កូវីដ - La Reine Media

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

យានហោះអវកាសរបស់ Sierra Space បានត្រៀមរួចហើយសម្រាប់ជើងហោះហើរដំបូង

(សហរដ្ឋអាម៉េរិក) – យន្តហោះ Dream Chaser ដែលមានជំនាញខាងដឹកទំនិញឡើងទៅកាន់ ISS នឹងបំពាក់ម៉ាស៊ីនរ៉ុក្កែតតូចៗជាច្រើនគ្រឿង អាចដឹកទំនិញបាន 5,550 គីឡូក្រាមក្នុងមួយជើង។

Dream Chaser ដែលជាយន្តហោះអវកាសពាណិជ្ជកម្មផលិតដោយក្រុមហ៊ុន Sierra Space នៅសហរដ្ឋអាម៉េរិក កំពុងឆ្ពោះទៅជិតដល់ថ្ងៃបាញ់បង្ហោះ។ Dream Chaser ដែលត្រូវបានអភិវឌ្ឍដើម្បីបំពេញភារកិច្ចបាន 15 ជើង នឹងដឹកជញ្ជូនទំនិញឡើងទៅកាន់ស្ថានីយអវកាសអន្តរជាតិ (ISS) ហើយអាចដើរតួនាទីសំខាន់ចំពោះបណ្ដាស្ថានីយអវកាសនាពេលអនាគត។ នេះបើតាម Interesting Engineering ចុះផ្សាយកាលពីថ្ងៃទី 02 វិច្ឆិកា 2023។

យន្តហោះអវកាសនេះមានដងខ្លួនប្រវែង 9 ម៉ែត្រ និងស្លាបប្រវែង 7 ម៉ែត្រ។ ស្លាបរបស់វាអាចបត់បាន អនុញ្ញាតឱ្យគេប្រើប្រាស់វាដូចទៅនឹងទំនិញដែលដាក់លើរ៉ុក្កែត។ Dream Chaser ត្រូវបានណាសាជ្រើសរើសជាយានដឹកទំនិញទីបីសម្រាប់ឆ្នាំ 2026។ វាក៏នឹងត្រូវបានប្រើប្រាស់ក្នុងការដឹកសំរាមពី ISS មកបញ្ឆេះចោលក្នុងស្រទាប់បរិយាកាសផែនដីផងដែរ។

តាមផែនការ ជើងហោះហើរដំបូងរបស់ Dream Chaser នឹងធ្វើឡើងនៅក្នុងឆ្នាំ 2019 ប៉ុន្តែត្រូវអាក់ខានច្រើនលើកដោយសារបញ្ហាកូវីដ-19។ វានឹងត្រូវបានដឹកទៅកាន់មជ្ឈមណ្ឌលសាកល្បង Neil Armstrong របស់ណាសា នៅ Ohio ដើម្បីធ្វើតេស្តពីមួយទៅបីខែ មុនពេលវិលត្រលប់ទៅកាន់មជ្ឈមណ្ឌលអវកាស Kennedy នៅ Florida ដើម្បីធ្វើការហោះហើរជើងដំបូងដែលគ្រោងនឹងធ្វើឡើងនៅខែមេសាឆ្នាំក្រោយ តាមរយៈរ៉ុក្កែត Vulcan របស់ក្រុមហ៊ុន United Launch Alliance៕

November 3, 2023

ថៃបញ្ចុះថ្លៃទិដ្ឋាការ និងការស្នាក់នៅសម្រាប់ពលករកម្ពុជា

ក្រសួងការងារថៃ បានចេញអនុក្រឹត្យថ្មីមួយដែលកំណត់តម្លៃថ្មីទៅលើការត្រួតពិនិត្យ និងផ្ដល់លិខិតពលកម្ម ចំពោះពលករបរទេសដែលមកពី កម្ពុជា និងប្រទេសមួយចំនួនទៀតដែលស្ថិតក្នុងតំបន់អាស៊ីអាគ្នេយ៍។

យោងតាមសារព័ត៌មានក្នុងស្រុក អនុក្រឹត្យខាងលើមានសុពលភាពរយៈពេល 4 ឆ្នាំ ដោយចាប់ផ្ដើមអនុវត្តពីថ្ងៃទី 10 វិច្ឆិកា 2023 និងអនុវត្តសម្រាប់ពលករដែលធ្វើការក្នុងក្របខណ្ឌកិច្ចសន្យា ឬអនុស្សរណៈនៃការយោគយល់ (MoU) ដែលទាក់ទងនឹងការជ្រើសរើសពលករ។

