កូវីដ ១៩ - La Reine Media

វ៉ាក់សាំង COVID 19 «made in Vietnam» នឹងមានតម្លៃ 120,000ដុងក្នុងមួយដូស

ក្រុមហ៊ុនអភិវឌ្ឍ និងផលិតឱសថរបស់វៀតណាមដែលមានឈ្មោះថា Nanogen បានប្រកាសព័ត៌មានជាផ្លូវការអំពីគម្រោងតម្លៃរបស់វ៉ាក់សាំង Covid-19 «made in Vietnam» ដែលក្រុមហ៊ុននេះកំពុងអភិវឌ្ឍ។

សារព័ត៌មានវៀតណាម បានដកស្រង់ប្រភពព័ត៌មានពីក្រុមមន្ត្រីរបស់ក្រុមហ៊ុនផលិតឱសថ Nanogen ឱ្យដឹងថា បច្ចុប្បន្ន ក្រុមហ៊ុននេះអាចផលិតវ៉ាក់សាំង Covid-19 បានប្រមាណពី 10-20 លានដូសនៅក្នុងមួយឆ្នាំ។ ក្នុងដំណាក់កាលនៃការប្រើប្រាស់សាកល្បងនៅលើមនុស្ស ក្រុមហ៊ុននេះនឹងបង្កើនបរិមាណនៃការផលិតឱ្យបានចាប់ពី 50-70 លានដូសក្នុងមួយឆ្នាំ ដើម្បីផ្គត់ផ្គង់តាមតម្រូវការទីផ្សារក្នុងស្រុក និងអាចនាំចេញទៅក្រៅប្រទេស។

តំណាងរបស់ Nanogen និយាយថា វ៉ាក់សាំងរបស់វៀតណាមនេះ នឹងមានតម្លៃមិនលើសពី 500,000 ដុង (21.5 ដុល្លារអាមេរិក) នៅក្នុងមួយដូស នៅពេលត្រូវបានបញ្ចេញលក់ក្នុងទីផ្សារ។ ក៏ប៉ុន្តែ ក្រោយមក ស្ថានីយទូរទស្សន៍ជាតិវៀតណាម VTV Go បានចេញផ្សាយថា ក្រុមហ៊ុន Nanogen បានប្រកាសជាផ្លូវការថា វ៉ាក់សាំងប្រឆាំង Covid-19 «made in Vietnam» របស់ក្រុមហ៊ុននេះ នឹងត្រូវបានលក់ក្នុងតម្លៃប្រហែល 120,000 ដុង/ដូស (5.22 ដុល្លារអាមេរិក)។

ដូច្នេះ មនុស្សម្នាក់នឹងត្រូវចំណាយប្រាក់សរុប 240,000 ដុង (10.44 ដុល្លារអាមេរិក/42,070 រៀល) សម្រាប់ការចាក់វ៉ាក់សាំងចំនួន 2ដូស ដើម្បីមានអង្គបដិបក្ខគ្រប់គ្រាន់សម្រាប់ប្រឆាំងនឹង Covid-19៕

ប្រភព៖ VTV Go

December 11, 2020

ករណីឆ្លង Covid-19 ក្នុងលោក កើនលើស 70លាននាក់! ទ្វីបអាហ្វ្រិកអំពាវនាវឱ្យចែករំលែកវ៉ាក់សាំង

មនុស្សជិត 1.6 លាននាក់បានស្លាប់ ក្នុងចំណោមមនុស្សជាង 70លាននាក់នៅទូទាំងពិភពលោកដែលបានឆ្លងវីរុស Covid-19 នាំឱ្យប្រទេសអ្នកមានជាច្រើន បាននិងកំពុងបញ្ជាទិញជាមុននូវវ៉ាក់សាំងក្នុងបរិមាណលើសពីតម្រូវការជាក់ស្ដែង ជាហេតុធ្វើឱ្យទ្វីបអាហ្វ្រិកអំពាវនាវឱ្យមានការចែករំលែកវ៉ាក់សាំងទៅឱ្យបណ្ដាប្រទេសក្រីក្ររបស់ទ្វីបនេះ។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកឆ្លងវីរុស Covid-19 សរុបចំនួន 70,711,368នាក់ ក្នុងនោះមានអ្នកស្លាប់ 1,588,247នាក់ និងអ្នកកំពុងព្យាបាល 19,983,563នាក់។ នេះបើតាម Worldometers ដែលជាគេហទំព័រធ្វើបច្ចុប្បន្នភាពអំពីតួលេខ Covid-19 បានលឿងជាងគេបង្អស់។

ទាក់ទិននឹងបញ្ហាវ៉ាក់សាំង Covid-19 នៅក្នុងសន្និសីទសារព័ត៌មានមួយកាលពីថ្ងៃទី 10ធ្នូ ប្រធានមជ្ឈមណ្ឌលគ្រប់គ្រងនិងទប់ស្កាត់ជំងឺឆ្លង (CDC) របស់ទ្វីបអាហ្វ្រិក លោក John Nkengasong ថ្លែង ថា៖ «ប្រទេសជាច្រើនបានបញ្ជាទិញវ៉ាក់សាំងលើសពីតម្រូវការជាក់ស្ដែងរបស់ពួកគេ ពី 4 ទៅ 5 ដងឯណោះ»។ ក៏ប៉ុន្តែ លោក មិនបានបង្ហាញឈ្មោះនៃប្រទេសទាំងនោះទេ។

