Tag: ខុនដូ

ផ្ទះលក់មិនដាច់នៅប្រទេសចិន ច្រើនគ្រប់គ្រាន់សម្រាប់មនុស្ស 150 លាននាក់
ផ្ទះដែលលក់មិនទាន់ដាច់នៅប្រទេសចិន មានទំហំសរុបជិត 5 ពាន់លានម៉ែត្រការ៉េ បើគិតត្រឹមចុងឆ្នាំកន្លង ហើយផ្ទៃក្រឡានេះអាចឱ្យមនុស្សរស់នៅបាន 150 លាននាក់។ នេះបើតាមការផ្សាយរបស់ទំព័រ Nikkei។
បច្ចុប្បន្ន ដោយសារតែជួបបញ្ហាហិរញ្ញវត្ថុ វិនិយោគិនទាំងឡាយក្នុងវិស័យអចលនទ្រព្យនៅប្រទេសចិន នាំគ្នាលក់បញ្ចុះតម្លៃជាបន្តបន្ទាប់។ ការប្រកួតប្រជែងតម្លៃនេះ កើតឡើងនៅពេលទីផ្សារអចលនទ្រព្យបានឈានចូលដល់ដំណាក់កាលគ្រប់គ្រាន់។ អត្រានៃអចលនទ្រព្យដែលនៅសល់ពីការលក់ គឺជិត 5 ពាន់លានម៉ែត្រការ៉េ កាលពីចុងឆ្នាំ 2023។ Nikkei ឧទាហរណ៍ថា ខុនដូ ឬផ្ទះមួយខ្នងដែលមានទំហំ 100 ម៉ែត្រការ៉េ និងមានមនុស្ស 3 នាក់រស់នៅ នោះផ្ទៃក្រឡាសរុបរបស់ផ្ទះដែលកំពុងសល់គឺអាចឱ្យមនុស្សរស់នៅបាន 150 លាននាក់ ដែលប្រហាក់ប្រហែលនឹងផ្ទះ 50 លានខ្នង។
ប្រទេសចិនកំពុងតែប្រឈមមុខនឹងផលវិបាករបស់ «ប៉ោងប៉ោងអចលនទ្រព្យ»។ កំណើននៃការសាងសង់ផ្ទះបានថយចុះ បន្ទាប់ពីប្រទេសនេះចាប់ផ្ដើមរឹតបន្តឹងគោលការណ៍នានាក្នុងឆ្នាំ 2020 ប៉ុន្តែចំនួនផ្ទះដែលលក់មិនដាច់នៅតែមានកម្រិតខ្ពស់ ព្រោះតែការលក់ចេញមានភាពយឹតយ៉ាវ។
China Index Academy ព្យាករថា សកម្មភាពទីផ្សារអាចនឹងប្រសើរឡើងវិញ នៅក្រោយរដូវបុណ្យចូលឆ្នាំប្រពៃណីជាតិចិន ដែលចាប់ផ្ដើមពីថ្ងៃទី 10 ដល់ 17 កុម្ភៈខាងមុខ។ ក៏ប៉ុន្តែ ក្រុមអ្នកវិភាគយល់ថា បញ្ហាបំណុលរបស់ក្រុមហ៊ុន Evergrande នៅតែជាស្រមោលអាក្រក់ក្នុងវិស័យអចលនទ្រព្យនៅប្រទេសចិន៕
February 8, 2024
នាយករដ្ឋមន្ត្រីថៃ ប្រកាសទ្រព្យសម្បត្តិជាសាធារណៈ
នាយករដ្ឋមន្ត្រីថៃ លោក Srettha ប្រកាសថា លោកមានទ្រព្យជិត 19 លានដុល្លារអាម៉េរិក ក្នុងនោះមានរថយន្តទំនើបមួយគ្រឿងដែលមានតម្លៃជាង 1.4 លានដុល្លារអាម៉េរិក និងនាឡិកាចំនួន 38 គ្រឿងផងដែរ។
អង្គភាពជាតិប្រឆាំងអំពើពុករលួយថៃ (NACC) កាលពីថ្ងៃទី 28 ធ្នូ បានឱ្យដឹងថា នាយករដ្ឋមន្ត្រី Srettha Thavisin និងជាអតីតអ្នកជំនួញផ្នែកអចលនទ្រព្យ មានទ្រព្យសម្បត្តិតម្លៃជិត 660 លានបាត (ជាង 18.9 លានដុល្លារអាម៉េរិក)។ ច្បាប់ប្រឆាំងអំពើពុករលួយរបស់ប្រទេសថៃ តម្រូវឱ្យមន្ត្រីរាជការប្រកាសទ្រព្យសម្បត្តិ និងបំណុលរបស់ខ្លួន និងភរិយា/ស្វាមី ក្នុងរង្វង់ 60 ថ្ងៃ រាប់ចាប់ពីថ្ងៃចូលកាន់តំណែង។