សេចក្ដីសម្រេចថ្មីនេះកំណត់ថា ថ្លៃទិដ្ឋាការសម្រាប់ពលករមកពីប្រទេសកម្ពុជា ឡាវ មីយ៉ាន់ម៉ា និងវៀតណាម ត្រូវបានកាត់បន្ថយពី 2,000 បាតនាបច្ចុប្បន្ន មកនៅត្រឹម 500 បាត ស្របពេលដែលថ្លៃស្នាក់នៅបណ្ដោះអាសន្ន (ថ្លៃពន្យារពេលទិដ្ឋាការរៀងរាល់ឆ្នាំ) ក៏ត្រូវបានបន្ថយពី 1,900 បាតនាបច្ចុប្បន្ន មកនៅត្រឹម 500 បាតផងដែរ។

ក្រសួងការងារថៃសង្កត់ធ្ងន់ថា អនុក្រឹត្យខាងលើគឺស្របនឹងវិធីសាស្ត្ររបស់រដ្ឋាភិបាលក្នុងការគ្រប់គ្រងការជ្រើសរើសពលករបរទេស ដើម្បីពង្រឹងសមត្ថភាពប្រកួតប្រជែងរបស់ប្រទេសនេះ ក៏ដូចជាការរួមចំណែកស្ដារសេដ្ឋកិច្ចក្រោយសម័យកូវីដ-19។

យោងតាមព័ត៌មានរបស់នាយកដ្ឋានរដ្ឋបាលការងារបរទេសនៃប្រទេសថៃ ក្នុងខែកញ្ញា ប្រទេសនេះមានពលករបរទេសចំនួន 2,593,439 នាក់ និងប្រហែលមួយលាននាក់ទៀតកំពុងស្ថិតក្នុងដំណាក់កាលដាក់ពាក្យស្នើសុំលិខិតអនុញ្ញាតការងារ ទៅតាមអនុក្រឹត្យចុះថ្ងៃទី 03 តុលា ឆ្នាំ 2023 របស់រដ្ឋាភិបាលថៃ៕

November 1, 2023

សេដ្ឋកិច្ចចិនមានកំណើនលឿនជាងការព្យាករ នៅក្នុងត្រីមាសទីបីនៃឆ្នាំនេះ

ទិន្នន័យរបស់អគ្គនាយកដ្ឋានស្ថិតិចិន បង្ហាញថា ផលិតផលក្នុងស្រុកសរុប (GDP) របស់ប្រទេសនេះ ក្នុងត្រីមាសទីបីនៃឆ្នាំ 2023 កើន 4.9% ធៀបនឹងដំណាក់កាលដូចគ្នានៃឆ្នាំ 2022។

យោងតាមទិន្នន័យផ្លូវការដែលត្រូវបានអគ្គនាយកដ្ឋានស្ថិតិចិន (NBS) ប្រកាសនាថ្ងៃទី 18 តុលា 2023 សេដ្ឋកិច្ចប្រទេសចិនក្នុងត្រីមាសទីបីរបស់ឆ្នាំនេះ កើនលឿនជាងការព្យាករ ដែលនេះទំនងជាអាចជួយឱ្យរដ្ឋាភិបាលចិនសម្រេចបានគោលដៅសេដ្ឋកិច្ចពេញមួយឆ្នាំដែលបានដាក់ចេញ។

ទិន្នន័យរបស់ NBS បង្ហាញថា ផលិតផលក្នុងស្រុកសរុប (GDP) របស់ប្រទេសនេះ ក្នុងត្រីមាសទីបីនៃឆ្នាំ 2023 កើន 4.9% ធៀបនឹងដំណាក់កាលដូចគ្នានៃឆ្នាំ 2022 និងខ្ពស់ជាងការវាយតម្លៃ (4.4%) របស់ក្រុមអ្នកជំនាញ នៅក្នុងការស្ទង់មតិរបស់ទីភ្នាក់ងារសារព័ត៌មាន Reuters នាពេលកន្លង។

GDP ក្នុងត្រីមាសទីបី កើន 1.3% ខ្ពស់ជាងឆ្ងាយបើធៀបនឹងកំណើន 0.5% ក្នុងត្រីមាសទីពីរ ហើយខ្ពស់ជាងការព្យាករ (1%) ផងដែរ។

កំណើន GDP របស់ប្រទេសចិនត្រូវបានព្យាករថា នឹងសម្រេចបាន 4.9% ក្នុងត្រីមាសទីបួន។ រដ្ឋាភិបាលចិនបានកំណត់គោលដៅប្រហែល 5% សម្រាប់កំណើនសេដ្ឋកិច្ចពេញមួយឆ្នាំ 2023។