លោក John Nkengasong បញ្ជាក់ថា ទ្វីបអាហ្វ្រិកពិតជាពិបាកក្នុងការធានាឱ្យបានគ្រប់គ្រាន់នូវបរិមាណវ៉ាក់សាំងដែលទ្វីបនេះត្រូវការ នៅក្នុងគ្រាដែលប្រទេសជាច្រើនបានចាប់ផ្ដើមទទួលរងរលកនៃការឆ្លងរាលដាលជាលើកទីពីរ។ លោកបន្តថា ភាគច្រើននៃប្រទេសនៅក្នុងទ្វីបនេះ កំពុងតែរង់ចាំគម្រោងបែងចែកវ៉ាក់សាំងជាសកលដែលមានឈ្មោះថា COVAX ដែលជំរុញដោយអង្គការសុខភាពពិភពលោក (WHO)។

COVAX ត្រូវបានបង្កើតឡើង និងដំណើរការដោយអង្គការចំនួន 3 រួមមាន សម្ព័ន្ធផ្លាស់ប្ដូរត្រៀមសម្រាប់ការទប់ទល់នឹងរោគរាតត្បាត (CEPI) អង្គការសុខភាពពិភពលោក (WHO) និង Gavi ដែលជាសម្ព័ន្ធវ៉ាក់សាំង និងជាអង្គការមិនស្វែងរកកម្រៃឯកជន ដែលធ្វើសកម្មភាពក្នុងវិស័យផ្ដល់ជំនួយវ៉ាក់សាំងទៅឱ្យបណ្ដាប្រទេសដែលមានចំណូលទាប។

រហូតមកដល់ដើមខែធ្នូ 2020 នេះ COVAX បានបញ្ជាទិញជាមុននូវវ៉ាក់សាំង Covid-19 ចំនួនជាង 700លានដូស។ តាមផែនការ អង្គការនេះនឹងផ្គត់ផ្គង់វ៉ាក់សាំងចំនួន 2 ពាន់លានអំពូលនៅក្នុងឆ្នាំ 2021 ដើម្បីជួយដល់ប្រជាជនយ៉ាងតិច 20% នៅក្នុងបណ្ដាប្រទេសដែលបានចូលរួមជាមួយអង្គការនេះ។ បច្ចុប្បន្ន មានប្រទេសជាង 198 ដែលបានចុះឈ្មោះចូលរួមជាមួយនឹងអង្គការ COVAX ដោយរួមមានទាំងបណ្ដាប្រទេសអ្នកមានផងដែរ។

ក្រៅ COVAX ក្ដីសង្ឃឹមមួយផ្សេងទៀតដែលបណ្ដាប្រទេសក្រីក្រនៅអាហ្វ្រិក ក៏ដូចជានៅពាសពេញពិភពលោកអាចរង់ចាំបាន នោះគឺការផ្ដល់ជំនួយជាវ៉ាក់សាំងពីបណ្ដាប្រទេសអ្នកមានដែលប្រើប្រាស់វ៉ាក់សាំងមិនអស់។ ក៏ប៉ុន្តែ ក្រុមអ្នកជំនាញយល់ថា ក្ដីសង្ឃឹមនេះ ពិតជាស្ដួចស្ដើងខ្លាំងណាស់៕

ប្រភព៖ Reuters, Worldometers, Nature

December 11, 2020

ទីផ្សារវ៉ាក់សាំងប្រឆាំង Covid-19! តើប្រទេសណាខ្លះដែលបានបញ្ជាទិញមុន ច្រើនជាងគេ?

ប្រទេសអ្នកមានជាងគេចំនួន 32 ក្នុងពិភពលោក បានបញ្ជាទិញជាមុន (pre-order) ជាងពាក់កណ្ដាលនៃបរិមាណសរុបរបស់វ៉ាក់សាំង Covid-19 នៅទូទាំងពិភពលោក ប៉ុន្តែ ប្រទេសទាំងនេះ មានប្រជាជនត្រឹមតែ 13% ប៉ុណ្ណោះនៃប្រជាជនសរុបក្នុងពិភពលោក។

យោងតាមលទ្ធនៃការប្រើប្រាស់សាកល្បងវ៉ាក់សាំង Covid-19 ដំណាក់កាលទីបី និងសេចក្ដីប្រកាសអំពីផលិតភាពដែលបានគ្រោងទុកពីបណ្ដាក្រុមហ៊ុនផលិតវ៉ាក់សាំង យើងអាចនឹងមានវ៉ាក់ស៊ាំង Covid-19 គ្រប់គ្រាន់សម្រាប់ចាក់ឱ្យប្រជាជនចំនួន 1/3 ក្នុងពិភពលោកនៅចុងឆ្នាំ 2021។ ប៉ុន្តែ ពលរដ្ឋជាច្រើននៅក្នុងបណ្ដាប្រទេសក្រីក្រ អាចនឹងត្រូវរង់ចាំរហូតដល់ឆ្នាំ 2023 ឬ 2024 ទើបអាចមានវ៉ាក់សាំងដើម្បីចាក់នឹងគេ។ នេះគឺជាទិដ្ឋភាពដែលត្រូវបានព្យាករដោយមជ្ឈមណ្ឌលកែប្រែសុខាភិបាលសកល Duke ដែលមានទីស្នាក់ការនៅតំបន់ Durham ក្នុងរដ្ឋ Carolina ខាងជើងនៃសហរដ្ឋអាមេរិក។