យោងតាម NACC នាយករដ្ឋមន្ត្រីថៃមានសាច់ប្រាក់សុទ្ធមួយលានបាត (ជាង 28,700 ដុល្លារអាម៉េរិក), ជិត 69 លានបាត (ជាង 1.9 លានដុល្លារ) ក្នុងធនាគារចំនួន 47 ស្ថាប័ន និងជាង 1.3 លានបាត (ជាង 37,300 ដុល្លារ) កំពុងវិនិយោគ។ លោកក៏មានដីដែលមានតម្លៃជាង 158 លានបាត (ជាង 4.5 លានដុល្លារ) នៅបាងកក។
នាយករដ្ឋមន្ត្រីថ្មីរបស់ថៃ ក៏ជាម្ចាស់អគារមួយចំនួនដែលមានតម្លៃសរុបជាង 156 លានបាត (ជាង 4.4 លានដុល្លារ) ក្នុងនោះក៏មានខុនដូនៅតំបន់លម្ហែកាយ Hua Hin និងផ្ទះបីជាន់មួយកន្លែងនៅក្នុងខណ្ឌ Khlong Toei នៅរាជធានីបាងកកផងដែរ។
អំពីយានជំនិះ លោក Srettha មានរថយន្តទំនើប Aston Martin DB5 តម្លៃ 50 លានបាត (ជាង 1.4 លានដុល្លារ)។ លោកក៏នៅមាននាឡិកា 38 គ្រឿង ដែលមានតម្លៃជិត 122 លានបាត (ជាង 3.5 លានដុល្លារ)។ ចំណែកបំណុលវិញ នាយករដ្ឋមន្ត្រីថៃកំពុងជំពាក់ជាង 10 លានបាត (ជាង 287,000 ដុល្លារ)។
នាយករដ្ឋមន្ត្រីថ្មីរបស់ថៃ ក៏ជាម្ចាស់អគារមួយចំនួនដែលមានតម្លៃសរុបជាង 156 លានបាត (ជាង 4.4 លានដុល្លារ) ក្នុងនោះក៏មានខុនដូនៅតំបន់លម្ហែកាយ Hua Hin និងផ្ទះបីជាន់មួយកន្លែងនៅក្នុងខណ្ឌ Khlong Toei នៅរាជធានីបាងកកផងដែរ។
អំពីយានជំនិះ លោក Srettha មានរថយន្តទំនើប Aston Martin DB5 តម្លៃ 50 លានបាត (ជាង 1.4 លានដុល្លារ)។ លោកក៏នៅមាននាឡិកា 38 គ្រឿង ដែលមានតម្លៃជិត 122 លានបាត (ជាង 3.5 លានដុល្លារ)។ ចំណែកបំណុលវិញ នាយករដ្ឋមន្ត្រីថៃកំពុងជំពាក់ជាង 10 លានបាត (ជាង 287,000 ដុល្លារ)។
NACC ឱ្យដឹងថា ប្រាក់ចំណូលប្រចាំឆ្នាំរបស់លោក Srettha រួមមានប្រាក់បៀវត្សរ៍ ប្រាក់រង្វាន់ជាង 153 លានបាត (4.3 លានដុល្លារ) រួមនឹងប្រាក់ឧបត្ថម្ភជាច្រើនផ្សេងទៀត។ ជារៀងរាល់ឆ្នាំ លោកចំណាយប្រហែល 36.5 លានបាត (ជាងមួយលានដុល្លារ) សម្រាប់ខ្ទង់ចំណាយផ្ទាល់ខ្លួន គ្រួសារ ពន្ធអាករ និងសប្បុរសធម៌។
លោក Srettha អាយុ 61 ឆ្នាំ កាលពីខែសីហា 2023 បានក្លាយជាមេដឹកនាំថ្មីរបស់ប្រទេសថៃ បញ្ចប់ស្ថានភាពជាប់គាំងដែលបានអូសបន្លាយអស់ច្រើនខែ ក្រោយពីការបោះឆ្នោតកាលពីខែឧសភា៕
December 30, 2023
អូស្ត្រាលីសាងសង់អគារឈើខ្ពស់បំផុតលើពិភពលោក