បើទោះទិន្នន័យខាងលើបង្ហាញថា សេដ្ឋកិច្ចចិនចាប់ផ្ដើមមានស្ថិរភាពជាងមុន ក្រោយពីមានចំណាត់ការជាច្រើន ប៉ុន្តែក្រុមអ្នកជំនាញជឿថា រដ្ឋាភិបាលប្រទេសនេះគួរតែធ្វើកិច្ចការច្រើនបន្ថែមទៀត ដើម្បីជំរុញកំណើនសេដ្ឋកិច្ច។

សេដ្ឋកិច្ចចិនមានកំណើន 3% ក្នុងឆ្នាំ 2022 ទាបជាងបើធៀបនឹងការកំណត់គោលដៅរបស់រដ្ឋាភិបាល ដោយសារតែការរឹតបន្តឹងនានាដើម្បីទប់ស្កាត់កូវីដ-19។

October 18, 2023

ពេជ្រមិនទាន់ច្នៃធ្លាក់ថ្លៃខ្លាំងដោយសារតម្រូវការទាបក្រោយសម័យកូវីដ

យោងតាមសន្ទស្សន៍ពេជ្រមិនទាន់ច្នៃសកល Zimnisky តម្លៃពេជ្រមិនទាន់ច្នៃបច្ចុប្បន្នស្ថិតក្នុងកម្រិតទាបបំផុតក្នុងរង្វង់មួយឆ្នាំកន្លង។

តម្លៃពេជ្រមិនទាន់ច្នៃបានដាំក្បាលចុះចាប់ពីដើមឆ្នាំរហូតដល់បច្ចុប្បន្ន ព្រោះតែតម្រូវការប្រើប្រាស់ពីអតិថិជនមានការធ្លាក់ចុះ ក្រោយពីសម័យវិបត្តិកូវីដ-19 ត្រូវបានបិទបញ្ចប់។

យោងតាមសន្ទស្សន៍ពេជ្រមិនទាន់ច្នៃសកល Paul Zimnisky Diamond Analytics តម្លៃពេជ្រមិនច្នៃបច្ចុប្បន្នស្ថិតក្នុងកម្រិតទាបបំផុតក្នុងរង្វង់មួយឆ្នាំកន្លង។ ក្រុមអ្នកវិភាគយល់ថា មូលហេតុបណ្ដាលមកពីការលក់រាយនៅតាមបណ្ដាហាងលក់គ្រឿងអលង្ការ បាន និងកំពុងថយចុះខ្លាំង។

អ្នកជំនាញ Paul Zimnisky ឱ្យដឹងថា បន្ទាប់ពីវិធានការរឹតបន្តឹងនានាដែលទាក់ទងនឹងកូវីដ-19 ត្រូវបានដកចេញ អ្នកប្រើប្រាស់ក៏ចាប់ផ្ដើមមានទំនោរទៅរកការចំណាយទៅលើទេសចរណ៍ ការហូបចុក និងបទពិសោធន៍ជាក់ស្ដែងនានា ជំនួសឱ្យការទិញគ្រឿងអលង្ការថ្លៃៗដូចមុន។

ការធ្លាក់ថ្លៃរបស់ពេជ្រមិនទាន់ច្នៃបានកើតឡើងក្រោយការឡើងថ្លៃខ្ពស់មិនធ្លាប់មានពីមុនមក នៅក្នុងរយៈពេលពីរឆ្នាំនៃសម័យកូវីដ។

ក៏ប៉ុន្តែ បើយោងតាមក្រុមអ្នកវិភាគ ការធ្លាក់ថ្លៃរបស់ពេជ្រមិនទាន់ច្នៃ មិនមែនមានន័យថា តម្លៃគ្រឿងអលង្ការធ្វើពីពេជ្រនៅតាមបណ្ដាហាងក៏ត្រូវធ្លាក់ថ្លៃតាមដែរនោះឡើយ។ ជាធម្មតា ក្នុងរយៈពេលខ្លី ក្រុមអ្នកលក់រាយតែងតែមិនផ្លាស់ប្ដូរតម្លៃផលិតផលនេះទៅតាមទីផ្សាររបស់ពេជ្រមិនទាន់ច្នៃ ដើម្បីរក្សាខ្ទង់ប្រាក់ចំណេញ។ បច្ចុប្បន្ន គ្រឿងអលង្ការធ្វើពីពេជ្រទម្ងន់មួយការ៉ាត់នៅតាមហាងនានា មានតម្លៃខ្ពស់ជាង 3% បើធៀបនឹងតម្លៃរបស់វានៅក្នុងខែមករា 2020។

ក្រុមអ្នកវិភាគព្យាករថា ការលក់គ្រឿងអលង្ការពេជ្រនឹងកើនឡើងខ្ពស់ខ្លាំងនៅក្នុងរដូវបុណ្យចុងឆ្នាំ 2023 និងដើមឆ្នាំ 2024។ ដោយឡែកនៅសហរដ្ឋអាម៉េរិក ក្រុមហ៊ុន Zimnisky បានព្យាករថា ទីផ្សារមូលបត្រ និងទីផ្សារការងារងើបឡើងវិញ នឹងជំរុញឱ្យពេជ្រឡើងថ្លៃជាថ្មីនៅឆ្នាំ 2024៕