មើលទៅលើក្រុមហ៊ុនចំនួន 3 ដែលកំពុងកាន់កាប់បេក្ខភាពវ៉ាក់សាំង Covid-19 ដែលមានសក្ដានុពលបំផុត គឺក្រុមហ៊ុន AstraZeneca, Pfizer និង Moderna។ តាមការគណនា បរិមាណសរុបនៃផលិតផលរបស់ពួកគេ អាចធានាការផ្គត់ផ្គង់វ៉ាក់សាំង Covid-19 ចំនួន 5.3 ពាន់លានអំពូលនៅក្នុងឆ្នាំ 2021។

តាមការគណនា បរិមាណវ៉ាក់សាំងនេះអាចចាក់ឱ្យមនុស្សចាប់ពី 2.6 ដល់ 3.1 ពាន់លាននាក់នៅលើពិភពលោក អាស្រ័យទៅលើវ៉ាក់សាំងរបស់ ក្រុមហ៊ុន AstraZeneca ដែលអាចចាក់ទៅតាមសេណារីយ៉ោ 1.5អំពូល ឬ 2អំពូលសម្រាប់មនុស្សម្នាក់។

ក្រៅពីបណ្ដាក្រុមហ៊ុនផលិតវ៉ាក់សាំងខាងលើ ក៏នៅមានក្រុមហ៊ុនជាច្រើនផ្សេងទៀត ដូច្នេះ រុស្ស៊ីជាដើម។ មូលនិធិវិនិយោគ Russia Direct ឱ្យដឹងថា ពួកគេអាចផ្គត់ផ្គង់វ៉ាក់សាំង Covid-19 ទៅឱ្យមនុស្សចំនួន 500លាននាក់នៅក្រៅប្រទេសជារៀងរាល់ឆ្នាំ ចាប់ពីឆ្នាំ 2021។

នៅក្នុងពិភពលោក មានប្រទេសចំនួន 32 ហើយដែលបានបញ្ជាទិញជាងពាក់កណ្ដាលនៃបរិមាណវ៉ាក់សាំងសរុបក្នុងពិភពលោក ដែលប្រទេសទាំងនេះមានប្រជាជនសរុបប្រហែល 13% ប៉ុណ្ណោះ បើធៀបនឹងប្រជាជនសរុបទូទាំងសកលលោក។ កាណាដា បច្ចុប្បន្នគឺជាប្រទេសដែលឈរលើកំពូលតារាង ដោយប្រជាជនម្នាក់ៗរបស់ប្រទេសនេះ អាចនៅសល់វ៉ាក់សាំងដែលអាចចាក់បានរហូតដល់ 9ដងឯណោះ។

ប្រការខាងលើនេះ នឹងនាំឱ្យបណ្ដាប្រទេសក្រីក្រ ជួបការលំបាកខ្លាំងដោយសារតែមិនមានលទ្ធភាពគ្រប់គ្រាន់ក្នុងការបញ្ជាទិញជាមុននូវវ៉ាក់សាំងដែលមានសក្ដានុពល។ ក៏ប៉ុន្តែ បណ្ដាប្រទេសក្រីក្រ នៅមានក្ដីសង្ឃឹមផ្សេងមួយទៀត នោះគឺការរំពឹងទៅលើការរួមចំណែករបស់ COVAX ដែលជាមូលនិធិបែងចែកវ៉ាក់សាំងស្មើភាពគ្នា។

COVAX ត្រូវបានបង្កើតឡើង និងដំណើរការដោយអង្គការចំនួន 3 រួមមាន សម្ព័ន្ធផ្លាស់ប្ដូរត្រៀមសម្រាប់ការទប់ទល់នឹងរោគរាតត្បាត (CEPI) អង្គការសុខភាពពិភពលោក (WHO) និង Gavi ដែលជាសម្ព័ន្ធវ៉ាក់សាំង និងជាអង្គការមិនស្វែងរកកម្រៃឯកជន ដែលធ្វើសកម្មភាពក្នុងវិស័យផ្ដល់ជំនួយវ៉ាក់សាំងទៅឱ្យបណ្ដាប្រទេសដែលមានចំណូលទាប។

រហូតមកដល់ពេលនេះ COVAX បានបញ្ជាទិញជាមុននូវវ៉ាក់សាំង Covid-19 ចំនួន 700លានអំពូល ហើយបើតាមគម្រោង អង្គការនេះនឹងផ្គត់ផ្គង់វ៉ាក់សាំងចំនួន 2 ពាន់លានអំពូលនៅក្នុងឆ្នាំ 2021 ដើម្បីជួយដល់ប្រជាជនយ៉ាងតិច 20% នៅក្នុងបណ្ដាប្រទេសដែលបានចូលរួមជាមួយអង្គការនេះ។ បច្ចុប្បន្ន មានប្រទេសជាង 198 ដែលបានចុះឈ្មោះចូលរួមជាមួយនឹងអង្គការ COVAX ដោយរួមមានទាំងបណ្ដាប្រទេសអ្នកមានផងដែរ។

ក្រៅពីនេះ ក្ដីសង្ឃឹមមួយផ្សេងទៀតដែលបណ្ដាប្រទេសក្រីក្រអាចរង់ចាំ នោះគឺការផ្ដល់ជំនួយវ៉ាក់សាំងពីបណ្ដាប្រទេសអ្នកមានដែលពួកគេប្រើប្រាស់វ៉ាក់សាំងមិនអស់។ ក៏ប៉ុន្តែ ក្រុមអ្នកជំនាញយល់ថា ក្ដីសង្ឃឹមនេះ ពិតជាស្ដួចស្ដើងខ្លាំងណាស់៕