អាជ្ញាធរទីក្រុង Perth បានអនុម័តគម្រោងសាងសង់អគារកម្ពស់ 191.2 ម៉ែត្រ ដែលប្រើប្រាស់ឈើបន្ទះកុងផ្លាកេផ្សំជាមួយនឹងបេតុងស្នូលដែកថែប។
កាលពីថ្ងៃទី 05 តុលា អាជ្ញាធរទីក្រុង Perth បានអនុម័តសំណើសាងសង់អគារកប់ពពកដែលមានឈ្មោះថា C6 របស់ Grange Development។ យោងតាម CNN អគារនេះនឹងខ្ពស់ជាងជិតពីរដងបើធៀបនឹងអគារឈើ-បេតុងខ្ពស់បំផុតក្នុងលោកនាបច្ចុប្បន្ន។ ម្ចាស់សំណង់នេះឱ្យដឹងថា 42% នៃអគារនេះនឹងសាងសង់ពីឈើ ខណៈសសរធ្វើពីបេតុង និងដែក។
ក្រោយពីបានសាងសង់រួចរាល់ អគរ C6 នឹងបំបែកកំណត់ត្រាអគារឈើ-បេតុងខ្ពស់ជាងគេលើពិភពលោក Ascent នៅទីក្រុង Milwaukee រដ្ឋ Wisconsin សហរដ្ឋអាម៉េរិក ដែលមាន 25 ជាន់ កម្ពស់ 86 ម៉ែត្រ។ C6 នឹងស្ថិតនៅក្នុងក្រុង Charles ភាគខាងត្បូងទីក្រុង Perth និងខ្ពស់ជាងអគារកូនកាត់ឈើ-បេតុង Atlassian Headquarters នៅទីក្រុង Sydney នាពេលខាងមុខ។ Atlassian Headquarters ក៏ត្រូវបានសាងសង់ដើម្បីបំបែកកំណត់ត្រារបស់ Ascent ប៉ុន្តែមិនទាន់រួចរាល់។
ដូចទៅនឹង Atlassian អគារ C6 នឹងមានធ្នឹមធ្វើពីឈើកុងផ្លាកេច្រើនស្រទាប់ដែលមានស៊ុមដែកការពារ។ យោងតាម Grange Development អគារកម្ពស់ 50 ជាន់ និងមានខុនដូជាង 200 នេះ គឺជាអគារស្នាក់នៅដែលមិនបំភាយឧស្ម័នកាបូនដំបូងគេនៅ Western Australia។ C6 នឹងប្រើប្រាស់ឈើ 7,400 ម៉ែត្រគុបដែលបានពីដើមឈើ 600 ដើម។
ក្រៅពីឈើ គម្រោងរបស់ក្រុមហ៊ុនខាងលើក៏រួមមានទាំងតំបន់បៃតងជាច្រើន មានដូចជា សួនរុក្ខជាតិលើដំបូលអគារ កសិដ្ឋានបែបទីក្រុង និងមានការផ្ដល់រថយន្តអគ្គិសនី Tesla Model 3s ចំនួន 80 គ្រឿងដល់អតិថិជនផងដែរ៕
October 6, 2023
ខុនដូសម្រាប់ជួលមួយកន្លែងនៅអាម៉េរិក មានតម្លៃខ្ពស់ជាងគេបង្អស់នៅនីវយ៉ក
(សហរដ្ឋអាម៉េរិក) – ខុនដូមួយស្ថិតនៅក្នុងមជ្ឈមណ្ឌល Manhattan ទើបតែបានបំបែកកំណត់ត្រាស្ដីពីថ្លៃជួលដែលខ្ពស់បំផុតនៅទីក្រុងនីវយ៉ក ដោយមានតម្លៃ 125,000 ដុល្លារ/ខែ។
អត្តសញ្ញាណរបស់អ្នកជួលខុនដូនេះ មិនត្រូវបានបង្ហើបឱ្យដឹងនោះទេ។ Jessica C. Campbell របស់ Nest Seekers International ដែលជាឈ្មួញជើងសារផ្នែកអចលនទ្រព្យឱ្យដឹងថា អ្នកជួលបានយល់ព្រមភ្លាមនៅក្នុងថ្ងៃមកមើលខុនដូ។ «តម្លៃជួលបានបំបែកកំណត់ត្រានៅកណ្ដាលទីក្រុង ប៉ុន្តែក៏ស័ក្ដិសមដែរ ព្រោះវាជាកន្លែងដ៏ថ្លៃថ្នូរ» Jessica C. បញ្ជាក់ដូច្នេះ។
