កែប - La Reine Media

ព្រែកជីកហ្វូណនតេជោ «ល្អមើលផង ល្អហូបផង»

(ភ្នំពេញ) – សម្ដេចធិបតី ហ៊ុន ម៉ាណែត បានមានប្រសាសន៍ថា ប្រទេសយើងជាមហាអំណាច ពេលដែលមានសេដ្ឋកិច្ចខ្លាំង ដូច្នេះព្រែកជីក (ហ្វូណនតេជោ) នេះ គឺបម្រើដល់ការបង្កើនសេដ្ឋកិច្ច និងជីវភាពរបស់ប្រជាពលរដ្ឋ។

ប្រសាសន៍របស់សម្ដេចប្រមុខរាជរដ្ឋាភិបាលកម្ពុជា ខាងលើនេះ ត្រូវបានធ្វើឡើងនាព្រឹកថ្ងៃទី 11 ខែមេសា ឆ្នាំ 2024 នៅក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតនៅភូមិឱភាសាំង ឃុំកណ្តឹង ស្រុកបាទី ខេត្តតាកែវ។

សម្ដេចធិបតី បានបញ្ជាក់ថា ព្រែកជីកហ្វូណនតេជោ «ល្អមើលផង និងល្អហូបផង» បន្ទាប់ពីមានមតិរិះគន់ខ្លះចំពោះគម្រោងព្រែកជីកនេះ។ គម្រោងនេះនឹងមិនបង្កផលប៉ះពាល់ដល់បរិស្ថាន ក៏ដូចជាមិនបង្កការគំរាមកំហែងដល់ប្រទេសជិតខាង។

សូមរំលឹកថា គម្រោងព្រែកជីកហ្វូណនតេជោ មានប្រវែង 180 គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លៃបាសាក់ រួចចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន 4 រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ 1.6 លាននាក់ រស់នៅអមសងខាងផ្លូវទឹក។

យោងតាមក្រសួងសាធារណៈការនិងដឹកជញ្ជូន ការដ្ឋានសាងសង់ព្រែកជីកដែលនឹងធ្វើឡើងក្នុងអំឡុងត្រីមាសទី 4 នៃឆ្នាំ 2024 ខាងមុខនេះ មានតម្លៃប្រមាណ 1,700 លានដុល្លារអាម៉េរិក ហើយនឹងត្រូវចំណាយពេល 4 ឆ្នាំ ក្នុងការស្ថាបនា។ គម្រោងនេះគឺជាផ្នែកមួយនៃគម្រោងក្រវាត់ផ្លូវពាណិជ្ជកម្ម (Belt and Road Initiative ឬBRI) របស់រដ្ឋាភិបាលចិន៕

April 11, 2024

ទំពាំងឫស្សីមានប្រូតេអ៊ីនស្មើនឹងទឹកដោះគោ

ក្រុមអ្នកវិទ្យាសាស្ត្រចិន យល់ថា ទំពាំងឫស្សីអាចដើរតួនាទីសំខាន់នៅក្នុងការផ្គត់ផ្គង់អាហារយូរអង្វែង និងមានជីវជាតិសម្រាប់ប្រជាជនទូទាំងសកលលោក។

ទំពាំងឫស្សីពិតជាមានអត្ថប្រយោជន៍ពិសេសសម្រាប់សុខភាព ព្រោះវាមានផ្ទុកប្រូតេអ៊ីនច្រើន ដូចទៅនឹងទឹកដោះគោ។ នេះបើតាមអត្ថបទសារព័ត៌មានមួយដែលបានចុះផ្សាយលើទស្សនាវដ្ដី និន្នាការវិទ្យាសាស្ត្រ និងបច្ចេកវិទ្យាអាហារ (Trends in Food Science & Technology) កាលពីពេលថ្មីៗកន្លងទៅនេះ។