ប្រភព៖ Nature

December 3, 2020

តំណាងរាស្ត្ររួមនឹងមន្ត្រីជាន់ខ្ពស់ជាច្រើនរូបរបស់រុស្ស៊ី បានឆ្លងCOVID-19 ខណៈអ្នកជំងឺសរុបក្នុងប្រទេសនេះកើនលើស290,000នាក់

តំណាងរាស្ត្រជាច្រើនរូបរបស់សហព័ន្ធរុស្ស៊ី ត្រូវបានធ្វើតេស្តរកឃើញថា មានផ្ទុកមេរោគCOVID-19 នៅពេលប្រទេសនេះបានក្លាយជាសម្បុកមេរោគធំជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក។

ជំនួយការផ្ទាល់របស់ប្រធានសភាជាន់ទាប(State Duma) របស់រុស្ស៊ី កាលពីថ្ងៃទី18ឧសភាបានបញ្ជាក់ថា ក្នុងចំណោមតំណាងរាស្ត្រទាំង450រូបរបស់សភាជាន់ទាប មាន6រូបត្រូវបានរកឃើញថាមានផ្ទុកវីរុសកូរ៉ូណា។

នាយករដ្ឋមន្ត្រីរុស្ស៊ី លោក Mikhail Mishustin

Anastasia Kashevarova ដែលជាជំនួយការរបស់ប្រធានសភាជាន់ទាបរុស្ស៊ី ថ្លែងថា “គិតមកដល់បច្ចុប្បន្ន តំណាងរាស្ត្រ6រូបរបស់សភាជាន់ទាប ទទួលបានលទ្ធផលវិជ្ជមានជាមួយនឹងវីរុសCOVID-19។ តំណាង2រូបត្រូវបានអនុញ្ញាតឱ្យចេញពីមន្ទីរពេទ្យ ចំណែក2រូបកំពុងទទួលការព្យាបាលក្នុងមន្ទីរពេទ្យ និង2រូបផ្សេងទៀតកំពុងបង្ខាំងខ្លួននិងទទួលការព្យាបាលនៅឯផ្ទះរៀងៗខ្លួន”។

អ្នកនាំពាក្យរបស់វិមានក្រឹមឡាំង លោក Dmitry Peskov

មន្ត្រីជាន់ខ្ពស់ជាច្រើនរូបរបស់រដ្ឋាភិបាលរុស្ស៊ី ក៏បានឆ្លងវីរុសកូរ៉ូណាក្នុងអំឡុងពេលចុងក្រោយនេះ ក្នុងនោះក៏មាននាយករដ្ឋមន្ត្រី (Mikhail Mishustin) អ្នកនាំពាក្យរបស់វិមានក្រឹមឡាំង (លោក Dmitry Peskov) រដ្ឋមន្ត្រីក្រសួងវប្បធម៌ (លោកស្រី Olga Lyubimova) រដ្ឋមន្ត្រីក្រសួងវិទ្យាសាស្ត្រនិងអប់រំជាន់ខ្ពស់ (លោក Valery Falkov) រដ្ឋមន្ត្រីក្រសួងសំណង់និងលំនៅដ្ឋាន (លោក Vladimir Yakushev) និងអនុរដ្ឋមន្ត្រីក្រសួងសំណង់និងលំនៅដ្ឋាន (លោក Dmitry Volkov)។

រដ្ឋមន្ត្រីក្រសួងវប្បធម៌ លោកស្រី Olga Lyubimova

រដ្ឋមន្ត្រីក្រសួងវិទ្យាសាស្ត្រនិងអប់រំជាន់ខ្ពស់ លោក Valery Falkov

រដ្ឋមន្ត្រីក្រសួងសំណង់និងលំនៅដ្ឋាន លោក Vladimir Yakushev

អនុរដ្ឋមន្ត្រីក្រសួងសំណង់និងលំនៅដ្ឋាន លោក Dmitry Volkov

ក្នុងសប្ដាហ៍កន្លង រុស្ស៊ីបានលោតរំលងអេស្ប៉ាញ និងអ៊ីតាលី ក្លាយជាសម្បុកមេរោគធំជាងគេទី2នៅក្នុងពិភពលោក ដោយមានអ្នកជំងឺCOVID-19 សរុប 290,678នាក់ ក្នុងនោះមានអ្នកស្លាប់សរុប2,722នាក់។ កាលពីម្សិលមិញ ប្រទេសនេះក៏បានរកឃើញអ្នកជំងឺថ្មីចំនួន8,926នាក់ផងដែរ៕

ប្រភព៖សារព័ត៌មានបរទេស

May 19, 2020

ជិត3.6លាននាក់ឆ្លងវីរុសCOVID-19 នៅទូទាំងពិភពលោក ក្នុងនោះមាន9ប្រទេសដែលមានអ្នកជំងឺលើសពី100,000នាក់

វីរុសCOVID-19 បានបង្កឱ្យមនុស្សស្លាប់យ៉ាងតិច248,000នាក់ ក្នុងចំណោមអ្នកជំងឺជិត3.6លាននាក់នៅក្នុងសកលលោកទាំងមូល។