ជាមួយនឹងតម្លៃត្រូវបង់ 125,000 ដុល្លារក្នុងមួយខែ អតិថិជនអាចរស់នៅក្នុងខុនដូទំហំជាង 600 ម៉ែត្រការ៉េនៅជាន់ទី 20 និង 21 របស់អគារ 100 Vandam។ យោងតាម Jessica C. នេះគឺជាកន្លែងស្នាក់នៅមួយដ៏អស្ចារ្យបំផុតដែលធ្លាប់ឃើញនៅនីវយ៉ក។
ខុនដូខាងលើមានបន្ទប់ដេកចំនួន 6 បន្ទប់ទឹកចំនួន 7 និងអាចមើលទៅកាន់ទន្លេ Hudson កំពង់ផែ New York និងរូបសំណាក Statue of Liberty យ៉ាងពេញភ្នែក។ ខុនដូនេះក៏មានគ្រឿងសង្ហារិមប្រណិតៗ រួមនឹងបន្ទប់ដែលប្រៀបបានទៅនឹងកន្លែងកម្សាន្ត និងសម្រាកលំហែកាយដ៏អស្ចារ្យ។ វាក៏មានសួរច្បារទំហំ 350 ម៉ែត្រការ៉េផងដែរ។
អគារខុនដូ 100 Vandam មានកម្ពស់ 25 ជាន់ និងត្រូវបានរចនាដោយក្រុមហ៊ុន CookFox Architects។
បើទោះអគារ 100 Vandam មានខុនដូដែលមានថ្លៃជួលខ្ពស់បំផុត ប៉ុន្តែនេះគឺជាតម្លៃដែលប្រកាសជាសាធារណៈ។ យោងតាម New York Post ទីក្រុងនីវយ៉កនៅមានអគារដទៃទៀតដែលដាក់ឱ្យជួលខុនដូក្នុងតម្លៃថ្លៃជាងនេះ។ ក៏ប៉ុន្តែ នោះគឺជាកិច្ចព្រមព្រៀងដែលមិនត្រូវបានអនុញ្ញាតឱ្យផ្សព្វផ្សាយ៕

August 9, 2023
អ្នកជំនាញថា៖ តំរូវការទីផ្សារខុនដូតំលៃសមរម្យក្នុងក្រុងភ្នំពេញ នឹងកាន់តែមានការកើនឡើងសំរាប់អតិថិជនជាជនជាតិខ្មែរយេីង
ភ្នំពេញ ៖ ដោយសារទំហំនៃទីក្រុងភ្នំពេញកំពុងតែមានការរីកធំឡើងៗ ខណៈពេលប្រជាជននៅក្នុងក្រុង មានកំនើនជាបន្តបន្ទាប់ នាំអោយមានតំរូវការលំនៅដ្ឋានខ្ពស់។
លោក សំ សុខនឿន អគ្គនាយកក្រុមហ៊ុន KW Sen Sok និងជាអគ្គនាយកក្រុមហ៊ុន សេម អេសអិន រៀលធី បានមានប្រសាសន៍ថា តំរូវការទីផ្សារខុនដូតំលៃសមរម្យក្នុងក្រុងភ្នំពេញ កំពុងតែមានការកើនឡើង សំរាប់អតិថិជនជនជាតិខ្មែរ។ លោកបានបន្ថែមទៀតថា មូលហេតុដែលកំនើនខុនដូតំលៃសមរម្យកំពុងមានការកើនឡើង ព្រោះបណ្តាលមកពីកត្តា៤សំខាន់ៗ:
1. បុរីថ្មីៗកាន់តែឆ្ងាយពីក្រុងហេីយមានតំលៃខ្ពស់ទៅៗ ដែលធ្វើអោយអ្នកស្នាក់នៅក្នុងបុរីត្រូវចំណាយពេលវេលា ក្នុងការចូលមកក្នុងទីក្រុង ដើម្បីបំពេញការងារ។
2. ដោយសារតែប្រជាជនក្នុងក្រុងមានការកើនឡើង នាំអោយមានការស្ទះចរាចរណ៍
3. ដោយសារតែប្រជាជនខ្មែរ មានការយល់ដឹងពីរបៀបរស់នៅដែលមានស្តង់ដារប្រសើរជាងមុន ដូចជាហេដ្ឋារចនាសម្ព័ន្ធ ឧបករណ៍ប្រើប្រាស់ ផ្សារទំនើប សាលារៀន មន្ទីរពេទ្យ ។ល។
