដែរថា លោកមានផ្ទៃដីដាំចេកប្រហែលមួយហិកតាដែរ ដោយកាប់លក់រៀងរាល់ថ្ងៃសីល ហើយមានម៉ូយមកទទួលទិញដល់កន្លែងតែម្តង មិនពិបាកយកទៅលក់ខ្លួនឯងនោះទេ តែបើមានពេលយកទៅលក់ខ្លួនឯងវិញ រឹតតែចំណេញបានប្រាក់ច្រើន ព្រោះថា ចេកងាយស្រួលលក់ណាស់ ដោយសារការដាំដុះតាមបែបធម្មជាតិ100% មិនដាក់ថ្នាំគីមីដើម្បីឱ្យបានផ្លែល្អនោះទេ។ លោកនិយាយថាការដាំចេកមានភាពងាយស្រួល និងមិនលំបាកថែទាំនោះទេ គ្រាន់តែជម្រះស្មៅពេលដើមចេកនៅតូចៗម្តងម្កាល លុះដល់ធំឡើងស្លឹកវាម្លប់ដីទាំងមូលហើយ ដំណាំផ្សេងៗនឹងមិនដុះនាំឱ្យប៉ះពាល់ដល់ដំណាំចេកនោះទេ។
យ៉ាងណាក៏ដោយកសិករដាំចេកទាំងអស់បាននិយាយថា ដំណាំចេកឆ្នាំនេះធ្លាក់ថ្លៃជាងឆ្នាំមុន ដោយឆ្នាំមុនលក់រាយបានចន្លោះពី3,000រៀល ទៅ4,000រៀល តែចំណែកឆ្នាំនេះលក់រាយបានតម្លៃតែ2,000រៀល ទៅ,3000រៀលប៉ុណ្ណោះ ដោយសារចេកនាំចូលមកពីក្រៅប្រទេសច្រើនពេក។
លោក ប្រុស សុវណ្ណ បានរៀបរាប់ពីរបៀបដាំចេកថា ចេកងាយស្រួលដាំណាស់ ដោយគ្រាន់តែជីកដីដាក់កូនចេកក្នុងរណ្តៅ1គុម្ព1ដើម ដាំទុកចន្លោះពី1ដើម ទៅ1ដើមចម្ងាយទទឹង 3ម៉ែត្រ បណ្តោយ 4ម៉ែត្រ ពេលដាំហើយបូមទឹកស្រោចប្រមាណជា2ដង ដើម្បីឱ្យចេកចាប់ឫស និងអាចរស់បានហើយ។ យើងមិនបាច់ដាក់ទឹកទៀតទេ គ្រាន់តែថែស្មៅកុំឱ្យដុះដោយបោចចេញម្តងម្កាលទៅបានហើយ។ ហើយដាំបានរយៈពេលត្រឹម7ខែ ចេកនឹងចាប់ផ្តើមធ្លាក់ត្រយូងចេញផ្លែឱ្យផលហើយ៕
July 3, 2017
ដឹងឬទេថា ញ៉ាំចេកអាំងមានអត្ថប្រយោជន៍អ្វីខ្លះដល់សុខភាព?
មានមនុស្សជាច្រើនមិនសូវនិយមទទួលទានចេកអាំងទេ ព្រោះពួកគេគិតថា រសជាតិរបស់ចេកអាំងមិនសូវជាត្រូវមាត់ និងមិនមានរសជាតិឆ្ងាញ់ដូចអាហារទំនើបនៅតាមហាង តែលោកអ្នកគួរតែដឹងអំពីអត្ថប្រយោជន៍របស់ចេកអាំង ដែលមានគុណប្រយោជន៍អាចព្យាបាលជំងឺបានច្រើនប្រភេទ ។ ឥឡូវនេះយើងមកអាន និងដឹងជាមួយគ្នាអំពីអត្ថប្រយោជន៍របស់ចេកអាំងថា តើមានអ្វីខ្លះ?
១.ជួយកាត់បន្ថយអាការឈឺក និងអាការចុកដើមទ្រូង ដោយសារការក្អកស្ងួត គួរទទួលទានពី ៥ ទៅ ៦ ផ្លែ និងថែមទាំងអាចជួយសម្រាលអាការរមាស់កបានទៀតផង។
២.ជួយរឿងក្លិនមាត់ អាចបំបាត់បាត់ក្លិនមាត់បានយ៉ាងប្រសើរ។ យកល្អគួរតែពិសាចេកណាំវ៉ាស្រស់ ឬអាំងនៅពេលក្រោកពីគេងភ្លាមៗ រួចហើយសឹមទៅដុះសម្អាតធ្មេញ វានឹងអាចជួយបំបាត់ក្លិនមាត់បានយ៉ាងល្អប្រសើរ។
៣.ជួយបំបាត់អាការទល់លាមក ឬជួយដល់ប្រព័ន្ធរំលាយអាហារឱ្យដំណើរការបានស្រួលដូចធម្មតា ដូច្នេះគួរទទួលទានផ្លែចេកទុំមុនពេលចូលគេង ១ ទៅ ២ ផ្លែ ហើយពិសាទឹកឱ្យបានច្រើន នឹងជួយសម្រួលឱ្យការបន្ទោរបង់បានស្រួលឡើងវិញ។
៤.ជួយព្យាបាលអាការរាករូសបាន ព្រោះនៅក្នុងផ្លែចេកមានសារជាតិកាកសរសៃ ដែលជួយសម្រួលប្រព័ន្ធរំលាយអាហារ នឹងជួយព្យាបាលមិនឱ្យហើមពោះដោយសាររាករូសបានទៀតផង ។
៥.ជួយព្យាបាលជំងឺក្រពះ ដោយការទទួលពី ៥ ទៅ ៦ ផ្លែរយៈពេល ៣ ទៅ ៤ ដង ក្នុងមួយសប្តាហ៍។
៦.សម្បកចេក អាចជួយព្យាបាលរោគរមាស់ ដោយសារសត្វល្អិតខាំ ឬស្រមោចខាំបាន ព្រោះវាមានឥទ្ធិពលក្នុងការសម្លាប់មេរោគផ្សិត និងមេរោគបាក់តេរីផ្សេងទៀតនៅលើស្បែក។
សរុប ៖ ទាំងអស់នេះគឺជាការយល់ដឹងអំពីគុណប្រយោជន៍របស់ផ្លែចេក និងចេកអាំងចំពោះសុខភាព ដែលវាជាអាហារមួយងាយស្រួលរកមកទទួលទាន និងមាននៅក្បែរៗខ្លួនយើងទៀតផង៕
May 26, 2017