ប្រទេស និងដែនដីចំនួន212ក្នុងពិភពលោក គិតមកដល់ថ្ងៃនេះ មានមនុស្សយ៉ាងតិច3,561,887នាក់បានឆ្លងមេរោគកូរ៉ូណាថ្មី ក្នុងនោះមានអ្នកជំងឺ248,084នាក់បានស្លាប់។ ពិភពលោកថ្ងៃនេះក៏បានរកឃើញអ្នកជំងឺថ្មី83,735នាក់ និងអ្នកស្លាប់ថ្មីចំនួន3,623នាក់។ ចំនួនអ្នកជំងឺដែលបានជាសះស្បើយ បានឡើងដល់1,152,993នាក់។ នេះបើតាមទំព័រ WorldoMeters។

ទ្វីបអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,290,469នាក់ អាមេរិកខាងត្បូងមាន211,800នាក់ ទ្វីបអឺរ៉ុបមាន1,447,503នាក់ ទ្វីបអាស៊ីមាន558,496នាក់ និងទ្វីបអាហ្វ្រិកមាន45,380នាក់។

សហរដ្ឋអាមេរិកក៏នៅតែជាសម្បុកមេរោគកូរ៉ូណាថ្មី ធំបំផុតក្នុងសកលលោក ដោយមានអ្នកជំងឺសរុប1,187,035នាក់ កើន26,261នាក់ធៀបនឹងម្សិលមិញ។ ប្រទេសនេះក៏មានអ្នកស្លាប់ថ្មីចំនួន1,115នាក់ ធ្វើឱ្យតួលេខនៃអ្នកស្លាប់សរុបដោយសារ COVID-19 កើនដល់68,559នាក់។

ចំណែកអេស្ប៉ាញវិញ មានអ្នកជំងឺកូរ៉ូណាសរុប247,122នាក់ ខណៈប្រទេសអ៊ីតាលីមាន210,717នាក់ អង់គ្លេសមាន186,599នាក់ បារាំងមាន168,693នាក់ អាល្លឺម៉ង់មាន165,664នាក់ ទួរគីមាន126,045នាក់ រុស្ស៊ីមាន134,687នាក់ និងប្រេស៊ីលមាន101,147នាក់។ ក្រៅពីនេះ គឺជាបណ្ដាប្រទេសដែលមានអ្នកជំងឺCOVID-19 ក្រោម100,000នាក់៕

ប្រភព៖ សារព័ត៌មានបរទេស

May 4, 2020

សហរដ្ឋអាមេរិក៖ អ្នកឆ្លងCOVID-19 កើនដល់ជិត1,159,000នាក់ ខណៈរដ្ឋខ្លះបើកដំណើរការសេដ្ឋកិច្ចឡើងវិញស្ទើរតែ100%

សហរដ្ឋអាមេរិកគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 1,158,881នាក់ កើន27,851ធៀបនឹងម្សិលមិញ។ អ្នកជំងឺដែលបានបាត់បង់ជីវិតនៅក្នុងប្រទេសនេះ បានកើនឡើងដល់ 67,293នាក់ ក្នុងនោះមានអ្នកស្លាប់ថ្មី1,540នាក់បន្ថែមទៀត។ អ្នកជំងឺដែលបានជាសះស្បើយ មានចំនួន160,705នាក់។

New York គឺជារដ្ឋដែលទទួលរងផលប៉ះពាល់ច្រើនបំផុតពីCOVID-19នៅសហរដ្ឋអាមេរិក។ រដ្ឋនេះ មានអ្នកជំងឺសរុប319,213នាក់ កើន3,991នាក់បើធៀបនឹងម្សិលមិញ(2ឧសភា) ចំណែកអ្នកស្លាប់ថ្មីដោយសារវីរុសកូរ៉ូណានៅ New York មានចំនួន299នាក់ នាំឱ្យអ្នកស្លាប់សរុបក្នុងរដ្ឋនេះកើនដល់24,368នាក់។

រដ្ឋនៅសហរដ្ឋអាមេរិកប្រមាណជាពាក់កណ្ដាល បានបន្ធូរបន្ថយការរឹតត្បិតលើកការដើរហើរចាប់ពីថ្ងៃទី1ឧសភា ខណៈដែលតួលេខនៃករណីឆ្លងវីរុសបានថយចុះ ឬនៅថេរ។ រដ្ឋ Texas បានអនុញ្ញាតឱ្យក្រុមហ៊ុន អាជីវកម្មនានាដំណើរការឡើងវិញទៅតាមផ្នែកដែលអាចធ្វើបាន ក្នុងពេលដែលហាងលក់រាយ និងមជ្ឈមណ្ឌលពាណិជ្ជកម្មបានបើកឡើងវិញក្នុងទំហំ25%នៃលទ្ធភាព។ នៅឯរដ្ឋ Georgia ក្រុមហ៊ុន អាជីវកម្មស្ទើរតែទាំងអស់ត្រូវបានអនុញ្ញាតឱ្យបើកដំណើរការឡើងវិញ៕

ប្រភព៖ សារព័ត៌មានបរទេស

May 3, 2020

អាជ្ញាធរក្រុងនីវយ៉កចាប់ផ្ដើមស៊ើបអង្កេត ក្រោយរកឃើញសាកសពស្អុយរលួយជាងកន្លះរយនាក់ គរពេញក្នុងរថយន្តដឹកទំនិញ បញ្ចេញក្លិនស្អុយពេញទីក្រុង