October 3, 2023

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

OECD ព្រមានថា សេដ្ឋកិច្ចរបស់ពិភពលោកនឹងបន្តពើបប្រទះការលំបាក

ថ្វីបើបានព្យាករថា GDP ឆ្នាំនេះកើនឡើង ប៉ុន្តែ OECD ព្រមានថា សេដ្ឋកិច្ចពិភពលោកមានហានិភ័យបន្ថយល្បឿន ព្រោះតែសម្ពាធការប្រាក់ និងសេដ្ឋកិច្ចចិនងើបឡើងប្រកបដោយភាពទន់ខ្សោយ។

អង្គការសហប្រតិបត្តិការ និងអភិវឌ្ឍសេដ្ឋកិច្ច (OECD) ទើបតែបានបញ្ចេញការព្យាករថ្មីបំផុតស្ដីពី GDP ទូទាំងសកលលោកឆ្នាំ 2023 ដែលអះអាងថា មានកំណើន 3% កើន 0.3 ពិន្ទុភាគរយធៀបនឹងការព្យាករមុននោះ។ ក៏ប៉ុន្តែ នេះនៅតែជាកម្រិតក្រោមធម្យមភាគ ហើយក៏ជាកំណើនប្រចាំឆ្នាំទាបបំផុតរាប់ចាប់ពីវិបត្តិហិរញ្ញវត្ថុសកល (2008 – 2009) លើកលែងតែឆ្នាំ 2020 ដែលរងផលប៉ះពាល់ពីកូវីដ។

អង្គការដែលមានទីស្នាក់ការកណ្ដាលនៅប៉ារីស ក៏បានទម្លាក់ការព្យាករកំណើនសេដ្ឋកិច្ចឆ្នាំក្រោយ 0.2 ពិន្ទុភាគរយ មកនៅត្រឹម 2.7%។ Clare Lombardelli ប្រធានផ្នែកសេដ្ឋកិច្ចរបស់ OECD វាយតម្លៃថា អតិផរណាបន្តថយចុះ ប៉ុន្តែសេដ្ឋកិច្ចពិភពលោកនៅតែស្ថិតក្នុងស្ថានភាពលំបាក។ លោកនិយាយកាលពីថ្ងៃទី 19 កញ្ញាថា «យើងកំពុងប្រឈមនឹងឧបសគ្គពីរត្រួត នោះគឺអតិផរណា និងកំណើនទាប»។

OECD យល់ថា ហានិភ័យគឺថា ការព្យាករកំពុងតែមានទំនោរទៅរកភាពអវិជ្ជមាន ព្រោះតែការដំឡើងការប្រាក់កាលពីអតីតកាលអាចប៉ះពាល់ធ្ងន់ធ្ងរជាងការរំពឹងទុក ហើយអតិផរណាក៏មានហានិភ័យអាក្រក់ក្នុងរយៈពេលយូរ ទាមទារឱ្យមានការរឹតបន្តឹងនយោបាយរូបិយវត្ថុបន្ថែមទៀត។ ពួកគេចាត់ទុកថា ការលំបាករបស់ចិនគឺជាហានិភ័យសម្រាប់ទិន្នផលទូទាំងសកលលោក។

OECD ព្យាករថា កំណើនសេដ្ឋកិច្ចនៅតំបន់ចាយប្រាក់អឺរ៉ូឆ្នាំនេះគឺ 0.6% និងឆ្នាំក្រោយគឺ 1.1%។ កំណើននេះនៅសហរដ្ឋអាម៉េរិកនឹងបន្ថយល្បឿនមកនៅត្រឹម 1.3% ក្នុងឆ្នាំ 2024 ទាបជាងធៀបនឹង 2.2% ក្នុងឆ្នាំនេះ។

កំណើនសេដ្ឋកិច្ចប្រទេសចិននៅឆ្នាំក្រោយក៏ធ្លាក់ចុះមកនៅត្រឹម 4.6% ដោយសារតម្រូវការក្នុងស្រុកថយចុះ និងភាពតានតឹងក្នុងទីផ្សារអចលនទ្រព្យ។ កំណើន GDP របស់ប្រទេសចិនក្នុងឆ្នាំ 2023 អាចឡើនដល់ 5.1% ថយចុះ 0.3 ពិន្ទុភាគរយបើធៀបនឹងការព្យាករមុនរបស់ OECD។