លោក Wu Liangru ដែលជាអ្នកស្រាវជ្រាវនៅមជ្ឈមណ្ឌលជាតិស្រាវជ្រាវទំពាំងឫស្សីចិន បាននិយាយថា ទំពាំងឫស្សីអាចជាអាហារសំខាន់មួយប្រភេទនាពេលអនាគត។ អត្ថបទលើទំព័រ Trends in Food Science & Technology សរសេរថា «ទំពាំងនាំមកនូវប្រភពអាហារស្ថិរភាព ផ្ដល់ឱកាសដល់ពាណិជ្ជកម្ម និងការនាំចេញ អាចរួមចំណែកទៅក្នុងកំណើនសេដ្ឋកិច្ចក្នុងស្រុក»។

ទំពាំងផ្ដល់អាស៊ីតអាមីនេចាំបាច់ចំនួន 7 ក្នុងចំណោម 9 ដែលមនុស្សត្រូវការ។ ជាក់ស្ដែង អាស៊ីតអាមីនេក្នុងទំពាំងមានបរិមាណខ្ពស់ជាងបណ្ដាមើមមួយចំនួន មានដូចជា ការ៉ុត ស្ពៃក្ដោប និងភ្លៅកង្កែបជាដើម។ ក្រៅពីនេះ ទំពាំងក៏មានផ្ទុកជាតិដែកច្រើនជាងល្ពៅ និងស្ពៃពួយឡេង (spinach) ផងដែរ។

ទំពាំងឫស្សីខ្ចីក៏ជាប្រភពផ្គត់ផ្គង់ជាតិសរសៃដ៏ច្រើន មានជាតិខ្លាញ់តិច ព្រមទាំងមានផ្ទុកវីតាមីនច្រើនប្រភេទទៀតផង។ ទន្ទឹមនឹងនេះ ការស្រាវជ្រាវក៏បានរកឃើញថា ទំពាំងមានសមត្ថភាពទប់ស្កាត់បញ្ហាលើសខ្លាញ់ ឡើងទម្ងន់ លើសជាតិស្ករ និងជំងឺមហារីក ហើយអាចទប់ទល់នឹងអុកស៊ីតកម្ម និងកម្ចាត់មេរោគផងដែរ។

ទំពាំងឫស្សីអាចត្រូវបានកែច្នៃទៅតាមវិធីផ្សេងៗ ក្នុងនោះមានជាអាទិ៍ ទំពាំងជ្រក់ ទំពាំងក្រៀម ទឹកទំពាំងកៀប និងម្សៅទំពាំង ឬចម្អិនជាអាហារដូចទៅនឹងបន្លែដទៃ។ល។

ការសិក្សាស្រាវជ្រាវបានឱ្យដឹងថា ក្នុងចំណោមឫស្សី 800 ប្រភេទដែលត្រូវបានរកឃើញនៅប្រទេសចិន គឺមានតែ 153 ប្រភេទប៉ុណ្ណោះដែលអាចបរិភាគបាន។

March 29, 2024

ទឹកធ្លាក់សិប្បនិម្មិតដែលខ្ពស់ជាងគេបង្អស់លើពិភពលោក

(អ៊ីតាលី) – ទឹកធ្លាក់ Marmore ដែលមានកម្ពស់ 165 ម៉ែត្រ បានកើតឡើង នៅពេលប្រជាជនរ៉ូមបុរាណ កែប្រែទន្លេ Velino កាលពី 2,200 ឆ្នាំមុន។

ទឹកធ្លាក់បីជាន់ដ៏ស្រស់ស្អាត និងមានឈ្មោះថា Marmore នេះ ស្ថិតនៅចម្ងាយពីទីក្រុង Terni ក្នុងតំបន់ Umbria របស់ប្រទេសអ៊ីតាលី ប្រហែល 8 គីឡូម៉ែត្រទៅទិសខាងកើត។

ភាពល្បីល្បាញរបស់ទឹកធ្លាក់នេះ មិនត្រឹមតែស្ថិតនៅត្រង់ភាពអស្ចារ្យរបស់វា ប៉ុន្តែក៏កើតមានដោយសារនេះជាលទ្ធផលនៃអន្តរាគមន៍របស់មនុស្ស ទៅលើធម្មជាតិ។ នេះបើតាមការផ្សាយរបស់ Amusing Planet។