ក្រុមអាជ្ញាធរទីក្រុងនីវយ៉ក កាលពីថ្ងៃព្រហស្បតិ៍(ទី30មេសា) បានបើកការស៊ើបអង្កេតជាផ្លូវការ 1ថ្ងៃក្រោយពីប៉ូលិសបានរកឃើញសាកសពជាងកន្លះរយនាក់ស្ថិតក្នុងសភាពហើមរលួយ បញ្ចេញក្លិនស្អុយពេញក្នុងរថយន្តដឹកទំនិញ និងរថយន្តទេសចរណ៍(ឡានតួរីស) ដែលចតចោលនៅក្នុងបរិវេណផ្នែកខាងមុខកន្លែងប្រកបពិធីបុណ្យមួយកន្លែង ក្រោមស្ថានការណ៍វិបត្តិឆ្លងរាតត្បាតរបស់មេរោគវីរុសកូវីដ-19។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានAFP។

បណ្ដាក្រុមអាជ្ញាធរ បានប្រទះឃើញទិដ្ឋភាពដ៏គួរឱ្យភ្ញាក់ផ្អើលនេះកាលពីថ្ងៃពុធ(ទី29មេសា) ក្រោយពីពួកអ្នកស្រុកបានប្ដឹងទៅអាជ្ញាធរអំពីក្លិនស្អុយគម្រង់ ដែលសាយភាយចេញមកពីរថយន្តទាំង 2គ្រឿង ដែលចតនៅក្នុងបរិវេណផ្នែកខាងមុខកន្លែងប្រកបពិធីបុណ្យសព Andrew T.Cleckley ក្នុងតំបន់ប្រ៊ូគ្លីន រដ្ឋនីវយ៉ក។

“យើងកំពុងតែស៊ើបអង្កេតលើរឿងនេះ” លោក ហាវើដ សាក់ឃើរ គណៈកម្មការសាធារណៈសុខាភិបាលនៃរដ្ឋនីវយ៉ក បានប្រាប់ទៅអ្នកយកព័ត៌មាន ព្រមទាំងបានបញ្ជាក់ទៀតថា ខាងក្រសួងរបស់លោក មិនដែលបានទទួលពាក្យបណ្ដឹងណាមួយដែលពាក់ព័ន្ធនឹងកន្លែងប្រកបពិធីបុណ្យសពមួយនេះឡើយ តាំងពីដើមមក។

តាមរយៈការត្រួតពិនិត្យរយៈដំបូងរបស់ក្រុមអាជ្ញាធរ បានរកឃើញថា ប្រព័ន្ធម៉ាស៊ីនត្រជាក់នៅក្នុងបន្ទប់ក្លាស្សេនៅផ្នែកខាងក្រោយរបស់រថយន្តដឹកសាកសពទាំង 2គ្រឿងនោះមិនដំណើរការ ទើបធ្វើឱ្យសាកសពដែលត្រូវបានផ្ទុកនៅក្នុងនោះស្ថិតក្នុងស្ថានភាពគ្មានធាតុត្រជាក់ រហូតធ្វើឱ្យកើតមានក្លិនសាកសពសាយភាយចេញមកក្នុងអំឡុងពេលរង់ចាំនាំយកទៅប្រកបពិធីបញ្ចុះតាមសាសនា ខណៈដែលកន្លែងប្រកបពិធីបុណ្យសពនានានៅក្នុងទីក្រុងនីវយ៉កស៊ីធី ត្រូវទទួលរងបន្ទុកដ៏ធ្ងន់ធ្ងរក្នុងការចាត់ការសាកសពក្នុងចំនួនដ៏ច្រើន ដែលបានស្លាប់ដោយសារការឆ្លងមេរោគកូវីដ-19។

លោក ប៊ីល ដឺ ប្លាស៊ីអូ អភិបាលក្រុងនីវយ៉ក បានបញ្ជាក់ថា ការប្រតិបត្តិលើអ្នកស្លាប់របៀបនេះ គឺជារឿងដែលមិនអាចទទួលយកបានឡើយ។ លោកនិយាយថា “ទីកន្លែងប្រកបពិធីបុណ្យសព ត្រូវមានតួនាទីប្រតិបត្តិចំពោះសាកសពយ៉ាងមានកិត្តិយស”។

ចំណែកលោក Andrew Cleckley ដែលជាម្ចាស់កន្លែងប្រកបពិធីបុណ្យសពនោះ បានប្រាប់សារព័ត៌មាននីវយ៉ក ថាមស៍ថា ដូចជាអ្នកចាត់ការសាកសពដទៃទៀតទូទាំងទីក្រុងដែរ លោកត្រូវជួបនឹងចំនួនសាកសពដ៏ច្រើនហូរហៀរក្នុងអំឡុងការឆ្លងរាលដាលនៃមេរោគកូវីដ-19 ដូច្នេះហើយទើបយើងត្រូវប្រើរថយន្ត ផ្ទុកសាកសពដែលលើសចំណុះរបស់កន្លែងប្រកបពិធីរបស់យើងទុកមួយរយៈសិន ដោយសារតែក្នុងអំឡុងពេលនេះ កន្លែងប្រកបពិធីបុណ្យសពរបស់យើង ពេញហូរហៀរដោយសាកសពជាង 100សាកសពទៅហើយ។ លោកបន្ថែមថា “ខ្ញុំលែងមាននៅសល់កន្លែងសម្រាប់បញ្ចុះសាកសពទៀតហើយ”។