OECD យល់ថា រដ្ឋាភិបាលនានាមិនគួរធ្វើអន្តរាគមន៍ដោយការបង្កើនការចំណាយបន្ថែមដើម្បីជំរុញកំណើនសេដ្ឋកិច្ច។ ជំនួសមកវិញ គួរតែកាត់បន្ថយការឧបត្ថម្ភ ដើម្បីសម្រួលឱ្យមានការវិនិយោគជាថ្មីនៅពេលអនាគត និងចៀសវាងកំណើនអតិផរណា។

អង្គការខាងលើក៏បានព្រមានដែរថា មិនគួរបន្ធូរបន្ថយការរឹតបន្តឹងនយោបាយរូបិយវត្ថុ ដោយសារតែអតិផរណានៅតែមាន។ យោងតាម OECD រដ្ឋាភិបាលនានាពុំមានលទ្ធភាពច្រើនក្នុងការទម្លាក់ការប្រាក់រហូតដល់ចុងឆ្នាំ 2024។

September 20, 2023

រោងចក្រដំបូងគេបង្អស់នៅក្នុងទីអវកាស ចាប់ផ្ដើមដំណើរការ

(សហរដ្ឋអាម៉េរិក) – ក្រុមហ៊ុន Varda Space Industries នឹងផលិតឱសថ រួមនឹងវត្ថុធាតុផ្សេងៗទៀតនៅលើគន្លងតារាវិថីផែនដី តាមរយៈកាប៊ីនដែលហោះអមនឹងផ្កាយរណប។

ក្រុមហ៊ុន Varda Space Industries នៅរដ្ឋ California ប្រកាសថា បានទទួលជោគជ័យក្នុងការបាញ់បង្ហោះ W-Seres 1 ដែលជាផ្កាយរណបដំបូងរបស់ខ្លួន ឡើងទៅកាន់គន្លងគោចរផែនដី។ ក្រុមហ៊ុននេះកំពុងឆ្ពោះទៅរកការផលិតវត្ថុធាតុជាច្រើននៅក្នុងទីអវកាស។ វត្ថុធាតុទាំងនេះមិនអាចបង្កើតឡើងនៅលើផែនដី ឬអភិវឌ្ឍឆាប់រហ័សជាមួយនឹងគុណភាពខ្ពស់ជាង ធៀបនឹងនៅក្នុងស្ថានភាពគ្មានទំនាញផែនដី។

ផ្ទាំងសូឡារបស់រោងចក្រដំបូងក្នុងអវកាសនេះ បានបែរទៅរកព្រះអាទិត្យ និងចាប់ផ្ដើមពន្លាតខ្លួន។ នេះបើតាមការឱ្យដឹងរបស់ Varda បន្ទាប់ពីផ្កាយរណបបានហោះចូលដល់គន្លងគោចរ នៅក្នុងបេសកកម្ម Transporter-8 របស់ SpaceX កាលពីថ្ងៃទី 13 មិថុនា 2023។

ផ្កាយរណប W-Series 1 ត្រូវបានបំពាក់កាប៊ីនទម្ងន់ 90 គីឡូក្រាម ដែលត្រូវបានរចនាឡើងដើម្បីស្រាវជ្រាវឱសថ។ កាប៊ីននេះនឹងផ្ដាច់ខ្លួន មុនពេលចាប់ផ្ដើមហោះហើរក្នុងអវកាស ប៉ុន្តែនៅតែភ្ជាប់ជាមួយនឹងបណ្ដាញថាមពល កម្លាំងរុញច្រាន និងទំនាក់ទំនងចាំបាច់ដើម្បីកំណត់ទិស។ ក្នុងភារកិច្ចដំបូង បណ្ដាញខាងលើត្រូវបានផ្គត់ផ្គង់ដោយក្រុមហ៊ុន Rocket Lab។ បន្ទាប់មក ការពិសោធនឹងត្រូវបានធ្វើឡើងដោយរ៉ូបូតក្នុងកាប៊ីន។

សកម្មភាពរបស់ Varda គឺយោងទៅតាមការសិក្សាស្រាវជ្រាវផ្នែកវិទ្យាសាស្ត្រដែលបញ្ជាក់ថា ប្រូតេអ៊ីនក្នុងអវកាសអាចកកើតរចនាសម្ព័ន្ធល្អជាងធៀបនឹងនៅលើផែនដី ដោយសារតែបរិស្ថានមាន និងគ្មានទំនាញផែនដី។

បេសកកម្មដំបូងរបស់ Varda នឹងផ្ដោតទៅលើការអភិវឌ្ឍ ritonavir ក្នុងអវកាស។ Ritonavir គឺជាថ្នាំដែលតែងត្រូវបានប្រើប្រាស់សម្រាប់ប្រឆាំងនឹង HIV ដែលជាវីរុសបង្កឱ្យមានជំងឺអេដស៍ ប៉ុន្តែប៉ុន្មានឆ្នាំចុងក្រោយនេះ វាក៏ត្រូវបានប្រើប្រាស់ដើម្បីព្យាបាលជំងឺកូវីដ-19។