4. និន្នាការរបស់អតិថិជនដែលទិញដីឆ្ងាយពីក្រុង ហើយកំពុងតែជួលផ្ទះនៅក្នុងទីក្រុងភ្នំពេញ នឹងងាកមកទិញខុនដូតំលៃសមរម្យវិញ ដោយហេតុថាការទិញខុនដូមានភាពងាយស្រួល ក្នុងការបង់ប្រាក់ ដែលអាចអោយពួកគាត់យកលុយពីការជួលផ្ទះ រឺលុយពីការបង់រំលោះដី ដែលនៅជាយក្រុង ជំនួសដោយការទិញខុនដូវិញ។
លើសពីនេះទៅទៀត ការទិញខុនដូគឺជាការទិញផ្ទះរស់នៅតែម្តង អាចអោយគាត់មានស្ថេរភាព និងផាសុកភាពសំរាប់គ្រួសារ ជាពិសេស គាត់អាចបំពេញភារកិច្ចក្នុងទីក្រុងភ្នំពេញ បានយ៉ាងងាយស្រួល និងចំណេញពេលវេលា ថែមទាំងកូនៗ របស់គាត់ អាចមានឱកាសក្នុងការចូលរៀនសាលាល្អៗក្នុងក្រុងភ្នំពេញ។
នាយិកាប្រចាំប្រទេសក្រុមហ៊ុនអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ថា “បច្ចុប្បន្ននេះខុនដូដែលតម្លៃសមរម្យភាគច្រើន មានតម្រូវការខ្ពស់ពីសំណាក់អតិថិជនក្នុងស្រុក ដោយសារពួកគាត់បានយល់ និងស្គាល់ពីគុណតម្លៃនៃការស្នាក់នៅក្នុងខុនដូ ហើយពួកគាត់ទិញសម្រាប់រស់នៅច្រើន ជាងទិញសម្រាប់ទុកវិនិយោគបន្ត”។
លោកស្រីអាន សុធីតាបានបន្តទៀតថា និយាយរួមទៅ ការវិនិយោគទៅលើប្រភេទខុនដូតម្លៃសមរម្យ នៅតែមានភាពល្អប្រសើរទាំងនៅក្នុងឆ្នាំ២០២០នេះ និងបន្តទៅឆ្នាំក្រោយទៀត ព្រោះកាលណាតម្លៃទាប នឹងមានទីផ្សារទូលាយ បន្ទាប់ពីទទួលបានការចាប់អារម្មណ៍កាន់តែច្រើនពីអតិថិជនក្នុងស្រុក ជាពិសេសជនជាតិខ្មែរ។
លោកស្រីបានបញ្ជាក់ថា ខុនដូដែលត្រូវបានចាត់ទុកថាប្រភេទសមរម្យ គឺមានតម្លៃប្រមាណ១២០០ដុល្លារ។ ដោយឡែកខុនដូតម្លៃមធ្យមឬតម្លៃកណ្តាល គឺមានតម្លៃប្រមាណចាប់ពី១៥០០ដុល្លារឡើងទៅ ក្នុងមួយម៉ែត្រការ៉េហើយចំពោះប្រភេទខុនដូតម្លៃខ្ពស់គឺមានតម្លៃចាប់ពីប្រមាណ២៥០០ដុល្លារ ក្នុងមួយម៉ែត្រការ៉េឡើងទៅ និងស្ថិតនៅជាន់ខ្ពស់ៗ៕
February 27, 2020
ខុនដូតម្លៃទាបថ្មីមួយ នឹងចាប់ផ្តើមសាងសង់នៅចុងសប្តាហ៍នេះ
ភ្នំពេញៈ ខុនដូតម្លៃទាបមួយដែលគ្រោងវិនិយោគទឹកប្រាក់ជាង 10លានដុល្លារអាមេរិកគ្រោងនឹងចាប់ផ្តើមសាងសង់នៅចុងសប្តាហ៍នេះហើយ។