កាលពី 2,200 ឆ្នាំមុន ក្នុងតំបន់ខាងលើ ពុំមានទឹកធ្លាក់ណាមួយឡើយ។ លើទន្លេ Velino ជាទីដែលមានទឹកធ្លាក់ Marmore មានខ្សែទឹកខុសពីបច្ចុប្បន្ន ដោយវាហូរទៅកាន់បឹងភក់មួយនៅវាលរាប Reiti។ ទឹកដែលស្ថិតនៅក្នុងបឹងភក់នេះ មិនល្អសម្រាប់សុខភាព ដូច្នេះ មន្ត្រីចក្រភពរ៉ូមបុរាណ Manius Curius Dentatus ក៏ចេញបញ្ជាឱ្យជីកព្រែកមួយខ្សែដែលហៅថា ជ្រលង Curiano កាលពីឆ្នាំ 271 មុនគ្រិស្តសករាជ ដើម្បីបង្ហូរទឹកពីបឹងភក់ ឱ្យធ្លាក់ទៅលើជញ្ជាំងថ្មធម្មជាតិនៅ Marmore បង្កើតបានជាទឹកធ្លាក់។ ចាប់ពីពេលនេះមក ទឹកក៏ហូរចូលទន្លេ Nera នៅខាងក្រោម។

ក៏ប៉ុន្តែ មិនយូរប៉ុន្មាន បញ្ហាក៏បានកើតឡើងខុសពីការរំពឹងទុក ដោយសារតែដំណោះស្រាយខាងលើបាននាំឱ្យមានទឹកជំនន់នៅជ្រលងភ្នំ Reiti និង Terni។ បញ្ហានេះក៏ធ្វើឱ្យមានការខ្វែងគំនិតគ្នារវាងប្រជាជននៅ Reiti និង Terni ផងដែរ។

រហូតដល់សតវត្សរ៍ទី 15 ទើបសង្ឃរាជ Gregory XII ចេញបញ្ជាឱ្យជីកព្រែកថ្មីដើម្បីដោះស្រាយបញ្ហា។ ការជួសជុល និងធ្វើឱ្យប្រសើរឡើងនូវព្រែកជីកនេះ ត្រូវបានសង្ឃរាជ Paul III ដឹកនាំការអនុវត្តនៅពាក់កណ្ដាលសតវត្សរ៍ទី 16។ ការធ្វើឱ្យប្រសើរឡើងលើកចុងក្រោយដែលបានជួយឱ្យទឹកធ្លាក់ Marmore មានរូបរាងដូចសព្វថ្ងៃ គឺអនុវត្តដោយស្ថាបត្យករ Andrea Vici ក្រោមការដឹកនាំរបស់សង្ឃរាជ Pius V1 នៅចុងសតវត្សរ៍ទី 18៕

March 19, 2024

តំបន់រុនតាឯក ត្រូវបានកែប្រែជា «ទីក្រុងរុនតាឯកតេជោសែន» ជាផ្លូវការ

យោងតាមអនុក្រឹត្យលេខ 07 អនក្រ.បក ចុះថ្ងៃទី 11 មករា 2024 រាជរដ្ឋាភិបាលកម្ពុជា បានសម្រេចកែប្រែតំបន់រុនតាឯក នៅក្នុងខេត្តសៀមរាប ទៅជា «ទីក្រុងរុនតាឯកតេជោសែន» ជាផ្លូវការ។

អនុក្រឹត្យខាងលើបញ្ជាក់ថា ក្រុងរុនតាឯកតេជោសែន នៃខេត្តសៀមរាប ត្រូវបានបង្កើតឡើងដោយការកាត់យកឃុំរុនតាឯក ពីស្រុកបន្ទាយស្រី និងឃុំបល្ល័ង្ក ពីស្រុកប្រាសាទបាគង ហើយមានសង្កាត់ចំនួនពីរ គឺសង្កាត់រុនតាឯក និងសង្កាត់បល្ល័ង្ក ខណៈទីតាំងរដ្ឋបាលក៏ស្ថិតនៅក្នុងសង្កាត់រុនតាឯក។