ក្រោយពីការពិសោធរបស់ Varda បានបញ្ចប់ កាប៊ីននេះនឹងត្រូវបានផ្កាយរណបរុញទម្លាក់មកកាន់ផែនដី និងចុះចតដោយប្រើប្រាស់ឆត្រយោង មុនពេលអ្នកវិទ្យាសាស្ត្រប្រមូលយកវត្ថុធាតុឱសថ។

ក្រុមហ៊ុន Varda ត្រូវបានបង្កើតឡើងដោយអតីតវិស្វករអេឡិចត្រូនិចអាកាសចរណ៍របស់ SpaceX លោក Will Bruye និង Delian Asparouhov។ គោលដៅរបស់ពួកគេគឺបង្កើតផលិតផលនានានៅក្នុងអវកាស ដែលរោងចក្រនៅលើផែនដីមិនអាច ឬពិបាកធ្វើបានល្អ៕

June 15, 2023

ថ្នាំប្រឆាំងCovid-19 ដែលប្រើសម្រាប់លោក Donald Trump ត្រូវបានសហរដ្ឋអាមេរិកអនុញ្ញាតឱ្យប្រើសម្រាប់ព្យាបាលជាផ្លូវការ

នាយកដ្ឋានគ្រប់គ្រងចំណីអាហារនិងឱសថអាមេរិកាំង (FDA) បានផ្ដល់អាជ្ញាប័ណ្ណរួចហើយចំពោះ Remdesivir ដែលជាថ្នាំមួយប្រភេទត្រូវបានក្រុមវេជ្ជបណ្ឌិតប្រើសម្រាប់ករណីរបស់ប្រធានាធិបតីសហរដ្ឋអាមេរិក ដើម្បីបើកផ្លូវឱ្យមានការព្យាបាលទូលំទូលាយទៅលើអ្នកជំងឺ Covid-19។

ក្រុមហ៊ុនផលិតថ្នាំពេទ្យ Gilead Sciences កាលពីថ្ងៃទី22តុលាបានឱ្យដឹងថា ថ្នាំប្រឆាំងនឹងវីរុស Remdesivir ដែលនឹងត្រូវបានលក់ដោយប្រើឈ្មោះ Veklury ទទួលបានការយល់ព្រមឱ្យប្រើប្រាស់នៅក្នុងករណីបន្ទាន់កាលពីខែឧសភា។ Remdesivir ត្រូវបានអនុញ្ញាតឱ្យប្រើប្រាស់បណ្ដោះអាសន្នដើម្បីព្យាបាលជំងឺ Covid-19 នៅក្នុងប្រទេសប្រមាណ50 នៅក្នុងពិភពលោក។

នៅសហរដ្ឋអាមេរិក ថ្នាំ Veklury ត្រូវបានអនុញ្ញាតឱ្យប្រើប្រាស់សម្រាប់ព្យាបាលមនុស្សពេញវ័យ និងក្មេងដែលមានអាយុចាប់ពី12ឡើងទៅ និងមានទម្ងន់យ៉ាងតិចចាប់ពី40គីឡូក្រាម ដើម្បីព្យាបាល Covid-19 ក្នុងករណីត្រូវចូលព្យាបាលនៅមន្ទីរពេទ្យ។ Veklury គួរត្រូវបានប្រើនៅក្នុងមន្ទីរពេទ្យ ឬមណ្ឌលសុខាភិបាលដែលមានលទ្ធភាពប្រហាក់ប្រហែលនឹងសេវាសុខាភិបាលនៅមន្ទីរពេទ្យ” នេះបើតាមក្រុមហ៊ុនផលិតឱសថ Gilead Sciences។

បច្ចុប្បន្ន ថ្នាំ Rembesivir គឺជាមធ្យោបាយព្យាបាលជំងឺ Covid-19 ដំបូងគេបង្អស់ និងតែមួយគត់ដែលត្រូវបានអនុញ្ញាតឱ្យប្រើប្រាស់ពេញលេញនៅសហរដ្ឋអាមេរិក។ មូលបត្ររបស់ Gilead បានកើនឡើង5% ក្រោយពីព័ត៌មានខាងលើត្រូវបានប្រកាស។

ថ្នាំប្រឆាំងCovid-19 ដែលប្រើសម្រាប់លោក Trump ត្រូវបានអាមេរិកអនុញ្ញាតឱ្យយកមកព្យាបាលជាផ្លូវការ — លោក Daniel O’Day នាយកប្រតិបត្តិរបស់ ក្រុមហ៊ុន Gilead