សារព័ត៌មាននៅក្នុងសហរដ្ឋអាមេរិក បានរាយការណ៍ដោយយោងលើប្រភពព័ត៌មានដែលបានបញ្ជាក់ថា មានសាកសពប្រមាណជា 60 ស្ថិតនៅក្នុងរថយន្តទាំង 2គ្រឿងនោះ។

មេរោគវីរុសកូរ៉ូណាប្រភេទថ្មីនេះ បានប្រហារជីវិតមនុស្សនៅក្នុងទីក្រុងនីវយ៉ករួចហើយចំនួនជាង 18,000នាក់ ក្នុងអំឡុងពេលមិនដល់ 2ខែផង ខណៈដែលដែនដីមួយនេះបានរងផលប៉ះពាល់ពីមេរោគកូវីដ-19 ធ្ងន់ធ្ងរជាងគេបំផុតនៅក្នុងប្រទេសអាមេរិក។

មានរបាយការណ៍ថា រោងតម្កល់សព, វាលបញ្ចុះសពទូទាំងទីក្រុងនីវយ៉ក សុទ្ធតែជួបនឹងបញ្ហាធ្ងន់ធ្ងរក្នុងការទប់ទល់នឹងចំនួនអ្នកស្លាប់ដែលកើនឡើងយ៉ាងលឿន បណ្ដាលឱ្យរថយន្តដឹកសាកសពដែលមានម៉ាស៊ីនត្រជាក់ បានក្លាយជារឿងមួយដែលគេមើលឃើញជាទូទៅនៅផ្នែកខាងក្រៅនៃមន្ទីរពេទ្យនានា ដែលពេញណែនដោយអ្នកជំងឺកូវីដ-19៕

ប្រភពៈ សារព័ត៌មានបរទេស

May 2, 2020

ទៀតហើយ! រដ្ឋមន្ត្រី និងអនុរដ្ឋមន្ត្រីរបស់រុស្ស៊ី ចូលមន្ទីរពេទ្យដោយសារ COVID-19

រយៈពេល1ថ្ងៃ បន្ទាប់ពីនាយករដ្ឋមន្ត្រីរុស្ស៊ី លោក Mishustin បានប្រកាសថាខ្លួនបានឆ្លងវីរុសកូរ៉ូណាថ្មី រដ្ឋមន្ត្រីក្រសួងសំណង់និងលំនៅដ្ឋានរបស់ប្រទេសរុស្ស៊ី គឺលោក Yakushev ក៏បានចូលសម្រាកព្យាបាលនៅមន្ទីរពេទ្យកាលពីម្សិលមិញ ដោយសារបានឆ្លងវីរុសCOVID-19។

“ខ្ញុំកំពុងទទួលការព្យាបាលក្រោមការតាមដានរបស់ក្រុមវេជ្ជបណ្ឌិតនៅម៉ូស្គូ” រដ្ឋមន្ត្រីក្រសួងសំណង់និងលំនៅដ្ឋាន លោក Vladimir Yakushev បានប្រាប់ Interfax កាលពីថ្ងៃទី1ឧសភាបែបនេះ។

មន្ត្រីក្រោមឱវាទរបស់រដ្ឋមន្ត្រី Yakushev គឺលោកអនុរដ្ឋមន្ត្រី Dmitry Volkov ក៏បានចូលព្យាបាលនៅមន្ទីរពេទ្យ ព្រោះតែបានឆ្លងវីរុសកូរ៉ូណានេះដែរ។ អនុរដ្ឋមន្ត្រីនៃក្រសួងសំណង់និងលំនៅដ្ឋាន លោក Nikita Stasishin ត្រូវបានតែងតាំងជារដ្ឋមន្ត្រីស្ដីទីនៃក្រសួងមួយនេះ ជំនួសឱ្យលោក Yakushev។

Yakushev គឺជាមន្ត្រីជាន់ខ្ពស់ទី2របស់រុស្ស៊ី ដែលបានឆ្លងវីរុសCOVID-19។ នាយករដ្ឋមន្ត្រីរុស្ស៊ី លោក Mikhail Mishustin កាលពីថ្ងៃទី30មេសា បានប្រកាសថា លោកបានឆ្លងវីរុសកូរ៉ូណា និងកំពុងបង្ខាំងខ្លួនដាច់ដោយឡែកដើម្បីការពារការឆ្លងរាលដាលទៅអ្នកផ្សេង។ ឧបនាយករដ្ឋមន្ត្រីទី1 លោក Andrei Belousov ត្រូវបានប្រធានាធិបតី Vladimir Putin តែងតាំងជានាយករដ្ឋមន្ត្រីស្ដីទី។

ប្រទេសរុស្ស៊ី គិតមកដល់បច្ចុប្បន្ន មានអ្នកជំងឺCOVID-19សរុប ជាង114,000នាក់ ឈរលំដាប់ទី8ក្នុងពិភពលោក ក្នុងនោះមានអ្នកជំងឺជាង1,100នាក់បានបាត់បង់ជីវិត ដែលភាគច្រើននៅរដ្ឋធានីម៉ូស្គូ និងទីក្រុង St. Petersburg។ ប្រទេសនេះ បានធ្វើតេស្តរកមេរោគកូរ៉ូណា ប្រមាណជា3.7លានលើក៕