កន្លងមក តំបន់រុនតាឯក ត្រូវបានរាជរដ្ឋាភិបាល គ្រោងបង្កើតទៅជាទីក្រុងមួយ ដើម្បីឱ្យក្លាយជាតំបន់ដែលបង្កើតការងារនៅនឹងកន្លែង ព្រមទាំងផ្ដោតសំខាន់ទៅលើនិរន្តរភាពនៃការលើកកម្ពស់ជីវភាពប្រជាជនក្នុងតំបន់៕

January 18, 2024

គម្រោងព្រែកជីកតម្លៃ 1.7 ពាន់លានដុល្លាររបស់កម្ពុជា នឹងបើកការដ្ឋាននៅត្រីមាសចុងក្រោយក្នុងឆ្នាំនេះ

(ភ្នំពេញ) ៖ «យើងនឹងមាន គម្រោងព្រែកជីកហ្វូណនតេជោ ជាគម្រោងព្រែកជីកជាប្រវត្តិសាស្ត្រនៅកម្ពុជា ដែលគ្រោងរៀបចំពិធីបើកការដ្ឋានសាងសង់ក្នុងអំឡុងត្រីមាសទី 4 ឆ្នាំ 2024 ខាងមុខនេះ» ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងដូច្នេះ។

ប្រសាសន៍ស្ដីពីព្រែកជីកជាប្រវត្តិសាស្ត្រដែលជាគម្រោងធ្លាប់ត្រូវបានវៀតណាមសម្ដែងការព្រួយបារម្ភនាពេលកន្លង ត្រូវបានលើកឡើងនាព្រឹកថ្ងៃទី 17 មករា 2024 នេះ តាមរយៈបណ្ដាញសង្គមហ្វេសប៊ុកផ្លូវការ របស់ក្រសួងសាធារណការ និងដឹកជញ្ជូន។

យោងតាមសារព័ត៌មានក្នុងស្រុក ព្រែកជីកហ្វូណនតេជោ ដែលនឹងលាតសន្ធឹងលើខេត្តចំនួន 4 គឺ ខេត្តកណ្ដាល តាកែវ កំពត និងខេត្តកែប នេះ ត្រូវបានបញ្ចប់ការសិក្សាសមិទ្ធលទ្ធផលរួចរាល់ និងគ្រោងចំណាយទុនវិនិយោគ 1.7 ពាន់លានដុល្លារអាម៉េរិក។ ព្រែកជីកនេះ នឹងមានប្រវែង 180 គីឡូម៉ែត្រ លាតសន្ធឹងចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ក្នុងស្រុកកោះធំ ហើយបញ្ចប់នៅត្រង់ដៃសមុទ្រខេត្តកែប៕

January 17, 2024

ឡាវមានផែនការអភិវឌ្ឍព្រលានយន្តហោះ Nongkhang ឱ្យទៅជាអាកាសយានដ្ឋានអន្តរជាតិ

ព្រលានយន្តហោះ Nongkhang នៅក្នុងខេត្ត Huaphan ត្រូវបានកំណត់គោលដៅអភិវឌ្ឍទៅជាអាកាសយានដ្ឋានអន្តរជាតិ ដើម្បីទាក់ទាញទេសចរបរទេស ក៏ជាគាំទ្រដល់ក្រុមហ៊ុនទាំងឡាយដែលចង់មកវិនិយោគនៅខេត្តនេះ។

អភិបាលខេត្ត Huaphan លោក Khampheng Saysompheng ថ្មីៗនេះបានចែករំលែកអំពីការលើកសំណើស្ដីពីការកែប្រែព្រលានយន្តហោះ Nongkhang នៅក្នុងកិច្ចប្រជុំទូលាយរបស់រដ្ឋាភិបាល ដែលធ្វើឡើងនៅរដ្ឋធានីវៀងចន្ទន៍កាលពីចុងឆ្នាំ 2023។