លោក ទុយ ប៊ុន ភាគហ៊ុនិកក្រុមហ៊ុនលំនៅដ្ឋាន L កម្ពុជាភ្នំពេញ បានថ្លែងឲ្យដឹងតាមទូរស័ព្ទនារសៀលថ្ងៃទី7 ខែសីហានេះថា ការសាងសង់គ្រឹះរបស់ខុនដូកម្ពស់ 24ជាន់នេះនឹងចាប់ផ្តើមនៅថ្ងៃទី13 ខែសីហាខាងមុខនេះ និងគ្រោងបញ្ចប់ការសាងសង់ក្នុងរយៈពេល 3ឆ្នាំ។ ខុនដូនេះមានទីតាំងនៅតាមបណ្តោយផ្លូវចូលវត្តដំបូកខ្ពស់ ក្នុងសង្កាត់បឹងទំពុន រាជធានីភ្នំពេញ។ លោកបន្តថា ខុនដូនេះជាប្រភេទខុនដូមានតម្លៃទាបដែលមានមួយបន្ទប់គេង និងពីរបន្ទប់គេង និងលក់ក្នុងតម្លៃ800ដុល្លារក្នុងមួយម៉ែត្រការ៉េ។
លោកបន្តថា “ខ្ញុំមិនព្រួយបារម្ភពីការលក់ទេ ព្រោះយើងមានអតិថិជនក្នុងដៃស្រាប់ ហើយបើលក់មិនដាច់ក៏ក្រុមហ៊ុនអាចប្រើប្រាស់ជាអគារសម្រាប់ជួលផងដែរ”។ ខុនដូនេះមានចំណតយានយន្តចំនួន6ជាន់ និងមានក្លឹបហាត់ប្រាណ Sky Bar ភោជនីយដ្ឋាន និងក្លិបហាត់ប្រាណនៅជាន់ទី24។ នេះជាគម្រោងទី6របស់ក្រុមហ៊ុនលំនៅដ្ឋានអឹល កម្ពុជាភ្នំពេញ។
ការទិញលក់ខុនដូនៅកម្ពុជាកំពុងចាប់ផ្តើមមានការកើនឡើង ពិសេសខុនដូសម្រាប់ប្រជាជនមានជីវភាពមធ្យម។ តាមការសិក្សារបស់ក្រុមហ៊ុនប៊ុណ្ណារៀលធីគ្រុប ដែលទើបបញ្ចប់កាលពីពេលថ្មីៗនេះបានរកឃើញថា ការលក់ខុនដូបានកើនពី60ភាគរយកាលពីឆ្នាំមុន ដល់61ភាគរយនៅក្នុងឆមាសទី1ឆ្នាំនេះ ធៀបរយៈពេលដូចគ្នាកាលពីឆ្នាំមុន ខណៈចំនួនខុនដូផ្គត់ផ្គង់ចូលទីផ្សារបានកើនឡើងជាង477,000យូនីត៕
August 7, 2017
ណត្ថិយា អះអាងថា លុយទិញខុនដូបានមកពីមុខរបររបស់នាង
កញ្ញា ណត្ថិយា មានមហាជនជាច្រើនស្គាល់នាងតាមរយៈការសម្ដែងកាយវិការក្នុងបទចម្រៀង «សន្សំលុយចងដៃអូន» និងបទ «រាំតាមពូ» ដែលជាការបកស្រាយរបស់លោក ខេមរៈ សិរីមន្ដ។ ថ្មីៗនេះបានលេចឮដំណឹងថា ក្រោយពីបានចូលប្រឡូកសិល្បៈមួយប្រាវមក នាងអាចមានលទ្ធភាពទិញខុនដូ នៅម្ដុំផ្សារបឹងត្របែកបានហើយ។
ក្រោយពីទទួលបានប្រជាប្រិយភាពមួយប្រាវរួចមក ស្រាប់តែបាត់មុខនាងឈឹង។ ធ្វើឱ្យអ្នកគាំទ្រនាងគិតថា នាងទំនងជាបោះបង់ចោលសិល្បៈទៅចាប់យកអាជីវកម្មថ្មីតាមរយៈការបើកហាងសាឡនពេញទំហឹងហើយមើលទៅ តែផ្ទុយទៅវិញមិនត្រឹមតែនាងមិនបោះបង់ចោលអាជីពសិល្បៈប៉ុណ្ណោះទេ ថែមទាំងមានដំណឹងល្អជាមួយការទិញខុនដូទៀតផង។
ជាមួយនឹងដំណឹងរីករាយនេះមានអ្នកគាំទ្រនាងជាច្រើនបានសរសើរពីសមត្ថភាពរបស់នាង ដ្បិតអីនាងទើបតែចូលប្រឡូកសិល្បៈបានមួយប្រាវសោះ តែអាចមានលទ្ធភាពទិញខុនដូរស់នៅបាត់ទៅហើយ។