ប្រភព៖ សារព័ត៌មានបរទេស

May 2, 2020

មនុស្សជាង239,000នាក់បានស្លាប់ដោយសារ COVID-19 នៅទូទាំងពិភពលោក

សកលលោកទាំងមូលមានអ្នកស្លាប់ជាង239,000នាក់នៅក្នុងចំណោមអ្នកជំងឺCOVID-19 ជិត3.4លាននាក់ ខណៈដែលប្រទេសជាច្រើនបានចាប់ផ្ដើមដកបម្រាមគោចរ ឬបន្ធូរបន្ថយការរឹតត្បិតលើការដើរហើរ។

ទិន្នន័យនៅលើ Worldometers ដែលជាគេហទំព័រផ្ដល់ស្ថិតិទាន់ហេតុការណ៍ស្ដីអំពីតួលេខអ្នកជំងឺCOVID-19 បង្ហាញថា នៅទូទាំងពិភពលោក មានមនុស្សប្រមាណជា3,395,780នាក់បានឆ្លងវីរុសកូរ៉ូណា និង239,350នាក់បានស្លាប់ដោយសារវីរុសនេះ។ អ្នកជំងឺកើន146,113នាក់ និងអ្នកស្លាប់កើន6,414នាក់ បើធៀបជាមួយនឹងម្សិលមិញ។ អ្នកជំងឺដែលបានជាសះស្បើយមានចំនួន1,079,557នាក់។

នៅទ្វីបអឺរ៉ុប តួលេខនៃអ្នកជំងឺCOVID-19 បានឡើងដល់ 1,399,063នាក់ ខណៈអាមេរិកខាងជើងមានអ្នកជំងឺ1,226,668នាក់ ទ្វីបអាស៊ីមាន533,842នាក់ អាមេរិកខាងត្បូងមាន190,099នាក់ និងទ្វីបអាហ្វ្រិកមានអ្នកជំងឺតិចជាងគេ គឺ41,537នាក់។

បណ្ដាប្រទេសដែលមានអ្នកស្លាប់ដោយសារវីរុសCOVID-19 លើសពី20,000នាក់ រួមមាន5ប្រទេស៖

1.សហរដ្ឋអាមេរិក៖ អ្នកស្លាប់សរុប 65,753នាក់ និងអ្នកជំងឺសរុប 1,131,030នាក់។
2.អ៊ីតាលី៖ អ្នកស្លាប់សរុប 28,236នាក់ និងអ្នកជំងឺសរុប 207,428នាក់។
3.អង់គ្លេស៖ អ្នកស្លាប់សរុប 27,510នាក់ និងអ្នកជំងឺសរុប 177,454នាក់់។
4.អេស្ប៉ាញ៖ អ្នកស្លាប់សរុប 24,824នាក់ និងអ្នកជំងឺសុរប 242,988នាក់
5.បារាំង៖ អ្នកស្លាប់សរុប 24,594នាក់ និងអ្នកជំងឺសរុប 167,346នាក់

ប្រភព៖ សារព័ត៌មានបរទេស

May 2, 2020

កូរ៉េខាងត្បូង៖ ជាលើកដំបូងដែលមិនមានករណីឆ្លងCOVID-19ថ្មីក្នុងស្រុក ក្រោយចំណាយពេលអស់2ខែក្នុងការធ្វើ “សង្គ្រាមជីវសាស្ត្រ”

កូរ៉េខាងត្បូងថ្ងៃនេះ បានប្រកាសថា រកឃើញអ្នកជំងឺថ្មីចំនួន4ករណីបន្ថែមទៀត ប៉ុន្តែទាំងនេះសុទ្ធតែជាអ្នកជំងឺ “នាំចូល” (អ្នកជំងឺមកពីបរទេស) ដូច្នេះ ថ្ងៃនេះគឺជាលើកដំបូងហើយដែលកូរ៉េខាងត្បូងមិនមានករណីឆ្លងវីរុសកូរ៉ូណានៅក្នុងស្រុក រាប់ចាប់ពីថ្ងៃទី29មីនាមកដល់បច្ចុប្បន្ន។

មជ្ឈមណ្ឌលគ្រប់គ្រង និងទប់ស្កាត់ជំងឺរបស់កូរ៉េខាងត្បូង KCDC (Korea Centers for Disease Control and Prevention) ថ្ងៃនេះក៏បានឱ្យដឹងថា តួលេខសរុបនៃអ្នកបានឆ្លងវីរុសCOVID-19 ក្នុងប្រទេសនេះ កើនឡើងដល់10,765នាក់ ក្នុងនោះមាន247នាក់បានស្លាប់។ អ្នកស្លាប់កើន1ករណីបើធៀបនឹងម្សិលមិញ។

KCDC បានឱ្យដឹងដែរថា អ្នកជំងឺថ្មីចំនួន4ករណីនេះ ក៏ជាតួលេខទាបបំផុតក្នុងអំឡុង2ខែមកនេះ។ អ្នកជំងឺCOVID-19 ដែលបានជាសះស្បើយនៅកូរ៉េខាងត្បូង មានចំនួន9,059នាក់។

បើទោះបីជាមានសញ្ញាបង្ហាញថា COVID-19 កំពុងថមថយកម្លាំងហើយក្ដី ប៉ុន្តែមន្ត្រីសុខាភិបាលកូរ៉េខាងត្បូងនៅតែបង្ហាញការប្រុងប្រយ័ត្នខ្ពស់ ខណៈដែលទិវាពលកម្មអន្តរជាតិ(1ឧសភា) និងទិវាកុមារកូរ៉េ(5ឧសភា) ជិតចូលមកដល់៕

ប្រភព៖ សារព័ត៌មានបរទេស

April 30, 2020

Tag: កូវីដ ១៩