លោក Khampheng ឱ្យដឹងថា រដ្ឋាភិបាលបានយល់ព្រមជាមួយនឹងសំណើរបស់អាជ្ញាធរខេត្ត Huaphan។ លោកជឿជាក់ថា ការពង្រីកព្រលានយន្តហោះដើម្បីឆ្លើយតបនឹងជើងហោះហើរអន្តរជាតិ នឹងនាំមកនូវផលប្រយោជន៍ធំធេងដល់សេដ្ឋកិច្ចរបស់ខេត្ត ក៏ដូចជាសេដ្ឋកិច្ចជាតិ។

បច្ចុប្បន្ន ការអភិវឌ្ឍនៅខេត្ត Huaphan នៅមានកម្រិត ដោយសារតែការធ្វើចរាចរណ៍លើផ្លូវគោកមានការលំបាក ខណៈដែលព្រលានយន្តហោះអាចទទួលបានតែជើងហោះហើរក្នុងស្រុក។

ទន្ទឹមនឹងការពង្រីកអាកាសយានដ្ឋាន អាជ្ញាធរខេត្តខាងលើក៏នឹងបង្កើនការគាំទ្រដល់វិស័យឯកជនដែលមានបំណងរកស៊ីក្នុងវិស័យហេដ្ឋារចនាសម្ព័ន្ធ សំណង់អគារនៅក្នុងខេត្តនេះផងដែរ។

អាកាសយានដ្ឋាន Nongkhang អាចទទួលភ្ញៀវបាន 100,000 នាក់ជារៀងរាល់ឆ្នាំ ដែលភាគច្រើនធ្វើដំណើរតាមយន្តហោះខ្នាតតូច ATR72 និង MA-60 ដែលមានពី 70 ទៅ 100 កៅអី។ បច្ចុប្បន្ន Lao Airlines និង Lao Skyway កំពុងផ្ដល់សេវាកម្មដឹកជញ្ជូនទៅមករវាងអាកាសយានដ្ឋាន Vientiane និង Nongkhang៕

January 4, 2024

នាវាទេសចរណ៍ខ្នាតធំដែលធ្លាប់ទទួលបានជំនួយពីកម្ពុជាក្នុងសម័យកូវីដ បានត្រឡប់មកជាថ្មី

(ខេត្តព្រះសីហនុ) – នាវាទេសចរណ៍ខ្នាតធំ Westerdam នាថ្ងៃទី 28 ធ្នូ 2023 នេះ ត្រូវបានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុ ដើម្បីឱ្យភ្ញៀវនៅលើនាវានេះឡើងមកកម្សាន្តនៅក្នុងខេត្តព្រះសីហនុ និងខេត្តកែប។ នេះបើតាមទំព័រ CPP។

នេះគឺជាការចូលចតជាលើកទីពីររបស់នាវាទេសចរណ៍ Westerdam នៅកំពង់ផែរបស់កម្ពុជា បន្ទាប់ពីការចូលចតលើកទីមួយកាលពីឆ្នាំ 2020 ជាពេលដែលពិភពលោកកំពុងប្រឈមនឹងវិបត្តិសុខភាព និងជាពេលដែលនាវានេះត្រូវបានប្រទេសជាច្រើនបដិសេធការស្នើសូមចូលចត។

ការចូលចតជាលើកទីពីរដែលធ្វើឡើងនៅថ្ងៃទី 28 ខែធ្នូ ឆ្នាំ 2023 របស់ Westerdam គឺមានភ្ញៀវទេសចរណ៍ជាងពីរពាន់នាក់។ ដំណើរចូលចតជាថ្មីនេះ ត្រូវបានក្រសួងទេសចរណ៍ សហការជាមួយរដ្ឋបាលខេត្តព្រះសីហនុ រៀបចំពិធីទទួល ក៏ដូចជារំលឹកខួបបីឆ្នាំនៃការស្នើសូមចូលចតរបស់នាវា Westerdam នៅកម្ពុជា។

យោងតាមឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ក្នុងចំណោមភ្ញៀវជាងពីរពាន់នាក់នៅលើនាវានេះ មានភ្ញៀវប្រមាណ 500 នាក់បានឡើងមកទស្សនានៅរមណីយដ្ឋាននានាក្នុងខេត្តព្រះសីហនុ និងខេត្តកែប។