កញ្ញា ណត្ថិយាបានលើកឡើងថា សូមអ្នកគាំទ្រនាងទាំងអស់កុំមានការយល់ច្រឡំឱ្យសោះទៅលើការទិញខុនដូនេះ ព្រោះវាជាលុយរបស់នាងសុទ្ធសាធ។ នាងបញ្ជាក់ថា៖ «ខ្ញុំទិញវាក្នុងតម្លៃជាង10ម៉ឺនដុល្លារ ហើយលុយទិញខុនដូនេះជាលុយដែលបានមកពីការរកស៊ីធ្វើការរបស់ខ្ញុំនាពេលកន្លងមក។ ពេលសម្រេចចិត្ដទិញខុនដូ ខ្ញុំបានគិតគូរវែងឆ្ងាយណាស់ ដោយសារទីតាំងនៅចំកណ្ដាលក្រុង ដូច្នេះខ្ញុំមិនបាច់ជួលកន្លែងបើកហាងលក់ផលិតផលអ្វីទេ ខ្ញុំយកកន្លែងរស់នៅធ្វើជាការិយាល័យសម្រាប់ដាក់លក់ផលិតផលតែម្ដង»។
ជាមួយនឹងការដកខ្លួនមួយរយៈនោះនាងប្រាប់ថា នាងមិនបានឈប់ពីការងារសិល្បៈទេ គ្រាន់តែមួយរយៈមុននាងរវល់រៀបចំរបររកស៊ីឱ្យមានដំណើរការល្អសិន ដូច្នេះហើយទើបនាងរយាលពុំបានចេញមុខក្នុងសិល្បៈ។ នាងបញ្ជាក់ថា៖ «ហាងសាឡនរបស់ខ្ញុំបានផ្អាកដំណើរការទៅហើយ ដោយសារតែខ្ញុំគ្មានពេលមើលការខុសត្រូវ ព្រោះខ្ញុំរស់នៅភ្នំពេញតែម្នាក់ឯង រីឯបងប្អូនរស់នៅឯខេត្ដបាត់ដំបងទាំងអស់ ចង់ឱ្យពួកគាត់ជួយក៏មិនកើត ដូច្នេះទើបខ្ញុំសម្រេចបិទហាងសាឡននៅភ្នំពេញនេះចោល ហើយទៅបើកហាងលក់បុកល្ហុងនៅឯខេត្ដបាត់ដំបងវិញ»។
តារាសម្ដែងរូបនេះបន្ដថា ទោះបីជានាងបិទហាងសាឡនពិតមែន ប៉ុន្ដែមុខរបរលក់ផលិតផលថែរក្សាសម្ផស្សដែលបានដំណើរការជាយូរមកហើយនោះ នាងនៅតែបន្ដលក់តាមរយៈ Online ដោយនាងពុំបានបោះបង់ចោលទេ។ រីឯហាងបុកល្ហុង ដែលចំណាយទុនជិតមួយម៉ឺនដុល្លារសម្រាប់ដំណើរការនោះ នាងត្រូវទុកឱ្យបងស្រីរបស់នាងជាអ្នកមើលការខុសត្រូវជំនួស៕

July 31, 2017
ខុនដូតម្លៃ 10លានដុល្លារសម្រាប់ប្រជាជនមានជីវភាពមធ្យមត្រៀមសាងសង់
ភ្នំពេញៈ ក្រុមហ៊ុនលំនៅដ្ឋាន អឹលកម្ពុជាភ្នំពេញ គ្រោងបោះទុន10លានដុល្លារដើម្បីសាងសង់ខុនដូថ្មីមួយសម្រាប់ប្រជាជនមានជីវភាពមធ្យមស្ថិតក្នុងសង្កាត់បឹងទំពុន រាជធានីភ្នំពេញ។
លោក ទុយ ប៊ុន ម្ចាស់ភាគហ៊ុននៃក្រុមហ៊ុនលំនៅដ្ឋានអឹលកម្ពុជាភ្នំពេញបានថ្លែងឲ្យដឹងតាមទូរស័ព្ទនាព្រឹកថ្ងៃទី20 កក្កដានេះថា ខុនដូនេះនឹងសាងសង់នៅខែសីហាខាងមុខនេះ ដោយមានផ្ទះសរុបចំនួនជាង400យូនីត និងមានកម្ពស់22ជាន់ ស្ថិតនៅតាមបណ្តោយផ្លូវបេតុងចូលវត្តដំបូកខ្ពស់ចម្ងាយប្រមាណ300ម៉ែត្រ។ លោកបន្តថា ផ្ទះក្នុងគម្រោងនេះមានទំហំចាប់ពីជាង32ម៉ែត្រការ៉េ រហូតដល់ជាង60ម៉ែត្រការ៉េ និងលក់ក្នុងតម្លៃ800ដុល្លារក្នុងមួយម៉ែត្រការ៉េ។