Daniel O’Day នាយកប្រតិបត្តិរបស់ Gilead បាននិយាយថា៖ “ពិតជាមិនគួរឱ្យជឿ ក្នុងរយៈពេលមិនដល់មួយឆ្នាំ រាប់ចាប់ពីពេលបានរកឃើញករណីឆ្លងដំបូង វិធីសាស្ត្រព្យាបាលមួយត្រូវបាន FDA អនុញ្ញាតឱ្យប្រើប្រាស់”។ លោក Daniel O’Day បន្តថា ថ្នាំ Rembesivir នេះ មានគ្រប់គ្រាន់សម្រាប់អ្នកជំងឺគ្រប់រូបដែលមានតម្រូវការ។

កាលពីដើមខែតុលានេះ ការសិក្សាស្រាវជ្រាវទូទាំងពិភពលោកដែលទទួលបានជំនួយពីអង្គការសុខភាពពិភពលោក (WHO) បានបង្ហាញថា ថ្នាំ Remdesivir មិនបានជួយឱ្យអ្នកជំងឺផុតពីការស្លាប់ ឬជាសះស្បើយបានលឿននោះទេ ប៉ុន្តែ ការសិក្សាស្រាវជ្រាវមួយរបស់សហរដ្ឋអាមេរិកបានបង្ហាញថា ថ្នាំនេះជួយកាត់បន្ថយពេលវេលាបាន1/3 នៅក្នុងការព្យាបាលរហូតដល់ជាសះស្បើយនៅលើអ្នកជំងឺមួយចំនួន។

ការយល់ព្រមឱ្យប្រើប្រាស់ថ្នាំខាងលើនេះពីសំណាក់ FDA គឺយោងទៅលើទិន្នន័យដែលត្រូវបានក្រុមហ៊ុន Gilead Sciences ដាក់ជូនសម្រាប់ពិនិត្យនិងអនុម័តនៅមុនពេលផ្ដល់អាជ្ញាប័ណ្ណ។ លទ្ធផលនៃការស្រាវជ្រាវរបស់ Gilead Sciences ត្រូវបានប្រកាសនៅលើទស្សនាវដ្ដី New England បានបង្ហាញថា ថ្នាំនេះ កាត់បន្ថយពេលវេលានៃការផ្ទុកវីរុសCovid-19 ពីមធ្យមភាគ15ថ្ងៃ ចុះមកនៅត្រឹមប្រមាណ11ថ្ងៃ នៅក្នុងករណីអ្នកជំងឺសម្រាកព្យាបាលក្នុងមន្ទីរពេទ្យ។

នាយកដ្ឋាន FDA ក៏បានពិនិត្យទៅលើលទ្ធផលនៃការស្រាវជ្រាវចំនួនពីរផ្សេងទៀត ក្នុងនោះមានលទ្ធផលមួយបង្ហាញថា ថ្នាំ Rembesivir មានប្រយោជន៍ខ្លះៗ និងលទ្ធផលមួយទៀតឱ្យដឹងថា ថ្នាំនេះមិនបានធ្វើឱ្យមានការប្រែប្រួលច្រើននោះឡើយ។

បណ្ឌិត Stephen Hahn ប្រធាន FDA បានឱ្យដឹងថា៖ “ការអនុម័តយល់ព្រម ត្រូវបានយោងទៅតាមទិន្នន័យដែលបានមកពីលទ្ធផលនៃការព្យាបាលសាកល្បងជាច្រើនដែលអង្គភាពនេះបានវាយតម្លៃយ៉ាងម៉ត់ចត់ និងបង្ហាញអំពីដំណាក់កាលសំខាន់នៃវិទ្យាសាស្ត្រនៅក្នុងសម័យ Covid-19”។

ថ្នាំខាងលើនេះត្រូវបានអនុញ្ញាតឱ្យប្រើប្រាស់នៅក្នុងពេលដែលសហរដ្ឋអាមេរិកបានរកឃើញអ្នកផ្ទុកវីរុសCovid-19 ជាង8.6លាននាក់ ក្នុងនោះមានអ្នកជំងឺជាង228,000នាក់បានបាត់បង់ជីវិត។ Remdesivir គឺជាថ្នាំដែលត្រូវបានប្រើសម្រាប់ព្យាបាលជំងឺCovid-19 របស់លោក Donald Trump ពេលដែលលោកបានឆ្លងវីរុសនេះកាលពីដើមខែតុលា។ ក្រៅពីនេះ លោក Trump ក៏បានប្រើប្រាស់ថ្នាំសាកល្បង REGN-COV2 និងបន្ថែមថ្នាំស័ង្កសី វីតាមីន D ថ្នាំ famotidine រួមនឹងថ្នាំ melatonin និងថ្នាំ aspirin ផងដែរ៕