«តាមរយៈការចូលចតជាលើកទីពីររបស់នាវាទេសចរណ៍ Westerdam នេះ នឹងជួយទាក់ទាញនាវាទេសចរណ៍ខ្នាតធំមកកាន់កម្ពុជា នាឆ្នាំក្រោយបន្តបន្ទាប់ទៀត» រដ្ឋមន្ត្រីក្រសួងទេសចរណ៍សង្ឃឹមដូច្នេះ។

យោងតាមឯកឧត្ដមរដ្ឋមន្ត្រី នាវាទេសចរណ៍នេះនឹងចតនៅកម្ពុជាក្នុងរយៈពេលមួយថ្ងៃ ហើយគ្រោងនឹងចាកចេញពីកម្ពុជានៅវេលាម៉ោង 9 យប់នេះ។

នៅក្នុង 11 ខែដំបូងនៃឆ្នាំ 2023 កម្ពុជាទទួលបានភ្ញៀវទេសចរណ៍អន្តរជាតិជាង 4.91 លាននាក់ ក្នុងនោះភ្ញៀវពីប្រទេសថៃមានចំនួនច្រើនជាងគេ ពោលគឺ 1.65 លាននាក់ ខណៈភ្ញៀវពីវៀតណាមច្រើនជាងគេលំដាប់ទីពីរ និងចិនលំដាប់ទីបី៕

December 28, 2023

តំបន់រុនតាឯក នឹងក្លាយជាទីក្រុងរណប ដែលបង្កើតការងារនៅនឹងកន្លែងនាពេលខាងមុខ

រាជរដ្ឋាភិបាលកម្ពុជា កំពុងរៀបចំកែប្រែតំបន់ រុនតាឯក ឱ្យក្លាយជា ទីក្រុងរណបរុនតាឯក ដែលបង្កើតការងារជូនពលរដ្ឋនៅនឹងកន្លែង នៅពេលតំបន់នេះមានហេដ្ឋារចនាសម្ព័ន្ធគ្រប់គ្រាន់។

ព័ត៌មាននេះត្រូវបាន សម្តេចធិបតីហ៊ុន ម៉ាណែត លើកឡើងនៅក្នុងពិធីសំណេះសំណាលជាមួយប្រជាពលរដ្ឋក្នុងភូមិរុនតាឯក កាលពីថ្ងៃទី 8 ធ្នូ 2023 នៅខេត្តសៀមរាប។

ប្រមុខរាជរដ្ឋាភិបាល បានណែនាំឱ្យក្រសួងស្ថាប័នពាក់ព័ន្ធ ពិនិត្យ និងទាក់ទាញអ្នកវិនិយោគមកបង្កើតរោងចក្រនានា ដើម្បីបង្កើតការងារជូនពលរដ្ឋនៅតំបន់រុនតាឯក ហើយថា តំបន់នេះនឹងមានហេដ្ឋារចនាសម្ព័ន្ធគ្រប់គ្រាន់ដើម្បីជួយគាំទ្រដល់ការអភិវឌ្ឍ។

តំបន់អភិវឌ្ឍ រុនតាឯក (ភូមិធម្មជាតិរុនតាឯក) ស្ថិតក្នុងស្រុកបន្ទាយស្រី ខេត្តសៀមរាប។ តំបន់នេះមានចម្ងាយប្រហែល 5គីឡូម៉ែត្រ ពីទីរួមខេត្តសៀមរាប ដោយធ្វើដំណើរចេញពីសាលាខេត្ត តាមផ្លូវអប្សរា បត់ឆ្វេងប្រហែល 4.5 គីឡូម៉ែត្រ រួចបត់ឆ្វេងតាមផ្លូវជាតិលេខ 67 ហើយពេលទៅដល់ផ្លូវបែកជាបួន បត់ស្តាំតាមផ្លូវលេខ 810 ប្រហែល 9 គីឡូម៉ែត្រ រួចបត់ស្តាំប្រហែល 3 គីឡូម៉ែត្រ ទើបបត់ឆ្វេងប្រហែល 300 ម៉ែត្រ រួចបត់ស្តាំប្រហែល 450 ម៉ែត្រ ហើយបត់ឆ្វេងប្រហែល 2គីឡូម៉ែត្រទៀត យើងនឹងទៅដល់ភូមិធម្មជាតិរុនតាឯក៕