លោកបន្តថា អគារខុនដូកម្ពស់22ជាន់នេះនឹងទុក5ជាន់សម្រាប់ចំណតយានយន្ត និងមានក្លឹបហាត់ប្រាណ ព្រមទាំងSky Barផងដែរ ដើម្បីបម្រើដល់ការកម្សាន្ត និងសុខមាលភាពរបស់អ្នករស់នៅលើអគារនេះ។ លោកបន្តថា អគារនេះសាងសង់នៅលើផ្ទៃដីជាង2,000ម៉ែត្រការ៉េ និងគ្រោងបញ្ចប់ការសាងសង់រយៈពេល2ឆ្នាំកន្លះខាងមុខនេះ។
យោងតាមការសិក្សារបស់ក្រុមហ៊ុន CBRE Cambodia បានរកឃើញថា គិតរហូតដល់ដំណាច់ឆ្នាំនេះ ខុនដូចំនួន7,000យូនីតទៀតនឹងដាក់ចូលទីផ្សារ ខណៈខុនដូចំនួន5,000យូនីតបាន និងកំពុងប្រើប្រាស់នៅលើទីផ្សាររួចហើយ។
អ្នកនាង អាន សុធីតា នាយិកាក្រុមហ៊ុនCBRE CAMBODIAបានថ្លែងថា ទីផ្សារខុនដូបច្ចុប្បន្ននៅតែដំណើរការលក់បានជាធម្មតា ប៉ុន្តែខុនដូដែលផ្តោតលើប្រជាជនមានជីវភាពមធ្យមមានទីផ្សារល្អជាងខុនដូដែលមានតម្លៃខ្ពស់៕
July 20, 2017
ខុនដូចំនួន 7,000 យូនីតទៀត នឹងដាក់ចូលទីផ្សារក្នុងឆ្នាំនេះ
ភ្នំពេញៈ ខុនដូចំនួន 7,000យូនីតទៀត នឹងដាក់ចូលទីផ្សារនៅឆ្នាំនេះ ខណៈការលក់ស្ថិតនៅក្នុងភាពមិនច្បាស់លាស់នៅឡើយ។
អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងឲ្យដឹងតាមទូរស័ព្ទនាព្រឹកថ្ងៃទី12 កក្កដានេះថា តាមការព្យាករចំនួនខុនដូផ្គត់ផ្គង់ចូលទីផ្សារនឹងកើនដល់ 7,000យូនីតបន្ថែមទៀត ដែលធ្វើឲ្យចំនួនខុនដូផ្គត់ផ្គង់ចូលទីផ្សារសរុបកើនដល់ប្រមាណ 12,000យូនីត គិតត្រឹមដំណាច់ឆ្នាំ2017នេះ។ អ្នកនាងបន្តថា ការលក់នៅតែដំណើការសម្រាប់ខុនដូដែលផ្តោតលើប្រជាជនមានជីវភាពមធ្យម ប៉ុន្តែខុនដូដែលមានតម្លៃថ្លៃផ្តោតលើប្រជាជនមានជីវភាពធូរធារខ្លាំងមានការលក់យឺតបន្តិច។
អ្នកនាងបន្តថា “វាមិនមានអ្វីគួរឲ្យបារម្ភនោះទេ បើទោះជាមានការបារម្ភពីការផ្គត់ផ្គង់លើសតម្រូវការក្តី ប៉ុន្តែទីផ្សារជាក់ស្តែងមិនមានបញ្ហានោះទេ”។ អ្នកនាងបន្តថា “យើងពិតជាមានការលំបាកក្នុងការប្រមូលទិន្នន័យពីការលក់ ដោយសារគម្រោងខុនដូនីមួយៗ មិនបង្ហាញពីតម្លាភាពនៃការលក់របស់ពួកគេនោះទេ”។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកគីម ហ៊ាងបានថ្លែងថា ការទិញខុនដូសម្រាប់វិនិយោគមិនសូវមានច្រើននោះទេ ដោយសារមិនសូវមានភាពចំណេញ និងពិបាកលក់ចេញ ប៉ុន្តែតម្លៃដីធ្លី និងផ្ទះនៅតាមបុរីនានាបានបន្តកើនឡើង និងមានតម្រូវការច្រើន។ លោកបន្តថា ការវិនិយោគខុនដូច្រើន មិនមានបញ្ហាក្នុងទីផ្សារនោះទេ វាអាស្រ័យលើពេលវេលាប៉ុណ្ណោះ៕
July 12, 2017