ប្រភព៖ CNN, CNBC

October 23, 2020

យកកេសកាតុងធ្វើជាមឈូសសម្រាប់ដាក់សាកសពអ្នកជំងឺCOVID-19 ព្រោះតែ…

ប្រទេសអេក្វាឌ័រ៖ ករណីស្លាប់ដោយសារវីរុសCOVID-19 កើនឡើងជាលំដាប់ នាំឱ្យទីក្រុង Guayaquil ត្រូវខ្វះមឈូស ហើយត្រូវយកកេសក្រដាសកាតុងមកជំនួសមឈូសធ្វើអំពីឈើ។

ក្រុមមន្ត្រីនៅ Guayaquil ដែលជាទីក្រុងធំរបស់ខេត្ត Guayas នៅភាគខាងលិចប្រទេសអេក្វាឌ័រ កាលពីថ្ងៃទី5មេសា បានឱ្យដឹងថា អាជ្ញាធរបានទទួលប្រអប់កាតុងពីរោងចក្រនានា ហើយបានបញ្ជូនទៅកាន់សាលដាកសាកសព2កន្លែង ដើម្បីប្រើជំនួសមឈូសឈើ។

អ្នកនាំពាក្យរបស់សាលាក្រុង Guayaquil មានប្រសាសន៍ថា “ធ្វើដូច្នេះទើបអាចផ្គត់ផ្គង់បានតាមតម្រូវការ។ នៅទីក្រុងនេះ អស់មឈូសឈើហើយ ឬក៏វាមានតម្លៃថ្លៃពេក”។

Santiago Olivares ដែលជាម្ចាស់សាលដាក់សាកសពជាច្រើនកន្លែងក្នុងតំបន់ បានឱ្យដឹងថា ក្រុមហ៊ុនរបស់លោកមិនអាចផ្គត់ផ្គត់មឈូសគ្រប់គ្រាន់តាមតម្រូវការសម្រាប់អ្នកជំងឺដែលបានស្លាប់ដោយសារវីរុសCOVID-19នោះទេ។

លោក Olivares និយាយថា “ខ្ញុំបានលក់មឈូសចំនួន40ឈុត ដែលខ្ញុំមាននៅឯសាខាកណ្ដាល និង40ទៀតនៅសាខាផ្សេង។ ខ្ញុំត្រូវឱ្យគេធ្វើមឈូសចំនួន10ឈុតទៀតកាលពីចុងសប្ដាហ៍ តែបានលក់ដាច់អស់ទៅហើយ”។

មឈូសដែលមានតម្លៃទាបបំផុតនៅក្នុងតំបន់ Guayas បច្ចុប្បន្ន ប្រហែល400USD/ឈុត។ លោក Olivares បន្តថា បម្រាមគោចរ15ម៉ោងរៀងរាល់ថ្ងៃនៅតំបន់នេះ ក៏រួមចំណែកធ្វើឱ្យអ្នកផលិតមឈូសត្រូវខ្វះវត្ថុធាតុដើមដូចជាឈើ និងលោហធាតុជាដើម។

យោងតាមរបាយការណ៍ផ្លូវការ ប្រទេសអេក្វាឌ័រ បច្ចុប្បន្នមានអ្នកឆ្លងមេរោគCOVID-19សរុបជាង3,600នាក់ ក្នុងនោះមាន180នាក់បានស្លាប់ ដែលភាគច្រើននៅក្នុងទីក្រុង Guayaquil និងតំបន់ក្បែរខាងនៃខេត្ត Guayas។ ក្រុមមន្ត្រីសុខាភិបាលបានឱ្យដឹងថា មន្ទីរពេទ្យនានាក្នុងទីក្រុង Guayaquil បានលើសចំណុះ ហើយបុគ្គលិកពេទ្យកាន់តែច្រើនឡើងៗបានឆ្លងមេរោគនេះ។

រដ្ឋាភិបាលនៃប្រទេសអេក្វាឌ័រកំពុងតែដុតដៃដុតជើង បញ្ជូនវេជ្ជបណ្ឌិត និងគិលានុបដ្ឋាកចំនួន700នាក់ ទៅជួយក្រុមបុគ្គលិកពេទ្យនៅ Guayaquil។ ទន្ទឹមនឹងនេះ រដ្ឋាភិបាលក៏កំពុងសាងសង់សាលដាក់សាកសពបណ្ដោះអាសន្ន ខណៈដែលមានការព្យាករថា ករណីស្លាប់អាចកើនដល់3,500នាក់នៅប្រទេសនេះ៕

ប្រភព៖ សារព័ត៌មានបរទេស

April 6, 2020

Tag: កូវីដ