December 8, 2023

ប្រទេសចិនធ្វើតេស្តរ៉ុក្កែតរុញច្រានអាចប្រើប្រាស់ឡើងវិញដោយជោគជ័យ

កាលពីថ្ងៃទី 02 វិច្ឆិកា ប្រទេសចិនបានទទួលជោគជ័យក្នុងការសាកល្បងដំណើរការហោះឡើង និងចុះចតដោយឈរត្រង់នៃរ៉ុក្កែតពាណិជ្ជកម្ម SQX-2Y ដែលអាចប្រើប្រាស់ឡើងវិញ។ នេះគឺជាជំហានថ្មីរបស់ប្រទេសចិននៅក្នុងវិស័យអវកាស។

រ៉ុក្កែត SQX-2Y ត្រូវបានអភិវឌ្ឍដោយក្រុមហ៊ុន Beijing Interstellar Glory Space Technology។ រ៉ុក្កែតនេះមានអង្កត់ផ្ចិតប្រវែង 3.35 ម៉ែត្រ, បណ្ដោយប្រហែល 17 ម៉ែត្រ និងបំពាក់ម៉ាស៊ីនប្រើប្រាស់មេតានអុកស៊ីសែនរាវ។ នេះគឺជាលើកដំបូងដែលប្រទេសចិនធ្វើតេស្តលើការហោះឡើង ចុះចតដោយឈរត្រង់ និងប្រើប្រាស់ឡើងវិញបាននូវរ៉ុក្កែតប្រើឥន្ធនៈរាវមួយជាន់ក្នុងទម្រង់ពេញលេញ។

ការសាកល្បងខាងលើនេះត្រូវបានធ្វើឡើងក្នុងមជ្ឈមណ្ឌលបាញ់បង្ហោះផ្កាយរណប Tửu Tuyền នៅភាគពាយព្យប្រទេសចិន។ ក្នុងការធ្វើតេស្តនេះ រ៉ុក្កែតបានហោះឡើងដល់កម្ពស់ 178.42 ម៉ែត្រ ខណៈរយៈពេលហោះហើរគឺ 50.82 វិនាទី និងសុក្រឹតភាពនៃទីតាំងចុះចតគឺប្រហែល 1.68 ម៉ែត្រ រួមនឹងល្បឿនចុះចតគឺ 0.025 ម៉ែត្រ/វិនាទី។

ក្រុមហ៊ុន Beijing Interstellar Glory Space Technology ឱ្យដឹងថា ការធ្វើតេស្តនេះមិនត្រឹមតែជួយដល់ការវាយតម្លៃលើគម្រោងអភិវឌ្ឍរ៉ុក្កែតដែលអាចប្រើឡើងវិញបាននោះទេ ប៉ុន្តែក៏ប្រមូលបាននូវទិន្នន័យសំខាន់ និងផ្ដល់ជាជំនួយផ្នែកបច្ចេកទេសសម្រាប់ការអភិវឌ្ឍរ៉ុក្កែតខ្នាតមធ្យម និងធំ ក៏ដូចជាការប្រើប្រាស់មេតានអុកស៊ីសែនរាវ ដែលអាចប្រើប្រាស់ឡើងវិញបានផងដែរ។

រ៉ុក្កែតមានពីរប្រភេទគឺ រ៉ុក្កែតឥន្ធនៈរឹង និងរ៉ុក្កែតឥន្ធនៈរាវ បើសិនបែងចែកទៅតាមប្រភេទឥន្ធនៈដែលប្រើប្រាស់សម្រាប់ម៉ាស៊ីន។ រ៉ុក្កែតឥន្ធនៈរាវមានចំណុចវិជ្ជមានត្រង់ថា វាជួយកាត់បន្ថយការចំណាយ កម្រិតនៃការស៊ីឥន្ធនៈ ការកែប្រែកម្លាំងរុញច្រាន និងលទ្ធភាពនៃការប្រើប្រាស់ឡើងវិញ។ បច្ចុប្បន្ន ប្រទេសនានាកំពុងផ្ដោតទៅលើការស្រាវជ្រាវ អភិវឌ្ឍរ៉ុក្កែតរុញច្រានពាណិជ្ជកម្មដែលអាចប្រើប្រាស់ឡើងវិញបាន។ ការប្រើប្រាស់ឡើងវិញនេះ មិនត្រឹមតែកាត់បន្ថយការចំណាយលើផ្នែករឹងរបស់រ៉ុក្កែតនោះទេ ប៉ុន្តែក៏ធ្វើឱ្យសកម្មភាព និងឧបករណ៍នៅលើដីមានភាពសាមញ្ញ ដូច្នេះក៏កាត់បន្ថយការចំណាយលើដំណើរការនៅលើដី និងបង្កើនការបាញ់បង្ហោះ៕

November 7, 2023

Honda បង្ហាញកង់អគ្គិសនីដំបូងបង្អស់របស់ខ្លួន

ក្រុមហ៊ុនជប៉ុន Honda កំពុងតែពង្រីកមុខជំនួញរបស់ខ្លួននៅក្នុងវិស័យយានយន្តប្រើប្រាស់ថាមពលអគ្គិសនី ដោយការបញ្ចេញកង់អគ្គិសនីដំបូងបង្អស់របស់ខ្លួន នោះគឺ Honda e-MTB Concept។

កង់អគ្គិសនីនេះទើបតែត្រូវបានដាក់បង្ហាញនៅក្នុងព្រឹត្តិការណ៍តាំងពិព័រណ៍ Japan Mobility Show នៅតូក្យូ ជាទីដែល Honda រួមនឹងបណ្ដាក្រុមហ៊ុនផលិតម៉ូតូ និងរថយន្តលំដាប់កំពូលៗដទៃទៀតនៅប្រទេសជប៉ុន បង្ហាញផលិតផលដែលមានលក្ខណៈជាអនាគត និង/ឬពង្រីកយីហោរបស់ពួកគេ។

កង់អគ្គិសនី Honda e-MTB Concept ត្រូវបានគេជឿថា ប្រើប្រាស់ម៉ូទ័រ Brose ដែលមានស្រាប់នាបច្ចុប្បន្ន។ វាប្រើប្រាស់ប្រព័ន្ធបើកបរ SRAM Eagle AXS, ហ្វ្រាំងកម្លាំងទឹក Shimano, ប្រព័ន្ធជើងទប់ក្រោម Fox នៅខាងមុខ និងខាងក្រោយ, ទម្រកែប RockShox Reverb, កង់ DT Swiss XM 1700 និងសំបកកង់ Maxxis Minion DHF។

សម្រាប់ Honda គោលដៅរបស់ពួកគេគឺការបូកបញ្ចូលគ្នារវាងម៉ូតូ និងកង់ទៅក្នុងផលិតផលមួយដែលអាចជិះលើភ្នំ នៅតំបន់ដែលមានឧបសគ្គច្រើន។

Honda មិនមែនជាអ្នកផលិតរថយន្ត ឬម៉ូតូដំបូងគេដែលយកកង់អគ្គិសនីធ្វើជាអ្នកនាំផ្លូវដ៏មានសក្ដានុពលដើម្បីពង្រីកយីហោនោះទេ។ ក្រុមហ៊ុនជាច្រើនបានធ្វើដូច្នេះ ក្នុងនោះមានដូចជា Harley-Davidson, Porsche និង Peugeot ជាដើម។

ថ្មីៗនេះ HUMMER និង Jeep ក៏បាន និងកំពុងប្រឹងប្រែងដើម្បីពង្រីកយីហោរបស់ខ្លួនទៅកាន់វិស័យកង់អគ្គិសនីផងដែរ។

November 6, 2023

Tag: កែប